*#إهتــــــــزاز*
*#(بنـات الزنزانة)*
*#نفيسة جلال*
*#عاشــقة الأســ🖤ــود*
*#البارت الخامس عشر*

*"الأُم"*

عوده من الماضي..

كنت بحكي لي آصف بكل حماس عشان اكمل القصه دي.. بس فجأه لمن وصلت النقطه دي حسيت اني رجعت للصفر حسيت اني ضعيفه ونفس التوتر الكان فيني وانا قدام ابوي اللحظه ديك رجع تاني..غمضت عيوني وانا بتزكر في طلبي الطلبتو وغير مجرى حياتي ودمرها كمان...

-انتي كويسه؟؟

كان دا صوت آصف الطلعني من أفكاري ..نسيت انو قاعد اصلا .. هزيت ليهو راسي بمعنى نعم وكأنو هو شايفني وقلت..

وسام: كويسه
آصف: مالك سكتي فجأه وليه نبرة صوتك اتغيرت
وسام: لأنو من اللحظه ديك كل شي اتغير ما نبرة صوتي وبس
آصف: حصل شنو؟؟ طلبتي من ابوك شنو؟

غمضت عيوني ودموعي نزلو.. والله كنت ماسكاهم ما كنت عاوزه ابكي بس غصب عني والله كل الحصل وكل الاتزكرتو خلاني ابكي ورجعني انسانه ضعيفه شديد..بكيت بصمت ودموعي بس نزلت من غير ولا صوت وبالرغم من كدا بس آصف صدمني وهو بقول..

آصف: خلاص لو ما عاوزه تحكي ممشكله بس ما تبكي

بس ما ابكي؟؟؟ دقيقه هو كيف عرف اني ببكي؟؟؟..مسحت دموعي وانا بقول ليهو بي استغراب

وسام: انت كيف عرفت اني ببكي؟

آصف سكت مسافه كأنو هو كمان مستغرب وبسأل في روحو هو كيف عرف اني بتبكي رفع اكتافو وقال..
آصف: ما عارف يمكن ..احساس!!
وسام: احساس!!؟
آصف: ايوا انا..

وقبل يقول حاجه سمعنا صوت زول جاي طوالي هو سكت وفي باب اتفتح رفعت راسي وكانت دي زنزانتي..قبل اشوف دي منو الجات هي سريع سحبتني بقوه ولمن طلعت قدرت اشوفها وكانت دي المشرفه الرسلتها نفحات مع سلافه وقبيل فتحت لي باب المنفرده..  كنت عاوزه سلافه هي التجي تطلعني لاني ما خلصت كلام معاها وعندي لسه اسئله..بقيت بس ماشه وراء المشرفه وهي ساحباني وكنت عاوزه اسألها عن سلافه بس سكت لاني قلت يمكن تشك اني متفقه مع سلافه وتوري نفحات وتعمل لينا مشكلة!!.. مشيت معاها من سُكات ولمن طلعنا السلالم بديت الاحظ من فوق انو الساحه التحت فيها مشرفات كتار وزينه وتجهيز!!!..بس دا كلو لشنو ياربي؟؟؟ والزاد حيرتي انو المشرفات هم البشتغلو والمسجونات كلهم مافي حتى المكان الكنا بنشتغل فيهو انا والبنات كان فاضي بس كان نضيف شديييد.. كنت بعاين لكل البحصل دا بي استغراب وفي مية سؤال في راسي واهم سؤال هو.. هل التجهيزات دي خير او شر؟؟؟؟!!!

-يلا خشي

كان دا صوت المشرفه القطعت حبل افكاري ..كنت سرحانه وما حسيت متين وصلنا الزنزانه فتحت الباب وكالعاده طبعا دفرتني جوا احس انهم بموتو لو ما عملو الحركه الغياظه دي!!.. قمت من الأرض وانا بنفض في روحي عاينت للغرفه ومن غير العاده كانت هادئه شديد..سويدا نايمه وعدن كانت قاعده في السرير بتتكلم مع شاهيناز الأصلا ما عبرتني لمن دخلتا وهي كانت لمن يرموني كدا بتعاين لي بشماته وترمي كلامها بس بالعكس كانت هادئه ولا كأني هنا.. ولمن شفتها اتزكرت قبيل لمن المشرفه ساقتني المنفرده انا لمحتها كانت طالعه من الزنزانه.. ياربي عملت شنو؟؟..وقبل أغرق في التفكير جات علي ياسمين الساقتني سريري وصفاء كانت راقده في سريرها فوق وتقريبا نايمه..

ياسمين: انتي كويسه؟
ضحكت وانا بقعد جمبها قلت ليها: يا بت انا مشيت المنفرده ما المصارعه
ياسمين: في زول بفرح بالمنفرده انتي بالجد شكلك جنيتي
وسام: هو السجن دا كلو مجانين وقفت علي
ياسمين: لا شغله ولا عمله اكيد حا نجن
وسام: على زكر السجن..الحاصل شنو برا؟
ياسمين بي استغراب: حاصل شنو؟
وسام: يابت المشرفات برا قاعدين يركبو زينه ويرتبو وحركات وبركات انا لمن شكيت في واحده منهم دايره تعرس هنا ولا شنو؟؟
ياسمين ضحكت وقالت: ما تستبعدي ديل بستمتعو على نغمات عذابنا اكتر من نغمات الفنان
ضحكت وانا بقول: لا بجد الموضوع يحير انا حاسه انو في حاجه
ياسمين: كان تسألي سلافه
وسام: اوف قبيل سألتها طلعت ما عارفه قالت لي دا بتعمل فيهو نفحات وهي ما عارفه لشنو بس قالت لي انو المشرفه الكبيره عيانه
ياسمين: معقول؟؟..المشرفه عيانه وهي بتزين دا شنو دا؟
وسام: بري ما عارفه
ياسمين: معقوله الزينه دي عشان بكره يوم الزيارات
وسام: قاعدين يزينو السحن لمن يكون في زيارات؟
ياسمين : لا الصراحه دي اول مرا
وسام: معناها الزيارات ما سبب!!

كنا بنتناقش انا وياسمين كدا عن سبب الزينه البرا دي بس من غير فائده اخر حل وصلنا ليهو انو نصبر لي بكره ونشوف البحصل ...بس انا حرفيا كنت خايفه متوتره وحاسه انو حا يحصل شي وانا ما قادره اعمل ولا حاجه..

