#بعد_صبر #2و 1
بقلمي:#Noona_Elnour

بعد يجي زياد ما بقدر اخد راحتي عشان كدا بمشي بيتنا احسن بعد شربنا الشاي منن اتجهزت وودعتني وطلعت بعد مسافه التلفون إتصل وكان دا زياد سلمت عليه حبيبي كيفك وربي مشتاقين اخبارك والشغل كيف معاك م تعرف انا مشتاقه ليك قدر شنو اها جاي متين ؟ رد لي لسه يومين تلاته كدا طبعا أستغربت من جوابو لكن قلت عادي عشان هو عاملها مفاجأة وما عايز يخربها اتونست معاهو لمن قريب وقت الفطور بعدها قفلت منو خشيت استحميت و فطرته لبست عبايتي ومشيت السوق اشتريت لي توب وعبايه وكم جلباب بعدها طوالي علي الكوفير ماما اتصلت لي واتونست معااي ساتني دا شنو الهواء دا قلت ليها انا بره البيت عشان كدا قالت لي مشيتي وين قلت ليها ماشه الكوفير عشان زياد جاي لكن خلي الكلام دا بيني وبينك بدتت تتمتم قالت لي كيف جاي الليله قلت ليها اي بي طايره الساعه 9 م عشان كدا ماشه اتمزز وكدا قالت لي خلاص تمام اعملي حسابك قلت ليها تمام مشيت هناك عملو لي حناء تقول يا انا مع اللون بقيت نجفه وعملت ميج بسيط بالعنابي وعملت لي تاتو و منكير لمن ما اتعرفت علي نفسي رجعت البيت رقدت نمت ما صحيت الإالمغرب قمت صليت وبخرت البيت حضرت البرنامج الساعه كانت سبعه ونص قمت صليت العشاء واتجهزت لبست عبايتي الجديده سقت عربيتي وطلعت وصلت المطار وبقيت قاعده في الانتظار قاعده لمن تسعه وكم دقيقه بقيت متلفهة ومقلقله عشان اشوفو بتلفت وبعاين للمسافرين الجو. من بعيد لمتحو بس كانت معاهو واحده ماسكاهو من يدو لابسه فستان حكلي وجميله شديد بقيت بسال بيني وبين نفسي دي منو وماسكه يدو لي وهو لي ما فكاها؟ صبت فيني مطره يا ربي انا بتخيل ولا دا شنو من مكاني ما قدرت اتحرك بعد شويه شايفه في راجل وبت شكلها مرتو وقفو معاهم وسلمو عليهم والابتسامه ما فارقت وشو ووش البت المعاه بقيت مركزه معاهم وانا مصدومه من البشوفو دا . الراجل والبت الكانو جنبهم اتحركو وجاين اتجاهي وطوالي قعدت قلبت عكس عشان ما يشوفني بس سبحان الله البت جات قعدت جنبي راجلها قال ليها نسيت الباسبورت حقي اقعدي هنا اجيبو واجي خت الشنط حقتهم جنبها وفات انا قاعده بس كل شويه بتلفت وبعاين لي زياد والبت المعاه دي. جاتني فكره قمت سلمت عليها وسالتها من الراجل معاها قالت لي دا راجلها اتونست معاها عشان اديها إحساس الامان واحاول اسئلها من دون م تشك او تحس بشي بعد مسافه قلت ليها بتعرفي.......

#بعد_صبر3
بقلمي : #Noona_Elnour

جاتني فكره قمت سلمت عليها وسالتها من الراجل معاها قالت لي دا راجلها اتونست معاها عشان اديها إحساس الامان واحاول اسئلها من دون م تشك او تحس بشي بعد مسافه قلت ليها بتعرفي الراجل والبت ديك قبلت واشرت عليهم قالت لي اااا داك ذياد والجنبو البت الحلوه ديك اسمها روان بتكون مرتو مع كلاما دا وقفت علي حيلي بحاول استوعب هي بتقول في شنو بقت بتنده لي سمر ي سمر خير مالك وقفتي في شنو قعدت جنبها قلت ليها ولا حاجه انتي متاكده انهم متزوجين قالت لي اي لانو عرفناهم من كنا في قطر كانو قاعدين في الشقه الجنبنا وهم عرسان جداد وفاتو قطر عشان يقضو شهر العسل مع كلامها دا دموعي جرت بدون وعي قمت جاريه خليت سلافه بتكورك وبتناديني فضلت جاريه وببكي لمن طلعت من المطار ركبت عربيتي وسقتها بسرعه عاليه وصلت البيت في وقت جيز دخلت وانا مصدومه دا شنو البحصل دا يا سمر معقول كلام سلافه دي صح مستحيل زياد يكون عرس فيني لا هو بحبني ما بعملها بقيت قاعده بقول اكيد دا حلم انا اكيد بحلم وهسي حاصحي فضلت علي حالتي دي لمن الساعه ٢ صباحا وقت المنبه دقه اصلا انا ضابطاه علشان اصحي اصلى وادعى ربنا يرزقني بالذريه الصالحه لمن دقه المنبه وعيت علي انو دا واقع ما حلم بقيت ببكي بحرقه كيف بس يجي من قلبو يعمل فيني كدا يمكن انا قاعده علي الحال دا لمن الشمس شرقت بعدها هديت شويه دخلت غيرت ملابسي وصليت وقلت حانتظر زياد أشوف حيقول شنو اكيد في شيء غلط وهو لازم يبرر لي. خليت الواطه اصبحت اتصلت علي زياد بس تلفونو بديني مغلق فضلت اليوم كلو مغلقه اتصلت لي منن قالت لي صوتك دا مالو كدا يا بت انتي كويسه قلت ليها انا كويسه وقت م صدقتني اظطريت وكذبت عليها قلت ليها عندي وجع حلق قالت لي سلامتك. سالتني عن زياد بس خفت احكي ليها حاجه انا ما متاكده منهاوقلت ليها ما جاء. قال بجي بعد يومين .قالت لي طيب البات معاك امس منو؟ قلت ليها براي طبعا جاطتت شديد قالت لي كيف تبيتي براك انتي جنيتي طيب وقت ما جاء كان تتصلي لي هو مأمني عليك زعلت منك والله يا سمر وقفلت الخط . فوق العلي كمان منن زعلت مني شلتها بكي لمن صدعت رقدت نمت صحيت مخلوعه بصوت الباب الكان بضرب بصوت عالي وصوت التلفون البرن لقيتها دي منن ومزن اختها جريت غسلت وشي وفتحت ليهم الباب لمن شافوني اتخلعو شديد هاجموني بالاسئلة مالك حاصل ليك شنو عاينه
وكسرتني بابشع الطرق

#بعد_صبر6
#Noona_Elnour
حمستوني شديد فكتب شويه يدي وجعتني لكن انبسط بتفاعلكم ❤
في الصباح صحيت وانا راسي تقيل طلعت لقيت امي ابوي ومراد قاعدين قلت ليهم صباح الخير ردو علي صباح النور مراد قال لي ما علي أساس راجلك جاي صاحيه الساعه تسعه مع قوله تسعه دي جريت اتجهذت وظبط اموري سريع جيت قلت لي امي اها ماشه معاي ولا كيف قالت لي والله نسيت الليلة الجلسه عندي وانتي عارفه الحريم لو قلت ليهم ما بقدر تاني ما بدوني ليها عشان كدا م بقدر امشي معاك قلت ليها طيب بمشي انا قالت طيب اقعدي اشربي الشاي قلت ليها بشبو قدام عشان ما إتأخر جيت بست راس بابا قال لي ربنا يحفظك. مراد قال لي يعني السماحه دي كلها عشان زياد جاي ما اتعرفت عليك يا سموور وقعد يضحك قلت ليهو الواحده لو ما بقت مزه راجلها عينو بتزوغ وبشوق غيرها ولا ما كدا وبقيت اضحك هم عاينوا لي سااي بعدها طلعت وصلت البيت رتبتو وبخرتو ورسلت لي زياد انا جاياك المطار الطيارة بتصل الساعه كم طوالي اتصل لي شكلو كان متوتر قال لي انا وصلت شويه كدا وبجي البيت انتي ما تتحركي وجهزي لي الفطور اشتقت لي طبخ يديك قلت لي طيب حاضر قفلت منو وبقيت مقلقه دخلت رتبت شكلي واتسرحت ولافه في البيت هو حيجي طيب حيحكي لي ولا. هو بالجد لو طلع معرس روان انا موقفي حيكون شنو لالا زياد بحبني انا. وانا ماشه وجايه في الصاله الجرس رن جريت علي اول من وصلت الباب وقفت مسافه اهدي اعصابي وابين اني طبيعيه اول من فتحت الباب فضلت مبحلقه فيهو اتامل ملامحو وهيبتو وريحه عطورو في اللحظه دي بس فضلت سارحه فيه ضماني عليهو وباس جبيني قال لي ما تعرفي انا مشتاق ليك كيف دخلنا جبت لي المويه ومشيت ختيت الفطور هو المره دي ما جاني في المطبخ كالعاده وانا خايفه ومتوترة حيحصل شنو جبت الفطور وبقي بياكل وياكل فيني بعد خلصنا جبت العصير وقعدت جنبو اخدت نفس وقلت لي اها رحلتك كانت كيف والطيارة وصلت الساعه كم لانك ما حدد لي بتصل متين قال لي وصلت الساعه تسعه بعدين انتي ما مشتاقه لي ولا شنو بقيت بعاين ليهو هو بشرب في العصير وطبيعي جدا وشكلو ما ناوي يقول لي قلت ليه انت متاكد انك جيت الليلة طوالي اتشرق بالعصير وبدأ يكح جريت جبت لي مويه قلت انت كويس قال لي اي كويس قلت لي ما جاوبتني قال لي اي جيت الليله حاجي متين ولا لو جيت قبل حاقدر اقعد بعيد عنك وغمز لي .
ولقد وثقت فيك لدرجه العما واصبحت لا أرى غير حبك 💛⚡

