( كظ حدك)
للكبير اسماعيل الكاطع

كظ حدك تره تماديت
كظ حدك
ولك داير جرب بالناس
خليلك اظافر من تحك جلدك
هاك مراية الايام
لو عندك اعيون تشوف'''
شوف الطين البخدك

عليمن كاعد وانته
لاتاهب زبيبه ولاكتلت احصان
ولاجدي بمضيفه كهوجي لجدك
واحن كلمن بدينه
لاشعري مثل شعرك
ولاوجدي مثل وجدك
عليمن كاعد وانته
تسبني وتنتظر ردي
واسبك وانتظر ردك
ولاصلت وراي الناس التريدك
ولا كفارنا باصنامها تعبدك

لكن بالشعر نندك
تكصر ...اكدر لمدك
تنحل اكدر لشدك
يالعمرك جزة الخمسين
شايب ماكمل رشدك

عمرك مو جزاهه هواي وانته بعقل الحديثات
وجفوفك على نهدك

ولو تارس شليلي احجار
اعوفك تنبح لوحدك
الي ساعة غضب وياك...

تذكرها لولد ولدك ...

هادي العكايشي - نزوه وما جهبها احد

نزره وماجهبها أحدّ... وأكل لكليبي يمعّود
تغازلها تحاجيها ..
يصير أعليك يوم أسود
رسنها أيتيه المولد ...
معارفها نده وياقوت
كصتها شذر .. وأمطرز بليلو
كلتلهم ذهب ! .. كالولي : لاله أزود
كلتلهم ذهب ... لا ينزل ويصعد
كالولي : الوصل ! كلت : الجزر والمد
لونها أتطاوع اويايه ... لجرها وياي للمشّهد
وأورجها على أجروحي ..
واعدهن .. واحد واحد .. وتيه العد
يجرح المربعانية.. غرو ماكحلك مرود ؟!
يجرح المربعانية .. يا شاعر رثه روحه
يجرح المربعانية
الجرح متشابجه أجروحه
ياعنبر مجمن ابفوحه
ياسر القوافي المحد ايبوحه
يجرح المربعانية .. للأجيك أمحزم أبروحي
وأتلك تل الموازه
وأكلك روحي معتازه
واطك واحه وافيليك
وبالهندس .. وأضويلك
يالجمة غفل مجروح ...
الجبل ينشال عااللوحه
صدك تحجون ! ... ياشاعر رثه روحه ؟
تضحك !..تسكت !.. تحجي !
تضحك .. ضحكتك نشوه .. تطوف بكاس ابن هاني
وتفزز طيف الولايات .. صوره وصوت ..
للدنيه ..ترد ثاني
نسكت سكتتك غنوه .. ياخذه النسيم أسنين ..
ويردها لكهاوينه
خرز سبحه .. وجكاره .. وجاي سيلاني
تحجي حجايتك سلوه .. غفت بيها النكات احروز
هايابه .. هاخويه .. هايابه وها خويه !
هايابه ..
وعلى هايابه هايابه ..نكته اثنين وأثلاث ..
وأربعه.. أتدش على أكليبي ..
كبل ماتوصل أذاني ..
وتخلي الروح مشروحه
صدك تحجون ! ياشاعر رثه روحه
يجرح المربعانية .. كصر باع الجلم ..
متدوهنه الجلمه
اجيت أرثيك مامن جلمه طاعتني ..
بسل روحه الحجي أبظلمه ؟!
يدانك ناكل المنجد ..
عبر شطين عالدنيه
ورجعت وكاغدي اينوني بياض ..
وفشلته بقلمه
ولاكطان جلمة .. وفالتي اتلوحه
صدك تحجون ؟ ! ...ياشاعر رثه روحه ؟
ياجرح المربعانية .. يبو كلب الجبير ألحكته ألدنيه
يبو جلمات البريسم ..
تفل باب ألسمه بشهكه ..
ونرد عالكلب حنيه
هم شفتو ا الكمر يختل أبرديه ؟
هم شفتوا الشمس تنباك صبحيه ؟
اتخسه ياشارع الطوسي !
جم مره يمر أعليك يتمشه
ولامره التجي بحرشه ؟
ولابيك الترد نعشه ؟
بآمر منبر عزا المشراك ..
ممنوع الكمر .. يسكن ألبريه
ممنوع الكمر ..يسكن ألبريه
ودواوين الشعر صاغت الاطروحه
صدك تحجون ؟!.. ياشاعر رثه روحه