____________

في مكان بعيد جدا عن بطلتنا ..بس ما اول مرا نمش ليهو

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت السادس عشر*


*"الفاجعة"*

وسام:
كنت خاته يدي في قلبي وانا بتنفس سريع بعد المنظر الشفتو دا؟؟..عاينت قدامي بخوف وبلعت ريقي وكنت بحاول اقرب شويه عشان ارجع اشوفهم تاني وكأني ما مصدقه انو هم هنا!!..قربت شويه ورجعت عاينت للبوابة والعلامه والمشرفات تاني ومن الخوف سريع دخلت الزنزانة ومشيت سريري كنت قاعده بتوتر وقلبي بضرب سريع من الخوف ..انا كنت حاسه والله كنت حاسه انو في حاجه بس بعد شفتهم بقيت متأكده انو الموت جاني برجولو.. انا صح ما عارفه هم هنا لييه بس شوفتهم رجعتني لي أسوأ كابوس انا عشتو وكيف اتعذبت يين يديهم!!..

وسام رفعت راسها وقالت: يارب يارب ما يكون الفي بالي صح وما يجو يسوقوني يارب اا..انا م عاوزه امشي مكان ما عاوزه امشي من هنا م عاوزه م عاوزه

كنت بهز في راسي وبحرك رجولي بتوتر وانا بشد في الملايا من غير احس.. ثناء ما انا بدعي ومتوتره كدا في بت جات داخله الزنزانة بطريقه خلعتني رفعت راسي وكانت دي..

وسام: ياسمين؟؟؟

اول ما شفتها ارتحت شويه لاني كنت خايفه شديد هي جات علي بلهفه وقالت لي
ياسمين: وسام بسم الله مالك؟؟

قعدت جمبي وهي بتقول كدا سندتا راسي في كتفها وغمضت عيوني وقلت..
وسام: مافي شي يا ياسمين
ياسمين: كيف ماف شي شوفي لون وشك دا مخطوف كيف

رفعت راسي عاينتا ليها ما كان نفسي احكي انا مالي عشان كدا قمت منها وانا بقول..
وسام: مالك جيتي انتي الزياره معقوله خلصت بالسرعه دي؟

قلت ليها كدا وانا بقيف جمب الشباك هي جات وقفت جمبي وقالت..
ياسمين: لا الزيارات م خلصت بس انا شفتك من تحت وانتي واقفه وفجأه اتخلعتي ودخلتي الزنزانة..منظرك خلعني وطوالي استأذنت وجيت اشوفك مالك..فعليك الله يا وسام وريني في شنو ..شفتي شنو لمن اتخلعتي كدا وخلعتيني معاك

عاينت ليها وكنت مصدومه في الطيبه العندها دي يعني اسي هي معقوله خلت اهلها الجو عشانها كل المسافه دي وهي ما بتشوفهم كل يوم عشان تجي وتعرف انا مالي؟؟؟.. غطيت وشي بي يدي ومن غير اي مقدمات في دموع نزلو مني بس مسحتهم قبل ياسمين تشوفهم ولفيت وشي منها.. هي ختت يدها في كتفي وقالت

ياسمين: وسام الله يرضى عليك وريني في شنو م تقطعي قلبي

اتلفت عليها وانا خاته يدي على الشباك قلت ليها بصوت ضعيف..

وسام: شفت حاجه كنت بحاول اني اعيش وانساها
ياسمين: شفتي شنو؟
وسام: كابوسي في الواقع شفت الخوف الانا بهرب منو قدامي اليوم كنت فاكره اني اتخطيت وبقيت قويه بس شوفتهم رجعتني للصفر يا ياسمين

قلت كدا وانا بعاين ليها ..هي اتنهدت وقالت
ياسمين: واضح انو العليك كتير رغم القوه الانتي بتحاولي تظهريها دي بس ممكن من غير لف ودوران توريني في شنو بالظبط
وسام: بب..برا
ياسمين: في شنو برا
وسام: المشرفات الكانو لابسين لبس زيتي واخضر
ياسمين سكتت شويه اتزكرتهم وقالت: اي عرفتهم مالهم
وسام سكتت
ياسمين قربت مني وقالت: انتي بتعرفيهم؟
وسام عاينت لي ياسمين جوا عيونها وقالت بوجع وقهر: الناس ديل يا ياسمين انا م بعرفهم وبس ديل لو انا انسى اسمي مستحيل أنساهم ومستحيل أنسى العملو فيني ابداا..ابدا يا ياسمين
ياسمين: عملو شنو؟؟

وسام بلعت ريقها وهي بتحاول تنزل الغصه الوصلت حلقها وتمنع دموعها قالت..

وسام: الما عملوهو شنو يا ياسمين.. في الليله المشؤومه ديك الحصل فيها الحصل انا بي جريمتي اترميت في سجنهم ومن دخلت سجنهم انا ما شفت ولا لحظه من الراحه والسلام.. من جيتهم وهم كانو بعذبو فيني بي كل الطرق الوحشيه الممكن تخطر على بالك قعدت في السجن داك اسبوع واحد بس اسبوع لكن والله كان أسوأ اسبوع يمر علي ..الضرب في السجن داك كان أسهل شي ممكن يحصل معاي..كانو بحبسونا في أماكن ضيقه انا ومعاي بنات كتار في مكان ضيق شديد م بسع لي شخص واحد بدخلونا فيهو ٥ بنات ..كانو بصعقونا كهرباء في اي وقت هم عاوزنو وعادي بتمر علينا ليالي من غير اكل وشراب..كانو المويه البجبوها عشان نمسح بيها الأرض كنا بنشرب منها من العطش يا ياسمين..دا كلو وانا ما جيتك لي أسوأ حاجه وهي اغتصاب البنات من الشرطى والعساكر الرجال..من الرجال المفروض يكون أمن لينا بقو لينا رعب وخوف كان كل يوم لازم نسمع صريخ واحده ونتعذب نفسيا من الأصوات البنسمعها..انا ما حصل واحد جا قرب مني بس في يوم جاني واحد وو..

وسكت ما قدرت اكمل ولفيت وشي ودموعي نزلو غصب عني.. كنت بتزكر في الأيام ديك وانا ما قادره اخد نفسي من البكى الكاتماهو جواي ..في اللحظه ديك كنت موجوعه شديد كان نفسي اصرخ واقعد في الارض واقعد ابكي في حضن ياسمين..بس ما قدرت ما قدرت اعملها ومسحت دموعي وغمضت عيوني وانا بحاول اتناسى الأيام ديك بحاول اكون قويه على قدر ما بقدر و..

