(وعلي لو ما آنه جا ماهوه انته )
عاد من الحرب منهكا ... فوجد حبيبته ....


(المباهلة)

لطيف العامري


لا تگلي تشگگت
تدري أنته شنهي ؟
سنين ساكن هيمه أدور خيوط ليلو

و خيط خيط أنه نسجتك يا قميصي
منين تنقد . .؟ !

من قبل ؟؟
صدري رصاص الفاو ما شگگك قميصه

منين تنقد . . ؟!

من دبر ؟؟
ظهري للكارون أثر لسِه عليه

بيوم چانت عبرة الكارون مو كلش رخيصه
يا ترافة وجهك . . و يا مستحاي
أنته من تسولف تنگط عسل . .
و آنه من أنكث هدومي يطيحن بحضنك رصاص

آنه ربتني السواتر . .
و مو عجيبه تشوف هسه المثلي كافر

آنه ما اعرف..... القصر...... من التمام
چنت گاعد على الحدود . . و حتى ما لحگت أنام

و هسه أجيت . .
جيتك مكمل دراسه . . مخلص أنواع الحروب

الشيب يوجع
و التجاعيد إلعالخدود الجميلة تصير لعنه
و ذوله أحنه

أنت تتباهه بشبابك
و آنه أتباهه بحروبي
لا تباهلني بشبابك
آنه لو ما شيبت فوگ الحدود
ما صرت أنته شباب

آنه أطلبك دين
حتى النده ألفوگ شفايفك مديون أليه
و علي ؛ لو ما نشفن شفافي على حدود السواتر
چا خذوها شفافك ( ........ ) سبيه

و علي لو ما آنه چا ماهو أنته
ولا گدرت تباهل الشيب بشبابك

آنه أذوبن بيك
أتيّه بيك شعبد ؟ !
أنته جنه ونهر خمرة إليجري بين شفاف صدرك

ما أغدرك . .
ما أصبغ شعري و أكلك آنه شاب
آنه إجيتك بسمه من آخر مسامات العذاب

آنه ذاك
إلفارش چفوفه شبچ و الدنيه ريح
يدور الليلو بتراتيل التراب
آنه ذاك
الضاعن سنينه سؤال
بلا جواب . .

الشاعر الثوري
.
.
.
الشاعرعدنان البركي
.
خبر عاااااجل...من على شاشات حانات المساجد.والكنائس.و(الحسينيات )حصرًا.
الابسه خاتم حسين....ابصبعها.؟؟
خبر عاجل....
هام...للماله اهتمام...

نقطة نظام...

الدواوين التلفي الفاجر الكسروا عَصاته.

بوس عتبتها حرام

واحترام(اشبابها)سوء احترام

الچفوف التمتد الخاين وطن

تقتل امام.

الثورة.مابيها خواطر

ولاسُلالة مناسبه الله...ولا عمام

الثورة يم ابن الحرام

تگله(ولّ)يبن الحرام .وماترد حتى السلام

ولا سلام اعله هتك عرض السلام

لا سلام اعله(الولغ)من دم شجر وبفيّه نام...

و(اليحنبط)شاربه ويعدل سرجها

شاربه ايصير الزمام...

الما حفظ سمعة شعب...(لثگه)بسمعته

وصعبه ابو الثگه يطب اعله الكرام...؟

ويلله هو شهامكم
اتموت ولد الخايبه...ايعيش رب(السايبه)

للامام...للامام...

وآه يابويه وطن.توجعني كلك.

والعبيد شهامها(فروخ)الاقزام

استغربوك...

يالملامح وجهك اتشگ الظلام

أنت وحدك والبقوا... كعبة وحجيج

وبس ضجيج.

شويه هم... وأنت كلك...يزدحام.

استغربوك...

ونسوا فوگ حلوگم...

مايك تبدى

استغربوك.

المالهم عرفة اوياملحك

برغم ملحك يفتر الرغباتهم خادم...غُلام

استغربوك

وهوّس بروحي(الفرزدق)...

