#خلقني_اسود
بقلم:Fulla_Ali
-٦-
( يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚإِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ)13(

حبوبة بقت شبه دائمه معانا ف البيت..والدليل انو سعيد بقي يمش المدرسه..
انا سجلوني الروضه قريت فيها تلاته سنه وحولني مدرسة..سعيد فايتني بتلاته سنه دراسة وتلاته سنه عمر..بقى صحبي شديد واي محل بنمش سوا..
ودا الشي الما حبتو حبوبة نهائي
صابرين خريجه يا داب ..وعندنا صابر..اخونا الصغيروني الآن عمرو سنتين ..
حياتنا عامله زي بص الجريف..مرات تمش مرات تقيف والله اعلم
🖤🖤🖤🖤
بعد خمسه سنه من المعاناة

حبوبتي ما اتغيرت نهائي..وفهمها ضد اللون الاسود ما اتغير زاتو ...
احلى شي انو تعامل صابرينا وسعيد معاي ما اتغير..وبقينا التلاته اكتر من اخوان ودا الشي الخلا تفكيري ايجابي اتجاه اختلاف الواننا ..
اما صابر اخوي قمحي فاتتح ..لونو حلو شديد وهو كمان شال وجاهة ابوي وجمال امي..ربنا يحفظو...

وانا كل ما الايام تضيف في عمري سنه كنت بكبر وانا مقتنعه بلوني..وكنت دايمآ بفكر اعمل حاجه تغير من مفهوم العنصريه في عقول الشعب الحبيب..
ممكن تقولو عليها احلام طفله ههههه لكن على الاقل عندي احلام..ولا شنو؟؟

🖤🖤🖤🖤

مره زي حوالي الساعه 11:34 مساء كده ..صابرينا صحتني اقدمها الحمام..
طلعنا مشينا وانتظرتها..وبعد خلصت رجعنا غرفتنا..
بعد طفينا النور صابرينا قالت لي اجيب ليها موية..
طلعت اجيب لي الغلباوية دي وانا راجعه شفت حاجه غريبة..
حبوبتي كانت بتمش ع اطراف اصابعها ...وكانت بتتاوق لي ناس امي بفتحة الشباك حق الغرفه !!
انا وبالرغم من صغري الا اني استهجنت الموضوع واعتبرتو تدخل غير مشروع ...ما حسيت الا بيد مسكت يدي وانا من الخوف رميت الكبايه وصرخته..لقيتها دي صابرينا جات تفتشني وقت اتأخرت .
حبوبة انتبهت لينا وناس امي كمان جو طالعين
ما تتوقعو قدر شنو انا كرهتها اليوم داك...خصوصي لمن ادتني كف وقالت : كانت بتتاوق ليكم الخدره الخادم
هنا ابوي ما سكت ليها..وقال ليها دي بتي وتربيتي ...يستحيل تعمل حركة زي دي...والبتقولي عليهم خدم بشترو 1000امثالك

حبوبتي حمرت لينا ودخلت غرفتها ...

🖤🖤🖤

لمن اكتب واكتب قدام العمايل دي اسم حبوبتي بخجل كتيير..بخجل من انو اقرب الاقربين لي يعاملني كده ...معقوله ¡¡ بدل القي منها كلمة : حبيبتي القى كلمة الخادم..الخدره..العبده
!!!؟
اي صح انا خادم...بس بخدم امي وبسهر على راحتها

وصح انا سمرا..لأنو شلت خدار ابوي الهادئ
وانا صح عبده..لأني بعبد ربنا وبنحني ليهو ما لي زول تاني..
لكن يا احباب قلبي الحياة دي مدرسة..وزي مافي المدرسة المواد بتكون مختلفه لازم المصائب تجينا مختلفه
مادة مصائب الاغتصاب
مادة مصائب السجن بظلم
مادة مصائب القتل
مادة مصائب الفقر
مادة مصائب الحب
ومادة مصائب المرض
مادة مصائب العقوق...وييييييك...مواد كتيرة

ونحن لازم نقراها ونمتحن فيها وننجح كمان عشان نمش الفصل التاني..لغاية نتخرج عند الموت بتقدير ممتاز و يوظفونا في اعلى الجنان ..

#صلو_علي_محمد

#To_be_Continued

#خلقني_اسود

بقلم : fulla_Ali
-٧-
وما كان لوني قبل ذلك أسودا** ولكن لهيب الشوق أحرق جسماني..
*عنترة

وقت وصلت سنه خامسه وكان سعيد خالي ممتحن شهادة اساس ..
ولأنو درجاتو شوية ما كانت كويسه حبوبة بقت عصبيه شديد..وبتفضي زهجها فينا..
حتى ابوي ما سلم منها ..ما كانت محترمه وجودو ..وبتصل لدرجة انو لمن يسلم ليها ما بترد السلام..وابوي بستحمل دا كلو عشان خاطر امي ..
امي ما كان عندها غير البكا..هي عارفه تصرفات حبوبة كانت نابعه من عنصريتها الشديده..والسبب الأساسي الخلاها تقعد معانا انو امي في الآونة الأخيرة كانت بتشكي من ضهرها لأنو حاجه ما كانت بتقدر ترفعها وبتتحرك بالعافيه..

