وسام: انت طول حياتك حا تفضل عذابي ..اسالني ليه
اسعد: ليه!!
وسام: لانك مستفز بتجيب الضغط والبتعرسك دي الله يكون في عونها وقبل تسوقها انا حا اعفيها واقول ليها كل ما يعمل ليك حاجه داعيهو دعاك مقبول لكن نحن اهلو ديل مساكين ما تدخلينا في لوامه ودعا ووقفه مع الله

قلت كدا واسعد دا فطس من الصحك وانا زاتي متا ضحك معاهو وحرفيا لحد م وصلنا بنضحك وبس وقال عني مجنونه ولمن وصلت وجيت انزل قال لي ..
اسعد: اسمعي
وسام: اها
اسعد: الناس ديل في زمتك ما تفضحينا
وسام: يخ تف عليك

وجيت اقفل الباب بقوه صرخ وهو بضحك...
اسعد: لالالا خلاص خلاص بجد كدا الله يوفقك يا طباختنا ومنتظرنك ترفعي راسنا يا شافعه
وسام لوت خشمها وقالت: اسي في داعي بعد الكلام الحلو دا كلو تطبظها وتقول شافعه
اسعد: يا بت انقلعي من هنا تاخير من اول يوم عاوزه تنطردي انتي
وسام حمرت ليهو وقالت: يلا باي

ورزعت الباب ومشيت واكيد هو جوا بكون سباني لي جدي الخامس (جدي الخامس اسمو منو!؟🤣) ...اول م دخلت المطعم كان كبير شديد وحلو ولونو رمادي وابيض.. كنت بتلفت لحد م شفت رميساء وكانت منتظراها شكلها لانها جات علي طوالي وسلمت علي وهي بتقول..

رميساء: واخيرا عملتيها ووصلتي هنا
وسام: حرفيا عملتها لكن توتر مووت
رميساء: عادي عادي عشان اول يوم بس تعالي وحا تستمتعي بالشغل معانا
وسام: واثقه من النقطه دي

رميساء ابتسمت لي وساقتني معاها مشينا ناحية المطبخ لمن صدقت جدجد اني حا اشتغل فيهو بس هي قالت لي انو عندهم مكان هنا زي المكان السري بقولو ليها غرفة اجتماعات ورا المطعم دا وهم بعرفو سيد المطعم عشان كدا بسمح ليهم يجو بي المطعم ويخشو لي مكانهم.. وفعلا لقيتها دخلت المطبخ وفي ستاره في نهاية المطبخ زحتها وفتحت الباب واتفاجأت لمن لقيت نفسي في الشارع!!.. كنا في زقاق كدا وفي وشنا طوالي في باب ابيض وفي نص الباب مختوت حرف M اسود .. وانا اتوقعت انو الحرف مقصود بيهو ماغنيس.. رميساء من غير تضرب الباب طلعت المفتاح ودخلت وكان في ممر دخلنا فيهو وكان في صاله كبيره بعديهو فيها طقم جلوس بالأسود والغرفه كلها ابيض .. وتاني كان في حاجز زجاجي وراهو زي مكتبين كدا وعلى الزاويا في كراتين كتيره مرصوصه ولاحظته كمان انو بعد الكراتين في باب صغير بس ما عارفه الباب دا بودي لوين..

-اها رايك شنو في المكان

دا كان صوت رميساء السالتني بي حماس واضح وانا كنت بتفرج في المكان والديكور حقو وكل شي كان كلو وجميل واكتر شي عجبني الصوره الكانت معلقه في نص الصاله كات نفس صورة البوروفايل الفي التيك توك ليهم هم الاربعه وتحت مكتوب *Magnis|ماغنيس*

وسام بي انبهار :المكان حلو شدييد بس ليه فاضي
رميساء قعدت وهي بتقول: ما فاضي بس الشباب مشو يجيبو حاجه للفطور وفي..
-السلام عليكم ورحمه الله وبركاته

اتلفت على البت القالت كدا وكانت بت كمان جميله شديد سمراء ولابسه فستان وعامله التحجييه بطريقه حلوه ومكياج بسيط عاينت ليها بنفس النظره بتاعت الاستغراب العاينت لي بيها لحد ما رميساء قاطعت النظرات دي وقالت لي

رميساء :ودي جميله يا وسام مالك ما عرفتيها

فعلا اول ما شفتها جاني نفس الاحساس لمن شفت رميساء ورجعت عاينت للصوره وشفتها واقفه معاهم وسلمت عليها وهي كمان ردت سلامي بلطافه ورفعت حواجبها لرميساء وقالت ..

جميله: ما تعرفينا يا رميساء
رميساء ضحكت وقالت: دي وسام
جميله: وسام!؟
رميساء: الباقي بوريك ليهو محمد

اول ما قالت ليها محمد جميله ضحكت وقالت لي ..
جميله: لو فيها محمد حبيبتنا انتي..
وسام ابتسمت ليها بس

وختيت في بالي انها حبتني عشان انا من طرف محمد ..محمد مديرهم

رميساء: معقوله الشباب ديل لسه ما جو انا متا جوع
جميله: عارفاهم انتي لو طلعو ما بخشو بالساهل بتهربو من الشغل
رميساء ضحكت وعاينت لي وقالت..
رميساء: طبعا يا وسام نحن شلة ماغنيس دي نادرا يطلع لينا فيديو ودا م عشان نحن رهيبين ومشغولين لالالا وحاتك دا عشان نحن اكتر ناس كسلانين وبس

ضحكت على كلامها وهي لسه واصلت وقالت لي..
رميساء: بالذات مديرنا محمد دا ابو الكسل زاتو

-مالو محمد

بتعرفو يعني شنو الدم يجمد فجأه وضربات قلبكم تضرب سريع كأنكم كنتو في سباق وجارين ساعه من غير تقيفو.. بس دا نفس الحصل لي اول ما سمعت الصوت دا الكان ما غريب علي ابدا لاني حفظتو مو الفويسات ومن المقاطع البتفرج عليها ليل ونهار ابدا ما اتلفت عاينت ليهو بس ركزت مع جميله الردت ليهو وقالت..

جميله: ابدا ما فيهو ميل هدي ورضي وحلو وجزاب واي بت بتتمناهو

قالت كدا وضحكت ومحمد ما عارفه تعابير وشو كانت شنو بس قال بفرحه..

محمد: ايوااااا دا الكلام يا شيخه و ..

فجأه سكت.. وحسيت انو في عيون اتحولت علي وتقريبا هنا ياداب شافني وادرك انو في شخص موجود هنا طوالي عاين لرميساء وقال..

محمد: جايبن ضيفتكم اليوم
رميساء: دي ما ضيفتنا دي صيفتك انت!؟
محمد: ضيفتي!؟

وفجأه جا وقف قدامي وانا هنا ياداب شفتو هو عاين لي بستغراب لانو ما حصل شافني وقبل يسأل سؤال تاني انا ابتسمت وقلت ليهو..

وسام: انا وسام

صدمه!! دي كانت تعابير وشو ختا يدو في راسو وكان واضح انها صدمه بالنسبه ليهو بس صدمه اسعدتو جدا لانو ضحك بي حماس وقال اسمي بطريقه خطفت قلبي...

محمد: وساااااام
وسام: كيفك
محمد: كويس شدييييييد بعد المفاجاه الحلوه دي نورتينا ياخي

قال كدا ومدا لي يدو استغربت انو بصافح بس م ختيت شي فبالي وصافحتو..

محمد: من وين هفت ليك وتزورينا

قال كدا وهو بقعد وردت عليهو رميساء القالت..
رميساء: اسكت ساي شحتفت روحي حتى رضت
محمد: م مشكله المهم جات ونورتنا

كنت مبسوطه بالفرحه الشفتها في عيون محمد وهو مبسوط بوجودي وكنت بعاين ليهو وفعليا مسحوره بي جمالو الخلاني اشوف قدر شنو الكاميرا ظالماهو وخافيه كل سماحتو دي..

-طيب عرفونا معاكم

وكان دا صوت شاب جا خاشي وقعد جمب محمد عاينت ليه وقدرت اعرفو دا الولد الرابع المعاهم وبكدا قفلت الشله وبقيت انا قاعده حولينهم وفي عالمهم كمان.. ويجماعه ياخ ما معقوله الناس ديل كلهم سمحين كدا ليه ياخي...

جميله: بري يا حسن والله انا زاتي ما فاهمه شي وقاعده اشوف في الضيفه الحلوه الغانجين بيها رميساء ومحمد وغير اسمها ما وروني شي
محمد: يخ معقوله بس يا جميله طوالي نعرفك دي وسام وبتقرب رميساء بس من بعيد ومتابعاني على التيك توك وفيديو واحد م بتفوتو لينا وحافظانا اكتر من روحنا كمان هههه..
رميساء: وكمان في حاجه ما قلتها
محمد: شنو!؟
رميساء عاينت لي وقالت: اقول انا ولا انتي
وسام ابتسمت ليها وقلت وانا بعاين ليهم : صراحه انا مبسوطه شديد اني هنا وانا من زمان بحب شلتكم وبحب الحاجه الانتو بتعملو فيها وصح م عندكم متابعين كتار بس بجد دا ظلم حاساهو ليكم لانو الزيكم مفروض يكونو معروفين عالميا.. وما عارفه اذا دا شي ح يهمكم بس انا فخوره كوني اليوم بينكم وجواا عالمكم.. واذا م كنتو بتمانعو وبعد موافقتكم كلكم طبعا انا حابه انضم لي شلتكم واكون جزو من عائلتكم البسيطه دي والبتسعى دايما للخير.. للخير وبس

حرفيا بعد الكلام دا حسن صفق لي ووقف على حيلو وقال..

حسن: جبتو لينا رهابه انتو ما عضو جديد "وتاني عاين لي وقال" حزاك الله خير على كل الكلام الحلو دا ونحن نبقى اغبياء لو فوتنا روح كلها رغبه انها تنضم لينا زيك.. مش كدا يا محمد

قال كدا وهو بعاين لي محمد العاين لي وقال بي ابتسامه ..
محمد: طبعا ..ومن غير تفكير حابي اقول ليك مرحب بيك معانا يا وسام عبدالرحيم في شلة *"ماغنيس|Magnis"*

وتعالو شوفو بعد العباره دي الفرحه الدخلت فيني وحتى رميساء نطت عديل من فرحتها وضمتني شديد وجميله كمان رحبت بي وحتى حسن ومحمد واضح الرضى في عيونهم بي كوني معاهم.. يعني ادوني احساس اني بالجد شي مميز وماف حد نفر مني ابدا حبيتهم شديد وطلعو بالجد ناس لطيفين وطيبين شديد وفي اليوم داك ما اشتغلنا شي لانو كل اليوم ضاع بي ونستهم معاي وعرفو عني كم حاجه واني امتحنت ومنتظره النتيحه واني بعرف اطبخ وكدا.. وبعدها وروني المكان كويس ووروني انو الكراتين دي فيها حاجات بكره حا يرفعوها عشان تتوزع للمحتاجين.. يعني عموما المكان كان حلو ومريح وهم زاتهم كانو لطيفين والقعده معاهم مريحه لمن اتمنيتها م تنتهي بس كان لازم امشي وفعلا ودعتهم ومشيت مع رميساء الوصلتني لاني ما كنت عارفه الشارع كويس.. واول م دخلت البيت وانا كنت بتبسم ساي وابوي كان في الصاله سالني من اول يوم رديت ليهو بلهفه وامي م سالتني لانو اصلا الموضوع م عاجبها واسعد م لاقيتو ومشيت الغرفه احكي لي ملاذ بس لقيتها نايمه طوالي مشيت غرفتي رقدت وانا بتخيل في شكل محمد بجد انسان جذاب وراقي وهادي حتى لمن يتكلم غيييييير ..كنت بتزكر في نظراتو لي وهو بتكلم وفي كل تفصيله هو عملها انا ركزت فيها وكنت بتزكر كدا واتمنيت يوم بكره دا يجي سرييييع حتى اني جهزت لبستي لبكره من اليوم

وكدا الروتين بقى كلو يوم اول ما اصحى بجهز وبطلع الساعه ١٠ وبمش ليهم وشويه شويه علموني الشغل انو بفتشو مناطق فيها ناس محتاجين وبتفقو مع واحد انو بدوهو كرتونه يمشي ويوزعها لي كل محتاج بعرفو او يوزعو براهم ..ومرات م بنوزع نحن بجي دفار كبير برفعو فيهو كراتين كتارع لمن بتحير وبستغرب وبقول الناس ديل بجيبو قروش من وين لكن تاني عرفت انو القروش دي بتجي من صفحتهم الفي تيك توك اي زول بشوفهم بحب شغلهم براسلهم وبرسلو مبالغ كبيره هم بشترو بيها المواد دي.. وحتى المطعم الفاتح فيهم دا لو فيهو بواقي اكل او اكل بايت وكدا هم بشيلو وبوزعو برضو للمحتاج.. يعني حرفيا انا متاكده من كمية الكراتين البتتصدر دي ماف محتاج الا ووصلتو كرتونه من ..ماغنيس

-وسام!؟
اتلفت لي محمد القال كدا وهو برتب ليهو في كراتين وانا بحسب في المناطق المفروض نمش ليها اليوم..

