#архітэктурабсср
Расійскі "Дзяржкаталог" выклаў у вольны доступ фотальбом з унікальнымі фотаздымкамі з будаўніцтва і адкрыцця Дома Ураду ў Менску, які захоўваецца ў фондах Дзяржаўнага музея гісторыі Санкт-Пецярбурга. Першая партыя здымкаў з першай стадыі будаўніцтва.

#архітэктурабсср #людзібсср
Старшыня СНК БССР Мікалай Галадзед з інспекцыяй на будоўлі Дома Ураду ў Менску ў 1933 годзе.
Крыніца: Дзяржаўны музей гісторыі Санкт-Пецярбурга.

#архітэктурабсср
Фінальная стадыя будаўніцтва Дома Ураду ў Менску.
Крыніца: Дзяржаўны музей гісторыі Санкт-Пецярбурга.

#архітэктурабсср
Урачыстае адкрыццё Дома Урада і помніка Леніну перад ім у Менску 7 лістапада 1933 года.
Крыніца: Дзяржаўны музей гісторыі Санкт-Пецярбурга.

#архітэктурабсср #людзібсср
Людзі, якія працавалі над будаўніцтвам і мастацкім афармленнем Дома Ураду ў Менску. На апошнім фота камісія па адчыненню будынка ў складзе якой быў і архітэктар Іосіф Лангбард.
Крыніца: Дзяржаўны музей гісторыі Санкт-Пецярбурга.

#архітэктурабсср
Магілёў. Дом імя Леніна на фота канца 1930-х гадоў. Будынак захаваўся (толькі надпіс з назвай дома знік, хутчэй за ўсё збіты ў часы акупацыі), знаходзіцца па адрасе Першамайская, 22.

#архітэктурабсср
Нядаўна адмін канала "Красивое из Минска" знайшоў у архіве БДАНТД фотаздымак міжваеннага жылога дома, які стаяў на рагу цяперашніх вуліц Гарадскі Вал і Рэвалюцыйнай (сёння на гэтым месцы знаходзіцца сквер Адама Міцкевіча). Асаблівасцю гэтага дома з'яўляецца тое, што ён рэдка трапляў на фота, а калі і трапляў, то толькі нейкай сваёй часткай (і гэта, відаць, першае яго фота, дзе дом бачны цалкам). Таксама пра яго амаль нічога невядома, ні імя архітэктара, ні для каго ён будаваўся. Вядомая толькі дата пабудовы - 1929 год (і тая з даваеннага фотаздымка, дзе яна напісана на фасадзе), а таксама дата зноса - 1975 год, калі на месцы дома і быў арганізаваны сквер.
Дарэчы, дом мог быць перабудаваным з дарэвалюцыйнага будынка, бо на аэрафотаздымку часоў Першай Сусветнай на гэтым жа месцы бачная іншая пабудова прыкладна такіх жа габарытаў (у 1929-м для пабудовы новага дома мог быць выкарыстаны, напрыклад, падмурак старога).

#архітэктурабсср
Толькі зараз зразумеў, што паводле генплана Менска 1936 года, планавалася аднаўленне Брэсцкага вакзала.
Гэта быў першы пасажырскі вакзал у горадзе, адчынены ў 1871 годзе разам з Маскоўска-Брэсцкай чыгункай. Ён знаходзіўся ў раёне цяперашніх вуліц Суражскай і Маскоўскай прыкладна ў тым месцы, дзе зараз прыпыначны пункт "Інстытут культуры". З 1928 года гэты вакзал не прымаў пасажыраў, а ў вайну быў разбураны. Дарэчы, сучасны Мінск-Пасажырскі - гэта былы Віленскі вакзал, пабудаваны пасля адкрыцця Лібава-Роменскай чыгункі ў 1873 годзе.
Згодна з графікай да генплана 1936 года - планавалася адрадзіць былы Брэсцкі вакзал ў сучасным для тых часоў выглядзе і разбіць перад ім цэлую Вакзальную плошчу на месцы кварталаў прыватнай забудовы. Гэтыя планы да вайны так і не пачалі рэалізоўваць, мабыць, усе сродкі пайшлі на рэканструкцыю станцыі Мінск-Пасажырскі, якая завяршылася ў 1940 годзе.

#звязда #архітэктурабсср
Цікавая заметка з газеты "Звязда" №165 1939 года - аказваецца, што жылы дом па сучасным адрасе 3-ці Чыгуначны завулак д.12 у Мінску, у 1939 годзе быў пабудаваны за рэкордныя 45 рабочых дзён брыгадай з 140 чалавек. Ня гледзячы на такі кароткі тэрмін пабудовы, гэты дом стаіць на тым самым месцы дагэтуль.