لأن حس بوادمك كلهم(هشام)

ايييييه يابويه وطن.توجعني حيل.

يا علي...الكون

يا ابو النهرين وثمنطعش زينب

أونفس زينب...

لو عطش بحلوگ نهران الرسالة

لو نفَس (نمرود)يلعط بالخيام...

ياعلي...الضاد.

اوشرف ضادك

خلصوا ليلك قيام

ومن ضحك سن الكراسي.

صلّوا الكعبة(قُطــام)...!!
...
الهضيمة اربات اديك...

وشلّوا بتحكيمهم كل حيل اديك

وكلشي ماظل بإديك

غير شاعر...كافر.بإي شي نظام

في زمان اللا نظام...

اربات اديك...

(حنطتك)بوجوهم(صوفر)بختها

وتلمع اعثوگ الرطب بعيونهم لمعان ...جام

اربات اديك

وصلّوا بوجهك قصر حتى النوافل..!!

وأنت مسقط روسهم

وبدوّل مسقط رؤوس اموالهم صلّوا...تمام

اربات اديك

بس هواء گلوبهم مو يم رئاتك

قسم يتنَفسون يم(الشاه ناما)...؟

قدس اللهُ عظامه...وأخ يلله آمن(العظام)

ربي لا تحي العظام

هم هسا بس رميمم...وحولوها احيائنا تراب ورُمام.

وللعم...(الشاه ناما)(يعربية)...

والدليل...اقرأ عالخط السريع

الينتهك چتف(الرمادي)الشــاه...شام...

الفوگ رب القسم الاول

الثاني ربه (ابعير)(يثرب)

ابعير يحلب..!!...(نفط خام)

بحلگ(سام)...

ثنينهم ما قدسوك...

قدس الله(نعلهم)...و(عگلهم)و(عمائمهم)جميعًا

(المستديرة)والصغيرة ام(الذوائب)

كُل الاحجام

قدس الله(السراويل)التي تحت(الصوايه)

والصوايه.

بارك الله بتطريز الصوايه و(البزيم)البلحزام

من أنا...

صفر..تافه ...عالشمال...ما إلي أي اهتمام

قذرٌ...قشرة جُذام.

لا أقدم ...لا أأخر...حتى لو خلي(مؤخر)

منيلي گومة حُسام.

أنه(خايس)مُتعفن...احلم بريحة(جواريب)الملالي.

من يحققلي الاحلام...

وين احصل(سفته تنگ)المومن اتبارك اريد...

بلكي ناسيله فرد(بوله)طويله.

وياها اكاسر ماي وجهي؛

وانصب اعليها عزه؛

ودبكه ومقام

منهو انه...

فد(جرد)خرگة(مواطن)

والســـلام...

حيدر العماري ....

حزني ...



حزني المذبل امتوني
حزني ظحكاتك ابدوني
حزني شباچ وطريج المايجيبك عله عيوني

حزني اغانينه التريدك
حزني مافاگد بريدك
حزني نسمات الهوه الحاسبهه ٱيدك

حزني مشطي الضايج من اچفوف شيبي،،
حزني الاسوار الشريته وماطلع من باب جيبي
حزني دنيا بلون وجهك چنت اصيحلهه حبيبي

حزني مغرب وانته صوره ابين اديه
حزني من اذكر عشرتك
غيرك يگلي خطيه

حزني غير لون ردني.. ولونهن ثابت اخدودك
حزني چلمات القصائد كلهه مكتوبه اعلمودك

من تواعدنه اكتبتلك
(كل ساعه تاخذ مني اربع ساعات
وانحني اگباله اشما رفع راسه الميل)

من تغازلنه اكتبتلك
(ادنه الستر ينعاب اذا بس احنه موجودين)

من تلاگينه اكتبتلك
(گالولي هذااك وصيحت بله
شفتك والخضار بكل كتر صله)

من حچو بيك اكتبتلك
(سولفو بيك اگبالي وتربعت
گلتلهم الديوان توه حله )

سافرت مره وگلتلك
(ٱنسه جنسيتي من اسافر والرسايل مانساهه)