وسام: ايوا اتفضل
محمد: معليش ح اتعبك شويه
وسام: لالا عادي قول
محمد: ممكن تمشي معاي نوزع الكراتين دي.. لانو في مواد ح تجي اسي وزي ما شايفه رميساء وجميله مشو يوزعو وحسن لازم يقعد هنا عشان يستلم المواد دي فممكن تمشي انتي..

ما عارفه وقتها اترددت ليه بس هو كان منتظر ردي وقبل كدا كتير بشوف رميساء بتمش معاهو او مع حسن ف افتكرت انو عادي فوافقت ومشينا وشلت منو الكراتين ركبنا العربيه وفي العربيه..

محمد: بالمناسبه حبيتي الشغل؟
وسام بحماس: شديد ياخي بجد انتو طيبين يا محمد
محمد: اسمي حلو منك على فكره
وسام خجلت وما ردت
محمد: طلعتي احلى من ما كنت بتخيل
وسام ببلاهه: هاا
محمد: قصدي شكلك
وسام: محمد ياخ
محمد: انتي خجلتي ولا شنو.. على فكره عادي نحن زملاء واصحاب بنتكلم ونهظر مع بعض اوك؟
وسام: لا عادي طبعا ما خجلت
محمد: دا كلو وم خجلتي ههه.. يلا يلا وصلنا

قال كدا ونزل وانا نزلت وراهو كنا في مكان شبهه مقطوع بس لمن خشينا كان في بيوت شكلها قديم وتعبان والناس الساكنين جوا شكلهم بجد محتاجين.. محمد شال كرتونه ومشى على بيت وانا وراهو ضرب الباب وفتح لينا شاب جسمو ضعيف ووشو تعبان وشاحب..

محمد: السلام عليكم ورحمه الله وبركاته
الشاب ما رد بس بعاين بي استغراب
محمد ابتسم وقال: ماغنيس

لمن قال ماغنيس الشاب دا لمن وشو نور من الفرحه وعاين للكرتونه بلهفه ورد السلام وشالها بعد م وقع في ورقه وبعدها قفل الباب ..

وسام: ليه قلت ماغنيس
محمد: عشان يعرفو اني من المجموعه دي ونحن في مناطق زي دي اسمنا معروف لانو وزعنا فيها كتير قبل كدا
وسام: ايوا ..
محمد: المهم اسي انتي شيلي الكراتين دي وامشي وزعيها في البيوت القدامك دي وانا بمشي البيوت الورا عشان نخلص سريع..

وسام ابتسنت بحماس وقالت : يلا

وفعلا شلت كم كرتونه وضربت الباب والناس بتكون نافره مني في الاول بس لمن اقول ليهم انا من "ماغنيس" بفرحو وبحسهم حا يخطفو الكرتونه من يدي حتى انهم بوقعو الورقه سريع وبشيلو الكرتونه وفي ناس بتنسى تقول ليك شكرا اصلا.. بس م اهتميت وكنت مبسوطه جدا بي الناس الفرحانه دي..وتقرببا محمد خلص قبلي لانو جاب تلفونو وبقى يصور فيني وانا اضحك وهو يقول لي للزكرى وعشان نوثقها مع حقاتنا ..ما اعترضت لانو عارفه مستحيل صورتي تتنشر في التيك توك ودا لاني نبهتهم قبل كدا اني م حا اظهر ابدا..

ومرت الفتره علينا كدا وبقيت كل طلعه مع محمد بنمش نوزع سوى حتى بننجز سريع والناس بحبونا وبدو يتعودو علي ..وفي يوم كنا قاعدين وانا بتأكد من انو عدد الكراتين مكتمل عشان امش مع محمد فجأه رميساء جات وكان شكلها غريب لابسه عبايه مفتوح ومن جوا جيب شورت وبلوزه ضيقه شويه وعيونها واقعه من التعب وحتى الطرحه مجدوعه في أكتافها اتخلعت لمن شفتها وخلعتي زادت لمن وقفت لمحمد في وشو وقالت..

رميساء: محمد انا حا اوزع معاك المواد حقات اليوم
محمد عاين ليها بستغراب وقال: رميساء د شنو العاملاهو في نفسك دا وبعدين شكلك تعبانه توزعي معاي كيف
رميساء: انا عاوزه اوزع معاك وبس خليني امشي
محمد: بشكلك دا م ينفع وانتي تعبانه لمن تبقي احسن و..
رميساء بنفعال: انت م مشكلتك شكلي مشكلتك انا زاتي صح لانو..
محمد بصوا عالي: رميساء!!!!!

رميساء سكتت وبقت تعاين ليهو ..وتاني محمد قال لجميله تسوقها وفعلا مسكتها ومشت وهي لحد م غابت من عيوني كانت بتعاين لمحمد.. اول م مشو محمد رفع الكراتين وطلع وانا لحقتو.. وحرفيا كنت مصدومه من الموقف الحصل دا ورميساء مالا وليه اتصرفت كدا وو..

محمد: عيانه
وسام: هاا
محمد: رميساء كانت عيانه امس بعد انتي مشيتي مرضت وتعبت..حتى انو قعدت معاها جميله
وسام: بالجد م كنت عارفه الف سلامه ليها
محمد: الله يسلمك.. فعشان كدا م تستغربي هي اصلا لمن تمرض وتتعب بتبدا تتصرف بغرابه اتعودنا بس لمن ترجع لطبيعتها بتعتزر
وسام: ايوا.. اصلا ما اخدت شي على خاطري وعارفه انو رميساء بت بسيطه ومسكينه
محمد ابتسم وبس

وبعدها وزعنا الكراتين وتاني م حصل شي مهم وفعلا تاني يوم رميساء جات وكانت لابسه حجابها وعبايه مقفله زي ما اتعودت عليها واعتزرت من محمد ومننا كلنا وهم اتونسو وضحكو معاها عادي وماف زول اخد على خاطرو ..كنت مبسوطه على بساطتهم وحبهم لبعض وانو ماف زول بهون على التاني ابدا وقضيت احلى فتره في ماغنيس وحياتي في البيت بقت مقطوعه لاني بقيت بطلع واقعد نص يومي معاهم وطبعا ماف زول بسألني على اساس انا معصوره في الشغل وكدا.. ومرات بطر امش واجي لبعد المغرب اول ايام كان ابوي بسالني وبزعل بس تاني خلاني وهو مطمن.. وفي يوم كنا قاعدين كلنا بنتونس ونضحك وكان يوم اوف ماف شغل بس منتظرين مواد ح نستلمها من دفار ..فجأه محمد قال..

محمد: وسام
وسام عاينت ليهو قلت: ايوا
محمد: سمعت انك طباخه

طبعا هنا عاينت لي رميساء الغمزت لي ..رجعت عاينت ليهو وهزيت راسي وقلت..

وسام: فعلا
محمد: طيب م ترحمينا شويه نحن جيعانين وعاوزين حاجه من يدك
وسام بضحك قالت: من عيوني.. بس اطبخ وين

وهنا محمد جراني من يدي وهو بقول..

محمد: تعالي معاي بس

حسيت كهربا مشت في جسمي من الشعور اللاسع الحسيت بيهو كانت ديك اول مرا يلمس يدي فيها وهو ما ركز ويمكن شافها حركه عفويه بس انا خلت قلبي يقيف..وساقني لمطبخ المطعم واستأذن منهم اني اطبخ وسمحو ليهو وفعلا بديت اشتغل وهو ساعدني ولقيت انو هو صفر في المطبخ يعني نشا من دقيق ما بعرف يفرق خالص وغايتو هو كان مساعد سئ وتعبني شدييييييد هههه.. بس كنت مستمتعه بالشغل معاهو وحتى طرحتي وقعت وانا بشتغل وما رفعتها لاني لمحت جميله ورميساء بنزلوها كتير وعادي يعني الموضوع ما خطير.. ومحمد مرا يساعدني ومرات بسرح وبعاين لي صح قضيت وقت مع محمد بس لحظات المطبخ دي كانت احلى لحظات.. وبعد خلصنا ودينا ليهم الاكل وحسن قال لي لو الاكل عملو محمد انا ما داير لاني بخاف على صحتي ضحكنا ضحك ومحمد ضربو في كتفو وقال ليهو سوتو وسام اتسمم ساي وفعلا قعدو واكلو وجميله كمان حبت الاكل شديد اما حسن دا ياكل لقمه ويدعي لي زي الحبوبات ضحكني.. بس رميساء رفضت تاكل ومشت على الغرفه الكانت في المكتب الانا عمري ما شفتها من جوا.. ولاحظت ليها بدت تتجنبني كتير وحتى لو كنت موجوده بس بتتكلم مع محمد وهو مرات برد عليها ومرات لا..

-حصل مرا سويتي مكياج؟

كان دا سؤال جميله لي بعد ما اكلنا ومحمد وحسن طلعو يجيبو لينا بارد قالو نهضم بيهو الطقه النضيفه دي ههه ..عاينت لجميله الكانت منتظره اجابتي وهي بتعاين لي شكل وشي وقلت..

وسام: لا ما حصل والله
جميله: بجد ملامحك حلوه ياخي ومع المكياج حتكون ابداع
وسام: ما قاعده احبو و ..
جميله: ما بتحبي في بت ما بتحب المكياج!؟
وسام: ما كدا بس..
جميله: لالا ماف بس اليوم عليك الله تعالي اجرب فيك ..شوفي انا ورميساء محجبات بس بنعملو عادي
وسام: اممم
جميله: يلا ياخي ح يعجبك

وبعد نقه وكلام اقنعتني وقعدت ليها وهي طلعت شنطة مكياج وبدت تتفنن فيني عملت لي حاجات كتيره واكتر شي عجبني البودره الهي عملتها كان شكلها مميز بس غريب وكان لونها مع بشرتي حلو شديد حتى ريحتها كانت حلوه .. عملت لي منها وكان مكياج خفيف وحلو شديد وانا كل شويه اعاين لنفسي في المرايه.. ولمن محمد وحسن جو اتخلعو واثنو على جمالي شديد ومحمد م شال عينو ابدا وقضينا اليوم ونسه لحد م مشينا وقبل اطلع جميله جات وجابت لي علبه استغربت بس لمن فتحتها لقيت فيها زي البودره العملت لي منها قبيل فرحتا شديد وقالت انو دي هديه شلتها وشكرتها ومشيت ..

وحرفيا من اليوم داك وانا بقيت مسحوره بي شي اسمو مكياج.. كل يوم بقيت اسوي من البودره حقت جميله واحمر شفايف وشويه شويه بتعلم في المكياج.. وشكرهم وثناءهم لي جمالي كان بخليني احب نفسي بالمكياج زياده.. حتى محمد م كان قادر يدس لهفتو لمن يشوفني.. وبقينا كتير نكون مع بعض بجمعنا توزيع بضاعه او نتونس في العربيه وحتى في البيت بنتكلم في الشات الاطور وبقى مكالمات لحد نص الليل وفي يوم كنا بنتكلم مكالمه وانا غرقانه في كلامو هو فجأه قال لي..

محمد: وسام
وسام: عيون وسام
محمد: انتي مميزه شديد انا عمري ما شفت بت زيك ..جميله وموهبه وعفويه و..بتتحبي
وسام ضحكت وقالت: انت بتتحبي دي قلتها لي كم مرا من يوم عرفتني ههه
محمد: بس بالجد بتتحبي
وسام: اممم
محمد: ممكن اقول ليك حاجه!؟
وسام: قول
محمد: انا بحبك

شنو...!!!!كانت صدمه بالنسبه ليه مع انو لمح لي كتير وعيونو فاضحاهو بس حسيت لساني اتربط م قدرت ارد عليهو خااالص وهو بس كان بعيد فيها وبقول..

محمد: بالجد بحبك يمكن شفت بنات كتار واتعاملت معاهم بس ماف بت جزبتني غيرك يا وسام ..انا بقيت كل يوم بجي وبتلهف على شوفتك والكلام معاك انا كنت اكتر واحد كسول في الشغل بس عشان اطلع معاك بقيت نشيط شديد..من زمان كنت بفتش عن بت زيك عشان تدخل حياتي وم مصدق اني لقيتك ومستحيل اضيعك.. انا بجد بحبك

ما كنت عارفه اقول شنو او هو اصلا بردو كيف في اللحظه ديك بس فصلت الخط وانا بقيت مبحلقه من الصدمه لحد م استوعبت انو محمد رئيس ماغنيس بحبني!!!!!!!.. نطيت من الفرح ولفيت وضحكت وهو كان برسل وخايف اني اكون زعلت ضحكت وانا بقرا رسايلو صح خوفتو بس اخيرا كتبتها وقلت ..

