(استمتعوا بقراءة احد معلقات الشعر الشعبي العراقي)

الليله اموت الليله اخر ليله

كاظم اسماعيل الكاطع


الليله اموت
الليله اخر ليله
الغيم مد ايده اعله راسي
والمطر شد حيله

الليله كَطرات العمر
ناكَوط حب سهران
يمه ادخيلج..
اترجاج
ضميني بسواد الشيله

الليله ليله
هد عليه الليل بخيول الظلام
منين اجيبن حيل ويرد خيله

حيرتني اضنون موتي
اووووف نعشي اشلون اوصله الباب اهلنه
ومن يكَابلني علي ونشيله

الليله اموت اخر ليله

الليله كَلبي ينام دافي
وتندفن وياه حرارة جيله

الدم ينبع من سراديب الضلوع
ويرسم جروحي على الفانيله

وطير من بين الضلوع يطير
وتلحكَه السهام
وقيس يخسر ليله

وكَمر سكران اعله ميز اقمار
ضيع ليله

تفيض روجات الحسافه
وتكسر الشط
يا سنيني الراحيات..وداعة الله
انطيني بوسه...موادع الخل الخليله


يا نخل يا عاكَر احبل
ضوكَ طعم الفاجعه بموتة فسيله


ويصيح:
يا هور الحزن..
لا تغفه يا هور الحزن
تابوت اجاك اويه الكَصب
بهداي حطه عالجرف
ومحمداوي امن الكَلب غنيله
يا مطر

ياسيل..ودني اعله نهران الحبيب
بلجي اصادف صورته
شي باقي منه
اثر جدمه عالرمل
واشكيله

ونزع اعيوني براحته
وهي العيون امعلمه
اشتبجيله

جن ربابة كاولي اتزتني بعتابه
وتركَص الغربان
عالجثه الثكَيله
يا طيور الليل
وديني اعله ناسي
اليموت..
يشوف..يسمع..يلتفت.
ينكسر كَلبه ويعرف اليبجيله

تمنى
وعادة الموات يتمنى ويجيله
انا اتمنى
الشته..وحضن الحبيب
وسيف جاتلني كَبل هالليله

الليله اموت آخر ليله

مشتهي بحظن المكابر كون انام
هناك يم حيدر اون واشكيله

وريت عزرائيل يهمس بذني صوت
يكلي باجر موعدك تانيله

حته ابوس امي واكلهه بمشتهاي

الليله اموت الليله اخر ليله

الى هويتنا الشاعر العراقي الكبير عريان السيد خلف


عقيل العرد

شاءو ام ابو عريان فوك الكل
هلال العافية المنك ضوانه يهل

ضمادك خوفنه وبلسمك حب الناس
ودواك جروحنه ودمعاتنه التهمل

يا ميسر شعر وجد لطيبك كاع
هضيمة بطيبك حلوك الفدن تشتل

بعدك مامتت وتباشرولك موت
ودبج هوساتهم فوك الكلب تفتل

التشمت بيك لو ناكص بخت لو عار
لو من مكَبلك جان بكفاه يختل

اليشور بيك مثلك كون نفس الطول
الدغل شابع سحكَ يم هيبة السنبل

الكاطع مو خصم ، خصمك الما ينشاف
المريض الما صحه الخاتل بضل الضل

الما يعرف محله من القوافل وين
العليه عبرت غفل والتهى بوصف البل

المولح عطش والما سمع بالماي
اليتاني فضالتك تشبع سجي وتبزل

يا ( تل الورد ) تلوك بس شبيت
شمام وعوافي وسمر خل لخل

اشوفنك ( هلي ) شما تطفه الولايات
ويا ( خطار عيني ) شما ردت طول

شما خم بالقصايد الك بيهن خيط
والمابيها منك زيجهن يهدل

شما فاركت خل ب(أشتاكلي) اتعناه
واغني (الشوك ذمة ) اكَباله من اجبل

وقارك والثكل والهيبة والهندام
يمثلنا ، ورزن ما غيرك يمثل

بعدك ما طحت طاحت وجوه اعداك
يبعد ظلوعنه الشابع عدوك ذل

يسباح القصيدة الشبكَ حري الكَاع
السنة موسمك حان وطيبك محمل

الموسم موسمك وحروفك محملات
هب وانت الهوى البزلوفهن ينسل

ترى السب ( القيامة ) ايامه معدودات
بخيت وشارتك من تندحج تكتل

||سيد وليد العوادي||

كلشي بيدك

كلشي بيدك
حتى هاي الضحكه تكدر انت ترسمهه اعله شفتي

حتى حزني بجلمه منك ينجفي وتزغر دمعتي

ياعزيز الكطع مو عادة كليبك
جنت اشوفك رب المواصل واحبك

تالي منك صار الموادع قسمتي

كبل ليلي وياك سفره
وهسه صار الليل يلتف ابركبتي

عوفهم وارجع لكلبي العاف ناسه
الخاطر ايشوفك خليله

شنهي ذنبي عيوني يوجعهن شكو ابنادم يشبهك؛؛ واشتكيله

شنهي ذنب التوه شاب ومن كثر شيب البراسه
بعد ما يمشي اويه جيله؟

شنهي من إحساس عدك
كل كتابتي اعلمودك وانت ساكت

ولأن صاير مايلجمك
كمت اشوف الشعر باهت

انت ماكو انسان ما كتله (أحبك)
وأنه ماحب القصيده البيدي كاتبهه اعلمودك
خاف (اغثك)