علي الشباني

مستاحش

تمر بيّه السچچ سكتة وارد مذبوح
لن طولك بعد مامش

ولك عمري عطش .. عمري مهر مجنون
ولك عمري تعنالك يهلبت چلمة بيك تهوّن
اني الطحت بدروبك مذلّة وهم
افر گلبي بسواليفك واطيحن دم
وانت مسيّس بكل السواجي اورود
انت مسيّس بكل الگلوب اورود
وبروحي تمر جدحة نجم للگاع
تجرحني ولا عوفك
واخافن تثگل اعيوني من اشوفك

واطيح بروحي من تجري حطب والهب
وانت ولا تخضر عود
ولك خضّر ولو بس ماي
اجيك مناحر السچة الحچي مترّب عله اعيوني
وأصابيعي دمع .. وامشيلك مراية
اجيك بحيل فختاية واردلك عشگ ماينگال
واطگ بعيونك المغرب شذر وهلال
ياخذني عليك الليل يالطولك سمه وهلال

اگعد بدربك سمه وانت اكبر بعمري گمر
اني المبعثر سواجي وانت ها وسعك نهر
اني بيه السكته تمشي سنين
تعبان النهر بالماي !!
ثگلان النهر بالطين
والسكتة جسر عالماي روحي لياجرف تردين
يا هلبت تجي بلا خوف
زاهي الشوف بعيونك .. واحچيلك عله الليل كلّه
وترجف بروحي محنّه
غنه حتى الخوف بيه الماي غنه
وفاضت بروحي المحنه
واعتنيت الشوگ بيه وما خفت
خافت اعيونك عليه وما خفت
طشريت ايامي دوهني غرامك حيّل
وبروحي تهت ..
وانت كلش مستريح واني من شفتك همت

اني من شفتك شبابيچ العمر وجن ضوه وقداح
وايامي رصيف يروح للملگة ويرد مرتاح

والبيت اليخضرلك عله العتبة عشب اخضر
واظل اني عله الشوفات خلگ يزغر
خلگ يكبر
وتظل انت عله ايامي
حرير اشگر

احمد عبد الدايم ..

صنتت ليل
وانه هناك يم روحي ضوه مكسور
وبرد اعمه
برد يگرص جلد ثوبي
ويدفه ابتجاعيدي خضار ابره

وانه اهنااااااااك عالسجةاحس روحي
غزف يضحك غزف يبجي
تاهن كل صناديگه ومشه ويالريح

وصوته ايشرمخ الشارع غنه بلا راي
وانه ادبي اعله لاهيتي
لكط شوفي اثر حنه وتكت مدفون
امسحت گبره وقريت اسمه
وشيعته الغصن ضايج
وانه هناك وانته هنا
بين اضلوعي جوية صيف
واحسنك تماشيني
واحس جفك يدرفعني
ويعثرني ابجرف سجه

وارد اعدل وامد ايدي
وتتلاشه رذاذ ارماد
ويرد جفي بوجه فشله وفراغ اهواي
وارد امشي بثگل جدمي
وتطيح اسنيني بردانه
واعبرلك تعب حانه وضحك بت ليل
ويفز الديرم ابروحي
ويريد امن الضحك شفه
(الضحك شارد مثل ضلي)

اتصفحوا 🤍✨

عقيل العرد



أول مشاوير العمر


جانت عيونك

وآخر رسالة للهجر جانت عيونك

اول غُرب نرتاح بيها
وآخر مدينة نموت بيها

جانت عيونك

ياما حبايب سامرونه وماكو واهس للعشك

وياما كصايب خدرت وما مش اصابع للصدك

وياما كلتلك ضايع المفتاح بكَليبي بعذابك لا تدك

ياما تنيتك بالمواعيد
هلال اعله كَدي وضاملك عيد

والصايمات بلا عذر ..