وسام: وانا كمان بحبك

وبعدها قفلت التلفون ونمت وانا غرقانه في الاحلام.. احلام كلها عن محمد.. محمد وبس

بعد الليله ديك وكلو شي اتغير ومحمد بقى لي انسان مختلف م محمد مديري لا محمد صحبي و..حبيبي!! يمكن كنا مفضوحين شديد حتى حسن وجميله كانو شايفين الحب الفي عيونا لبعض ورميساء كانت بس زعلانه وبتعاين لينا بغل واتغيرت شديد والطرحه دي لغتها خالص والعبايه كمان وبقت تلبس بس فساتين ضيقه وبعد دا كلو محمد وحسن بقو ما بسالوها ابدا... وبتونسوو وبضحكو معاها عادي ولو انا قلت شي هي كانت بتتمسخر علي وبطاعني كمان كرهها لي بقى واضح شديد مع انو انا ما عارفه ليه كل دا!!!.. بس كنت بحاول اتجاهلها وما اركز معاها وكنت بس في عالم مع محمد مليان حب ودلع وكلام حلو ..

وما عارفه هل حبي لي محمد خلاني عمياء عن الحاجات البتحصل في الشله ولا هم فجاه اتغيرو.. اي بقى في حاجات غريبه حتى جميله بفت تفك طرحتها عادي وتلبس بناطلين تحت العبايه ومرا من دون عبايه وبتضحك وتهظر مع حسن عادي وهي بالشكل داك ومحمد م بسال جميله ولا رميساء عن اي حاجه وهو وراني الموضوع عادي فبقيت كمان بطلع طرحتي معاهم واسوي مكياج ونضحك ونهظر بس ما طلعت عبايتي ابدا مع انو محمد حاول معاي وفهمني عادي بس رفضت وحبنا انا وهو بقى مفضوح لدرجة انو بمسك يدي قدامهم وبقول لي كلام حلو معاهم عادي.. وكل ما يعمل كدا بحس رميساء حا تاكلنا بعيونها عدييييل

وفي يوم كان قبل عيد ميلادي بي يوم جيت للشله ورميساء ومحمد كانو مافي بس في حسن وجميله الكانو قريبين من بعض شديد وبعاينو فتلفون جميله حتى بعد جيت خاشه ما زحو من بعض سلمت عليهم وهم ردو ب "هاي" وما ركزت معاهم بس كنت بفتش بعيوني عن محمد وفجأه جا طالع من الغرفه الفي المكتب وواضح انو كان متنرفز ووراهو رميساء الكمان كانت معفصه وشها وزعلانه ..ومحمد اول م طلع مسكني من يدي وطلعنا ولمن ركبت العربيه افتكرت حا يديني تبرير للحصل وشنو كان بعمل مع رميساء بس صدمني لمن ما برر ولا شرح شي زي كل مرا بس اتونس معاي ومسك يدي وقال لي كلام حلو واكلنا برا واتصورنا وطول اليوم مع بعض قضينا يوم حلو خلاني انسى الحصل صباح اليوم حتى وريت محمد بي انو عيد ميلادي بعد يوم فرح شديييييد ووعدني بهديه..

لمن جا تاني يوم محمد رسل لي انو اليوم ما شغالين استغربت لانو اول مرا م يشتغلو وزعلت لاني ما حا اشوفو وحا اشتاق ليهو وافتكرت اني حا اعوض الحاجه دي بي انو اتصل ليهو بس ما كان برد وما خاشي في اي موقع تواصل استغربت وخفت عليهو واتصلت لرميساء اسالها عنو بس فصلت الخط في وشي بكل بساطه..

طلعت من الغرفه وانا متحيره وما عارفه اعمل شنو فجأه شفت ملاذ في وشي وما كانت دي نفسها ملاذ وشها بقى شاااحب وعيونها تعبانه .. اتخلعت لمن شفتها ولمن قعدت معاها عرفت انو رضوان حا يجي بكره يعني يوم ميلادي وح يجي يقابل ابوي ..والمشكلة انو بعد ميلادي بيوم بس عرس ملاذ وحمدي!!؟. حرفيا هنا ادركت اني بقيت بعيده شديد من البيت ومن ملاذ لدرجة اني نسيت وعودي ليها ووقفتي معاها فشلت وم قدرت اعمل اي شي عشانها حرفيا كنت ندمانه وشفت العتاب فعيونها لي لمن قالت لي "شغلك اخدك مننا" ..م كنت عارفه اعمل شنو بس انا وعدت ملاذ ولازم اعمل حاجه عشانها لازم وقتها ما كان في الا حل واحد شلت رقم رضوان من ملاذ واتكلمت معاهو واتفقت معاهو على حاجه.. ملاذ كانت مخلوعه بس انا قلت ليها بكره ح تشوفي انتي مستحيل تتزوجي حمدي.. حرفياااااا ضمتني وحسيت اني شلت هم تقيل من قلبها وخففت عليها وطول اليوم داك قضيتو مع ملاذ ووريتها مكياجاتي هي ما عملت بس سوت لي انا وقبل اتمكيج كنت تعبانه بس اول م ملاذ عملت لي مكياج حسيت بي نشاط م طبيعي وافتكرت دا شي طبيعي جدا.. وقضينا اليوم كدا لحد م جا اليوم التاني وبرضو صحيت على رسالة محمد البتقول انو م نجي اليوم.. استغربت وزعلت انو هو نسى اليوم عيد ميلادي.. وحتى ناس البيت نسو مع انو متعودين كل م يجي عيد ميلاد حد هم بجيبو ليهو هدايا من غير حفله..بس انا م عملو لي ولا عبروني ولحد قريب المغرب وانا حابسه روحي في الغرفه حاسه بي تعب وراسي لافي وزعلانه من البيت ومن محمد لانو نسو عيد ميلادي فجأه ملاذ جاتني جاريه وقالت لي انو ابوي قال ليك تعالي وقبل افهم شي هي جرت..

نزلت وراها بستغراب ولقيتهم قاعدبن وعاملين شاي وبعاينو لي وملاذ جات ضمتني وقالت Happy birthday 🎂

وسام بفرحه وخلعه: يعني م نسيتو!!!؟
ملاذ: معقوله بس يا شافعتنا

فرحت شديد انهم متزكرين عايدوني كلهم واتونسنا وقعدنا وكنت بتأمل فيهم كلهم وهم بتونسو عني وعن شغلي وبمدحو فيني مع انو امي كانت زعلانه من موضوع شغلي بس بعدين رضت كنت بعاين ليهم واحد واحد وانا بشكر ربي لانو عندي اهل زيهم بالرغم من انو في عقد ومشاكل بس د شي طبيعي في اي بيت ما عارفه ليه بالرغم من اني بيناتهم بس كنت خايفه كنت حاسه بشي غريب احساس بقول لي انو دي اخر مرا تتلمو كدا..

واثناء ما بنشرب في الشاي جاتني رساله من محمد بقول فيها..

"ما حا اكتفى بمجرد مسج عشان اعايدك تعالي لينا في مكانا منتظرنك"

فرحت شديد بالرساله وبقيت متحمسه متين اطلع عشان امش للشله واحتفل معاهم.. وجات لحظة الهدايه ملاذ ادتني سلسل كان حلو وفيهو دلايه على شكل قلب فيهو صورتي وصورتها واسعد اداني آله كدا على شكل اسبونج بوب لمن ضغطت الزر طلع منها موس وسكين صغيره وحاجات حاده قال لي عشان تحمي بيها نفسك ضحكت فيهو.. وامي ادتني برواز فيهو صوره لينا نحن كلنا اكتر هديه بكتني حرفيااا وحبيتها شديد وابوي طلع الساعه الفي يدو اداني ليها وكانت حاجه غاليه.

وعزيزه عليه و فكونو اداني ليها ما كان شي هين بالنسبه لي ابدا وقال أداها ليهو تبوهو زمان لمن بدا يعتمد على نفسو واسي اداني ليها عشان انا كمان بقيت معتمده على نفسي وشغلي.. شلتها وبوستا يدو وكنت فرحانه بكل الحاجات دي ..وطلبت منو امش المطعم عشان احتفل معاهم وصدمني لمن ما عارض وفعلا طلعت الغرفه وانا شايله الهدايا رميتهم في السرير شلت لي فستان حلو لبستو وفوقو عبايه سوداء وكنت مستعجله ومتحمسه شلت شنطة جلد لقيتها في الرف ما متزكره الجابها لي منو بس عمري م استخدمتها ف شلتها وقبل اطلع عاينت للهدايه المجدوعه في السرير ما عارفه ليه بس شلتهم دخلتهم في شنطة الجلد دي وطلعت وأثناء ما انا في السلم جاتني رساله كنت قايلاها من محمد بس انصدمت لمن لقيتها من رضوانه كاتب لي فيها..

*"انا منتظر"*

شفت الرساله وكنت حا انسى وعدي ليهو جريت على غرفة ملاذ لقيتها قاعده ومتوترة ولابسه عبايتها وخاته شنطه جمبها اول ما شافتني ضمتني وبقت تبكي وواضح انها كانت خايفه بس طمنتها انو الحل دا مؤقت لحد ما ابوي يقتنع ويرضى بي رضوان انتو اختفو ليكم كم يوم ومتأكده ابوي حا يخليكم تعرسو.. بس لو قعدتي بكره ح يكون عرسك من حمدي.. ملاذ مسحت دموعها ووافقت على كلامي شالت الشنطه وطلعت معاي براحه البيت كلو نايم اول م طلعنا من البيت هي ضمتني شديد وانا ضميتها وحسيت كأنو دي اخر مرا اضمها فيها ما بس يومين وترجع.. ووقتها فعلا كان داك "الحضن الأخير" وخليتها هي مشت بي اتجاه فيهو قصتها مع رضوان الحا تهرب معاهو وانا مشيت بي اتجاه لي شلتي ولي محمد..

وقتها ما كنت عارفه الليله ديك داسه لي شنو م كنت عارفه انو دي اخر مرا اشوف فيها البيت م كنت عارفه انو بالجد ديك كانت اخر كباية شاي لي مع اهلي ما كنت عارفه انو شنطة الجلد الانا لبستها لاول مرا دي حا تكون سبب في عذابي وفي حاجات كتير.. ماشه وانا مليانه طاقه وفرح بس لمن رجعت للبيت دا تاني كنت واحده مختلفه كنت واحده تانيه خالص عن وسام الطلعت منو...

ساعات بس قلبت حياتي جحيم..
والطبخه الطبخوها لي شلة ماغنيس كل الفتره دي انا اكلت منها في الليله ديك ومن يومها بقيت انا ما انا..















*#حرف السين:*
وسام..
ياسمين..
سويدا..
سوزان..
أسعد..
ساره..
رميساء..
سلافه..
و..
نفيسة..🙈










*#يتبع..*
*#صلو على النبي..*

https://whatsapp.com/channel/0029Vaucv2AJZg4D9Kl4rH07


♻️قناتنا بالواتس كل جديد وحصري

😁وين الناس ووين الحماس

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت الرابع والعشرون*

*"إلى الصفر"*

-اها نمشي!؟

كان دا صوت عم الطيب وهو بركب العربيه الصحاني من سرحتي .. انتبهت ليهو واصف اتلفت عليهو وقال..

آصف: اها بشر لقيت!؟
الطيب ضحك وهو بقول: اي لقيت وجا معاي واحد ركبو معاي كمان بس انت شكلك كنت سرحان مع حرمتك ماك جايب خبر هههه

آصف ضحك معاهو وعاين لي وانا حمرتا ليهم.. وخليتهم بتونسو وعم الطيب اتحرك وانا بقيت اعاين بالشباك وسرحانه.. حاسه اني ماشه نحو المجهول ما عارفه شنو حا يحصل او انا ماشه وين ..ما عارفه اي حاجه غير اني مع آصف وبس.. قلت كدا وانا بعاين ليهو هو انتبهه لي نظراتي واتلفت غمز لي وقال ..

آصف: للدرجه دي انا عاجبك!؟
ضحكت في كلامو وبقيت متعوده على الردود دي تقريبا ..ما عارفه ليه بس فجأه سألتو..
وسام:حا تمشي وين يا آصف!؟
عقد حواجبو وعرفت انو م فهمني ضحكت وقلت ليهو..
وسام: قصدي يعني لمن نصل المدينه حا تعمل شنو
آصف: ما عارف والله يا وسام ما فكرت ابدا بس بالي كلو كان في الحريه..
وسام: معقوله م عندك اهل تمشي ليهم!؟
آصف: امي وابوي ماتو وعمي قتلتو بي يدي امشي لمنو يا وسام
وسام: واهل امك!؟
آصف: قطعو علاقتهم بينا من زواج امي تفتكري حا يتزكروني!!؟
وسام: ما عندك ليهم رقم ولا عنوان!؟
آصف:كل البعرفو انهم مشهورين بلقب "اولاد البرقاوي" لانو ابوي زمان كان بقول لي امي يا بت البرقاوي
وسام ضحكت وقالت: برقاوي دا شنو الاسم البضحك دا هههه
آصف: انا اصلا اهل امي من بربر وفي محل اسمها برقاوي جو منها عشان كدا بقولو ليهم اولاد البرقاوي
وسام: ايوااا.. لكن اسم غريب بجد يا ود البرقاوي

آصف كان بعاين لي وانا بضحك كدا وقال: انتي عندك ضحكه حلوه شديد
عاينت ليهو وما رديت
آصف: انا صح ما عارف ف نهاية القصه حصل شنو بس كل العارفو انو الحصل معاك حولك لانسانه تانيه من حكايتك.. وسام المعاي دي ما نفسها وسام الفي القصه الكانت بتضحك وكلها روح مرحه بتنطط هنا وهناك والابتسامه من وشها م بتتمحي

وسام اتلفت على الشباك وما رديت عليهو كنت بحاول ادس الدموع البدت تتجمع في عيني وانا متاكده انو شافهم.. والدموع دي عشان كل كلمه هو قالها كانت صح انا حياتي ادمرت من الليله ديك وبقيت انسانه تانيه خالص.. انا كل يوم بمر علي بشتاق فيهو لنفسي اكتر.. وحصل مرا جربتو الشعور دا!!.. انكم تشتاقو لنفسكم وما تقدرو تبقو زي زمان مهما حاولتو لانو لسه في سواد جواكم والسواد دا حا يلحقكم وين ما كنتو..

