عن القاسم بن الحسن رضي الله عنه


انجان هذا اليوم امك زفتك
ليش دمك صار جاسم حنتك


********


شلون امك ودتك نار اللهب
خاف ماتندل يجسام الدرب
وين درب الزفه من درب الحرب
مدري هيه الحرب صارت قسمتك


*************


بدل ثوب العرس بيش اتحزمت
وعفت حنت الايد بالسيف اطلعت
شلون كلب امك يجاسم من رحت
هم ترد لوماترد من روحتك


***************


شلون ياجسام مووكت الرحيل
عيون امك تعمه يانور ودليل
سال دمع عيونها ودمك يسيل
حنه لودم هذا تارس بدلتك


************************

اشفت من عمرك يمن عمرك حلم
ماتهاب الخيل لوكثرة زلم
ماشفت للموت مثلك يبتسم
بس على المظلوم تجري دمعتك


****************


اشفت من عمرك يجسام وتروح
يوم حنه هذا لويوم الجروح
انجان حنه ليش والدتك تنوح
انجان حنه السيف ليش بيمنتك


****************

اليوم زفتك يمه يلرايح بعيد
شافته مذبوح مكطوع الوريد
بدلت بالموت عرسك ياشهيد
اعرفت نصر حسين هيه غايتك

شعرحسن لعيبي الحريشاوي

https://tttttt.me/ssgadAl

استشهاد القاسم بن الحسن رضي الله عنه


علقاسم زيد الحزن دك علصدر
علقاسم ابن الحسن ضي الكمر
ابن الانوار الساطعه
وابن الزياره الجامعه
علقاسم زيد الحزن دك علصدر


**********


ياشمعه ذابت من وكت
ياجنه بالنار انجوت
يبن الحسن ماقصرت
غير الشهاده ماردت
يلقاسم غيره وطبع مثل الحسن
يلقاسم سيفك كطع حبل المحن
علارض من طاح النجم
زيد الحزن زيد اللطم
علقاسم زيد الحزن دك علصدر


****************

ماقصرت يابن الحسن
قصتك كاتبها الزمن
بعمرالورد شفت المحن
عليك السيوف اتخالفن
يلقاسم لومالغدر ماتنولي
يلقاسم ماتنكدر جدك علي
يانور نار على العده
عليك العزاء انردده
علقاسم زيد الحزن دك علصدر

*******************


ياورد عطره من غضب
ويانور علظالم لهب
خاب الي مايعرف حسب
اي خبره مالك بالحرب
يلقاسم لابينوا محد وكف
يلقاسم اتحينوا لحظة ضعف
رادوك لحظة تلتفت
اصواتنا عليك اعتلت
علقاسم زيد الحزن دك علصدر


****************


تحينوا فرصة يابطل
اي لحظه بيها تنشغل
من نكطع شسع النعل
وتصلحه رايد بالعجل
يلقاسم انتظروا الفرصة واجت
يلقاسم اطبروا راسك من طحت
بسيوف ورماح وسهم
تانوه عمرك ينختم
علقاسم زيد الحزن دك علصدر


*************************

يا حال عمك من دره
ياكمر طايح علثره
بالحسن نورك ذكره
والدمع بالحسره جره
يلقاسم انكسر ياعمي الظهر
يلقاسم ياكمر ماظل صبر
يامن تذكرني الحسن
لمن يداهمي الحزن
علقاسم زيد الحزن دك علصدر


****************


يارمله لمن شافتك
لدموم صارت حنتك
عريس تانت زفتك
جاليش طالت نومتك
يلقاسم انظر الصبري انسلب
يلقاسم احظر الموتي كرب
ارفعت راسي للسمة يم حيدر ويم فاطمه
علقاسم زيد الحزن دك علصدر

الشاعر حسن لعيبي الحريشاوي

https://tttttt.me/ssgadAl

نزلة
لاوالله لاوالله ما اهاب الظالمين لاوالله لاوالله اقسم بعمي الحسين


**********

انا من صلب الكرامة والمواقف ثابته
القاسم وعمري نذرته لجل عمي ورادته
غايتي وي عمي وحده حسين للحق غايته
مهجتي ترخص لاجله بدمي افدي مهجته

لاوالله لاوالله امضي عن حق ويقين لاوالله لاوالله اقسم بعمي الحسين

*********

ودعتني اودعتها امي والدمعه تهل
كلت ياوالدتي عذرا لاتضلين بامل
ياعزيزه علي انتي وصعب عنج ارتحل
حسين وحده وي الاعادي شلون يايمه يضل

لاوالله لاوالله عالي راسج والجبين لاوالله لاوالله اقسم بعمي الحسين

**********

ودعتني امي وعفتها يكتل وداع اليطول
ذكرتها بالوصيه والدي اشوصه ويكول
ابني ياقاسم وصيتي حسين هذا ابن الرسول
لويصير ابشده وحده بسيفك على الطاغي صول

لاوالله لاوالله مايهمني الحاقدين لاوالله لاوالله اقسم بعمي الحسين

********

كل شبابي مااريده ولاعرس رايد ابد
اليوم عمي حسين وحده لانصير ولاعدد
احنه علحق والرساله واحنه صح المعتقد
وهمه علباطل اصلهم عل دسايس والحقد

لاوالله لاوالله همه جمع الخاسرين لاوالله لاوالله اقسم بعمي الحسين

******

عمري ما اريده وشبابي ريت عمري للذره
بعد الاكبر وابوفاضل ذاكه سبع الكنطره
ولااشوفن دمع زينب والخيام اموجره
يابو السجاد خادم ردت يوم الاخره

لاوالله لاوالله مااهاب ولا الين لاوالله لاوالله اقسم بعمي الحسين

شعر حسن لعيبي الحريشاوي

https://tttttt.me/ssgadAl

عن القاسم بن الحسن

ايقن بالرحيل في منظر جميل
هذا فتى من مطلع الطور بكيت نورا جاء من نور
كانه قتيل في منظرجميل

*****************

اهناك من خيمة طلع وجه النهار من مطلع السلامه
ودع امه وبالكلب مشعول نار وعينه على امامه
يايمه كلي شقررت اخر قرار بس تنتظر كلامه
يايمه بعد حسين عمري مرار ودعها بابتسامه

بدولة النفاق العمرلايطاق
قدمت للرحمان قربانا انال منه اليوم رضوانا
من ربي الجليل بمنظر جميل

