ل في طياته قصة ، البيت دا كان معروف افراد أسرته ، نفر ، نفر .. يعني ! تتعدد الاسباب بالنسبه لي بس بيني و بينكم انا عارفة السبب ! ليه انحنا مشهورين في حلتنا !
ما عشان انحنا اسرة قديمة في الحلة دي ، ولا عشان وضعنا الاجتماعي رهيب و لا الحاجات الممكن توصلنا للنقطة دي !!
للأمانه (انا) السبب ، و دا حتستكشفوه براكم معانا لي قدام !
و في الدور التاني اللي كان مختلف شوية من الدور التحت ، كان ظاهر فيهو الاهتمام والمثاليه في الفرش و كل شي بيعكس روح البيت بس كمان خيالكم م يروح بعيد لانه ف النهايه مستوانا متسوط و يمكن اقل بي خطوتين تلاته ...... والتفاصيل كفيلة بالباقي !!
(وانا بغير ملابسي ، باب غرفتي اتفتخ ، و كانت امي )
__ امنية !!
تعالي خشي ! .. الله ! حاتقيفي كدا يعني يا امي !
__ وانتي من متين بيهمك امري ! شوفي تلفونك انا ضربت ليك كم مرة !!
تلفوني كان صامت و كنت ملتهية بالونسة مع سمر .. و ليه ما بيهمني امرك يا امي ! في شنو ؟، عملت شنو غلط المرة دي ؟
— كمان بتسألي ! كلامك مع عمك !دا ما غلط ؟
اهااا عمي ، لحق يجي يشكي ليكي ! ما تعبو ! كل يوم والتاني جاينك يشتكو بتك عملت و بتك سوت و بتك فعلت و بتك تركت ! وين الغلط وريني انا ما شحدت منهم !
__ للمرة الالف ! احترمي عمك يا امنية م تنسى انه في مقام ابوكي و عايشين تحت ظله ! ما ممكن معاكي انا تعبته ، عمايلك الفاتت دي كلها كوم و العملتيهو مع عمك دا كوم تاني ! اسمعي هنا ،، تنزلي تعتذري ليهووو و تنسي الفي راسك دا نهائي فاهمه ولا لا !!
امي ! انتي لحد متين حتفضلي عايشه كدا ؟ متين حتاخدي قرار يا امي ؟ حياتك كلها ماشة حسب ترتيب ابوي ليها في حياتو و حتى بعد مماتو ! لحد متين حنفضل تحت رحمة عمي ! كل البعملو لينا انه يجدع لينا كم مليم كل شهر و شكراً على كدا !
شوفي يا امي ااي انا قليلة ادب زي ما بقولو عني الناس ، و زي ما عمي تحديداً بيقول عني كدا ! و انا ما حأمشي و اعتذر ليهو لاني ما عملت حاجة غلط ! كل العملتو طالبتا بي نصيبي انا ! واخواني كان ما عايزين حقهم هم احرار !
__ اليسمعك بتقولي كدا يقول عمك معذبنا ولا حابسنا !! اسمعي هنا ! انا سكته ليكي كتير و انتي اتماديتي ، لا عمك لا اولاده ما قصرو معانا في حاجة عشان تطالبي بي حقك !
للاسف يا امي انا طموحي اكبر من مجرد اني اقبل اعيش العيشه دي يا امي ، و انتو كلكم ما فاهمني ! دا م زمن بتاع قعاد و فرض و تقبل لي حاجة هي ما مفروضه علينا و بي يدنا نغيرها ، دا زمن قروش يا امي ، قروووش و بس ! عندك قروش تبقى فوق ما عندك قروش تبقى تحت ! و انا بصراحة مكاني فووووق و فوق شديد كمان .
__ يا بت انتي غبية ! فتحي عقلك دا يا امنية ! القروش ما كل حاجة ! القروش ما بتجيب ليك حب الناس ما بتجيب ليكي اهل ! يا امنية انا وصلت الحد منك و تعبته و كل مرة اقول حتكبري و تعقلي و انتي ماشه العكس كل ما تكبري كل ما بتبقى اصعب اكتر ! حني علي يا بتي وشي بقى قدر السمسمة من كلام اهلك والناس عليكي !
خليني بي راسي طيب ، عشان ما اتعبك لاني ما دايرة ليكي التعب يا امي ! انا دايرة حقي القانوني ما طلبت حاجة فوق مقدرتهم وهما عندهم الحمدلله ، دايرة حقي الخلاهو لي ابوي ، دايرة اسافر اطفش برا البلد دي انا يا امي !
__ انتي ما طبيعيه ! بس وريني بي ياتو منطق عايزة المصنع دا يتفرتق و يتباع عشان يدوك حقك انتي ! البيت دا كلو عايش من المصنع دا ، انتي غبية ؟ وبعدين سفر شنو التسافريهو وانتي بت براك !! اعقلي واركزي وختي عقلك دا في نص راسك ، وقدامك خيارين يا امنية ، يا تنزلي لي عمك و تعتذري ليهو يا اما الخيار التاني و انتي عارفاهو كوووووويس ! ( رجعت لي ورا وقفلت باب غرفتي)
** امي ... دقيقه ..امي قصدك شنو انتي ؟؟؟