دمعة مره وگلتلك
(عيوني اشكثر رطبات واتمنه بديك ابچي)

من عشت غربه اكتبتلك ،
(سمعت اشگد غريب انه
لان ٱدري غريب انته )

مره بالعيد اكتبتلك
(اجتني اشگد رسايل بس ردت منك
تعال العيد وعيوني ورجفة صوتي يردنك)

مره منعوني اكتبتلك
(رادو ايضيعون وجهك وانه بالگوه لگيتك
وگالو انعودك بدونه
سولفولي .. وسولفولي .. وسولفولي
خلصو كل السوالف واشتهيتك)

مره بالصيف اكتبتلك
(ابطاطين اربعه ودويت صوبه
الظهر بالصيف من اگطعت بيه)

مره ادخن وكتبتلك
(الجگاير چنهه عشرت باردين بساع تگضي)

اتمرضت مره اكتبتلك
(هذه انه الغصت الدنيه بلهاته وصاح بااسمك)

من بعت مره اكتبتلك
بيعني بسعر اليحبك هيچ رخصني اريدك)

من رحت مره اكتبتلك
(دنيلي الهوه وروح بسلامه)

حزني ذني الما يروحن وانته رايح.. مااشوفك
حزني كل اصبع تركته ايخوزر ابظلمة ازلوفك

حزني قمصاني القديمه الچنت جايبهه عله رايك
حزني گاعي الما تسولف ٱله اذا سيرلي مايك
حزني عطرك مدري نايك
حزني الهفه البعدهه من اقره كاتبلي برساله
ٱنه جايك

حزني ذني

(الحب وطن) والنشيد الوطني (حاسبينك)
والفرات يصير شاعر من يمر بالناصريه...

لطيف العامري




الجفوف العاشرتهن
كبل جفك .. باهتات
بجفك ملوحة شلب

وبروحي شوك سنون منجل ..
خل أحصدك ....

خل أغرز بيك لآخر مشتهاتي ..

واختصر بشفايفك معنى العطش

عمري 6 آلاف خطوه من القحط
وانت حدر زلوفك
تخضرّ محنه

وشوكي أبد مابيه دغش ....

لاتّيهني الليالي العشت بيهن موحشات .
بروحي صفنة بوم
والدنيه خرابه ....

والرمل غطه الدروب
ولو شفت وجهك أغرد

شلون مثلي بشوك مثلك مايذوب ؟؟
شلون أتوب ؟؟!!

حتى لو طولك سراب
بمشتهاتي أشرب سرابك
انت حيّ على الحياة

اوذان روحي يصيح بيك ....
مشتهـــــــــــــــيك

بكثر مابالناصريه هموم
وبروحي حزن ....

راكد بروحي الرماد
وانت مدري منين اجيت
تريد تنفخ صور بيّه
وتبتدي بروحي القيامه

والذنوب البيّه كلها من الكبائر
حبي الداخل حسن ..
وانتمائي الناصريتي
وارتدائي الخاكي أيام الشباب

الملح زادي ....
والخمر بيه أسكي صحراء القصايد

والشعار الشايله
يناقض قوانين الحكومه ..

الحب وطن
والنشيد الوطني بيه .. حاسبينك ..
والفرات
يصير شاعر
من يمر بالناصريه

عماد المطاريحي

غزل يستحق القراءه ....


من سمارك
رضعت الحنطه سمار

وغنج شرّبت الطيور ،
وفرح شرّبت الزغار

انتَ وحدك ترسم بروحي النهار
انتَ من تنزل ضحكتك يصعد بروحي
الخضار

انتَ من تسكت مناجل تحصد بروحي الخضار

ومن اشوفك حضني يدفه
وحده يدفه ،
مدري ليش

وروحي كلها تصير شفه !!

تذكر الغيم الصعد مره بسماي؟

ومطرت عيونك غوه ثلاثين ليله ..

واعتذرنه من السوالف
والنوافذ والضوه
والخناجر والقبيله
وفصلت جفني ستاير
وشيعت روحي بخور وقدمتلك گلبي – هيله –

وخضرت كلي عشب ..
من راسي حد راس الجديله ...

