#من_الصفر✨
#حلقة_١٠_
⁦🖋️⁩:امتنان الهادي....

عمر بسكت مسافة : طيب اركبي لكن ما تتعودي دي اخر مرة.
اسماء وهي بتركب : شكرا شكرا..
اسماء وصفت لي المحل وبعدها اتحرك وهو ساكت طول الطريق ؛ وقف قدام محل هدايااا كبير ؛اسماء نزلت وهي بتقول...
_ ماح اتاخر.
_ لازم ما تتاخري عشان ح امشي واخليك .
اسماء ما ردت على ودخلت على طول ؛ المحل شبه السوبرماركت بس مختص بالهدايا والعاب الاطفال والمستلزمات المدرسية و.....الخ ؛ اول ما دخلت ابتسمت وهي بتسلم علي في يدو ؛ عاين ليها في عيونها وهو لسة ماسك يدها ....
_ مشتاقين يا بت.
اسماء بخجل: مشتاقين شديد ..
_احييي انا من الخجل .
_ خلاص ياا انس ياااخ.
_ كدي قولي انس دي تاني ..
اسماء وهي بتجر يدها وبتتلفت في المحل: قاعد براك الليلة ولا شنو .
جاء عليها قريب: امممم براي .
اسماء بترجع لي ورا في توتر: ههه خلي يكون بينا مسافة .
رجع وأمن الباب من جوا وجاء راجع ليها بمسافة اقرب من الاول : خلينا نشيل كلمة مسافة دي من بينا .
اسماء بترتبك: انت قفلت الباب لي ..
مسك يدينها: عشان ماف زول يزعجنا ..
اسماء بتمتم: ااا اانن انس انا ح اتاخر والله
_ لا ما ح تتاخري يا قلب انس انتي ...
_ح اصرخ والم عليك النااس زح مني يااخ...
_ ما تخافي انا بس عايز بوسة وحضن صغير .
اسماء بخوف: لا لا لا كده ما صاح يا انس.
_ اسماء انا بحبك شدييد ونفسي احضنك ..
اسماء كانت بترجع لي ورا لحدي ما وصلت الحيطة: عليك الله خلني امشي ..
_ انتي العليك الله اهدي وتعالي لحضني .

في نفس الأثناء عمر كان كل شوية بعاين لي الساعة وزهج من الانتظار؛ كان عايز يمشي بس اتراجع لمن لاحظ للمكان بعيد واسماء ما ح تلقى مواصلات هنا ؛ نزل من الركشة ومشى على المحل بزهج ؛ حاول يفتح الباب بس ما فتح ؛ استغرب لانو شاف اسماء وهي بتدخل ؛ حاول تاني وبرضو ما فتح ؛ عايز يرجع بس سمع صوت أسماء من جوا وهي بتبكي ؛ رجع تاني وضرب الباب وهو بقول....
_ اسماااء انتي جوا ..
هنا انس خت يدو في وشو بزهج وجاء على الباب وفتحو وهو بقول لي عمر: معليش بس المحل مقفول حالياً .
عمر بزح انس من كتفو وبدخل ؛اول ما دخل أسماء جات جارية علي وهي بتبكي: عمرر ساعدني😭.
عمر : ممكن افهم الحاصل شنو هنا
انس بعصبية: انت مالك دي مرتي وانا عاقد عليها واتفضل اطلع برا لو سمحت.
اسماء كانت واقفة ورا عمر وبترجف: كذاب والله العظيم كذاب .
عمر بمسك انس من قمصيو: عايز شنو من بت الناس .
انس بزح يد عمر: انت العايز شنو وجابك هنا شنو..
عمر ما اتردد وهو بدي انس بوكس في وشو خلى يقع على الأرض...
أتلفت لي اسماء بعصبية: اتفضلي قدامي يا ست هانم
اسماء طلعت وهي بتبكي وركبت الركشة وفضلت تبكي ( البكاء ده اكتر حاجة شاطرة فيها اسماء 🙂) ؛ عمر جاء عاين ليها وهي بتبكي؛ كان عايز يسألها من الحصل بس فضل انو ما يتدخل وركب واتحرك بيها على البيت؛ اسماء ما وقفت بكاء وكل شوية بتزيد؛ عمر بوقف على جنب وبتلفت عليها بعصبية ...
_ ممكن افهم انتي بتبكي لي.
اسماء ما بين دموعها: انا لي كل مرة بحصل معي كده... كل ما احب لي واحد يكسرني ..
عمر فهم انو الكان في المحل عندو سابق معرفة بي اسماء ودي ما اول مرة تجي هنا ؛ نزل ودخل اقرب بقالة واشترى موية ومناديل ؛ جاء ومدى ليها المناديل اول ؛ شالتها منو ومسحت دموعها وهي بتتنهد ...
عمر بزهج:خلاااص ياااخ صدعتي بينا ...
اسماء سكتت وشالت منو الموية ونزلت غسلت وشها وشربت ورجعت ركبت وهي ساكتة؛ في الأثناء دي تلفون عمر بتصل ؛ كانت فاطمة ام اسماء ...
عمر رد ليها: الو السلام عليكم..
_ اهلين يا ولدي ...وين اسماء للان .
_ ااا ...كان عندهم امتحان نهاية الدوام بس هسي خلصت ومسافة الطريق أن شاء الله ...
_ايوااا تمام ما مشكلة بس قلقت عليها قلت يمكن ما مشيت ليها .
_ لا لا ما تقلقي معي و في امان وشوية تكون معاك .
_ تمام يلا بالسلامة ..
_ الله يسلمك .
عمر قفل الخط وركب ( قِدام محل السواق) واتلفت ناحية اسماء ...
_ شايفة امك بتخاف عليك كيف؟! ..
اسماء عاينت لي وما ردت...
عمر بواصل : ساكتة لي ؟!... ولا ما بهمك أمر امك ؟!..
_ بس انا ذنبي شنو
_ امك موفرة ليك كل شي يا اسماء ....البنات المعاك بتمشي بالمواصلات وانتي عندك ركشة كل يوم تجيبك وترجعك عشان خاطر خايفة عليك من الناس الزي ده وانتي حضرتك بتجي في مكانو ؟! ...وتقولي لي ذنبك شنوو
_انا حبيتو ما افتكرتو ح يحاول يعمل كده ..
_ انتي مجنونة؟! حب شنو ليك يا بت الناس ...المفترض تشوفي قرايتك بوين ومواضيع الحب دي خليها ؛ انتي ممتحنة الشهادة يعني زمنك محسوب ما تضيعي في حاجات فارغة وتافهة ..

#من_الصفر ✨
#حلقة_١١_
⁦🖋️⁩: امتنان الهادي ....

_طيب انا عندي ليك فكرة بس فيها مخاطرة كبيرة...
_ مستعد اعمل اي شي عشانهاا..
_امشي واعترف ليها بحبك واذا طلعت هي كمان بتحبك سوقها وسافرو محل بعيد وابدو حياتكم من الصفر.
_ كيف يعني نسافر محل بعيد ؟ ... عايزني أخر عمري اهرب يا أسامة ؟!..
_قوي قلبك واعمل حاجة تسعد بيها نفسك لمرة وحدي في حياتك .
_ بالعكس ده اسمو ضعف وعدم رجولة مني لو عملت كده ؛ وانا راجل يا أسامة عشت عمري كلو متمسك في الطريق الصاح ودست على قلبي كتير عشان ما اغلط مستحيل اخلي الحب يضعفني ولا يغير مبادئي .
_ اها طيب ح تمشي تقول لي ناس بيتهم انا عايز بتكم دي والله ؛ ما تعرسوها لود عمها الجاهز وانتظروني اجهز.
_ بسسس ح امشي واعمل كده .
_ انت مجنون يا عمر مستحيل يوافقوا.
_ خلاص اكون حاولت على الأقل.
_ امرك عجيب يا صحبي...
عمر بقوم : يلا انا ماشي
_ دقيقة ماشي وين .
عمر بياخد مفاتيح الركشة و بتطلع : الليلة يا اما كسبتها للابد يا اما خسرتها للابد ...
_________________________________
بعد المغرب في غرفة اسماء ؛ كانت قاعدة في السرير وعلى يدها دفتر؛ كانت كاتبة حاجات كتيرة عن عمر ؛ فتحت صفحة جديدة وبدت تكتب ..." للاسف كنت غبية وافتكرتو بحبني ...ضيعت ايام وليالي بفكر فيهو وانا ولا على بالو ... دائما حظي عكس امنياتي ..عمر اكتر انسان اتمنيتو خذلني " ...
ختت القلم ومسحت دموعها واتنفست بعمق ؛ فجأة بتسمع صوت الباب ؛ لبست طرحتها وطلعت عشان تفتح ؛ وقفت ورا الباب قبل ما تفتح : الفي الباب منو؟!..
بجيها صوت عمر : افتحي الباب يا غبيةة.
اسماء بتفتح الباب وهي مبتسمة: عمرر!!
عمر عاين جوا البيت واتلفت يمين وشمال: بحبك يا اسماء...
اسماء:🙂 ...
_ بتحبيني ولا لا ؟
_ انااا 🙂 ...
_ انتي شنو سريع
اسماء بتنزل رأسها وبتبتسم: بحبك اي ⁦❤️⁩.
_ طيب ممكن ادخل ..
_ داخل وين هيي 😮
وعمر وهو بدخل : سللاممم عليكمممم ...
محمد بطلع من الصالون : وعليكم السلام .... اتفضل يا عمر البيت بيتك ...
عمر بدخل مع محمد الصالون واسماء دخلت وهي عاملة كده 😮.
فاطمة: مالك يابت متوترة كده الجاء منو ؟!.
_ ده عمر بتاع الترحيل يا امي .
_ والجايبو زي الزمن ده شنو ؟ عملتي ليك عملة وجاي يشتكيك لمحمد ؟!..
_ عملة شنو يا امي لا لا ..
_ خلاص امشي و سوي شاي ولا عصير للولد ..
_ حاضر...

عمر كان متوتر بس قوى قلبو وقال لي محمد : اكيد بتقول لي نفسك الجايبني زي الزمن ده شنو....
_ العفو يااخ تشرفنا في اي زمن ..
_ والله يا محمد عشان ما اطول عليك الكلام بصراحة كده جاي اطلب يد اختك اسماء ..
محمد بسكت لثواني بعدها بقول بعدم استيعاب: تطلب شنو؟! .. عمر انت جادي ؟.
_ عارف الموضوع يمكن يكون غريب عليك بس ..
محمد بيقطع كلامو : معليش بس اسماء مخطوبةة لي ود عمها من زمان
_ لا هي ما مخطوبة ولا مواقفة عليهو أساسا وما اظنك تغصبها على حاجة هي ما عايزها
_ كدي خلينا من ود عمها انت عندك شنو ؟ حتسكنها وين وح تعيشها كيف...عمر معليش بس انت شايف نفسك كويس ولا ما شايف.
عمر بيبتسم: فعلا انا ما عندي اي شي ولا حتى أهل عشان يساعدوني ما عندي ...بس انا يا محمد حبيت اختك بصدق و مستعد اعمل اي شي عشانها وبوعدك اذا وافقت لي بيها ح تعيش ملكة والله العظيم طول ما انا جنبها ح تكون مبسوطة وما ينقصها شي ؛ وانت من حقك ترفضني بس انا كمان من حقي اخد فرصتي ..
محمد سكت شوية قبل ما يقول: وانا اثق كيف انك ح تعيشها في احسن حال وما تحوجها لي شي.
_ ح أثبت ليك كل ده لو اديتني فرصة كل العايزو منك حاليا تواقف علي وتديني فرصة لحدي ما اسماء تمتحن وانا ح أثبت ليك عشان حبها انا ممكن اعمل شنو ...
محمد وهو يقوم: دقائق ح امشي واجي .
_ اتفضل براحتك .
محمد بمشي لي اسماء في المطبخ: اسماء.
اسماء بخلعة : ايواا محمدد ..
_ انتي عايزة عمر ده ؟؟
اسماء بتسكت ...
_ اسمااااء ..عايزة الولد ده ولا ما عايزة .
اسماء بخجل : عايزة اي ...
محمد برجع لي عمر : من هنا لحدي ما اسماء تمتحن يا اما تجي وتتم العرس يا اما تنسى فكرة اسماء دي تماما ..
عمر بفرحة باينة في صوتو: ابشررر بالخير أن شاء الله ....
_ دقيقة انا عندي شرط .
_ اتفضل اشرط زي ما عايز .
_ من هنا للزمن داك ما ح تلاقي اسماء لي اي سبب من الأسباب وانا ح اشوف ليها زول تاني للمدرسةة.
عمر بعدم رضا: حااااضر ما عندي مشكلةة ...

بالنسبة لي عمر الموضوع كان حياة أو موت ؛ فما كان بخلي ساعة تمر من غير ما يستفيد منها؛ قدم بشهادتو في كم وظيفة في كذا محل ؛ من ضمنهم كانت شركة حاج علي القبلتو في وظيفة صغيرة براتب شهري مناسب؛ ما وقف على الوظيفة دي وكان اول ما ينتهي الدوام بطلع ويشتغل كم شغلة وينتهي بيهو اليوم هلكان من التعب ؛ بنوم عشان يصحى تاني يوم ويبدأ من جديد؛ الموضوع ما وقف هنا ؛ عمر كان بدعي ليل نهار انو اسماء تكون من نصيبو ؛ كان مشتاق ليها وفاقدها بس ما بقدر يخلف