ما عارفه فضلنا كم في العربيه بس لما الليل جا عم الطيب وقف الدفار على جنب وقال انو ح يرتاح شويه وينوم والصباح بنتحرك .. وفعلا وقفنا وهو على طول نام حتى آصف كان عاوز ينوم وانا بس خاته راسي في الشباك وواضح اني م حا انوم..

آصف: وسام!!
وسام: هاا
آصف: انتي م ح تنومي!؟
وسام: لا انا م جايني نوم
آصف: كيف ما جايك نوم شوفي واضح عليك التعب الله يرضى عليك نومي وارتاحي شويه حتى عم الطيب اهو نام
وسام: بس يا آصف..
آصف قاطعها وقال: اطمني ما بحصل شي المكان دا امان يا وسام .. نومي الله يرضى عليك

كنت متردده وخايفه بس في نفس الوقت نعسانه شديد وبحاول اقاوم بس بعد كلام آصف اطمنت شويه وسندت راسي وما عارفه كيف ومتين بس نمت.. وياريتني ما نمت ولا غمضت عيوني لانو كل ما اغمضهم بفتحهم على كابوس جديد..

سمعت صوت جوطه وكان بعيد شديييد افتحت عيوني بضيق وكان الصوت بدى يوضح ازعاج وكواريك وصوت عربات.. فتحت شويه شويه ولقيت روحي براي في العربيه رفعت راسي وكان في صوت الانزار العمري ما انسى صوتو..

وسام: دد..دا انزار شرطه!!!

كنت خايفه فتحت العربيه ونزلت واول م نزلت صرخت من الصدمه كان في شرطه وعساكر جزو ماسك عم الطيب والباقين متلمين في آصف وبضربو فيهو لمن شفت المنظر دا صرخت وجريت عليهو وآصف اول ما شافني اتخلع وبقى يكورك لي..

آصف: وسام لاااااا وسام اجري يا وسااااام وسام لالالا

كان بكورك لي وانا ماشه عليهو وببكي فجأه لقيت في عساكر مسكوني وبقيت احاول اتفكى منهم عشان الحق اصف الكان بنضرب بقوه ..

وسام وهي بتبكي: الله يخليكم فكوهو حا يموووت ما تضربوهو الله يخليكم فكوهووو ..آصــــــــــــــــــف

بس ولا كأنو بتكلم مع حد وكنت بحاول اتفكى بس كانو ماسكني بقوه وآصف جسمو كلو جاب دم وانا بعاين ليهو وببكي وشفت عم الطيب العساكر فكوهو افتكرت حا يمشي لي آصف ينقذو بس انصدمت لمن عم الطيب مشى ناحية واحد من العساكر وسلم عليهو بالاحضان!!!!!!!!!!!!!!! .. بس دي ما كانت الصدمه.. الصدمه كانت لمن شفت وش العسكري السلم عليهو وقتها صرخت وانا ما قادره اصدق عيوني


وسام: أسعــــــــــــــــــد..!!!!!!!!!!!!!!!!!!!

__________________

كانت شايله صينية فيها اكل وماشه على غرفه في الطابق الفوق لمن وصلت ضربت الباب بس ما جاها صوت بقت تنادي وبرضو ما سمعت شي استغربت وفتحت الباب براحه واستغرابها زاد لمن لقت الغرفه فاضيه نزلت ولسه الصينيه في يدها وأثناء ما هي نازله في السلم الباب ضرب بي قوه اتخلعت وقلبها قبضها منو الجاي في الوقت دا وبضرب بالطريقه دي!!!.. جا عبدالرحيم فتح الباب وكانت دي

عبدالرحيم: هنادي؟؟.. بسم الله مالو نفسك مقطوع كدا

هنادي وعيونها بطلع شرار اتجاهلت كلام عبد الرحيم ودخلت الصاله وبقت تنادي بأعلى صوت..

هنادي: اسعـــــــــد أسعـــــــــد يا أسعـــــــــد

جا عبد الرحيم مسكها من يدها وبحاول يسكتها قال بغضب..
عبد الرحيم: هنادي فهميني فشنو وبتنادي لي اسعد عاوزه منو شنو!!!؟؟
هنادي: حا تفهم لمن يجي اسعد لانو انا كمان عاوزه يفهمني حاجات كتيييير

قالت كدا واتلفتت منو كانت ماشه على السلم وهي بتنادي بصوت لي أسعد بس وقفت بصدمه وهي بتسمع في عبد الرحيم القال..

عبد الرحيم: ما تتعبي نفسك اسعد مافي البيت
هنادي عاينت ليهو بصدمه وقالت بصوت واضح الخوف فيهو: اسعد مافي البيت!!؟.. طيب اسعد وين عبد الرحيم كلمني وييين اسعد
عبد الرحيم كان مستغرب في رد فعل هنادي بس جاوبها وقال: ما عارف وين بالضبط بس قبل يطلع قال لي انو عندو مهمه برا المدينه وتقرببا في الحدود..
هنادي: فف.. في الحدود؟؟؟؟ لالالا

قالت كدا وختت يدها في راسها وهي ماشه على الباب واطرافها كلها ترجف عبد الرحيم وقفها وهو عاوز يجن من تصرفاتها وقال بنفعال ..

عبد الرحيم: هنادي فشنو فهميني واسعد مشى وين؟؟؟
هنادي اتنفضت منو وقالت بغصب

هنادي: ولدك مشى الحدود عشان في سجينه هربت وهو رسلو ليهو عشان يجي ويفتش عليها.. والسجينه دي بتكون وسام بتك يا عبد الرحيم

-وسام...!!!!!

كان دا صوت سوزان الوقعت الصينية من يدها وهي بتلفظ في اسم بتها... بتها؟؟

_______________

بعد ما كان الهدوء مالي على الزنزانة المنزويه في اخر الممر ..الكانت مليانه ضجه وناس اسي بقى الصمت هو حليفها صمت مرعب وتلاته سراير فاضيه بسبب اصحابها الماتو والهربو!!.. كانو بس قاعدين اربعه بنات او ممكن نقول تلاته لانو واحده منهم كانت جسد بلا روح حاضنه المخده وهي بتبكي طول الوقت ومرا تردد اسم ياسمين ومرا وسام.. ايوا ياها "وداد!!'' وجمبها ساره البتعاين ليها بحسره بعد م كشفت خيانتها ليهم ومشاركتها في قتل صفاء.. وفي زاويه تانيه كان في سريرين جمب بعض سرير فيهو سويدا النايمه والسرير التاني وكان دا نفس السرير المن فتره قومت شاهيناز وسام منو ومن هناك بدت قصتنا.. كانت قاعده فيهو شاهيناز بكل وقاحه وسرحانه والغضب مالي عيونها انتبهت لي عدن القعدت جمبها وهي بتقول..

عدن: شاهيناز!!

شاهيناز ما عاينت ليها وما ردت عليها
عدن بلعت الغصه الفي حلقها ورفعت يديها براحه في وش شاهيناز وقالت بصوت برجف وملان خوف..

عدن: شش.. شاهيناز شوفي
شاهيناز عاينت ليها بملل واول ما شافت يدين عدن اتخلعت واتنفصت من عدن وهي بتمش منها بعيد وبتكورك..

شاهيناز: ابعدي منيييي دا شنوو داااااا
عدن دموعها نزلو وقالت: شاهيناز
شاهيناز بنفعال: اوعى تقربي لي خليك مكانك انتي مجنونه دا شنو دا؟؟؟؟

عدن وقفت مكانها وهي بتعاين لي يديها الاتملو علامات حمراء وهي لسه بتحك فيهم وجلدها بياكلها بطريقه غريبه.. عاينت ليهم وعيونها ملانه دموع قالت..

عدن: ما عارفه ما عارفه دا شنو انا.. شاهيناز ساعديني شاهيناز الالم بقتلني انا ما قادره اتحمل

قالت كدا وهي بتحك في نفسها بطريقه هستريه وبتبكي وحتى سويدا النايمه صحت بخلعه وجات عليها وساره كمان بس شاهيناز كانت بتعاين من بعيد وقالت..

شاهيناز: مجنونه انتي؟؟؟.. اساعدك كيف يعني؟؟؟ عاوزه المصيبه دي تجيني انا كمان.. خليك بعيده عني اوعك تصليني انتي ممكن تعاديني
عدن: شاهيناز!! انا عدن شاهيناز ساعديني انا عدن يا شاهيناز عدن
شاهيناز بلا مبالاة: ويعني شنو عدن؟؟؟ ما تفكري عشان نفذتي لي كم حركه ح اخليك تاج راسي كلكم هنا عندي واااحد فاهمه ؟؟؟ كلكم حشر تحت جزمتي دي..
عدن بصدمه في رد شاهيناز: شاهيناز!! ليه بتقولي كدا؟؟؟ اا.. انا كنت معاك في كل حاجه ما حصل خليتك ولا فكيت يدك يوم كنت بنقذك من كل حاجه وبخش في المشاكل بدلك وعشانك .. وانتي رافضه تساعديني؟؟ انا اول مرا اطلب منك حاجه يا شاهيناز حراام عليك ساعديني الله يساعدك ساعديني وخليهم يجيبو لي دواء انا بمووووت بمووووت
شاهيناز كانت بتعاين ليها ببرود وقالت: الدراما الرخيصه دي م تعمليها لي انتي نفذتي الانا قلتو وبالمقابل انتي لسه عايشه قدااامي اوعك تفتكري نفسك اتفضلتي علي في يوم فاهمه؟؟؟.. ولاخر مرا اقولها ليك خليك بعيده مني يا عدن

قالت كدا وكانت ماشه على الحمامات وهي بتنفض في جسمها بقرف من لمسة عدن ليها.. وعدن كانت بتعاين بنظرات كلها خيبه وكسره وصح جسمها واجعها شديد بس دا كلو ولا حاجه بالنسبه لوجع قلبها وهي بتشوف معاملة شاهيناز ليها.. شاهيناز الكانت فاكراها اقرب انسانه ليها وانها مهما كانت سيئه م ح تقلب يوم عليها ..بس هي نست انو السئ دا مهما كان فهو سئ..

عدن بكت بحرقه وهي بتعاين لي يديها وقالت..
عدن: دي نفس الايادي القتلت بيها صفاء ونفسها الاذيت بيها وسام كتيييير انا استاهل استاهل كل شي بحصل معاااي

وبقت تبكي وسويدا وساره حوليها وما عارفين يتصرفو كيف وفجاءه باب الزنزانة فتح وجا صوت بقول..

-شاهيناز!!

كان دا صوت المشرفه نفحات الجات داخله الزنزانة وشافت منظر عدن عاينت ليها ببرود وما قالت اي شي وشافت شاهيناز طالعه من الحمام نادتها سريع بلهفه واول ما وصلتها مسكتها من يدها وطلعو وما عاينو وراهم للمسكينه البتتألم دي مرتين.. ولمن طلعو نسو الباب فاتح وجات مشرفه تقفل الباب سويدا وساره اول ما شافوها جرو ليها وطلبو منها تساعد عدن وفعلا المشرفه لمن شافتها اتخلعت ورفعتها سريع مع مشرفه تانيه وقفلو الباب ..

كانت جارها من يدها بقوه وماشه بستعجال وهي ماشه بس وما فاهمه اي حاجه لحد ما فجأه لاحظت انو بوابة السجن مفتوحه استغربت ليه البوابه فاتحه زي الوقت دا؟؟.. بس استغرابها زاد اول ما شافت عربية شرطه وراها عربية عساكر جات خاشه وكان في عساكر كتار واقفين تحت وفي نصهم كان في ..