تيه مره وخلي جدمك يأخذك صدفه اعله بأبي
ولو خاف وياك أقصر؟

حيل ماكو ،
خلك ماكو،
ربع ماكو؟
عوزي واحد يقره فاتحتي بثوابي

انه هسه انسان يبجي اشما ذكر منك حرف
لا اغنيه اتشافي جرحي ولاصديج؟
ولا ابنادم يشتهي عيوني ويحبني

ومن كثر شرب الجكاير
بعد ماظل عندي ريج

(من دمي كطر بالحلم عنبر فحت
من ردت اجيسك جست روحي وفرفحت)

مظفر النواب

ياريحان 🌱

ياريحان ( شكد ندى) والرازقي النيمته
ﺷﻜﺪ ﻧﺪﻩ ﻧﻜﻂ ﻋﺎﻟﻀﻠﻊ ﻭﻧﺴﻴﺖ
ﺍﻛﻠﻚ ﻳﻤﺘﻪ

ﻭﺷﻜﺜﺮ ﻫﺠﺮﻙ ﻋﺎﺷﺮ ﻟﻴﺎﻟﻲ
ﺍﻟﻬﻮﻯ ﻭﻣﺎ ﻟﻤﺘﻪ
ﻭﺍﻧﺖ ﺍﻟﺴﺤﻨﺖ ﺍﻟﺸﻮﻙ ﺑﻜﻠﻴﺒﻲ
ﻭﻛﻠﺖ ﻣﻮﺵ ﺍﻧﺘﻪ

ﺗﺪﺭﻱ ﺗﻨﻴﺖ ﺍﻟﺪﻓﻮ ﺑﻠﻬﻔﻪ ﻭﻣﻮﺩﻩ

ﻭﻣﺎﺟﻴﺖ ﻧﻴﻤﻨﻲ ﺍﻟﺜﻠﺞ ﻭﺍﻟﺸﺘﻪ ﻛﻠﻪ
ﺍﺗﻌﺪﻩﻻ ﺑﺎﻟﻤﺤﻄﺔ ﺭﻑ ﺿﻮﻩ
ﻻ ﺧﻂ ﺍﺟﺎﻧﻪ ﻣﻦ ﺍﻟﺒﻌﺪ ﻻ ﺭﻳﻞ مر
ﻋﺎﻟﺴﺪﻩ
ﻭﺍﻟﺸﺘﻪ ﻛﻠﻪ ﺍﺗﻌﺪﻩ
ﻛﻠﻪ ﺍﺗﻌﺪﻩ

ﻭﺍﻋﻠﻜﻨﻪ ﺭﻭﺍﺯﻳﻨﻪ ﻟﻠﺴﻤﺮﺓ ﺷﻤﻊ
ﻣﻦ ﻳﻨﺰﻝ ﺍﻭﻝ ﺩﻓﻮ ﺑﻨﻴﺴﺎﻥ ﻳﻬﺘﺰ
ﻧﺒﻊ
ﻳﻤﻜﻦ ﻳﺨﻀﺮ ﺩﻣﻊ

ﻭﻳﻤﻜﻦ ﺑﻌﺪ ﺑﺎﻟﺮﻭﺡ ﺭﻳﺤﺎﻥ ﻭﺻﻠﺔ
ﺗﻨﺰﺭﻉ
ﻭﺍﻟﻜﻴﻆ ﺍﺟﺎﻧﻪ ﻭﺍﻧﻜﻀﻪ ﻭﺭﺩ
ﺍﻧﻜﻀﻪ ﻭﺭﺩ ﻛﻴﻆ ﺍﺟﻪ
ﻭﺍﻟﺰﻟﻒ ﻫﺠﺮﻙ ﻓﻀﻀﻪ ﻭﻣﺎ ﻣﺶ
ﺭﺟﻪ

ﻭﻟﺴﺎﻉ ﻣﻦ ﻫﻤﺴﻪ ﺗﺠﻲ ﻣﻦ ﺑﻌﻴﺪ
ﻳﺨﻀﺮ ﺍﻟﻀﻠﻊ
ﻛﻞ ﻧﺴﻤﻪ ﺗﺮﻓﻪ ﻣﻦ ﺗﻔﻚ ﺍﻟﺒﺎﺏ
ﺗﺨﻨﻜﻨﻲ ﺑﺪﻣﻊ
ﻟﺴﺎﻉ ﻭﻟﺬﺗﻨﻪ ﺍﻧﻜﻀﺖ ﺍﻫﺠﺲ
ﻋﻠﻜﺼﺎﻳﺐ ﺷﻤﻊ

