غير كنا مبسوطين بعرسنا ما كان في خاطرنا ابدا ان ممكن تحصل حاجة زي دي..
اخر حاجة كان اتكلمنا لما قال لي ماشي البيت انا واحمد لموضوع الكهرباء وانا منتظرة منه يتصل بي اطمن عمل شنو اذا انتهى او لا ولما طول مسكت التلفون ومع ردو...
غمضت عيوني وكأني سامعة الخبطة واصوات الجوطة من تاني...
" هوووف هووووف بتنفس بضيق واني كان لازم اطلع غصتي ف" البسكويته الغمستها وقعت في الارض قمته اجيب منديل انضفها الا وفي ممرضة جاية علي وبتقول:
انتي اخت المريض قصي؟!
"ما بكذب قلبي اتقبض وقلت خلاص في حاجة معناها لدرجة غلبني ارد الا وهي بتتكلم تاني"
انتي اختو؟
__انا خطيبتو قصي كويس في حاجة ولا شنو مالو؟!
**لالا ما تخافي اتوترتي مالك كويس هو الحمدلله بس في ادوية مفترض تجيبوها هسي دي الروشته..
__حاضر "بتشيلها منها" طيب اذا سمحتي خليني اخش بس دقايق اشوفو
"بتعاين لي وحسيتها ما قادرة تقول لي لا"
قلت ليها :
__معليش انا اسفة بختك في موقف كدا وانا زاتي دكتورة و عارفة انو في العناية وممنوع الزيارة لكن الله لا يختك في موقفي دا بس انا من جواي مخنوقة وعايشة على نار وما قادرة استحمل اني لحدي اللان ما اشوفو واطمن عليه.
** ربنا يطمن قلبك عليه يارب ، طيب عايني بعد ساعة كدا بخليك تخشي تطمني عليه وتطلعي سرعة لكن.
"بفرح"
__سمح سمح شكرا كتير ليك
"مسكته الروشته وبعاين وبقرا فيها ومتقدمة
مورفين 5 ملجم
ترامادول 50 ملجم
oxycodone
و
جاني صوت الهادي يا وصال في شي حصل وين كنتي؟!
__ايوة جات الممرضة وطلبت الادوية دي
"بشيل مني الورقة"
**قالت اي شي بخصوص قصي ؟!
__بس ياهو نفس كلام الدكتور على حسب حالة المريض بعد العملية غالبا يومين او تلاتة ايام بفيق ان شاءالله ، عاين انا حا اجي معاك الصيدلية
**لالا انتي انتظري هنا امكن يحتاجو شي افضل ما نمش الاتنين
__ايوة كلامك صاح طيب خلاص
"الهادي بطلع مني وانا بمشي على غرفة الممرضات"
بعد ساعة بالضبط من لما جاب الادوية المطلوبة الممرضة دخلتني بهدوء
#وصال بتقول
وانا داخلة الغرفة وشايفاه هناك راقد في السرير مغطى وكل الاجهزة دي موصلة فيه من فوق ومافي صوت الا صوتها "تيييت تييييت تييت" كان في بالي اجري عليه واحضنو قوي واقول ليه قصي قوم حبيبتك جات قصي قوم وصال جات
قربته منو وختيت يدي على يدو وضغطته عليها شديد
وبصوت هامس
يا حبيب قلبي انت سامعني ابقى كويس عشانا وعشان حلمنا القربنا نحققو وعشان بيتنا "بتقش في دموعها وعيونها بتعاين ليه"
انت عارف انا مشتاقة ليك شديد والله العظيم مشتاقة اسمع صوتك واشوف عيونك وانت بتتكلم معاي ضاحك ومشتاقة لي مكاواتك لي ب يا مندريني
انا مشتاقة لي كلامك السمح الكلو حنية وطاقة وحب لي..
حاسة ان ليك كتير هنا
قوم عشاني يا روحي.
"بتخت يدها على راسو براحة وبتهمس"
بسم الله أرقيك من كل شيء يؤذيك من شر كل نفس أو عين حاسد الله يشفيك بسم الله أرقيك
"بتقرب منو بتسلم عليه في راسو وبتطلع"
✎﹏﹏﹏﹏﹏﹏﹏﹏﹏﹏﹏﹏﹏﹏
#في جانب قريب من بيت ناس حاج الطاهر " والد وصال"
"كان في مشكلة كبيرة في بيت الجيران"
"بيت ناس حاج عثمان ووداد وعندهم البراء الولد الكبير حدو اولى ثانوي عاطل في البيت ما شغال عندو تاكسي بس موقفو في البيت وبيان الاصغر منو شغالة في منظمة اجنبية بتاعت بحوث ، و تقى الصغيرة بتقرا في الجامعة اقتصاد وعلوم سياسية ، و ميمونة حبوبتهم جهة ابوهم مرا كبيرة ومخرفة" اما حاج عثمان عندو دكاكين اسبيرات ومتزوج اتنين تاني غير وداد "
_أسمعني يا عثمان انا عداني العيب بعد كدا أمك #ميمونة إتحملتها بما فيه الكفاية اكتر منك انت ولدا
طالعة كل يوم حايمة في دربا افتش فيها من بيوت الناس
متحملة هرجيها وشلهتتها لي قلت معليش يا وداد مرا كبيرة وبسايرا حسب خرفها دا
نضافة بنضفا وحمام بحممها واكل ما مقصرة منها
لكن امك الليلة جابتا كبيرة يا عثمان كيف تقول شافت بتي واقفة مع ولد في الشارع والدنيا ليل تخلي اخوها يضربها كدا وانت عارف البراء دا مع اخواتو شديد وعصبي ما بتفاهم لما في البت دق وقلع تلفونا وكان صوت كوراكو طالع بداية الشارع منو هو الما اتفرج فينا.
ماشاءالله عندك اتنين غيري قاعدات مرتاحات نايمات ماكلات شاربات سوقها ليهم.
* وانتي هسي فرقك شنو منو يا وداد ما هدا رافعة صوتك تهرجي من قبيل خلاص الموضوع دا اقفليه واسكتي منو خلي اليوم يعدي على خير
_ما بسكت اسكت لي ياها حالتك اي شي تدمدم وتغتي فيه لا بتحل مشكلة لا بتسوي شي اقلاها خش اتكلم مع ولدك دا اقنعو يمش معاك المنطقة مسكو دكان ما ياهو ولد واحد عندك تاني ولد.
*اها دايراني اسوي شنو اودي امي وين ؟! دار العجزة كدا بترتاحي وتنومي وانتي ضميرك رايق. انا بجي البيت دا ارتاح لي شوية . ولدك كان داير يشتغل كان اشتغل جبت ليه عربية يشغلها تكسي هديك مركونة ما بطلع بيها صغير هو اسوي لي شنو؟!

