كريم البغدادي


مو زعلان بس الحب يتعبنه

حبينه الوطن وشصار ؟؟

خير من الله بأول موعد انبعنه

خلص هذا الوطن للبيع
مثل يوسف خذوه للسوگ

وطن بيه كل معاني البوگ

بيه سيد يبوگ الناس
بيه خير أمدنگ الراس
بيه وادم يرجعون بنسبهم لهل بيت الدين
بس عدهم علاقة ليل ويه الكاس

وطن كل عمره يصرخ ليش
وطن منتوف منه الريش
وطن كل متر بيه حزبين عدهم جيش
وطن ميت يريد بكل طريقة يعيش

حلمنه يموت يوميه اعلئ تربانه
الفقرة تنام بيه جياع
واهل الدين شبعانه
شبعد وتريدني اصبر مو حجر آنه

وطن بس بالحچي احنه اسلام
ذيچ ام الشهيد الغزرت بالگاع
تالي اعلئ الرصيف تنام
________________

الاستاذ غانم الفياض


شفتك تشرب جروحك
ضوة امبسمر عذابة بلوحة الايام
طش ثوبة الظلام ..
وما طفت روحك
وشفت ابظل تواريخك حزن يغلي
اوجه غابة اونهر متعوب
واگف وحدة ايصلي
وشظايا .. ومنجل .. ونخلة
اومدن ميته رماد ابعينهه اتخلي
لگيتك هم مثل روحي
عثگ عالي .. بعيد وما تلوحة الايد
للچف اليحبه الوحدة ايدلي
لگيتك هم مثل روحي وجرح مثلي

وطبع گلبك مثل گلبي
غريب وبالسفر معني
اتناسل ليل للمجنون
ليل .. وخضرتله سنون
واحنه اثنينه ابهالليل
بس اثنينه انغني

تذكر
من چنت تركض وره اهلالك
ماواحد ركض وياك
اول ما ركض گدامك اخيالك
وتذكرمن گمت غنيت
شفت ابكل حرگته الماي غنالك
وتذكر .. من بنيت امن الثلج تمثال
طلعت چم شمس

ما ماع تمثالك ؟!

الثوري عقيل العرد

اوتار المرحلة اكتملت نسجناها

ولحن معزوفة الثورة بده يدندن على شفافي

الطفل والشاب والحرمة تهجوا كلمة الـ (كافي)

الشعب صدره انترس منك جذب يچوي

حرامي الوان اليحلمون

.. ماتدري؟

شباب الوطن نگط دمهم من وشالة اخر حِب؟

بجيبك جم فقير يموت

وصفار الناس كل ما زاد مثل السعف من يشب

الحناجر راح تهتف (طيح)

