لفت نظري و انا بقفل في الباب وحدة مثلمة يعني حتى ما منقبه ، بس لافة الطرحة على وشها ، و مجرد ما شافت بابي فتح نطت بخلعه كدا ، هرولت و طلعت الدور الفوقي اللي هو اصلاً سطوح فاضي  !
انا بيتي في عمارة دورين ! في الدور الدور  حقي  الجمبي ماخدنو مخزن كامل ، و المعاي في نفس الدور من ما جيت سكنته هي سافرت السعوديه لي راجلها و تاني م جات ..
فااستغربت ، و انجبرت احاول اناديها و بقيت بقوليها :
** لو سمحتي .. لو سمحتي …. يا خالة و لا يا اخت !!!
( وقفت و هي في نص السلم البطلع السطح و فضلت ماسكة الطرحة بي يدها عشان م تقع و م نطقت ب ولا حرف ! فا لمن ما اتكلمت قلت ليها ) :

** شكلك مضيعه ! فوق السطوح مافي حاجة انحنا هنا اول و اخر دور سكني !!

( ولا ردت علي طوالي نزلت بي توتر و مشت سرعه سرعه ( طبجك طبجك صوت شبطا السحافي مع السلم )  ! خفت شديد صراحه و قلبي م ريحني ، طوالي فتحت باب شقتي راجع و دخلته و فضلت ورا الباب واقفه مرعوبه ! و كل شويه اخت اضاني على الباب قرابه العشرين دقيقه ، نعلت الشيطان و فتحت الباب و انا بتدبا و جادعه اضاني جاي و جاي ! لمن حسيت انه مافي شي ، قفلت بابي و نزلته زي خمسة عتبات كدا … )

وقفت خشم الباب حق المبنى بقيت بعاين يمين و شمال و بسأل في نفسي ! حا امشي ياتو جارة ؟؟ حوليني بيوت م عارفة .. قررت امشي اول بيت يميني بعد الفسحه ، لانه بيتهم جذبني صراحه حجر جبل و جنينه و حاجة ظريفه ..
وصلت بيتهم و بقيت بتلفت و 90٪؜ من تفكيري لا انا عايزة ارجع بيتي انا كيف امشي لي ناس ما بعرفهم ! اقوليهم دايرة شنو يعني ؟؟ دايرة اتعرف بيكم و الله شينه !! هوي اخير لي ارجع ..
" لسه ما اتلفت وراي عشان ارجع لقيت بابهم فتح " قلبي عمل بوووووم  .. لقيت صوت بيقول :

__ بسم الله الرحمن الرحيم !!
** ( عدلت وشي تجاهو لقيتو شاب طويل كدا ماشاءالله )
__ بسم الله ما شاءالله ! " بي همس مسموع " قمر يطلع عز الظهر دا ما شفنا ولا سمعنا بيه !
** مم معليش والله انا بس جيت ملخ… #قاطعني !
__ يا سلافه .. سلافه ..  عندك ضيفه تعالي تعالي !!
** لالالا انا ماشه و …. #قاطعتني !
سلافه " بي ترحاب شديد جات " : اهلاً و سهلاً تعالي اتفضلي يا هلا والله تعالي واقفه كدا لشنو تعالي ادخلي !
** انا .. انا .. جج ج
سلافه : تعالي ادخلي من الحر دا ! زح من السكة انت كمان خليها تخش ! امشي م تنسى اللبن خليهم رطلين !
__ " واقف مسهي فيها "