#архітэктурабсср
Знойдзены аўтар даваеннага будынка з сучасным адрасам Мінск, вул.Броўкі дом 5 - ім аказаўся архітэктар 2-й праектнай майстэрні пры Наркамаце Аховы Здароўя СССР - А.А.Апресян (звесткі пра яго дрэнна гугляцца, удалося знайсці толькі тое, што пасля вайны ён працаваў у Ленінградзе і займаўся распрацоўкай тыпавых праектаў жылых дамоў і чыгуначных вакзалаў).
Як бачна з дадатку №22 да "Архитектурной газеты" 1937 года - будынак сапраўды праектаваўся, як корпус Медыцынскага інстытута, але да пачатку вайны завяршыць яго не паспелі, у пасляваенныя гады ў будынку размяшчалася абласная дзіцячая бальніца. Зараз будынак закінуты і не выкарыстоўваецца, ёсць звесткі пра тое, што яго збіраюцца знесці.

#архітэктурабсср #піонэрархнаглчд
Малавядомы канструктывізм з Шклова.
Жылы будынак на Фабрычнай вуліцы (тапаніміка хутчэй за ўсё таксама 1920-х). Па стылю падобны на чыгуначную паліклініку з Гомеля 1928 года пабудовы. Хутчэй за ўсё гэты будынак таксама канца 1920-х. Першапачатковае прызначэнне мне невядомае, зараз тут жылы дом і крама.

#архітэктурабсср
У дадатку да "Архитектурной газеты" №2 за 1937 год знайшоўся яшчэ адзін раней невядомы архітэктурны аб'ект Менска, які, хутчэй за ўсё, так і не быў рэалізаваны. Гэта праект будынка дзіцячай клінікі ў сталіцы. Ён, як і раней згаданы корпус медінстытута на Броўкі 5, быў распрацаваны 2-й архітэктурнай майстэрняй пры Наркамаце аховы здароўя СССР, архітэктар Якаў Яўсеевіч Астроўскі (пра яго інфармацыі вобмаль, канал @radiosnapkouski дапамог знайсці гады яго жыцця 1900-1964 і поўнае імя).
Патрэба ў новым корпусе для дзіцячай клінікі была відавочная, бо, прынамсі, да 1940 года такая клініка размяшчалася ў дарэвалюцыйным доме на вул.К.Маркса 20. На жаль, слядоў новага будаўніцтва ў такіх формах, як у праекце, на тэрыторыі даваеннага Менска не знаходзіцца. Хутчэй за ўсё да рэалізацыі гэтага праекта так і не прыступілі.

#архітэктурабсср #беларускаявёска
Выявіўся яшчэ адзін архітэктурны аб'ект міжваеннага Менска, які быў адчынены ў гадавіну Вызвалення Беларусі ад белапалякаў 11 ліпеня 1930 года - гэта рабочая паліклініка і амбулаторыя на сучаснай вуліцы Мяснікова 26 за аўтарствам менскага архітэктара Герасіма Якушкі (пра адкрыццё амбулаторыі ў 10-ю гадавіну пісала газета "Беларуская вёска" №77 1930). Будынак захаваўся да нашага часу амаль у незмененым выглядзе, адзінае, што страцілася арыгінальная двухколерная расфарбоўка фасадаў, характэрная для тагачаснай архітэктуры пачатку 1930-х гадоў.

#архітэктурабсср
Дарэчы, першапачатковы праект Вялікага (опернага) тэатра БССР, закладка каторага адбылася 11 ліпеня 1933 года ў гадавіну Вызвалення Беларусі ад белапалякаў на пл.Парыжскай камуны ў Менску, выглядаў так.
Праект быў створаны тагачасным галоўным архітэктарам сталіцы Георгіем Лаўровым на безконкурснай аснове. Праект быў зроблены ў стылі савецкага канструктывізма, час каторага адыходзіў. Ужо ў 1934 годзе на дзяржаўным узроўні быў абвешчаны пераход да асваення класічнай спадчыны ў архітэктуры, таму ў тым жа годзе быў праведзены конкурс на будынак Опернага тэатра, на якім перамог праект Іосіфа Лангбарда, які і быў рэалізаваны.

#архітэктурабсср
Фотаздымкі 1930-х гадоў канструктывісцкага клубу чыгуначнікаў у Гомелі са збораў Музея архітэктуры імя Шчусева ў Маскве.