ﻭﺍﺭﺩﻭﺩ ﺍﻛﻠﻚ ﺍﻧﺘﻪ ﺷﻜﺪ ﺭﺍﺯﻗﻲ
ﻭﻧﻴﻤﺘﻪ

ﺍﻣﻨﻲ ﻳﺎﺳﻤﺮ ﺑﻴﻚ ﻛﻞ ﻋﻤﺮﻱ
ﺍﻧﻜﻀﻪ ﻭﺍﻣﻠﺘﻪ
ﺣﺘﻰ ﺧﻴﺎﻟﻚ ﺑﺎﻟﺤﻠﻢ ﺧﺎﻳﻒ ﺍﺟﻪ
ﻭﺍﻣﻨﺘﻪ

ﻛﻞ ﻟﺤﻈﻪ ﻣﻦ ﻫﺬﺍ ﺍﻟﻌﻤﺮ ﻭﻋﺖ
ﺣﺴﺎﻓﻪ بكلبي
ﻳﺎﺍﻭﻝ ﺍﻟﺮﻳﺤﺎﻥ ﻳﺎﻟﻌﻄﻴﺖ ﻧﻮﺑﻪ
ﺑﺪﺭﺑﻲ

ﻳﺎﺍﺧﺮ ﺳﻮﺍﺟﻲ ﺣﻨﻴﻨﻲ ﻭﺣﺒﻲ
ﻣﻦ ﻳﻮﻡ ﻃﻴﻔﻚ ﻫﺠﺮ ﻧﻮﻣﻲ
ﻣﺎﻧﻤﺖ
ﺣﻨﻴﻪ ﻳﺎﺟﺬﺍﺏ ﻣﻨﻚ ﻣﺎﺷﻔﺖ
ﻣﻦ ﺩﻣﻲ ﻛﻄﺮ ﺑﺎﻟﺤﻠﻢ ﻋﻨﺒﺮ ﻓﺤﺖ
ﻣﻦ ﺭﺩﺕ ﺍﺟﻴﺴﻚ ﺟﺴﺖ ﺭﻭﺣﻲﻭﻓﺮﻓﺤﺖ

ﺍﺗﺮﻑ ﻣﻦ ﺟﻔﺎﻓﻲ ﺍﻟﻤﻬﺮ
ﻗﻨﺪﻭﻝ ﻣﺎﺿﺎﻳﻚ ﺷﻜﺮ
ﻳﺎﺣﻠﻮ ﻳﺎﺟﺮﺓ ﻛﺤﻞ
ﻳﺎﺣﻠﻮ ﻳﺎﺑﻮﺳﻪ ﺳﻬﺮ
ﻳﺎﺣﻠﻮ ﻳﺎ ﻳﺰﻱ ﻗﻬﺮ
ﺷﻴﻀﺮﻙ ﺑﻜﻞ ﺍﻟﺸﺘﺎ ﺍﻟﻮﻟﻬﺎﻥ ﻟﻮ
ﺻﺤﻮة ﻣﻄﺮ

ﻭﺍﻟﺸﺘﺎ ﻛﻠﻪ ﺗﻌﺪﻩ
ﻭﺍﻟﻜﻴﺾ ﻫﻢ ﺗﻌﺪﻩ
ﺷﺠﺎﺏ ﺍﻟﻌﺸﻚ ﻭﺷﻮﺩﻩ
ﻻﺑﺎﻟﻤﺤﻄﻪ ﺭﺩ ﺿﻮﺍ
ﻻﺧﻂ ﺍﺟﺎﻧﺎ ﻣﻦ ﺍﻟﺒﻌﺪ
ﻻﺭﻳﻞ ﻣﺮ ﻋﺎﻟﺴﺪﻩ

ﻭﺍﻟﺸﺘﻪ ﻛﻠﻪ ﺗﻌﺪﻩ ...ﻛﻠﻪ
ﺗﻌﺪﻩ...ﻛﻠﻪ ﺗﻌﺪﻩ

،،، سـفر نعـناع ،،

محمد مواش


ابلل واهسي بطاريك..
وأشر الدمعه فشلة حنه عالبيبان..

اتيمم بحرگة خوف.. واصليلك شمع بردان ..
رد شهگة ملاگه.. بريتي متانيك ..
وظنوني نعش دخان..

يشيعني جفاك تراب..
وأرد تابوت خيبة حيل يفززني گبر وحشه..
كل حسبة دمع تصهل ملامح طيف للغبشه..

وأنشغ ساجيه اتاني الضوه مرطوب يعرگ للعتب چلمه..
آنه عيوني گمر مهظوم غفله نباگ من حلمه..
وآنه ادري الحلم وهواس يمته يغازل النجمه..

تانيتك حدر كل سدره خدرانه بخت وفياي گعدنه بسدها نلعب طيش..

أتناوش خيالك ماي وأشد رمشك ضفيرة ليل..
وأمد الصفنة سچة غيم يسحگها المطر چم ريل..

لحد ما خضر ابالي العطش عطاب..

يمته تمر يضلع الشوگ..
لباريك بهوه غافي حلم گمرة وغنه ولايات..

وأتعناك نثة هيل نده ونتشلبه المرايات..
ويضيع الحچي بجرفي..
بخلگ ناعور ابدي سوالفك فوگ الوجوه
فياي..

زلوفك سعف تخدر والتراچي عثوگ..
تسكر رطب كتر الماي..

اليشرب من لمى شفافك ضحك چرچف ضوه دافي وبرودة طيف..

