#خلقني_اسود
بقلم fulla_Ali
-١٢-
يابن ادم خالفني واختلف عني يهوديا مسيحيا او مسلما كنت شيعيا ام سني فقط كن انت ولاتكنهم يابن ادم خلقك الله مختلف فبربك باختلافك اعترف كن خليفة الله على الارض باختلافك ولا تتبع ذاك القطيع عش حراً يابن ادم فهذه الارض للجميع ..

#أنيس_شوشان

*
المساء ابوي جا وكان وشو مقلوب...دخل الصالون طوالي
وبما انو امي طريحة الفراش و حبوبتي من سابع المستحيلات تمش تقدم ليهو حاجه انا المشيت اشوفو مالو...
شلت معاي جك مويه وكبايه ومشيت ليهو...

لقيتو قاعد و وشو على الأرض ....كبيت ليهو مويه ومديت ليهو الكبايه...

شربها كلها وتاني كبيت ليهو

يعني شرب قريب الاربعة كبابي ...قلت ليهو في شنو يا ابوي !!!؟؟

عاين لي مسسسسافه ...وفجأة دموعو بدو ينزلو...
دي اول مره اشوف دموعو ..بركت في الأرض وقلت ليهو في شنو يا ابوي !!!!

قال لي وهو ببكي : امك عيانه شديد يا صبا...عيانه شديد !!

قفلت خشمي وقلبي كان بضرب بقوة...خوفت خوف شديد من الحكايه دي

ابوي طلع الورقه وقال : عندي معارفي شغال في المجال الطبي. .اديتو نتيجة الفحص وقال انو .....

بعدها قعد يبكي ..انا زحفت منو واتكيت في الحيطه ودموعي عشرة عشرة

امك عندها كانسر في الرئة يا صبا !!!! ومراحله متأخرة شديد يا صبا "!!!!!

قعدت ابكي واضرب راسي في الحيطه ...كنت بقول : لالالا يا ابوي ما تقول كده لااا

ابوي كان ببكي بحرقه قال لي : من زمان وهي بتشكي من ضهرها !!" الكلاب شغالين يقولو لينا رطوبة رطوبة !!! لو من بدري شخصو المرض صاح كان اسي قدرنا نتحكم فيهو !!! بس بعد شنو !!! اسي كلو انتشر في جسمها "!!!!

قلت ليهو يا ابوي امي حتتعالج ان شاء الله..ما تشيل أي هم..بس ما لازم نكلمها أسي عشان صحتها ما تتدهور

قال لي اسي حنواصل مقابلتها مع الدكتور وحنواصل في العلاج ..(لاحظو لي نواصل..يعني سوا هو وهي )
..وقريب #حنبدا جلسات الكيماوي ..ربنا يديني القوة أكلمها بالحاصل...بعد رقد وقبل على الحيطة...طفيت ليهو النور و
طلعت منو وانا قلبي مقبوض و واجعني شديد...ااخ من وجع القلب ااخ!! الله لا ضوقكم ليهو
كلمت حبوبتي وبكت شديييد...يمكن يا داب عرفت انو حبوبتي بتحب أمي كده...بس للأسف كنت مخطأة...

زي الضهر كده طلعت الدكان اجيب لينا سكر...وحظي الكعب لقيتو قافل..

قعدت انتظرت لغاية جا من الصلاة واداني ...وانا طالعه صبا جاتني تلهث

قالت لي الحقي يا صبا ..الحقي امي !

اديتها السكر وجريت على البيت...سمعت صوت حبوبه بتشاكل ..كانت بتقول : اها اسي جاك عقابك ..ربنا بمهل وولا يهمل !!! عصيتي كلامي وعرستيهو هدا جاك المرض الكعب !!!

امي واقفه ومصدومة وماسكه صدرها بي يدها ..

وحبوبتي مواصله فيها زله وإهانه!!!
ياخ دي ما انسانه ياخ !!!!

صاح مصيرنا كان نكلم امي بمرضها..لكن ما بالطريقه القاسيه دي !!

مسكت حبوبتي من يدها ودفرتها بره وقفلت الباب ..سامعاها بتقول أصلآ من جيتي من عماتك بقيتي قليلة.أدب..و و و ...كلام كتييييير ما بتقال وكعب ...غايتو ربنا يصلح حالها...

قعدت جمب امي وبست يدها...عاينت ليها لقيت وشها خالي من التعابير ...قلت ليها : امي..مش انتي دايمآ بتقولي لينا المصائب البتحصل لينا دي امتحان من ربنا ؟؟؟

عاينت لي ودموعها بنقطو...مسحتهم ليها وقلت ليها يلا ده امتحان ليك...ربنا بتمحنك عشان يشوف مدى صبرك وإيمانك قدر شنو ..

والفوز ما انك تتعالجي لالا..الفوز انك نهائي ما تشكي الا لي ربنا وتصبري لغاية تشوفي النتيجه في النهايه شنو..

ابتسمت وما ردت لي..بس فهمت انها مبسوطه لأنها ربتنا على المبادئ دي..

ابوي وقت جا المساء وعرف..مشى شاكل حبوبتي وكالعاده ..تاني يوم سافرت رجعت بيتها وخلت لينا البيت...
***
ظهرت نتيجه القبول..شالوني كلية القانون جامعة الخرطوم.

كنت مبسوطه لأنو دي رغبتي..لكن كل ما كنت افرح بتذكر مرض أمي..

امي يااا عالم بقت لا بتجر رجل لا كراع !! ..ماا بتفارق السرير إلا في الضرورة !

ضعفت وانتهت ...حتى شعرها بدى يتحت..

بدينا ليها جلسات الكيماوي...العذاب الكانت بتتعذبو في الكيماوي ولا عذاب المرض زاتو..وما تشوفو شر في عزيز يارب

#صلو_علي_محمد

#TO_be_Continued