#بعد_صبر_7
بقلمي :#Noona_Elnour
من جانب تاني
#عند مزن
كنت راقده وبحضر في التلفزيون تلفوني رن لقيتو دا مازن براجه جريت قفلت الباب ورديت علي سلم علي وقال لي وين ليك يومين لا حس لا خبر قلت لي قاعده بس كنا انا ومنن عند سمر بت خالتي راجلها كان مسافر. ولمن رجعت البيت ماما قالت لي الا امشي معاها السوق وبعد رجعنا نمت والتلفون كان قافل شحنتو وقلت يكتمل الشحن واتصل ليك. قال لي جد قلت لي عندك شك .قال لي لا ابدا. وبقينا نتونس وهو يحكي لي وانا بضحك لمن دموعي جرت في الاثناء ديك جات منن داخله طوالي صريت ليها وشي خطفت مني التلفون وقعدت تكورك فيهو انا مش حزرتك تبعد من اختي عايز منها شنو وكمان بتبكيها تاني اوعك تتصل عليها فاهم وقفلت الخط في وشو قبل ما تفهم اي شئ قالت لي ميتين مره حزرتك وبتبكي ليهو كمان الزفت الاسمو مازن دا لو لقيتك او سمعت بالغلط انك بتتكلمي معاهو بكلم ليك عثمان يتكفل بالباقي طوالي اتنفض فيها انا ما ببكي انتي عامله القومه والقعده دي كلها بس عشان شفتي الدموع دي يااخ هو كان بحكي لي وانا بضحك ولمن جيتي اتخلعت وكشرت وشي بعدين حيلك حيلك انا بحبو وعثمان زاتو اخوي وحيعرف عم قريب لانو بعد تلاته شهور حيقدم لي بعد يسافر ويرجع طوالي منن سكتت وبقتت منططه عيونها يتقدم ليك كيف يعني قلت ليها عديل قالت لي التلاته شهور بتجي وبنشوف اذا اتقدم ليك بعدين مازن دا انا ما برتاح ليهو واكيد بكون عندو بنات وحركات اصلو ظاهر علي قالت لي المظاهر خداعه يمكن عشان انتي بتكرهي بتشوفي عيوبو بس قالت لي وانتي عشان بتحبيهو بتشوفي محاسنو بس وبينتا الايام يا منن وبكره بثبت ليك هو بحبني اكتر مم انا بحبو .
_______
قضينا انا وزياد اليوم كلو ونسه وانا علي امل انو حيحكي لي بس شكلو ما ناوي وكل ما اجيب ليهو سيره قطر بتهرب وبقول لي يعني انتي ما مشتاقه لي ولا همك كلو كيف قضيت شغلي هناك قلت لي لا م كدا بس حبيت اعرف سالتو انت ما عايز تعمل كرامه اتخلع قال لي لي قلت لي ما عشان جيت سالم قال لي بعملها لكن ما هسي لاني عايز ارتاح و لسه ما شبعت منك .🤤❤
ولكنني احببتك وانت اتلفت قلبي دون ان تشعر 💔

#بعد_صبر_8
#بقلمي:#Noona_Elnour

باليل زياد نايم في سابع نومه صحيت قلت اصلي وادعي زمان كنت بدعي ربنا يرزقني بطفل قعدت احمد ربنا علي حملي وادعي انو زياد ما يكون معرس روان كملت دعاء ورجعت نمت الصباح لمن صحيت ما لقيتو جنبي طلعت في الصاله ما لقيتو وانا ماشه افتح باب الشقه سمعت صوتو شكلو كان جوا الصالون بتكلم ومعصب لمن قربت من الباب سامعه بقول ليها روان لا إله الا الله انا كلمتك ما بقدر اجيك هسي خليك قاعده لمن القي لي طريقه واطلع واجيك انا راسي لف وحسيت نفسي حاستفرق جريت الحمام قبل ما اصل وقعت لمن وعيت لقيتو جنبي وكان باين عليه الخوف مالك يا سمري حاصل عليك شنو مش قالو ليك ارتاحي ما بتسمعي الكلام مالك بتخوفيني عليك قالها بكل لهفة وحنيه قلبي حن لكلامو لكن ما قادره اصدق يعني روان دي في موجوده يعني في حياتو طيب موقعاها شنو يا رب ما يكون معرسها لكن هو قال ليها بجيك يعني هو معرسها بقيت ببكي وبصرخ هو اتخلع مالك يا سمري حبيبي مالك الواجعك شنو نمشي الدكتور انا حاشيلك قلت لي لا من بين بكاي ودموعي انا كويسه بقي قاعد بحنس فيني لمن سكتت بعد رقت قلت لي انا تعبانه عايزه انوم ممكن تطلع تخليني ارتاح قال لي تمام بعدين حنتفاهم في بكاك دا بس اذا حاسه بحاجه بتوجعك هسي نمشي الدكتور قلت لا انا كويس طلع وخلاني . بقلبي قلت انت سبب البكي والوجع وبتسألني💔 لي بس يا زياد لي هسي انا ما قادره اتاكد انك معرسها ولا لا انا لازم اعرف وانت الحتقول لي الحقيقه دي من غيرك ما حاسمعها او اصدق اي شيء لاني بثق فيك وبحبك اكتر من اي حاجه تانيه ختيت يدي علي بطني وضميت رجولي علي وبقت بتكلم مع طفلي انا لسه ما شفتك بس انا بحبك انت املي في الحياة دي انت الحاجه الانا صبرته عليها واتمنيتك من قبل عشره سنين وهسي انا بوعدك اني حاعمل كل جهدي عشان احافظ عليك وفي الوقت المناسب بابا حيعرف انك جواي وحيفرح بيك كتير بس لازم نصبر ونتصرف بحكمه يا حبيبي انت الحتقويني غمضت عيوني وغرقت في النوم .
تاني يوم صحاني باسني في خدي وقال لي طمنيني عنك كيف هسي قلت ليهو تمام انا كويسه قال لي يا سموري لي كنتي بتبكي كدا امس انتي ما عارفه خوفتيني عليك قدر شنو قلت لي ولا حاجه بس كنت حاسه باني مضايقه عشان كدا بكيت حسيت بيه ما اقتنع لكن م كتر كلامو معاي قال لي طيب قومي انا عملت الشاي عشان الليلة لازم انزل الشغل قلت لي ما بدري قال لا عندي شغل ضروري اتحملي حبه ي عمري بس الايام الجايه حاكون مضغوط شديد قلت لي في شنو قال لي في مشروع مع شركه V.R.S تابع لي أمريكا عايزين نعمل عقد معاهم فلازم ننجح في المشروع دا قلت لي تمام بالتوفيق ان شاء الله. شربنا الشاي وهو اتجهز واتعطر قدمتو لي الباب وبستو وطلع . بعدها رجعت قعدت اخ منك يا زياد لي ما عايز تحكي لي لي بس؟ بتخبي عني بديت تدخل في قلبي الشك .قعدت استغفر تاني قمت انضف بعد الظهر كدا الجرس رن قلت معقول دا زياد يكون رجع بدري كدا تاني قلت يمكن ما هو دخلت لبست توبي وفقتحت الباب بقيت واقفه بستوعب الواقفه قدامي معقول دي نفسها روان بعدين كيف ولي جات هنا . اتخلعت شديد لمن شفتها وقت المسافه طالت ابتسمت لي ومدت لي يدها قالت لي انا روان قلت ليها معليش بس انتي بتعرفيني من وين قالت لي يعني ما حتخليني اتفضل .قلت ليها طيب اتفضلي دخلتها وجبت ليها مويه وعصير كانت ساكته وبتشرب في العصير وانا بعاين ليها لابسه فستان اسود وراسمه جديد الميكب والدبله والحال انا قربت اجن هي ما شاء جميله جدا . لمن شافتني مركزه معاها قالت لي انتي بتعرفيني يا سمر إلتقينا قبل كدا بس شكلك نسيتيني قلت ليها وين ممكن تزكريني قالت لي قبل تلاته سنوات في الشركه وقت كان في حفل تكريم جيتي مع زياد بعاين ليها عيوني بقت قدر الفنجان. واصلت كلامها قالت لي انا بت الشريك في الشركه مع زياد عصام نصر الدين قلت ليها اي صح اتزكرتك بس ما كان اتكلمنا كتير قالت لي اي عرفتيتي قلت ليها غريبه سبب زيارتك لي بعد تلاته سنين شنو وانتي اصلا جبتي العنوان من وين قالت لي انا اصلا جايه عندي موضوع معاك فاحكي ليك كل شيء بس رجاءا خلي الموضوع يكون بيني وبيك وخليك رايقه ومحاظه علي اعصابك لمن قالت كدا انا ياداب اعصابي تلفت قلت اكيد في إنه. يا رب تهون وما يكون الفي بالي ....😔💔
*كُن أقوى من أن يمُر بك يوم دُون أن تبتسِم ، كُن أقوى من أن تنام وقلبُك مُكتظ بالهمُوم ، كُن أقوى من أن تستيقِظ كل يوم دُون أمَــل وتفاؤل ، كُن أقوى مِن الحياة ..😴💜💭*
اها كدا قصرت معاكم ❤
بس ممكن ترفعو البارت بلايك عشان الاجزاء تنزل مرتبه بحسب التفاعل 🤚💛⚡

