روايات سحر سمير:
#مندرين
بقلم فاطمة قسم الله و سحر سمير
-٢-

على سيرة عمتو زينب !
عمتو زينب دي حنينه و بحبها حب ما عادي ! كل عماتي و اهلي بحبهم بس عمتو زينب في قلب براهو ! و ربنا ما اداها اولاد غير مجاهد و رزة  ..

اما انا : ما بعرف احكي عن نفسي كتير ، و اهم جوانب في حياتي انتو عرفتوها خلاص و الباقي أكيد حتعرفوه قدام أن شاءالله ، ااايوا صح ما وريتكم أخواني ، انا و بعدين سراج  و سلمى ما توأم بس اساميهم جات كدا الا انا جليت من حرف السين حقهم دا !
و على قدر اسمي البحبو على قدر اني شايله كل تفصيله في اسمي ! مش بيقولو كل زول ليه نصيب من اسمو !؟ انا كذالك ، ودودة و بحب ال ! قاطعتني عمتو و هي بتقول لي :
__ غايتو خليني اوصلك البيت و حاولي اقنعي لي امك انا م حقدر اتغدا معاكم ! عندي كم مشوار
** طيب احنا استفدنا شنو من جيتنا دي يا عمتو مش على اساس المهندس حيجي الليله و اقعد اتفاهم معاه و قلتي لي افضي نفسي اليوم دا لا نه احتمال كبير ننضغط !،
__قال بكرة يا بتي ! و بعدين انا قايله روحي وريتك والله
** ما جبتي لي سيرة ، شايفاني مستعجله و مشلهته
__ معليش بكرة ما بعيد ، و م تنسي موضوع امك
** يا الله يا عمتو ! كل مرة كدا والله امي بتزعل
__ تزعل شنو انتي طيرة ! دا بيتي كمان عملتوني غريبه عشان اتلوم ؟ بطلوا حركاتكم دي انتي و أمك !
** خلاص تجي تنومي عندنا و ياريت تجي تقعدي معانا كلوكلو زاتو يا عمتو !
__ و الطاشي داك اخليهو لمنو ؟
** هو م بقعد يا عمتو اليوم كله شغال يا مع اصحابو في الكورة !
__ م مشكلة ححاول ! قومي حركي ..
** انا مفروض اتصل على قصي ، لو مستعجله امشي انتي ، انا بقفل المحل و بيوصلني هو !
__ اكيد يعني ؟ طيب خليني اتصل ليهو اكلمو !
** يا عمتو بسم الله تكلميهو كيف هههه دا خطيبي م تقلقي بخاف علي اكتر من نفسه !
__ طيب اسمعي كلامي ! انا عارفه انك ناويه تمهدي ليهو موضوع السفر ! رغم ان ما واثقه من رأي ابوكي لكن خلي نفسك بارد في الكلام لو في اي حاجة انا مستعده اسافر معاك ! بس ما تعندي ، انا عارفاك كويس ! قصي حار و انتي حارة لمن تصري على حاجة ، و لو رفض اتذكري ان دا من حقو ! و لو وافق مفروض تكوني مقلقة لأن مافي راجل قلبو حار بخلي مرتو و لا خطيبتو تسافر و براها ، ختي مليون خط تحت براها دي ! فهمتي كلامي صح ؟
** فهمته يا عمتو ، م تشيلي هم اتطمني !
__ كيف ما اشيل هم ! المهم انا مستعدة اسافر معاك على كلاً !
** لاقياك وين انا يا عمتو يا غاليه ( بستها ) !

#جانب_تاني
" الشارع "

( جاهو صوت مبحوح بقول ليهو ) :
__ اححمد اححمد !!
** ( أتلفت على الصوت ) : انتي ؟؟ خير دايرة شنو ؟؟
__ انت ليه بتكلمني بالطريقه دي ؟؟ ليه القسوة دي يا احمد ؟؟
** كم مرة قلت ليك انا ما داير اشوف وشك ؟ انتي ليه ما بتفهمي ؟؟
__انا بفهم ! لكن انت الما داير تفهمني !
** يا بت الناس انتي لو بتفهمي ما بشوف وشك دا قدامي !
اسمعي ! انا ما داير مشاكل ..
__ مشاكل ! والقال انا داير اعمل ليك مشاكل منو ؟ انا دايرة فرصة بس ! فرصة وحدة اديني ليها و افتح لي قلبك و اسمعني !
** و انا ما داير اسمعك لان اي كلام حيطلع منك ما حيوصلني لاني اصلاً ما متقبلك عشان اتقبل كلامك ! و خليك بعيد مني و من مرتي و من بيتي لان الفي راسك دا والبتفكري فيهو دا قبل يحرقني بحرقك بيهو انتي اول ! مفهوم … " مشى ركب الموتر حقو و دور "
— " بينها و بين نفسها " ! معقول !!

