#مندرين
بقلم سحر سمير و فاطمة قسم الله
-١٧-

#مندرين17

#جانب_وصال

" بعد مرور ساعات - فجأة صحيت على صوت صريخ و كواريك و جوطة "
م عارفه قمت كيف لمن وصلت باب الغرفة - بعد طلعت لبرا سمعت صوت عم محمد " ابو قصي " ، رجعت سريع و شلت لي طرحة كبيرة لبستها و طلعته على جملة
( غلطانة انا الاعتمدت على حيطة مايلة ، على حضرتا نايمة و انا ولدي هنا كان داير يموت ، جايانا بلا و اذى ، انا الخلاني شنو اعتمد عليها ، من لمن قصي دا طلع من المستشفى انا عيني دي ما غابت منه دقيقه وحدة )

مروة ( شافتني ، اتوترت جات علي وقفت جمبي نظام بتشاركني في الكلام و تبرد علي كلام خالتو فوزيه ) : انتي اكيد عارفه ناس السكري ديل اصلاً انفعالين و لسانهم م عليهو لوم ، ياهو اللوم بجي بالغفلات ! و ما بكونو بقصدو شي والله ، خلعه ساي و كدا .. و
يا خالتي خلاص اطلعو من الحمام دا الحمدلله قصي بخير ، يا عمي جيبو جيبو خلي وصال تنشف ليه و تبدل ليه ملابسو دي !

وصال ( انا لسه م مستوعبه حاجة و قلبي بقى يدق شديد و عيني على الباب حق الحمام خصوصاً اني م قادرة اشوف قصي ، بس لقيت نفسي بتمتم بي اسمو ) : قصي ! قصي !! قصي مالو يا عمي !! ( دايرة ادخل ، قالي ممرقو يا بتي )
فوزية : شوفي يا وصال ، الحق و الجد ما بزعل ! من هنا و لي قدام انا عفيتك من مسؤلية قصي ، يدك ما توصلو في علاج و لا في حاجة تخص صحتو ، و من الليله تمشي تنومي في الغرفة التانيه و تخليني انا معاهو يا اما تجيبو لي في غرفتي بهناك !!
مروة ( مسكتا من قريب ) : خالتي ! دا كلام شنو !! م كدا استهدي بالله !

(رفعت راسي عاينت ليها بأستغراب )
عم محمد ( وهو ساحب قصي بالكرسي لي برا ) : خليها خليها يا مروة يا بتي خليها تتكلم لسه .. ( عاين لي ) وصال ! قصي كويس بس الكرسي اتزحلق من تحتو عمل ليهو حركة غلط ! تعالي ( زح لي - بقيت بعاين لي قصي و ملامح وشو المرهقه - نزلت جمبو قعدت على رجولي )
وصال ( بي لهفه ) : حاسي بي شنو ؟ في شنو بوجعك ؟ نمشي الدكتور هاه ؟؟ ليه م صحيتني مش انا نبهت عليك ! يا قصي ؟ رد علي ليه عملت كدا هاه ؟ لا حول ولا قوة الا بالله العلي العظيم ، ( قمت عشان احرك الكرسي و ادخل بيهو الغرفه عشان اغير ليه )

فوزيه : ماشه بيه وين ؟ زحي ، جيبي لي حاجاتو كلها في غرفتي !

قصي : دقيقه يا وصال اقيفي !
( عاين لي امو ) : وصال في البيت دا زوجتي ! يعني حبكم لي يتقسم نصين بيني و بينها ! يعني خوفكم علي يتقسم نصين ! يعني كل اذى سواء نفسي و لا جسدي اقسميهو يا امي بيني و بين وصال نصين ! دا في حالة وحدة ، لو قعدنا في البيت دا !!!
هي هنا م مجبورة تخدمني بالطريقه البتتكلمي عنها دي هي م خدامة لي ! و بعدين انتي يا امي عينك فيني بتتفشي فيها هي لشنو ؟ هي الشالتني رمتني ؟؟ ما ياهو حالها من حالكم - انا شايف و سامع لومك ليها في اتفهه الاسباب و كدا م صح يا امي دي بت ناس برضو و امانه عندنا ، ما كنتي بتحبيها و دايراها و فرحتي بيها اسي مالك !؟
على العموم زي ما عارفين انا لي بيت و مجهزو و سلفاً عندنا نية رحول ليهو ، انا محتاج لي وصال حالياً و هي كمان محتاجة لي ..
و انا اسف يا امي لو فهمت خوفك علي غلط او كلامي اوحى ليك بعدم احترام مني ليك ، و مشيتي بيتي دي ما ليها اي سبب غير راحتي و راحة وصال في الوضع الحالي دا —-

وصال ( اخترت السكوت لأسباب كتيرة شديد ) ..
قصي : دخليني الغرفه
فوزيه : قصي يا ولدي انا قلبي مقطوع عليك من يوم الحادث انا م نمت لي نومة هنيه و انا غصب عني بنفعل والله ، خلاص تاني م حتكلم بس خليك هنا قدام عيني !
قصي : ربنا ما يحرمني من حسك يا امي انا ما ماشي عشان انتي اتكلمتي والله مع وصال ،هي زي بتك و زي مروة و عارف وصال ما حتمون ركزت في كلامك دا و مستعد احلف ليك ، زول بعرف وصال قدري مافي ، انا بس ماشي لانه اصلاً داك بيتنا و جاهز انتي عارفه كدا يا غاليه !
فوزيه : قولي حاجة يا وصال يا بتي !
وصال ( بي تفادي و طيب خاطر ) : معليش يا خالتو
فوزيه : محمد اتكلم ساكت لشنو انت
عم محمد : كلام ولدك صح يا فوزية ، خليهم ياخدو راحتهم !
قصي : كلها ساعة زمن و تكوني عندنا و نكون عندك ، دا غير ان هناك عندي مساحة لغرفة العلاج و للحركة حوشي اكبر ، تعالو لينا انتو بس م فرقت ..
فوزيه : م مشكلة طالما فيها مصلحتك يا ولدي اتوكل
قصي ( ابتسم ) : يلا ي وصال

( بعد مشينا )

عم محمد ( مسك فوزيه على جمب ) : ليه يا فوزيه ؟ ليه
بت الناس دي اسي م حتخجلي لو وصلت كلامك دا لي امها و ابوها الما شفتي منهم غير الاحترام و الطيب و كل خير ؟ اتخيلي بس مشت حكت لي امها ! منظرك حيكون شنو قدام نفسك و قدامهم ؟؟