شاهيناز: أم بخت؟؟؟... بتعمل شنو هنا زي الوقت دا وفي شنو تحت؟؟

كانت بتتكلم وهي بتعاين لي نفحات الجاراها بس نفحات ما ردت عليها ولسه مواصله في المشي.. شاهيناز نفضت يدها بغضب وقالت

شاهيناز: نفحات فهميني في شنو والعساكر ديل واقفين هنا ليه؟؟؟؟
نفحات بلعت ريقها وهي بتقول: وسام مسكوها يا شاهيناز
شاهيناز بفرحه:. شنووووووو؟؟؟ احلفبيي واخيراااااا
نفحات بتوتر: بب..بس
ساهيناز سكتت وهي بتعاين لنفحات ولاحظت التوتر الفيها وقالت: بس شنو وانتي متوتره كدا مالك؟؟
نفحات: لانو وسام م حا يخلوها هنا
شاهيناز: كيف يعني ما فهمت؟؟
نفحات: حا يحولوها لي سجن جوا المدينه
شاهيناز بصدمه: يحولوها؟؟؟
نفحات هزت راسها بنعم
شاهيناز بنفعال: كيف يعني يحولوها؟؟ طيب وانتقامي؟؟ انا لسه ما فشيت غليلي فيها النار الجواي دي لسه ما طفت يا نفحات
نفحات مسكت شاهيناز من يدها وقالت: شاهيناز انا في راي انك تنسيها خلاص نحن م حنقدر نعمل شي العساكر جو يشيلو الاذن من أم بخت وحا يمشو
شاهيناز نفضت يدها من نفحات وقالت: انساها؟؟ قصدك استسلم يا نفحات؟؟؟.. انا عمري ما استسلمت ولا حا استسلم فاهمه؟؟
نفحات اتنهدت وهي بتقول:طيب حا تعملي شنو؟؟ صدقيني م حاتقدري تسوي حاجه ووسام حا يسوقوها قدام عيووونك
شاهيناز: منو قال ما بقدر ؟؟ انا ماف شي مستحيل علي

قالت كدا ونفحات عاينت ليها بستغراب مافهمت حاجه لحد ما شاهيناز ابتسمت ليها بخباثه ورجعت ورا خطوتين .. واتلفتت منها فجأه وجرت..

نفحات: شاهينااااااااز

بس شاهيناز ما وقفت وجرت نزلت بالسلالم لحد م وصلت تحت وبقت ماشه ورا الأعمده واستغلت فرصة انشغال أم بخت مع العساكر وطلعت وراهم فتحت صندوق واحد من العربات وركبت فيهو وهي بتقول..

شاهيناز: ضعتي قبل كدا من يدي يا وسام.. بس المرا دي مستحيل اضيعك وح اكون معاك وين ما كنتي

قالت كدا وقفلت صندوق العربيه الاتحركت بعد مسافه بسيطه واتقفلت البوابات.. وكل دا كان تحت نفحات العاينت للعملتو شاهيناز بصدمه وهي بتقول بنفعال

نفحات: عملتي شنو يا شاهيناز!!!!!!!!!!!! انتي مشيتي للموت برجولك الله بس البعلم عن نظام السجن داك وانتي مشيتي برجولك ليهو !!!!!!!!!



شاهيناز الانتقام عماها وما كانت عارفه هي ماشه ياتو سجن؟؟؟.. لانو السجن الحا تشوفو حا يخليها من اول لحظه تتمنى ترجع للسجن الكانت فيهو.. في السجن داك ماف رحمه وماف حد بعرفها وبشتغل تحتها هناك ماف نفحات ولا في سويدا وعدن كمان!!.. هناك حتكون سجينه زي اي سجينه وحا تشوف لأول مرا يعني شنو تكون تحت رحمة غيرك وهي الكانت عايشه حياة كل الناس تحت رحمتها...

_________________

صداع فظيع والم في كل جسمي فتحت عيوني بصعوبه ما عارفه انا وين بس حاسه بالعربيه بتتحرك وكان في ظلام بس الا الشباك الصغير الفي باب العربيه الجايب ضو خافت عاينت لنفسي ويديني مربوطه بكلبشه وتقرببا كنت قاعده في صندوق عربيه كبير ..عاينت حولي ولقيت واحد راقد جمبي في العربيه اتخلعت وانا بعاين لوشو..

وسام بصدمه: آصف ؟؟.. آصـــــــــف!!!

بقيت بزحف عشان اصل ليهو ما قادره امسكو بي يدي بس لزيتو برجلي على ضهرو وهو بدا يصحى وكان بكح وبطلع دم انا اول ما شفت منظرو بقيت ابكي زيااده ما قادره اصدق الحصل في لحظه بس كل احلامنا الكنا بنحلمها رجعت اتحولت لكابوس تاني.. عاينت لي آصف وهو بحاول يقوم وهو كمان يدو كان فيها كلبشه بعد صعوبه قدر يرفع نفسو وسند راسو جمبي وهو بقول بتعب ونفس مقطوع..

آصف: وو..وسام
وسام وهي بتبكي: آصف آصف حصل شنو يا آصف كك..كيف لقونا انا ما فاهمه حاجه
آصف: عم الطيب هو الغدر بينا يا وسام هو الدلاهم علينا
وسام بكت وهي بتتزكر في عم الطيب لمن كان بصافح في أسعد وقالت: بس متين وكيف
آصف: مم.. ما عارف بس كنت نايم وفجأه صحيت لقيت عم الطيب م قاعد جمبي لمن صحيت نزلت ولقيتو واقف بعيد من الدفار وماسك تلفون في يدو زي الكأنو بوصف في حاجه لمن شافني نزل التلفون وانا عاينت ليهو بستغراب وكنت بسألو لو في مشكله وهو كان بس ساكت ما قال شي وبعاين لي بطريقه غريبه وشويه تاني ولقيت في عربات كتيره جايه علينا وسامع انزار الشرطه وقتها فهمت انو هو كشفنا وقبل اجيك واهرب العربات وصلت ونزلو عساكر مسكوني وبقو يضربو فيني لحد ما انتي جيتي وتاني اغمى علي من الضرب اخر حاجه سمعتها صوتك وانتي بتنادي بي اسم... أسعد!!!!

أسعد!!..سندت راسي على العربيه وانا دموعي نازله ما قادره اصدق اني شفتو كان قدام عيوني بس..بس كان بضحك!! كان بصافح في الراجل السلمو اختو عايشه عشان هو يقتلها ويعذبها!!

آصف: أسعد دا نفسو الفي قصتك يا وسام؟؟؟
وسام ما ردت
آصف بلع ريقو بتوتر وقال: أسعد نفسو هو..
وسام: اخوي!!..

قلتها وانا بعاين ليهو ودموعي ما راضيه تقيف ولا انا ما منعت نفسي بكيت وانا بقول ..
وسام: اخوي يا آصف دا أسعد اخوي هو اللقانا نحن هنا بسببو نحن هنا بين يديهو يا آصف بين يدين أسعد
آصف ابتسم وقال لي: طيب انتي بتبكي ليه نحن مع اخوك انا عارف انو هو عسكري بس مهما كان دا اخوك هو اكيد حا يساعدك هو حا ينقذك صح؟؟؟

ضحكت.. والله ضحكت من فكرة انو أسعد بساعدني؟؟ عاينت لي آصف وقلت ليهو بوجع

وسام: كيف عاوز من نفس الأيادي الرمتني جوا السجن في يوم تطلعني منو يا آصف كيف؟؟
آصف اتصدم وقال: كك..كيف يعني؟؟؟
وسام: انت ما عارف حصل شنو في الليله ديك ولا ح تقدر تتخيل اصلا الحصل

قلت ليهو كدا ولفيت وشي وكملت بكى بس هو فجأه قال لي..

آصف: طيب وريني.. وريني شنو حصل في الليله ديك
وسام :ما بقدر يا آصف والله ما بقدر ما نفسي اتزكر الليله ديك انا لو خيروني اقدر احذف شنو من حياتي حا احذف الليله ديك يا آصف لانها اكبر كابوس انا عشتو وملاحقني للان
آصف بهدوء: وسام.. انا عارف انو صعب عليك بس انتي لازم تحكي لازم تكملي القصه انا عاوز اعرف الحصل
وسام ما ردت
آصف: وسام؟؟

كان صعب علي احكي او اتزكر بس لمتين حا افضل ساكته ولمتين حا اكون بهرب من الواقع دا لمتين حا اكون خايفه اواجهه حقيقتي ..!! عاينت لآصف وأخدت نفس عميق وانا بقول..

وسام: عاوز تعرف صح طيب اسمع..

*"فلاش باك"*

حماس وتوتر وفرح كل دا كنت حاسه بيهو جواي بقيت شايفه المسافه فجأه بقت بعيده شدييييييد وانا عاوزه اصل سريع عاوزه اشوفو.. عاوزه اشوف محمد عاوزه يكون دا احلى عيد ميلاد لي بي معايدتو وهديتو..

-وصلنا يا آنسه

كان دا صوت بتاع الركشه القطع سرحتي وهو بقول كدا.. عاينت للمطعم قدامي وكان شبهه فاضي بس شغال ..نزلت وفتحت الشنطه ودفعت لي بتاع الركشه اخر قروش كانت عندي وجريت على المطعم فتحت الباب ودخلت ومشيت على المطبخ وكان في نفرين بس في المطبخ وقتها راجل كبير ابتسم لي لمن جيت داخله وانا متعوده اشوفو اصلا كل ما اجي بادلتو الابتسامه ومشيت على الستاره زحيتها وفتحت الباب وطلعت..

عاينت للباب قدامي بتوتر وكان مفتوح شويه وقفت مسافه وانا بحاول اخفي توتري الما لاقيه ليهو مبرر دا وخشيت وكان الجو صاني وهادي ما على العاده دخلت في الممر لحد ما وصلت الصاله كان الجو ظلام بس لدرجه مخيفه انا هنا توتري زاد وبقيت انادي بصوت برجف..

وسام: مم..محمد؟؟ رر.. رميساء رميساء؟؟

وفجأه اشتغلت الانوار ولقيت الصاله مزينه فيها بوالين واشرطه ملونه حتى الطاوله في النص كان فيها قالب كيك بالشوكلاته صغيروني بس حلو وعليهووحرفي *"W"* عاينت للمكان والكيك بفرحه ومحمد ولع الشموع وهو بغني لي.. لحد ما وقف جمبي وقال

محمد بإبتسامه: سنة حلوه يا جميل
وسام بحماس: محمد دا شنووو داااا
محمد: دي حاجه بسيطه عشان عيونك يا قلبي
وسام: محمد
محمد: عيونو
وسام: بالجد انا بحبك
محمد: وانا بموت فيك

قال اخر كلمه وهو بحضني حرفيا اتخلعت بس عشان كنا فرحانين ختيت يدي واستمتعت باللحظة.. بس فجأه ادركت اننا برانا لقيت نفسي بسأل!!

وسام: محمد!!.. وين البقيه؟
محمد زحا مني وهو بقول: اممم طلعو قريب اسي بجو
وسام : ايوا فهمت
محمد: م حا تقطعي الكيك؟؟

قالها وهو بمد لي السكين..
وسام: ما حا ننتظرهم؟؟
مسكني من يدي واداني السكينه وهو بقول بغمزه..
محمد: لا.. دي لحظتنا نحن

شلت منو السكينه وكنت مبسوووطه شديد ما اتوقعت محمد يعمل كل دا عشاني كنت مبسوطه حرفيااا.. عاينت للكيكه وقبل اطفي الشمعه محمد مسكني وهو بقول..

محمد: اتمني امنيه
وسام: انت معاي ما عاوزه حاجه اكتر من كدا
محمد ضحك وقال: طيب اتمني الله يخليك لي
وسام: انا واثقه انك لي وما حا تخزلني في يوم

محمد ابتسم لي وبس وانا وقتها م كنت ملاحظه لي اي حاجه بس غرقانه في جو ملان الوان وحب و... محمد!!

بعد قطعت الكيك واكلنا منو اتصورنا انا وهو بتلفونو وتلفوني..

محمد: تعالي تعالي عاوز اديك الهديه حقتك

قال كدا وهو بسحبني من يدي كنت ماسكه التلفون بتصور نزلت التلفون وانا ماشه وراهو بستغراب ..لقيتو ماشي على المكاتب وعاين لي وانا بس مستغربه وفجأه لقيت يدو بتمش على الباب ..اي اي الباب السري حق الغرفه العمري م دخلتها ومن جيت كان نفسي اعرف وراها شنو.. وانصدمت لمن شفتها كانت غرفة نوم!!.. كنت مستغربه ليه الغرفه دي هنا؟؟ والشله بدخلو هنا بعملو شنو؟؟..

وسام: محمد!!.. دي شنو؟؟
محمد طلع التلفون من جيبو وقال من غير يعاين لي: كيف دي شنو ..دي غرفه يا روحي
وسام: اا.. انا عارفه بب..بس الغرفه دي ليه هناا وانتو بتعملو فيها شنو وو..انت جايبني هنا ليه؟؟
محمد: وس..

وفجأه سكت بصوت نغمة التلفون الرنت ردا وهو بأشر لي ثواني وطلع من الغرفه وقفل الباب وراهو.. انا كنت لسه واقفه مكاني ختيت التلفون براحه وانا بعاين للغرفه بحاول افهم في شنو ووقتها مهما كان مستحيل كان يخطر على بالي العملو محمد!!

حسيت اني قضيت فتره في الغرفه ومحمد ما جا فتحت الباب وطلعت اشوف فشنو لقيت الباب برا فاتح وفي رجال غريبين بشيلو في الكراتين الفيها مواد غذائيه للمحتاجين استغربت وقلت معقول في استلام للمواد زي الوقت دا؟؟؟.. بس فجأه محمد ظهر ووقف قدام الراجل والراجل طلع ربطة بتاعت قروش انصدمت وانا بعاين ليها كانت قروش كتيره شدييييييد بس صدمتي بالقروش ما كانت اكبر من صدمتي لمن سمعت الراجل وهو بقول لمحمد..

