محرم ١٤٤١
القاسم بن الحسن (عليه السلام)

بــيــن الطـــف والجــنــه
تــنــزل تـصـعــد حــنــه
واتخـيـر ﮔـالوله وﮔـلهـم
إلا بــــدمـــي اتــحــنـــه

يـنـزل مَـلَـك ويصعـد ثانـي...جايـب حـنـه اتـســر الناظــر
ﮔـلـولــه انحنـيــك وﮔـلـهــم...مـا اتـحـنـه إلا ابــدم بــاﭽــر
عاف شموعه وحَضَر سيفه...وسيفه أيـﮔله متاني وحاضـر
كلـشي البـي والإلـه يتسائل...لـيـش إتـأخــر يــوم العـاشــر

يـالـتــاســع مــا تـمــشــي
امـتـانـي العـاشـر كلـشـي
خل يوصل وانه الحالفـله
إلا بــــدمـــي اتــحــنـــه
ـــــــــــــــــــــــــــــــــ1ــــــــــــــــــــــــــــــــــــــ

ﮔـالـولـه اتـبـاوع صـيـنـيتـك...ﮔـلـهـم بـس الطـف أنـظـرلَّـه
ما تـشـتـاﮔ لغـيــره عيـونـي...ودم بعـده ابحيـلـه امحضرلَّـه
مـن وادعـني الحسن ولسـه...يــوم العـاشـــر مـتـحــزمــلَّـه
وايرف نحري بذكره ويهتف...جسام الطـف خـل اﮔصدلـه

واشـعــر لــو رف نــحـــري
ﮔـلــبــي أيــهــز بـصــــدري
نبضه يسولف واعرف رايـد
إلا بــــــدمـــــي اتــحــــنـــه
ـــــــــــــــــــــــــــــــــــ2ــــــــــــــــــــــــــــــــــــ

يـروح لعمـه أيـريـد يـسولف...يـﮔـعـد يـمـه ومـا يتـكـلــم
والعـاشـﮔ لـو ذاب ابـعـشـﮔـه...يم معـشوﮔـه ايظل يتلعثـم
وكـل الــراد يـﮔــولــه لعـمـه...أول واحـــــد ودي اتـقـدم
ﮔـدمـا حب حـسـين أمـنـيـتـه...مـنَّـه اتطيح أول قطرة دم

ومــا سـولــف بـس عـمـه
سـاكـت يـحـﭽـﻲ يـفـهـمـه
ﮔـله اتـريد اتـﮔـلي بجيتـك
إلا بــــدمــــي اتــحــنـــه
ـــــــــــــــــــــــــــــــــــ3ــــــــــــــــــــــــــــــــــــ

كـل لـيلـه ويـطلـع للحومـه...يـنـدل امكـان البـي يــوﮔـع
ويشـمـه ويـﮔـعـد يـحـﭽـيله...هنانه لعمي امنيتي اتـﮔـطع
ويختار الوﮔـعه التاذي اكثر...ومـا يقـنـع ليلـيـه ويرجـع
يريد الخيل اتدوس بصـدره...بلكـت بـس بصدره وتقـنع

والخـنـصــر بـﭽــفــوفــه
مــا يـتـمـنـــه يــشـــوفــه
ويـﮔـله العاشر من يبدي
إلا بــــدمـــي اتــحــنـــه
ـــــــــــــــــــــــــــــــــــ4ــــــــــــــــــــــــــــــــــــ

متـعـود أصبـح كـل لـيلـه...للعـده يحسب عـدد العسـكـر
ويرجـع فرحـان ومتـطـمن...مـن يلـﮔـاهـــم زادو أكــثــر
وابلهـفـه أيـروح وكالعـاده...بهـاي الفـرحه يبشـر الأكبـر
ويحضـنـه الأكـبـر ويـﮔـله...الفـرحـه الأكبـر مـن نـتوذر

وشـكـر بـﮔــد فـرحـتـهــم
صـلـــوَّ يـــم عــمــتــهــم
هـذا أيـﮔـلهـا اتـوذر هـذا
إلا بــــدمـــي اتــحــنـــه
ـــــــــــــــــــــــــــــــــــ5ــــــــــــــــــــــــــــــــــــ

راح لعـبـد الـله وسولـفـلـه...سهـمك كون ايصير بصـدري
عبـد الـله بنـظـراتـه وﮔـله...هـذا السـهــم يـلــوﮔ لـنـحــري
تـبـرز أنـــت وأبـــرز أنـه...انـت بسيـفـك وانـه بـزغـــري
وعـن حسيـن اندافع كلنه...والـله ايعظـم اجـرك واجـري

ﮔـــلـــه وداعــــة عـــمـــي
ﮔــبـلـــك يــنـــزف دمــــي
وابشر راح تشوف عيونـك
إلا بــــــدمـــي اتــحــــنـــه
ـــــــــــــــــــــــــــــــــــ6ــــــــــــــــــــــــــــــــــــ

أحمد البصراوي العبادي

https://tttttt.me/ssgadAl

للحرب قادم .. صرح القاسم ..مايضل ظالم
.............1
وكف نص المعركة القاسم صرخ
الشمر من الخوف حس جلده انصلخ
مثل ابوه الحسن عالعسكر شمخ
ومثل جده الوصي بالحومة كشخ

شاهر الصارم .. صرح القاسم .. مايضل ظالم
...........2
والزلم جدامه محتاره وتهج
مثل حيدر بالكتايب ضل يفج
الكاع بيهم والسمه ضلت ترج
ارياكهم نشفت وصار الهوه مج

العانده واهم صرح القاسم .. مايضل ظالم







..................3

ضيغم وبرواحهم يخمش خمش
الصكر بالغربان ضل ينحش نحش
سيفه سيد على اركبهم ضل يمش
سيفه حوت وهمه يم حلكه حرش

