مهند الحچيمي


جزتني وكورتها بخيرها وشرها
امفرع والربع متعاجبه اغترها

واضحك والخناجر بضلوع تبات
ولخاطر الخوه الزاحله اعبرها

نايم من عصر ومشرع البيبان
انا راعي الثنية المحد يمرها

و ايد الضلت تنايط بحمل الريش
اغسل عارها ومن متنك ابترها

صيتك ورث غيرك ما يموت وياك
بتعبك على وياك شما ردت ترها

كلبك مو سلاحك خايب اليحميك
والتوحش بعين الغيرك اطرها

ماي اطيتني وعديتك من امهيد
اليملك ناگه وحده وحرم يكرها

وما كثرت صايح حتى بت الليل
والمسوي الگنايه گنايته استرها

وموش انه اليدور ضيكت النهران
طول ومو عرض نهارنك اطفرها

واستر خلت الوياك كبل الكوم
وارجع على اكتارك خايب اخزرها

واشد اليلچخ ينعرض للــ  لوم
ولا تفتگ فتوگ تحيرك بزرها

من حگي وطرتلك مو قضيه خوف
وياك اليضل شلانه تدمرها

ولا تنغش ب الاصفر واتخورس دوم
ما كاسر خواطر ليش تجبرها

وعيبك لحد عينك ما عبر رجليك
وادين الگادتك للنور تنكرها

واحمل وزرك وبري المشوا وياك
وغلطتك على احبالك لو ردت شرها

من عين اليضده ما يطير النوم
ليش الموش يمه يروح ينكرها

مو كل الزلم من تنذكر بالخير
اكو وياي تمشي وما اتذكرها

حسن علي الغالبي



الدنيا ليل
سنطة ودروب المدينة بلايه ناس
وبس دَبي جروحك تسمعه ..
وياخذك تعبك لحد عثرة جدامك
والشوراع وحشة كلش
وحشة چفوف السواجي بلايه ماي
وحشة الطف وره العاشر ..
وانت حاير يا مكان يشيل روحك
تبتدي ادور مقاهي ..

چاي نرگيلة خبر والليلة تگضي
وعادي حَت لو يگضي عمرك ..
وبعد مدة امن البحث تِعثر بواحد
تگعد اعله الكرسي حزنك يضل واگف ..
تنادي (نرگيلة ثگيلة بروح جدك)
يجيبلك وحده حزينة ..

شگد ادين انباعت وگاداها چفها..
تباوع اعله الفحم يشبه لون عينك
تِسحب الدخان ..
حد آخر زوية بطَرف ريتك
بلكي هاي الخنگه تِهفَت
بلكي تبرد ..
ماتفيد ..
ٰتمشط المقهى بعيونك
هلبت ابن ادم عرف يكسر وحشتك
هلبت حچاية هلا اتموت غربتك
هلبت وماتلگه واحد ..

ادنّگ وتحضه بجريدة شويّة عنك
تشيلها تضيع وحشتك بالجريدة
وكون ما شفت الجريدة ..
تقرأ باول صفحة بيها
خبر عاجل:
في تمام الساعة عِز (انتحر شاعر)،!
والسَبب: (محظور من نشر الجرايد)
هنا شرايينك تضخ دمك بحرگة
تطلع ٰمن المقهى والحرگة اعله طولك

تبدي تبحث ع المُسبب
وبعد بضعه ٰمن الايام السبب بيّن
واصله الشاعر رسالة ..
تگضي بالشارع حياتك،
لا وظيفة وتنذل بأبسط حقوقك
لو تجيب النه قصيدة اعله الكراسي
وبالقصيدة ادني يم الله السياسي

وچان رده (الشِعر دين)
الينتهك حرمة قصيدة الذِلة ثوبه
وبنهج دين القصايد ماكو توبة
واغفه بمتون الشوراع بالكرامة
ولا انام بسد قصيدة تخِل ضميري ..

طبّگ المرسال ضماه بسترته
وفوگ من جسر الكرامة ..
انشمرت الروح العزيزة
طاح وتناثر ابيات بذمّة الدزله الرسالة
مات بس موته رسالة تعيش باچر ..!

كاظم اسماعيل الكاطع


شلّك عندي
خيط ظل بالراس وخلافه اجن
راسي بير وبيه افاعي
وانه ميت موت عصري بلا دفن

وگلبي سيّاف اعله راسي
ينذبح لمن يحن
وگلبي يا ويل اعله گلبي
من يعظ شفه اعله شفه
ينطبگ سن اعله سن

گلبي يا سيّاف لو راد يتحلم
يلزم ادروب الجفن
وجدمي يانار الترده
من تطخ ويعتنيهم؟
آ ه هواهم لو يعن

لكن وگالوله گلبي
الريح تعكس
وايد ماتهوى السفن

وامّلت روحي اعله شجره
تگاوت اويّ الريح
مره ثنين سبعه
وايّست من نسمه طاحت

وصبّحت چن آنه ميت
وامي شگت ثوبها بوكت الغروب
وحيل صاحت
وامي استاذه يتشگگ زيجها
وباچر تخيطه..
وماتفوت نايحه وما بيها ناحت

نشفت ارياگ السواجي
سوط بارح شگ ظهرها
وتالي ماتت واستراحت
وآنه گطرة ماي عميه وزل جدمها
وبين فكين العطش
والصيف طاحت