يعرگ للخمر كاسين..
كاس بشعرك اليتبده فوگ الغيم نده ويمطر عطش صحره..
وكاس عيونك مرايات تمد چف السمه ولايه لحد رمش الضوه بخصره..

وبعدني متاني وشلة ظلمه تنشد بير يترس مستحه الفانوس..

لهسه أفرش شمع ودموع وسولفلك بچي وبخور..
أحني ظنوني بدموعي وتناوب جفن متعوب يسهر للعشگ ناطور..

أنعسلك شذر دافي واغفه بخدك بريسم..
وحرير يهفي همسة ليل وگلاید تصحه ويا
اخر نفس خدران من نشتهي الورده متاع..

رافگني "سفر نعناع"

راودني رفيف طيوف من تفرع شمسنه شراع..
.
.

نــذر-ْعريان سيد خلف 💙🌱

ليس عندي غير روحي
وكانت .. وتبقى نذرا
.......
ادك روحي .. نذر للجايب
ابشاره
واورجه اعله الجروح ، المالهن
جاره
جرح ينزف .. جرح باني .. اعله
بسماره
- خجل .. والمايخاف اللوم.. يرضه
ابذلته وعاره
يالمبشر .. مته المكَصوص جنحه
ايطولن اكَصاره ؟
ومتى الوكت التراده ، ايبدل
اطواره
ومتى العايش غريب ، ايأمن
ابداره ... ؟
يالمبشر .. ممحله الروح ..
غيمك .. عزّت امطاره
اوجثيره المايهزها الضيم ..
جن اكَلوبها حجارة
ولو لذة عشيج الموت .. كَلبه ..
ايموت بسراره
لجن ، شانت على المذبوح .. دمه ..
ايضيع فجّاره
دَفك عينك ، زمانك ليل ..
ليل .. ايريدله انطاره
ولا كلشي الجليته ايطيح زنجاره
ولا كلمن يموت ايضيع تذكاره
هلبت .. مات
(جيــــفاره .. ؟)
اوهلبت .. (هوشي منه )
انكَطعت اخباره ..؟
عمت عين الوجاغ الماتشب ناره
ولو دنياك غداره
ولو .. جرحك .. جرف تعبان ..
تغفه الآخ باكتاره
لجن .. بيه العتب شاره
امن اشوفن : دانك السفان ..
صار الروج .. حدّاره
يهلتشبر ، خيال الليل .. وترد
كَاصره اشباره
اعله هونك .. بيه الك حسبات
كلها اغيوم مطاره
ابدمع ، يا دمعة المهظوم .. ما
ما تعتاز .. تسياره
يناري .. المالجم عاره
اعله هونك .. من يهاب
السيل .. لو ينخاض
تياره
اعله هونك .. من تربّه اهلال
.. غطت غيمته انواره
دَذر ، جرح الصبر بارود ..
خل يتباهن اكتاره
يبارغ .. من تضيف الموت ..
يخشى الموت .. خطاره
آنه الجرحك .. عشت مجروح ..
وانته .. ابعشر معشاره
الم بيه الوجع نيشان ثاير ..
ما يرد ثاره
واهزك هزة المطعون ، من تتلايم
اكتاره
اعله وكتك والوكت مشوار ..
غمّه الباع مشواره
واداري العيب تتداره
اداري العين .. وانته العين
.. والدم .. اورفيف
الدم
اداري الآه .. انته الآه ..
وانخه الروح .. لا تهتم
اداري الحيف .. كل الحيف ..
ظل بيك الحلم .. يحلم
اداري اوكَضت روحي انذور ..
لاوِد لا شمل يلتم
يهاوي الروح غم الروح كون
ابشان ما تحلم
يباجي العين .. ذل العين
بالدمعات تتوشم
هظم والشال هظم الناس لوجّه
الموت ما يندم
لَوَن .. شحت دموع الغيض ..
خل دمع العتب .. يلتم
ندامه ، اعله الشرف .. ينداس
والداس الشرف .. يسلم !؟
ندامه ، اوعزّة المندوم .. وكت
الثار .. يتحزم
فشك .. والمافهم معناك ..
بزمور التفك .. يفهم
او جرعنه .. اشجم شكل
علكَم .... ؟!
وِنِت طيف المحبه .. اوشوك
الولايه
انت .. زخات غيمه .. ابكَاع
صبخايه
يشاتل بالكَلب دايات .. دايه
اتلوب .. من \دايه
يبو الشط التعيش اوياك ..
قصته .. طينته .. اومايه
اشتكَل لمشذبات الروس ..
لوجن ليك .. شجايه ..
اشتكَل للطاح .. بين ارماح .. كلها
اوياه كَصايه .. ؟
اشتكَلي ؟ .. اوبيك روحي اتموت
وترد .. بيك تتحايه
ابرجاها ولو كسرها ايجيد .. تصرخ
وين جباره .. ؟
اوثكَلها .. اوعادة المضهود .. بالمعبار
.. يتباره
ولو .. جرحك جرف تعبان ..
تغفه الآخ .. باكتاره
لجن .. شانت على المذبوح .. دمه
يضيع فجاره