#من_الصفر ✨
#حلقة_١٢_
⁦🖋️⁩:امتنان الهادي.....
وقف الترحال داخل المجمع قِدام سوبرماركت حاجة نصرة ؛ اسماء نِزلت ونَزلت اولادها وشنطها ( الشنط والعيال شغالين رايح جاي 🙂) نصرة بتطلع من المحل وبتجي على اسماء وعلى وشها علامات استفهام ...
نصرة: خبارك يا بت يومك ما تميتي.
_من الاحسن اعيش في بيتي.
_ اسماء حصل شنو ده ما كلامك الاول.
_ هو شنو الما حصل يا خالتو نصرة بس قولي لي شنو الما حصل.
_ دخلي حاجاتك ديل وتعاليني هنا كدي
_ والله ما بوعدك اقدر اجي نازلة تاني.
_خلاص ما مشكلة انا بجيك .
_ طيب ..
اسماء طلعت بيتها مع عيالها وأكيد طبعا الشنط😙 ، اول ما دخلوا محمد بجري على غرفتو ومِنن بتلحقو ، اسماء قعدت على الكنبة في الهول ونظرات عيونها بتتجول في المكان ؛ ذكريات عمر في كل محل ؛ في كل زاوية وركن ؛ حست بخوفة بتقتحم قلبها اول جات على بالها فكرة ١٥ سنة من غير عمر ؛ ختت يدها في قلبها وصرخت بصوت عاالي خلى محمد ومِنن يجو جارين ، اتوالت الصرخاات مع زيادة في الصوت ، دخلت في حالة هستيرية من الصراخ بصوت كان كافي انو كل المبنى يتلم على باب الشقة ، نصرة بتزح الناس وبتقيف على الباب وبتضرب بقوة وهي تنده على محمد ، أما محمد ومِنن كانو مرعوبين و واقفين بعيد من اسماء ، محمد بجري يفتح الباب، نصرة بتدخل بسرعة وبتاخد اسماء في حضنها وهي بتقول ليها...
_ وحدي الله يا اسماء وحدي الله يا بتي..
اسماء بين صرخاتها: ليييي كده ؟ ليييي كده بس لييي ليييي
كل الناس واقفة ومذهولة في حالة اسماء ، نصرة في محاولة تهدي فيها : قدر ربنا يا بتي قولي الحمد لله كان ممكن لا قدر الله يموت وتفقدي مرة وحدي .
اسماء بصوت عالي: هسي انا فقدتو هسسي انا فقدتووو💔 والله العظيم فقدتوو💔. ..
بتتعالى انفاس اسماء وجسمها بهبط شوية شوية في حضن نصرة لحدي ما فقدت وعيهاا ، نصرة بتستنجد بالناس الواقفة ؛ شالوها و نزلوا بيها بسرعة على المستوصف الفي المجمع ، بعد ساعة اسماء بتبدأ تستعيد وعيها ؛ فتحت عيونها وهي بتخت يدها على رأسها ؛ نصرة كانت قاعدة في كرسي جنبها وسرحانة بعيد ؛ بتقطع سرحتها صوت مبحوح :خالتو نصرة ..
نصرة بغضب: دي شنو حركات الشفع دي يا اسماء
_ معليش بس والله ما قادرة استوعب ما قادرة اصدق انو خلاص عمر ما حيجي راجع..
اسماء ودموعها بتنزل بغزارة : كان دايماً بقول لي ماف زول ح يستحملكم غيري وفعلا ماف زول ح يستحملنا غيرو..
نصرة بصوت حازم: كفاية يا اسماء خلاص كفاية ؛ امسحي دموعك دي وشدي حيك وبطلي تعيدي وتكرري في نفس الكلام ( بذات دِموعك دي 🙂)
_ بس انا..
_ انتي انسانه ضعيفة يا اسماء وإيمانك بربنا ضعيف؛ ضعيف جدا كمان ؛ الانتي فيهو ده امتحان من ربنا امتحان ليك ولي عمر وربنا لمن يحب عبد من عبادو بيبتلي ؛عايزة تفشلي في امتحانك ده؟! عايزة تثبتي انك ما رضيانة بقدر ربنا ؟!...
اسماء بتسكت وهي بتعاين لي نصرة بتركيز...
نصرة بتواصل كلام: اذا بكيتي ولا جنيتي عديل حتغيري شنو ؟! الكاتبو ربنا حصل وانتهى بعد كده انتي تركزي في الجاي.
اسماء بتنزل رأسها: انتي شايفة اني ح اقدر على الجاي
_ لي ما تقدري ؟ انا نصرة القدامك دي في يوم من الايام فقدت راجلي وفجأة لقيت عندي مسؤولية خمس اطفال وانا لا حول لي ولا قوة حتى راجلي ما خلى وراهو اي شي شلت الهم كيمان يا اسماء بس في الاخر اكتشفت انو الرزق ده حاجة بتجي من ربنا ما ليها علاقة بوجود الراجل ولا شغلو وفعلا زي ما شايفة وصلت وين و براي بنيت حياتي و ربيت اولادي بالحلال و الحمدلله على كل حال .
نصرة وهي بتخت يدها على كتف اسماء: ختي الرحمن في قلبك يا اسماء واستحضري فكرة انو رب الخير ما بجي الا بالخير وأكيد البحصل ده فيهو خير ليك ولي اولادك احنا ما قادرين نشوفوا لكن ربنا عارفو ؛ اثبتي يا اسماء وثبتي قلبك وشوفي لي عيالك المساكين ديل حاليا مسؤوليتهم عليك يا اما تربيهم صاح يا اما يضيعوا ليك في الدنيا الكعبة دي وبكره تندمي والله .....وما تشيلي هم شي ربنا معاك وانا بعد ربنا برضو جنبك وحتى قلبك ربنا قادر يجبر بخاطرو ويسعدك ويرضيك ...
اسماء بتحس بالكلام كلمة كلمة ؛ عاينت لي نصرة مسافه قبل ما تقول: كنت محتاجة اسمع كلام زي ده كان ناقصني الكلام ده جدا والله...
نصرة بحنية : يلا قومي اولادك بكونو منتظرنك وخايفين عليك لأنك عملتي جو دراما فظيعع.
اسماء بتضحك : يخسي عليك بتشمتي علي
_ اي افردي وشك كده واضحكي الدنيا ما تستاهل دموعك..
_ ربنا ما يحرمنا منك يا نصرة
_ خالتو نصرة يا تافهةة.
_ حاضر خالتووو نصرةة
_ قومي يلا قدامي .
اسماء بتنزل من السرير بفتر وبطلعوا هي ونصرة من العيادة؛ كانت على بعد تلاتة شوارع من مبنى ناس اسماء ؛ محمد ومِنن كانو واقفين برا ومحمد اول ما شاف امو جاء جاري وهو بقول: ماااما جااات ...

#من_الصفر✨
#حلقة_١٣_
⁦🖋️⁩: امتنان الهادي....

مر شهر واسماء شوية شوية ماشة تتأقم ، بتحاول تكون قدر المسؤولية بس الموضوع كان صعب وخصوصاً انها كانت بتعتمد على عمر في كل شي ؛ في يوم الجمعة صِحت بعد ما مِنن أصرت عليها تقوم ؛ دخلت المطبخ عشان تعمل لي مِنن حاجة تاكلها ؛ مِنن كانت ماشة وراها في الدخلة والطلعة ؛ فجأة تلفون أسماء برن ؛ قبل ما تقول لي مِنن جيبي بتلقاها جرت عشان تجيبو ؛ اسماء عاينت لي الرقم وارتسمت على وشها ابتسامة قبل ما ترد بلهفةة...
_ الووو.
بجيها صوت عمر: اسماااء ..
_ عمررر ..
_ كيفك يا اسماء ومحمد ومِنن أن شاء الله بخير .
اسماء وهي بتبكي: احنا فاقدنك بس يا عمر والله فاقدنك بس ..
عمر والعبرة بتخنقو : قوي قلبك يا اسماء انتي الليلة ام واب في نفس الوقت.
اسماء وهي بتسمح دموعها: عندي ليك مفاجأة حلوة شديد ..
اسماء بتشيل مِنن وتختها في الكرسي وتفتح الاسبيكر بعد ما تقول ليها : قولي بابا..
مِنن بصوت طفولي : بابا ⁦❤️⁩.
عمر بسكت مسافة في محاولة استيعاب الصوت ...
اسماء : قولي لي بابا انا بتكلم
مِنن : بابا انا بتكلم
عمر لي اول مرة دموعو تنزل ؛ حس وكانو اول مرة يسمع كلمة بابا ..
اسماء : الوووو عمررر وينك..
عمر: مِنن حبيبي قولي بابا تاني .
مِنن: بابا انا كل يوم بسوك اسناني بليل بس محمد ما بعمل كده .
عمر بضحك ما بين دموعو: انتي يا قلبي الزيك منو بس ..
اسماء: يا ريت لو كنت معانا يا عمر
عمر بحاول يتجاوز كلام اسماء: مِنن اتكلمت بتين يا اسماء
اسماء:ليها شهر تقريبا و ما شاء الله بتتكلم بطلاقة يا عمر وبتفهم احسن من محمد وحتى كلامها واعي كأنها ما طلفةة.
عمر : ماشاء الله ماشاء الله ربنا يحفظها يا رب
اسماء: دعواتك لينا يا عمر
عمر: دعواتي على طول معاكم يا اسماء
مِنن: بابا ح تجي بتين .
عمر : ح اجي أن شاء الله بس اخلص الشغل هنا ح اجي
اسماء : بتتكلم معانا من وين هسي .
عمر: كل شهر بكون في زيارة من أهالي المساجين و احنا بخلونا نعمل مكالمات ؛ ح اتصل ليك كل يوم ١ في الشهر خلي التلفون جنبك تمام
اسماء بحزن: حتى صوتك من شهر لي شهر .
عمر: خليك من ده محمد وينو .
اسماء: مِنن حبيبتي اجي صحي محمد وقولي بابا في التلفون..
مِنن بتنزل وبتجري عشان تصحي محمد..
عمر: ركزي في كلامي ده يا اسماء.
اسماء بتركيز : اهاا
_ في دولابي بتلقي ملف باللون الازرق .
_اهاا
_ الملف ده مهم شديد فيهو اوراق الشقة. وشهاداتي وحاجات كتيرة مهمة ما بينهم ورق العربية ح تشيلي وتمشي لي نصرة وتخليها تبيع ليك العربية .
_ نبيع العربية كيف يا عمر .
_ انتي حالياً ما ح تحتاجي ليها كتير بس محتاجة مصدر رزق القروش الفي البنك دي ح تخلص و وقتها ما ح تعرفي تتصرفي .
_ اها طيب وبعد ما ابيعها .
_ بتخلي القروش مع خالة نصرة وهي ح تعرف تعمل ليك حاجة مناسبة تسترزقي منها
_ ما شفتها يا عمر واقفة معانا كيف والله العظيم اهلي ما عملو العملتو معي .
_ انا بعرفها كويس مرآة بمية راجل ومطمئن عليكم معاها شديد والله .
محمد جاي جاري: اديني بابا اديني بابا
اسماء وهي بتدي التلفون: قول بسم الله اجييي.
محمد: باااباااا.
عمر : محمد يا بطلل
محمد: لي للان ما جيت يا بابا مش قلت بعد اسبوع .
عمر: لقيت الشغل هنا كتييير شديييد ولازم اخلصو كلو .
محمد: خلي صحبك يخصلو وتعال وارجع
عمر : اسمعني يا محمد انت راجل البيت لازم تخلي بالك من امك واختك كويس فاهم
محمد: حااااضر يا بابا .
عمر: والصلاه يا محمد ما تقول بابا مافي ما ح اصلي ربنا شايفك .
محمد:لا لا انا بصلي والله بس لمن اكون نعسان بنوم قبل ما اسوك اسناني.
اسماء :خلاص يا محمد كفاية جيب التلفون
محمد: دقيقة بس يا ماما. اوصي بابا على حاجات .
اسماء بتشيل منو التلفون: محمد كلامو كتير يا عمر وما بخلص .
عمر: انا ح اقفل خلاص يا اسماء خلي بالك من نفسك ومن الاولاد .
اسماء:, مابدري .
عمر: الزمن خلص يلا لا اله الا الله .
اسماء :محمد رسول الله ( صلى الله عليه وسلم ⁦❤️⁩ ) .
اسماء بتنزل التلفون بعد ما عمر قفل الخط ؛ اخدت نفس عميق وهي بتبتسم ..
محمد : مالك يا ماما .
اسماء : صوت ابوك برد الروح والله⁦❤️⁩ ...
اسماء عملت زي ما عمر طلب منها وخلت نصرة تبيع العربية ؛ واقترحت ليها انو تفتح محل حلواني يكون داخل المجمع ؛ اسماء رحبت بالفكرة وفعلا فتحت محل حلواني باسم "ابو مِنن" ؛ الشغل كان جديد على اسماء بس نصرة وقفت معاها وعلمتها حاجات كتيرة والحمدلله بفضل ربنا ودعوات عمر ليهم الشغل ماشي حلو شديد واسماء اتِعرفت في كل المجمع باسم ام محمد وحلوياتها بقت رقم واحد في الحتة ؛ مرت الايام وكل شهر عمر بتصل عليهم ؛ ما كان معاهم بس دعواتو دايما معاهم ده غير الوصايا البشدد عليها في كل مكالمة لي اسماء ، أما اسماء فاتعودت على المسؤولية ومع الايام عرفت انو الدنيا مرة ليك ومرة عليك وخلت البكاء الكتير و اتقربت من ربنا شديد بعد ما عرفت انو بذكر الله تطمئن القلوب واستشعرت

#من_الصفر✨
#حلقة_ ١٤_
⁦🖋️⁩: امتنان الهادي ..
بتبدأ تراجع الورقة بتوتر وبتقيف على نفس السؤال لعدة مرات؛ بتحاول تستجمع تركيزها وهي بتغمض عيونها وتتذكر في المعلومات بالترتيب؛فجاة بتفقد تركيزها على صوت المراقب وهو بقول: خمس دقائق على نهاية الزمن .
مِنن بتوتر: لا ما ح اجمع ورقتي الا وانا مخلصة كل الاسئلة يا رب اي وحدي منهم يا ربي c ولا a انا محتاجة زمن اراجع فيهو الكلام ده وأكيد الاجابة ح تظبط معي.
المراقب بجي وبقيف جنبها:قولي بسم الله وما تتوتري .
مِنن وهي بتعض على أسنانها: انت لو بعدت مني كلو تمام .
عاينت للسؤال وعملت دائرة على c وهي بتقول: يا رب تطلع صح ( ده انا بعرف وحدي صحبتي لما يغلبها سؤال بتدور علىa لانو حرف حبيبها وسبحان الله بتنجح🙂) .
جمعت الورقة وطلعت من القاعة. و وشها ح يقع منها من كتر ما صارة؛ نزلت وقعدت في واحد من البينشات وطلعت تلفونها واتصلت على شهد ؛ ردت ليها بعد كم جرس...
_ اها بشري يا دكتورة.
_ بلا دكتورة ولا زفت
_ لا يا حبيبتي ما يسخن معاك الامتحان تفرغي فيني انا .
_ خلاص معليش هو فعلا الامتحان كان صعب .
_ كل امتحان بتطلعي وبتقولي صعب وهي نهاية فجأة نلقاك البروف .
_لا المرة دي شكلها ح تطير مني
_ ما تقولي كده يا مِنن انتي تعبتي شديد والله .
_ شهد عندي تلاتة في ضع دائره ما متأكدة منهم صاح ولا لا واخر وحدي دي احتمال كبير تكون غلط.
_ يا بت ضع دائره دي بالحظ بس شفتي انا بشتغل فيها يا ايدي شيليني وبدور وتاني انا وحظي يا صاح يا غلط ( انا برضو والله زي شهد 🙂)
_ كدي انتي هسي وين .
_ ما جيت الليلة
_ ما عارفة بس خايفة على مستقبل اولادك انتي ومحمد من هسي .
_ محمد الكل يومين بزعلني ده زاتو ما عايزة
_ هو انتي لاقية يا يمة حنية محمد ولا طيبة محمد .
_ والعجب ضحكت محمد
_ ما تثبتي يا بت 😂.
_ استغفر الله العظيم بس يا مِنن الحب بخيلك إنسانة صعيفة جدا .
_وما عندك كرامة وهبلة .
_ كويس يا مِنن بكره تحبي وتعرفي انا بسامح اخوك كل مرة لي .
_ يا بت الحب ده للناس القلبها ضعيف ولين زيك انتي ومحمد بس انا قلبي حديد .
_ ماااشي خليك عند كلامك ده
_ يلا يلا جيعانة شديد ح امشي اكل لي حاجة واطلع على المكتبة.
_ لااا مكتبة شنو انا عايزاك في مشوار ضروري .
_ مشوار شنو بس يا شهد مش بكره امتحانك انتي
_ حاجة بسيطة بس وح نرجع .
_طيب طيب لمن اطلع ح اجرس ليك .
_ ظاااابط
_ يلاا.

في نفس الأثناء في كافتيريا الجامعة ( يا جماعة ح نتحفظ على إسم الجامعة ونخليكم انتو وخيالكم) ؛ كانو قاعدين شُلة بتتكون من تلاتة أولاد وبتين ؛ اصوات ضحكاتهم مالية المحل؛ وريحة السجائر ما تديك الدرب؛ واحد منهم بِطلع مفاتيح وبختها على الطاولة وهو بقول: يا سيدي المرة دي ح اراهن على الشقة
وحدي من البنات: محل عايش يا جيمي والله انت لو خسرت ح تندم .
جيمي: سوزان انتي شكلك ما بتعرفيني كويس .
سوزان: اها ولو فاز يا احمد
احمد: ح اديك تلفوني لمدة أسبوع .
جيمي: الله دي شكلها مسخنةة اها اها خليك من ده التحدي شنو
احمد بسكت شوية : امممممم ركز معي في المدخل واول بت تجي داخلة بس تجيب رقمها .
جيمي: حتى لو دكتورة؟!
احمد: والله دكتورة طالبة حبوبة بس المهم تجيب رقمها .
جيمي وهو بركز في المدخل: تمام رقمها دي هينةة.