شلك عندي
فلان راح
فلانه راحت
واحرگتني اويّ الرسايل
والرماد البيّ لحروفي يحن
من يعظ شفة ندامه
ينطبگ سن اعله سن

كرار موحي


غيرك من يمشط گذلة العتبه
يـ في غبشه؟

يـ في توك صيار شموس

امس ما تيهت جدمك
حجل صايريلك الفانوس

كل لمعه بأصابيعك
تزاود سنبله من تشب
كل خوفي گمر طايح
و حدر زنودك مچلب

اوچبلي يبزر التوت

انه شجندوب اصيح بعيني محتامك؟
تضحك و الشمس فزاعه بـ الثامك
تصفن و الندئ يتلعثم بـ جامك

وك يا طين
يا أول نبي للبوس

مامش شرده من عينك؟
بداية كل درب عينك
شما نبعد نهاية كل درب عينك

يالبشفتك خلاصة ياس
چم بستان بـ سنينك؟

ليليه اعله طاريك يصلي الطير
و تصلي الناس
و يصلي القبلته عيونك
و جرة الكأس

وحتى الما عرف دينك يصليلك!

وك يا طين!
چم نجمه شفتها تلوذ بـ شليلك؟
چم شباچ ما جاسه هوه محبين
فك روحه ويغنيلك؟

شبعد و تفزز الكحله؟
حرام تشابچ عيونك
حله بـ حلگك الخوف هواي
كاسر ثلجة سنونك
امس من البرد خصرك ينث ليرات

هنا ليره جنوبيه
بعدها مسومره بگصبه
و علگها احزاز
هنا ليره فراتيه
تغنيلي بـغنج و بكيف
و المزه خصر و اعزاز

شيصحي الَمرتوي
بـ خصرك و لذة اعزاز

غاد و كل نمش بـ الجيد
ياخذني اعله بستانك!

مشحوفي اعله راگ الماي
متئ يغويك شيطانك؟
انطر هلبت
و يغويك شيطانك

سعد الزبيدي


چيسني ودلني بحلاتي بطعم اصبعك
انته يل ساكت بروحي منين ماتحچيني اسمعك
ياحلم والليل يعطشني اعله نبعك

عذب يا كل المواسم
منين ماتصعد شبگ يتحنه جذعك

كاود اسنيني اعله كيفك
ياترف وشلون مابياش اتبعك

ويله دورني اعله اعرفك
ولگه روحي وخلي اضيع

التلگه بي روحك حلاته
منين ماچاسك يضيعك

انت يا موگد شتاي
ورجفتي يسولفها طبعك

وانته انته 
بكل حزن يتغنه دمعك
سكتتني وسكتتني وسولفيتك
وحزمتني وحزنتي ومابجيتك

شبت احروفك طواري وليل گمره وماحجيتك
نادت ارسومك غربتي وناس اشتهيتك

تيهتني وضيعتني.     
مدري انه الضيعيتك

واعدتني 
وحيرة عيوني
عناوين ونشد بيبان غربه ومالگيتك

فاضت اجروحي مسافات وتعب يضوي اعله نيتك

اه من يگصي الحزن
اه من روحي التحن

اه من گتلي تعال ومااجيتك
طافيه الوان البوجهي
ومن حجوها اتذكريتك

بالصور بالناس بطيوفي لگيتك
بالصور بالناس بسنيني بجيتك

سكرتني  ولحنتني
وغنوةالسكران بيتك

ضيعتني وتيهتني
مدري انه الضيعيتك
مادريت بروحي انته  ولانه اتهجه وقريتك

موفق محمد



لا تبطلين اللعب


گام على حيله الگلب
من فتح بابي الهوه
والگمر حدر النهد
وينث عليه الضوه
ويلفنه قوس قزح
داير مداير سوه
لا تسولف على الورد
كل الورد بيدي
ولا تبطلين اللعب
يرويحتي زيدي

زيدي النهد بالشمس يغسل
بمي الذهب
وفضه نده إتطرزة ومكتوم
بيه الرطب
غافي ابحرير الدفو مايوم
گاسه التعب
إيشگ الصدر لو صحه
تلني وجرح إيدي
ولا تبطلين اللعب يرويحتي
زيدي

نجمه على نجمه الخصر
ويضوي على الردفين
ويحجي على طوله الغنج
إبهيده تسمعه العين
لف إيدك على الظهر
ضل تلزم الصوبين
تيهني فتر الخصر لف
الضوه بيدي
ولا تبطلين اللعب يرويحتي
زيدي

هيچي اغاني الضوه
إتشگ المسامة تفوت
وبسكوت شرب العسل
إشگد طيب البسكوت
ولوز الشفايف غنه
وعلى اللوز روحي تموت
يحچيلي كل النهد
وآنه اسمع إبيدي
ولا تبطلين اللعب
يرويحتي زيدي

طخ الضوه بالضوه
وجمر العشگ يجدح
وريان يضوي الزند منه
العطر ينضح
وتاخذنه مزنة هوه
بيهه المطر يجرح
خل يشبع من العطر
كل إصبع إبيدي
ولا تبطلين اللعب يرويحتي
زيدي
لا تيأسن يا حسن
إشما يجور الزمن
وتعيث بينه
المحن
لا تيأسن يا حسن
كل ماسه وإلهه مسن