وشجن رفض الشعب دافي

وخاف اتيه اوصافي

انه الجوعان انه البطران انه الحافي

انه البيه ملامح نار

لكن مستحي وطافي

انه الراويته وجه الله

وطلع وجه الله مو صافي

وخاف اتطيح تعذرنا

اذا شوهنه وجهك يوم … لا تزعل

شعارك باجر نصبغه بنزاهة چف الاسكافي

نوفل الصافي - اشتهيتك 🏴

ياشذر طيفي ونثيث اصباي
دبّرني اشتهيتك
شوغة الرغبة كلتني
اومن اذكرك...اتخرخش ابگلبي سوالف مدري شنهي
اومدري ليش..ابروحي صمّ اطفال تنشغ..اشتهيتك.
اشتهيتك
گاع تشرب ملحة اجنوني اوتخضر تين برّي!!
تين الولاية غشيم اوطبعه فاهي..
وانته ياشيرة اسوالف
اتعســّل الحنظل لون جسته ابحلاتك!!
اشتهيتك تغسل اجروحي اعله عرفك
وانته تندل.
اشتهيتك تنفخ تراب الكناتير الشلتها
اوتكوي قمصان الونين الطبگتهه ابصوت (داخل) !!
صوت (داخل) بي لگيتك...اوبي عرفتك
اوبي بچيتك واشتهيتك.
انت تدري من يوّن (داخل) اهيــّس روحي
لضلوعي تشيغ .. ترگص الگصبة على ريتي
اوچنـّي اغط
لحزامي بالكاس
اومراجيح الطفولة الماشفتهه..
وانهدم جامه على جامه!!
صوت (داخل).. شيلة امي.. اوحلم ابوي
وزهو جدي وفحطة عيونه اعله (قوطية) تِتــَنْ تدهن لهاته!!
صوت داخل.. زفة البردي التمندَل فوگ شختورة (علاهن)
ولـ (علاهن) سالفه.. كل گلب حمرية صايغهه نشيد
اومو وكتها..
انه اشمّك وي (علاهن)..
ويّه كل برديّة خدرت... من يجيب الروج ريحة سكر ختلات الحبايب!!
وانه احســّك ويَّ كل عطــّاب من (بحّة) حنين..
و لاعساه ايطول
عمره الــّلام گلبي ...لاعساه
امجرشه روحي.. والشته اعله الباب
عض سِنـــَّه تسابيج ابغرفتي
وانته يا باب اليفرفح عافية اوباگة ربيع ...
اشلون اسدّك
او ليش اسدّك؟؟
فدوه طفــّرني سناسل شوگك
الظــُفرت گصايب جمر صدّك
گطــّع اخيوط المروره الشبگتني
فالة الحنيه يمــّك
والسچاچين التحد بيها خذتني
گوم طش وحشة غربتي ابشذر خدّك
كاسِر الظلمه ابطلعتك
يا ضوة اليتمزلگ ابضويات (دجلة)
اشلون اهدّك؟؟
يا شلب روحي الشتلته ابجـبل ودّك
گوم سلسني اعله كيفك
فرّع الليل اعله صدري
او دوفـْـنِي ابـ (حرحارة) ايدك
واچفي شرقيتي اعله شرقيتك حبيبي
ابهيدة خل ارتاح ..زِقْ ريتي ابمهفة
عسل شفتك.. اولاعساني ابيوم شفتك
يالگلتلي:
لذبح الليل الخنگ روحك حبيبي
واشتل البسمة اعله عتبة شفتك
السكرانه شوگ ..
إنته گتلي
لفــْتـَح البيبان كلهه..
واغلگ البيبان كلهه
او (هيْتَ لك ) بس الك وحدك !!
لا (تِقِــدْ) مني قميص
ولا (أقـِدْ) منك قميص
لأن احنه اثنـينـّه ابلايه قميص

عمار سالم......

بعد ياعين تبجيلك؟
ويا ديره الترحب بيك؟
وانت الكاتل دخيلك..
دم باجر تطيح ومحد يشيلك...

وبعد لعيوني مادنيك خيط عگال تهوه البلگفه يخليك.
شما ضمك يبيعك باجر اليلگيك
ذهب منهوب يارخص المساوم بيك
عزيز بروحتك بس من ترد تابوت
بارد ملگه المتانيك
ومثل مال الحرام بلاتعب جابوك ناسك مو حريصه عليك

يماذيني
حلم حتى من اريد احجيك
ماوصفك مثل ماشافتك عيني...
زعلانين واحنه جروف موش أبعاد أگبالي وماملاگيني
وخرزة سبحة لازم ينزرف گلبي
حتى الجاي يشريني...
وانا بيدك عشت خاتم محيبس موعزيز عليك
بس يلگوني تنطيني
وكل ملگه بجرح وياك جلد وموس
شيزيح اثارك بعيني يهلماشي
تجي بيدي وترد بيده
يالعايش تنگل طوس
جام جفوفك انت وبينت مجيوس
واضمك وين؟
كنز حتى مندفنك هم تظل منفوس

وماضن تبتعد نار بجكاره الروح تگرب ليك كل ماجاي تشعلني....
بنفسي اسمع اليمته يعود
حزن ماينشد عني..
جرح ودواي يكتلني...
يخيط وجرحي مثل خياط شگ الثوب يرجع نفسه كل ماتنوخذ مني...
وفزاعة زراعة وجدامك انت طيور يردن من يشوفني..
هذا انا
گطن ماوالم المرتاح والمجروح بس ينزف يبدلني...
وين الگه الجفوف المايذبني...

وضميت العتب عازه...
گبال عيوني بس صرت اعله روحي بعيد
نفس ماليه بأخذك جن غطه جنازه...
وگتلي وياك بس مو من گلب والسان
ححجيك بيع الموازه...
وهاي الدنيا هشة كاع من تمشيها مشية خوف بيها تضيع
ثكل ابنادم بجازه...

وبعد ذاك العشگ غربه
تلاگينه بعتب صحبه
كلمن گال البگلبه
تفارگنه دمع نفس الوجع بس كلمن بدربه....