دخلته معاها لي جوا البيت ماشاءالله على الروقان انا بحب كدا ، دا جوي النظام و النظافه و الهدوء .. رحبت بي شديد و كان في شافعه قاعده في الارض في سجادة الانتريه و خاته كراسة الاسكتش في تربيزة الانتريه و بترسم عمر 6 سنة كدا !! رايقه و لا كأنه طفله ، مجرد م شافتني جات علي حضنتني من نصي و قالت لي ازيك خالتو ؟
لقيت نفسي ضميتا علي و قلت ليها :
** انتي ودودة مع الناس كلها و لا انا استثنيتيني ؟
الشافعه : انا بحب الناس كلها ، ماما و حبوبه قالو لي كدا
** انتي حلوة شديد طيب عارفه كدا ولا لا !؟
امها : ههههه يوم يجينا زول دا حالها كدا مع الناس
** ( مسكتها خفيف من جضمها اليمين ) : ربنا يحفظا ، ما وريتيني اسمك ؟
امها : اقعدي اقعدي ، براءة يا ماما زحي لي خالتو عشان تقعد !
الشافعه : اتفضلي يا خالتو اقعدي اقعدي !
** شكراً حبيبتي !
الشافعه : انا اسمي براءة ماما اسي نادتني بيهو ! اتي اسمك منو ؟
** انا اسمي سُهاد !!
امها : ما شاءالله عاشت الاسامي انا سلافة ام براءة !
** اتشرفت بيكم والله ، طبعاً انا لي فترة هنا بس ياهو الليله قررت اطلع و كنت مترددة صراحة لمن لقيت بابكم فتح ههه
__ انا شفتك بالمناسبه لكن طول و كنت قايلاك جاية زيارة لي ناس هنا ، انا زيك واحد ماعندي معرفه كدا بالجيران لانه زاتو م عندي زمن الا اليومين دي اخدت لي اجازة قلت اريح نفسي شويه !
** كويس يعني ما طلعت براي المابمش لي زول ههه
__ ما براك يختي ههههه " قامت "
** عايني لو ماشه تعملي لي حاجة تعالي انا ما ضيفه جيت اسلم عليكم بس والله و اعرفكم !
__ اجي دا كلام شنو ! عيب منك الكلام دا انتي زوله دخلتي بيتي يعني انا اسي لو جيتك بتقعديني سليقه ؟ ههههه
** لالا ياخ معقول هههه ( لاحظت ان في برواز كدا معلق و فيهو صورتا بالابكوت ، م قدرت اوقف فضولي و قلت ليها ) : انتي دكتورة ؟
__ ااي دكتورة والله نساء و توليد ياها الشغلانه المجهدة دي حمدلله  ههههه
** ماشاءالله تبارك الله ربنا يحفظك !
__ ( غابت شويه و جات شايله الصينيه فيها عصير اصفر كدا ) ، امين و يحفظك يارب …

#جانب_قصي

البت دي وين ما بترد .. " عمل اعادة اتصال و خت التلفون و بيعاين بي شباك العربيه قبل يدخل جرس تلفونو ضرب و هو في اضانو ، اتخلع من الصوت و رد بلهفه قبل يقرا الاسم "

فوزيه : انا ما عارفه انا عملت كدا كيف بس ما قصدي حاجة والله يا حاج بس لمن شفت قصي واقع في الارض جوا الحمام خفته شديد ! و بقيت بجدع في الكلام !
مروة : ما مشكله اكيد هي حتعذرك يا خالتي انتي في مكانة امها ، و زاتا ما ردت على كلامك القلتيهو ! بس انتي براحه يا خالتي عشان الايام دي ياها البتكسبيها فيها و ياها البتحببكم في بعض و ياها برضو البتخسركم بعض لا سمح الله ، و انا بيني و بينك دايرة لي اخت تونسني هنا ! بعد تنومي يا خالتي البيت بيفضى علي !
فوزيه : هي زاتا م ناويه تقعد معانا يا بتي من اول يوم ختت شروطها لي قصي ! عشان ما تبقوني انا السبب !
عم محمد : انا طالع عايزين حاجة ؟
فوزيه : ماشي ليها ؟ ( قصدها مرتو التانيه )
عم محمد : ايوا
فوزيه : تمام ! حا تجي تبيت هنا ؟
عم محمد : لالا بكرة معاكم ان شاءالله …