*******************

ودع امه ومسح دمعات الحزن بحسره كتم عذابه
وين وين اتريد ياابن الحسن من زادت بعتابه
شلون شمعاتك يجاسم لوطفن يلعمرك ابشبابه
دمعه دمعه عيوني تدريهن عمن كلبي شكثر مصابه

اماه تعلمين اماه ماالحسين
هذا حبيب المصطفى طاها وفاطم الزهراء عيناها
فماله مثيل بمنظر جميل

**********************

تدرين يمه شكال ابوي الحسن جنتي تذكريني
يارمله كلج ردته يوم المحن ضميته لحسيني
هليوم انتظره واجه ما اظن يمه تمنعيني
الروح هوه حسين جنة عدن هوه نظر عيني

والحب والمثال وكعبة الامال
هذا حسين للردى يمشي فكيف اهوى لذة العيش
لاعيش للذليل بمنظر جميل

*******************

الفرح يرحل مااريد العرس كل فرحتي بسيفي
اعداي القنهم ييمه درس من اخذ ابحيفي
الويل لهل الظلم واتباع الرجس منهجي وتكليفي
الموت ظيف وليه اجاني احس انا افرح بظيفي

الموت ظيف قلت ياموتي اهلا انادي عاليا صوتي
السيف في اليمين لنصرت الحسين
فاعشق الرحيل بمنظر جميل

*********************

يايمه صدكي مااريده العمر مااريدن سنيني
يايمه الاسلام صار ابخطر محد يمس ديني
حسين لاناصر بقه ينتظر من شفته بعيني
الدين دم وتضحيه ينتصر يايمه شجعيني

الدين اذ يكون يصنعه المنون
هذي دمائي اعلنت رفضي دون الحسين للردى امضي
بسيفي الصقيل بمنظر جميل


الشاعر حسن لعيبي الحريشاوي

https://tttttt.me/ssgadAl

جاسم جمال الله يوليدي واسم الله
من طاري الغياب
ــــــــــــــــــــــــــــــــــــــ
ياغبشــــه وصبـاح الخيـر ... شمحلاهه بلسانك
يالطــــولك شطب ريحان ... يافلتــــة زمــــانك
وسط الخيمه بش عطـرك ... ظـل تارس مكانك
حبني ابراسي واشبـگـنـي ... وغـرگني ابحنانك

من گبل الإمفارگ خلينه نتشابگ
ياهيبة الشباب
ــــــــــــــــــــــــــــــــــــــ
يالتنگط خجل واخلاق ... من تگبل عليه
راكع ما شلـت راســــك ... واتبـوس بديه
أفّن ما گلت فــــد يـوم ... يبني يالشفـيه
مو أم آنــــه بوجـــودك ... ياجاســم نبيه

ياخوفي لو ترحل والفرحه تتبدل
بالدمعه والمصاب
ــــــــــــــــــــــــــــــــــــــ
لو زرنه الحسـن تبعـد ... إشگد روحك أصيله
أتگلي إبراحتج أبچي ... يمه وســـولـفـــيـــله
گليـلــه بأمـــان اللـــه ... والسـفـــره طـــويله
باچـــر كلنه نتـــذبـح ... لـــعـــيـــون العقيـله

ويتطوع القاسم إبعسكر بني هاشم
وايلاوي الصعاب
ــــــــــــــــــــــــــــــــــــــ
ابنك يالحسن مثلك ... آيه إمـن الاحسـاس
راح إيعـزب ابروحه ... وعيب يدنگ الراس
وگليله العرس عافه ... بالطف ماكو أعراس
وباچر حيدر ايزفــه ... وايـهـــوسلـه عباس

نخطبله حوريه إنعرسه ابحسينيه
ومضمون إله الثواب
ــــــــــــــــــــــــــــــــــــــ
روح وبيرغ إعمامــك ... لا مايبقه مكــســـور
ومن تستشهد الدينك ... حگك يبني معـــذور
هوه العاشگ احسينه ... يمشي أبدمه عاشور
ينسه النـــار والجــنه ... ويعبر سبع الابحــور

ميفكر شياخذ بگلبه العشگ نافذ
ومن المصيبه ذاب
ــــــــــــــــــــــــــــــــــــــ
ولو جابولي الاجنـازه ... تدري إشلون أشيعك
من تابـوتـك الحضني ... يــاجـــســـام أطلعك
وحـــد المگبـره ابوني ... يــاعـــريـــس اتبعك
حسره وتاكل ابروحي ... ما حنـيـــت اصبعك

يالشمعتك تضوي بس فرگتك تچوي
ياحصة التراب



#العبدالحسيني_محمدالجماسي

https://tttttt.me/ssgadAl

عن لسان القاسم بن الحسن عليه السلام


لاوالله لاوالله ما اهاب الظالمين لاوالله لاوالله اقسم بعمي الحسين


**************************************

انا من صلب الكرامة والمواقف ثابته
القاسم وعمري نذرته لجل عمي ورادته
غايتي وي عمي وحده حسين للحق غايته
مهجتي ترخص لاجله بدمي افدي مهجته

لاوالله لاوالله امضي عن حق ويقين لاوالله لاوالله اقسم بعمي الحسين

*************************************

ودعتني اودعتها امي والدمعه تهل
كلت ياوالدتي عذرا لاتضلين بامل
ياعزيزه علي انتي وصعب عنج ارتحل
حسين وحده وي الاعادي شلون يايمه يضل

لاوالله لاوالله عالي راسج والجبين لاوالله لاوالله اقسم بعمي الحسين

**************************************

ودعتني امي وعفتها يكتل وداع اليطول
ذكرتها بالوصيه والدي اشوصه ويكول
ابني ياقاسم وصيتي حسين هذا ابن الرسول
لويصير ابشده وحده بسيفك على الطاغي صول

لاوالله لاوالله مايهمني الحاقدين لاوالله لاوالله اقسم بعمي الحسين

************************************

كل شبابي مااريده ولاعرس رايد ابد
اليوم عمي حسين وحده لانصير ولاعدد
احنه علحق والرساله واحنه صح المعتقد
وهمه علباطل اصلهم علدسايس والحقد

لاوالله لاوالله همه جمع الخاسرين لاوالله لاوالله اقسم بعمي الحسين

**********************************

عمري ما اريده وشبابي ريت عمري للذره
بعد الاكبروابوفاضل ذاكه سبع الكنطره
ولااشوفن دمع زينب والخيام اموجره
يابو السجاد خادم ردت يوم الاخره