#بعد_صبر _9
#بقلمي:#Noona_Elnour

بلسان روان
طيب حابدأ يا سمر وانا والله ما عندي اي نيه سيئة تجاهك . قبل تلاته شهور انا وزياد اتزوجنا انا حاقول ليك انو انا وهو اتجبرنا علي الزواج دا وانتي يمكن كان لازم تسمعي الكلام من زياد ما مني لكن زياد خايف عليك تتصدمي ولا تحصل ليك عشان كدا خبي عليك الموضوع . حاحكي ليك من الاول في يوم جدي وابوي نادوني لمن مشيت ليهم قالو لي جاك عريس واحنا موافقين عليهو بس عايزين رايك اتصدمت بكلامهم وقلت ليهم انا ما عايزه اتزوج ولا اي حاجه جدي جاط فيني شديد وقتها قال لي عشان رفضنا زولك الما نافع داك انتي رفضتي العريس دا ابوي ادخل قبل ما ارد قال لي اسمعي يا روان اي شيء في الدنيا دي قسمه وانتي كدي ما تحكمي علي الزواج او ترفضي ما لم تعرفي العريس وتسمعي منو هو كمان .قال لي بعد يومين حيجي يشوفك . ما حبيت اعاند وقلت ليهم تمام طيب بنشوف بس اعرفو انو قراري ما حيتغير وحارفضو ومشيت من قدامهم . بعد يومين المساء جاء زياد ومعاه ابوهو و جياد اخو قعدو اخدو واعطو اها جاني ابوي قال لي العريس عايز يتكلم معاك علي انفراد قلت لي طيب. بقيت قاعده علي اعصابي بس كانت الصدمه لمن الباب اتفتح وجاء داخل دا زياد اتصدمت شديد مد يدو سلم علي وقعد لمن شافني لسه واقفه قال لي اتفضلي اقعدي . بدينا الحوار
زياد قال لي اسمعيني كويس انا حاليا اتقدمت ليك للزواج وانتي عارفه اني متزوح سمر وبحبها شديد بس انجبرت علي الزواج دا .قلت ليه انجبرت علي؟. قال لي دي حاجه ما بقدر احكيها قلت لي لا لازم تقول لي طالما عايز تعرسني لازم اعرف كل شيء .اخد نفس وعيونو اتملت دموع اتمالك نفسو وقال لي عشان سمر ما خلفت مني واهلي ضاغطين علي عشان اتزوج واخلف اطفال من غيرها. قلت طيب متوقع مني يعني حاوافق عليك لا طبعا بعدين سمر مره ما شاء الله وانتو حلوين مع بعض وانا ما بقدر ادخل بينكم بعدين انا زاتي مرتبطه وراجيه بس جدي يوافق بالزول البحبو . قال لي انتي ما مجبورة القرار بيرجع ليك بعدها طلع وخلاني محتاره بعد ساعه كدا امي جاتني قالت لي زياد زول كويس صح هو متزوج بس انا متاكده انو ما حيقصر فيك خلي العولايق داك وافقي . قبل ما أرد علي كلامها ابوي جاني قال لي بعد خمسه أيام تدينا رأيك وبتمني توافقي علي . قمت قلت لي ابوي انت كيف ترضي تدي بتك الوحيده لي واحد متزوج كيف بس قال لي انا بخاف عليك من التافه المبارايه داك بعدين لو عمل ليك حاجه عشان كدا أحسن تنسي وتشوفي زياد دا مافي منو . وخلوني علي كدا في اليوم التاني اتصلت لي حبيبي كتير بس تلفون مغلق حاولت يومين بتصل بس برضو تلفونو مغلق في اليوم الرابع اتصل لي رديت عليهو وانا ببكي حكيت ليهو كل شيء وقلت ليهو امي وابوي وجدي ضاغطين علي وانا ما بقدر اعيش من دونك قال لي اهدي بنلقي حل قلت لي كيف نلقي حل والموافقه لازم اديها بكره قال لي خليها لي المساء بفكر وبوريك. المهم عدا اليوم وانا منتظراهو يتصل لي وفعلا اتصل لي قال وافقي علي زياد قلت لي كيف وبقيت ابكي يعني انتي ما بتحبني؟ وكيف اوافق قال لي روقي انا وانتي عارفين سبب رفضهم لي صح؟ عشان كدا عرسي زياد واقعدي معاهو تلاته ولا اربعه شهور واطلقي هو اكيد ما حيجبرك .و زي ما قلتي هو بحب مرتو شديد وبعد تطلقي منو حاعرسك انا قلت لي بس قال لي ما عندنا حل غير دا . جاء يوم الموافقه رغم اني كنت متردده بس وافقت . ومن هناك بدت تجهيزات العرس وانا مبسوطه لانو حاقدر بعد كم شهر اتزوج الزول البحبو .
مرت الايام وعمل لي عرس مبالغه لانو اهلي ما رضو يعمل لي حاجه بسيطه بعدها سافرنا قطر وهو اتحجج لي بي الشغل لمن مشينا هناك قعدنا انا هو قال لي انا ما حاجبرك علي حاجه ولا بقدر افرض نفسي عليك بقدر اتحمل اني اقرب من وحده غير سمر ونشوف لي قدام يحصل شنو وبعد شهرين نرجع السودان وانتي حتسكني مع ناس امي في الشقه الفوق لي ناس جياد عشان ناس امي ما يحسو بشي وحسك عينك سمر تعرف اني متزوجك او حتي لمن اتكلم معاها ما تقربي مني وعلي كدا قعدنا هناك . لمن رجعنا السودان في المطار انا كنت صح ماسكاهو و بنضحك بس عشان ماجد وسلافه مرتو ما يشكو فينا لانهم كانو ساكنين في الشقه الجنبنا في قطر واحنا م عايزين زول يعرف الحصل كلو . المهم زياد قعد معاي يومين في بيت ناس امو وعملنا الكرامه لكن والله من يوم ما عرستو وضميري مانبني عارفه احساسك حيكون كيف لو عرفتي راجلك معرس وحده غيرك لاني زيك بغير علي مازن حبيبي وما برضي وحده تقرب منو فعشان كدا يوم زياد جاك قال لاهلو انو حيقسم الايام بينتا ويعدل عشان ما يشكو في حاجه . انا تبعتو عرفت انك ساكنه في الرياض ومكان الشقه حقت وين بالضبط ورجعت البيت بحجه اني طلعت السوق . وانا والله عشان انتي مرا زي انا ما عايزه اذيك بس كل البعرفو انو زياد بحبك . لمن سلافه اتصلت لي قبل يومين وحكت لي الموقف لمن سالتها من الاسم قالت نستو شكيت تكوني انتي لمن قلت ليها سمر قالت لي اي . فمن اليوم داك وانا ما مرتاحه فحبيت احكي ليك.

#بعد_صبر_10
#بقلمي : #Noona_Elnour

من جانب سمر
روان لمن انتهت من الكلام انا حسيت دموعي كلها خلصت حسيت بغصه كبيره في قلبي روان زاتها لمن شافتي ببكي بقت تبكي معاي جات ضمتني عليها وبقينا نبكي سوا بقت تحنس فيني وتقول لي ما تبكي انا والله ما قصدي اجرحك ولا اكسر خاطرك بكينا لمن كملنا الدموع بعدها بعدت عنها وقلت ليها انا والله ما زعلانه منك رغم انك عرستي راجلي لكن كونك تجي تكلميني وتطمنيني دا معروف مستحيل انسي ليك قالت لي طيب عندي منك طلب صغير قلت ليها تفضلي قالت لي حلفتك بالله ما تجيبي لي زياد سيره او اي زول تاني قلت ليها في ناس تاني عارفين اترردت فلمن قلت ليها انتي اصلا قلتي الكتير كملي. قالت لي اهلك كمان عارفين لمن قالت كدا ما قدرت اشوف قدامي وغميت. فضلت جنبي لمن صحيت جابت لي مويه وحنستني وشالت رقمي قال لي اعتبريني صحبتك انا والله ما عايزه عداوه معاك اديتها ليهو ودعتني وفاتت
بعد طلعت مني حسيت الدنيا دي سودت في وشي معقول زياد يعمل فيني كدا ياخ هو ما حاول حتي انو يجيب لي سيره الله يا ربي وحتي ناس امي عارفين بقيت ببكي وبقول يا ربي الناس دي لي كلها خذلتني وكسرتي بالطريقه دي بس كان يقولو لي خافين علي شنو يعني. هسي هم كسروني شديد وفضلت ابكي لمن صدعت . بعد هديت وعدت نفسي ما حاجيب سيره لي زول عشان خاطر روان لانها الزول الوحيده العملت لي خاطر قلت حاشوف زياد حيتمادا كدا لي متين . قمت اكلت لي سندوتش رغم م عندي نفس بس طفلي انا عايزه احافظ عليهو وسط الزحمه والخذلان دا . بعلت حبوبي وغسلت وشي وبقين منتظره زياد.
_________
من جانب روان
رجعت البيت وبقيت بفكر في عاقبه القرارات الانا إتخذتها اولها اني كيف اعرس واحد انا ما بحبو عشان خاطر واحد بحبو ضميري بقي مانبني شديد. تانيا كيف بس اقدر اكسر قلب مره زي كيف قدرت اعمل فيهاكدا .و هل انا هسي عملت الصح لمن كلمت سمر بالحقيقه ولا كان اسكت .الامور جاطت في راسي فبقيت ابكي متحسره علي قراراتي كيف اقدر اكون انانيه بالشكل دا.
___/__
نرجع لي سمر
بعد العشاء كدا زياد شرف اول من جاء سلم علي وحضني شديد كاني حاضيع منو دخلنا وختيت ليهو الاكل هو اكل وانا قاعده اعاين ليهو سالني مالك يا سمري ما عايزه تاكلي قلت لي سبقتك انا . قال لي كيف عملتيها وانتي ما حصل اكلتي وخليتيني جعان قلت لي جعت شديد عشان كدا ما قدرت انتظرك واصل اكلو وانا فضلت اعاين لي كيف بعد الحصل دا كلو قادر يقعد معااي وما يرف لي جفن كيف حتي ما كلمني الحقيقه . الوقت اتاخر جيت عايزه انوم هو بقي بقرب مني دفعتو بكل قوتي لمن وقع قلت لي رجاءا بعد عني وخليني في حالي طبعا هو استغرب من ردت فعلي وحاول يتكلم معاي لمن ما اتجاوبت معاهو قبل علي الجهة التانيه وخلاني حسيت بيه زعل بس كيف عن زعلي انا . عدت الايام وبقا فعلا مقسم الايام بينا انا و روان بحجه انو مضغوط بالشغل.
____/_____
من جناب روان
زياد كان مافي فاتصلت علي حبيبي سلمت عليهو وسالتو عن اخبارو والشغل كيف مع واتونسنا كتير هو سألني من زياد وكيف تعاملو معاي وكدا. قال لي مشتاق ليك ما تخلينا نتلاقي قلت لي بس زياد ما حيرضي خلينا كدا احسن لمن اطلق قال لي لا ارح نطلع وانتي اقترحي ليك اي كذبه واطلعي . فكرت كدا وقلت لي تمام بكره زياد حيكون في الشغل وحيبيت عن سمر عشان كدا احسن نطلع قال لي تمام نمشي مطعم.... قلت لي تمام وخلصنا المكالمه علي كدا . لمن رجع زياد قلت لي انا عايزه اتكلم معاك في موضوع بكره عايزه امشي لي صحبتي اتزوجت وانا ما مشيت باركته ليها. قلت لي لو تحب تمشي معاي قال لي لا امشي انتي شوفي ترحال ما تمشي بالموصلات. لو كنت فاضي كنت حاوصلك وطوالي دخل غرفتو . فرحت ونطتت انو وافق لي اطلع وبكره حاشوف غاليي 💛 في الصباح زياد بعد طلع نزلت تحت لي خالتو هاجر وساعدتها شويه واتونسنا كدا بعدها قلت لي انا طالعه يا خالتو عندي صحبتي اتزوجت لمن كنا في قطر وهي غاليه علي فماشه ابارك ليها ابتسمت لي قال وزياد ما ماشي معاك قلت ليها الايام دي مشغول وقال م عندو طريقه . فامشي بترحال قالت تمام يا روان حبيبتي بلغي سلامي لصحبتك قلت ليها حاضر . طلعت شقتي شفت احلي فستان عندي لبستو وطقمتو لقيت زياد خاتي لي قرووش في الطربيزه شلتها لقيت الترحال زاقف لي بره وصفت ليهو المطعم وصلت هناك لقيت زولي قااعد منتظرني اول من وصلتي سلم علي وقعدنا تنونس ونضحك وانا مبسوطه شديد قال لي بعد الحلا دي كلها إلا نتصور في البدايه رفضت لكن تاتي وافقت اتصورنا واتهابلنا الناس كلها تعياين لينا شكلهم مفتكرننا نحن عرسان .
_________ من جانب زياد