الموت اله خادم. صرح القاسم .مايضل ظالم
.......................4
والسمه اعله الارض رادت تنطبك
ولذلك سمو العاشر طبك
هذا جاسم للحرب عنده خلك
ومايهمه تنكلب لو تحترك

هذا ابن هاشم صرح القاسم .. مايضل ظالم
..........................5
فحط كل الجيش جاسم مافحط
ربط لحيه بلحيه جم شارب ربط
عالحروف بكيفه حطاهه النقط
حكم اميه انزاح بفعاله سقط

بخطته راسم . صرح القاسم .. مايضل ظالم
........
....حيدر موسى الرميثي

https://tttttt.me/ssgadAl

ليلة القاسم
عليه السلام

لبنج ابني هديه/يالزچيه
رايح بهذا العمر
همّي كلّه وغلاتچ/بس رضاتچ
عن قصوري اعتذر
عندي بس هالولد
جاسم ابنچ بعد
عن قصوري اعتذر
+++++++++
ريع الگلب/هجره صعب/ترخص الچ كل عين
ازغر عمر/منچ بعد/ يالزهره وتعرفين
حيل افرحت/لمن اجه/ قبلني بالجفين
رخصت حرب/مدري عرس/
ويزفه عمه حسين

گتله بلغ سلامي/يم امامي/
يقبل ادموعي عسن
ييني لمن يشوفك/مايعوفك/
يذكر اليوم الحسن
حاله يصبح اشد
جاسم ابنچ بعد
عن قصوري اعتذر
++++++++
ماغييره/حر الضمه/يشبه لبدر التام
ما تنخفي/عني مشه/بكسرة ﮔلب والام
بظهره صحت/دعوة بدمع/ولهفة عطش بخيام
تتقبلك/ام الحسن/يوليدي ياجسام

هذا عرس المنيه/الغاضريه/يختلف عدها الوضع
زفه مابيها رجعه/لاكو شمعه/حنّتك دم ودمع
اذكرتچ امن ابتعد
وجاسم ابنچ بعد
عن قصوري اعتذر
++++++++
ساعة زمن/لمك ترد/متخضب امن ادماك
توگع ترى/بوجه الثره/والزهره تتلكاك
اتصحك هله/ومنها الدمع/يتگاطر اعله شفاك
تتحنه من/دم هامتك/واذكرني يمه هناك

وال حسن لو اجالك/لو بچالك/گلّه هاذي اوصيّتك
امي ثوبك نطتني/وحشمتني/جهزتني بلامتك
عدها منك وعده
وجاسم ابنج بعد
عن قصوري اعتذر
+++++++
جرحچ اشد/يم الحسن/يرخص الچ مبچاي
اشماقدمت/ما وافي الچ/فضلچ علينه هواي
اتمنه مثل/ام الگمر/اربع جبت وياي
اعصرهم ابحلگ الطفل/لو شح علينه الماي

كافل اخته شريف/هالعفيفه/مو سهل من تنسبي
وانه اوافي العقيله/بهل رحيله/نمشي وي الاجنبي
ابلا كفيل وسند
وجاسم ابنج بعد
عن قصوري اعتذر
+++++++
لرض الوطن/ارجع الچ/واحچيلچ التفصيل
بصينية/ القاسم اجي/الگبرچ يزهره بليل
وانصب عزه/مو للولد/ابنچ گطعلي الحيل
بعيوني شفته منذبح/ضامي وتسحگه الخيل

وزينبچ هالاميره/تمشي اسيره/ابلاكفيل اعله الهزل
شيلتچ عالعقيله/وعالهزيله/تصعد بچفها حبل
حيلي الها انضهد
وجاسم ابنج بعد
عن قصوري اعتذر

ثائر الربيعي

https://tttttt.me/ssgadAl

حوار بين رمله (( ع )) وقلبها



گلبي گلي يروح مايرجع بعد
ودّعي القاسم يرمله
ساعة وتشـوفين مذبوح الولد
ودّعي القاسم يرمله

÷÷÷÷÷÷÷÷÷÷÷÷÷÷÷÷÷÷÷

هذا اوداعي الأخير القاسم
گلبي گلي ما يردلج سالم
اليوم للحومه حبيبچ عازم
و الأجل وياه شفته ملازم

حضري ثوبه للحرب مو للعرس
مُنيتچ چانت بعيده
زيدي نوحــچ بالگلب لا ينحبس
منيتچ چانت بعيده

لليوم بتاره يحمله ... ودّعي القاسم يرمله

÷÷÷÷÷÷÷÷÷÷÷÷÷÷÷÷÷

ناذر الروح لحياة حسينه
بعد ساعة و ابنچ تشوفينه
لايـگ الـسـيف وحلو بيمينه
أمني يمه و أبد لتوصينه

قـاسم الـعريس يـطـلع للحرب
لاتصيرين بطريقه
شاف عمه حسين يشعر بالغرب
لاتصيرين بطريقه

الشوط وي عمه يكمله ... ودعي القاسم يرمله

÷÷÷÷÷÷÷÷÷÷÷÷÷÷÷÷÷÷

ساعة ويروح الجهاده يقاتل
يصيح هل بيكم رجل وينازل
يگطر مروه وشجاعه وباسل
السيف بيمينه يرمله وراجل

هـذا رجـواج وامل تالي العمر
بالـدمه يسـبح عجاله
اتـحملي الاهـات ومصاب اليمر
بالدمه يسبح عجاله

وجفنچ المدمع يهمله ... ودعي القاسم يرمله

÷÷÷÷÷÷÷÷÷÷÷÷÷÷÷÷÷÷

ودعي موادع رحيل ورايح
شدي حيلچ لواجاچ النايح
وگلچ مخضب دماء وطايح
يبقه مدمعهه النواظر سايح