#جانب_قصي

( وصال بتنشف ليهو راسو بالبشكير من سكات - )
قصي : وصال … وصال ..
وصال : نعم قصي !
قصي : حنمشي طوالي بعد الجلسه م حنرجع على هنا !
وصال : ان شاءالله - اطلع ليك شنو تلبسو ؟
قصي : بتقدري تنزلي الشنطه من راس الدولاب ؟
وصال : ايوا
قصي : بس براحه اعملي حسابك -
وصال : ان شاءالله
قصي ( جرا البشكير من يدها و جدعو في السرير و فضل ماسك يدها و قال ليها ) : تعالي قريب عايز اقوليكي حاجة !
وصال ( عاينت للبشكير و رجعت عاينت ليهو ، و قربت كم خطوة من الكرسي حقو ) : احكي لي !
قصي ( باس يدها و مسح عليها ) : اسف
وصال : اس** " قاطعها "
قصي : انتي عارفه و انا عارف مافي داعي نفتح مواضيع ! بس عايز اقوليك من هنا و لي قدام ان شاءالله ما حتحصل مني اي حاجة تضايقك ! و ان كان على تصرفاتي البتستغربيها فا دي انا نفسي والله ما قادر افسر بس بلقى نفسي في دوامة ضيق دائمة ! و بكتم و بنزعج شديد و دا كلو بس لاني لحد الان ما قادر استوعب حالتي و ما قادر اتقبلها و الله غصب عني ، غصب عني ، كل مرة بمشي بنوم فيها على امل اصحى القى نفسي بخير و الايام بتمر و انا في حالتي .. عشان كدا انتي اكتر زول عارفني و فاهمني اكتر مني ! ختي لي العذر لمن تلقيني كدا .. ممكن ؟ ( باس يدها تاني ) !

وصال ( ختت يدها التانيه فوق يده و مسحت عليها ) :
و انا عايزاك تفهم اني م عندي مشكلة لواشيلك فوق راسي و اللف بيك و عمري ما حا احس انك تقيل و لا حمل علي مقارنه بي افكارك العويرة دي ، و انا مقدرة دا تماماً و فاهمه كل شي بس انا دايراك تساعدني بي ارادتك و اتأكد انا هنا جمبك ! انا جيتك عشان اكون نفسك ، قبل ما تتمنى حا تلقاني بقوليك من عيوني الاتنين يا قصي ، م تتخيل انت عندي كبير و قيم قدر شنو و مستعدة استحمل اي حاجة عشان اشوفك بخير - بس عايزة منك طلب !
قصي ( مسح تحت عيونها ) : كأنه في كم حبة لؤلؤ تحت عيونك الحلوات ديل !!
وصال ( ضحكت و نزلت كم دمعة ) : انا ببكي
قصي : عارف عشان كدا قلت ليكي كم حباية لؤلؤ حلوات شديد ههه
( ضماها عليه ) اسف اسف … (فكاها ) ، ارح اطلبي مني !
وصال ( بتجر نفسها ) : طيب ممكن لمن تحس نفسك متضايق تقعد تقول ( استغفرالله العظيم و اتوب اليه - و لا حول ولا قوة إلا بالله عدد ما خلق و لا حول و لا قوة الا بالله ملئ ما خلق و لا حول ولاقوة الا بالله ولا حول ولاقوة الا بالله ملئ ما احصى كتابه لا حول ولاقوة الا بالله ملئ كل شي و لا حول ولاقوة الا بالله عدد كل شي ) عرفته ؟ و اذكر الله كتير - و هسي عايزاك تقول الحمدلله و رضيت بأمر الله و قضائه فا اللهم اني لا اسألك رد القضاء و لكن اسألك اللطف فيه !

قصي : الحمدلله على كل شي ، رضيت بأمر الله و اللهم اني لا اسألك رد القضاء و لكني اسألك اللطف فيه !
وصال : احنا كدا بدينا صفحة جديدة ، صفحة مليانه تقبل و رضا و بهجة عشان المُر يمر ، و صدقني كدا انا ححبك اكتر ، الرضا دي اهم قناعة لازم نكون عليها يا قصي ! مهما كان العسر اللي بنمر بيه صعب و مؤلم ، فا مؤكد حايجي بعده عسر يا حبيبي ! و دا كلام ما فايت عليك بس انت صدمتك خلتك تنسى يمكن و انا هسي بذكرك بأمر الله ، فا كن راضي !!
قصي : بحبك يا وصال
وصال : بحبك اكتر من ما انت عارف … ارح يلا خلينا نجهز حا امشي اخد لي دش سريع !
قصي : طيب و انا حا اكلم الهادي عشان الشنط
وصال : اسمع كلامي ، الشنط اسي خليها لبعد الجلسه خليها نمشي و نجي ، عشان نجيب معانا حلويات نعمل لينا شاي و نسهر معاهم و نراضي خالتو فوزيه على مشيتنا ! لازم تحس بالرضا قبل نمشي ..