اقدم بين ايديكم احد قصائد الشهيد الشاعر الشاب


بارق العاشقــــــــي

ما يعجبني اشارك بالحجي وياك
ولو عندي سوالف ضام اهواي
وانه المعذور صوتك يطرب الروح
وضحكتك جن رياض ايجر وناداي
ابوسك كون كلك رايد اليوم
وابدي من الجدم لشفاك بهداي
مثل ماي وي نخله وشله الحال
يتشلبه من العرك حد راسه الماي
وخايف والضهاري اشموسه اعيون
اريد البد بسدك واشبع افياي


وسمعت الناس الك صاحو ولف ياي
وحرت عالسجه الف رايح والف ياي
اريد اتمدد بطولك والفياي
يكسر والشمس تنده بديه

وفضل مانكره حزنك حسن الحال
واضحك بي صرت لهموم دنياي
وطعنات الظهر منهه انه ممنون
لأن لوله الطعن مايعزف الناي
وتغطيت وبعدني الليله بردان
ابرد مو لأن مو انته وياي
خيالك يغفه يمي اينام تعبان
ونص الليل يكعد ياخذ اغطاي
وشسولف بعد ما تحضرني كلمات
من كالو اجه وما صدكت جاي
بمنامي وبيك نحلم تونه غافين
فزينه وسمعنه اعله الدرب جيت
طشينه الجفوف العين ملكاك
مالحكنه بيهه انجيب جكليت
وشلعت الباب خاف اكضك الباب
وطلع يركض قبل مانطلع البيت

ابتليت وشال كلبي باب اليه
ومنك خذت بابل بابليهي
بعد للبيت ماحط باب اليه
شلعته ابدكتك ايخرك عليه

ودفنتك روجه ميته ابمكبره ماي
وعله اجروف الليالي اهواي تانيت
ولن جيتك سراب ايعذب الروح
غرفتك طاحن اجفوفي وتبديت
ولو مابيك رجعه انوب واتناك
اجن لمناطرك مايوم مليت
قبل شفت اليموت اهله ايتوانون
عدهم للصبح تبقه التوابيت
مو رفقأ ولكن ماييسون
وبالتابوت بالكن يكعد الميت
ودعاء ام ابمسيه امفرعه واتنوح
دعت كونك تجي الياريت ياريت
ردينه ابهضمنه انلم بالجفوف
ورد للبيت يبجي امدنك البيت
ورد للبيت يبجي امدنك البيت

ابداع ما ينوصف ابداً ً للاسف هجي شعراء مظلومين اعلامياً

ابراهيم الرائدي

رسائل للـ [ الرب . وانت . وامي ]
————————————————

#ربي حزن الدنيا بيت وحزني شِعري
ربي حزن الناس
شيبه
وحزني شَعري
ربي حزن الناس خطوه . وحزني دربي
ليش حزن الدنيا غربه . وحزني شعبي
ليش حزن الدنيا نبضه . وحزني گلبي
ربي حزن الدنيا هذااا
ووحزني مدري
مدري اسكت
مدري احجي
"وانه مثل الناس ابجي . لو لكيت الناس تبجي"
وحزني مدري
وانت تدري
تدري حسبالي الحزن . جلمه بجريده
يموت من تغفه المقاهي
يااا أللاهي
مدري حزن اعيوني يلمع
مدري حزن الدنيا فاهي
#وانت تدري
تدري حسبالي الحزن . ليله وقصيده
ويمشي عنك_
تدري حسبالي الحزن مثل التريده
يجي يوم يروح منك_
مثل اي شباج خلكك مايسده
اتسده ريح
والله
والله
والله حسبالي الحزن دمعه وتطيح
مثل اي چادر يطيح
ثاري حزني الماله ثالث
ينولد . ويضل ضريح
ثاري حزني اكلاده حلوه
ياهو حبني يحلي چيده
وينصلب ع الركبه يوميه المسيح
ثاري حزني
احروف اسمي
احروف اسمي
شمااااا يصيحوني

اااااصيح

#يــمـــه
دكو البسمار بيدي
والحزن بعيوني شاخ
ابتسمتج
وسمعت خشبة صليبي اتصيح .. اااخ
يمه هذا اگليبي شاهد
كلبي شال الناس كلها
وماشلت مره اعله واحد
يمه حزن الدنيا دافي
يدفي بيهم . حزني بارد
يمه حزن الناس طيف . يموت باجر
حزني كاعد
يمه حزن الناس مايترك علامه
وحزني شامه
ليش حزن الدنيا باب
يكتله سركي
وحزني جامه
اشلون بيه
اشلون بيه
وحزني جام . وكلبي جام . وعيني جام
وطبع اصابعهم عليه
يمه حزن الناس لمسه

وحزّني ادّيه

ويلي . حزن الناس . كفره . وحزني امانه
ويلي . حزن الناس . ناس .
وحزني انه

وخانه خانه
دورت روحي اعله كيف ومامش انه!

