‏مابضايق إلا من الولد البقول لي بخت البعرسك 😒😒😒😒😒
‏
ماتعرسني إنت ويبقي بختی وبختگ

ونجيب لينا {بخيت}صغنوووني كدا.

‏😜😜😜😂😂.

تاني الخروف سوداني 😂😂😂

يلا قبل سنين كان اول ضحية لي في الغربة ..اها يلا يوم الوقفة جهزت حاجاتي ..وقلت لي زوجي البضبح معاك بكرة.منو قال.لي هنا بضبحو في السلخانة (لكن انا خروفي والله مايضبحو لي الشغالين في السلخانة لأنهم ماكلهن مسلمين ..اها قتا ليو لكن عادي بالنية قال لي مافي كلام زي دة بالنية كيف يعني 😈وقعد يهرج..انقلب لي متولي الشعراوي اليوم داك غايتو 😂 ..وينقنق ( كمان خروفي انا يضبحو لي الكفار ديل😎) اها قلت ليو لكن بتعرف تضبح انت ..قال لي (كيييف مابعرف اضبح..💪 ..ياخ انا بضبح.من عمري 17 سنة 😎 ...وانا وانا وانا ..طبعآ الاخ جعلي وكدة.ياجماعة 💪✊..اها قلت ليو خلاص كان كدة تمام ..يلا قال لي لكن بجيب الخروف بالليل عشان الصباح الزحمة ..وفعلا مشي يجيبو...طبعآ قال لي السودانيين الهنا لازم الخروف يكون سواكني عشان هنا الخرفان حقتن مسيييخة وكلها دهن وشحم ..يلا تاريو مشي لقي السواكنيات كلللهن اشتروهن مافضل الا السعوديات..بس اشتراو جابو .
يلا قبل كل شيء انا زوجي النوع الضعيفووني داك..يلا اثناء مابجهز للعيد والشفع نامو..اسمع ليك اصوات غريييبة كدة.((ترررر...كررررر كورب...طاااخ ..طرااااخ..رببببب..ربب..والاصوات ماشة زايدة...تاريهو دة زوجي داير يركب الخروف بالسلم ..ياخ جنس معركة هي..يلا لما الاصوات كترت قلقتا قلت هوي كدي النشوف دة شنو ..بالذات انو العمارة كانت فاضية المشي الحج والسافر اهلو..اها طوالي لبست عبايتي ونزلت اول سلم وتاوقت تحت..اشوف ليك راجلي يعاتل في الحمار ..اقصد الخروف ههه..ياخ دة قدر الحمار..وشكلو خروف نجيييض وواقعة.لييهو.😂و مابدور الاجانب😂 هعه..ياخ راجلي دة لقيتو رابط جلابيتو في نصو والباقي عاضيو بي خشمو ..ويجر الخروف يركبو درجتين ومعاها اعععععععع..يلا ومسافة يقيف يجر نفس ويقول اححح واخخخخ..اتا يا الخروف تجر راجلي تاااني لي تحت 4 درجات وتااااني راجلي يركبو 4 هو ينزلو 6 وراجلي يركبو 5 يجرو ينزل بيو 10 درجات..ههههه..انا بقيت اقول ليو فككو ياخ.الشي دة برميك ساي..وعاد هو يسمع برميك دي يتجعلن يدخل حبة من الجلابية زيادة في خشمو ويقوم. يجرجر
ياخ.خروف اول شيء كلللو صوف ولا ريش مابعرفو ..والضنب براااو لو وزنوهو قدر زوجي ..ويلا قال لي افكو كيف اتي مجنوتة..يلا حرقتني مجنونة قلت ليو خلاص ركبو انا ماشة آخد لي نومة مسافة تصلو فوق والباب فاتح وركبت.
يلا طبعآ مانمت دي مكاواة ساي..جيت تميت خدمتي والجماعة بي تحت..كرررررر..كرررررررر..وتاني راجلي فقد المنطق بقي يقول للخروف مااااااااتبرررروك ..اتا حيوان ولاشنو..ههههه..الخروف عاد اريتو حال فيحاء..ليو كليوات بالله..وتاري غتيييت لما راجلي كتر عليو الجرجير برك ليو علي كرعينو طبعآ الخروف برفعو الكرعين الوري وبسوقو ..يلا بقي يبرك بالقدام نظام كان سوداني ارفعني..ههههه
اها غايتو بعد مازوجي خلاااص عيونو بقت حمراء ونفسو قااام حتي وصلو بالسلامة. .اها قال لي افتحي باب الحوش عشان اربطو..يلا فتحتو..بالله الخروف دة الساعة العندي فاظة حلللوة في الطربيزة نطحا جابا الواطة لما شهقت..بس وداو برة
..وجا شغال يتنفس بس ضلعو بالله..وشغال لي خروف غتيت ياخ..خروف صعب ياخ وقليل ادب 😂😂😂😂😂 غايتو ماخلي ليو شيء
اها قلت كدي النمشي اتمعنو..مشيت لقيتو ليك زهجان ووشو مايتفسر والربيط مااعاجبو
..واداني عين كدة ودنقر في وضع الهجوم بقي..والقرينات والحال والضنب دة يرقص..اها قلت كدي اهبش الصوف..يلا مشيت يدي بي رقة كدة في ضهرو ويلا..اتا يا الخروف نط فوووف وتعال وتاني غير الاتجاه واخد ليك نطة وتاني اقع في الواطة وارفس لما الحبل اتفكا.( شكلو مطوع وكييف تلمسو الحرمة😂) .اصلو راجلي من المعاتلة التحت ماكان فيو حيل يربطو كويس😂..يلا ومن اتفكا بقي يترس وينطط وانا حامل لي شهرين ..جريت علي باب الحوش لقيتو اتقفل😧 وبقيت ادق وحدة يجيني جاري اجري ارجع..ويدنقر راسو نظام ينطحني ويجيني ليك..وانا طبعآ عاد اكورك دي مشكلة في البلد دي
لو السودان كان لميت الحلة ..بس بقيت عاصرة بطني واجري ادق الباب..الشفع نايمين وابوهن تاريو نزل يجيب ليو برسيمو من تحت ..يلا بس بقيت اجر جاي واجر جاي والخروف يرجع وري هنااك ويجيني ..ولما خلااص تعبتا بقيت شغالة اكووورك..وداك مافيش..اقيف افتح في الباب يجيني بي وراي..والله جنس شيء..غايتو دة ماخروف..دة
يلا زوجي سمع اخيرآ جا جاري فتح الباب..بس وقبضو ..وانا جري علي السرير..والله تاني لما اصبحت وزوجي مشي الصلاة وجا غلبني اقوم..يلا جات ساعة الضبيحة..انا طبعآ معروووفة.مابحضر الضبح كنت بحن عليهم لكن من الخروف دة بطل قصتنا دة والحائز علي جائزة اقوي خروف في المملكة وجائزة نوبل في كيفية تخويف البشر ..تاني بقيت مااابحن علي اي خروف.😈
اها زوجي شايفاو جاب كرتونتو واكياسو وساطورو وسكاكينو وخناجرو وطلع برة..وانا ولعت لي فحم..اها تاني اسمع ليك
.كربت.كوروبوت..كرووو طاااخ..واسمع ليك الراجل شغال ..اقيف هنا ياود الككب..ا