#بعد_صبر_11
#بقلمي :#Noona_Elnour
من جانب سمر
مره شهر كامل علي الحال دا وزياد مصر انو ما يجيب لي سيره نهائي كم مره مشينا بيت ناس امي ويوم مشينا ناس خالتو هاجر سملت علي وضمتني عليها شديد م عارفه بس حسيت بيها حاسه بالذنب . اتصلت لي منن قلت ليها تعالي لي انتو مزن بكره اشربو معااي القهوة لاني زهجانه وقرفانه قالت لي انا ما عندي طريقه بكره ممتحته عملي فحاتاخر بكلم مزن لو فاضيه تجيك وانا لو خلصت بدري بجي غاشياكم اواصلنا كلامنا وحكت لي عن مازن ودرامتو مع مزن وانو عاوز يتقدم ليها قلت ليها يا منن انتي ظالماه هو زول كويس وطيبان شديد بعدين هو ظاهر علي زول جادي انتي ما تحكمي عليه سااي وان شاء الله ربنا يسهل ليهو لانو مزن بتستاهل كل الخير وخلصنا المكالمه . جاء زياد بعد زمن ختيت لي العشاء وقعدت معاه المره دي سألتو قلت لي انت ما مخبي علي شئ؟ كان مودي اللقمه علي شخمو طوالي ختاها في الصينيه قال لي اخبي عليك حاجه زي شنو .؟ قلت لي اي حاجةانا حاسه كدا . قال لي كيف اخبي عليك في شنو يا سمري؟ انت ليك فتره ما عاجباني مالك انا زعلتك في حاجه من متين بتتعاملي معاي بالبرود دا كلو . قلت لي ولا شي نفسيات بس ما تاخد علي بالك قال لي طيب خلاص رايك شنو نطلع وناكل ايس كريم يمكن مزاجك يتعدل . طبعا هو عارف الايس كريم نقطه ضعفي ومستحيل ارفض . كان جايب ليه لبسه حلوة حقت جنز وجايب لي زيها نسائيه قال لي شنو رايك نطقم الليله فرحت شديد قلت لي طيب . اتجهزنا ومشينا محل ايس كريم ضخم مكان من تشوفي بترتاحي والايس كريم عندهم رهيب انا باكل وهو بعاين لي سااي. لمن كملت حقي قال لي اجيب ليك تاني قلت لي اكيد هو انا برفض . قعد يضحك ضحكتو دي هزت جواي حاجات كتيره لخبطت كل مشاعري . لمن لاقني مركزه معاهو قال شنو يا سمري حتاكليني بعيونك الحلوات ديل طوالي كسرت عيني. لمن قام عشان يجيب الايس كريم باسني في جبيني قربو دا بغيرني من جوه حتي لمن اكون زعلانه منو وجودو بطمني. قعد يونس فيني وانا اكل سااي اصلو من ظهر لي الحمل يا وقفت اكل يا اكلت كتير في الطريق قلت لي زياد. قال لي عيون زياد قلت لي بكره حيجوني مزن ومنن يشربو معاي القهوة قال لي طوالي يجو المشكله وين الدار تنور. قلت لي عايزه لي حاجات قال لي انتي اطلبي وانا كلها بجيبها ليك نزل البقاله جاب لي حاجات وتاني اشترا لينا باسطه لانو منن بموت فيها رجعنا البيت منهكين طوالي نمنا . تاني يوم كالعاده هو طلع وانا قعدت نضفت ورتبت دخلت عملت لي كيك وفطائر وجهزت القهوة بعدها عملت لي سندوتش. شويه كدا ومزن جات قعدنا نحكي ونضحك ونتزكر زمان كيف كنا بتشاكل وبندس من جدو العصايه لمن يلقاها يضربنا بيها . انا ومزن في قعدتنا ديك الجرس رن قلت لي مزن خليك انا بفتحو بتكون دي منن لمن فتحت الباب لقيتها دي روان طبعا هي ما قالت لي جايه وهسي مزن قاعده جوه حاقول ليها شنو قالت لي حتخليني وافقه في الباب كتير ولا شنو سلمت عليها وقلت ليها اتفضلي . لكن ي روان معاي بت خالتي فانا حاقول ليها انتي صحبتي وكدا قالت لي جدا ما مشكله دخلنا انا وهي عرفت مزن عليها وقعدنا . روان ساكته ما شاركتنا في الحديث كتير شربت معانا القهوة واحنا منتظرين منن لكن اتاخرت فروان قالت ماشه مزن قالت ليها اقعدي شويه قالت ليها بجي مره تانيه وفرصه سعيده . قدمتها للباب سالتها عن سبب زيارتها قالت لي كنت عايز اتناقش معاك في موضوع الطلاق دا انا دايره اتخارج وكفايه تمثيل قالت لي لكن هسي خليهو الموضوع دا لمن نتلاقي تاني قلت ليها خير وطلعت علي كدا.
____/___
من جانب روان
في فتره الشهر دي لاحظت لي تصرفات زيزو ما تمام بقي لا بتصل لا بتزكرني حتي لمن انا اتصل ما برد لي واحيانا بقول لي مشغول قلبي اكلني وقلت لازم اعمل حد للموضوع دا واطلق باسرع وقت . بس كمان حاقول لي زياد شنو وناس ماما فكرت كتير في النهاية قررت امشي بكره لي سمر واتكلم معاها يمكن عندها حل للموضوع دا. فعلا تاني يوم لمن مشيت ليها فتحت لي الباب بس اترددت تخليني ادخل شكيت انو زياد يكون معاها فقلت ليها حتخليني وافقه كدا قالت لي اتفضلي . قبل ما ندخل جوه قالت لي معاي بت خالتي فانا حاقول ليها انك صحبتي وكدا قلت ليها تمام دخلت وعرفتني عليها بس خالص ما حبيتها هي حلوه وظريفه بس نهائي قلبي ما ارتاح ليها فهي وسمر بتونسوا ساي وانا مره مره بشاكرهم الحديث شربت قهوة لمن قلت كفا لمن قنعت انو مزن ما حتمشي واختها زاتها جايه استاذنت وقلت حامشي ودعتهم. قدمتني سمر لي باب الشقه ورجعت البيت وانا بفكر اعمل شنو . في اليوم التاني زياد طلع فات الشغل اصلا هو م عندو لي حاجه . كان في ملابس كتيره ليهو ما مكويه قلت بدل الفراغ والملل دا وم عندي نفسيات انزل تحت واتونس مع ناس خالتو هاجر فأحسن اقعد اكويهم . اتصلت علي سجود مرت اخو زياد ترسل لي المكوة حقتها مع حمودي انتظرت مسافه حمودي جاء وجات داخله معاهو وحده كدا .

#بعد_صبر_12
#بقلمي : #Noona_Elnour
سمر........
يوم قاعده زهجانه وجسمي واجعني والطمام مطلع عيني وكان نفسي في فراخ مشوي اتصلت علي زياد وكلمتو .قال بجيبو ليك قلت لي لا انا زهجانه ما ارح نمشي مره واحده منو اغير جو .قال لي طيب حاضر برجع بدري صلي المغرب ولمن اجي القاك جاهزة ونطلع طيب يا سمري . قلت لي حاضر . فعلا اتجهزت بعد المغرب وحضرت لي ملابسو قعدت منتظراه سرحت وبالي فات لي بعدين زياد متزوج وعندو مره والعجيبه مرتو هي الكلمتني يا ربي دا شنو الإختبار الصعب دا . كيف زياد حتي ما فكر حتي يلمح لي عارفني بحبو . كيف يجي من قلبو يعمل فيني كدا . بعد شويه وعيت على نفسي سمعت صوت الجرس وكان مستمر مشيت فتحت الباب زياد ضماني عليهو شديد قال لي طمنيني عنك انتي كويسه . قلت لي الحمد لله. خير مالك متوتر كدا قال لي من جبيل بضرب في الجرس وما فتحتي حتي اتصلت ليك بس تلفونك م بدخل لي خفت تكون حاصله عليك حاجه. قلت لي يعني بتخاف علي؟ قال لي عندك شك . قلت لي لا بس كان ممكن تفتح باب الشقه بالمفتاح قالي لي المفتاح نسيتو عشان كدا . قال طيب بمشي انا آخد حمام ونطلع يا حلوتي وطبع بوسه علي خدي خلاني متحيره وفات . قلت بقلبي زياد دا مالو . قعدت انتظرتو بعد خلص ركبنا العربيه وهو طول الطريق وبونس فيني ما انكر انو غير لي مودي . لمن وصلنا مطعم حلو وفخم دخلنا جابو لينا مويه شربنا . قلت لي انا نفسي امشي اقعد مع ناس خالتو هاجر كم يوم اشتقت ليها طوالي تعابير وشو اتغيرت . وانا فهمت لانو روان قاعده معاهم في الشقه الفوق وممكن اصادفه او شوفها لمن ما ردا علي قلت لي زيادي بتكلم معاك . قال لي عيون زياد بس انا مشتاق ليك شديد وعايز اخد اجازه كم يوم اقضيها معاك بعدها لو حابه تمشي فحاضر من عيوني. كان بقول في الكلام دا وهو متردد ومشتت شديد . قلت لي خير . انا وهو قاعدين ومقابلين بعض طبعا فجأة لاحظت لي روان ومعاها واحد من يعيد انا ما شفت وشو لانو ماظيني ضهرو قاعدين قصادنا خفت واتوترت شديد لو زياد شافهم حيحصل شنو . غمضت عيوني وفتحتهم قلت لازم تتصرفي يا سمر وكل شويه بعاين لي روان وزولها علي امل انهم حيمشو بس كانو منداحين في الونسه و روان باين عليها مبسوطه جدا في النهاية قلت لي زياد ممكن نمشي . قال لي : لي قلت لي اتضايقت قال لي لا بعد تاكلي حتي حنمشي لمن رفضت رسلت لي روان بس من مكانها ما اتحركت ولا اظن انها شافت الرسالة هو لاحظ لي قال لي شكلك خايفه مالك يا عيوني قلت لي لا مافي شيء قال لي انا حافظك بصم مالك . قلت لي زياد عليك الله خلينا نمشي قام بزعل قال لي طيب امشي العربيه وانا بجيب ليك الفراخ وبجي قلت لي لا إلا تمشي معاي زعل زياده وطلعنا وانا لسه بدعي انو ما يشوفهم قبل ما نطلع . بعد تعب طلعنا وانا قلبي قرب يقيف من الخوف ركبنا العربيه وزياد ساقه بسرعه عاليه بقيت بحنس فيه يقلل السرعه بس لا حياة لمن تنادى قلت لي انا لو حبيت واحد غيرك حيحصل شنو ؟طوالي وقف العربيه في نص الشارع انا لمن رجعت لورا تاني جيت لي قدام . قال لي بنبره حاده وصوت عالي . عيدي قلتي شنو قلت لي انا انا م قلت شي . ضرب الدركسون بكل قوه تحبي واحد غيري وكمان بتسالي بيحصل شنو قلت لي جاوبني بس . قال لي عايزاني اقول ليك تكوني كسرتيني كسر تاني عمرو ما بتصلح ورجع دور العربيه وساق وخشمو نهائي م فتحو معاي عرفتو زعل بالجد . وصلنا البيت قال لي انزلي قلت لي وانت قال لي بجي بعدين قلت لي كيف بعدين قال لي سمرررر يااخ انزلي خوفه سااي منو نزلت وانا عيوني اتملو دموع فتحت باب الشقه ودخلت قعدت في الأرض وبقيت ببكي ببكي من جوه ما عارفه سبب البكي دا كلو عشان هو مخبي علي ولا عشان هو معرس غيري ولا عشان علي صوتو علي ولا عشان الكذبه الانا عايشه فيها دي .
____________
من جانب روان
كفايه يا روان تكابري انتي بتحبي زيزو ما عيب تكوني عايشه مع راجل تاني. و هو من ارضك ما شايلك كفايه عذاب . لحد اخر الشهر دا انا حاطلب الطلاق وارتاح من كل دا . قطع تفكيري إتصال زيزو سلم علي وسالني من اخباري قلت لي زهج وملل وقرف بس الحمد لله .ما تعرف انا مشتاقه ليك قدر شنو . وعن قريب ان شاء الله حكون في بيت واحد يلمنا ويحفظنا من بين الدوامه دي كلها. قال لي ان شاء الله ي عمري رايك شنو نطلع المساء نتعشي مع بعض قلت لي لا المره الفاتت كفايه بعدين ما اظن انو زياد حيخليني اطلع بعد المغرب. قال لي خلاص هو بقي بتحكم فيك ولا انتي من متين بتفضلي علي وتسمعي كلامو براااحتك يا روان يلا اقطعي وشك مني قلت لي لا م كدا معقول انا بحبك انت وبس وانت عارف كدا. قال لي خلاص معانا نطلع نتعشي سوا قلت لي طيب حاشوف لي حجه قعدت افكر وأفكر في النهاية اتصلت لي زياد. زياد كيفك . انا بخير الحمد لله وانتي . ماشي الحال انت اليوم حتبيت مع سمر صح. اي حابيت معاها . خير حاصل معاك شنو .لا ما حاصل شيء بس امي عيانه شويه وانا طولت ما مشيت ليهم كان بتسمح لي امشي ليها .