الغربه والوحده في قصيده

ل حيدر العماري

ابكل الولايه وحزنهه
وطينهه ودمعة اهلها
مالگيت الوجهي لون

ابكل محطات انتظاري
ماكـو مـوعد لـليجون

انه ياوحشة العيد اليخنگ اضلوع السجون

انه باعتـني الدرابـين الچنـت تارسها اغاني
انه ذاك الدار وجـهه ومالگاله احد يـتاني

انه شباچ العجوز الشايــله امتوني تـتـنهـه
انه شباچ العجوز الگامت اتحسني وطنهـه
انه شباچ العجوز المختنگ صدري ابحزنهه

ياگصب ماجاس ريتي وگال الله يعين صدري
يامچان ايلم صفنتي التكبر اشما كبر عمري
الحيره وصلت بيه .. مدري
الحيره ثگلي الفوگ ضهري

خوفي لا عمري يهدني حاله حال الفارگـوني
خوفي لا اخمل واجاوب عاليسئلوني .. نسوني
ضايع اگبال الضيعوني
عذبوني اهواي كلش ومره يمكن دلـلـوني
مره يمكن فرحوني
مره يمكن ضحكوني
المهم خايف لا اجاوب
عاليسئلوني .. نسوني

اولايتي ضيعت عرفي استغرب اجدامي دربـهـه
انه ذاك الطاح دمعي ابكثر ما طايح رطـبهه

انه ذاك الباع قمصانه ابغربته
واشتره كاسيت داخل
التارس الخانه رسايل مايوديهن الزاجل
لان ماردو على العدهم بعدهن
رفض ياخذهه الرسايل

الكبير محسن الخياط


يلبصحتك حبيبي شالو الكوس

على النگاط فوت اشلوحك أو دوس

جوالي تگابلن والنهر متروس

انه من كثر الهموم عليك معفوس

حجل مسچي غبچ غرنوگ طاووس

يحلوين الجرح ...لمو على الروس

مهي الغاگه التبيظ لازم تحووس

انه قصة هذاك البالع الموس

الــشـاعـر بـهاء الـكـاظـمـي

قـصيده درب الـطـين

وين اتريد ..
تريد اتشوفلك خيال ..
انه الخيال ..

جبتهـه وياك صف ابصف

واظن كلفه وصعب والله تتوصف

امن اشوفك تنزل المركاض ..
انته وياه .. ايد ابإيد ..
مهره امأصله وخيالهه مهتلف

صـرت بـالبـال حسـبـة بـال
حسبـة مهره اصيله ومالكت خيال
يسرجهه ويسابكهه ويه هب الريح

اذا طرت سلف كون السلف ينشال

واحـلـم جــن
انـه الخـيـال

وبجـفي الـرسـن وتمايل ويـه الـريح

واخـرمش بالدرب واسـحك ضلوع الكاع

وبحافـر مهـرتي الكاع نصـهـه يطيح

ويتلاشـه الحلم سكته بتوالي الليل

لامهـرتي يـمي ولابـديه الحيل

افـز والكـه الـدرب لـيـغـاد

وانه لوحدي

وكدامي تسري الخيل
.

زين كريم
......



چا وإلعيون إلبچتلك..؟
چا وإلگطوف إلحچتلك..؟
وإلدرابين إلخذت صوتي ومشتلك..؟
ذني بيش..؟

چا وإلچفوف إلتمسحك..؟
چا وإلأرتاحن لملحك..؟
وإلشبابیچ إلتصليك إعله هَويه وما تفتحك..؟
ذني بيش..؟

چا وإلدروب وسفرها..؟
چا وإلوجوه إلصدع يمّك شذرها..؟
وإلمحطات وزحمها وليلها وريل إلعبرها..؟
ذني بيش..؟

چا وإلعزاز إلعفتها..؟
چا وإلسنين إلجزتني وماشفتها..؟
وضحكتك گلولي بيش ومابعتها..؟
وذني بيش..؟

چا وإلشموس إلچوتني..؟
چا وإلحلوگ الحچتني..؟
وإلأماكن..؟ وإلقصايد..؟ وإلهدايا..؟ وعوّدتني..؟
ذني بيش..؟

چا وإلمدخنات ضلعي..؟
چا وإليحبك يَ گطعي..؟
وإلبرد..؟ وإلـ آخ منّك..؟ وإلصور طفحت بـ دمعي..؟
وذني بيش..؟

چا عليمن تعّبتني..؟
چا علىٰ إلمامش بعتني..؟
وماكو بيش..!!

شاعر شاب من شباب البصره المبدعين

•~•~•الشاعر زيــد الهـاجـري •~•~•


•••••• قصيده بـالله وبيـــك •••••••

بالله وبيك ..

مسني الخوف وأشتميت ذكرى موادعك وبجيت
مسني الخوف وتأذيت .

عفتني ألمن ؟
غيرك ياهو يعرفلي ؟
غيرك لو وجه نسمة ,، آنه أستثكَـله لو خف
تعال ألحكَـ عليه أستكثرت عمري
أثق بيمن وأضم روحي
دنيه بدونك تخوف

بالله وبيك ..

أروح لوين؟
وأختل وين؟

ظلمة مكَـابلة عيوني
ظلمة وتارسه جفوني
ظلمة وتلمض بوجهي ملامح ناس مدري منين !