قيف ياود ال.......واسمع ليك لبببب..لللب..زولكن فقد المنطق بقي يدق..وتاني اسمعو ..الله اكبر ربنا تقبل منا ..اقول خلاص ضبحو ..تاااني اسمع ليك ..كررر..كوروبت كرروبوت..ياخ الشمس مرقت كبيييرة والجماعة ديل يتجارو في الحوش..يلا مشيت وقفت في الباب بقيت اتفرج..بس الراجل حرقتو قال لي (واتي كمان يافيحاء واقفة تتفرجي فينا ماتجي تساعديني 😂😂😂😂
عاد الجعلي اليوم داك اتجرررس والجعلي كان اتجرس بتحرقو حرقة ..بس قلت ليو (اجي يا البتضبح براااك من 17 سنة مالك الليلة😂😂)..بقي يقول لي ومعلق..بضبح زي دة لكن..بضبح زي دة..ويتفتف الخروف طبعآ ضنبو منفووش وراجلي بقي يرقد فيو من فوق عشان يقع بيو الواطة والخروف يقول بااااع ويضربو ليك بالضنب في وشو..بس ويجيو ليك البعر والصوف..غايتو شبع وفطر 😂😂
اها بعد خلاااص استبسل و قدر وقعو ..وبقي مكلت ومكنكش فيو وشغال لي يافيحاء جيبي السكينة قبل مايقوم..وانا بالضحك حيلي مات.يلا ، اديتو السكينة وقال الله اكببببررر..بس خرش الخروف كدة..الخروف دة الساعة النفض راجلي دة هناااك ..وقام لف الحوش وجانا ليك..انا جررري دخلت ولزيت الباب وراجلي بقي ياقيحاء تعااالي قبضتو ..تعالي امسكي لي كرعينو ديل ..لو ماضبحتو سريع الضحية لاتجوز..بس قلتا آآآ بعد يتجرح لاتجوز.وكفكفتا وجيت طالعة..بس لقيتو راكب فيو وماسك الراس في وضع الضبح والسكينة ويرجف والخروف يرافس.فيهو وبالمرافسة كل مرة السكينة تلف علي صدرو وانا بقيت ازغرت..فكوووو..السكينا بتخش في قلبك ..مادايرنو وهو شغال يكورك..الله اكبر فيحاء امسكي الكرعين سرعة..الله اكبر..امسكي الكرعين يافيحاء ياخ.يكبر كدة ويخت السكينة الخروف دة يقوم بينا.( عاد ما قاعد في بلد القصة وعااارف بعد التكبيرة في موتة😂😂😂😂😂😂 يلا قتا بسم الله ورقدت في الخروف ومسكت الكرعين حتي قدر ضبح.اها.انا طبعآ مابعاين للضبح..بس هو من الفرحة ..بقي يقول ضبححتو.والله...ضبحتو والله ضبحتو خلاص والله الحمد لله ضبحتو.. ضبحتو😂😂😂😂..وانا سمعتو قال ضبحتو طوالي بسرعة فكيت الخروف لأني كنت ارجف.يلا ومقبلة عكس الضبح و ماقايلة الخروف لما بضبحو ويفكو سرعة بعمل كدة..بالله فكيتو كدة دايرة أقوم فوق الساعة الخروف دة الجا راجع بي كرعينو الوري ديل ورفسني ليك مزدوج في جنبتي .والله ياجماعة بقيت مافاهمة أي حاجة ورقدت اتمددت طويييييلة في الواطة..والراجل شغال يتراجف فوق راسي (.مالك أجهضتي ولاشنو😂😂 )..وانا خشمي البتكلم بيو زاتو يرجف من الرفسة ..بس رفعني والخروف يشخر ويرشنا بالدم..ويلف يرش الحوش والحيط..بس انا بقيت حاسة بي مغص..وبقت تنزل مني موية وخليناو في محلو داك وصحينا الشفع وجررري علي المستشفي..غايتو الحمد لله جات سليمة لكن بالزعل من الخروف..بس اشتغلنا فيهو توزيع 😂😂😂
. ..اها صاحبكم داك القال هييع وانا ضباح الطيرة الياها تاني.من الضبح براو 😂😂.غايتو بشوفو الضحية البعدها بقي يقول( ياخ الاجانب البضبحو ديل كلهن مسلمين اتي قايلة شنو )😂😂😂..عرفتوهن ؟.ديل الكفار دييييك القال مايهبشو ضحيتو 😂😂😂😂...
.. اول يوم في العيد.دة جابو قلت ليو كان مالقيت زول يضبح معاك اضبح براك ..قال لي هو الخروف السعودي المدلع شفتيو كان زهجان كيف وعمل فينا شنو دة خروف سوداني سوووداااني ومابعيد تربية جعلييين😂😂😂😂
..#.:كسرة
اوعك تخلي راجلك يضبح براو .
^^........
#مسروقه عجبتني

ﺍﻟﺰﻭﻝ ﺑﻲ ﻛﻢ ؟
ﺣﻤّﺎﺩ ﻗﺎﻡ ﺑﺪﺭﻱ ﺑﻴﺴﺄﻝ ﺃﻣﻮ
ﻗُﺒّﺎﻝ ﺍﻟﺸﺎﻱ ﻭﺍﻟﻨﺎﺱ ﻧﺎﻳﻤﻴﻦ
ﻗﺎﻝ ﻟﻴﻬﺎ ﺁﺁ ﻳُﻤّﻪ ﺍﻟﻨﺎﺱ ﺑﻲ ﻛﻢ ؟
ﻗﺎﻟﺘﻠﻮ ﺍﻟﻨﺎﺱ ؟ ﺍﻟﻨﺎﺱ ﻏﺎﻟﻴﻴﻴﻴﻴﻦ ..
ﻗﺎﻝ ﻟﻴﻬﺎ ﺍﻟﺰﻭﻝ ﻟﻮ ﺩﺍﺭ ﻳﺘﺒﺎﻉ
ﻓﻲ ﺍﻟﺴﻮﻕ ﺃﻭ ﻛﺎﻥ ﺗﻤﻮﻳﻦ
ﺑﻴﻜﻮﻥ ﺑﻲ ﻛﻢ ؟
ﻗﺎﻟﺘﻠﻮ ﺁﺁﺁﻭﺩ ﻗﻮﻝ ﺑﺴﻢ ﺍﻟﻠﻪ
ﺇﻧﺖَ ﺻِﺒِﺢ ﻣﺤﻤﻮﻡ ﺍﻟﻠﻴﻠﻲ ؟
ﺩﻩ ﻛﻼﻡ ﺍﻟﺠﻦ ﻭﺍﻟﺠﺎﻥ ﻭﺍﻟﺠﻨﺒﻮ
ﻗﻮﻡ ﺻﻠّﻲ ﺻﻼﺗﻚ ﻭﺍﺳﺄﻝ ﺭﺑّﻚ
ﺇﻥ ﺷﺎﺀ ﺍﻟﻠﻪ ﻳﻌﻴﻦ
ﻗﺎﻝ ﻟﻴﻬﺎ ﺁﺁﻳُﻤّﺔ ﺃُﻣﺒﺎﺭﺡ ﻛﺎﻥ
ﻓﻲ ﺍﻟﺒﻴﺖ ﺍﻟﻔﺎﺗﺢ ﻓﻲ ﺍﻟﺪﻛﺎﻥ
ﺇﻧﺴﺎﻥ ﻣﻌﺮﻭﺽ ﻭﺍﻟﻨﺎﺱ ﻗﺎﻋﺪﻳﻦ
ﻗﺎﻟﺘﻠﻮ ﺇﻧﺴﺎﻥ ﺯﻳّﻲ ﻭﺯﻳّﻚ
ﻭﺍﻟﻨﺎﺱ ﺷﺎﻳﻔﻴﻦ ؟
ﻗﺎﻝ ﻟﻴﻬﺎ ﺁﺁﻳُﻤّﺔ ﺑﻨﻴّﺔ ﺣﻼﺗﺎ
ﻭﻛﻤﺎﻥ ﻣﻦ ﻧﺎﺳﻨﺎ ﺍﻟﻐﻠﺒﺎﻧﻴﻦ
ﺟﺎﺕ ﺷﺎﻗﻲ ﺍﻟﺸﺎﺭﻉ .. ﺍﻟﻌﺼﺮ ﺃُﻣﺒﺎﺭﺡ
ﻭﺍﻟﺮﻳﺤﺔ ﺗﻘﻮﻝ ﺯﺭﻋﻮ ﺍﻟﻴﺎﺳﻤﻴﻦ
ﻻﺑﺴﺎﻻ ﻗﻤﻴﺺ ﺯﻱّ ﺑﺮﻧﺎﻣﺞ ﺍﻟﺴﻬﺮﺓ
ﻓﻮﻕ ﻟﻠﺮﻛﺒﺔ ﻭﺑﻼ ﺇﻳﺪﻳﻦ ...
ﻭﺑﺘﻨﺎﺩﻱ ﺍﻟﻨﺎﺱ ..
ﻳﺎﻧﺎﺱ ﻳﺎﻧﺎﺱ ﻳﺎﻣﺤﺘﺎﺟﻴﻦ
ﻗﺎﻟﺘﻠﻮ ﺗﻘﻮﻝ ﻳﺎﻧﺎﺱ ﻳﺎﻧﺎﺱ
ﻭﺍﻟﻨﺎﺱ ﺳﺎﻣﻌﻴﻦ ؟
ﻗﺎﻟﻴﻬﺎ ﺁﺁ ﻳُﻤّﺔ ﺑﻼ ﺃﺻﻮﺍﺕ
ﻭﺑﻴﻨﺎﺗﻢ ﻛﺎﻥ ﺳﻤﺴﺎﺭﻱ ﺍﻟﻌﻴﻦ
ﻗﺎﻟﺘﻠﻮ ﺁﺁﺍﻭﺩ ﻃﺐ ﻭﻳﻦ ﺃﺧﻮﺍﻧﺎ
ﻭﻭﻳﻨﻮ ﺑﻠﺪﻧﺎ .. ﻭﻭﻳﻨﻮ ﺍﻟﺪﻳﻦ ؟
ﻗﺎﻟﻴﻬﺎ ﺃﺧﻮﺍﻧﺎ ﺑﻜﻮﻧﻮ ﺳﻜﺎﺭﻱ
ﻭﻃﻮﺍﻟﻲ ﺁﺁ ﻳُﻤّﺔ ﺑﻜﻮﻧﻮ ﻧﺎﻳﻤﻴﻦ
ﻭﺍﻟﺪﻳﻦ ﺁﺁ ﻳُﻤّﺔ ﻫﻨﺎﻙ ﻓﻲ ﺍﻟﺠﺎﻣﻊ ...
ﺑﺮّﻩ ﺍﻟﺠﺎﻣﻊ ﻣﺎﺑﺴﻮﻭﺍ ﺍﻟﺪﻳﻦ
ﺣﻤّﺎﺩ ﻛﺎﻥ ﻋﻤﺮﻭ ﻳﻜﻮﻥ ﻛﻢ ﻃﺎﺷﺮ ..
ﻭﺍﻟﻮﺍﻟﺪﺓ ﺗﻜﻮﻥ ﻓﻮﻕ ﻟﻠﺨﻤﺴﻴﻦ
ﺷﻮﻑ ﻓﺮﻕ ﺍﻟﻌﻤﺮ ﺍﻟﻜﺎﻥ ﺑﻴﻨﺎﺗﻢ ...
ﻭﺑﻴﻨﺎﺗﻢ ﻛﺎﻥ ﻛﻢ ﺯﻭﻝ ﻋﺎﻳﺸﻴﻦ ..
ﻛﻢ ﺯﻭﻝ ﻣﺒﻴﻮﻉ ﻛﻢ ﺯﻭﻝ ﺇﺗﺒﺎﻉ
ﻭﻛﻢ ﺳﻤﺴﺎﺭﻱ ﻭﺩﻟّﺎﻟﻴﻦ ..
ﻭﻗُﺒّﺎﻝ ﻣﺎﺗﻘﻮﻝ ﺍﻟﻮﺍﻟﺪﺓ ﻛﻼﻡ ..
ﻗﺎﻟﻴﻬﺎ ﺁﺁ ﻳُﻤّﺔ ﺷﺎﻳﻚ ﻓﺎﺭ
ﻗﺎﻟﺘﻠﻮ ﺁﺁﺁﻭﺩ ﺍﻟﺸﺎﻱ ﻣﻠﺤﻮﻕ
ﻗﺪﺍﻣﻮ ﺯﻣﻦ ﺃﻧﺎ ﻛﺎﺗﻠﻲ ﺍﻟﻨﺎﺭ ..
ﻗﻮﻝ ﻟﻲ ﻛﻴﻔﻦ ﻣﺎﺑﺴﻮﻭ ﺍﻟﺪﻳﻦ !!
ﻗﺎﻝ ﻟﻴﻬﺎ ﺁﺁﺁﺁ ﻳُﻤّﺔ
ﺍﻟﺒِﺖ ﻟﻮ ﺩﺍﺭ ﺗﺘّﺒﺎﻉ
ﺑﺲ ﺗﻘﻠﻊ ﺗﻮﺑﺎ ﻭﺗﺸُﻖ ﺍﻟﺸﺎﺭﻉ ..
ﺗﻘﺎﺑﻞ ﻭﺍﺣﺪ ﺣﺎﻓﻆ ﺍﻟﺴﻮﻕ ﻭﻋﺎﺭﻑ ﺍﻟﺤﺎﺻﻞ ..
ﻭﺑﻲ ﻧﻈﺮﺓ ﺻﻐﻴﺮﺓ ﻭﻏﻤﺰﺓ ﻋﻴﻦ ..
ﺗﺼﺒﺢ ﺣﻖ ﺍﻟﻮﻟﺪ ﺍﻟﺒﺖ
ﻭﺗﺼﺒﺢ ﻫﻲ ﺍﻟﻤﺠﻨﻮﻧﺔ ﻭﻫﻮ ﺍﻟﻌﺎﻗﻞ ..
ﻋﺮﻓﺘﻲ ﺁﺁﻳُﻤّﺔ ﺍﻟﺰﻭﻝ ﺑﻲ ﻛﻢ ؟
ﺍﻟﺰﻭﻝ ﺑﻲ ﺷﺮﻓﻮ ..
ﺑﺎﻟﺸﺮﻑ ﺍﻟﻐﺎﺍﺍﺍﺍﺍﺍﻟﻲ ﺍﻟﻤﺎﻣﺒﻴﻮﻉ
#ﻣﺤﻤﺪ_ﻋﺒﺪﺍﻟﺮﺣﻴﻢ