جانت عيونك

وتاخذني للوادم نذر ... جانت عيونك

زعلان لو هاوي الزعل حيرنا طبعك
جبنا دمعنا ونعتذر لو تعب شمعك

والمطر من كل غيمه اجه ايطيح اعله دمعك

ثاري المطر ما وفه الاعذار

والغيم يم عيونك احتار



ثاري اول صيار المطر ...جانت عيونك
والتهدي للناس السهر ...

جانت عيونك

انشد بساتين الورد يا وردة منهن بيها خله وباكَتك

هاي الالوان الوان صارت جي
شفتها وشافتك

وهاي الانهار الحلوة ..
صارت حلوة..... لمن ضاكَتك

طعم الشموس ولون الازهار
يالحسنك اعله الدنيا خطار
وخطار غالي اعله الحلم ..

جانت عيونك

يطفح دمعها وتبتسم ..



جانت عيونك

ادهم عادل

وآني مليت أرد أعاتب ..
كافي يومية نتعارك عل المذاهب !..
كافي كلمن لام ربعة
وطالع الغبشة يحارب ..

أبنو فكرة
رسّموا صورة
خرّجوا طالب ..
ربّوا للطفلة گصايب ..
حطّوا ضحكة بوجه كل انسان شايب ..

فرّحوا جيل بعمرة ما يعرف سعادة
ولا تزيدون الوكت ضيم ومصايب ..
الدين ضحكة طفلة حلوة
وجنة الله انخلقت لكل طينة طيبة
الجنة مو بس للگرايب !!..

والله واضح
ما يهمه الناس تسجد

بس تهمه الناس لو عاشوا حبايب ..

رياض أبو شبع
من الشعراء الشعبيين الملتزمين ولد في الكوفة عام 1947... قصيدته.(صلاة الكاولي) من القصائد الانسانيه الكبيرة

أنا ابحالين ...
حال الناس تنعاني على البيه
اوحال البيه يشچيلي العمر...
من ضيع اسنينه ابلياليه
وصلاة الغبشة فاتتني
وگلب ظل ابنواعيه
وألف ليل اليمر والآه...
تنگال ابتواليه
وحزن جَر الربابه ابليل
تحچي البيها والبيه
وأون ... لا طارش من الراح
ولا موت بطواريه
ولا چلمة التحاچي الروح
عن ذاك العزيز وروحي عاريّه
ولا نيسان عالتعبان مر فيّه
وظل والنار بجروحي
وشمس مصلوبة فوگ الروح ظهريه
وربابه ...
أونوح وسوالف غجر مابيها حنية
وتنام الخيمة عالمامش..
ويوميه عرس عالمامش ابمامش
وانا آبنادم
وأحط عيوني بعيون...
اليجيني ابليل ، ضيف ونازع الفشلة
واگابح ... واليگابح ضيف خيمتنه
ويجينه وبالنواعي انبيع لمتنه
ويحط جدمه
على أنفاس الربابه ويخنگ الچلمة
ويصيح ويثگل السانه
ويگول ابعين المواكح
يهنياله
ويهنياله اليغني الليل كله وما يعرف النوح
ويهنياله.. اليغني وعيب شاف اجروح
وانا آبنادم...
ينام الصبر بجروحي
وتنام حچايتي ابروحي
وينشدوني ...
أبوك اشچان ؟؟
وگلهم والشفاف أتموت بالحيره
وگلهم چان
أبوي (الكاولي) ولا يگعد ابديرة
ابويه (الكاولي) ومايعرف الغيرة
وگلهم كاولي...
ولاچن... انا ابنادم..
ولي احچاية هوه ابدنياي
وليلية الربابه اتسولف ابلواي
وليلية الجرح ينشدني عن اهواي
ويغص العذر بشفافي
وتموت اعيوني عالسچه
وتبات احچايتي الباچر
وارد اردود ذاك انه
گلب حاير
وحزن متواعد الباچر
ربابه وتكسر الخاطر
وضواي بخيمتي مساهر
واصيح بدمعي يالوادم..
انا ابنادم !!
وألي وياكم گلب بالدنيه يتألم
والي وياكم گلب ما شاف غير الهم
ولي وياكم... حرام احلم ؟!..حرام احلم ؟!
وانا بنادم ؟؟؟