البينه لو بالصخر
صاح آخ من القهر
الگلب گصته الطبر
وبنياطه خاط الچفن
لا تیأسن يا حسن
هيچي إبتوالي العمر
شدنه إبتبليه الفگر
ويشلبه يلگط صبر
يا ريت ينزل حرن
لا تيأسن يا حسن
زرنيخ صار العمر
نگعد گبر  يم گبر
من الضيم نحسد جبر
من مات حصل عفن
لا تيأسن يا حسن

ما صارت ولا جرت
ويا ريت عيني عمت
ما أنصفت من صفت
إندور خبز باليمن
لا تيأسن يا حسن

لا كهرباء ودوه
ولا ماي يطفي الجوه
لو يگدر على الهوى
چا ماتحصله إبثمن
لا تيأسن يا حسن
كل ماسة وإلهه مسن
صدگ وترد
صبراً على مجرم حز إمرارتي
منجلة
جاثم على صدورنه يحموم
البلد منجلة
طساه بالموت وما خله بعد
منجلة
ذبحاً من الراس وبالهام
الطبر دامله
وما  يرتوي الذيب كل دجلة
جره دم إله
قيح وصديد البلد مفجورة
يا دملة
والناس تبكي دماً وزاد
القهر منجلة

صدگ وترد
يلگلبي جنح عصفور من فرگاك
يرف إيگول أريد الگاك
وترجاك
يلغالي وعليك الروح
مرة وتجرع الحنظل
غريبة وتلهم الزرنيخ
مشجولة شچل بالصيخ

صدگ وترد
وجمعلك ورد قداح
جوري
لا أجمعلك ضوه عيوني
وتلگاها  حديقة الروح
خضرة
والشجر نومي
صدگ وترد
يلگلبي إلك  يومي

صدگ وترد
وجمعلك فخاتي  البيت
أجمعلك بلابل كل
محلتنه
سكر بلبل سمع صوتك
غنه بأعذب الألحان
غنه ورگص البستان
غنه بأعذب الأحزان
أجه الغايب
هلهلن يا بنات العم
أجه الغايب
إبچنه بدمع من سم
أجه الغايب
لفته إبجفن أظلم
چذب مترد
چذب مترد
چذب مترد

بشير المرشدي



تنيتك شايل بجيدي   
گلايد مستحه لعينك

وحفتلك گمره وهلالين     
شذرات لروازينك

تنيتك والعطش ياخذني روجة ماي
مصلوبه عله جرفينك

وانت شگد نوارس كاعده اتغني  
بمتن جرفك
  
تنيتك والعشك شاتلني عتبة باب    
تتنطر تشم چفك
يوديها لبيدرها الغفه ابزلفك
لمرواح السنين الضاع    
ذاك الذرة حنطتها

تنيتك والدروب بظلعي  شالتلك محطتها

وانت شچم نبي  البمتون 
جرفك فرع وصله

الحنين يدخن بصدري يطين الله

تعال وطش رذاذك مطره بخدودي

تعال ولم عطيت الله
الغدتلك  تبجي بزنودي

يقداح العطش يتمشه برياگي ويذكرني بطواريك

يماتدري الگمر كل ليل
يندهني بمعانيك

وينك خايف اتراب الرفوف ايخيم بصدري

خايف لاتجيني جفوف  
وتحوف الهوى العذري

وينك حط علي چفك واخذني لمعضدك شذره

اخذني اشگد عشگ بيه  
عشگ فلاح للشجره

تنيتك والشته ابچفي لگه امچانه وبرد كلشي
وخضاري عليك راح وفارگ اغصانه

عليك شگد بلابل دوم تسألني
عليك شجم غصن مرطوب يسألني

واسكت…
والحنين اتنگد بصدري بواچيه
ويهيجني…
وتفز الآ آخ ويفضحني ابسواجيه

عليك العين رمدت وانفضح سري
ونزل غيم الله وانداف
بخصل شعري

وانت ولا دفو الهزك عليه
وزاجلك شفته

ولا حظنة حلم مرت عليه ومحزمك طفته

يماتدري
عذاب الله ابغيابك 
من رحت شفته

يماتدري
النواعي اتوصفت ليه
وسواد الثوب رافكني 

انوحن من اشوفن طير
عالشجره
احسه ابأسمك ايغني

تعال ابداعت الخفگه العفتها احذاك

احس اني اتعبت مني

اريد ابعطرك الگاني
اريد الگه الخمر ذاك اليثملني

اريد ابشمك انساني
اريد الگه  العطر عريس
مزفوف عله قمصاني

امير الجدوع


افرش جروحي بـ شليلك
جيس دمهن ياوجع بيهن قديم ..

من فگدتك
گمت اطش روحي
على كل شباج فصليه
بجي والله كريم

انت حلمي وشوفك بـ روحي شتريته

ليش نايم وانا ماكو
فز يحلمي اكدار حلمه الشاعر تفز شاعريته

گود عيني
الما يگود الطيف شوفة  
تكبر الضلمة بخيالة

شضيع المكتوب يـ الدمعك هلا وصوتك دلالة..

وليش كل ساعي دنت نفسه اعلى حزني
يموت لو فك الرساله

وموش وحده بـوحده تحسب
جلد مكتوب الموادع مايمض بيه البـجاله.

والدمع مرواح مثلوم اعلى بيدر
ينعرف جتاله كيفه

للموادع مامحسب وهمتني

الينام وشايل حموله اعلى متنه مايريد يوهمه طيفه

كسرت مرايه دمعتي
ومالي جف يصير راگ..

