#اولاد البدري9
#جوان عبدالرحمن
*عمر ولد البدري
قرر انو يكلم امو بي موضوع رهام وهي تكلم ابوهو دخل لي امو في المطبخ
عمر: ظهر الخير يا حاجة 😂
فاطمة: يا ولد اختاني انا عندي مئة شغلا يا حليل عثمان الكان بساعدني
عمر: يعني يا امي عثمان بس البساعدك
فاطمة: اي والله ربنا ينجحو ان شاء الله ويبقا لي اكبر دكتور والله ما يشوفني في المطبخ اي حاجة بعملا لي
عمر: خلاص خليني اغسل ليك العدة
فاطمة: كتر خيرك بس امرق لي من المطبخ دا تكون ما قصرت نهائي
عمر: لي يا امي الحالة دي عندي ليك شمار
فاطمة: اها شمارك شنو ?
عمر: في واحد من اولادك عايز يخطب
فاطمة: منو?
عمر: حرفو الاول عمر
فاطمة: هي يوم المنا والله بركة يا ولدي الله هداك علي العرس من بكرة دي اشوف ليك عروس بت حلال وتسعدك
بكري: العروس قاعدة يا امي بس امشو اخطبوها لي
فاطمة: سجمي دي منو دي?
بكري: ما بتعرفيها يا امي
فاطمة: ما تقول لي من بنات شركتكم المعولقات ديل لبسهم كعب وكلام ما بعرفن يتكلمن
بكري: ههههه لا يا امي دي لبسها سمح وبتعرف تتكلم كدي كلمي ابوي وروني بتمشو ليهم متين
فاطمة: خير يا ولدي ان شاء الله الفيهو خير كلو ربنا يسويهو
*عثمان ولد البدري
الليلة اول امتحان لي عثمان طلع الجامعة بدري وقعد يراجع مع اصحابو جاتو بت من الدفعة ومعاها صاحبتها
سحر: السلام عليكم عثمان
عثمان: اهلآ وعليكم السلام
سحر: معليش بس ممكن تشرح لي عندي كم حتي كدا ما فاهمها
عثمان : جدآ
قعدت وعثمان بقا يشرح ليها جاء مازن صاحبو وهو بعرف سحر والبت دي مكسراهو شديد لكن هي كانت ما شغالة بي لانها معجبة بي عثمان
مازن: سلام عليكم يا سحر امتحانات وكدا
سحر: ههه اي والله
مازن: الاخبار شنو عليك الله
عثمان: يا مازن عليك الله خلينا نشرح ما فضل حاجة لي الامتحان قوم اتشايلا
مازن: قلتا كدا يا صاحبي عديلة اشرحو ان شاء الله تجي اولة الدفعة يلا يا سحر بنتلاقا
رجع عثمان يشرح لي سحر وسحر ما مركزة مع شرحو اصلآ مركزة معاهو هو زمن الامتحان جاء دخل الامتحان ومن نصف الزمن طلع وكان مبسوط الامتحان جاء حلو شديد انتظر اصحابو وبعد طلعو بقو يراجعو في الامتحان واي زول يقول الامتحان صعب وعثمان كان متاكد انو ما عندو ولا غلطة
عثمان ومازن طالعين علي البيت مازن ماشي مع عثمان بيتهم يراجعو لي امتحان بكرة ركبوا الموصلات وبعد وصلو البيت سلمو علي ناس البيت ودخلو غرفة عثمان يقرو
*سمر بت البدري
بعد خلصت دوام طلعت مع حسن ومشو الحديقة الاتلاقو فيها المرة. الفاتت وقعدو تحت نفس الشجرة
حسن: انتي عارفة انا الشجرة دي ما بحس بي الراحة الي تحتها
سمر: لي يعني قصتها شنو?
حسن: ما عندها قصة بس كدا من  اول مرة قعدت تحتها وانا ارتحت بقيت كل ما احس روحي مضايق بجي هنا
سمر: كويس حاجة كويسة الزول يلقا ملجا ومكان يهرب ليهو وهو زعلان
حسن: ايوا صاح يمكن انت ما لقيت زول لكن لقيت مكان حتي لو شجرة طيب اقعدي هنا امشي اجيب لينا حاجة نقزقزة واجي
سمر: اوكي تمام
بعد حسن رجع قعد قصاد سمر ختا الحاجات
حسن: ما نفسك تسالي من حاجة ولا تعرفي عني حاجة
سمر: نفسي نفسي شديد بالمناسبة يا حسن انت زول شكلك بيوحي عكس طبعك
حسن: كيف?
سمر: يعني انت بتدي انطباع الزول الجادي في حياتو الصارم داك الما بعرف يضحك بس انت بتضحك عادي
حسن: هههههه بالجد انا الزول بقول عني جادي وصارم كمان
سمر: ايوا حقيقي كدي عرفني عليك
حسن:انا حسن حسن صالح العطار قريت نظم معلومات وياهو عندي المحل دا اهلي في الشمالية وانا قاعد هنا مع خالتي
سمر: امم يعني انت شبهي مغترب
حسن: انا مغترب عديل ما قاعد امشي بيتنا طوالي
سمر: ليه طيب
حسن: مافي زول يقعد لي في المحل بعدين ياهو مصدر رزقي الوحيد احكي لي عنك انتي?
سمر: انا سمر البدري خريجة صيديلة زي ما عارف انا واحدة وسط اربعة اولاد وامي وابوي الحمدلله اسرة سعيدة جدآ
حسن: بختك شديد امسكي في اهلك ديل الاهل هم اي حاجة
سمر: ماسكة قوي والله وعارفة انو مستحيل اقدر اعيش من غير واحد فيهم مش انت قلتا بتلجا لي الشجرة دي انا بلجا لي اهلي وكل واحد فيهم بطلعني من الانا فيهو
حسن: ربنا يخليهم ليك

الي لقاء..............😊♥

#اولاد البدري10
#جوان عبدالرحمن
* محمد ولد البدري
البلد عجبتهم شديد وكل يوم يوسف يوديهم مكان والليلة عندهم اول مقابلة مع الدكتور وكان من اكبر الدكاترة في الاردن تخصص خصوبة وكان مصري لبسو وشالو كل فحوصاتهم ومشو بي عربية يوسف وصلو العيادة ودخلو لي الدكتور
محمد: السلام عليكم دكتور
دكتور: اهلا وعليكم السلام اتفضل
فتحية ومحمد قعدو الدكتور بسال في فتحية
منصور: عمرك كم?
فتحية: 33سنة
منصور: طيب يا فتحية انتي بقالك كم سنة متزوجة?
فتحية: 11سنة
منصور: اسمعي انا فحوصاتك دي كلها مش هشتغل بيها هكتبيلك فحوصات تعمليها
فتحية: تمام يا دكتور
منصور: ممكن تتفضلي معايا اعملك الموجات
طيب انا من خلال الموجات اتضح لي انو انتي عندك تكييس في المبايض
فتحية: ايوا انا قالو لي كدا في السودان واخدتا دافستوان وفاريما لي مدة ستة شهور
منصور: طيب انا هكتبلك نوع علاج جديد لي مدة تلتة شهور وبعدها ترجعيلي نعملك موجات وفحوصات نشوف اذا اختفي يبقا انتي بقيتي كويسة واذا لسه موجود نتصرف ان شاء الله
محمد: يعني يا دكتور مافي حاجة مخيفة
منصور: ابدا الموضوع. اكتر من بسيط عايزك بس تاخدي حبوبك في ميعداها وان شاء الله تخلفو احلي عيل
فتحية: ان شاء الله يديك العافية يا دكتور
منصور: اول ما تطلع الفحوصات جيبهالي وانت يا محمد انا هكتبلك فحص للسائل عشان نطمن انو مافيش اي خلل عندك
محمد: حاضر يا دكتور الفحوصات دي نعملها وين?
منصور: في معمل برا قصاد العيادة وربنا يكتب ليكو الخلفة وخد دا الروشتة الصيديلة كمان قريبة من هنا بالشفاء ان شاء الله
محمد: تسلم يا دكتور
طلعو ومشو المعمل عملو الفحوصات ومشو الصيديلة جابو العلاج ورجعو البيت
*ابو بكر ولد البدري
ولد الزينة ما كان بسقي الزراعة بكري تعب معاها شديد ليل علي نهار هو حارسها رجع البيت هلكان من التعب ما قدر يستحما ولا ياكل رقد نام بعد فاطمة نومت اولادها قامت صحت بكري وعملت ليهو اكل وجهزت ليهو غيار بعد اكل دخل استحما وجاء لقاء فاطمة عملت ليهو شاي
بكري: يريحوك اولادك يا فطومة والله كنتا تعبان وجعان الحمام دا ريحني خلاص
فاطمة: انا مستغربا في ولد الزينة دا لي  اهمل  الزراعة دي كدا
بكري: والله لقيتها مليانة سلك(شجرة بتقوم في البرسيم وبتمص جذرو لحدي ما تموت )
فاطمة: اصلك ما تخلي بكرة امشي وشاكلو
بكري: كدي النلحق الزراعة اول شئ الليلة اليوم كلو مقيل امرق في السلك ما فضل كتير بكرة صحيني بدري عشان اكمل الباقي
فاطمة: الله يديك العافية وان شاء الله كمان ما يجيها شئ
بكري: ان شاء الله ما بجيها حاجة
*عمر ولد البدري
المساء فاطمة كلمت البدري
البدري: البت دي منو واهلها منو وعرفها من وين?
فاطمة: والله ما عارفة
البدري: كدي نادي لي
فاطمة مشت لي عمر ونادتو
عمر: ايوا يا ابوي
البدري: كدي تعال اقعد وريني البت الدايرة دي منو??
عمر: اسمها رهام وابوها اسمو عادل
البدري: اها ومن وين وانت هسي خلاص متاكد من اخلاقها ومن اخلاق اهلها
عمر: اي يا ابوي البت دي كويسة واهلها برضو كويسين ابوها عندو مصانع وشركات زول معروف عادل ابراهيم يعقوب
البدري: شنو?  بت عادل يعقوب والله ياهو الفضل يا ولد خلي امك تشوف ليك بت تناسبك نحنا البت دي ما دايرنها
عمر: كيف يعني ما دايرنها انا دايرها يا ابوي
البدري: قلتا ليك شوف ليك واحدة غيرها
عمر: لكن يا ابوي انا دايرها هي
البدري: لو بقت اخر بت ما بتعرسها قوم شوف ليك شغله تقضاها
عمر طلع زعلان وما شايف قدامو مشا المسطبة الجنب الدكان قعد يسجر وسرحان يفكر يتصرف كيف ويقنع ابوهو كيف
فاطمة: هي لكن يا البدري ما زعلتا الولد
البدري: يزعل هسي احسن من يزعل بعدين
فاطمة: مالها يعني انت بتعرفها البت الدايرها دي
البدري: ما بعرفها لكن بعرف ابوها
فاطمة: ابوها كعب?
البدري: اي وانا ما بشرفني نسب زي دا
فاطمة: خلاص عليك الله يا البدري اقعد معاهو واتكلم معاهو براحة عشان ما يزعل ما كمان البت هو دايرها
البدري: كدي خير

