#እናትፓርቲ

" አማራ ክልል በተሟላ ጦርነት ውስጥ ነው። በየቀኑ ሰዎች በድሮን ጭምር ይጨፈጨፋሉ። ኮሚሽኑና መንግስት ደግሞ ' የለም እየሞትክም ተመካከር' ' ይላሉ ! " - እናት ፓርቲ

እናት ፓርቲ የኢትዮጵያ ሀገራዊ ምክክር ኮሚሽን በአማራ ክልል ባደረገው አጀንዳ የማሰባሰብ ሂደት ያልተሳተፈበትን ምክንያትና የኮሚሽኑን አካሄድ በተመለከተ የሰላ ትችት ሰንዝሯል።

Q. በክልሉ አጀንዳ የማሰባሰብ ሂደት ያልተሳተፋችሁበት ምክንያት ምንድን ነው? ኮሚሽኑ ‘ይምጡ በራችን ክፍት ነው’ ይላል፤ እናንተ ደግሞ እየተሳተፋችሁ አይደለምና ልዩነቱ ምንድን ነው? መፍትሄውስ?

እናት ፓርቲ ፦

" ግልጽ ነውኮ! ክልሉ በተሟላ ጦርነት ውስጥ ነው ያለው፡፡ በየቀኑ ሰዎች በድሮን ጭምር ይጨፈጨፋሉ፡፡ በአጠቃላይ ከባድ ውድመት እየደረሰ ነው፡፡

በክልሉ ለሚሊዮን የሚጠጉ ተፈናቃዮች፤ በብዙ ቦታዎች ከፍተኛ ድርቅና ሰው ሰራሽ ረሃብ አለ፡፡ ለሕዝቡ ጥቅም ሊሟገቱ የሚችሉ በርካታ ምሁራንና ፖለቲካኞች በእስር ናቸው ወይም ተሰደዋል።

በየሳምንቱ ዜጎች እየታገቱ በሚሊዮን የሚቆጠር ገንዘብ ይጠየቅባቸዋል፡፡ በክልሉ እንኳን ምክክር ሊያስደርግ የሚችል አውድ ገበያ ወጥቶ ቤት ለመግባት፣ ነብሰጡርን ሀኪም ቤት መውሰድ፣ ህፃናትን ትምህርት ቤት መሄድ፣ ከቦታ ቦታ መንቀሳቀስም ብርቅ ሆኗል፡፡

ማህበረሰቡ 'የህልውና ችግር ገጥሞኛል በቅድሚያ እሱን ፍቱልኝ' (quick fix) እያለ ነው፡፡ ኮሚሽኑና መንግስት ደግሞ 'የለም እየሞትክም ተመካከር” ይላሉ።

በእነዚህ አበሳዎች ውስጥ ያለን ማህበረሰብ ነው ለፖለቲካ ትርፍ ሲባል 'ናና  አዲስ ማኅበራዊ ውል ለሚፈራረምበት ምክክር አጀንዳ አዋጣ'፣ ተመካከር' የሚባለው?

ኮሚሽኑ ከነችግሩ መጀመሪያ የነበረውን አቋም ወደመያዝ መመለስ አለበት፡፡ ኮሚሽኑ ለመንግስት የፕሮፓጋንዳ መሳሪያነት እየዋለ ነው። እንደዚያ መሆናቸውን ያቁት ይሆን አይሆን እርግጠኞች አይደለንም።

መፍትሄው፥ በአጠቃላይ ከምክክሩ በፊት ድርድር መቅደም፤ ተኩስ መቆም አለበት፡፡ ጦርነቱ ፖለቲካዊ መፍትሄ ያሻዋልል።

የኮሚሽኑ ሰዎች ያ እንዲሆን ባላቸው ተጽዕኖ በጎ አስተዋጽዖ ቢያሳራፉ ውለታም ጭምር ነው፤ ካልሆነ ግን ቢያንስ በሰው ቁስል እንጨት ከመስደድ ቢቆጠቡ እንመክራለን” ብሏል።

Q. በአማራ ክልል አጀንዳ ማሰባሰብ ሂደት እንደማትሳተፉ ገልጻችሁ ለነበረው በተለይም "ቅድሚያ ጦርነት ይቁም" የሚለውን ሀሳባችሁን ኮሚሽኑ ምላሽ ሰጠበት ? 

እናት ፓርቲ ፦

" እንደማንሳተፍ የሚገልጸውን ደብዳቤ ለኮሚሽኑ ከላክንና ለህዝብ ይፋ ካደረግን በኋላ በሚዲያዎች በኩል በተወሰወነ ደረጃ መልስ የሚመስል ነገር ሰጥቷል።

ሀሳቡ የሚጣል እንዳልሆነና በጊዜ ሂደት (እስከዚያው) የተጠቀሱ ችግሮች ይፈታሉ ብለው እንደሚያምኑ የሚያወሱ ነበሩ፡፡ 

ከሦስት ሳምንታት በፊትም ከክልሉ ባለስልጣናት ጋር በባሕር ዳር ተገኝተው በተወያዩበት ወቅት እኛ ያነሳናቸውን፥ መንግስት በራሱ ተነሳሽነት ተኩስ አቁም እንዲያውጅ፣ እስረኞችን እንዲፈታ የሚሉትን ቅድመ ሁኔታዎች አንስተዋቸዋል።