ياسمين: وو..وسام

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت الثامن عشر*

*"لم أفعلها"*

بعد كل الكابوس الحصل رجعنا تاني لي زنزانتنا والدنيا كانت ليل..المرا علينا يوم الليله بالجد كان م بتصدق امس دي صفاء كانت معانا واليوم نحن نايمين من غيرها..كنت راقده ولافته وشي على الحيطه ودموعي نازله وانا متأكده انو كل بت في الزنزانه دي حالتها حتكون نفس حالتي..
حاولت ما افكر في صفاء كتير على الاقل قبل ما انوم وبس..لكن ما قدرت وجاني صوت من سريري الفوق بقول..

-وسام..!!

روقو روقو دي ياسمين كانت راقده في سرير صفاء..يعني اكيد صفاء ما حيكون عندها شبح!!.. اتنهدت وانا بقول

وسام: ايوا يا ياسمين
ياسمين: حتى انتي ما قادره تنومي؟
وسام: انوم كيف يا ياسمين.والله خايفه وحاسه انو الآندفنت اليوم قطعه من روحي م صحبتي
ياسمين صوتها بدا يضعف ودموعها نزلو قالت: عارفه البوجع اكتر شنو يا وسام؟
وسام ما ردت
ياسمين بين شهقاتها قالت: انو صفاء ما عاشت ولا لحظه حلوه ضحكت فيها من قلبها عشان نحن نتزكرها بيها.. كل القضتو هنا كان عذاب وموت بالبطئ ..وسام صفاء اتعذبت شدييد ..انا والله زعلانه على موتها بس لحظات بقول انو ربنا شالها مننا عشان يريحها من كل الكانت عايشاهو قدامنا وورانا .. هي ماتت وما لقت لحظه حلوه في الدنيا دي بس بتمنى الموت دا بالجد يكون ليها راحه يا وسام..لانها تعبت والله تعبت

قالت اخر كلمه ورجعت تبكي بحرقه وهي بتتنهد وبتعضي في المخده عشان تكتم شهقاتها.. وانا كمان كنت ببكي بس بصمت ..كل كلمه كانت بتقولها ياسمين كانت زي النار على قلبي وانا بتزكر في صفاء وفي كل شي سئ هي مرت بيهو💔.. فجأه كدا ياسمين اتكلمت وقالت.

ياسمين : انا بس بتمنى اسي انو نعرف منو الكان سبب في موت صفاء عشان تقدر تكون مرتاحه..لانها انظلمت كتير يا وسام ولازم حقها يرجع ليها

وهنا طق اتزكرت حاجه استعدلت في السرير وقلت ليها..

سام: ياسمين صح اتزكرت انتي مش المشرفه أم بخت قالت حا يعملو فحص طبي لي صفاء؟ ؟ عشان يعرفو سبب موتها وقالت كمان حا يحققو في الموضوع دا عشان يعرفو القاتل ..ليه للان ما عملت حاجه؟؟
ياسمين: ما عارفه يا وسام.. ما عارفه
وسام : معقوله ام بخت كانت بتكذب علينا..!؟
ياسمين: ما..

وقبل ياسمين تكمل كلامها سمعنا فجأه صوت عالي من برا خلانا نقوم مخلوعين وصوت عصايات المشرفات على أبواب الزنزانه عشان نصحى لحد ما فجأه الباب حقنا اتفتح بقوه ... ومن الطريقه الاتفتح بيها نحن قمنا مخلوعين ووداد ولعت النور..عاينت للمشرفه الفتحت الباب بالطريقه الوحشيه دي وطبعا كانت..

وسام: نفحات..!!!

دخلت الزنزانة ووراها شاهيناز وكم مشرفه تاني واخر حاجه جات خاشه المشرفه أم بخت!!.. كلنا قمنا وبقينا نعاين ليهو بخلعه وخوف وكنت بتمنى يكون الجاي خير..بس نظرات نفحات كانت بتقول عكس كدا..!!!

-وسام..!؟

كان دا صوت أم بخت القطع حبل افكاري استغربت هي نادتني ليه وبتعرف اسمي من وين؟؟...مشيت براحه وقفت في وش أم بخت ونفحات كانت عاوزه تتكلم بس المشرفه وقفتها..ورجعت عاينت لي من فوق لي تحت وقالت..

أم بخت: انتي وسام؟؟
وسام: ايوا لو بتتزكريني قبيل اتكلمت معاك في دفن صفاء واخر حاجه انتي عملتي ليها المراسم شكرا شديييد بس كمان انتي وعدتيني تعملي تحقيق وتعرفو القاتل صح؟ طيب حصل شنو و..

قاطعتني أم بخت وهي بتقول..

أم بخت: ماف داعي للتحقيق
وسام عقدت حواجبها بي استغراب وقالت: ماف داعي؟ ؟ بس لل..ليه؟؟
أم بخت: لانو خلاص نحن عرفنا القاتل
وسام بفرحه: بجد؟؟؟ طيب منو ولييه ما مسكتو لحد الآن و..
أم بخت: نحن هنا اصلا عشان نمسكو

عاينت ناحية شاهيناز وابتسمت وفرحت شديييد انهم واخيرا عرفو انها القاتله وجو عشان يمسكوها كنت عاوزه امشي عليها واوري المشرفه بكل أفعالها بس وقفت مكاني من الصدمه وانا بسمع في المشرفه بتكمل وبتقول..

أم بخت: والقتلت صفاء طلعت انتي يا وسام عبدالرحيم...!!!!!!

_____________

في مكان تاني بعيد عن الزنزانه..

كانت راقده في الغرفه براها ما جايها نوم وكأنو قلبها حاسيها انو في شي ما كويس.. بس كانت دي عادتها كل يوم في غرفه مفصوله عن راجلها راقده وبتتقلب وبتفكر في بناتها كيف كانو وكيف صارو!!!.. واثناء ما هي سرحانه كدا وبتفكر في حال بناتها..فجأه سمعت صوت خبيط على باب الشارع بطريقه خلت قلبها يوقف و النوم من عيونها طار ..قامت طوالي طلعت برا اتلاقت مع راجلها عبدالرحيم وولدها اسعد في الصاله وهم الاتنين صحو بنفس الخلعه ..ماف زول منهم قال حاجه بس مشو على الباب وهي كانت من جواها بتتمنى انو الجاي يكون خير بس ضربات الباب دي ابدا ما كانت بشارة خير..

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت التاسع عشر*

*"صفحة ممزقه"*

جات داخله الغرفه بي اندفاع شافتني وانا راقده في السرير سرحانه في السقف وبتبسم براي من غير تفكير شالت اقرب مخده وجات علي وبقت تضربني بيها انا اتخلعت لمن لقيتها في وشي حاولت اوقفها ولمن فهمت انها في اخر مراحل الغضب استسلمت وبقيت اجري بس ..وتقريبا المواجهه دي كانت داخل مربع الغرفه لكن متين وصلنا حوش البيت وانا بجري وملاذ وراي بخرطوش المويه بترش فيني واسعد قاعد في الارض بعيد ماسك كيس شيبسي بياكل وبعاين لينا وهو بضحك !!..

ملاذ: اقسم بالله يا وسام م ارحمك

كنت جارية وانا حاسه اني حا اقع من كتر م جريت ومع انو هي م وصلتني لكن حرفيا استحميت بالمويه شفت اسعد من بعيد وبقيت اكورك ليهو عشان يساعدني..

وسام: اسسسسعد اسعد تعال الحقتي واااي يا امييييي
اسعد وهو بضحك: انا ما بدخل بين النسوان
وسام: اسعد اختك حا تموت بطل ظرافه عليك الله الحقنييييي

اسعد عاين لي وضحك بس وما جاني اتغظتا منو بس عملت ليهو حركه بوشي نظام حسابك بعدين واتلفت لي ملاذ وبقيت بحاول استعطفها هي ..

وسام: ملوذه حبيبتي بسم الله عليك اقيفي يا بت جاريه وراي مالك خاشي فيك شيطان انتي؟؟
ملاذ: الشيطان دا حا يخش فيك انتي لمن اصلك يحيوانه
وسام: خلاص اقيفي اقيفي خلينا نتفاهم عايني لي روحك ح تقعي بعد كدا اقيفي عليييك الله انتي م تعبتي

قلت ليها كدا وبقيت ابطئ في الجري لمن لقيتها بدت تقيف وقفت وحمرت لي وقالت..

ملاذ: برضو م حا ارحمك
وسام: طيب سوي العاوزه تسوي بس خلينا نتفاهم طيب؟؟

طبعا كنت واقفه بعيد منها لانها لسه ماسكه الخرطوش ..لقيتها شويه رخت قربت منها وشلت الخرطوش سريع ورميتو وقعدتها في الارض وقعدت معاها وانا باخد في انفاسي..

وسام: عجبك كدا نقصتينا كيلو كامل بالجري دا ونحن اصلا زي سلك الاقاشي
ملاذ: انتي همك في جسمك وانا في مستقبلي الضاع بسببك يا وسخه

قالتها وشدتني من شعري طبعا اسعد قبيل مشى مننا اول م لقى الشغل راق وماف اكشينات😂

وسام بصدمه: مستقبل شنو الضاع يا بت هو انا ياداب بديت انقذو ليك
ملاذ: اي واضح عشان كدا مشيتي طلبتي طلب تافهه زي دا صح
وسام بخلعه: طلب تافهه؟؟ يا بت دا حلمي ودا هدفي من الله خلقني دا ولدي الانتظرتو اكتر من انتظار امي لي لمن ولدتني وتقولي لي طلب تافهه؟؟
ملاذ: *تلفون؟؟*

مسحت وشها بنفاذ صبر وقالت..
ملاذ: في نص المصايب النحن قرقانين فيها دي وانا كلي امل انك تعملي حاجه عشاني وبعد ما القى ربنا هداك وقوى كرعينك ووصلك لحد باب صالون ابوي ووقفك جمبو زي الجبل وادى لسانك دا قدرة يتحرك قدامو تقومي تقولي تلفووووووون؟؟؟؟؟؟؟

قالتها بصوت عالي وقلبها بغلي من الغضب والاستفزاز ..وانا بس كنت منزله راسي وما عارفه ابرر العملتو كيف وياداب بديت احس بشعورها ..

وسام: والله يملاذ انا اصلا كنت عاوزه اساعدك انتي
ملاذ: بالله؟؟ لالا والله ونعم المساعده يعني برافوووو بجد برافووو اصلا دا الكان محيرني متين وسام تقول لي ابوي عاوزه تلفون ياخي انتي كدا شلتي كل همومي تصدقي؟؟؟
وسام بفرحه وهي مصدقه كلام ملاذ: ما انا زاتي قلت كدا و...
ملاذ: يا بت انتي عاوزه تجنينينييييييي وسام الله ياخدك ياخيييي دا شنو العملتي دا ياخ قبيل لمن كنتي قدام ابوي وعاينتي لي قلت خلاص دايره تطلع من خشمها القدر الباب دا حل مستقبلي كلو وانا من كتر م صدقت اديتك نظره لي رضوان ما اديتها وانتي تجي تقولي تلفووون يلفوك في النار يا زفته

لمن لقيتها هايجه وبتردح كدا وقتها عرفت انو ظرافتي في اللحظه دي م حا تنفع ولا الردحي حقي كمان عشان كدا ح نلجأ للفلسفه شويه وبكل هدوء مسكت يديها وهي طوالي نفضتهم مني برضو ابتسمت وقلت ليها ..

وسام: شوفي يملاذ انا عارفاك مضايقه ودا من حقك طبعا انك تضايقي وتعصبي وتدقيني كمان
ملاذ: اصلا دا الحا اعملو
وسام: كدي اتمهلي انتي واسمعيني للنهايه انا اصلا م طلبت التلفون دا ساي
ملاذ رفعت ليها حاجبها بي استغراب؟!
وسام: يعني قصدي انو التلفون دا هو الحل لي مشكلتك يا ملاذ

طبعا هنا ملاذ صلحت قعدتها ورخت ملامح وشها الكانت معفصاها من الزعل وعاينت لي عديل وقالت بتمتمه ..

ملاذ: كك...كيف يعني هو الحل انا ما فهمت
وسام: يابت انتي عمرك م حضرتي مسلسلات وافلام؟
ملاذ: وسام ياخ اتكلمي وريني ح تعملي شنو والتلفون د موقعو شنو من الاعراب
وسام: طيب شوفي انا بالتلفون دا حا اقدر اعمل لي نفسي رقم وحاجه اتواصل بيها مع الناس ومعاك انتي كمان
ملاذ: انتي اصلا قاعده في وشي اربعه وعشرين ساعه التواصل لشنو
وسام زفرت بضيق وقالت: ممكن تسكتي وتسمعيني للاخر..انا صح طلبت التلفون بس صدقيني دا احسن شي عملتو انا حا استفيد وانتي كمان ح تستفيدي اوعدك
ملاذ: فهمت انا حا استفيد بس كيييف كيف يا وسام
وسام: باقي كم للعرس؟
ملاذ: شهر ٢٨ يوم و١٣ ساعه (عاينت في ساعة يدها وكملت) و٤٧ دقيقه

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت العشرون*

*"تيار كهربائي"*

صحيت على صوت عصايات بتضرب في الارض وناس جاين على المنفردة بسرعه انا كنت ياداب بستوعب وبتزكر في الحصل امس شنو حتى م متزكره امس نمت متين وكيف وقبل افهم اي حاجه لقيت الباب بفتح بقوه وفي مرا م كنت قادره اشوف ملامحها مسكتني وجرتني وراها بوحشيه وتنبز وتجر فيني وانا ما فاهمه حاجه ودي منو وفي شنو اصلا بس لقيت انو نحن طلعنا في السلالم ورغم الذله البتذلني فيها دي الا انو بجد فرحت شويه لاني حسيت نفسي حا اشوف النور وحا ارجع الزنزانة تاني.. منو قادر يتخيل انو الزنزانة ديك بقت لي ملجأ وبيت وفرحتي اسي وانا مسحوبه ليها كأني طالعه على بيتي وانا حره.. بس دقيقه دا شنو دا!؟؟؟...