الي لقاء............😊♥

#اولاد البدري11
#جوان عبدالرحمن
*سمر بت البدري
سمر علاقتها اتطورت مع حسن تطور سريع طول اليوم يتونسو واتس
حسن معجب بي سمر سمر ما عارفة مشاعرها تجاه حسن شنو المهم هي بتحب تتونس معاهو تحت ياتو مسمي هي ما عارفة
&سمر في الصيديلة
سمر: انتي عارفة يا فوفة والله حسن دا ظريف وفي نفس الوقت تحسي بي مهموم ما عارفة بس حبيتو
عفراء: يا زولة انتي الزول دا بتعرفي من متين والله شكلو ما ود ناس
سمر: بالعكس التربية السمحة ظاهرة فيهو الزول دا متعوب فيهو زول راقي وفاهم ومحترم
عفراء: يا زولة علي كيفك شكلك تاني عايزة ترجعي زي زمان تقضي وقت
سمر: مستحيل ديك كانت فترة. طيش وهسي الحمدلله بقيت زولة كبيرة وعارفة وحسن عمري ما فكرت فكرة ارتباط معاهو
عفراء: تشكري فيهو من الصباح وونستك كلها حسن حسن ودا شنو?
سمر: زول دخل جديد في حياتي طبيعي اني اذكرو كم مرة انتي شكلك الزول دا ما حبيتي عشان كدا انا تاني ما بزعجك واحكي ليك عنو
عفراء: اي والله يكون احسن
*عثمان ولد البدري
رجع البيت بعد خلص الامتحان ادوش ودخل المطبخ حاجة فاطمة قاعدة تعمل ليهو في اكل بدا يلم في العدة في المغسلة عمل صابون وقعد يغسل فيها
فاطمة: الله يرضا عليك يا عثومي خليها وامشي شوف قرايتك بي وين
عثمان: يا امي انا بقيت راجل ليه بتقولو لي عثومي
فاطمة: هههه يعني انت قايل روحك بتكبر في عين امك انا لسه شايفك ولد عمرك 4سنة بعدين انا بحب اناديك كدا
عثمان: خلاص يا امي وقت بتحبي اسم عثومي انا رضيان تناديني بيهو
فاطمة: والله انا بريدك ريده
عثمان: ريدت الحمامة لي وليده
فاطمة: ههههههههه يلا غسل يدك وتعال الاكل جهز
عثمان ياكل جات سمر داخلة
سمر: المنتحر والله مشتاقين
عثمان: يعني انا باكل في داعي تذكريني
سمر:اسفة خلاص نعيد المشهد عثومي والله مشتاقين
عثمان: ياخ اسم عثمان دا صعب شنو البيت دا كلو عثومي
سمر: شنو يا حبيبنا لا كدا عاجبك لا كدا عاجبك اها الامتحانات كيف وماشي كيف?
عثمان: لا الامور باسطة الحمدلله اشتغلت اكتر من امتياز
سمر: الحمدلله اها ومازن اشتغل كيف?
عثمان: يعني مازن ما شادي حيلو شديد لكن بعدي
فاطمة: وين هو ليهو يومين ما جاء?
عثمان: ابوها جاء من السعودية ومشدد عليهو الرقابة لكن هسي بجي
فاطمة: هي ما بجي عشان يقرا فيها شنو?
عثمان : ابوهو صعب شوية
فاطمة: الله يهدي خلاص كدي النقوم انضف ليك غرفتك مسافة يجي
سمر: خليني بنضفها انا يا امي
فاطمة: هي كدي انتي امشي استحمي واكلي ليك حاجة واخدي راحتك كانك ساعدتيني والله
&مازن جاء سلم علي ناس البيت ودخل مع عثمان الغرفة وقعدو يذاكرو
مازن: يا عثمان ماشي اجيب موية وجاي
عثمان: خلي بجيبها اقعد
مازن: شنو يا خوة ما من ناس البيت ولا شنو
عثمان : ما قصة كدا لكن خلي بجيبها انا ذاتي عايز حاجة من المطبخ
مازن: شكلك ما عادي الحالة واحدة وانا المعتبر نفسي من ناس البيت وكل يوم اجيك
عثمان: بطل حركات البنات دي وامشي جيبها سريع عارفك عايز تتهرب من القراية
مازن مشا المطبخ ما كان في زول شال الموية وطالع لمح سمر في غرفتها الباب فاتح قاعدة في التسريحة بتسرح في شعرها لابسة بجامة اكمامها طويلة مازن وقف يعاين لي سمر عثمان طلع من غرفتو ماشي الحمام شاف مازن وهو واقف قصاد غرفة سمر قرب ليهو شافو بعاين لي اختو مسكو من قميصو وبقا يضرب فيهو
عثمان: يلا اطلع من البيت دا. وتاني ما داير اشوف وشك دا
سمر: بسم الله في شنو يا عثمان?
عثمان: مافي حاجة خشي جوا سريع وانت يلا. اطلع من هنا قبل انتهي منك
مازن: يا زول انت فاهم غلط انا ما كان قصدي دقيقة فكني خليني اشرح ليك
عثمان: يا زول ما تشرح لي اي حاجة
عمر كان نايم في غرفتو صحا وطلع عايز يشوف الحاصل شنو لقا عثمان ماسك في مازن وبدق فيهو طوالي دخل معاهو من غير يفهم الحاصل شنو ونزلو فيهو دق لحدي ما جات حاجة فاطمة حجزتهم وتكلت مازن لحدي وصلتو الباب ومن هناك اجرت ليها تكسي يوصلو البيت ورجعت لي اولادها
فاطمة: دا شنو الهمج والعنف دا انا ربيتكم كدا ربيتكم علي انكم تتفقو اتنين علي واحد انا ما قادرة اصدق انو القدامي ديل اولادي
عثمان: يا امي دا واحد عديم ادب ولازم يتادب
عمر: مالو هو عمل شنو يا عثمان
عثمان: ياخ عديم ادب ساهي
عمر: بقول ليك عمل شنو
عثمان: دخلتو بيتي واعتبرتو من ناس البيت قعد يعاين لي عرضي ويستاهل وتاني لو لميت فيهو بدقو
عمر: دا باطل دا انا لو عارف كدا ما كان فكيتو الوسخ
فاطمة: اسمعو هنا تاني لو زول اتعرض لي الولد دا لا انا امو ولا بعرفو وانت يا عثمان ذاتك غلطان ما بس هو
عثمان: غلطان في شنو يا امي
فاطمة: لانك ما عملت ليهو حدود وخليتو يسرح في البيت علي كيفو انت ناسي انو عندك اخت في البيت
عمر: صاح صاح كلام امك صاح كيف يدخل المطبخ علي كيفو ويلف في البيت حدو غرفتك بس
عثمان: لا دا خلاص بيتنا بقا ليهو حرام
فاطمة: خلاص الحصل حصل لي قدام ابقو ناس واعيين وما اي مشكلة بتتحلا بي العنف
عثمان: ان شاء الله

الي لقاء.............😊♥

#اولاد البدري12
#جوان عبدالرحمن
*ابو بكر ولد البدري
بكري رجع المساء من الزارعة لقا اولادو نامو وفاطمة بتكوي ليهم في لبس المدرسة
بكري: والله اشتقت ليهم عديل
فاطمة: والله هم برضو طوالي يسالو منك
بكري: يوم الجمعة قرب ان شاء الله نمشي كلنا نتفسح ونشوف الحصل معاهم شنو في الفترة دي
فاطمة: ان شاء الله العافية اها الزراعة ماشا كيف?
بكري: الحمدلله دي بشارة عديل ماشا اكتر من ممتازة شهر كدا ونبدا المحصول ان شاء الله
فاطمة: كدا بقن بشارتين يا بكري
بكري: كيف?
فاطمة: انا حامل
بكري: الف مبرووك والله الحمدلله ان شاء الله لو ولد من الصالحين ولو بت من المستورات
فاطمة: اميين وان شاء الله كمان عقبال ناس محمد يرجعو بي البشارة التالتة
بكري: والله دي اكبر بشارة منتظرنها من زمان والله محمد اخوي الله يدي ولد الي اضبح لو سبعة بهائم وناقة
فاطمة: ان شاء الله الله يسمع منك
*عمر ولد البدري
عمر :اها يا امي ابوي لسه ما غير رايو
فاطمة: يعني انت ما عارف ابوك مستحيل يغير رايو
عمر: اها يا امي اسوي شنو انا انا البت دي دايرها
فاطمة: خليني اشوف ليك واحدة اسمح منها وابوك يكون رضيان
عمر: امي امي والله انا يا اعرس البت دي يا ما داير اعرس عديل كدا بس
فاطمة: بتذم فينا يا عمر البت دي قالوا ابوها زول كعب
عمر: يا امي انا ما داير اعرس ابوها انا داير اعرسها هي
فاطمة: يا ولد صدعت بي دايرها وميت بي دربها امشي هداك ابوك انا ما عندي اي مشكلة يومو الابوك يوافق بلبس توبي وبمشي بخطبها ليك
عمر: ابوي يوافق كيف ابوي مافي زول بقنعو غيرك
فاطمة: انا ابوك اتكلمت معاهو
عمر: يا امي الناس ديل مدني فرصة اسبوعين لو ما جيت خطبتها تاني ما بدوني ليها
فاطمة: اها شفتا دا دليل علي انو الناس ديل كعبين لي مستعجلين كدا بس عايزن يتخلصو من بتهم
عمر: والله يا امي الاسبوعين ديل يمرو وما تخطبوها لي والله افوت اخلي ليكم البيت دا والله تاني وشي دا ما تشوفو
فاطمة: يا ولد يعني بتهدد فينا وما تمشي كان داير تمشي
عمر: بس خلاص
&حاجة فاطمة انتظرت البدري بي فارق الصبر يجي البيت واول ما جاء البيت استلمتو
فاطمة: يا البدري عمر دا عايز البت
البدري: البت منو?
فاطمة: بت عادل
البدري: نحنا الموضوع دا ما قفلنا
فاطمة: لكن هو ما قفلو اسمع يا البدري انا ما مستعدة اخسر ولدي عشان ابو البت
البدري: كلامك دا يعني شنو?
فاطمة: يعني اقعد مع عمر دا ويا اقنعو يخليها يا يقنعك لكن انتو ما متفقين كدا انا والله ما بقعد اعاين لي ولدي واقع في النار
البدري: وينو هسي هو
فاطمة: مشا يجيب لينا حاجات اقعد اتكلم معاهو
البدري: سمح حاضر يا فاطمة عايزة اي حاجة تاني
فاطمة: بس يا اقنعو يا يقنعك
البدري: ان شاء الله
*محمد ولد البدري
نتايج الفحوصات طلعت مشا محمد استلمها ودخل لي الدكتور لقا مافي حجز قعد انتظر نهاية العيادة ودخل لي الدكتور وراهو الفحوصات
محمد: اها يا دكتور ان شاء الله خير
منصور: ان شاء الله كل خير طب فحوصات المدام كلها سليمة والحمدلله وبالنسبة لفحصك فانا عايز اقولك انو في عندك تشوه في ذيل الحيوان
محمد: ما فاهم يعني التشوه دا بمنع الحمل?
منصور: انت عارف لو كانت مراتك سليمة وحصل حمل كان هيكون البيبي مشوه فسبحان الله مراتك عندها تكييس منع الحمل فالتالي منع التشوه
محمد: الحمدلله طيب محتاج لي علاج
منصور: ايوا طبعآ التشوه محتاج علاج انا هكتبلك علي ادوية وبعد شهر تعال ونشوف ايه الي يحصل
محمد: ان شاء الله تسلم يا دكتور
منصور: الله يخليك
&محمد مشا الصيديلة جاب الادوية ورجع البيت كلم فتحية بي كلام الدكتور
فتحية: سبحان الله يعني انا عدم حملي دا لي حكمة
محمد: اي سبحان الله عليك الله ذكريني بي مواعيد الحبوب ما قوم انساهن
فتحية :حاضر دايرة اقول ليك حاجة يا محمد
محمد: قولي
فتحية: كلام الدكتور دا عليك الله مافي زول يعرفو بس انا وانت
محمد: ليه يا فتحية انا ما خجلان ما دي ما حاجة بي يدي دي حاجة كتبها لي الله
فتحية: ونعم بالله وانا عارفة لكن كمان مجتعنا دا ما بعرف ليك كدا وانا ما عايزة زول يتكلم عنك عشان كدا بس عشاني ما تكلم ولا زول
محمد: حاضر انت تامر
فتحية: ما يامر عليك ظالم

الي لقاء ...........😊♥

#اولاد البدري13
#جوان عبدالرحمن
*سمر بت البدري
صحت الصباح استحمت لبست عملت ميكب خفيف قعدت تتونس مع امها لحدي ما عمر جهز وطلعو وصلها الصيديلة عفراء الليلة ما شغالة فتحت الصيديلة في ادوية جايه معاها مزن مساعدة صيدلي رتبو الادوية وبعد خلصو حسن جاء لي سمر
حسن: سلام عليكم دكتورة سمر اجدع دكتورة
سمر: اصبحنا بي الله
حسن: حزينة منك وانا الجاي وعايز اصتبح بيك
سمر: ههه شكلك عندك مصلحة يا اخوي تكسر في التلج من جيت
حسن: في مطعم فتح جديد بتاع صاحبي وانا قلتا مستحيل سمر ما توافق انو نكون اول الزبائن فيهو
سمر: صدق حناك صراحة اقنعتني يا زول انت عايز تبقيني حبيبتك ولا شنو
حسن: وانتي ليه رافضة الشرف دا انتي عارفة كم بت نفسها تكون مكانك ويقدم ليها العرض دا
سمر: ما نفسي والله
حسن: خلاص بعد تخلصي دوامك نمشي ان شاء الله
سمر: ان شاء الله
&بعد سمر خلصت دوام انتظرت لحدي معتز جاء وطلعت مع حسن المطعم ما كان بعيد عشرة دقائق بي العربية وصلو نزلو المطعم كان فاضي لسه ما عملو افتتاح دخلو جوا وكان صاحب حسن منتظرهم
ايمن: اهلآ شرفتو مطعمي المتواضع
حسن: يا زول المكنة دي ما بتاعتك شنو متواضع وبتاع
ايمن: ههههه اخبارك شنو عليك الله وما عرفتنا علي الانسة
حسن: ما عندك شغلة بي الانسة خليك في مطعمك دا وارح ورينا المنيو
ايمن: اتفضلو دقيقة بس اجيب المنيو واجي
سمر: ليه انت محرج كدا
حسن: ياخ اصلآ صحبتنا كدا ما تركزي وارح اقعدي
ايمن: طيب يا حسن نحنا لسه ما جربنا يد الطباخ الجبنا دا وعايزكم تدوني رايكم في الاكل
حسن: يعني انت واثق فينا
ايمن: عارفك جنك اكل غير الاكل ما عندك شغلة هسي لو قفلت محلك دا وبقيت شغال متذوق اكل بتربح والله
حسن: وهو في احلي من الاكل الاكل دا حبيب الكل اها ارح ورينا عروضك
&جابوا الاكل انواع واصناف وختو ليهم وبدو ياكلو ويعلقو ويدو رايهم في الاكل وبعد خلصو جابو ليهم الحلو
حسن: سمر
سمر: اممم
حسن: انا معجب بيك جدآ جدآ
سمر: ههه لا انت جادي
حسن: لي اول مرة
سمر: والله ما عارفة اقول شنو
حسن: انا جادي يا سمر انا ما بحب العلاقات ولا بحب الارتباط بس انتي يا سمر حقيقي خليتيني اعيد النظر
سمر: حسن انت ما ملاحظ انو نحنا علاقتنا دي اتطورت بي سرعة يعني انت لسه ما بتعرفني كويس ولا انا
حسن: ما مشكلة نعرف بعض لي قدام وانا كل ما اعرف عنك حاجة اعجابي بيك بزيد
سمر: والله يا حسن انا ملخبطة وبعدين انا قررت انو تاني ما عايزة ارتباط
حسن: فكري يا سمر وانا متاكد انك ما بتندمي
سمر: خير يا حسن خير
حسن: خلينا ندي علاقتنا دي اسم
سمر: ما كفاية صحبة
حسن: بس انا عمري ما عديتك صاحبة ولا بتمني تكوني صاحبتي عليك الله يا سمر اديني فرصة اثبت ليك انو الارتباط ما حاجة كعبة
سمر: طيب اديني فرصة افكر انا حاليآ مشوشة
حسن: تمام اديك فرصة و.فرصتين المهم في النهاية توافقي
*عثمان ولد البدري
عثمان بعد طلع من الامتحان جاهو زميلو اسمو حاتم
حاتم: يا اصلي. اشتغلت كيف?
عثمان: لالا اكتر من حلو
حاتم: طيب اسمع كلامي
عثمان: اها سامعك
حاتم: قعادين نراجع لي مادة بكرة وراء القاعة ما ترح معانا
عثمان: والله ياخ تعبان ماشي البيت وهناك براجع
حاتم: لكن نحنا محتاجين ليك عندنا كم حاجة كدا ما فاهمنها
عثمان: خلاص تمام ارح
& عثمان مشا مع حاتم وراء القاعة وهناك لقاء مازن منتظرو ومعاهو شلة شباب شايلين اسواط وعكاكيز
مازن: يعني مفتكر اني بخليك بعد العملتو فيني
عثمان: عشان تعرف انك ما راجل لو راجل بالجد ما بتنصب لي فخ وتاني بتواجهني براك ما معاك مئة صوص
مازن: علي اساس انك واجهتني براك ما كان معاك اخوك. التور داك حتو عندو يوم
عثمان: عايز تعمل شنو يعني عايز تدقني انت والمعاك ديل
مازن: ارح يا شباب نوري عايزين نعمل شنو
كلهم اتلمو في عثمان وضربو ضرب شديد لحدي ما اغمي عليهو دخلو جوا القاعة وهربو وعثمان مغمي عليهو لحدي ما جاء الغفير عايز يقفل القاعة لاحظ ليهو كلم ادراة الجامعة اسعفو واتصلو لي اهلو جو المستشفي