#باك
#للأستكانة 💕
مبارك عليكم الشهر و ربنا يحقق ليكم همس الدواخل و جهر الخواطر يارب ..

#سحر_سمير ..

على كذا ؟
لا العفو انا قدمت زيارة مرتين و انتو رفضتوها و انا مضطر انزل اجازة الوالدة مريضه ، و ما اعتقد في سبب اقوى من كدا ! حتى لو اتضطريت اني ادق خروج نهائي !
اوكيه ! كم ؟
من شهر لي ثلاثه شهور !
مو كثير ؟
اذا الوالده بقت بخير حرجع قبل المدة دي حتى لو بعد اسبوع !
ما عندنا استعداد نخسرك ( وقع على الطلب ) اتفضل و ربنا يكتب الشفاء !
شكراً .. استأذن
اتفضل !

#في_جانب_تاني

ههههه ، ههه
وااي لا خلاص م تزعلي انا اسفه ههه
اسفه و لسه بتضحكي ، عواليق خلاص ، زحي مني امشي اقعدي في الكرسي الورا دااك !
حيييه انا و اخليك لي منو افوتك وين انااا بالجد خلاص معليش المرة دي جاده ما حضحك !
همممممم
مالك ؟
شايله هم !
ابوكي برضو ؟
اكيد يا سلوان حيكون شنو غيرو !
طيب مش كان وافق تاني شنو ؟
كلو ضغط من امي !و انا لازم اجيب تقدير حلو شديد عشان افرحها يا سلوى !
ان شاءالله حنقرأ و حننجح ما تشيلي هم ، و طالما امك اتكلمت معاهو خلاص و كدا كدا انحنا بعيدين من البلد يعني مافي حاجة حتعكر عليكي !
المشكله في اهلو الفقر ديل ! يتفق مع امي انه حيخليني اتم الجامعه و يجي يمرق بي جاي تلاقيهو سجم الرماد و الباقين ديك بغيرو ليهو رايو كلو كلو ! بس ما نفسي في حاجة غير اتم قرايتي دي !
انا ما بعرف لكن مفترض الزمن اتغير و جيلنا ما زي جيلهم يا رُقية ، حتى القُرى اتمدنت اسي و التعليم بقى في كل مكان !
كان ما قابلتيهم و شفتيهم و ساكنه معانا يا سلوى كان قلته عادي و ببلع كلامك دا !لكن براك شفتيهم ديل اتجاه واحد و مخهم دا والحجر واحد !
للاسف بالجد الله يعينك !
يارب يارب ... البص دا مالو لف بينا كتير كدا !
** خش من وين هو زاتو انا مع الكلام معاك لمن سرحته ! اقيف ... اقيف هنا يا ... اقيف اقيف !!!!

#باك_للأستككانة👏🏽🔥

#سحر_سمير 🔗 #فاطمة_قسم_الله