من يجيچ مخضب بدم النحر
خلي دمعاتچ غزيره
حالت وليدچ تفت صم الصخر
خلي دمعاتچ غزيره

عملتچ مامنهه عمله ... ودعي القاسم يرمله

÷÷÷÷÷÷÷÷÷÷÷÷÷÷÷÷÷÷

أيسي يارمله برجوع الغالي
ضاعت اتعاب العمر والوالي
عيشي بدمعوچ بعد للتالي
واشتكي الرب السماء العالي

باچـر تـروحين ودمـوعج تهل
وعالـترب ابنچ رميه
يصعب افراك الولد ماضن سهل
وعالترب ابنج رميه

باچر تشوفين حمله ... ودعي القاسم يرمله

÷÷÷÷÷÷÷÷÷÷÷÷÷÷÷÷÷÷÷÷

راح عريـس الشــهاده بـيومه
خـله لوحه بالدمـاء مرســومـه
يدري بالتاريخ يحچي علومه
اتلاگه وي موته وخرس محتومه

تخضب بدم الشهاده وما رجع
قاصد الجنه بهيامه
وجهه چنه هلال بالمصرع وگع
قاصد الچنه بهيامه

وقّع بدمه وبصمله ... ودعي القاسم يرمله

÷÷÷÷÷÷÷÷÷÷÷÷÷÷÷÷÷÷
✍ بقلم خادم الحسين ع
الشاعر رعد الچريخي

https://tttttt.me/ssgadAl

1\ قصيدة في رثاء القاسم بن الحسن المجتبى عليه السلام

باريتك بروحي .. يابلسم جروحي .. يبني وحبيبي
ما حسّبت تالي .. تفجعني يالغالي .. يبني وحبيبي
بعيوني انطفه وغاب بـدرك والضوه
گلبي من القهر ذاب بجروحه انچوه
.........................

يُمّه يالفگدك صعب. انت سبّاح الگلب
يبني تتركني بحزن وتفارگ عيوني
بيـدي ربّيتـك گـمـر. وتشهد نجوم السحر
مساهره عليك العمر ماغمضن جفوني
كلساع اشمّك. ولصدري اضمّك
ابني الوحيد بدنيتي ياشمعة سنيني
روحي وحياتي. كل امنياتي
ما حسّبت غدر الزمن تمشي وتخلّيني
ما ارهـم بدونـك .. مجروحه وعيونك .. يبني وحبيبي
جرح الهجر قاسي .. بعضائي ونفاسي .. يبني وحبيبي
ابني واغله الاحباب يالعشنــه سـوه
گلبي من القهر ذاب بجروحه انچوه
....................

عطرك اشتمّه نَفَس ينزل لريتي واحس
انت يمي وشوفتك ترويني يالغالي
بحجري يبني ترعرعت وبتعب حيلي اكبرت
حسّبت تكبـر الي يوليــدي تبرالي
تالي الحسبته. راح وفگدتّـه
احلامي ضاعت والرّبه وتعبي وسهر ليلي
شفتك ضحيّه. بالغـاضـريـه
امك طحت من لوعتي يبني انهدم حيلي
ضــاع العـمـر كلّه .. فگدك جرح خلّه .. يبني وحبيبي
انحب طحت يمّك .. لمن شفت دمّك .. يبني وحبيبي
ينزف جرحي ماطاب مايحصل دوه
گلبي من القهـر ذاب بجروحه انچوه
.....................

يبني كل أم عالأبن تتعب وتحمل محن
عدها غايه لو كبر تتهنّه وتشوفه
تشوفه عرّيس وشباب. مطرّز بأجمل ثياب
تشوف ابنها بزفّته والحنّه بچفوفه
عرسك يغالي. چان عله بالي
تاليها صارت زفّتك مابين لسيوف
شمعة زفافك. تبچي لمصابك
من دم وريدك حنّتك مو حنّة چفوف
حنّه وشمع بيدي .. تـتـركني يوليدي .. يبني وحبيبي
اتحنّه بدمومك .. ومتخضّبه هدومك .. يبني وحبيبي
حلمي تشتت وخاب ويّـــاك انطـوه
گلبي من القهر ذاب بجروحه انچوه
........................

ياهي مثلي ابمحنتي خل تگابل دمعتي
ما اظن وحده ابتلت بمصابي وحزاني
يامره الشافت جرح. مثلي وتشاهد ذبح
آنه شفت ابني انذبح ومصابه اذّاني
جابوه اليّه. وشلته بأديّه
ابني وحبيبي مگطّع ومابي کتر صاحي
حاچيني يُمّه. وبنحره اشمّه
ابچي واصيحن يالولد ما ينفع صياحي
عمر الورد عمره .. ابني انگطع نحره .. يبني وحبيبي
متغيّـره اوصافه .. متفـطّـره شفافه .. يبني وحبيبي
دامي وذاري التراب من جرحه رتوه
گلبي من القهـر ذاب بجروحه انچوه
........................

امّك وگلبي انفجع. يبني ما احمل وجع
آنه رمله امك تره حاچيني ياجاسم
ياجرح ياذيك اشد. ما تجاوبني بعد
جسمك مگطع وذر مابي كتر سالم
جاسم حبيبي. تسمع نحيبي
جاوب ولو كلمه ردت مو شيّبت گلبي
امك وريدك. ايدي عله ايدك
امك وطلبك بالربه شو ضيّعت تعبي
منهو الگطع نحرك .. منهو الخسف بدرك .. يبني وحبيبي
ارحم گلب رمله .. هجرك صعب حمله .. يبني وحبيبي
للموت احسب حساب ما ريـد الهوه
گلبي من القهر ذاب بجروحه انچوه

سيد زيد الفحام
_____________________________

https://tttttt.me/ssgadAl

٢\ نزلة ... في رثاء القاسم بن الحسن المجتبى عليهم السلام


قاسم اهل البيت. بالعمر ضحّيت
في سبيل الله. في سبيل الله
..................

