‏﴿وَ لَيَالٍ عَشْرٍ﴾ • اللهّم اجعل لنا فيها نصيباً من الرحمة والمغفرة وبلغنا ليلة القدر ♥️

وبعد العقد تّم..
اتصل ليها وقال: مبروك عّلي بيك وبيتنا منور بيك.. وحيااتي مُكمله بيك ❤
قالت: ربنا يباركَ فيك يا تاج راسي ، نص ديني وحلالي ❤

وهي متوترة شديد وصحباتها بحاولو يطمئنو فيها ويهدوها ، حيلها كلو برد وخافت عليو شديد ...
إتااخر تلت ساعة عليها وتلفونو مقفول ...💔
أهلو أهلها بهناك متوترين لأنو العرسان إتاخرو ... أخواتهاا قلقو عليها شديد....
أبوها كل شوية يدخل ويطلع وامهاا خلاص هبطت ... أبوه وأخوانو بتصلو عليو وبحاولو كل شوية... أخواتو متلمين في أمو الخلاص إنهاراات مما قالو ليها تلفونو مقفول وأصحابو م قادرين يوصلو ليهم ...
الصالة كلها إتقلبت فوق تحت والناس كلها بتدعي .." يارب أبعِد عنهُم العَّوارض ، يارب إحفظهم "
بعد نص ساعة ...
وصل الكوفير عشان يستلم عروسو ..
هي من شافتو قامت جارية وحضنتو.. وبدت تبكي ... وصحباتاا فيهم البتبكي وفيهم البتزغرد ... " م كانت ناويه تفكو"
زحااها براحه ومسح دموعها ...باس راسها مساافه ❤
وقال: اسف وحقك علي ...دموعك م مفروض تنزل في يوم زي ده ... ح اعوضك عن القلق الدخلتو فيك ❤
هي م كانت قادره تتكلم ودموعهاا بتحكي عن فرحتها بشوفتو..❤
اتصل علي اهلو واهلها وطمئنهم انو هو بخير وفالطريق للصالة

رجعو صلحو ليها الميكاب الباظ وطلعت "قمر دورين" وزي ما بقولو "قمر 14"
كانت جميله شديد.. وعيونها بتبرق بالحب الفيهم والعشق الظاهر عليهم ..❤

جاا عليهاا ومسك ايديهاا وحبى عليهم.. وباس راسها مساافه وتمتم ب " أيآت التحصين " وقراا ليها فوق راسهاا " أية الكُّرسي " ❤

اثناء ماهو بحصّن فيها ' كانت سرحانه في عيونو في هيبتو وعن انو كيف ربنا جمعهم بالحلال ... الزول الرفض يمسك يدها والا يعقدو ..الزول الكان امآن بالنسبه ليهاا... الطلعهاا من الحاله النفسيه الدخلت فيهاا ... السند والقوة بالنسبه ليها.. " الراجل " بحق وحقيقة❤

واخيررأ وصلو الصالة ... وحبهم ماشي قدامهم خطوة وعشقهم ظاهر بضحكتهم الامتصت قلق الناس ... ❤

ولمن خلاص ماشين ...❤
امها قالت ليو ابقى عشرة علي روحيتك ي ولدي ياك سندهاا وابوها التاني ..❤ خليك اخوها قبل راجلهاا خاف عليهاا ي ولدي م تقسى عليهاا .. ابقى ليها ام واخت الغربه حاارة ياولدي ❤ بتي ياني بعرفهاا مجنونه وزعوله لكن بتريدك وروحهاا فيك وباقيه عليك❤

امو قالت ليها هاا ي بتي ولدي ياهو خلاص بقى ولدك ... اهتمي بيو وشوفي ناقصو شنو .. حِني عليو ي بتي المسؤليه صعبه ... رضيهو ي بتي وارضي عليو ... وقت يشد ارخي انت ، حيااتكم خلي مفتاحها الثقه ، كوني ليو امانو واختو قبل مرتو خليك سندو وكتفو ... ❤

#رينوش_محمد
#مقتطفات

‏21 | رمضان 🌙
اللهُم إنّك عفوُّ كَريمُ تُحب العفُوَ فاعفُ عنّي.

#_غلطه_في_عمر_صغير
بقلم ناني عمر بيك
-١-
ما اجمل انك تتمني وتحلمي انك تعيشي حياه حلوه مع شخص يحبك و تحبيهو ويكون سندك و دنيتك وحياتك اهلك وعزوتك وتكوني معاهو اسره واحده سعيده ده كان حلمي زي اي بت في عمري انا رحمه عمري ٣٠ سنه مأساتي بدت لما كان عمري 15 سنه وغلطت غلطه حياتي في سن صغير شديد عايشين في مدينه بعيده مجهوله مكانها في الخريطه ما موجود عباره عن قريه معدومه يومها بيبدا من الساعه ٦ الصباح وبنتهي المغرب عايشين علي نار الحطب ومويه الابار لا في كهربا ولا تكنلوجيا بنسمع بي حاجه اسمها مدينه من الاساتذه البيجو مطوعين من ولايات قريبه لينا بس شكلها كيف ما بنعرف الحاجه الوحيده الكويسه عندنا مدرسه لحد الاساس بس مافي ثانوي ولا جامعه وعندنا الخلوه لتحفيظ القرآن نحنا عيله ابوي كبيره وصعبه شديد كانو بزوجو البنات من عمر ١٢ سنه الواحده بتبلغ في بيتها وكتير ماتو في الولاده انا واخواتي ٣ بنات بس واولاد عمي كتار زوجو اخواتي الكبار وانا فضلت اخر واحده ابوي كان صعب بس حكمه من الله كل ما يتقدم لي واحد من اولاد عمي بحصل شي لحد ما قالو علي منحوسه من حظي امتحنت لحد تامن ونجحت ما كان في حاجه اسمها حب ولو ولد عاين لي بت ساي بقتلوهو كان في عندنا عرس من بنات الحله عمها زول كبير في العاصمه جو عربات واصلا العرس تم عشان البت وحيده وابوها عندو دهب وبهايم واراضي بس عمها ده زمان باع نصيبو مشي خلي القريه جا مره بس لمن ابوهو مات بعد سنين عنده قروش بس الطمع خلاهو يزوج ولده لي بت اخوه دي عشان يضمن انه مافي راجل غريب يجي يتزوجها ويدخل بينهم العروس بعرفها صحبتي من بنات الخلوه عزمتني العرس وعشان هي واحده اتبرعنا انا وبنات القريه نرتب ليهم البيت لحد ما العرس يتم طبعا كلنا كنا صغار في السن مشينا بيتهم كلنا ولقينا عمها واهله موجودين امها قالت لينا جهزو الضيافه جهزنا كل شي امها قالت لي اقيفي جمب باب الصالون ونادي عمك حسن ابو العروس مشيت اناديهو لقيت راجل كده بتكلم بالتلفون بره لابس هدوم سمحه وعطرو سمح ما زي العطور العندنا من النوع الغالي داك خلص مكالمه واتلفت والله ماشاءالله جميل وعيونه كبيره مرتب ونضيف ما زي اولاد القريه وقف عاين لي مسافه وابتسم لي انا خفت قمت ماشه قال لي اقيفي خفت زياده وجريت رجعت قعدت مع العروس جوه وقلبي كان بضرب بالليل كده راقده في عنقريبي بفكر فيهو وفي ابتسامتو وصوته وعيونه لحد ما نمت وحلمت بيهو الصباح جات امي صحتني عشان اعمل الشاي قمت ومشيت البير عشان اجيب المويه الجو حلو شديد الجانب المريح في قريتنا الجو والخضره ماشه علي البير شفتو اي والله هو كان واقف هناك جمب الشجر مع رجال كده شكلهم جو مع بعض من المدينه بي عربيتهم بتصورو بقيت واقفه بعاين ليهو فكرت ارجع قبل ما يشوفني بس اتلفت ما عرفت اعمل شنو مشيت واصلت مشي وقفت جمب البير عشان اشيل مويه قال لي يسعد صباحك ما رديت قال لي محتاجه مساعده قلت ليهو شكرا ليك شلت المويه وماشه مسك ايدي بي طريقه ما عجبتني رميت المويه قلت ليو احترم نفسك وما تلمسني قال لي طيب اسمك منو قلت ليهو ما عارفه وخليت المويه ومشيت بجد حسيت نفسي متضايقه شديد من تصرفه اي نعم نحنا بنات قريه بس متربيين كويس وبنميز قله الادب وما بنتعدي الحدود امي قالت لي المويه وينها قلت ليها في اولاد جمب البير عشان كده ما جبتها وجيت راجعه قالت لي طيب شويه وارجعي جيبيها اخواتك ونسوان اعمامك جايات الفطور بعدين قلت ليها طيب اخواتي جو ونسيباتهم فطرو وشربو الجبنه والعصر بنات الخلوه جوني قالو لي نمشي حنه العروس استاذنت امي قالت لي ترجعي قبل ما ابوكي يرجع عشان ما يقيم علينا الحد قلت ليها كويس مشينا كده داخلين لقيت ود المدينه واقف بره بتكلم بالتلفون بره من شافني بقي يتبسم لي عاينت ليهو ومشيت دخلت للعروس الزمن فات والمغرب دخل ماشه البيت بعد كم شارع كده بس الشوارع فيها شجر كتير كنت خايفه شديد انا ماشه حاسه بي حركه رجلين وراي اتلفت لقيتو هو قلت ليهو متابعني مالك قال لي عاوز اوصلك قلت ليهو براي بمشي قال لي الدنيا ليل اسمعي الكلام قلت ليهو طيب انا بمشي وانت خليك وراي عشان ما صاح نمشي سوا بتحصل لي مشاكل قال لي طيب ومشيت دخلت البيت لقيت امي واقفه لي في الباب قالت لي ابوكي جا وسال منك قلت ليهو نايمه خشي قبل ما يشوفك ودخلت سرعه راقده في سريري بفكر فيهو طلع شهم ما خلاني جيت براي ونمت مبسوطه تاني يوم العرس بنعمل في الشاي جا داخل المطبخ عشان يشيل الشاي اديتو ليهو وابتسم لي لي اول مره ابتسم ليهو ما عارفه ليه بس كنت حاسه اني ما في منومه مغنطيسيا وفي عالم تاني والعرس انتهي وقعدو معانا اسبوع في القريه كل يوم نتقابل ما بنتكلم بس نظراتنا كانت بتتكلم لحد ما ساقو العروس وسافرو قبل ما يسافرو الصباح لقيتو مستنيني جمب البير زي كل يوم قال لي انا عاوز اتكلم معاكي قلت ليهو طيب قال لي انا بحبك لمن جردل المويه اتكشح مني وع

ارفك بتحبيني من يوم شفتك جزبتيني بقيت واقفه بعاين ليهو مسك ايدي فكيتها وجريت وفي نفس اليوم سافر وعدي ٣ شهور انا بفكر فيهو كنت بمشي لي ام العروس اسال عنها امها قلت لي العروس حامل وابوها عيان شديد ح يجو بعد اسبوع طبعا طرت من الفرح يارب يجو وانتظرت اسبوع بي فارغ الصبر لحد ما يوم ماشه الخلوه شفت عرباتهم واقفه فرحت ومشيت عشان اسلم للعروس لقيتهم قاعدين وهو معاهم سلمت وعاينت ليهو ما عبرني ولا بي نظره قلت يمكن عشان اهله قاعدين قعدت مع العروس شويه ومشيت الصباح مشيت البير اجيب مويه لقيتو واقف قام جاني قال لي اشتقت ليك من غير ما احس قلت ليهو وانا كمان قال لي بحبك قلت ليهو وانا كمان مسك ايدي وباسها قال لي عاوز اتزوجك من الفرحه اتصدمت قلت ليهو بجد قال لي من يوم شفتك قلت انتي ام عيالي قلت ليهو ام عيالك😳 قال لي اي ام ولدي مؤمن طبعا من الفرحه ما قادره اتكلم قال لي ح اسافر بعد يومين قبل ما امشي ح اقابل ابوك عشان اتقدم ليك مشيت البيت من الفرحه ما قادره انوم بتخيل نفسي مرتو وام اولاده الصباح مشيت البير ما لقيتو جيت زهجانه العصر مشيت الخلوه لقيتو جمب الشجر قال لي بعد تخلصي الدرس انا مستنيك هنا قلت ليهو طيب مشيت الخلوه خلصت دروسي وجيت المغرب قرب لقيتو مستنيني وماشين جم الشجر قال لي ما نمشي بي الشارع الرئيسي عشان ما تحصل ليك مشكله قلت ليهو طيب دخلنا بي شارع تاني ما فيهو ناس مقطوع ونادر من يجي زول ماري بيهو لقينا شجره كده كبيره قعدنا فيها قعد جمبي قال لي بكره جاي اقابل ابوكي قلت ليهو طيب وابتسمت من الخجل قال لي حتبقي مرتي وما ح اسيبك ابدا قلت ليهو وانا كمان قام حضني حسيت بي راحه وامان بدا يبوس في ايدي بقيت احس بي شعور غريب ما حسيتو قبل كده بدا يبوسني قمت وقفت وزحيت منه قلت ليهو عيب قال لي بكره بكلم ابوك يعقد لي طوالي وتاني بدا يبوسني وانا ما قاومت لحد ما اخد شرفي فقت بعد فوات الاوان بكيت قلت ليهو انا غلط وضيعت نفسي قال لي حتكوني مرتي بكره وهداني وسكت ومشيت البيت وانا خايفه ومرعوبه وما مستوعبه الحصل لي ما قادره اصدق اني غلط وفرطت في شرفي