" في نفس الجانب في بيت احمد "

#قالت : 

كلام احمد خلاني اراجع نفسي و اعاين لي حياتي الروتينيه الممله و الباهته و اللي اصلاً م بيتقال عليها حياة ! حياتي كلها عبارة عن احمد ، الوش الوحيد البشوفو تقريباً ! سألت نفسي سؤال ! انا اخر مرة طلعت متين مشوار و لا من البيت اصلاً ؟
ما متذكرة ! اثناء ما اخدني التفكير سمعت صوت الموتر حق احمد ! جريت عاينت بالشباك لقيتو فاات ! استغربت انه ياداب مشى رغم انه نزل ليهو ربع ساعه عديل و يمكن اكتر !
م ركزت كتير و كالعادة قمت على الشقه قلبتها نفيض و مسح و كنيس و غسيل و دي حاجة بعملها اسبوعياً انا برفع الستاير و الملايات و السجاد و بغيرهم بعد اغسلهم ! دي الحاجة الوحيده المجهدة بس بتريحني ، بديني احساس امان اكتر و اكبر و ان دي مساحتي و حياتي و حريتي و بحب شديد كلمة #بيتي ! بتحسسني بالدفا و الامان الشدييييييد !!
بعد خلصته كالعاده ما كان عندي حاجة اسويها ! و راجعت تاني كلام احمد و قررت اني احاول اتشجع و اطلع على جيراني  ..
كان استحميت و صليت و طلعت لي توب " سلطة ارضيتو صفرا صفار حنين كدا " مبخر من الدولاب و شبشبي البيج اب سيرين ، و شلت مفاتيحي و تلفوني و طلعت و قفلت الباب !!

مزاهر:شغل شنو؟ وموناليزا شنو؟
رتاج:عايزة تعملي شنو يعني تبعي ريح؟
-اي ابيع ريح مالو بيع الريح عيب ولا حرام وبعدين ده شغل.
محمد:حوجتك لي شنو لمن عايزة تشتغلي؟ ياتو يوم جعتي في البيت ده وما لقيتي التاكلي؟ النقصك شنو وما جبتو ليك؟ بتلبسي احسن لبس وماسكه احسن تلفون ورصيدك عندك ليو مصروف خاص في شنو تاني يخليك تطلعي تشتغلي عند الناس وابوك عايش وبتنفس؟ عايزاهم يقولو عني شنو مجوع بناتو لمن طلعوا يشبعو برا؟ هاا قولي لي قصتك شنو ولا ياتو يوم حصل قلتي عايزة حاجه وانا ابيت ليك؟
-حصل يا بابا حصل تذكر يوم داك الصباح لمن قلت عايزة قروش اشتري تشيرت قلت ما عندك وبعدها بأقل من عشرة دقايق اديت رتاج وقتها قروشك دي جات من وين؟ ااا ولا رتاج عندها ليك قروش وانا ما عندي، عاين لي وما اتكلم قلت ليو للسبب ده انا عايزة اشتغل عشان متى ما حبيت اشتري حاجه اشتريها امي قالت لي من غير كلام كتير ماف اي شغل بتشتغلي والكلام انتهى قلت ليها معليش لكن انا وقعت عقد واذا بكرة ما مشيت يا ادفع غرامه ولا بخش السجن ابوي قال لي وانت بتوقعي عقد مالك؟ قلت ليو عشان كنت عارفه انكم ما بتقبلو وكده اذا ما اشتغلت ح تدفع القروش القلت ما عندك قال لي القروش كم هي قلت ليو ما عارفه لكن بالدولار ابوي نطط عيونو وسكت امي قالت لي دولار ولا يورو ما بتشتغلي والكلام انتهى عاينت للساعه وقلت ليها نو نو عان الوقت اتأخر كيف لازم امشي انوم عشان بكرة من الصباح لازم اكون في المحل قالت بي يعني انت بتكسري في كلمتي؟ قلت ليها لا العفو لكن انا اخدت قرار وعايزاكم تحترمو بس زي ما انتو بتتخذو قرارات وتفرضوها علي صج ادتني كف في وشي وقالت لي اي نفرض قراراتنا لانو نحن اهلك وعايزين مصلحتك قلت ليها شكرن على الدرس وبرضو بكرة ماشه، خليتم بتكلمو ودخلت غرفتي لقيت وهج ضاربه لي
-سراج.
وهج:سراج في عينك اها الحصل شنو من قبيل مقلقه عليك اتكلمتي معاهم.
-دي دخلتي منهم.
+وردت الفعل كيف؟
-اتوقعت اسوء من كده لكن انتهت بكف من ماما بس.
+رغوده عليك الله اسمعي كلامم وماف داعي للشغل ده.
-حتى انت ما عايزة تقيفي معاي؟
+والله انا عايزة مصلحتك ما اكتر.
-ح تكونو ادرى مني بي مصلحتي يعني ولا انا عويرة ما بعرف اتصرف لمن كلكم عايزين تتصرفو بدلي.
+ما قصدي كده يارغد لكن...
-انا نعسانه ماشه انوم تصبحي على خير.
-انتظري اق...
قفلت الخط والتلفون ونمت.