قاسم اهـل البيت يالتسئل عليه
آنـه ابـن ثـانـي امــام عله البريه
قـدّمـت روحـي لبوالاكبـر هـديه
شفته وحده بكربله بين آل اميه

للفرض أدّيت. بالعمر ضحّيت
في سبيل الله. في سبيل الله
...................

ياشبـاب الواعـي افهمني بحياتك
قـدوه خلّينـي الك تضمـن نجاتك
فـي سبيـل الله ارخص اُمنيـــاتك
طاعة الله ودينه قدّمها عله ذاتك

بالعهد وفّيت. بالعمر ضحّيت
في سبيل الله. في سبيل الله
.....................

القاسـم ابن المجتبـى آنـه بولائي
والله لجل الدين ضحّيت بدمائي
الدنيـه ما غرّتني يالتسمع نـدائي
آنـه مو لبـليـس للبـاري انتـمــائي

والله ما زلّيت. بالعمر ضحّيت
في سبيل الله. في سبيل الله
.......................

يالتـريــد تـفـوز وتـعـلّي مقـامك
ألتـزم مثـلي بأمـر الله وأمـــامك
ما يفيـدك يالمحـب غيـر التزامك
ألتـزم زيـن بصــلاتـك وبصيــامك

عمري ماذلّيت. بالعمر ضحّيت
في سبيل الله. في سبيل الله
........................

عـمـري عمر الورد لكنّي رخصتـه
للغـريـب حسيـن وبدمّي نصـرتـه
آنـه تربــات الحسن راسه رفعتــه
منّ نصرت حسين عمي وماخذلته

أفتخر ظلّيت. بالعمر ضحّيت
في سبيل الله. في سبيل الله
........................

مـن دخـلـت المـعـركـه شـردت زلمـها
بكيفي اطشّر بيها ساعة وساعة المها
آل اميّـــــــة آنـه مَـنْ ذلـها وهـضـمـها
الروس طارت والجثث ترست خيـمها

للنبي حنّيت. بالعمر ضحّيت
في سبيل الله. في سبيل الله

سيد زيد الفحام
____________________________

https://tttttt.me/ssgadAl

٣\ في رثاء القاسم بن الحسن المجتبى عليه السلام


ماينوصف جمالك
ياجاسم وكمالك
ثوب العرس حلالك
ياحبيبي. ياحبيبي


امك يجاسم ياضوه عيوني وحياتي
ربيتك بايدي وصرت كل اُمنياتي
يايُمّه كل صبح ومسه ادعي بصلاتي
يوليدي ياجاسم تضل ذخر لوفاتي

اعز من الهوى الهاب يعزي ويادلالي
اشوفك گلبي يرتاح توافيني يغالي
ربيتك باديّه
يوليدي حن عليّه
لا تمشي للمنيه
ياحبيبي ياحبيبي
..................................

بس انت عندي بدنيتي ارحم دليلي
من كربله وغدر الدهر اصرخ يويلي
جاسم ييُمّه لو رحت يكتلني ليلي
ابقه بعذابي للاجل حد مايجيلي

رايد تودعني تروح يوليدي للمنيه
گبلك تمنيت الموت هاي المسيه
عمر الورد شبابك
ماحسّبت غيابك
وتعذّب بمصابك
ياحبيبي ياحبيبي
...................................

اتمنّه ياجاسم احط حنّة بچفوفك
عريس مابين اخوتك يوليدي اشوفك
تاليها يبني بكربله سيوف التحوفك
خوفي يذبحوك العده مابيه اعوفك

ييُمّه گلبي ملچوم دخيلك لا تلچمه
زفافك يبني ماريد اريد تردلي يُمّه
انتظرك بحنيني
يبن الحسن تجيني
ماينگطع وعيني
ياحبيبي ياحبيبي
..................................

محروس بالله والنبي خوفي يحسدوك
وتغيضهم يبن الحسن لمن يشوفوك
يايُمّه بسيوف ونبل خافن يأذوك
يطعنون گلبي يالولد لمن يطعنوك

تصير الحنة بدماك يفجعوني بمصابك
اموت بكربله هنا ولا احمل غيابك
مابيه اصد وشوفك
متحنية دم چفوفك
امك ولا اعوفك
ياحبيبي ياحبيبي
.............................

يالودعتني للحرب گلبي مشه وياك
بالخيمه انتظرك أنه ترجعلي ولگاك
جابوك ياجاسم إلي تتسايل دماك
متگطع وجسمك وذر من ساحة اعداك

شفتك ييمه مذبوح يجاسم بعيوني
ضاع الأمل حيلي انباد يوليدي عذبوني
من منحرك اشمّك
ياجاسم واكلمك
تالي عفتها امك
ياحبيبي ياحبيبي

خادم القاسم بن الحسن المجتبى عليه السلام
سيد زيد الفحام
_______________________________

https://tttttt.me/ssgadAl

٥\ قصيدة في رثاء القاسم بن الحسن المجتبى عليه السلام


يبني ياجسام ياروحي وحياتي
انت عمري وسلوتي وكل امنياتي
ودعتني وگلبي ذاب
ارحم امك ياشباب


آنه امك يجاسم بيدي ربيتك
بين جفوني وسط العين خليتك
حبيب الروح جاسم يبني سميتك
تباريني مثل ما آنه باريتك
ساهرت برباك يوليدي الليالي
غالي ماعندي ابد بس انت غالي
والله مااحمل غياب
ارحم امك ياشباب