كل الشلة فِضلت مركزة على المدخل ( جيمي وأحمد ومصعب و سوزان وعجسد شُلة وحدي ؛في سنتهم الأخيرة إدارة أعمال ) مِنن وهي مركزة في تلفونها بتجي داخلة الكافتيريا وبتتوجه ناحية الكاشير؛ احمد بخت يدو في كتف جيمي قبل ما يقول لي: يلا يا حلو ام عباية رمادية ديك .
جيمي بقوم وهو برجع شعرو لي ورا: خمسة دقائق وح يكون الرقم عندك .
مِنن اخدت فطورها وقعدت في وحدة من الطاولات على جنب كده ؛ بكل ثقة بقيف قِدامها وبمد يدو وهو بقول: السلام عليكم.
رفعت رأسها وعاينت لي ورجعت عاينت لي يدو ؛ كانت شايلة في يدها سندوتش ؛ خدت منو لقمة بعدها قالت لي: لا سلام على الطعام .
رجع يدو بإحراج وقعد مقاصد ليها ؛ مِنن بتواصل اكلها وكأنو مافي زول قِدامها؛ جيمي عاين ليها وفي كمية البرود العندها وعرف انو ما حينفع معاها اي حنك كده ولا كده ؛ سكت شوية قبل ما يباشر في الموضوع...
_ اسمعيني انا عايز رقمك بس صدقيني لا ح اتصل ليك ولا ح ازعجك هي مرة وحدي بس ح اتصل ليك فيها ممكن تردي وممكن تصدي .
مِنن وهي مركزة مع السندوتش: متراهن على انك ح تجيب رقمي وعايز تفوز في الراهن صح؟ .
_ لا انتي ذكية جدا .
_ المراهنة حرام
_ يا ستي ما عايزك تفتي لي وكلام كتير ارح جيبي تلفونك ح اجرس على نفسي وح اقوم امشي ويا دار ما دخلك شر

#من_الصفر ✨
#حلقة _١٥_
⁦🖋️⁩: امتنان الهادي.....
بعيون واسعة ونعسانة ؛ سبيبة شعر ناعمة و بتتميز بسواد فيهو لمعة غير انو كثيف ونازل على جبهتو وببشرة فاتحة بتميل لسمرة ؛ متوسط الطول بجسم رياضي ممشوق ؛ نزل من العربية وقفل الباب بعصبية ؛ دخل الجامعة وطلع تلفونو واتصل على سوزان ؛ صدت المكالمة وهي جاية من ورا وبتقول لي : جنبك جنبك .
أتلفت عليها: صباح الخير يا جميل يا رايق .
_ عايز شنو من الصباح يا جيمي .
_ يخسي عليك يعني الواحد كان عايز يعزمك على فنجان قهوة تعدل مزاجك من الصباح .
_ مدام جابت ليها عزومة يبقى اكيد عايزني اعمل ليك حاجة .
_ ومدام انتي كاشفة الدور فخلينا واضحين عايزك تجيبي لي زيت البت الامس .
_ كنت عارفاك كده كده ح ترجع لي عشان كده سبقتك بخطوة
_يا سلااام انتي زيك كم بس
_ عاين يا سيدي اسمها مِنن عمر في تانية طب وبروف دفعتها ما عندها اي أصحاب او صحبات من دفعتها صحبتها وحدي بس في تانية مختبرات اسمها شهد .
_ وح ألقاها وين في الجامعة الكبيرة دي
_ المكتبة بيتها التاني و على طول بتكون هناك والأيام دي شغالين امتحانات .
_ والليلة عندها امتحان ؟
_ لا بس حتجي المكتبة .
_ متأكدة ح تجي؟
_ لا لا ما متأكدة بس حسب كلام بنات دفعتها بتجي ايام الاسبوع كلها وبتقعد في المكتبة غالباً.
_ امممم شكلو الموضوع ده ح يجر ياااخ
_ انت البتدخل نفسك في حاجات زي دي هسي في داعي للمراهنة والكلام الفارغ .
_ يا بت انتي ما جادة المغامرة حياة نعيشها.
_ وين المغامرة في انك مشرد وبتبيت مع الناس.
_ الكلام ده كبير عليك يلا انا ماشي .
_ ماشي وين وفنجان القهوة .
جيمي وهو بلبس الفريم ويمشي: المرة الجاية المرة الجاية..
سوزان بتبتسم وتنزل رأسها: بس لو تعرفني بحبك قدر شنو .

في نفس الأثناء مِنن كانت واقفة مع شهد قِدام قاعة الامتحان ؛ شهد بتراجع في الشيتات بتوتر ومِنن مركزة مع التلفون ، شهد بتعاين لي مِنن قبل ما تشيل منها التلفون ...
مِنن بتعصب: ياااخ مالك يا شهد .
_ كدي اشوف مركزة على شنو.
_ بحفظ ياخ في مصطلحات مهمة .
شهد بتعاين في التلفون وبترجعو ليها : أستغفر الله العظيم .
مِنن بتاخد تلفونها وتعاين للساعة: فضل ليك ربع ساعة .
_ وااايييي لااا لسة ما خلصت .
_ ولا ح تخلصي في ربع ساعة ادخلي و اتوكلي علي الله بس .
_ شوف منو البتكلم على أساسا انك بتعملي كده.
_ الحمد لله بخلص المادة قبل يوم الامتحان وبراجعها كمان متابعة الفارغة ما اختصاصي ( دي بتضربني انا شخصياً 🙂) .
_ مِنن حبيبتي امشي المكتبة بتكون فتحت .
_ اي فتحت لكن عايزة اقعد معاك هنا لحدي ما تدخلي الامتحان.
_ لا شكرا حبيبي امشي شوفي قرايتك بوين .
مِنن بتدخل تلفونها في الشنطة : اوك ... بالتوفيق
_ امييين امييين يا رب
_ بعد تطلعي اتصلي لي تمام .
_ حااضر .
كان قاعد في واحد من البينشات ومقاصد المكتبة؛ كل شوية يعاين على ناحية المكتبة مترقبها تجي ؛ فجأة بتظهر من بعيد ؛ كل شي فيها كان بيوحي بالجدية ؛ طريقة مشيتها ولبسها حتى ملامح وشها جادة وحازمة ؛ قام وبخطوات سريعة بمشي عليها؛ وقفت على صوتو وهو بنده ليها...
_مِنن عمر !!.
مِنن بتتلفت: نعممم .
جيمي بيبتسم وهو بمد يدو: المرة دي مافي طعام.
مِنن بتسلم لي: عرفت اسمي من وين أن شاء الله.
_مافي حاجة بتصعب علي .
_ كنت تجيب الرقم زي ما جبت اسمي طيب
_لا لا ده برضاك ما من وراك
_ امممم برضاي قلت لي .
_ ايواا
_ طيب بس بشرط
_ عارف عارف ما ح اتصل ليك تاني ولا ح تشوفي وشي ده
_ لا ده ما شرطي ما تستعجل
_ طيب اهااا
_ ح تدخل معي المكتبة وما ح تطلع إلا انا اخلص واطلع.
جيمي بعاين لي المكتبة: مستحيل انا والمكتبة خطين متوازيين ما بنتلمى .
_ بس ده شرطي لو عايز الرقم .
_ لا كده شكلي ح اخدو من وراك .
_ طيب حاول... يلا باي ..
_ دقيقة دقيقة .
مِنن بتعاين لي الساعة في يدها: اهاا اختصر عشان الوقت .
_ خلاص تمام ح ادخل معاك المكتبة بس انتي ما تتاخري .
_ والله على حسب الشيتات .
_ تمام يا ستي لا .
مِنن بتدخل المكتبة وهو بلحقها؛ قعدت وطلعت شيتاتها وقلم رصاص وبدت تقرأ بتركيز متجاهلة جيمي القعد مقاصد ليها؛ لبس سماعاتو وفتح التلفون وهو بقول بصوت واطي: طيب يا جيمي ح تركز في تلفونك كانك ما في المكتبة .
مرت ساعة ونص ؛ لسة مِنن في نفس التركيز؛ أما جيمي اتخطى مرحلة الملل وبدأ يزهج من القعدة ؛ أتلفت حول كل الشخصيات غربية عليهو؛ كل زول مركز مع الحاجة القِدامو ؛ ماف زول بتكلم مع زول والهدوء مسيطر على المحل؛ للحظة عاين لي مِنن؛ كمية من الغموض في ملامحها؛ قاعدة بطريقة رزينة ومحترمة؛ للحظة حس انها ما غربية عنو؛ ملامحها مألوفة شديد؛ فجأة مِنن بترفع رأسها؛ ارتبك وحاول يكون طبيعي ؛ رفعت حواجبها بمعنى مالك .

#من_الصفر ✨
#حلقة_١٦_
⁦🖋️⁩: امتنان الهادي.....

موسيقى دي جي عالية؛ اضاءة ملونة ؛ضحكات بصوت عالي؛ اغلب الناس ما في وعيها ؛ مشروبات محرمة وسجائر ؛بنات بلبس شاذ ؛ جاء داخل وسلم على شلتو الكانو وقفين كلهم مع بعض؛ سوزان كانت لابسة فستان اسود بقماش فنايلي مفصل جسمها وعاملة روج احمر وجايبة شعرها بالجنبة؛ جات وقفت جنب جيمي وهي بتقول لي : شنو لكن الاسود ما عامل شغل ..
جيمي: لا والله العامل شغل اسودك أنتي .
عسجد(كانت لابسة بنطلون مع قميص واسع بالكبدي): اها قولي لي دي برضو صدفة .
سوزان بتتلفت على جيمي: أنا أتفقت معاك نلبس نفس اللون يا جيمي .
جيمي: لا لا ابدا
احمد: خلاص يا جماعة قلوبكم على بعضها وبتلبسو سوا بالصدفة .
سوزان بتبتسم: اي فعلا
مصعب: اها يا جيمي وينو الكاش منتظرنك احنا يا صاحبي .
جيمي بطلع بطاقتو: لا لا الليلة بعزمكم اطلبو العايزنو والحاسب علي ..
احمد: يا سلاااام ده الكلام الصح .
مرت الساعات و الليل بقى في نصو (الساعة١٢:٠٠ ص) ؛ كانو مندمجين مع الموسيقى وبرقصوا ؛ سوزان بتجي قريب من جيمي وبتهمس لي : انا نعسانة ممكن توصلني
جيمي: لسة الليل في اولو ماشة من هسي لي .
سوزان: لا لا عايزة امشي .
يجمي بصوت عالي : شباب انا ح اوصل سوزان وارجع .
عسجد: دقيقة انا كمان عايزة امشي .
احمد : بكره عندنا جامعة بدري احسن كلنا نمشي يا جماعة .
سوزان: يعني هسي لو ما قلت ماشةة..
احمد: نبهتينا كتر خيرك .
يجمي: خلاص ارح اطلعوا اقدمكم لقِدام واوصل سوزان وعسجد .
سوزان بزهج: غايتو الحمدلله .
مصعب بضحك : زي الشوكة في حلقك قاعدين قاعدين .
طلعوا وركبوا كلهم في عربية جيمي؛ سوزان ركبت قِدام مع جيمي ومصعب وأحمد وعسجد ركبوا ورا؛ وصلوا عسجد بيتها وأحمد ومصعب نزلوا في نص الطريق لانو اي واحد وجهتو مختلفة ؛ جيمي بتلفت على سوزان...
_اها يا ستي بيتكم ولابيت خالتك .
_ ولا واحد.
_كيف يعني؟ .
_خالتي مسافرة ومابقدر امشي البيت بعد الزمن ده
_ طيب كنتي تنزلي مع عسجد.
_عندك مانع لو مشيت معاك انت .
جيمي بسكت شوية : لا ما عندي مانع بسس ..
_ بس شنو اذا في مشكلة تقدر توصلني البيت وانا بتصرف مع امي .
_ لا انا ما عندي مشكلة لو انتي ما عندك .
_ لا ما عندي .
_ طيب تمام يلا تشرفي و وتنوري.
وقف العربية تحت واحد من المباني في شارع المشتل في الخرطوم؛ نزلوا من العربية و طلعوا على الشقة ؛ جيمي بطلع المفاتيح وبفتح الباب وبدخل وسوزان بتدخل ورا؛ جيمي بوصف بيدو على الغرفة وهو بقول ..
_ نومي في الغرفة وانا ح انوم هنا .
سوزان وهي بتجي علي قريب: لي تنوم برا والغرفة ح تشيلنا الاتنين .
جيمي برجع منها لي ورا وبضحك: يا بت انتي شاربة ليك حاجة لحسة مخك ولا شنو .
سوزان بتقرب تاني: لا انا بكامل وعي دي اكتر لحظة انا فيها واعية ومركزة.
_ سوزان ما تتصرفي بغرابة الشيطان شاطر .
بتقرب منو لدرجة مافضل بينهم مسافة وبتعاين لي في عيونو :جيمي انت ما شايف حبي ليك ولا شايفو وبتتجاهلني قاصد.
جيمي بزحها منو شوية : حب شنو يا سوزان انتي غبية .
سوزان بعصبية: انت الغبي لانك ما حاسي بكل الحب الشايلة ليك في قلبي .
جيمي بسكت وهو بعاين ليها بعدم استيعاب....
سوزان بتجي وتحضنو:انا آسفة بس انا بحبك يا جيمي بحبك شديد ومستعدة اعمل اي شي عشانك ...
فضل واقف ومصدوم في البحصل؛ سوزان بتبكي في حضنو وبتواصل كلام: لمحت ليك كتير وانت ما فهمت كلهم كانو عارفين اني بحبك الا انت ..
جيمي بادلها الحضن: انا اسف طيب ما تبكي ..
سوزان زحت منو وبدت تمسح دموعها: انت كمان بتحبني صح ؟ .
مسكها من اكتافها: سوزان انتي صحبتي و زي اختي عمري ما فكرت فيك غير كده .
بتزح يدينو منها بعصبية: زي اختك ؟! كل ده وزي اختك ؟!
_ انا اسف .
_ لا انا الاسفة انا الاسفة يا جيمي .
مشت على الباب وعايزة تطلع؛ جيمي بسرعة بجي وبقيف قِدامها : ماشة وين في زمن متأخر زي ده .
_ ما دخلك زح من قدِامي وما تتكلم معي .
ضمها علي وهو بقول ليها: انا اسف طيب ... ح احبك زي ما بتحبيني واكتر .
سوزان بتبدأ تبكي في حضنو؛ جيمي بزح منها وبمسح ليها دموعها : ما كنت قايلك بتعرفي تبكي .
ضحكت ما بين دموعها: كلو بسببك .
_ الزمن أتأخر امشي نومي عشان بكره عندنا جامعة بدري .
_ وانت ؟
_ ح انوم هنا .
_ مُصر تنوم برا .
_ اممم
_ طيب تصبح على خير .
_ تلاقي الخير .
سوزان بتدخل غرفة جيمي وبتقفل الباب؛ أما جيمي فرقد على الكنبة ونام بعد تفكير دام لفترة طويلة ....
_____________________________________
في اليوم التاني...
حوالي الساعة ١بعد الظهر؛ طلعت من باب الجامعة و وقفت وهي بتفتش بعيونها على بتاع ركشة؛ فجأة بجيها صوت من وراها: آنسة مملةة.