-المرا الفاتت بضاعتكم ما اتوزعت كويس وفي ناس في المنطقه المهجوره ديك م وصلتهم كرتونه
محمد بغيظ قال: اعزرنا يا ريس بس جبنا لينا واحد مبتدئه وغبيه شويه بتكون نست تدي ناس كتار بس غلط زي دا ما بتكرر تاني
-انت عارف انا ما بجب الاغلاط عشان كدا خلو بالكم ..البدره دي قويه شدييييييد وبتلزمني
محمد: المخدر دا بالزات خلي بالك منو يا ريس لانو كمية زياده منو ممكن توديك لي ربك
الراجل ضحك وهو بقول: ما تخاف علي دا لعبتي يا *"شادي"*

قالها وغمز ليهو بخباثه ومحمد ضحك بطريقه غريبه كانت ضحكه مخيفه و.. شريره

الراجل طلع وانا كنت واقفه ورا الحيط بستقبل صدمه ورا التانيه!!!
مخدرات!؟؟؟
شادي؟؟؟

فجأه حسيت بي رجول جايه كنت عارفه دا محمد جاي على الغرفه خفت وم كنت عارفه اعمل شنو بس فجأه تلفونو ضرب تاني وهو وقف يرد واول ما التلفون ضرب انا كنت عاوزه امشي واهرب.. بس وقفت اول ما سمعت بقول

محمد: رميساء!!.. بتتصلي لي مالك انتي؟؟؟؟ مش قلت ليك اوعك تتزفتي تدقي في الرقم دا؟؟

اتخلعت من الطريقه الكان بتكلم بيها وهو ما كان مشغل الاسبيكر بس صوت التلفون كان عالي وكنت قادره اسمع صوت رميساء الردت عليهو بطريقه خلعتني اكتر!!!

رميساء: انت ما بتقدر تتجاهلني كدا يا محمد انت عارف انا بحبك انت ليييه بتعمل كدااا
محمد: رميساء بطلي الدراما البتسوي فيها دي ودا ما وقت جنك افهمييي
رميساء: ما وقتو؟؟ ولا انت ما فاضي لي من وسام حقتك انت اكيد معاها اليوم صح
محمد: دا شي ما يخصك وما تتصلي تاني

كان عاوز يقفل الخط بس هي وقفتو..
رميساء: محمد خلاص اقيف ما تقفل الخط اسمعني
محمد: في شنو تاني
رميساء: شوف اا..انا عارفه انك بتحبني انا وبس ووسام دي مرحله عابره صح الله يرضى عليك بس فهمني يا محمد واوعدك تاني ما اتصل
محمد بغضب: رميساء انتي مجنونه ؟؟ انا ما بحبك ولا بحب الزفته القاعده جوا دي كمان انا ما بحب اي زول غير نفسي انتو الاتنين مرحله عابره في حياتي وزي ما لعبت بيك انتي واخدت العاوزو هي كمان الليله دورها حا اخدو العاوزو منها وبعدها بجدعها زي ما جدعتك يا رميساء فاهمه؟؟..
رميساء ما ردت بس كانت بتبكي
محمد اتنهد بضيق وهو بقول: اياك تتصلي تاني انا عندي لعبه وسخه عاوز انفذها

قال كدا وقفل الخط ورجع ورا ما عارفه مشى وين بس انا كنت متسمره مكاني من الصدمه ما قادره اصدق البحصل ما قادره اصدق السمعتو ..بقعوو علي صدمه ورا التانيه وانا ما قادره استوعب حاجه ابدا.. دخلت الغرفه وكنت عاوزه أهرب قبل ما يشوفني بس فجاه سمعت صوتو وهو جاي طوالي مشيت عاوزه اقفل الباب بس هو جا على الباب سريع لزاهو ورماني في الارض بقيت بزحف لي ورا وانا بعاين ليهو وببكي وهو بضحك بطريقه خبيثه عاين لي وقال..

محمد: مالك يا حلوه؟؟
وسام: مم.. محمد دد..دا شنو الحصل برا الكراتين دي فيها شنو وو.. رميساء رميساء دا شنو القلتو ليها دا..اا..انت انت بتمزح معاي صح دد..دا مقلب صح مقلب سخيف منك يا مم..محمد صص..صح؟

محمد ضحك في منظره والخوف الفي عيوني نزل لي مستواي قرب مني وانا من الخوف رجعت ورا لمن ضربت راسي بالسرير وبقيت احك جسمي فجأه ما عارفه ليه وانا بسمع فيهو..

محمد: تؤتؤ شوفي حالتك كيف يا مسكينه عرق وخوف وتوتر و .."عاين لي يدي البحك بيها جسمي وقال" وحكه
وسام: ابعد منيييييييييي انت شكلك واحد مجنون ابعد مني انا عاوزه امشي البيييت
محمد: بيت؟؟.. تاني مافي بيت يحلوه انتي جيتي هنا بي كيفك بس حا تطلعي بي كيفي انااا.. انا ما سويت المسرحيه دي كلها عشان ارجعك البيت بالسهوله دي يا حلوه
وسام: محمد انت بتقول فشنو محمد انت شكلك شارب حاجه انت ما طبيعي سامعني انت ما طبيعيبييي
محمد ضحك وهو برفع راسو قال: شارب حاجه؟.. فعلا انا شارب بس عارفه شنو؟! شارب مخدر مفعولو قوي شدييييييد عارفه المخدر دا جبتو من وين جبتو من الكراتين البرا الكراتين البنوزعها للناس المحتاجين اقصد الناس المريضين البدفعو ملاييين عشان يحصلو على مخدر واحد بس
وسام: مخدرات؟؟ اا..انت انت تاجر مخدرات يعني الكراتين البرا دي مافيها مواد يعني انت كنت بتوزع مخدرات على الناس اا..انت واحد شيطاااان انت انسان ما طبيعي ليييه عملت كدا ليييييه حرام علييييك حرااااام الشرطه لو مسكتك حا تفصل راسك من جسمك يا حقييييير وانا كمان ما حا ارحمك على السويتوو
محمد: ما حا ترحميني؟ انتي اقدري قومي اول هههه ..ما شايفه نفسك بتحكي روحك كيف؟؟ عارفه ليه لانو اليوم ما اخدتي جرعة المخدر حقك عشان كدا كل جسمك حا يحكك حتى الدوخه ولفة الراس دي م حا تروح لو ما اخدتيها.. لو انا مدمن والشرطه حا تمسكني ف انتي كمان مدمنه زيي والشرطه ما حا ترحمك يا وسام عبدالرحيم مدمنة المخدرات وانتي الوزعتي معانا الكراتين ديك وانا عندي دليل يثبت الحاجه دي والصور معاي كمان

قال كدا وغمز وانا نزلت راسي وبقيت ابكي وانا ما قادره اصدق العملتو اا..انا كيف عملت كدا كنت بسلم في المخدرات بي يدي وانا ما عارفه طول الفتره دي وانا عايشه بين تجار ومدمنين وما عارفه اي حااجه ..بب..بس انا كيف بقيت مدمنه زيهم؟؟؟

وسام رفعت راسها عاينت ليهو وهي بتبكي: عملتو فيني شنوووو كيف خليتوني وسخه ومدمنه زيكم كيييييف
محمد ختا يدو في وشي وضغط وشي شديد وقال: ماف زول عمل ليك حاجه انتي عملتي في نفسك كدا براك

قال كدا وطلع علبه من جيبو عاينت ليها بصدمه كانت زي علبة البودره البعملها في وشي ضحك وهو بعاين لي قال..
محمد: شايفه دي؟؟.. هدية جميله ليك اتزكرتيها.. وهي المخدر الكنتي بتاخدي كلو يوم وانتي ما واعيه.. واليوم شكلك ما عملتي هههه

حرفيا كنت مصدوومه كنت حا اجن نفسي اقوم اخنقو واقتلو بس ما كنت قادره جسمي كان واجعني وحاكيني شديد وانا ببكي ما قادره اصدق انو الحبيتو عمل فيني كل دااا..

وسام دموعها نزلو وقالت: لل..ليه ليه يا محمد لييييييه انا حبيتك يا محمد والله بجد انا حبيتك من كل قلبي ليييه تعمل فيني كدا معقوله ما شفقت علي انت دمرتني يا محمد انت نهيت حياااتي قبل تبدا حرااااام علييييك حرااااام والله حرااام
محمد: هشششش ما عاوز اسمع نفس اياك تتكلمي عن الحب لاني عمري م حييتك ولا حبيت اي زول.. وما زول عمل فيك كدا انتي الكذبتي على نفسك واهلك عشان تجي هنا انتي الكنتي بتصدقيني وتعملي كل شي معانا وماف زول غصبك انتي الوقعتي في فخنا وجيتينا بي رجولك .."قرب مني وهمس وقال" وما تنسي انك انتي الرسلتي لي اول رساله كمان
وسام دفرتو منها وهي بتقول بنفعال: الله يلعن اليوم داك ياخييي ياريت اتقطعت يدي وما شلت تلفون ولا رسلت ليك زاتو انا بكرهك يا محمد انت احقر انسان يلاقيني لييييه عملتو فيني كدا انا عملت ليكم شنوووو حسبي الله ونعم الوكيل فيكم واحد واحد وصدقوني انتو ما حا تطلعو منها يا محمد انتو ح تخشو السجن وبسببي انا كمان

قلت كدا وجيت اقوم هو حاول يمسكني لزيتو بس قام بقوتو ومسكني وثبتني في الحيطه وقرب وشو مني بطريقه مقرفه وقال..

محمد: لالا ما حزرتي ما بالسهوله دي يا وسام تعبت شديد عشان اصل ليك مكالمات وشات وكلام حلو وسهر وكل دا يضيع ساااي؟؟ انا بستحق اخد جائزتي واحصل عليك بحق لي استمتع بعد التعب دا كلو صح؟؟؟

قال كدا وهو بعاين لي بطريقه خبيثه خلتني اشمئز منو شدييييييد عضيتو في يدو وهو فكاني جريت على الباب تاني بس فركشني من رجلي وقفل الباب وانا بعد وقعت قمت سريع واول ما رفعت راسي هو لزاني على السرير بقوه ...

وسام: محمد لاااا محمد الله يرضى عليك خليني امشي محمد حراااام عليك يا محمد الله يرضى عليك لااااا
محمد: ما تخافي انتي كمان ح تستمتعي

كان بتكلم وهو بفك في زرار قميصو وانا بديت اصرخ وابكي بهستريا في الوقت دا ما كنت قادره افهم اي حاجه والمكان غير صرخاتي ماف شي مسموع بس ماف زول جا عشان يساعدني عاينت لمحمد القعد في السرير عشان يطلع جزمتو واداني ضهرو.. واتلفت وراي الطاوله الجمب السرير كان فيها فازه تقيله شلتها براحه وقربت منو عشان اضربو على ضهرو بس هو فجأه اتلفت وانا اتخلعت وضربتو بكل قوتي على راسو....

محمد: وساااااااااااااااااااااااااام

صرخ بي اسمي وهو بترمي في الارض والارض كلها اتملت دم من راسو وانا اتخلعت ومنظر الدم خلاني ارجف شدييييييد رميت الفازه من يدي ومحمد غمض عيونو قربت منو وانا برجف..

وسام: مم.. محمد مم..محمد

ختيت يدي جمب انفو وما كان في نفس زحيتها سريع وانا ما قادره اصدق اني عملتها!!!!

وسام: اا..انا انا قتلتو انا قتلتوووووو ااا..انا قتلتوووو قتلتوووووو

كنت بعاين ليهو وانا ما عارفه اعمل شنو قعدت بس جمبو في الارض وانا بعاين ليهو وببكي ..

وسام: محمد قوووم محمد ما تموت الله يرضى عليك لااا اا..انا والله ما قصدي والله ما قصدي والله محمد محمد قوووم الله يرضى عليك قوووم مح..

وفجأه سكت بصدمه اول ما سمعت صوت غريب ركزت شويه وكان صوت..

وسام بصدمه: الش..الشرطه الشرطه؟؟؟؟؟؟

قمت بصدمه وادسيت ورا السرير وكنت خاته يدي في خشمي عشان اكتم صوت شهقاتي وانا ببكي ضميت رجولي علي وجسمي كلو برجف وبحكني وراسي كان لافي شديد كنت شايفه الشباك فاتح قدامي بس م كنت قادره اهرب بسبب جسمي الحاكيني ولفة الراس.. وكل شويه انا بسمع في انزار الشرطه ببقى اعلى وخوفي بزيد وقلبي عاوز يقيف من الخوف م كنت عارفه اعمل شنو عاينت لي درج جمبي فتحتو وكان فيهو كيس مخدر كنت برجف ومتردده بس لمن سمعت صور ضرب على الباب البرا طوالي شلت المخدر وبقيت اشم فيهو بطريقه مجنونه وادمااااان وبعد خلصت رميتو في شنطتي وقمت على الشباك كنت بحاول انط وقبل انط فجأه باب الغرفه بقى يضرب شديد وفي صوت شرطيه بتصرخ بأعلى صوت

-افتخو الباب المكان كلو محاااصر

مع اخر كلمه فتحت الباب بقوه لمن اتكسر وانا نطيت من الشباك بس هي شافتني.. وطوالي نطت وراي كنت جاريه في الشارع وانا ببكي وجسمي كلو برجف لسه من تأثير المخدر حتى راسي كان لافي وخطواتي كل شويه بتبقى بطيئه بس الخوف كان مخليني أجري قدر ما اقدر والشرطيه من طريقة جريتي عرفت اني ما طبيعيه طوالي شالت حجر ضربتني بيهو في راسي وانا من قوة الضربه غمضت عيوني ومن الألم ما كنت عارفه هل اغمى علي او موتا ووقتها ياريت لو موتا كان حايكون اهون لي الف مرا من الواقع الصحيت عليهو..