سالوفة برد ..

للكبير عماد المطاريحي ..



طبعك طبع سنبلة ..
الريح لو عاندت بالحوّل بيدر ترد..
ارتاح لو عاندت..
بردك بـ لمسه تدفي ..
وارتاح لو حوّلت نار الشماته برد
تعجبني من تنجرح ..
مو دم نزيفك ورد ..
بستان عمري عطش
وطيور حبك خضر
وضحكاتك الهن جنح
حطن بروحي العصر
وسالوفتك من برد
وهمساتك من النده
وعيون نشوة خمــر
يعجبني موت الشمع
يفرش الروحه لحد..
يعجبني موت النده
من ينزل امن السمه
يختار حضن الورد
الله يـمّوت العشگ
الله يمّوت الكحل
من ينتحر عالجرف
نفس انتصب مأذنه
للناس غـنّي الحمد
نفس اشتعل واشتعل
ومحرابي برزخ ضوه
بين النهد والنهد
بس طبعي مرود كحل
ابحر ابعين الشگر
وابحر ابعين السمر
ومن يجي الليل انتحر
وارجع طفل منكسر
افرش سريري ملح
واتوسد الزنجار
وابقى احلم بمكحله
ما بيها مرود غفه ..
ما بيها مرود دفه ..
ما بيها مرود دار ..
احلم بخصرج يـ حره ..
ما مسه جف الصبغ
واحلم بنهد ارتفع
ما طافته الزوار

كريم البغدادي


يطشرني الصبح چن تعب عالعمال
ويلمني العصر بيده

انه المحروم من كل واحد يريده

انه جرح السجين الما تضمده الناس
انه اليصرخ بوحده منين ما ينجاس

انه الجاب الحزن يمه
انه الروحه اعلئ كلمة شنو السويته ؟ وعليمن راح متعلمه
مثل الفگدتلها اوليد اخلص الليل
وأرد من الصبح زلمة

انه الما حاچي بجروحي
انه حچاياتك الحلوات هنه الطلعن روحي

انه كلمة الآخ التجي بتالي الليل
متعجب لأن ماميت لهساع
مدري منين اجيب الحيل ؟

انه اليعرف سنينه شبقن من عدهن
اليلم كل الرسايل والصور بالليل
خاطر يگعد بسدهن

انه الراسم ضحكته بوجه صحبانه
انه الما نام ليله وناشفه اردانه

انه قداحهم بس يبسو لوني
العشت يمهم سنين هواي
چنهم مايعرفوني

انه الودعت ناسي لبابهم بيدي
انه الگد الحزن مرات
انسى اسمي ومواليدي
___________

عريان السيد خلف

(تلولحي )

تلولحي بروحي كصيبة تلولحي
تمرجحي بكلبي قصيدة
تمرجحي
احنه خلانه وكتنا تراب
بحلوك الرحي
شما يطول الجرح بينا
يطيب بس ما يمنحي

تلولحي صوتي جزاني
وعافت عيوني الحلم
تايه ومامش علامة وملت السجة الجدم
وطشت سنين المحبة ومن بكاياهن شألم
ومرة تغفه جروحي بيه
ومرة احن وتلجم


تلولحي

اليا كتر يا شوك روحي
تريد بيه الياكتر
لعبت بحالي الليالي وما لكه ولاية العمر

سولة الناس الملامة...
واحنا سولتنا الصبر
وشيمة الكاع يصبرها تشوغ لهفة وتنتظر

القصيده من ذائقتي اليكم

(صوت انسان)..كتبت عام..١٩٩٩

غانم هاشم الفياض

يل ما دنكت فد يوم ذل
ومابعت بالعوز ناموسك..
حط اخدودك..
اعله الكاع..
خلي اشفافهه اتبوسك...

يا لمعة ضوه
لو شد ضلامه الليل
يشرب كل ضلام الدنيه فانوسك...

ياكطرة نده
أبشفة حلم عطشان
شفتك من كبر جرحي
مشاتل طيب
سجاده ،
وصلاه،، واوذان.....

شيضرك لون
تزرع ضوه اعيونك
عله النجمات
وخل يعكس ...
ضواها الماي عل الحيطان

كوم ازرع قميصك
غطي ثديي الكاع
لون الكاع.....
واحد موش عشر الوان

لاتمتد جسر
تعببر عليك الناس..ياهو الجان
وايدك لاتمدهه..اتشيل ياهو الجان
هذا الباس رجلك
باجر....
ايدوسك

حط اخدودك اعله الكاع
خلي اشفافهه
اتبوسك.....

