م. نفحات: بتتحدي فيني يعني؟؟

قمت فوق ولسه بعاين ليها جوه عيونها قلت: ليه الجوطه والعنف دا كلو اسي؟؟
م. نفحات: اسألي نفسك انتي السؤال دا.. يا مهمله قايله نفسك في فندق!! تاكلي وتشربي وتنومي ووقت يجي وقت النضافه ما بتتضفي مع البنات!!!
قلت ليها بغضب: يعني انتي اسي مضايقه من عدم نضافتي!!.. ما هدي كمان شاهيناز ما نضفت ليه ما سألتيها وشاكلتيها زي ماعملتي معاي!!!

نفحات اتلفتت عاينت لي شاهيناز ورجعت عاينت لي وقالت..
م. نفحات: انتي يا بت بتقاارني نفسك بي شاهيناز!!!
قلت ليها بصوت عالي وغل: ولا يشرفني اصلا اقارن نفسي بواحده تافهه زي دي  بس انتو البتقارنو بينا وبتعملو ليها البتقولو وكأنو هي المشرفه وانتو السجناء وانتو زي الاغبياء بتمشو وراء كلام الشيطانه دي و..

قبل ما اكمل كلامي حسيت بي كف زي النار في وشي.. رفعت راسي وكانت دي نفحات قالت لي بصوت عالي وغضب..

م. نفحات: انتي واحده حيوانه وقليلة ادب كمان .. كيف تتكلمي معاي بالاسلوب والطريقه دي!؟.. انتي قايله نفسك شنو انتي عباره عن واحده سجينه وانا المشرفه هنا وبقدر في ثانيه بس اغير ليك ملامح وشك دي يا وسخه لانك رفعتي صوتك علي.. بس ما مشكله انا بعرف كيف اربيك

وقبل ما اقول اي شي واستوعب كلامها جرتني وراها بقوه وقفلت الزنزانه ونزلت بي تحت وودتني مكان تحت الارض كلو ضلام زي المره  الفاتت هنا اتأكدت انها بجد مودياني "السجن الانفرادي".. اول ما وصلنا تحت فتحت نور البطاريه رمتني جوا وقفلت الباب وشالت معاها البطاريه ومشت خلتني في الضلام براي كنت لسه خاته يدي في خدي من الكف الادتني ليهو كان كف اقوى من المره الفاتت.. ضميت رجولي علي وانا بتزكر في كل شي بوجع.. اسلوب شاهيناز وحقارتها وسريري الشالتو بالغصب والكف الضربتتي ليهو امس وتعامل المشرفات معاي لحد ما وصلت لي موقف هدومي الاتحرقو قدام عيوني امس وشنطتي التانيه الاترمت في الزباله💔.. واسي انا في الضلام دا.. بس نفسي افهم بي ياتو ذنب!! بي ياتو ذنب بس انا بتعاقب كدا!!.. انا بموت الف موته من جواي كل يوم وماف زول حاسي فيني.. كنت عامله فيها قويه وما بكيت قدام زول لا قدام شاهيناز ولا المشرفات ولا ياسمين كمان.. بس انا ما قويه انا ضعيفه شديييد انا ما متماسكه ابدا انا منهار ومكسوره من جوا.. من غير افكر بقيت ابكي لمن بشهق وبتنهد ما حاولت اوقف دموعي دي وبقيت ابكي بكل راحتي لاني عارفه اني هنا بعيده من انظار كل الناس.. شديت من ضمي لي نفسي وبقيت عاضه على يدي وببكي ببكي بحرقه وبطلع كل شي جوااي في شكل  دموع.. واثناء ما انا في الحاله دي فجأه سمعت صوت ما غريب علي بقول..

" انتي كوبسه!؟ "










*#صلو على النبي..*
*#يتبع..*

مرا اليوم تاني عادي من غير أحداث مهمه غير حماس البنات لزيارات بكره..وجات مشرفه نفحات طلبت سويدا في مكتب مديرة المشرفات ما ركزت مع الموضوع وانا كملت اليوم ونسه مع ياسمين وصفاء كالعاده مرا مرا بترد علينا وطبعا هي صلت بينا تاني العصر والمغرب والعشاء وصوتها بجد راحه نفسيه♡..وقضيت كل الليل بفكر اني كيف حا اصل لشنطتي قبل ما يجي زول تاني ويشيلها!!؟..

______

*#في الصباح..*

صحيت بصوت كركبه وازعاج واصوات كتيره فتحت عيوني وقعدت في السرير وكنت بحاول افهم في شنو..بس طق اتزكرت انو الليله يوم الزيارات..وبقيت اعاين للبنات الكانو متحمسين لليوم الكانت بتصلح في شعرها والكانت بتلبس في جزمتها والكانت بتصلح في طرحتها وهي مبسووطه..♡وقبل ما اقش عيني من النوم شفت ياسمين واقفه قدامي..

ياسمين: صباح الخير..واخيرا صحيتي
قلت ليها بصوت نعسان: والله لسه نعسانه بس انتو ما بتخلو الزول ينوم براحتو
ياسمين: هي تنومي شنو قومي اتسوكي وصلي وبعد البنات يطلعو للزياره نومي واشبعي نوم
ابتسمت ليها وانا بمش على الحمام: طيب طيب ماشه

مشيت اتسوكتا طبعا بنتسوك بي "مسواك" ..خلصت واتوضيت مشيت شلتا عباية ياسمين وفرشتا المصلايه وصليت..بعد خلصت مشيت قعدت في سريري وقبل اقعد زي الناس ياسمين جات ومعاها كبايتين شاي مدت لي واحده وهي مسكت حقتها وقعدت جمبي..

انا شربت من الشاي وابتسمت وقلت ليها: الليله الشاي أجمل من الايام الفاتت
ياسمين ضحكت وقالت لي: اي عشان انا زدتا النعناع الليله
قلت ليها: اهاا يعني الليله بتفرطي بالنعناع عشان جاياك الزياده هههه
ياسمين: اي طبعا

ضحكت عليها وبقيت بشرب في الشاي فجأه هي ساره نادتها من بعيد مشت عليها وانا كملت الشاي ومشيت ختيتو في الطاوله الكانت في نهاية الزنزانه واثناء ما انا راجعه على السرير مريت بالشباك وقفت وكنت عاوزه اطمن الشنطه موجوده ولا لا!...وقفت اعاين ليها وياريت لو ما عاينت...















*#صلو على النبي..*
‏*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

وسام مسحت الدمعه النزلت في وشها وقالت: وانت كيف عرفت اني مظلومه!!
آصف سكت مسافه وقال: احساس..بس احساس
وسام سرحت وقالت ليهو: ما دايما احساسنا بكون صح
آصف: بس كمان ما دايما بكون غلط
وسام ابتسمت بألم وقالت ليهو: شكلك انسان متفائل جدا
آصف اتنهد وقال: التفاؤل يعني عشم..والعشم الزايد نهايتو وجع..انا ما متفائل بس ممكن تقولي انا واحد الدنيا صابتو وادبتو من كل الجهات
وسام: شكلها قصتك حاتكون غامضه
آصف ضحك وقال: ما اغمض من قصتك..
وسام: منو قال قصتي غامضه.. بالعكس بسيطه بس  كمان معقده شدييييد
آصف سكت مسافه وقال:
انا جاهز اسمعها
وسام ابتسمت بي سخريه وقالت:  تفتكر عندنا الوقت البخلينا نحكي قصص؟
آصف: اممم سمعت المشرفه الجابتك هنا وهي بتقول ليك "حاتقعدي هنا يومين"
وسام بتزكير: اي صح.. طيب وانت!
آصف: انا مالي؟
وسام : حاتقعد فتره طويله!!
آصف: ما تفكري في دا انتي بس احكي..
وسام:  امم طيب.. حا احكي صح انا مابعرفك بس حا احكي عشان ارتاح وعشان الجبال الفي قلبي تنزاح
آصف: من الامان انك تحكي لي غريب مضمون ولا قريب مغدور
وسام: فعلا كلامك صح..