#بعد_صبر_13
#بقلمي :#Noona_Elnour
من جانب سمر
نمت من بين بكاي ودموعي في وشي كنت مرهقه مرهقه نفسيا وجسديا وانا بين نايمه و وعايه حسيت بي شايلني من علي الارض دخلني الغرفه وحضني عليهو شديد ونمنا . في الصباح لقيتو منضف البيت وعامل الشاي شكلو كان بس راجيني اصحي . ما اتكلم معاي خالص قدر ما حاولت معاه بس ما اتجاوب معاي قلت لي يعني يرضيك احنسك قدر دا وتحرجني بالشكل ده انا قربت ازعل منك علي فكره . قال لي طيب اذا انتي مجرد سفهتك ما بالك اذا عايزه تشاركي مشاعرك راجل تاني قلت لي هسي انا ما قلت ليك عايزه اعمل كدا. بس كنت عايزه اعرف موقفك حيكون شنو . قال لي بالله عليك تاني ما تقولي كدا لانو م حيحصل خير وخلينا نقفل الموضوع علي كدا لو اتكلمنا فيه اكتر من كدا ما بستحمل . قلت لي طيب تمام امس جيت متين قال لي بعد نمتي ما بكتير لانو لمن جيت دموعك لسه ما نشفت . قلت لي افتكرتك ما حتجي قال لي قلبي ما بسمح لي اخليك زعلانه لاني لاحظت ليك قبل ما امشي. قلت لي خلاص متين حنمشي ناس خالتو هاجر قال لي لسه مصره . قلت لي اي زهجت ومليت من البيت اليوم كلو لا شغله لا موضوع . قال لي خلاص رايك شنو تمشي تقعدي مع ناس امك شويه وتاني نمشي ناس امي قلت لي خير . قال لي رايك شنو نصين الشقه دي نغير الألوان ونجيب اساس جديد قلت لي فكره بس كدا حلوه قال لي نعملها احلى من كدا قلت لي طيب حلوو طلع التلفون وبقينا نختار في الالوان قعدنا فتره طويله وانا بس متاكده مهم حصل مستحيل حبي لي زياد دا يقل في يوم قطع تفكيري قال لي شنو بقيتي بارده كدا وين الجديع وهظارك بعدين دا شنو حنه ما عامله رو.... قلت لي كمل عايز تقول شنو قال لي ولا شيء قلت لي زياد عارفني ما بحب الحركات دي قول لي كنت عايز تقول شنو سكت مسافه قال لي بقيتي ما بتدلعيني زي زمان ضحكت قلت لي ما أظن نحن حتي بقينا زي أول وقبل ما اتم كلامي خالتو ماجدة ام مزن ومنن اتصلت لي مشيت وخليتو رديت ليها سلمت علي علي بحرارة واتونست معاي مسافه قالت لي اول امس جاء واحد اتقدم لي مزن واهو وافقنا عليه فقال عايز يعمل خطوبه يوم الجمعه فتعالي تمام اصلا طولنا منك بقيتي كعبه واليوم كلو بس مع راجلك دا تعالي اقعدي ليك كم يوم قبل الخطوبه . قلت ليها يخسي عليهم منن ومزن ما جابو لي سيره نهائي قالت لي منن دي اصلا ما شغاله بالموضوع كتير . انا زاتي ما عارفها ماله. ومزن طاشه شبكه مره واحد قعدت اضحك باعلي صوتي قلت ليها خير اكلم زياد وربنا يتم ليها علي خير . وقفلت منها مشيت كلمت زياد قال لي اها عشان زهجانه هسي اتخلق ليك موضوع تمشي بنات خالتك ديل يغيرو ليك مودك قلت لي بس شايفاك مبسوط قال لي يعني الزول ما يفرح ولا شنو قلت لا افرح سااي عشان الجو يفضي ليكم طبعا ملامحو وشو اتغيرت وانا ياداب لاحظت اني قلت شنو . قال لي يفضي لي منو قصدك شنو ي سمر قلت لي قصدي قصدي انت والبيت والشغل . ضحك قال لي انتي بس الله يخليك لي يا سمري باسني في جبيني . قلت لي خلاص انا بمشي بجهز شنطتي قال لي يعني ما صدقتي طوالي كدا ماشه ما عرفتك لكن ي سمري قربت منو بستو ومشيت . بعد دخلت الغرفه قلت اجي هسي انا مالي الا دي كان تكون هرمونات الحمل . طق اتزكرت انو بكره عندي مقابله والمره الفاتت الدكتوره سالتني من راجلي وانا قلت ليها مسافر وما ممكن اسوق زول تاني معاي لانهم ما عارفين ياا ربي تهونها . شلت التلفون اتصلت اول شي لي مزن شاكلتها ما اديتها فرصه تبرر بعد خلصت كلامي كلو قالت لي انا لي هسي ما مستوعبه عشان كدا ما قدرت اكلمك معليش قلت ليها خير ومنن وين قالت لي هسي انا جاياك في الموضوع دا منن زعلانه شديد حتي كلام ما بتتكلم معااي ودايما تقول لي مازن ما نافع ابعدي منو. وهسي ولا شغاله بينا كتير بتمشي الامتحان حقها بتجي تغير وتمشي الجيران تجي المغرب تجهز حاجتها وتنوم ولمن اتكلم معاها بطنش . قلت ليها خلاص م تزعلي انا بجيكم يا الليله يا بكره الصباح ان شاء الله وبتكلم معاها وقفلت علي كدا . زياد جاء داخل قال لي انا طالع عايزه حاجه قلت لي لا بس ماشي وين الليله مش ما شغال قال لي أي بس في موضوع كدا عايز احلو قلت لي خير .
______/__
من جانب روان

الخوف اتملكني والحمد لله الليل الطويل خلص وحل الصباح دخلت استحميت وطلعت الحوش سلمت علي بابا وجدو امي جابت لينا الشاي قالت لي الليله مالك شكلك فترانه كدا قلت ليها اصلو الفتر حاصل . جدو سالني يا رونه اها راجلك كيف معاك قلت لي كويس . ابوي قال لي ان شاء الله ما قعد تزعلي منك قلت لي لا مافي شيء من كدا وهو ما مقصر مني في حاجه . جدو قال لي متين جيتي امس قلت لي زي الساعه عشره كدا قال لي اها راجلك وصلك . سكت سااي بقيت افكر لو قلت لي ما وصلني حيتصل لي وزياد حيعرف اني جيت متاخره وهو لو سال خالتو هاجر حتقول لي طلعت من بعد المغرب طوالي .