حنين ( مشت لي فوزية ) : انا حمشي بعد دا ، عايزة مني حاجة قبل امشي ؟
فوزية : تمشي وين براك يا بتي ؟
حنين : ابوي برا
فوزية : يعني ابوك يخلي الرجال و يجي يوصلك !؟!! انتظري شويه انحنا الهادي بسوقنا لي اهل مروة امرقي معانا مرة وحدة ، بنوصلك و نمش احنا !!
حنين : حاضر ! يا خالتو .. ( سكتت مسافة و بعدين قالت ) يا حليل وصال .. يارب تسعدهم و تهنيهم يارب
" كل الجمبها بصوت واحد " : اللهم امين يارب يهدي سرهم -
امال : يارررب يارب و يهنيك و يوفقك يا حنونه يارب نقيف ليك و نفرح ليك و نهجج ليك الماعملناهو لي وصال وقصي نسوي ليك !
فوزية " بي تحسس ، صلحت توبا و صلحت قعدتا و مسحت وشها و عاينت لي مروة "

مروة ( طلعت تلفونا و قامت من جمبهم ) !

#في_جانب_قريب_منهم

" جوطة "

وداد : لا حول ولا قوة إلا بالله … يا ولدي الله يهديك .. اقول شنووو
غلبني البسوي والله غلبني !
عثمان " اول مرة يرفع صوتو في البراء " :
انت ناوي ترجل متين ؟ هاه ؟؟؟ ولا اخاف تقوم تمرق حزامك دا و تحمطني بيو انا زاتي ! لانو اصلاً دا الفضل ليك تاني تمسكنا انا و امك ديل تمسح لينا وشوشنا دي في الارض ! ياخ انحنا بقينا قدر السمسمة قدام الناس و الجيران كل يوم والتاني كواريك و جوطة ! بس فهمني انت ما داير تفهم ليه البتعمل فيو دي ما رجوله ، انك تستقوى على حريم دي ما رجوله ؟؟؟ عشرتي مع امك دي بالسنين جطنا و اتشاكلنا و وصلنا للطلاق عديل م حصل مرة مديت يدي دي عليها !