لمن فتحت عيوني لقيت نفسي جوا سجن ومعاي بنات كتار كنت مرميه في نصهم في الارض.. لمن شفتهم كنت حا اجن قمت وبقيت اضرب في الباب واكورك بصوت عالي..

وسام: طلعوووني من هنااا يا ناااااس انا ما عملت حاجه والله طلعوني من هنااااا يا ناااس طلعوني

كنت بصرخ وبضرب في الباب جات شرطيه بقت تضرب في الباب بالعصايه بقوه وضربت اصبعي بالغلط من الألم رجعت ورا وانا بعاين ليها بديت وابكي ورجعت مسكت في الباب وقلت ليها..

وسام: الله يرضى عليك طلعيني من هنا انا ما عملت حاجه انا والله بريئه طلعوني انا ما عملت حاجه صدقينييي الله يرضى عليك

بقيت بترجا فيها وببكي وهي بس بتعاين لي بقرف ونهاي ما اشتغلت بي ومشت خلتني وانا لسه بكورك ليها عشان تفتح الباب نهاي ما سكت ولا استسلمت لحد ما هي جات وفتحت الباب اتوقعت عاوزه تقول لي امشي خلاص انتي حره.. بس اتصدمت لمن لقيتها عاوزه تكلبشني وتوديني سجن تاني وقتها من الخلعه بعد ما هي قفلت الباب وانا بقيت برا شلت الكلبشات ضربتها في راسها وجريت وهربت من السجن ... اول ما طلعت م كنت مصدقه و جريت على الشارع وانا منظري كان بخوف وببكي الحجر وقفت في نص الظلط وقفت ركشه وقلت ليهو يمشي بسس وكنت خايفه شديد وانا شايفه الشرطه جاريه وراي.. وقتها ما عارفه كيف وصلت شارع بيتنا نزلت من الركشه حتى ما دفعت ليهو حاجه وجريت على البيت وانا عاوزه امسك امي وابوي عاوزه احتمي بيهم وادسى ورا ضهرهم عاوزه يضموني وما يفكوني ابدا كل ما اجري خطوه كنت بحس اني قربت للامان اكتر.. بس لمن وصلت اكتشفت واقع تاني واكتشفت اني مشيت للموت والخطر برجولي.. وقفت في نص الحله وانا مصدومه من كمية الناس المتجمعين في ابوي وفي راجل واقف في النص كان بكورك وبقول في الالفاظ كعبه وهو بوجهه اصبعو على ابوي..وابوي!! كان منزل راسو في الارض وقاعد يسمع من غير يقول اي شي!!! والناس كلها بتعاين ليهو بقرف واشمئزاز وعلى الزاويه كانت في ملاذ المرميه في الارض وبتبكي وامي حاضناها وبتبكي معاها.. وقتها ما كنت فاهمه شي لحد ما عيني وقعت على رضوان الكان واقف قدام ملاذ وخاتي يديهو في جيبو وبعاين لي ملاذ وفي وشو ابتسامة خبيثه.. وهنا انتبهت للراجل الكان بصرخ في ابوي كان دا عمو حسين ..ابو رضوان!!!

حسين وهو بكورك في ابوي: عامل لينا فيها هدي ورضي وشيخ الحي كمان واحسن منك ومن ولدك وبناتك مااف صح؟؟؟.. طيب ودا شنو العملتو بتك المصووونه يا شيخنا دا شنو يا عبدالرحيم ممكن تفهمنا؟؟؟.. دي تربيتك الكنت بتفتخر لينا بيها كل ما نقعد معاك ديل بناتك الكنت رافع بيهم راسك صح؟؟ الليله غتسوهو ليك جوا التراااب ..انت ربيت بناتك كدا؟؟ ربيتهم يهربو مع اولاد الناس صح ربيتهم يحبو في اولاد حيهم ويهربو معاهم زي ما عملت بتك وجات لي لدي بلا حياء جاره شنطتها وبكل جراءه مسكت يدو وقالت ليهو ارح نهرب.. بس ما حسين الولدو بهرب مع بنات انا ولدي اصيل بدق الباب لو داير بت بس بتك المخطوبه وعرسها بكره هي العينها زاقت وجات تتسلط في ولدييي يا عبد الرحيم
-غلطااان

كان دا صوتي وانا بقيف في وش حسين طبعا كلهم اتخلعو لمن شافو حالتي وهم لسه ما جايبين خبر لي مصيبتي عاينت لي عم حسين ووقفت في وشو وقلت..

وسام: ملاذ ما اتسلطت على ولدك ولا مشت ليهو قلة ادب منها ولدك هو الكان واعدها يعرسها وكان مغرقها بالحب شهووور يا عم حسين وواضح لمن الموضوع قلب جد ولدك هو الجبان وفكى يدها في اخر لحظه ..وفكرة الهروب دي ما من ملاذ الهروب دا فكرة ولدك الواقف ومدسي وراك زي الجبان دا..
حسين ضحك وهو بقول: مهما قلتي ما ح تقدري تغطي على اختك الكل الحي شافها وهي جاريه لي ولدي بس ولدي عرف يتصرف معاها ومسكها من يدها وجا رماها لي ابوك الما عرف يمسك بتو عليهو ولا عرف يربيها ولا عرف يربيك كمان

وسام بغضب: انت كي..

كنت عاوزه اكورك فيهو واوريهو لسه انو ولدو هو الباطل بس سكت اول ما سمعت انزار الشرطه وهنا اهلي والحي كلو خلى ملاذ وعم حسين وبقو في الشرطه الجات وانا لمن شفت الشرطه ياداب اتزكرت الورطه الانا فيها عاينت ليهم بخوف وهم رفعو مايك صغير لانو الناس كتيره والدنيا ليل وقالو ..

-وسام عبد الرحيم انتي مطلوبه ودا أمر ليك تطلعي بي سلام لانو لو مسكناك برانا ما حا يحصل خير

بعد الإعلان دا كل الناس عيونها اتوجهو علي بالذات ابوي الكان حا يموت من صدمتو م كفايه بتو المرميه تحت رجولو واسي التانيه مطلوبه؟؟؟.. انا لمن سمعت الكلام دا رجعت ورا من حسين وجريت على البيت طوالي وانا بصرخ وببكي وبقول ..

وسام: لااااا لااااا انا ما عملت شي لااااا

بس حسين شافني واشر علي وناداهم ووراهم اني دخلت جوا طوالي جو وراي ووراهم اهلي وجزو كبير من الناس دخلو البيت ورا اهلي واولهم حسين..

وسام: فكونيييي انا ما عملت شي فكونيييي

كنت بلاوي فيهم وهم ماسكني وببكي واهلي كانو مصدومين فجأه ابوي جا مسك يدي وجراني منهم دساني وراهو وهو بقول...

عبد الرحيم: فكوها انا بتي ما عملت حاجه عاوزنها لييييه؟؟
-فعلا بتك ما عملت حاجه دي عملت حاجات والعملتو بتك الداسيها وراك دي ما هين
عبد الرحيم: انت بتقول فشنو دي بتي وانا بعرفها كويس انت اكيد غلطان يا جنابو وبعدين انا ولدي عسكري هو الحا يعرف يتصرف معاك .. أسعد يا أسعد يا ..
-قبل تنادي لي ولدك خليني بس اوريك انو الانت داسيها وراك دي بتكون مجرمه

هنا حسيت ابوي اتبكم من الصدمه والراجل رفع صور في وش ابوي وقال..

-شايف صور الجثه حقت الراجل دي؟؟ "كانت صور محمد" بتك الوراك دي هي القتلتووو
عبد الرحيم: مم.. مستحيل انت بتقول فشنو انا بتي اصلا ما بتعرف واحد زي دا انت شكلك غلطان ولا جنيت انا بتي ما بتعملهااا
-طيب دقيقه ..شوف ديل

قال كدا واداهو صور في يدو كانت صور لي انا ومحمد مع بعض مرا في عربيتو ومرا في المطبخ ونحن بنطبخ و..وصوري وانا بوزع في الكراتين ابوي لمن وصل الصوره دي الشرطي سحبها منو وقال..

-عارف الكراتين دي فيها شنو؟؟
عبد الرحيم ما رد كان بعاين بصدمه بس
-فيها مخدرات يعني بتك قتلت وتاجرت بالمخدرات كمااان وضهرك ما حا يقدر يحميها من القانون ابدااا
عبد الرحيم ختا يدو في راسو وهو بقول: كك.. كيف يعني كيف يعنيييي انا بتي تعمل كداا؟؟ لاحول ولا قوة الا بالله لا حوله ولا قوه الا بالله يا الله يا الله

كنت شايفه ابوي وهو ما قادر يقيف ختا يدو في قلبو وانا مسكتو سريع بس هو صدمني لمن نفضني منوووو!!؟؟.. صدمني لمن ضربني كف قدام الناس كلهااا !!!؟؟؟؟..وما خلا لي فرصه اقول حاجه..

عبد الرحيم: جايه تقيفي في وشي وتدافعي عن شرفي بي ياتو عييين وريني وانتي الغطستي راسي جوا الترااب جايه تعايني في عيني بياتو قوه وانتي قاتله رووح وبتتاجري بالمخدرات وكل دا عملتي من وراي وانا ما حاسي بي حاجه.. ياخ انا وثقت فيك اديتك الحريه اديتك كل شي طلبتي لمره بس حاولت اكون حنين معاك وانتي بكل شي عملتو ليك ضربتيني كف حار على وشي وريتيني انو انتو البنات حرااام الزول يتساهل معاكم لانو لو حصل حا يفقد سمعتو واحترامو وشرفو ومكانتو زي ما انتي خسرتيني كل دا اليوم عفصتي على سمعتي وما سألتي ..

وسام كانت بتبكي وهي مرميه في الأرض مسكت رجولو وهي بتقول بإنهيار...

وسام: بب.بابا لا والله لا بابا انا ما عملتها والله انا والله ما قتلتو يا بابا انا اسفه اسفه انا اسفه يا ابوي بس والله ما عملتها ما عملتهاااااا

دفرني برجلو وهو بكورك بأعلى صوت وما قادر يشوف من الغضب..

عبد الرحيم: اسفك دا انا اعمل بيهو شنو انا خلاص انتهيت انا انتهيييييت وانتي الكسرتي راسي انتيييي.. اا انا انا ربيتك وشلتك بين يدي ديل وبعد كبرتي غطستي راسي بعمايلك ياخ انتي بت ملعووونه انتي ملعونه وانا ما راضي عليك ليوم القيااامه انا ما راضي عليك ابدااا

وسام رقدت جمب رجولو وهي بتبكي بهستريا: بب..بابا اا

عبد الرحيم زحا منها ورفع اصبعو في وشها: اياك تقوليها انا من اليوم ما ابوك فاهمه؟؟؟؟ انا ما ابووووك ومن اليوم انا ما عندي بت اسمها وسااام ابداااا

قال كدا وزحا مني والشرطه جات تمسكني بس انا كنت بزحف في الأرض ومنظري كان يبكي حجر بس ماف زول شفق علي منهم اتفكيت من الشرطه بالغصب وعاينت لي امي جريت بسرعه عليها كانت واقفه بعيد مني مسكت طرف توبها بكل قوتي وادسيت وراها وانا بترجاها ..

وسام وهي بتبكي: امييي امي قولي ليهم ما يسوقوني امي انا ما عاوزه امش معاهم عاوزه اكون معااك انا والله يا امي كويسه انا والله ما عيانه انا ما عملت حاجه يا امي الله يرضى عليك خليني معاك م تخليهم يسوقوني معاهم الله يرضى عليك يا اميي

كنت ببكي وانا شاده من مسكت توبها وهي ما اتحركت ولا عملت اي شي بس زحت من قدامي وكانت بتبكي وخلتهم جو ومسكوني وبقو يجروني بكل قوتهم وانا قابضه على توب امي وبجرها منو.. لحد ما هي مسكت يدي ووقتها فرحت لانها حسيتها حا تجرني عليها حا تصرخ وتقول ليهم خلوها دي بتي ما تسوقوها بس ابتسامتي اتلاشت اول ما لقيتها فكت يدي من توبها وادتني ضهرها!!!

وسام بصدمه: اا..امي!؟

كنت حا اجن من تصرفها وكانو هم ساحبني بقوه وانا لحد م طلعت كنت بس بصرخ بي اسمها ..

