بقدر انكر ان ليها دور كبير في حالتي حالياً ! في الصراع اللي
 مفروض انا مااعيشو ! بعد ما بقى لي بيت .. بيتي لي براي .. 
امارس حريتي فيهو مع شريك حياة عمري م كنت احلم بيه ، 
شفت فيه عوض ربنا و رحمة ربنا .. 

جا انتشلني من قاع حياتي و اوجاعي و عيشني فوق .. فووق .. فوق 

بنى لي واقع م كنت بحلم بيه .. بقى لي الأم و الاب و الاخ 
و الاخت و الصديق و الصديقه ، بقى لي الدنيا بالجد ، رغم ان 
دا حق من حقوقي طالما اتزوجني يبقى ليبيتي وحياتي ، بس
 انا كنت حاسة انه عمل لي حاجة عظيمة شديد ..في انغماسي في افكاري البتقلب مزاجي و بتأثر على ملامحي فوق تحت ، سمعت صوت المفاتيح حقتو عند باب الشارع !!

من غير ما احس لقيت نفسي بجري على الباب و بفتح ليهو قبل يفتح ! مجرد ما دخل من الباب لقيت نفسي حضنتو من غير مقدمات و الدموع في طرف عيوني بقاوم فيها !

لقيتو ضغط علي شديد و بيردد لي في ( اعفي لي ، إتأخرت عليك الليله و خليتك قعدتي براك كتير )

و كنت لسه ماسكة فيهو ، احساس امان م ليهو حد .. هو البيطمني و بخليني احس اني في امان و بخير .. لحد م قلت في نفسي انا وقفتو كتير و هو ياداب راجع تعبان ، و كدا زاتو حيقلق !

حاولت ارجع منو لي ورا .. لقيتو م داير يفكني و ماسكني عليهو قوي .. هنا انا البديت اقلق و حسيت ان في حاجة حاصله معاه ، اخدنا مسافه و فكاني شويه و قاللي :

( اعفي لي ) قلت ليهو ( مجنون انت ؟ كيسك دا فيهو شنو ؟ شامة ريحة موز )

قالي ( ياهو موز ، عارفك بتحبيه ) ..

دخلنا لي جوا و ماسك يدي و ماسكة كيس الموز بي يد .. قلت ليهو :

** اتأخرت عافيه ؟

__ عافيه بس مشوار طويل عشان مشيت بالموتر

** طيب عملت فاصوليا و رز ، اخت ليك طوالي ؟

__ لالا تعالي اقعدي عايزك !

** ( ختيت الكيس في التربيزة و قعدت جمبه بي قلق ) احكي لي !

__ بحبك

** ههه ما قدري !

__ حتكلم ما تقاطعيني تمام ؟

** تمام

__ ما حسألك اقوليك مالك لاني عارف ، و ما عارف اعمل شنو عشان اريحك و تنسى الماضي و تركزي في حياتك ! الكنتي عايشاهو دا امتحان من ربنا و ربنا طلعك من البيت داك و بقيتي هنا ! معاي .. البرجعك تتذكريهم شنو ؟ هل في زول حاول يوصل ليك منهم او اي حاجة ؟ لو في كلميني عشان انا اتصرف ..

** لالا والله مافي زول حاول يوصلني ! هما اصلاً ما صدقو اني عرست و اتفكو من مسؤليتي !

__ طيب خلاص و انتي كمان اتفكي منهم و العذاب العشتيه دا اعتبري كفارة جسد ! ولا يكلف الله نفساً الا وسعها ! شوفي لو حابه نسافر م عندي مشكلة ، لو حابةانقل شغلي في ولايه تانيه فترة مؤقته ما عندي مشكلة ، لو حابة نطلع اجازة برا السودان عديل والله م عندي مشكله ! اهم شي تكوني مرتاحه ! وريني اسوي شنو ؟

** دايرة طفل !

__ تمام اتكلمنا في الموضوع دا ! شوفي حابة نبدأ من وين انا ما عندي مشكلة !

** طيب كنت مفكرة اتكلم مع جارتي دي ياها دكتورة في نفس التخصص لكن غيرت راي م حابة زول قريب لي يعرف عني حاجة حساسة زي دي ! و عارفة ردك لكن الحاجة دي حتريحني شديد !