قصي : انتي جميلة شديد طيب و قلبك ابيض شديد عشان كدا بحبك يا وصال و حبي ليك دا حاجة حا اعيش عليها ايامي الجاية كلها لحد ما ربنا ….
وصال : بعد عمر طويل و سعيد جمبي و معاي .. اميييييين
قصي : اميييييين
وصال : يلا …

#جانب_سراج
( صوت الباب )

(سراج جا داخل من برا )
سراج : السلام عليكم !
رزة ( بي اهتمام و فرحه خفيه ) : و عليكم السلام !
امال : اخت ليك تاكل مسافة الدعايات دي تنتهي ؟
رزة : خلي يا خالتو انا بخت ليهو
سراج : لالا انا شبعان - امي ممكن بعد مسلسلك ينتهي تجي عايزك في موضوع !
( باب الشارع فتح ورا سراج )

وصال : السلام عليكم
رزة و سلمى ( نطو فيها ) : وصااااال …
سراج ( ضحك ) : وصال
زينب : من شاف اختو ضحك من جا داخل مطرم هههه
وصال ( بيسلمو لبعض ) : مشتاقه ليكم ! كلكم ، عمتو حبيبتي كيفك ؟ انتو لسه بتحضرو في المسلسل دا ياخ دا الجزء الكم من قبل اعرس شغاله ههههه عندكم طولة بال كدا عجيبه ههه
سراج كيفك مع الشغل ؟
سراج : الحمدلله والله - وصال تعالي عايزك
رزة ( بي اهتمام )
زينب : شنو انت شغال امي عايزك و وصال عايزك
معناتو م داير تتكلم قدامنا بس ، نقوم نمشي ولا كيف ؟
سراج ( مشى باس راسها ) : اسف والله م قصدي بس متوتر شويه

وصال ( قامت سبقتو لي غرفتها ) : تعال ي سراج !
سراج : م تزعلي ي غاليه اصلا امي مع مسلسلتها جات وصال حبيبتي !
وصال : سراج ..
__ جيت … ( دخل الغرفه قعد جمبها لي طرف السرير ) : اها كيفكم و قصي كيف ؟
وصال : بخير والله مبسوطين حمدلله
__ حمدلله يارب يدوم و يزيد
وصال : في شنو ؟ احكي لي !!
__ وصال ! ( اتوتر ) .. عايني م حدخل ليكي دخلت رايك شنو في فلانه ! بي اختصار انا بريد حنين شديد والله - و من بدري ممكون و صابر يا الله و امين ! و ما فاتحتها و لا جبت ليها سيرة خايف شديد لي شهور كاتمها في حناني .. نوريني
وصال ( بي فرح ) : تعرف انكم بتتشابهو شديد و حنين اطيب زولة عرفتها و بالجد انا مستعده اعمل ليك اي شي ! الا اني امشي اكلما ليك لو بتفكر في كدا ! لان الحاجة دي م ينفع تجي غير منك ! فهمته ؟
__ عارف بس حكيت لان كنت محتاج احكي و هي م عارفا م حاسه و لا عاملة فيها ما فاهمه !
وصال : انتو متواصلين و بتتلاقو وكدا ؟
__ ايوا متواصلين على الواتساب و بنتلاقى اغلب شي لمن تجينا هنا يعني م لاقي مدخل اقرب منها اكتر لي كم شهر بحاول و مخي شاطب !!
وصال : ما عارفه لكن لازم تتجرأ ، بس انا خايفه تكون مركزة في حتة فارق العمر البينكم دي و تكون خاتاك اخ و صديق ساي !
__ فازق العمر كيف م فهمته
وصال : كيف يعني ! انتو م حصل اتكلمتو في الموضوع دا ؟
__ لا البعرفو انها ياداب في تالته اعلام يعني اصغر مني انا لي سنتين و نص متخرج !
وصال : لا حبيبي حنين قدري و مخلصه جامعه و اسي بتقرا تاني مجال مختلف !
__ صدقي م حصل اتكلمنا ق الموضوع دا و انا اصلاً م حسيت بالحاجة دي و م حتفرق معاي في شي ، بالله شوفيها و شوفيني اتشاف اكبر منها بي خمسه سنة عديل هههههه !
وصال : اصلاً عادي لكن مجتمع عنده مفاهيم عجيبه و هي صغنونه م كيوت كدا ياخ بحبها كدااا راييييقه ياخ ، يارب تبقى من نصيبك يا سراج يا اخوي و اعمل ليك عرس يقول يا ليل !