يتبع

#_غلطه_في_عمر_صغير
بقلم ناني عمر بيك
-٢-

ما قادره اصدق اني غلط وفرطت في شرفي لحد الصباح ما نمت بعض الشمس طلعت مشيت البير لقيتو مافي رجعت البيت قلت المسا بجي يقابل ابوي انتظرت اليوم بي فارغ الصبر لحد الليل ما في زول قابل ابوي همي ذاد قلت الصباح بمشي بيت العروس اشوف مالو ما جا الصباح صحيت مشيت البير ما لقيتو مستنيني زي كل مره مشيت بيت العروس قلت ليها ضيوفكم فاتو ولا شنو قالت لي سافرو امبارح الصباح قلت ليها حيجو تاني قالت لي لا انا ح اقعد مع امي وابوي شهر وبجي راجلي ياخدني بيتي طبعا من الصدمه ما عرفت اعمل شنو يالله اعمل شنو ما فاهمه حاجه يعني هو خدعني قلت لالا هو بحبني يمكن يجي صبرت نفسي ومشيت بعد شهر مشيت للعروس عشان راجلها جا ومرجعها المدينه قلت يمكن جا معاهم لقيتو ما جا معاهو لقيت راجلها جا وجاب طاقه شمسيه وصلها في البيت عشان مرتو تقدر تتكلم مع ابوها وامها بالتلفون عشان مافي طريقه شحن وصل ليهم كهربا في البيت قلت ليها راجلك باين عليهو طيب قالت لي اي كتر خيره ما محوجني حاجه وبعاملني كويس قالت لي جاب تلفون لي امي وابوي بعلمك كيف تستخدمي التلفون عشان تضربي لي اكلم ناس بيتنا قلت ليها طيب ساهل التلفون عرفت كيف استخدمو سالتها بي فوق كده قلت ليها انتي اخو راجلك داك اسمو منو بتاع العربيه قالت لي ده ود خاله زوجي قلت ليها شايفاهو ما قصر مع راجلك افتكرت اخوه من المدينه البعيده ديك بجي معاهو قالت لي اي زوجي وعلي قالو من قامو سوا وهو اصغر من راجلي بي سنه قلت ليها راجلك عمره كم سنه قالت لي 26 سنه ما سالتها تاني عشان ما تنتبه ودعتها ومشيت علي امل انه يجي راجع في يوم وبعد شهر وقعت في الخلوه جابوني البيت تعبانه الصباح قمت من النوم بستفرغ امي قالت لي مالك قلت ليهو معدتي قالبه غلت لي نعناع بي ليمون شربتو وهديت امي شكت فيني من الاعراض قامت نادتني قالت لي انتي عملتي حاجه غلط نطط عيوني وبقيت ارجف امي ختت يدها في راسها قالت لي ارح الحله التانيه مسافه ساعتين مشينا دخلنا لي مره قالت لي بتي عروس جديده عاوزه اكشف ليها الحمل كشفت لي وقالت ليها البت حامل امي لمن داخت لاكين اتماسكت وطلعنا مشينا في نص الشجر قالت لي وريني غلطي مع منو ومتين حكيت ليها بكت بي حرقه قالت لي ابوكي لو عرف بقتلك ومشينا البيت امي قالت لي الزول ده بتقدري تصلي ليهو قلت ليها اي مشيت لي بيت ام العروس قلت ليها عاوزه اكلم بتك واتكلمت معاها قلت ليها ابوي عاوز رقم علي قريب زوجك قال في زول بعرفو حيقابلو في المدينه ملتني الرقم قفلت ومن تلفون امها وطلعت بره قلت ليها الشبكه عشان ما تسمعني اتصلت اول ما رد تاني رفع ياهو صوته قلت ليهو علي قال لي منو معاي قلت ليهو رحمه قال لي رحمه منو قلت ليهو بت رحمه اللعبت بيها وبي شرفها قال لي اااااه رحمه بت الريف قلت ليهو انت ليه ما جيت قابلت ابوي زي ما وعدتني قال لي وعدتك بي شنو قلت ليهو بالزواج قال لي هو اي بت انا بنوم معاها بوعدها بي الزواج بتصدق انتي فاكره اني ح اتزوجك بتحلمي قلت ليهو انا حامل قال لي العبي غيرها وتاني ما تتصلي وقفل في وشي الدنيا ضاقت بي رجعت البيت امي سألتني ما عرفت اقول شنو قلت ليها الرقم مقفول قالتي لي ابوكي لو عرف بقتلوكي زي بت عمك حامد بت عمي حامد دي غلطت وما كانت حامل بس عشان فرطت في شرفها ابوها ضبحها ودفنوها وطبعا ما عندنا قانون بيحاسب القانون عند ابهاتنا وجدودنا البتغلط بتموت فكرت في كلام امي وعارفه الراجيني مرت ٤ شهور بطني بدت تظهر وامي كل يوم بتسألني من ابو الجنا قلت ليها تلفونو مغفول لسه يوم جاتني قالت لي لازم تمشي من هنا قبل ما ابوكي يعرف قلت ليها امشي وين قالت لي اي حته المهم تمشي جابت لي دهبها ومعاهو قروش قالت لي شيلي الدهب ده وامشي المدينه ابدي حياتك من هناك وكان ربنا كتب ليكي عمر حنتلاقي المهم ما تفقدي حياتك فكرت في كلام امي انا صغيره علي الموت ولازم امشي الصباح بدري مشيت لقيت امي نايمه ودعتها وبست رجلينا وطلبت رضاها ومشيت لابسه بس عبايه وشنطه فيها الدهب ورقم علي والعروس حافظاهو في راسي مشيت مسافه ساعات بي رجليني مره اتعب ومره ارتاح ومره ابكي احساس صعب وما عارفه ح اعمل شنو ولا ابدا من وين ولا الراجيني شنو بعد ساعات مشي وصلت شارع السفريات شفت باصات كبيره بتعبر بي الشارع زلط كبير وقفت باص احتار السواق البت دي في الحته المقطوعه دي وقف لي فتح الباب قال لي ماشه وين قلت ليهو المدينه قال لي ده ماشي حته تانيه لاكين فيها موقف بمشي المدينه ركبت ومشيت بتاع الباص بدا يسأل قال لي انتي جايه من وين قلت ليهو من قريه كده صغيره قال براكي ليه قلت ليهو ماشه افتش علي اخوي مشي المدينه وم جا راجع قال لي بس انتي صغيرونه قلت ليهو اخوي اصغر مني ووحيدنا بمشي افتش اخوي قال لي بتعرفي ناس هناك قلت ليهو اي عمي هناك وانا بعرف المكان وصلنا قال لي ده محل الباصات هناك نزل كتر خيره قطع لي تزكره وصي علي سواق قال ليهو دي بتنا خلو با

لكم منها وكتب لي رقمو في ورقه قال لي اي حاجه تحصل اضربي لي ولو وصلتي برضو اضربي لي الراجل باين عليهو طيب ومشيت وبدت رحلتي ورحله معاناتي ساعات ماشين وصلنا تاني يوم الصباح نزلت طوالي المدينه كبيره وعربات وناس كتار ومباني كبيره ماشه وبتفرج تعبت قعدت لي جمب ست شاي شربت مويه قالت لي جايه من وين قلت ليها من مدينه بعيده جايه لي منو هنا قلت ليها ناس اهلي قالت لي يابتي انتي ما صغيره قلت ليها في عمري عندنا متزوجات بي عيالهم قالت لي حتصلي لي اهلك كيف قلت ليها بالتلفون عندي رقمهم طوالي طلعت لي تلفونها ضربت رقم العروس مقفول لحد المسا قاعده مع ست الشاي دي والتلفون لسه مقفول قامت تقفل لميت معاها الحاجات قالت لي تمشي تبيتي معاي لمن اهلك يفتحو التلفون جات من الله قلت ليها كويس ومشينا بيتها صغير وبسيط وعندها بتين وزوجها ميت بناتها صغار عمر ٧ و ١٠ سنه سلمت عليهم ظريفات طلعو لي جلابيه قالت لي غيري غيرت هدومي وطلعت لي سرير رقدت فيهو واتعشينا الصباح كده قلت ليها يا خاله عاوزه اشتري تلفون قالت لي كويس في ود جيرانا عند بترينه تلفونات وتلفوناتو كويسه رسلو ليهو قاعد ما مشي السوق لسه جا قلت ليهو عاوزه تلفون كويس وقوي وراني التلفونات شلت ربيكا عادي ودفعت ليهو قلت ليها في مكان شرايح قالت لي عندي شريحه كنت شغاله بيها زمن تلفوني بشيل شريحتين قاعده ما شغاله بيها جابوها ركبوها لي في التلفون شحنتو وشغلتو طوالي طوالي ضربت رقم العروس لقيتو فتح قلت ليها انا جيت المدينه اتخلعت قالت لي براكي قلت ليها اي قالت لي طيب بوصف ليك البيت تعالي وصفت لي ست الشاي البيت مشت وصلتني ودعتني وشلت رقمها وفاتت وصلت لقيتها مستنياني في الباب بيتهم كبير عماره ٥ طوابق دخلتني بيتها ماشالله نضيف ومفروش سمح عندها حاجات في حياتي ما سمعت بيها وتلفزيون دخلت فضلتني دخلتني اوضه كده قالت لي دي للضيوف اصلا وقالت لي جيتي كيف براكي قلت ليها هربت اتهجمت قالت لي هربتي من شنو وليه قلت ليها انتي عارفه البتهرب عندنا بتهرب ليه قالت لي غلطي😱 قلت ليها اكبر حملت .......يتبع