*"صباحاً"*

بكل النشاط والحيوية الفي الدنيا قمت وانا برقص من الحماس طلعت لبسي صليت واتسرحت وكل شويتين بعاين لنفسي في المراية ودعيت كتير ربنا يوفقني ويسهلا علي، لما الوطى صبحت شويه وقلت اطلع بدري عشان ما اتأخر لقيت ابوي وامي برا وهو لسه ما جهز قلت ليو ما ماشي الشغل قال لي طالع متأخر قلت ليو طيب اديني حق المواصلات امي قالت لي مش مشيتي تشتغلي خليم هم اليدوك ليك عاينت لي ابوي بنظرات لا يا ابوي ما تعمل كده لكن ولا اشتغل بي قلت ليهم طيب الله كريم وبرضو بصل رجعت غرفتي كان عندي حصالة مسمياها #بيتي_الحلو لامه فيها القروش العايزة اشتري بيها حاجات لي بيتي وقلت ما مشكلة بشيل واول ما اصرف ارجعهم وعلى كده طلعت، وصلت بدري لقيت خالتو البتنضف جات صبحت عليها وكنت لافه بتفرج لغايه ما جات البت التانيه الشغله معاي،
مي:انت رغد صااح؟
-اي رغد.
مي:انا مي شغاله معاك هنا لكن طولت لي اكتر من سنتين.
-معناها ح استفيد منك.
+اريتو، عرفتني على كل قسم واسمو وكل ريحه بلقاها وين وكيف اشتغل على الكمبيوتر عشان اطلع الفاتورة وغايتو كان رغي كتير
-لي ماف زول جاء لحدي هسي؟
+اصلا الفترة الصباحية دي من النادر ما يجي زول لغايه الضهر ولا قريب العصر كده حتى الناس تجي.
-وانتو ما عاملين دعاية ولا شيء للمحل؟
نعمل ليو شنو ما هدا محل كبير واليافطه من برا بتوحي انو حق عطور اكتر من كده شنو؟
-شكلك ما فهمتي علي، ممكن اتكلم مع المدير.
+امشي لو ما احرجك.
وقفت قدام الباب اخدت نفس ودقيت قال لي اتفضلي
-ا.عمر صباح الخير.
عمر:صباح النور يا رغده ومن غير استاذ.
-لا انت مديري ما ينفع اناديك بي اسمك.
=انا كده مرتاح.
-لكن انا ما مرتاحه.
=اوكي على راحتك، عايزة شنو؟
-كنت عايزة اسألك هو نحن لي ما عاملين اعلان للمحل بتاعنا لازم نوري الناس انو موجود عشان يجيو ويشترو مننا.
=المحل بتاعنا؟
قالها بي نبرة كده ما عرفت افسرها قلت ليو قصدي يعني بالمحل بتاعنا اني اشتغلت هنا وبقيت بنتمي ليو و... قاطعني اسمو المحل حقي ما بتاعنا وانت هنا شغاله عندي اعملي القلتو ليك وما تدخلي في حاجه تاني ويلا قومي على شغلك، الشعور الحسيت بيو ما قدرت اوصفو طلعت لقيت مي بتعاين لي وبتضحك شكلها كانت متصنته للباب وسمعتو قال لي شنو دخلت الحمام غسلت وشي وفكرت بعدلي ده اطلع بيتنا واخلي الشغل تاني اتذكرت الكلام القالو لي امبارح ولو جيت الليله وقلت ليهم خليتو تاني مستحيل يخلوني افكر في الشغل مسحت دموعي وقلت انت قدرها يا رغد ما تستسلمي طلعت وقفت في محلي ولا كأنو حصل حاجه، كانت مي بتتفحصني بي نظراتها