__ عشان كدا انتي اشري بس !

** نمشي نعمل تحاليل مبدئيه بكرة و نشوف المشكلة اول حاجة وين بعدين نشوف التوجيهات الممكن نلجأ ليها شنو !

__ عيوني ليكي يا سهادي !

** تسلم عيونك .. هههه بمناسبة سهادي دي ! إتذكرت خطيبة صحبك و الاسم داك راح لي ! م عارفه لكن حسيت نفسي دايرة اقرصا في جضوما ديل ههه

__ هه دا تنمر ؟

** لالا ياخ اتنمر في شنو البت حلوة عديل ماشاءالله !

__ النصيحة !

** ( بي خلعه ) ! قلت شنوووو ؟؟؟؟؟؟؟


#قصي_بيقول !

وصلت البيت ، صليت و اكلته و قعدت جمب امي شويه و كنت بتكلم معاها في موضوع العرس ! بعدين جات مروة ( زوجة الهادي اخوي الكبير - ساكنة مع امي فوقطوالي ) انا استأذنت بعفوية ! مروة قالت لي : خليك قاعد طيب انا ماشه !

قلت ليها : ما فهمتك ؟ ماشة وين ؟

مروة : ما عارفه لقيتك قمت مجرد م انا جيت ! زي الكنتو ماسكين ليكم موضوع !

قلت ليها : تعبان والله يا مروة ما عارف فكرتي فيها كيف دي !! لكن كنت بتكلم مع امي في موضوع العرس ! انا جاهز و البيت كمان ، كنت عايز افهم الخطوات المفروض اسويها شنو ؟

مروة : ربنا يبارك و يتمم على خير يارب ! ما عليك انا بقعد مع خالتي اسي و نرتب و نشوف الحاصل ما تشيل هم !

امه : ربنا يتمم على خير

قصي : يارب

مروة : يعني هي ما حتسكن معانا هنا !؟

امه : مروة حبيبتي ! نتكلم بعدين في الموضوع دا انا بفهمك كل حاجة ! الهادي كيف اسي الحمة خفت ؟

مروة ( بي توتر ) : اي خفت ، خليتو نايم و نزلته !

قصي : معليش يا امي و مروة بس م عارف لو انا احساسي صح ولا غلط ! بس ليه بحس ان سيرة ان حا اسكن برا دي بتزعل ؟؟ بعدين البيت اصلاً م بيحمل دور تالتفوق ولا مساحتو مساعده نقسم ! دا غير انه هي قالت راحتا في كدا ، دا م معناتو ما دايراكم ولا عندها ضدكم حاجة و انتو قعدتو معاها مليون مرة و دخلتو فيها هي واهلها و عارفنها كويس !!

الهادي ( بي صوت واطي ) : امي ؟؟ في شنو جطتي في بت الناس كدا ؟ امي البت لسه عروس ساعات في نصنا ! ما عادتك يا امي تنفعلي و تكوركي كدا حتى فينا ما بتسويها مالك ؟؟
فوزيه : الهادي ! اكل اكلك - اصلاً الحقيقه بتزعل !
الهادي : مافي اي حقيقه في الموضوع و العملتي بيزعل يا امي !
قصي : امي ! وصال دكتورة زي و زي الهادي و زي ابوي ، مركبنا وحدة م تنسي الحاجة دي !! و حاولي بردي نفسك معاها البت دي م متعودة على الجوطة دي براك شايفه امها و ابوها شايلنها من الواطة شيل و لو م بحبوها م بدونا ليها بالبساطة دي !!

الهادي : يعني انت مراعي للنقطه دي ؟؟
كان انت و لا امي م عارف الحاصل عليكم شنو ! تعاملكم مع الزولة دي بالذات عجيب ، المنكم يشيلها فوق راسو - الزي وصال في عمرها دا طموحهم سفر و لبس و فسح و صرف و امور زي دي ! مش وحدة تجي تقفل نفسها مع واحد في غرفه محتاج رعاية !!
و كان داير تزعل من كلامي ازعل و خلي الباقي - انا اصلاً سكت كتير و عايز اشوف حدكم وين ( قام مشى ) !!
مروة : الله يصلح الحال .. ( بتشيل الصينيه ) !