صرخت بصوت عالي وانا بحاول اتفكى منها وانا شايفه الموت قدامي وبصرخ

وسام: دقيقه لالالالالالالا مودياني انتي وين لااااااااااااا

_____________

#مكان آخر..
كانت ماشه وجايه قدامو وواضح التوتر في وشها وهو بس كان قاعد وبعاين ليها وواضح انو هو كمان قلقان بس ما زيها..اتنهد وهو بسألها للمره الالف بهدوء وبقول ..

-هنادي!!.؟ ممكن تفهميني في شنو بديت اقلق معاك والله

هنادي مسحت وشها بتعب وقعدت في الكرسي قدامو دفنت وشها بين يديها وقالت..

هنادي: لازم تقلق لانو الموضوع بالجد بخوف يا حمزه

حمزه مشى قعد جمبها وقال بحنيه..

حمزه: انا ما عارف مالك بس من لحظة جينا من السعوديه وانتي متوتره والتوتر دا زاد لمن مشيتي لي بيت اخوك..ف الله يرضى عليك براحه وريني مالك وشاركيني همك انا راجلك يا هنادي
هنادي ودموعها نزلو: وو..وسام
حمزه عقد حواجبو بي استغرب وقال: وسام بت اخوك؟
هنادي هزت راسها بنعم
حمزه: مالا؟ مش هي سافرت برا عشان تقرا الجامعه
هنادي: طلع دا كذب يا حمزه وسام ما سافرت اي مكان وسام قاعده في السودان هنا
حمزه: وسام م سافرت؟؟ طيب اخوك لي كذب وفهمك انو وسام سافرت وهي وين اسي؟؟
هنادي رفعت راسها عاينت ليهو جوا عيونو وقالت: ف..في السجن
حمزه اتصدم ووقف على حيلو من الخلعه وقال: سجن!!!!؟؟؟؟؟

هنادي طوالي بقت تبكي وحمزه مخلوع ما فاهم اي حاجه غير انو من شهرين هنادي تواصلها مع اخوها كان مقطوع لانهم م بردو عليها ومن فترة ردو عليها واتعزرو ليها انو انشغلو بعرس ملاذ ولمن سالت من وسام كانو بدوها اي عزر لحد م فجأه قالو ليها انو وسام سافرت برا البلد ..ومن وقتها وهنادي فجأه بقت م مطمنه وحاسه انو في شي غلط وكانت بتنق لي حمزه لحد ما اخد اجازه ونزلو السودان واسي هو وهنادي بتصدمو بحقيقة وجود وسام في السودان وكمان في السجن!؟؟؟؟

هنادي وهي بتشهق من البكى: اا.. انا اصلا من البدايه من البداية كنت حاسه انو في شي غلط.. لانو يي يا حمزه عبدالرحيم اخوي مستحيل مستحيل يرسل واحده من بناتو برا السودان وكمان براها!؟؟ وحتى لو قدرت استوعب انو عملها كيف يرسل وسام الصغيرة؟ وبعدين دي ياتو جامعه مشت تقراها وياداب من اسبوع بس نتيجتها طلعت متين لحقت وعملت دا كلو وسافرت.. واحساسي طلع صح واهو وسام طلعت واقعه في مصيبه وفي السجن كمان
حمزه وهو لسه تحت الصدمه: بس وسام في السجن ليه منو دخلها وليه اخوك كان ساكت ليه ما طلعها للان؟؟
هنادي: ما عارفه ما عارفه حاجه انا والله حاسه راسي حا ينفجر ما قادره اتخيل البحصل دا والحا يجنني اكتر انو اخوي ومرتو واسعد وملاذ عايشين عادي وما واضح انهم متأثرين ولا كأنو في مصيبه حاصله انا بالجد حاسه راسي حا يطير من مكانو دا شنو البحصل دا يا حمزه وليه وسام في السجن انا عاوزه افهم كل حاجه انا حا اموت عليها والله

حمزه بس ختا راسو في كتفها وبقى يمشي يدو على راسها وهو كمان متأثر وحالة هنادي خلتو يضايق اكتر..

حمزه: روقي وانا اوعدك انو ح نفهم ونعرف كل شي وكمان وسام ح نطلعها
هنادي: حمزه بس انا عاوزه وسام حتى لو هي بالجد عملت غلط يستحق السجن انا عاوزاها تطلع وبس انت فاهمني؟
حمزه هزا راسو وقال: العاوزاهو انتي حا يحصل ووسام حا تطلع دا وعدي ليك

هنادي بس غمضت عيونها وهي بتسمع فيهو ودموعها نازله وقالت عبارة من جوا قلبها خلت عيون حمزه كمان تدمع معاها..

هنادي: انا الله ما اداني اولاد يا حمزه بس كان عندي وسام وما نفسي اخسرها كمان..

_________________

شمس حاره ومساحة كبيره مليانه رمل وكان في حيط كبير بعيد مني شويه وفيهو باب حديد صغير وانا واقفه في نص الساحه دي والشمس شوت جسمي وبعاين حولي ما كان في اي زول غير كرسين كانو من بعيد كبار وواضحين شديد ما كنت فاهمه اي حاجه وليه المشرفه حابتني هنا ودا شنو البحصل دا؟؟.. فجأه سمعت صوت ضربات قوي وقلبي بقى يضرب مع الصوت لمن حسيتو حا يوقف شويه واستوعبت انو دا الباب القدامي في زول بضرب فيهو بقوه لحد ما الباب جا واقع!!؛..

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت الواحد والعشرون*

*"العذاب الأبيض"*

كانت بتتسحب بهدوء وبتتلفت خايفه زول يشوفها وقفت ورا الحيطه مسافه بعد ما اتأكدت انو الممر فاضي كتمت انفاسها وبقت ماشه على اطراف اصابعها بهدوء ومن جواها ميته خوف وبتعاين في كل الزوايا خايفه زول يشوفها وقتها كل خطتها ح تفشل.. فجأه حست بي ايادي بتجذبها بقوه خلت قلبها يقيف من الخوف وكانت حا تصرخ بس سكتت اول ما شافت الزول الجذبها وقالت بفرحه..

-سلافه..!!!!!!!!!!!
سلافه بي استغراب قالت: بتعملي في شنو هنا انتي؟؟
هي اتجاهلت سؤالها وقالت بحماس: يعني انتي ما تم استبدالك انتي لسه موجوده في السجن دا معانا صح؟؟؟
سلافة: انا ما فاهمه انتي بتقولي فشنو بس انا حولوني حراسة السجن الخارجي وجابو مشرفه غيري جوا
-بالجد!!!.. الحمد لله الحمد لله يارب انا متاكده وساام حا تفرح شدييييييد لمن تعرف انك لسه موجوده و..
سلافه: وسام؟؟.. مش دي القتلت صفاء
-لالالالا صدقينيي يا سلافه والله وسام ما عملتها وسام م قتلت صفاء ودا كلو كان تخطيط شاهيناز ونفحات والقالوهو كلو كذب والله
سلافة: طيب الحقيقه شنو منو قتل صفاء وليه كل الأدله على وسام؟
-دي قصه طويله شديد بس اسي خلينا في المهم.. انا محتاجه مساعدتك شديد يا سلافه
سلافة: مساعدتي؟؟.. عاوزه تعملي شنو انتي؟
-عاوزه اهرب وسام من السجن
سلافه بخلعه: نعععععم؟؟ يا بت انتي مجنونه الموضوع دا مستحيل السجن دا حراستو اضاعفت من الاول ومستحيل اصلا اخليك تهربي سجينه
-بس ياسلافة..
سلافه: حتى لو وسام ما قتلت صفاء بس دا ما بنفي انها قتلت قبل كدا وهي مجرمه
-انا ما عارفه انتو كيف بتصدقو انو انسانه زي دي ممكن تقتل؟؟
سلافة: نحن اتعلمنا انو الشكل ما كل حاجه
-ما حا اجادلك بس لو قررتي تساعديني اديني اشارة بس.. وانا عشمي كلو فيك البت دي مظلومه وانتي عارفه الحاحه دي وكلنا عارفين
سلافه: اديني بس دليل انو وسام م قتلت صفاء وانا حا اقيف معاك
-الشنطة
سلافة: الشنطه؟؟
-شوفي اخر بصمات فيها كانت لمنو وقتها حا تعرفي اذا وسام بريئه او لا

قالت كلامها وجات تمشي بس وقفت بي سؤال سلافه الخلاها تبتسم بسخريه..

سلافة: بس دقيقة انتي منو وليه مهتمه لي موضوع وسام كدا

-اهتمامي بي البت دي عمل انساني ما اكتر.. اما بالنسبه لي انو انا منو..

اتلفتت عاينت لي سلافة جوا عيونها ابتسمت ببراءه وقالت..

-ف انا ياسمين...


تان تان تااااااااااا

ايوا ايوا ظلمتو البت وم طلعت خاينه ....
بس السؤال الذي يطرح نفسو لو البت المع سلافة دي ياسمين طيب الظهرت لي وسام دي منو..!!!!؟؟؟؟؟؟؟

_______________

اتعودت اشوفها كتير ياما اتكلمنا سوى وفضفضنا لي بعض ضحكنا مع بعض واكلنا من نفس الصحن كمان بس ابدا ما اتوقعت انها ممكن تقيف وقفه زي دي في وشي يوم من الأيام وعلى وشها الإبتسامه الخبيثة الخلت ملامحها البريئه مقرفه شديد في اللحظه ديك..

قربت مني غمزت لي بخباثه وقالت
-رايك شنو في السبرايز؟؟
وسام بصدمه: وو..وداد!!!!؟؟؟؟؟
وداد قربت منها وقالت: ايوا وداد يا وسام ودااد
وسام: بب..بس ليه بس ليه يا وداد ليييه
وداد عقدت حواجبها بي استغراب وقالت: ليه؟؟ بعد كل الانتي مريتي بيهو دا ولسه بتسأليني لييه؟؟؟ انتي شكلك نسيتي بس انا حا ازكرك يا وسام نحن هنا في سجن في زنزانة ما في داخليه يعني اتوقعي اي شي من اي حد في اي لحظه كمان
وسام بغل ودموعها نزلو: انتي اخر واحده كنت بتوقع منها تعمل كدا ياخ انتي كنتي معانا شاركتينا وجعنا وبكيتي معانا كيف قدرتي تعملي كدا كيييف معقوله ما عندك قلب معقولة بس ضميرك ما أنبك لحظه و ..
وداد بي انفعال: ضمير؟؟. قلب؟؟. نحن مجرمين يا وسام نحن م دخلنا السجن دا فسحه وسياحه دخلناهو لاننا بنستحقو دخلناهو لانو بشبهه كل الحاجات العملناها برا والنفاق الواجعك اسي دا حاجه بسيطه قدام الحاجات الممكن اقدر اعملها

وسام غمضت عيونها حاولت تهدا وم تضعف قدامها صح الموضوع مؤلم شديد كونك تشوف الانسان الكان ورا ضهرك في يوم ساندك اليوم انت اول م حسيت بطعنه ف ضهرك لقيتو هو الواقف ف وشك بي انتصار وماسك سكينه..

وسام: ما اتوقعت ابدا حاجه زي دي منك.. بس خليني اعترف انك مثلتي علينا كويس كنتي بالجد ماهره في الحاجه دي وانا لحد م اموت م كنت ح اتوقع انك ممكن تخونينا كدا بس ..
وداد قاطعتها: اخونكم؟؟.. انا اصلا ما كنت معاكم عشان اخونكم يا وسام البقاء في السجن دا للاقوى ما للاذكى وقفتي معاكم كانت تجسس وفضول عشان اشوف كيف بتمارسو الغباء حقكم دا بإحتراف بس انا اصلا مع شاهيناز وهي الاختارت انو خضوعي ليها يكون سري عشان انا اكون اليد الحا توجع كل زول بقيف في وشها زي ما وجعتك بي اسي

ما كنت قادره ارد ولا قادره اصدق اصلا كنت حاسه اني بحلم وانا شايفاها كيف بتتكلم بملامح كلها كراهيه وحقد وبغض ..

