#غلطتي
(الجزء التاني )
بقلم سحر سمير و فاطمة قسم الله
-٧٢-

#جاها اشعار : [تمت اضافتك الى قروب pandas بواسطة ana lolo] ... نزلت الاشعار من الشاشه و قالت : هئ وووب علي منك يا الاء انتي غير القروبات والفارغ دا م عندك شي ، جابت ليها باندا هه ، كدي النشوف فيهو شنو ..... بعد اتصفحت لمدة تلاته دقايق في القروب ، لقت بوست مكتوب فيهو :
انا بتفق جداً مع فكرة ان الحب بيجي بعد الزواج ، بيقوي العلاقه و بتبدأ مرحلة اكتشاف الطرف الاخر و بكون في انجذاب و فضول انه كل طرف بتعرف على الطرف التاني ، الحب حاجة عظيمة جداً و متأكدة ماف وحدة اتزوجت بطريقه عادية و ما لقت الحب دا ...
بتقول : لمن قريت البوست دا استفزاني شديد ، و ماقدرت امسك نفسي من التعليق : و رديت لـ ست البوست دا و كتبت ليها : مافي حاجة اسمها حب لا بعد الزواج لا قبله ، الزواج دا عبارة عن قنبلة مدمرة لحياة الشباب بعد ما كانت ابسط امانينا اللبس والفسح بقت اقصى طموحاتنا هي ارضاء رغبات شخص اصلا ما مهتم ، ومافي حب بجي بعد الزواج الحب خدعة و الزواج خدعه اكبر .
بعد دقايق ، الاشعارات بقت تطاقش تحت التعليق حقي ، حتى في اتنين اتشاكلو .. عاينت ليهم و ما اهتميت و عملت تسجيل خروج و قفلت اللابتوب .. همي كلو كان في #غياب_ممدوح !

بصراحه -
كنت مستغربة نومتي و ان في راجل نايم جمبي لاول مرة ، و بصراحه لا انا لا هو ما قدرنا ننوم و الاتنين حاسين بكدا بس ما قادرين نواجه بعض .. فاا شلت تلفوني و طلعت برا .. و اتصلت بخالتي #نعمة..
_بسم الله (هتون !!!) خير !!
*كنتي نايمة ولا شنو ؟
_اي والله من طلعتو ختيت راسي دا نمته جسمي دا واجعني و الرجلين ديل ينتحو نتح ، في شنو مالك قلقتيني !!
*من الوقفه والرقيص وضغط اليومين ديل ما هين !
مافي شي بس حبيت اتطمن على يزن لانو متعود ينوم في حضني ...(حسيت بي حركة) !
_لالا هو زاتو مرهق من اللعب نام طوالي ، انتي زاتك امشي اخدي راحتك ...و شوفي راجلك (بي نص ضحكة كدا ) ..
*شهاب نايم يا خالتي نعمة !
_(شهقت وقالت سجمي) كيف ينوم في يوم زي دا !!
*مالك يا خالتي و فيها شنو !
_(تمتمت وسكتت) اا طيب يلا انا نعسانه تصبحي علي خير ..*قفلت ..
بصراحة استغربت في ردة فعل خالتي نعمة ما طبيعيه ماخدة الامور بي ريآكشن زيادة ومهتمة بتفاصيل كدا اكتر مني !!! و اتزكرت ابوي و #ميمونه ااخ .. في حلقة وصل ناقصه و قاطعني #صوت.....