أحس ماعندي حيلة وأظفر بملكَـاك
تچيني كَـبل فركَـاك

خايف لا أظل وحدي ، وأتمنالي أي واحد
دنيه وكلشي بيها ثنين ما تستلطف الواحد

شفتها الدنيه مو لأجلي
سفينة أختنكَـت من الناس
وظل يدبي بجسمها الماي
وأنا بيها حمل زايد

شكو بيها أذا جرفك عرف لوني ؟
شكو بيها أذا رديت بس هالمرة تشمر كَـمرة بعيوني ؟
تعال الوادم مظلمة

تعال أتلكَـه خلكَـي بسالفة نعناع طعم الدنيه ماينراد

أنا متيه شنو الموجود ,، مر بيه

كافي ، أستوحشت كلشي يطب ريتي

مر بيه
غيرك ما لكَـيت أنسان يحچيلي بأهميتي

مر بيه

أنا موجود ، بس مشمور يم حاجات خلص دورها ويـه الناس
أنا موجود ، بس مركون يم أشياء من ألمسها ما تتعرف بأيدي
تعال تمدد بچفي ولو بصمة

تعال ودور بعمري
وأخذ ليعجبك وضمه

أحس ما عندي حيلة وأنتشي بملكَـاك
وين ألكَـاك ؟

نـدّت روحي وتمنيت أطيحن بيك
وأحتاريت ، بيش أتحسرك لمن يفز طاريك ؟
لا مفكَـود مني وماخذيك الغير وأصرخ بيك
ولا ميت وأظل أرثيك

يا موجود
يلمحتاجك بكلشي

أتمناك تطلعلي ،، من أي شي

من وجوه ما تستاهل عيوني
من خطوات ما تندل ،، تمشي بواهس ظنوني

من بين الزوايا الما يمرها الصيف
چان محاضنك بيها
من حچايه صرت أسمعها وأتأذه
وحدك چنت تحچيها

أطلعلي

وأذا ألكَـاك وأظفر بيك
ماحاچيك
غير حچاية التنكَـال

مسني الخوف
بالله وبيك ،.

عقيل العرد
.......................

تكبر الدنيا واشوف الناس مرتاحين
من تگلي اريدك

من حضنتك بطلت اسمع اغاني
وادمنت دگة وريدك

صوتك يرش الگلب ماي وهلاهل

ودورة عيونك تلم حزني
وترتب اسنين عمري

اوگف اگبالك واخاف احجي البگلبي

وانه ليليه اگابل روحي واتهدل عليك

مخوف الدنيا واخاف الزم اديك

من يمر طاريك بيه
تركض بدمي رسايل

شعرك يشيل الهوى بعطره ويجمل الماي روجه

الك بيه شجم غصن بالروح مايل

شواصلك مني
وحليت ودوختني
احس باوصافك عليه هواي شايل

هواي وادم ترگص بروحي من احطك راس حسبة

تدري من يصدگ العاشگ
يصير للعشاك كعبة

وكل بنات الناس تتوضى وتطوفه
وتلبس احرام العشگ لونين من تفصال گلبه…

رسول المنصوري
..............................


مايندلني ضحك الناس
مايندلني وجه العيد

وجه عاشور من عمري بعد شيريد؟


الفرح وياي مايرهم
وياي الحزن خيّم
مثل اطيور عالبيدر اذا تلتم

و لياليّه كضنّي ابساع

الحزن لو سافر امتاعه بشر
و انه الصرتله امتاع


و صفنتي شكد؟

احسبها

صنم صنمين ثلث اصنام

هم شويّه

ذني اعدال ثانيتين

صفنة بشر ماله احد

وحدي بدنيا

خلتني اشوف الناس كلها ارماد

حتى الناس التحبني تعذّبني
اليجي و يحجيلي و احجيله يعذبني
اليكلي شلونك امن ابعيد
هم هذا يعذبني

اليباوعلي يعذبني

احبهم و ادري هاي الوادم اتحبني

بس انه صبر يرادلي لصبري

الانطاني عمر
صاحب فضل لو فكني من عمري


عمر مابي سهر و ادموع
مابي موعد و موضوع .. مايسوه

عمر جنه خشب مرطوب
لا ناشاف و يرهم بوب
و لا يرهم حطب للنار
جي مرطوب مايسوه ..