#من_الصفر✨
#حلقة_١٧_
⁦🖋️⁩: امتنان الهادي....
بتقيف على باب البيت وبتضغط بيدها على الجرس ؛ شوية وبفتح الباب وهو بقول ليهاا: دكتورة مِنن.
مِنن وهي بتدخل: السلام عليكم..
محمد: وعليكم السلام ....مالك جاية من برا زهجانة..
مِنن بتسلم على اسماء الكانت قاعدة قِدام التلفزيون وبتحضر وبتقعد جنبهاا..
اسماء: أن شاء الله بس لقيتي المِرجع الكنتي بتفتشي ليهو .
مِنن: ما لقيتو والله يا ماما .
محمد: وعشان كده زهجانة .
مِنن: ما زهجانة يا محمد فترانة فتى ساي بس.
اسماء: قومي خلاص غيري وتعالي نأكل لأننا كنا منتظرنك .
مِنن: حاضر.
بعد نص ساعة اجتمعوا على الصفرة ؛ اسماء ومِنن بدو يأكلو ومحمد قاعد يعاين ليهم...
اسماء بتنتبه لمحمد : مالك يا ولد ما تاكل ..
فجأة جرس الباب برن ؛ محمد بيقوم بسرعة وبمشي على الباب وبفتح وهو مبتسم ...
شهد وعلى يدها صحن: مساء الخير .
محمد: مساء السعاده .
شهد بتدخل :وين مِنن وخالتو اسماء ؟
محمد بمشي على المطبخ: هناا تعالي تعالي ..
شهد بتسلم على اسماء ومِنن وبتخت الصحن وبتقعد جنب مِنن ؛ محمد بشيل صحن شهد وبختو قِدامو وببدا ياكل....
مِنن: شكلك كنت منتظر الصحن ده من قبيل .
اسماء: عشان كده ما كنت بتاكل .
مِنن: طبيخ بامية ! عملتي انتي يا شهد.
شهد: لا لا عملتو حبوبة نصرة .
اسماء: محمد بحب البامية شديد .
محمد: اول ما عرفتهم عاملينها عزمت شهد تجي تتغدا معانا.
شهد: يعني عزمتني عشان البامية ؟!
مِنن: وانتي يا الخفيفة شلتيها وجيتي.
شهد: سامعة يا خالتو اسماء بتك .
اسماء: ما تشتغلي بيها انتي بتنورينا في اي لحظة .
محمد: واساسا فترة زمن وتجي تسكني هنا ومِنن ح تمشي .
مِنن : هييي عايز تطردني بعد تعرس .
اسماء: لا لا بس ح تعرسي انتي وتمشي.
مِنن: ما ماشة اي محل وح ابقى لي اولادكم العمة البايرة الشريرة .
محمد: ما بستبعدها منك .
شهد: معقولة بس مِنن صحبة عمري .
مِنن: انتي زاتك بعمل ليك حق النسابة.
اسماء بتضحك: كررعليي 😂 .
شهد: خوفتيني يا مِنن.
محمد: انا زاتي خفت 🙂.
مِنن وأسماء قعدو يضحكوا ؛ فجأة تلفون مِنن بهتز معلن وصل رسالة جديدة في الواتس ؛ فتحت شاشة التلفون واتلاقت حواجبها بإستغراب ؛ رسالة من رقم غريب مكتوب فيها "آنسة مملة" ؛ شهد بتميل رأسها عشان تشوف ؛بسرعة مِنن بتقفل الشاشة و بتزح منها التلفون ؛ بتكمل اكلها بسرعة وبتقوم اول وحدي ...
اسماء: قايمة وين يا مِنن اقعدي .
مِنن:لا خلاص شبعت يا ماما .
شهد: يا بت اكلتي شنو عشان تشبعي .
مِنن وهي بتشيل تلفونها وتمشي: بالهنا ليكم بالهنا ليكم..
مشت المطبخ غسلت أيدها وشربت موية وبسرعة بسرعة دخلت غرفتها وقعدت في طرف السرير وفتحت التلفون؛ ابتسمت وهي بترد ...
_ انت تاني ؟
كان متصل طوالي رد ليها: اي انا تاني الولد المزعج البضيع زمنو في الفاضي ممكن ترسلي لي اسم المِرجع
بترد علي طوالي : اعترف يا ولد عايز مني شنو بالضبط .
_ والله العظيم نيتي صافية يا بت الناس 😂 .
_ طيب بتساعدني لي .
_ على قولك ما عندي موضوع وبباري الفارغة .
_ مساعدتك لي دي تنزلها في قائمة انجازاتك تمام .
_ لي يعني ؟! 😂.
_ عشان خليتك تزور مكاتب لأول مرة في حياتك تشوفها.
_ وهل دي حاجة عظيمة؟ .
_ شديييد
_ طيب هسي خليني اتم العظمة دي ورسلي لي اسم المِرجع صحبي عندهم مكتبة ح يشوفوا ليك فيها .
_ دقيقة طيب .
رسلت لي صورة عليها الاسم .
_ تمام لو لقيتو ح اكلمك
_ طيب منتظرة .
مِنن بتقفل التلفون وبترقد في السرير ؛ شوية وبتنزل رسالة ؛ بسرعة بتفتح شاشة التلفون وبتشوفها من برا " بت حلال والله قال فضل واحد بس و حجزتو ليك " ؛ انتظرت خمسة دقائق بعدها دخلت المحادثه وردت ...
_ الحمدلله شكراً شكراً.
_ بكره نمشي نجيبو؟!
_ نمشي وين رسل لي موقع المكتبة وبمشي براي .
_ خليني أتم جميلي للنهاية🙂.
_ ما مطمئنة ما مطئمنة شكلك النوع البتمسكن عشان يتمكن
_ على فكرة انتي بتهيني فيني وانا زعلت وماف ليك اي مِرجع🙂 .
_ لا لا اي شي ولا المِرجع.
_ بكره ح تجي الجامعة .
_ كل يوم بجي الجامعه .
_ طيب بتطلعي بتين ؟
_ حوالي الساعة ٢ كده كويسة معاك .
_ لا ح اكون في المحاضرة .
_ بتدخل محاضرات يعني؟😂 .
_ لا لا انتي بس البتدخلي .
_ خلاص ما مشكلة بنتظرك لحدي ما تطلع .
_ الساعة ٣ جنب مدخل الجامعة تمام.
_ طيب تمام أن شاء الله .
مِنن بتقفل التلفون وبتختو من يدها لما تسمع صوت امها جاية على الغرفة ؛ اسماء بتفتح الباب وهي بتقول ..
_ بتعملي في شنو يا حلو.
مِنن بتوتر: لا ولا شي ولا شي..
اسماء: تعالي طيب عملنا شاي لبن يستاهلك.
_ حاضر .
_ قومي ارح قِدامي.

#من_الصفر ✨
#حلقة_١٨_
⁦🖋️⁩: امتنان الهادي...
مر اسبوع ومِنن وجيمي ما اتلاقو تاني؛ ولا حتى جمعتهم مكالمة أو محادثة واتس ؛ وفي يوم كان جيمي وشلتو قاعدين في كافتيريا الجامعة ؛ كان في جوطة زايدة وناس اكتر ...
مصعب: شباب الليلة في شنو في الجامعة الناس دي هايجة كده .
سوزان: اخر يوم في الامتحانات.
احمد: بتين كده قبل كم يوم مش بدوا.
عسجد: كم يوم شنو يا ولد ليهم اكتر من أسبوعين .
جيمي: فعلا ليهم فترة طويلة .
احمد: اها ونتيجتنا احنا ما منها خبر .
سوزان: بتسال منها لشنو من شغلك السمح يعني .
جيمي: انا المرة دي احتمال اشيل البُورت كلو😂 .
مصعب: كلنا في الهواء سوا يا صاحبي 😂.
عسجد: قلت ليكم نجتهد يا جماعه احنا خريجين ودي سنتنا الأخيرة .
سوزان: وبسمع ليك كلام منو خليهم نتخرج ونخليهم في الجامعة دي .
جيمي بسرح شوية قبل ما يقول: كل الدُفع بتخلص الليلة؟؟.
عسجد: اي كلهم .
سوزان: بتسأل لي.
جيمي : عندي صحبي في طب لي فترة منو ماشي اسلم عليهو واشوف الامتحانات دي كيف معاهو.
سوزان: دقيقة دقيقة صحبك ده منو الفي طب ده.
احمد: مالك يا بت الناس قاعدة لي الولد في حلقو.
سوزان: انت اسكت ما اختصاصك .
بتتلفت على جيمي: صحبك ده منو يا جيمي .
جيمي: ياااخ ارحميني من شكوككِ دي حاسي نفسي لو عايز اتنفس الا اجي استاذن منك ما ممكن يا سوزان ما ممكن .
سوزان : ما قصدي انا بس....
جيمي بقوم بعصبية وبمشي بسرعة قبل تتم كلامها ...
احمد: سوزان انتي زودتيها الصراحة..
عسجد: والله لو قايلة كده ح يحبك فالترابة في خشمك
سوزان: خايفة تجي وحدي تانية تشلبو مني يا جماعه.
مصعب: لا لا ما تخافي خليك متأكدة ح تجي وحدي وتشلبو 🤣.
سوزان: مصعب يااااخ .
احمد: كلامو صاح بالانتي بتعملي ده ح يكرهك ما يحبك .
مصعب: ح يكرهك شنو هو هسي ما طايقك 🤣.
عسجد:مصعب بطل .
مصعب: انا بقول الحقيقة يا جماعه ما توهمو البت ساي جيمي بجاملك لأنك صحبتو من زمان وما عايز يكسر خاطرك لكن بحبك دي ما اظن .
سوزان بتسكت وهي بتعاين لمصعب و بتسرح في كلامو .....

اما جيمي فأتوجه على قاعات طب وبالأخص القاعة الممتحنين فيها المستوى الثاني؛ كان لسة زمن الامتحان ما خلص؛ وفي باقي طلبة جوا القاعة؛ وقف جنب القاعة لحدي طلع جاء طالع واحد من الطلبة ؛ وقف قِدامو وهو بقول لي ..
_ ااا.. لو سمحت دقيقة من زمنك
الولد وقف: اتفضل .
_ مِنن عمر لسة جوا؟
_ البروف؟! اي لسة جوا دي بتطلع اخر زول.
_طيب ونهاية الزمن فضل منها كم؟ .
الولد بعاين للساعة : يعني نص ساعة كدا..
_ تمام شكراً ليك
_ ولو العفو ..
جيمي بَعد من القاعة شوية وفضل مراقبها ؛ مرت النص ساعة وكل شوية يطلع زول عدا مِنن ؛ بعد انتهاء الزمن جات طالعة ؛ كانت لابسة عباية كاجوال أنيقة باللون العُنابي ومحجبة الطرحة الكانت بنفس لون العباية ؛ جيمي اول ما لمحها طلع تلفونو وعمل نفسو مركز معاهو وهو ماشي على ناحيتها؛ مِنن جات ماشة ومع رفعت راسها شافتو ؛ طوالي وقفت واول ما وصلها وقفتو وهي بتنده علي...
_ جيمي...
جيمي بنزل التلفون وبتلفت عليها: آنسة مُملة !! يا اهلين ..
مِنن بتمد يدها: كيفك .
بسلم عليها: بخير الحمد لله وانتي .
_ الحمدلله كويسة.
_ طالعة من الامتحان ولا شنو ؟! .
_ اي كان اخر امتحان .
_ يااااخي !! ...حمد لله على السلامه .
_ الله يسلمك .
_ والشغل كيف .
_ والله الحمدلله .
_ الحمدلله ...نازلة تحت؟
_ اي
_ ارح طيب انا زاتي نازل .
بتحركوا من جنب القاعة؛ مِنن طلعت تلفونها واتصلت على شهد ...
شهد: الو يا مُزةة ..
_ اها بشري اشتغلتي كيف .
_ الحمدلله ظااابط وانتي
_انا برضو كويس الحمد لله .
_ طلعتي يدوب شكلك .
_ اي انتي وين ؟.
_ انا طلعت مع البنات ديل نفطر برا وبعدها ح القي محمد .
_ اها طيب .
_ تعالي ارح معانا صدقيني صحباتي ديل ظريفات وعسولات .
_ لا لا شكراً استمتعي بوقتك يلا باااي .
_ مِنن عليك الله تعالي ياااخ وبطلي .
_ لا شكراً ح امشي البيت .
_ طيب برحتك بس لو غيرتي رايك ارجعي لي .
_ تمام تمام يلا ...
فصلت الخط واخدت نفسها بزهج ودخلت تلفونها في الشنطة ؛ جيمي كان مركز في كلامها من الاول ...
عما الصمت لدقائق قبل مايقول ليها: شكلو كده الطلعة طارت...
_ كنت عايزة اطلع معاها برانا لاني ما بحب اطلع مع ناس ما بعرفهم.
_ طيب شوفي صحباتك البتعرفيهم واطلعي معاهم .
مِنن بتسكت....
جيمي بواصل : ما تفكري كتير طلعي تلفونك وشوفي صحباتك وين اكيد ح يكونوا طالعين ليهم محل .
_ بس انا ما عندي أصحاب .
_ لا بنات لا اولاد .
_ لا بس شهد وشهد لما تلقى صحباتها بتفضل تطلع معاهم او تطلع مع محمد .

#من_الصفر✨
#حلقة_١٩_
⁦🖋️⁩: امتنان الهادي......
فتحت التلاجة واخدت منها مسكن ؛ بلعت منو حبة وقعدت وهي بتقول : استغفر الله العظيم يا رب .
محمد: ماما انتي كويسة ؟
اسماء: اي كويسة بس صدعت شوية .
شهد: تحبي اعمل ليك شاي خالتو اسماء
اسماء:لا لا اقعدي ما عايزة اي شاي هسي ببقى كويسة .
فجأة جرس الباب برن؛ شهد بتمشي وتفتح ؛ كانت مِنن سلمت على شهد وبسرعة دخلت ؛ اسماء اول ما شافتها جرت عليها وحضنتها ....
اسماء: كده يا مِنن تخوفيني عليك .
مِنن: انا آسفة والله ما قصدي يا ماما .
محمد بعصبية: كنتي وين يا مِنن .
اسماء:ما تعلي صوتك على اختك يا محمد .
محمد بقوم وبجي يقيف في وش مِنن: كنتي وين ؟
مِنن بتعاين لي في عيونو: لما تتكلم معي بأسلوب احسن من كده ح اجاوب عليك .
محمد بضغط على اسنانو: نزلي عيونك وما تعايني كده
مِنن : لي ح تعمل شنو لو ما نزلتها .
اسماء بتجي وتزح محمد: انتو الاتنين مجانين؟ ده شنو البتعملو فيهو ده .
شهد : اطردو الشيطان يا جماعة.
مِنن بتعاين ليهم كلهم وبعدها طوالي بتمشي تدخل غرفتها؛ اسماء بتتلفت لي محمد : ده شنو يا محمد لي بتعمل كده .
محمد: عايزة تغلطيني انا صح؟ عملت شنو انا ؟ عشان سألتها كانت وين يعني ولا ما من حقنا نعرف بتمشي وين وبتجي من وين .
اسماء: بالهداوة كلو بالهداوة ما بالصوت العالي يا محمد .
محمد: رفعت عليها صوتي من خوفي عليها ؛ بس شوفتيها كانت بتعاين لي كيف ؟ لي ماتغلطيها على اسلوبها معي انا ما اخوها الكبير ينفع تعاين لي كده ينفع ؟؟ .
محمد قال جملتو الأخيرة وهو بمشي على الباب وبتطلع ؛اسماء بتقعد على الكنبة وتبدأ تبكي ( لسة ياها اسماء البكاية🙂) ؛شهد بتجي وتقعد جنبها : خلاص يا خالتو اسماء انتي بتبكي لي بس .
_ ده الكنت خايفة منو وبحاول امنعو .
_ محمد في لحظة غضب بس شوية ويهدأ ويجي يصالح اختو .
_ المشكلة مِنن حساسة شديد وما حتخت في رأسها انو محمد غضبان بس حتقول ما بثق فيها وافكار تانية .
_ لا لا ما في اي افكار تانية انا هسي بمشي وأتكلم معاها وح اتكلم مع محمد وان شاء الله باقي اليوم ده بنوموا متراضين .
_ صحي يا شهد.
_ وعد مني ليك .
اسماء بتحضنها: ربنا يحفظك يا بتي ويكملك بعقلك .
شهد طوالي بتقوم وبتمشي لي مِنن في الغرفة؛ فتحت الباب و دخلت وهي بتقول : ادخل ..
مِنن عاينت ليها وابتسمت: بتستأذني لي وانتي دخلتي وانتهى .
_ يعني ارجع ولا قصدك شنو .
_ لا يا غبية تعالي .
شهد بتجي وتقعد جنبها: حماتي الشريرة .
_ محمد مرسلك صح؟
_ابدا والله محمد زعل وطلع قبيل .
_ زعل لي؟ مفروض انا الازعل منو .
_ مِنن خالتو اسماء خافت عليك لدرجة أنها بكت وصدعت وتعبت ومحمد كمان كان خايف داخل وطالع لا عارفين ليك صحبة نسألها منك ولا انتي بتردي على تلفونك .
_ دي اول مرة يا شهد اتاخر فيها من دخلت الجامعه مفروض يعرف اني ما قصدي اعمل كده .
_ بسسس..... لانها اول مرة هم خافو عليك ومحمد ما رفع صوتو عليك الا من خوفو عليك ولحظة غضب ما اكتر.
_يعني هسي انا الغلطانة ؟.
_ لا انتي ولا محمد مافي زول غلطان بس شيطان ودخل بينكم .
_ حااضر يا شهد اول ما محمد يجي ح اعتزر ليهو .
_ ايوا دي مِنن الواعية الانا بعرفها .
_ اها يومك كان كيف .
_ خليك من يومي انتي المشيتي وين انا ما حبيت اقول قِدام محمد وامك انك ما عندك اي صحبات بتطلعي معاهم.
مِنن بتفتح تلفونها وبتجيب ليها صورة جيمي الكان خاتيها في بروفايل الواتس ؛ شهد شالت التلفون وعايت للصورة كويس قبل ما تقول..
_ جيمي😮؟؟.
_بتعرفي من وين؟ .
_ يا بت الا بعرفو من وين ده منو المابعرفو أساسا الجامعة على بكرة أبيها بتقول جيمي بزنس .
_ بالجد ؟ وبقولوا عنو شنو .
_ لا دقيقة كنتي مع جيمي ؟ كيف وبتين وعلاقتك معاهو شنو بالضبط .... سجمي بتحبي من وراي يا مِنن .
_يا بت حب شنو اسكتي افهمك .
_ اها سكت ..
_ اولا احنا اصحاب بس لا غير وعرفتو قبل فترة في يوم كان ......الخ ( حكت ليها القصة كلها من طقطق للسلام) .
شهد بتعاين. ليها وبتقوم وبتقعد تاني: سجمك يا مِنن شكلو الولد ده ختاك في رأسو.
_ختاني في رأسو كيف يعني؟
_ جيمي وشلتو معروفين في الجامعة كلها مغرورين ورافيعن رأوسهم في السماء و غربية شديد الولد ده يجي يتكلم معاك ويساعدك كده من غير مقابل.
_ قصدك يكون ناوي لحاجة كده ولا كده .
_انا ما ح افتي ليك في موضوع زي ده من رأسي لاني ما عارفة نيتو شنو بس خلي بالك خلي بالك شديد شديد.
_ لا ما تخافي انا ما بخافو علي ؛ وبعدين حتى الان ما شفت منو حاجة كعبة وصدقيني لو حاول حيندم .
_ بس بيني وبينك يا مِنن الولد قرضة و وسيم وسامة تقول نازل من الجنة .