واحنه غشمة
انا و عيوني نفرزن لمعت الشذرة بهاگ

وهمتني..

وانا شاعر كلبه جفه
مفطره بيه القصايد

كل جرح يصغر ضماده يفيض زايد

او مو تعرفه
طمع گلبي وجرحه اكبر من شليله

لاتروح شلون بيه

شيلت التابوت سهله
وفركت الميت ثكيلة

يخضر او مضمام عشگي من يصوفر
خاف لا يسمة حطبه.

و من فگدتك عاتبيته

ياگنز روحي الرخيص
الضامينك بـ غله منك
جان مضمامك گلايد
وانت جنت حزاز رگبه

وموش گبحي انا تعرفني

ودوم اگل للهور هاك شفاي اخـذهن وطني گصبه

يارفيجي
شكثر باجيك بسكتي
المامربي القفص جنحه وراد يعله مايطلع جناحه صفگه

وين يا مضمامي الاخضر
ربعك وعدلين كلهم ما الك بالموته رفگه...

عاد اخذني انگاب افيدك
النگاب اعلى الغريب زواگ ينشد

بلضنون ايصير شوفك بـلچي منهم غاد تنعد

ياغصن يـ العشي فوگگ
العشوش تبان بالفي عل الغصن وزرة ومعاضد

لليل غاد
و ماكو في ينشاف عدهم
غاد وسفه تنقري بشارت مـواگد

وين رايح
وانت مو بدوي او تسافر
مهو البدوي امتاعه  ناسه
اليذبح الوحشة بغربته
يـ المتاعك عيبك انته

وانا عيبي
اعلى البعيد امولـفه روحي

ومن تمر حمرة غروب
تگول
هذا اشداد محطوط اعلى جرحه...

ومن يدور الخوف بيها
تظـل تاكل روحه ابلا لهو الـرحه

او مو الك ياصاحبي..
التابوت اليه
هلي بجيوبي من اسـافر
يلن متعود عليهم هلي بس فوك الجناسي

او لو عزت ياخوي اگلك
انت عاشگ خـاف حسباتك جبيره هاك راسي

ميثم فالح



احسد عيون اصحابك الشافتك
وتمنه ابوس رموشهم وجفن

دمعت عيوني التوكع بغيبتك
دورها تلكه جم حلم مندفن 

ما لحكت وحجيلك شبلكلب
وضميتلك باقي السوالف وأن

ادري برجعتك ماتصح بحلم
لابيك رجعه ولا عمر ينضمن

الشجره العليها اسمائنه تعلكت
علكت بيها جم علك عل غصن

تانيت شوفت عينك اجم عمر
مثل الصحار الي تتاني السفن

شيجيبهن رمل المفارك عطش
ومجروح اغاني الشوك بيهن لحن

يوفقك الله ادعيلك بكل نفس
وتخيل انت بخير حته طمئن

من شتاكلك تنعصر روحي عصر
ومدري شطلع صوت لمن اون

علمني يا شباج مابي الك
دمعه ودعاء وعصرت ايد وحزن

علمني اشوفك حته ابطل العمه
علمني انام وما تجيني بحضن

دربك كزاز وحافي ماكو وجع
شو غيرك اتوجع ودربه كطن

محتلني كلني شلون اخلص اذا
في كل شبر من روحي باني حصن

كل ما ابطل ارجع الرحلتك
وارسب بحبك ثم ارد امتحن

بلكت بعالم ثاني من ننخلق
اختار غير بس اضن ما اضن

موفق محمد




يا مطر ارگص عصافير وسنابل
ويا مطر زخني هلاهل
ويا مطر نث گلبي وردة
إتسولف ويالريح وأدزلك رسايل
يا مطر حطني اعلى بالك
مالي غيرك
يشهد إترابي علي وروحي طينة
من يمسهه الغيم
آخ الغيم تتفطر نساتل

يا مطر زخهه إبحلاتك
والله تلگاهه عسل عالشفة سايل
يا مطر حطني اعلى صدرك
خلني ارضع من حليب الغيم
عاداتك ونجي زفة بلابل
إتغرد على التين
فدوة التين دومه التين عايل
وارد اغني الروح طير
وشلچله اجناحه المناجل
وارد اغني المطر
فلني يمه توه المطر نازل
ويا مطر  بوس اعلى كيفك
گلبي گلي أحساب كل ألبوس واصل

يا مطر هدني أرد أنگرك
وانته بالغيمة وطيرلك حمر
لا خالي چیكيات اطيرلك زواجل
وبالسمه نگلب فرح نگلب غرام
ديچ ينده دیچ طيره
إتفلي طيرة
يا حلاة البوس فوگ البوس
والدنيه مطيرة
إنبشر الطيبين يمعودين رد إلنه
مطرنه الغاب عنه
إرگص إرگص يا مطرنه
إرگص وزخنه محنه