الي لقاء ..............😊♥

#اولاد البدري16
#جوان عبدالرحمن
*سمر بت البدري
حسن بتصل علي سمر وسمر ما بترد عليهو كانت في العنبر مع امها وعثمان خلاص بجهزو طالعين علي البيت طلعو علي العربية ووصلو البيت والبدري مشا جاب بهيمة ضبحها هو وعمر ووزعوها علي الجيران كرامة عثمان وبعد فضت سمر رجعت لي حسن
حسن: وين يا زولة انتي كويسة?
سمر : ايوا انا كويسة الحمدلله
حسن:وين ليك يومين ما ظاهرة ما بتجي الصيديلة ولا بتردي علي تلفونك خوفتيني عليك
سمر: لالا كل خير بس عثمان اخوي عمل حادث بسيط وكنا معاهو في المستشفي
حسن: يا زولة الف سلامة ليهو وهسي بقا كيف?
سمر: لا تمام الحمدلله وحتي طلعو البيت
حسن: حمدلله علي السلامة انتي كيف كويسة
سمر: الحمدلله تعبانة بس عايزة انوم
حسن: خلاص يا زولة نومي وانا بعدين برجع ليك
سمر: تمام اوكي مع السلامة
حسن: نوم العوافي
*عمر ولد البدري
كان بوزع في اللحمة لي الجيران وهو بفكر في كلام ابوهو هو مقتنع انو كلام ابوهو صاح لكن هو ما عايز يخلي رهام لانو بالجد بحبها خلص ورجع البيت دخل لي عثمان في غرفتو
عمر: شنو يا زول الله يعين ساهي ما بتقولا
عثمان: يا زول عشان تحس بي قيمتي عمري دا كلو اساعد فيك الليلة عرفت انك من غيري ولا حاجة
عمر: انت عارف انا نسيت اقول لي الدكتورة افحصي لي راسو دا
عثمان: الدكتورة عارفة اني نيوتن
عمر: اعوو اعوو كدا خلينا في المهم
عثمان: الي هو
عمر: الحصل معاك شنو وما تقول لي ما متذكر لاني لا ابوي ولا امي عشان اصدقك
عثمان: يعني انا كذاب
عمر: اي كذاب يا عثمان وريني الحصل معاك شنو وانت فهمك شنو عشان اقدر اساعدك
عثمان: مافي شئ انا ما متذكر
عمر: عثمان انا اخوك وعارف انت ما بتعرف تكذب انت فهمك شنو عايز تاخد حقك براك وخايف ابوي يفتح بلاغ انا ما بكلم زول وبساعدك في العايز تعملو
عثمان: انا بكلمك لكن بتخسرني لو ابوي عرف
عمر: احكي يا زول سرك في بئر
عثمان: مازن دا مازن اتفق علي هو واصحابو
عمر: صدق كنتا حاسي قلتا مستحيل يفوت دقتو ساهي
عثمان: باطل ساهي وعامل فيها صاحبي كويس انو انكشف علي حقيقتو
عمر: اها وانت عايز تعمل شنو?
عثمان: انا داير اخد حقي بي يدي وما عايز زول يعرف
عمر: وانا معاك لي الموت انا معاك
عثمان: عارفك من يومك اصلي
* ابو بكر ولد البدري
رجع المساء من الزراعة لقاء فاطمة قاعدة في عتبة الباب وخاتة يدها في راسها وتبكي
بكري:بسم الله بسم الله يا مرة مالك
فاطمة: انا تعبت انا تعبت يا بكري
بكري: يا مرة قولي بسم الله التعبك شنو?
فاطمة: تعبت من اي حاجة انا عايزة اخد راحة ما معقولة ياخ
بكري: كدي ارح اقعدي جوا ونشوف الحاصل شنو
فاطمة:ما قادرة
بكري: اها مالك يا فطومة مالك في شنو المتعبك شنو تعبانة من الحمل?
فاطمة: انا تعبت من اي حاجة انا اليوم كلو احمم والبس واغسل واكنس وانضف واعمل الاكل واغسل العدة واكوي الهدوم واقري دا وانوم دا ودا عيان ودا عندو امتحان ودي عايزة ترضع واليوم كلو انضف في البخربو فيهو لمتين يا بكري انا برتاح متين
بكري: لا حولا ولا قوة الي بالله يا مرة وقفتي قلبي قلتا هسي المرة دي يكون حاصل عليها شئ
فاطمة:شئ اكتر من دا انت يا بكري ما حاسي بي انت اليوم كلو في الزراعة بتجي تلقا اولادك نايمين ماكلين شاربين نضيفين وفي المدرسة ناجحين العمل ليهم دا كلو منو وبعد دا تجي عندك مئة طلب ومئة حاجة
بكري: يا مرة استغفري دا ياهو حال الدنيا وحال النسوان وقولي الحمدلله ما يقوم الله يبتلينا في اولادنا
فاطمة: الحمدلله ما قلتا شئ لكن كمان التعب دا ما عندو حد
بكري: يا مرة ما تجحدي هسي عايني ناس محمد اخوي عايزين يموتو بي درب الولادة الاولاد رزق من الله احمدي الله عليهم
فاطمة: الحمدلله ان شاء الله ما اشوف فيهم شينة
بكري: ايوا بس ادعي انتي عندك شنو غير الدعا ادعي الله يسهل ليك ويكون معاك في التربية دي ويطلعو احسن اولاد يكبرو ويساعدوك
فاطمة: ان شاء الله يا بكري ان شاء الله
بكري: اي خليك مرة تقية ومرة مؤمنة الله يديك العافية وما تتعبي روحك اليومين دي عشان الحمل
فاطمة: ان شاء الله
بكري: انا بكلم محمد والبدري يساعدوك في شغل البيت وانا ذاتي لو يوم قيلتا ما مشيت المزرعة بساعدك
فاطمة: الله يديك العافية ويرزقك الرزق الحلال
بكري: امييين امييين

الي لقاء ...........😊♥

#اولاد البدري17
#جوان عبدالرحمن
*محمد ولد البدري
الليلة مواعيدهم مع الدكتور لبسو وطلعو مع يوسف وصلهم العيادة دخلو جوا لي السكرتيرة عايزين يحجزو
محمد: السلام عليكم عايزين نحجز عند دكتور منصور الرضوان
السكرتيرة: الدكتور مسافر في مؤتمر في لندن
محمد: وبجي متين?
السكرتيرة: بعد اسبوعين لكن موجود دكتور خالد الناصر
محمد:حاليآ موجود?
السكرتيرة: نعم موجود ولي حسن حظكم الدكتور سوداني
محمد: الحمدلله خلاص سجلي اسم المدام
حجزو وانتظرو دورهم ودخلو لي الدكتور
محمد: السلام عليكم دكتور
خالد: اهلآ وعليكم السلام سودانين?
محمد: ايوا
خالد: يا سلاام ياخ ريحت السودان ناس بلدي واهلي
محمد: حبابك والله يا دكتور الغربة حارة الله يرد غربتك
خالد: اسكت بس كيف اخباركم وكيف السودان
محمد: والله في امن وامان والسودان بس فاقدك
خالد: الله يكرمك ياخ متابعين مع دكتور منصور?
محمد: ايوا ودا الملف بتاعنا
خالد: كدي اشوفو. طيب اممم
محمد: خير يا دكتور?
خالد: طيب يا مدام فتحية انتي خلصتي العلاج?
فتحية: اي قبل يومين
خالد: طيب اتفضلي معاي اعمل ليك موجات
خالد: التكييس ما زال موجود انتي اخدتي علاج غير الكلوميد دا
فتحية : ايوا اخدتا الدافستون في السودان ومعاهو فاريما
خالد:طيب نحنا نعمل عملية للتكييس
فتحية: عملية جراحية
خالد: لاما تخافي عملية بي فتحة المهبل بنكوي الاكياس الجوا المبايض بي ليزر
فتحية: اها والعملية دي عندها اثار جانبية ولا في احتمالية ما تنجح
خالد: العملية دي عملية ساهلة وبسيطة شديد وممكن بعيدها تمارسي حياتك عادي واحتمالية نجاحها كبيرة شديد
فتحية: ان شاء الله كل الخير
خالد: ان شاء الله انا هسي بكتب ليك فوحصات وبحولك لي دكتور. هو البعمل ليك العملية
فتحية: شكرآ يا دكتور ما قصرت
خالد: يديك العافية طيب يا محمد بالنسبة ليك انت برضو اخدتا علاج صاح
محمد: ايوا صاح
خالد: انا بكتب ليك الفحص جيبو ونشوف اذا العلاج ادى نتيجة. محمد: حاضر يا دكتور تسلم يديك العافية ان شاء الله نجيك متين?
خالد: اصلآ انا شغال في. مستشفي() وهسي سادي لي منصور تعال بعد تجيب النتيجة ولو احتجتا لي اي استشارة تعالي لي في المستشفي
محمد: ما قصرت يا دكتور في امان الله
*سمر بت البدري
اصبحت من الصباح تتلبس الليلة ماشا الصيديلة ليها تلاتة يوم ما مشت لبست فستان ارضيتو بيجي ومخطط بي احمر طلعت مع عمر وصلها الصيديلة قبل ما تدخل عاينت لي محل حسن لسه ما جاء دخلت سلمت علي عفراء وبدت دوامها وفي نص اليوم جاء حسن
سمر: وين الليلة يا زول
حسن: وين انتي ياخ تلاتة يوم معقولة بس
سمر: ههه ما حصلت علي قبل كدا
حسن: بقا كيف اخوك?
سمر: كويس الحمدلله
حسن: طيب انا عايزك في موضوع
سمر: اتفضل
حسن: لا ما هنا بعد تخلصي نمشي شجرتنا
سمر: بقت شجرتنا
حسن: ايوا لانو مافي زول عارفها غيرنا يلا ما اشغلك لي بعدين
سمر: يلا التلفون بينا
بعد حسن طلع سمر ساعة تتبسم مع روحها مبسوطة
عفراء: عاد ماشاء الله الامور وضحت بينكم
سمر: امور شنو يا بت
عفراء: يا بت مفتكراني طرشة شجرتنا وشنو ما عارف
سمر: ياخ انتي ليه ما عايزة تصدقي انو البينا دا مجرد صحبة ما اكتر
عفراء: امم ظاهر

الي لقاء...............😊♥

#اولاد البدري18
#جوان عبدالرحمن
*عثمان ولد البدري
عثمان ضيع عليهو اربعة امتحانات زعلان ومضايق من الحتة دي وما متعود علي قعدت البيت
صحا الصباح وهو زهجان وما عارف يعمل شنو مشا لي فاطمة في المطبخ
فاطمة: صباحو حبيبي عثومي اصبحت كيف?
عثمان: كويس يا امي كويس
فاطمة: عارف انا بعمل في شنو?
عثمان: في شنو?
فاطمة: بعمل ليك في المشبك البتحبو
عثمان: يا سلام عليك يا امي شكرآ ليك ياخ
فاطمة: ما تتضايق يا عثمان كلو بتعوض وقول الحمدلله انك كويس الصحة دي ما اهم منها حاجة
عثمان: الحمدلله الحمدلله يا امي بس انا اول الدفعة ما امتحن اربعة امتحانات
فاطمة: انا كلمت ابوك يمشي الجامعة ويكلمهم بي ظرفك
عثمان: ان شاء الله الخير
فاطمة:  ان شاء الله
تلفون عثمان اتصل وكان الرقم غريب
عثمان: الو السلام عليكم
سحر: وعليكم السلام عثمان كيفك?
عثمان: عافية الحمدلله
سحر: الف سلامة ليك وبركة الربنا قدر ولطف
عثمان: الله يسلمك صوتك ما غريب علي
سحر: انا سحر زميلتك في الكلية
عثمان: ايواااا سحر ازيك تمام معليش رقمك ما مسيف عندي
سحر: تمام التمام الحمدلله لا لا عادي انا شلتو من جعفر وما كنتا عارفة فقدتك في الامتحانات سالتا جعفر كلمني
عثمان: ايوا ما قصرتي يا زولة اها كيف الامتحانات
سحر: لالا كلو تمام الحمدلله ونحنا كلمنا الادراة بي حالتك
عثمان: اها وقالو شنو?
سحر: لالا ما تخاف تمتحنها ملاحق وبتعدي ان شاء الله هسي انت اخد راحتك. بس
عثمان: الله يطمنك صدقي كنتا شايل هم الامتحانات دي كيف
سحر: اخد راحتك بي الكامل يا زول وما تشيل هم الطيبين امورهم بتمشي
عثمان: الله يكرمك ياخ وشكرآ علي اللفتة الظابطة دي شكرآ من الاعماق
سحر: ولو ياخ مافي حاجة تذكر يلا اخليك تاخد راحتك ربنا يتم عافيتك وترجع لي جامعتك زي اول واحسن
عثمان: تسلمي ياخ يديك العافية
*محمد ولد البدري
الليلة عملية فتحية دكتور خالد حولهم لي دكتور وهو العايز يعمل العملية لي فتحية عملت كل الفحوصات اللازمة ومشت المستشفي مع محمد ويوسف
محمد: مالك يا فتحية شايفك هامة
فتحية: خايفة يا محمد متوترة
محمد: ما تخافي اتوكلي علي الله وسلمي امورك كلها وان شاء الله العملية تنجح وربنا يرزقنا بي الولد الصالح البعوضنا عن السنين دي كلها
فتحية: وينسينا الحبوب والعلاجات والجري كل يوم في دكتور
محمد: كلو بهون وربنا كريم
فتحية: ونعم بالله
محمد: قيبل اتصل لي ابو بكر اخوي دي فاطمة قالت عايزاك
فتحية: كدي اضرب لي ليها
فتحية: الو فاطمة كيفك ان شااء الله كويسة
فاطمة: هي يا فتحية والله مشتاااقين ليك شوق شديد كيف انتي عليك الله
فتحية: والله تمام الحمدلله والشوق كميات والله مشتاقة لي اولادك التقول لي منهم سنة كيف هم عليك الله كويسين
فاطمة: والله كويسين الي الغلبة الشديدة خسرو لي تلفوني
فتحية: كلو هين المهم هم كويسين سمورة كيف?
فاطمة: والله كويسة حتها مشتاقة ليك اها عمليتك متين?
فتحية: في. المستشفي انا عمليتي بعد نص ساعة دعواتك عليك الله
فاطمة: والله ما نسياك طوالي بدعي ليك ان شاء الله ربنا يصححها ليك صلي واتحصني واقري قرانك
فتحية: ما بتقصري يا فطومة والله ان شاء الله سلمي علي اولادك اها النضرب لي امي قبلي ادخل العميلة
فاطمة: ودعناك الله كلمي محمد يضرب لينا بعد العملية يطمنا اها في امان الله
فتحية : ان شاء الله تسلمي اها يديك العافية ان شاء الله .هاك يا محمد اضرب لي امي
منال: الو
فتحية: اهلين امي كيفك?
منال: اهلين يا بتي كيف اخباركم كويسين
فتحية: والله الي الشوق بس
منال: شووق شديد وحاتك اها كيف انتي مع العلاجات وعمليتك الساعة كم?
فتحية: هسي بعد شوية هسي انا في المستشفي
منال: ان شاء الله العافية يا بتي الله يصححها ليك ويكتب ليك فيها العلاج
فتحية: ان شاء الله يا امي كيف ناس البيت كلهم كويسين ابوي بقا كيف?
منال: والله كلهم في امان الله وابوك كويس الحمدلله محمد كيف هو
فتحية: كويس والله الحمدلله
منال: اها كلمي يضرب لينا اول تنتهي من العملية
فتحية: حاضر يا امي دعواتك بس
منال: ما بنساك والله اها ودعتك الله ربنا يحفظكم ويغطيكم
فتحية: يديك العافية ان شاء الله سلمي علي ناس البيت