علي الشباني || الشمس و البيت ||

الشمس ودتني فيّ البيتكم ودتني فيّ
رحت بعيون الضهر داوي حزن و تراب ..
وبروحي يفيض الـميّ..
فيض يا روحي تعب وتراب ..
واتعنه المشه بعمري سهر..
واندك وي الباب ..
يمكن بالعمر ينفتح مره البــاب ..
واعلگلك شمس عالـباب...
واتعناك ..ادگ روحي على العتبه نذر..
ومخضر اتمناك...
اصيرن فيّ للمخضــر اصيــرن فيّ
واشبگه انه خضار و ميّ ..
اسيلن غــاد..افيّض كل سواجيك ..اسيلن غاد
ألملم كل عطش روحي واشتله ابابكم سدره ..
جبيره ..وبالعطش ثوب السواجي ازغـــار..
حزينه..وبالربيع اتخضر الها اعشـــوش ..
يالعمرك فرح مرشوش..
يالحزنك خبز يبجي الصبح عالــناس..
يالعشگك درب مسكون ..
ونْ من الزغر بـ الراس ..
واقرالك دفاتر ضيـم ..
ويضل بس حرف بـ الراس ما ينگال ..
يالعشگك هِني و ﭼــتال ..
اضوگ الروح من تــجزي ..
يلفني الدرب واتدوهن ..
واگول اشماله گلبي الما يشوفك حن..
والك گلبي حمامه هناك ..
من تمشي يطگ جنحه و يطير هناك..
يالمامش بعد سجه گضيت وياك ..
بس هوَ العمر ما ينگضي بلياك ..
لا هوَ الشمس وتغيب ..
اول ما يشوف العين وبروحي يفرفح ضيّ..
يمر بيه الگمــر و الميّ..
واجيب الشمس و اوگفلك يـ الاسمر فيّ

عريان آل سيد خلف. (وادعيني )

وادعــيني اوداع المحـــبين مـــــا ضايج حــلاته

انه مثل الطير لـــــو طاحـــن طوارف ســـــبكاته

لو مثل ضامي بظهاري الصيف من تنشف لهاته

عايش بنارين اهــن نار الجـــفه ونـــار الشماته

انتي تدرين الوكــــت يردف علي بمكســــراته

حــطني دوارة كَطب للظيم و افـــترت رحـــاته

لا نهاري يريحــــني ولا ليلي مثل الـناس اباته

وادعيني وداع مضنوكـَ النفس ودموع عينه امونساته

وادعيني وداع الامايه الولدها ابين اديها اموزراته
لاتبرد شوگها ولاتگدر تهده لغلاته

وذاك كلبي الطيب ذاته
وآنه ذاك آنه اليعيش بطيف لو طول بعاده
يل بسمتج فرحتي
او رقة جفن عينچ سعاده
ويا نظر ..لنواظري اوياهن وكتهن لو تراده
يل تبوگ عيونچ من الليل كل لذة سواده
يل حنيني لشوفتچ حن السكن غربه لبلاده
يل تكولين الونين ايچيد
ون الروح عاده
هذا چانون الكلب يسري اللهب حتى برماده
وادعيني ابسّمتج ..اهوه الوداع
البي جلاده

عقيل العرد...


نزلوني مو موتي بعد !!

بيه اعتراض وثرثرة

نزلوني تابوتي استحى

كدما غبش للمكبرة

ما مات شعبي المستقل

ما مات صوتي المايذل

هذا انه ما ميت عدل !!

افرش الكاع من الدما

وارسم خريطة اعله السما

وشرياني اسويه كنطرة

خلني انتحاري المرحلة

البس حزام من الورد

وسلاحي كصبة ومحبرة

ياشعبي كافي تنهضم ؛

اخذ استراحة من اللطم

وازحف على اسوار الظلم

شيل الدنگ والسيطرة

واصرخ بصوتك ( لا تخف )

(يا عملاء المملكة وولاية اهل المصلحة )

الشعب باقي للشعب

واحزابكم والقندرة

( عذرا للقندرة )
....................

فواز الهلالي...

يبو غيمة الزركه شبيك..

انه ابنك..وابن أدم..

جم شلال صبيت الحزن فوكاي..

موش انت التميز وادم او وادم..

يرب الخير ..

خيرك ليش يعبرني..

يرب الروح ..

كون العافيه ابمنه..

اخذها ولا تعذبني..

يربي استغفرك بس الوكت هزني..