آصف غمض عيونو سند راسو في الحيطه وبقى مركز بكل حواسو مع وسام وقال..: يلا احكي

وسام سرحت شويه وهي بتتزكر كل شي حصل دموعها نزلو مسحتهم ورجعت راسها لي ورا اخدت نفس طويل وقالت:

وسام: قبل شهور بالضبط لمن كل حياتي كانت احلام ورديه.. بس فجأه كل شي بقى عباره عن كابوس اسود..








*"بدأت رحلة الفلاش باك"*

من هي وسام؟
وما هي القصه التي جاءت بها هنا؟
ومن كان السبب في وجودها؟
واين عائلتها؟ ومن هم؟

كل هذا وأكثر في البارتات القادمه..
*#اتفاعلو🔥*







*#صلو على النبي..*
*#يتبع..*

عاد دا التيك توووك وجررري على غرفة ملاذ لقيناها ماسكه تلفونها  "طبعا امي ادتو ليها الصباح" طوالي نطينا جمبها وبقينا نتشاكل في التيك تووك واي واحده عندها فيديوو عاوزه تشووفو!! "دعاء كمان عندها تلفون بس ما جابتو معاها.." وطبعا كالعاده خشينا التيك توك دا خمس دقاايق والدقايق بقت سااعات ونحن ما حاسين بي شيي نهاااي وانا لسه في حالتي وهدومي الوسخااانه ههههه... بس اثناء ما نحن سرحانين ليك كدا الساعه باب غرفة ملاذ دا عمل طاااااخ😀.. رفعنا راسنا وكانت دي امي واقفه وانفاسها طالعه زي التنين من الغضب وطبعا عشان التلفون حق ملاذ امي طوالي قالت بغضب..

سوزان: ملاذذذذذذذذ

ملاذ طوالي طلعت في السرير فوق شالت تلفونها وجررت البت دي عندها موهبه اسمها الجري😂.. وامي دي بقت تحمرر لينا انا ودعاء.. دعاء بلعت ريقها خووفه ساي وقالت لي امي..

دعاء: اا  انا مم ماشه بيتنا

والله ما قدرت امسك الضحكه في منظرها وبقيييت اضحك... امي هرشتني ليك هرشه خلتني اقيف زي المسطره وقالت بصووت عالي..

سوزان: عندنا ضيووف في البيت مهميين وانتو قااعدين تطبظووو لي فييي التلفونااااات!!!!

طبعا انا خليت كلامها دا كلو وقلت ليها بكل غباء

وسام: الضيووف جو؟!!!

امي سفهتني ليك وادتني حدررره تمام واتلفتت على دعاء قالت ليها: طيري انتي امشي سوي الشاي والقهوه للضيووف

طبعا دعاء ولا صدقت قالو ليها طيري في كسر من الثانيه بس البت اختفت من قدامنا.. طبعا هي وملاذ ماف زول بفوتهم في الخوف نهااااي.. امي بعد دعاء مشت طوالي عاينت لي وقالت لي..

سوزان بغضب: وانتييي...
وسام: ها.. اا انا انا مالي
سوزان: متين بس تعقلي وتكبري مية مره قلنا ليك.... الخ

طبعا نفس الاسطوانه حقت امس وانا الكلام حفظتووو اكتر من اسميي اوووقسسم... انتظرتها لمن خلصت وانا اصلا كنت في واادي تاني منزله راسي زي البت المؤدبه وهي فاكراني منتبهه معاها وانا كنت بحسب في مربعاات السرااميك🤣.. بعد خلصت خلاص قالت لي بصوت عالي

سوزان: يلا سريييع قدااامي امشي غيري هدومك ديل وانزلي سلمي على الضيوووف

ولا كضبت عااد طوالي جريت دخلت استحميت لبست لي جلباب "جلباب راقي لونو اسود فيهو ورود بيجيه" وعاينت لي شعري في المرايه سريع فكيتو وجلطتو ورجعت لفيتو وختيت الطرحه في راسي ونزلت...
وانا طالعه من الغرفه ماشه على السلم شايفه دعاء وملاذ الكمان غيرو هدومهم ولابسين طرحهم واقفين جمب السلم.. بس كانت ملامح وشهم وكأنهم مخلوعين كنت قادره اشوف الاستغراب والدهشه في عيونهم مشيت وقفت جمبهم ومنظرهم وترني قلت ليهم بخوف!!..

وسام: مالكم واقفين كدا؟؟.. في شنو!!!

وقبل ما يردو لي سمعت صوت ابووي المابغباني من تحت وهو بقول..

عبد الرحيم ابتسم وقال:
على بركة الله نحن موافقين واديناكم بناتنا على سنة الله ورسوله....












*#صلو على النبي..*
*#يتبع..*

من وشها بقرف وبقت تعاين للبان في يدها مسافه تاني رفعت عيونها في صفاء وبقت تعاين ليها بي برود..! استغربت فيها افتكرتها حا تجوط بس كانت نظراتها بارده وفجأه بقت تتبسم وتضحك..!! وتلعب باللبان في يدها ويديها كلهم بقو عباره عن لبان ملزق ..صفاء ما اشتغلت بيها كتير والتفتت جات تمشي منها بس فجأه شاهيناز مسكت شعر صفاء الطويل من نصو ومسحت اللبان الفي يدها كلو في شعر صفاء وصفاء كا رد فعل من الحصل جات تتنفض من شاهيناز بس شاهيناز بقت ماسكه شعر صفاء بي يديها الاتنين وشاده صفاء عليها بقوه وقالت بشر..

شاهيناز: تتفي فيني انا يا وسخه؟؟؟؟؟انا حا اوريك كيف تعملي كدا تاني

هنا انا صحيت من خلعتي وجيت امسك صفاء من شاهيناز بس شاهيناز عاينت ناحية باب الزنزانه الكان مفتوح وقالت بصوت عالي..

شاهيناز: نفحااااااات

وكأنو نفحات كانت واقفه جمب الباب طوالي جات خاشه شافت المنظر قدامها انا بجر في صفاء من طرف وشاهينناز شاداها من شعرها من غير تفهم اي حاجه جات جرتني انا ومسكتني بالقوه ودخلو وراها مشرفتين شاهيناز عاينت ليهم وقالت..

شاهيناز: امسكوهم كلهم م عاوزه زول منهم يتحرك

فعلا المشرفات واحده فيهم مسكت ياسمين والتانيه جات مسكتني انا ونفحات فكتني..وعدن مسكت ساره وسويدا مسكت وداد...كان منظر دخل الرعب في قلوبنا وكنا عارفين انو الجاي ابدا ما خير دا كلو كوم وصفاء الصوتها راح من الصريخ كوم تاني وماف زول كان فاهم دا شنو دا ولي شنو؟؟؟.. بس فجأه نفحات بعد فكتني للمشرفه التانيه مشت مسكت في صفاء كويس وبقت تضحك ضحكه خبيثه..شاهيناز فكت شعر صفاء ومشت على سريرها وبقت تفتش وكلنا مستغربين هي بتعمل فشنو وقبل زول يقول ليها حاجه هي اتلفتت وعاينت لي صفاء ورفعت حاجه في وشها وقالت بشر..

شاهيناز: تتزكري دا..

كانت بتتكلم وهي رافعه في وش صفاء (مقص!!!!!!!..) هنا صفاء انهاااارت وبكل حيلها بقت تحاول تتفكى من نفحات وتصارع فيها وهي بتصرخ..

صفاء: شاهينااااز لاااا شاهيناز لاااا ...شاهيناز اوعى تعمليها اوعى تعمليها يا شاهيناز..اا اانا اسفه انا اسفه شاهيناز ما تقصيهو لي انا اسفه والله..والله اخر مرا انا حا اسمع كلامك انا حا اعتزر بس م تقصيهو ما تقصيهو يا شاهينااااز الله يرضى عليك لاا لااا فكوووني فكووووني

كانت بتتكلم بجنون وكأنها شايفه جحيم قدامها بتحاول تتفك من نفحات بس نفحات كانت أقوى منها شاهيناز ابدا ما اشتغلت بيها وبقت ماشه عليها.. طوالي ياسمين بقت تصرخ وهي دموعها نازله عاينت لي شاهيناز وقالت..