الي لقاء..................😊♥

#اولاد البدري19
#جوان عبدالرحمن
*سمر بت البدري
بعد خلصت دوامها طلعت مع حسن الحديقة وقعدو تحت الشجرة حسن جاب اكل وايس كريم وعصير وجاء قعد مع سمر
حسن: اها يا سمر الدنيا دي ماشا معاك كيف?
سمر: الحمدلله احسن ما يكون صدق انا مرات بفكر اني اكتر بت محظوظة في العالم
حسن: حقيقي انا اكتر زول محظوظ عارفة ليه
سمر: ليه??
حسن: عشان في ناس زيك في حياتي ما شفتا كمية التفائل والفرفشة العندك في زول عمري ما شفتا زول طوالي مبتسم وضاحك الي انتي
سمر: ههه الحمدلله انا بالجد مبسوطة كل اسباب الراحة والفرح متوفرة عندي الحمدلله
حسن: ان شاء الله دائما اها يا سمر انا منتظر ردك
سمر: والله يا حسن دا السؤال الكنتا خايفة منو
حسن: قولي يا سمر وانا متقبل اي حاجة بتقبلا لكن عليك الله حاولي اديني فرصة ولو صغيرة
سمر: انا ما عارفة انا مشوشة انا شايفة انت زول كويس وكل تصرفاتك بتوحي بي كدا بس انا قررت اني ما ادخل في علاقة ارتباط لانها وجع قلب يا حسن وانا ما عندي قدرة ادخل زول في حياتي ويبقا محورها وتاني يطلع ما بقدر
حسن: انا ما بطلع انا جادي يا سمر انا بجي بي الباب انا عايزك مرتي وام اولادي
سمر: ههههه. شنو! !!
حسن: زي ما سمعتي انا جادي يا سمر انا مستعد امشي لي ابوك واخطبك
سمر: لا دقيقة يا حسن انت مستعد تتزوج واحدة ما بتعرف عنها حاجة انت ما بتعرفني يا حسن ولا بتعرف اهلي ولا عارف طباعي ولا عارف اخلاقي وتفاصيل كتيرة انت ما عارفها
حسن: بعرفها يا سمر الزمن في وانا قدر العرفتو عنك بخليني اتمسك فيك وما افرط فيك انتي زولة كلك اخلاق وانا عايز اكفي باقي حياتي معاك
سمر: صراحة انا مصدومة يا. حسن مصدومة فيك شديد كيف تاخد قرار مصيري بي السرعة دي انت عارف يعني شنو شريك حياتك
حسن: عارف وما عايز يكون شريك حياتي زول غيرك انتي عندك شك فيني
سمر: انا ما بعرفك اكذب عليك ما بعرف عنك حاجة غير القلتو لي والي هو بستحمل الصاح والغلط
حسن: انا متفهم تخوفك دا يا سمر لكن صديقيني يا سمر ما بتندمي لو سمعتي كلامي وخليتني اعمل خطوة جادة واجي البيت
سمر: ما عارفة اقول شنو
حسن: طيب خليني اجي البيت واخطبك وفترة الخطوبة انتي تكوني عرفتيني كويس لو نفعت معاك نعمل العرس ولو شوفتي اني ما مناسب معاك وقتها اي زول يشوف حياتو
سمر: طيب اديني فرصة افكر
حسن: يا سمر انتي ليك زمن بتفكري طيب انا بديك لي بعدين فكري والمساء اديني خبر
سمر: اوكي تمام
* عمر ولد البدري
رهام بتتصل لي عمر وعمر ما برد عليها هو مع صاحبو في شارع النيل بشربو في شيشة وبتونسو
عمر: انا مقتنع بي كلام ابوي ابوي كلامو صاح انا سالتا من ابوها وفعلآ طلع راجل حرامي ونصاب
علي: يا زول انت مالك ومال ابوها ليك بي البت
عمر: لالا ياخ انا احسن اشوف لي واحدة ابوها زول دغري
علي: والله رهام دي غنيمة ما بتتفوت يا اصلي عرس البت احسن ليك
عمر: ياخ انا خايف ما انساها بالجد اتعودتا عليها لكن انا ما بخذل ابوي وبعدين انا عايز اضمن مستقبل اولادي يكون جدهم حرامي
علي:غايتو انا ما عارف لكن رهام دي سمححححة عديل نار وشراااار اولادك ربيهم انت مالك ومال جدهم
عمر: ياخ انت زول فهم ما عندك سماحتها عايزة تربي لي اولادي قوم لف عليك الله
علي: من يومك عوير وما بتفهم وهسي عايز تعمل شنو?
عمر: هسي عايز اخد لي فترة كدا امرق رهام دي من حياتي وطوالي عايز اعرس
علي: عررس عديل يا زول
عمر: اي والله كفاية عزوبية اقعد لي انت من شيشة لي شيشة
علي: لالا انا اخر من يعرس بعد اكمل صياعتي تاني بشوف
عمر: والله معناها لمن تموت ما بتعرس لانو صياعتك ما بتنتهي
علي: حزينة منك ههههه

الي لقاء ...........😊♥

#اولاد البدري20
#جوان عبدالرحمن
*ابوبكر ولد البدري
بكري اليومين دي مشغول مع الزراعة وبيبت هناك وفاطمة معاها بت الزينة خالت بكري اسمها نورة عمرها23سنة راجلها في السعودية بتجي تبيت معاها والصباح بترجع ناس امها
المساء بعد فاطمة نومت اولادها عملت شاي لبن وعندها باسطة في التلاجة ختتها في صحن وجات لي نورة يتونسو
فاطمة: والله يا نورة سلو روحي دي حتي نامو
نورة: اصلن الشفع غلباوين والله هسي حيدر ولدي زمان بعذبني حتي ينوم هسي تلقي معذب امي
فاطمة: اعفي لي يا نورة عذبتك معاي كان تجيبي معاك
نورة: اجي في شنو كمان انتي مرتآ ماك ساهلة والله لو جبتو معاي كان رحلكم من البيت حركتو كتيرة وقليل ادب
فاطمة: والله بس الله يدي العافية الشفع مهلكين والله انا هسي بنوم ميتة عديل من التعب
نورة: لكن كان واحد فيهم عيا ساهي قلبك بتقطع عليهو والله يا حليلنا تعبانات وشقيانات وبعد دا الواحد يكبر يمشي يشوف حياتو
فاطمة: عاد ياها سنة الحياة الله يعظم اجرنا شغلت الشفع بي جنبا والراجل بي جنبا
نورة: احيييي يا حليل الراجل  تما اربعة سنة حالف كان يجي السفر دا كعب خلاص
فاطمة: اي والله كان بجيب مليارات اخير الواحد يكون مع اهلو حتي لو رزق اليوم بي اليوم
نورة: البفهم ليك كدا منو لكن والله هسي حيدر دا ولا بعرف ابوهو سافر خلاني حامل وياهو الي يشوفو في الصور ولا يتكلم معاهو فيديو وابوهو ذاتو ما عارف عنو اي حاجة لا عارفو بحب شنو ولا عمرو كم ما عاش معاهو اي تفاصيل
فاطمة: مشكلة والله الله يصلح الحال
نورة: اي والله اميين يردو لينا سالم
فاطمة: امييين يا رب والله يا حليلك هسي انا بكري دا ليهو تلاتة يوم حاسه بيها تلاتة سنة
نورة: الحمدلله غايتو بجي متين هو بكري
فاطمة: والله قال لي الصباح بتصل ليك بوريك يا جاء بكرة يا بعد بكرة
نورة: ان شاء الله العافية
* محمد ولد البدري
الحمدلله عملية فتحية نجحت والبنج الموضعي فكا مفروض بعد العملية تقعد اربعة ساعات وبعدها ترجع البيت دخلوها في غرفة واتصلو ليها ناس البدري
فاطمة: حمدلله علي السلامة يا بتي وبركة الربنا صححها ليك
فتحية: تسلمي يا خالتي يديك العافية ان شاء الله
فاطمة: اها هسي حاسه بي روحك كيف لعل ما حاسة ليك بي حاجة
فتحية: لا لا الحمدلله كويسة ما علي حاجة
سمر: فتحية المفقودة بي شدة الف حمدلله علي السلامة
فتحية: اووو سمورة الفقد حاصل والله الله يسلمك كيف اخباركم كويسين
سمر: والله تمام الحمدلله كيف يا محمد
محمد: سمورتي البت الشاطرة ام شعيرات
سمر: اووف ليه دائمآ بتخربها انا اكبر صيدلانية وناس البيت بقولو لي ام شعيرات
محمد: ما انتي في البيت ام شعيرات وفي الصيديلة دكتورة يا دكترا ما تزعلي ياخ عشان مشتاق ليك بس
سمر: اسكت بس والله شووق كميات مكمكمة الجيه متين
محمد: اذا الله هون شهر بي الكتير ونكون معاكم
سمر: ان شاء الله العافية هاك امي
محمد: يعلم الله مشتااقين يا عسل
فاطمة: كتير الشوق يا ولدي كيف اخبارك كويس
محمد: بعد سمعت صوتك بقيت في امان الله بس نقصاني شوفتك
فاطمة: الله يديك العافية ويجيبكم بي السلامة
محمد: اميين يا رب اها بتاخدي علاجك في زمنو?
فاطمة: قاعدة ابلعو شئ مارضني غيرو مافي
محمد: ههههه ما توقفي يا امي ابوي كيف هو
فاطمة: كويس والله الليلة مشا صلة رحم لي اهلنا
محمد: الله يديهو العافية
فاطمة: العافية لي الجميع اها اتصلو لي ابو بكر اخوك طمنو هو ومرتو عليك الله
محمد: حااضر انت تامر يا ملاك
فاطمة: ما يامر عليك ظالم اها ودعتك الله
محمد: الله يخليك يا غالية
فاطمة: الله يحفظكم ويغطيكم

الي لقاء...............😊♥

#اولاد البدري21
#جوان عبدالرحمن
*عثمان ولد البدري
عثمان بقا في امان الله خلص كل الادوية وبقا اكتر من كويس والليلة نازل جامعة فرحان ومبسوط شديد صحا من الصباح يغني ويدندن ادوش وجاء لبس وطلع بي المواصلات وصل الجامعة وكل الدفعة رحبت بيهو شديد بما فيهم سحر الكانت مبسوطة انو عثمان جاء تاني
سحر: حمدلله علي السلامة الجامعة فقدتك
عثمان: انا ذاتي والله وحشتني شديد
سحر: ما تشيل هم يا عثمان واقراء الملاحق قربت
عثمان: لالا انا الحمدلله بقيت مطمئن عديل امس ابوي جاء لي العميد والعميد شكرني جدآ لي ابوي
سحر: اول الدفعة ما بشكرك كيف نحنا لينا الله العميد يسب فينا داخل وطالع
عثمان: هههههههه اشتغلتي كيف انتي?
سحر: غايتو في كم حاجة وقفت لي لو كنتا قاعد كان شرحت لي
عثمان: يلا الايام جاية وكلو بتعوض ان شاء الله بس انتي اجتهدي
سحر: ان شاء الله عايزة اسالك يا عثمان
عثمان: اتفضلي
سحر: انت عارف الضربك منو?
عثمان: عارف اي
سحر: بس كدا كويس انا خوفتا تكون ما عارف انا سمعتا مازن
عثمان: قال شنو?!
سحر: انا ما كنتا عارفة انو قاصداك والله العظيم سمعتو في الكافتيريا هو ومعاهو شلتو بتفقو في المكان البضروبك فيهو
مازن دا واحد جبان بي المناسبة
عثمان: اكبر جبان لكن هو الجاي عليهو عظيم ان شاء الله يبقا قدرو
سحر: عايز تعمل شنو يا عثمان
عثمان: خليها لي الزمن بس
* سمر بت البدري
المغرب سمر جات البيت استحمت وقعدت اتونست مع امها شوية ومشت غرفتها تفكر في كلام حسن سمر مترددة وما عارفة تعمل شنو في النهاية قررت انها تشوف رائ امها شنو
مشت لي امها في غرفتها
سمر: امي ممكن دقيقة بس
فاطمة: اتفضلي يا بتي
سمر: ماما انا عايزة اقول ليك حاجة بس ممكن تسمعيني لي الاخر بعدين تديني رايك.
فاطمة: اتفضلي قولي في شنو?
سمر: انا صراحة يا ماما اتعرفت علي واحد جار الصيديلة والعلاقة بينا كانت صحبة وهو ينشاف زول كويس شديدوهسي هو قال جاي يخطبني من ابوي وانا مترددة وما عارفة
فاطمة: انا ما بعرفو لكن يا بتي الجاي بي الباب وما بتاع لف ودوران دا يبقا فيهو الخير
سمر: انا ما عارفة يا امي حاسه اني لسه ما بعرفو كويس عشان امانو مستقبلي
فاطمة: ما خاب من استخار استخيري. والفيهو خير ربنا يكتبو ليك طيب عشان تتاكدي الزول دا بصلي
سمر: اي بصلي وفي الجامع كمان
فاطمة: البخاف من الله دا ياهو البسعدك لانو بخاف الله فيك
سمر: خلاص. انا بستخير وبشوف البحصل شنو
فاطمة: كل الخير ان شاء الله وشكرآ يا سمر
سمر: علي شنو يا ماما انا اقول ليك شكرآ
فاطمة: لانك فكرتي فيني عشان تستشريني
سمر: عارفة اني مستحيل اضيع بعد اشاورك في حاجة تصبحي علي خير يا ماما
فاطمة: وانتي من اهل الخير حبيبة قلبي انتي
&سمر مشت اتوضت وصلت الاستخارة ورقدت عايزة تنوم اتصل عليها حسن
حسن: سلام عليكووووو
سمر: اهلين وعليك السلام
حسن: كيف امسيتي?
سمر: عافية
حسن: اها بشري
سمر: الفيهو خير ربنا يسوي
حسن: يعني افهم انك موافقة?
سمر: اي
حسن: انا الدنيا دي ما شايلني انا فرحان وانا مبسووط والله يجعلك من نصيبي
سمر: هههه اميين
حسن: انا من بكرة جاي لي ابووك
سمر: كدي اصبر شوية
حسن: لا انا صبرت كتييير انا من بكرة جاي لي ابوك رسلي لي رقمو في الواتس
سمر: حاضر
حسن: تصبحي علي خير يا خطيبتي
سمر: هههههه وانت من اهلو