المفاخرة بتقديم الضيافة أفسدت فرحة اللقاء وأصبح التزاور هماً بعد أن كان سروراً..

ما أجمل البساطة والتواضع ، فالناس لم يذهبوا لبعض من مجاعة ليأكلوا ما لذ وطاب عندهم

إنما ذهبوا للأنس ولكن البعض حول هذا الأنس والإخاء إلى تعب وهم وشقاء....

فقل المتزاورون ، وثقل الضيف على المزورين لما ذهبت البساطة ، وطغت الكلفة..

يصّر صاحبنا على أن لا يدخل بيت زائره إلا شاريا معه شيء ..

وصاحب البيت يرهق أهله ، ويفرغ جيبه من أجل زائر حبيب لم يكن يريد من وراء الزيارة إلا رؤية حبيبه ، أو تفقد قريبه..

لذلك قل طرق الأبواب ، وتزاور الأصحاب ، وكثر التلاوم والعتاب ..
ولو فهموا لعلموا أن الأمر كما قيل قديما :
الكرم شيء هين .. وجه طلق .. وكلام لين !!
ورحم الله من قال :
أحب إخواني إليّ من لا يتكلف لي ، ولا أتكلف له..
ورحم الله غيره عندما قال :
زوال الكلفة يزيد الألفة ..

كم ظلمنا أنفسنا عندما ضيعنا التزاور من أجل كرم مستعار!!

تبسطوا يرحمكم الله ... فالزائر بيته مملوء طعاما، والمزور نعرف أهله كراما .

فجلسات الود مع الأحبة على كوب ماء ، و وتر من تمرات و فنجان قهوه خير من تأخر البركة عن بيوت غاب عنها طرق الضيوف .
رحمك الله اجعل شعارك ( زوال الكلفة يزيد الألفة )
#منقول

لا يعني لا
قلت مرارًا وسأظل أقول إنه من الضروري أن يعرف الأطفال متى نقول نحن أولياء أمورهم «لا»، وأن «لا» يعني «لا»، ولمن نقولها، ولماذا نقولها، وفي أي الحالات لا نقولها، فليس من حسن التربية أن تكون كلمة «لا» حاضرة على لسان الأب أو الأم كلما طلب العيال شيئا: أريد أن ألعب مع حسون.. لا... أريد مشاهدة مباراة.. لا.. أريد سندويتش بيرغر.. لا)، فلابد من الموازنة بين التدليل والتدليع، والجفاء والقسوة ولو بالكلام «الناشف». والمصيبة الأكبر هي أن ينقسم الأب والأم إلى حزبين أحدهما يلعب دور الحنون الرؤوم، و«يفوِّت» للعيال أخطاءهم، مهما كانت فداحتها بينما يميل الآخر إلى الحزم. ومن غرائب الأمور أن الآباء عادة أشد حزما مع الأولاد، وأكثر رقة مع بناتهم، والعكس عند الأمهات اللواتي يكنّ عادة أكثر تدليلا للذكور من عيالهن؛ فعندما بدأت التدخين اكتشفت أمي الأمر فقالت: أبوك سيقتلك لو عرف بالأمر. لازم تعمل حسابك! وعملت حسابي وعلقت في ضباب التبغ قرابة عشرين سنة، أصيبت خلالها رئتي وجيبي بالثقوب. (من أغاني الأمهات المصرية: لما قالوا دا ولد انشدّ ضهري وانسند/ ولما قالوا دي بنية انهد ركن الحيط عليا/ جابو لي البيض بقشره وبدل السمنة ميّه "ماء")
ولو زجرتني أمي، أو أبلغت والدي لربما ما واصلت التدخين، والأطفال أذكياء: يا أحلى ماما.. تعرفي أن أبوي صعب ومش حنون مثلك.. كلميه عشان يخليني أبيت الليلة عند صديقتي سونيا.. بس خليها كأن الاقتراح منك أنت مش مني أنا.. وتعتقد الأم بذلك أن حب بنتها لها أكثر من حبها أبيها، ولا يخطر في بالها أن البنت تستعبط، بل ربما تحترم الأب أكثر، لأنها تعرف أنه صارم حيث ينبغي أن يكون صارما، وعطوفا وودودا في معظم الأحوال.
هذا الوضع قائم في غالبية بيوتنا، لأن الأب غائب عن حياة البيت بسبب «مشاغل الدنيا وأكل العيش»، ويترك مسؤولية رعاية العيال للأم، والأم قد تكون عاملة مثله، ووقتها موزع بين البيت والعمل ومن حقها أن تطلب الراحة والهدوء بعيدا عن دوشة العيال بعض الوقت، وقد تكون متفرغة لشؤون البيت ولكن كثرة الأعباء تجعلها تلجأ إلى طلب راحة البال بالاستجابة لكل ما يطلبه العيال؛ أي أنها تشتري راحة بالها «مؤقتا» بتلبية طلبات «المستمعين». ويفاقم الوضع أن الأسرة الممتدة بدأت تتآكل باسم مشاغل الحياة، ففيما مضى كان الطفل يعمل حسابا للعم وابن الخال والعمة وبنت الخال وزوج أخته الذي من حقه أن يزجره، كل ذلك انتهى، وإذا تعرض طفل للزجر من قبل قريب غير والديه قد لا يتردد في القول له: أنتَ لستَ أبي، وأنتِ لستِ أمي، فلا تخاطبني بهذه الطريقة.. بل يقول الأطفال ذلك الكلام لإخوتهم الكبار: أنت مش أبوي.. خلّيك في حالك.. وأحيانا قد يحتج الطفل على قرار الأم أو الأب ويطالب بتفسير وتبرير، شخصيا لا أتردد في الرد على الاحتجاج بأنني اتخذت القرار لأنني أملك الصلاحية لذلك بحكم أنني أب وأنني لا أدخل في مفاوضات مع الإرهابيين، والعيال يلجؤون إلى أساليب الإرهابيين الذين يحتجزون رهائن، ومنها الابتزاز: يعني ما تحبوني؟ لا، بل نحبك ونرفض تلبية جميع رغباتك لأننا نحبك.
ولأن الطفل لبيب ويفهم بالإشارة، فيجب على الدوام أن يقترن الزجر والنهر ورفض الطلبات بأدلة ملموسة (وليس مجرد كلام) على أنه محبوب، ليس بالانهزام أمام ابتزازه و«حركاته القرعة»، ولكن بمنحه الإحساس بأن هناك أشياء كثيرة يحبها مباحة ومتاحة، وفي تقديري فإن من أسوأ خصال الأبوة والأمومة مواصلة تمثيل دور الزعلان ساعات أو أياما، العفو والمسامحة أحيانا عقوبة تأتي بنتائج أفضل من التكشير والصراخ المتواصل