يا مطر لفني إبعباتك
وبلل أترابي تره أترابي عطش چم
گیظ شايل
ولمني نخله
مزنه مزنه
مزنه حب ومزنه دهله
ومزنة من مي الفرات
إتزخ نوارس فوگ دجله
ومزنة من كاسك يبو النواس
تضوي الليل كله
ومزنه فله
إتسكر الواوية كلهم وكلمن إيبوگ
اعلى رسله
ومزنه حله إتلم حليب الغيم كله
وتنده العشتار إترضعنه محله
إتزق محله وأترس إشليلي مطر
حالوب يا هو الچان يمعود دخيلك ارد اطير وياك
واتنفس گذايل
وتدري خالي الگذله وردة
الگذله هلهوله
ضوه إبراس الجدايل
يا مطر طگني إبسبحتك خزرة
خزره
وخلي شاهودك إبأيدي وآنه أبيت
ومن اصيحين بات إنزل يا فحلنه
وأگعد أگعد أگعد أگعد
وافتح اليمنه دخيلك ...
بقن هالنهدين
لفني الدنيه گمره
وارد أذبن ليل حزني
وأسكر إبميتك أغني
يادیچ يابو عرف
گعد حبيبي الترف
گله المطر تلني
يخدرني چني إبحلم
خل يجي إيلعبني
إينزعني ثوب المطر وبميته إيضمني


يا مطر زخني أرد ابوسك
حبه حبه
ويا مطر رگصنه بيدك
خلي نترادم فرح وأنطگ  محبه

يا مطر غني الهوه إبظهرك
وغني ودگلي إصبعتين
رد إلنه فرحنه الشال عني
وأسمع البوسات ريانه الشفايف
تعتلگ وتضوي ميك
وكلهن إحديثات عالصوبين
يتلالن حسن واليروي صدرك
يا مطر والخاطر الله الخاطر السياب
ابو غيلان  مر بينه المسه
وحفظنه شعرك
يا مطر لفني اعلى خصرك

يا مطر طگني دخيلك كلشي عدنه
وارد ارگصلك گمر بالروح يتماوج محنه
ولمني طينه ودوفني  إبمي الورد
دوف غطيني إبحنينك
ارد اطگ شجرة محبه إتضوي
من طاريك
وتخضر فخاتي من تهزهه الريح
والله إتصيح باسم الله بناتي
ونام حدري  وهزني امطرلك
عسل بوسات ترچیات
عيديات وشتامر اغاتي
وطير تلگه  ابصدري
عشك وغني وآنه اسبح إبحسك
مرة أكاوي ومره حداري
على طولك يا گمرنه العاري
وبوسه بوسه اشرب حليبك
يا گمرنه
إمبر عمين إنرد لهلنه
ياديچ يابو زلف
عوعي اعلى راس الولف
گله المطر هزني
ولفني ابگلايد شذر خل يجي اينزعني
ويعلگلي شمعة عرس وبميته ايزفني


يا مطر طگ گلبي غيمه
غيمه مفروشه على گدنه
آنه وحبيبي
غيمه مليانه حنان
غيمه ناسيهه الزمان
غيمه تتمرجح امان
غيمه من چف الشمس تشرب غرام
غيمه تتطاير حمامات وسلام

الاستاذ .. غانم الفياض


انا وذان اعلى حسي تصلي الولايات
وبعد فوگ المناير ينقره اوذاني
واثر جدمي لهسه على الشمس نيشان
رغم الصار والماصار
مامسحت ليالي السود نيشاني

عناوين الاحبهم
فوگ جلدي جروح
وبگلب المشو وياي عنواني
نجمة وبالسمة ومالاح جدمي الگاع
بس بكل شبر بالگاع تلگاني

يم كل طفل يلعب بالمرض والجوع.. تلگاني
يم كل گمر يطفئ وكل شهيد يطيح ..تلگاني
يم كل بيت علگ لافتة تأبين.. تلگاني
بگلب نخله اصيله تعارچ وي الموت.. تلگاني
يم نهر العشگ بولايتي التعبان ..تلگاني

قصيده من اول الدنيا ولحد الان
كل داير سنه الانسان يقراني

انا بروحي نهر يجري وجرف خدران ..
چم نخله اعلئ چتفه تنام... مايدري..
وعشگ عذري الوطن
يمتد مسافة ابين
كاروكي وحظن گبري

علي حسن الشمري


غنوة ماي



غنوة ماي ماتعرف عطش بحات المكابر
نرجس والعطر ذبلان
اشمك وأخنگ الساتر

يمايع فوگ كلشي اتصير
آنه وياك روجة ليل
كبر ظلنه بغلاة الفي

عوف البير
من صوب الگمر ضميتلك نجمه
من طاري المطر جايبلك احچايه

وعد ماسولف الشوغات عازلك گلب طفله
تدري اشتاگلك وتعوذ الرجفه

شريدن غير شبگه وياك ومشاور شجر مغرب

ياخمرة ظلع وچه ابزوايا الروح
اطوف ومزتي اللذه
اعشگ كلشي منك ياطواري الهيل
يجرح الليش تكبر بالضوه المتعوب

كونك ليل حتى اسهر
يلنك حلم وأتصور
النهار ايضيع ملگه وياك
وأتلمس گفه الملگه
اشوف اشكثر بي عطاب
اتعثر هوه وأوكف اگبالك ظل

اشكبر بخت النخل لو فرع لملگاك جماره
يالتارس اعيوني انذور
متى طيفك يكحل خاطري الموحش

الهوه يتمرجح بريتي جسر دخان
ولك والدنيه عثرة سالفه بديوان
ماتتخيَط بديره

ولك والشهگه موش النه
احنه اعزاز

حد گطع العطش مانچهب الغربيل
يكتلنه هوه الصفنه
يانهر الخجل من مستحاك الگاع
تشرب لون الولايه
يمن كل التراچي اتلوگ
لَوَن سولفت عن زلفك