ياسمين: شاهينااااز حرام عليييك حرام علييك والله.. ما تعملي فيها كدا ابوووس يديك تفكيها..فكيها يا شاهيناز ما تقربي منها الله يرضى عليك البت عملت ليك كل شي انتي عاوزاهو واسي هي غلطت واعتزرت الله يرضى عليك ابعدي منها يا شاهيناز حرااام عليك والله البت حا تموووت حا تموووت يا شاهيناز ارحميهاااا

بس شاهيناز ولا كأنو في حد بتكلم معاها..انا ما كنت قادره اتكلم والله كنت حاسه انو كلامي حا يزيد غضبها على صفاء كنت مغمضه عيوني من بشاعة المنظر القدامي وصريخ صفاء ومحاولاتها عشان تجري من نفحات كانت حاجه زي الكابوس م كنت قادره اعمل اي حاجه حسيت انو طاقتي انتهت في اللحظه دي حتى المشرفه الكنت بحاول اتفكى منها خليتها وغمضت عيوني بس وانا حاسه بالعجز.. واحساس العجز دا كان أسوأ احساس ممكن الانسان يشعر بيهو وانت شايف زول قدامك بتعزب قدامك بس ما قادر تساعدو..💔..فتحت عيوني وانا بسمع في شاهيناز القربت من صفاء ولفت شعر صفاء بين يديها وصفاء كانت بتقاوي في نفحات عشان تتفكى وهي بتحرك راسها وتبكي بهستريا.. شاهيناز شدتها شده قويه من شعرها عشان تتوقف من الحركه وعاينت ليها جوا عيونها وقالت بغضب..

شاهيناز: حزرتك قبل كدا وقلت ليك اوعك تلعبي معاي وانتي شفتي عواقب لعبك معاي بي عيونك..وانا اول مرا سامحتك وما قصيت ليك شعرك..بس شاهيناز ما بتسامح مرتين والغلطه العملتها قبل كدا ما برجع اكررها تاني والمرا دي مستحيل ارحمك

قالت كدا وصفاء كانت بتبكي وبتعاين لي شاهيناز جوا عيونها وقالت بصوت مهزوز وهي بتترجى فيها..

صفاء: شش..شاهيناز ابوس ايدك ابوس ايدك م تعملي كدا اا..انا انا اسفه بب..بس ما تعملي كدا يا شاهيناز عليك الله لا عليييك الله لا ..لا لا يا شاهيناز لا ..الرحمه يا شاهيناز ارحمينييي ارحمينيييي

شاهيناز ابتسمت وغمزت ليها وقالت:
معليش بس ما المرا دي يا حلوه

ومع أخر كلمه قالتها سحبت المقص لي بداية شعر صفاء وووو......













(الدنيا رمضان ..والسب حرام 🙂)















*#صلو على النبي..*
*#يتبع..*

عدن قعدت في وش شاهيناز وقالت
عدن: كيف في شنو؟؟..انتي ما شايفاهم بتهامسو كيف اكييد ناوين يعملو شي ياخ
سويدا ردت ليها وقالت: مالك معاهم يا عدن ياخ سيبيهم في حالهم
عدن حدرت ليها وقالت: انتي اسكتي ما سألتك..انا بتكلم مع شاهيناز
شاهيناز قفلت المنكير وقالت: اوهووو علينا يا عدن...يعني هم بتهامسو او بصرخو انا اعمل ليهم شنو مثلا
عدن: يخ انا متأكده انو لمتهم وهمسهم دا ما ساي اكيد ناوين ينتقمو منك على الحصل امس
شاهيناز ضحكت وقالت: ينتقمو؟؟..يابت ديل عباره عن حشرات فاهمه يعني شنو حشرات؟؟.. يعني عينهم في عيني ما بقدر يرفعوها سيبك من انوي ينتقمو ..كلهم هنا بخاافو مني وكلهم عارفني كويس وعارفين شنو بقدر اعمل انا ..عشان كدا مستحيل يفكرو في حاجه زي دي ..والانتقام مني دا عباره عن حلم بشوفوهو بليل لمن يجي ينومو هههه
عدن : ايوا انا عارفه كل كلامك دا بس المره دي غير كل المرات

شاهيناز رفعت حاجبها بي استغراب وقالت: كيف يعني؟
عدن عاينت ليهم ورجعت عاينت لي شاهيناز وقالت : كل البنات هنا بخافو منك وعارفينك كويس..بس وسام لا

شاهيناز ما ردت وبس حولت انظارها لي وسام وكانت بتعاين ليها مسافه وكيف كانت بتتكلم بحماس ..رجعت عاينت لي عدن الكان ملامح وشها مليانه بالشر والخباثه وقالت بهدوء بس وراهو غضب كبير..

شاهيناز: لو الما بتتسمى دي فكرت مجرد فكره بس انها تعمل لي شي وقتها خليك جاهزه لي حفلات التعذيب
عدن ابتسمت وقالت بحماس: ايوااا دا الكلام ياااخ

(وضحكو الاتنين بشرر)

________

ياسمين: بس ما وريتينا يا وسام حاتعملي شنو؟ والخطه شنو وحاتبدي من وين!!

ياسمين قالت كدا وكلهم كانو بعاينو لي بي استفهام عاوزين يعرفو انا حا اعمل شنو؟؟..انا سرحتا مسافه وقلت ليهم

وسام: انا مفكره ومجهزه كل شي وما حا اقدر احكي ليكم بكل تفاصيل الخطه بس خليكم واثقين فيني
ساره ابتسمت وقالت: نحن نثق بك جدا يا وسام لأنك فتاة قوية
ابتسمت ليها وقلت شكرا يا ساره..
ياسمين:متأكده انك حاتقدري تنفذها براك؟
هزيت ليها راسي وقلت: ايوا حا اعملها بس محتاجه مساعده بسيطه
وداد:انتي بس قولي وحا ننفذ

عاينت ليها وهزيت راسي برفض وقلت: المساعده ما منكم انتو

كلهم استغربو وعاينو لي بي استفهام ياسمين اتكلمت وقالت..

ياسمين: ما مننا!!!...طيب من منو؟
وسام: تتزكري امس لمن قلتي لي لو عاوزه تفيفي في وش صفاء لازم تلقي حيطه في ضهرك؟
ياسمين: ايوا بس الكلام د دخلو شنو ما فهمت
وسام: انا لفيت الحيطه والمشرفه الحاتساعدني
ياسمين: دي منو دي؟؟

سكت مسافه وابتسمت بخباثه وقلت ليها..

*وسام: سُلافه...!!!!!*




















*#صلو على النبي..*
*#يتبع..*

قلت كلامي وانا بمشي على سريري الفوقو سرير صفاء..كانت راقده فوق وساره كانت في سريره قعدت جمبها وقلت

وسام: شكلكم كنتو عازمين روحكم في سريري
ياسمين صفقت بي يديها وضحكت: اجي يا سريري..مش كان سرير الشيطانه شاهيناز

قالتها وقعدت جمبي ضحكت وانا بعاين للسرير الفوق وبقول

وسام: بطلة قصتنا مالا نايمه؟
-بطلة قصتنا انتي ما انا

كان دا صوت صفاء القالت كلامها ونزلت من فوق جات قعدت جمبي بالجهه التانيه وبقيت بين ياسمين وصفاء الكانو بعاينو لي بنظرات مليانه رجاء عشان اقول ليهم انو الخطه نجحت ..

ياسمين: انتي حا تلعبي بي اعصابنا كدا لمتين
صفاء: ما قدرتي تتفقي مع سلافة صح؟
ضحكت فيهم ومسكت يد صفاء وقلت ليها
وسام: شاهيناز ازتك كتير وانا اوعدك اني ما حا اقصر فيها وبعدين خاتشوفي البحصل فيها

بعد قلت كلامي الدموع اتجمعو في عيونها وقالت بعدم تصديق وهي بتمتم..