لاوالله لاوالله مااهاب ولا الين لاوالله لاوالله اقسم بعمي الحسين


الشاعر حسن لعيبي الحريشاوي

https://tttttt.me/ssgadAl

ألمن ايدچ تلوح ..... يرمله
على يازلمه مذبوح ..يرمله

على جسام يارمله تصيحين ...ابن الحسن
لو عالمهدي من صحتي تريدين.. ابن الحسن
يرمله. يرمله
--------------------------------------------------
ايدچ شايله. وصرتي معلعله
ونياحچ عله. ونين

سلاچ الدمع. وكلبچ منشلع
وحالچ منفجع. وين

صوتچ يشبه صياح المخيم
من اتذبحن وتلطخن دم
ترسمين اعله طولچ رمله تل هم
تشبهين شكثر عاشر محرم

خلصت روحچ نياح. يرمله
جاسم عنچ وراح. يرمله

أشوفچ بالطفوف أنتي تركضين. ابن الحسن
لو عالمهدي من صحتي تريدين. ابن الحسن
يرمله. يرمله
--------------------------------------------------
عيونچ تنفتح. بعيون الصبح
وروحچ تنذبح. ويل

تبچين بهمس. ودمعچ ينغرس
وأذنچ تنترس. خيل

على جسام يارمله تدورين
من هجمو وشبوهه الصواوين
وزينب لزمتچ لمن تعثرين
بكلبچ نار عالنار وتطيحين

طحتي بزحمة الناس. يرمله
اظن صحتي يعباس. يرمله

تأشرين بچفوفچ من تونين. ابن الحسن
لو عالمهدي من صحتي تريدين. ابن الحسن
يرمله. يرمله
--------------------------------------------------
ياهو الينتظر. ودمعچ لو صبر
ليلچ لو عصر. ظيم

صرتي بلوعتچ حركو خيمتچ
وكبرت دمعتچ. غيم

العسكر من هجم وأنتي چبيره
ماسامع بنص هيمه الأميره
الأميره شلون تتحول أسيره
وتگعد عالتراب بلا حصيره

عالهزل صعتي. ،،، يرمله
بالتربان نمتي. يرمله

بچيتي الهزل لمن تنوحين. ابن الحسن
لو عالمهدي من صحتي تريدين. ابن الحسن
يرمله. يرمله
---------------------------------------------------
ياسورة حمد. ماتحمل بعد
جاسم ينفگد. ليش

طفچ والخيم. وجروح العلم
وبروحچ ألم. جيش

ضهر الناگه صارالچ وساده
وأنتي أبيت كل أهله قياده
جفچ والحبل واضح سواده
جفچ عالحبل اسود زياده

بعد مجيب الأيام. يرمله
مثل الچان جسام. يرمله

بعد بهدومن رمله تمشين. ابن الحسن
لو عالمهدي من صحتي تريدين. ابن الحسن
يرمله. يرمله
--------------------------------------------------
شدن بالعبي. والناگه تحبيّ
وبيام السبي. اهناك

يااهل الترف. ماعدهم شرف
من هذا السلف. هاك

الحبل برگابچن ياويل مشبوگ
التميل من النياگ اطيح بالسوگ
النفس والصوت حتى الشوف مخنوگ
وزينب تلتفت والجفن مطبوگ

زينب صاحت عليچ يرمله
الحبل خلي على اديچ يرمله

بعد ما مش أهل ألمن تنضرين ابن الحسن
لو عالمهدي من صحتي تريدين ابن الحسن
يرمله يرمله
---------------------------------------------------


🔸️عبد زينب 🔸️
محمد الابراهيمي

https://tttttt.me/ssgadAl

چفك ياجاسم حني حني
وشموعك يبجن يبني يبني

وين رايح يافتشت عيني
انه امك لتخليني
طاحن بالكاع سنيني ا ا ا
تقبل امك تتيتم
مهدوم بروحي خيم
جاسم وبأمك تعلم

أريد.... تعبي وايامي وسهري وينه
أريد.... الشلته بأحشائي مغمض عينه
أريد.... ساكت وأنه امك متحاجينه
_
معرس جاسم كدامي ضامي
شمعةْ عمري واحلامي أيامي

عين.... تبجي العين وملجومه
ياعطر ومالي الحومه
منك امك محرومه ا ا ا
صيواني تهدم بيه
امك لاتبطي عليه
رمله تموت بلا جيه

اصيح.... ماريد عيونج دنيا وفوتي
اصيح.... خلصت صياحي وشيب صوتي
اصيح .... وينك يايمه ومجبل موتي
.........
يوليدي ورفعة راسي ....راسي
اسمك يمشي بأنفاس.....انفاسي

سهام ..... ماتعرف رمله اتاني
ابني الواحد ماجاني
بنص الخيل وخلاني ا ا ا
هدت ياطايح وينك
كوم اكعد شوف بعينك
ياوسفه اطيح سنينك

ذبيح..... بجرحك يوليدي تراب يذري
ذبيح..... مو عمرك ريته الرايح عمري
ذبيح..... شبو خيمتنه جاسم تدري
__
طايح وتسيل دموعك يبني
جيش ويسحك بضلوعك يبني
خيل...... ضلوعك ماتحمل حافر
ياجاسم روحي تكابر
بعيونك نضره حاير
روحك ماتنهض حته
ودموعك سالت سكته
جيش يسلب سالفته

خيام...... الخيمه اللمتنه صارت جمره
خيام..... الخيمه ذبحوها وصارت حمره
خيام..... وامك طكوها بسوط وصطره
..........
ودعتك وأنت توادع.......توادع
من راسك شفته يباوع......يباوع

حيل...... مشتاكه البسمت روحك
بس انت برمح جروحك
عالي هواي ومالوحك
أنزل وأسمع اهاتي
وامسح بيدك دمعاتي
وسكت جمره صيحاتي
هيام ....... صعبه تفاركني الوحدي
هيام ..... الهزله اتانيني ودمعي اليحدي
هيام ....... ياشالع روحي ومارد جبدي



عبد زينب
محمدالابراهيمي

https://tttttt.me/ssgadAl

ودعونه الما يرجعون
إموادع الدمعه للعيون
ياشباب القاسم الله اوياكم
لازم ابجنة عدن نلكاكم
ما يرجعون.
--------------------------؛
يلي خليتوا الشمس تعشك ضواكم
والهوه من يختنك يشتم هواكم
جم كلب أم بطل إيدك من جفاكم
وجم يتيم الشمر أحلامه وراكم