#_غلطه_في_عمر_صغير
بقلم ناني عمر بيك
-٣-

قلت ليها غلطتي ما بتغتفر وما غلطه عاديه غلط بي عار في بطني طبعا ختت يدها في خشمها من الخلعه قالت لي كيف غلطي ومع منو قلت ليها من علي تاني ختت يدها في قلبها وجاتني قريب قالت لي علي منو قلت ليها علي اخو زوجك قالت لي علي اخو زوجي كيف وحصل متين اصلا هو ما جا الا في زواجي وتاني جا معانا لمن ابوي كان عيان متين ووين عرفتو بعض حكيت ليها القصه كلها وبكيت قالت لي عشان كده مره سالتيني منو؟ قلت ليها ايوه قالت لي طيب علي عرف قلت ليها اتصلت عليهو من تلفون امك وما صدقني وقفل فيني الخط قالت لي انتي كيف غلطي ما عارفه العادات كيف عندنا ما فكرتي في العواقب لمن غلطي قلت ليها انا حبيتو والحصل ده كله حصل في غمضه عين قال ح يتزوجني قالت لي وانتي صدقتي صحي ح يتزوجك قلت ليها صدقتو كنت بحبو قالت لي علي ده نسونجي انا من جيت كل يوم داخل وطالع مع النسوان ما جادي وسمعتو كعبه بكيت زياده بكيت بي حرقه قلت ليها طيب انا اعمل شنو قالت لي مافي حل غير انه اكلم راجلي هو يتصرف معاهو عاينت لي نظره حزن قالت لي انتي ارتاحي وما تتعبي نفسك وربنا بحلها ربنا اتزكرت ربنا قلت ليها عاوزه اصلي قالت لي طيب جابت لي عبايه ومصلايه مسيت اتوضيت وصليت وسلت كتاب قعدت اقرا قرأن حسيت بي راحه نفسيه ركعت ودعيت ربي ربنا يسهل لي ويسامحني علي غلطي المسا كده زوجها جا وجا سلم علي كان كويس وبعد شويه شال ليهو شنطه هدوم قال لي مرتو مسافر تبع الشغل وما معروف برجع متين وسلم لي ومشي قالت لي ما قلت ليهو حاجه ليه عشان كان مستعجل قالت لي غير كده خفت اتكلم في الموضوع قلت ليهو كويس وقعدت معاها ١٥ يوم حتي راجلها جا خلتو نام طول اليوم بالليل كده صحصح حكت ليهو الموضوع طوالي جاني هايج قال لي الكلام ده صاح انتي حامل من علي قمت طوالي جريت علي الحيطه لمن شافني خفت حن علي وقال لي تعالي اقعدي طيب واحكي لي الموضوع ماسك راسو بسمع فيني قال لي انتي متاكده ده علي ما يمكن زول تاني وملصقاها فيهو دمعتي سالت قلت ليهو انا عرفت راجل غير علي في حياتي كلها قال لي طيب علي سافر وما معروف حيرجع متين بس يجي نتكلم في الموضوع ونحلو اتنفست بي راحه كده قلت ليهو كويس قال لي واهلك عارفين انتي وين؟ قلت ليهو لا حيقتلوني لو عرفو سكت ومشي غرفتو قلت للعروس اضربي لي امك شوفي الحاصل شنو في قريتنا اتصلت علي امها وفتحت مكب الصوت واتكلمت معاها كتير قالت ليها اخبار ناس القريه شنو قالت ليها صحبتك رحمه اختفت ما لقوها ما عارفينها كبارات القريه اجتمعو قالو يمكن هربت مع راجل ولو صحي هربت ولا غلطت حكمو عليها بالموت وتحت تحت قالو يمكن ابوها ضبحها ودفنها في مكان بعيد غطي علي فضيحتها قالت ليها طيب ام رحمه ما جاتك قالت ليها ما شفتها نهائي لاكين قالو تعبانه وقعت من الرجال طلعو الحكم علي بتها ودعتها وقفلت منها بكيت بي حرقه علي وجعي وغلطتي الضيعتني مرت الايام وقعدت معاهم ٣ شهور وبطني بقت كبيره وهي زاتها حامل قربت للولاده قاعدين كده نتغدا الباب دقا زوجها كان بيتكلم في التلفون وانا جمب الباب فتحتو لقيت علي.............يتبع

#_غلطه_في_عمر_صغير
بقلم ناني عمر بيك
-٤-
فتحت الباب لقيتو ده علي اتفاجأ لمن شافني واتفاجأ اكتر لمن شاف بطني قدامي قال لي الجابك هنا شنو سكت مسك ايدي شديد قال لي بتكلم معاكي طوالي قام اخوهو جا ومسكو مني وهاج فيهو دخلنا وقفلنا الباب قال ليهو البت دي بتعمل شنو هنا قال ليهو البت دي قالت حامل منك قال ليهو وانت صدقتها قال ليهو انا كنت منتظرك تجي عشان اقدر اعرف منك قال ليهو تعرف مني شنو انا البت دي اصلا ما لمستها اسمها منو ما بعرفو ولا قربت ليها اخوهو قال لي اها رايك شنو قلت ليهو انا حامل من اخوك ولا عمري عرفت راجل غيره قال لي انتي كذابه يمكن طمعانه فيهو وعاوزه قروش يمكن متفقه مع زولك الحملتي منو طوالي علي قال لي عاوزه شنو قروش طلع قروش ورماهم في وشي قال لي اصلا انتو بنات الاقاليم رخاص وبتجرو ورا القروش انا علي ده الدنيا ملانه بنات اشكال والوان اعاين ليك انتي وقعو فيني اهانات وفي شرفي كلام جارح ما بتقال حسيت بي وجع في قلبي يالله لمن تكوني وحيده وفي ضيقه لا اهل لا صديق ولا قريب لا اخ واخت ولا اب ولا ام يدافعو عنك ما عندي شي غير البكا قالو لي بكره تلمي هدومك وتمشي من هنا طوالي وعلي طلع فات واخوهو دخل غرفتو وقال لي مرتو تحصلو وانا ما انتظرت طوالي شلت حاجاتي وطلعت ماشه في الشارع وببكي ما عارفه ماشه وين ما بعرف الاماكن اتزكرت ست الشاي ضربت ليها ردت وانا ببكي وقلت ليها الناس الكنت معاهم طردوني قالت لي اركبي اي امجاد وانا بوصف ليهو يجيبك وقفت امجاد وضربت ليها وصفت ليهو البيت وصلني ليها من شافتني اتفاجأت بي بطني قالت لي احكي لي الحصل شنو حكيت ليها الكلام كله قعدت تبكي وقالت لي انتي غلطي بس صغيره في نفس الوقت وزولك ده حاولي معاهو يمكن يحن ويعقد ليك عشان جناك يكون عنده اسم قلت ليها بحاول تاني قعدت معاهم شهر ما قصرت المره بتعاملني زي بناتها يوم قاعده قلت ليها خالتو علويه قالت لي نعم قلت ليها انتي طيبه كده وساعدتيني ليه وانتي ما بتعرفيني قالت لي يابتي انا ام بنات والما برضاهو في بتي ما برضاهو في بت تانيه انتي الظروف جبرتك وجيتيني انا والله بطلع الشغل علي الله وبكون قلبي علي بناتي هم براهم في البيت بس من يوم جيتي ومسكتي لي بمشي وبجي مرتاحه طبعا انا من يوم جيتهم ماسكه البيت والبنات ما بخليهم يطلعو الا للضروه وبحفظهن القرأن وبحل معاهم الواجب وبمشي المدرسه معاهم لو عاوزين ولي امر رغم اني صغيره بس واعيه وكلامي موزون الاستاذات بقو يحترموني قالت لي بعد كده قربتي للولاده نمشي نحاول مع ابو الجنا ده تاني قلت ليها كويس ضربت لي زوجه اخوهو بت قريتي قلت ليها عاوزه عنوان شغله قالت الاحسن ما تمشي علي عشان علي عاوز يتزوج في الاسبوع ده وعلي بتاع مشاكل قلبي انقبض لمن سمعت الخبر وعصرت علي نفسي واتماسكت قلت ليها يمكن يشوف بطني وحالتي يحن علي قالت لي احسن تبدي حياتك من جديد قلت ليها والفي بطني ده كيف اربيهو براي قالت لي طيب بوصفك ليك محل الشغل لاكين ما شلتيهو مني عشان ما تحصل مشاكل قلت ليها ما تشيلي هم عرفت محل شغله خالتي علويه قالت بتعرف المكان تاني يوم الصباح مشينا كان معاهو ناس من شافني قام هاج وقال لي الجابك هنا شنو قلت ليهو علي انت عارف الجنا ده حقك قال لي اضمن من وين زي ما نمتي معاي نمتي مع غيري قلت ليهو اهلي ح يقتلوني قال لي انا دخلي شنو بقيت اكورك والناس اتلمت قلت ليهو ربنا ينتقم منك في العملتو فيني انا ما عرفت غيرك اعمل شنو واربي جنا براي كيف خاف الله فيني في اللحظه ديك هاج وكورك وضربني جو الرجال مسكوهو مني بقت ليهو فضيحه قال لي بدفعك التمن غالي وكان ناوي علي شر في راجل كده طلع ورانا سلم علينا وقال اسمي علاء الدين قال لي احكو لي الحاصل ما قدرت اقول شي سكت قام تاني قال لي احكي وما تخافي خجلت لاكين حكيت ليهو الراجل اتاثر شديد قال لي ده رقم تلفوني في اي حاجه اضربي لي قلت ليهو طيب ومشينا الصباح كده جا بوكس بتاع بوليس رفعوني ودوني القسم قالو انا سرقت قروش قلت ليهم ما سرقت والله ما سرقت خالتي علويه قالت لي ما تقولي انتي حامل منو قولي متزوجه وراجلك مسافر عشان ما يفتحو فيك بلاغ زنا العساكر معاملتهم قاسيه وضربوني وانا حامل ما هماهم حملي كفتوني وسمعوني كلام فاضي بكيت وحلفت شكلهم وصوهم علي اتزكرت الراجل الكتب لي رقمو خالتي علويه اتصلت عليهو لقتو مغلق قعدت يومين في الحراسه بصلي وبدعي وببكي في الدنيا البهدلتني بس جاتني خالتي علويه قالت لي ضربت للراجل قال لي جاي وفعلا جا وشافني قال لي تلفوني ضايع ويادوب طلعت الرقم قال لي ما تخافي ح اطلعك قلت ليهو انت بتساعدني ليه قال لي عندي اسباب قويه تخليني اساعدك قلت ليهو ما يكون لي شر انا ما عندي شي في الدنيا دي قال لي ما تخافي ما عندك علاقه انا عداوتي مع علي وفعلا الراجل طلعني وبعد فتره كده جاني وجع ولاده ودوني المستشفي ولدت ولد حلاه الدنيا عليهو طلع بشبه ابوهو وفيهو شبه مني طفل في

شكل ملاك اول ما شلتو جاني احساس غريب قوه علي ثقه علي اني وهو بقينا اتنين وانا ما وحيده في الدنيا دي وطلعوني وفي المستشفي جاني الراجل اللقيتو مع علي جاني شايل هدايا وحاجات لي وللبيبي بارك لي قلت ليهو سبب عداوتك مع علي شنو قال لي علي ده كان اعز اصحابي زمان بس انا خطبت وكنت ح اتزوج جيت يوم صدفه لقيتو نايم مع خطيبتي قلت ليهو طيب عملت شنو قال لي ما شافوني مشيت طوالي فسخت الخطوبه ولغيت العرس قلت ليهو ما واجهت علي قال لي ابدا ولا عمري سألتو موجوع منه لاكين بتعامل معاهو عادي قلت ليهو ربنا يرزقك بي بت الحلال قال لي امين وخرجوني من المستشفي طلعت من دهب امي قلت لي خالتي علويه فكي الدهب ده حلفت كان تشيلو قالت لي قدرت علي بتين بقدر علي تلاته وانتي ليه مشوارك طويل وفري الدهب ده للحوجه المره ما قصرت معاي ولا حصل حسيتني اني غريبه وعرفت انه علي وبعد فتره بسيطه اتزوج قلبي وجعني من علي عايش مبسوط ضيعني وبعدني من اهلي بقيت عايشه مع الاغراب واهلي عايشين عدت الايام وعملت 16 سنه دخلت المدرسه طوالي دخلت الثانوي نزلت سنه اولي الحمدلله كانو بيطلعو لينا ورق وجبت اوراقي معاي قالو لي اجيب شهاده سنه ٨ عشان اقدر ادخل المدرسه عرفت البلد بقيت اقدر اتحرك وامشي واجي مشيت الوزاره بي الوصف طلعت شهادتي ودخلت وبديت الحصص كنت شاطره شديد والمديره قدرت موقفي وبقيت اجي بي ولدي ماشالله هادي اصلو ما ببكي طول الوقت نايم تقول حاسي بي عدت السنه وعملت ١٧ سنه ودخلت سنه تانيه ولدي بقي يمشي بالسرير فرحانه بيهو شديد خالتو علويه بقت تمرض بقيت امشي المدرسه وبعد اجي بمشي اشتغل في محلها تعالو شوفو المضايقات وقله الادب الا في عمو كده خالتو علويه فهمتو اني بت اختها حتي وقف معاي وحزر اي زول يتعد حدوده معاي امورنا ماشه بس طوالي بتزكر امي وبشتاق لي اخواتي نفسي اكلم امي واسمع صوتها نفسي تدعي لي واسمع دعاها ودخلت سنه ثالثه وامتحنت ونجحت بي تفوق ولدي بقي عمره ٣ سنين يوم النتيجه خالتي علويه وقعت نقلناها المستشفي طلع عندها فشل كلوي ملتني رقم قالت ديل عمات بناتها بس ما عندهم علاقه كده بي بعض اتصلت عليهم وكلمتهم جو بعد يومين البيت ومشيت عشان اجيب حاجات تعالو شوفو يا تحقيق انتي منو وقاعده هنا في البيت بي صفتك شنو طوالي قالو لي علويه نحنا بنهتم بيها وانتي شيلي ولدك ده واتخارجي الاسويهو ما عرفتو طوالي شلت ولدي ومشيت بيهو المستشفي خالتي علويه حست بي حاجه وسألتني قلت ليها الولد قاعد يبكي عشان كده جبتو وبعد شويه هن زاتهم جو قالو لي الجابك شنو مش طردناكي قلت ليهم خالتي علويه زي امي وهي محتاجاني بس تبقي كويسه انا بمشي خالتي علويه قالت ليهم دي بتي مافي زول يطردها البت وحيده ما عندها غيري قالو ليها ده بيت اخونا القاعده فيهو ونحنا كلام زي ده ماةبينفع معانا سكتت منهم وعاينت لي بي حسره قعدنا اسبوع انا وولدي مع خالتي علويه في المستشفي وطبعا ديلك معاها م حبيت اعمل ليها مشاكل قلت ليها بمشي مشوار وبجيك ضربت لي علاء الدين سلمت عليهو وحكيت ليهو الحاصل قلت ليهو عاوزه مكان اقعد فيهو لحد م اتصرف قال خليك مكانك جاي عليك طوالي دور جاني ومشينا علاء الدين عندهم شقق ايجار قال لي في وحده اصلا فاضيه ما اتأجرت وشكرتو قال علي شنو مافي داعي تشكريني اصلا الشقه دي كل ما تتاجر بتفضي ممكن نصيبك تقعدي فيها قلت ليهو تقلت عليك بس فتره مؤقته قال لي البيت بيتك تقعدي بي راحتك مشي وجا شايل معاهو اكياس فيهم اكل وحليب وحاجات قلت ليهو ليه التعب قال لي انتو بقيتو مسؤليتي واي حاجه اضربي لي قلت ليهو ممكن بس انا الاصرف علي نفسي معليش يعني قال لي حتصرفي من وين طيب قلت ليهو بتصرف قال لي ما عجبني الكلام لكين ما بضغط عليك وقت ما شفت وضعك ما عجبني انا بتصرف معاكي قلت ليهو طيب قام ماشي كده ولدي قال ليهو بابا😳 وجري عليهو طبعا اتحرجت منو قام طوالي شالو قلت ليهو معليش بس عشان طفل صغير قال لي بالعكس بسطتني الكلمه قال ليهو وانت يا بطل انا من اليوم بابا تمام قال ليهو انت بابا ؟ قال ليهو ايوه بابا لعب معاهو شويه لمن ولدي نام ومشي قال لي رحمه انتي الولد ده عنده شهاده ميلاد ؟ قلت ليهو لا طبعا عارف وضعي قال لي طيب ممكن اسجلو بي اسمي فاجأني قلت ليهو بس انت ما ابوهو وما مجبور تعمل كده وبعدين زوجتك حتقول شنو قال لي انا كنت عاوز اقول ليك كده من اول يوم بس خفت ترفضي قلت ليهو بصراحه ما عارفه قال لي ما تفكري كتير الولد ح يحتاج الورق عشان يتسجل في الروضه قلت ليهو طيب تم اسبوع كده وجاب شهاده ميلاد لي ولدي بي اسمو قال لي الولد كده بقي ولدي ومافي مخلوق بقدر يغير الكلام ده فرحت بجد كنت خايفه يكبر ويسألني وما اقدر ارد عليهو.........يتبع