( جات رزة وقفت عند الباب و سمعت الجملة دي و بقت تتكشم )
رزة : احم ! ممكن ادخل ؟ ولا مواضيع خاصه
سراج ( اتلفت عليها ) : رزة تعالي ! لالا خلصنا ( و قام على حيلو )
وصال : تعالي رزتي مشتاقه ليكي والله تعالي تعالي !
رزة : خليك والله لو قايم عشاني انا بطلع
سراج : بطلي عوارة اتكلمو مع بعض ، انا ماشي اغير وصال تاكلي معاي ؟
وصال : اكلت مع قصي قبل اجيكم
سراج : طيب هني يارب ( طلع )

رزة ( جات قعدت جمب وصال ، بي لهفه ) : وصال وصال ! في شنو سراج مالو ؟ سمعت سيرة عرس ! وريني !
وصال : مالك قال ! ههههه عادي موضوع كدا
رزة : في شنو موضوع كدا وريني ما بكلم زول والله الشمار حرقني !
وصال : بيحب وحدة و كان بكلمني !
رزة ( اتصلحت في قعدتها و فرحت ) : منو دي بنعرفا ؟
وصال : ايوا
رزة ( بي لهفه و فرحه ) : منو عليكي الله ؟؟؟
وصال : وانتي لو م عرفتي بتجني
رزة : ياخ قولي لي
وصال : قال بيحب حنين !!!

#جانب_قصي
في الحوش مع احمد قاعدين محل السراير ..

قصي : اسمع اتغديت ؟
احمد ( بيهبش في شنطة العدة الكهربائيه حقتو ) : خلي الغدا !
قصي : قول لي !
احمد : انا واقع في مشكلة كبيرة ما عارف اواجه بيها سهاد كيف !!
انا عارف ان سعاد م حتخليني عشان م عندها غيري بس كمان انا ما داير استغل النقطه دي !
قصي : الموضوع شكلو كبير ! اسمع خليني امشي نعمل لينا حاجة نشربا ! قهوة ولا نسكافيه و في كيك كمان !
احمد : طيب السلم حقك وين ؟
قصي : لالا السلم العندي حديد ! خليني اشوف ليك واحد خشب من الجيران !
احمد : طيب
قصي : م تنسى الصندوق كان فيهو اسلاك خليتا المرة الفاتت
اعمل حسابك ! و نزل التأمين العام من جمبك قبل تبدأ !

قصي : احمد كان حاكي لي انه ما عندها غير وحدة قريبتا اتربت معاهم اظن او حاجة زي كدا و في مشاكل شديدة بينهم لدرجة ان احمد لمن كان بيكون معاي بيخاف يخليها براها كتير ! تتذكري يوم الكافيه داك اول مرة اتلاقيتو ؟
كان قاصد يعرفك بيها و قالها لي عديل ( سهاد ماعندها زول غيري )
عرفتي لشنو انا التأنيب مطلع عيني يا وصال ؟
و هسي بالواضح طردتنا قالت ما عايزة تشوف زول مننا !