وداد : عثمان دا م بفهم الكلام ، شوف بت الناس يا عثمان
اسي انا اوديها لي اهلها بي منظرها دا كيفن بس وريني ؟ البت وشها زي المرتبه م مفهوم ليه اي حاجة !؟ ليه يا البراء حرام عليك البت صغيرة ! فوق لي دا كمان بي طلاقها ! ليه يا ولدي حتى العرس ما هداك !
البراء : اسمعوني سمح ! انا امور الحريم دي ما بتخارج معاي ! البت اكان م نافعه ترجع اهلها وين المشكلة ؟ زي م جبتيها رجعيها انا ما دايراها !
وداد : كل دا فوق شنو ؟ عشان مشت الدكان ؟؟؟
البراء : البطلعها شنو من غير علمي يمة ! اكان من هسي رخيت ليها الحبل تخش و تمرق زي الغنماية بتكسر لي رقبتي قدام خلق الله !

عثمان : عشت 51 سنة من عمري دا و الشيب ملا راسي ملي
ما حصل لاقيت لي واحد متخلف و جاهل و م بفهم و ما عنده مخ زيك ، انت عارف انا معرس الحريم ديل كلهم لشنو ؟
عشان كنت سافي التراب لمن ربنا يبل ريقي بي خلفة الولد ! يوم الله جابك كفر ذنوبي دي كلها بيك ( عاين لي بيان ) .. سوقي البت دي معاك جوا و ساعديها تلبس بوديها المستوصف !
البراء : ( نفخ و هفهف و شو و طلع الشارع ) !
وداد : الله يسامحنا في حقها ، يارب تسامحنا في حقها
عثمان :حسبي الله و نعم الوكيل - انا برا في العربية راجيها وحدة منكم تلبس عبايتا تجي معاي !
تقى( بعد ابوها فات و بيان مشت مع مرة البراء ، قربت جمب امها و قالت ليها ) : يمة بتودوها عند اهلها ؟
وداد : لا
تقى : مش قال طلقها تاني تقعد كيف معانا ؟
وداد ( بي ضيق ) :جيبي الكرسي داك و تعالي معاي يا تقى !
تقى : لشنو ؟
وداد : سوي البقولو ليك ! حصليني غرفة اخوك !
تقى : يمة لا انتي دايرة يكسر رجولي ! عليك الله لا دايرة اخش غرفتو ولا دايرة اجي جمبو ، خليني بعيد !
وداد : حتسمعي البقولو ليك و لا عندك راي تاني ؟. قومي قلت ليك يا تقى !
تقى " بي خوف " : حاضر حاضر " بتنقنق " !

#جانب_زينب
( جوا غرفة وصال ، قاعدة بي طرف السرير و ممحنه )

" الباب فتح "
امال : في شنو يا زينب !
زينب : تعالي تعالي خشي و اقفلي الباب !
امال : بسم الله الرحمن الرحيم ! في شنو ؟؟ حاصل شنو
زينب : ما حاصل حاجة تعالي
امال : قلقتي بي خليت الحريم قاعدات و جيتك ! في شنو يا زينب ؟
زينب : في حاجة شاغله بالي و ما متطمنه !
امال " قعدت جمبها " : في شنو للمرة التالته دمي نشف !
زينب : طيب .. اا صراحة جيت مارة جمب مروة مرة الهادي ! سمعتها بتتكلم و بتقول للهادي حسب الفهمتو ! كيف يعني نجي البيت و نبيت عادي في نص العرسان ! اخوك دا جن ؟ و انا اتعنيت اسمع الجملة دي للاخر اتمحركته جمبها لانه فجأة قلبي اكلني ، و صراحة بقيت خايفه على وصال يعني عشان في نوع كدا من الناس بتفهم التنازلات دي غلط لا سمح الله استرخاص و تقليل من النفس و البتنازل مرة و يضحي مرة بتجر مرة ورا مرة و خايفاها تعيش في الدوامة دي طوالي يا امال ( سكتت ) ….. امال … هي ! امال !!!!

امال " بي خلعه " : هاه !!
زينب : هاه شنو سمعتي كلامي دا و لا راح ساي ؟
امال : دايرة الجد يا زينب يا اختي ؟
زينب : احكي !
امال : انا زاتي الحصل دا م عاجبني بس انتي عارفه وصال ، و دي ما انانيه مني والله و لا قلة اصل مني بس اي أم بتتمنى الاحسن لي اولادها ، و غير سعادتهم ما دايرين ، يعني اي نعم انحنا وضعنا ميسور و الحمدلله و مافي زول حيحوجها لي حاجة ، لكن كمان نعاين لي حالة قصي دي م معروفه يعني مستقبلياً فاهمه علي ؟

سراج " عاين ليها شديد و قاليها " : صح يا رزة !!
اجهزو " عاين لي حنين " : اطلعي مع البنات غيري جو شويه ! و ( مشى )

#سراج_بيقول :