عمر مابي عشك

لأقرب كبر وديه

حلاة العمر من اتحب
و الأتحبه تريد شلون ماجان
المهم توصله و تحاجيه

اليحب ما يندم اعله العمر شباج و تتن يكضيه

بس انه ولا شباج البعمري و لا كذله

و لاعندي حبيب اليلبس امعاضيده و يكلي
منو الاحلى؟

و اجي بضلمه و احط ايدي عله شعره

و اتذكر اكو واحد
يكول اعله الحرير انعم شي بالدنيا
و احسبها عليه كفره

هذا انه
خيالي و واقعي .. بكترين

وين انه افكر وين
و هاي الدنيا خايب وين

و ارد للحسبه التسلني
و ارد للحزن

هذا الحزن

هيج امن الله دون الناس

بس انه يدللني

الكبير ...عامر عاصي

ولوحتهه

نعي

وينشد فضيض الماي شتشوف؟
ماي وسِعِد وعيون وچفوف
ومچتوف لاذ بإيد مچتوف
والروج مغزل يغزل زلوف
.........
شتشوف من توگف على الشط
وشمس الفجر توهه اتّمَغَط
وتسمع غراب الليل ينغط :
شيلي الضمير البالنهر غَط
.........
شيلي الولد شوفي شحلاته
عطشان والماي بلهاته
والموت شل جرحه بعباته
عريس ...... شيگولن خواته؟
.........
هم تعتقد انسه المضه ردود
يا نهر ، وانته الخنت چم جود
يالكِحلِتك شامات الخدود
چنك جرح عالگاع ممدود
.......
يا نهر روجاتك مخاديد
ناموا عليها الإيد بالإيد
حتى اليريد يصيد ، شيصيد؟
ضحكات وشفاف ومواعيد

المجموعه الثانيه لتعاريف المختلف....

كرار ماهر



الفيّ .. كذلة الحائط

القصيده .. تصبح عاهره عندما يكتبها شاعراً خائن

الصدمه.. فتاة سمعت بحبيبها أستشهد في يوم زفافها

الغراب .. شامه في وجه السماء .

الماء .. ليس سر الحياة ربما يكون حظن حبيبتك

الألم .. سجين سِمعَ بحبيبتهُ تزوجت أخيهِ

القهوه .. عاهره نجدها دئماً ترقص داخل الفنجان

الكتاب .. حكيم لا يملك الرأس عباره عن أيدين فقط لو فتحته سيحتظن عقلك ويذهب بك الى عالم الأستمتاع

حكمَ على نهر الفرات بالجفاف حتى اظهار تجاعيد الارض
ولن يتم أطلاق سراحه الا أن يعتذر من القائد أبي الفضل العباس ع .

يا صديقي أتعلم شيئاً
لقد شتتُ شمل شكوكي بك
كي أتكئ على أستيعاب حبي بك .. لكن للأسف !

أتعبني قلبي
كـ أغنيه جميله جانبُ مسجون منتهك .

نعم ثم ماذا ؟
ثم قلبي غص شوقاً لـرؤيتها .

البير .. ترتفع مياهُ وتخرج أسرارك .. لا تثق بأحد !

لا أستطيع البوح بما لا أستطيع ترميمهُ
انا كـ طفلةٍ أخبرها أبيها لو نجحت سيذهب بِها الى أمها المطلقه .. عادت راسبه !
ملامحها تشبه خراب قلبي تماماً

السذاجه .. فتاة زينت يد أبنتها بـ المجهورات أمام طفله مصاب بالشلل !

الغربه .. معاق أستيقظ في منتصف ألليل ورأى أشخاص يغتصبون زوجته !

لا يُمكنني أستيعاب الفكره أبداً
الكلام .. تابوتهُ الفم ، وعند خروجهُ يعيش .. كيف ذلك ؟!

بائع الأقمشه .. هو أكثر شخص تجدهُ يفكر بالكفن .

سائق التكسي .. يختصر الأخبار أكثر من القنوات أحياناً .

السرطان يستسلم عندما يصيب الدكتور والسياسي
لأنَ مكانهُ الصحيح في النفوس الطاهره ، وهم ليس كذلك !

أكبر أنجاز حققتهُ جعلت أنعزالي يتفوق عليّ
لكوني أنسان غرزوا أسنان الألم بعمق ِفي قلبه .

الطيور على أشكالها تقع !

لديهم شكً عميق في تلك العباره

تدفوا جيداً وجدوا أنَ ( الجمال على عينها يقع )
والذينَ يرونها يوم إذاً يتبعثرون

كُلُّ قبلتاً تَقبل بِها السكائر يُنقص من عمرِها
لذا علينا أن نرتدي لشفافنا شيئاً من عطف كي نتمكن من أنقاذها

#المجدُ_للسكائر

عندما يبدع الشاعر ويمزج بين المجتمع والنقد ...والغزل الرائع

باسم الخاقاني


الشامة ليش !

وسرچ المكنون من يالهفة لابد !!

ضمّي سرچ ..
ضمّي الهلال الجزه ولايات صدرچ
جوه الثياب أرد اعايد

هناك فيّ سدرة ومنام
ولحم طير وخمر بارد

جوه ثوبچ
لا حكومة !!
و لا مرض أسمه السياسة ..

ولا الگه اسمي بين الانذبحوا خبر بين الجرايد

جوه ثوبچ للتصوف غار و انا بروحي عابد

هناك كلشي هناك
جوه الثوب متبدي الصراط
مؤمن بثوبچ سمه وجنة خلد

وكلشي جوه الثوب إلي
بس عناگيد العنب !!

يَ أم العنب تذوي وتعاند

هناك روج ..
ومرج بحرين
ونهد يقره بنهد
وبرزخ وتاريخ فضة

يبدي من شوگ الچفوف

وينتهي بحزن الگلايد

اغويني .. أرد امسح شبابيچ المدينة

اقريني ترتيلة عشگ

مليت من چذب المعابد

الشاعرحسن عاشور ..وقصيدته



گرنفل غشیم ...