عند نهى -
نهى : موهوب ، في تلفون بيرن ....
موهوب : امسكيها خليني اشوفو ..
*يدها صغيرة شديد ، هي ليه ماخدة وضع البنية في يدها ، بفتح ليها يدها بترجع تلم اصابعها تاني ههه ..(بتتأمل فيها)..
_هووووي دي ما بيلعبو بيها ههه
*رد رد التلفون صرعني ...
_اااي ..لحظة - الوووووووو (وهو طالع من الغرفه و بيقفل الباب )
*موهوب كيفك ؟
_(نزل التلفون من اضانو وعاين في شاشه التلفون ، لقاهو رقم ! ) ارحباااا الف .. منو معاي ؟
*(احم ) ممدوح يا موهوب ، الضابط !!!
_ااااا .. اممممم يا مرحب ! اي عز المعرفه (اتحسس لمن انزكر موقفو معاه يوم جا المستشفى مع هتون)
*مبرووك ما جاكم و يتربى في عزكم (لمن شافهم جارين بي نهى بعد العقد )..
_الله يبارك فيك شكرا.... حصلت صنة !
*موهوب انا عارف ان دمك حار و بتاخد الامور بتسرع ، بس انا محتاج ليك تكون رايق و نتكلم بي منطق ، اذا مافيها ضيق و يمكن اتصالي دا زاتو في وقت ما مناسب لكن والله ما قدرته استنى ! ممكن ؟
_قلقتني ! حاصل شي ؟ البعرفو ان بيهمك امر هتون و هتون خلاص اتزوجت ، تاني في شنو ؟
*اي عارف ..عاررف (قااها بأنكسار) .. انا بس داير اسألك من #نعمة !!
-شنوووووو!!! يا زول انا راجل متزوج و بحب مرتي ، معقول تجي تسألني من مرة ! يا زول مالك انت ..
*اففف موهوب ! ياخ بطل حمقيتك دي ي زول ، شووف يا زول ، نعمة دي ليها علاقه بي هتون و انا بسألك اذا عرفتكم بيها من قريب ولا من بعيد .. ما اكتر من كدا !!
_لا،، ما ركزت في اسم زي دااا ..في شنو ؟؟
*(حس ان فكرة اتصالو بي موهوب كانت غلط وان موهب ما زول اخد و عطا في موضوع زي دا ) لالا مافي شي بس هتون كانت متدينه منها مبلغ ، و قبل نختلف كان خلت لي المبلغ دا و طلبت مني ارجعو ليها و اسي انا احتمال اسافر برا السودان ، فا كنت عايز اعرف بس ..(ساطا ليهو فوق تحت و اتملص من الموضوع .. ) و ودعو وقفل !!
موهوب ما اقتنع ابدااا و كان الموضوع في راسووو !!

(في نفس الممر -غرفه نهى)

نهى : ابوي !! اتكلمت مع هتون ؟
محمد : ايوة
نهى : (عيونها لمعو و فرحت) يعني يا ابوي اخيراً عرفت الحقيقه و ان هتون اتظلمت !! اااخ بس يا ابوي انا من اليوم داك كل مناي بس الم في الحيوان الاسمو مؤمن داا ، كان دخلت بسببو السجن اااخ بس ؟!!
ابوي قام وقف على حيلو ومشى على نهي قاليها :بتقولي في شنو انتي !!!! مؤمن منو ؟؟
امي : !!!!!!!! هتون ما حكت لي سيرتو !!!
ابوي : دقيقه يا فوزية ( ب نهرة ) !! (جا موهوب داخل !!) بتقولي في شنو انتي يا نهى !! (بي هرشه)
نهى : !!! بسم الله في شنو يا ابوي!

#غلطتي
(الجزء الثاني)
بقلم سحر سمير و فاطمة قسم الله
-٨٩-
اما #نسمة اللي ما كانت قادرة تقتنع ان شهاب ما كان قاصد اللي فهمتو و هو ما قدر يقنعها و اكتفى ب انو يلبس و يطلع ..
كل اللي عملو ، اتصل على هتون من غير مقدمات ولا يلام و لا كلام ، انا جاي البيت الجديد خليكي هناك !!
بصراحه كنت مستغربه في شهاب و كلامو المختصر و لا هو اصلا كان كدا و انا اللي ما جايبه ليهو خبر !!
و انا بجهز عشان اطلع ل شهاب ، سمعت ان موهوب جا و قاعد مع ابوي في الصالون ..
اخدت مسافه حتى طلعت من الغرفه .. و انا طالعه لقيت نهى واقفه جمب مدخل الصالون و بتعاين في حتة وحدة وبتها جوا بتبكي م جايبه ليها خبر !!
جيت جمبها ، قلت ليها : نهى !!! نهى !!!!! نهى هيبي يا بت في شنو !! فجاة صوت ابوي كان الجواب لكل تساؤلاتي ! وكان بكورك في موهوب بكلام ما قدرت استنتج منو حاجة ، و بقيت واقفه في مدخل الصالون لا قادرة اقيف جمب نهى ولا قادرة ادخل و انا بين الاتنين !! فجأة جاني صوت نهى قالت لي #موهوب_عرس و دمعتا نزلت !!
انا اتصدمتا ما اتخيلتا ، قلت ليها قلتي شنو !! انتي فاهمه غلط ! اكيد ، و مع دخلتي الصالون سمعت ابوي بقوليهو انا بتي م بجيبو فيها ضُرة!!
رجعت ل نهي اللي كانت تقريباً دخلت الصالون وبقت في نص ابوي وموهوب .. دايرة امسكا و احضنا ، لزتني منها ، قالت لي انا ما مكسورة عشان تحضنيني و تطبطبي علي و تواسيني يا هتون ، عاينت ل موهوب ، قالت ليهو : و الله يا موهوب والله في سماهو ما تكسرني انت و ما تبكيني انت ، ما انا البجيبو فوق راسي ضرة ! و اقولها ليك كلمة يا موهوب ، راجل تمشي مرة دا زاتو ما بينفع معاي ، كل الحصل بينا عشان قسمة الشافعه دي تجي !!
و الكلام بعد حيكون كلام #ابوي
كلامي معاك انتهى و م عندك بت ، تجيني في يوم من الايام تقول لي اشوفهااا بقطع رجلك لـ دربي !!
و مشت دخلت !!!
موهوب : انا سكته احتراماً ليك يا عمي و الا كان ضربتهاا لان دي المرة التانيه نهى تعلى صوتها علي !!
محمد : ورقة بتي تصلني قبل وصولك #الحميراب ، و قبل اداهو ضهرو !!!