وداد ضحكت وكانت بتتكلم بقرف وقالت..

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت الثاني والعشرون*

*"مَن آصف..!!؟"*

كنت بعاين لي يد ياسمين الماسكاني وماشه قدامي وجاراني بكل هدوء وراها.. كانت لمستها دافئه وحسيت انها ضمتني بي مجرد المسكه دي.. ويمكن دا شعور طبيعي لي واحده كانت محرومه من الناس والحنيه والدفىء لي ايام.. ايام؟؟
ما كنت قادره اصدق اني طلعت من المنفرده ما قادره اصدق انو انا بين ياسمين وسلافه.. لمن كنت ببكي فجأه نمت من التعب وبعدها حسيت بي اصوات وهمسات واتخيلت انو ديل اكيد الشيطانات نفحات وشاهيناز رفضت ارفع راسي لحد ما حسيت بي ضوء موجه علي وقتها رفعت راسي وانصدمت لمن شفتهم قدامي.. وياسمين كمان واضح انها انصدمت وانا وقتها م كنت قادره اعبر بس ختيت يدي في خشمي وقعدت ابكي اما ياسمين سحبتني برا لاني كنت قاعده في مكان ضيق واول م سحبتني ضمتني شديد وانهارت في البكى وانا ما عارفه هل هي بتبكي بسبب شوقها لي ولا بسبب حالتي..!!
بعد سلامنا الكان قصير جدا بس كان كافي يدخل جواي كمية كبيره من الامان والأمل عاينت لسلافة وانا م مصدقه انها موجوده ضميتها وم كنت قادره اتكلم بس حضني ليها دا قال كتير وهي بادلتني الحضن ودموعها كمان نزلو لانو حرفيا منظري يبكي الحجر..
بعدها طوالي قالو لي نطلع من هنا قبل زول يجي وانا طوالي طلعت وراهم وهم وروني بي الخطه الفي بالهم انو حا يخلوني اهرب من السجن!!!!؟؟
والحاجه دي صدمتني شديد وفجأه ياسمين فكت يدي ولقيت نفسي واقفه تحت شجره برا السجن خالص عاينت لي ياسمين بي استغراب وهي ابتسمت وقالت لي

ياسمين: شعور شنو وانتي ح تكوني حره اليوم؟
وسام عاينت ليها وقالت بدموع: مم.. نا عارفه البحصل د ااا..اكتر من الاتمنيتو يي.. يا ياسمين ..انا بعد الشفتو مع شاهيناز ونفحات كانت اكبر احلامي ارجع زنزانتتا ارجع لي سريري ولي المشاكله التافهه مع كلاب شاهيناز كنت بحلم بالمنفرده يا ياسمين كان نفسي بس ارجغ الزنزانة ارجع اقعد جمبك واسمع تحزيراتك واشرب كباية شاي النعناع من يدك وو.. واتناقش مع صفاء

لمن قلت اسم صفاء هنا ياسمين ما قدرت طوالي ضمتني عليها وبقت تبكي شدييد وانا شديتها اكتر وهي همست وقالت لي ..

ياسمين: انا ما قدرت انقذ صفاء قبل كدا بس انتي لو اموت انا م حا اخليهم يلمسوك

________________

صحت من النوم فجأه وكانت مخلوعه عاينت حوليها لقت الدنيا لسه ليل بس حست انو في شي غريب حاصل!!.. طوالي قامت ومشت على سرير باسمين بس لقتها ماف؟؟؟؟؟ استغربت وكانت ماشه على الباب بس وقفت وعاينت في السرير كان في ورقه رفعتها والورقه كان فيها رساله ليها لانو كان مكتوب فيها بالخط العريض..

*"وداد"*
انا اسفه لاني م وريتيك من بدري بس كل شي حصل بسرعه كنت عاوزاك تكوني معاي وتساعديني بس م حصلت فرصه.. المهم انا اسي طلعت مع سلافه وماشين نشوف وسام وخلينا كل المشرفات يشربو شاي فيهو مخدر ح ينومو فترة طويله وم حا يحسو علينا ولحد الوقت داك بنكون لقينا وسام وكمان حا نهربها عاوزه اقول ليك بس لو حصل اي شي ياريت تداري لينا ويلا سلام..

وداد بعد ما قرت الورقه عيونها بقت زي النار عفصت الورقه بي يدها وجرت لي سرير شاهيناز بقت تصحي فيها بهجوم وشاهيناز صحت وهي مخلوعه..

شاهيناز: فشنو؟؟ وداد دي انتي؟؟ مالك يا بت جنيتي؟؟
وداد: انتي دي الحا تجني بعد تعرفي الحاصل
شاهيناز: فشنو ياخي

طوالي وداد ادتها الورقه وقالت
وداد : شوفي بي نفسك

شاهيناز قرت الورقه وانصدمت وطوالي جدعتها وشالت مفتاح كان مخبى عندها وفتحت باب الزنزانة وطلعت ووراها وداد وكانو متجهين على مكاتب المشرفات ...

______________

ما كنت قادره اوصف احساسي في اللحظه ديك شنو بس كنت مرتاحه وانا شايفه سلافه وياسمين حولي كنت حاسه اني دخلت دائرة الامان ومعاهم ماف زول حا يقدر يأذيني ماف زول حا يقدر يعمل لي حاجه ابدا.. ابداا

ياسمين: وسام؟
وسام عاينت ليها وضمتها وهي ساكته بس دموعها نزلو وياسمين كمان بكت معاها وقالت..

ياسمين بوجع: انا اسفه لاني اتاخرت عليك
وسام: لا.. ما تقولي كدا المهم انك جيتي انا ما كنت فاكره انو في زول متزكرني اصلا

قلت كلامي وزحيت منها وانا بمسح دموعي وببتسم بوجع ..سلافه عاينت لي وشايفه الوجع في عيوني ختت يدها في كتفي وقالت بصوت مليان اسف وندم..

سلافة: انا اسفة على كل لحظه مريتي بيها وما لقيتينا انا كنت بقدر اساعدك من اول لحظه بس وقتها والله ما كنت عارفه انو انتي تحت اشراف نفحات وم كنت عارفه انو نفحات وشاهيناز كانو بعاملوك بكل الوحشيه وعدم الانسانية دي.. لمن لاقتني ياسمين وقالت لي لازم نهربك وقتها كنت محتاره وم قادره اعمل شي عشانك لانو جوا عقلي انتي ارتكبتي جريمه وتستحقي تتعاقبي وكان مفروض اسوي فحص للشنطه عشان اتاكد انك ما انتي العملتي الجريمه دي..