ما نكللكم حرامات
المات لجل الفتوه مامات
ياجرحنه النازف إشينساكم
لازم إبجنة عدن نلكاكم
ما يرجعون
---------------------------؛
ما ضريتوا العلكمي ينداس مايه
ولا رضيتوا الشمر ينظر للنثايه
صحتوا زفنه ياحسين اعله المنايه
إنموت بس ما ترجع ايام السبايه

عفتوا رمله ابلايه جسام
صرتوا عباس اعله الخيام
وجم رقيه أمنت بحماكم
لازم إبجنة عدن نلكاكم
مايرجعون
---------------------------؛
حسين ناداكم ألا هل من مناصر
صدري ماضل بي ضلع يحمل حوافر
والنعم يالصحتوا تفداك المناحر
وداعتك لا نترس احلوك المكابر

إلمهم ما توصل خيول
ويم ظريحك ترجع اتصول
ولا سهم من حرمله يدناكم
لازم بجنة عدن نلكاكم
مايرجعون
----------------------------؛
خلي كل واح يشوف امه اشتكله
الزفه عالتابوت يبني اهوايه احله
الحنه ما تنراد اذا وياهه ذله
والي مثلك بالعرس يايمه شله

روح وي ربعك يمدلول
وما أريدن توصل خيول غايره وتسحك صدرمولاكم
لازم إبجنة عدن نلكاكم
مايرجعون
---------------------------؛
عفيه يبني الما غفه اولا نام ساعه
من نظرشمر الخنه داس اعله كاعه
إوياك ما ضاع الربه وطيب الرضاعه
وكابلت ريح العده ابهمه وشجاعه

يالرفضتوا الحنه والياس
وصحتوا فدوه العين عباس
بالحشر راح افتخر بدماكم
لازم بجنة عدن نلكاكم
مايرجعون
---------------------------؛
شكرا الكم يا اسود الجعفريه
ما نجازي افضالكم لا والزجيه
يالي شيبتم كلوب المرجعيه
جروحكم نزفت عله الساترحميه

يالجركم بعده ما طاب
مسحي وخجلان التراب
منكم بيوم الذي غطاكم
لازم بجنة عدن نلكاكم
ما يرجعون
----------------------------؛
ش/علي الإبراهيمي

https://tttttt.me/ssgadAl

يا شباب إتباركولي
جرح البكلبي إعله طولي
زفيت الولد لسيوف عطشانه
وبحرالشمس ذاكه إويه خوانه
جرح البكلبي اعله طولي
---------------------------؛
ياشباب الجان زارع بيه ياسه
شعره لاحه تراب من طاح اعله رأسه
سهم الموادع رماني وكلبي جاسه
ساعدوني بزفته يا اغله ناسه

شيدتله بعيني حوفه
وبيهه كاعد جنت اشوفه
ما أدري اعله تالي يفرغ امچانه
وبحر الشمس ذاكه إويه خوانه
جرح البكلبي إعله طول
----------------------------؛
گلي يمه إوداعتج هاي النهايه
إمنيلج ماي وتذبينه ورايه
إقري سورة ياعلي واقريلج آيه
إبين متوذرني أبناء البغايه

گلي حسبة آخ وأرجع
شويه بس طعنات أشبع
عمي ابلا معين وروحه خلصانه
وبحر الشمس ذاكه إويه خوانه
جرح البكلبي إعله طولي
--------------------------؛
يا شباب الليله جاسمكم يعرس
اتباركولي وبالفرح سووله مجلس
إبني جان ابمدرسة دلالي يدرس
وگامت سيوف العده فوكا تهوس

ذاكه مرمي ويمه الاكبر
ولايك إعلي لون الأحمر
متحني إبدما وشفافه ذبلانه
وبحر الشمس ذاك إويه خوانه
جرح البكلبي إعله طولي
--------------------------؛
يا شباب ابزفته سووله عزيه
كاشخ ابني ولابس سيوف المنيه
ابني ولهان ويحب الغاضريه
والسهام العرسه صارن واهليه

آنه ناذرته لإمامي
عني راح وكله ضامي
وياعريس بالله اليابس السانه
وبحرالشمس ذاك إويه خوانه
جرح البكلبي اعله طولي
----------------------------؛
أجمل العرسان جاسم بالقيافه
إمحصن بعباس من عين إلي شافه
خلو دمعات الحزن تروي إبشفافه
وياحسين اتصير هلهولة زفافه

جلمة امبارك يرمله
بالوداع إهوايه أحله
وشبيدي إعله سيف الكطع شريانه
وبحر الشمس ذاكه إويه خوانه
جرح البكلبي أعله طولي
----------------------------؛
الصفگه لطمه إتصير أريدن بالمآتم
وخلهه تنشد هالعرس المن الوادم
گولوا هذا الفرح لبن الحسن جاسم
وحاضره بهذا الفرح كل الهواشم

هذا عرس إلإسمه هيبه
وآنه فرحانه بنصيبه
وأهلآ بالغيور اليفرح إويانه
وبحرالشمس ذاكه إويه خوانه
جرح البكلبي إعله طولي
---------------------------؛
ش/علي الإبراهيمي

https://tttttt.me/ssgadAl

لطميه للإمام القاسم ع
****
جاسم نزل للمعركة. ..كومي يرمله ادعيله
**************
جاسم برز نوره يشع. ...كومي يرمله ادعيله *
عوفي العرس طفي الشمع. ..كومي يرمله ادعيله *
والحنه دوفيها ابدمع. ......كومي يرمله ادعيله *

خبري الرباب وليله. ..كومي يرمله ادعيله
جاسم نزل للمعركة. . كومي يرمله ادعيله *
* * *
شبل الحسن لمن برز. ..كومي يرمله ادعيله *
برض المعاره وارتجز. ..كومي يرمله ادعيله *
بيهم يذببح ماعجز. .كومي يرمله ادعيله *

وكلها تصيح ادخيله. ..كومي يرمله ادعيله *
جاسم نزل للمعركة. . كومي يرمله ادعيله *
* * * *
بنصهم وكف جنه رمح. ..كومي يرمله ادعيله *
بكيفه ايتخير بل ذبح. .كومي يرمله ادعيله *
ماعنده واحد ينجرح. .كومي يرمله ادعيله *