أمشي

والدنیه عصر

وشویّه مرشوش الهوا بگذلة المغرب

وریحة الدخان
والریحان
والنهران
والتنور
توَّهه ترید تطلع
رحت أودی الحنّه وارجع

مدری وین
ومدری المن

حس بنات
یغنّن ویه الریح اسمع

أو .. ویّه کل هلهوله من کل گلبی
بیامچ أضیع

وریحتچ نگلت لراسي
سوالف اللگاح
للیالي الربیع

وأذکر زلوفچ الچانت عالهوا حنّه تبیع

کلشی ظل بالماضي

بايام اللي چنه

وآنه أبیع الحنه
بس ماعندی حنّه

امشی وحدی وشتکي لروحي....
يروحي ....
بیا أمل عود استریح؟

بیا طریق الیستحق مراّت
بيه اعثر و أطیح؟

إبنیّة أحلامي بعیده ....
ومامش
گرنفل غشیم
یأمن بسفرة الریح....

(نصبولي منصه وساوموني بموت)

( بين ان يمدح السلطان ويعيش او يقتل)

ماذا قرر ؟.......



عقيل العرد

.......................................................
من ضاكت الكاع بجدمي وتوازيت

لملمت المدن بعيوني واتمشيت

اخذت الوطن كله وياي
كله وياي

بس ريحة وطن لاهل الوطن خليت

ورشيت القصيدة اعله الضمير المات

وطشيت الحزن فوك امي صم جكليت

لميت الخوّذ

والسدر

واهل البيت

وضميت الجكاير للسفر صحبان

وصاحب عكب صاحب خلص الباكيت

نصبولي منصة وساوموني بموت

وبين امدح واعيش.. وعركً بيه الصوت

وتذكرت المدن

والخوّذ

واهل البيت

قريت آخر قصيدة بكًصة السلطان

وكملت القصيدة ومتت بآخر بيت

الألم في قصيدة يا حريمة للشاعر ناظم السماوي ..

يا حريمة

يا حريمة انباگت الچلمات من فوگ الشفايف..

يا حريمة ..!

سنينك العشرين ما مرها العشگ و العشگ خايف..

يا حريمة ..!

لا علي بختك ما اني سالوفة صرت بين الطوايف...

يا زلف يتغاوي ويّا الليل باطراف الگصيبة...

هاك روحي الما غفت و الطيف ما مرّه حبيبه ..

هاك جرحي الما تعطّب و انت عطّابه و لهيبه ..

هاك عمري الضاگ حنظل و انت برحي..
يا حريمة..!

الشوگ مرّ بوحشة تايه

يا عضد ياللي شتلك عايش بفيّ النخل

يا ثلج و فراگ طبعك يا طبعك كلّك زعل

و آنه و وعودك صفيت ابلاية وعدك..

و آنه دمعات الحزن شاتلها ظلّيت اعلى خدّك ..!

و آنه سچّة درب سوّاني زماني..!

يا حريمة ، يا حريمة

(مو رايدك واتنفسك لايانفس شي اكبر)

ايهاب المالكي

وياك ابتديت

تعرف غلاتك لو بعد
محتاج ابينهة اكثر
يل بيك لهاني العمر ماركزت بيه من مر
يمكن اذا كتلي شكثر
تهواني راح اتحير
الليل اعد محبتك
بس باجر تزود اكثر

ال ادري بي من تبتعد مدري شحس بحيرتي
صدري حفر بيه خنجر
مكطوع شريان ابهر

يندفع شباج الجفه وبالروح شي يتكسر
اشتاكلك بس الحجي المضموم الك يتبعثر
وبدون موج احتاجلك بالبر واحس بيك البر
مرات ادور الجيتي كبالك سبب يتفسر
وتلمحني حرك الخاتم وابدي ارتبك واتحسر

وهنا تحس بقيمته الي بس على شوفك يضطر
يافكة عيون الكلب ياميزتي البيها انغر

مو رايدك واتنفسك لا يانفس شي اكبر

ياروح ماتطلع مثل روحي التموت من اكبر
انه اعرف بزعلك كبل ماتزعل وياي اكدر
والنوم يتركني وقت ما تنوي عينك تسهر
ياريت كل هذا الحجي من اكعد كبالك يحضر
ومن التهي بعينك بعد تهمسلي حتى اذكر
وياك اذا ماسولفت من الصمت لاتحذر
مرات مو كل الحجي يلم المشاعر يكدر
انه اؤمن التهواه صدك
تتنخه بيه من تعثر
روحك عليه تتكدر
تنشف لحد مايخضر

لو برد ملكاه تشتعل ورماد خلكك ينذر
وانته اعرف شلون اختنك من نسمتك تتأخر
اكبل علي روجة عتب
واتقرب تكون اخطر

بس ها عتب بس للمثل مو بالزعل تتأثر
تلكاني ناطر روجتك فارش جرف يتعذر

بس انته ردتك من جنت ما بين الاحلام افتر
ومادامك بحضن الجفن جف النظر خل يكصر

وياك ابتديت
بدونك شلون ابتدي شتتصور

عنك ردت مره ابتعد
والغيض بأفكاري ابحر
وتراجعت نفس الوقت من حرت بيش اتعطر
يغفه بضواي وما يظل لو شوف الفراك ابصر
والليل يتشمت هوة بخيط الشمع من يصغر