وسام: اميييي لالالالالالالا امييي تعالي لاااا ما تخليهم يسوقوني اميييييييي والله ما عملتها انا امي انا ما عملتها..ابووووووي ابوييييي الله يرضى عليك ما تخليهم يسوقوني انا ما عملتها يا ناااااس ساعدونيييي ساعدونيييييي والله م عملتها ما قتلتو انا ما قتلتووووو

-فشنو هنا؟؟

كانو ساحبني لي برا واول ما وصلنا الشارع جمب الباب فجاه أسعد جا ..لمن شفتو اتفكيت منهم وجريت مسكت فيهو والشرطه الكانو ماسكني رفعو ليهو تحيه بي احترام هو عاين ليهم وعاين لي انا الكنت ماسكه فيهو بي اصابعي العشره وبرجف وببكي ..

-نحن معانا إذن بالقبض على وسام عبد الرحيم بتهمة قتل وتجارة مخدرات ومعانا ما يثبت على مشاركتها ووجودها في مسرح الجريمه "مدا ليهو صور وقال" والصور دي كلها بتثبت كلامي ودي صور حقيقيه تم التأكد انها ما مزيفه ولا مزوره

أسعد كان بسمع وبس ساكت وكان في ورقه في يدو التانيه وكان واقف وملامحو كلها بارده اتلفت علي وفكاني منو براحه وانا ما راضيه افكو رجعت مسكتو وانا بقول بهستريا..

وسام: أسعد لا أسعد ما تفكني الله يرضى عليك لاااا انا والله ما عملتها انا بريئة يا أسعد انا بريئه والله الله يرضى عليك انا ما دخلني في دا كلوووو ما تخليني ليهم يا أسعد الله يخليك م تفكني الله يخليك لا

أسعد ما قال شي بس رفع صور لي وانا بسلم في الكراتين وقال: دي انتي ولا لا؟
وسام: أسع..
أسعد بصوت عالي: جاوبي دي انتي ولا لااا؟؟؟؟
وسام: اا..انا مم..ما ما
أسعد: نعم أو لا يا وسام؟؟؟
وسام: ايوا ايوا دي انا بس انا ما..
أسعد: تمام ما عاوز اسمع.. ودا انتي العملتي فيهو كدا؟؟

رفع صور محمد وهو غرقان في دمو عاينت للصوره وقلت ليهو..
وسام: أسعد الله يرضى عليك اسمعني انا..
أسعد: انتي عملتي كدا نعم او لا يا وسام انطقييييي

قال كدا وهو بجدع الصوره في وشي انا بكيت وما كنت قادره اتكلم بس هزيت راسي وقلت بصوت ضعيف..
وسام: انا عملت كدا انا ضربتو بس ما قصدي والله ما قصدي اقتلو يا أسعد والله ما كان قصدييي والله

أسعد عاين لي وانا بترجى فيهو وببكي كنت ماسكه فيهو شديد كان هو اخر حاجه استنجد بيها بس وقتها هو كمان ما شفق علي انا امي وابوي ما شفقو علي كيف أسعد يعملها؟؟.. طوالي أسعد زحا مني وسمح ليهم يسوقوني واداهم الورقه الفي يدو وكان فيها اذن عشان يقبضو علي وقتها هم مسكوني وانا مشيت معاهم وكنت بعاين لي أسعد لسه كان جواي احساس انو حا يجي يمسكني منهم كنت لسه حاسه انو حا يقول ليهم خلوها دي اختي الصغيره المدلعه مستحيل تعمل كدااا ..بس هو ما جاا ما مسكني منهم ما دافع عني ولا حتى عاين لي كان بعاين في الأرض وانا لحد ما اختفيت ما قلت ولا حرف لانو كنت حاسه انو قواي كلها نفذت وما عندي حس اكورك بيهو اصلا.. ركبوني في العربيه وانا سندت راسي وكنت ببكي بصمت وانا بتزكر في أشكال اهلي اهلي الجيت جاريه ادسا في حضنهم هم مسكو بيدي وسلموني للشرطه بنفسهم .. ما قادره اصدق انهم عملوا كدا ما ادوني فرصه اتكلم او ادافع عن نفسي حتى..

وملاذ!! ما كانت بتعاين لي وبس بتبكي في مصيبتها ولا كأنو اختها هي الحا تمش السجن ما عاينت لي حتى انا ما قادره اصدق ما قادره اصدق ابداااا ما قادره..

الألم الفي قلبي الكان في الليله ديك ما بتقارن مع اي الم جسدي في العالم كلوووو.. انا من اللحظه الخسرت فيها اهلي خسرت فيها نفسي ووسام القديمه كمان انا خسرت كل حاجه من اللحظه ديك وبقيت ماشه على مجهول ما عارفه حا اطلع منو حيه او ميته بس ياريت اموت ياريييت يارييييت..

"""

-وسام!!!؟

كان دا صوت آصف الشافني ببكي بعد ما خلصت رجعت ابكي بنفس الطريقه ديك وانا جسمي كلو برجف هو ما كان عارف يعمل شنو بس بكى معاي كأنو الحكيتو حصل معاهو كان ببكي بصوت عالي على حالي وانا قلبي كان بتقطع على الوجع العشتو ولسه بعيش فيهو كنت بموت الف موته وانا بتزكر في الليله ديك الليله الفتحو فيها اهلي الباب للناس السلبو مني كل دمي وطاقتي وروحي اليوم.. حاولت اهدا وبعد مسافه سكت وآصف كمان هدا شويه بس كان بعاين لي لحد ما روقتا وبعد هديت عاين لي وقال ..

آصف: انتي احسن؟
وسام مسحت دموعها وهزت راسها وما قالت شي
آصف: يعني انتي دخلتي بجريمة قتل صح؟
وسام: ايوا
آصف: طيب ليه ما اعدموك؟
وسام: مم.. ما عارفه يمكن عشان عمري او تقريبا اسعد هو الادخل ومنع من الإعدام.. بس ياريت ما عمل كدا وياريت أعدموني يا آصف الانا عشتو خلاني اتشنق واموت في اليوم الف موتا يا آصف انا تعبت والله تعبت متمنيه تمر علي لحظه بس اقدر ارتاح واضحك وافرح فيها زي اي زول طبيعي بس كل لحظه بتمر علي بكون فيها وجع جديد او اخسر فيها انسان عزيز علي يا آصف انا ما متحمله اكتر من كدا خلاص والله كفااايه كفايه تعبت اناااا تعبت
آصف اتنهد وقال: عارف انو المرينا بيهو م ساهل وانتي اكتر واحده تعبتي بس لازم نصبر كل الحصل دا بلاء من ربنا لينا ..انا عارف انك اتألمتي كتير بس كل ألم حسيتي حيكون كلو كفارة لزنوبك يا وسام انتي بريئه وقتلتي دفاع عن نفسك وشرفك صح ماف زول عارف بس ربنا عارف وحا ينصرك اكيد اصبري اصبري يا وسام
وسام: عارف يا آصف انا مرات بقول اني استاهل كل البحصل مرات بشوف انو دا عقاب ربنا لي وانا استاهلو.. يخ انا من دخلت السجن اول مرا في نص ضيقي وبكاي وقتها كنت براي جريت لي امي وابوي واخوي وماف زول منهم قبلني وقتها اتزكرت ربنا اتزكرت صلاتي يا آصف صلاتي الوقفتها من يوم دخلت شلة ماغنيس ولا صلاه ما صليتها وقتها بكيت على نفسي لانو كنت عارفه في اللحظه ديك اني خسرت كل حاجه كل حاجه خسرتها وما لي غير ربنا وقتها سجدت في الظلام والسجن داك وكانت ديك اول مرا اسجد من فتره طويله شديد يا آصف اتزكرت كل العشتو والعملتو وبكيت من جوا بكيت لمن انفاسي ضاقت من البكى يا آصف

كنت بتكلم ودموعي نازله بقى يتكلم معاي وخلاني روقتا شويه وكان بحاول معاي عشان انوم بس ما قدرت ..

وسام: انا م نعسانه
آصف محاوله منو عشان يلطف الاجوا: غمضي عينك واتزكري حد بتحبي
وسام: ما عندي حد بحبو في الدنيا دي وكل الكنت بحبهم ماتو يا آصف
آصف ضحك بوجع وقال: بالجد الدنيا دي غريبه انا ما عندي اهل امشي ليهم وانتي بالرغم من انو عندك ما بتقدري تمشي ليهم.. في اختلاف وتشابه كتير في نفس الوقت
وسام عاينت ليهو وقالت: كيف ما عندك يا آصف ؟ طيب واختك مش قلت انو عندك اخت
آصف ابتسم ابتسامه باهته وقال: بعد دخلوني السجن مرت عمي ما كفاها انا لاني قتلت اختها وعمي ودخلت اختي وراي وللاسف اختي دخلت متهمه بي انها قتلة امها اللي هي زوجة ابوي ..ما عارف عمتي عملتها كيف بس نجحت تخلينا انا واختي نعفن في السجن
وسام بصدمه: دقيقه يعني اختك في السجن؟؟؟؟
آصف دموعو نزلت وقال: ياريت ياريت اختي في السجن يا وسام
وسام بستغراب: طط..طيب وين؟؟؟
آصف: انا يا وسام اختي اا..

وفجأه آصف سكت بسبب باب العربيه البدا يكركب شويه والباب اتفتح للنهايه وانا وآصف غمضنا عيونا من قوة الشمس ..ما كنا عارفين الصباح جا اصلا من شدة الضلام الفي الصندوق.. زحيت يدي من وشي واتنين من الشرطه مسكو آصف جروهو بقوه واتنين جروني انا وبقو ماسكني وانا بس بعاين لي آصف وببكي وآصف بعاين لي.. ما زحيت عيني الا لمن سمعت صوتو وهو بقول..

-طلعتوهم؟.. يلا تعالو

أسعد!!.. كان دا صوتو والله رفعت راسي عاينت ليهو كان واقف قدامي وبعاين لي جوا عيوني بس كانت ملامحو جامده وانا كنت ببكي وبعاين ليهو واصف لاحظ نظراتي ليهو وقتها عرف انو دا أسعد اخوي..

-ادخلو من البوابه دي

قالها أسعد وهو بأشر لي عساكر يفتحو البوابة وزحا للشرطه الماسكننا عشان يخشو ولمن جيت ماره بي جمبو رجلي كانت واجعاني من القعده الفي العربيه وفجأه اتفركشت ووقعت لانو الشرطي سحبني شديد ..

وسام: ااااخ رجلييي

قعدت في الارض جمب رجلي وجيت اخت يدي عليها فجأه لقيت أسعد بلزني برجلو وخلاني اقع على ضهري صرخت من الألم وهو ولا كأنو اختو واقعه قدامو شداني من شعري وقرب من وشي وقال بغل وكراهيه..

أسعد: الحركات دي نحن بنعرفها كويس بس هروب تاني مافيييي انتي هنا في سجن المدينه التحت سيطرتي انا واوعك تفكري انك ح تقدري تطلعي منو لانو دا مستحيل وعلى جثتي بس فهمتي؟؟؟

قال كدا وفكاني بقوه وانا والله لا شعري ولا رجلي وجعوني قدر الوجع الحسيتو من اسلوبو وكلامو معاي وقتها حسيت انو دا شخص تاني دا ما نفس اسعد ما نفسو اخووي أسعد ابدا...

-انت شنو ياخييييي

انتبهت على الصوت القال كدا وكان دا آصف عاين لي أسعد وحركة أسعد لي وجعتو شديد كان بجوط بأعلى صوت وهو ما قادر يتفكى من الشرطه الماسكنو..

آصف: انت مستحيل تكوون انسان القدامك دي اختك لو انت ما عارف انا بوريك دي اختك يا حيوااااان حرام عليييك
أسعد مشى عليهو بغضب وقال: انا عارف كويييس دي منو بس شكلك انت الما بتعرفها يا مسكين
آصف: انا عارف كلو حاجه
أسعد : يعني انت عارف انها قاتله؟؟؟
آصف بغضب: ما كان قصدها هي كانت بدافع عن نفسهااااا
أسعد: دقيقه دقيقه انت بتتكلم عن ياتو مرا بالبظبط الكانت بدافع فيها عن نفسها!؟.. لانو حسب علمي القدامك دي قتلت مرتين
آصف سكت عقد حواجبو وقال: مرتين؟؟
أسعد بسخريه: تؤتؤ شكلك بالجد انت الطلعت ما عارف دي منووو بالجد مسكين هههه

قال كدا وبقى يضحك وهو بعاين لي وبعاين لي أسعد انا ما كنت فاهمه شي حتى آصف كمان ما كان فاهمه وجا يتكلم بس بلع لسانو من الصدمه أول ما أسعد أشر علي وقال..

أسعد: القدامك دي هي القتلت صفاء.. هي القتلت صفاء علي اختك يا آصف علي...!!!!!!!!!!!!!!!!!!!!!!!!!!!!!





وتان تان تاااااااااااااااا
































*#صلو على النبي..*
*#يتبع..*

☘☘☘حصريا علي حسابنا بالفيس

https://www.facebook.com/share/1QVfHQyQCM/

حلقات يوميه

وقريبا بالتلغرام