قصائد حسينية مكتوبه

عن لسان رقيه بنت الحسين (ع)

مرّت أيام ... ما شفت احسين الغالي
مرّت أيام ... خـايـف گـلبـي ودلّالـي
بــس لا مـذبــوح - بــس لا مـذبــوح
——————————————
مـرّت أيـام وحـيــره ما شـفـت أحـسيـن
لشوفت وجه أبن الزهره مشتاگه العين
مشتاگـه لعطـر انفاسـه وشبـگ الچفين
بـنيتـه وما أحمل فـرّگـه عنه أسئـل وين

گلبي المشتاگ ... يـسـأل ويـريـد أعـلومـه
گلبي المشتاگ ... بس يشتم عطر أهدومه
يهده من النوح - بـس لا مذبـوح
——————————————
عيوني النـوم أمفارگته هـاي الچـم يوم
بغير إيده وحضنه الدافي ما يحله النوم
ما فـارگ چـفي أچـفـوفـه لو راد إيـگـوم
بخدي أنطبعـة بوساته حسين المضلوم

ترجع ياريت ... بـويـه حسين ويـا ريـتـك
ترجع ياريت ... وأمسح دمعي بخاچيتك
وتـــرد الــــروح - بـس لا مـذبـوح
——————————————
سـافــر عـنّـي وخـلانـي للـهـم والآه
يرجـع ما أدري ليمتـه يشعـب فرگـاه
آخر لحضـه آنـه بـحضنه نـوّمني أوياه
شابگني وشفت أدموعه تجري بعيناه

يدري من ايغيب ... تطلع روحي من اغيابه
يدري من ايغيب ... مـا تـرحـمـني السـلّابـه
لو عـنّـي أيـروح ... بــس لا مـذبـوح
——————————————
محتاجه اليوم أچفوفه تمسح عالهام
مثل المن چانت تمسح روس الأيتـام
يتمني احسين أغيابه چـن يومه بعام
ما گـال أرقـيـه الضلت چا ويـن أتنـام

طفله وشتريد ... بس والدها يرد ليها
طفله وشتريد ... يفتح حبـل البيديها
متروسه أجروح - بـس لا مـذبـوح
——————————————
يالغايب چا يـمّتـه أتـحـن وتـرد للدار
وأحچيلك عن أحوالي وبيّـه شما صار
عن ترّچياتي أحچيلك وعن حرگ النار
وعن أجدامي المچويّـه بالرمـل الحار

غايب والناس ... سـلبـو مـنّـي التـرچـيّـه
غايب والناس ... ترضه أبسوط أتطگ بيّه
ودمعي المسفوح ـ بــس لا مـذبـــوح
——————————————
الـشـاعـر
سـيـد عــلاء الـحـيّـدري
٢٠٢٠/٨/٢٨
٨ محرم ١٤٤٢

الناشر عباس التميمي
https://telegram.me/aabas78
قصائد لكل ايام محرم اشترك بالقناة👆👆

كروب قصائد والحان منبريه اشترك👇👇
https://tttttt.me/joinchat/AAAAAD7f0FNmkN2JjlNIBw