#قصي_بيقول

بقيت خايف على وصال ، من نفسي و من خوف امي علي
للحظه حسيت كأننا بنشيلها ذنب الحصل لي ، بس بالجد انا ما عارف مالي ، م قادر افهم انا بعمل كدا ليه ، و دايماً في حالة مقارنه ، و انفعال و ضيق و كتمة -
مشيت الغرفه راجع ، لقيت وصال قاعده في سجاده الصلاة منزويه و سرحانه ، قلت ليها :
قصي : تقبل الله - لو خلصتي تعالي جمبي عايزك
وصال : م عايزة اتكلم في حاجة لو عندك موضوع ، مصدعه عايزة انوم شويه لو احتجت حاجة صحيني ..
قصي : وصال ! انا عارفك مزعوجة و متضايقه و مستغربة الوضع ، اسمعيني !
وصال : قصي انا م مزعوجة من حاجة غير الحادث الحصل ليك و عشان دا م حيفيد فا انا مركزة على انك ترجع و تبقى احسن ! فا ساعدني … ( طبقت السجادة و جيت رقدت و اتغطيت ) - جد محتاجة انوم انا لاني شبه مصدعه ، لو عايز حاجة صحيني …
قصي " بي احباط " : حاضر !!
وصال : اساعدك تجي السرير ؟؟
قصي : لالالا طالع برا شويه و احتمال اتصل على احمد يجيني شويه !
وصال : طيب ( قبلت وشي منه و بمسح في رقراق عيوني و نمت )

" بعد مرور ساعات - فجأة صحيت على صوت صريخ و كواريك و جوطة "

#جانب_سهاد

( لقت احمد بيكوي في قميص كاروهات ازرق بي ابيض و اسودا )
سهاد : بسم الله ! كدي زح يا احمد ما تكلمني اكوي ليك معقول قاعد تكوي براك !
احمد : عادي حبيبي وين المشكلة دايماً بتكوي لي و بجي بلقى ملابسي دي مطبقه و مكويه و معطرة عديل في الدولاب فيها شنو لو ساعدتك !
سهاد : طيب كدي زح لي جيب المكوة دي !
احمد : برضو ! م بزح انا قربته اخلصو المهم بطنك كيف ؟
سهاد : لالا تمام حمدلله
احمد : قلبة البطن راقت ؟
سهاد : شديد والله حمدلله
احمد : طيب رايك شنو تلبسي تمشي معاي منو تغيري جو و منو تباركي !
سهاد : هو انت ماشي وين اصلاً ؟
احمد : ماشي لي قصي !
سهاد : اجي ! و قصي م عندو شهر عسل ؟ دي شنو قلة الذوق دي يا احمد سبب واحد يخليك تمشي ليهم مافي !
احمد : كدي استهدي بالله !
سهاد : لا اله الا الله سيدنا محمد رسول الله
احمد : هو ضرب لي و بعدين فكري فيها انتي ما إلا اقول ليكي بالواضح يا سهاد و بعدين قصي مع اهلو في البيت يعني مافي بيتو الخاص !
سهاد : فاهمه انا بس كلامهم الحلو خلص يعني ! القعاد مع حبيبتو دا براهو بالدنيا ! ولا انا فاهمه غلط ؟
احمد : لا ما فاهمه غلط ي سهاد - م علينا يا ستي المهم ضرب لي و دا غير ان في موضوع الكابلات حقت بيتو دي كمان احتمال كبير يكون ضرب لي عشانها !
سهاد : جايز برضو ، المهم انا م بقدر امشي والله ! احتمال امشي على سلاف جارتي و احتمال لا - لسه م قررته !
احمد : ما عارف بس بقيت بقلق لمن اخليكي وراي بقدر م كنت بنق ليك عشان تطلعي على الناس و تعملي صحبات بقدر ما اسي م حابي الحاجة دي م عارف ليه !
سهاد : انا في كل الاحوال مافارق معاي - على كلاً خلي بالك و انت سايق !
احمد : حاضر - انتي اكلي ليك حاجة قبيل م اكلتي كويس !
سهاد : حاضر حياتي - حاول ما تتأخر علي
احمد ( ابتسم بي فرحه ) - حاضر اصلا حا اشتاق ليكي م بقدر اتأخر عليكي !
سهاد ( بتصلح ليهو في القميص ) : م اكتر مني !
…

#جانب_حنين

الساعه 6:27AM " صباحاً "

فجأة صحيت و لقيت نفسي نايمة في سريري - استغربت انا اخر حاجة بتذكرها ، اني كنت في العربية معاهم … بعداك استحضرت اني غفيت و كنت سامعه صوت سراج دا بعيد ، و هو بيقول لي ( حنين .. وصلنا .. اصحي عشان تنزلي كملي نومك في بيتكم جوا )