ازر ابروحي جم ركعه..

ويهد اليل وي نومي ويشككني..
هذا انه وطن ..

بس هجرته الوادم..

هذا انه فرح..

بس ما دره بيا ديره يتبده..

بهت لوني مثل نجمه..

خذاها الصبح وتعده..

وره شباجي ليش تموت كل ورده..

وليش تظلم الدنيه وتشح الريح..

كل ما افتح البرده..

المغرب لا هلا المغرب..

يجي شايل شليل دموع..

وحزني يكودني لحضنه..

وكسر بيه السنين ضلوع..

تمنيت الله خالكني غصن شجره..

عله متوني يحط الطير....

(...طيفك شيخ يتگهوه بدمع عيني )


الشاعر قاسم الشريفي




امر   المن  وتراب  البوب  يكسر  واهس  ضنوني

اتعنه وارد مطلوب مية ثار عيني مجلبه بمتوني

يل عفتوني مو ناطور لل گيعان خاطر هيج تنسوني

انه فرض  الفجر مريود  واجب  من  تصلوني

واجب من يضل ليلية طيفك شيخ ويتگهوه بدمع عيني 

يهنيالك ولا يعنيلك الساعي

تنام من العصر عينك عجوز الريف ولا غنيت لوجاعي

ساهرلك سهر مسجون وتاعبلك تعب ماصول زرف  ضهري   الراعي 

كاتلني الضمه وبزل بگاعك ماي  وتعيرني بملحها وتطعن بگاعي

يل معودني افسرك من وره الحيطان  ليش متيه اطباعي 

ليش ابجيلك من اتغيب ونته تغني بوداعي

ولك فكني اريد ارجع وجه بسمار داير ضهره لل
صوره

اريد  ارجع نهر يتسابگ ويل غيم ولا يهتم  لناعوره

لجن  مگدر  هذا انته  مرض  سكر  مشيت بروحي وبجلدي 

عفت بيه جرح نيشان  تشهدله  ولد  ولدي

يل عندك بغيري هواي غيرك كلشي ما عدي

الكبير كاظم أسماعيل الكاطع
يصف دول الجوار بقصيدته (الغابه)



كلشي ولا تجنون اسلاح
گالوا لتصنعون اسلاح
واحنه بغابه وداير مادايرنه اذيابه
وهتك اعراض وسفك ارواح
وكل جار ايراوينه انيابه
وكل جار ايسمن بـ ﭼـلابه
ويحد خنجر ذبــاح ..
بوسط الغابة (الشرك) امكهرب
والغار امسگف برماح
وطيور بگاع المحترگه
ويا ويله الما عنده اجناح
مناه ظلمة ومناه ظلمة
وبس عدنه اينور مصباح
كلمن بيده احجار وهدو نص الليل
ويا ليل اشگد بيك اشباح؟
واليگصد بغداد بغاره بأسطنبول يرد يرتاح
وبسوريه الثعلب ماكر
ماكر جداً ثعلب هجاء ومداح
ماكر جداً مو حواء الغشت آدم
هو القدمله التفاح ..
وذاك اللي گاعد يتفرج
هذا اتصوب ذاك الطاح
ومن روجات البحر الاحمر
شفنه الدم وشفنه الكاتل
ومعگل جان التمساح
ويا بستان الما جر حسره؟
ويا عود الما ون اوناح ..
هضبه نجد وربع الخالي
خلوا گاع الله الخضره هيمه ومبزل للأملاح
گطره وطاحت شيرد ماي الگصه الطاح
واشلون ابنادم يرتاح
منهو يعيش بهاي الدنيا
ومامش جوه الراس اسلاح؟
شافوا بغداد ابعزتهه
يومية الناس اتزف عاشگ ..
وحزن الحلوه يصير افراح
وما فادتهم هاي الفكره
ورادوه يطيح وما طاح
ما يعجبهم يكبر سنبل
ويصير ابطول الفلاح
شافوا شمس الديره اتعلي اتعلي اتعلي
وبحجارتهم ما تنلاح
گالوا لا تجنون اسلاح
واحنه بغابه وداير ما دايرنه اذيابه
وهتك اعراض وسفك ارواح ..