صفاء: يي..يعني قصدك اا..انو سس..سلافه وافقت و..

ما خليتا تتم كلامها وانا بضمها وبقول ليها

وسام:وافقت ايوا

ضمتني شدييد وقعدت تبكي ما عارفاها هي حاسه بشنو بالزبط بس اكيد زي احساس انسان كان فاقد الأمل ولقى قشه اتعلق بيها والقشه دي بقت ليهو بر امان..صح انا ما قدرت اخد حقي من ناس كتير بس حا اعمل كل جهدي انو كل الحولي حقهم ما يضيع طالما انا موجوده..

كنت ضامه صفاء علي وهي بتبكي وانا بعاين بعيوني لي شاهيناز الكانت بتضحك وتتونس بكل حقد وكراهيه..

وسام: كلها ساعات وحا يبدأ جحيمك يا شيطانه..










(ادري البارت قصير)






*#صلو على النبي..*
*#يتبع..*

كل زول مشى اترمى في سريرو وانا من الإرهاق ما لحقت افكر في تفاصيل اليوم وطوالي نمت..

____________

في الصباح..
صحيت وانا خاته يدي في راسي من الصداع ما كنت عارفه سبب الصداع شنو خصوصي انو امس شربت الشاي ..بس تاني اتزكرت سهرتي مع البنات وشعر وداد وحكاوي ياسمين الما بتخلص وانا من جيت هنا م كنت بساهر عشان كدا صحيت بصداع.. وكمان التم الناقصه صوت باب الزنزانه وهو بفتح بطريقه مزعجه تسمع الأطرش والما عندو صداع بجيهو من الصوت المزعج دا..خليت راسي واتلفت على الباب عشان اشوف الصباح دا حا يبدأ بي ياتو وش والصدمه كانت انو الدخلت دي شاهيناز....






















*#صلو على النبي..*
*#يتبع..*

آصف ضحك وقال: اي شي ما بخطر على بالك انا بفسرو
وسام: يبقى دي موهبه
آصف: موهبه اي بس ما عارف حا استفيد منها شنو
وسام: بي راسك دا تستحق تكون محلل او شرطي او محامي والله حا تنجح
آصف اخد تنهيده طويله وقال: الإنسان ما بقدر يكتسب مهنتين وانا حاليا مهنتي هي الإجرام وبس
وسام: على زكر الإجرام انت ناوي تحكي لي بي قصتك متين؟
آصف ضحك وقال: بعد ما انتي تكملي
وسام: اممم.. بس كالعاده انا نسيت وين كنت واقفه
آصف: وانا كالعاده متزكر اخر حاجه اختك الخطبها ابوك لي ولد صحبو غصب عنها ..بس بعدين ما وريتيني هي وافقت او لا؟؟

اخدت تنهيده طويله وانا بستجمع كل الأحداث الحصلت وقلت بصوت مهزوز ومليان ألم:

وسام: وقتها ملاذ ما وافقت بس ياريتها لو كان وافقت..










*#صلو على النبي..*
*#يتبع..*

قعدت بكل هدوء في طرف الكرسي وانا خايفه ومتوتره وشغاله بس اتحسبن في اسعد والموقف الختاني فيهو وكنت بتلفت ساي لمحت أسعد واقف جمب الشباك بعاين لي وهو ميت ضحك وكمان جمبو ملاذ الما كانت فاهمه شي بس برضو بتضحك (ديل اخوان ديل؟؟؟؟) قطع نظراتي ليهم صوت ابوي وهو بقول..

عبدالرحيم: انتي حا تقعدي ساكته كدا قولي الدايره تقوليهو

بلعت ريقي من التوتر وقلت ليهو

بتمتمه: هو صص..صراحه يا اا..ابوي
اا..انا يعني مم..ما كان فف في موضوع وو..وقلت يعني اا..اجي وو.واشوفك و..

وفجأه وانا بتمتم كدا وما عارفه روحي بقول في شنو زاتو لقيت ابوي ضحك...اي والله ابوي الواحد دا قعد يضحك تخيلووووو!!! عاينت جهة الشباك لي اسعد وملاذ الهم كمان من الصدمه خلو ضحكهم وبقو في ضحكة ابوي!!! الكانت زي كأس العالم كلو اربعه سنه نشوفها!!!

عبدالرحيم وقف ضحك وقال: بسم الله يا بتي شايفاني شايل ليك صوت؟؟ اتكلمي ساي عاوزه تقولي شنو
وسام: انت بجد ضحكت؟؟

حرفيا من غير احس لقيت روحي بقول ليهو كدا هو ضحك تاني وما علق على كلامي وانا أدركت نفسي وقلت في روحي بما انو هو هادي كدا وبضحك كمان خليني اخش في الموضوع الجيت عشانو.

وسام: صراحه انا جيت وو..وعندي طلب يعني هو طلب صغير كدا يعني
عبدالرحيم: اها كملي
وسام: يعني زي ما شايف انا خلصت امتحانات خلاص وبقيت قاعده ساي ماف قرايه بتلهيني وكدا
عبدالرحيم: وانتي متين القرايه كانت بتلهيك؟؟..

وبعلي جبهتي يا ابوي ما كدا؟؟.. ضحكت ليهو وقلت: يعني قصدي خلاص ماف قرايه وكدا
عبدالرحيم: اها كملي عاوزه شنو انتي ما فهمت
وسام: انا كنت بس بفكر انو يعني بما انو ماف قرايه كدا وانا قاعده ساي يعني رايك شنو انو يعني..
عبدالرحيم: يابت انتي حاتقولي "يعني" دي كم مرا

لمن لقيت اني حا افوت في الكلام واجيب الهوا رفعت عيوني وعاينت لي ملاذ الكانت بتعاين لي بي استغراب ورجعت عاينت لي ابوي المنتظرني اتكلم وطوالي غمضت عيوني وقلت الفي قلبو كلووو والداير يحصل يحصل..

وسام: .......











*#صلو على النبي..*
*#يتبع..*

وسام : لالالالا مستحيل مستحيل يحصل كدا مستحيييييل

______

في نفس الزنزانة دي بس في زاوية تاني كانت ماشه وهي بتضحك وبتبعب بي مفاتيح في يدها بي رواق فجأه حست بي أيادي بتجذبها اتخلعت ..شويه واستوعبت الحصل وعاينت للمرا السحبتها وقالت..

-اووووف في شنو يا نفحات ياخي جاراني كدا مالك جنيتي
نفحات: لالا شكلك انتي الجنيتي كيف تحومي كدا وكأنو دا سجن ابوك اسي لو في زول شافك يا شاهيناز؟؟
شاهيناز قلبت عيونها بملل وقالت: والعاوز يشوفني منو المشرفه العجوز الخرفانه العيانه ديك ولا سلافه يعني؟؟
نفحات: المهم اخدي حزرك يا شاهيناز
شاهيناز: سمح خير
نفحات: واسمعي هنا الحصل شنو في خطتك؟
شاهيناز: حاليا كل شي ماشي تمام بس اصبري شويه ولو ما جننتها ما ابقى شاهيناز
نفحات: بس انتي ما ورتيني حا تعملي شنو؟
شاهيناز: انا ما وريتك لانو الحا اعملو دا خطير شديد وانا م بقدر اخاطر واشارك زول معاي لانو ما معروف بحصل شنو
نفحات: انا ما عارفه حا تعملي شنو بس واضح انو الجاي كلو شر
شاهيناز: اكيد بس اسي باقي لي حاجه رايحه ولازم ألقاها
نفحات: الرايح ليك شنو؟؟

نفحات سألت شاهيناز..وهي كانت عاوزه تجاوب بس فجأه عينها وقعت على صفاء الكانت طالعه وبتتسحب بي خوف..شاهيناز ابتسمت بخباثه لمن شافتها وقالت لي نفحات..

شاهيناز: خلاص اعتبري اني لقيتها...





















*#صلو على النبي..*
*#يتبع..*

صفاء كانت مرميه في الأرض وفي ماده بيضاء طالعه من خشمها وكان جسمها بتتفض وبتشنج بطريقه مخيفه وفي مشرفه كانت قاعده جمبها وماسكه يدها ..انا جيت أقرب بس اتجدمتا في مكاني اول ما المشرفه الجمب صفاء قالت..