حسبت احساب تكبر يبني وتمنّه
اشوفك يالولد عريس وتهنّه
وفرح بيك يبني واعجن الحنّه
حلم عمري حلمته وماشفت منه
زفّتك يوليدي بسهام المنيه
وحنّتك من دمك بذيچ المسيه
عذبتني بهالمصاب
ارحم امك ياشباب


مثل وجه الحسن وجهك يشع أنوار
يوارث كل صفاته ومعدن الأسرار
برباك تعبت دلالي ضل محتار
خذاك البين مني ومابقه تذكار
امك واشتاگ اشوفك ياضوه العين
وين ياجاسم رحت يالغالي وين
فرگتك لَمّك عذاب
ارحم امك ياشباب


ربيتك بديه وچانت احلامي
ازفك بيدي يبني وانسه آلامي
ابد ما فكّرت تغدرني ايامي
تالي بعيني اشوفك منذبح ضامي
من عگب ذاك التعب يبني ودلالي
عالثره مذبوح اشوفك آ يغالي
يالطحت فوگ التراب
ارحم امك ياشباب



بعد شلّي بحياتي يبني من دونك
يمن آنه وحياتي فدوه لعيونك
چنت اتمنّه عريس ويزفونك
ابد ما فكّرت يبني يذبحونك
ريت ميته ولا وصلت الغاضريه
بعيني شفتك منذبح فوگ الوطيه
اعتب وحگي العتاب
ارحم امك ياشباب


شگول عله الزمان المارحم حالي
اخذ مني حبيبي اوليديّ الغالي
بقيت بلا ولد وجروحي تبرالي
رباي وتعبي راح وخابت آمالي
جاسم العريس خلاني بمصابي
دمعتي الماتنشف تبيّن عذابي
ما حسبت الهالحساب
ارحم امك ياشباب

خادم القاسم بن الحسن المجتبى عليه السلام
سيد زيد الفحام
__________________________

https://tttttt.me/ssgadAl

٦\ نزلة ..... في رثاء القاسم بن الحسن المجتبى عليه السلام


ودع امّه وعمّته جاسم وشد رايته
والسيوف تلگته. ينصر حسين 2
.....................

سمع صوت حسين عمّه وصاح لبيك
ابـن اخـوك ابشر يعمي الروح افديك
مثل ما وافــاك الاكبـر كـون اوافيـك
آني جاسم وانت عمي وفـتـخـر بيك
ياجماله وهيبته. جاسم وشد رايته
والسيوف تلگته. ينصر حسين 2
........................

ودع امّه وحب اديـها وللحـرب گــام
وعمّتـه زينـب اجتّـه تـصـيـح جسـام
هـذا سيف الحسن يبني وهـذا لحزام
وهذا درعه شيله يبني بصدرك اوسام
لبس درعه ولامته. جاسم وشد رايته
والسيـوف تلـگـتـه. ينصر حسين 2
...........................

طلـع والسيـف بيمينــه وللـحـرب راح
توسّـط الميـدان جاسم اغضب وصاح
يابنـي سـفـيــان دمـكــم بالوغه انبـاح
اليوم يومي وهذا سيفي يقبض ارواح
والكتايب عرفته. جاسم وشد رايته
والسيوف تلگّـتـه. ينصر حسين 2
.......................

شردت الفرسان منّه وشافت الموت
هـذا جاسـم بالمعاره سيفه مبخوت
يحصد بروس آل اميّه يهجم بيوت
مثل صولة جده حيدر بيـهـم يفوت
عـذّبتـهـم صولته. جاسم وشد رايته
والسيوف تلگّـتـه. ينصر حسين 2
....................

هــذا ابـن الحسـن هـذا وعـمّـه عبـاس
بسيفه حز روس آل اميّه مايطخ راس
خيل فـوگ الزلم صعدت شردت الناس
المات من الخـوف واللي بخيلها انداس
ما يثنّي بضربته. جاسم وشد رايته
والسيوف تلگّـته. ينصر حسين 2

سيد زيد الفحام
____________________________________

https://tttttt.me/ssgadAl

٧\ قصيدة في رثاء القاسم بن الحسن المجتبى عليه السلام


جمــال الدنيـه بعيـونك
وخاف من اليحسدونك. ييُمّه ييُمّه
يشمعة عمري وسنيني
يجــاسـم لا تـخـلّينــي. ييُمّه ييُمّه
............................

اخاف عليك يُمّه من الهوى الهاب
يلـوحـيّـد ييُمّـه واغـله الاحبـــاب
جـمـالك هـذا يبني شلون ينصاب
وسف وجهك يجاسم ينملي تراب
اذا ما شوفك بعيني
اكيـداً ميتـه تلگينـي. ييُمّه ييُمّه
دخـيـلـك لا تـأذّيـنـي
يجـاسـم لا تـخلّينـي. ييُمّه ييُمّه
.........................

تعبـت عليـك يُمّه سنين وسنين
يوردة عـمـري يااغـله الريـاحين
اذا ما شوف وجهك شلّي بالعين
ييُمّه منين اجـتـنـي كـربله منين
حسبتك تقبه يالغالي
وعيـش ويــاك للتالي. ييُمّه ييُمّه
اصيح ودمعي يچويني
يـجـاسـم لا تـخـلّيـنــي. ييُمّه ييُمّه
............................

حلم عمري اشوف بعيني عرسك
وحنّي چفـوفـك بـأيـدي والَبَسك
وگـول مـن الحسـد الله يحرسك
لچن ما ادري ليش تروح احسّـك
احس بالموت يدنالك
ولا مَـرّ عرسـك ابّـالك. ييُمّه ييُمّه
بعد منهو اليواسيني
يجـاسـم لا تـخـليني ييُمّه ييُمّه
..........................