وشلم وجهك
يسيل الصوت من يتسرسح بروحي نده امعرسين

شربتك عافية خرسان
ونطشيت حيل اشراع ماهم لثگل نيه
مابايعت چف سفان اله وبالخلگ روجه

من يصحه البرد وأشتاگ
الم كل السوالف طين
على لچمة خلگ مبخوت

آنه الذابلك ضلعين شنهي امعاتب الخنجر

صليتك يغصن الليل لآخر نجمه بظنوني
وچيمت الهوه خاف استلذ بالطيف
وانت عله العمر مچفي
وتگاودت حسبة بير
آنه وچم صبح وتراب

من لابد نهر ينچوي ابجسر اعتاب
بي خل ماگدر يعبر رسالة ها…
غنه ابرية مسافر
صفه لوني أبَختهم ماي
كبر وجهي أبحلمهم راي

خذوك وما دري اشغنيت
طفوك بنارهم وآنه عله حسرة شيب
على برد العشگ وجيت
حزمت الضوه بغربيل عن لا اشوفك امرايه

وهديت العتب مشحوف خاف عله النهر نيه
من كلهن بديت وياك
بين احچايتك والماي فرعت السواجي اوجوه

طشيت النشد ملگه
ومامستاحش من الجاي بس بيه ندم عالطيش
وأحچاية صدگ وياك
گضت وأندچت ابصفنات ايامي الثگيله اوياك

گضت يافشلة المگرود من يشرب سفر غربه
على امتون الدرب حطيت كل شهگه عزيزة ماي
صاوغت الضحك بيبان وبروحي الف سچه

من كل صوب صليت الجرح عبره
وأخذت المامش من الروح

حتى اسكر وأشوفك جاي

حسين سليم


لكيت الدنيا كطره التمت ابعينك
ولكيت الطير كلما يبرد ابرمشك يلم جنحه

ترسم صورتك بالماي
تغني الوحدك عالماي
يسكر بالغناوي الماي

اهيمن سفن بعيونك
وافز باخر الدنيا اشراع
اجيك ابلا مهر خيال تلم اخيالي بفيايك وانامن بيك

تشبكني وتلم التعب بعيونك واغار اعليك

ياخذني على عيونك حرير ازرك
وشمس كلما خنكها الرمل فزتلك تاخذني لعب وياك
وانسى الدنيا من يا مهره طاحتلك

انسى اسمي شمس حمره على اشفافك
تطيح عيوني بهدومك تشع ليره

افز امرصع ابثوبك
اغار من المناره الراكدة ابطولك
هدوءك بالسعف عصفور
وچدني ..
واخذني ابعيد لاخر سنبله ابعينك
فضضني بصابيعك
اخذني جناح لرموشك
افزلك بالسواجي انجوم

تدليني المدن بعيونك امرايه

من عندك عرفت الماي
كلما بلل اعيوني اشب واحلم
من عندك تعلمت الاغاني الوان
يمي وتكبر اللهفة واحب واشتاك واتعذب

وارسمك وانجفي بطولك
واجيك امفضض من الشمس لجفوفك

تلمني وتصغر الدنيا بصابيعك
الم روحي جنح بيدك وغنيلك
واغرك بيك كطره من الثلج للدم

افك من الشمس شباج
اشوف الدنيا بعيونك

منو يشبهك ..
توكف على المري امرايه ؟
منو غيرك يشتل للوطن طوله ويخضر ثوره وحجاية ؟

ايي انت التعلمني العشك ثوره
شما تبرد اصدور الناس تخفك بالمدن رايه

حسين جبار


بين شباچك وچفي شگد كلام
أتخورست كل المعاجم بالصمت

قاضي حاجة وراعي ملگة وكله خير
ذنّي جلباب أعله كل خير شفت

بعالم الخيرين أشوفك عالي راي
سهم سَم ضايف وبعروگك يفت

شلون يمك يدبر بجدمي الثبات
وآنه فنجانك ومن چفك خفت

موسوي مسمّي الگلب عطرك سباه
گلب، بس من يمشي منّك يلتفت

إينزِّف عيوني من أجيلك ومن أروح
ينزف الساعات للـ جيّة ويكت

ميل ميل الصفنة يم باب المراد
عمَل گلبي أمباوعَك كل الوكت

مو عصاتك عينك تشگ الغرام
بصحنك أذكر غفوة الشارد، نمت

يقضة زالت منّي أحلام الوجود
بعاصمة روحك طفل ضايع همت

يا هلي شچم مرّة أگلك وأدري زين.
من أهلي لـ أهلي بهوى صحونك لو ضعت

يا جذر بغداد يسگيك الله نور
ناس وطيور بحضرتك لملمت

روح جنسيتي إنتمائك، كلشي زيف
جاحد من أنساك، مؤمن لو نِحِت

أغترب بيك، أحله دنيا الإغتراب
شمس بس من إتجاهك شرَّگِت

علمتني أشتاگ والباقي عليك
آنه شندَل كون مو أنتَ الردت؟
آنه جرحك شلته يعني بطولي خير
بلايه جرحك گِصر كلّي شما طلِت