-انا لله وانا اليه راجعون..البت دي ماتت يجماعه..!!!!!!!!!





"ماتت..!!!!"





























*#صلو على النبي..*
*#يتبع..*

كنت بعاين ليها وانا مخلوعه حرفيا في ردة فعلها على زعلنا وبكانا في أغلى انسانه علينا في السجن دا... بعد كلامها دا وصلت اخر مرحله من الغضب وبالجد طفح الكيل منها اتتفضت وبقيت اصرخ فيها بأعلى صوت عندي من غير اراعي لي مشرفه ولا لي البنات الواقفين ولا راعيت لي انها هي السجانه وانا المسجونه..!!!

وسام بصوت عالي: انتي ما ممكن تكوني من غير قلب ورحمه كدا؟؟؟ معقوله انتي لمن تنومي بليل ضميرك دا ما بأنبك ولا بعذبك لحظه؟؟؟ انتي امثالك بنومو كيييف اصلا.. فهمنااا فهمنا انك سجانه ولازم تعاملك يكون خشن معانا بس ما للدرجه دي انتي هنا بتعاملي في انس ما جن يا شيطانه..انتي هنا بتتعاملي مع بشر نحن ما حيوانات نحن ناس وعندنا قلب بحس وبتوجع.. يخ حتى موت المسكينه دي ما أثر فيك ..واصلا يأثر فيك كيف وانتي كنتي سبب في موتها كمان.. يأثر فيك كيف بس وانتي قبل أيام بس كنتي ماسكاها من يدها وهي بتترجى فيك تفكيها عشان شعرها ما يتقصى بس انتي كنتي ما سكاها وبتضحكي.. الانسانه الماتت المستهتره بي موتها دي انا يمكن ما اقدر اعاقبك على السويتيهو فيها بس انتي شكلك ناسيه انو الدنيا دي ما ماشه ساي..فوقنا في رب وهو أعلى مني ومنك وانا يمكن ما اقدر عليك بس ربنا قادر يا نفحات وما عندي ليك حاجه اقولها ابدا غير حسبي الله ونعم الوكيل فييييك وفي أي زول كان سبب في انو تنزل دمعه واحده بس من صفاء.. والله ربنا م حا ينساها ليكم وبكره حا تشوفو الحاجه دي لو ما في روحكم في أقرب الناس ليكم ..وربنا يوريني قدرتو فيكم..

جيت امشي بس لفيت وشي وقلت ليها..

وسام: وعلى فكره كلامك صح صفاء بقت جثه ونهايتها كوم تراب .. بس كوم التراب دا بكره كمان حايكون نهايتك انتي.. هل انتي شايفه انك جاهزه ليهو؟؟؟..انا بقولها ليك صدقيني انتي ما جاهزه لي اي لحظه من لحظات حسابك يا نفحات وما جثة صفاء الحا تعفن السجن دا لانو هو اصلا معفن بوجود ناس زيك ..

قلت ليها الكلام دا وانا بعاين جوا عيونها وابدا م خفت منها ولا اترددت لحظه وانا بقول في الكلام دا لانو بجد هي اتجاوزت حدودها شديييد.. هي شايفه نفسها كبيره علينا بس الكبير الله.. وانا ما بخاف من اي عبد ..بس بخاف من ربي وربها .. مشيت منها وبقيت واقفه في نص الساحه عاينت ناحية البوابه الاتقفلت وكنت بحاول استوعب انو خلاص صفاء اختفت صفاء خلاص مشت!!! ..
تاني ماف صفاء
ماف ربونزل السودانيه
مافي الشبح!!؟..

وهنا كل طاقتي انتهت قعدت في الارض وانا مستسلمه وبقيت أبكي وانادي في صفاء بصوت ضعيف وانا ما قادره اصدق ما قادره اتخيل انها خلاص مشت خلاص تاني ما حا نشوفها خلاص تاني ماف صفاء مافيييييييي...!!!!

_________

في قسم الرجال..دخلو الشباب وهم شايلين السرير الفيهو صفاء وكان كل الرجال برا وفي قبر مفتوح وجاهز ..كلهم كانو متلمين عشان يدفنو ويصلو ..وفي الزاويه كان هو قاعد مع صحبو وسرحان..

-هيي آصف سرحان وين انت
آصف رمى الحجر الفي يدو وقال: ماف شي بس مزاجي معكر
عمر: اي خليهو يتعكر تستاهل بعد الضرب الأكلناهو بسببك قلت ليك ماف داعي نمشي ماف داعييي
آصف: فعلا ما كان في داعي لاني في النهايه م قدرت اشوفها
عمر بخلغه: نعم نعم؟؟ كيف يعني م قدرت تشوفها والكانت بتصرخ بي اسمك قبيل دي منو ؟؟

آصف ضحك وجا يتكلم... بس جا شاب قاطعهم وقال..
-تعالو ساعدونا نحن جبنا جثة البت عشان ندفنها

قال كدا ومشى آصف وعمر قامو وراهو وفجأه آصف ضحك.. عمر عاين ليهو وقال..
عمر: جنيت انت نحن دايرين ندفن زول وانت بتضحك
آصف: لانو الموضوع بضحك.. القبر دا نفسو الحفرتو انا معاك وقلت ليك يمكن انا اندفن فيهو.. بس للقدر كلمه أخرى وياربي دي منو الحا يبقى القبر الإندفن بي اسمي ملجأها؟؟

قال كدا ومشى وقف بين الصفوف ومسك ليهو آلة حفر وبقى يحفر شويه عشان يوسعو القبر أكتر بعد انتهو هو ومعاهو شاب مشو على الجثه عشان يشيلوها بس وقف مصدوم لمن سمع صوت الشرطي الماسك تقرير البت الميته وبقول..

-أحر التعازي للمتوفيه "صفاء علي المختار"

آصف رفع راسو بخلعه شال الملف وبقى يقرأ في الإسم تاني ..رجع عاين للجثه القدامو وهو بهز راسو بهستريا وفجأه شال الغطاء من وشها ولمن شافها رجع ورا من الصدمه وصرخ بي اسمها .....

آصف: صفاااااااااااااااء....؟؟؟؟؟؟؟

عمر قرب منو مسكو وقال ليهو..

عمر: آصف في شنو مالك؟؟؟ انت بتعرفها؟؟
آصف: دد..دي دي اختييييييي....!!!!!



تان تان تاااااااااااااااااااااا















































*#صلو على النبي..*
‏*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

عديت الليله ديك كلها بكى غمضت عيوني بعد م حسيت انو حتى البكى بقى يتعبني كنت بتزكر في كل حياتي كيف كانت وكيف بقت واتزكرت كل الحكيتو لي آصف عاينت للحيطه الوراي وكنت حاسه اني عاوزه احكي عاوزه اقول اي حاجه المهم انسى الوجع دا طوالي غمضت عيوني واتخيلت آصف موجود وبقيت بحكي في باقي القصه...


*فلاش باك..*

*#وكأني أنسى وجع ب وجع آخر..*























*#يتبع..*
*#صلو على النبي..*

من مسكتي ليها اتكلمت معاها بهمس وقلت ليها..

وسام: انتي كويسه؟

ما قالت شي بس اكتفت بي انها طلعت التلفون من تحت المخده وادتني ليهو كان فاتح فيهو شاتها مع رضوان وكان مرسل ليها رسايل وهي م ردت عليهو قريت الرسايل وكان محتواها..

"انتي دايما بتصبري فيني بس للان ما عملتي اي حاجه عشاني ومتاكد لو انتظرتك تعملي شي حا القاك ضعتي من يدي"

"انا جاي بعد اسبوع وكل المهزله دي حا اوقفها وامش لي ابوك والعاوو يحصل يحصل"

"بس قبل اجي واعمل كدا وريني هل انتي للان بتحبيني ولا لا؟"

قريت الرسايل وعاينت ليها لقيت دموعها نزلو وواضح انها حاسه نفسها م عارفه تعمل شنو او تقول شنو بالجد موقفها كان اصعب من ما كنت بتخيل طوالي ضميتها علي ولقيت نفسي انا كمان دموعي نزلت معاها بس مسحتهم سريع اول ما امي جات خاشه وقالت ..