ييُمّه زغيـر بـعـدك جاسم الروح
اذا جرحوك مرّه تصيبني جروح
امـوت ولا اصـدّ عليـك مـذبـوح
اروح آنـه ابّـدالك كـون مسمـوح
يمن عطرك عطر فاطم
تـروح ومـاتــرد ســالـم. ييُمّه ييُمّه
عُمُر ما بينك وبيني
يجـاسـم لا تخلّيني ييُمّه ييُمّه
............................

ييُمّه يگلها صبري يعوضچ الله
غريب حسين عمي ومحّد وياه
الا مـن نـاصـر تسـمـعـيـن أمّــاه
منو ينـصـره اذا مـو آنـي افـداه
قسمت حسين ماعوفه
وحيــد بكربله انشـوفه. ييُمّه ييُمّه
ييُمّه وچـن يناديني
يجـاسم لا تـخـلّيني. ييُمّه ييُمّه
..........................

اذا عالـمـوت عـازم خـل اودعـنّـك
ييُمّه گبـالـي اگـعـد خـل اشبگـنّـك
اريد اشبع يجاسم شوف بس منّك
بعد سـاعـة السيـوف هنا يگطعنّـك
ترد مـذبـوح يوليدي
اغمض عيونك بأيدي. ييُمّه ييُمّه
بعد ما گول ياعيني
يجاسم لا تـخـلّينـي. ييُمّه ييُمّه

سيد زيد الفحام
___________________________

https://tttttt.me/ssgadAl

نزلة ميمر ..... في رثاء القاسم بن الحسن عليه السلام


طفوا الشمع ونّه ودمـع
راح الولد. گلبي نفجع
بالدم تحنّه العريس وتخضبت بخضابه


بالدم تحنّه القاسم ابني وذبحوه
للخيمه بس جروح تنزف جابـوه
آنه امّـه ابنـي بس اليّـه عـوفــوه
الطم وون. يم الأبن
دم ودمع. صب الجفن
صار العرس يوم مصاب وتعذبت بمصابه



مثل البدر وجهه وتخضّب بدمـاه
طفوا الشمع خل نصرخ بويل وآه
جاسم تگطع ويلي بسيوف اعداه
هذا الولد دامي الجسد
بمصيبته. گلبي انمرد
ياريت اخذ عمري الموت وتصوّبت بصوابه



ابنـي بشبـابـه ومـا تهنّــه بـعـمـره
من مثله جاسم ياهو ضحّه بكبره
لجـل العقيـدة مـا بخـل دم نحـره
عاف العرس. ضحّه النفس
جسمه وذر. مـا ينلمـس
تتنازف جروحه دموم ما فكّرت بغيابه



ابن الحسـن ابنـي واعـز من روحـي
ياروحي طلعي من الجسد ياروحي
لا دمـعــي ينفــع عالابـن لا نـوحــي
شفته انذبح دمه انسفح
الزم جرح. ينزف جرح
گلبي عله جاسم مجروح نار الگلب لهابه



يايُمـه ياجـاســم ينـور عيـونـي
ليش بشبـابـك يالـولـد فجعوني
صبح ومسه ابچي واون خلّوني
راح الأمل. عقلي نذهل
بدري خسف لمّـن كمـل
اگضي العمر حسرة ونوح جاسم وون لمصابه

خادم ام القاسم عليها السلام
سيد زيد الفحام
_______________________________

https://tttttt.me/ssgadAl

قصيدة في رثاء القاسم بن الحسن المجتبى عليه السلام

بمصابك. شاب الراس
بغيــابك. شاب الراس
............

يبني تعـبـت بربـاك ليلي السهرته
عمري الگضيته وياك لجلك نذرته
تـاليــها مني تروح نـورك فـگـدتّـه
ابني ورحت ياحيف من بين اديـه
............

يوليدي چنت وياي سلوت حياتي
شمعة وتضوّي البيت كل امنيـاتي
رحت وبقت بجفاك بس ذكريــاتي
ظلّيت انـوح عليـك صبح ومسيـه
..........

بعمر الورد ياحيف من فارگتني
ابچي وعميت العين لمن عفتني
بعدك عليّة شصار ريتـك شفتني
بس للـدمــع ظلّيت بس للأذيّـــه
............

راح التـعـب وربــاي مــاي وتبدّه
يبني اليخطفه الموت ياهو اليردّه
ريـت انـدفـن ويّـــاك هــذا الأودّه
ابقه وتغيب شلون تحت الوطيــه
............

هسّه شعرت بجروح رمله وحزنها
من شـاهــدت بالعين ذبَحَت ابنـها
مذهـوله دم ودمـوع ينزف جفنها
جاسم ابنـها انصـاب بالغــاضـريـه
.............

للخيمه من جـابـوه يتجــاره دمّه
من منحره المذبوح طاحت تشمّه
من تلطم عله الراس معذوره امّه
بس هوه عدها وراح بسيوف اميّه

سيد زيد الفحام
________________________

https://tttttt.me/ssgadAl

قصيدة مقدمة مجلس في رثاء القاسم بن الحسن عليهما السلام.


بعيونك سوالف هجر
اعرف بعد لا تعتذر
عمّك تضحّيله العمر
جاسم حبيبي جاسم حبيبي
*

گربت اللحظه الاخيره يُمّه ياجاسم تعال
خل اودعك خل اشمّك گبل ميعاد القتال
ياجمالك ياجلالك ينوجد مثلك مُحال
هيّه ساعه وتالي بالدم ينخضب هذا الجمال
ياذخري من نور الحسن
عايفني بجروح الزمن
اتوفّه من گبلك عسن
جاسم حبيبي جاسم حبيبي
*

يُمّه يالكلّك ترافه بعدك بعمر الشباب
شلون اشوفك ياحبيبي مگطعينك عالتراب
ويلي من دمّك يجاسم ينترس وجهك خضاب
ريت ميته ولا مصابك ويلي من هذا المصاب
مو تدري بوداعك صعب
ويّاك اخذني للحرب
ما عندي لمصابك گلب
جاسم حبيبي. جاسم حبيبي
*