مظفر النواب || للريل و حمد ||


مرّينه بيكم حمد ،

واحنه إبقطار الليل

واسمعنه دكَ اكَهوه

وشمّينه ريحة هيل

يا ريل صيح ابقهر

صيحة عشكَ يا ريل .


هودر هواهم ولك

حدر السنابل كّطه
-

يا بو محابس شذر ، يلشاد خزّامات

يا ريل بلّله ابغنج

من تجزي بام شامات

ولا تمشي مشية هجر

كَلبي بعد ما مات .


وهودر هواهم ولك

حدر السنابل كَطه .
-

جيزي المحطة بحزن وونين يفراكَين

ما ونّسونه بعشكَهم عيب تتونسين .

يا ريل جيّم حزن أهل الهوى مجيّمين .


وهودر هواهم ولك

حدر السنابل كَطه .
-

يا ريل طلعوا دغش والعشكَ جذابي

دِكَ بيه كل العمر ما يطفه عطابي

نتوالف ويه الدرب وترابك ترابي .


وهودر هواهم ولك

حدر السنابل كَطه .

-

آنه أرد ألوكَ لحمد . ما لوكَن لغيره

يجفلني برد الصبح وتلجلج الليره

يا ريل باول زغرنه لعبنا طفيره .


وهودر هواهم ولك

حدر السنابل كَطه .

-

جن حمد فضة عرس جن حمد نركَيله

مدكَكَ بمي الشذر ومشلّه شليله

يا ريل . ثكَّل يبويه وخلِ أناغيله

يمكن أناغي بحزن منه ويحن الكَطه

كَضبة دفو ، يا نهد لملمك برد الصبح

ويرجفنّك فراكَين الهوه ياسرح .

يا ريل . لا . لا تفززّهن . تهيّج الجرح

خليهن يهودرن حدر الحراير كّطه .

-

جن كّذلتك ، والشمس ، والهوه هلهوله

شلايل بريسم ، والبريسم اله سوله

واذري ذهب يا مشط يلخلكَكَ اشطوله .

بطول الشعر

والهوى البارد ينيّم الكَطه .

-

تَو العيون امتلن ضحجات وسواليف

ونهودي زمَّن ، والطيور الزغيره ، تزيف .
يا ريل . سَّيس هوانه وما اله مجاديف .


وهودر هواهم ولك

حدر السنابل كَطه .,!

حته لو ميت تعال ....عزيز عسكر

وگتلي باچر نلتقيبأول رسالة
ونشعل الدنيا برسول
ونطفى من يكبر عشگنا
ونرسم الدمعة انتظار

بيه ليل مناطرك خاطر محطة
الكاسره سنين انتظارك
يمتى اشوفك جايني
بواهس قطار
يل عفتني تراب تدري الوحشة ريح ،
خايف اتطشر تعب
صفنت شمس
باگو عمرها
وواعدوها بچف ضوه

من مشيت
توحشت عيني ..وكبر حزني
ولبستة وشيب
بصدري الهوه

يل عفتني ابين
هجرك والسنين
انطيني چفك
خاف بيه اعثر واطيح
لا توادعني العمر
مابيه حصاد
ًتنتجي الحيطان من تمشي اعله خلگي وينذبح
صوت المسيح
يل عفتني بين خلگي وخاطري
احجاية بواچي

الناس گامت تكره اسمي
كلها احسها
تصيح اجه
الماعنده ام
كلها احسها
تصيح اجه
المايكره احد
چا گلتلي
بروحتك تذبل
حياتك ، وچا
گلتلي بذمتك
فرحت خواتك

وين رايح والمسافات انطوت
والشوگ ردني لواهس
احلام العمر
بريتي ضميت النفس
چيه بيه صورك
حتى لو ميت
تعال الميت
من يموت
خطار الگبر

اسحگ الضلمة بضواك . ول مسية
العافية بخاطر سماي
واذن بروحي الفجر
ردن ل ايامي الصبا
لچف الطفولة ماتت حچياتنه
بعين الصور
وخذني للگاع
الرسمنه عليها روحي وروحك
بچف المطر
ردني ل اول مستحى
ل آخر محنة
ردني مو زين الكبر

بروحي شايلك نهر وسنيني گاع
منين ما اميل ايتبدى
وما كرهت مناطرك
ظال انتظر ....
باچر متانيك يم
باب الچفن لابس فرحتي
استرخص من الله وتعال
باچر بروحي
انشتل جيت
حلم ضموا طريچه وبيه
عثر تالي العمر
باچر تغني الشواطي
بطور داخل ماتبدل ثوب گلبك والمحنة
انتَ ذاك انت الحنين
الكلشي بيك
يصوغلك دموع وحزن
كلشي بيك يردني سفانه وهلاهل
من يمر تابوت
چتال السفن