وصال : الله يارب … دا امتحان شنو ياربي ! غايتو الله يعفي لينا حقها ! يعني فوق لي دا يتيمة !! بس يا قصي يوم العزا جات وحدة تشبها تحس دمهم واحد ! و اتكلمت معاها بي اسلوب سخيف شديد
قدام الناس - ديك تحس بيها شرانيه كدا م زي سهاد في حاجة فهمته ؟
قصي " بي ضيق " : طيب كلامك دا خلاني استحضر احمد دا كان عندو كلام عايز يقولو لي ياهو منو و اتوفى ! و كان في حالة ضيق غريبه ! بس لو ما القدر اقول ياريتني ما خليتو و مشيت للسلم !

وصال : ربنا يرحمو و يحسن إليه !! قصي رايك شنو نمشي نعمل فحوصات و نتطمن و نشوف حالتك بقت كيف ؟ بس ما هنا ! في سفرتنا !!
قصي : حاضر بس اديني شوية وقت نحل المشاكل دي !!

#جانب_رزان

" خاته السماعات في اضنيها و قاعده في العربية برا "
" كو كو كو " في الشباك من برا -

" طلعت السماعات و عاينت ليهو بي استغراب ، نزلت القزاز "
رزة : اهلاً !!!
سراج : و سهلاً - قاعده في العربيه لشنو ؟
رزة : منتظرة امي !!
سراج : انزلي انزلي امك امشي انتظريها جوا ! من متين بتتصرفي كدا انتي ؟؟ ولا دا الطبيعي حقك !! افتحي الباب دا و انزلي استنيها جوا !!
رزة : ما نازلة انا ! مشكلتك شنو انت ؟؟؟
سراج : مشكلتي للاسف م لقيت اثبات لصحة الكلام الحا اقولو لاني رجعت للحساب الفيهو صورك لقيتو اتقفل !
مشكلتي صورك الفظيعه المنتشرة و الفيديوهات و الدعس ! كل الفترة دي انا بحاول اقنع في نفسي انه لا دي ما انتي !!! كل مرة اشوفك فيها بتذكر الصور و بستنكر ان دي انتي … مش هي دي النظرات الفسرتيها غلط ؟؟؟

رزة " ختت يدها في خشمها بي صدمة لمن بقت ترجف " :
يعني ما وصال القالت ليك الكلام دا ؟؟؟
سراج : تصدقي ان وصال ابت تجيب لي سيرة بالموضوع و اسي انا ياداب عرفت منك ان وصال عارفه و عندها خبر و كدا اكدتي لي ان شكوكي صح ! اتوقعتك تنكري !!؟
رزة ( بدت تنهار و تبكي ) : عشان كدا انا م استاهل الحب منك صح ؟
سراج : انتي اختي قبل الموضوع دا و بعده ! و قبل حنين و بعد حنين انتي ما اكتر من اختي عشان ما ترمي اللوم على حاجات م ليها دخل !!

#جانب
قصي - #مكالمة

قصي : يا اخينا ما تصعبا على نفسك و علينا ! انت البرضيك شنو انا حعملو !
__ و انا كلامي معاك واضح ! انا داير بيتي يفضى ! حقي و لا ما حقي !
قصي : لا حقك بس كمان في ظروف انت عندك علم بيها ! كان زعلان من تأخير الايجار انا بزيدك و بعتذر ليك و كان داير زيادة م عندي مشكلة !
__ و انا ما داير الكلام البتقول فوقو دا !
قصي : تمام البيت حا يفضى ! بس سؤال انت عندك راي في الموضوع دا و ليك اسباب ! ممكن تقول الحقيقه ؟؟
__ اسبابي اني داير البيت !
قصي : مصمم ! اوكي تمام ، مجرد ما يفضى حا اديك خبر !!
__ تمام [ طق - قفل الخط ] !!