#بعد_صبر_14
#بقلمي: #Noona_Elnour

وصلت ناس خالتي متين ما حسيت بس كنت مبسوطه شديد انو حتجيني بت شايله مني ومن زياد . وصلت ناس خالتي سلمت عليها وقعدت جابت لي مويه . قالت لي اكيد ما فطرتي قلت ليها معقول افطر وافوت طبخك دا قالت لي عشان عارفاك جايه عملت ليك كسره قلت ليها وانتي اصلا الزيك منو نادت مزن جات سلمت علي وسالتني من اخباري قلت ليها كويسه قالت لي شكلو قعاد البيت والراحه نافعه معاك قلت ليها قصدك شنو ما فهمت قالت لي ما ملاحظه لي نفسك بقيتي دبه وكمان طلع ليك كرش قعدت اضحك قولي ما شاء الله . خالتو ماجده جابت الفطور قعدنا نفطر انا وهي ومزن واثناء ما بناكل منن جات داخله فضلنها قعدت تاكل معانا بس خشمها نهائي ما فتحتو ولاحظت انها بالجد في حاجه مزعلاها شكلو ما موضوع مازن دا . بعد الاكل اشرت لي مزن عشان تخلينا انا ومنن برانا لانو خالتو ماجده قالت ماشه الجيران مزن قالت لي معناها انا اقوم اعمل قهوة لاحلي بت خاله في الدنيا واخت . سألت منن في شنو ابت تجاوب بعد عناء قالت لي انا مازن دا ما مقتنعه بيه وما قادره اقنع مزن انو هو زول ما كويس لانها بتحبو ولمن مره قلت ليها كدا اصرت وقالت انو هو بحبها وحيتقدم ليها وفعلا دا الحصل صح مزن فرحانه وانا دا الدايره لكن مازن دا ما بضمنو . قلت ليها منن كل شيء قسمه ومكتوب في الدنيا دي انتي اتقبلي الفكره بعدين مزن اختك وانتي صح بتحبها شاركيها فرحتها وخلي المستقبل بيد الله وربنا قادر يغير كل شيء فاحنا ما نفكر في امور الغيب . سكتت بعد مسافه قالت لي صح كلامك . قلت ليها بس دا كل الموضوع ولا في شيء تاني وغمزت ليها عاينت لي كدا 😒😒 شكلك خرجتي بره النطاق يا سمر من زياد رجع تاني ما جمعتي خالص بقينا نضحك . جات مزن شايله القهوة ومعاها كيك كبت لينا وبقينا نشرب ونتونس ونفكر حنعمل شنو الخطوبة والترتيبات حتكون كيف .
______/___
من جانب زياد

انا من رجعت السودان وتصرفات سمر اختلفت لي بتعاملني كدا . ما عارف حاصل معاها شنو بالضبط بس احساسي بقول لي هي شاكه فيني وانا بالجد كترتها حاقعد اخبي عليها لي متين انا لازم اطلق بس كمان ما بقدر اطلق روان الا وهي تطلب الطلاق عشان الناس ما تخرب سمعتها وهي ما قضت معاي اكتر من تلاته شهور. في يوم طلعنا انا وسمري مزاهجا كان سيئ فلمن طلبت ليها الأكل قالت ما عايزه تاكل والا نرجع البيت تصرفها غاظني بس برضو مشيتها طلعنا من المطعم وكنت زعلان شديد من حركتها كنت بفشي غضبي في السواقه فجأة قالت لي لو حبيت راجل تاني حيحصل شنو انا من الخلعه وقفت العربيه في نص الشارع بحاول استوعب هي بتقول في شنو اخدت نفس بالغصب طلع قلت ليها عيدي لي قلتي شنو اترددت في البدايه قالت لي مجرد سؤال بس عايزه اعرف الجواب . وشكلها كانت جاده ومصره انها تعرف قلت ليها حتكسريني كسر عمرو ما حيتصلح ودورت العربيه وصلتها وجطت فيها قلت ليها ادخلي ودورت عربيتي ومشيت لقيت لي مكان شبه فاضي قعدت فيه وانا بفكر في البحصل دا بس جات في زاكرتي ملامح سمر وعيونها الاتملت دموع فطوالي رجعت البيت . وفعلا لقيتها مرميه علي الارض وشها مليان دموع رفعتها ودخلتها الغرفه غرقت في حضنها ونمت الصباح قمت رتبت وعملت الشاي ما انكر كلام سمر خوفني شديد يمكن كلامها وسؤالها دا وراني الشعور دا سيئ قدر شنو. راضتني وقررنا نغير الشقه حقتنا ونجددها فخالتها اتصلت ليها وقررت تمشي ليهم عشان خطوبه بت خالتها فانا ما صدقت فرحت لانو كل ما اكون قريب من سمر بحس بالذنب تجاها ومن ناحيه تانيه روان انا حاسي اني بلعب بيها ما قادر اديها مساحه ولا قادر افكها. الدنيا ضاقت بي شديد . سمر كانت مصره تمشي ناس امي فانا فكرت في حل انو اشوف لي بيت يكون ما بيعد من ناس امي وارحل روان فيه عشان سمر تقدر تمشي ليهم براحتها بدون ما اشيل الهم وفعلا دا الحصل .
__/____
من جانب روان

قضيت اليوم مع ناس امي كلو نسه وضحك ولفينا انا وهي الجيران وانا بفكر زياد عايز يوديني وين... فالصباح اصبح وهو جاء شرب معانا الشاي واتونس مع بابا وجدو وبعدها استاذنا وطلعنا طول الطريق كان ساكت ما قال شيء وصلنا حلتهم وعلي بعد كم شارع وقف العربيه وقال لي انزلي كان معاه مفتاح فتح الباب وقال لي اتفضلي دخلني البيت كان حلو ومرتب وكلو اثاث فخم وجديد قال لي حاليا حنرحل هنا ورجاءا ما تساليني لي هنا حتقدري تاخدي راحتك اكتر انتي رايك في البيت دا شنو قلت لي حلو قال لي تمام الليله تمشي تستفي ملابسنا واغراضك المهمه كلها وبكره نجي البيت دا تمام. قلت لي حاضر فكرت افاتحو بموضوع الطلاق بس تاتي سكته مشينا ناس خالتو هاجر لقينا جياد ومرتو واولادو سلمنا عليهم زياد قال ليهم لمه في الحرم ان شاء الله . قالو ليهو امين يارب. احلي حاجه حصلت اولاد جياد جو يسلمو على زياد بالاحضان وحتي هو متفاعل معاهم شديد وانا ركزت معاهم قلت يمكن عشان هو فاقد الإحساس دا.

#بعد_صبر_15
#بقلمي : #Noona_Elnour
من جانب سمر
عدت الايام واحنا مشغولين بتجهيزات الخطوبه . يوم الخطوبه من الصباح جو ناس امي ديك يا الونسه الضحك والترتيب . الظهر كدا مزن قالت لي الا امشي معاها الكوفير في البدايه رفضت تاني قلت لا احسن امشي معاها علي الاقل هناك حارتاح اصلو الايام دي بازله مجهود . مشينا هناك شي حمام بخار وحمام زيت ومنكير وتسريح كنت مرهقة بس مزن اصرت علي الا اتجيه. منن جاتنا جابت الغداء وهي زاته اتجيهت وبقت مزه. جاء مازن واخوهو وزياد لمن عرفني مشيت معاها طوالي جاء ساقني وصلنا هناك الكل علقو علي وعلي توبي نفسيات ارتفعت فوق. كانت المراسم حلوه شديد ومنظمه وعلمو حفله اتجدعت سااي والرقيص مع بنات خالتي زينب واولاد خالاتي عمر وعامر و احمد .زياد يحمر لي سااي اول من عيني تقع علي عينو طوالي بعمل نفسي بعاين في حته تانيه وهو يشيل ويتصل وانا خبرو ما جايبه في النهاية جاني ومسكني من يدي وقال لي بنات خالتي واولاد خالتي .عن ازنكم عايز مرتي شويه هم شغلوها لينا ساحبني من يدي وكأني حاهرب منو . طلعنا الشارع اخد نفس طويل وطلعو بغضب رفع لي التوب في راسي قال لي سمر دا شنو الكنتي بعملي فيهو دا .انا ساكته سااي عاد ما غلطانه ما بقدر افتح خشمي علي صوتو بتكلم معاك انا .خوفه سااي منو قلت لي كنت برقص بشارك مزن فرحته . قال لي الشعر برا وترقصي انا ما مالي عينك ولا شايفاني خروف قدامك وكمان الفستان تحت التوب قصير لا انتي شكلك جنيتي . طبعا هو بتكلم بكل عصبية اول مره اشوفو غضبان للدرجه دي قلت لي طيب اسفه ما تعصب كدا. عيوني اتملت دموع حضني عليهو قال لي اسف ما كان قصدي اعلي صوتي عليك بس وربي بغير بغير شديد ي سمري . بعدها بعدت عنو قال لي طيب ارفعي التوب ورجاءا ما ترقصي يا سمري قلت لي خير دخلنا جوه طبعا سمعت كلامو وبقيت محترمه نفسي. مازن لبس مزن الدبل وانا اشيل واصور وتاني اتصورنا معاهم وصور جماعيه تاني اتصورنا انا وزياد واولاد جياد . الحمد لله خلصت الخطوبه والناس بدت ترجع وانا كنت نعسانه وفترانه مشيت رقدت كدا في اقرب سرير وامي قعدت جنبي قالت لي شكلك فترانه قلت ليها اي والله . نطت منن قالت لي ما حتيتي يا دبدوبه وبقت هي وامي يضحكو قلت ليها خلاص لقيتي ليك فرقه فيني قومي عايزه انوم انا . جاء زياد قعد معانا شويه قال لي ارح يا مرتي بيتنا . قلت لي لا خليني انوم يااخ بكره برجع معاك قال لي وهسي مالو طبعا هو ولا بخجل قدام امي ومنن بتكلم عادي . امي قالت لي ارجعي بيتك اصلا انا بقعد بكره برتب معاهم حتي ارجع .و منن قالت لي كفاك عملتي لينا وجع وش ارجعي مع راجلك . يختي عاينت ليها كدا 😒😒 زياد قال لى يلا يا حلوه طبعا هو بس بحرجني بكلامو دا . قلت لي خلاص اجيب شطنتي قال لي مزن ادتني ليها بس فاضل انتي . امي قالت لي عاد يا ولدي مستعجل شديد انا سرعه سرعه انتفضت قلت ليهو يلا ارح ودعت ناس خالتي وطلعت هو طول الطريق يشل ويعاين لي قلت لي زياد علي فكره يعني حتاكلني بعيونك ديل ركز على الطريق ضحك وقال لي حاضر انتي تامري يا سمري .وانا النعاس خيم علي ونمت وصلنا متين وما عارفه لمن فتحت لقيتو بعيان لي قال لي صباح الخير يا سمري ما نفسك تقومي كدا وتبلي شوقي منك ليك كم يوم بعيده عني يااخ اشتقت لي ضحكتك وونسك وعباطك بس فجأة بقيتي عاقله . بصوت مليان نعاس حبيبي خليني انوم شويه قام بدون ما يقول شي وانا غمضت عيوني وكنت حانوم بس احس ليك بوميه بارده اتكشحت فيني بصوت عالي قلت لي زيااد . فتحت عيوني وهو طوالي بقي يجري قمت وبقيت جاريه وراه وبقول لي والله ما اخليك في زول طبيعي بصحي زول بالطريقه دي وهو جاري ويضحك وانا وراه . بس وقفت حسيت بالم في بطني وهو جاء علي مالك يا سمري خير حاصل ليك شنو قلت لي موجوعه يا زياد موجوعه قعدني في الكرسي وانا بس بقيت ببكي خفت يكون حصل للبيبي حاجه . بعد هديت شويه قال لي ارح نمشي الدكتور قلت لي لا .قال لي ما علي كفيك عايز اشوف حاصل معاك شنو وانا من جيت انتي بتشكي قلت لي ما بيحتاج . و سكتت في اللحظه ديك كنت عايزه اقول ليهو انا حامل بس تاني اتراجعت اتزكرت عمايلو بغض النظر عن اي شيء ما كان يخبي علي . قطع تفكيري لشنو م نمشي يا سمر قلت لي عادي لانو دا مغص .سكت سااي وداني الغرفه وغاطني عمل لي شاي بالنعناع شربتو وبقيت احسن .
___/____
من جانب روان

زياد بمشي ويجي وبقيت امل من قعدت البيت وزيزو بقي ما بتصل لي. بس بقت تجيني ليلي كتير تتونس معااي وتساعدني في شغل البيت وتمشي . دايما بتونسي بعمايلها لي ضرتها . راجله معرس فيها ممغسه هو ومرتو مغسه وانا اشيل واضحك . في اليوم الكانت فيهو خطوبه بت خالت سمر . مشيت ليها بعد الظهر بعد استاذنت من زياد سمح لي اطلع قعدتها معاها قريب المغرب حتي رجعت لكن حاسه نفسي ما تمام وجسمي كلو واجعني .