وباچر مظفر
يمر بيه
بتوابيت القصايد
لو سمع حن وانه احن
وباچر من اعزف رجعتك
تختنگ فيروز وتبطل
غناها وتستچن
وباچر تردتي لغناي لواهسي وبيك
استراح ، وليلي
خضر سالفة
وگاعين وچفوف ووطن

ومن تجي اتلگاك

بأحلام الصغار
بفطرة السبعين بعيوني لعلى فراگك گضن
باجر متانيك
موتنسى شگلتلك
حتى لو ميت
تعال ..

لم أقرأ هذه القصيدة الا مرة واحدة وكانت في امسية لندن عام ١٩٩٥
ولم تطبع..

مظفر النواب



ودگك انوب الباب
ودگك النوب الباب
نبگة وزفة زرازير وصغار بحديقة نوم يتختلون
وسنين انگضت وايام يمسحها الدمع ووجوه تطلع من ضباب العمر ترسم للزمان عيون
تمسح گصتك من بعيد بالقداح
راجع ورة نص الليل گايد سكرك ونعسان
ناسي بجيب امس مفتاحك اليسوة الف مفتاح
قصدن چنك انت مضيع المفتاح شوية ارتاح
دگيت وسمعت الصنطه بعظامك
چنهن خلصن ايامك
مثل عصفور نايم بالگمر وتكي جنحة وگعد الامك
راجع عگب كل العمر
تحلم بتنگة ماي مملية بنجوم الليل
وعضت هلال بارد
حمر التيغة بعمالك
وعانگ هلال السمة وشاور نجمة سهيل
وعيونك طفاهة السكر
تتوچه بالمحجر نقطة بيت علوية
والچراچف چنهة شمت كل البساتين
تسمع عركة بزازين
تسمع مدري شنهي ثنين عرگانين
تسمع نوم الجوارين
وتمتمت مدينة ماي مشتهية لشهر تشرين
ودور بجيبك تلگة كومة زروف
كرز
كرز زروف العمر
كرز راحو الاحباب
مفتاحك بجيبك مر عمر كلش
وبابك نست المفتاح
يمكن نست چانت باب
يمكن نست رجعاتك توالي الليل
كطبة ورد چفيتك
وصبعك بليلته تگلب الصنطة
وقريت من السكوت كتاب
ترسم صوت ترسم فكر
ترسم راحة لاچن انت مامرتاح
لصغار بحديقة نوم ولبزازين تتعارك عشگ مجنون
ولا انت رجعت انت
حزين وتعشي وعيونك عليها عيون
تسأل والجواب تراب
ودگك النوب الباب !!
وتگلك منو ؟؟
اتگلها ارجعت ماغيرت ثوبي چثير الغيرو
بس انزعت كلشي وجيتچ طفل عاشگ ماعليه ثياب
درت الكون كله ومالگيت زوية تحظني
احظنيني اتعب مني ومن الايام وعشگ الناس
اريد اتلولي بحظنچ
الوح الكمر بيدية الصغيرة
وانه اگلج رضعيني اعتاب
حگج غبت عن حبچ زمان طويل
لاچن گلبي يحبيبة گمر عن شوفتچ ماغاب
احبچ وارد انام بسدچ احبيبة
اشمن ريحة الله بصدرچ الواسع
وامرغل وجهي بترابچ اعز تراب
....

محسن الخياط ...

تعال الحگ

تعال اليوم ما طولك نباع ازرگ
وخذلك شمعه توصل بيك خاف يفوتك المفرگ
الوكت عبره وخصرهه رفيع
وبنادم عليه يزلگ
وصبغ راسه الوكت فرحان چنه بجيتك يطلگ
يطور التعب المطبگ
يطليع الشويثي شبيك ما تنشگ
تعال الحگ تعال اليوم ماطولك نباع ازرك

تعال الحگ
عله عمري البگه مدري اشكثر منه وبگه معلگ
وانه صبري جرد جرجيت شگيته وتشگه ردود فدوه يروح خل ينشگ
انه گلبي شكر محروگ طاح بگصب وبچالي
ولمَّه بكاغد مشگگ
اجيتك ساجيه بلا ماي بتراب الدفني اغرگ

وانه اضحك عالدفني وراح ...
رد اردود ما صدگ
اخاف يفوت عمري عليك ويعفسه الهوه ويعتگ
تره الديوان لو هجروه بس البوم بي ينغگ
تره من يكبر الرمان طبعه يهيج يتفشگ
تره من يبرد التنور تلتم خبزته وتلزگ
وبعد من يلتوي البسمار ما بي حيل من يندگ
تره عمري ترد اردود تحوي شراع المزَّگ
تعال الحگ
تعال اليوم
ماطولك نباع ازرگ....