#_غلطه_في_عمر_صغير
بقلم ناني عمر بيك
-٥-

خلاص ولدي بقي عندو ورق فرحت جزو من همومي راح اتصلت علي خالتو علويه اطمن عليها قالت لي انتي وين تجي هسي قلت ليها يا خاله ما عاوزه اعمل ليك مشاكل وكلامهم صحي انا ما بقرب ليكم وكتر خيرك في كل العملتيهو لي وانا بجي ازورك كل فتره وفتره قالت لي طيب انتو كويسين وقاعدين كيف حكيت ليها وقالت لي انتبهي علي نفسك ما يكون طمعان فيكي قلت ليها انشالله يا خالتي ما تشيلي هم لحد هسي ما سفت منو شي قالت لي اوعديني لو حسيتي بي شي غريب شيلي الولد وتعالي قلت ليها كويس اليوم التاني علاء الدين جا وقال لي جهزي الولد في روضه قريب نمشي نسجلو طوالي طلعنا مشينا سجلناهو ولدي ماشالله ما بكي نهائي شاف العيال واللعبات واتصورو هو وعلاء الدين وطلعنا مشيت الشقه لقيت مره في الباب من شافتني سلمت علي قالت لي انتي ساكنه هنا قلت ليها اي قالت لي والله العماره دي ناسها كل زول في حالو بتمني القي لي جاره اتونس معاها قالت لي انا من الابيض وناسنا هناك بدخلو لي بعض بس المدينه عكس قالت لي كدي تعالي نشرب لينا قهوه ودخلنا شقتها حلوه ومليانه كراتين بضايع وحاجات اتونسنا وسالتها قلت ليها دي بضايع قالت لي اي بمشي بجيبها من مصر فلت ليها طيب شغلها كيف وراس مالها كيف قالت لي راس المال حتي لو بسيط بجيب ورتني البضايع الماشه قلت ليها انتي بتشغلي براكي قالت لي بناتي متزوجات وحده في دبي وحده في السعوديه قلت ليها يعني عايشه براكي قالت لي ابو بناتي اتوفي من ١٠ سنه وانا بديت طريق التجاره ده بونسني ومره بسافر لي بناتي اقضي معاهم فتره وبجي سالتني قالت لي انتي وين اهلك قلت ليها في مدينه تانيه بعيده وحاليا بس انا وولدي ما سألتني كتير وحمدت ربي المهم قلت ليها بجيك تاني عاشان ماشه اجيب ولدي من الروضه مشيت جبت ولدي لقيتو مبسوط وزعل لمن جبتو البيت حنستو قلت ليهو بكره تمشي تلعب مرت الايام وعلاء الدين بجي للضروره بلعب مع ولدي ومرات بجهزو بجي يسوقو يلعبو ويجيبو راجع مره مشيت لي جارتي لقيتها بتسوق بس هي مره كبيره ما بتقدر علي مشي السوق قلت ليها انا عاوزه اخش معاكي شريكه وعاوزاكي توريني الشغل قالت لي والله كويس القي زول يخش معاي ويساعدني قلت ليها خلاص وريني التسويق والزباين نزلنا السوق ولفينا وزعنا البضاعه سالت كم تاجر قلت ليهم السوق بحتاج شنو قالو لي العده والصواني وحاجات كتير من مصر بتمشي عندنا رجعنا وقلت للخاله انا بسافر معاكي المره الجايه عشان اقدر اتعلم واعرف قالت لي طيب مشيت السوق بعت الدهب بتاع امي كله ضربت لي علاء الدين قلت ليهو عاوزه جواز وحكيت ليهو شجعني قال لي لو مضمون ٣ يوم بس بجهز ليك الورق قلت ليهو طيب بعد ٣ يوم جهز لي كل الورق وجهزت حالي للسفر مع جارتي بقت المشكله ولدي مشيت بيهو لي خالتي علويه وسلمت عليهم لقيت جماعتها فاتو الا هي وبناتها حكيت ليها قالت لي الولد ولدنا خليهو ماتشيلي هم قلت ليها بحي بعد اسبوع دعت لي بالخير ومشيت سافرنا انا وجارتي لفينا الاسواق ما خلينا حاجه ما اشتريناها ورجعنا ماشالله البضاعه وزعناها في يومين بس واستلمنا قروشنا والربح النص بالنص مبلغنا اتضاعف وبقينا انا والجاره بنسافر في الشهر ٣ مرات لحد ما اموري ظبط قلت لي علاء الدين انا عاوزه افتح حساب فتحو لي وقلت ليهو انا ح ادفع ايجار رفض تماما وزعل قلت ليهو انا اموري ظابطه هسي عسان اكون مرتاحه والا ح امشي مكان تاني حتي وافق قال لي طيب نعمل عقد ايجار قلت ليهو مافي مشكله عمل عقد الايجار بي مبلغ بسيط قلت ليهو بس باقي السكان بدفعو اكتر قال لي ده العاوزك تدفعيهو يا كده يا ما بستلم منك قلت ليهو طيب مواقفه بعد فتره طوالي قلت هسي انا اموري ظابطه طيب ما اكمل تعليمي طوالي الصباح لبست وصلت ولدي الروضه ومشيت سالت عن الجامعات والتسجيل لقيت جامعه خاصه وسعرها ما بطال قدمت اداره اعمال وبقيت بحاول اوفق مابين سفري وبضاعتي والجامعه وولدي مرت سنتين وعلاء الدين اتقدم لي مرتين ورفضت قلت ليهو وضعي مجهول نا بيسمح لي وتستاهل احسن مني لحد ما رحلت لي شقه قريب للجامعه اتصل لي علاء الدين قال لقي ليهو بت حلال حيتزوجها وعزمني مشيت العرس قاشره ظبطوني في الكوافير ولبست ولدي احلي بدله ومشينا العرس قاعده في التربيزه مع اخوات علاء الدين كان اشوف ليك علي معاهو مرتو يضحكو ومبسوطين مع بعض فجاءه كده انتبه لي وبقي يعاين لي ما متاكد دي انا ولا لا لانو شكلي اتغير كتير طبعا دخلت في قلبي خوفه مشيت باركت للعريس وخليت ولدي لمن جيت قريب لي تربيزه ناس علي عشان في الممر ولدي جاني قال لي ماما طبعا علي واخوه قعدو يعاينو ليهو بي انبهار الولد عمره 5 سنين ونوع الاطفال الشخصيتهم قويه جيت شلتو سريع ومشيت طلعنا بعد شويه علي طلع ورانا قال لي رحمه بي اعلي صوت وقفت قلت ليهو نعم قال لي جيتي تعملي شنو هنا لو جيتي تعملي شوشره ما حتقدري ولا نسيتي الحراسه والكفيت وقفت قلت ليهو ابعد عني انا ما عاوزه م

شاكل قال لي ده ولد منو قلت ليهو م بخصك وطوالي مشيت ركبت تاكسي وطول الشارع بتلفت ما يكون عرف محلي وصلنا البيت ح شويه روقت بعد اسبوع ضرب لي علاء الدين سلم علي وحكيت ليهو قال لي انا ما قابلت علي لحد هسي واتصل علي ما رديت عليهو قالت ليهو تابعني وحكيت ليهو الحصل قال لي ما تخافي طالما انا موجود ما بقدر يعمل شي ثم انه بيخاف من مرتو واهلها عشان واصلين قلت ليهو طيب ومرت سنه ومرت علاء الدين ولدت بس ماتت في الولاده وخلت بتها رضيعه علاء الدين اتاثر عشان بتو يلا مرتو اهلها كعبين ابو يهتمو بالبت واخواتو طالبات جامعه مافي وحده بتقدر علي المسؤليه وامو كبيره قلت ليهو انا بهتم بيها مع ايام العزا البت بتبكي تقول خاسه امها ماتت من اشيلها تسكت بقيت بهتم بيها جبت شغاله في البيت لمن امشي الجامعه هي بتهتم بي الاولاد وربيت البت لمن عملت عمر سنه وبتقول لي ماما علاء الدين بقي يقسم وقته من شغله للعيال واتخرجت من الجامعه اولي الدفعه كان احلي يوم في حياتي ولدي عمره ٨ سنين وبتي عمرها سنه فرحانه بيهم بعد التخريج مشينا بيت ناس علاء الدين قالو عازمننا عشا بي مناسبه تخريجي مشينا امو نادتني جوه قالت لي يا بتي انا دايراكي لي علاء الدين ولدي بقيتي مننا وفينا وما بلقي ليهو احسن منك قلت ليها يا خاله ولدك طيب ود حلال بس انا ما مناسبه ليهو في وضعي قالت لي شوفي يابتي علاء الدين حكي لي قصتك وانا متعاطفه معاكي فيها شايله مسؤليه وعمرك صغير وكمان اهتميتي بي بتنا وبقيتي امها ماضيكي ما مهم وانتي بت حلال اخلاقك تكفي وانا ضغط علي علاء الدين عشان يحكي لي لانو قال رفضتيهو مرتين وانا يابتي بضمن اخلاقك احسن من باقي بنات الناس بكيت وحضنتني قالت لي من الليله انا امك وانتي بتي ومرت ولدي وافقي الله يرضي عنك قلت ليها خلاص يا خاله انا موافقه انو طوالي بدت تزغرت وعلاء الدين جانا خاشي قال ليها وافقت بي فرح طوالي قالو يجيبو مأذون قلت ليهم عندي طلب عشان اهلي مافي اطلبوني من خالتو علويه امو قالت بكره دي نمشي ليها وفعلا تاني يوم مشو ليها واتقدمو لي حسب الاصول خالتي علويه فرحت وبكت كانو وحده من بناتها فرحت لي وتم عرسي عمل لي عرس حلو يليق بي وجاء علي في الكوشه اتفاجأ اني العروس بارك للعريس وبعاين لي بي انبهار كده وحسد وغيظ وغل نظرتو فيها كلام كتير قمت مسكت علاء الدين من ايدو وهو مسك يدي بطمني انه مافي داعي اخاف هو سندي وسافرنا شهر العسل دبي انا وهو ورفضت اسيب العيال كان زي اجازه عائليه كنا مبسوطين شديد علاء الدين حنين وطيب تعامله حلو كان بحب ولدي اكتر من البت قلت ليهو انت بتظلم لي بتي قال لي ده بعتبرو فرحتي الاولي واول م نطق لي قال لي بابا قلت ليهو ما تعقد لي بتي طبعا البت بعتبرها روحي من جوه وما برضي فيها اصلو وسبحان الله طلعو متفاهمين الولد م برضي في اخته نهائي رجعنا السودان علاء الدين عندهم شركه استيراد وتصدير من الاهمال خسرت درست وعملت ليها خطط وفتحت المكتب بي حلول بسيطه وقفتها وامورنا اتحسن بقينا الحمدلله علاء بي شركتو وانا بي شركتي واتعلمت السواقه واشتري لي عربيه دخلت بتي الروضه حلات الدنيا عليها وشقيه لازم تجيني بالليل تفتشني وتنوم في حضني صوتها مالي البيت وبعديها بقيت حامل علاء الدين فرحتو ما بتتوصف قال لي دبستك فيني مافي ليك مخرج الدي سريع عشان نجيب باقيهم وضحكنا قلت ليهو لسه في باقي قال لي حنجيب ٦ تاني وضحكنا بنتكلم علاء الدين قال لي مسافر لي شغل وانا بجي بعد اسبوع قلت ليهو كويس مشي وبتصل تلفونو مغلق قلبي اكلني يوم قاعده الباب دقا فتحتو لقيتو ده علي .......يتبع