مره زي حوالي الساعه 10:34م كده...امي ولعت حفرة الدخان ..و مسافة تمش تجيب زيت من غرفتها حبوبتي جات كبت جك موية كامل ف النار وطفتها
امي وقت جات قالت ليها ليي عملت كده !!! ..حبوبة ردت ليها بي انو دي امور لعب وم بتنفع معاها ""!! اتخيلو بسسس !!! زينة المرأة لزوجها بقت لعب !!!

وبرضو امي سكتت...وم نضمت ولا حرف ..لأنو مفتكرة انو هي لو شاكلت حبوبة معناها كده بتكون عصت ربنا ودخلت في عقوق الوالدين..
طبعآ انا زاتي كنت مفتكرة كده بس لمن درستونا عرفته انو طاعة الزوج اهم بكتيير من طاعة الام وانو الواحده بتدخل بيها الجنه ..طبعآ الطاعه هنا لازم تكون بالمعروف

🖤🖤🖤🖤

احلى ايام واسوء ايام لمن حبوبتي هدى ام ابوي جاتنا زيارة ...جات هي وعمتي سوسن وزهرة
سوسن كانت متزوجه وعندها بتين تؤم مروة وصفاء ..اعمارهم كانت سنه كده
وزهرة كان لسع صبيه..حلاته وسمراء تشبه ابوي..انا حبيتهم شديد وهم كمان حبونا..
طبعآ دي اول مرة نلاقوهم وم عارفه السبب الخلاهم ما يجونا من بدري شنو..
...

وبما انو حبوبتي وبناتها خدورين ..اكيد انتو حتكونو عرفتو نوع المعامله كيف ...وياارب اغفر لي حبوبتي لأنو بصيرتها اتعمت بالعنصريه ...يارب

🖤🖤🖤🖤

وبغض النظر عن المطاعنات بالكلام حبوبتي حمتنا ناكل معاهم في صينيه واحده...اتخيلو بس !!!

عماتي ما رضوها بس حبوبه هدى سكتتهم وسكتو..
لغاية ما جا اليوم الشششششوم وحبوبه غلطت في عمتو زهرة ...
وشوفو الغلط كان كيف :
الصباح عمتو سوسن كانت بتكنس الحوش..حوشنا كان عباره عن ضفائر حقت طوب..
وحبوبة هدى كانت بتطبخ في المطبخ...
و عمتو زهرة نضفت الغرف ومسحتهم ونضفت الهول وبدت تمسح فيهو ..
يلا انتي يا حبوبة علويه تعالي ادخلي بنعالك الكلها طين و وسخي الأرض ...ودا الشي الما رضتو عمتو زهرة
قامت طوالي قالت ليها يا خالتي كده ع....
وحات الله ولا تمت كلمة عيب دي زاتها ..حبوبة علوية (ورورت ) ليها بالسبابه وهي بتقول : حسسسك عينك تقولي لي خالتي يخلخل ضروسك !

حبوبه هدى و عمتو سوسن وامي جو جارين بعد سمعو الاصوأت علت ...
حبوبة هدى قالت ليها انتي غلطتي..وشغلك دا شغل حقارة..من يوم جينا انا لاحظت ليك بتتعمدي تهينني وتهيني بناتي بس قلت اديك فرصه..لكن تاني طفح الكيل!

حبوبة علويه ضحكت كداااا..وعاينت ليها وقالت : انتو مجرد عبيييد ونحن اسيادكم..ودا شغلكم .. تنضفو وتطبخو وتغسلو فاهمه ولا لا !!!!؟

امي قعدت تبكي وهي بتترجا حبوبتي تسكت..بس كأنو دموع امي كانو وقود ليها ليها عشان تتكلم ..و واصلت : لو ما راس بتي القوي بي انها عايزه تعرس ولدك كان اسي انتو رسميآ خدم عندنا..بس برضو كده ما بطال ..لانكم لو ناسبتونا او لا حتفضلو خدم وعبيد طول عمركم!

يارب اغفر ليها يارب

خفت كتير وقت شفت دمعت حبوبه هدى ودموع زهرة..الوحيده الردت ليها عمتو سوسن..قالت ليها : حيجي يوم وتندمي فيهو علي البتسوي في بتك والبتقوليو..لكن بتمني ما يكون فات الآوان..ارح يا امي كفايه اهانه..وتاني بيت خالد اخوي رجلنا ما حتعتبو ما دام العقرب دي هنا
و لو داير يشوفنا عارف طريق بيتنا كويس..
وبالرغم من كرههم لي حبوبتي الا انو عمتو سوسن قالت لأمي برقه :لو احتجتي لينا رقم التلفون معاك...وبيتنا مفتوح ليك ولي العيال في اي وقت..جهزو شنطهم وطلعو خلو حبوبة واقفه ورافعه نخرتها للسماء!! ..وامي بتبكي وصابرينا قعدت في واحد من الأركان..انا كنت ماسكه صابر اخوي وبسس بحاول اطفئ نار الحقد الجواي

#صلو_علي_محمد

#To_be_Continued

بقلم:

#fulla_Ali