دخلت رقدت في السرير ، و في حاجة غلط في رزة ، ما قادر افسرها !!
قدر ما حاولت افسرها م عرفتها متأكد اني شايفها قريب دا !!
اما حنين - ما قادر افهم لهفتي تجاهها دي شنو ؟ دقات قلبي البتسابق بعضها دي ليه ؟؟ ليه برتاح لي شوفتها - ليه بحب اسمعا لمن بتتكلم ؟؟ يا الله — طلعت لي من وين دي خلتني غيرت كل حساباتي .. اعمل شنو يا ربي
كل الحاسي بيه انه نفسي اتكلم معاها وقت اطول ، عندي فضول اعرفها ، منجذب ليها بطريقه مخيفه و م عارف الاحساس دا حدو وين خصوصاً اني ما صبور ، و في نفس اللحظه م عارف اعمل شنو و لا ابداً من وين !!!!

لقيت نفسي قمت ، قلبت في دفاتري القديمة
قطعت لي ورقه مخططة بالازرق و قلم حبر خط عربي بالاسود ، و بالمقص قصيت الورقه مستطيل عريض متواسي ..
و قررت اني اعمل الفي نفسي من غير تردد .. و كتبت فيها جملة وحدة بس كانت :

{ عندي رغبة قوية اعرفك من قريب - ممكن تحققي لي رغبتي دي ؟ } سراج الدين ..
طبقتها نصين و ختيتا في جزلاني -

#جانب_وصال

اخر حاجة كنت ممكن اتخيلها اني فعلياً اقدر انوم في اللحظة ديك ! صحيت قبلو و كان غرقان في النوم ، نايم زي الطفل الصغير ، كنت بعاين لي ملامح وشو الاتغيرت مع آثر الحادث ، و العوجة البقت موجودة في عمود الانف ، بواقي الكدمات المزرقه و اتحولت لرمادي لانها ماشه تختفي في وشو ، نسبتاً لي ان قصي لونو فاتح شوية فا الاثر ظاهر عليهو ..
سرحت شديد في تفاصيلو اللي بالجد انا عشقتها اكتر لان كل خدشه في جسمو كان وراها معاناة ، كان وراها الم .. كانت وراها حياتو
يمكن انا عكس ناس كتيرة ، اني ممكن اتغير او حبي ليهو يتأثر بعد التغيرات الحصلت ليهو دي ، بس الحاجة دي خلتني احترم ذاتي و احترم تربيتي لان دا كان اختبار لي و عرفت ان حب الروح هو البدوم !
و ان مهما حصل انا سندك و معاك !
منو القال الراجل هو بس اليسند المرة ! لا انحنا ربنا خلقنا عشان نكمل بعض ، البحب بعرف يسند و يدعم و يكمل …
انا ما حا اكذب عليكم و اقوليكم انا ما حزينة للتغير الحصل في حياتي و اني اتخليت عن حلم سفري و شغلي مع عمتي ، لا م هين علي خصوصاً انا زولة م بعرف اقعد ساي ، م بعرف اعيش يوم يعدي علي من غير م انجز فيو حاجة عشان كدا الوضع دا كان صعب علي بس م اصعب من شوفة قصي و هو بالحالة دي -
عشان كدا انا لازم اساعدو بأي شكل من الاشكال ، م ينفع اسمح للضعف يتمكن منه ..

قمت من جمبه براحة - مديت يدي شلت الحاجات الختيتا فوق الكومود ، و اتسحبت و طلعت برا …

#في_جانب_قريب

عثمان : انتي شايفه دا حل يا وداد ؟
وداد : حل يا عثمان ، اصلاً كان لازم يحصل من زمان .. يا ريت تمنع منه اي قرش داخل و مارق منك ! و تخلي يعرف الدنيا دي ماشة كيف لعل و عسى يتأدب و يرجل !
عثمان : ما اتوقعتك في يوم تعملي كدا يا وداد !
وداد : مافي شي خربو غير الحنيه و تعلقنا بيهو عشان ولدنا الوحيد ! لكن بقدر ريدتنا ليهو عشان يتصلح و يعيش صح لازم نقسى ! و ياريت تساعدني !
تقى: انا لي هسي قلبي بضرب لمن امي ساقتني غرفتو و شلت ليها الكرسي عشان انزل ليها الشنطة من راس الدولاب و نكتنا ملابسو دي كلها في الشنطة دا غير الختتهم ليهو جوا كيس … وااي م متخيله مرعوبه منه

بيان : الله يستر
وداد : مرتو وين ؟
تقى : نامت يا حليلها …مسكينه والله ..

يتبع …

{ في الحلقة الجاية }

__ و ناوي على شنو ؟؟
** ناوي أطلقا … م ينفع تقعد على ذمتي !!

#استككانة🐻‍❄️🤍

#سحر_سمير
#فاطمة_قسم_الله