گلوب أزوَّد من بشِر بيها الضياع
غسّلتها وبيها عالم غيّرِت

لامني الما يدري بعيونك صراط
الما يشوفنّه بحلم ما ينبخت

ما مچلب بيّك طماع أعله هاك
ولو أحصله الرايدة ومنّك رحت

آنه چلبت بنغم سينَك غريج
ويم لحن ميمَك مصوّب أمنِت

رية العذال ما شمت هواك
وأنتَ بس تنگال عنبر فوّحِت

بس عرفت الذنب ما يشتم ضريح
ويا ضريح الويْ جوادك بي صرت

أمنيتي أجيلك وأقلَق وأحچيها هاي
أمنيتي أدخل يمّك وأنده حرِت

گبل لا طبلك تجيس العاصيات
ببابك تذبهن وخالي الهَم فتت

ما بچيتَك سالفة هاك وثواب
وطن لدموعي صرتلي ودمعِت

صرت مفتاح لـ مصيبة كل عزاء
منّك لكل جرح قُدسي أتگربت

مِن عَلَي بجناح قربك خل أبات
بكاظميتك، طير وحشة أتأسرِت

فيلسوف بليل حزنك ما أريد
أبچي بيك وهاي تكفي، أتفضلت

آنه راهب كاظميتك حزني دين
حسرة لو جاستني بيك أتعبدت

ثوب خدمة أستبرقي وچفيتي تاج
بيك مرتبطات أقدسهن گمِت

بيا شكر أغمر جميلك يا وريد
عشتك وعايشلك ومنك عشت

سلام الراجحي


ششمن بيك
وإنته بكل حلم
راسم نفس مجفي أعله روج ألليل ..

شسولف بيك
وإنته إرضاب برحي
تناغي شوف ألطين لو مر بيك ..

منين أحجيك
يا غيمة عوافي أجهبهه كبل الماي
تروي أشفاي لو أغنيك ..

متمنيك
نجمه إتطيح بعيوني بسمار ألليل
وأخدر بيك ..
يافي ألاشوفه إمراد صليت لفجر طاريك .

ياعفة جدايل شوك أغرك بلهوه
من أحجيك ..
مر لذة مسامر
بيه خضر جاي
وإتبده أعله سجة گيظ
مامرها ألربيع بريل ..
دليني أعله رسمك
عيني مرها ألشيب
لامكتوب جاست لا شهكها ألحيل ..
يمتاعي
اشتهيتك رأي
وإنته أهلال صبري الخضر بممشاي .

يافزعة مهر مغتاظ
غنيتك تردلي إصباي .
وينك يا خدر عمري ..
وينك يا إدموع إغروب
مشتاك أشتم إطيوفك روايح ليل
وأتسرسح بريسم لو جست شوفي ..

يفي ألعافيه ألرايج
يكحلة گمره
يابيدر ضوه إمتانيك ..

هلهل بيه عتني من ألظلام إحذاك ..
وخل يتلاگه برد إظنوني حدر إغطاك ..
وإصفن ليش ييه وتيه .
وإندهني ?

تعال بحيل مفطوم إشتهه يضوگک ..

وأجيك
بكشخة ألمثمر عطش
فحطان سولفني إعله عرفك كيف..
إگرب ياحلم مبخوت ..
أجيك إفياي

أضم طولك برد وأجري تراب وماي
حدر إعثوگك وظل بيه رايح راد

عريان السيد خلف

(( غريبة ))


يا غريب اذكر اهلك - والكَالها
بحچيه ايتنكّت

هيّج اجروح الكَلب .. والعين
كت مهضوم .. كتت

ذكروّها .. واعادة اليذكر يحن
والروح .. لاهل الروح حنّت

ونتّ .. اوماظن مثل ونها .. الصخر
خنساه ونّت

صبّرتها .. اوكابرت عالظيم .. والكابر
يظل بسكوت .. ينهت

طاحت ، اوفوك الفشل .. بمصابها
الشامت .. تشمت

شلون ذلت .... ؟

اخ ياروحي .. الكّبل جانت عزيزة
شلون ذلت .. ؟

ملت امن اونينها .. او عذّالها
امن اللوم ملّت

واصبحت .. مثل الرشة المتروك
من يشله .. جليبة

اوحنت .. اوعاداة المحبين

لو حن المحب .. يطلب حبيبه

يالتريدين الولف .. ولف الجفاج .. امنين اجيبه

كافي غيبه .. كافي .. جلمات العتب
عالناس .. ياروحي الغريبة

يالمثل دلّه استوت بوجاغ ما يخمد لهيبه
يالتظنين .. ابعظم بلواج .. ما صارت مصيبة

هذا سهمج .. والسهم لوعات
والخانه الوكت يرضه بنصيبه

او هذا طبع الناس .. بيها بلاوفه
اوبيهم وفي .. اتجيبه الحليبه

وانتي لا جف الينشف العين .. لا دار
الولف .. يمج جريبه

يالحسرتج . حسرة المجبود .. وادموعج
تبدّت

يالعلى اجروحج .. اعز الناس
من شافت ، تشمت
يالتظنين الشمل .. يلتم
شمل عزّج .. تشتت

عبآس الغآلبي



الليل مايندل حرگتك يل عشگتك
الموت علّم روحي تسكت من يطر صوتك فرحتك

الموت واليمَي توابيت لعشرتك
اوووف منَك
تشبگ بشبَاچ من طين وتلومة

اشلون ما چمَل هواك ايصيح فگدك.
ما كبرت بأسمهان
الچانت اتلولي لمچانك
آنه لچمة أسمهان
گاعي لچمة أسمهان