كنت قايلة نفسي بحلم - لحد ما فتحت عيوني و شفت ابتسامتو و هو بيصحي فيني من كرسيهو و كل وحدة كانت نايمة على اتجاه . لمن استوعبت الوضع كان راسي على الشباك و سلمى راسها على كتفي - لقيتو بيقول ( سلمي .. قومي )

سراج : م حتصحى نومها تقيل زي ناس كدا - زحي ليها راسها و اتحركي !
حنين ( زحيت من سلمى براحه و نزلته من غير انطق كلمة و كان هو بس بيضحك ، و فضل واقف مسافة لحد م دخلت البيت و بتذكر اتكلم مع ابوي كان نزل ليهو من العربيه و بعدين دور فات )

يا الله - منظري بايخ انا كيف نمت في العربيه و كيف م ودعتهم و لا شكرتو و قال شنو لي ابوي ولا انا بتخيل يارب …
مسكت تلفوني - لقيت رسالة من رقم مكتوب فيها :
{ عندك معاي ساعة ، دايراها ؟؟ }
اتنفضت و بقيت بعاين في الرقم ! دخلتو في برنامج التولر لقيتو بإسم ( موفق ) - استغربت و رديت ليهو !؟ م عرفتك !!
في حين انه عاينت في يدي ساعتي مافي و لي لحظة حسيت ب ان ساعتي دي مهمة شديد رغم اني م بلبسا الا كل فترة و فترة !!

رد لي بي صورة ( مصورها ماسكة في يده و مكتوب معاها صباح الخير )
رديت ليه : صباح النور !! انت سراج ؟
__ ايوا سراج
** ظاهر لي بي موفق
__ عييك دا صحبي - الرقم دا قصتو قصه ! المهم عايزاها ولالا ؟
** انت رايك شنو ؟
__ شكلك صحصحتي ههه
** انت م نمته لحد اسي ولا شنو ؟
__ صحيت صليت و تاني م جاني نوم
** ربنا يتقبل !
__ منا و منكم يارب - حترجعي تنومي ؟
** ووين يا ياريت والله ، عندي محاضرة كمان ساعتين
__ كل يوم في الحال دا ؟
** لا لا -دقيقه !

" دخلت ليهو بأتصال في الواتس"

__ الوووو
** الوو يا هلا
__ يا هلا و غلا .. صباح الخير تاني
** صباح الانوار .. عاين سراج انا دخلت ليك بي اتصال عشان اقول ليك شكراً على الفسحة اللطيفه ديك و البيتزا الحلوة جد جد - و بعتذر لان م متذكرة ودعتكم كيف ! و متذكرة طشاش طشاش معليش لو بدر مني تصرف م لطيف ..
__ لالا والله م بدر منك الا كل خير ، انا و البنات انبسطته بيك
** طيب لقيت الحاجة الوقعت منك قبيل ؟
__ للاسف لا ..
** حزينة ( سكتت و استوعبت بعد مسافة ) .. سراج انت صحي جبت رقمي من وين ؟
__ اللوكيشن رسلتو لنفسي ! زعجتك ؟
** لالا ابدا والله م قصدي كدا بس فضول .. عارف ! انا فاقدة وصال شديد ، رغم انه معرفتي ليها م بالسنين لكن بالجد اتعلقت بيها و لقيت فيها الاخت و الصديقه ..
__ م عندك اخوات ؟
*^ : من امي وحدة و تاني ياهم قصي و الهادي !
__ ربنا يحفظكم لبعض
** و يحفظكم يارب …
__ طيب اخليكي تشوفي حتعملي شنو ، و ان شاءالله لمن اجيب ناس امي عندكم بجيبا ليك معاي !
** عارف - انا ما حمشي الجامعه الليله ، انا نسيت عديل جيت ناس خالتو امال دي ! و بيني و بينك دايرة سبب ادك الجامعه لانه قلته وااي !
__ قلتي اخير كدا يعني ؟؟
** ايوااا ههههه
__ طيب اساعد بشنو ؟
** كيف يعني ؟
__ اكيد عايزة تعملي شي عشان كدا دكيتي الجامعه -
( صوت الباب عنده خبط ) - حنين لحظه !!