جعفر عباس

ﺳﻮﺩﺍﻧﻴﺔ ﻓﻲ ﻃﻴﺒﺔ ﻣﻼﻣﺤﻨﺎ
ﻓﻲ ﺿﺤﻜﺘﻨﺎ ﻭ ﺍﻟﺴﺤﻨﺔ
ﺳﻮﺩﺍﻧﻴﺔ ﻓﻲ ﺫﺍﺗﻨﺎ
ﺳﻮﺩﺍنية ديل نحن
ﺳﻮﺩﺍﻧﻴﺔ ﻓﻲ ﺭﻭﺣﻨﺎ ﻭﺃﺻﺎﻟﺘﻨﺎ
ﻭﻧﻴﻠﻨﺎ ﺍﻟﺮﺍﻭﻱ ﺳﻤﺮﺗﻨﺎ
ﺳﻮﺩﺍﻧﻴﺔ ﻓﻲ ﺻﻮﺗﻨﺎ
ﻭﺳﻮﺩﺍﻧﻴﺔ ﺻﻮﺭﺗﻨﺎhttps://tttttt.me/joinchat/AAAAAEPtL5qDu6s5k57daw

مره جابو لي قميص كنقولي هديه😍 فقلت خلاص القميص دا حق مثقفين فانا لازم ابقي مثقف😌 فعندي صاحبي مثقفاتي... ضربتا قلتا ليهو أنا أتثقفتا يا معلم وتسوقني معاك اتني😃 قالي فجأة 😳؟ قلت ليهو اي 😌... قالي خلاص تعالي نمشي ... لبست القميص وعندي نسخه من كتاب انتخيرستوس شلتها ومشيت👌 والليله يا المثقفين جاكم المثقف الماخمج 😂ومشيت معاو دخلتي كده قلت لست الجبنه كبي لي جبنه عميقه ☺قالت لي جبنه عميقه كيف😒 قلت ليا خالي دوا يعني😉 وقعدت وصاحبي المثقف جاب اصحابو المثقفين وبقو يتناقشو عن الليبرالية والاتحادية ونشأة الانسان والايمانيات واصل التدين😥 فطوالي قلت ليهم شوفو يا جماعة انا عوودي راكب قالي عودك راكب كيف يعني 🙄!! قلت ليهم يعني داخل في الموضوع دا😃 قالي انت اساساً مننا وفينا يا رفيق اتفضل اطرح وجه نظرك☺ قلت ليهم قبل ما اقول وجه نظري انا بحب حميد وبحب مصطفي سيد احمد ودستوفيسكي والانسان اصلا كان قرد مع المطرة الشديدة والهبوب العاتيه بقا زول وعندو يدين وكرعين زي القرد 😃وولا تاجرنا بي اسم الدين وولا اتدسينا ورا دبابه ويحيا العدل يا رفاق المنفي😃 واخر حاجه الوطن مقيد😢 الوطن رجال الدين خانقنو من رقبتو لازم نتنفض😍 اها خلصت كلامي المثقفاتيه ديل بقو يعاينو لي عشره عشره ماباقي ليهم الا يقولي طير من هنا😂 لكن البطير منو الوطن للجميع حبايبي😂 وجابو لي الجبنه شلتا منا جغمه وقلت للحجه جبنتك عميقه والله 😍المرا ضحكت وقالت لي انت الاعمق💔 وبقيت اشرب فيا بعد حصلت للاخر الكبايه مسكتها كده وبقيت اعاين فيا زي ست الفنجان😃 فواحد قالي انت بتقرا الجبنه؟ قلت لي اي بقرا الجبنه وبخت ودع كمان تعال تعال جيب كبايتك نوريك الوطن البتحلم بي يوماتي مخبي ليك شنو 😉اها المثقف طواالي مدا كبايتو عاينت ليا كده وقلت ليهو الترابه في خشمك يا رفيق حتمر عليك سنين في المنفي وحتتعذب شديد لكن في الاخر حتنتصر😔 قالي خلاص شوف لي المنفي دا وين ايطاليا ولا فرنسا 😃عملت بعاين في الكبايه وقلت لي لا دي ولا دي سجن كوبر يارفيق 😔حممر لي كده وقالي جيب الكبايه دي وكزب المنجمون ولو صدقووو 😏خلااااص يعني خليت الدين كلوو مسكت في المنجمون انجم رويسك دا😏 علي كيفك انا وريتك غايتو وفتحت روايتي وانا اصلا قريتا قبل كده لكن انا بقيت مثقف فلازم اي كتاب اقرا عشرين مره😂 وقلت ليهم عاوز اشاركم بي اقتباس للكاتب العظيم داروين😍قالي اتفضل قول اقتباسك 😉 فقلت ليهم كان لها من مباهج العشق في تلك السهره مايفيض علي نساء العالم جميعهن😍 انا داير اعرف مباهج العشق دي شنو😥 فواحد قاالي لكن دا ما داروين دي احلام🤔... قلت ليهو : واحلام انت قايلا هينه ولا مقطوعه لينه😏 واحلام ست الشي واي شي ماقريت عليك اللهفه ادس من نشأة الخلق وانفصمت ليك فيهم وبقيت اجخمس حته من الاسود يليق بك وحته من هيبتا وحته من انثي عبريه الجماعه ديل ماباقي ليهم الا يقومو يخلو لي المكان😂 لكن البقوم بخليني حكتب اكتب اكتب بكتب بلوت احمر💔 وبعلقا ليهم في الشجره دي😌 وبقو قاعدين وشاميني ليك جنس شم لكن انا مثقف واهم.حاجه في الثقافه انك تبقي لصقه وتغالط وتسب دين في اي شي دا اساسيات المثقفين 😂فبقيت قاعد بسس ومتعمق في الوجود لحدي ما ازان الضهر ازن قلت ليهم ماش اصلي انا اوعكم تتحركو قالي في عميق بصلي😏 قلت ليهم الدين حق للجميع وحريه التعبد من الدستوور وبي دستووورنا😌 ومشيت منهم صليت وطلعت لقيت حافله ماشه الاستاد ركبت ودخلت حووش النيلين لقيت ناسي وجلاسي قعدت معاهم وجابو لي البليله والباكمبا وياداب الواحد استكان في القعده قال ثقافه قال نحنا لاقين ناكل اصلا لمن نتثقف😂😂💔
#wd_7amid

القصة دي طريفة جدا نشرتها في قروب وصافين قبل ايام وما في مانع نعيد نشرها هنا ( قصة في الوصف ) ...