ياحره لاتبجيله. ..كومي يرمله ادعيله *
جاسم نزل للمعركة. . كومي يرمله ادعيله *
****
جن حيدر اعليهم حمل ..كومي يرمله ادعيله *
عملت بدر بيهم عمل. .كومي يرمله ادعيله *
ورداهم اليوم الجمل. .كومي يرمله ادعيله *

بل جيش صارت ميله. .كومي يرمله ادعيله *
جاسم نزل للمعركة. كومي يرمله ادعيله *
* * * *
زلزال طاح إعله الكفر. .كومي يرمله ادعيله *
وراواهم انجوم الضهر. .كومي يرمله ادعيله *
والقاسم بهذا العمر. .كومي يرمله ادعيله *

من علي ماخذ حيله. .كومي يرمله ادعيله *
جاسم نزل للمعركة. . . كومي يرمله ادعيله *
_____الشاعر عمار الدراجي ________

https://tttttt.me/ssgadAl

الى القاسم العريس
-------------------------

ماحنت العريس طفت شمعها
عالقاسم المبذوح صبت دمعها
حنتة بدمه ---- مفجوعه امه -- صبت دمها
---------------------------------------
انفجعت امه والعرس ماتمته
لان للحومه ابنها زفته
جاسم العريس من دم ركبته
تصير رادت امه تصبح حنته
والحنه صارت وين برض الحرايب
من زفت العــــريس شافت مصايب
تنتحب يمه --- مفجوعه امه -- صبت دمها
--------------------------------
جاسم العريس قدمها ثمن
روحه لن عدنه وصيه من الحسن
و رمله امه الشافت الوان المحن
عيونها لمن بجت بالطف عمن
ماتتم العـــــريس فرحت زفافه
هذا المصير الجان بالطف تخافه
بلوعته وهمه --- مفجوعه امه -- صبت دمها
----------------------------
قدمت رمله ابنها بهل مصاب
ونار حست بالكلب نار الغياب
جاسم العريس ماحس بالشباب
لان دم نحره صفه بجفه خضاب
من الحسن جسام عنده وصيه
ينذر العمه الروح بالغاضريه
اتمنت اتظمه --- مفجوعه امه -- صبت دمها
----------------------

جابو العريس دامي الخيمته
رمله مذبوح الابن من شافته
امه مفجوعه تشمه وظمته
ويمها زينب تون تنحب عمته
زينب على العريس تنحب بعبره
من شافته مذبوح شمته بنحره
وتنادي عمه ---- مفجوعه امه -- صبت دمها
---------------------
تبجي وتنوح بكلبها المنفجع
وصاحت امه كافي طفوه للشمع
خل على اوليدي اصب دم مو دمع
وراح اعيش العمر مكسورت ضلع
مفجوعه امه تصيح والدمعه بالعين
كل احنه فدوه انروح لو سالم حسين
بالطف تقدمه ---- مفجوعه امه -- صبت دمها


الشاعر السيد رياض الرسل الجابري

https://tttttt.me/ssgadAl

تغفه عله بعدي شلون وبكبرك تنام
وجنت انه اخاف اعليك حتى من الأحلام
يمه عبدلله ____ يمه عبدلله

ليش عفت امك تلولي بحضن خالي
رد عليه حلوه يا ذيج اليالي
يمه هايه نومتك بهذلت حالي
شلون عيني تنام وأني مضيعه غالي

لو يبرد ابني شلون ياهو اليغطي
ماجه اعله بالي النوم ما فكرت بي
يمه عبدلله _ يمه عبدلله
_____________________________
إني بستانك يا يمه رد عليه
كماطك وكاروك متانين جيه
لغيرك إني ياهو اكله ليه ليه
ياهو عكبك ياشمعتي تلعبه اديه

متوقعه تكبر عود عريس اشوفك
ما ادري اني الموت لازم جفوفك
يمه عبدلله _ يمه عبدلله
_____________________________
ياهو الوليله بعد ويده تكضني
خلافك إني دمعتي نامت بحضني
صعبه اليفارك محب والكلشي يعني
يمه يا عبدلله فدوه وياك اخذني

ضل حضني وحشه عليك عوف الكبر كوم
جندوب اضل يازين اشتهم بلهدوم
يمه عبدلله ____ يمه عبدلله
_____________________________
المثل حلك يمه هسه بمهده نايم
وانته مسرع عل كبر رايحله هايم
شوفي جندوب عله طولك يبقه صايم
الموت من كلك تفضل كله دايم

ما يرضه إني وياك يأخذني البين
خل الدمع نيشان فوك الوجنتين
يمه عبدلله _ يمه عبدلله
_____________________________
يمه كون وياك أريد اغفه أنه ليله
مكابل يضل صورته الفاكد خليله
والدمع ما يركد ويجري اعله حيله
وجيت المغرب علي كلش ثجيله

فكدك يبعد الروح ما خل بي حال
كلشي اندفن وياك بس الجسد ضال
يمه عبدلله ____ يمه عبدلله
_____________________________ الشاعر : أنور خلف البيضاني

https://tttttt.me/ssgadAl

قصيده بحق القاسم العريس


حگ الشباب اعـلـه الشباب الليلــه
نتوجه الباري السـمـه ونشگـيـلــه
المايبچي عالقاسم الــف ياويـلــــه
عاف الزفاف وراح ضحه بدمه


هاللـيـلــه نبچي عالشباب وننعـــه
كلمن فگد عريس يبچي بــدمــعـه
والقاسم اسيوف الاعادي اتگطعه
الله يساعدها بمصابه أمــه


الله جعــل نــوره وجـلالت قـــدره
بالقاسم العــريـس روح ونظـــره
بعده زغير وضحه بالطف عمره
شنهو العمر كل العمر ماهمه







من شال سيفه القاسم وشن غاره
براية محــمــد وشايــل وبــتـــاره
كل آل اميه انـــذهلت ومحــتــاره
ابن الحسن بالطف تخلد اسمه


قـاتـل قتال ابطال وسط الحــومـه
وأمه تنظــره عالبعـــد مالــومــه
ماتـدري بالعـريس هــذا يــومــه
ماقصر القاسم وثابت عزمه


نــوره تشعـشـع يشبه الياقــوتـــه
قاسم رفع عالظلم عالي صـوتـــه
بالطف تمنه يصير قاسم مــوتـــه
ضحه بشبابه الدين جده وعمه


الشاعر السيد رياض الرسل الجابري

https://tttttt.me/ssgadAl

يوم القاسم ابن الحسن ع

يارمله شمعچ طفيه .. العريس دمه محنيه
يارمله ذبحوها الشمس .. چا وينچ وين العرس
يارمله شمعچ طفيه
………………………….....
للحومه جاسم من طلع .. گلبچ وره وليدچ وگع
بين العده ودنگ اظن .. شسع النعل ماله انگطع

من راد شسعه يعدله
بعسكر تحاوط وانوله
وحيدچ بقه محد اله .. أيسي يرمله مارجع

شعندچ يرمله اتانين .. غاب الولد عن العين
غاب وبعد شوماله حس .. چا وينچ وين العرس
يارمله شمعچ طفيه
………………………….....
عريسچ ابراسه انطبر .. وفوگ الرمل مخه انتثر
مثل الملبس من يطش .. راس الولد سووه وذر

يارمله هالمنظر صعب
مخه اختلط وي الترب
ودمه على اچتافه يصب .. يجري يرمله چن نهر

ابنچ وگع واتولوه .. وداروا عليه ايطبروه
الطبره عالطبره ترس .. چا وينچ وين العرس
يارمله شمعچ طفيه
………………………….....
ببنچ بقه وشالت نفس .. ياعمي الحگني همس
شافه الشمر وعليه رجع .. وبصدره يارمله رفس

ايلوج ضل اعله الثره
امتاني عمه شأخره
وحسين يمه ومادره .. شاله ولاجاسم يحس

بحظين عمه من مات .. وصالچ بهل كلمات
العمي ضحيت النفس .. چا وينچ وين العرس
يارمله شمعچ طفيه
………………………….....
يارمله طفيه الشمع .. احسين جابه بياوضع
ماشايله بجاسم يجر .. يزحف اجه محني الضلع

لجسام ظهره منكسر
وكلساه ابو اليمه ايعثُر
مهضوم يلطم عالصدر .. وعلى ابن اخوه يجري الدمع

بالقاسم احسين انصاب .. مذبوح عريس وشاب
ثوب العرس ماينلبس .. چا وينچ وين العرس
يارمله شمعچ طفيه
………………………….....
يارمله مذبوح الحلم .. نصين راسه منجسم
ابهيده مومالت حظن .. خافنه جاسم ينلچم

سالم ولاضل بي كتر
لا راس سالم لا صدر
كل جسمه جاسم منعصر .. يحتار البجسمه يلم

شمخليه بيه الطبرات .. ماينلزم بالراحات
حتى لمس ماينلمس .. چا وينچ وين العرس
يارمله شمعچ طفيه
………………………….....
ايسي يرمله من الولد .. ميلمه حظنچ لا بعد
مشتاگه ادري البوسته .. بس الولد ماعنده خد

وجنات جاسم وارمه
طبرات متروسه ودمه
واشفافه فطرها الضمه .. والدم على شفافه جمد

بوجه الولد ضل نيشان .. دم جامد وبي تربان
مغطيات ضحكات الأمس .. چا وينچ وين العرس
يارمله شمعچ طفيه

الشاعر عقيل الحسناوي..

https://tttttt.me/ssgadAl

الليلة الثامنة

( القصيدة بحق الامام القاسم ع )

يجسام بالرؤيه جن..شفت الحسن..للطف حضر يجسام
جاب الك حنه ونشد****آنه عندي جم ولد...يجسام

********************

ارد اسولف حلمي يمه شفته والحال ابتسم
جن ابوك ويانه حاضر يوم البعرسك عِلم
جنه ملتمين كلنه والفرح مالي الخيم
وأغله ماعنده ابوفاضل جابه ونطاك العلم

يكلك...تستاهله...ظل شايله...وزادك فخر...يجسام
وجفي بالرايه عكد****آنه عندي جم ولد...يجسام

*****************

جان مالي العشك عينك مستحه بيك اشكثر
وجن هديه انطاك عمك إغله من ذاك الامر
حسين كلك عكب عمك انته حماي الخدر
ابن اخوي انت واعرفك تكرم لزينب عمر

ابن من...واستغربك...شو والدك...أكرم نهر..يجسام
عالحسن طالع بعد...آنه عندي جم ولد...يجسام

********************

هوسه هوس شفت الاكبر ابن عمك مبتسم
هذا يمه حزام ظهرك حين للحومه تهم
رسّه مابيهـ لخواله شوفه ألمن بالعزم
بي ثلت لحسين اشوفه وثلث عباس الشهم

للحسين...أسمي اريد...أم الشهيد...انطي النحر...يجسام
فدوه للواحد أحد...آنه عندي جم ولد...يجسام

********************

يمه يابستان تعبي مشيتك تنكط ورود
ابوفاضل روح يمه وكله عمي انطيني جود
وتره ابوك يكلي رمله مو أوليدي المايجود
كون اسمع خبر عنك كطع الزينب زنود

أسميك...شيخ الورد...يلا استعد...تترك أثر...يجسام
ياحمامه ويااسد...آنه عندي جم ولد...يجسام

********************

من نزل جبريل يمنه علجنح شايل امل
من طرف خيمتنه شفنه يبارك لعمك نزل
ال هاشم صيت عدهم للعرش صيته وصل
الوحي ما شايف مثلكم وانتوا اصغركم فحل

علي وياك...لو نازلت...لو هوست..ليك النظر...يجسام
أويالحسين إعله العهد...آنه عندي جم ولد

********************

يمه حلمي بشاره صار وانته هذه الي تريد
من هداك الرايه عمك يعني تكطع ليهه ايد
وهوسه الاكبر بعرسك يعني أزفنك شهيد
الحسن من باسك بنحرك يعني ينحزلك وريد

أشارات...وضحن الي...بس وعلي...جفي انعصر...يجسام
يامه هزالك مهد....آنه عندي جم ولد...يجسام

نسألكم الدعاء
علي حسين المياحي

https://tttttt.me/ssgadAl

الليله الثامنه

وياك ما خذت الگلب
وياك جاسم للحرب

رايح شبابك

**********************

من رحت جسام عني عمرك الظل اعله بالي
ما شفت شي من شبابك بعدك بعازة دلالي
جفك الينكط محنه بعده من الحنه خالي
وانه ادري الزمن ياخذ شكو انسان بكلبي غالي

الشموع طفاهه الهوه
وحسيت. ما نرجع سوه

رايح شبابك

**********************

يبني ياجسام رادت روحي تطلع وي طلعتك
جفوفي ما قبلت تحلك بيها من اني حضنتك
ما ردت سيف اني بيدك ردت بيدك كون حنتك
جانت امنيت حياتي تفرح امك يوم زفتك

ما صار. بخيمنه الفرح
واسمع. عريس انذبح

رايح شبابك

**********************

من اجاني خبر موتك يبني هد حيلي شبابك
حنتك محضرتهه امك شرد اكله اني بمصابك
شلون افهمها يجاسم صبح حنتك دم خضابك
يبست الحنه اعله ديها متانيه ترد من غيابك

عرفت. من عيني الدمع
كالت. ميموت السبع

رايح شبابك

**********************

روحي مختنكه اجيتك من شفت ما بيك جيه
يبن اخوي اني اجيتك ردت اشم ريح الخويه
هذه حكي من الخوه الجنت عايش جوه فيه
من الحسن بس انته ردتك والله مو مالت منيه

بس كوم. انطيك العمر
وخلي. يذبحني الشمر

رايح شبابك

**********************

احسب ابعمرك ثواني وجنت اشوف ابعيني تكبر
جنت اشربك ماي عيني مثل ما شربت الاكبر
اني ربيتك بديه وصعبه اعيش بدونك اكدر
يعني من اتموت ارجع محني ظهري وجدمي يعثر


ذابل. جن غصن الورد
وياي. ما جنك ترد

رايح شبابك

**********************

انه اخر واحد ابقه لا معين ولا مناصر
لا اخو يحميلي ظهري ولا ابن اخ اليناطر
وحدي اظل ابمهري افتر تجتمع ضدي العساكر
الشمر يكسرلي ظهري لجن يكسر لختي خاطر


ينحز. راسي من الكفه
وزينب. تمشي مجتفه

رايح شبابك


نسألكم الدعاء
علي حسين المياحي

https://tttttt.me/ssgadAl

السيده رمله تكلم ابنها القاسم عن ابيه الحسن المجتبى وتنقل وصيته اليه وتقول :


أبو محمد يُمه وصانــي
كبل موته وأبجي خلاني
كبل المنيه     ناده عليه     وصه بوصيه
أبو الغيره
 
* * *
 
الوالدك جانت تنحني اكبار الصحابه
تخضع إله شيوخ العرب كلها وتهابه
 
هوه الفريضه وكلها كاصدته
أمة محمد تحلف ابختـــــــــــه
بآخـر حياته منولم شفتـــــــــه
وصلت منيته وخايف اعلى اخته
 
جرت عينه من اتكلـــم
جان بأخته شكثر مهتم
 
عينه أعلى زينب     ودلاله يلهب     يعرفها تتعب
أبو الغيره
 
* * *
 
الخير الوادم بالكلب تحفظ وصيتـــــه
يوصي بعزيزه كل شخص تكرب منيته
 
وكلي أبوك امن اكعدت يمـــــــه
لو شفتي أخوي حسين أبواليمه
وحده وجيوش أعليه ملتمــــــه
خل أبني جاسم يفزع العمـــه
 
ابني اريده بالطف يقاتل
تحت راية ابوفاضـــــــل
 
الكله غيره     اوصيته الاخيره     بشيخ العشيره
أبو الغيره
 
* * *
 
وصه بوصيته المجتبى ويدري أنته كدها
وميخيب ضنه يعرفك لو وصل حدهــــــــا
 
يبن الغيور اليكضي كل كلفه
البلكرم حد أو ما مثل جفــــــه
ينطي اليعرفه واللي ميعرفـــه
ومن نور وجهه الشمس تتخفه
 
لا يهمك زغر سنك
كفو والله كفو منـك
 
يحلالك أنته     كلشي ورثته     صيته وسمعته
أبو الغيره
 
* * *
 
كال أبني أعرفه بالحرب يسحك شوارب
وأنطيه سيفي بكربله بيـــــه خل يحارب
 
مو مهم عمره الزلمه بأفعاله
العنده موقف للسمه شالــه
والويه أخوي حسين هنياله
ماكو مثيل الصفحة أعمالـه
 
أدري كلبه على كلبي
ولا مره زلف دربـــي
 
وي آل هاشم     وسط الملاحم     بيمينه صارم
أبو الغيره
 
* * *
 
من تطب ساحات الحرب يابوالحميه
منك يطش عطر الحسن بالغاضريــه
 
يامن عليك امفصله الغيره
هز هالجيوش وخلهم بحيره
كبر بنصهم يبني تكبيــــــــــره
خل صوت ابوك اتسمعه هالديره
 
وبهجومك على العسكر
يطش أسمه بعد أكثـــــر
 
خل هالجحافل     تصرخ يباسل     هذا اليقاتل
أبو الغيره
 
* * *
 
راسك إذا شفته أرتفع عالسمهريه
راح آنه كلبي ينولم مثل الزجيـــــه
 
خليني أواسي فاطمــه وبتها
وأبجي واشوغن مثل شوغتها
شنهي دموعي أكبــال دمعتها
كل غالي يرخص لأجل مهجتها

كون انطي اعز ناسي
كون الطم على راسي
 
يا أغلى ناسي     خليني أوآسي     بهاي المآسي
أبو الغيره
 
* * *
                                        سلام المشعل

https://tttttt.me/ssgadAl

ام القاسم// ع اتخاطب ولدها القاسم



توه خشن صوتــك واتنطر لشبابـــــك
زرع الأمل يذبـــــل لو طولت غيابـــك

يبني يا طير السعد غيرك شعندي بعد
---------------------------------------
عمرك بعمر الورد واترف يغالـــي
راسمه لطولك امل واحسب ليالــي
امنيه يمدلل تره تعيش بخيالـــــي
بعرسك احصد فرحتي وثمرة دلالي

جبت العمر كلــــه اتأمل واكابـــــر
گلت الصبر يحصد والخاتمه للصابر
حلمي يالغالي ابتعد
---------------------------------------
بگد سنينك كل سنه اتزيد امنياتي
يحله طولك وارسم أمال بحياتــي
ربي تحفظ سلوتي ادعي بصلاتــي
يمه رايدتك ذخر ساعة وفاتـــــي

يسحر حسن وجهك يتغزل اليشوفــــــه
اسمك نغم روحــــي واستأنس بحروفه
انت صيوان وعمد

-----------------------------------------

صوتك يناغم حناني وصعبه تبعــــد
انتظرتك لحضه لحضه لروحي تسعد
قربت اسنين الردته بضلك اكعــــــد
خلّصت امك عمرهه العمرك اتعــــــــد

العدهه ولد يكبر تتحقق الامانــي
وانه كثر خوفي متحيره بزماني
يجرح افراگ الولد
-----------------------------------------
اتفارگ بليل الحزن تقبل حميتـــــــك
وانت حلمي شگد صبرت واناطريتك
يالترف عودك انه بدمعي سگيتـــــك
واسهرت ياما اسهرت من كبريتـــك

كمت اذكر الماضي واتحسر بدمعتي
ليش بعجل رايـــح يالغيبت فرحتـي
ادري بوداعك اشد
-----------------------------------------

تمشي عني ولشوكت ابقى اناطـر
رايح وادري الدرب موت ومخاطر
جفوني تصبح للدمع مثل الگناطــر
تبعد وامك تضل مكسوره خاطــــر

التفگد اعز غالي تتمرمر بعمرهــــه
ضل يمي يوليدي يا دنيتي وسهرهه
الربت انطيهه وعد
-------------------------------------
يبني بحساسي اعرفت بُعدك يطول
يجرح عيوني ودمه دمعي يحــــول
يبقى بحزانه الگلب وبليله معـــــول
هذا حالي وامري للباري اخـــــــول

هو ارحم بحالـــــي ويشاهد العبــــادة
احسب جنت عمرك ما حاسبه الشهاده
ابالي ما خطرت ابد
---------------------------------------

✍الشاعر رعد الجريخي✍

https://tttttt.me/ssgadAl

محرم ١٤٤١
القاسم بن الحسن (عليه السلام)

ﭽـنَّــه الـمــوت امـفـرحـك
راجـع نـحـــرك يـضـــحـك
وابـمــوتـك ﮔـدمـا فرحـان
وج اشـمــوعــك جـرحــك

فدوه لعـمك روحي وروحك..بس شو ذني هـواي اجروحـك
يـا سـيـف اتـجـرء وايلوحـك....يـالـﭽــنــك مــاي
وجهـك ويـنه شماله اتبضـع..أمـسح جـرحـك دمـك يطـلـع
وعـيوني الا بوجهـك تـقـنــع....وشـلـون بـهـــاي

كــــل الـنــــور ابـــوجــهـــك
جــرحــك ويـــن يـشـبــهــك
وحسبالي أنه اعلـﮔ الاشموع
وج اشــمـــوعـــك جـرحــك
ـــــــــــــــــــــــــــــــــــ1ــــــــــــــــــــــــــــــــــــــ

يـبـنـي الأم لـو دنـيـا اتضدهــا..اتـلاويهـا وتنهـض وحدهــا
بــس افـــراﮔ الإبــن أيـهــدهــا....وبـسـرعـه اتطـيـح
وهاي انه انهض واعثر واعثر..وبـحـيلـي اتـنخـيت إِتعـذر
خـــلانــي افــراﮔــك اتـطـشــر....دخــــان ابــريـــح

ويـمـه اشــﮔــد انـخـيــتــك
بــس مـا ﭽــن حـاﭽـيـتــك
ومن ﮔـتلـك صينيتـك هاي
وج اشـمــوعـــك جـرحــك
ــــــــــــــــــــــــــــــــــــ2ـــــــــــــــــــــــــــــــــــــ

جيـت ارد اسأل يبني شلونـك..لن الـوادم بـاﮔــو لـونـك
وامـكـيـفــيـن بــدم اعـيـونــك....ضـيَّـع الاعـيـون
لا أخـذوك شـويـه شـويـه..ولا تركو شي يرضي الريه
أنـفـاسـي ابـدونـك ما هـيـه....ﭽـﺎ اعـيـش شـلــون

ومـن ﮔــد هــاي الـسـكـتــه
إحـــســــب أمـــك مـيــتــه
وموتي اتدنالي امن الـﮔيت
وج اشـمــــوعـك جـرحــك
ــــــــــــــــــــــــــــــــــــ3ـــــــــــــــــــــــــــــــــــــ

كـل عمـرك يمـه امدارينـي..ومن كلـشي العندك تهديـنـي
مـن مـوتـك ﭽـﺎ مـا تطـينـي....بــداعــة جـســام
انطيني امن اجروحك اكبرهن..وإختـار اليـاذن أكـثـرهـن
بلـكـت يـا يـمه اتـخـف منـهـن....عــنـــك الالام

وبـلـكـي الـلـه أيـسَــلَـــنَّـي
ولا فــرﮔـــه أيــذبــحــنَّــي
مـا تتحـمـل عيني اتـشوف
وج اشـمــوعــك جـرحــك
ـــــــــــــــــــــــــــــــــــ4ــــــــــــــــــــــــــــــــــــــ

بـس رِد يـمـه شـويـه ويـانــه..ولشفـافك ذنـي العـطشانـه
احـفــر سـابـع ﮔـاع هـنــانــه....وأمــيَّــه ارويـــك
لـو بـس يـمـه والـلـه يعــودك..ما نَّـزل عيـني من خدودك
وروحي اعـﮔـدها اعله زنودك....عـلـﮔ وأحـمـيـك

وانــثــر روحـي ابـكــلـــك
مـحـلــه الطـعـنــه لأجـلـك
كـل هـذا اهون والما هـان
وج اشـمــوعـك جـرحــك
ـــــــــــــــــــــــــــــــــــــ5ــــــــــــــــــــــــــــــــــــ

أَسأل تسكت مو من طبعك..بح صوتي اصياحي وما اسمعك
بـس ﮔـلي اشينفـع وايرجعـك....مـو ما ظـل صـوت
هـاي السكته اهيه التوجعـني..بس احـﭽـﺎيـه اﮔـعـد سـمعـنّـي
عـاد اشــر بـيــدك ودعــنـي....ولاثـنـيــن انـمـــوت

مـــا مـيــتــه امـتـانـيــتــك
مـشــتـــاﮔـه لـحــنــيــتـــك
ومـيته الـلازم من حسيـت
وج اشـمــــوعـك جـرحــك
ـــــــــــــــــــــــــــــــــــ6ــــــــــــــــــــــــــــــــــــــ

أحمد البصراوي العبادي

https://tttttt.me/ssgadAl