( بعد المكالمة )
وصال : اها قال شنو ؟؟؟
قصي : مصمم ! و ما داير يتفاهم و كلامو حار !!
وصال : و العمل ؟؟
قصي : تمشي معاي ؟ اقعدي معاها و شوفي الحاصل احتمال خاته مكان تمشي عليهو !!
وصال : بس يا قصي انا عايزة امشي لي عمتي لو متذكر المحل حقنا داك شايفاها قامت عليهو تاني و كانت عايزاني ! و غير كدا انا م شايفه انه لازم نمشي ليها اسي ولا رايك شنو . يعني نديها كم يوم تقعد مع نفسها و تشوف حساباتها ؟
قصي : بالعكس مافي زمن للبتقولي فيهو دا ! و لازم تعرف يا وصال !!
وصال : طيب ممكن نخلي بكرة ؟
قصي : وصال انا خايف الراجل دا يمشي ليها و يطلعا من البيت
ما ضامنو والله ! الموضوع معقد زي الواصلو كلام الزول دا - عشان لو عندها زول تمشي عليهو ولا عندها فهم يا وصال اريح ضميري دا !
وصال : داير الجد انا زاتي ضميري مأنبني و كاتماها عشان انت ما تتاأثر !

قصي : يا الله يا وصال ….. طيب خليني اشوف الهادي ، و لا امشي عليهو عديل ، كدا كدا امي عايزاني اوديها البيت … انتي حتعملي شنو عشان اكون فاهم ؟
وصال : حا اتابع معاك بالتلفون و عندي غسيل في الغساله من بدري و بعدها حطلع على عمتي !
قصي : طيب ما تتعبي نفسك !!
وصال : عملت المرهم قبيل ؟ و اخدت الحبة ؟
قصي : ايوا م تشيلي هم !

#جانب_سهاد
" كو كو … صوت الباب "

سهاد " بي خنقة من ورا الباب " : منو ؟
__ انا سلاف ! بس معاي مصطفى !

امها : اخوك في حياتو م قطعنا كان عندنا و لا ماعندنا بيرسلو في تلفونك انتي دي و بدل الاشعار عندك مية اشعار كلها من بنكك !!! اسمعي انا ما دايرة معاك كلام كتير !!
خلي سهاد في حالها و انحنا في حالنا .. خلينا نريح اخوك في تربتو .. قومي غسلي يدك و تعالي وزعي معاي و ساعدي اختك .. يلاااااااا !!

ناديه " بي ضيق هفهفت و قامت " !!

#جانب_سراج
#مكالمة

سراج : وينك ؟
__ مع امي كنا بنتعشى !
سراج : بالعافيه عليكم ، بس لانه دي المكالمة التالته أستغربت
__ كنا بنتكلم عشان كدا " احم "
سراج : و تاني ؟
__و تاني شنو ؟؟ عرفت حاجة بخصوص الرقم ؟
سراج : لسه ما قعدت ليه
__ سراج ! في منو من الحولينك انت كلمتو بي قصتنا و خصصت معاه موضوع العمر دا ؟ و قبل ترد ادي نفسك فرصة تفكر !!
سراج : موضوع العمر انا اصلاً م كنت عارفو عشان اكلم بيه زول
__ اممم معليش ممكن تفكر ؟؟
سراج " بإستحضار " : عايني الموضوع زاعجك ؟
__ لا بس من حقي أعرف !
سراج : طيب م حا أقدر اديكي رد قبل اتأكد
__ يبقى حا أنتظر منك رد !
سراج : طيب جاتك رسالة تاني ؟
__ لالالا ابداً ما جاتني رساله والله …
سراج : طيب أبوك ما قاليك حاجة ؟؟
__ " بي ابتسامة مدسوسة " : احم ، ما قال لي أنا لكن كلم أمي !
سراج : و امك رأيها شنو ؟
__ قالت رأيها من راي بس قالت لي انها عندها نية تمشي تقعد في مدني مع خالاتي كلو كلو بعد الزواج ان شاءاالله !
سراج : طيب حلو تطمني عليها اكتر
__م قايلاك مستعجل للدرجة دي اتوقعت على الاقل اسبوعين
سراج : لا ما للدرجة دي انتي كمان ! اسبوعين يا لطيييف ما قادر اتخيل !!
__سراج ! بتحبني لي ياتو درجة؟
سراج : أكبر من خيالك
__ حتتمسك بي ؟
سراج : انا البسألك السؤال دا ! حتتمسكي بي ؟؟؟
__ ايوا انا ما بفك يد مسكتني !
سراج : اتذكري كلامك دا و ما تنسيه ! لأن يديني الاتنين ما حيفكوك لو مهما حصل .. انا بالجد بحبك شديد بالجد بحبك يا حنين من لحظة شوفتك لحد اللحظة البكلمك فيها دي ! انتي ماخدة كل تفكيري !!
__ طيب استسلمتا ها أعترف … انا كمان من يوم طلعنا داك م فارقت تفكيري …اتملكتني !!
سراج : اااااااه بس اااااه ههههههههه

