‍ #شعر_گیلکی_عاشورایی

شاعر:
#سیداسحق_فاطمی

چی روزیَه کربلا غوغا وَکِت
عینَه خودی آخورِ دنیا وَکِت

یزید اوجِه شال و کُلا هاکُردِه
دشمنی رَ چارُقِ پا داکُردِه

صف بَکِشَن آبِ دَمِ بِگیتِن
رو در رو آفتابِ دَمِ بِگیتِن

ستاره شانِ بالِ با تیر بَزَن
یه نوجوانِ صد تَه شمشیر بَزَن

غلغله برپا وَکِتِه کربلا
خونِ جی دریا وَکِتِه کربلا

قاسم و اکبر اُوجُه جولان هَدَن
مردانه جنگ هاکُردِه تا جان هدن

تَش وارِنِه تَشنای آبِن هَمه
وینِه عمو چِتا بِتابِه غَمِه

رآ دَکَنِه روخانِه آبهِ دانی
برأر زایِه بُرمِه جوابه دانی

نیآرِسِه یکی وِرِه دیم هِیرِه
پس وَنِه سقای دَمِه کی بِیرِه

پَر بَکِشَه کمانِه جی تیرِشان
آبه دِلِه وِپیتِه تَشنا زِوان

مَشکِه بَزَن وی دُوشِه جی بینگَتِن
گاز هَکِشَه مَشکِه زِمی بینگَتِن

عَمٓه جوابِه چی بُوگو نِدانِه
کربلا سقا کی بُوبو ندانه

قیامته اُوجِه علمدار بَکِت
آب اُوجِه از خجِالِتی آب وَکِت

ماهِه کَشِه ستاره سوسو کانِه
خُوش دَنِه وی دیم و پَرِ بو کانه

رو هاکانِه دشمنه ای کافران
هین وَچِه جان دَعدَرِه تَشنا زِوان

یه شیرخواره مرد جنگی نیَه
آبِه دَمِ بِیری زرنگی نیَه

کافرِه ری روزِ برو بیایِه
یه دل سیا همیشه رو سیایه

تیرِ بَنَه کمانِه کَـش بیأردِه
زُلالِه آفتابِ ری تَش بیأردِه

هَنتَه وَچِه قُورتِ کَشِه وَر هِیتِه
دنیا وِری رَختِ عزا سر هِیتِه

پییِر نیاکُردِه هیتا بُسوتِه
خدا دانِه رُبابِ چی بوگوتِه

دل خَنِه طاقت بیأری بیأردِه
حُکمِه خدایه تابِنِه وی دردِه

نمازه خا بوُخانِسِه راه درِه
خدایه خا دُوخانِسِه راه درِه

شمشیرِه دَس هگیتِه میدان دَکِت
دشمنِه غم بِگیتِه حیران وَکِت

اینجوری سردارِه حریف کِمینِه
هون پسرِ امیرِ مومنینه

نشانِ از خوشتی پییر داره هون
سپاه مسلمینِ سرداره هون

تَش وارِنِه تَشنایِ تَشنا ولی
حتمنی مولا بوگوتِه یا علی

وی دورِه خون بِگیتِه کورِ گَردِه
چِتا دَرِه بِتابِه کوهه درده

وی ذوالجنایه دَستِ جی دَر کِشَن
زهر جفایه هم همه سَر کِشَن

نیزه خُوشِه کاره هاکُردِه اُوجِه
ماهِه دانی دارِه چاکُردِه اُوجِه

گب زَ دَرِه کلّه اُوجِه نیزه سر
خاخُر تی جان می سه ساله دِتَر

یه غافله بیدونِ ساربانه
اسیر دستِ قومِ کافرانِه

تَش دَکِتِه خیمه دَرِه بُسوجِه
عَمّه دلِ زخمه ِ چِتا بُدوجِه

چِندی اِسیری بَکِشِه راه دِلِه
دل بَزَه دریا آخو دریا دِلِه

شیرِ زِنِه خطبه بینا بِگیتِه
دنیا دِلِه خطبه صدا وِپیتِه

کلّه شُونِه رایه دِلِه گَب هَنِه
راهِبِ نصرانیَه مکتب دَنِه

وی یاده هَرنی وِری منظور بونِه
وی ذِکرِه همرَه کارِشان جور بونِه

#شعر_و_خوانش

#سیداسحق_فاطمی_تنکابن
محرم ۱۳۹۷

کانال اشکور نگین ایران❤️

@yeelagh