سریوەی ئاڵۆت/Alot

بۆمبارانی شاری بانە
پازده ی جۆزەردانی ساڵی شەست وسێ یادەوەری ڕۆژێکی ڕەش و خوێناوییە لە مێژووی ئەم شارە دا ، خوا لێخۆشبوو مەلا مەحەممەدی سەلیمی کتێبێکی بە ناوی بانە هێرۆشیمای کوردوستان نووسیوە ، منیش ئەو ساڵەی هەوەڵی دەبیرستان بووم ، ئەو ڕۆژە بڕیار بوو ئیمتیحانی فیزیکمان هە بێ لە نێزیک بە کاتژمێری دەی سەر لە بەیانی دەستی ڕەشی دیکتاتۆرێکی مل هوڕی مێژوو بە خوێنی پۆلێک خەڵکی لێقەوماوی شاری بانە سوور بوو ، دیارە کە قەڵاچۆ کردنی ئەم شارە بەر وبوومی شەڕی هەشت ساڵەی ئێران و عێراق بوو ؛ بە داخەوە ڕژێمی بە عسی لە شارە کورد نشینەکان زۆر ترین جینایاتی دەخوڵقاند ، ئەوەش دەریدەخست ئەم ڕژیمە چەندە دژ بە کوردستان قین لە دڵە ، دیارە بۆ شارێکی وەک بانە بۆو سەر دەمە شەشسەد کەس یەکجار زۆر بوو ، من بۆخۆم پاش پێنج خولەک چوومە پارکی شار کە دەیان کەللەسەر و لاق ودەستی پەڕیوم بینی بە دەیان مەیتم لە پەنای یەکدا بینی ، بەڕەحمەت بێ مینە بەگی ئاڵۆت لە بەردەم دووکانەکەی خۆی دا جامەدانەکەی خۆیان بە سەر دەم وچاوی دادابوو کە دیارە بۆ من کە زۆربەی جاران لە دووکانەکەی لە لای دادەنیشتم خەمێکی گەورەبوو ، ڕووداوێکی دڵ تەزێنی دیکەم کە دیت تەرمی حەوت کەسی بنە ماڵەی دەروێش عەبڵای زەر واو لە مزگەوتی خدری بوون کە دیارە تەواو سووتابوون و لێک نەدەکرانه وە ، هەروەها لە هەمان مزگەوت تەرمی کوڕێکی لێبوو کە باوکی ئەو کوڕە تەمەنی هەشتا ساڵێک دەبوو تەنیا ئەو کوڕەشی بوو ، گێڕانەوەی ئەم کارەسەتە ئەگەر هیچ قازانجێکی نەبێ خۆ ئەو فایدەی هەیە کە دەریدەخا شەڕ تەنیا ماڵ وێرانی و کاول کاری دێنێ و خەڵک تێدادەچێ ، دەبا نەسڵی ئێستا بزانن کە ئاشتی و‌ئاسایش نیعمەتێکی گەورەیەو ئەو کەسانەی شەڕەنگێزی پیشەیانە نابێ ڕێگەو مەجالیان پێ بدرێ کە شەڕێکی ماڵ وێران کەر هەڵاییسێنن ، پێغەمبەری مەزن دەفەرموێ:
نِعمتانِ لا یَنفِدانِ ، أَلصِّحَّهُ وَال٘اَمانَهُ
پازدەی خوردادی شەست و سێ پەڵەییکی ڕەشە بە نێو چاوانی دێکتاتۆرو مل هوڕان وڕێبەران و کاربەدەستانی ڕژێمی بەعسی لە نێو چوو .
هەروەها بیرەوەری لە خوێن سوور بوون و شین گێڕی و ڕەش پۆشی شارە خنجیلان و هەڵکەوتووەکەی بانە لە داوێنی چیای جوان و دڵکەشی ئاربەبایە.
@S_Alot

1.23K viewsقادرخدرزادە, edited 16:42