الي لقاء..............😊♥

#اولاد البدري22
#جوان عبدالرحمن
*عمر ولد البدري
عمر في الشركة المدير ضغاطو شديد شغال وزهجان وبس منتظر متين دوامو يخلص عشان يطلع جات رهام الشركة ودخلت لي عمر في مكتبو
رهام: ليه يا عمر ليه تعمل فيني كدا
عمر: رهام انتي الجابك هنا شنو?
رهام: ما هو لو انت بترد علي ما كان اضطريت اجي هنا
عمر: عايزة شنو يا رهام?
رهام: انت عمرك ما حبيتني وكنتا بتكذب علي يا عمر كنتا بتلعب بي وماسك بي زمن
عمر: لا يا رهام انتي فاهمة غلط بس والله العظيم اني حبيتك وكنتا عايزك بي الحلال
رهام: (تبكي) والحصل شنو عشان تهرب ما تجي البيت ولا حتى ترد علي
عمر: ابوي يا رهام رافض يجي معاي
رهام: ليه رافض عشان شنو?
عمر: لانو نحنا ما بنتزوج برا العيلة اخواني اتنين متزوجين بنات عمي وانتي عشان غريبة ابوي رافض شديد وانا ما بقدر اجي من غير ابوي
رهام: انت كذاب يا عمر دي حجة كل واحد بلعب بي بت اهلي رافضين انت لو عايزني بالجد بتعرف كيف تقنع اهلك لكن دي كذبة عايز تتخلص مني وتشوف بت ناس تانية تلعب بيها لحدي ما اهلها يكشفوكم وتاني تخليها والدائرة تدور
عمر: دا كلام شنو يا رهام البتقولي فيهو دا والله انا ما كدا انا عمري ما وعدتا زول بي حاجة الي واكون بالجد عايز اعملا وانا وعدتك اني اجي بالباب والظروف بقت ضدي تقومي انتي تقولي كلامك دا
رهام: انت الظروف لو عايز تصلحها ما بتغلبك اقعد واتكلم مع ابوك وشوف حل لي الموضوع دا يعني انت خلاص عايز تستسلم وعلاقة اربعة سنة تمر مرور الكرام
عمر: طيب يا رهام اودعك اني ما اتخلا عنك واجي اخطبك بس انتي امسحي دموعك دي وكدي اقعدي
رهام: والله يا عمر انا صدقتك لو طلعتا بتكذب علي انا ما عافية ليك البعيشو بي سببك
عمر: يا زولة كدي استهدي بالله واقعدي
*محمد ولد البدري
من الصباح سرحان يفكر. ومهموم شديد
فتحية: خير يا محمد ان شاء الله خير?
محمد: والله يا فتحية ما منك مدسا
فتحية: في شنو خير.
محمد: والله يا فتحية نحنا القروش العندنا علي وشك تخلص وهسي انا راسي جاايط شديد وما عارف اعمل شنو
فتحية: ما تشيل هم كلها بتهون كدي شوف ناس السودان ما بقدرو يرسلو ليك
محمد: والله كلهم معصورين ما فيهم طريقة
فتحية: طيب يا محمد قالو الاعوج رائي والعديل رائي انا عندي ليك حل
محمد: اها قولي
فتحية: نحنا قاعدين هنا عشان نكمل العلاج ونرجع لي الدكتور يشوف الحاصل شنو صاح
محمد: ايوا صاح
فتحية: نحنا نرجع السودان ونكمل العلاج هناك وتاني نعمل فحوصات ونرسلا ليهو
محمد: طيب لو الدكتور عايز يكتب لي علاج تاني
فتحية ما مشكلة بنجيبو من هنا لو هنا مافي صاحبك يوسف يرسلو لينا
محمد: كدي. قومي اعملي لي شاي خليني ادرس فكرتك دي
فتحية: حاضر ادرسها كويس
محمد: انتي عارفة انا اعمل لي كم تلفون اشاور في الموضوع دا ما نقوم نرجع وتاني يحصل ندم
فتحية: شاور قالو ما خاب من استشار وان شاء الله ما يحصل ندم.
محمد: ذاتو تاني الرجعة بتبقا صعبة احسن نتاكد تاااب وتاني نرجع
فتحية: ان شاء الله العافية


الي لقاء...............😊♥

#اولاد البدري23
#جوان عبدالرحمن
*سمر بت البدري
اتصل حسن لي البدري واخد معاهو موعد يجي المساء مع اهلو يخطبو سمر واول ما قفل من البدري اتصل علي سمر
حسن: صباحك عافية اصبحتي كيف?
سمر: تمام انت كيف?
حسن: انا اكتر من كويس اتصلـت علي ابوك والله كنتا خايف منو خوف لكن طلع زول راقي
سمر: اصلآ اصلآ اها قال ليك شنو
حسن: جايكم بعدين المساء معاي خالتي وبناتها اهلي ما بقدرو يجو المكان بعيد شديد لكن بجو الشنطة ان شاء الله
سمر: ههههه واثق ما شاء الله
حسن: كل الثقة يلا هي انا سايق برجع ليك بعد اصل
سمر: يلا لي بعدين
سمر قفلت من حسن وجرت لي امها
سمر: مام ماما عندي لي خبر
فاطمة: الله يسمعنا الاخبار الطيبة اها في شنو من الصباح
سمر: حسن جاي بعدين مع اهلو
فاطمة: خبرك قدديم
سمر: اجي يا امي الكلمك منو?
فاطمة: ضرب لي هسي ابوك قال يعملو حاجات مع الشاي
سمر: خلاص خليني اعملهم
فاطمة: والشغل
سمر:في. ستين انا كل يوم عايزين يخطبوني
فاطمة: هههه عاد جنس بورة امشي امشي افتحي الديوان ونضفي كويس لينا زمن ما فتحنا
سمر: حاضر يا حبيبتي
فاطمة: عاد الليلة النفسية فل ما شاء الله
&سمر جهزت حاجات النضافة وفتحت اغانيها ومشت علي الديوان خلتو يلمع لمعان لحدي البخور بخرتو وقفلتو ومشت استحمت وطلعت اكياسها من اخر الدولاب مركونات ليهن زمن اتمسحت ولبستن ونامت والعصر كدا صحت دخلت المطبخ مع امها عملت كيك وبسكويت ولقمة القاضي وكم حاجة كدا دخلتهم التلاجة مشت اتظبطت تمام
ناس حسن وصلو استقبلهم البدري وعمر وعثمان دخلوهم الديوان وقعدو  يتونسو ويتعرفو علي بعض
سوسن(خالت حسن) : طبعآ انا حسن دا ربيتو انا وقاعد معاي من هو بقراء في الثانوي وكمل جامعة وهسي ياهو شغال الحمدلله وما عشان ولد اختي لكن والله حسن كل الناس بتشكرو بي اخلاقو العالية وحبو لي عمل الخير. واهلو هناك في الشمالية ما قدرو يجو والله المسافة بعيدة وامو مرة كبيرة
فاطمة: ما مشكلة ربنا يديها العافية ان شاء الله
& الاسرتين قعدو يتونسو ويحكو في تفاصيل العرس وسمر محرجة تشارك بس تعاين بي عيونها وكل ما عينها تقع علي حسن يغمز ليها بعد اتفقو علي التفاصيل ناس حسن استاذنو ومشو وبعد طلعو سمر رتبت الديوان هي وعثمان ولمو العدة غسلوها وبعد خلصت مشت لي امها
سمر: قالو شنو يا امي
فاطمة: اجي يا بت انتي ما كنتي قاعدة
سمر: والله يا امي ما كنتا مركزة نهائي خجلانة خجل شديد. فاطمة: ههههه ابوك عايز يسال منو وبعد بكرة بتصل ليهم بديهم خبر.
&البدري سال كل الناس البتعرف حسن وكلهم شكرو ومدحو في اخلاقو والبدري اعجب بي شكر الناس لي حسن وطوالي اتصل ليهو واداهو الموافقة
حسن: تسلم يا عمي اها انا عايز العرس بعد شهر لو ما عندك مانع
البدري: والله مافي اي مانع والفيهو خير ربنا يكتبو
&البدري كلم فاطمة بي مواعيد العرس
فاطمة: خلاص نعمل عرس سمر وعمر مع بعض
البدري: عمر عايزة تخطبي لي منو
فاطمة: والله يا البدري الولد دا مصر علي بت عادل اصرار شديد وكمان ما عايزة اغصبو علي حاجة هو ما دايرها دا كمان ما عرس ما لعب
البدري: يا زولة خلاص خلي يعرسها نحنا العلينا عملنا يا فاطمة نصحنا
فاطمة: اها نعمل عرسهم واحد
البدري: خلاص امشي بكرة لي اهل البت واخطبيها ليهو
فاطمة: ان شاء الله
&فاطمة حبست سمر لي العرس مشت السوق جابت ليها الكريمات وكل حاجات الحبسة والمساء مشت مع منال وعمر والبدري خطبو رهام لي عمر وحددو موعد العرس مع عرس سمر
عمر وسمر مبسوطين وكل الناس تجي تبارك ليهم
*محمد ولد البدري
محمد وفتحية قررو يرجعو السودان محمد ضرب لي اهلو وقال ليهم انو جايين فرحو شديد ومحمد مشا حجز راجعين بعد بكرة مشو السوق اشترو هدايا لي الناس وجو يلمو في حاجاتهم
متحمسين لي الرجعة

الي لقاء...........😊♥

#اولاد البدري24
#جوان عبدالرحمن
الليلة عرس سمر وعمر البدري حجز ليهم اكبر صالة وعزمو كل الاهل والجيران الناس متلمين وفرحانين يغنو ويرقصو والعروسات في الكوفير العرس عشاء سمر معاها فتحية وعفراء وزيرتها ورهام معاها صحباتها الخبيرة مكيجتهم كلهم ولبسو وحسن جاء معاهو اصحابو يبشرو وفتحية تزغرد ساق العروس ومشو التصوير اود دور ومشو الصالة كل المعازيم يباركو ليهم ورقصو معاهم واتصورو معاهم عملو الجرتق وبعد الحفلة خلصت اي واحد ساق عروستو ومشو حاجزين في فندق
حسن عندو غرفة مع ناس خالتو ح يسكن فيها بعد رجعو من الفندق كل الجيران جو باركو ليهم واهل سمر جو رحلوها في بيتها وامها جابت ليها عدتها وفاطمة وفتحية نضفو ليها بيتها وبخرو ليها ورتبو ليها هدومها والمساء رجعو مع محمد البيت سمر كانت حاسه روحها غريبة هي مع ناس ما بتعرفهم سوسن عندها تلاتة بنات كوثر وميسون وشهد اخر العنقود كوثر متزوجة وساكنة جنب ناس امها وميسون في الجامعة وشهد في الثانوي
*سمر بت البدري
صحت الصباح نضفت غرفتها ومشت لي ناس سوسن بي هناك حسن لسه نايم
سمر: صباح الخير
سوسن: صباح النور كيف اصبحتو
سمر: الحمدلله وين شهد وميسون
سوسن: مع كوثر تعالي غسلي لي العدة دي انا بعمل الفطور وماشا ليهم هناك
سمر: حاضر يا خالتي
سوسن: عارفة انك عروس وما صاح تشتغلي لكن كلو علي كتير بعد راجلك يصحا اعملي ليهو شاي وهدا الفطور سخني ليهو
سمر: حاضر ان شاء الله
سمر لمت العدة في الحوض وغسلتها كلها سوسن عملت الفطور ولفحت توبها ومشت ناس كوثر بتها خلت سمر براها مع حسن  سمر استحمت وسرحت شعرها وعملت ميكب حسن صحا عملت ليهو الشاي والفطور وبعد حسن فطر طلع المحل سمر بقت براها في البيت حست بي ملل ما عندها شاشة في الغرفة مسكت تلفونها اتصلت علي امها
فاطمة: اهلين يا بتي كيفك?
سمر: كويسة الحمدلله كيف انتي وكيف ناس البيت
فاطمة: كويسين الحمدلله اها كيف وضعك الجديد ان شاء الله مرتاحة.
سمر: والله راحة مافي يا امي انا اشتقت لي بيتنا والبيت دا حاسهو ما بيتنا وما قادرة اقعد فيهو
فاطمة: شوية شوية يا بتي بتتعودي عليهو اها ناس خالتك سوسن بعاملوك كيف?
سمر: ما عارفة حسيتها ما بتحبني تخيلي يا امي قالت لي غسلي العدة وانا عروس هسي لو دي بتها ما كان رضت
. فاطمة: الله يرضا عليك يا بتي اعتبريها امك واي حاجة تقول ليك اعمليها اعمليها طوالي عشان خاطر حسن
سمر: حاضر يا امي حاضر اها عروسكم كيف?
فاطمة: كويسة ما شفنا عليها شئ  اليوم كلو في بيتها
سمر: اجي يخواني مالها يعني
فاطمة: بري خلينا منها ناس بكري اخوك الليلة رجعو البلد والله خلو لينا المكان فاضي
سمر: يا حلليلهم والله.
فاطمة : هاك فتحية قالت عايزة تسلم عليك
فتحية: العروسة كيفك?
سمر: والله يا حليلك يا فتحية اشتقت ليك
فتحية: والله خليتي لينا البيت فاضي كيف اخبارك وكيف عريسك
سمر: والله تمام التمام كويس نزل الليلة الشغل اها انتي ماشا تفحصي متين?
فتحية: بعدين المساء ان شاء الله. دعواتك غايتو بعد العملية دي لو ما حصل حمل تاني ما عارفة اعمل شنو
سمر: لالا حااامل يا زولة وولدك هدا يسمع فيك الله كريم يا فتحية
فتحية: ان شاء الله يا سمر الله يسمع منك واطلع حامل قالو العروس فيها الملائكة ادعي عليك الله
سمر: والله ما نسياك وطوالي بدعي ليك
فتحية: ما بتقصري يا السمحة
* عمر ولد البدري
عمر: يا رهام قومي ارح نمشي لي امي بي هناك
رهام: امشي انت انا عايزة انوم
عمر: رهام الكلام دا ما صاح منك معقولة اليوم كلو في بيتك والناس تجي تبارك ليك يلقوك مافي
رهام: اسمع يا عمر العايز يبارك لي انا بي غرفتي يجي يبارك لي فيها
عمر: يا رهام الله يرضا عليك قومي وابقي مع الناس نحنا هنا كلنا واحد اسرة واحدة المفروض تصحي من الصباح تمشي تصبحي علي امي وتشربي معاها الشاي وتتونسي معاها وكدا
رهام: حاضر يا عمر حاضر
&عمر لبس وطلع مشا لي ناس امو بي هناك
فاطمة: عريسنا زينة تمام
عمر: يا امي انتي لسه معلقة بعد كدا دي غنوها لي عثمان
فاطمة: احلي عريس وانت لسه ما قدمت شوف الحنة في اظافرك لسه ما طلعت
عمر: والله ذاتها زهجتني
فاطمة: هاك شيل الشاي وامشي اشرب مع عروستك
عمر: لالا انا عايز اشرب معاك الشاي هنا
فاطمة: تخلي عروستك براها
عمر: عروستي ذاتها تجي تشرب هنا
فاطمة : البريحكم يا ولدي البريحكم