عدنان شايع




حتى لو بطراف اصابيعك تكظني وانچفي

الينچفي يگلوله فدوه

الفدوه من حلگك يبعد احلوگ اهلنا هواي تسوه

لولي برموشك على رموشي نُعاس

بروحي غفوه.

فراشنا النسمه .العليله

الگمره.. .غطوه

عيشني ....امن اول (دللّو)خدرتني

وإبدي سافر

خطوه ,خطوه .

طشر بروحي السعادة بكاس وصلك

بي غنوه ...

بي اه

وبي اخ

وبي مدري ...!!

منين ماكظيتني ...

تلگاني شكوى .

عيشني .

وفزز احلامي النامت امتانات .صحوه ؟

عيشني (الجلمود).اكل لوني بضراوة.

وروحي خضره ..

وعيني .رخوه

( خيال الطف )

كريم البغدادي




شمس ضلمه

ونهاية صوت

ونداء من السماء

ياهو العزيز يموت

واختار الحسين الورد والريحان

گلهم روحوا للجنة

والقاسم اذا موجود

هسه نكمل الحنه

ومشوا نجمة بگفة النجمة

كل خطوة بأثرهم خضرت نعمه

وشفت ريشة وگلت عباس راسك حار

نزل ريشتك لا توصللهه النار

وشفت هلال نص الليل بس يفتر

رحت وتقربت منه وطلع يشبه علي الاكبر

سألته شبيك گال حسين

گتله الماي گال حسين

گتله الجنة گال حسين

كل احنه فده لحسين

احنه هوااي عد الله

ياهوا الگالكم سبعين

ورجعت امشي وشفت شمعه وعليها گماط

يعبدالله الخلق روحك عليها شحاط

شو تلمع

انت اول طفل لحسين يتبرع

نزلتلك سمه وشالتك من الگاع

طف متروس كله سباع

واجت زينب وصاحت خويه ابو السجاد

هاي الدنيا موش النه

بعد فترة ويصير فراگ خويه حسين حاللنه

عقيل العرد......


من طحت بجفوفك ابجي
جانت جفوفك منارة
وجان بعيوني صنم

ومن جبت عمري اعله جفي
جانت عيونك متاهة
وضحكتك سجة وهم

اتوكلت عالحب كبل لا امشي بيك
وما شفت خدك جوازي ... الا من شفته بحزن شفتي انختم

من طحت بجفوفك ابجي
جانت الدنيا زغيرة
وشفت بين خطوط اصابيعك وطن

وكتلك احضني لحد ماموت بيك

الماي من تكبر احضانه يتيه دروبه البلم

كبرن حياطينك بروحي وبجيتك
ونزلت كل صورة بيضة وكل حلم واغنية حلوة
وعلكت بمجانهن صورة ندم

لهفتي اضحية برودك
يالخذت ضحكات زغري
لضحكتك تجراة دم
..........

علي نغيمش


تفاح وشايل تفاح
وهذا گليبي ولا يرتاح
اله ايحوشه وينسى الراح
اله يبحوش كل شي بي
واله يشم الماحاچي

فنان بأحلى الألوان
يعرف اطوار الرمان
يعرف فاكهة البستان
تجمع كل شي
بس مايعرف عنده شضام
ياريت يطلع ماضام
ياريت انشوف الاحلام

وياريت ادرفع ياريت

صح الشايلهن نعرفهن
بس الشابگهن مامنهن
شيعثره وحظنه ايكشفهن

هلبت يعثر
هلبت يعثر

شيعثره ونحتضنه اسم الله
شيعثره ونشوف الصله

صلى النده على صدره وسلم
صلى الخمر عليه وسلهم
صلى الشام عليه ونسم

مطر الخجل عليه وقام
قشعر جسمه مثل الجام
وگفت كل مسامته سلام

اسأل مايحدث في المعبد
اسأل كيف يكون المشهد

انه تخيلته وحريت
انه تخيلته وهميت

مابين النهدين قصيدة
مابيني وبينه قصيدة
مابين الأحلام قصيدة

وانه اعشق كل قصيدة
لچن مامتأكد كلش
شنهو اتريد
وهل هي
عنيدة
مفيدة
مااعرف بس حلوة الصيدة
من تطلع من الألهام
تفاح وشايل تفاح
وانه وگلبي اعليه اولام