الفرح عندي بخور التايهين
طشّة الچكليت بتراب المگابر
موش مثلك تكتب اعل الشجرة ضيمك

آنه من حبّيت ادري السفرة چول ايريد يتغرّب بزرعة
ويازرع بالچول يفهم شوغة الفقرة التدوّر ماي صافي

آنه أحقّر من جذب لون العوافي
آنه كافي

آنه ابن صوتك يميعاد الچحيم
آنه كل ضيچة خلگ بعيون ذيب

تذكر بكل غنوة منّك من أسبّك أشتهي الغربة اعله عودك
چنت تحچيني وتگلي العود مخلوق اعلمودك

وياهو يدري
عمر مدفون بمدينة
ودورو عنّة ولگوني اتراب يهذي
ياهو شايف سكرة اتراب المدينة .؟

الموت مخمور ويدوّر شاب يتلگة اليعينة
الموت عدنا
سورة الرحمن من تنسة الحنان
وتلگط سنين بحچينة.

عبد الكريم القصاب

......... خرزة دمع .........

وحشه ومتانيك شبكَه ،
آنا والشباج ومرايه حزينه ...
وشهكَه صعدت فوك ، عالي .

اِشطولها الساعه بغيابك !!
بيها جم صفنه ضريره ...
الما تدلّيني بخيالي ،

بيها جم مرّه أروحن لله حافي ،
وآكَعد آببابه ....
وآسبّح له شليل آمن السبَح ،
ومدري جم خرزة دمع ، .....
وآلكَاها سكته ، وما كو تالي .

جم سنه مناطر ....
وثلّجني الشته ....
والصيف سومرني ....
ويريت تشوف حالي .

يل مشيت آشجان ضرّك ...
كون ماخذني بجفك ....
طاسة آميّه ترش تراب دربك ؟
خاف تغْبر كَذلتك ....
يل كَذلتك والكل شي منك عليْ غالي .
وليش جفك مني خالي ؟

اِشجان ضرَك ، وآنت ماشي ،
تاخذ الشهكَه اِلك شيشة عطر ....
لو نشف عطر الله العليك ....
تحطها من عشيات وتخدْر الليالي ؟
يل بطيت وما نسيت ،
وكَلبي مثلك موش سالي ،

مرني نسمة شوك ....
وانا آوياك جنحين الفراشه ،
نصعد بشبكَة حرير ،
آنحط على نجيمه زغيره ،
ازغيره لكن على كَدنا .
الكَاع مامش بيها عش لآثنين ...
طيبين وغوالي .

الكَاع ما بيها نفاهه ،
ومالي حيل آوكَف وآشوفك مختنك ،
يل حيل غالي .......... ....... ................................

عزيز عسكر

اجيت أمشي نهر للناس وجروفي شربها الليل وبعيني انذبح صبحي،،،

أمشي ويلتفتني الخوف شفت اوجوه كلها تراب واولهن وجه جرحي،،

ضايع والليالي شراع وبعين السفن مكتوب عمري أسرار!!

ادور على الوحي من اسنين شايل كل صحاري الله وعبرت الغار

مجنون بخيالي الماي لوحة اطيح منها الشيب ويخضر سواچي ازغار:::

اجيت اعتذر للتاريخ وشگد منه شلت اغبار،،،

وتعديت بثيابي صبح واعذار،،،
وتلگيتهم ملگه الحطب للنار،،
حلوة أوجوهم تشبه بيوت الطين وأول كلمة من تنگال للخطار؛؛

جامة بيتك المكسور ماضل الحزنها أحجار ــ,

شگگ كل رسايلنه أمس مات آخر الثوار!!!!؟؟؟
...................................................................

يوسف الحلفي


الخوف ظلمة
من السگف يتلولح لعمرك حبل
والرسالة تبات تابوت اعله صدرك
هذا وجهك سجة للدمعة الغريبة

فات عمرك وانت وحدك
لاوطن لملم ضياعك
ولا غربتك ضاعت بحضن الحبيبة

من تسلهم اخر خيوط الشمس
تشرب ضياعك
وبين حبات الرمل تشتم وداعك
تخاف يل روحك حياطين السجن
مابيها معبر

انت عايش
مدري ميت
مدري تابوت الحزن وياك كلما تبجي يكبر

باجر دروبك تضيعك
والمسافة الفارغة ابين الاصابع بور تصبح
ومايفز للملگة عنبر

ويا اصابع تفتح ازرار الشمس وتبوس گلبك
وتمحي فردوس الحزن جوه القميص

تنتظرمن
واليحبونك مشو والدنيا فرغت
لايجن منهم رسايل
ولايمرون اعله دربك

تريد تزعل
تعتب وما مش جواب
توگف اتاني خبر منهم يجيك
وتسمع السكتة وصداها
وحزنك يوهمك تظن دگة اعله باب

تگابل الوحشة وتشوف مراية متروسة ظلام
أتاني وجهك
ماي يغسل وحشتك
يطلع سراب

انت بالنسيان ذاكرة العدم
وبالغياب تصير معنى
تنوجد فوگ الطلاسم جزء ممحي
وماصرت للناس معنى

ويافراغ وتكبر بفيْ الغياب وما الك ذكرى بغياب
وانت نسيان وكبر برفوف ذاكرة التحبهم
واسمك بهمس الشفايف يبقى لعنة
انت واسمك تبقى لعنة