الي لقاء...........😊♥

#اولاد البدري25
#جوان عبدالرحمن
*محمد ولد البدري
المساء رجع البيت وفتحية لبست وطلعو علي المعمل فحصو الحمل وبقو منتظرين النتيجة
فتحية: انا متوترة يا محمد خايفة ما يظهر
محمد: اتفائلي يا فتحية اتفائلي ان شاء الله حمل
فتحية: ان شاء الله يا رب يا رب تجبر بي خاطري يا رب
الفحيص نادا اسم فتحية قاموا ومشو استلمو النتيجة.
محمد: اها النتيجة فيها شنو
الفحيص: مافي حمل النتيجة سالب
محمد: ما مشكلة لي خير ان شاء الله ارح يا فتحية.
فتحية كانت ساكتة والعبرة خانقاها ركبت في العربية والاتنين ساكتين لحدي ما وصلو البيت هي دخلت غرفتها طوالي من غير ما تمشي لي ناس فاطمة بي هناك محمد دخل علي امو
محمد: السلام عليكم
فاطمة: وعليكم السلام اها الفحص فيهو شنو
محمد: كالعادة يا امي
فاطمة: الله كريم يا ولدي ولخير ان شاء الله
محمد: ونعم بالله
فاطمة: امشي يا محمد طبطب علي مرتك اكيد حتكون زعلانة
محمد دخل غرفتو وفتحية تبكي وماسكة المخدة عليها شديد
محمد: ما تبكي يا فتحية لا اعتراض علي حكم ربنا
فتحية: انا ما معترضة انا بس نفسي في ولد يا محمد
محمد: بجي بجي يا فتحية خلي املك في ربنا كبير واكيد ربنا حيكتب لينا احلي ولد نربي احسن تربية انتي بس قولي يا كريم
فتحية: انا عاقر يا محمد انا ما خليت دكتور وما خليت علاج وما خليت عملية انا ربنا ما كاتب لي ذرية عشان كدا يا محمد عرس وجيب لي اولادك بدل قاعد حارس ليك مرة عاقر
محمد: دا كلام شنو يا فتحية ربنا قال (ولا تقنطو من رحمة الله)  انتي ما عاقر انتي لسه ربنا ما اكرمك بي الذرية لكن قريب ربنا حيكرمنا بي الولادة
فتحية: متين يا محمد متين
محمد: متي ما تجي حبابها متي ما تجي نحنا عايزنها ومتي ما ربنا يقول ليها كوني بتكون
فتحية: (تبكي بي حرقة)  يا رب ما تحرمني يا رب انت كريم يا رب استجيب دعائي وقر عيني بي ولد
محمد حاضن فتحية وعيونو مدمعات
* سمر بت البدري
الصباح بعد حسن طلع المحل سمر مع ناس سوسن معاهم الجيران
سوسن: قومي يا سمر اعملي قهوة وشاي
سمر: ارح يا شهد ساعديني
سوسن: شهد عندها قراية هن ذاتهم ما صعبات
سمر: خلاص وقت ما صعبات ما باخرنها علي القراية ارح يا شهد انتي اعملي القهوة وانا اعمل الشاي
بعد سمر وشهد طلعت النسوان قعدن يقطعن فيها
سوسن: بري قاهر خلاص
سلمي: اصلن نسوان الزمن دا قادرات وقليلات ادب الواحدة ترد علي نسيبتها
سوسن: لكن والله تشيطن علي وعلي بناتي اكرها العيشة
سمر جابت القهوة والشاي شربت معاهم ومشت بيتها نامت العصر صحت نضفت بيتها واستحمت وبخرت البيت وعملت ميكب وبعد حسن جاء طلعت ليهو الغداء ومشو غرفتهم جات لاحقهم سوسن
سوسن: قومي يا سمر عايزاك
سمر: ايوا يا خالتي
سوسن: تعالي غسلي العدة
سمر: انا راجلي جاء هسي عايزة اقعد معاهو
سوسن: لاحقة تشبعي منو غسليها سريع وامشي
سمر: وين ميسون خلي هي تغسلها
سوسن: جات من الجامعة تعبانة
سمر: ما مشكلة تاخد راحتها وتقوم عليها يلا انا ماشا
سوسن: (في سرها) الله ياخدني ان بخليك ترقدي فينا
سمر رجعت لي حسن وبقا يحكي ليها في يومو ويتونسو ويضحكو
₱بعد مرور سبعة شهور
سمر حامل في الشهر الخامس سوسن وبناتها عايزين يحقرو بي سمر بس سمر شديدة علي روحها ومن حملت بقت ما بتشتغل اي حاجة معاهم وسوسن كاشفة حالها مع الجيران سمر نزلت دوام جزئي بتمشي الساعة9 وبتجي 3 مع حسن وبقت تعبانة مع الشغل والحمل عندهم جارتهم وضعها بسيط سمر اتفقت معاها كل يوم تجي تنضف ليها بيتها
&بعد سمر وحسن جو من الشغل سمر استحمت وجات عايزة تنوم جات سوسن
سوسن: حسن يا حسن
حسن: نعم يا خالتي
سوسن: تعال عايزاك دقيقة
حسن: حاضر يا خالتي
سمر: جيب لي معاك عصير
حسن: حاضر
مشا لي خالتو وكانت مكوعة ليهو
سوسن: دا شنو الانت فيهو دا يا ولد
حسن: خير يا خالتي في شنو?
سوسن: مرتك دي حدها وين
حسن: مالها سمر
سوسن: قاعدة كدا زي الضيفة ونحنا نخدم فيها لو جايبها عشان نخدمها كلمنا نحنا عايشين في البيت دا. كلنا المفروض كلنا نتساعد
حسن: كلامك صاح يا خالتي انا بمشي اتكلم معاها واخليها تجي تساعدكم
حسن مشا لي سمر في الغرفة
حسن: انتي ليه يا سمر ما قاعدة تساعدي خالتي وقاعدة ليهم ضيفة
سمر: ملت ليك راسك خلاص يا حسن عليك الله انا تعبانة ومافاضية هسي اقعد ابرر ليك وين العصير
حسن: هسي انتي كل همك العصير اسمعي هنا انا مرة بتقعد واهلي يقعدو يخدمو فيها دي ما عندي تساعدي زيك وزي الناس
سمر: الناس منو مافي زول بساعد بنات خالتك ديل قشه ما برفعنها انا الله ما سالني من خالتك لكن هن الله سالن وانا مرة حامل لو ناسي اتذكر وبعد دا شغالة
حسن : من الليلة شغل مافي اقعدي هنا في البيت دا اصلآ شغلك دا مافي داعي ليهو
سمر: ما داعي ليهو بالنسبة ليك بالنسبة لي في داعي ليهو ما معقولة نحنا كل يوم في نفسي الاسطوانة انا زهجت زهجت منك ومن خالتك النقتها ما بتنتهي اشتغلت شغلتي ما عاجبها ما اشتغلت برضو ووب دا شنو ياخ راعي لي انا مرة حامل
حسن: اول حاجة ما تكوركي تاني حاجة يعني انتي اول مرة تحمل الن

#اولاد البدري26
#جوان عبدالرحمن
*ابوبكر ولد البدري
فاطمة: اها يا بكري عملت شنو
بكري: والله يا فاطمة بقيتي مرة كلامك كتير لسه شوية كدا
فاطمة: شوية كدا لحدي ما الد تكون لسه ما جهزت لي ولا حاجة يا بكري
بكري: يا مرة اطري الله استغفري وادعي الله يرزقنا انا والله العندي كلو كبيتو في الزراعة
فاطمة: اتصرف يعني نحنا نقعد حارسين الزارعة وانا لسه ما جهزت حاجة لي الولادة
بكري: الله كريم
فاطمة: ونعم بالله لكن اتلحلح شوف ليك شغلة تانية دخل بيها مصاريف جهز لي انا بعد كدا ماشا اهلي
بكري: والله الي كان دايراني ابقا مكنة اليوم كلو في الزراعة وتاني اشوف لي شغلة
فاطمة: ياخ اتصرف يا بكري شوف ليك اي حل ان شاء الله ادين جيب لي حاجاتي خليني امشي اهلي
بكري: ادين وتاني الزول يبقا لي في روحي كدي اصبري شوية
فاطمة: لا حولا ولا قوة الي بالله صبرت النشوف الصبر دا حدو وين
* عثمان ولد البدري
عثمان نزل سمستر رابع الليلة هو وعمر مشركين لي مازن بعد خلص محاضرات عثمان اتفق مع سحر تجرجر ليهم مازن لي عربية عمر
سحر مشت لي مازن
سحر: مازن كيفك?
مازن: البت المزة امورك باسطة
سحر: تمام الحمدلله
مازن: شايفك. اليومين دي مبارية لي عثمان الباطل
سحر: ها محنكا عشان الامتحانات الزول دا مخو نضيف
مازن: مفتحة يا قرضة تلعبي في النضيف
سحر: عايزاك في خدمة
مازن: عيوني ليك تامري
سحر: في ولد من برا الجامعة بشاغلني وبقا كل يوم يشرك ليك جنب الجامعة ويتعرض لي عايزة منك توقفو عند حدو
مازن: الليلة يومو اسود الليلة ارح
مازن وسحر مشو برا الجامعة وفي طبلية عمر كان موقف العربية وراها سحر وصفت لي مازن العربية مازن مشا وفتح باب العربية عايز يشاكل الزول عثمان ركبو وقفل الباب وعمر دور العربية
عمر: الليلة بتشرب من نفس الكأس يا حبيبنا
مازن: دا شنو حركات القدر دي ما تبقا راجل يا عثمان مالك بتحماي بي اخوك
عثمان: دا العلمتني ليهو يا صاحبي والماشي عليك كتير
مازن: والله اكلم ابوي يوديكم تحت الارض
عمر: دا لو عشت لحدي ما تكلمو
عمر وعثمان مشو مزرعة فاضية وشكلها مهجورة ولمو في مازن كسرو تكسير لحدي ما اغمي عليهو خلو في مزرعتو ديك ورجعو البيت بعد مازن صحا اتصل علي ابوهو جو اسعفو
عبدالله: دا منو يا ولد العمل فيك كدا
مازن: صاحبي في الجامعة يا ابوي هو ومعاهو اخوهو
عبدالله: دي مهزلة مفتكرين الدنيا سايبة سجل اسامهم هنا نشوف نهاية الموضوع دا شنو
عبدالله مشا القسم وفتح في عمر وعثمان بلاغ والشرطة جات لي ناس البدري في البيت البدري فتح ليهم الباب
البدري: اهلآ وسهلآ اي خدمة
الشرطة: نحنا عايزين عمر البدري وعثمان البدري
البدري: ايوا ديل اولادي لكن خير لي شنو في شنو?
الشرطة: اتفضل معانا القسم وهناك بتفهم
الشرطة ساقت عمر وعثمان والبدري مشا معاهم القسم
البدري: خير يا حضرت الظابط في شنو اولادي عملو شنو
الظابط:اولادك عاملين روحهم عصابة ضاربين ولد ضرب مبرح ولو ما ربنا لطف كان راح فيها
البدري:  شنو!  مستحيل انا اولادي ما بتاعين مشاكل ولا بعرفو السكة دي
الظابط: رايك شنو في الكلام دا يا عمر
عمر: دي قصة طويلة يا ابوي بحكيها ليك لكن نحنا ما غلطانين في حاجة نحنا اخدنا حقنا
البدري: حق شنو وفي شنو ومن منو?
الظابط: تعال يا ولد سوق العصابة دي السجن
البدري: كدي استهدى بالله
الظابط: تاني الحاجة دي راجعة لي الولد الضربو لو اتنازل من حقو كان بها ما اتنازل يقعدو في السجن عشان يعرفو البلد دي ما سايبة
البدري: لا حولا ولا قوة الي بالله اللهم لا نسالك رد القضاء وانما نسالك اللطف فيه
*سمر بت البدري
الليلة ما مشت الصيديلة حاسه بي روحها تعبانة ونفسياتها في الارض راقدة في غرفتها وما نفسها تشوف اي زول جاتها سوسن
سوسن: نحنا ماشين نقيل مع كوثر ونبيت معاها راجلها مافي وما عملت حاجة قومي اعملي اكل ليك ولي راجلك
سمر: سلمي علي كوثر.
سوسن: اوعك تجوعي حسن
سمر: بي السلامة يا خالتي
سوسن: بس وشك دا نهائي ما بتطرحي تبسمك في وجه اخيك صدقة.
سمر: خالتي ودعتك الله
سوسن: اعوذ بالله منك .
سمر اتصلت علي حسن
حسن: نعم يا سمر
سمر: جيب معاك اكل جاهز
حسن: ناس البيت. مافي ولا شنو?
سمر: اي مبيتين مع كوثر.
حسن: وحضرت سيادتك ما بتعملي لينا اكل
سمر: اي فعشان ما نجوع جيب معاك اكل مع السلامة
&حنست روحها تحنيس قامت استحمت وسرحت شعرها ولعت بخور في البيت ورقدت لقت مكالمة من بكري اخوها رجعت ليهو
بكري: الحبيبة كيفك?
سمر: صدق محتاجة اتكلم معاك حسيت بي شكلك
بكري: والله يا سمر فجاءة كدا جيتي في بالي
سمر: الله دا ما كريم اتصالك دا عشان تخفف علي شوية
بكري: شكلو امورك ما ظابطة وما رايقة نهائي
سمر: احيييي يا ود امي الوجع راقد
بكري: احكي وفشي قلبك
سمر: والله ما عارفة القاها من الراجل ولا من اهلو ياخ العيشة هنا لا تطاق ياخ كرهوني روحي
بكري: استغفري يا سمورة الزعل ما شبهك
سمر: يا ريت لو كل ناس زيك يا بكري يا ريت لو حسن بعاملني بي نص معاملتك بس
بكري: كدي احكي لي الجديد شنو
سمر: والله