#_غلطه_في_عمر_صغير
بقلم ناني عمر بيك
-٦-

لقيتو علي اتفاجأت طبعا قلت خير قال لي مشتاق ليك قلت ليهو مجنون احترم نفسك قال لي عاوزك ما قادر انساكي وجيت اقفل الباب دفرو وداير يهاجمني بس في اللحظه ديك راجلي جا ومسكو مني وقع فيهو ضرب خبطو خبط الجن مسكت راجلي قلت ليهو ما يستاهل عندنا عيال حتي خلاهو قال ليهو مرتي حامل ولو حصل ليها شي تلوم نفسك يا واطي وطردو وقفل الباب جا مسكني حلف الا نمشي مستشفي مشينا الدكتوره قالت ليهو كويسه ما عندها حاجه حتي اطمن قال لي نرحل من البيت ده قلت ليهو بيتنا ده كويس قال لي بعد الحصل ده نمشي طوالي قلت ليهو طيب المهم قلت ليهو انت تلفونك مغلق لي شنو من مشيت اسبوع وانا راسي مقطوع قلت ليهو انت كنت وين قال لي سفره سغل مهمه وتلفوني قطع شحن المهم بعد اسبوع قال لي نرحل قال لي بس شيلو بس شنط الهدوم مشينا عماره ٦ طوابق كبيييييره قال لي اشتريتها جاهزه قلت ليهو غاليه قال لي شقي عمري كلها فيها بس ما اغلي منك ومن عيالي مشينا دخلنا الشقه مفروشه مبالغه فيها ٦ غرف وصاله كبيره ومطبخ كبير وبلكونات وكلها مفروشه فرحت وبكيت من فرحتي قال لي بكره في ضبيحه جايين ضيوف وانا فرشت طابقين تحت شوفي ليك شغالتين عشان يمسكو البيت ما تتعبي قلت ليهو ضيوف منو قال لي ضيوف اهلي من البلد قلت ليهو يشرفو علي عيني وراسي وفعلا الصباح كده طلع عشان يجيبهم من الموقف جا دق الباب قال لي انزلي للضيوف تحت مشيت عشان اسلم عليهم لقيتهم ديل اهلي امي وابوي واخواتي ورجالهم وكبارات العيله طبعا من الصدمه اغمي علي فتحت لقيتهم كلهم واقفين في راسي وراجلي ماسك ايدي مسكت امي وبكيت واخواتي راجلي قال لي بوسي يدك ابوك وراسو وسلمي لي اعمامك مسكت ابوي وبكيت اول مره اشوفو يبكي وقعدنا كلنا ابوي قال لي وجعتيني يا بتي قلت ليهو سامحني يا ابوي قال لي سنين بسأل نفسي حصل ليك شنو ميته ولا حيه زوجي طوالي حكي لي قال لي مشيت قريتكم معاي رجال دين وقعدنا وفهمنا الناس دي انو قتل النفس حرام واشتغلنا فيهم فتاوي وانه الغلط ما بعالجوهو بي جريمه بعالجوهو بي الدين وانك غلطي والحمدلله صلحناهو بي الدين والستر زي ما ربنا امر انتي زوجتي وام اولادي وحمايتك واجبه علي الناس تتسامح كبار العيله قررو مافي حاجه اسمها بت تتقتل اي حاجه بي الشرع والدين وقفو زواج القاصرات وغيرو قوانين القريه فرحت وبكيت وكانو مبسوطين بمدحو في راجلي وقالو ليهو انت ولدنا مننا وفينا قال ليهم ابشرو وطلعنا النسوان في شقه وخلينا الرجال براهم والشغالات جهزن الاكل وضايفوهم بي احسن ما يكون وانا في حضن امي مره بكا ومره فرح واولادي مبسوطين من اهلي اهلهم وحكينا كتير والحصل بعد ما مشيت وقلبو علي الدنيا ابوي بفتش ليل نهار كان بتمني يلقاني حيه قال بحميني بس امي من خوفها ما اتكلمت خافت اخوانو يأثرو عليهو ويقتلني راحه نفسيه انا وسط اهلي وناسي وامي وابوي وقعدو معانا اسبوع وسافرو

ودعت اهلي وسافرو بين دموع وفرح رجعنا بيتنا قلت لي علاء الدين لو مهما شكرتك ما بوفيك رجعت اهلي ضهري كان مقسوم قال لي كده ح ازعل يعني ما كنت مقويك قلت ليهو ما قصدي زعلك انا بس كنت حاسه اني ميته وانا عندي اهل واخوات قال لي انا لو لفيت الدنيا ما بلقي زوجه زيك ربيتي لي بتي وبقيتي امها قلت ليهو مافي كلام زي ده تاني البت بتي ومافي زول يقدر يغير ده قال لي حاضر يا ام اولادي بس الحقي طلعي ده عشان نجيب اخوانو ابتسمت ليهو قال لي في شي تاني م ح تنزلي الشغل عشان ما عاوزك تتعبي قلت ليهو بس في شغل كتير قال لي اشتغلي هنا في البيت وللضروره امشي المكتب قلت ليهو امرك قال لي مرتي شاطره عارفها ومرت شهور حملي مشينا محل البيبي عسان نشتري الحاجات نسيت حاجه قلت لي راجلي ارجع جيبها مشي وقبل ما يجي راجع لقيت علي ومرتو حامل من شافني وشو اتغير مرتو ما بتعرفني دخلت جوه المحل وهو جا يتكلم معاي قال لي كيفك قلت ليهو اهلا قال لي تعرفي انك جميله واتغيرتي كنتي بت قريه هايفه وغبيه صدقتيني بالساهل قلت ليهو انتقام ربنا قريب وانا دعيتك بعد شويه راجلي جا وشافو عاوز يشاكلو قلت ليهو ما توسخ ايدك عاينت لي علي قلت ليهو بي سببك لقيت راجل احلامي راجل نضيف واحسن منك ومن مليون راجل انت سبب تعاستي وبعدي من اهلي سنين لاكين بي سببك عرفت علاء الدين واتزوجني الحمدلله ما ارتبط بيك انت حتي صحبك الوحيد خنتو مع خطيبتو عشان هو راجل سكت وما حسيك بي شي يا غزر كنت ح اندم طول حياتي لو كملت معاك بقي واقف مصدوم ما قدر يقول شي سقت راجلي ومشينا كان مبسوط شديد وبعد يومين ولدت ولد حلات الدنيا عليهو الخالق الناطق علاء الدين ابوهو واهلي جو السمايه وفرحو بي المولود قضو معاي ايام ومشو قعدت امي واخواتي لحد الاربعين وفاتو قاعدين كده الباب دقا زوجي فتحو لقاهو اخو علي ومرتو بت قريتنا طبعا اتفاجأنا من سبب الزياره فضلهم وسلمت عليهم وضيفتهم مستنيين نعرف هم جو لشنو قام طوالي قام زوجي قال ليهم

خير يا جماعه طوالي اخو علي بدا يجيب مقدمات وكلام كتير في النهايه قال لينا علي عيان ومحتاجين ليهو نقل نخاع شوكي انا وراجلي بقينا نعاين في بعض قلنا ليهم ربنا يشفيهو بس نحنا علاقتنا شنو بالموضوع طوالي قال لي انتي مش كنتي حامل من علي فاجأني من كلامو قلت ليهو عرفت كيف انا حامل من علي قال لي انتي قلتي قلت ليهم مش انت طردتني مش اهنتني وصدقت اخوك انا هسي بقول ليك الجنا ما بتاع علي انا بس كنت عاوزه قروش علي قولك ولو سمحت اتفضلو من غير مطرود وابعدو عني نهائي قال لي علاء انت رايك شنو قال ليهو كلامها واضح مافيهو اضافه ابعدو عننا وعن اولادي طوالي مشو بعد كم يوم جاني ولدي قال لي يا ماما انا ابوي منو طبعا كأنو اتخبطت في راسي قلت ليهو ده سؤال شنو ابوك علاء الدين قال لي في راجل جاني في المدرسه وقال هو ابوي قلت ليهو شكلو كيف وصفو لي ياهو علي قلت ليهو ادخل غرفتك وغير هدومك نتكلم بعدين طوالي ضربت لي علاء الدين قلت ليهو تجيني هسي قال لي مالك الاولاد حصل معاهم شي قلت ليهو لا بس في مشكله قال لي طيب اقفلي انا جاي طوالي جا قال لي انتو كويسين قلت ليهو علي مشي للولد في المدرسه وقال ليهو انه هو ابوهو قال لي كده هم بدو قلت ليهو دي ما المشكله هنا ولدك سألني ما عرفت ارد قال لي الولد ولدي ومافي غير كده طوالي مشي ليهو الغرفه وقال ليهو انا ابوك ومافي غير كده اي زول يقول ليك غير كده كذاب قال ليهو انا يا بابا عارف انت ما ابوي سمعت قبل كده بتتكلم مع امي طبعا صدمنا قال ليهو بس انت بابا حتي لو ما ولدتني طبعا زوجي مسكو وقعد يبكي قال ليهو يا بابا انا ما زعلان عشان انت ما ابوي الحقيقي انت احسن من ابوي الحقيقي علاء مسح دموعو وحضنو قال ليهو انا ابوك وانت ولدي الكبير ح تمسك مسؤليه اخوانك لمن تكبر قال ليهو حاضر وطلعنا بجد هم وانزاح كنت خايفه من المواجهه دي من زمان والحمدلله عدت علي خير طوالي راجلي قال طالع ماشي لي علي في البيت لبست توبي وقلت ليهو جايه معاك اول رفض بس انا اصريت قال لي طيب ومشينا بيت علي لقيناهو هو ومرتو قاعدين واخوهو معاهم طوالي علي كان تعبان مركبين ليهو درب وادويه اتفاجأنا انه تعبان كده لقينا طوالي علاء قال ليهم انتو مشيتو لي ولدي في المدرسه لشنو اخو علي قال ليهو الولد ولدنا وابوهو محتاج ليهو قلت ليهو لا ما ولدو ده ولدي انا وعلاء الدين اخوك ما عندو معاي حاجه عاينت لي علي قلت ليهو نسيت العملتو فيني غشيتني ولعبت بي ما فكرت تكون راجل وتقيف معاي اهنتني وذليتني وسجنتي ظلم لا وخليتهم يضربوني وانا حامل ما خفت من الله ولا خفت علي جناك رميتني ومسكتني مسؤليه ما قدرها بعدتني من اهلي خليتني عايشه مقطوعه من شجره ومعدومه جاي تقول ولدك عارف ليهو شنو انت حتي اسمو ما بتعرفو مش قلت ما جناك مش قلت بت قريه وغبيه اهو الغبيه دي الحل في يدها وريني ح تحل مشكلتك كيف قلت ليهو مش مرتك والده خلي جناها يتبرع ليك لاكين ولدي ما بخسرو عشانك قال لي انا عارف العملتو فيك ما بسيط ربنا عاقبني حتي المولود الجديد طلع ميت قلت ليهو شفت انتقام ربنا كيف كلمه وحده ومافي غيرها لو شفتك ميت قدامي ما بخلي ولدي يتبرع ليك علي طوالي ساقني وجينا بيتنا للصباح ما نمنا ولدي وقفتو من المدرسه شهر كامل الواجب في البيت وعرفت من اصحابو انه اخو علي جا مرتين سال منو كلامي كان في محلو كانو ح يخطف ولدي تاني يوم الضهر كده جاني اتصال من بت قريتي قالت لي علي بيموت وقال عاوز يشوفك انتي والولد بجد علي تعبان في اللحظه ديك راجلي جا وسمع الحوار بعد قفلت قال لي جهزي نفسك عشان ح اخدك انتي والولد يشوف ابوهو قلت ليهو لا قال لي اسمعي الكلام الراجل بيموت قلت ليهو ما يمكن كذب قال لي نمشي ونتاكد اكيد م حيخطفو من ايدنا بعدين انتي ناسيه الولد مسجل بي اسمي قلت ليهو طيب اتجهزنا ومشينا لقيناهو تعبانه منتهي دخلنا سلمنا طوالي بدا يتكلم قال لي انا ح اموت طالب منك السماح سامحيني وخليني اموت مرتاح عاينت لي راجلي وهذ لي راسو قلت ليهو مسامحاك دنيا واخري وطلب من راجلي يسامحو وراجلي قال ليهو مسامحك من قلبي وقبل علي ولدي بعاين ليهو مد ليهو يدو ولدي مسك علاء الدين قال ليهو ده ابوك الحقيقي وهو عيان سلم عليهو بعد تردد مسكو من ايده علي اتامل فيهو وبعد شويه دمعتو سالت قال لي اخوهو شهودني شهودو وعلي مات الله يرحمو ومرتو بدت كواريك بقيت اواسي فيها رجعنا البيت ومشينا العزا عملنا الواجب رغم انه حالتو كانت صعبه بس في قلبي ما زعلت عليهو وما ندمانه رفضت انه ولدي يتبرع ليهو ما عشان بنتقم منه بس خفت علي ولدي عدت السنين ولدت بتين وولد اولادي بقو ٦ فرحانه بيهم ولدي دخل الثانوي سافرنا قريتنا قعدنا فيها شهر اطورت ودخلو فيها الكهربا وفتحو مدارس ثانوي وعملو توعيه للمجتمع والنسوان بقت من قريه مدينه ورجعنا بيتنا واولادي دخلو المدارس وبقيت زمني مقسماهو بين اولادي وشغلي وزوجي كل شي امتحان من ربنا عشان نصبر كل شي كعب في الاحسن منو