مو سهل جرحك يجاسم انه گبلك انجرح
من يذبحونك يغالي گلب امّك ينذبح
ريت اموت ولا اشوفه راسك يشيله الرمح
بدالك امشي للمنيّه يبني لو بيدي يصح
رايح وعرفك ما ترد
يوليدي ياعطر الورد
وتذبحك سيوف الحقد
جاسم حبيبي جاسم حبيبي
*

حاسبه حساب لزفافك وفرح بعرسك گلت
اعجن الحنّه بديّه وثوب عرسك جهّزت
يبني ما مر عله بالي يومك وما حسّبت
حنّتك من دم وريدك آه من دهري صحت
اتنفّس احزان وقهر
ما انصف ويايه الدهر
فراگك كسر منّي الظهر
جاسم حبيبي. جاسم حبيبي
***

يصعب فراگك عليّة لكن اصبر يالحبيب
روح ياجاسم انصره عمّك الطاهر غريب
غربته كسرت دليلي يصرخ ومامن مجيب
انصر المظلوم عمّك ورجع بدمّك خضيب
گاللها يُمّه ادلّلي
گالتله منصور بعلي
اجرك قسم منّه الي
جاسم حبيبي جاسم حبيبي

سيد زيد الفحام
________________________________

https://tttttt.me/ssgadAl

قصيده رئيسية في رثاء القاسم بن الحسن عليه السلام


شمعة زفافك يالولد طفوها بعيوني
مو حِنّه من دم منحرك يالغالي حنّوني
يالما الك مثيل. بدمومك التسيل
يالغالي حنّوني. يالغالي حنّوني
…………………

بس انت عندي بدنيتي حلمي وحلالي
اربعطعش عام اكتمل عمرك يغالي
جاسم ييُمّه وجهك يضوّي الليالي
ربيتك ورتّك ترد تعبي ودلالي

انت الهوى ومن تبتعد تخنگني آلامي
حسبتك ويايه تظل وتحقق احلامي
حزن الگلب قليل. بدمومك التسيل
يالغالي حنّوني. يالغالي حنّوني
………………………

ياوردة امّك كل صبح اشتم عطرها
مصابك يزهرة فاطمة كاسر ظهرها
امّك يجاسم من طحت اضلم عمرها
بمصاب ابنها الوالده تفگد صبرها

ما حسّبت غدر الدهر صوبني بسهامه
بعدك فلا يسوه العمر تجرحني ايّامه
ما ينفع العويل. بدمومك التسيل
يالغالي حنّوني. يالغالي حنّوني
…………………………

عمّك وحيد بكربله واجب تنصره
يوليدي وصّاك الحسن لبّيت امره
ضحّيت أله بدم النحر للغالي نحره
لكن مصابك مو سهل خلّالي حسره

بأوّل شبابك تنذبح ياشمعة سنيني
بسيوف اميّة توذّرت شاهدتّك بعيني
حلم العمر قتيل. بدمومك التسيل
يالغالي حنّوني. يالغالي حنّوني
…………………………

منتظره فرحه بدنيتي عرسك يجسّام
يوليدي تالي بكربله فجعتني الايام
شفتك ذبيح بلا ذنب يالعمرك اعوام
بسيوف اميّة توذّرت وجروح الاسهام

وجهك مثل وجه البدر بالدم يخضبونه
يايُمّه وبدال العرس جسمك يوذرونه
يتعذّب الدليل. بدمومك التسيل
يالغالي حنّوني. يالغالي حنّوني
…………………………

دمك يجاسم دم علي حامي الحميه
لعمّك فديته يالوفي بالغاضريه
خلّيت راسي مرتفع عند الزچيه
باچر يعوضك بالحشر الله ونبيه

يالوارث اوصاف الحسن يااغله من روحي
جروحك شفتها وهيّجت ياجاسم جروحي
تتشافه مستحيل. بدمومك التسيل
يالغالي حنّوني. يالغالي حنّوني
………………………..

رمله العفتها تعذّبت من فارگتها
أُمنيتي ياجاسم وسف ما حققتها
أُمنيتي چانت زفّتك بس ما شفتها
ياوسفه بسيوف ونبل شو عوّضتها

رديت الي دامي النحر للخيمه يوليدي
امسح گمت دم وترب عن وجهك بأيدي
عنك دنه الرحيل. بدمومك التسيل
يالغالي حنّوني. يالغالي حنّوني

سيد زيد الفحام
____________________________________

https://tttttt.me/ssgadAl

نزلة في رثاء القاسم بن الحسن عليه السلام

عترة الهادي سيد البريّه
ما نبايعكم يا آل اميّه
…...…

احنا آل البيت احنا الله خصنه بآيه
آية التطهير بينه نزلت موصّايه
راية الاسلام عدنا ما تطيح الرايه
ما نبايع آل اميّه نُقتل ولا هايه

احنا والدنه حامي الحميّه
ما نبايعكم يا آل اميّه
………..

يابني سفيان سمعوا آنه هوه القاسم
بايعت لحسين عمي ما ابايع ظالم
هذا سيفي وهذا رمحي عالشهاده عازم
حسين عمي ما اعوفه واليگلكم واهم

دون ابواليمّه نهوه المنيّه
ما نبايعكم يا آل اميّه
……………

آنه شبل الحسن ونّتم كلكم تعرفونه
من يسلّ السيف بيده فنكم تلاگونه
اليوم ارد صولات ابويه بالحرب وفنونه
هذا عمي حسين هذا فنكم تمسّونه

فدوه دم نحري لِبِن الزچيّه
ما نبايعكم يا آل اميّه
…………

يالغدرتوا حسين عمي إلّا آخذ ثاره
آل هاشم احنا درعه من بعد انصاره
بالحرب مشهود الها سيوفنه البتّاره
هاشمي والسيف بيدي من يخمّد ناره

راح ارد خيبر بالغاضريّه
ما نبايعكم يا آل اميّه
………………

شد عله العدوان جاسم والعزم بچفوفه
عسكر ابن زياد ذَلّه من دخل بصفوفه
من عزم جاسم وسيفه شردوا اهل الكوفه
شاب وتحدّه المنايا ياهو مثله انشوفه

عزمي من حيدر يالناصبيّه
ما نبايعكم يا آل اميّه
………………

شردت الفرسان منّه جاسم اتحدّاهم
صولة الكرار جدّه بالحرب راواهم
الروس تتطّاير بسيفه بس جثث خلّاهم
شاب هوه وجيش ضده والنعم ذلّاهم

فارس بدمهم غطّه الوطيّه
ما نبايعكم يا آل اميّه
…………………

بالغدر صوّبوا راسه عجزوا يطيحونه
طاح جاسم والنواصب گاموا يوذرونه
من وصلّه حسين شافه عالثره يعذبونه
تمدد بطوله يندبه والدمع بعيونه

جاسم بدمّه كاتب وصيّه
ما نبايعكم يا آل اميّه

سيد زيد الفحام
_________________________________

https://tttttt.me/ssgadAl

مولاتي رملة وولدها العريس

لمولاي القاسم ابن الحسن

عريس الولد جابوه يتجوله
مايرهم زواج ابلاية هلهولة
..................
امنيتي الولد عريس اشوفنه
بهلهولت خواته وصفكت الحنة
ومن الخيمة عماته يزفنة
وبت عمه العروس تعاين الطولة
....................
فرحانة ابا ابنها تبخر هدومة
هذا اول فرح للكاضي ملزومة
ما تدري ابنها عاشك الحومة
المنية زفته وبسيوف يقروله
.......................
لبس هندام ابوه وشاجخ عكالة
عمه امن الخيم صد او تعناله
على عمه الولد ما طالع الخاله
يشبه صورة العباس كللوله
....................
معروفة بسلفنه البت لابن عمها
زفة وكون عباس ايتجدمها
سكنة تصير جنتي وانا اصير امها
يسويها البخت وتصير معقولة
....................
معقولة تصير الما حسبتلها
والعباس سكنة الا ادللها
اكعد يمه بت عمك شكللها
جاسم راح منج آيا مدلوله
.................
جاسم راح منچ ونهدم حيلي
حسبت حساب أُم بيتي تصيريلي
ها يُمّه يجاسم اگعد احچيلي
شنهي بخاطرك ايصير بس گوله
...............
كلشي يصيرلك لا تاخذك حيره
اسويلك عرس ما صاير بديرة
من عباس اطشلك ها كثر غيرة
وبخت حسين ازفك والزلم ذوله

،،،،،،،،،،،،

كريم الدراجي

https://tttttt.me/ssgadAl

◼️ برنامج محرم 1441هـ / 2019م ◼️
#محرم_1441هـ #2019م
🔺 نعي اليوم الثامن 🔺

نعي الى القاسم

ليـش الـولد ليش من الله محبـوب
وليـش الوالــده تحبـــه ويحـبـهــا
وليـش الـولــد اسال لمــن يمــوت
بــس لـلـوالـــده يحــرگ گـلبـهـــا

وشوف القاسم العــريس من مات
امــه اشسوت بهـــاي المـصـيـبـه
صاحت وين زينب خل تجي وياي
وخـل انــوح انــــه وي الغـريـبـه

صاحت وين عـمته تشوف جسام
أبـنـي ومـنــذبـــح مـابـيــن اديــه
ضحـيـت انـه ببني فـدوه لحسيــن
بس كـون الحسـن يـرضـه عـليـه

من جابو ابنها الخيـمه ياهالناس
جابت حنـته وشعـلت اله الشمعه
حـنت أيــد ابنها القاسم المذبـوح
واختـلطن الحنه و دمـه والدمـعـه
وينك يـالـولـد وينـك ييمه تصـيـح
مذبوح وعلـيـك ابـقـه العـمر انعه


الشاعر السيد رياض الرسل الجابري

https://tttttt.me/ssgadAl

نعي ام القاسم لولدها

صدك عفت العرس يمه ورحت للحرب شاريها
من الخيمه طلعت مسرع نيتك شنهي ناويها
يجاسم يابعد روحي شموعك ذن صوانيها
وحنتك هاي يوليدي اجفوفك ردت احنيها
عرسك ردت بالدنيه وعلي دارت نواحييها
تمهل يابعد روحي روحي بعد مابيها
تريد جروحي تلجمها تريد اضلوعي تحنيها
وتمشي للحرب وحدك عيوني اتريد تعميها
ادري غيرتك نيران وغضب محد يطفيها
واجب نصرت الوالي ابو السجاد ادريها
اكبار النايبه تصغر لاجل عينه ورواسيها
ادري بيك تكلبها اسفلها على عاليها
هاي الكوم متهمك وبسيفك تلاويها
يلي نصرتك لحسين يمه انا افتخر بيها
ويم الزهره ما ادنك هناك انا من اصد ليها
اعذرني لونحت يبني ودموعي عليك اجريها
كلب الوالده وتدري افراك الابن ياذيها

الشاعر حسن لعيبي الحريشاوي

https://tttttt.me/ssgadAl

لسان حال رملة ام القاسم ع


يمّلّيني الحزن واكتب ... وره املاه

على ابني الدمّه روّه الطف ... ورملاه

الحسن ما حضر موت ابنه ... ورملاه

احضرت موت الحسن وابنه سويه



سجاد الاسدي

https://tttttt.me/ssgadAl