كريم الجسار ...

بعد شالحگ جزه النيسان

والما لحگ ما يلحگ

ولا بيدي رسن دنياي

والوي عنانهه وتسحگ

يقنديل الليالي السود

نمنه وبعدڪ امعلگ

يدرويش القوافي الجام

من جان الوكت زيبگ

الڪ بي هوه العزاب

لا غرب ولا شرگ

المه وروحي ثوب عروس

ما گتلي هوه العزاب للمفرگ

شمعه شتاخذ من الليل

خلصت وابو طبيله

اتعطل وما دگ

وانا يا خوي مو ايوب

والتحت الثگال شما صبر يزهگ

اخذلڪ چلمه صوغه .. الشمعه تگظي بساع

مو بس الهدوم الناس هم تعتگ

وخلينه انعم الله رطوبه السباح

لا ريعان ظل ولا نباع ازرگ

بعد شالحگ؟

زمانڪ مو زمان الچان

ماهو الواعد وصدگ

اظملڪ حفنه مني وضوگ

واصفن بي من تشهگ

تلگاني هذاڪ انه

فرق بس الجروح اغمگ

ادور بطارف الدولاب

مدري شظامه التطلگ

بعد شالحگ!! وكت ما عاف ذاڪ الحيل

هسه ايعوفني امعوگ

لو يعرگ وجه دنياي

للعنده وجه يعرگ

تسطر واليطيح ايطيح

وشراع الورق ينشگ

دنيه الصاح منهه الحيد

مو ندمه الرجيچ يصيح من ينطگ

بعد شالحگ!! يليل البارحه اندليتني بيا صوب

لو ما ظال لون البابنه المغلگ

لاگيني عصاري بسوگنه المسگوف

وبريحه عبي الحلوات خل نغرگ

وي زف الفخاتي على الشواطي غروب

ومواعد عشگ وعيون تتعانگ

وخل برد القوافي اينزز النيشان

واعذر غيضته ويكفيڪ ما دنگ

(المعلقه الحمدانيه ) ورمزية الشعر الشعبي العظيم عندما تمتزج بالشعر التأملي


قصيدة (نجمة ليش )للشاعر

حيدر الحمداني


تيممتك سوالف خوف
وصليتك كمر ينزف عله امتون المناير ماي

وتداينتك نفس مصلوب
من وادم كله بيهه السموم اسنين
ماشافت سراب افياي
توسمتك رهاوة شيب ودوهنت الكناطر بيك جي شايل دفو الكيعان

سبحانه اشكثر باراك رب التين
بده اشموسنه ابنحرك
هيبت مستحه اتلكاك يالبيك الترف شطين
باهلت الفلح والكاع ماشتلو مثل خصرك

تسيورة ضمه اعله النوك
سير ياشريج الهيل
تلكاني نعش متعوب
مر جم برزخ ابروحي ولا مريت

يالغنيتلك عمرين غير الماعرفهن وين
عدمن صارن الياشيب

يالهجرك سهر مغبون غث الليل والحسبه
يبلسم كل صبر مطعون
مر بيه شتال اعيون اخضرلك دمع تواب

حطني ابكل عزه ايوازيك
اساجي الفاجدات اعيون واتميز ابنصهن حيف

يالمالك عرف بالماي دخانك وصل ل الطيف

شمتو بالكمر بجفاك حجيي الوادم حجر سجيل
وجفوفي نخل ثوار
وعيوني ضعن ممحل

وين الكالي رية كاع
منتجيه اعله حفنه ازلوف
اكول اهنا وطن روحي

بس إقنت امسامر ليل
اغبشلك مطر بي طعم ماي اوجوه
وصحالك سمار اخدود

مر بيه زعل شفتين
وضحكلي ظهر مطعون
اغني اشموس الولايه عرس ملجوم

وجذب اسوالف اهل الريل
وامشيلك سماي اخيول
وغازل كل كمر ماطخ جبينه لماي
بس يضحك ضوه لجبريل اشهكله صلاة ابليس واعزفله لحن تفاح
واجيبه لحظرتك سكران
وانت اعفو اعله كيفك طين