#اولاد البدري27
#جوان عبدالرحمن
البدري رجع البيت قنعان ومافي يدو حيلة يمرق بيها اولادو
فاطمة: اها يا البدري الاولاد مالن ليه ما جو معاك
البدري: اولادك المحترمين داقين زميل عثمان في الجامعة واسي لو ما عفا حقو بتسجنو تلاتة شهور وهاك يا مصايب
فاطمة: اجي سجمي الليلة كر علي البدري جيب لي اولادي يا البدري
البدري: يا مرة قولي بسم الله انا بمشي لي اهل الولد وهو بعفي ان شاء الله
فاطمة: ان شاءالله اها النضرب لي سمر ما تسمع من الناس تتخلع
البدري: يا ولية المرة حامل ما تكلميها يمكن يطلعو قبلي تعرف
فاطمة: هو في شي بتدسا احسن تعرف مني
فاطمة اتصلت لي سمر
سمر: اهلين امي كيفك?
فاطمة: الحمدلله كيف انتي?
سمر: الحمدلله كيف ناس البيت
فاطمة: والله يا سمر اخوانك ديل عملو مشكلة مع صاحب عثمان مازن الكان بجي هنا وهسي ودوهم الحراسة وابوك قال بطلعوهم ما تخافي
سمر: اجي يا امي متين الكلام دا
فاطمة: الليلة الصباح
سمر: انا جاية يا امي احيي علي اخواني
فاطمة: تعالي والله خلي بعد راجلك يجي تعالي معاهو
سمر: كدي النتصل ليهو وارجع ليهو
سمر اتصلت علي حسن كلمتو جهزت حاجاتها وحسن جاء وصلها. ناس امها دخلو
حسن: السلام عليكم
البدري: اهلآ وعليكم السلام حباب نسيبي الحر اتفضل لي جوة
حسن: مرحب والله عمي والجماعة ديل بسيطة ومحلولة ان شاء الله
البدري: ان شاء الله خير كيفك يا سمورة
سمر: مشتاقة ليكم بس يا ابوي كيف انت
البدري: خانتك مئة بت ما بتسدها والله البيت من غيرك مسييييخ
سمر: والله يا ابوي انا ما بشوف زول زيك ولا في راجل بشبهك
البدري: ربنا يخليك ويكرمك خشي جوا لي امك متجرسة جرسة شديدة خلاص
سمر: ربنا كريم يا ابوي وبلطف بي حالها كدي الندخل عليها
فاطمة: حبابك يا السمحة اقعدي اخدي راحتك
سمر: كيفك يا امي ان شاء الله كويسة
فاطمة: بس ناقصني اخوانك انا دايرة عمر و عثمان يمرقو
سمر: بمرقو يا امي انتي بس اصبري وادعي ليهم اولادك رجال يا فاطمة مرت البدري
فاطمة: السجن كعب يا سمر كعب وما معروف هسي الحاصل عليهم شنو
سمر:كل خير يا امي
جاء البدري وحسن داخلين لي فاطمة
حسن: خالتي كيفك?
فاطمة: الحمدلله يا ولدي تسلم
حسن: ما تخافي يا خالتي الامور كلها طيبة عندي صاحبي ضابط اتصلت عليهو وقال لي بكرة بي الكتير يكونو معاكم
فاطمة: ما قصرت يا حسن ان شاء الله الله يديك العافية ويسمع منك اولادي بكرة دي يرجعو
حسن: لالا راجعين ان شاء الله
&حسن والفاضل المساء مشو القسم لي الظابط مازن عفا حقو طلعوهم ورجعو البيت
فاطمة: هي حبابكم حبابكم والله البيت من غيركم مسيخ يا اولادي
عمر حضن امو شديد :والله يا امي نحنا من غير دعواتك امورنا جايطة
فاطمة: ان شاء الله ما اعيش يوم من غيركم يخليكم لي ويحفظكم بعينة التي لا تنام
عثمان: عمر زح من امي خليني ابل شوقي ياخ
فاطمة: تعال لي يا عثومي حبيب قلبي كر علي تلقيك تعبتا هناك
عثمان: يا امي انا راجل وما بتجرس من السجن
فاطمة: سيد الرجال والله وبركة الكبرت لي
عمر: ما مستغرب الي في مازن العفا حقو دا
عثمان: قال لي انا بس كنتا عايز اذلكم وتدخلو السجن
عمر: ههههه عشان بننذلا ليهو
*محمد ولد البدري
محمد: الحمدلله بس الطلعو والله كنتا شايل همهم
فتحية :الحمدلله والله خالتي ذاتها كانت متجرسة
محمد: انا ذاتي كنتا خايف اكتر شي علي امي
فتحية: اها يا محمد قلتا شنو في موضوعنا?
محمد: موضوع شنو كمان
فتحية: اني اخطب ليك
محمد:فتحية انا والله ما بعرس مش لو قعدتي تتكلمي معاي كل يوم لو قعدتي تتكلمي كل دقيقة عرس ما بعرس
فتحية: انت بتحسس فيني بالذنب يا محمد
محمد: فتحية انتي ناسية انو انا برضو عندي مشكلة يعني انا برضو ممكن اكون سبب في عدم ولادتك فاهمة
فتحية: اها نسوي شنو
محمد: نحنا ما نزهج بس وندعي ربنا وهو برزقنا
فتحية: لكن نحنا ما خلينا دكتور
محمد: هسي انا وصفو لي دكتور نمشي ليهو في اليومين دي وعسي ولعلي يكون علاجنا عندو
فتحية: ان شاء الله
*ابوبكر ولد البدري
فاطمة تقطع في البصل وساارحة بتفكر في حاجة واولادها جايطين في راسها هي خلاص دخلت في الشهر التاسع زهجانة من التقلة وبتها صغيرة واولادها الكبار طول اليوم مشاكل
&جاتهم نورة داخلة
نورة: سلام عليكم فاطمة كيفك?
فاطمة: حبابك اهلين نورة والله تعب شديد الحمدلله كيف انتي?
نورة: مالك يا فاطمة
فاطمة: احيييي يا نورة والله تعبانة تعب واموري كلها جايطة
نورة: نسال الله السلامة مالك انا امس ما خليتك كويسة
فاطمة: والله انا لي سنين ما كويسة الحمدلله
نورة: كدي احكي لي وجعك
فاطمة: اصحي صلاة الصبح اعمل الشاي الراجل يطلع اعمل سندوشات الشفع لي المدرسة انضف المكان وشايلة سمر في يدي وبطني مترين قدامي اغسل وسمر تبكي في راسي اكوي وهي تبكي يجو الشفع من المدرسة اعمل ليهم اكل واقعد اراجع معاهم اغسل ليهم لبسهم واحميهم وتاني اقبل علي الغداء مسافة انتهي من الغداء القي الشفع وسخو المكان انضف المكان تاني اطلع الغداء لي الشفع امشي اولع حفرتي ادخن واجي تاني اعشي

#اولاد البدري28
#جوان عبدالرحمن
*سمر بت البدري
الصباح جاء حسن ورجعت بيتها سمر دخلت في الشهر السابع وبدت شهور التقلة اخدت اجازة من الشغل وبدت تجهز لي الولادة حسن مشا المحل والعصر جاء عشان متفقين يمشو السوق لبسو وطلعو وقفتهم سوسن
سوسن: ماشين وين يا حسن
حسن: ماشين السوق يا خالتي عايزة حاجة اجيبها ليك معاي
سوسن: ماشين لشنو ما تقول لي دايرين تجهزو لي الولادة
حسن:اي يا خالتي
سوسن: وكيف ماشين من غيري انتو دا اول ولد ليكم ما بتعرفو هو محتاج لشنو يغسي عليك يا حسن كيف ما تكلمني انو ماشين السوق
سمر: اصلآ الاول دا بدربو فيهو ونحنا ماشين عشان نتلعم لي الجايين
سوسن: دقيقة النمشي البس امشي معاكم
سمر رجعت غرفتها وقعدت جاء حسن لاحقها
سمر: اسمع هنا يا حسن انا وخالتك ما بنتفق يا نمشي انا وانت بس يا ما نمشي ونخلي المشي
حسن: انتي من يومك كعبة هسي هي فرحانة بي ولدي وعايزة تجهز معانا مشكلتك شنو انتي
سمر: انا العندي قلتو انا وهي ما بنمشي
حسن: غلطان انا الخليتك تعملي ليك راس وما كسرتو ليك يا تمشي معانا يا نمشي وانا خالتي نجيب ليك الجهاز
سمر: ههه يعني بلاهي راسي دا عاملو لي انت! !يا راجل ما تستحي دا شنو الجهل دا بعدين بتهدد فيني ها والله انا وخالتك ما نمشي سوا والله تمشي انت وخالتك تجيبو لي علي كيفكم لا انا ولا ولدي ما نلبسهم واجدعهم في الشارع وانا حلفت
حسن: هسي انتي بتكوركي مالك يعني بتخوفي فيني اسمعي هنا انا راسي دا ما فاضي ليك يا قومي ارح يا خلينا نمشي نخم ليك حاجاتك دي نجيبها ليك ونرتاح من همك ما معقولة معاك اي حاجة عايزة تعملي فيها موضوع
سمر: ترتاح مني!  تخم لي حاجاتي! اقول ليك حاجة اقعد انا ما عايزة منك حاجة والبيت دا. مخليه ليك ماشا لي ابوي عمرو ما زهج مني ولا حسسني انو عايز يرتاح من همي
&سمر فتحت الدولاب وشالت ليها غيارات وطلعت وحسن لاحقها
حسن: يا مرة انتي مجنونة اقيفي خلينا نتفاهم النقاش ما بنحلا كدا
سمر: ابقا بالجد مجنونة لو قعدت معاك وانا ما عايزة النقاش دا ينحل انا بس عايزة ورقتي وما توقفني تاني
&سمر طلعت الشارع ركبت ليها امجاد وهي تبكي بي حرقه وبس عايزة تصل البيت وصلت البيت حاسبت بتاع الامجاد نزلت وقفت في باب بيتهم تقش في دموعها عمر جاء علي البيت شافها واقفة جنب الباب
عمر: سمر! مالك في شنو شكلك كنتي بتبكي ووين حسن جيتي براك
&سمر ارتمت في حضن عمر وقعدت تبكي :احححي يا اخوي انا كتر علي والله
عمر: خلاص ارح جوا يا سمر
سمر: انا ما عايزة امي تشوفني كدا
عمر: امي مافي طلعت مع محمد الليلة المقابلة بتاعتها مع الدكتور
سمر: خلاص ارح
&سمر وعمر دخلو. وقعدو في غرفة عمر
عمر: احكي مالك يا سمر
سمر: انا تعبتا يا عمر انا تعبتا من حسن واهل حسن
عمر: مالو عمل ليك شنو واهلو عملو ليك شنو
سمر: هو. الما عملو شنو حسن دا عمرو ما فكر فيني بفكر في خالتو وبس انا ما مهمة بالنسبة ليهو واقل حاجة يكورك فيني
عمر: ما تبكي يا سمر وانا حسن دا بعالجو ليك
سمر: عليك الله يا عمر ما تعمل مشاكل مع حسن انا ما ناقصة انا عايزة اتطلق يا عمر انا الراجل دا ما عايزة اكمل معاهو
عمر: دا كلام شنو يا سمر حسن ما زول كعب حسن بس عايزة ليهو ضربة تجيب راسو وبعدين الطلاق ما حل انتي ناسية البيبي الفي بطنك عايزة تحرمي من ابوهو عشان شوية نقاشات
سمر: يعني احسن تاني يشوفنا كل يوم مشاكل وتجيهو نفسيات
حسن: انتي عارفة يا سمورة اصلآ سنة اوله زواج كدا انتو ما كعبين انتو لسه ما فهمتو بعض ومافي زول فاهم طباع التاني ادي نفسك شوية زمن تاني بتعرفي كيف تتعاملي مع حسن بتعرفي الحاجة البكرها والبحبها بتفهمي مداخلو وبتفهمي متين تتكلمي معاهو وبتعرفي كيف تخلي يعمل الحاجة الانتي عايزاها
سمر: متين لكن يا عمر متين!?
عمر: اصبري ادي نفسك فرصة وهسي الفترة دي اسكتي خلي هو يتكلم عشان تفهمي وتفهمي طبعو وانتي ركزي في تصرفاتو
سمر: انت عارف. يا عمر كلامك فيهو روح بالجد شكرآ ليك يا عمر
عمر: انا اخوك يا السمحة انا مخلوق عشان اكون جنبك
سمر: ربنا يخليك لي يا عمر وما يضرني فيك انت وين رهام
عمر: مع ناس امها من امس
سمر: عافية?
عمر: كدي رهام دي عايزة ليها قعدة طويلة خلينا منها
*عثمان ولد البدري
عثمان خلص امتحانات سمستر خامس بعد طلع من الامتحان لقاء سحر منتظراهو في البنش الجنب القاعة واول ما طلع نادتو مشا قعد جنبها
عثمان: سحورة الدكتورة
سحر: امتحنتا كيف?
عثمان: اكتر من ظابط وانتي?
سحر: كويس شديد الحمدلله وفضل بعد ربنا برجع ليك
عثمان: خلاص بعد كدا اجزنا
سحر: واخيرآ الحمدلله
عثمان: حفقدك يا سحر
سحر: هههه انت جادي
عثمان: كل الجداد انا اتعودتا عليك شديد بالمناسبة وما عارف اصبر الشهر دا كيف من غيرك
سحر: وانا كمان يا عثمان اتعودتا عليك وبقيت جزو من يومي
عثمان: انا عايز ااقول ليك حاجة يا سحر لكن خايف اندم وخايف اخسرك
سحر(اتوترت) : قول يا عثمان
عثمان: انا ما عادي البينا دا صحبة انا عمري ما عاينت ليك كصاحبة انتي حاجة اكتر من صاحبة انتي عار