سوزان: ملاذ ودعاء يلا الجماعه ديل منتظرنكم ..

قالت كدا وعيونها مثبته في ملاذ..دعاء بعد كلام امي قامت بس ملاذ ابدا ما اتحركت امي جات عليها رفعت ليها راسها ومسحت دموعها وقالت ليها بكل حنيه ..

سوزان: ملاذ ما تبكي حبيبتي انا عارفه انك زعلانه اسي بس صدقيني دا كلو لمصلحتك وانا عندي احساس كبير بقول لي انو كل البحصل دا لي خير ليك وانا واثقه من الحاجه دي الله يرضى عليك روقي خبيبتي وافرحي عشاني

قالت ليها كدا وهنا ملاذ ياداب بكت كويس وضمت امي شدييد وبقت تبكي وامي زاتها بكت معاها حتى انا بكوني... وكنت بعاين ليها وفي وشي ابتسامه صادقه ومبسوطه بكمية الحب بينهم وكالعاده جا نفس السؤال البجيني دايما لمن اشوف مواقف امي مع ملاذ وهو انو.. لو انا الكنت مكان ملاذ هل امي كانت ح تتعامل معاي كدا!؟..

-هوي يجماعه الناس ديل منتظرنكم بتبالغو والله..

كان دا صوت بت اهلي اسمها لجين .. امي مسحت دموعها وقالت ليها..

سوزان: خلاص خلاص اهو جينا

لجين ضحكت لمن شافت امي بتبكي مع ملاذ وقالت..
لجين: والله يا خالتو م عارفه لمن بتك المدللة دي تمش انتي ح تعملي شنو ههه

امي ابتسمت على كلامها وظبطت مكياج ملاذ لانها خربتو بالبكاء ومسكتها من يدها ولجين مسكت دعاء ومشو خلوني وراهم امي قبل تطلع عاينت لي وقالت..

سوزان: جيبي معاك الشيالات الجهزناهم بتلقيهم في غرفتي واعملي ليك حاجه في وشك دا م تنزلي مبشتنه كدا

قالت كلامها وطلعو وانا مشيت على الغرفه شلت الشيالات وجيت نازله طوالي من غير اعمل شي في وشي وم سمعت كلامها.. لمن جيت نازله بسم الله ما شاء الله البيت كان ملان وشكلو اهل العريس كتيرين في مرا كانت قاعده بين ملاذ ودعاء لابسه توب حلو ودهب يكشكش ومن الشبه واضح انها ام حمدي وفهد وابوي كان قاعد مع جمال وجلال الكالعاده مالين الجو ضحك وفرح ولاحظت لي فهد العيونو كانت معلقه في دعاء ودعاء تتبسم وحمدي كمان كل شويه يسرق النظر لي ملاذ بس ملاذ م كانت مهتمه ابدا وواضح انها راسمه ابتسامه بالغصب ..وشكلو امي عزمت ناس من الجيران لانو شايفه وجدان قاعده وبتتونس مع مرتين شكلهم من طرف أهل العريس..

طبعا كنت ماشه في السلم وانا سرحانه فيهم والشيالات في يدي لمن قربت انزل خلاص في حاجه عترتني وكنت ح اقع بس فجأه في زول مسكني وشال مني الشياله رفعت يدي وكانت دي بت بسم الله ما شاء الله عليها فيها كميه من الجمال لونها ابيض حرفيا وعيونها كبار عامله مكياج خفيف ومحجبه الطرحه ولابسه فستان محتشم ..ابتسمت لي وقالت

-كنتي حا تقعي انتبهي قدامك
وسام: شكرا لانك ساعدتيني بس الشيالات شويه تقيله

طبعا كنت بتكلم معاها وانا سرحانه وحسيت ملامحها دي ابدا م غربيه علي بس م قادره اتزكر انا شفتها وين.. هي فجأه مدت لي يدها عشان تشيل مني شويه لمن جيت اديها الشياله وقعت كل الكان في يدي من الخلغه لمن عاينت للاسواره الفي يدها الكان مكتوب عليها بالأسود..

*#ماغنيس|Magnis*

وقبل اسألها من شي في مرا صرخت ليها وقالت ..

-رميساء...!!!!!!































*#يتبع..*
*#صلو على النبي..*


تابعونا


https://www.facebook.com/share/1YHW59jqru/

وداد: هروبك من السؤال ما..
ياسمين: الدفاع دا بكون للانسان الضغيف للانسان الانت شاكي انو ممكن يغلط ويعملها.. بس وسام قويه وسام ما محتاجه دفاعي عنها وسام ...ما قتلت صفاء
وداد: والأدله؟ الفيديوهات والصور ؟ تصرفات وسام وكلامها؟
ياسمين ابتسمت بي وجع وقالت: والله لو قالتها وسام بنفسها انها هي القتلت صفاء صدقيني حا اقول وسام مجبوره على الكلام دا.. مستحيل تعمل كدا وسام م بتعملها
وداد: اذا واثقه انها بريئه ليه ما حاولتي تساعديها؟
ياسمين عقدت حواجبها بي استنكار وقالت..
ياسمين: مين قال اني ما حاولت؟
وداد: بس انتي ..

وقبل تكمل كلامها قاطعهم صوت باب الزنزانة الفتح بطريقه مزعجه دخلت منو شرطيه عاينت للمسافه بتفحص وقالت..

-ياسمين بلال..مطلوب حضورك

ياسمين عاينت لي وداد ابتسمت وطوالي طلعت ورا المشرفه وخلت البنات كلهم مصدومين

وداد: دي اول مرا ياسمين تنطلب !!!..يارب استر

________________

فكت لي الحبل وواضح من وشها انها مضايقه لانها بأمر من شاهيناز الجات قعدت قدامي فكتو غصب عنها..اول م فكتو لمست يديني براحه مكان الألم وكنت بعاين للعلامه الحمرا البقت محفوره في جلدي من أثر الحبل رفعت نظري عنها على صوت شاهيناز القالت..

شاهيناز: ما حا تاكلي؟

عاينت ليها وعاينت للاكل المختوت قدامي كان وليمه حرفيا صحن جداد وصحن فطائر وكل انواع اللحوم وفي عصير ومويه بارده كمان !!! عاينت ليها بي استغراب وكنت بحاول افهم دا ياتو نوع من انواع العذاب المرا دي!!!

شاهيناز: اكلي مالك بتعايني لي كدا

ما رديت وابيت امد يدي ابدا هزت راسها وضحكت بسخرية وقالت..
شاهيناز: ايوااا فهمت انتي فاكراني مسممه الأكل صح؟ اها شوفي

قالت اخر كلمه وشالت لقمه من كل صحن اكلتها قدامي وهي بتقول
شاهيناز: الاكل ما فيهو اي شي بس الا الفطاير دي ملحها مرخي شويه ههههههه

قالتها وضحكت بصوت عالي مع نفحات وانا بس بعاين ليهم ولاني كنت جيعانه وضمنت الاكل ما فيهو حاجه طوالي بديت اكل وما كنت مهتمه لي الخبااثه الفي راسهم..

شاهيناز: بما انك مستمتعه بالاكل كدا رايك شنو نحكي ليك قصه..
نفحات: يا سلام انا دايما بحب الاكل وانا بسمع او بحضر
شاهيناز: مش كداا ههه.. اها رايك شنو؟

قالت اخر كلمه وهي بتعاين لي وانا ابيت ارد بس باكل وبشرب في العصير ببرود..
شاهيناز: طيب حا اعتبر سكوتك دا موافقه.. بس احكي ليك ياتو قصة ؟
نفحات ضحكت وقالت: رايك شنو بي قصة موت صفاء؟؟
شاهيناز صفقت بحماس وقالت ليها: والله انتي مرات بتدي اقتراحات بتكيفني جدا هههه

رفعت رجل فوق رجل عاينت لي وقالت..