#من_الصفر✨
#حلقة_ ٢٠_
⁦🖋️⁩: امتنان الهادي......
بجسم معسم وفتران بقوم من السرير؛ عاين للساعة الكانت بتشير ل٣:٠٠ عصراً؛ دخل الحمام و وقف قِدام المغسلة وعاين لنفسو في المرايا؛ برجع شعرو لي ورا وبياخد نفس عميق وهو بقول : اووووووف .
فتح الحنفية وغسل وشو ؛ قرب من المرايا وعاين لي عيونو المحمرة وجفونو المُورمة ؛ ابتسم ابتسامة باهتة قبل ما يقول : لبتين يا جيمي لبتين بس حتفضل ماشي في الطريق ده ؟؟..ضايع ومشتت وفاشل وباهت و وحيد ....يا ربي ح اعيش عمري كلو كده ؟؟ .. يا ربي ح يجي يوم واتغير ؟؟ ... نفسي اتغير بس كل حاجة في حياتي بتغرقني اكتر ....ح القاها من اصحابي الاكعب مني ولا من اهلي الما عارفين عني حاجة واخرهم يرضوني ببالقروش ولا من وين بس يا ربي .
نزل راسو مسافة قبل ما يمشي يقيف تحت الدش ويفتح فيهو الموية ؛ بعد عشرة دقائق بطلع من الحمام وبغير ملابسو ؛ عاين لي مصعب اللسة في سابع نومه؛ مشى المطبخ عمل لي قهوة وطلع وقف في البلكونة ؛ فتح شبكة التلفون ودخل الواتس؛ بفتش بعيونو على دردشة مِنن متجاهل كل الدردشات الجديدة ؛ دخل على دردشة مِنن ؛ كانت اونلاين على طول رسل ليها " صباح الخير " .
بعد دقيقتين بترد : صباح الخير الساعة ٤ ؟؟😂.
_ صحيت هسي انا ف بالنسبة لي الدنيا صباح.
_ من أمس نايم لحدي هسي😮 .
_ لا لا ما من أمس نمت الليلة الصباح .
_ قمة الفشل .
_ شكراً 🙂 .
_ لو كنت عايش مع أهلك ما كنت ح تكون بالفشل ده
_ ربنا يديني اهل يعيدو تربيتي طيب
_ فعلا محتاج إعادة تربية
_ خليك مني بكره ح تجي الجامعة؟!
_ لا لا عندنا اسبوعين إجازة السمستر
_ ما حتجي لمدة أسبوعين؟ .
_ايوا .
_المكتبة ح تشتاق ليك ؟ .
_ تصدق انا كمان ح أشتاق ليها .
_ اوع تكوني النوع البقرأ في الإجازة مواد السمستر اللسة ما نزلوا
_ لا طبعاً .
_الحمد لله لانو كنت ح اقطع علاقتي بيك
_بس برضو ما بضيعها نوم ساي .
_بتعملي شنو طيب؟
_ عندنا محل حلواني بقعد فيهو .
_بتشتغلي؟
_ايوا ....اساسا ماسكة ادارتو ماما ومحمد وانا لما اكون في إجازة بقعد محل محمد ..
_ بتعملوا باسطة حلوة ؟
_ يا ولد حلواني ابو مِنن الاول على مستوى المجمع كلو .
_ ما نفسك تعزميني يوم؟ .
_ ح اجيب ليك لمن الإجازة تخلص .
_طيب تمام اتفقنا .
مر اسبوع و المحادثه بين مِنن وجيمي كل يوم بتطول اكتر؛ ساعة ساعتين ومرات اكتر من كده ؛ في يوم جمعة كانت مِنن في المحل مع اسماء بتبايع في الناس والدنيا عصريات كده؛ فجأة بقيف قِدام اسماء وبقول ليها :السلام عليكم.
اسماء: وعليكم السلام .
مِنن بترفع رأسها: جيمي 😮 .
اسماء: اتفضل
جيمي: واحد كيلو باسطة ولو في ينسون كمان اديني كيلو.
اسماء: اوك .
بتدي ورقة صغيرة ( العاملة زي الفاتورة دي 🙂)؛ جيمي بشيلها وبمشي لي مِنن؛ بمد ليها الورقة وهو بقول ليها بصوت واطي ....
_ مشتاقين .
مِنن وهي مركزة مع اسماء: الجابك هنا شنو انت مجنون.
_ ماشي في شارع الله لقيت لي محل حلواني وانا اصلا نفسي في باسطة ويا محاسن الصدف القاك هنا .
_جيمي بطل كذب
_طيب بتساليني سؤال زي ده لي ح يكون جابني شنو يعني .
مِنن بتوتر: تحب اديك من اي صنف ؟
_ كنافة وبسبوسة .
_ اها وتاني .
جيمي بصوت واطي: ما نفسك في مشوار بعد المغرب.
_ اتفضل باسطتك و ده الينسون 🙂.
_ لو ما طلعتي معي ح اجي تاني راجع .
_ جيمي ماما ح تشك امشي .
جيمي وهو بطلع من المحل: لحدي بعد المغرب لو عجبتني بجي تاني .
اسماء: تشرفنا في اي زمن .
مِنن بتاخد نفسها: مجنوووون .
بتنزل رسالة على تلفون مِنن ؛ بتفتح شاشة التلفون وبتشوفها من برا " ح انتظرك برا لو ما جيتي ح اجي اسوقك وما تقولي بهددك ساي والله العظيم بعملها" ؛ رجعت قفلت الشاشة ...
مِنن وهي مترددة : ماما ..
اسماء: ايوا حبيبتي.
_عايزة امشي البيت وح اجي راجعة بعد المغرب
_ طيب تمام ما تتاخري لكن.
مِنن بتغسل يدينها وبتطلع؛ بسرعة مشت برا المجمع و وقفت تتلفت ؛ جيمي ضرب ليها بوري اول ما طلعت عشان ينبها على مكان واقف؛ جات وركبت العربية وقفلت الباب بقوة وهي بتقول...
_دي شنو الحركات يا جيمي.
جيمي كان فاتح صندوق الباسطة وبياكل منو: والله رهيييبةةة شكلي تاني ح اجي كتير .
_ لا دي اول مرة واخر مرة تجي فيها هنا .
_ ممكن افهم انتي زعلانة كده لي.
_ لأنك بتتهور وما بتحسب خطواتك وبعدين يا جيمي ..
جيمي بعاين ليها وببتسم ...
بتسكت لثواني قبل ما تقول: مالك بتعاين لي كده .
_ شكلك وانت زعلانة حلو شدييد.
مِنن بتفصل : من يومي حلوة شديد .
_ فعلا والله .
_ عايز تحجبني بكلامك ده مش .
_ انتي اتحجبتي وانتهى🤣.

#من_الصفر ✨
#حلقة _٢١_
⁦🖋️⁩: امتنان الهادي...
في أجواء الصباح الباكر ؛قبل طلعوع الشمس بشوية ؛ على شاطئ النيل ونفس المحل المتعودين يجوا كل مرة ؛ مِنن بتفرش المصلاية وبترجع العربية وتجيب سيرميس فيها شاي لبن و معاها كبايتين وبتجي تقعد؛ جيمي كان بعاين ليها وهي ماشة وجاية ؛ بتكب الشاي في الكبابي وهي بتقول : امشي جيب علبة الكيك بدل ما انت واقف ومتنح كده.
جيمي بمشي يجيب العلبة وبجي بقعد جنبها؛ مِنن اخدت كبايتها وبقت مركزة بكل حواسها اتجاه النيل .
جيمي بعاين ليها باستغراب: بتعملي في شنو انتي .
_ هُسسس ح تطلع هسي .
_ شنو هي الحطلع.
_الشمس يا جيمي الشمس .
_اهااااا قولي لي انك مصحياني وجايباني في وقت زي ده علشان تشوفي الشمس وهي بتطلع .
_ في احلى من المنظر ده .
_عيونك احلى بكتير ..
تنزل راسها بخجل: بطل يا جيمي .
_ عايني عايني الشمس عايزة تطلع .
بتبتسم وهي بتعاين للشروق: واحد من احلامي اتحقق.
_ دقيقة اول مرة ؟
_ امممم اول مرة والله.
_طيب باقي احلامك شنو .
_كتيرة كتيرة .
_اهمها طيب .
_اشوف بابا .
جيمي ببتسم ابتسامة باهتة : كان عندي نفس حلمك ده .
_ صحي انت عمرك ما حكيت لي عن ابوك .
_ الكيكة دي عملتيها انتي .
_ جيمي ما تغير الموضوع .
_ ما جمعتني بيهو اي ذكرة عشان احكيها ليك .
_ هو عايش؟.
_ههه تصدقي ما عارف .
_ كيف يعني ما عارف ؟ متذكر طيب اخر مرة شفتو فيها .
_ متذكر اي ...كنت في تانية ابتدائي وعمري ٨ سنة ؛ وطول ال٨سنة دي كان افضل اب ؛ كنت بحبو شديد ومتعلق بيهو شديد بسس.
_ بس شنو ؟.
_فجاة ومن غير مقدمات اختفى ؛ في الاول كانو بقولوا لي مسافر في شغل و ح يرجع لحدي ما يوم اصريت على ماما انها تتصل عليه ويا ريتني ما اصريت يا ريت لو فضلت على فكرة أنو مسافر لشغل ؛ ماما قالت لي وقتها انو طلقها واتخلى عنها وعني وعرس صحبة امي بس لانها عرضت علي ملكية شركتها اذا عرسها وطلق امي .
_طيب لي عمل كده؟
_ ما عارف يا مِنن بس كل العارفو انو اتخلى عني بكل بساطة عشان القروش ؛ ماما طوالي اتزوجت راجل تاني وبعدها سافرنا امريكا وهناك اتغير اسمي من ياسر لي جيمي ..
_ دقيقة كان اسمك ياسر ؟؟ طيب لي غيرت اسمك؟
_ بابا كان مسميني على جدي ؛ وكان اسمي اكتر حاجة بتذكرني بيهو ؛ فجأة لقيت ماما بتغير اسمي و
في كل اوراقي الثبوتية لي جيمي وبدت تنادني بيهو تناسبا مع الحياة هناك وأكيد عشان اطلِع بابا من حياتي تماما وفعلا ده الحصل من وقتها وانا نسيت الموضوع و حتى شخصيتي اتغيرت تماماً.
_يعني نوال ما شقيقتك ؟
_ لا نوال اختي من امي بس .
_ وجيت هنا بتين؟.
_ قبل أربعة سنين وقعدت مع جدو سنة وكم شهر كده بعدها جدو اتوفى .
_انا آسفة ...ربنا يرحمو ويغفر له .
_اللهم امين ... بعد وفاة جدو ما قدرت اقعد في البيت براي وخصوصا انو جدو كان قريب لي شديد ف قعدت في الشقة الحاليا انا فيها دي .
_ شكلك عانيت كتير في حياتك.
_ كل معاناتي كانت مع الخذلان ...شفت الخذلان بكل انواعو وكل مرة اتخذل من انسان جديد كنت شايفو حاجة عظيمة في حياتي .
مِنن بتخت يدها على يدو : إلا انا مستحيل اخذلك ولا اتخلى عنك مستحيل.
_شكرا مِنن .
_ على شنو يا غبي
_على كلامك ده اولا .
_وثانيا .
_ ثانيا دي خليها بيني وبين نفسي .
_ ما ح اعصر عليك بس اذا حبيت في يوم تقولها انا جاهزة اسمعها ..
_ ماشي يا ستي .
مِنن بتعاين للساعة: زمن المحاضرة قربت ..نمشي؟
_نفسي يوم تنسي الزمن وتخلي يمشي يمشيي لحدي ما اليوم انتهي .
_ يمشي يمشي في عينك يلا قوم .
مِنن بتشيل الحاجات وبتمشي على العربية: يلا يا جيمي وجيب معاك مصلايتي دي .
_ جيمي بقوم وبشيل المصلاية: حااااضر حبوبة مِنن .
فجاة تلفون جيمي برن؛ طلع من جيبو وعاين للرقم مسافة قبل ما يبعد شوية عن مِنن ويرد ....
جيمي: الو ؟..
_ الخرييج
_ ماما ؟؟
_ ياقلب ماما
زح التلفون وعاين للرقم مرة تانية ورجع التلفون: ده مفتاح السودان انتو جيتو هنا؟
_ايوا احنا جينا هنا .
بفرحة ظاهرة في صوتو: بالجد ؟ بتين ولي ما كلمتوني انكم نازلين السودان؟؟ .
_ عشان تكون سبرايز .
_ احلى سبرايز والله ... في بيت جدو ولا نزلتوا وين؟
_اي في بيت جدو تعالنا هناك .
_ حااااضر مسافة السكة بس .
قفل منها الخط ومشى ركب العربية واتحرك على الجامعة ؛ مِنن عاينت لي بسوق بحماس وعلى وشو ابتسامة عريضة ..
مِنن: ممكن اعرف سبب الإبتسامة الحلوة دي.
_ احذري
_موضوع البحث ظبط ؟
_ لا لا .
_امممم ما عارفة طيب قول لي .
جميي بتلفت عليها: ماما ونوال هنا .
_ في السودان 😃 .
_ايوا .
_ وكنت عارف ؟
_لا طبعاً.
_يا سلاااام أخيراً ح تتلمى زيك زي اولاد الناس .

