አትሮኖስ

ክሪስ የእውነት ያስደነገጠኝን አንድ ነገር አደረገ፡ ትልቅ ስጋ በሹካ ያዘና
ሙሉውን ወዳፉ ከተተው ምን ነክቶታል!

“እንደዚያ አትብላ ክሪስ። ለልጆቹ መጥፎ ምሳሌ ትሆናለህ” አልኩት።

በአፉ ሙሉ ምግብ እንደያዘ “እነሱ እያዩኝ አይደለምº በዚያ ላይ እርቦኛል።በህይወቴ እንደዚህ ርቦኝ አያውቅም: ምግቡ ደግሞ በጣም ይጣፍጣል” አለ፡

እኔ በመቀማጠል አይነት በትንሹ ቆረጥኩና አፌ ውስጥ ከተትኩ። እግረ መንገዴን በትክክል የሚበላው እንዴት እንደሆነ እያሳየሁት ነበር በመጀመሪያ
ዋጥኩኝና “ለምታገባት ሚስት አዘንኩላት፡ በአመት ውስጥ ትፈታሀለች " አልኩት።

ከመደሰት በቀር ለሁሉም ነገር ዲዳና ደንቆሮ ሆኖ መብላቱን ቀጠለ፡

“ካቲ… ክሪስ ላይ ክፉ አትሁኝበት፤ እኛም ቀዝቃዛ ምግብ ስለማንወድ መብላት ስለማንፈልግ ነው:: አለች ኬሪ

“ሚስቴ በጣም ትወደኛለች፤ የቆሸሹ ካልሲዎቼን ማንሳት ያስደስታታል።

ኬሪ፣ አንቺና ኮሪም ቀዝቃዛ ምግብ ትበላላችሁ:"

ምግቡ አልቆ ጠረጴዛውን ማፅዳት ስጀምር ክሪስ ያግዘኝ ጀመር፡ ላምን አልቻልኩም! በመረታት አይነት ፈገግ አለና ጉንጬን ሳመኝ፡ ከዚያ ወደ እኔ መጥቶ ሳህኖችን ሳጥብና ሳደራርቅ ከማገዙ በፊት ካልሲዎቹን ሳይቀር
አነሳ፡ አሪፍ ምግብ አንድን ወንድ እንዲህ ሊያደርግ ከቻለ፣ ምግብ ዝግጅት መማር ያዋጣል።

ክሪስና እኔ ሁሉንም ነገር አፅድተን በንፁህ ፎጣ ሸፍነን ጠረጴዛው ስር አስቀምጠን ከጨረስን ከአስር ደቂቃ በኋላ መንትዮቹ በአንድ ላይ “እርቦናል ሆዳችንን አመመን፡" እያሉ ጮሁ።

ክሪስ ወንበሩ ላይ ተቀምጦ እያነበበ ነበር፡ እኔም ጋደም ብዬ ከማነብበት ተነሳሁና ምንም ሳልናገር በለውዝ ቅቤ ሳንድዊች ሰርቼ ሰጠኋቸው።

ወለሉ ላይ ተቀምጠው እየበሉ ሳለ ራሴን አልጋ ላይ ወረወርኩና ግራ በመጋባት ተመለከትኳቸው፡ እንዴት ይህንን የማይረባ ምግብ ወደዱት? ወላጅ መሆን ለካ እገምተው እንደነበረው ቀላል ወይም ደስ የሚል አይደለም።

“ኮሪ ወለሉ በጣም ይቀዘቅዛል ወለሉ ላይ አትቀመጥ።” አልኩት።

በሚቀጥለው ቀን ኮሪን ሀይለኛ ብርድ አመመው: ትንሽዋ ፊቱ ፍም መስላ በጣም ያቃጥላል ሰውነቱን ሁሉ እያመመው እንደሆነ ተናገረ ካቲ እናቴ የታለች? እውነተኛዋ እናቴ?” እናቱን ነው የፈለገው: በመጨረሻ መጣች።
ወዲያውኑ የኮሪን የጋለ ፊት ስትመለከት ፈጠን ብላ የሰውነት ሙቀት መለኪያ አመጣች: ደስ ሳይላት የምታስጠላውን አያታችንን ተከትላ ዞር
አለች::

ኮሪ የሙቀት መለኪያውን አፉ ውስጥ እንደያዘ በጭንቀቱ ጊዜ ልታድነው የመጣች ወርቃማ መልአክ ትመስል እናቱን አተኩሮ እየተመለከተ ነበር።የእናትነት ቦታ ተክታ የነበረችው ግን ተረሳች:

“የምወድህ ውዱ ልጄ” እሹሩሩ ልትለው ከአልጋው ላይ አንስታ አቅፋው የሚወዛወዘው ወንበር ላይ ተቀመጠችና ቅንድቦቹን እየሳመች “አለሁልህ የኔ ልጅ እወድሀለሁ እንከባከብህና ህመምህን እናጠፋዋለን፡ እንደ ጎበዝ ልጅ ምግብህን ብላ፣ የብርቱካን ጭማቂህንም ጠጣ ከዚያ ቶሎ ትድናለህ" አለችው::

እንደገና አልጋ ላይ አስተኛችውና አስፕሪንና ውሀ ሰጥታው እንዲውጥ አደረገች: ሰማያዊ አይኖቿ በእምባ ረጥበዋል። ቀጫጭን እጆቿ በደመነፍስ
ይሰራሉ፡ አይኖቿን ጨፍና ፀሎት የምታደርግ ይመስል ከንፈሮቿ ሲንቀሳቀሱ እያየሁ ነው።

ከሁለት ቀናት በኋላ ኬሪም ከኮሪ አጠገብ አልጋ ላይ ሆነች: እሷም
እያስነጠሰችና እያሳላች የሰውነቷ ሙቀት በሚያስፈራ መጠን ከፍ አለ፡ ክሪስም የፈራ ይመስላል ፍዝዝ ብለውና ገርጥተው ሁለቱም ትልቁ አልጋ ላይ ጎን ለጎን ተኝተዋል።

ከሸክላ የተሰሩ ይመስሉ ነበር፡ ሰማያዊ አይኖቻቸው ወደ ውስጥ እየጎደጎዱ በመሄዳቸው ትልቅ መሰሉ: አይኖቻቸው ስር ጥቁር ጥላ አጠላባቸው እናታችን አጠገባችን በሌለች ጊዜ አይኖቻቸው በፀጥታ እኔና ክሪስ ላይ ተተክለው የሆነ ነገር እንድናደርግና ስቃያቸውን ማጥፋት እንድንችል ይማፀኑናል፡

እናታችን ከትምህርት ቤቷ ተመልሳ ከልጇ ጋር ለመሆን ሳምንት ወሰደባት በጣም ያስጠላኝ ነገር አያትየው እናታችን በመጣች ቁጥር ተከትላ የመምጣቷ አስፈላጊነት ነው ሁልጊዜ አፍንጫዋን በማያገባት ቦታ መክተት፣ የእሷን ምክር የማንፈልግበት ጊዜ ላይ ምክር መስጠት ትወዳለች አስቀድማ
እንዳልተፈጠርን፣ እግዚአብሔር በፈጠራትና እንደሷ ፃድቅና ንፁህ ለሆኑ ያዘጋጃት ምድር ላይ በህይወት ለመኖር መብት እንደሌለን ነግራናለች።
የምትመጣው የበለጠ ልታሰቃየንና እናታችንን ለራሳችን በማድረጋችን ያገኘነውን ምቾት ለመንጠቅ ነው።

የግራጫ ቀሚሷ መንኮሻኮሽ፣ ድምፅዋ፣ የከባድ እግሮቿ እርምጃ ድምፅ፣በአልማዝ ቀለበቶች የተንቆጠቆጡ፣ ቡናማ ነጠብጣብ የሞላባቸው የገረጡ፣
ለስላሳ፣ ወፍራምና ትልልቅ እጆቿ! አምላኬ እሷን ማየት እጅግ ያሰለቻል፡

ከዚያ እናታችን በአብዛኛው እየፈጠነች ትመጣና መንትዮቹን ወደ ጤንነታቸው ለመመለስ የቻለችውን ሁሉ ታደርጋለች: ለመንትዮቹ መጀመሪያ አስፕሪንና
ውሀ፣ በኋላ ደግሞ የብርቱካን ጭማቂና ትኩስ የዶሮ ሾርባ ሰጠቻቸው።

አንድ ጠዋት እናቴ ራሷ ጨምቃ ያዘጋጀችው የብርቱካን ጭማቂ የያዙ ሁለት ትልልቅ ፔርሙዞች ይዛ መጣች: “ከቀዘቀዘው ወይም በቆርቆሮ ከታሸገው ይሻላል፤ በቫይታሚን ሲ እና ኤ የተሞላ ስለሆነ ለብርድ በጣም ጥሩ ነው::” ስትል አብራራችልን፡፡ ከዚያ እኔና ክሪስ ቶሎ ቶሎ የብርቱካን ጭማቂውን እንድንሰጣችው ነገረችን፡

እናታችን ከኬሪ ከንፈሮች ላይ ያነሳችውን የሙቀት መለኪያ ስትመለከት ደነገጠች: “አምላኬ! ወደ ዶክተር ልወስዳት ይገባል፡ ወደ ሆስፒታል!”

አያትየውን አየት አደረግኳት፤ ለዚህ ነገር ያላትን ምላሽ ማወቅ እየሞከርኩ ነው: አያትየው ለእንደዚህ አይነት ከቁጥጥር ውጪ መሆንና መርበትበት
ምንም ትዕግስት አልነበራትም “ሞኝ አትሁኚ ኮሪን: ልጆች ሁሉ ሲያማቸው ትኩሳት ይኖራቸዋል ምንም ማለት አይደለም አሁን ያንን ማወቅ አለብሽ ብርድ በቃ ብርድ ነው” አለች

ክሪስ ከሚያነበው መፅሀፍ ላይ ጭንቅላቱን ቀና አደረገ:፡ መንትዮቹ ኢንፍሉዌንዛ
ይዟቸው እንደሚሆን አምኗል: ያልገባው ቫይረሱን ከየት እንዳገኙት ነው::

አያትየው ቀጠለች “ዶክተሮች ብርድን ስለማዳን ምን ያውቃሉ? እኛ ብዙ እናውቃለን፡፡ ማድረግ የሚያስፈልጉ ሶስት ነገሮች አሉ᎓ አልጋ ውስጥ መቆየት፣
ብዙ ፈሳሽ መጠጣትና አስፕሪን መውሰድ ሌላ ምን ያስፈልጋል? እና እነዚያን ነገሮች ሁሉ አላደረግንም?” በክፉ አይን ተመለከተችኝና “እግሮችሽን
ማወዛወዝ አቁሚ አንቺ! እየረበሽኝ ነው:" አለች እንደገና አይኖቿንም፣
ቃላቶቿንም ወደ እናታችን መለሰች ለእናታችንም “ብርድ ለመያዝ ሶስት ቀን ህመሙ ሶስት ቀን ይቆያል በሶስት ቀን ውስጥም ይለቃል” አለች

“ኢንፍሉዌንዛ ቢሆንስ?” አለ ክሪስ አያትየው ጥያቄውን ችላ ብላ ጀርባዋን አዞረች በጣም አባታችንን ስለሚመስል መልኩን አትወደውም አያትየው እንደገመተችው መንትዮቹ ተሻላቸው፤ ግን በዘጠኝ ቀን ሳይሆን በአስራ ዘጠነኛው ቀን ነበር፡ ደህና የነበሩ ጊዜ ብዙ ጥያቄ የማይጠይቁት
ከታመሙ በኋላ ግን ጥያቄዎች መጠየቅ አበዙ።

የሚያነጫንጯቸውንና የሚያስጨንቋቸውን ነገሮች ሁሉ በቃላት መግለፅ ባለመቻላቸው የፈሩ አይኖቻቸው አስተያየት ልብ የሚያደማ ነበር።

“ለምንድነው ሁልጊዜ እዚህ ፎቅ ላይ የምንሆነው?”

“ምድር ቤቱ ጠፍቷል?"

“ፀሀዩዋ ወደተደበቀችበት ሄዶ ነው?"

“እናታችን ከአሁን ወዲያ አትወደንም?”

“ግድግዳዎቹ ለምንድነው የፈዘዙት?”

👍28🥰1

7.75K viewsአትሮኖስ, 15:17