شاهيناز: بس ابدى ليك من وين لانو قصة موتها دي براها عاوزه يوم بحالو

ابدا ما كنت شغالع بكلامها لانها من غير تقول شي انا متوقعه كيف قتلوها بس فجأه اللقمه وقفت في نص حلقي وانا بسمعها بتقول بخباثه..

شاهيناز: ابدا ليك بي كيف قتلناها؟ او بشنو قتلناها؟؟ او او متين نفذنا؟ ولا...

سكتت مسافه وكملت بسخريه..

شاهيناز: ولا اوريك منو الساعدنا من صحباتك..!؟؟؟

صحباتي؟؟؟؟... عاينت ليها وقلبي بقى يدق سريع صحباتي؟؟؟ بتكلم عن شنو دي؟؟؟ ما كنت فاهمه شي وبقت تجي صور كتيره في بالي وانا من خوفي من الصدمه اتمنيت ما اعرف ابدا بس هي ضحكت على ملامح وشي وعاينت لي باب الغرفه وقالت ..

شاهيناز: اتفضلي..

دخلت وكانت واقفه في الظلام ملامحها ما كانت واضحه قربت شويه واول ما شفت وشها اتمنيت وقتها انضرب مليون مرا بالكهرباء ولا اني اشوفها هي!!!.. الكبايه وقعت من يدي وانا بصرخ بصدمه..

وسام: لالالالالالالا الا انتي الا انتييييييي



*"إحزر من عدوك مرا ومن صديقك ألف مرا.."*
















*#يتبع..*
*#صلو على النبي..*

تابعونا


https://www.facebook.com/share/1YHW59jqru/

كنت ببكي وانا شاده من مسكت توبها وهي ما اتحركت ولا عملت اي شي بس زحت من قدامي وخلتهم جو ومسكوني وبقو يجروني بكل قوتهم وانا قابضه على توب امي وبجرها منو.. لحد ما هي مسكت يدي ووقتها فرحت وابتسمت لاني حسيتها حا تجرني عليهم حا تصرخ وتقول ليهم خلوها دي بتي ما تسوقوها حسيت انها ح تتمسك بي وح تضمني وتغطيني تحت توبها.. بس ابتسامتي اتلاشت اول ما لقيتها فكت يدي من توبها وادتني ضهرها!!!

وسام بصدمه: اا..امي!؟؟؟؟؟

كنت حا اجن من تصرفها وكانو هم ساحبني بقوه وانا لحد م طلعت كنت بس بصرخ بي اسمها ..

وسام: اميييي لالالالالالالا امييي تعالي لاااا ما تخليهم يسوقوني والله انا ما عملتها يا امي ما عملتها... اميييييييي

*"باك"*

نزلت دمعه حاره من وشي وانا بتنهد بوجع وهمست..

وسام: ليه خليتيني افك توبك يا امي

_______________

في مكان في نفس الزنزانة كانت ماشه براحه ووراها ياسمين الكانت كمان ماشه بحزر ..وبتهمس ليها ..

ياسمين: سلافه انتي متاكده انك وصلتي ليهو الرساله؟
سلافه: اي اي ما تخافي وصلتها واسي هو منتظرنا برا

وفعلا طلعو برا السجن سلافه اشرت لي ياسمين على زول كان قاعد بعيد منهم بس شافتو لكن ما شافت وشو لانو مغطي وشو بي شال بس ابتسمت ليهو وعملت ليهو اشاره نظام ينتظرنا هنا ومشت ورا سلافه المشت قدامها.. مشو على باب تاني دخلوهو ولقو نفسهم في مكان جمب مكتب المشرفات بس المكان كان فاضي والناس كلها نايمه بالذات المشرفات المستحيل يصحو بعد المخدر الادتو ليهم سلافه في الشاي!!.. سلافه براحه خشت الغرفه وياسمين كانت بتعاين بي استغراب وقالت..

ياسمين: دا شنو دخلتينا هنا ليه
سلافه: ثواني اسي بتعرفي

قالت كلامها ومشت على درج معين فتحتو وكان فيو ورق رفعت الورق ولقت مفتاح قديم تحت الورق شالتو وطلعت وياسمين كانت وراها وهي ما فاهمه شي.. مشو براحه ودخلو بي ممرات كتيره لحد ما وصلو مكان كان معروف شدييد بالنسبه لي ياسمين وبالنسبه لي كل بت سجينه في المكان دا..

ياسمين: المنفردة؟؟.

سلافه هزت راسها ووقفت جمب باب معين طلعت المفتاح بقت تفتح في الباب واول ما الباب فتح سلافه فتحت نور تلفونها وضوت جوا في الزوله الكانت نايمه وما حاسه بي شي بس اول ما حست بي ضو رفعت راسها وهنا ياسمين عاينت ليها بصدمه وقالت..

ياسمين: وساااااااااااااااااااااااااام



*"ضاقت فلما استحكمت حلقاتها فرجت..وكنتُ أظنها لا تفرج"*



*#متابعيني:*
*#وانتو من أهل الخير🫵🏻..*






















*#يتبع..*
*#صلو على النبي..*

تابعونا


https://www.facebook.com/share/1YHW59jqru/

سويت فيها ماف زول بسالك ..وعندهم النسوان ديل لازم يرضو بكل شي ويسكتو ما عندهم مرا بترفع راسها قدام راجل ولا مرا تسلم على راجل ولا تجي بدربو اصلا مع انو كل شغلهم وراحتهم وراها النسوان ديل الا انهم خاتنهم صفر على الشمال.. اشمأزيت شديد من العقليه العندو دي وكان نفسي اديهو محاضر في يعني شنو مرا؟؟ لانو أجابة السؤال دا بتنتهي بي نظره واحده بس لي امك .. سؤال (يعني شنو مرا!؟؟.). اجابتو (يعني شنو امك!؟؟)

-لا لا لا

كان دا صوت الطيب القال كدا وهو بضرب دريكسون الدفار بعصبيه اتخلعت عاينت ليهو وعلى صوتو آصف صحى بي انزعاج وقال..

آصف: فشنو بسم الله
الطيب عاين لينا وقال بضيق: ماف شي بس شكلو في لستك نفس ولازم اركب واحد تاني
آصف: يا الله لا.. وانت عندك اسبير؟؟
الطيب: للاسف ما عندي والله ..اسع ما عارف اعمل شنو دي عوجه والله
آصف: والمشكلة كمان نحن في حته مقطوعه م بنلقى هنا
الطيب: لالا لازم نكوسو ونلقى ولا كدا شبر لقدام م بنقدر نمش وبنموت هنا جوع وعطش ساي

هم كانو بتكلمو وانا اتلفت على الشباك كنت بعاين للمنطقه كويس وكان المكان بالجد مقطوع بس عاينت كويس ولمحت لي محطه من بعيد كانت بعيده شديد اشرت عليها بفرح وانا بقول..

وسام: آصف شوووف

آصف عاين للمكان ابتسم والطيب كمان شافو وقال..
الطيب: الحمدلله بس يارب يكون عندهم لستك
آصف: أن شاء الله بنلقى عندهم يلا خلينا نمشي
الطيب: نمش شنو؟؟ انا بمش براي وبعدين الدفار دا بحرسو منو كان مشينا الاتنين
آصف: ماف مشكله هدي وسام قاعده

وطبعا هو طوالي عاين لي بسخرية وقال لاصف..

الطيب: انت مجنون حرمة شنو البنحرسها دفار
آصف: بس..
انا قاطعتو وقلت :على فكره انا م عندي مشكله احرسو الموضوع عادي
ضحك وقال لي: يعني عاوزه تقنعيني انك م حا تخافي
صريت وشي وقلت : لا ماحا اخاف أصلا ماف شي بخوف
الطيب تاني رجع ضحك بسخريه وقال: صح واضح انك ما بتخافي عشان كدا من راجلك نام وانتي ماسكه في طرف قميصو..