متسودن ضوه لملكاك يالرموشك مناوب ليل

برد حيله اشوكح طاريك
يندل بالضنون ايعيل

انا مغيم سهر وفياي اريد امطرلك اجفوني ودفو اعيوني
بلجي ارهم عتب لشفاك
شفاااك ...البيهن مدري جم زمزم تبده وذاب
البيهن يكشخ الممنوع مدة ايد
البيهن شال ياقوت النده اشراعين
البيهن للخمر تاريخ ومزاحم ضحك نعسان
البيهن ما لكه النواب يم سجة حمد محراب يسجدلك بنفسج ريل

مرني بكل جرح يرضيك

نجمة ليش...... ماتلكه ابسمه روحي

دمر بيه الجرح مريود لشايل مثل هجرك

ياسلام.... ياعامر عاصي

............
لا تنسه جرحك
إنته جرحك يندل
وين اشتهيك
أو وين احن
واتهدّل
چنت ادري
بس حتى النهار اتبدّل
وظليت
ما ظليت
ظل جرحي
وذل
........

گتلي اشتهيك
وظل هواك براگه
براگ الشواطي ينوح
غربة غاگه
دلّيني جرحك
هم بعد نتلاگه؟
خطواتنه تضيع
العمر من باگه ؟
..........

مر بيه شهگة مستحه
وعِتني وگوم
جاهل
والوليك
ردت ليلي يدوم
جفلة نهد
مستحي
وطولك مبروم
وصدر الورد عاري
ونده الليل هدوم
.........

گتلك تعاااال
وگضه الليل ورحنه

وظل الهوه
من ايامكم
يجرحنه
يا ما استحينه
وچان شعرك مِحنه
يجفِل
واجيسك
ينشغ
وتفضحنه...

عريان ال سيد خلف

همت من غير راحة بال بس طرواك تبرالي
على جروحي الجروح تنوح
حالي يشد عزم حالي
واهيمن ناحر وية الريح ياريح الجفة شعالي
لمن زل الجدم هينوب منك ماشفت تالي

واضل حاير ولا بالناس للسر ضل كلب خالي
ولادانك عذابك يوم عاصف يردم بجالي

ولاترخص شجاهه الروح .؟!
عدهه شما تذل غالي
اسل سل الشمع واتناك
وانته على اليسل
سالي
وتضل عالطول تبرالي
مثل ضلي وعذاب جفاك كل لحضة يتراوالي

وازيحك من رفيف الروح... ماتنزاح عن بالي

واعيش بحسرتك هايم
اشب نوبة بعذاب الروح
نوبة بلومة الايم
واعض اصبع ندم ياهيه ندمة شتنفع النادم
واسبط للوكت للضيم ليك لشرهه الوادم
عفاني شبية الك نابات ماخلت كتر سالم

ولا سايل ولا عاتب
واحن وتغيب عني الروح وانته على اليحن غايب
دبس درحم وشيل العين تايب ياصبر تايب
بعد مالي وية هاي الناس عشرة بطيبهه نطالب
ولاخوة وجذب من كال...
ينفع بالمحن صاحب
دزل... دبعد... يكلبي ابعد ذب الحبل عالغارب
دبطل ...شو ...دبس... درتاح
وك ما يجبر العايب
هفة وضل الوكت وياه طول العمر متواتب

واهيمن ناحر ويه الريح ياريح الجفه شعالي
لمن زل الجدم هينوب منك ماشفت تالي

حسن وصفي


من تبدي الذمم تنباع
اهنا لازم الثوره تعيش...!
موش احنه العبدنه الگاع ..
حسافه اعله الزلم تنهان والثوره رماد بطيش...

باچر يعتلي التاريخ ...
اعله كلمن ما طلب حگه يثور الليل گمريه عله ابنادم..

الثوره التنسي تنباع .. !
نطلع عالضلام اهلال

هذوله احنه درب للناس...
نسافر والتذاكر مو ضمايرنه..
حيف ايبيعنه المبيوع ..
يذوله احنه عراقيين ما بينه ولا وهواس..
متعوبين..
ياخذنه حچي النهران لاخر كاس..
ولك يا من بعتنه اعله الغرب چا ليش...!

موش احنه العشگنه‌ حسين..
وموش احنه النحب عباس

شمسوين حته تهز چوادرنه..

هذوله احنه رسايل خوف ما ننقري ولا ننباس..
مهي الثوره كحل تاريخ ..

تجرحنه ينزّ الدم عله عيونك حجر سجيل...
ما نتعب ...
الما يسري بشرايينه وطن متعوب ما بي حيل...
بس احنه عراقيين..
عراقيين ما نتعب نزاود جيل ...