#بعد_صبر_16
#بقلمي :#Noona_Elnour

من جانب روان

مره كم يوم والملاريا متعباني زياد ولا لحظه ما خلاني برااي واهتم بي . حتي ناس امي جو زاروني وطلبت تسوقني معاها لكن زياد رفض قال ليها انا بهتم بيها . أمي وصتني عليهو قالت لي ما اظن القي احن عليك من زياد .راجل وزياده بعد بقيت كويسه الحمد لله زياد قال عايز يمشي يرجع سمر ويعقد معاها كم يوم وفعلا مشي . بعد طلع مني اتصلت لي زيزو وكنت زعلانه منو وكلي عتاب . كيف يهون على وما يطمن علي ويعرف اخباري . بس ما رد فضلت اكرر الاتصالات وبرضو مافي رد لمن قنعت قلت خلاص ادخل النت اشوف اخر ظهور ليه متين . دخلت ولقيت منو رسائل كتير وريكوردات وصور .فتحت الشات وانا كلي حماس قلت اكيد بكون اشتاق لي . نزلت عشان اصل لاول المحادثه،،، فتحت الصور فرحتي اتلاشت معقول دا مازن ودي منو كمان شفت صور كتيره لي والظاهر انها حقت خطوبتو . فضلت اعاين في الصور حتي البت المعاه دي شكلها ما غريب علي خليت باقي الصور وفتحت اول ريكورد ؛،،بقول لي فيه روان كيفك . انا عايز متين يجي الوقت دا وتفتحي الدردشه دي انا خطبت ومبسوط جدا حبيت اشاركك فرحتي عايز اكون صريح معاك انا ما حبيتك ولا شي كنت بتفاخر بيك سااي فراغ مني . بعدين انتي كسرتي اعز صديق عندي واهنتيهو واحرجتيهو قدام الناس وانا ما برضي فيهو عشان كدا ربطت معاك عشان بس اكسرك . زي ما دمرتي حياة معاذ انا اتعرفت عليك عشان ادمرك .وانا لمن جيت طلبتك حاولت ابين اني سيئ قدام اهلك عشان يرفضوني ودا الحصل . في الريكورد التاني قال لي انتي انانيه شديد يا روان وما بهمك غير نفسك متوقعه مني شنو اكون بحبك بالجد لا دا في احلامك انتي ما بتستاهلي ذره حب . انا من وقت بفكر كيف اتخلص منك ومن لياقتك يااخ خنقتيني وكرهتيني عيشتي ماشي وين جاي من وين بتتكلم مع منو بس الحمد لله اتقدم ليك الاسمو زياد دا وحلاني منك . مسكينه حتي اهلك بخسوك وعرسوك لواحد متزوج وبحب مرتو زي ما قلتي . اوعك تفكري تظهري في حياتي تاني . انت واحده معاقه وحقيره لدرجه والعملتو فيك دا اقل من البتستاهلي انا اخدت حق معاذ منك وانا مبسوط وراضي جدا. انا ما حبيتك ولا حاحبك انا حاحب مزن ولاخر العمر وحاعزمك عرسي . أما انتي حاولي يمكن راجلك يقدر يحبك لكن م اظن . هو معمي بحب مرتو وانتي مجرد خيار انفرض عليه . انا ما شمتان فيك وفي وضعك لكن دا جزاتك يا روان انا بكرهك . وانا بسمع في اخر ريكورد الدموع ابت تقيف كيف مازن يعمل فيني كدا لي بس . معاذ معقول صحبو انا صح غلط في حقو بس كيف هو ينتقم مني بالطريقه دي . مازن اصلو الدخلو شنو . وبقيت ابكي واعاين للصور وازيد في باكي مزن اي مزن نفسها الشفتها عند سمر . اي هي بت خالتها معقول وبقيت ابكي والعن في حظي .ولمن ركزت في الصور شفت سمر وزياد في الصورة الجماعيه هنا خلاص دموعي جفت ظاهر عليهم مبسوطين شديد . و سمر معقول تكون ما بتعرف مازن وكيف بتكون ما بتعرفو يااخ حتي انا وريتها صورتنا ما كلفت نفسها تكلمني . وتكلمني لي ما هي مبسوطه ومعاها زياد واكيد حتفضل بت خالتها علي في اللحظه دي احتقرت سمر شديد . وانا قاعده و ببكي الباب ضرب غسلت وشي عشان ما ابين اني ببكي . قلت منو الفي الباب ؟ قالت لي انا ليلي افتحي لي. اول من فتحت الباب وسلمت عليها قالت لي مالك عامله كدا بتبكي ولا شنو قلت ليها اتفضلي . في وقتها كنت حاسه بالضعف ومحتاجه حد يخفف عني فقعدت وحكيت ليها كل شيء . لامتني شديد وقالت لي انتي غبيه تبكي عشان واحد زي مازن . بعدين ما تكوني مسكينه كدا زي ما سمر ازتك إنتي ازيها . بعدين زياد زي ما هو راجلها هو راجلك قلت ليها ما فهمت . قالت لي مش مازن قال ليك زياد ما بحبك ومستيحل يحبك انتي اثبتي ليهو العكس واكسبي زياد . أما بالنسبه لي سمر انتي حكيتي ليها وعملتي خاطر لمشاعرها بس هي عملت شنو ما اهتمت بي دا كلو . واصلا لي تهتم وعشان منو ما عشان ضامنه زياد بحبها وما حيتخلي عنها . قلت ليها لكن زياد م عندو لي حاجه . قالت لي غلطانه هو عندو ليك حاجه لكن انتي ما شايفه كدا . طيب بوريك كيف،،، هو لمن مرضتي ما كان قاعد معاك وبهتم بيك ودا سمر بيت اهلها . وكيف كان خايف عليك معقول انتي ما شايفه كل ده .. قلت ليها لكن هو بحب سمر قالت لي دا احتمال واحتمال بحبك انتي بس بكابر عشان سمر . وانتي لازم تثبتي حبو ليك عشانك وعشان مازن وعشان زياد . و عندك حل قدامك سمر ما خلفت لي زياد طفل واصلا انا ما بريدها عشان مفتريه . فانتي حتكسبي اذا خلفتي منو . قلت ليها بس كيف قالت لي قومي اول شي غسلي وشك وبطلي بكي ما تخليك ضعيفه للدرجه دي . وانا بوريك كيف . غسلت وشي وجيت وانا قررت اخطي الخطوة دي عشان اثبت لمازن انو في زول بحبني . اما بالنسبه لسمر ما بتستاهل اتخلي عن زياد عشانها . ليلي قالت لي الحل بسيط اغريهو قلت ليها ما فاهمه . قالت لي شويه شويه تخلي يتعلق بيك وبالتدريج حيقع في حبك . اول شي اتحبسي اتدخني وطلعي الدخان اللون ببقي رهيب .

#بعد_صبر_17
#قبل_الأخيره
#بقلمي :#Noona_Elnour

من جانب سمر

لمن ولصنا البيت قلت لي زياد عندي موضوع عايزه افاتحك فيه قعد وعاين لي بانتباه . قلت لي جاهز عشان تسمع قال لي عندك شك يعني ؟ قلت لي ابدا . طيب يا زياد انا ،، انا عايزه انزل شغل في المستشفي . قال لي سمر 😒 قلت لي عارفه بس انا بالجد عايزه اشتغل . لي اكتر اربعه سنه اتخرجت مختبرات طبيه بمرتبه شرب فدا كلو يروح سااي انا حابه ابدا شغل وبتمني توافق . قال لي سمري انا منقص ليك حاجه او حصل مره طلبتي مني حاجه وما جبتها ليك جاوبيني ؟ قلت لت لي لا ابدا انت ما مقصر . قال لي طيب عايزه تشتغلي لي . قلت لي الموضوع رغبه وبقيت مصره علي في ال نهاية قال لي طالما دا قرارك انا موافق . فرحت شديد جيت حضنتو وقلت لي شكرا . قال لي ولو وانا عندي كم سمر . بقينا نفتش في النت عن فرص عمل . ولمن فترنا رقدنا نمنا او اقول زياد النام وانا من الفرح فضلت صاحيه . تاني يوم زياد قال لي رايك شنو نمشي ناس امي . مش انتي قلتي عايزه تمشي ليهم قلت لي تمام حلو . بس كانو انت بتعمل كدا عشان تماطلني عشان ما القي شغل . عاين لي قال لي ظالماني لو ما عايزه ما حنمشي . قلت لي لا حنمشي جهزنا حالنا ومشينا . خالتو هاجر فرحت بشوفتنا سلمت علينا سلام شوق . وجات عصماء مرت جياد واولادها قعدو يتونسو معانا . انا سرحت ... هسي لو كنا كدا مالو ليه بس . زياد اتزوج وحتي خالتو هاجر انا ما اتوقعت تخت واحده تانيه في مكاني . طقتقت لي رماز بنت اخو زياد قالت لي شنو يا عمتو وين سارحه بترعي في غنم ابليس . قلت ليها جبتي الكلام دا من وين ؟ قالت لي لمن نكون في المدرسه وحده تشرد زيك كده الاستاذة بتقول ليها بترعي في غنم ابليس . ضحكت وقلت ليها انتي عسل . قعدنا معاهم كم يوم وزياد بمشي الشغل ويجي المساء . حسيت بي متغير بس ما ركزت مع الموضوع شديد . يوم جاء وقال لي : لقيت ليك شغل في مستشفي ...... نطيت فيهو وحصنتو قلت لي ربنا ما يحرمني منك يا زيادي . رد لي وما يحرمني منك يا سمري . رجعنا بيتنا يوم السبت الصباح لانو يوم الأحد نازله شغل. رتبت البيت وغسلت وكويت وانا طايره من الفرح . تاني يوم لبست واتعطرت وعملت لي مكياج خفيف زياد قال لي هسي لو بتتمزمزي لي كل يوم كدا مالو . قلت لي زيااد يااخ . قال لي مالك لمن اشوفك بالمنظر دا بغير راي وما اخليك تمشي وانا اخلي شغلي واعاين ليك واشبع منك. قلت لي زيااد بطل ثقاله البس خلينا نطلع . اتاخرنا قال لي ولو قلت لا . قلت لي بزعل منك .قال لي طيب تعالي زرري لي القميص دا جيت جنبو وبديت ازر وهو يشيل وبعاين لي لمن وترني . قلت لي زياد لو حتفضل تعاين لي كدا ما حاقدر ازررو ليك قال لي هو في زول عندو الحلا دا كلو ويشيل نظرو عنو . بقيت اتبسم سااي. بعد خراج روح طلعنا وبديت شغلي في المختبر اتعرفت على دكتور يوسف ودكتوره جيهان و أروي دي الحاشتغل معاها في المختبر ناس راقين وفاهمين وكلهم زوق الشغل في البدايه كان بالنسبه لي متعب بس تاني اتعودت .
___________
من جانب روان