مكتوب
النـــــــــــهاية

#مياسم
الليلة اول يوم زواج لي !
اتزوجته من راجل لا بعرفه لا بيعرفني ، ااااي زي ما بتقولو كدا زواج تقليدي !!!
بعد حبيبي الـ(عمرو 28 سنة ) و بت خالتي( العمرها 40 سنة ومتزوجة) #خانوني ، اكتشفت انهم عاملين علاقه مع بعض.

انا مواليد السعودية ، يعني عشت حياتي كلها في السعوديه و قريت فيها من الاساس ، لحد لمن جا وقت الجامعه ، نزلت السودان و دي كانت اول مرة لي ، مع العلم ان اخوي الوسيلة نزل قبلي السودان بـ سنة للجامعه برضو ، فاا وجودو سهل علي مرضوع دراستي في السودان ، و علاقتي ب الوسيلة كويسه شديد ، #المهم علاقتي بـ حبيبي ( محمد)
بدت من اربعه سنوات بـ حسبة يومنا هذا .. #المهم2 عندي بنت عمتي (زينب) بتقرأ في هاي ليفل ، مشيت معاها زيارة و من اليوم دا قصتي بدت ..
بالنسبه لي محمد دا اصلا ما كان لافت نظري و لا كنت منتبهة لـ وجودو ، لحد ما لكزتني زينب ، و متزكره جملتها لحد اللحظة دي ، قالت لي : ( محمد ما شال عيونو من عليكي ) ، قلت ليها محمد منو ؟
قالت لي جاي زيارة ساي بس دي المرة التانية يجينا مع احمد ود اهلو ، قلت ليها اهااا ..
فا امي اتصلت علي ، طلعت تلفوني من الشنطة و زحيت بعيد اخدت لي زاوية و اتكلمت معاها ، مسافة انتهيت من المكالمة لقيت محمد واقف ، عاينت ليهو وبقيت عايزة امشي ، قالي دقيقه ... و من هناا تواصلنا بدا ، كيف ، كيف ما بعرف اقنعني وشاال تلفوني ..
و من وقتها بقى محور حياتي ،.. مكالمات كل يوم ، لمن نجي نتلاقى كنا بنتلاقى عن طريق زينب في الجامعه ، لحد ما جا يوم و قالي انه مسافر السعوديه
و انه ليهو فترة كان بجهز في اوراقه و الحمدلله اتوفق ، الغريبه ما زعلتا والله بالعكس فرحته ليهو و لانه ماشي السعوديه تحديداً ما حسيت انه حيتغرب ، لمن شك فيني قالي كنت متوقع منك ردة فعل غير دي ، قلت ليهو انا لمن بحب زول بتمنى ليهو الخير ، و اسي الخير جاك و البفرحك بيفرحنب يا محمد ..
المهم ما اتلاقينا لفترة اسبوعين قبل زواجه ، لحد لمن جا وقت سفره ما كنت بقدر اطلع لانه فترة امتحانات و وجود الوسيلة كان كتير في البيت ، بس كنت متابعه معاهو في التلفون ، لمن وصل .
الغريبة انه بعد سافر تواصلنا بقى زيادة ، يعني م بنتفارق الا ساعات النوم ، و لحد لمن جات اجازتي ورجعته السعودية ، هو كان في جدة و انت كنت في الرياض فا ماكان في مجال انه نتلاقى ،،
و تاني رجعته السودان لسنه تانية ، و علاقتنا ماشه تتعمق بزيادة ..
لمن في يوم امي اتصلت علي و قالت لي ، بت خالتكم ( بهجة ) حتجي تنزل معاكم كم يوم ، كلمي الوسيله ، حتى قلت ليها براها ؟ قالت لي ايوة زوجها سافر ما بعرف وين كدا ،
قلت ليها حبابها ، الوقت داك بهجة دي انا كنت سامعه بيها سمع ، و حسب علمي انها قاعده في القصيم فا م كنت فاهمة حاجة و م اهتميت بالموضوع كتير ، كل العملتو قمت نضفته و رتبته البيت ، و اتصلته على محمد وريتو انه جايانا بنت خالتنا و حتقعد معاي في غرفتي لانه اصلا شقتنا غرفتين بس ، و صعب القى طريقه اتكلم معاهو خصوصا انه اول مرة ح التقى بيها .
المهم اتذكر زوجها وصلها لينا لحد البيت كان بعد المغرب ، جاتنا و شكلها بيقول عروسه جديده ، و زوجها اعتذر مننا انو قلق بينا وكدا وشرح وضعو و بعد كم يوم حيرجعو السعوديه ،
بالنسبه لي انبسطته بيها لانها زولة ضحكة و وشها فرايحي جد بهجة اسم على مسمى ، المهم عملنا العشاء انا والوسيلة ، و اتعشينا و دخلت معاي غرفتي غيرت و قعدت مسكتني ونسة ، و بهناك محمد بيرسل لي لمن فتر و انا بجاي قاعده اتونس
بصراحه حبيتا و ما حسيت بالزمن ، لمن هي نعست انا مسكت تلفوني و بقيت بدردش مع محمد ،، لمن قالي انه ربنا وفقو في شركة في الرياض و حيشتغل فيها و كان صابح مسافر و قالي انه عنده اعمامه وخيلانه في الرياض وعلى اتم الاستعداد انه يلاقي اهلي ، لان شغله الكان موقفو و اسي الحمدلله ربنا كرمه ، المهم م بنسى فرحتنا الليله ديك و قعدنا ندردش لحد الصباح و هو طالع يركب من النقل على الرياض ، حتى بعداك نمته ، و صحيت با اتصال منه
رديت و قلت ليهو #هاحبيبي، وصلت بالسلامة ؟
و نسيت ان بهجة جاتني و ممكن تكون سامعاني ، و فعلا بعد استوعبت الحاصل لقيتا قاعدة في السرير تعاين لي و تتبسم ، تلقائياً قفلت في وشوو من غير م احس بنفسي .
و بتوتر قلت ليها صباح الخير نمتي كويس ، قعدت تضحك قالت لي اي حمدلله ، ارجعي للزول القفلتي في وشو دا ، انا زي اختك ي بت عادي اخدي راحتك ،، و ياريتني ما اخدت راحتي ...
خجلتا من كلامها برضو و قمت ع الحمام و جهزت الفطور ، و الوسيلة كان مافي و استلمتني وانحنا بناكل ، ما بنكر انها ذكية و زول مسايسة شديد ، خلتني احكي ليهاا علاقتي بيهو من قرارك نفسي ، و مرت الايام و بقيت بتكلم معاهو عادي قدامها ، من اول مرة اتكلمت فيها معاهو قدامها و هو كان بيصمم يقفل و بيقولي انا كدا م مرتاح و لمن تبقى براكي ارجعي لي و انا كنت بصمم انه لا نتكلم وانه عادي ، و يرجع يقولي انه ما حبيت الزولة دي و ...الخ
المهم

قعدت معاي قريب شهر ، و عرفت ان المشكلة اقامات تقريبا ، المهم بعد 28 يوم اوراقهم جهزت ، و قالت لي انه خلاص بعد دا حيرجعو السعوديه ، و كان فاضل على العيد فترة بسيطة ، بيني وبين نفسي زعلت شديد حسيت انه حتقطع لي راسي ، بس دي حاجة لابد منها ..
و قالت لي عايزة تنزل السوق و محتاجاني انزل معاها ، قلت ليها جداااا ، و قبلها بيوم انا كان مصاريفي وصلتني ، فا لبسنا و كلمت الوسيلة و طلع معانا ركبنا و رجع ، و قعد يوصي فيني على جمب كدا ، خلي بالك من نفسك و م تتاخري واي مشوار خلاف السوق ما تمشي ، رغم انه بيثق فيني شديد و م حصل وصاني كدااا ..
المهم لافه معاها في السوق ، شفت على الله و طقم كدا رجالي طبعا ، وقفت فيهو عجبني شديد ، قالت لي مبالغه و حلو وضخمت لي الموضوع و انه حتاخد طقم ل راجلها عشان العيد وكدا ، فا كبرتا لي في راسي و الهاشمية شالتني ، و اشتريت وحدة ل محمد ، و طقمت معاها و خلصنا باقي الحاجات و رجعنا البيت .
اثناء ما هي بترتب حاجاتها قالت لي اهاا مسافرة متين انتي السعودية ؟ قلت ليها في اجازتي لسه باقي زي شهر كدا ، قا اتخلعت قالت لي وهدية محمد ما حيعيد بيها و بايخه بعد العيد و كيف حتوصل ليها و انتي حتمشي بعد العيد و جوطتا لي شديد .
قلت ليها ي زوله هي هدية بي قيمتا جوة قلبو ما بي وقتها ،، قالت لي صح ، لكن برضوو يعني انا زوله متزوجة وعارفه الحاجة البتفرح قلب الراجل شنو ..
قلت ليها اعمل شنو يعني ، جات كدااا
قالت لي رايك شنو توصلو عن طريقي ؟
قلت ليها كيف و انتي في القصيم !!! وهو في الرياض
قالت لي لا شغل راجلي في الرياض حالياً ، المهم الفكرة كانت غريبه بس هي طمنتني م ادتني مجال لحاجة .. اقتنعت تماماً
و ياريتني ما اقتنعت.....
يلا جا اليوم الكانت مسافرة فيهو
ودعناها من خشم الباب ، و الغريبة الوسيلة اخوي كان فرحان بي مشيتا دي شديد و لاحظت انه ما بيحبها ، حتى لو ختينا الاكل م بياكل معانا دايما بيقول اكل برا ، م عدا اليوم الجاتنا فيهو داك ،،
المهم ، انا بكيتا عديل وهي ماشه والله لمن الوسيله دا استغرب فيني ، دخلنا البيت و بقيت قاعده برااي ،
اتصل بي محمد و كان فرحان انها مشت و كنت بشاكلهم هو والوسيله ، و بقوليهم دي طيبه وحرام عليكم ، و الباقي قلبناهو حب و ونسة لمن نمت ليهو في السماعه ..
يلا تاني يوم طوالي لقيت اتصالات من رقم سعودي ، و ما كان عندي رصيد ارجع للرقم فا ما بعرف غباوة ولا شنو رسلت الرقم ل محمد قلت ليهو شوفو لي منو لانو داقي لي كتير ،، فعلا اتصل و قالت ليهو انا بهجة و انا اتصلت ب ( مياسم) اااي صح اسمي مياسم ..
عشان تديني رقمك و اسلمك الامانه ، ف كان مستغرب امانة شنو انا اصلا م جبت ليهو سيرة المهم قفل منها و رجع لي و انا حكيت ليهو ، و قالي قوليها تخليها معاها لمن اجي لاهلك و موضوعنا يبقى رسمي ، بعداك بشيلها منها ب عين قوية ،، ما بنكر كل مرة محمد ككان بيثبت لي انه حبو لي قوي شديد ، و فعلاً و صلت الكلام دا لبهجة بالحرف الواحد ، من خلال الواتساب حقها اللي عملتو جديد ..
قالت لي سيد راجلي قال حنمشي القصيم و م عارفه برجع الرياض متين و ...الخ
انا هنا بي دوري ، ضغطت على محمد ، و قلت ليهو حاول تلاقيها ، و هو كان رافض شديد ، لمن قالي خلاص يا مياسم خلي بهجة دي تدي امانتك دي ل راجلها و يوصلها لي ، و برضو مشيت كلمتها و قالت لي تمام ، رغم انه ما عارفه حتقول شنو ل سيد راجلها ،، قلت ليها انتي اتصرفي و رقم محمد معاكي قولي اي حاجة لسيد ... يعني لمن اقنعتني ارسل الهديه دي معاها و سهلت لي الموضوع ، اسي فجأة اتشربك ،،
فات اليوم دا بي نقتو و جوطتو ، واصبح زينب بت عمتي جاتني ، قعدت معاذ و جات ساقتني ابيت معاها ، و في االيوم دا اكتشفت ان في انجذاب بينها وبين الوسيلة بس ما موضوعنا اسي ..
المهم زينب سمعتني بتكلم مع محمد ،و انه قالي ان بهجة كلمتو انه يجيهم بكرة و رسلت ليهو اللوكيشن واتساب ، قلت ليها اخيرا و حمدلله و استأذنت منو عشان قاعده مع زينب ،، المهم ( فلقتكم بالمهم دي 😹 م تركزو ) ، لمن سمعت الكلام شاكلتني و اني كيف اكون متهورة بالطريقه دي و كيف اسمح لمخلوق يتواصل مع محمد و اصلا يعرفف بعلاقتنا ، و بشتنتني شديد و انبتني اكتر ، و بقيت ساكتة بعد ما كنت بقنع فيها اني صح و ان بهجة طيبة ، للحظة حسيت اني في دوامة و فجأة قلبي قبضني ، و ف نفس اللحظة محمد رسل لي رساله مكتوب فيها :
(‏ فإن الساعي إليکِ حلالاً لن يخونه دربه ؛ وسيسوقه الله لعقر دارک مجروراً من قلبه ❤ رسلي لي رقم أبوكي )
الفرحة الدخلت فيني في اللحظة ديك ما بقدر انساها ، و حكيت ل زينب ، شالت مني التلفون كتبت ليهو رقم ابوي ، قلت ليها ما ترسليهو دقايق ، قالت لي انتي باردة و يومك بي سنة ، و عملت ارسال ، قام رد لي بي قلوب ، و بقيت مضيعه من الفرحة ما فاهمة شي ...
جا اليوم التاني ، رسل لي رسالة صباح الخير متاخر و قالي ملخوم و جايط ف المكتب ،المهم م ركزتة ، قامت رسلت لي بهجة قالت لي زولك دا

منتظرنو و ما بيرد ، قلت ليها جيرجع ليككم اسي عندو جوطة في الشغلز، قالت لي تمام ..
و لحد المغربيات بقيت قاعده منتطراهو ما رجع لي ، و جاني االوسيلة رجعني البيت ،وبقيت قاعده برسل لي بهجة ما بترد ، و بقيت خاته التلفون و راقدة ، فجاة رسل لي رساله قالي : شكرااا على الهدية الجميلة ، لو قاعده براكي كلميني فيديو ..
فرحته شديد ،و طوالي دخلته ليهو ب اتصال ، طبعا بقفل كمرتي ،، سلم علي و وسو كان ما بتفسر بس كان بيحاول يضحك لي ، قالي دقيقه ، خت التلفون على وشو ، لبس ال ( على الله ) ، و وجهه لي التلفون عليهو ، قالي شاطرة عرفتي مقاسي و ما كان تتعبي نفسك و كلام زي داا ، انا بس كنت ساكته .. انتظرتو لمن غير و رجع لي قالي يلا حرجع ليكي ب اتصال عادي ،، قلت ليهو خليك ،قالي لا عشان ح اطفي النوور ، قلت ليهو تمام ..
بعد اتقل علي قلت ليهو حاصل شنو ، قالي مافي شي و حاول يطمني انه بخير ، م حبيت ازعجو وعملت فيها اقتنعته .. المهم فاتت الايام وبقيت قلعده منتطرة محمد يقولي انه كلم ابوي ، و انا ما سالتو ، لحد ما جا في يوم ، لقيت بهجة خاته صورة من سُفرة اكل ، و كاتبه تحتها ، نورتنا و كانت لمة حلوة يا (M) ، علقت ليها ايامكم ، سافت الرسالة و ما ردت ..
و اتصلت على محمد ، قالي مشغول يا مياسم ،وقفل قبل يسمع ردي ،، ختيت ليهو العذر ، و كنت داخله على امتحانات ، و كنت محتاجة اركز واجتهد شديد لانه بعده طوالي كنت حأنزل السعوديه اجازتي و منو اجدد الاقامة حسب كلام ابوي ..
المهم بقيت بي نص تركيز مع محمد ، حتى ما بيسالني عن الامتحانات ولا اي حاجة ، فا التغير بقى واضح شديد ..
بي حلوها و مُرها الامتحانات انتهت ،و بقيت بجهز في اموور سفري ، و رسلت ليهو اني جاية الرياض ،كل القالو لي توصلي بالسلامة ، مافي اي ريأكشن ، مافي اي نوع من انواع الفرح او اي تعبير ، بقيت حقيقي فاقدة محمد وانا ما فاهمه اي حاجة ،،
جا يوم سفري والله راد ، الوسيلة وصلني لحد المطار ، و طول فترة سفري انا محملة نفس الذنب ، يمكن انا قصرته منو ، انا كان مفروش اقرب ليهو اعرف في شنو في الشغل مجوطو و قالب حالو ، و بقيت في الحال دا لمن وصلتا ، و لحد اليوم التاني ، محمد م رسل حتى يسألني وصلت كيف ، ولا حية و لا ميته (بقلمي / سحر سمير ) ..
المهم قررتا بيني و بين نفسي اني لازم اطيب خاطرو واعتذر عن اي تقصير ، عشان نفرح و ناخد الخطوة البنحلم بيها لينا زمن ..
و اتصلت عليهو مراراّو تكراراّ بلقاهو مشغول ، مشغول ..
مشبت قعدت جمب امي بقت تتونس معاي ،و انه عندنا مناسبة زواج وحدة قريبتنا زي الليله و بكرة كدا المناسبه ، قلت عديلة ذا مياسم اغير جو شوية ،، فا سالت امي عن بهجة ، قالت لي بهجة ، الله يهديها ، قلت ليها ليه في شنو ؟
قالت لي بالله تلقى زي سيد راجلها دا وين ، واقغةليهو وحالفه الا تطلق ، و رامية فيهو العقم ، وقالت عايزة اولاد و انها لازم تطلق وتشوف حياتها ،وهو مسكين ما عارف محل يقبل ، والله العظيم يا مياسم فارش ليها شقه في ال... تقول انا انا ، ما ثخليها محتاجة شي ، قلت ليها معقول بهجة تعمل كدا ؟ و بعدين ليه ما يكون العيب منها هي ؟ هي زاتها ما صغيرة بعد دا يا امي ، عمرها مش 40 سنة ؟
قالت لي 41 ، قدر خالك ابو عبيدة ( امي وامها ما شققا و دي قصه براها ) ،، قلت ليها والله ياخ الزوله الشفتحها دي فرايحية ما بتاعت مشاكل و ان شاءالله ربنا يهدي سرهم ،، و استأذنت و قمته ..
رجعت بعد دايرة اتصل خليتو ، ما قدرتا اتحمل ، قمتا اتصلتا عليهو ،، دخلني في الانتظار و رد لي ..
_الو
*ايوة يا محمد انا مياسم
_اهاا ، ايوة كيفك
*معقول دا ردك لي يا محمد ! طيب انا لو غلطت عليك بقصد ولا من غير قصد ياخ وريني ، معقوز تتغير علي كدا ،كنا وين وبقينا وين ، حاصل شنو ؟
_مافي شي ضغط شغل بس ..
*لا في الموضوع م مجرد شغل ، في شنو وريني الله يرضى عليك ، و بعدين انا جمبك هنا في الرياض ، تعاال قابل ابوي قبل ارجع زي ما متفقين و نتراضى. و ....الخ
_اقابل ابوكي ! مياسم ، انا غيرت رأي
*ياخ ما تهظر كدا ،دي كلها زعله ، طيب عاقبني ياخ لكن... انت ما اشتقت لي ؟
_مياسم انا ما قعد اهظر ، انا #بحب وحدة تانية !
*هههههه محمد ياخ ، عليك الله بطل و الله فاقداك ، وريني بس انا مزعلاك في شنو عشان اصالحك (رغم اني مقتنعه اني ما زعلتو ، و حتة انه م استفقدني في امتحاناتي رفي سفري دي حزت جوا نفسي ، بس الصلوب بتشيل بعض الدنيا ما مستاهله ) ..
_مياسم ، دي الحقيقه ، انا حأقفل ،، عن ازنك * لا ما تقفل ، انا ما فاهماك ( كنت في حالة صدمة ) ..
_كلامي واضح ، انا بحب وحدة تانية غيرك ، وانا وانتي مافي اي علاقة بتربطنا .. **قفل الخط في وشي ..
بمنتهي القسوة ، قالي كدا ، حتى ما فكر يصيغ كلامو لي ، بأختصار دا اسوء يوم انا عشتو .. ختيت التلفون و والله دمعه وحدة ما نزلتها ، بقيت قاعده في نص السرير مربعه و مسهمة ، بحاول استوعب .
انتو متخيلين قمته دخلتا المطبخ ساعدت امي ، و اتونست مع ابوي