قبل القصة ، لمن تجي توصف لابد ان تنتبه لحاجات معينة ...،كدي تابعو معاي القصة الطريفة الظريفة دي ، وبأحكيها ليكم باللغة العربية الفصحى (لأني ما بعرف اقص بالدارجي ^_^ ) :

بداية القصة وقفت سيارة صالون بالقرب من شباب يجلسون بطرف الشارع تحت (ضل الحيطة) ، كان يقودها رجل كبير(محجوب) وبجانبيه زوجته (نعمات)، وتجلس على المقعد الخلفي فتاة نحيفة (ابنتهم) بجوار اخيها الصبي المشاغب ، نادى السائق علي مجموعة الشباب قائلا :
- يا شاباب لو سمحتوا ، بتعرفوا بيت عمر سر الختم ؟
وقف احدهم من على (اللستك ) الذي كان يجلس عليه وتقدم نحو السيارة قليلا و سأل :
- منو ؟ عمر سر الختم .؟؟
ثم أخذ يردد مرات عديدة بتفكر:
- عمر سر الختيييم ... والله الاسم ده ماآآآآآآ غريب علي ! ، هم قالوا ليكم هنا في الطلاطاشر (13 ) ؟
هنا في الحارة دي ؟
- ايوه راجل كبير كان في الجيش هسي بالمعاش! .
التفت الشاب الى أصحابه موجها ذات السؤال اليهم ، فاجاب احدهم السؤال بسؤال آخر :
- ما عندكم ليهو أي تلفون .؟
- نحن برا التليفونات دي الضيعنا شنو ؟
ثم اردف قائلا : مقفلة كلها يا ولدي ، الصباح كنا متواصلين .
قاطعه الشاب مناديا شاب اخر مر بالشارع : يا جلكسات، جلكس .. تعال جيت في وقتك .
ثم توجه للرجل بالحديث مبتسما : والله انتو محظوظين شدييييد ، شايف الزول الجاي ده ؟ بجيهكم تب :) ، ده بعرف الحارة دي بيت بيت،شارع شارع ، زنقة زنقة .
اتجه المدعو (جلكسات ) نحوهم وهو يأرجح راسه شمالا ويمينا مع كل خطوة بثقة ،وبعد ان سلم على الشلة وعرف المطلوب خلع نظارته الشمسية و أجاب على الفور بلا تردد :
- ايوه ، عمك "عمر سر الختم " السمعو شوية تعبان ... ، بيتم جنبو جنينة صح ؟
ولم ينتظر الإجابة وبدأ في الوصف :
( البيت ده قريب من هنا شديد ، يلا تمشي بالشارع ده طويل ، بعدين تخش شمال في يمين وتخلي الفسحة وراك ، تعد أربعة شوارع اول بيت على شمالك فاتح شرق ياهو زاتو البيت ) ثم اردف قائلا :
- وقع ليك يا عمك ؟
- ايوه وقع تب .
ثم قام محجوب بشكر الشباب الوصافين ، وتركهم فرحين بنجاح المهمة ، وانطلقت السيارة الى ان وصلت الى المنزل المقصود ، وقد كان الوصف دقيقا وصحيحا ، فنزلوا جميعا ، وهنا سالت الام إبنتها
- اها يا رشا ياهو ده البيت ؟ انتي التقول ما جيتهو قبل كده .
- ما متاكدة يا أمي لكن ما كان جينا بالليل ورجعنا بالليل ..
علقت الام بسخرية : والله البت دي مهودة هوادتن ، روشه رواشتن ..
قال محجوب وهو يطرق الباب بحذر : اصبروا كدي ،،، انشاء الله يكون الوصف صاح ، لكن الود ده وصاف شديد والله .
وفجأة فتح الباب، وكان شخصا اخر غير المقصود !!!! وصاح بصوت عال جدا :اهلن اهلن... افتضلوا اتفضلعواااا ...
رد محجوب باستحياء : الظاهر انا غلطنا في العنوان ... بنسال عن "عمر سر الختم"
- شنو ؟؟؟ انا عمر جايين من وين انتو ؟ !!! .
- نحن من المسعودية و كنا بنسال عن بيت واحد اسمو عمر سر الختم ..
- السعودية ؟ يا جماعة وصلتوا خلاس ، انا عمر السر زاتو ..
فهم محجوب ان الرجل ضعيف السمع لذا اخذ يفهمه بصوت عال قائلا :
- كنا بنفش عن واحد تاني غيرك ، اسمو عمر سر الختم ا
- بقول ليك أنا ياني زاتي إياني عمر السر ،..
ثم بدأ الرجل الكبير يسرد قصة قائلا : بس السر دي " سر" ، وما بعرفوها الناس لاني مشهور باسم (عمر كجيك) ،ثم ضحك وهو يقول : كجيك دي من زمن كنت في القضارف لما كان الدنيا بخيرا كنت باشتري ال,,,.
حاول محجوب ان يفهمه لكن فيما يبدو انه في وادي وهم في وادي اخر ، ثم قال :
كدي ننادي ليكم المرة نشوف قصدكم شنو ، ثم نادى لزوجته : يا فاطمة فاطنة ضيوف جايين من السعودية .
خرجت زوجته فاطنة ومن خلفها عدد من اطفالها ووقف الجميع خلف الباب :
يا جماعة خشوا كدي .ا.
- لا مستعجلين ، نحن جينا بالغلط هنا وبنسال عن واحد ساكن هنا اسمو (عمر سر الختم )
اجابت فاطنة : زوجي طبعا سمعو شوية كده يعني .. ، هو اسمو "عمر السر" بس ما بنعرف والله عمر سر الختم ده ،!!؟
هنا انبرى ابنها (ذو الثمانية سنوات) قائلا :
-يا ماما .. عمر سر الختم انا بعرف بيتهم .
- يا ولد بتعرفو من وين؟ اذا انا أمك ما بعرفهم ..
أجاب الطفل بثقة : هم سكنوا جديدين ، بعرفم والله .
ردت نعمات باعجاب : ايوه صاح ايوه هم جداد سكنوا ليهم تلاتة سنوات
قاطعها الرجل : جداد شنويا مرة ؟! هسي تموا خمسة سنة من سكنوا الخرتوم .
قالت فاطنة معلقة على كلام ولدها بسخاء : والله شفع الزمن ده بعرفوا احسن من الكبار ، خلاص يا حمودي وصلهم وتعال راجع ..
ركب معهم (الشافع المسلط ) ثم اخذ يوصف لهم من شارع لشارع حتى وصلوا للبيت المقصود ،
هنا قالت نعمات : والله ماشاء الله شافع لكن اشطر من ناس كبار ، ثم التفت الام جهة بنتها وهي تقول : . اها ده ياهو البيت ولا برضو ما بتذكري ؟!!
ردت الفتاة : تقريبا ياهو الا

لون الباب كان بوهية بيجي .
أخذ حمودي حجرا ثم ضرب الباب بقوة ، (طق طق طق ) حتى فتحت الباب فتاة يبدو انها عاملة منزلية ، تسلسل حمودي الى الداخل من تحت يد ها قبل ان ياخذ اي اذن بالدخول ،حيث كانت تقف خلف الباب ممسكة به ، رددت بصوت منخفض ولغة ركيكة :
تفدلوا تفدلو جوه ..
سالوها : ده بيت عمر سر الختم
اجابت : سح ده بيت ناس ( أومر) ، نناديو ليكم ؟
قالت نعمات : ما شاء الله جابوا ليهم شغالة حبشية والله ارتاحوا .
ثم ظهر حمودي من الداخل بسرعة وفتح الباب على مصراعيه وقال : قالوا ليكم خشوا ..
دخل الجميع بحذر ،، هنا ظهرت امراة تعيد لبس ثوبها وهي تقول بفرح وطيبة شديدين :
اهلا اهلا والله خشوا ..
في تلك اللحظة أشار حمودي لولد اخر في مثل سنه وهو يمسك يده ويرفعها للاعلى :
ياهو ده عمر ^_^ ما قلت ليكم بعرفوا ، بيقرا معنا في الفصل ^_^ .
هنا أصيب الجميع بالذهول والدهشة و حلت بهم (زهللة ) ، قالت نعمات وهي تحاول اخفاء الدهشة والصدمة التي اصابتها :
الله يجازي محنك يا حمودي ، دي عملية تعملا فينا يا حمودي ، نخش بيت الناس توووش ؟
لم تكترث صاحبة المنزل (التومة ) للأمر وهي مازالت تردد كلمات الترحاب بطيبة بالغة :
كدي بالاولاتفضلوا يا جماعة .
ووسط السخرية والدهشة والصدمة ، حكى الاب محجوب قصتهم مع وصف البيت ، ورغم ان المنزل طلع خاطئ . وقد اكلوا المقلب من "حمودي " الذي لم يكترث للامر ودخل يلعب مع صاحبه (عمر سر الختم ) وكان شيئا لم يحدث .
كانت العائلة صاحبة البيت ترحب بالضيوف بكرم بالغ وفرح شديد ، ما زالت تسلم عليهم وترحب بهم بترديد السلام الذي لا ينتهي ( الله يسلميك ، الله يبارك فيك ، كيف كويسين الله يسلمك اقعدوا كويس عليكم الله )
. ثم قدموا لهم العصائر والشواحن وأرقام الشبكة ووصلات الكهرباء وكل متطلبات الضيافة ، ويدات قصة التعارف
- من وين انتو ؟
- من المسعودية ^_^
- بتعرفوا ناس بسمات كانوا جيرانا زمان ، راجلا اسمو حيدر ؟
- كيف ما بعرفا ؟ ... بسمات دي بت عمتي وبت خالي طوالي ...
هنا توثقت المعرفة و بدأت رحلة سلام جديدة وحديث ملئ بالاشواق ، فقد كانت (بسمات) المذكورة هنا جارة قديمة لهم بالسعودية الرياض .
و بعد ساعة زمن صاحت رشا : امي بتي عمتك ( لجين ) خشت الواتساب
- الله يلجنا لكن ، قولي ليها تتصل
- اخيرا الحمد لله اتصلي عليها احسن وخليهم يفتحوا جوالاتهم
وكان الحوار بالواتساب :
- الووو الووو لجين ، ردي يا ،،، نحن ضايعين هسي وصفي لينا بيتكم .
- اهلين وسهلا وينكم ما جيتوا كنا منتظرنكم بالغداء
- فتحي جوالك سرررررررعة ، امي زعلانة شديد مقفلين جوالاتكم مالكم .
ثم رن جرس الجوال فخطفته الام بسرعة فسالتها لجين :
- الو... انتو هسي وين عشان اوصف ليكم بالضبط ؟
- نحن قريب منكم في الحارة 13 ، لكن لينا ساعة لافين ،من بيت سر الختم ، لبيت تاج السر ، باقي لينا بيت ختم السر بس ^_^ ، اصبري لي بس انت وامك ..
- لا كدي بالضبط كده وين ؟؟؟
-ايوه في الحارة 13 زاتها ، الثورة ..
- ثورة شنو يا مرة ؟؟ نحن في الحارة 13 امبدة السبيل محطة الماسورة
- ماسورة شنو ؟ والله دي ماسورة دي .
- يعني سفر من هنا ؟
والحل شنو ؟
- خلاص مع السلامة نحن برنجع المسعودية قولي لي امك اصبري لي عاد .

انتهت المكالمة ، ورغم ان الكل استمع لهذا الحوار ، الا أن الحاجة نعمات قالة (بنجر ) ظاهر :
قالوا جيرانهم ابوهم مات عشان كده ما ردوا ملخومين ،خلاس نحن بنرجع المسعودية ونجيهم وقت تاني !!! ^_^ ..
________________________
لم تنتهي القصة بعد ، طبعا سيد البيت حلف الا يرجعو حتى يتغدوا ، وتغدوا وانبسطوا ورجعوا ، وهم يرددوا طول الطريق : والله الناس دل طيبين خلاص ، اطيب من قرايبنا .
ولم تكن هذه اخر زيارة بينهم أيضا ، زارتهم التومة وعائلتها في المسعودية ، وتبادوا الزيارة بزيارتين
وأكثر .
ولم تنتهي القصة أيضا ، أصبحت نعمات كل خميس تزورهم في منزلهم العامر بالثورة الحارة (الطلاطاشر) ، مع انها لم تزر قرايبها في امبدة حتى الان ، ليس ذلك " شلاقة منها " ، لكنها تزور أبنتها (رشا الروشة ) التي تزوجت من ولد التومة الكبير ^_^ .
شوفتوا ختمت ليكم القصة كيف :)
لن نترك القصة تنتهي حتى ناخذ هذه العبرة : احذر الناس الما بتركز بالوصف ، بس بتحب توصف صح ولا غلط ، والقصة دي كلها حصلت بسب الوهم الاسمو (جلكسات) والشافع المسلط داك ! ولا شنو ؟.
_________________________

#الجفاف_العاطفي

اعتدنا ونحنُ نقرأ «واللّقمة يضعُها الرّجلُ في فم امرأته صدقة» أن نُركّز على لفظةِ اللّقمة ونُهمل يضعها في فم امرأته! السِّر إذاً ليس في اللقمة بل في طريقة تقديمها!

ولقد حرص الإسلامُ أن يجعل كلّ شأنٍ من شؤون الحياة طقساً من الحبّ، فاجتماع رجل وزوجته على مائدةٍ ليس اجتماع خروف ونعجة أمام معلفٍ يعُبُّ كل واحد منهما ما يملأ بطنه ثم ينفضّ الجمعُ! هذه الحركة اللطيفة تحوّلنا من كائنات مُقتاتة إلى كائناتٍ مُحبّة، وتُحوّل الطعام من غذاء للمعدة إلى غذاءٍ للقلب والرّوح!

جوع المعدة أمره يسير، يسدّه رغيفٌ، ويُسكته صحن أرزّ مهما تأخّر، أما جوع المشاعر والأحاسيس فقاتِلٌ إن لم يُقدّم في وقته! وأكثر أنواع البخل إيذاءً ليس ذاك الذي يتعلّق بالمال وإنّما ذاك الذي يتعلّق بالاهتمام!

الفقرُ الحقيقيّ ليس في الجَيْبِ وإنّما في القلب! ونحن في الغالب نتقبّل فكرة فقر من حولنا ونتعايش مع قلة إمكاناتهم لأننا نعرفُ أنّ هذا رزق ليس لهم في قلّته يد، ولكن الذي لا نتعايشُ معه هو فقرُ الأحاسيس! وقلّة ذات القلب! هذه الأشياءُ الصّغيرة التي لا تُكلّف درهماً ولا ديناراً، أشياء بالمجان هي التي تجعل الحياة رغم قسوتها جنّة!

هديّة بسيطة دون مناسبة
عناقٌ في غير موعده
كلمة أحبك في زحمة سير
وردة من بائع متجوّل
ثناء أمام الآخرين
تشجيع ولد، ومديح بنت،
تفعل في القلوب أكثر مما نعتقد!

عندما نُغدِقُ الحُبّ على من حولنا نُحصّنهم جيداً من الوقوع في أفخاخ اللطف العابر الذي يُقدّمه الآخرون! صحيح أن اللطف ليس مرضاً يجب أن نُحصّن من حولنا ضدّه ولكن الخواء العاطفيّ مقتلة! إننا نعيشُ جفافاً عاطفياً يجعل منا جميعاً فرائس سهلة أمام أولئك الذي يجيدون الاصطياد في الماء العكر! وحتى إن حسُنت نوايا الآخرين يبقى الجفافُ العاطفيّ سيّد التأويلات يُفسّر كل كلمةٍ عابرة على أنّها رسالة حب!

صارت البنتُ تسمعُ صباح الخير كأنّها: أنا أحبكِ
وتسمعُ كيف حالكِ على أنها: لقد اشتقت إليكِ
وتسمعُ كم عمركِ على أنّها: أنتِ في سنّ مناسبٍ للزواج أيّتها الجميلة.

ونحن نتحمّل مسؤولية كلّ هذا!

إنّ أقسى ما نواجهه اليوم ليسَ البطالة في الأعمال وإنّما البطالة في الأحاسيس!

وليس ارتفاع أسعار الطعام في المطاعم ولكن انخفاض سعر الحب على موائدنا!

وليس ندرة الورد بل ندرة الذين يقدّمونه!

وليس ندرة الأرصفة قرب البحر بل ندرة الأزواج الذين يمشون هناك كحبيبين!

النّاسُ يجِفّون من قلّة الاهتمام كما يجفُّ الزّرع من قلّة الماء! فاسقوا زرعكم ولا تحوجوه لماء الآخرين!

منقول
نحو بناء أسرة سعيدة
مقال للكاتب #أدهم_شرقاوي

اقترﺏ ﻣﻨﻬﺎ ﻭﺍﻣﺴﻚ ﺑﻴﺪﻫﺎ ﻭﺿﻐﻂ ﻋﻠﻴﻬﺎ ﺑﻠﻄﻒ ﻧﻈﺮ ﺇﻟﻲ ﻋﻴﻨﻬﺎ ﺍﺯﺍﺡ ﺑﺼﺮﻩُ ﻋﻨﻬﺎ، ﺗﻠﻌﺜﻢ ﻭﻭﻗﻔﺖ ﺍﻟﻜﻠﻤﺎﺕُ ﻓﻲ ﺣﻠﻘﻪِ ﺣﺎﻭﻝ ﺍﻥ ﻳﻠﻔﻈﻬﺎ ﺑﻜﻞ ﻣﺎ ﺃُﻭﺗﻲ ﻣﻦ ﻗﻮﺓ، ﻏﻠﺒﺘﻪُ ﺭﻳﺎﺡ ﺍﻟﺤُﺐ ﻭﻟﻔﺖ ﺑﻪ ﻏﻤﺎﺋﻢ ﺍﻟﻌﺎﺷﻔﻴﻦ
ﺗﻨﻬﺪ ﻃﻮﻳﻼً
ﺛﻢ ﻗﺎﻝ ﻟﻬﺎ
ﺃُﺣﺒﻚ !..
ﺗﺴﻤﺮﺕ ﻓﻲ ﻣﻜﺎﻧﻬﺎ ﻭﺍﻧﺘﺎﺑﻬﺎ ﺧﺪﺭ ﻟﺬﻳﺬ ﻭﻏﺎﺻﺖ ﻓﻲ ﻋﻴﻨﻪِ
ﺃﻣﺘﻼﺕ ﻣﺤﺎﺟﺮ ﻋﻴﻨﻬﺎ ﺑﺎﻟﺪﻣﻊ ﻟﻘﺪﺍﺳﺔ ﺍﻟﻠﺤﻈﺔ ﺧﺮﺟﺖ ﻛﻠﻤﺎﺗﻬﺎ ﻋﻄﺮﺓ ﻧﺪﻳﺔ ﻗﺎﻟﺖ ﻟﻪُ : ﺃﻧﺖ ﺍﻟﻘﻄﻌﺔ ﺍﻟﺘﻲ ﻫﺒﻄﺖ ﻣﻦ ﺍﻟﺠﻨﺔ ﻟﺘﻜﻮﻥ ..فجاة جات عمتو صحتو من النوم قالت ليهو قوم اسقي الحمير من الضهر يهنقن عطشانات 😂😂
#منقول