ግን አጠንክረው አልዘለቁባቸውም፤ አይዘልቁባቸውም፡፡ "

Q. ኮሚሽኑ በአዲስ አበባ አጀንዳ ማሰባሰብ ሲጀምር ተሳትፋችሁ ነበር፤ ከዚያ በኋላስ በሌሎች ክልሎች (ለምሳሌ በኦሮሚያ) ተሳትፋችሁ ነበር ?

እናት ፓርቲ ፦

"አዎ ተሳትፈናል፡፡ በአጠቃላይ የፓርቲያችን እምነት በዋናው ምክክር ላይ ቅድመ ሁኔታዎች ቢኖሩንም በአንጻራዊነት ለመመካከር የምትሆን ክፍተት ከተገኘች ለዚህ አገር ከምክክር የተሻለ መፍትሄ ይኖራል ብለን አናምንም፤ ያንንም ከማንም በላይ ስናቀነቅን ቆይተናል፡፡ 

የአስቸኳይ ጊዜ ዐዋጅ መነሳትን ጨምሮ ሌሎች ቅድመ ሁኔታዎች እንዳሉ ሆነው የመነመነም አስቻይ ሁኔታ አለ ብለን ስላመንን አድርገነዋል፡፡"

Q. በአማራ ክልል በነበረው ሂደት ኮሚሽኑ ምን ክፍተቶችን ቢያስተካክል አሁንስ አጀንዳችሁን ታስረክባላችሁ ? ነው ወይስ ከዚህ በኋላ አጀንዳ የማስገባት እቅዱ የላችሁም? ከሌላችሁ ለምን ? 

እናት ፓርቲ ፦

" የእኛ የቅድሚያ ቅድሚያ ጉዳይና ሆድ ቁርጠት የህዝብ ደህንነትና በሰላም ወጥቶ የመግባት ሁኔታ ነው።

የመሳሪያ ድምጽ በቅድሚያ ፀጥ ይበል፣ የፖለቲካ እስረኞች ይፈቱ፤ በአንድም በሌላም ከምክክሩ ራሳቸውን ያገለሉ ኃይሎች እንዲመለሱ ይደረግ። በተለይ አሁን አሁን ደግሞ የኮሚሽኑ ለመንግስት ያደላና ፖለቲካዊ ዝንባሌ ያለው አካሄድ ካልተስተካከለ አጀንዳ ማቀበሉንም አናደርገውም ከዋና ምክክሩም ለመግባት ይቸግረናል።

ኳሱ እነርሱ እግር ላይ ነው፡፡ እንዲያውም አሁን አሁን አንድ ሥጋት እየጫረብን የመጣ ጉዳይም አለ፡፡ ምን አልባት እንዲህ እያጓተቱ ምርጫ 2018’ን ለመጋፋት እንዲውል ሊያደርጉት ይሆን? የሚል። " 
 
Q. የምክክር ኮሚሽኑ በተለያዬ ክልሎች ያካሄዳቸውን አጀንዳዎች የማሰባሰብና የመረከብ ሂደቶች እንዴት ገመገማችኋቸው ? ምንስ መስተካከል አለበት? ምንስ ጥሩ ጎን አለው ?

እናት ፓርቲ ፦

" በአጠቃላይ በጣም ጥሩ ባይባልም መጥፎ የሚባል አልነበረም፡፡ እንዲነሱ የያዝናቸው አጀንዳዎች በተለያዩ አካባቢዎችና የማኅበረሰብ ክፍሎች ጉዳይ ሆነው ሲነሱ ታዝበናል፡፡ አብዛኛው ሰው አዲስ ማኅበራዊ ውል ሰርተን የተሻለች ሀገር እንድትኖረን የመናፈቅ ነገሩ ይታያል።

በአንጻሩ በርካታ ለብልጽግና ታማኝ የሆኑ ሰዎች እንዲሳተፉ የማድረግ፣ በአንዳንድ ቦታዎችም ጭሬ ላፍሰው ዓይነት አካሄዶችን ታዝበናል፡፡ ወደ ፊት የመራመድ ጥማት ሳይሆን ወደ ኋላ የመመለስና የብጥበጣ ዓይነት አዝማሚያም አስተውለናል፡፡

ኢትዮጵያን ከስሟ ጀምሮ ክዶ የመነሳትና ፖለቲካ ወለድ ጉምዠታና የኔ፣ የኔ ዓይነት ነገሮች ነበሩት፡፡ ኮሚሽኑን ደጋግመን እንዳሳሰብነው የማይታለፉ ቀይ መስመሮች ይኖሩታል ብለን እናምናለን።

ምክክር ያስፈለገው ከነበረው የተሻለ ለመጨመርና ጥሩ ለማድረግ እንጂ ጭራሽ ያለንንም ለማጣት እንዳልሆነ ማስታወስ አይከፋም" ብሏል።

(ፓርቲው በአማራ ክልል ጉዳይ ስላነሳው ሀሳብ በቀጣይ ይቀርባል)

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia