بسم الله الرحمن الرحيم

#قناع_العروسة1

_ أتخيلي أنك عروس ، باقي ليكي يومين و تتمي الشهر ! و يجيكي راجلك داخل ليكي البيت و في يده وحدة تانية ، أحساسك حيكون شنو وقتها ؟

"يوم 21/4/2018 " كان عبارة نقطة تحول لي حياتي !!

#احداث_سابقة

*ولاية الجزيرة*

__يوسف ! يووسف ...هي
( رفع راسو ) ...! نعم ؟
__ هو شنو النعم ، غاتس جواا الابتوب ، يعني ما سامع ؟ امي دي من قبيل بتناديك !
ما سامع يا عبير لو سامع كان مشيت ليها .. كدي زحي !
__مششيم محن !
اسمعي في منو مع امي ؟
__ خالتك وغاده بتها ! ( بي رفعة حاجب )
اوفففف .. اسمعي امشي عليها و قولي ليها بعد يمشو انا بجي ، عندي شغل على الابتوب انتهي منو بس !
__تدفع كم؟
وبعدين معاكي !! اااها امي جات زاتااا ... امي ! مشو ؟؟
امه : اي مشو .. تعال اقعد عايزاك في موضوع
والله يا امي موضوعك دا بعرفو تب ! عشان اختصر ليكي و انا عندي شغل ، انا موااافق ، كدا تمام ؟
امه : شنوووو !! موافق ( ايوووووي يوووي يووووي) ايوا كدا ، الله يرضى عليك يا نور عيوني الاتنين و يحفظك و يهنيك و يفتحها عليك يارب و تترقى و ربنا يفتح ليك باب رزقك اضعاف مع فتحة بيتك دا يا ولدي !
__انا ما مصدقة ! يوسف !! والله ما مصدقة وافقته علىً غادة ! و طوالي كدا من غير نقة و جرجرة محن غايتو ! لكن والله يا امي اقوليك كلام !
بت اختك دي انا ما بريدها و ما بتتبلع لي من هنا دا ! بت خالتي واي حاجة لكن كريهه و كان يوسف موافق انا ما موافقه ! عندك فاطمة بت ست سعاد و عندك نهلة بت على الدومة و عندك مروة صحبتي ، ديل كل وحدة فيهن اسمح من التانية ! ماشه ليهو على فلانة دي مالك يا يمة ! يوسف هوي انا اختك دي واظن لي حق الرفض والموافقة و انا ما موافقه وريتك !!
امه : هي هيييي حيلك انتي الداير رايك منو ؟ حتعرسيها انتي ولا حيعرسا هو ؟؟
__ اجي ! كيف يعني ؟ و حتسكنوها وين يعني ؟ مافي نفس البيت دا و حتقابلنا الـ٢٤ ساعه ! يوسف عاين لي هنا ! وحاة الله مروة صحبتي مافيها كلام و اصلا هي رايداك !
امه ( بي حزم) : عبيييييير !! دا موضوع بيني وبين اخوك ما تدخلي فيهو و انا ما جابراهو على حاجة ، انا اخترت ليهو ما اكتر ! ما تدخلي في الموضوع دا فاهمه ولالا !!!
اها خلصتو نقة ؟ بعد ازنك يا امي و بعد ازنك يا عبير ، اطلعو خلوني اشتغل لانه اقسم بالله مضغوط لمن عيني مارقه و الفيني مكفيني !
__ برودك يا شيخ ! ياخ انا قلبي عليك و بعدين دا موضوع ارتباط وانت ولا هنا .. ااااح يا قلبي ، بس عليك يا يوسف ... ( مشت ورزعت الباب ) ..
امه : لمن تخلص تعال لي بهناك عشان نتفق و نشوف حنعمل شنو !
ما يحتاج يا غاليه انا اديتك الصلاحية ، جهزي انتي و التقولي عليهو انا حاضر من العين دي قبل العين دي ...
امه : اكلم خالك يعني ؟
كلميهو يا غاليه ، بس كل الطالبو منك ، كلميني قبل المواعيد المفروض نمشي ليهم فيها بي يومين عشان براك شايفاني معصور كيف !
امه : الله يرضى عليك ويبارك فيك و يفتحها عليك من اوسع ابوابه يا ولدي ..
امين يا غاليه ..

*عن نفسي*

كتييييير منكم ، حيقولو " ود امه " هههه و كتير منكم كمان شايفين ان الزمن اتغير ، لي فكرة زواج بالطريقه دي !
بي بساطة و السؤال هنا : انه ليه لأ ؟
ليه ما اتزوج بي اختيار امي ؟ فعلا انا ود امي حيكون ود منو يعني ! هي امي الولدتني و ربتني و من قبل ما اعرف ان في حاجة في الحياة دي اسمها اختيار ! كانت هي البتختار عني !و بتحرص على انها تكون افضل الخيارات المناسبه لي ، ااي متفق معاكم ان خيارتها في اي شي ، إلا الحياة الخاصة ، و انا اللي ها اعيش الحياة دي ما هي ! بس لي شاب في وضعي ، مرحب بيهو اختيار امي ! ... حتقولو لي طيب يا يوسف حسب الفهمناهو من كلامكم اللي فوق دا ! انك كنت رافض !!
بس انتو ما عارفين انا رافض مبدأ الزواج نفسو ولا رافض الشخصيه !!
انا كنت رافض مبدأ الزواج نفسسه ! انحنا في السودان حياتنا كشباب صعبة ، صعبه شديد ، لحد ما نقرا و نخلص و نبدأ في مرحلة البحث عن باب رزق ، دا براهو زمن ! و في ناس من هم في الثانوي كطبيعة الحال بينزلو يشتغلو ويقرو في آن واحد ، ولمن يدخل الجامعه و يقرا و يتخرج و من هنا تبدأ مرحلة " البحث عن عمل " و دي الله اعلم تضيع فيها كم سنة و يا لقيت يا ما لقيت !
اتزوج بي شنو ؟ و كان اشتغلت ادي اهلي و لا ادخلها في نفسي؟؟
حقيقي الحياة ما ساهله ابداً الا على فئه معينه و انحنا فئه عادية جداً و انا زي زي اي شاب في السودان آماله كتيرة و طموحو اكبر و احلامو مركونة على جمب تحت مسمى " لا صعب "
رغم كل اللي بقولو ليكم دا انا ماشي بي مبدأ ان :
" النجاح ليس حكراً على احد " و النجاح عمره م كان ليه فرص محدودة او قيود او زمن محدود ! مقتنع تماماً بـ ( انا داير = أعافر ) ..
امي زيها زي امهات كمية ما دايرة حاجة غير سعادتنا و تشوف اولادنا قدامها ، و طبيعي لمن ربنا وفقني في شغل على قدري ، انها تفكر في استقراري !
اعرفكم بي نف

سي : ما فايت عليكم طبعاً ، أنا يوسف عبدالرحمن محمد الشيخ ، الملقب بي جوي ود الشيخ ! عمري 30 سنة ، ساكن في وحدة من قُرى ضواحي الجزيرة ، امي عاششة زي ما خالي بكري بقول ليها ، و الوالد رحمة الله عليه وهو متوفي من بدري شديد ، ياهو وعيت على خالي دا ! ، درست ادارة اعمال و اشتغلت في حاجات كتيرة شديد كبداية حياة عملية و منها اتعرف على الدنيا و مسؤلياتها و المداقشات البتحصل في البدايات ديك لمن نمسك الدرب .. عندي أخ واحد اكبر مني اسمو عماد متزوج بت عمنا لي ورا كدا ، و ليهو سنتين في السعودية ، ياهو هو و ود خالي بكري مترافقين بي غادي و زوجتو معاهو .. وانا الوسطاني ، وعبير وحيدتنا .. حالياً شغال في شركة ادوات صحية في الخرطوم ، اسبوعين في الخرطوم و اسبوع في البلد ..
انا زول عمري ما دخلت في علاقه و عمري ما حبيت ولا فكرت في علاقه لامن قريب لا من بعيد ، حتى في الجامعه علاقاتي كانت محدودة و محصورة على كم نفر من اصحابي و حتى فى حلتنا م حصل ختيت عيني على وحدة كلهن شايفن اخواتي ، يبقى واحد في وضعي دا عادي جداً انه يتزوج بي اختيار امه ، و مقتنع تماماً و ما شايف فيها حاجة ، و المانع الوحيد كان بالنسبه لي هو اني ابني نفسي قبل ادي اهلي ، رغم ان امي ما محتاجة لي و خالي بكري ما قصر معانا ولا علينا بي حاجة ! لكن الاهل حقهم قبل حقك !
حياتي عبارة عن روتين شغل و سفر من الخرطوم للبلد ، و من البلد للخرطوم و من اصحابي ..... اخلي الباقي للاحداث !

( في جانب تاني )
*الخرطوم*

__انتي عاجباك نفسك دي ولا شنو ؟
تشيلي و تتصوري "تششك ، تشششك ،تششك "
من قبيل ! انا جاية اتونس معاكي و لا اقعد اتفرج فيك كدا وانتي بتتصوري !
انتي زاتك يختي طلعي تلفونك دا و اتصوري القاليك اتفرجي فيني منو هيهي ..
__استغفرالله يا ربي ياخ جيبي الزفت دا ( خطفت منها التلفون و ختتو في الكرسي الجمبها ) زهجتيني اقسم بالله ياخ .. م ممكن معاك !
اففف اها احكي ! بس اديني تلفوني دا عشان منتظرة مكالمة !
__بعد نقوم من المكان دا بديك ليهو ، عايزة اعرف انتي قاعده تعملي شنو و بتخططي لشنو !!
ليه بعمل في شنو قصدك ! ( كدي ناوليني التلفون دا يا سمر قاعد يرن )
__خلي التلفون عشان انتي مكالماتك دي ما بتنتهي ، ركزي معاي عشان انا من بليل راسي داير يطرشق من ما سألتيني من اجرءات السفر الما بغباني داك في الواتساب ، وانا راسي دا قاعد يودي و يجيب من التفكير !
( قامت اتناولت التلفون ) اوفف دي امي !
__ انتي غبيه ! ردي عليها طيب يمكن عايزة حاجة ! انجزي عشان توريني !
انا عارفاها عايزة شنو ! اكيد عمي حيكون كلمها !
__ كلمها !! يعني انتي عملتي الفي راسك برضو يا امنيه ؟ يا بت انتي حتعقلي متين ! الحاجة البتخططي ليها في راسك دي لازم تنسيها !
سمر !! انتي عارفه كويس ان الفي راسي في راسي فا ما تكتري معاي عشان م اشيل شنطتي دي و اتخارج منك ! كان لي عمي انا ما بشحت تمام ! و كان للسفر فا انا انسانة طموحي حدها السماء تمام ! و اذا كلام عرس و حاجات زي دي ، عرسي انتي و خليني انا ! و امور العيب ان بت تسافر براها وكلامات زي دي انا م عندي ، المجتمع كلو ما فارق معاي اوكيه !
__اصلك ما بتتغيري انتي ! بس البتخططي ليهو دا خطير و خطير شديد راجعي نفسك و عايني لي امك !
ولا حأتغير يا سمر ! لانو انا كدا الله خلقني كدااا كلي عبارة عن غلط في غللط و مافي زول حيتقبلني ولا انا حأتقبل زول و ولا محتاجة لي زول يتقبلني مكتفية بي نفسي جداً جداً جداً ! و الدايراهو ح احققو حأحققو !
__الله يهديكي بس !
في شنو انتو ! مجنونة انا ولا الفهم شنو ؟
__ انتي لو ما مجنونة حتفكري افكار شيطانيه زي دي و انتي بت ؟ ولا حتعملي في بت عمك العملة دي يا دلاهه انتي ! تقصي ليها شعرها بالغباوة دي عشان بس شالت عبايتك و ما كلمتك و قبلها داقاها و مخربشاها ؟؟. امنية ! انتي لو مجنونة ولا فيك سلك ضارب كلمينا عشان نحصلك انا صحبتك و بتحملك اصلا ماف زول متحملك غيري !
هه براك قلتيها ، هي زاتا ما بتتوب تستاهل واسي كان لقيتا بمسكا بعضيها في نص راسهاا ! ( دقيقه ) ..
__ردي على مكالمتك ردي ! فالحه تردي على الناس و مطنشة امك !
(بترد في التلفون) يا ود الناس انا لا بحبك لا عندي ليك حاجة ... تكلم عمي ليه ؟ .... احسن و يلا تاني ما اشوف رقمك دا عندي زاتو !! *قفلت الخط !
__ دا منو ؟؟ ..... هييي دا منو ؟؟ يااااا ..سرحتي وين ؟؟
** اااا اممم ايوا معاكي !! اا شوفي ! انا لازم امشي البيت اسي تمام ! يلاااا ( شالت شنطتا وتلفونها ) ما تنسي تدفعي الحساب يا سمورة موااح .....و جرت !
— بسم الله دي مالها دي ! ووواي الدنيا دي كلها تتغير الا امنيه اصلو ما بتتغير جلدة للأبد يا لطيف !

*بعد ساعة*
_منزل رقم 13_ ..

بيت كبييييير (كبير الله ) دورين و لكن بيت عادي جداً و بسيط .. شبابيكو خضرا .. حيطانو بيجية مُكحتة ، قدامو في شجرة نيم و تحتها في مزيرة .. اي بيت صغير و كبير معروف ان بيحم

ل في طياته قصة ، البيت دا كان معروف افراد أسرته ، نفر ، نفر .. يعني ! تتعدد الاسباب بالنسبه لي بس بيني و بينكم انا عارفة السبب ! ليه انحنا مشهورين في حلتنا !
ما عشان انحنا اسرة قديمة في الحلة دي ، ولا عشان وضعنا الاجتماعي رهيب و لا الحاجات الممكن توصلنا للنقطة دي !!
للأمانه (انا) السبب ، و دا حتستكشفوه براكم معانا لي قدام !
و في الدور التاني اللي كان مختلف شوية من الدور التحت ، كان ظاهر فيهو الاهتمام والمثاليه في الفرش و كل شي بيعكس روح البيت بس كمان خيالكم م يروح بعيد لانه ف النهايه مستوانا متسوط و يمكن اقل بي خطوتين تلاته ...... والتفاصيل كفيلة بالباقي !!
(وانا بغير ملابسي ، باب غرفتي اتفتخ ، و كانت امي )
__ امنية !!
تعالي خشي ! .. الله ! حاتقيفي كدا يعني يا امي !
__ وانتي من متين بيهمك امري ! شوفي تلفونك انا ضربت ليك كم مرة !!
تلفوني كان صامت و كنت ملتهية بالونسة مع سمر .. و ليه ما بيهمني امرك يا امي ! في شنو ؟، عملت شنو غلط المرة دي ؟
— كمان بتسألي ! كلامك مع عمك !دا ما غلط ؟
اهااا عمي ، لحق يجي يشكي ليكي ! ما تعبو ! كل يوم والتاني جاينك يشتكو بتك عملت و بتك سوت و بتك فعلت و بتك تركت ! وين الغلط وريني انا ما شحدت منهم !
__ للمرة الالف ! احترمي عمك يا امنية م تنسى انه في مقام ابوكي و عايشين تحت ظله ! ما ممكن معاكي انا تعبته ، عمايلك الفاتت دي كلها كوم و العملتيهو مع عمك دا كوم تاني ! اسمعي هنا ،، تنزلي تعتذري ليهووو و تنسي الفي راسك دا نهائي فاهمه ولا لا !!
امي ! انتي لحد متين حتفضلي عايشه كدا ؟ متين حتاخدي قرار يا امي ؟ حياتك كلها ماشة حسب ترتيب ابوي ليها في حياتو و حتى بعد مماتو ! لحد متين حنفضل تحت رحمة عمي ! كل البعملو لينا انه يجدع لينا كم مليم كل شهر و شكراً على كدا !
شوفي يا امي ااي انا قليلة ادب زي ما بقولو عني الناس ، و زي ما عمي تحديداً بيقول عني كدا ! و انا ما حأمشي و اعتذر ليهو لاني ما عملت حاجة غلط ! كل العملتو طالبتا بي نصيبي انا ! واخواني كان ما عايزين حقهم هم احرار !
__ اليسمعك بتقولي كدا يقول عمك معذبنا ولا حابسنا !! اسمعي هنا ! انا سكته ليكي كتير و انتي اتماديتي ، لا عمك لا اولاده ما قصرو معانا في حاجة عشان تطالبي بي حقك !
للاسف يا امي انا طموحي اكبر من مجرد اني اقبل اعيش العيشه دي يا امي ، و انتو كلكم ما فاهمني ! دا م زمن بتاع قعاد و فرض و تقبل لي حاجة هي ما مفروضه علينا و بي يدنا نغيرها ، دا زمن قروش يا امي ، قروووش و بس ! عندك قروش تبقى فوق ما عندك قروش تبقى تحت ! و انا بصراحة مكاني فووووق و فوق شديد كمان .
__ يا بت انتي غبية ! فتحي عقلك دا يا امنية ! القروش ما كل حاجة ! القروش ما بتجيب ليك حب الناس ما بتجيب ليكي اهل ! يا امنية انا وصلت الحد منك و تعبته و كل مرة اقول حتكبري و تعقلي و انتي ماشه العكس كل ما تكبري كل ما بتبقى اصعب اكتر ! حني علي يا بتي وشي بقى قدر السمسمة من كلام اهلك والناس عليكي !
خليني بي راسي طيب ، عشان ما اتعبك لاني ما دايرة ليكي التعب يا امي ! انا دايرة حقي القانوني ما طلبت حاجة فوق مقدرتهم وهما عندهم الحمدلله ، دايرة حقي الخلاهو لي ابوي ، دايرة اسافر اطفش برا البلد دي انا يا امي !
__ انتي ما طبيعيه ! بس وريني بي ياتو منطق عايزة المصنع دا يتفرتق و يتباع عشان يدوك حقك انتي ! البيت دا كلو عايش من المصنع دا ، انتي غبية ؟ وبعدين سفر شنو التسافريهو وانتي بت براك !! اعقلي واركزي وختي عقلك دا في نص راسك ، وقدامك خيارين يا امنية ، يا تنزلي لي عمك و تعتذري ليهو يا اما الخيار التاني و انتي عارفاهو كوووووويس ! ( رجعت لي ورا وقفلت باب غرفتي)
** امي ... دقيقه ..امي قصدك شنو انتي ؟؟؟

#باك
#للأستكانة 💕
مبارك عليكم الشهر و ربنا يحقق ليكم همس الدواخل و جهر الخواطر يارب ..

#سحر_سمير ..

#قناع_العروس
بقلم سحر سمير
-٢-

يوسف مكمل كلامه قال:

من جانب تاني ، كنت شايف ان الزواج مسؤلية كمان ، بس رضا امي كان بيهمني أكتر ، و في كل الاحوال انا شايل مسؤلية ، فا وجود شخص اضافي معانا ما حيضر بي حاجة ، و فعلاً اتصالحت مع الموضوع بالطريقة دي ، امي و خالي كانو مهتمين لي موضوع زواجي شديد و كل القدمتو وقتها لي مرحلة قبل الزواج اني استقل يوم اجازتي ، و اجيب معاي جردل بوهية ، و اجدد غرفتي الحالية اللي مفروض حاتكون بيتي المستقبلي و ما متذكر اني عملت حاجة اكتر من كدا ، غير. ( يا يوسف جيب المبلغ الفلاني ) .. مرت شهور من بداية الفكرة للزواج كأنها اسبوع مع اهتمامي الزايد في الشغل و الترقيات اللي كنت بدعك روحي عشان اوصل ليها خطوة بي خطوة واقدر ازيد من دخلي الشهري + الحوافز ..
لمن بقى فاضل للزواج زي اربعه يوم استوعبت اني فعلاً حأتزوج و برضو م اتغيرت فيني حاجة كأني في عالم تاني ! لمن جاتني امي و قالت لي :

__ يوسف ! اخدت اجازة كم ؟
حاخد اجازة ليه يا امي ؟
__اجي ! يوسف يا ولدي كيف يعني تاخد اجازة ليه ؟
يا ولدي دا عرسك ! دا يفهمو كيفن يخواني ! و بعدين مش مفروض تتصل بي بت خالتك دي تتكلم معاها و تطمن عليها و تشوف احتياجاتها !
اتكلم معاها لشنو يا امي و كلها يومين و حاتجي تقعد معاكم هنا ! و بعدين مش انتي قضيتي ليها حاجاتها تاني في شنوو؟
— هي يا يوسف يا ولدي كمان ما كدا !! يا ولد اتلحلح ابقى زي الشباب ديل ! عقدكم بعد تلاته يوم ولا اربعه ، كمان م حتدق ليها ؟
خلاص يا امي حأتصل .. اديني رقمها !
__ هي يخواني ! كمان الرقم ما عندك ! دا كلام شنو ؟؟ سمح انقلو من تلفوني مخير الله ! اها ادوك اجازة كم يوم ؟
يا امي انا ما طالبته بي اجازة ! ما بقدر اشيل اجازة انا عندي شغل !
__ يا ولدي عرس من غير شهر عسل دي كيفن ما كفاية ما عاملين ليهم حفلة و هيلمانه و اكتفينا بالعقد والغدا !؟ يا ولدي لازم اجازة و في الشركة دي حق من حقوقك !
يا امي والله ما ...(قاطعتو)
__ قول خير يا ولدي و وريني معاك كم ؟
الخير في يا امي قولي الناقص شنو ؟
__الناقص شهر عسل يا يوسف البت من حقها تنبسط زيها زي اي عروس ! و لازم تسافرو تنفسحو تشوفو الدنيا وانت زاتك تنجم و تغير جو من جو الشغل دا شوية كدا يا ولدي !
كلامك دا لي اتنين بعرفو بعض و حبو بعض لكن اخلي شغلي يا امي ..... طيب يا امي انا حأتصرف !
__ايوة كدا يا ولدي الله يرضى عليك ، انا بقوم امش على الحريم ديل بعد تخلص جرب لي الجلابيه دي انشوف محتاجة شنو تاني ، و امش اتكلم مع اختك الطيرة دي و خليها تجي على الناس و تبطل ركوب الراس دا !!
حاضر يا امي ابشري ..

يمكن احساسي بي اني بعمل في حاجة كأنها من اساسيات الحياة و كانها مرحلة لابد منها ،مخليني ناسي واجباتي ! و بعد امي طلعت اتصلت على استاذ محمد، صحبي بس بحكم العلاقات ف الشغل فا بتكون في شوية رسمية و كلمتو و اداني اسبوعين اجازة .... فاتو زي تلاته يوم و الرابع كانت المناسبه حقتنا ، عقد و غدا !!
و تم العقد الساعه ٤:٣٠ عصر ، و لمن اتذكرت كلام امي طلعت الرقم و دقيت عليها ....
احم .. الو !
__ اهلا !
ااا ( بي تردد شديد ) مبروووك العقد !
__اها يوسف ، الله يبارك فيك ..... و سكتنا الاتنين ما كانت في غير اصوات زغاريت جاياني من سماعتها !
طيب اخليك مع ضيوفك و ان شاءالله حنتحرك الساعه ٦ اكيد امي كلمتك !
__ اي كلمتني ( بي حماس شديد ) حنسافر وين ؟
احم .. بورتسودان و بعده عندي شغل في الخرطوم بنختم بيهو و نرجع البلد !
__ بورتسودان !!! ( بي استخفاف ) اممممممم يعني لا عرس زي الناس لا شهر عسل كمان ! طيب تمام !!
انا حأقفل اسي جمبي صحباتي ..
** ااا طيب اتفضــ....(قبل اتمها قفلت الخط ) ..

#احداث_حالية

كل قصة متعارف عليها كانت بتتبني على بطل ، بطل في نظر القارئ ، لانه بينظر ليهو بنظرة انه انسان مميز او انسان مخالف للطبيعه حسب مجريات القصه !
اما انا ! كنت انسان ضعيف لمن عصفت بي الحياة ما اتحملتها ! رغم مبادئي الرهيبه و معتقداتي اللي ما بتنازل عنها ! الا اني كنت معترض على اول اكبر و اقوى امتحان ربنا ختاني فيهو ! و كنت شايف انه فوق طاقتي ، و بيتحدى قدرتي ! رغم اني مقتنع تماماً ان اي انسان يغلط يتحمل نتيجة افعاله .. و نسيت ان " الله اذا احب عبداً أبتلاه "
و وراء كل ابتلاء ، انحنا اتذمرنا و اعترضنا فيهو كان بكون ربنا خاتي لينا قصادو مفاجأة كبيرة شديد !
قصتي بدأت بي #صرخة !

ما قادر أنسى صرختها !
ما قادر انسى استسلامها ، و هي بتخت يدها .. يدها على وشها ! ما قادر انسى منظرها و هي مرميه في الارض !!

*الخرطوم*

" صوت مجموعة من الناس "

يا شاب يا شاب ( بيخبط على شباك العربيه ) افتح الباب من التأمين من جواا عندك ... ( و لسه بيخبط)
و انا نظري كان كلو في اتجاه واحد ، بقيت كدا لمدة طويله ما قادر اوعى للوضع الحاصل او بمعنى اصح ما قادر اتقبل ! رغم ان وضعي ما كان بيسمح ل

لحاله دي ..
و لي لحظه حسيت في يد بتشدني من قميصي ، لمن عاينت يميني ! لقيتو راجل كبير مدخل يدو من شباك العربيه لانو اصلا كان متكسر على عكس شباكي ، لمن بقيت سامع صوت الاسعاف كأنه اتكبت فيني موية نار ، بقيت بحاول افتح الباب مدة وانا بعافر فيه ، لمن جاني واحد من رجال الاسعاف و بقو يحاول يشد الباب من برا ، اخر حاجة قالي بتقدر تتحرك ؟ حاول تصل الكرسي الجمبك بنطلعك بالباب دا ! و انا كنت مصمم افتح الباب دا لاني م كنت في وعي و في حالة ذهول كامله !
لمن هو لف و قال للراجل الكان مدخل يدو من الشباك " زح لي يا حاج " فتح الباب و قالي اطلع بسرعه عشان تحصل الاسعاف و بقى بسند فيني لمن طلعت و داير اجري على الاسعاف ، و الراجل الكبير قاعد يقول " لا حول ولا قوة الا بالله "
الزول دا ما قادر يمشي بيعرج و في دم نازل من جبهتو ... رد ليهو بتاع الاسعاف " ربنا يلطف يا حاج " طلعوني الاسعاف و انا بعاين ليهاا مافيها ملامح ! وشها عبارة عن دم !
مسكني واحد من تمريض الاسعاف ، بمسح لي في الجرح اللي كان على جبهتي ! بالقطن ، بقيت بقول ليهو : " فكني ...فكني .. بت الناس حتموت و انت بتعالج لي في جرح صغير زي دا ! "
بقيت ماسك في راسي ، و غلبني اعاين فيها ! لمن وصلنا المستشفي و هما بنزلوها ، و انا جارري وراهم
لمن لقيت فجأة في باب بيتقفل قدام وشي !
بقيت بخبط على الباب و بخبط !
مسكتني وحدة لابسه لبس تمريض ! قالت لي يا استاذ يا استاذ لو سمحته ارجع ورا و ممنوع تدخل الغرفه دي ! ارجع ورا من فضلك تعال معاي ... استاذ من فضلك اتفضل معاي ... في اللحظة دي لو رموني جوا النار ما كنت حأتكلم !
ساقتني جوا غرفة و قالت لي انتظر هنا من فضلك ، الدكتور حيمر عليك اسي لانو واضح ان عندك مشكله في رجلك و الحته دي لازم تتخيط !
الكلام كان باقي لي بعيد، بعيد كدا طالع منها .. ما متذكر اخدت وقت كم ، و جاتني راجعه و معاها دكتوور !
هي كانت واقفه بتنضف الجرح اللي كان فيهو دقة قزاز و اخدت كم غرزة ، و قالي ان رجلي اليمين متأذية شوية و فيها رضوخ في الفخذ و كم كدمة خفيفه !
بعد انتهو ، قاليها جيبي ليهو الاستمارة خلي يملاها هنا و نشوف البيحصل شنو بعد داك !
لمن جا طالع ، مسكت في يد الدكتور و بي انكسار شديد ، قلت ليهو : حتبقى كويسه ؟ متين اقدر اشوفها لانو ما عارف اتصرف كيف ولا اعمل شنو ؟
قالي : ما حأكذب عليك و اقوليك الحالة الشفتها دي حتعدي على خير ! لكن نقول يارب و انت بس حاول تتحمل العواقب لانه في الحالة دي اكيد اهلها ما حيعدو الموضوع دا على خير ، خصوصاً لو طلع في كسر لاقدر الله او سلبيات و ..الخ لانو مرينا بي حالات زي دي كتير و كويس انك طلعت راجل و ولد ناس و ما حاولته تهرب ! قلت ليهو : انا حتحمل بس بنت الناس ما تتأذي حتحمل كل شي بس ما داير احس بي ذنب اني ممكن اكون قاتل ! الممرضة قالت : طيب حالياً المفروض اهلها يكون عندهم علم بالحاصل اكيد حيقلقو على بنتهم ! خصوصا ان المستشفى بعيدة شديد من مكان الحادث و ما حيوصلهم الخبر لو هي كانن ساكنة قريبة من المنطقة ديك !! قال ليها : دا دور التحقيق بعد كدا ما دورنا و ادعي ان اهلها يطلعو ناس كويسين و ما يجرجروك في المحاكم !!! ( و طلع)
في نص الجوطة الحاصله دي ، حسيت بي هزاز التلفون في جيبي ! كنت فاكرو راح في العربية .. لمن طلعتو لقيت شاشتو ضايعه شديد و م كنت فارز المتصل علي منو و رديت !
الو
__يوسف ها وينككم لسه ما اتحركتوو؟
امي !
__ ايوة يا ولدي مالك ؟
مم مافي حاجة !
__في شنوويا ولدي ؟
مافي حاجة ! خالي بكري رجع البلد ولا لسه في الخرطوم ؟
__ لا لسه ف الخرطوم !
كلميهو يتصل علي اسي ضروري ، و اضربي لي غادة خليها تضرب لي اسي !
__بسم الله انت وين و مرتك وين ؟ و مالك ما بتضرب لي خالك انت ؟
امي ! مرتي في الشقة و انا في الشغل و تلفوني وقع مني شاشتو حرقت ، ما قادر اشوف غير نهاية الشاشه ! و انا ما تنتظريني الليله انا بكلم خالي بكري يسوق غادة معاهو البلد !
__ دا كلام شنو ي ولدي ! انا كمان سُقت عبير و كنا مسافرين لي خالتك نقعد معاها كم يوم عشان تاخدو راحتكم ! يعني شنو اسي ؟
** امي خليكم في البيت انتي وعبير مافي داعي للسفر والكلام دا ، و انا حصلت لي ظروف في الشغل
و ..( قاطعني صوت الممرضه ، بتقول لي : مفروض تدفع التكاليف يا استاذ ! )
بقيت بهبش في التلفون محل كنت حافظ حتة بقفل منو و انا كاتم محل الصوت بي يدي ، لمن حسيت المكالمة فصلت فعلاً !
قالت لي ممكن تجي معاي ؟ ( وقتها انا كنت برا الممرات ) ...
مشيت معاها فعلاً ، و لقيت طالبين سداد التكاليف حتى قبل يطلعوها من العمليات ولا اعرف الحاصل شنو !
و ما كان عندي حل غير اني اتصرف خصوصاً ان زواجي اخد مني اللي وراي واللي قدامي و م عندي اي مبلغ شايلو للزمن !! فا كان لازم اتصرف !

*في الحلقات الجاية*

معقول ( عروسة تهرب قبل عرسها بي يوم !!!! ) ؟
ليه ؟؟؟

#استككانة 🍓..

#قناع_العروس
بقلم سحر سمير
-٣-
طلعت برا حوش المستشفى و اتوترت شديد ! ما عارف اعمل شنو و لا اقول يا منو ؟. حتى تلفوني ما قادر استخدمو ، حرفياً الدنيا ضاقت بي شديد ، واحساس العجز بقى متملكني .. م كان عندي حل غير اني افكر اصل الشقه و اتصرف في تلفون !!
لمن وصلت البوابة بي عرجتي ديك ، حسيت بي هزاز التلفون تاني .. طلعتو و بقيت ماسكو و بعاين و ما عارف منو البيتصل علي .. بقيت بهبش تاني محل حافظ ... لمن سمعت صوت بيقول :
الوووو ...يوسف !
ايوا الو .....منوو ؟
ما عارفني يعني ! اسي بقيت ما عارفني ؟
( صوتو ياداب وقع لي ، رديت ليهو بي خجل شديد ) ايوا يا استاذ محمد ! ااا انا اسف ، بس تلفوني مكسر و شاشتو سودا و يا الله قدرت ارد !
عارف يا يوسف ! اتصلو علي و كلموني و قالو لي تعال استلم الخردة حقتك اللي عملت لي بيها حادث ! ليه يا يوسف ! طالما ما بتعرف تسوق ليه شلته العربية و قطعت لي رجلي و انت عارف ان مشاويري البعيدهدو القريبه بالعربية دي !!
( حسيت بي كتمة لانو كلامو حار شديد ) انا حأتحمل التكاليف يا استاذ محمد بس اديني وقت و انا اسف لانو دي حاجة ما بي يدي و قضاء رب العالمين ، و حالياً في روح معلقة في رقبتي ما عارفه اذا حية و لا ميتة ( العبرة خنقتني ) !
(بقى ينفخ في السماعه ) طيب انا ذنبي شنو يا يوسف ! دا جزاي اني ساعدتك و اديتك العربيه تقضي بيها مشوارك ! تنا اسوي شنو وريني و بعدين حتعوضني من وين و انا البديك مرتبك في الشركة دي !!!
استاذ محمد ، حياتي لي رب العالمين الخلقني و خلقك و هو البدبر لي امري ! و ربنا جعلك وسيلة ما اكتر ، زي ما انا باخد مرتبي منك انت كمان بتاخد مرتبك من استاذ كمال ! الحياة درجات ، و انا راجل و كلمتي وحدة ! و الحصل دا ما بي ارادتي ولابرغبتي و لا حُباً في اني اسمع منك كلام زي دا لاني ما ناقص ، و بي حكم صداقتنا وخوتنا اللي كنت بتتكلم عنها صباح اليوم دا بالضبط مفروض تسأل عني و تعرف الحاصل علي شنو ، انا زول طالع من حادث ما يعلم بيهو الا الله و في وحدة راقدة بي سببي بين الحياة و الموت !! و انت بتتكلم في حديدة !!
م حسيت بي نفسي و انا بزح التلفون من اضاني و رزعتو في الارض من غير شي هو منتهي و زيادة ضرر ما بيأثر ...
لقيت الممرضة وراي بتقول لي :
يا استاذ ( وهي بتعاين لي قطع التلفون كل حتة في اتجاه ) انت ماشي وين ! ما حينفع تطلع لانو المستشفى م بتضمنك اذا حترجع ولالا ! من فضلك تعال راجع و ممكن تتعامل بي التلفون الثابت في الاستقبال !
( اتلفت عليها ) ! اها لو فرضنا اني هربت ! حأهرب من بشر زي ؟ و الاقوى منكم شايفني ! وينو الضمير البخليني اعيش ؟ بي ياتو قلب ممكن اسوي كدا ؟ ( دنقرت شلت الحتة اللي فيها شريحة التلفون ) و رجعت للاستقبال !!
بقيت واقف قدام الغرفه حقت العمليات القبيل ديك ! م كان عندي حل غير افتش للممرضه ، و بقيت لافي ، لمن صادفتها طالعه من واحد من العنابر ..قلت ليها :
ممكن استخدم تلفونك ؟
في التلفون الثابت قلت ليك موجود ... تعال معاي !
لالا انا ما حافظ اي ارقام ! كل المحتاجو موبايل ادخل فيهو شريحتي لانو حأتصل دولي !
(طلعتو من الجيب و مدتو لي ) انا بقعد هناك ( اشرت لي بي يدها ) بعد تخلص جيبو لي ! و مشت ..
( مشيت قعدته و طلعت شريحتها و ركبت حقتي ) لقيت محاولات اتصال من خالي بكري و من غادة و امي و عبير ! م رجعت ولا لي زول ، طوالي اتصلت بي عماد اخوي !
اووه جوووي يا مشتاقين با حبيب
كتير والله الاخبار شنوو؟
صوتك مالو ! امي بخير و عبير وخالي بكري و ناس البلد كويسين ؟
كويسين حمدلله كلهم تمام ...(ااا) اسمعني يا عماد كنت عايز ...*قاطعني*
والله مبسوط بسطه يا اخوك عليكم الله ادعو لي ربنا يحل رحاب بالسلامة ( مرتو ) الليله بليل احتمال تلد ، رغم تكاليف البلد دي لكن فرحاااان ح ابقى اب و انت حتبقى عم ياخ .. عقبالك يا اخوي نفرح بي ذريتك انت كمان ...
اا و الله ماشاءالله .. اي والله ، والله ماشاءالله . خلاص تمام ابقى طمنا و ربنا يفرحك يااخوي ، يلا انا بقفل لانه عندي شغل ....
سلم على ناس امي و على عبورة بالله ... و *قفلت*
اعتقد الحصل واضح شديد و دا باب كبير كنت عشمان فيهو و اتسدا قدام وشي ، و عمري م طلبت منه حاجة ... و م كان فاضل لي غير باب واحد ... و هو ....
( في جانب تاني )
في مكالمة ...
هاه جبتيهو ؟
الووو
ايوة سامعاكي ، قاعده اكوي في فستاني انا و فاتحه المايك و التلفون بعيد مني حبة ! سامعاني كويس ؟؟
__ ايوة يا سمر...
...... ايوة منو ؟ دا مش تلفون اا ....
ايوة ..
** الليلة سجمك يا زوبا بتقتلك كان شافتك شايله تلفونها .. امشي رجعيهو لو عندك نية تحضري العرس صلعة ههه و حاك الله المرة دي بتحلقو ليك زيرو دي مجنونة و بتسويها ههه !
انا ما قعد اضحك يا سمر ! اقسم بالله انا واصلة اخري منها لانو بالجد قلة ادبها فاتت الحد !
يعني يا سمر انحنا تعبانين عشان منو

؟ ما عشانها هي .. رغم كل حاجة شينة ه

ي بتسويها لينا لكن بنفضل اهلها !؟ يعني انا سبت كل شي في يدي حتى فستاني ما استلمتو و جريت ليها و تخليني اطق المشوار دا في الشمس و اقيف ساعتين في الشوارع ! طيب ياخ كلنا عارفين انك صحبتها ، و طالما عايزة تجيك و تسوقك كان على الاقل تقول لي انا اتصرفت ما تجي يا زوبه ! يعني هي الكلمة الكويسه بتنقص منها شنو ما انا اصلاً جاية عشانها !!
هيييي ..هيي افصلي ! شنو هو ؟ المشى منو و الجا منو ! زوووبا اسمعي !
انا قاعده اكوي و اجهز في اموري عليك الله م تخربي لي مزاجي و بعدين مشاكلكم دي حلوها بعيد عني ، بس حاولي تتجاوزي زعلك دا الليله و بكرة و خلي الامور تعدي على خير !! اقفلي التلفون دا
و رجعي محل شلتي عشان المرة دي و الله بتكفتك قدام الناس و انتي عارفاها ما بفرق معاها زول ... يلا بااااي *قفلت السكة*
يوسف بيقول :
اثناء محاولتي لي خالي بكري و انا بتصل ، اتصلت علي غادة مرتي :
ايوة يا غاده !
يوسف ! وينك ؟
عندي شغل ، امي ما كلمتك ؟
كلمتني ايوة وقالت لي خالي بكري بسوقني معاهو الجزيرة ! صحي ؟
ايوة .. امشي معاهو لاني ح ابيت برا الشقه اليومين الجاين ديل ، عشان كدا اخير تكوني هناك ..
طيب دايرة قروش !
قروش !! ااا (بي تمتمة و شيلة هم) اهه طيب شيلي الف جنيه من خالي بكري انا برجعها ليهو !
الف جنيه بس ؟
غاده ( بي حزززم) !!
— تمام طيب ... سلام ....
اثناء تفكيري وانا بقفل .. لاحظت لي حركة في الممر التاني ... جريت بعرح من غير م احس .. لقيتهم بطلعوها من الغرفة حقت العمليات ، لمن انا وصلته كان دخلوها العناية المركزة ... بقيت بسال من كل اتجاه ، بمسك يد و افك يد دا !!
لمن مسكني الدكتور ، و قال لي : ( يا زول صلي على ) النبي !
قلت ليهو : ( عليه الصلاة و السلام )
انت من اقاربها ؟
لالا انا الخبطتها بالعربيه ، و الاتسببت في الحادث !
قدر الله و ماشاءالله فعل .. الحالة مستقرة من بعد العملية ! الوقعة على الدماغ كانت قوية شديد ، و دي حنعرف نتيجة العملية بعد يومين اذا كان في استجابة ، دا غير ان في كسر في معصم اليد و الجروح في كل مكان تقريباً والتواء في قدم الرجل يمكن دا اخف قدراً من باقي الاصابات م نقول الا الشفاء من عند الله !
لاحول ولاقوة الا بالله يارب ، يارب يا حبيبي ياتو ذنب انا ارتكبتو و بكفر فيهو بالقساوة دي يا الله ..
جاتني الممرضة مدت لي يدها (...)
شنو ؟
التلفون حقي !
ممكن دقيقتين تاني ؟
طيب
لمن الاسعاف شالوها م كان معاها شنطة ولا تلفون ؟
(هزت لي راسها انه لا ) و يمكن طار ولا زول من ناس الشارع رفعو والله اعلم ! حسب العرفتو الاسعاف جابكم الاتنين !
ياكريم ! طيب من وين اقدر اعرف التكاليف كم المفروض ادفعها ؟
بتمشي قسم الحسابات و الباقي بتعرفو هناك !
طيب حأشيل تلفونك معاي اعمل اخر مكالمة وارجعو ليكي !
اوكي ..
مشيت قسم الحسابات و بالجد لقيت المبلغ صدمة محل اقبل ما عارف ! مسكت راسي و قعدت على رجولي .. قلت لي نفسي هي حاجة بقت في رقبتي و لازم اتحمل مسؤليتها اياً كانت و مافي زمن للحزن
و كونها لسه عايشه لحد اللحظة دي ، دي في حد زاتها نعمة من ربنا علي ..
طلعت التلفون و بقيت بفتش لي رقم ...
الوو
ود العمة خبرك يا عريس
عوض ! اسمعني
خبارك يا اخوي ؟
اسمعني الله يرضى عليك يا عوض ، انا واقع في مشكلة و محتاج لي قروش توصلني الخرطوم في باقي اليوم دا ، و المبلغ كبير شديد ، حتقدر تتصرف و تجي ؟
حاصل شنو طيب عشان اعرف و المبلغ كم العايزو ؟
لمن تجيني الخرطوم بتعرف ، هاه قلت شنو ؟
يا زول ابشر معاي 10الف جنيه ، بتكفي ؟
هه 100الف ، عوض عشرتك دي انا عايزها اضعاف مضاعفه ... اااه اسمع كلامي و نفذو بالحرف الواحد!
هي لا اله الا الله ، مشكلتك دي مالها غالية كدي يا اخوي !
ياخي اسمع ! اول حاجة مافي زول من اهل البلد يعرف بالحصل دا فاهم ! و حتشيل تلاته راس من الحواشة و تبيعهم و تجي بي نفسك و تجيبهم لي ، و انا بكتب ليك مكاني في رسالة عشان تلفوني
ما معاي !
تلاتة !! يوسف انت بقيت تتعاطى ولا شنو يا اخوي مبلغ قدر دا داير بو شنو !
عوض ! ( بي حزم ) ..
خلاص يا زول عديلة سمح اقول لي ابوي بكري شنو ولا عمتي عاشة !
ياعوض ما حارسين ليك الحواشه هم يا عوض ! اتصرف انت وانا بحلها لي بعدين .. يلا انا بقفل و برسل ليك العنوان !
كتبت ليهو الرساله و طلعت شريحتي و وديت ليها التلفون ... و بقيت رايح جاي قدام العناية !
( في جانب تاني )
__ انت انسان غريب شديد يا عاطف !
ليه يعني !
هه يعني الانحنا فيهو دا ما غريب !!!! يعني زول حنتو الليله و ..*قاطعها*
** اششششش ما تكملي ! بس داير اديك كلام ،ختي في عقلك ! حلو ؟
انا ما دايرة اسمع كلام ، انا عايزة اعرف انت كيف بتحب انسانة كل الحب دا و انا ميتة فيك موت ما شغال بي ! دا غير كمية البنات البتعرفهم

! بس دايرة افهم ! من وين بتحبها و حتعرسها و من وين قاعد معاي اسي في كافيهه قدام الناس كلها !
ما انت

ي لو خليتني اكمل كلامي للاخر كان فهمتي ياحلوة !
__كمل ..!
شوفي يا حلوة ! اي انسان في الدنيا مهما كان ذكي ولميح مستحيل يقدر يفهم تفكير انسان تاني ! يعني الحياة دي مصالح و انا شايف ان وزنتها عادلة لي كل الناس و متاكد في ناس حتعرض على كلامي دا لكن دي وجهة نظري انا و بتمثلني انا !
يعني انتي شايفاها مسكينة و ما بتحبني وانا جابرها علي و شايفاني انا الحيوان و الكعب هه ! (قرب عليها و بي صوت هامس قاليها ) دا قناع !
و خافي من الزول البعمل فيها مظلوم و مغلوب على امره و ما تخافي من الزول البعمل افعاله دي في العلن !! و الجزء الاهم من كلامي دا حتعرفيهو براااكي يا حلوة ..!
*ملحوظة :
لسة الرواية ما بدأت .
*في الحلقة الجاية *
مافي زول يمشي شرطة ولا يبلغ ولا يفتش عليها
انا عارفة هي وين ! و انتهينا على كدا
و من الليله ، انا ما عندي بنت اسمها #امنية ..
يتبع ...
ما خُلقنا لنيأس خُلقنا لنقف ونخوض هذه الحياة مطمئنين واثقين بالله وإن طال وقوفنا فـ الأمل أطول ..💛
#استككانة 💛
#سحر_سمير

#قناع_العروس
بقلم سحر سمير
-٤-

و الجزء الاهم من كلامي دا حتعرفيهو براااكي يا حلوة ..!
__ طيب براك قلتها ، مصالح ! طيب مصلحتك شنو انت من انك تتزوجها و هي ما دايراك ؟
منو قاليك ما دايرياني ؟
__ لا دقيقه يا عاطف انت بتغش على نفسك ولا علي !! كلنا عارفين انها ما دايراك !
طيب يا ستي حأمشيكي على قدر عقلك و لنفترض انها ما دايراني ! انا بحبها و حأتزوجها و بي رضاها و حتشوفي الكلام دا ...(شال حاجاتو من الطاولة و قام ) عن اذنك زي ما عارفه ! الليله حنتي ..باي ....

يوسف مكمل كلامه :

بقيت رايح جاي لا كليت لا مليت لا حسيت بي تعب ، و كل دقيقة و التانيه ارفع راسي للساعه و احسب لي عوض و بفكر اذا قدر يتصرف ولا لا ! ..
لمن غُلبت حيلة .. مشيت حاولت اخليهم يدخلوني العناية يمكن القى شوية راحة لو شفته نفسها دا طالع و نازل و طبعاً ما وافقو انهم يدخلوني و رجعت بقيت لافف حولين نفسي ... مرت الساعات ! لمن دخلت 10:11pm قلقي زاد و قلت 100% ما حيكون عرف يتصرف ، خصوصاً ان دا اول تعامل شخصي بيني و بين عوض ، علاقتنا اسرية و انا البعيد بحكم تواجدي في الخرطوم اكتر ! .. لمحت عوض رايح جاي بيسأل مني بحكم انه ما فاهم حاجة ... من شفتو حسيت بالراحة و جريت عليهو .. مسكتو من كتفو و جريتو في زاوية !! بقى واقف قدامي فاتح خشمو و مخلوع من منظري ! قالي :
__ دا دااا شنو يا يوسف ! دا شنو ( بعاين لي من فوق لي تحت و لي ملابس الشبهه منتهية )
وين ؟ ( مديت ليهو يدي ) !
__ يا اخوي طمني روحي دي معلقه طرف رقبتي من كلمتني و التوتر مطلع عيني !
عوض ! حأفهمك كل حاجة بس اديني المبلغ خليني امشي احل رقبتي !
( طلع لي الظرف من جيبو ) امسك !
شلتها منو و مشيت على الحسابات و هو وراي ! واقف بعاين فيني ، دفعت المبلغ كلو المطلوب و خليت زي الفين في الحساب ! لمن ربنا يرفع عنها ونشوف بعدين البحصل شنو ! استلمت الوصل و اخدت نفس طويل شديييييييييد احساس بالراحة ..
عوض جراني من يدي ! لمن وصلنا المقاعد البرا ...
قالي :
انت دافع المبلغ دا كلو لي شنو و حاصل شنو ؟
حاحكي ليك بس طمني الاول اتصرفت كيف ؟ في زول انتبه ليك ؟
__اصلاً ما طلعتهم من الحواشة مشيت لي واحد بلدياتنا فهمتو الحوجة و اداني وخلاهم عندنا لمن يحتاجهم بجي يشيلهن و لحد الوقت داك بتكون دبرت المبلغ وترجعهم تاني قبل عمتي عاشة تعرف الموضوع دا وتغطس حجرنا !
الحمدلله !
__احكي !
الحصل يا عوض اني عملت حادث ! كيف و متين م عارف ! كل المتذكرو اني كنت ح اتصادم مع بوكس فا لمن كسرت شمال هي كانت شبه قاطعه و ما قدرت افرمل من الخلعه و ضربتها ، و العربيه دخلت في حيطة دكان .. و البت في العناية و القروش دي ياها التكاليف حقت العلاج دي ابسط حاجة ممكن اسويها !
__لاحول ولاقوة الا بالله ، طيب اهلها وين ؟
ماعارفين يوصلو لي زول وحتى م كان معاها حاجة توصلنا ليهم ، و مافي حل غير بعد تفوق نقدر نتوصل ليهم !
__ياخوي الشغله دي ما هينة ! الله اعلم تفوق متين بي كلامك دا و دي بت اكيد حيقلقو عليها و اسي بكونو قالبين عليها الدنيا ! يارب العمل شنو !!
والمشكله الاكبر كمان !
__ لسه في مشكله اكبر من دي يا يوسف يا ود عاشه !؟
م اكبر من روح انسان اكيد ! لكن في النهايه مشكلة والحمدلله ! عارف محمد انت صح ؟
__ محمد ... محمد ! محمد منو ؟
محمد دفعتي و حاليا معاي في نفس الشركة !
__ ما متذكرو والله لكن مالو ؟ نعلو كان معاك في العربيه يا يوسف ؟ انت التعال نسألك صحي ! لقيت العربيه وين لمن تعمل بيها حادث !!!
كدا انت وصلت تب ! العربيه دي ياها حقت محمد دا زاتو ، شلتها منو عشان اصل الفرع التاني و استلم حاجات ، بحكم المسافه و كنت راجع البلد الليله بليل ، قلت اختصر المشوار بالعربيه بدل بهدلة المواصلات و ربك قدر وحصل الحصل !
__ دي مصيبة شنو يا اخوي !
نقول الحمدلله يا عوض .. الحمدلله على ما اراد الله ...ربنا يقوم بت الناس دي على خير و نوصلها لحد اهالها و بعداك الباقي كلو هين و بتحمل التكاليف ان شاءالله حتى لو اضطريت اخلي السودان نهائي و اشوف لي شغل تاني و ادبر اموري !

( في جانب تاني )
الساعه 10:30pm - في مكالمة ..

ردي .... ردي .......
__الووو ( بي صوت ناعس )
ايوا يا سمر ، اديني الزفته المعاكي دي !
__ منو معاي ! و منو الزفته ! الرقم غلطط
(بي هرشه) سمررررر!! انا خالتك فاطمة ام امنيه ( ما خالتها عديل بس من باب الاحترام )
__ خالتي فاطمة ! (قامت استعدلت ) ايوا كيفك ! الساعه كم هي !
سمر ، اديني امنية !
__امنية وين هي عشان اديك ليها ؟
كيف يعني وين ! قصدك ان امنيه اسي ما معاكي ؟ سمر ما تغطي ليها على عمايلها و قلة ادبها دي انا قلبي دا ماكلني و مقلقه عليها من مرقة الصباح ما رجعت لحد اسي الساعه ماشة على 11بليل !
__ يا خالتي والله ما معاي لو معاي ح ادس منك ليه !؟ و كيف يعني من مرقة الصباح !
**زووبا قبيل قالت لي انكم مع بعض و دا الطمني ط

ول الوقت دا يا سمر ! اطمنت انكم سوا قلت بتكون جات عليك تنوم عندك لانو الليل كلو ما نامت مع الازعاج ال في البيت !
__ زوبا دي متخلفة ولا شنو ! بتألف و تقطع من راسها ! قبيل كلمتني و وريتا انها ما معاي اقسملك بالله ما معاي ! و كان م مصدقاني تعالي بيتنا شوفي بي عينك !
اقفلي يا سمر ...( وجدعت التلفون)
__ يا خالتي .. الووووو ..الوووو فهميني كيف يعني من مرقة الصباح ! سجمي ! سجمي يا امنية م تكوني عملتي الفي راسك وااااي كان سويتيها اقول لي امك شنو ! .. اسوي شنو انا اسي !

تفكير خالة فاطمة كله كان بتمحور حول نقطة واحدة !! و كل ما تتذكر كلام امنيه كانت بتخاف اكتر و بتستنكرو و تقول صحيح هي قليلة عقل بس مستحيل تعمل فيني كدااا ... مستحيل !!
و في مثل معروف بيقول ليك ( التور لمن يقع سكاكينه بتكتر) و دا اللي كانت بتسمعو خالة فاطمة من الناس اللي هم مفروض اقرب الاقربين ليها ..
ان دي آخرة دلعك ليها ، اسي كسرت رقبتك ..
ان دي اخرة قوة الراس والعناد ف الفارغة ..
ان دي من عدم الولي ما عرفتي تربيها صح بعد ابوها ..
ان دي اخرة قلة الادب والفرعنه اللي كانت بتستخدمها مع كل الناس ..
و ان معقول ( عروسة تهرب قبل عرسها بي يوم !!!! ) ؟ ليه ؟؟؟

لحد ظهر اليوم التاني ... و كان حوار بين خالة فاطمة و زوبا بت عمها لي أمنية ...
زوبا ...زوبا ... تعالي دقيقه !
__ ايوا
انتي معاكي رقم الكوافير دا ؟
__ لا
طيب عارفة محلو صح ؟ مشيتي معاها اول يوم ؟
__ ايوة
تمشي معاي ؟
__امممم طيب ، دقايق اللبس عبايتي !!
و بي حكم المسافة اللي كانت لحد الكوافير ، كانو بعد ساعتين بالضبط عند الكوافير !
السلام عليكم
(العاملة اللي ف الكوافير ) يا مرحب .. اتفضلي !
انحنا كان عندنا حجز حنة و فستان زفاف و مكياج و مفروض الليلة زواجها بي اسم امنيات عبد الله ! و جاتكم امبارح زي الوقت دا عشان تستلم الفستان !
__ دقيقه يا خالة خليكي معاي !
طيب !!
__ ايوا فعلاً و دافعه نص المبلغ ! و لا الليله و لا امبارح ما جات علينا ! و داك الفستان الكانت مختاراهو ( اشرت ليها على المنيكان ) !
يا بتي عليكي الله اتأكدي تاني ،، طيب عايني (فتحت التلفون و طلعت ليها صورتها ) عايني ركزي في الصورة دي كويس ! دي صورتها !
__ايوة شايفاها قبل كدا و عارفاها و اتكلمت معاها كذا مرة و جات معاها وحدة صفرا طويلة كدا اسمها سمر تقريبا ، بس والله يا خالة ما جات علينا و ست المحل ضربت ليها عشان تاكد الحجز ما ردت و زي ما قلت ليك داك ليهو فستانها !!
( مسكت راسها وقعدت في اقرب كرسي ) ..
زوبا : ( بي طنطنة ) كويس زاتو ارتحنا منها ! اقطع يدي لو ما كانت لعبة لعبوها هي و سمر ! (علت صوتها ) يلا يا مرة عمي خلينا نمشي عشان الزمن و البيت ملان ناس على الاقل يعرفو الحاصل ... قومي ! و اقوليك كلام يا مرة عمي ! ١٠٠٪؜ امنية دي هجت و طفشت !!

يوسف قال:

لو ما رفقة عوض ود خالي بكري لي ، يمكن كان جنيت ولا حصلت لي حاجة .. اول مرة في حياتي كان ابيت في مستشفي رغم صعوبة الوضع و المسشفى في غنى عن وصفها بس كمان ما كعبه بدون ذكر اسامي ..
__ يوسف
احكي
__ حنقعد كدا لحدت متين ؟
لمن ربنا يفرجا علينا
__ طيب مش اتكفلته بالعلاج ؟ يبقى دورك انتهي لحدت هنا !
عوض انت ما نصيح ؟ يعني التكلفة دي كل حاجة ؟ على الاقل اقابل اهلها واعتذر منهم و اشرح ليهم الحصل و اديهم حق الادوية الحتستخدما بعد كدا ! و القلق الدخلتو فيهم دا ما ساهل يا اخوي ! دي بت ناس برضو ! يعني اتخيل لا قدر الله حصل كدا مع عبير اختي ! احساسنا حيكون شنو ؟
__ طيب انا م معترض غير على قعدتك بالطريقه دي و م معروف حتفوق متين ولا يحصل ليها شنو ! كل القصد ان نخلي ليهم ارقامنا هنا و نمشي القسم نديهم معلومات بالحادث يمكن اهلها يكونو مبلغين !
اها حتى صورة م عندنا ليها و لا بنعرف اسمها ، معلومات الحادث براها ما بتكفي ، ماعندنا حل غير ننتظر لمن تفوق على الاقل نعرف اسمها منو و ساكنه وين و حسب كلام الدكتور دي م غيبوبه دي نتيجة حادث وفي اي لحظه حتفوق !
__اااخ نقول يا كريم
عوض انت ارجع البلد و القعده دي حارة عليك من بليل وانحنا قاعدين القعده دي ..
__عيب عليك ! يا زول القعدة دي للرجال الله !
عارف ! حاسس جسمي دا كلو مكسر مافي مفصل ما واجعني لمن ما قادر ارجع ضهري دا لي ورا !
دا ركوب راس منك بتعرج و جبهتك مفتوحه و انت معاند و قاعد قعده زي دي و بعدين م تنسى غالباً الحاجات دي بتظهر بعد مدة من الحادث ! اسمع افرد جسمك هنا انا حامشي اشوف لينا حاجة ناكلهااا ....
و دي آخر جملة انا سمعتها من عوض و تاني ما عارف الحصل شنو ! لقيت نفسي راقد في عنبر و شايف عوض دا جمب الباب حق العنبر طشاش طشاش !!!
بقيت بنادي فيهو بي صوت ما مسموع تقريبا الا مع كم محاوله حتى انتبه لي ! و جاني جاري ! مسكني !!
قالي :
بقيت كيف ؟
** انا كويس حمدلله ! حصل شنو ؟
__ حاجات بسيطه اثر الحادث بس و ال

حمدلله طمنوني انها بسيطه !
فاقت ؟
لا بس حالتها استقرت شديد و استغنو عن الاجهزة و حولوها لي غرفة عاديه لانه تمت 48 ساعه ! بس في تحسن ملحوظ حسب كلام الدكتور !
يعني انا نايم هنا من امبارح ؟
ايوة
( بيقوم ) لازم امشي اشوفها !
بتقدر تمشي طيب ؟
يلا يا عوض بس وديني ! الغرفه
على مهلتك طيب !
طيب ... هنا ؟
لالا اصبر ! قدام لسه
طيب .... اهااا هنا ولا وين !
يوسف ! الصبر الشفقه شنو !!! لمن نصل حتعرف!
** طيب طيب ..

لمن عوض قال لي :
هنا .. و وقفني جمب الباب و هو رجع لي ورا ! رغم لهفتي عشان ارتاح و اطمن بالي ، الا اني كنت حاسس رجلي تقيله شديد و انا واقف جمب الباب و الاكرة حقت الباب في يدي !
و قبل انا افتح الباب ، كان هو اتفتح من جوا !!

يتبع ...

#استككانة ...

#سحر_سمير ...

قناع_العروس
بقلم سحر سمير
-٥-

رجعت لي ورا خطوة مجرد م الباب اتفتح !
لقيت الممرضه طالعه منها ! ( ياها الاتعاملت معاي ) .. عاينت لي بي نظرة كدا م قدرت افسرها !
قلت ليها :
هي كويسه ؟
قالت لي :
__ الحمدلله حسب كلام الدكتور ، اتطمن
ادخل عادي صح ؟
__ ايوة بس ما تطول و ادخل براك !
حاضر !
لمن دخلته ! حسيت ان اعصابي باظت ! من المنظر اللي شفتو ، بعض اجزاء جسمها ملفوفه بي شاش و محاليل مركبه و جهاز على شمالها !
م قدرت اتحمل ابداً و احساسي بالذنب متسيطر علي ، انه انا السبب في كل الحاصل ليها دا !
م قدرت اقيف اكتر و طوالي طلعته !

اما ( في الجانب الاصعب ) :

في البيت اللي م كان بتقدر تفرز الزول المبسوط بالحزين فيهو منو ؟
علشان كدا بنقول الاثر الطيب يخوانا و السيرة الحسنة هي اللي بتفضل وراك بين الناس !
خالة فاطمة ما كانت في وضع يتحمل حرف زيادة و الناس م كانت مقصرة ابداً ، كل زول يلطش و يجدع ليها كلمة و ما كانت بتقدر تتكلم لانه عارفه ان الحق على بتها !
سمر جات البيت لي خالة فاطمة اللي كانت قاعده في كرسي جلوس و حوليها زوجة عمها و حريم من الجيران و زوبا واختها !! عرفت ان الوضع م مريح
و مشت على خالة فاطمة ، و قعدت على رجولها جمبها ، و قالت ليها :
خالتي فاطمة ازيك ؟
__ ( بي يدها ) زي م شايفه الحال ظاهر !
استغفرالله ياربي !
__سمر اسألك بالله ، اسألك بالله يا سمر ما عارفاها وين ؟ اسألك بالله ي شيخه ! انا عارفه انك صحبتها الوحيدة و اسراركم مع بعض ! اسألك بالله ما عارفه امنية مشت وين ؟ وريني و انت حأشاكلها بس وريني !
يا خالتي فاطمة اقسم بالله انا ما عارفه عنها حاجة زيكم واحد ولو عارفه اكيد حأوريكي و ما حأقبل اشوفك بالحال دا !
لا حول ولاقوة الا بالله الناس اكلت وشي يا بتي ، عمها اكل وشي و ولد عمها ما خلا مكان يا سمر م خلو مكان !
** طيب عاطف قال شنو و لا عمل شنوو ؟
ما اتكلم معاي انا ، كلامو كان مع عمها ! و اخواتها بهناك حيجنو ! ( اثناء كلامهم مع بعض ، جا عمها لي امنية داخل هو و ولدو ) !
قاليها : دي اخرة الدلع و قلة الادب ! و اخوي عبدالله لو كان عايش للحظة دي كان مات من حصرتو و الحمدلله انه ربنا شال امانتو قبل يجي اليوم دا ! ياما حذرتك و نبهتك ! و قلت ليك بتك دي ما بجي منها خير ، البخليها تجيني لحد عندي و فاتحة عيونها قدامي بدون اي احترام و تعلي في صوتها علي ! بخليها تشرد بالطريقه دي ! ما عملت احترام لا لي كبير لا صغير ، خُمي و صُري يا فاطمة !
و اداها ضهرو و بقى طالع !
قالت ليهو : دقيقه يا عبداللطيف ، مافي زول يمشي شرطة ولا يبلغ ولا يفتش عليها انا عارفة هي وين ! و انتهينا على كدا و من الليله ، انا ما عندي بنت اسمها #امنية ..و كفاية السمعتوني ليهو لحد اللحظة دي ! و مشت خلتهم !!

سمر بتحكي :

ما عارفة ليه ما كنت مستبعدة اليوم دا !
و عارفه انه حيجي يوم و حيحصل كدا رغم تنبيهاتي الكتيرة و نصايحي لي امنية بي انها تعقل و ان امها م عندها غيرها حالياً و اخواتها مع رجالهم كل وحدة في بلد !! بجد الحال اللي شفت خالتي فاطمة عليهو حرقني شديد ! و م كنت حاسة بالخوف على امنية ! لاني عارفاها من شهور و هي بتخطط لي شنو ! بس ما كان في داعي تتفذ خططها دي في اليوم دا تحديداً و تخت اهلها في الموافق دي !!
و بحكم ان بينهم كان دورين و الدور التحت حق ناس عم عبداللطيف ياهو عم امنية ! و الفوق كان حق ناس امنيه .. طلعت ورا خالتي فاطمة حصلتها ! و م قدرت اعمل حاجة غير اني اسمع اصوات تنهيداتها و بكاها و انا ما في يدي اي حاجة اسويها !!
رجليني ساقتني لي غرفة امنية اللي كنت مكندشة حرفياً بي جنون ! كنت بعاين في الشخابيط اللي في الحيطان و اخر شي لي خريطة العالم اللي كانت معلقه في واجهة السرير ! و السهم حق الرمي كان مجدوع تحديداً في "بريطانيا " !
كنت سامعه صوتها و ضحكتها اللي كانت بتستفزني شديد ! بالجد كنت بتأمل في تفاصيل كتيرة شديد كأني كنت بودع فيها و العبرة خنقتني شديد !
و ارجع اقول ليه يا امنيه عملتي كدااا ليييييه عملتي كدا ؟ يعني لو اتخليتي عن احلامك و طموحاتك حيحصل ليكي شنو ؟ ما كلنا عندنا احلام و اتخلينا عنها لانو كوننا جمب اهالينا وهم بخير دي براها بالدنيا !!
لمن حسيت اني اتكتمته و كان لازم اطلع من الغرفة دي ، و انا قايمة جريت طرف المخدة بالغلط ! و لمحته دي كتاب بي غلاف اسود !
جريتو و رجعت المخدة محلها ! لمن مسكتو لقيتها المذكرة حقتها ! راسمه عليها زي كركتير ! صورتها و هي ماسكة الكرة الارضيه بي يدها ! و جوا الكرة خريطه العالم !
م حسيت بي دموعي الا و هي على خدي !
فتحت اول صفحة و كان مكتوب عليها : " امنياتي ! و كان لي من اسمي نصيب "
بعدها سمعت صوت زووبا و هي بتنادي على خالتي فاطمة ، طوالي #حشرته_المذكرة جوا شنطتي و مسحت دموعي و طلعتا بسرعه ، لانه م كان ينفع تقع في يد زول غيري ، ...

يوسف قال :
بعد تعب و زن من عوض ، قبلته اني امشي

الشقه اغير ملابسي و ارجع ، و اتصرفته لي في تلفون ربيكا و انا راجع على المستشفى ، كـ تمشية حال لمن ربنا يسهل !
و لمن وصلت المستشفى و اطمنت عليها ! و مشيت على عوض و فكيت التلفون و ركبت الشريحه .. طوالي دخلت على مكالمة من استاذ محمد !
عوض قال لي : منو المتصل ، لمن وشك قلب كدا ؟
رديت طوالي :
يا هلا استاذ محمد
__ ايوا يا يوسف ! حبيت ابلغك ان تم رفدك من الشغل ، غياب من غير اعذار او سابق انذار ، بالاضافة لي اني حبيت اعرف عملت لي شنو في العربية ؟ ( لاحظو ان الكلام دا بعد تلاته يوم من الحادث ). !
هه غياب من غير اعذار يا صحبي واخوي و استاذي ! الله بسألك غياب من غير اعذار ! طيب معاك حق انا ما وصلت الشركة ولا قلت اسبابي بدايةً من الشغل اللي كان مفروض امشي انجزو و ما تم ! طيب يا استاذي ! انت جاك خبر الحادث وعارف الحصل معاي شنو ما كان ممكن تقدم خطاب بي ظروفي نيابه عني ع الاقل حق العيش والملح البينا !
__ يا يوسف دا شغل ! ما ليهو علاقة بالعلاقات الخارجية و ما تلخبط الامور ! حق العيش و الملح براهو !
براهو !! طيب الرفدني منو انت و لا استاذ كماال ؟؟ ولا اقوليك ! م محتاج لي اجابة لانه بحكم تعاملي معاكم انتو الاتنين بقدر اتوصل لي اجابة ! و اديك كلام يا محمد مع سقوط كلمة استاذ طبعاً و دا نسبة لي اني مرفود حالياً ! ان مافي انسان بقفل باب رزق زول ، و ما بقفل باب الا و ربنا بفتح باب اوسع منه ! يعني م تخاف علي انا ح اقعد ابكي !
و اما بالنسبة لي عربيتك اديني مهلة لمن بت الناس دي تتعافي و الدايرو بيحصل و اظن اديتك كلمة من يومين !؟
(عوض دخل في النص بي انفعال )
قال : دي شنو امور الحريم دي كلها حديدة شنو يعني بني ادم بيموت ، عربية هي و لا كفاية بلاااا ..
يوسف : عوض دقيقه زح من التلفون .. زح الله يرضى عليك خليني اتم كلامي !
عوض : يا زول ما بزح و انا عايزو يسمع الكلام دا كويس ! يا زول انحنا ما بغمض لينا جفن كان ما سدينا دينا و خلي امور الحريم دي يا زول و ارجل ! شنو يعني عربية ! حررم اجيبا و اكسر رقبتك فيها ! (اوووف شال نفسو و زح بعيد من يوسف )
يوسف مع رجعته للمكالمة لقى الخط فصل !! .. استغفرالله العظيم يارب !
يا عوووض ... عوووض ( اشر ليهو بي يدو تعال ) ..
تعال تعال .. اقعد !
__ اسمع هناا ! تصليح الزفت دي بكلف كم ؟
كدي روق انت كدا و هدي ! يا عوض نكون واقعين ! الليله انت لو اديت زول حاجة تعز عليك يقضي بيها حوجتو ! و جاك خبر ان فلان دا خرب ليك حاجتك الاديتهت ليهو دي ! قولك حيكون شنو !
__ (خبط يدو في الحيطة ) حرررم ما اغرم لي راجل زي ! يااا زول دا وسخ دنيا ما بدوم ! شنو يعني خربت ولا اتكسرت و لا اتسجمت ! الدنيا انطربقت يعني ؟؟ رد لي ! الدنيا اتطربقت !
لا .. كدي انت روق اسي مافي داعي للانفعال ! __ __يا زول انحنا رجال يا زول ، الكلام دا عيب ، ياخي الفي محلو يجيك عديل يشوفك و يتطمن عليك و يشوف حوجتك شنوو، مش يضغطك و انت في وضع زي دا ! دي ما امور رجال والله ..
طيب روق .. في النهاية دا حق من حقوقو !
لا و كمان داقي ليك شنو انت اترفدت من الشغل (بيحاكيهو) اها و بعد يعني ! خيييير حنجوع مثلاً !
** هههه والله يا عوض ضحكتني و انا مالي نفس اضحك ، الله يديك العافيه يا اخوي !
ياخ كدي بالله رفع لي ضغطي اقسم بالله ..
اثناء كلامنا دا انا و عوض .. جاتنا ممرضه غير زولتنا ديك ! بتقول لي : استاذ يوسف صح ؟
من غير ما اشعر وقفت على حيلي ! قلت ليها : ايوة !
قالت لي : مريضة في غرفة 815 ! تبعك صح ؟
قلت ليها : ايوة ! خير ؟
قالت لي : اتفضل معاي ..
انا هنا بقيت ما فاهم اي حاجة ! و بعاين لي عوض اللي كان بيحاول يواسيني بي نظراتو !
لمن قالي ، يا زول .. ما نقول غير ما يصيبنا الا ما كتب الله لنا ! و انا لله و انا اليه راجعون !
وقفت عاينت ليهو !!! مالك يا عوض ؟
قالي .. انا بهيأك بس يعني !

يتبع ...

*في الحلقات الجاية*

اسمعي هنا :
امنية كان طارت السماء الاحمر ! عارفه !!
السماء الاحمر ! بجيبها يعني بجيبهااا و كسر رقبة حأتزوجها ! ولو فاكرة ان الهروب هيحلها مني ، تعيش و تشوف عاطف على حق !
وصلي ليها كلامي دا و قولي ليها الذوق حلوووو !

#استككانة🖤....

ناس كتار بيكونو على حق في نقاشات بيخسروه !
‏بيخسرو بالأسلوب !
‏الأسلوب هو الحاجة الممكن تقلب كفّة اي نقاش !
‏حاول دايماً انو يكون لصالحك ، ماعليك .

#سحر_سمير

#قناع_العروس
بقلم سحر سمير
-٦-

كلام عوض وترني اكتر ! على اساس بهيأني لي اي خبر شين ! لكن هو عفسني فوق تحت !
لمن وصلنا الغرفه ! عوض وقف جمب الباب ، و كانو في اتنين لابسين لابكوت واحد شاب في عمري كدا و التاني راجل اربعيني كدا و واضح انه كانو بتناقشو !
و الممرضة دخلت شالت الاغراض اللي كانو بستخدموها !
هنا انا شبه ارتحت انها لسه عايشه ! بس وترتني فكرة انه ممكن تكون حالتها ساءت !
فا حاولت اقرب عليهم ! لقيتو بحاول يلاغيها و بيحول صوابعو يمين يسار ! مقابل عيونها ..
التاني قاليهو : في استجابة !
رد ليهو : ضعيفه لكن واضح انها زولة قوية و متمسكة بالحياة لانها بتستجيب بي شكل كويس ! و بقى يدون زي ملاحظات !
بعد خلصو .. جو طالعين و قال للممرضه ! ليه ما وديتهو المكتب .. و طوالي قالي تعال اتفضل معاي !! مشيت وراهو و خليت عوض واقف قبلو ... لمن دخلنا و ابتدأ يتكلم معاي بي مقدمة اصلاً انا م مستوعبها ! بالاصح ما فاهمها لانه كلها مصطلحات طبية و اغلب كلامو انجليزي و انا حدي في الانجليزي ( Yes,No ,Ok) ! و لمن وضح كلامو ،
قالي : المريضة فاقت و فتحت كذا مرة بس بترجع تغمض و دي حاجات عاديه لانه الجسم كمية علاجات جديده عليهو ، و شوية قوية دا غير العمليه ، ومحتاجة زول يلاغيها عشان تشغل خلايا المخ ! و بالنسبة للجروح الحمدلله ماشه في تحسن !
طيب الحمدلله ، يعني كمان كم يوم و بنقدر نوديها لي اهلها ! صح !
__ م للدرجة دي ! براك شايف الحاله ، و كونها عايشه لحد اللحظة دي ، دا براهو فضل من ربنا ! بس .....
( بي اهتمام ) بس شنو يا دكتور ؟
__ احتمال كبير تكون في مشكله في الذاكرة !
لالا ما تقول كدا ! يارب ! دي اكيدة ! ولا في شك في الموضوع يا دكتور عليك الله قول كلام غير دا !
__ما اكيدة لانه لسه ما اتكلمت معانا ، بس زي ما وريتك الضربة كانت قوية على الدماغ و دا الواضح لي ! و الفحوصات البدنيه العصبية عشان نشوف ردة الفعل يعني الفحوصات الفسيلوجية للمخ والحهاز العصبي و كلها مسألة وقت ، ومتوقع انها تتكلم في اي لحظة ! عشان كدا محتاجك تلاغيها ! لانو في فحوصات تانيه و دي لازم تكون بلغت نسبة كويسه من الصحة عشان نقدر نتاكد ، و عامتاً عايز اطمنك ان لو دا حصل فا حيكون لمدة مؤقته بس !! و العلاج في المرحلة ديك بكون نفسي اكتر !
يا الله يا كريم ! يا دكتور .. يشهد الله انا تعبان ضميري ما مريحني تعبان من الاحساس بالذنب ، امآلي كلها في انها تفوق بس تنطق جملتين ! اسمها و درب اهلها ما معقول نجي في دوامة فقدان ذاكرة لا في الحُسبان ولا على البال ! الموضوع صعب يا دكتور صعب شديد !
__ اي علاج في الدنيا دي محتاج صبر ! مافي شي بيحصل بين يوم و ليله ، وانت م بتتكلم عن مرض ! انت بتتكلم عن حادث ، و عشان تشوف حكمة ربك انت بقيت بخير و اضرارك حبة ! عشان تقيف فيها و تراعيها ! و دا المعني الحقيقي لي ان ربنا بيوقف الناس لي بعضها ، و من ناحية اختبار ربنا ليك ! في النهاية انت بني ادم ما بينفع تعترض على حكمة ربك ! دي ما ختاك في الاختبار ، قادر يطلعك منو !
ونعم بالله ، انا م معترض انا بس داير اهلها يعرفو يا دكتور و انحنا بعيدين عن مكان الحادث و الله اعلم وقتها كانت جاية من وين ولا ساكنة وين و المصيبه الاكبر لو بقت من الولايات التانيه و جات هنا للجامعة ! (ااااخ ) يارب !
__ قول يارب بس و كله بي امر الله ..
ونعم بالله ، اسف يا دكتور اخدت من وقتك و شكراً لاهتمامك ...
الشكر لله ...