طبعا انا وآصف استغربنا لحد ما عاينت لي يدي البجد ماسكه قميصو وانا ماحاسه على نفسي.. الطيب ضحك علينا ونحن بنعاين لبعض فتح باب الدفار وقال

الطيب: المهم خليكم هنا وانا بحاول م اتاخر

قالها ومشى خلانا مبحلقين ساي وانا رفعت عيني لي آصف وهو عشان تافهه وناقص عقل طوالي غمز لي وابتسم وهو بعاين لي يدي.. طوالي جريتها وقلت بملامح حاده واحراج

وسام: آسفه بس ما انتبهت
آصف ضحك وقال لي: لا عادي م نحن متزوجين

مع اخر كلمه غمز لي وانا حمرت ليهو وقلت..

وسام: انت حا تقول الكذبه وتصدقها ولا شنو؟؟
آصف: بس يمكن الكذبه دي تبقى حقيقه يوم
وسام اتنهدت بضيق وقالت: آصف ممكن تفكنا من السيره دي بديت اضايق
آصف: طيب طيب خلاص خلينا نتكلم عن حاجه م تضايقك
وسام: الشي الما بضايقني انك تكون ساكت
آصف: طيب حلو انا حا اسكت

عاينت ليهو بي استغراب نظام انت ح تسكت بجد!! هزا راسو وقال
آصف: حا اسكت بس انتي حا تتكلمي
وسام: لا شكرا لا انا لا انت
آصف: لالا كدا م ممكن نسكت زي الاصنام لازم زول فينا يتكلم
وسام ابتسمت بغيظ وقالت: واكيد انا ما حا أتفق انو تتكلم انت
آصف: طيب انتي اتكلمي
وسام: اووف ياخي بتكلم انا خلاص وانت بس هوس لكن اقول شنو!!!؟؟
آصف: اممم.. ممكن تتمي القصه
وسام: اي صح القصه
آصف: احكي
وسام: طيب حاضر حا احكي

والمرا دي وسام ح تحكي من الفلاش باك الفات لي آصف ونحن عشان عارفنو حا نمش لحد اخر حاجه واقفه فيها وسام وبما انو وسام ما حكت لي آصف المرا الفاتت فمنو منكم حا يزكر وسام وين وقفت اخر مرا!!!؟؟؟










وصح قبل نمشي.. حابه ابشركم البارت الجاي حيكون اخر فلاش باك وبعدها ح نكون بنلعب على المكشوف وح نعرف واخيرا السبب الدخل وسام السجن بالتفصيل...



*"فلاش باك"*


















*#يتبع...*
*#صلو على النبي..*


تابعونا


https://www.facebook.com/share/1YHW59jqru/

وعزيزه عليه و فكونو اداني ليها ما كان شي هين بالنسبه لي ابدا وقال أداها ليهو تبوهو زمان لمن بدا يعتمد على نفسو واسي اداني ليها عشان انا كمان بقيت معتمده على نفسي وشغلي.. شلتها وبوستا يدو وكنت فرحانه بكل الحاجات دي ..وطلبت منو امش المطعم عشان احتفل معاهم وصدمني لمن ما عارض وفعلا طلعت الغرفه وانا شايله الهدايا رميتهم في السرير شلت لي فستان حلو لبستو وفوقو عبايه سوداء وكنت مستعجله ومتحمسه شلت شنطة جلد لقيتها في الرف ما متزكره الجابها لي منو بس عمري م استخدمتها ف شلتها وقبل اطلع عاينت للهدايه المجدوعه في السرير ما عارفه ليه بس شلتهم دخلتهم في شنطة الجلد دي وطلعت وأثناء ما انا في السلم جاتني رساله كنت قايلاها من محمد بس انصدمت لمن لقيتها من رضوانه كاتب لي فيها..

*"انا منتظر"*

شفت الرساله وكنت حا انسى وعدي ليهو جريت على غرفة ملاذ لقيتها قاعده ومتوترة ولابسه عبايتها وخاته شنطه جمبها اول ما شافتني ضمتني وبقت تبكي وواضح انها كانت خايفه بس طمنتها انو الحل دا مؤقت لحد ما ابوي يقتنع ويرضى بي رضوان انتو اختفو ليكم كم يوم ومتأكده ابوي حا يخليكم تعرسو.. بس لو قعدتي بكره ح يكون عرسك من حمدي.. ملاذ مسحت دموعها ووافقت على كلامي شالت الشنطه وطلعت معاي براحه البيت كلو نايم اول م طلعنا من البيت هي ضمتني شديد وانا ضميتها وحسيت كأنو دي اخر مرا اضمها فيها ما بس يومين وترجع.. ووقتها فعلا كان داك "الحضن الأخير" وخليتها هي مشت بي اتجاه فيهو قصتها مع رضوان الحا تهرب معاهو وانا مشيت بي اتجاه لي شلتي ولي محمد..

وقتها ما كنت عارفه الليله ديك داسه لي شنو م كنت عارفه انو دي اخر مرا اشوف فيها البيت م كنت عارفه انو بالجد ديك كانت اخر كباية شاي لي مع اهلي ما كنت عارفه انو شنطة الجلد الانا لبستها لاول مرا دي حا تكون سبب في عذابي وفي حاجات كتير.. ماشه وانا مليانه طاقه وفرح بس لمن رجعت للبيت دا تاني كنت واحده مختلفه كنت واحده تانيه خالص عن وسام الطلعت منو...

ساعات بس قلبت حياتي جحيم..
والطبخه الطبخوها لي شلة ماغنيس كل الفتره دي انا اكلت منها في الليله ديك ومن يومها بقيت انا ما انا..















*#حرف السين:*
وسام..
ياسمين..
سويدا..
سوزان..
أسعد..
ساره..
رميساء..
سلافه..
و..
نفيسة..🙈










*#يتبع..*
*#صلو على النبي..*

أسعد: الحركات دي نحن بنعرفها كويس بس هروب تاني مافيييي انتي هنا في سجن المدينه التحت سيطرتي انا واوعك تفكري انك ح تقدري تطلعي منو لانو دا مستحيل وعلى جثتي بس فهمتي؟؟؟

قال كدا وفكاني بقوه وانا والله لا شعري ولا رجلي وجعوني قدر الوجع الحسيتو من اسلوبو وكلامو معاي وقتها حسيت انو دا شخص تاني دا ما نفس اسعد ما نفسو اخووي أسعد ابدا...

-انت شنو ياخييييي

انتبهت على الصوت القال كدا وكان دا آصف عاين لي أسعد وحركة أسعد لي وجعتو شديد كان بجوط بأعلى صوت وهو ما قادر يتفكى من الشرطه الماسكنو..

آصف: انت مستحيل تكوون انسان القدامك دي اختك لو انت ما عارف انا بوريك دي اختك يا حيوااااان حرام عليييك
أسعد مشى عليهو بغضب وقال: انا عارف كويييس دي منو بس شكلك انت الما بتعرفها يا مسكين
آصف: انا عارف كلو حاجه
أسعد : يعني انت عارف انها قاتله؟؟؟
آصف بغضب: ما كان قصدها هي كانت بدافع عن نفسهااااا
أسعد: دقيقه دقيقه انت بتتكلم عن ياتو مرا بالبظبط الكانت بدافع فيها عن نفسها!؟.. لانو حسب علمي القدامك دي قتلت مرتين
آصف سكت عقد حواجبو وقال: مرتين؟؟
أسعد بسخريه: تؤتؤ شكلك بالجد انت الطلعت ما عارف دي منووو بالجد مسكين هههه

قال كدا وبقى يضحك وهو بعاين لي وبعاين لي أسعد انا ما كنت فاهمه شي حتى آصف كمان ما كان فاهمه وجا يتكلم بس بلع لسانو من الصدمه أول ما أسعد أشر علي وقال..

أسعد: القدامك دي هي القتلت صفاء.. هي القتلت صفاء علي اختك يا آصف علي...!!!!!!!!!!!!!!!!!!!!!!!!!!!!!





وتان تان تاااااااااااااااا
































*#صلو على النبي..*
*#يتبع..*