*الجداد والدجاج* 🐓
في هذه المقالة رأيت أن أسلط الضوء علي هذه السلعة اﻻستهﻻكية الهامة التي تربعت علي عرش المائدة السودانية بقدرة قادر...
فكلمة *جداد* حرفت من كلمة *دجاج* مثلما حرف غيرها من كلمات في السودان لسر ﻻيعلمه اﻻ الله الواحد اﻻحد...إذ تقول إحداهن مفتخرة بزوجها: راجلي شغال في *الديش* ، وتقصد *الجيش* ، واﻻخري تقول : أنا راجلي شغال في *سﻻح _الصاقعة*_ الفي _*الشدرة*_....وعندما كنا صغاراً كان أحد أندادنا يقول ، وبملء فيه: أنا أبوي سواق *باظات* ، ويعني *بصات* ...وفي يوم العيد توصي ست النفر ابنها عوج الدرب أن يلبس المنطلون اﻻصفر ، وقميص تحرمني منك المشخط ، و لا ينسي الفنيلة الكحلية أم حماﻻت ، وإن أبدي اعتراضا ، فإنها تطلب منه بكل حزم أن يترك *الفلفسة*
أما عندما يكون أحدنا في حالة _زهو_فهو يردد من أعماقه ، الله _الليمون والبرتكان الناير_ .
وتتسع *دائرة قليب الكﻻم* عندما يصر أحدهم علي أم ضبان بدﻻ من أم ضوا" بان...
وأعلن من هذا المنبر عن جهلي التام بسر العﻻقة ما بين *كوشة الزفاف*، *وكوشة النفايات* ، وشتان ما بين اﻻثنتين.
أما *الجداد* فهو نوعان ، *جداد حلة*، *ودجاج فقاسات* ، ودجاج الفقاسات نوعه أبيض ناصع يسر الناظرين ، ويأتيه رزقه رغدا"
أما جداد الحلة ، فلونه أغبش...أحمر... أصفر ، زي شفق المغارب ، ويجازف مثل شماسة الخرطوم في الحصول على قوته اليومي ... وتمتاز دجاجة الفقاسات بالهدوء والرزانة والمنطق وتمشي الهويني كما يمشي الوجي الوحل....وتوصف بأنها نؤوم الضحا ، ومتجدعة ﻻبعد مدي ، أما _جدادة الحلة_دائما تجدها خفيفة ولفيفة ورشيقة أكثر من اللزوم وفضولية وﻻ تستقر علي حال بل تزازي من بيت لبيت ومن راكوبة لراكوبة ومن تحت زير لتحت دوكة ومن تحت عنقريب لتحت حيطة .
وما تنتجه _دجاجة الفقاسات_ يسمي *بيضا"* ، ويوضع في قوالب جميلة وجذابة ، وآخر تقليعه كمان عليه تاريخ صﻻحية ويباع في أغلب الأحيان في *البغاﻻت* أو *البقاﻻت* .
أما ماتنتجه _جدادة الحلة_ فيسمي *جنا جداد*، ولونه غير مستقر ، وكذلك حجمه وتسمي صغار الدجاجة *بالكتاكيت* أما صغار الجدادة فتسمي *بالسواسيو* ، وإذا بلغ _الكتكوت_ الحلم فهو *فرخة* أما إذا بلغ _السوسيو_ الحلم فهو *فروج/فروجة* .
فتن أحد الشعراء المرهفين بدجاج الفقاسات فقال:
*دجاجي يلقط الحب.... ويجري وهو فرحان*
اﻻ أنه بهت لما رأي البشتنة والوضع المزري الذي يعيشه جداد الحلة ، فقال بحسرة
*جدادي يبلع السفة....ويجري وهو سكران*
ويحكي أن دجاج حلة ما قد شارك المدعوين في سكسكتهم وهجيجهم عندما سمع الفنان يؤدي أغنية *حبة....حبة*
وﻻ يفوتني أن أذكركم أن الديك يلعب دوراً هاماً في اﻻعﻻم دونك عنه صحاف بﻻد الرافدين...اﻻ أنه يعاب عليه عدم مراعاة شعور النائمين...خاصة عندما يواجه ديك حلة آخر وتحدث المشاترات ونتف الريش.
وعند التسويق يجمع دجاج الفقاسات في اقفاص زاهية جميلة ، وفي طريقه إلي السوق تجده هادئاً مؤدبا كأنه ذاهب إلي قاعة الصداقة .
أما جداد الحلة فتجده يكاكي بصوت عالي مستنجدا" بناس الحلة ، وﻻنه تفتيحة ، فإنه يعرف دنو أجله ،'لهذا تجده يزيد في المكاكاة ، والسكلبة كلما أحس بفرملة اللوري أو البوكس . ونسبة ﻻن الخير يخص والشر يعم فإن مرض سمير الليفي ﻻ يفرق بين *دجاجة* و *جدادة* ، وعند موسم مرض سمير تتساقط دجاجات بلدي مثل أوراق الخريف.
يلعب *الدجاج* و *الجداد* دورا هاما" في اﻻقتصاد الوطني ، لكن رغم تكاثره وتواجده بين ظهرانينا صباحاً ومساءا" ، اﻻ أننا لا نتناوله اﻻ عندما ينكسر أحد أفراد اﻻسرة ، فيوصي حينها بأكل الجداد والترمس ﻻنهما يجبران الكسر ، أو عندما تلد إحدي نسائنا الماجدات ...

*🍀🐓ماهي قصة سهر الجداد وﻻ نومه🐓🍀*

قالوا في واحد في قرية مربي جداد...،، وبعدين الحلة جوها ثعالب كل يوم يجي يلقي الجداد ناقص.....قام فكر في قفص وعمله فعﻻ" ، الثعالب زعلت زعل شديد ، واحد من الثعالب المحموقين قام دخل *ضنبو* جوه القفص ، وبقي يحركوا.....
يقوووووم *الجداد* يكووووورك.....الثعالب المعاهو ...سألوهوا ...قالوووا ليهو ...ليه بتعمل كدة....؟
*قااااال ليهم.....سهر الجدااااد وﻻ نوووومه*.
طبعاً المثل ده بنطبق علينا حسة نحنا كسودانيين بعد فك الحظر اﻻمريكي عن السودان في عهد أوباما وتولية ترامب الحكم ...زعل علينا اﻻخير وقام دخل لينا ضنبوا وبدأ يعمل عملة الثعلب بقراراته اﻻخيرة دي....!!!

اسباب نجاح الزواج . .
على حسب فهمى مع انى صغيرة فى السن . . بس اتعاملته مع ناس كتااار . . وناس كتااار بحكو لى مشاكلهم . . فهمته من تجاربهم الحاجات دى
اول حاجه . . نجاح الزواج ما ليهو علاقه بالحب والوعود الاوليه . . حياة تانيه بالجد . . بس ليهو علاقه بالتفاهم والاتفاق على كل صغيرة وكبيره . . الحب بحلى ليك طعم الحياة بس ما بحل ليك المشاكل . . خصوصا لو دخلو اطراف تانيه بعد دة حتى لو الحب موجود ممكن عادى الزواج يفشل ويكون الحب موجود . . عشان كدة اتفاهو اول . . كل زول يرسم حياتوو مع زولو بالتفاهم وحسب الواقع والعادات والتقاليد .
تانى حاجه . . اى زواج فيهو مشاكل . . مستحيل تلقى حياة خاليه من المشاكل خالص . . بس المشاكل دى بتتحله بى حاجتين . . الاولى انو لازم الطرفين يتقبلو عيوب بعض ولازم الطرفين يتقبلو الظروف بعض . . العيوب دى بتعلق بالطباع دايما . . يعنى دة صعب ودة احمق ودة بمسك فى قلبو . . عيوب زى دى . . اهم شى الزول يتعامل معاها بصدر رحب وبالعتزار لانو بطيب الخاطر . . والاعتراف بالغلط لانو بشفى الغل . .اما الظروف دى يا ظروف ماديه يا ظروف من ناحيه الاهل . . يعنى الوضع المادى دة الناس ما تتكلم فيهو وتحاول تعيش بالموجود والبنات بالزات ما يطلبو حاجات ما واقعيه . . اما الظروف البتجى من ناحيه الاهل اذا كان اهل الراجل او المراة . . دى ما عندها حل غير الصبر وانك تفهم طبعهم وتحاول تتماشى معاهم خصوصا لو ساكنين سوا . . لانو لو خربته وش العلاقه تانى ما بتمشى لى قدام حتى لو فى حب وتفاهم بين الزوجين . . ماف زول بخلى اهلو والاهل بضغطو شديد اكيد الحل ح يكون فشل الزواج !
تالت حاجه . . فى مشاكل بتكون بسيطه . . بس الزوجين بحلوها بالطلاق . . واحيانا بكون فى اطفال فى النص . . والحاجات البسيطه دى بقصد بها العناد . . يعنى فى ناس شغلهم معاكسه بس بدون اى متطق او مبرر . . الحاجه دى للاسف بتولد الكراهيه !
واسلوب التهديد دة كعب ودة خاصى الرجال بالزات فى واحد بقول ليك لو عملتى كدة طلقانه . . الحاجه دى بتخلق عدم احترام وعدم تقدير بتخلق نظرة ما حلوة . .
اخر حاجه ودى اهم حاجه هى عبارة عن مبدأ امشى بيهو (اذا نفسك فى حاجه قدمها ) . . يعنى نفسك زوجك يتهم بيك اهتم انت بيهو . . عايزو يهديك اهديهو . . عايزو يحكى ليك احكى ليهو . . عايز اى احساس تعيشو معاهو بادر بيهو انت الاول واكيد ح تلاقهو . . حاول علم زولك الحاجات البتحبها براحه براحه . .دى الحاجات البتولد الحب ما بعد الزواج والبتخلى الحب دة يستمر الابتسامه والكلمه الطيبه 😊
علم زوجك ما يخاف منك بالعكس يطمئن ليك . .
الحياة بقت محتاجه زول مرح ياخد الامور ببساطه وحازم فى بعض الامور . . ومع تنشنه الحياة اتعلمو الصبر والتنازل . . وابعدو من الحماقه وركوب الراس وناس كرامتى الزواج والحب ما فيهم كرامه
. . نسأل ربنا سبحانه وتعالى يدى كل العزابه بنات واولاد الشريك الصالح والحب الحلال والسعادة فى الدارين . . ويدي كل المتزوجين السعادة ويهدى سرهم ولو فى اى خلاف بين اى اتنين ربنا يحلو ويرجعهم لى بعض ياااا رب 👐
فى الفترة دى فى ناس كتااار بحكو لى مشاكلهم . . دى الحاجات الفهمتها ان شاء الله نتعلم منها كلنا 😊

