278. Саид ибн Мусаййиб айтадилар: "Агар шайтон нимадан ноумид бўлса, шунда аёллар томондан келади". Ибн Мусаййиб саксон тўрт ёшларида ҳам: "Менинг наздимда аёллардан кўра хавфли нарса йўқ", дердилар.

279. Ҳасан Басрий ва Умар ибн Абдулазиздек хавфлари кучли зотларни кўрмадим. Гўёки дўзах фақат икковлари учун яратилгандек эди.

Язид ибн Ҳавшаб роҳимаҳуллоҳ

280. Мени Ўзингга шу даражада яқин қилибсанки, ҳатто Сени мен деб ўйлабман.

Ҳаллож

281. Обид Аллоҳдан хавф қилганидан ибодат этса, ориф Унга шавқдан ибодат қилади.

Абу Яъқуб Наҳржурий роҳимаҳуллоҳ
"Рисалатул қушайрийя" китобидан

282. Дунёни севган уч нарсадан қутилмайди:
1. Давомли ғам-ташвиш.
2. Доимий қийинчилик.
3. Туганмас пушаймонлик (айниқса охиратда).

Ибн Қоййим роҳимаҳуллоҳ

283. Дунё тўғрисида розилик, зоҳидликдан яхшироқдир. Чунки рози банда ўз даражасидан ортиғини истамайди. 

Фузайл ибн Иёз роҳимаҳуллоҳ

284. "Ўзи билан нажот манбаи бўла туриб ҳалок бўлганнинг ҳолидан ажабдаман", дедилар ҳазрати Али розияллоҳу анҳу. "У нима?" деб сўрашганди: "Тавба ва истиғфор" дея жавоб қилдилар.

285. Агар кутилмаган нарсангизни олиб қўйса ҳам, Аллоҳ билан бирга бўлинг. Шунда эга бўлишингиз хаёлингизга келмаган нарсани тезда бериб қўяди.

Шайх Муҳаммад Мутаваллий Шаъровий

286. Тўқлик - қалбни қотиради, танани оғирлаштиради ва зеҳнни ўтмаслаштиради.

Имом Шофиъий роҳимаҳуллоҳ

287. Унга қуллик қилишингиз ҳокимлик, Ундан бошқадан сўрашингиз эса хорликдир. Яхши нарсани паст нарсага ҳаргиз алиштира кўрманг!

Абдураззоқ Судоний

288. Абдуллоҳ ибн Умар розияллоҳу анҳу айтадилар: "Ҳожатим бўлмасада, мен одамларга салом беришим ва улар менга салом беришлари учун кўчага чиқаман".

289. Кўз ёшлари фақат қалб қотгани учунгина қуригандир,
қалблар эса, фақат гуноҳларнинг кўплиги учунгина қотгандир.
Алий ибн Абу Толиб розияллоҳу анҳу

Zufar Shosalimov таржимаси

290. Зубайд Ёмий айтадилар: "Ибн Масъуд розияллоҳу анҳунинг қуйидаги сўзлари мени йигирма йил сукут қилдирди:
"Кимнинг гапи ишига тўғри келмаса, ўзидан хафа бўлаверсин".

291. Аслзода бўлсин, олим ё фозил, ҳаммада ҳам айб бор. Фақат одамлар орасида айблари зикр қилинмайдиганлари бўлади.

Саид ибн Мусаййиб роҳимаҳуллоҳ

292. Аллоҳим, нафсим гуноҳ қилишга моҳир бўлиб кетди. Унинг маҳоратини ер билан яксон қил! Унга ҳунарда устоз бўлган шайтоннинг шарридан паноҳ бер!

293. Мурид - Аллоҳ азза ва жаллани кўзлаб ўзини отадиган ва то Унга етишгунча оқсамайдиган кишидир.

Ҳаллож

294. Саҳл ибн Абдуллоҳга: "Қайси амал нафсга оғирроқ?" деб сўралганда, у киши: "Ихлос. Чунки ундан нафсга насиба йўқдир", дея жавоб қилдилар.

295. Банда қирқ кун ихлосли бўлса, қалбидаги ҳикмат булоқлари тилида зоҳир бўлади.

Макҳул роҳимаҳуллоҳ

296. Ихлосли банда ихлосини кўрмаслиги ва унга хотиржам бўлмаслиги лозим. Қачон бунга хилоф қилар экан, ихлоси комил бўлмайди. Балки баъзиларга кўра риё ҳисобланади.

Шайх Закариё Ансорий роҳимаҳуллоҳ

297. Ихлос Аллоҳ билан банда ўртасидаги сирдир. Уни ёзиб қўймоқчи бўлган фаришта, бузмоқчи бўлган шайтон ва оғдирмоқчи бўлган ҳавои нафс ҳам билмайди.

Жунайд Бағдодий роҳимаҳуллоҳ