#رزان بتقول :

كنت قايله ان الدنيا ما حتضحك لي تاني و كنت قايلة نفسي كرهت الرجال و كرهت الحب - بس للاسف من شفت سراج ، حب الطفولة الكان جواي رجع صحى من جديد و عرفت انه م كان شعور عابر ، تعلقي الزمن داك بيهو م كان من فراغ -
كنت خايفه من اني اعاني في حبو براي ، من ان العلاقه بينا تكون صعبه لحد م ناخد خطوة تجاه بعض ، بس من نظراتو لي الكانت بتوترني و من الورقه ال اداني ليها بليل مع القروش !
بطريقه عمري ما اتخيلتها صدمتني و فرحتني شديد و عرفت ان ربنا بدا يعوضني -
رغم ان محتوى الرساله كان غريب علي الا انه كان مفهوم و فسرتو بكل بساطه بقدر بساطة رسالتو و خطو الجميل شديد …

عشان كدا قررت ارد ليهو بنفس الطريقة و أكتب ليهو :

{ أنحنا م محتاجين نعرف بعض ي سراج لاني عارفاك اكتر منك ، ولو يوم تهت من نفسك انا بدلك عليك }

كتبتها و قررت امشي اوديها ليهو عديل زي ما اداني ليها عديل …
و مشيت …

#قصي_بيقول :
( قبل الحصل بي ساعة )

كان جاني احمد - طلعنا خشم الباب انا و هو و الهادي و ابوي جا اتطمن علي و دخل جوا - و بعدها الهادي مشى ! و بقينا انا و احمد برانا -
احمد : م عارفك مكتئب كدا لشنو ما فاهمك والله ! قصي في شنو ؟
قصي : خليك مني ! انت مالك ؟
احمد : انا !!
قصي : احكي يا احمد !
احمد : الفيني كتير والله يا قصي لكن انت براك ما ناقص
بس كل همومي بتتمحور حولين سهاد مرتي ! انت قادر تتخيل انه م ليها اي مخلوق في الدنيا دي غيري !
يعني لا ام لا اب لا اخ لا غيرو ، و انا رغم ان اهلي على قيد الحياة بس هي بقت لي الدنيا كلها ! رفضهم ليها دا براهو داير يجنني لانه م ليهو اسباب مقنعه ! دا غير انه بيبان قديمة كنت فاكر انها اتقفلت - ابتدت تنفتح تاني … بيبان م متمنيها تنفتح لانه حتخرب علي بيتي و استقراري مع سهاد ! بس دا كلو ما هاميني بقدر اني بقيت خايف عليها من الاذى الممكن يجيها من اهلها ديل ، لدرجة والله بقيت بخاف اطلع مشوار اطول عليها و اخليها براها ! كل م افكاري تضيق علي بعاين ليك انت و وصال و نفسي العلاقه تبقى قوية حا اتطمن عليها -

قصي : اسمعي كلامي انا حا اوديك عند ناس بيتكم ، امشي مشوارك عادي و انا حا اتصل بالهادي يجيني و نمشي مجرد م نستلم العنوان !
وصال : ااه طيب طالما الهادي حيكون معاك تمام ! بس ممكن تسوقني و تخليني في العربيه ؟
قصي : لااااا - ابعدي شويه من الحاصل دا ، انتي حتى اخوك ما باركتي ليه و لا اي حاجة دخلتي في دوامة لا يد لا كراع ليك فيها .. ارح ارح شوفي حتشيلي شنو معاك ؟؟
وصال : جاهزة انا اصلاً من قبيل ما حا اشيل حاجة !!

قصي : طيب ارح … ( طلعوا و قفلو البيت وراهم )

#سلاف_بتقول

كان لازم اتصرف بي اي طريقه ! شلت رقم منيرة دخلتو في تلفوني التاني حق الشغل و رسلت ليها على اساس اني دليفري و عندها معاي شحنة جايه بي اسمها و طلبت منها العنوان … اخدت قريب ساعه حتى ردت لي ، دي حتى ولا سألتني من منو الشحنة و لا فيها شنو و لا اي تفاصيل ! النوع دا شكلو بيحب الاكل …
طوالي اتصلت على وصال في تلفون سهاد و اديتا العنوان زي ما كتبتو لي - و بكدا اتمنى المشكلة الوقعت فيها بت الناس دي تتحلا عشان ضميري يرتاح …

#قصي_بيقول

وصلت وصال بيتهم ، و مجرد م استلمنا العنوان ، هي نزلت و انا كنت بحاول اتصل على الهادي ما كان بيرد علي و ابيت اقوليها كدا عشان حا تقلق و ما حترضى تخليني براي ..