انا بقيت واقفه !! ولقيت امي كمان كانت واقفه و مسكنا بعض و ما عارفين البحصل معانا دا شنو ما لاقين السكينة في حياتنا لحظة وحدة كل ما نقول ارتحنا ، ترجع تجوط تاني والحمدلله !!
#قاطعنا : صوت تلفوني ! رديت ..
_ انا مش قلت ليكي اجي القاكي في البيت !!
*مرة الغفير ف البيت حتفتح ليك ! بتكورك مالك ؟
_كلامي واضح يا هتون و مكلمك انا قبل اتحرك من محلي !!
*حصلت ظروف اخرتني و براحه لو سمحته !
_.....*قفل فيني الخط !!!
كنت حاسه ان اسلوب شهاب غريب ومتغير ، بس كنت خاته ليهو عذر بيني و بين نفسي انه ماري بي مرحلة صدمة بخصوص موضوع #ميمونه !!
م كان في يدي في حاجة اسويها غير اني اطلع في الهدوء الحاصل في بيتنا دا ، للحظة حسيت اني ضعيفه و ما لي دور في حياة اختي اللي قبل اليوم دعمتني و ساعدتني و م بنكر موهوب كمان بس كمان اكيد ما حأنحاز لي صفو !!
المهم سقت يزن و طلعنا .. دقايق مشي ، وصلت البيت .. لقيت في دفار عديل مليان عفش راقي قدر ما وصفت ليكم ما حتصدقو ، وقفت بالطرف كدا بعاين ، لقيت في عاملات اظن هو جايبهم مع مرة الغفير زولتنا .. جاني و شكلو كدا كان م طبيعي ، قلت ليهو ازيك وانا مبتسمة مديت ليهو يدي !
سلم لي بطرف يدو و قبل مني !
قلت ليهو : في حاجة حاصله ! بصراحه افتكرت ان الحصل زمان و ميمونه دا حيقربنا من بعض و ..*قاطعني بي نهرة !! قالي ما تجيبي لي سيرة زفت مااااضي يا هتون !
سكته لمن لاحظت ان مرة الغفير شبه انها حضرت الموقف دا !!
سبحان الله انا الما بتحمل حاجة زي دي بقيت ساكته احتراما لظروفو و لي حالتو ..
قلت ليهو : ممكن نطلع نتغدا الليله كلنا !
قالي : مافاضي !
م حبيت ازعجوو ، وقفت تحت شجرة في الحوش ، و تاني رجعت ليهو ، قلت ليهو طيب في موضوع مهم بخصوص يزن ممكن نتكلم فيهو ؟
قالي : يزن !! قلت ليهو ايوة ! (و لاحظت انه عاين ليهو شديد كداا ) !
قلت ليهو يزن نطقو اتاخر شديد ، عمرو ٧ونص ولحد اسي م بيتكلم ، و اضافه لذلك المدرسه فاتتو بفكر لو نفتش لمدرسة كويسه يمكن لمن يلقى الشفع بتكلم و ظروفو تتحسن !
قالي : انتي مصدقه نفسك انك امه ؟
*!!!!!!!! كيف الكلام دا !!
#تلفوني دخل في النص بأتصال من #مازن .. وشهاب مان مراقب شاشة تلفوني ، لمن شاف اسم مازن سكت !!
*ها مازن ..
_انا برا انتي وين اجي عليكي !
*في حاجة حصلت ل نهى ولا في شي ؟
_لالا ابوي حكى لي الحصل و لمن مشيت عشان اتكلم معاها لقيتا حاضنة بتها ونايمة !
*حمدلله ، طيب في شنو ؟
_انا لقيت ديكور للمحل و ناس الصيانة كلموني لازم نمشي عليهم لانه م حياخدو زمن يومين بالكتير والمحل حيبقى جاهز و كمان عشان نقعد نختار البضاعه اون لاين عشان تترسل بعد يومين ..
*مازن !! ما قادر اصدق ! الناس في شنوو والحسانيه في شنو ؟ انت م شايف وضع اختك مستعجل على شنو ؟
_عشان اختي انا مستعجل ! انا م داير اديها وقت تقعد فيها بينها و بين نفسها