#منقول

الإساءات ماحبابا
والكلام الشين جريمه...
كل زول لو صان لسانو
بيبقى عندو مكان وقيمه...
وحقو نحسب كل كلامنا
وننتبه للفيهو ديمه...
والسباب والله بفسد كل
علاقاتنا الحميمه....
ومافي زول في الدنيا
اصلآ قالو مشكور بالشتيمه..
تعالو من الليله نجرد
كل عباراتنا الأليمه..
ونحذف الجمله البتجرح
وكل معانيها العقيمه..
ونحفظ العشره ونصونا
وننهي اي صفات ذميمه..
ومفرداتنا المره ترحل
ونبقى عايشين دون نميمه..
وتزدهر كل المجالس
ونمشي في الطرق السليمه.
............

يوميات مستجد في الخدمة
=============

اول ماخلصت الجامعه عندي قريبي ضابط اتصل علي قال لي تعال نفك ليك الخدمه معانا..
قلت خلاص دا الزيت زاتو ..
اها مشيت ظبطا اموري وشلت امر التحرك ومعسكر خالد بن الوليد جاك الفارس الجحجاح 😌
اها من وصلت البوابه جيت داخل طوالي نظام انا قريب عمك ومافي زول بسالني ..

اها اسمع ليك زول طالع فووق شبكني ليك:
ثااااابت🗣 انا لمن اتخلعت 😳
اها وقفت وجاني ملازم كده قال لي:
عندك شنو ؟؟
قلت ليهو: انا جاي من طرف سيادة العقيد فلان الفلاني وداير اقضي الخدمه الوطنيه ودا امر التحرك بتاعي ..📄
شال الورقه عاين ليها وطبقها دخلا في جيبو وقال لي :
يلا ارنب استعد يامجند ..
بسم الله الرحمن الرحيم😥
كدي اصبر ياشاب
قال لي انا شاب كمان .. انت قايل روحك قاعد في الجامعه ... استخدم لينا الساتر سريع ..😠
هي دي مصيبه شنو الوقعنا فيها دي ؟؟
قلت اخير ارنب نط ..
يازول مشيت ارنب نط مترين كده كثافتي جات ولساني طلع ..
وشفت ليك عربيه قريبي هناك جاي ..
و زي الشافع الشاف امو طوالي قمت وقلت ليهو ارنب شنو ياجنابو البتتكلم عنها .. انا سياده العقيد داك خالي طوالي انت ماعرفتني ولا شنو ..😌
اها دقيقتين وقريبي وصل سلام ما سلم علي 😥
مشا للملازم وقال ليهو المستجد دا دايرك تطلع منو المويه البارده لانو عامل فرعون ومشاكل في الحله ..

هو دا الجايبو فزعه بقا لي وجعه ..😥
وصحت ليهو بي اسمو طبعا هو في البيت عسل بس .. لكن ماعارفو هنا قالب وشو مالو ..؟؟😏
قلت ليهو ياخ انت ما قلت لي بفرغك .. شنو هسي ارنب نط وبتاع. ..😒
قال لي انتباه يا مستجد ياملكي نحنا ماعندنا تفريغ ..
نشتغل معاك زي ما قال الجيش ... ويلا يا جنابو شوف شغلك ومشا خلاني ..😭😭
والملازم بعد كلام عمك نفسو اتفتحت قال لي:
انتباه وامنع الحركه والمحركه والاشياء المتحركه😠
وجاب لي عسكري قال ليهو:
المستجد دا لو حكا اضانو ساي جيبو لي الغرفه رقم تسعه 😠
ومشى خلاني .. وانا واقف والشمس في نص الراس .. واقف ساعه .. وخلاااص الفيني انتهى 😔
قلت للعسكري كدي دقيقه امشي اشرب مويه واجي ..
قال لي مويه شنو يامستجد الجيش دا مافيو مويه ..
عليكم الله شوفو الكافر دا .. انت ماعندك اولاد في البيت😭
قنعني طبعا ..
واها مع الوقفه والدبرسة اشوف ليك الملازم القبيل جا ومعاهو واحد شايفهم من هناك بضحكو ..
قلت خلاص هسي يجو يقولو لي امشي 😃
اها بعد وصلوني صرو وشهم وزولي قال لي:
شايف العمود داااك .. تمشي تسلم عليهو في ظرف تلتين ثانيه وتجي تقيف مكانك ..
اخر الزمن والله كمان امش اسلم علي العمدان😪
طبعا العمود بعيد جنس بعد كان ركبت ركشه داير ليك ساعه بس انا قلت الجري اخير من الوقفه✌
فطوالي جريت اديت العمود كف وجيت .. اخدت لي زي تلت ساعه ..
قلت خلاص بعد الجريه دي تاني بقول لي امشي استريح .
اها وصلتو ونفسي طالع قال لي: بش أب استعد 😥
اها البش أب دي انا بعد التعب دا اربعه مابدقهن
بس قلت ليهو ادق كم ؟
قال لي اشتغل بس الجيش دا مافيهو أسئلة ..😠
اها بديت ادق هو شغال يعد لي .. بعد وصلت تمنيه رجع قال لي تلاته ..
قلت ليهو: قصدك تسعه ياجنابو😥
قال لي داك حساب الجامعه .. حساب الجيش براهو ..
طمم بطني طبعا وشغاال بعد وصلت عشره ونزلت غلبتني القومه تاني😆
وهو شغال لي قوم يا مستجد
قلت ليهو: والله قطعت ..
قالي دا النوم الكتير .. اثبت فوق وقفت وبقيت انفض في قميصي ..
قال لي: اتوسخت ولا شنو تعال جاي نوريك حمام الجيش 😌
انا قلت بتكون ماسوره وكابه بس ماحنك😃
مشيت معاهو لقيت لي ماسوره كاسره وماليا الارض ..
فقلت ليهو وينو الحمام؟؟
دقاني ليك في صدري بي يدو انا لمن كحيت ..😔

قال لي شايف الطين دا امشي ازحف لينا فيهو..
اها دي طبعا صعبه عديل فبقيت واقف مااشتغلت بي كلامو 😓
بس فجاه شفتو كورك لعسكري ..
العسكري جا وحياهو ..
قال ليهو أمشي البوابه جيب ليك بسطونه وحبل وتعال المستجد دا خالف التعليمات 😥
اها جابت ليها دق وربيط اخير ازحف زحفي ساي ..
مشيت علي الطين وبديت ازحف ..
قال لي: يلا اقطع لينا الطين دا بهناك .. وبقيت ازحف .. بعد قطعت بهناك قال لي ازحف تاني ارجع .. تاني رجعت😥
بعد وصلت نص الطين قال لي:
اتدردق نحنا دايرنك انت والطين دا وااحد 😠
عاينت كده وقلت الاتبلبل بعوم .. واتدردقت .. وفعلا بقيت انا والطين واحد ..
وبعد ساعه كده قال لي اثبت فوق .. وقفت علي حيلي والمويه والطين بتشُر والشعر يايُما والهدوم اتبشتنن بشتنة السواد😔
قال لي:
مستاء ولا عادي ..
طبعا عرفت الحنك لو قلت ليهو مستاء حيوريني سواد الليل فقلت ليهو استاء كيف يا جنابو دا شغل الجيش كده☺
قال لي: ايوااا
بس نحنا دايرنك تستاء وقت ما استئت تعال جاي الليله نوريك الاستياء ..
غايتو بقيت اتزكر في البنات الموسرتهن والناس الغشيتهم.. الليله دي ربنا خلص ليكم حقكم 😭
ومشيت وراهو وفي سري قلت الليله بربط