#اولاد البدري29
#جوان عبدالرحمن
*محمد ولد البدري
الليلة عندهم مقابلة مع الدكتور دخلو علي الدكتور
محمد: السلام عليكم
ابراهيم: وعليكم السلام اتفضلو اتفضلي يا مدام اسمك
فتحية: اسمي فتحية
ابراهيم: متزوجة ليك كم وعمرك كم
فتحية: متزوجة لي 12سنة عمري28 سنة تابعت مع كم دكتور وكل دكتور بقول لي كلام
ابراهيم : طيب اتفضلي اعمل ليك موجات
انتي عندك ضعف في المبايض يعني ما عندك ايام إباضة حتي لو جات مرة كل كم سنة طيب عشان نحنا ما ندخل في علاج ونفع وما نفع احسن تعملي زراعة وان شاء الله تنجح انا مرت علي حالات كتيرة زي حالتك دي وكلها الحمدلله ولدت من اول زراعة
فتحية: الله يسمع منك يا دكتور الزراعة دي بعملوها وين
ابراهيم: انا بحولكم لي دكتور وهو البعمل ليك الزراعة
فتحية: نمشي ليهو متين?
ابراهيم: ممكن تمشو ليهو حالآ هو شغال في مستشفي() وانا حاتصل احجز ليكم مسافة تصلو تدخلو طوالي
محمد: جزاك الله خير يا دكتور ما قصرتا
ابراهيم: نحنا في الخدمة
&محمد وفتحية طلعو ومشو لي الدكتور وصلو العيادة ودخلو علي الدكتور
محمد: السلام عليكم
ناصر: اهلآ وعليكم السلام
محمد: نحنا جينا من طرف دكتور ابراهيم النيل
ناصر: ايوا صاح انتو ناس الزراعة?
محمد: ايوا صاح
ناصر: طيب يا مدام انا حكتب ليك كم فحص بكرة جيبي النتيجة وتعالي لي في العيادة ونعمل العملية ان شاء الله
فتحية: ان شاء الله
&فتحية ومحمد مشو المعمل عملو الفحوصات النتيجة بتطلع بكرة رجعو البيت وبكرة من الصباح طلعو علي المعمل استلمو النتيجة ومشو لي الدكتور
ناصر: الحمدلله كل فحوصاتك نضيفة ومافي اشكالية نعمل العملية اتفضلي معاي
محمد انتظر برا لحدي ما الدكتور خلص العملية وهو قاعد علي اعصابو الدكتور طلع لي محمد
محمد: اها يا دكتور الحصل شنو
ناصر: الحمدلله الامور الي الان ممتازة اتفضل معاي في كلام لازم تعرفو
ناصر: طيب يا فتحية ومحمد الحمدلله الي الان الامور ممتازة لكن انتو عليكم شنو عشان الزراعة تنجح
فتحية: شنو يا دكتور
ناصر: ممنوع حركة ممنوع تشيلي حاجة تقيلة ممنوع تعملي اي مجهود يعني ما تتعبي روحك نهائي وممنوع تمشي مشاوير طويلة لحدي ما نتاكد انو الزراعة نجحت
فتحية: حاضر يا دكتور ان شاء الله
محمد: يديك العافية يا دكتور ما قصرت نجيك متين?
ناصر: بعد اسبوعين نشوف الحاصل شنو
محمد: الله يكرمك ياخ
* سمر بت البدري
المساء حسن جاء لي سمر في البيت قعد اتونس مع البدري وتاني دخل لي سمر في غرفتها
حسن: سمر انتي ليه بتعملي فيني كدا
سمر: انت البتعمل في نفسك
حسن: انا اسف يا سمر انا كنتا منفعل وما عارف بقول في شنو
سمر: الحقيقة بتطلع لمن نكون منفعلين
حسن: معليش يا سمر والله انا ماقصدي اني ازعلك خلينا نرجع بيتنا وتاني اي مشكلة بتنحلا
سمر: بيتنا! قصدك بيت خالتك انا ما عندي بيت عشان ارجع ليهو معاك وما عندي كلام اقولو ليك
&جاء عمر داخل
عمر: مشكلة بين راجل ومرتو وما مفروض ادخل فيها لكن يا حسن انا عايزك في كلمتين
حسن: عادي يا عمر انت اكتر من اخو اتفضل قول
عمر: اسمع هنا يا حسن سمر دي واحدة ونحنا شايفنها بي مئة بت عزيزة وغالية علينا اديناك ليها امانة تعيشها احسن عيشة تكرمها وما تزعلها لكن انت ما صنتا الامانة ولو زهجت منها نحنا والله ما بنزهج منها وبتلزمنا وحقتنا تسريح بإحسان يا حسن
حسن: انا ما زهجت منها دي مرتي وام ولدي ازهج منها كيف والنقاش الحصل دا نقاش عادي بحصل بين اي راجل ومرتو
عمر: لا يا خوة نحنا ما عايزين نقاش نهائي لا عادي ولا ما عادي اي حاجة يا اقنعا يا تقنعك غير كدا ما ينفع
حسن: حاضر انا اوعدك يا سمر انو تاني ناصل. لي حل يرضي الطرفين خلينا نرجع بيتنا
عمر: اسمح لي. لكن سمر ما بترجع تاني هناك عايزها اجر ليها بيتها براها وتعال سوقها زول عندو حق يسالك مافي
حسن: خلاص التمشي معاي علي بال ما القاء بيت
عمر: القي البيت واجرو وتعالي بتلقاها قاعدة منتظراك
حسن: دا اخر كلام
عمر: ايوا اخر كلام.
&حسن طلع وعمر قعد مع سمر
سمر: شكرآ ليك يا عمر ونعم السند
عمر: انتي ما بستاهلي ترجعي لي بئية انتي ما مبسوطة فيها وزي ما قلتا ليك خلي عندك سياسة عشان امورك تمشي
سمر: ربنا ما يحرمني منك
*ابوبكر ولد البدري
ابوبكر صحا الصباح بدري ومشا السوق جاب لي فاطمة كل احتياجتها وجاب جهاز البيبي واشتري ليها ملايات وريحة وتياب واي حاجة قالت عايزاها اشتراها ليها لحدي المساء هو لافي في السوق وبعد رجع البيت فاطمة عايزة تطير من الفرح بي الحاجات
ابوبكر: عجبوك يا فطومتي
فاطمة: كيف ما بعجبوني ربنا يخليك لي ويعوضك ويديك العافية وبدل كل جنية عشرة
ابوبكر: تستاهلي يا فاطمة مرة ماك هينا جهزي حاجاتك واولادك بكرة ان شاء الله تمشي ناس امك لي الولادة
فاطمة: ان شاء الله
&فاطمة مبسوطة وفرحانة جهزت هدومها. وهدوم اولادها نامت ومن الصباح صحت جهزت اولادها وجهزت هي وطلعو علي الباص ركبو والباص اتحرك المشوار بعيد ومتعب لحدي ما وصلو الخرطوم تعبو تعب شديد. لقو عمر ومحمد منتظرنهم في الميناء سلمو عليه

#اولاد البدري30
#الاخيــــــــــــــــــــــــرة
#جوان عبدالرحمن
صباح يوم جديد اولاد البدري ملموين يشربو في الشاي عثمان وعمر قاعدين مطرفين يلعبو ببجي وبكري مع اولادو يتونسو مع حاجة فاطمة سمر وفتحية وفطومة ورهام في المطبخ يعملو في كيك ويتونسو اي واحدة تحكي عن راجلها ومبسوطات البدري ومحمد قاعدين يتكلمو في الحاصل في البلد ومرة ينفعلو ومرة يضحكو
سمر: اها يا فتحية مواعيدكم متين?
فتحية: بعد اربعة يوم
رهام: ان شاء الله تكوني حامل
فتحية: امييين يا رب
فطومة: اها يا سمر الحصل معاك شنو?
سمر: الحمدلله لقينا شقة مشينا امس شفناها والله سمحة وواسعة والحاجة الشجعتني عليها ما بعيدة من ناس امي
فطومة: اخير ان شاء الله ربنا ييسرها ليكم وترحلو قريب
سمر: ان شاء الله رهام دي. ما ورتنا الشريط طلع فيهو شنو
رهام: من الصباح خجلانة اتكلم ظهر لي حمل
سمر: الف الف مبروووك وربنا يتم ليك علي خير ان شاء الله والله فرحتيني فرح شديد
فتحية: مبرووك والله بركة الحملتي وربنا يتمو ليك
رهام: الله يبارك فيك وعقبالك ان شاء الله بالتيمان قريب يا رب
فاطمة: مبرووك ربنا يكمل ليك علي خير وعقبالك يا فتحية تفرحينا قررريب
فتحية: ان شاء الله

‰عمر: لقيت لي شقة في المزاد والله سمحة خلاص يا بكري اجرتها ودفعت مقدم سنة
بكري: والله ياخ ربنا يقدم الفيهو الخير واحسن ما عملت
فاطمة: هي بركة يا ولدي ان شاء الله رحول العافية والله ما دايراك تطلع مني لكن ياها سنة الحياة
عمر: انا كل يوم بجيك يا امي قايلني بقدر اعدي اليوم من غير ما اشوفك واسمع دعواتك يا الغالية
فاطمة: ان شاء الله العافية يا ولدي والفيهو الخير كلو
عمر: ان الله يسر في اليومين دي نرحل
بكري: ان شاء الله الخير قبلي ارجع لي الزراعة نكرم ليك حتي ارجع
بكري: ان شاء الله
&عمر وسمر رحلوهم في نفس اليوم ناس البدري مشو مع عمر رحلو وكرمو معاهو وتاني مشو لي سمر رحلوها وكرمو معاها شربو شاي المغرب ورجعو البيت
فاطمة مشت ناس امها وبكري رجع البلد لي الزراعة
الليلة مواعيد ناس فتحية مع الدكتور لبسو وطلعو وحاجة فاطمة قاعدة مع البدري براهم
البدري: اولادنا كبرو يا فاطمة
فاطمة: اي والله واي زول بقا عندو مسوؤليات جاري وراها
البدري: انا بحمد الله ليل ونهار علي نعمة اولادي ديل ناس بخافو من الله وبارين بينا وبحبونا
فاطمة: الحمدلله ربنا وفقنا وربيناهم وتعبنا فيهم وحصاد زراعتنا ثمرة حلوة الحمدلله الربنا ما إبتلانا في واحد فيهم
البدري: الحمدلله الحمدلله

‰محمد وفتحية وصلو العيادة ودخلو لي الدكتور
محمد: دكتور ناصر ازيك
ناصر: اهلا وسهلا اتفضلو
محمد: طمنا يا دكتور
ناصر : كل خير ان شاء الله
ناصر: الف مبروووك المدام حامل والزراعة نجحت
محمد: شنو يا دكتور سمعني كويس
فتحية: انا حامل انا حامل انت متاكد يا دكتور
ناصر: ايوا انتي حامل
محمد: الحمدلله انا عارفك يا ربي كريم انا عارف انك ما نسيتني
فتحية: يعني يا محمد ربنا إستجاب لي انا كل يوم بدعي ربنا في كل صلاة في كل دقيقة انا حابقي ام انا ما مصدقة يا محمد ما مصدقة
محمد: صدقي صدقي يا فتحية واخيرآ ربنا كرمنا وحنكون ام واب لي احلي ولد
فتحية: الحمدلله الحمدلله
ناصر: الف مبروك لكن لازم تعملي حسابك وتتابعي متابعة شهرية وربنا يكمل ليك يا رب
&فتحية ومحمد رجعو البيت وهم ما مصدقين وطايرين من الفرحة واول ما وصلو محمد جري لي امو
محمد: فتحية حامل يا امي حامل
فاطمة: اييييوووووي يييووووي بركة يا ولدي شفتا الله كريم كيف الحمدلله الحمدلله الف الف مبروووك
فاطمة حاضنة محمد والدموع جارية الف مبرووك يا حبيبي
حضنت فتحية وبقو يبكو
البدري: يا نسوان دا خبر بذغرتو ليهو خلن البكاء
فاطمة: دي دموع الفرح الحمدلله دا اليوم المنتظرنو لينا سنين
البدري: الف مبروك وربنا يتمو ليك يا فتحية
فتحية: الله يبارك فيك يا عمي ويديك طولت العمر وتربي
رهام: في شنو مالكم بتبكو
فاطمة: فتحية حامل يا رهام
رهام: اجي ما شاء الله بركة والله الحمدلله الف مبرووووك
فتحية: الله يبارك فيك ويكمل لينا علي خير
محمد: نحنا ماشين ناس عمي نفرحهم
فاطمة: نحنا ذاتو بنمشي معاك ونعمل الكرامة هناك امشي يا رهام البسي وانا النضرب لي سمر اكلمها امشي يا البدري جيب البهمية
البدري: دا كلو فرح يا مرة استهدي بالله وكلو بقضى ان شاء الله
&كل الناس اتلمت عند ناس الامين عاملين كرامة لي فتحية وكل الناس تبارك لي فتحية ومبسوطين ليها وسبحان الله فاطمة جاها الوجع في نفس اليوم ودهو المستشفي ولي بعد المغرب حتي ولدت  جابت ولد الساعة عشرة رجعو البيت
سمر: حمدلله علي االسلامة وبركة الانحلتي طيبة
فاطمة: الله يسلمك وعقبال تنحلي انتي الحلل الهين
سمر: اميين يا رب حلاتي يا ناس الصغيرون
فتحية: بعد كدا يا فاطمة انا بشيل معاي سمورة.
فاطمة: بتعذبك ساهي مع وحمك دا
فتحية: وهو انا لاقية عذابها

&يوم السماية كل اهل بكري وفاطمة موجودين
البدري: اضبح البهيمة يا بكري عايز تسمي منو
بكري: الولد دا انا سميتو عمر علي عمر ا