طلعت من عند الدكتور و شايل من الهم كيمان ، كيمان !!! مع طلعتي كدا .. لقيت عوض جاريني من يدي !! قال لي :
نعلو بقت عميانه ؟
عوض انت طوالي كدا ..
__لا إله الا الله ، لكن والله العمى اخير من الموت كان اسي بقت في رقبتنا ..
عووووض ! ياخ انت داير تواسيني و لا تغطس حجري ياخي اتفائل عليك الله !
__ ياخوي انت ما شايف بت الناس عامله كيف ! دخلت ليها ما ظاهر فيها اي شي !!
انت ما تجي تخنقني و تريحني اخير من اموت بي سقطة قلبيه بي سببك ! ياخ انا براي قلبي في رجلي عليك الله لو ما عندك كلمة حلوة اسكت ساي !
__ اها مش دا خشمي مسكتو علي ( خت يدو في خشمو ) !
لكن ... اوفففففف ! احتمال ما تتذكر اي حاجة !
__ (بي خلعة ) اتشفررررت !؟ ويبيوووووووه اخير العمى !!
وحاة الله غلطان انا البحكي ليك ( مشيت منه ) !
__دقيقه اقيف فهمني ! قاليك شنو الدكتور اتشفرت عديل !
....( ما رديت عليهو ) !

كنت بفكر في كلام الدكتور ! و كيف ااشغلها !!
بدايتاً من الليله ديك ! ، قررت اني اكون موجود معاها بي استمرار ! الساعه 10:00 بليل .. مشيت محل الاستقبال ! لاقيت نفس الممرضه الاتعاملت معاي قبل كدا ..شلته منها مُصحف ، و مشيت ..
بعدها كانت اول مرة اخش ليها الغرفه ! يعني مهما حكيت ليكم عن صعوبة الاحساس ما حتقدرو تعرفو انا حاسي بي شنو ! ما كنت قادر ارفع عيني و اعاين ليها .. دخلت و خليت الباب فاتح نص ..
و ما كان في كرسي ! كان في

كنبه و كانت بعيده من السرير ! فعشان اكون قريب ليها و صوتي مسموع ! ما كان عندي حل ، غير اني اقعد على الدرج حق العلاجات ( اقرب للكومدينة ) ..
دخلت الحاجات الكانت بي فوق في اول درج و جريتو و بقيت على يمينها ، مع حركتي سمعت صوت (تنهيده قوية كدا زي الزول النفسو كان مكتوم و اسي اتنفس ) ! تلقائياً لقيت نفسي استجمعت قوتي و اول مرة كنت اعاين ليها !
هم بقولى ان قلب الراجل قوي و بيتحمل شديد و كتير مقارنة بي المرأة ! بالجد الحاجة دي ما صح انحنا في النهاية بشر و نفس الاحساس اللي هنا ، هناك بس يمكن بنختلف في اخفاء الاحساس دا !!
اول حاجة قلتها ليها و انا بعاين ليها و هي مغمضة : أنا أسف .. اسف ، اسف ،اسف لو الاسف بكفي ، اسف لو الاسف بيرجع حاجة ، اسف لو الاسف بيصلح حاجة ، اسف لو الاسف حيقومك بالسلامة ، اسف لو الاسف بشيل منك وجعك الاسي و اللي كان بي سببي ، اسف لو الاسف بيطمن اهلك عليكِ ، بالجد اسف اسف اسف !
صدقيني انا متألم شديد يمكن اكتر منك ، لانو الم الضمير اقوى من الم الجسد ، انا انسان مؤمن رغم ذلك اتهزيت و ضعفت ! اتمنيت لو كنا اتبادلنا الادوار ! انتِ تضربيني بالعربيه و انا الاكون مكانك ، و انا الاسامحك ! مش بقولو الراجل بيتحمل الوجع ! انا بتحمل وجع العافية لكن ما بتحمل وجع الضمير !
و كمان صدقيني ! انا ما قصدت والله بس انتي كنتي بتحاولي تقطعي و انا الداهمتك يمكن لو خليت البوكس دخل فيني انا ، كان ممكن انتي تكوني بخير !
طيب ، رايك شنو اسميكي " أمل "
يعني ! لانو عندي فيك أمل انك حتتعافي و ما حتخذليني و ما حتخذلي اهلك و لا حتخذلي الناس البحبوك ! ولا حتى حتخذلي ...امممم حبيبك ! او خطيبك !! ما عارف يعني اذا عندك شريك !
المهم يا أمل ، من الليله ان شاءالله ما حتكوني براكي بين الاجهزة دي ولا في الغرفه دي ! انا حأكون معاك و كل يوم نقرا قرآن عشان ربنا يعافيكي بسرعه ! رايك شنو ؟ اكيد موافقه صح ؟ يلا انا كمان مواقف .. و نقول بسم الله الرحمن الرحيم .....
حسيت بي حركة جمب الباب .. اتلفته على الباب !! لقيتها الممرضه زولتنا ... حسيتا واقفه من بدري ! نزلت من الدرج و رجعت لي ورا ( و مسحت راسي بي يدي ) ، قلت ليها :
انا بطلع تعالي اذا حتعملي ليها حاجة !
__ لالا خليك انا كنت مارة على العنابر بشوف المحاليل عشان ابدل !
اهاا تمام ..!!!
__ اجيب ليك كرسي افضل ؟
( بي اهتمام ) والله ياخ ياريت لانه دي شوية القعده فيها م مريحه !
__ طيب ( و بقت ماشه )
ياااا .... ااا ( اتلفتت علي ) اا دقيقه !
__ اسمي ملاذ !
طيب يا ملاذ انتي وريني وين وانا بجيبو عشان ما تشيليهو انتي !
__ لالا خليك م حاجة تقيله - دقيقتين وبجيبو ..
اها اوك ..شكراً!
فعلاً دقايق و لقيتا جابتو ، حصلتهت عند الباب و شلتو منها ..جات لحد عندها عاينت ليها و عاينت لي ملف مختوت ع الدرج التاني ! قالت لي :
__ حتكون صاحي لحد متين ؟
صاحي طوالي
__ صاحي طوالي ! كيف الكلام دا !!
مافي حاجة تخليني انوم ، المهم كنتي عايزة حاجة ؟
— ايوة ! في علاج الساعه 3:15 و انا تعبته و محتاجة ارتاح في الكم ساعه ديل لو ينفع تخبط على غرفة الاستراحه بس اللي اخر الممر على الشمال !
جداااً ، مافي غيرها مريض عندو علاج في الزمن دا ؟
__ لا مافي كلهم حدهم الساعه 12 في الدور دا ، و زميلتي مسؤلة عنهم !
تمام ما عندك مشكلة ، و اطلبك طلب خاص رغم انه م صح مني انت عارف ، بس داير اقوليك اهتمي بيها زياده الله يرضى عليكي و الدكتور قال نلاغيها ، وحاولي شاغليها طول فترة تواجدك في غرفتها ! ممكن ؟
__ انت انسان غريب شديد ! معظم الحالات الاستلمناها من الحوادث ما حصل لاقاني انسان زيك ، يعني كل البعملوه ، بجدعو ليهم مصاريف العلاج و بمشو ! دا غير البهربو !
في زي و في احسن مني و الاحسن مني في احسن منو ، الحياة درجات و نفس الشي الناس كمان ، فا كل انسان عندو ظروفو و مسؤلياته و م تعرفي الحاصل شنو ، اضافه لي كدا امل وضعها مختلف و ...(قاطعتني ) !!
__امل !!!! جميل الاسم الختيتو ليها !
اممممم
__ طيب انا بمشي ، اخليك تقرا و ربنا يرفع عنها ان شاءالله !
اللهم امين تسلمي ....
ملاذ طلعت ... و صلحت الكرسي و قعدته فيهو !
عاينت ليها و قلت ليها : ها نبدأ ؟
يلا بسم الله الرحمن الرحيم .....الخ

(في جانب سمر )

اللي كانت بتبكي ... جاها اتصال من رقم غريب !
الووو
__ سمررر ...سمر .. سمرر !!
منو معاي ؟
__ازيك يا حلوة ؟
منو معاي قلت ليك ؟
__ منو معاكي ! طيب يا ستي انا عاطف ! عاطف خطيب امنية صحبتك اللي خططتو للهرب سوا انتي و هي ! بس الفرق انك جبانه !
عاطف ! ازبط كلامك و اتكلم معاي بي ادب !
__اتكلم بي ادب ! طيب يا استاذة اسفين
ما داير كلام كتير ، هو سؤال و عايز اجابتو ! و انتي عارفاهو كويس عشان كدا جاوبي و اياكي تقول لي ما عارفه !!
و فعلاً ما عارفه امنيه وين تصدق او لا دي حاجة ترجع ليك و كان عارفه زاتو ما ب