، و رجعت غرفتي وفتحت الدولاب ، طلعت لي طقم للعرس حق بكرة ، اللي اصلاً ما بيلزمني ..
و رجعت سريري ، و انفجرت بكا ، بكل ما اوتيت من وجع ،بقيت بشهق و بفتش للهواء عشان اتنفس نا قادرة مكتومة ، عشان صوتي م يطلع على العلي ، ختيت المخدة على وشي وضغطته ، و بكيت بحرقة .
و سبحان الله ، الراجل قيمتو عند الوحدة من حب كبير بيتحول لي بكية ! هي بكية وحدة و بعدها كأن شيئ لم يكن ..
طلعت على الحمام ، استحميت ، و رجعت سريري اتغطيت و نمت م صحيت الا تاني يوم ..
جا وقت العرس ، لبسته عادي جدا ، م حقوليكم كنت حاجة رهيبة ، و واو شديد ، انا كنت عادية جدااا بس لاني خابة اكون كدا ، المهم مشينا ، من دخلنا سلامات ، و مشيت قعدتا و مسكت تلفوني بمسح في كل حاجة ليها علاقه ب محمد ّ..
مع رفعة عيني شفت منو ؟ شفت بهجة ، ياخ انا من الفرحة كنت حاسة اني حأطير ،، قمت خميت حاجاتي وخليت امي مع صحباتا ومشيت علي بهجة ، اول حاجة منظرها ما بيوحي انها مارة بمشاكل زي ما امي حكت لي ، قمة القشرة ، والاناقه ، بس لا حنة لا دبله ولابسه موضه ، رغم ان عمرها ظاهر ، بس كونها ما والدة دا ماديها باور انها لسه شباب ، انا ضربتها ف كتفها من اتلفتت اتخلعت بس انا حضنتها ، و دمعتي جرت احساس انها عارفه محمد وعلاقتنا و عايزة افضفض ليها ، قلت ليها تعالي نقعد ، وجريتا ابت تمشي معاي قالت لي انا عندي صحباتي منتظرني ، قلت ليها جلية معاكي ، قالت لي لا م بتعرفيهم ، المهم حاولت تتملص مني وكانت مختلفه من الزولة القابلتها ديك ..
قلت ليها في شنو ؟ ، تلفونها رن وهو ف يدها قامت كنسلت وحاولت تزح من جمبي ، المهم فتحت ليها السكة و مشيت قعدت محلي وانا مستغربة فيهااا ..
سبحان الله صادف خالتي قاعده مع امي في نفس الطاولة ، ف نادتني قالت لي ،نادي لي بهجة ضروري ،(رسلوني )
مشيت بفتش فيها ، عاينت للطاولة الكانت قاعده فيها مع صحباتها ، لقيت وحدة قاعده سالتها ، قالت لي ما بعرف تقريبا مشو الحمام لكن اتاخرو ،هاكي دا تلفونها ، من قبيل بيرن ، بس تلقيها ادي ليها ..
شلتو و بقيت بفتش ليها ، والتلفون شغال يهز في يدي .. استمر زي تلاته مرات ، لمن عاينت في الشاشة ، و اشوف صورة محمد حبيبي في الشاشة و متسجل ب ( نور عيوني ) ..
وقفتا م عرفت اسوي شنو مصدومة ، قعدت في اقرب كرسي لمن حسيت الدنيا لافه بي رجعت طاولتنا ، وقعدت و امي وخالتي بيتكلمو معاي انا م سامعه ولا فاهمه شي ، ختيت تلفونها ف الطاولة وهو لسه بيتصل ، لمن بهجة جات جارية بتلث بتفتش على تلفونها ،، جات وقفت مدت يدها بتمسك التلفون ، انا قبضت يدها بي يدي !
و وقفت و امي وخالتي و كم خالة كدا في الطاوله. ...
قلت ليها ، #خلاني عشانك انتي ؟
انتي يا بهجة ! ، ياخي انتي لو كنتي عرستي بدري شوية كان بتلديهو ، انتي مستوعبه العملتيهو !
شلتي مني حب حياتي الوحيد ! وقاحة و عدم اخلاق للدرجة دي ! اهااااا عشان كدا عايزة تطلقي من المسكين دا ، عشان تعرسي محمد صح ههههه
قالت لي دا كلام شنو البتقولي فيهو دا !
قلت ليها دي الحقيقة ، خليهم يعرفو حقيقتك ، والجوطة بدت وكل واحد بقى يحلل على كيفو ، لبست عبايتي و طلعته ، و امي جات محصلاني ، عايزة تشاكلني ..
حكيت ليها الحاصل كلو من البداية للنهاية ، يمكن العملتو دا خفف علي شوية ، لكن م اكتفيت بكداااا ، كان لازم اوصل لمحمد ، ليهو نصيب الاسد ..
اتصلت عليهو ورد من اول جرس ( دي بقت لي غريبة طبعاً ) قلت ليهو :
*ههههههههههههه ، ما خجلان ؟ عليك الله ما خجلان ، راجل ! اوووه لالا دي ما حركان رجال ، ما عارفه اسميك شنو صراحه ، بس شنب ودقن و طول ، كل دا يطلع صورة ساي من غير شخصيه ! مع مرة قدر دي ! ههههه ،
تعرف انا محظوظة ، لان ربنا نجاني من علاقه مع واحد زيك ، و قعدت اانب في نفسي والوم نفسي ، يااااه ، بالله شوف الفرق بيناتنا ، كل م اتزكر الحصل واتزكرك بحترم وبقدر نفسي اكتر ، و بتاكد ان عندي ام واب واخ ربوني احسن تربية ، و عشان ربنا بيحبني بعد عني كل ابتلاء ، و من اللحظة دي انا لمن ارمي لي وسخ في القمامة ، ما علموني ارجع امد يدي على الوسخ دا تاني ، و انا رميتك يا محمد احمد عبد السلام .
قفلتا فيهو السكة ، و بالجد انا كنت حاسة بأنتصار عظيم وسلام نفسي ما عادي ، رجع اتصل علي ، بقيت بقفل فيهو ، و بجهجة تتصل و بقفل ، اخر حاجة حظرتهم و قعدتت ،انا في النهاية بشر ، مريت بي فترات كانت تحدي بالنسبة لي ، تعبت فيها بس اتجاوزتها ، مع زينب ، و مع القراية و الوسيلة ، كان حاسي بي ما تمام ، فا طواالي كنا بنطلع و نبرمج ...
كان مر على الحصل دا سنة بالضبط ، و اتجاوزتا الحصل بس احساس اني غبيه كان متسيطر علي ،، يلا الفترة دي ، كانت اخر سنة لي في السودان والجامعه ، و في آخر يوم امتحان لي ، خالة امي الفي مدني اتوفت ، طبعاً وصل الخبر لأمي في السعوديه ، والطبيعي الحيحصل انها حتجي السودان ، و ابوي طبعا مرتبط بي شغلو .. فا حسب الحصل انه كان مفترض اسافر بعد تلاته يوم ، فا سفري اتكنسل ، و تا

ني يوم طوالي امي وصلت السودان ، و سافرنا في نفس اليوم انا وهي والوسيلة ، لحد ما وصلنا مدني كانت عظرة بليل يعني حتى الدفنه ما حضرتها ، ياهو قعدنا في تعازي و بكاء ، لمدة تلاته يوم ، ( انا ما عايزة اخش في تفاصيل كتيرة بحاول اختصر واعمم قدرتي ) ..
اتعرفتا على اهلي و بنات اهلي ، و زي م تقولو عملت اصحاب و زي ما بقولو الاهل عز ، بس زينب حتبقى الافضل ..
قضينا فترة العزاء ، و رجعنا الخرطوم ، بقيت شغاله استقبال ضيوف و زيارات ، لان عيلة امي ماشاء الله تبارك .
بعدها بأسبوع ، لقيت الوسيلة وامي قاعدين يوسوسو ، و من اجي يقطعو الكلام ، انا كمان بقيت واقفه ليهم ، اخر شي جابوني قعدوني ، الوسيلة قام خلاني مع امي ..
قالت لي سيد طلق بهجة ، قلت ليها و اذا ؟
قالت لي حتى محمد خلاها و بقت معلقه و طبعا اقامتها على سيد ، و ما عندها حل غير تجي السودان .. قلت ليها والله ياخ ربنا يصلح الحال ، المهم انتو والوسيلة مالكم !
قالت لي ردة فعلك غريبه ، قلت ليها امي ، انتي علمتيني ، لو بقيت ماشه في الشارع و زول ناداني م اتلفت بيهو ، يبقى البخليني اعاين وراي شنو تاني ؟
قالت لي طيب سهلتي علي الموضوع ، سكتت وكملت ، قالت لي والله في واحد دايرك ، رغم انه ما شافك بس كنتي اختيار اخته ، قلت ليها و ديل لقوني وين ؟
قالت لي في مدني و ....الخ .. رايك شنو ؟ قلت ليها #موافقه
قامت من تكويعتها و قالت لي بي انا رفضتا واتحججتا م اتوقعتك توافقي !
قلت ليها ليه ما اوافق ، زول جا دغري و بالباب ، المانع شنو ؟ قالت لي بس ما بتعرفي لاعمرو لا شكلو ولا اي شي عنو !!
قلت ليها والعرفناهم عملو لينا شنو ؟ قالت لي ، استخيري ، قلت ليها اكيد ح استخير بس انا عارفه ومقتنعه ما بيبعد عني حاجة الا لخير و ما حيقرب مني شر ، لاني عبده صغيرة زي و ما عندي الا قلب مؤمن بالله سبحانه و تعالى .فا اتوكلي و كلمي ابوي وقولي ليهم خير ،و ان شاء الله ما يجي الا الخير يا امي ..
و قمت و كنت مبتهجة شديد ، بس راحه نفسيه ، بقيت بتونس مع بنات اهلي الفي مدني ...
و مرت الايام و سبحان الله ، كل شي كان ماشي مرتب ، ولحد لحظة ترتيبات الزواج حقي ، انا ما لاقيت غير اسرتو ل عبدالرحمن ، ااااااي اسمو عبد الرحمن ، والعرفتو ( عشان تكونو في الصورة ) ان عبدالرحمن مغترب في عمان ، و اهله اقل ما يقال عنهم انهم محترمين و ظراف و رايقين شديد ، رغم اني كنت ضد مبدأ ان زول م تكون عندو خياراتو في حياتو ،وان امه واخته يختارو ليهو زوجته، فا م جبيت اتسرع او احكم على شخص انا برضو عملت زيو و قبلت بزواج وحياة م عارفه شكلها حيكون كيف ..
المهم يا حبايب ، ابوي جا ، وعبدالرحمن عمل وكالة لي خالو لان والدو متوفي ، عقدو و عملنا غدااا ، و اشهرو في الجامع ..
و لاحظو كل دا مافي اي تواصل بينا انا و عبدالرحمن ..
و العقد تم على اساس اوراقي تجهز و يرسلوني ليهو طرد ( ياقولكم) ، صدقوني م كنت خاته اي عقبة وسايباها على رب العالمين ،، و طول الفنرة الفاتت دي ، محكد ما استسلم من اتصالاتو ، من ارقام مختلفه ، بس هو ما كان عارف مكانتو بقت تحت جزمتي ...
و المهم لحد ما جا الوقت المفروض اسافر فيهو ، و فعلاا اهلي سافرو على السعوديه و انا على عمان
، انا حتى ما استفسرت من انه حيعرفني كيف بس بركة العارفه اسمو ..
المهم خلصت الاجراءت و مع طلعتي كداا ، اشوف البلالين الملونة و ورود و دوشة كدا بتاعت الوان ، و مكتوب انا عبدالرحمن ، فا ماكنت متخيلة ولت مستوعبه حاجة بالشكل دا ، منو الما كان بيعاين في المنظر دا ، بقيت انا متجهه على المنظر دا ، فا لقيت زول جاي علي يعني مهما وصفت ليكم عن كمية الوجاهه و الاناقه ما حتتخيلو معاي ، عارفه لمن يقولو ليكي فلان دا راجل ، كدا بس من خلال هيئته ،، المهم بقيت خاته يدي في خشمي ما عارفه اتصرف كدااا ...
وقف وقالي #مياسم ، قلت ليهو ايوة ، و انت عبدالرحمن ؟ قالي ايوةة .. و ضحكتا لانو حاكاني ..
قالي نورتي عمان ، لا نورتي حياتي ..
ممكن نمشي ؟ فا هزيت ليهو راسي ، مد لي وردة من الجوطة القبيل ديك ، و جر شنطتذ و قالي من هنا اتفضلي ...
لمن طلعنا من الصالة مشينا علي الباركن ، فتح لي العربية ، لكن ما عربية ، ركبته و دخل شنطتي و جا ركب جمبي ، قالي #بالجد انا مبسوط بيكي ، و حقيقي منوراني ، و بحمدالله على #القسمة_دي 💜
و فتح درج في العربية ، و طلع علبة سوداء ، فتحها ، و مسك يدي ،، ولبسني #الدبلة .
قالي ، دي مرحلتي انا .. والله يسعدنا و يجعلني ليكي #سند

‏"مَا كُنت مِثلَ العَابِرِينَ فَإِنَّهُم ، مَرُّوا عَلَيَّ وَأَنت سِرت خِلَالِي"و أراك في كُل البقاعِ كأنما لا جرم في فلكي يدور سواك".❤️

#تمت
انا اريد ، و انت تريد ، و الله يفعل ما يُريد
#سحر_سمير