*#إهتــــــــزاز*
*#(بنـات الزنزانة)*
*#بقلم:نفيسة جلال*
*#عاشــقة الأســ🖤ــود*
*#البارت الثالث والعشرون*

*"الصفحة الأخيرة"*

واقفه قدام المرايه بسرح في شعري وانا سرحانه بتزكر في الاحداث الحصلت اليوم الشيله الجابوها وتحديد موعد العرس ..وفي نص دا كلو اتزكرت رد فعل رميساء لمن واجهتها بمجموعة *Magnis|ماغنيس*

""
كانت قاعده وماسكه التلفون وبتصور في الشيله والعريس والعروس والاهل المتجمعين وقتها مشيت وقفت جمبها هي ابتسمت لي وانا بادلتها الابتسامه وقلت ..

وسام: انا وسام اخت العروس وانتي؟
هي عاينت لي وقالت: وانا رميساء.. بت خالة العرسان
وسام: اتشرفنا
رميساء: شرف الله قدرك حبيبتي

وسام سكتت مسافه وهي بتعاين للاسوارة الفي يد رميساء ما كانت قادره تصدق هي متاكده انها دي نفس الاسواره ..

وسام: رر..رميساء!!
رميساء لاحظت لتوترها عاينت ليها بي استغراب وقالت: اتفضلي

وسام كانت مثبته عيونها على الاسواره ورميساء لاحظه للحاجه دي وقالت

رميساء: في حاجه؟
وسام: اسوارتك حلوه
رميساء ابتسمت وقالت: تسلمي حبيبتي انتي الاحلى
وفجأه من غير مقدمات هاجمتها بسؤالي وانا بقول بعد الفضول اكلني..

وسام: انتي تبع مجموعة ماغنيس الخيريه؟؟

صدمه!!.. دا كان رد فعلها الصدمني انا زاتي فجاه لقيتها اتوترت وبقت تعاين حولينا كأنها خايفه زول يسمعنا وقالت ..

رميساء: مم..مجموعة شنو م فهمتك انا

استغربت في رد فعلها بس م قلت شي طلعت التلفون وجبت واحد من الفيديوهات المحتفظه بيهو ليهم فتحت وكبرتا الصوره على بت معينه كانت محجبه ولابسه فستان ابيض وقلت ليها

وسام: دي انتي صح !!؟

رميساء هنا فتحت عيونها من الصدمه وواضح انها اتوترت شديد حتى وشها بدا يعرق شالت التلفون مني وخبتو سريع وعاينت حوليها ورجعت عاينت لي وقالت..

رميساء: تعالي

قالت الكلمه دي وهي بتطلع برا البيت مشيت وراها وكانت واقفه متوتره قالت لي ..

رميساء: انتي متابعه شلة ماغنيس الخيريه؟
وسام: ايوا متابعاكم.. بس انتي ليه اتوترتي كدا لمن جبت سيرتها
رميساء: ماف شي.. بس اسمعيني م تجيبي سيرة المجموعه دي قدام اي زول نهائيا فاهمه؟..ما عاوزه زول يعرف اني مع الشله دي
وسام بستغراب: بس ليه؟؟ انتو بتعملو في عمل خيري وحلو شديد مفروض تفرحي لو زول عرف وتكوني فخوره كمان بس ليه دايره الموضوع يكون سر
رميساء: بس كدا يا وسام الله يرضى عليك خلي الموضوع دا بس سر وماف زول يعرفو ابدا حتى أهلي نحن صح بنعمل لي شي خيري بس اهلي شويه صعبين وما ح يرضو بفكرة اني بعمل مع اولاد وبظهر في الميديا .. فا انتي لو وريتي حد خليك متاكده انك بتكوني كتبتي نهاية شلة ماغنيس بي يدك ف الله يرضى عليك خليك ساكته
وسام: طيب بس كيف الموضوع ح يفضل سر وانتو مشهورين في مواقع التواصل
رميساء: ما تخافي نحن بننشر في التيك توك بس واهلي ما شغالين بالتيك توك ابدا وماف زول عندو ..وحتى لو نزلو نحن م بتظهر فيديوهاتنا الا للناس المسوين متابعه فهمتي!؟

وسام سكتت ما قالت شي ورميساء مسكت يدها وقالت..
رميساء بنبره كلها ترجي قالت: الله يرضى عليك ممكن تحتفظي لي بي سري دا؟؟
وسام عاينت ليها مسافه وبعدين هزت راسهاا وقالت: ما تخافي سرك في امانتي وبندفن معاي لين اموت
رميساء: شك...

-سر شنو!!؟

قلبي وقف من الصدمه ورميساء دي اطرافها بردو اول م سمعت الصوت دا اتلفتنا عليهو ورميساء عاينت ليهو وقالت بخلعه..

رميساء: حح..حمدي!؟
حمدي رفع حاجبو بستغراب وقال: بتقولو فشنو انتو وسر شنو البتخبو

طيعا انا اتوترت وم كنت عارفه اقول شنو ورديت وقلت..

وسام: السر انو رميساء..
رميساء طوالي قاطعتني وقالت ليهو بضحكه كدا: السر انو انا بعمل كريم في وشي وهي كانت دايره تعرف وانا قلت ليها بوريك بس خلي سر عشان ما كل الناس يبقو حلوين هههه
حمدي ابتسم بي سخريه وقال: هه.. امور بنات
رميساء: اي بس ما تخت في بالك.. المهم عن اذنكم حا امشي ليهم جوا عشان اكمل تصوير

قالت كدا ودخلت خلتني واقفه مع حمدي برانا عاين لي وانا اتوترت م عرفت اعمل شنو بس نزلت راسي واستاذنت عشان امشي بس وقفت بي صوتو وهو بقول ..

حمدي: دقيقه!!

قالها وجا وقف قدامي دخل يديهو في حيبو وقال..
حمدي: انا عارف انو رميساء ما قالت الحقيقة فممكن انتي كمان م تكذبي!؟

لمن قال كدا تاني رجعت اتوتر وبقيت مترددة وانا ما عارفه اقول شنو هو لاحظ لتوتري وقال ..

حمدي: ما تكذبي لانو ما معروف الكذبه دي عقوبتها تكون شنو

ما عارفه ليهو هو بخوفني كدا انا متاكده الموضوع عادي واصلا هم في يوم ح يعرفو الحقيقه بس م حا اخليهو يعرفها مني هنا ابتسمت غصب وانا بقول بثقه مذبذبه ..

وسام: ماف كذب ولا شي زي ما قالت ليك رميساء كنت بسالها عن كريم هي بتستخدمو ..امور بنات!!