و انا فعلاً ناوي و لسه عندي امل انه يرد علي رغم اني مسكت الطريق على العنوان ، و عارف حالتي الصحية م حتنفع لي وضع ممكن يكون فيه اشتباك او ماشابه و م كنت ناوي اوصل للمرحلة دي اصلاً بقدر اني احل الموضوع بصورة ودية ….
فعلياً لحد ما وصلت الهادي م كان بيرد و بعدها انتظرت مسافه في الشارع و برضو ما رد و لا رجع لي .. نزلت شباك العربيه و سألت واحدة من شفع الحلة البلعبو .. و اكدت لي ان البيت التاني بيت ناس منيرة يعني م محل انا واقف .. خليت العربية في حتتا و نزلته
و اصلاً الباب حقهم كان فاتح شارع !
" بابا خشم تقيل وسخان كدا " خبطت الباب كتير عشان زول يجيني طالع !! طلعت لي مرة بي صحة كدا !! قالت لي :
__ مرحب ؟؟؟
** ازيك ؟
__ حمدلله داير شنو ؟؟؟
** بردي نفسك معاي انا ما جاي لي مشاكل ! جاي داير افهم !
" جا راجل نفس الهيئة ماسك الابريق في يدو و ماسك عراقيهو بي يدو ، قالي " : خير ؟؟؟
قلت ليهو : ممكن تطلع معاي برا ؟؟ عندي معاك كلمتين ؟؟؟
( لسه م كملت كلامي ، جات عربية بي صوت البوري شغاله وي وي وي … و نزلو منها تلاته حريم و راجلين ، و شغالين زحو زحو للعريس - و داك ليهو راجل شيخ كدا ماسك ليه دفتر سايقو شافع و جاي على البيت ، و شابكنو شيخنا وصل شيخنا وصل ، ديل طوالي اتجاوزرني و داك جدع الابريق و نزل عراقيهو و مشى يرحب و بفضل الجماعه و دفروني انا و دخلو !!! بقيت م عارف اقول شنو ، شغال ليهو يا عمنا .. يا عمنااااا … دايرك في كلمتين .. و لا كأني بتكلم !! لحد م شفت منيرة جات في نص الحوش بتضحك دايرة تسلم على الجماعه ديل )

من شافتني وقفت حتتا بي خلعه ، وقتها تلفوني رن .. طلعتو من جيبي و لقيتو الهادي ، رديت و عيني فيها ما كترت معاه و قلت ليهو تعال لي سريع امسك شارع ( …) و حرسل ليك الباقي اسي ….
هو بقول لي في شنو يا قصي و انا بقوليها تعال سريع …و رسلت ليه العنوان و رجعت تلفوني في جيبي -

لقيت منيرة فجأة اتوترت و جات علي !! قبل تتكلم قلت ليها :
__ شكلك عارفه الجايبني شنو

منيرة : سهاد مش !!! ابعد من الموضوع دا يا قصي ابعد و خليك في بيتك و في حالك احسن ليك !
__ ممكن افهم المشكله شنو و الحاصل شنو ! انا كنت حابي كلامي يكون مع ابوك لكن يبدو انه مهتم بي ضيوفو !
منيرة " قربت على الباب و عايزة تقفلو " !

__ خلي عندك أدب ! كان رباك ابوك على الاقل ختي مساحة لتربية الدنيا ! ما علموك لمن ما يكون عندك رد ما تخافي ما تهربي !
منيرة : انا حمدلله متربيه و متربية كويس شديد
__ ما حا اخد و ادي معاكي في امور زي دي في النهايه انتي مفروض بت ناس ! اسمعيني مشكلتك شنو مع سهاد ؟
منيرة : ليه مشكلتي ما حكاها ليك صحبك قبل يموت ؟؟؟ و لو انت م عرفت مشكلتي م اظن في زول غيرك حيعرفا لانك اقرب زول ليهو حتى اقرب ليو من مرتو !!

( وقتها الهادي كان وصلني و فضل واقف وراي و من شافها شبه فهم الحاصل )

__ (بعد كلامها استحضرت جزء من كلام احمد يوم جاني و تقريباً بديت استوعب ) انا ما عارف مشكلتك شنو بالضبط بس ممكن تسلميني سهاد لانها امانة المرحوم و بهمني اهيئ ليها حياة مريحه لو عندك اي مشاكل معاها بسبب المرحوم في النهايه هو راح ! النزاع لشنو ؟؟؟
منيرة : اتطمن حنهيأ ليها احنا الحياة المريحه دي ! اهو زي م شايف جا المأذون و داك العربس بي نساوينو حتربعهم و تقعد معاهم زي العجب !