فكرت كويس في كلام ليلي وقررت اني اكسب زياد وما اخليهو يستغني عني . ويمكن هو كمان يكون بحبني زي ما قالت ليلي . قلت خلاص الايام البقضيها مع سمر دي انا استغلها اظبط اموري . بقيت كل يوم بطلع لي ليلي واتدخن معاها واجي بالليل اتمسح وانوم طلعت ملابس القصيره كلها وختيتها في بدايه الدولاب . اجتهدت شديد طلعت الدخان وبديت ترطيب الجسم بقا ابيض من زمان. ليلي قالت لي قولي لي زياد يحول ليك قروش . قلت ليها مافي داعي انا عندي قالت لي لا القروش دي حجه بس عشان تتكلمي معاه . فعلا اتصلت علي زياد وقلت لي عايزه قروش قال لي تكرمي . حول لي . مشينا انا وليلي السوق وما خلينا تشيرتات ولا فساتين قصيره ما اشتريناها وملايات . ليلي قالت لي خلي زياد يوريك هو جاي متين . هو اصلا بقعد معاي اسبوع او بالاحري ببيت بس والصباح بمشي شغلو . والاسبوع التاني بقضي مع سمر . اتصلت علي وقلت لي زياد لمن تكون جااي اتصل لي . وتعال بدري شويه لاني عايز حاجات . قال لي خير . في اليوم الجاي فيهو اتصل علي وسلم . قال لي عايزه شنو ؟وريتو الاغراض والحاجات قال لي خير العصر كدا بكونو عندك . قلت لي تسلم يا زياد قال لي ولو الواجب . اتغظت من كلمتو دي . طوالي لبست توبي الدنيا كانت صباح مشيت لي ليلي . قالت لي خير مالك من الصباح يا بنت . قلت ليها زياد الليلة جاي وجيت اسالك اها اعمل شنو واتصرف كيف ؟ ابتسمت بخبث قالت لي تقومي بي دربك تمشى الكوفير تعملي حنه عروس وتكوي الشعر دا اصلو شعرك طويل وناعم تغيري التسريحه عشان هو يلاحظ . بعدها اعملي اكل وجهزي وبخري بيتك . واختاري ليك فستان من الفساتين الاشتريناها سوا واوعك تلبسي التوب قدامو واتجدعي وانتي داخله ومارقه . بعدين حاولي اتونسي معاه شوفي ليك باب عشان يركز معاك باي شكل وهو براهو بضعف بس دايره صبر . طالما بقعد معاك اسبوع انتي استغلي الحاجه دي لصالحك واكسبي .

#بعد_صبر_18
#والأخيره
#بقلمي : #Noona_Elnour

من جانب زياد

صحيت الصباح ولقيت روان نايمه جنبي . قمضت عيوني مسافه علي أساس اني افتح القي دا كلو عباره عن حلم . بس مع الأسف فتحتهم وما اتغير شيء قمت وشلت قميصي وانا بحاول استوعب كيف أنا عملت كدا . كيف عملت كدا مع روان . كيف انا قربت منها وكسرت الحاجز دا بدون ما اشعر . دخلت استحميت وشلت تلفوني لقيت مكالمات من سمر هنا يداب لاحظت . سمر انا قربت علي وحده غيرها 😔 كيف قدرت اشارك تفصايل زي دي روان بدون ما اعمل خاطر لي سمر💔 انا صح اتزوجت روان بس كمان كان من البدايه اكلم سمر . هسي لو عرفت حصل كدا بينا انا وروان حيحصل شنو . لا انا ما حاكلمها بس كيف حاخبي عليها . وروان انا حاعمل معاها شنو . وسمر كيف حاقدر اخت عيني في عينها بعد الحصل دا كلو . ختيت التلفون ودخلت اتوضيت وجيت صليت وانا ببكي وبدعي ربنا يهونها علي . انا ما بقدر اخسر سمر ما بقدر . بس هي لو عرفت مستحيل تسامحني .بعد خصلت صلاة ودعيت شلت التلفون ومفتاح عربيتي وفتحت الباب . كنت عايز اطلع بس روان نادتني زياد يا زياد جات طالعه وهي لسه بمنظر امس دنقرت راسي وكيف حارفعو وانا خجلان من عملتي . جات علي قالت لي زياد حبيبي صباح الخير . قلت ليها صباح النور . قربت مني وختت يديها علي رقبتي قالت لي مالك طالع هسي ما تخليك معااي شويه . نزلت يدينها وقلت ليها الحصل امس بينا يا روان انسيهو . قالت لي كيف كيف يعني عايزني انساهو علي فكره يا زياد انا وانت ما عملنا حاجه غلط ودا حقي عليك وحقك علي يعني ما في عيب . قلت ليها بس دا ما كان لازم يحصل . قربت مني قالت لي وحصل و انت كسرت الحاجز البيني وبينك بارادتك وانا ما جبرتك تجيني او تعمل معاي كدا . بصوت عالي قلت ليها روان . قالت لي زياد ما تعلي صوتك دي حاجه حصلت وانتهت .
________
من جانب سمر

مر كم يوم وانا بفكر اني اكلم زياد بحملي واشوف ردت فعلو حتكون شنو . بس بتردد . كنت بتصل علي روان عايزه احكي ليها عن مازن وقصته معاه شنو وهو هسي خطب بت خالتي . بس بلقي تلفونها مغلق . يوم الأربعاء المساء اخدت قرار وقلت بكفي لحدي هنا . انا حاكلم زياد اصلو بطني بقت ظاهره والحمل ما بتدسي اكتر من كدا . وأما روان انا حامشي اكلمها يمكن مازن ما يحكي ليها بس انا حارد ليها المعروف زي ما هي كلمتني بزواجها من زياد .جهذت حاجاتي ونمت علي كدا . الصباح قمت بدري نضفت البيت وبخرتو وعملت بسبوسة ختيتها في التلاجه . قلت بعدين المساء لم يجي زياد اكلمو . دخلت اخدت حمام لبست واتعطرت كنت ماشه الشغل بس تاني قلت احسن امشي اكلم روان الساعه تسعه بتكون صحت . من هناك امشي الشغل عشان ارجع بدري بيتي . ركبت عربيتي وسقتها وصلت شارع بيت روان شايفه عربيه تشبه حقت زياد بس ما كانت وافقه جنب الباب بعدين قلت زياد هو بكون في الشغل ما بكون قاعد هنا . وقفت عربيتي بعيد شويه . لمن وصلت وقفت اصلح طرحتي عشان ادق الباب بس لاحظت لي الباب فتح . سمعت روان بتنادي علي زياد . بقيت وافقه بسمع في الحوار الدار بيناتهم . معقول زياد يكون عمل فيني كدا كيف ، كيف بس بقيت متصمغه مكاني وكل كلمه بتقولها روان وزياد برد ليها بتاكد لي انو الحصل دا حقيقه . وانا ما بتوهم زياد علي صوتو علي روان في اللحظه دي الباب فتح . هو كان ما ديني ضهرو وروان قدامو كانت بمنظر و حاله خلتني اتاكد انو هم بالجد عملو كدا . من بين صدمتي ودموعي النزلت ابت تقيف . قول لي زياد. قبل علي قال لي سمر قلت لي قول لي دا شنو السمعتو دا ؟ قال لي سمر اسمعيني بس . قلت لي اسمع شنو اسمعك انك بتخوني يا زياد ولا اسمع ادق تفاصيل ولحظات عشتها معاها . كيف بس يجي من قلبك تعمل فيني كدا . دموعو نزلت قال لي سمر قلت لي حريقه تاخدك وتاخد سمر معاك . عايز تقول شنو يعني . روان قالت لي سمر ممكن تسمعيني . قلت ليها وانتي كمان ما اتوقعت منك كدا . معقول انتي نفسها روان الحكت لي كل شيء انا اعتبرتك اخت وصديقه بس انتي عملتي شنو اخدتي راجلي . فعشان كدا تسكتي خالص . قبلت علي زياد قال لي سمر انتي بتقولي شنو وبتعرفي شنو . نطت روان قالت لي هي بتعرف كل شيء عارفه انك متزوجني وانا الوريتها هي شافتنا مع بعض يوم جينا من قطر . قلت ليها خلاص اسكتي صوتك خالص ما اسمعو . اي انا بعرف بعرف يا زياد بس كل يوم بقول زياد عندو اسباب زياد وحيكلمني . مر شهر واتنين وانت خبيت علي . انا كنت مطمئنه انك مستحيل تفكر في غيري مجرد تفكير . بس انت عملت علاقه وما هز ليك رمش . ولا فكرت فيني رفعت راسو بيدي قلت لي عاين لي هنا انا بتكلم معاك نزل راسو . قلت لي وكيف تقدر تخت عينك في عيني ما انت عمايلك براها بتكفي . قال لي سمر اديني فرصه وحده بس وانا . قلت لي فرصه وحده عشان شنو عايز توريني من متين وانت بتعمل وبتنوم مع روان ، قال لي بصوت عالي سمررررر قلت لي لسه علي صوتك واضربني كمان ولسه عندك عين كمان . انا بكرهك يا زياد كرهتك واحتقرتك شديد .