#من_الصفر✨
#حلقة _٢٢_
⁦🖋️⁩: امتنان الهادي ....
مِنن بتنزل الورقة وبتعاين لجيمي؛ كانت عيونو حتولع نار من شدة الغضب؛ لدرجة عروق رأسو ظهرت ؛ مد يدو ليها عشان تدي الورق ؛ مِنن في محاولة انها تهدي..
_ هدي اعصابك يا جيمي وبراحة براحة شوف نفسك عايز تعمل شنو .
بضرب الطاولة وبعلي صوتو : جيبي الأوراق دي يا مِنن .
مِنن بترمي الاوراق في الطاولة وبتزح يدها بخوف؛ بشيل الاوراق وبطلع من المحل بسرعة؛ في زمن قياسي بصل البيت وبدخل وهو بقول بصوت عالي : مااماا ماااماا
خولة بتجي نازلة بسرعة ؛ كانت جاية علي وهي بتقول: مالك يا ولد مالك .
جيمي بمد ليها الاوراق: ممكن افهم ده شنو ؟
شالتها منو وعاينت ليها مسافة : لقيت الاوراق دي وين؟؟
جيمي بجي منها قريب: خليك من لقيتها وين وجاوبيني لي عملتي كده ؟؟ لي حرمتيني من اكتر انسان كنت بحبو ؟؟ لي حرمتي هو مني وكان في أمس الحاجة اني اكون معاهو ؟ كيف طاوعك قلبك تعملي فيني كده كيف بس كيف؟؟.
خولة بتوتر: عشان بحبك وعايزة احميك يا جيمي .
_ نعمم ؟ اي حب ده البديك الأحقية تبعديني عن ابوي واي نوع من الحماية الح ألقاها بعيد من ابوي؟؟
_ كان عيان وممكن يفارق الحياة في اي لحظة وانت ما كنت ح تتحمل صدمة زي دي ما كنت عايزاك تشوفو وهو عيان وبصارع الموت ولا كنت عايزاك تشوفو بموت .
_تخليني اكرهو الفترة دي كلها وتشوهي قلبي بالحقد اتجاهو كده احسن يعني ؟ انا ما قادر استوعب انك حرمتيني منو الفترة دي كلها.
_ يا جيمي هو اتوفى بعد أقل من سنة من مرضو يعني كده كده انت كنت ح تعيش من غيرو.
جيمي مصدوم في طريقة الكلام وفي الكلمات البتقولها بكل بساطة ؛ كان واقف وبعاين ليها وبحاول يستوعب كل البحصل؛ خولة بتجي قريبة منو وبتخت يديها في اكتافو : جيمي انسى الماضي والحصل حصل انت هسي ماشاء الله عليك تسد عين الشمس وأنا فخورة بيك شديد .
جيمي بنتفض منها : زحي مني.
برجع خطوتين لوار وبصوت عالي : عمري ما ح اسامحك على العملتي فيني حياتي ما ح انسى انك السبب في حزني طول السنين الفاتت دي انتي السبب في كل الحصل لي وانتي السبب في حياتي الفاشلة العايشها دي انتي مافي زول غيرك .
خولة بتجي علي: اهدا يا جيمي انت...
بقطع كلامها: ما تتكلمي معي ..اياااك تفتحي خشمك ده وتتكلمي معي اياااك .
بتراجع لي وار وبطلع من البيت مخلي خولة واقفة ومصدومة في ردت فعل جيمي و ما عارفة تعمل شنو ولا ترجع ولدها كيف ....
____________________________________
حوالي الساعة ٤ عصراً؛ كانت ماشة وجاية في الغرفة بتوتر وقلق؛ بتفتح التلفون وبتتصل ؛ شوية وبتنزل التلفون وهي بتقول: لسة مقفول يا شهد لسة مقفول ..
شهد كانت قاعدة في السرير ومتمحنة في حالة مِنن ؛ قامت وجابتها قعدتها وهي بتقول ليها: رووقي يااخ صدعتي بي .
_ اروق كيف بس يا شهد ما شفتي حالتو لمن طلع من الكافية كانت كيف ما كان لازم اخلي يسوق بالحالة دي كان لازم امنعو .
_ ما عندك رقم اي واحد من اصحابو ؟
_ لا لا .
_ طيب ما بتعرفي بيتهم ده وين؟
_انتي مجنونة حتى لو بعرفو ما ح امشي .
_ ح اعمل ليك شنو طيب ما عايزة تصبري ونشوف نهايتو شنو.
_ من قبيل انا صابرة بس اكتر من كده كتير خوفت علي .
_ انا اول مرة اشوفك متوترة كده يا مِنن عليم الله اهدي والله مابكون حصلت لي حاجة ..
مِنن بتقوم بسرعة : في محل احتمال كبير يكون فيهو .
_وين ؟
بتمشي على الدولاب: بسرعة اطلبي لي ترحال بسرعة .
_ لي ماشة وين.
مِنن بتطلع عباية وتلبسها : ياااخ ما تساليني اطلبي بس.
_ اجيي اطلب كيف لو ما قلتي لي ماشة وين.
_ جيبي التلفون ده اصلك ما نافعة في شي
طلبت ترحال وبعد عشرة دقايق كان برا؛ نزلت ليهو بسرعة وأتوجه بيها على العنوان الوصفتو لي؛ بعد تلت ساعة وصلت ؛ نزلت وهي بتقول : يارب يكون هنا يا رب يكون هنا .
اخدت نفسها بطمئنينة لما شافت عربيتو واقفة ؛ كان قاعد في الارض ومتجه على النيل ؛ جات وبركت على رجولها في الإتجاه المعاكس ليهو وبقت مقاصدة ؛ ختت يدها على وشو وهي بتقول لي ....
_كنت بتبكي ؟؟..
نزل يدها: عرفتي كيف انو انا هنا .
_ قلت لي بنفسك لما اتضايق بجي هنا .
_ ممكن تخلني براي يا مِنن ؟
_ لا طبعاً أنا قلت ليك اني مستحيل اخليك .
صوتو كان مبحوح ؛ وملامح وشو مرهقة ...
مِنن بتعاين لي في عيونو : ما ضروري تتكلم لاني شايف اي شي في عيونك .
فجأة عيونو بتتملي دموع؛ نزل راسو وحاول يمنع دموعو الغلبتو ونزلت متتالية على الأرض ...
بصوت مبحوح : بابا اتحرم من أسرة تسندو وتقيف معاهو في أصعب اوقاتو واتحرم من ابن يدعو ليهو بعد ما اتوفى ... انا كنت بكرهو عشان اتخلى عننا وهو كان مافي الدنيا دي أساسا ... كنت شايف نفسي انسان كعب بس هسي انا ما طايق نفسي ...

#من_الصفر ✨
#حلقة _٢٣_
⁦🖋️⁩: امتنان الهادي...
مِنن اول ما نزلت وقفت على جنب وطلبت ترحال؛ شوية وبتجي سوزان نازلة وبتتكلم بالتلفون وهي بتبكي ؛ وقفت لقدام شوية من مِنن وما لاحظت لوجودها ؛ كانت بتتكلم بصوت عالي وهي متعصبة ؛ومن ضمن الكلام السمعتو مِنن " انتي عارفة ...ح يندم على انو خلاني حيندم والله العظيم ح اخلي الشلة كلها تتخلى عنو ح يموت في شقتو دي ويعفن فيها هو ما عارف نفسو ما عندو غيرنا ومن غيرنا هو ولا شي الكلب الحيوان يطردني انا عشان بت طب التافهة دي ...
للحظة مِنن بتتردد بين قلب يريد وعقل يرفض ؛ بتسرح للدقائق بعدها بسرعة بترجع؛ بتقيف على الباب وبتهدي أنفاسها بعدها بتخت يدها على الجرس مرتين ورا بعض ؛ شوية وتاني مرتين ورا بعض؛ بتطلع تلفونها وتتصل علي برضو ماف اي رد ؛ بدت تتوتر وبيدها مرات كتيرة على الجرس؛فجاة بفتح الباب؛ مِنن بصوت عالي ...
_ يعني قاعد جوا وما عايز تفتح لي فاكر نفسك...
بتسكت لما عينها بتقع على كفت يدو البتنزف بغزارة؛ بتمسكو من يدو التانية وبتدخل بسرعة؛ بتمشي بيهو على اقرب مغسلة وبترجع تجيب موية باردة وبتكبها على النزيف...
مِنن بعصبية: وين علبة الاسعافات الأولية.
_ ما عندي .
_ لي بتعمل كده يا جيمي يعني انت مراهق عشان تقل ادبك زي ده
_ لي رجعتي ؟
مِنن متجاهلة السؤال: كلنا بنمر بأيام صعبة بس الواحد بصبر وبثق في ربنا
_ واثق انا من ربنا
_ كذاب كل البتعمل فيهو ده كانك معترض على حكم ربنا ؛ وكانك بتعاقب نفسك على حاجة انت ما ليك فيها ذنب
_ لا بس نفسي مقفولة من اي شي .
_ نفسك ح تدمرك لو تابعتها انت لازم تجاهد نفسك وتغيرها للاحسن ما ممكن تصل لمرحلة انك تشرب يا جيمي ده خمر وحرام في دينا ومأذي لصحتك .
_ مش قلتي علي فاشل وما عايزة تتكلمي معي تاني
_خلينا من الكلام ده عندك بن جاهز .
_ في رفوف المطبخ فوق .. بس انا ما عايز قهوة هسي .
_ اسكت عليك الله .
بتمشي بسرعة وبتجيب علبة البن وبتخت منو على الجرح؛ أتلفت حولها وهي بتقول: ما تحركها خليني اشوف حاجة اربطها بيها .
_ ما جاوبتني انتي رجعتي لي؟
_ هُسس ولا كلمة .
بتقوم تجيب من شنطها منديل من القماش وبتربط ليهو يدو وهي بتقول لي: عايز تعرف انا رجعت لي؟.
_ اي
_ لاني وعدتك انو مستحيل اتخلى عنك و ح افضل جنبك حتى لو انت ما بتستاهل اني اكون جنبك .
جيمي بعاين ليها في عيونها: مِنن .
_ ايوا .
_ انا عايز اتغير ؛ ما عايز افضل كده ولا حياتي دي عاجباني ؛انا نفسي اكون انسان جديد ؛انسان يستاهل انك جنبو
_ انا كمان عايزاك تتغير يا جيمي وما تخاف ح اساعدك وشوية شوية كل شي ح يظبط .
_ أن شاء الله.
قامت وهي بتقول: اولا حتشرب الشوربة دي .
_ عملتيها انتي ؟
_ بصراحة عملتها ماما بس انا كمان بعرف يعني .
_كل حاجة بتقولي عملتها ماما بس انا كمان بعرف بديت اشك في عرفتك دي .
جابت الشوربة ومعاها معلقة وختتها قِدامو : عاين اشرب وانت ساكت .
جيمي بشيل من الشوربة:فيها طعم غريب.
_غريب كيف يعني ؟ ما حلوة يعني؟ .
_ فيها طعم البيت وطبيخ البيت .
_اهااا يعني هسي حلوة ولا لا.
_حلوة يا مِنن حلوة شديد بس انا ما متذكر اخر مرة شربت فيها شوربة بتين .
_ يا سيدي ولا يهمك كل ما يكون نفسك فيها ح اخلي امي تسويها .
_ اهاااا ده اكبر دليل انك ما بتعرفي تطبخي.
بتضربو في كتفو : انت واحد معفن والله .
جيمي بخت يدو محل الضربة: اخخخخ.
_ ضربتي دي هسي حارة ؟
_ما حارة بس ياااخ جسمي مكسر ومعسم
ختت يدها في جبهتو: حتى حرارتك مرتفعة
_ اممم من النزلة
_ غير النزلة يا جيمي انت شكلك فاقد والفترة الفاتت دي اكلك تعبان .
_ اها يا دكتورة مِنن .
_ يااخ ما تستهتر .
_ ابدا والله بس انتي قولي اعمل شنو وانا ح اعمل على طول.
_ مبدئيا لازم تستعيد صحتك وعافيتك وكمان لازم تحلق شعرك ده .
_ تحلق شنو🙂 .
_ شعرك الكتير ده صدقني حتكون حلاتك بدون شعر .
_نعممم حلاتي وبدون شعر بتهظري انتي .
_لا والله بالجد
_ لا لا شعري خارج التغير ده.
_ما عارفة عاجبك فيهو شنو .
_عاجبني بس انتي مالك.
_ براحتك .
عاينت للساعة في يدها: انا اتاخرت ياااخ .
_ لا لا اتاخرتي شنو لسة الزمن بدري.
_ انا قلت لي ماما ح ارجع طوالي .
_ طيب بس ح تجي تاني .
_ أن شاء الله .
مِنن بطلع من شنطتها علبة مسكن : المسكن ده حلو شدييد اخد منو حبة كل تمنية ساعات و اشرب موية كتير وعصائر .
_حااضر اي طلبات تانية .
_ لا لا سلامتك. ...يلا انا ح امشي .
_ خليني اوصلك .
_ لا لا توصلني وين بحالتك دي انت تخش تنوم وبس .
_ لا لا ما ح اخليك تمشي براك
_ قلنا لا يعني لا
_ ماشي براحتك .
مِنن بتمشي على الباب: مع السلامه وخلي بالك من نفسك .

#من_الصفر✨
#حلقة_٢٤_
⁦🖋️⁩: امتنان الهادي...
حوالي الساعة ١٢:٠٠ ظهراً ؛ بتفتح باب الغرفة وبتدخل وعلى يدها كباية عصير ؛بتقعد جنبها في السرير وبتضربها على كتفها بخفة وهي بتقول: نونوو اصحي حبيبتي اليوم بقى في نصو .
نوال بتتلفت منها على الجهة التانية : خليني شوية بس .
_ قومي يا بت و بطلي كسل.
_خمسة دقائق بس .
بتهز ليها كتفها تاني : نونووو
فتحت عيونها وقامت بكسل : اهاا قومت كده ارتحتي .
خولة بتحرك يدها علي شعر نوال : عصبية زيي انا زمان .
_ بس ما عايزة اكون زيك انا
بتمد ليها كباية العصير : اشربي العصير ده وقومي اتنشطي النوم الكتير ما كويس لصحتك .
نوال بتضحك بإستهتار : كل كلمة بتقوليها بحسها كذب وكل حاجة بتعمليها بحسك عندك هدف من وراها .
_ نونو يا حبيبتي انتي نور عيوني واغلى حاجة عندي من الطبيعي احبك واهتم بيك واخاف عليك .
_ طيب وجيمي مش كمان ولدك ؟ لي اذيتي كده؟ حالياً احنا خسرنا وبسببك حتى انا ما بتكلم معي.
_ لا احنا ما خسرنا ح يرجع لما يفهم مصلحتو وين وحالياً انتي واخوك ما قادرين تفهموا مصلحتكم وين والعملتو انا كان عشان مصلحة جيمي .
_ مصلحة وين بس في بعدو عن ابو .
_ انا ما عايزة اتناقش في الموضوع ده كتير كفاية لحدي هنا .
_طيب تمام يلا شيلي عصيرك وامشي من هنا .
_ من الاحسن تحسني اسلوبك معي يا نوال .
_ ح افكر في الموضوع ده يلا يا حلوة .
خولة بتقوم وبتخت الكباية على التربيزة: خلي العناد واشربي عصيرك ده تمام .
قالت جملتها دي وهي بتطلع ؛ نوال بتمسك تلفونها وبترجع ترقد ؛ فتحت التلفون ولقت أربعة مكالمات فائتة من باسل ؛ طوالي بترجع ليهو ...
باسل: شنو لكن تخوفيني عليك كده .
_ معليش حبيبي كنت نايمة .
_ ما مشكلة نوم العوافي.
_ مشتاقين وكده .
_والله كتير الشوق من أمس وانا بفكر فيك .
بتبتسم بخجل: بالجد ؟
_ وانا بعرف اكذب عليك كمان .
_ اها الليلة ح نتلاقى ولا مشغول .
_افضي نفسي عشان خاطرك انتي بس قولي لي وين .
_ لا انا ما بعرف البلد دي انت قول لي وين والساعة كم وانا ح اكون هنالك .
_ طيب ظااابط ح ارسل ليك الموقع في التلفون.
_تمام.
_ اسمعيني .
_ اهااا
_ جيبي معاك بطاقة الصراف حقتك عملت مشكلة مع ناس البيت وقفلو حسابي .
_ مشكلة شنو كمان .
_بعد نتلاقى بحكي ليك.
_ خلاص تمام ح اجيبها معي .
_ يلا يا قلب .
_يلا ...
فصلت الخط بعدها بتقوم وبتنط في السرير وهي بتضحك بصوت عالي ؛ وبتنزل وبتتجه على الدولاب عشان تختار ملابس موعدها المنتظر ...
____________________________________
مِنن كانت خايفة على جيمي ومتوترة طول الطريق؛ وصلت المبنى الفيهو شقة جيمي وبسرعة طلعت ؛ اتصلت ليهو وقالت لي أنها برا ؛ جاء وفتح ليها الباب وهو بقول ليها ...
_ دكتورة مِنن .
مِنن بتخت يدها على جبهتو متفقدة حرارة جسمو؛ بتزح يدها وبتعاين لي : حراراتك عادية وما ظاهر عليك تعبان .
_ كدي ادخلي ونتكلم جوا .
جيمي دخل ومِنن بتدخل ورا وبتفقل الباب : تعال وفهمني لي بتكذب يا جيمي .
جيمي وهو بضحك: لو قلت الحقيقة ما كنتي جيتي.
مِنن بعصبية: انت عارف انك ضيعت علي محاضرة انا من دخلت الجامعه ما حصل ضيعت محاضرة.
_ معليش تكبري تنسي .
_ جيمي ما ممكن تكون بالبرود ده ياااخ .
_كدي انتي روقي وركزي في البيت شايفة شنو جديد .
مِنن بتعاين حولها؛ البيت نظيف ومرتب وكل حاجة في محلها منظمة ...
مِنن وعلى وشها إبتسامة: ما شاء الله شكل البيت اتغير تماما قول لي عملت كل ده انت .
_ صحيت وانا نشيط وماف اي موضوع قلت املى وقتي في حاجة مفيدة .
بترجع تتعصب تاني: صحيت كويس ونشيط وجايبني على ملى وشي كده .
_ يا بت بطلي العصيبة الزيادة دي بتقتلك .
_ غلطانة انا البباري لي واحد فارغ زيك
_يلا انتي بديتي تغلطي في حقي .
_ ما قلت حاجة غلط فعلاً انت فارغ .
_ طيب يا مِنن ارجعي الجامعة واحضري محاضرتك
بتخت شنطتها وبتقعد في واحد من كراسي القعدة الفي الهول : لا ما حزرت والله ما ح اجي علي كيفك وامشي علي كيفك يا استاذ
_ مدام ما ماشة ح اعمل ليك كباية شاي.
_ لا لا ما بحب الشاي اعملها قهوة .
جيمي بمشي على المطبخ : حاضر هسي قهوتك تكون عندك.
بعد شوية برجع وعلى يدو كبايتين ؛بمد لي مِنن قهوتها وبقعد ؛ مِنن بتشرب من القهوة وهي بتقول...
_ طلعت بتعرف بتعملها .
_ يا بت معاك خبير قهوة وشاي .
_ بتعرف شنو غيرهم .
_على فكرة أنا طباخ شاطر شديييد .
_ ياااخي .
_والله اعمل ليك بطاطس شبس و بيض و العجب الاندومي خطيييرر يا بت خطيير ..
مِنن بتضحك: لا لا انت خطيير شديييد.
_ بتضحكي لي ما مصدقاني يعني .
_ لا معقولة بس اكذبك .

#من_الصفر✨
#حلقة_٢٥_
⁦🖋️⁩: امتنان الهادي...
بعد المغرب بشوية كده ؛ طلع التلفون وكتب رساله محتواها " تعالي على نفس الكافي الامس اطلعي هسي وما تتاخري " ؛ كان قاعد مع واحد صحبو ؛ بجيب صورة نوال وبمد التلفون لي صحبو وهو بقول لي ...
_ ياهاا البت الحكيت ليك عنهاا .
_ قيااااامةة عديل يا زولي متأكد عمرها ١٤ سنة بس
_ اي والله لكن متربية في امريكا تفرق من عيشتنا دي .
_ وانت حنكك معاها شنو .
_ والله ياااخ مصلحة قروش بس الناس ديل قروشهم محل يودها ما عارفين .
_ وخطتك شنو .
_ انا عايزك تديني حاجة كده نضيفة اقدر اخليها خاتم في اصبعي وبعدها تاني لو قلت ليها جيبي لي نجمة من السماء تجيبها.
صحبو بطلع شريط حبوب من جيبو : الحبوب دي قوية شديد نص حبة بس كفاية ومفعولها بسري ٢٤ ساعة بعدها ح تجيك جارية عشان تديها تاني
_ بس ده المطلوب .
_ ما تنساني لكن .
_ ده كلامك بعزك عِزة تمام .
_ يلا انا ماشي وبالتوفيق كده.
_ ظابط يلااا .
بعد نص ساعة نوال بتجي؛ سلمت على باسل وقعدت ؛ باسل بطلع صندوق سجائر وبمدو ليها؛ نوال اخدت وحدي و ولعتها ...
باسل: البشوفك يقول قديمة في الشغلة دي .
_هههه اصلا اي حاجه انا بتعلمها بسرعة .
باسل بتطلع من جيبو شريط الحبوب وبقسم ليها نص حبة: هاااك جربي دي .
_ دي شنو .
_ حاجة كده ظابطة شديد
_ انا ما عايزة ادمن لكن .
_ تدمني شنو يا بت معقولة انا اعمل حاجة تأذيك انتي ما بتثقي فيني ولا شنو .
_ لا لا اكيد بثق فيك .
_ طيب شيليها وما تترددي .
نوال بتشيل منو نص الحبة وبتبلعها ؛ شوية وبقت دايخة وبتضحك من غير سبب وبتسلم لكل زول بجي ماشي جنبها؛ استمرت اكتر من ساعة بالحالة دي بعدها شوية شوية حالتها بدت ترجع طبيعية و وعيها بدا يرجع ليها؛ باسل جاب ليها موية شربت وغسلت وشها منها...
باسل: حاسة نفسك كويسة .
_ حاسة نفسي مبسوطة شديد حاسة نفسي عايزة ارقص .
_ لا لا روقي رقيص شنو انتي مفروض تمشي البيت بعد كده .
_لااا البيت لا خليني معاك هناا .
_حبيبتي انا ما عايز ليك المشاكل وخايف امك تمنعك من الطلعة معي تاني.
_ طيب حاضر ح امشي .
_جبتي البطاقة صاح؟
نوال بتفتح شنطتها وبطلع البطاقة: هاك يا سيدي حاسب ورجعها لي.
باسل بشيلها: ربنا ما يحرمني منك يا قلب.
_ ولا يحرمني منك .
_____________________________________
في نفس الأثناء ؛ الساعة كانت ٩ الا ربع ؛ كانت لابسة عباية كاجوال أنيقة باللون الكبدي ؛ وقفت قِدام المرايا وحجبت طرحتها ؛ فجأة شهد بتفتح الباب وبتدخل وهي بتقول ...
_عشنا وشفنا عشنا وشفنااا مِنن عمر عندها موعد .
مِنن بتمشي عليها :هُسسس انتي مجنونة سمعتيهم .
شهد بترجع لورا وبتعاين ليها من فوق لتحت: دقيقة انتي ماشة كده.
_ اي.. اللون ده اوفر ؟
_ مِنن لابسة عباية لي؟ وين الميكب يا روحي انتي قايلة نفسك ماشة الجامعة ولا شنو
_ قصدك شنو يعني شكلي ما مناسب ؟
_ اعملي ليك حاجة في وشك ده وغيري العباية سريع .
مِنن وهي بتعاين لنفسها في المرايا: بس هو متعود علي كده .
_عشان كده لازم تعملي حاجة جديدة تخلي ينبهر فيك ويمكن يعترف ليك بحبو .
_ أنا خايفة يكون ما بحبني أساسا وشايفني مجرد صديقة .
_ لا لا انا متأكدة جيمي بحبك وهسي هو عازمك عشان يعترف ليك
_ نفسي اعرف واثقة كده لي .
_ مِنن يا روحي انتي إنسانة روحك حلوة و بتدخلي القلب على طول ده غير جمالك ف مستحيل ما تكوني في قلبو .
_ بالجد؟ أن شاء الله ربنا يسمع منك .
_صحي انتي قلتي لخالتو اسماء ماشة وين في زمن زي ده .
_ قلت ليها خطوبة وحدي صحبتنا .
_ طيب وح تفضلي تكذبي ليها كتير .
_ لا لا ح اقول ليها الحقيقة في اقرب وقت أن شاء الله .
_اي لازم .
تلفون مِنن برن؛ بسرعة مِنن بتاخدو وبترد...
جيمي: اها جاهزة ؟
_ايوا جاهزة
_ طيب أنا منتظرك برا ما تتاخري .
_ تمام .
اول ما مِنن فصلت الخط ونزلت التلفون شهد بتجي عليها وهي بتقول ليها: لي قلتي انك جاهزة مِنن عليك الله ما تطلعي كده .
مِنن بتشيل شنطة صغيرة باللون البيجي وبتدخل تلفونها متجاهلة كلام شهد.
شهد بتنفعل: مِنن ما تتجاوزي كلامي ياااخ .
_ما عايزة اغير يا شهد ده لبسي كده و دي ملامحي الحقيقية ما عايزة اغير اي حاجة فيني وجيمي لازم يتقبل شكلي ده وبس يعني
_طيري خلاص اصلك ما بتسمعي الكلام.
مِنن بتبوس شهد في خدها وبعدها بتطلع ، أما جيمي فكان لابس قميص نص كُم باللون الاسود وبنطلون بيجي ومتعطر ؛ قاعد جوا العربية وكل شوية يعاين للمدخل بتوتر ؛ اخد نفس عميق وهو بقول لنفسو: هدي نفسك يا جيمي انت بس ح تعترف لنفس الشخصيه الكل يوم بتلاقيها بكلمة وحدي بس مافي داعي تتوتر ده كلو .

#من_الصفر ✨
#حلقة _٢٦_
⁦🖋️⁩: امتنان الهادي ...
_ايوا اكيد بس انا عندي شرط .
جيمي بسكت شوية : شرطك شنو يا مِنن؟ .
_ تسامح امك وتجي معاك بنفسها بيتنا.
بفك يدينها وملامح وشو بتتغير : مستحيل ما بقدر اعمل كده .
_لي ما بتقدر هسي مش قلت ح تعمل اي شي عشاني .
_ ايوا قلت بس انتي كده بتعصري علي شديد .
_جيمي دي امك عارف يعني شنو ام يعني لازم تاخد رضاها لانو رضاها من رضا ربنا عليك .
_ ما عارف اعمل كده كيف .
_ بابا فضل ليهو شهر يجي أن شاء الله واظن ده وقت مناسب عشان تفكر فيهو .
_ بمناسبة شهر دي حتى التخريج فضل ليهو شهر .
_ وطبعا انت ما جاهز ولا من أي ناحية .
_ربنا يسهل ربنا يسهل .
_ أن شاء الله .
جيمي بحرك يدو في شعرو وعلى وشو ابتسامة عريضة: كدي هسي ماف اي حضن كده ولا كده باللحظاات الحلوة دي .
بتضربو في كتفو: اتلمى عشان ما اطلع الجزمة دي .
_ قااسية يا ست البنات .
_ ارح وصلني .
_ ما بدري ياااخ .
_ لا لا ما بدري ارح ما عايزة اتأخر .
_ ماشي يا ستي .
بركبوا العربية و بتحرك بيها لحدي ما يركن جنب مدخل المجمع ...
مِنن بتعاين لي شوية بعدها بتقول لي: شكراً على العشوة الجميلة دي .
_ شكراً لأنك في حياتي .
_ و دايما ح اكون فيها .
_ بحبك شديد يا مِنن 🔥.
مِنن بخجل: وانا كمان .
بفتح كفة يدو وبمدها : ختي٠ يدك هنا و اوعديني انك مستحيل تتخلي عني مهما حصل .
مِنن بتبتسم وهي بتخت يدها: مستحيل اخذلك ولا اتخلى عنك مهما حصل.
_ بعد كده ممكن تنزلي وتمشي.
_ طيب يلا تصبح على خير .
_ انتي الخير كلو .
مِنن بتفتح الباب وبتنزل ؛ كان بعاين ليها لحدي ما دخلت المجمع بعدها اتحرك ...
بالنسبة لي جيمي فكان لازم يمسح كل حاجة فاتت ويبدأ من الصفر ؛ انسان جديد يستحق حب مِنن ليهو؛ واول حاجة عملها اتصل لي مصعب واستفسر من موضوع التخريج ؛ ومصعب ما قصر وساعدو كتير لحدي ما قدر يغير القروب لواحد تاني ؛ وبكل جدية واجتهاد كان ساعي ورا البحث من ناحية و القراية للامتحانات من ناحية تانية؛ ده غير انو بدأ يصلي وجاهد نفسو شديد عشان يلتزم وما يفوت اي فرض ؛ ومن ناحية مِنن ف كانت ملاحظة تغير جيمي ومبسوطة شديد بأنها سبب رئيسي في التغير ده وفي نفس الوقت هي واسماء ومحمد كانوا بحسبوا الوقت بالثانية والدقيقة منتظرين رجعت عمر بينهم؛ أما نوال فكانت صيد ثمين لباسل القدر بكل سهولة يستقل بساطة عقلها وافكارها وصغر عمرها وللاسف كل همو كان القروش متجاهل انو بدمر في حياة بت زي الورد ؛ انتهى اخر شهر في ال١٥ سنة وجاء اليوم الحاسم والمنتظر ؛ رجعت عمر السودان بعد ١٥ ظلم ؛ طلع على أساس ح يرجع بعد اسبوع وفجأة قضى ١٥ سنة ؛ اسماء ما نامت ليها يومين من القلق والتوتر ؛ وتقريبا اخر ايام مشت ابطئ من السنين المضت كلها؛ طيارة عمر كانت ح تصل الساعة ٤ بعد العصر؛ اسماء واولادها كانوا في المطار من الساعة ٣ ؛ الاحاسيس كانت ملخبطة ما بين حماس وشوق وتوتر ؛ اسماء بتمشي وتجي ومِنن بتعاين للساعة في رأس كل دقيقه؛ فجأة مِنن بتقوم وهي بتقول : الساعة ٤:٠٠ شوكة يا جماعة .
اسماء بتعاين ناحية البوابة : وينو ابوكم ما شايفة
محمد: روقي يا ماما اكيد الطيارة وصلت وفي أي لحظة ح يجي داخل .
اسماء بتمشي على البوابة: تعال يا محمد نسأل اذا الطيارة وصلت ولا لسة .
مِنن : سوقيني انا يا ماما .
فجأة عمر بجي داخل من البوابة؛ اكيد كل السنين دي اخدت من شكلو كتير؛ الجسم الرياضي الممشوق ضعف ؛ والشعر البني غزاهو الشيب؛ ده غير تغير ملامح وشو الشبابي ؛ بس لسة نفس الابتسامه ونفس المشية؛ اسماء بتتجمد في محلها ؛ ضربات قلبها ارتفعت بشدة؛ عمر في ثواني وقف قدِام وشها؛ الصمت عما المكان والنظرات مسيطرة على الموقف؛ عيون بتلمع بشوق وحنين دام سنين وسنين ؛ اسماء كالعادة دموعها سابقها ونازلة على خدها؛
عمر بمسح دموعها قبل ما يضمها علي بقوة؛ هنا اسماء انهارت وبكت بحرقة وصوت عالي خلى كل الناس تتأثر معاها واولهم عمر الماقدر يمسك دموعو البتنزل بغزارة على كتف اسماء؛ حضن دام اكتر من خمسة دقائق ؛ اسماء بتزح منو وبتمشي على مِنن وهي بتقول لي : شوف يا عمر طفلتنا الصغيرة بقت عروسة .
عمر بجي على مِنن: وفي الحقيقة اجمل بكتير من الصور
مِنن والعبرة خانقها : بابااا 💔
عمر وهو بحضنها : يا عيون وقلب باباا
عمر وهو حاضن مِنن حس كانوا روحو رجعت لي بعد ١٥ سنة ؛ مِنن بالاخص عندها مكانة خاصة عند عمر؛ بس ده ما بيعني انو كان حيموت من شوقو لي اسماء ومحمد ، عمر بزح من مِنن وبقيف قِدام محمد الكان اطول منو ؛محمد ضحك وهو بقول لي : اطول منك يا حاج .

#من_الصفر ✨
#حلقة _٢٨_
⁦🖋️⁩: امتنان الهادي ...
اسماء ومِنن جهزوا الصفرة ؛ ريحة الاكل خلت عمر ومحمد الكانوا قاعدين في الهول يجوا المطبخ مُتابعين ..
عمر : ياسلااام على الريحة الحلوةة .
محمد : تسلم الايادي الناعمة المبدعة دي .
اسماء : يلا غسلوا يدينكم وتعالوا .
عملوا زي ما اسماء طلبت منهم وجوا قعدوا ؛ بدوا يأكلوا وكل واحد يِشكر الحاجة البتذوقها ؛ اسماء لكزت مِنن وبصوت واطي بتقول ليها: اقول ليهو هسي .
مِنن بمستوى صوت اقل من اسماء : لا يا ماما ما قدام محمد .
محمد : شنو هو الما قدامي .
مِنن : ولا شي ولا شي .
اسماء : سر بينا انت مالك .
محمد:بس الليلة الا توروني السر ده .
مِنن : مافي اي سر يا محمد وممنوع الاكل في الكلام .
عمر وأسماء قعدوا يضحكوا ...
محمد : لااا جابت ليها ممنوع الأكل في الكلام شكلو السر ده خطيييير شديد الوترك قدر ده يا مِنن يا اختي بس الليلة ما بتقوموا من هنا الا تقولوا لي .
عمر: انا زاتي عايز اعرفو والله .
اسماء: لا لا يا جماعة سر بتي ما بطلعو والله ( غيرت راي ما عايزة اشتريك يا اسماء 🤣) .
مِنن بتخت يدها على خدها : غلطانة بتك البتديك سرها ما غلطانة انتي والله .
محمد: اها انجزوا يلا سريع .
مِنن : قولي ليهو يا ماما قولي ليهو .
اسماء بتلصح قعدتها : احم احم بتك يا عمر و اختك يا محمد عايزة تعرس .
محمد وعمر مع بعض : مِنن تعرس ؟ .
مِنن بتنزل رأسها وتخت يدها في جبهتها من الخجل..
اسماء : اي تعرس مالكم صغيرة يعني .
عمر : لا ما كده بس ده منو سعيد الحظ ده.
اسماء: ح تتعرف عليهو بكره لما يجي مع اهلو .
محمد : نععععم وبكره كمان لا لا يا جماعة مِنن ما تعرس قبلي .
عمر : بالجد ح يجوا بكره؟ .
اسماء: اي ان شاء الله .
عمر: كده احنا ما استعجلنا ؟ .
اسماء: جاين تعارف ساي يا عمر وتعرف اصلهم و فصلهم وكده بس .
محمد: مِنن هييي ارفعي راسك ده ما تتخجلي وقولي لينا بتعرفي من وين ومن بتين ؟
عمر : ح نعرف كل حاجة من الولد بكره مافي داعي تخجل اختك .
محمد بطلع تلفونو وبصور مِنن : طول حياتي وانا احاول اكسر نظراتك الباردة القاتلة واخليك تخجلي زي البنات تجي الليلة تخجلي عشان عريس يا بايرة .
مِنن بتقوم : انا شبعت يا جماعة ماشة انوم .
محمد : كمان خلت الاكل لا لا يا جماعة دي ما اختي .
اسماء: ما بدري يا بت تعالي تمي اكلك .
مِنن بسرعة بتمشي غرفتها وبتقفل عليها الباب
عمر : ينفع كده يا اسماء انتي و ولدك احرجتوا لي بتي .
اسماء: اتحمست وما قدرت اسكت على الكلام مع انها قالت لي اكلمك انت بس.
محمد: لي انا ما بكلموني ما تابع للبيت ده ولا شنو.
عمر قام : عشان انت متنمر ما بتخلي فرصة الا وتكرها حياتها فيها .
اسماء: اجييي وانت برضو قايم ماشي وين .
عمر بشيل من الاكل في صحن : ماشي اكل مع بتي وانتي و ولدك أكلوا سوا .
اسماء بتلوي خشمها : امشي امشي .
عمر بقيف قِدام باب غرفة مِنن وضرب على الباب وهو بقول : مِنن ..مِنن ؟.
مِنن :اهلين بابا اتفضل .
عمر بفتح الباب وبدخل : شايفك ما تميتي اكلك .
_ لا اكلت والله .
بقعد جنبها في السرير: كذابة انا بعرف كمية الأكل البتاكليها وبعرف الزمن البتقومي فيهو .
_ مع انك جيت متاخر بس اكتر إنسان حافظني .
_ لو ما حفظتك ح احفظ منو تاني .
_ ربنا لا يحرمنا منك ⁦❤️⁩.
_ انا ما عايزك تخجلي مني يا مِنن واعتبريني صاحبك وتعالي احكي لي كل حاجة وانا ح اعتبرك صاحبتي وانا اكتر انسان في الدنيا دي عايز مصلحتك وعايز ليك الخير.
_حاضر يا بابا.
_ اها قولي لي بتحبي ؟؟
مِنن بخجل: اي .
_ وهو ؟
_ هو برضو بحبني .
_ بس ده المهم والباقي كلو بجي وأكيد امك حكت ليك قصتنا ميات المرات و انو لمن جيت أتقدم ليها ما كان عندي شي غير حبي ليها وكيف الحب ده خلاني اكون ناجح واغير حياتي ١٨٠ درجة .
_ يعني مبدأياً انت موافق؟ .
_ لا لسة بس بوعدك اول ما اتاكد انو بحبك ح اوافق بغض النظر عن اي شي تاني لانو لو بحبك ح يقدم ليك عيونو ويفديك بنفسو والأهم حتكوني مبسوطة معاهو .
_ هو بالجد بحبني وبخاف فيني ربنا شديد وغير من نفسو عشاني .
_ خليني بكره اعاين في عيونو ولو شفت كلامك ده طوالي ح اديك ليهو .
_ وعد يا بابا؟
_ وعد يا عيون بابا؟ ...يلا تمي اكلك .
_ ح اكل اذا اكلت معي.
_ اصلا ح أكل معاك .
_ طيب ارح .
بيبدا ياكل : بسم الله .
___________________________________
حوالي الساعة ١٠:٠٠ م ؛ شايلة في يدها كباية حليب ؛ فتحت باب الغرفة ودخلت ؛ نوال كانت راقدة و ماسكة تلفونها ؛ بتقعد جنبها وهي بتقول ..
_ يلا يا روح ماما قومي واشربي كباية الحليب دي .

#من_الصفر✨
#حلقة_٢٩_
⁦🖋️⁩: امتنان الهادي ...
جيمي بضحك بتوتر : شكلو في سابق معرفة 😅 ..
خولة :ههه عجيب امرك يا الدنيا .
اسماء بتجي عليها: كيف بتجيك عين وتدخلي بيتي انتي لسة ما خليتي وقاحتك دي .
ملامح الصدمة بتترسم على وشوش محمد وجيمي ونوال .
خولة بتعاين ليها في عيونها : شكلو الدرس الاديتك لي ما قص لسانك الطويل ده .
محمد: لو سمحتي حسني كلامك .
خولة بتتلفت تعاين لمحمد: ممكن نعيد ليك الدرس لو ما فهمتي .
اسماء بتمسك خولة من فكها وبتلفت وشها وتخلي مقاصد ليها: كل شي ولا اولادي اقسم بالله اشرب من دمك يا خولة .
خولة بتنفض يد اسماء: ما تتعدي حدودك يا اسماء انتي عارفة كويس ممكن اعمل شنو .
جيمي: في شنو يا جماعة وده شنو الكلام البتقولوا فيهو ده .
عمر وعيونو ح تولع شرار : من الاحسن انك تطلعي برا قبل ما أفقد اعصابي يا خولة .
جيمي : كدي استهدي بالله يا عم عمر وخلينا نتافهم .
عمر بصوت عالي زي الرعد : ما عندي بنات للعرس اتفضلوا اطلعوا برا .
مِنن و شهد بطلعوا من الغرفة على صوت عمر العالي..
خولة: ولا انا بتشرف اعرس ولدي لبتكم .
محمد : ممكن افهم البينكم شنو يا جماعة ولي بتعملوا كده .
اسماء : عايز تعرف البينا شنو ؟؟ الواقفة قدامك دي يا محمد كانت السبب ورا بُعد ابوك طول الفترة الفاتت دي
جيمي: كيف يعني كانت السبب ؟؟.
اسماء: عمر اتسجن ١٥ ظلم بسبب قضية اتدبرت زور من المراة دي .
جيمي بعاين لخولة : الكلام ده صاح يا ماما ؟ .
خولة: لا ما صاح تفتكر لو كان مظلوم كان سكتوا المدة دي كلها ولا لو كنت انا السبب كانوا خلوني من غير ما ينتقموا .
عمر بجي عليها: لو عايز انتقم منك ما بغلبني وكان ممكن وانا جوا السجن اخليك تكرهي حياتك بس انا مخليك لربنا ياخد حقي في الدنيا وفي الآخرة .
جيمي بقيف قدام عمر : الكلام القالتو خالتو اسماء صاح ؟؟
خولة :خلينا نمشي يا جيمي وانا اعرس ليك ملكة بت ملوك .
عمر: واحنا ح نستفيد شنو لو كذبنااا في كلام زي
ده؟ .
جيمي بتلفت لخولة: انا مستحيل اعرس غير مِنن .
عمر بنظرات باردة وقاتلة : انت مستحيل تعرس مِنن .
جيمي : ارجوك ما تحرمني منها انا مستعد اعمل اي شي عشان مِنن .
اسماء: سوقي ولدك و اطلعوا برا بيتي يا خولة .
خولة: يلا يا جيمي كفاية إهانة لحدي هنا .
جيمي بلمح مِنن الكانت واقفة بعيد ومصدومة في البحصل ؛ مشى عليها ومسك يدينها وهو بقول ليها : مِنن انتي عارفة أنو ما عندي ذنب في الكلام ده تعالي قولي ليهم عليك الله قولي ليهم انو العملتو امي انا ما عندي فيهو يد .. ( الوِليد قطع قلبي💔) .
محمد بجي بعصبية وبجر جيمي من كتفو: ايااااك تقرب منهااا .
عمر :اذا ما طلعتوا في اللحظة دي ح استعمل معاكم أسلوب تاني .
جيمي لثواني بعاين لمِنن الكانت ساكتة وملامح وشها ثابتة ماف اي ريأكشن ؛ بعدها بخطوات سريعة بطلع من البيت ؛ خولة بسرعة بتمشي ورا ونوال بتلحقهم ؛ خولة كانت بتسرع عشان تلحق جيمي بس هو كان أسرع ؛طلع برا و ركب العربية واتحرك بسرعة ؛ خولة بتنده علي بصوت عالي: جيمي ...يا جيمي...
نوال بتنفصم فيها : عايزة منو شنو تاني ؟ ممكن اعرف عايزة منو شنو ؟ ما كافية لحدي هنا ما كفاية ؟.
خولة بتضربها كف: انتي اسكتي ما عايزة اسمع صوتك.
_ بتضربيني يا ماما ؟؟ .
خولة بتضمها عليها : آسفة ما قصدي والله بس عشان انفعلت شديد .
نوال بتزح منها : لا انتي إنسانة شريرة شديد وانا ما عايزة ام زيك في حياتي .
خولة بتجي عليها: نونو انا ...
نوال بصوت عالي: زحييي مني ما تقربي علي ..
بتتراجع منها كم خطوة قبل ما تجري بسرعة متجهة خارج المجمع ؛ خولة بتتعصب وبتعض على أسنانها : بعد ما خلاص قدرت اكسبهم تاني زحوا مني بسسببكم والله يا اسماء وعمر لاوريكم الويل.
____________________________________
في غرفة مِنن ؛ كانت قاعدة وساكتة وسرحانة؛ شهد قاعدة جنبها وبتحاول تتكلم معاها ...
شهد: مِنن افتحي خشمك ده واتكلمي معاي ياااخ انا لي ساعة برقي..
مِنن دموعها بتجري في خدها وبصوت مخنوق : اي حظ العندي ده يا شهد ؟ معقولة اكتر انسان حبيتو تطلع امو اكتر انسانة اذتنا في العالم ده
_ بس جيمي ما عندو ذنب .
_ ذنبو انو خولة امو .. ذنبو دم خولة يجري في عروقو .
_ده شنو يا مِنن ؟؟ من بتين وانتي بتفكري كده ؟
_ خليني يا شهد خليني عليك الله .
_ ماهو انتي ما تكذبي علي نفسك بالكلام ده ؛انتي بتحبي جيمي ودي حقيقةة ما ح تتغير .
_ ما سمعتي بابا وهو بقول ليهو مستحيل تعرس مِنن ؟ عايزاني اقول لي بابا شنو بعد كلامو ده ولا باي عين ح اطلب منو يوافق .
شهد بتضم مِنن بحنية: ربنا يكون في عونك يا مِنن وفي عون قلبك يا رب .

*#لو_تحكي_الجثة.💔*
*#الجزء_ الثانى*
*#الخرطوم_بليل 《24》*🔞
*#☆الاخــــــــــــــــــــــــــــــــيرة☆*
*#بقلم_حنين_محمد*
*ــہہہـہہہـ٨ــ٨ـہہہـ٨ــ٨ـــہہہـــــــــــ❥ :00:00*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
*#حلقة أمس نزلت بدون مراجعه بعتزر على الأخطاء .*
*حيتم.مراجعت.الرواية كا كل في مابعد بهدف تعديل الأخطاء .*
*#آدم*
زي الثور الهايج كان.بيزرع في المكان.مشي وجيه ،،مرة الخمس دقايق الحدده لي بدر وامتدت لي أكثر.من.ربع ساعة،ومافيهم حد ظهر ،،،معقولة قدرو يهربو من بين يدهم ?!..
لا ياخ رجالو أحسن.من كدا .

سمع.صوت ،،مشي ناحية الباب ،كان ناصر قايد سميرة من يدها وموجه سكين على و رقبته ...
آدم_ وين بدر..وسعيد ?!..
ناصر_ بدر ده سلم امانتو ..وسعيد كمان ..
اتصدم آدم وهو بتلقي خبر وفاة افضل اولادو المربيهم على يدو ،،فكر بس كيف?!..
معقولة يكون ميوك بيملك كل القوة و الجرأة عشان يقتل ...فكر ماهو.كمان كان ز يو في يوم من الإيام ،كان ضعيف جدآ ،بس قوي نفسو ،وقتل كل الوقف في طريقو...

قال ادم في صوت ثابت وهو بمرر عين على سميرة.
:الحصل شنو بالضبط ..
رد ناصر وقال لي :
كنا محاصرنهم جنب الباب الخلفي ، البنات فتحو الباب وجرو ، اعترض طريقنا ميوك ماقدرنا نلحقهم ، اشتبكنا.مع.بعض وغدر بي لما رماني على الأرض. رجع اشتبك كمان مع سعيد. بس قرر سعيد يسيبو يهرب . فتح ليهو المجال وهو بيعطل بدر ، ده كآن سبب كافي لأن بدر يغضب منو شديد ومع انفعالو ده قام سله سكينة و ضربو ب في.كذا.حتا وشكله في ضربه جاتو في مقتل لأن.مات وقتي،، بعده طاردنهم إحدى بره.ولما لقيناهم ووقع ميوك في يدنا ،بدر طعنو ميوك بدون.تردد وشكل جات.في مقتل ،بس ميوك.قبل يقع وينخ يسيح.في دمو سدد هو كمان سكينو في قلب بدر ..
وقع ومات هو كمان.

عض آدم شفايفو.بغيض ،وقال ليه : قلت نسمة.معاه ،،وينه.هسه?!..
رد ناصر وقال لي : هربت وساعدها حاج عصام...
في صدمة ردد ادم في رييه
" حاج.عصام ،،بس كيف?!..
همس وكان.كان.بيكلم.نفسو
"أنا كدا يداب فهمت الحاصل.
فك.لي الكلبه.دي ،وامشي بسرعه اضرب لي رجالنا ،قول ليهم.،يجو.بسرعة. عايز المكان.ده يفضي سريع وما يفضل في أي أثر لأن في بشر كان.فيهو ...

أخد ادم سميرة.من يدها في طريقو لي شقتو ،وفضل ناصر يجري.في اتصالت .

أول ما.فتح.آدم باب.الشقة رماها.على الأرض ،صرخت وهي.بتمسك.يدها.
قال ليها : اتوجعتي?!...إنتى لسا.ما ضقتني وجع ،،وأول الغيث قطرة..
قال كلامو ،ده وطلع وقفل الباب عليه ب المفتاح ...
مش على غرفة الطاف ،الكانت.ما داريه ولا حاسه ب حاجه ،،
لحسن الحظ لقاه صاحية بتشرب في سجائر برنجي. قالت ليه: آدم?!..مالك وشك متغير وعرقان كدا ?!..ّ
قال ليها : ما انتى.قاعده في حتتك.ده وما جايبه خبر ب البيحصل بره ..
قالت لي في حيره: الحاصل شنو ،،قول لي ما توغوش بي ّّ
قال.ليها.: حا احكي ليك اي حاجه ،بس ونحن في طريقنا لي شقتي ..
قالت ليهو : لي في شنو هناك?!..
قالت.لي : عايزك تفتحي جوجو ...
"اسم كتاب سحر"
قالت لي : لي في شنو.جديد ?!..
قال ليها: عايزو لي سميرة ..
ختت يدها على قلبه وقالت.لي : جنيت إنت ولا شنو ، إنت عندك عهد اول معاهم.،واذا.كانت حامل ،ورجعت تفتح الكتاب في الفترة دي بزات ،حاتموت هي و الفي بطنها ،و حا تخسر العهد ،و الوعد ب القوة والغنى والسلطة الوعدك بي جوجو ...
قال ليها: ما مهم ،أنا بس عايز روحه تتعذب ،لان الموت راحه ،هي ما بتستحقه.
بعدين بخصص العهد ،حا أرجع افتش لي بنت من.أول وجديد ،تكون فيه كل المواصفات

قامت الطاف علي حيله انحنت وهي بتدنقر تحت السرير ،جرت ليها صندوق خشبي متوسط التربيع فتحتو. و طلعت منو عصا من تحت سريرة منقوشة ب حروف غريبة و منحوت.في نصه وش معين ب الألوان الابيض و البني ، طلعت.كمان ريشه حمراء ،وفرشة.ب الاحمر ..
وطلعت قدامو.،قالت لي : عايزني أفتح الكتاب وعايز جوجو و لسا ماقلت.لي الحصل شنو بالضبط?!...
قال ليها : طيب حا احكي.ليك.كل حاجه
____

*#نرمين*

بين شجرتين كنت واقفه ،بتحين الفرصه المناسبة عشان.أدخل.،ضوء سبق صوت عربات الدفع الرباعي ،تقريبآ ست اصطفو وراء بعض ،نزلو منهم رجال طول في عرض ،وكمان مسلحين...