" صوت زعاريدت "

__ دا شنو ؟؟؟ كأنه في صوت زعاريدت ؟؟؟
سراج : هههههه دا ابوي بكون كلم امي ههههههه
__هي لسه لكن على الدغاريدت هههه
سراج : ما لسة يا زوله ههه
__ الله يسعد قلبها و يفرحا بيكم كلكم يارب …
سراج : يا رب يا حبيبتي ! يارب ….
__حبيبتي ! هه
﮼سراج : و حبيبتي جداً كمان … خلينا نفرح
__ بحبك طيب !
سراج : اقوم ازغردت زي امي ولا كيف ههههههه ياخ بحبك زاتا شويه .. ربنا ما يحرمني منك يارب يا حنين يجعلك نصيب الفرح كله في حياتي …

#جانب_قصي
#مكالمة

" كان مبتسم و خاتي تلفونو في اضانو ، قال " :

__ والله يا حاج ماعندي اي علم بالموضوع دا ..
حاج محمد : ما مشكلة المهم دا الحصل ، و انا قلت ليهو بشاور البت و بشاور اخوانها لكن مبدئياً ما عندنا مشكلة و انت عارف سراج مافيهو كلمة ، راجل بمعنى الكلمة !
__ انا شهادتي فيو مجروحة والله ياحاج لو قلت فيهو رأي و لا كلمة حتقولو لي عشان اخو مرتك ، اها بخلي ليكم الكلام انتو ..
حاج محمد : زي م قلت ليك البهمني رأي حنين لو قالت دايرة انا طوالي بنجز ليهم ديل ناسنا ما محتاجين برتكولات و كلام بالشكل دااا !!
__ على بركة الله .. تم
حاج محمد : على بركة الله .. يلا في امان الله
__ في حفظ الرحمن يا حاج !!

#الهادي بيقول :

عرفت ان الموضوع حيجيب جوطة و كلام ما كان عندي استعداد اني اسمعو - لمن لقيت أبوي بيدق علي قلت بس جا في وقتو ، شلت تلفوني و اتمشيت على مسافة منهم ، لقيت صوت امي برضو كان عالي - رديت عليهو و انا بحاول اجابد في صوتو اللي حسيت بيه فيهو نبرة انبساطة و سعادة كدا … قلت ليهو :
__ يا حاج ابسطنا معاك !!؟
حاج محمد : حنين جاها عريس !

" لقيت نفسي طلعت على الحوش برا بالباب التاني ، و انا كنت سامع جملة أبوي حقت حنين جاها عريس - لمحت سهاد واقفة جهة الباب حق الهول الفيهو ناس امي …لقيت نفسي بقول لي ابوي "

الهادي : دقايق يا حاج انا حا أقفل برجع ليك برجع ليك ( مشيت عليها )

#جانب_وصال

بتقول :
قعدت بي تُقلي كله في الكرسي ! بستوعب كلام خالتي فوزية النزل علي رب رب رب زي الصاقعه !! بقيت لا عارفه افرز الصح من الغلط ، في حين ان مافي كلمة بتدل على انها دايرة لي الضرر او الاذى او مقصدها انها تضايقني و خلاص …
دايماً لمن كنت بسمع كلام امهاتنا و الناس الكبار ديل ، بقول ياخ كلامهم م منطقي و بشوفو غريب ! لحد م يلف الزمن و القاه صح و حاصل … م قدرت ارد على كلامها دا كلو فا كل القلتو ليها :

وصال : خير يا خالتي … " قمت طوالي و مشيت جهة الباب "
مروة " جات محصلاني " : دقيقه دقيقه يا وصال اقدمك …