ومن تغيب
الورد يسأل والنجم والحلم ، وذراعي
ونبض گلبي الحنين ..

كلها تسأل – وين –
وين – وين !!
وين غايب .. ؟
واني جامد ... !!
ومن أشوفك

إگبالك اتخيل سرير وحضن دافي والليل بارد

ياملاذ ودنيه غابه

غابه مزروعه خناجر

أنتَ وحدك تسكن بروحي قصيده

أنتَ وحدك ممكن تسويني " شاعر "

وممكن تسويني – آنه-
وممكن تسويني- غير-
ممكن تسويني دمعه
وممكن تسويني شمعه
وممكن تسويني طير

أعطش
وشفتك كوثر ؟
أبرد
وطولك حرير ؟

وياك أحب حتى النهار يصير ليل

وياك أحب اقره الخرايط من جديد
وياك أحب الريح يعصف
حيل يعصف ..

حتى أسد شباجنه بحجة الريح
حتى أفك شباج ( رفضك ) وأستريح

وياك أحب إيامي كلها تصير عيد
حتى افلح شفتك بوسات..

واليمنعني – أگله اليوم عيد –

ـــ ياحياتي ـــ
لان أدري انتَ فراشه
قررت أبقى غصن
وانتَ يلكلك ترافه ...
آني محتاجك حضن

وماإگلك آني – أحبك ..
خاف يتغير طعمها ..

الشفه خاف تبوگ من عدها الترافه
ولذلك راح اضمها ...
...................

من ميسان واحد مبدعيهاا

جواد زغير

"اشطبني" ....

اشطبني
أسم
فوگ الرمل مكتوب ما أتعبك
ضباب
أعله المري مصلوب ما أخسرك

أشطبني
بـ ضحك
بـ دموعك
بـ نسيان
من عمرك حزن حايل

أشطبني
بـ سحابه
بـ هندس
بـ دخان
من ليلك گمر ذابل

لا تحتار بـ أدموعي
الحزن ثوبي

ولا تنشد قبلتك وين
خليك لـ صلاتك وأنه لـ ذنوبي

ما مكسور خاطر حتى تبچيلي

ولا ضايع بـ دربك حتى توميلي

أنه مكتوبلي العثرات ما يحتاج تحچيلي

صـدگ نوبات أذم روحـي
وصدگ نوبات أمل نوحي

لچن شفت الحزن صاحب طويله أوياي و أعشگته
و شفت عمر النهر يركض تعب مو ماي
منها وفرزنت علتي مثل علته

عليمن چا امعطلني ؟
السفر واجب اذا كل السچچ غنت
و اذا رب المشابگ بارد بملگاي أكص اچفوفي اذا صلت

دتيهني
الدمع چذبه اذا ما عطل الرايح
دتيهني
ألك كل التعب و الـ مو تعب طايح

ما ألومك
و لا ازعل
المثلي بكلشي يقنع حتى بـ الله وياك

وأعذرني
أعله كل لهفـه
أعله كل رجفه
أعله كل مكتوب مني مطرز بـ أهواك

أشطبني
العشگ مو نخوه حتى انخاك

ولا گلبي ضريح أيمام
من تدعي يگلك هاك

أشطبني

المواسم تايهه بعمري
و خريفك عمره ما يگضي

أشطبني
وراي اهموم
لا حظك ولا حظي

شلك بيه ؟

الجريده
اليجزي موعدها وطنها أرفوف

ولك بابي رهم عـ الريح
مو ذاك اليتاني أچفوف

يـ ما تشبهني من احتار
ضم چفك
عتبتي بـ ندم مرشوشه

أنه حتى من أفك بابي
افكه لـ نسمه تستاهل
شلي بـ چفوف مغشوشه

يـ بايعني
أشنفع وجهك ؟
أنه أمناطر وجه بيه ماي

أشنفع فيـّك ؟
أنه متعـوب
بس تعبي بدليلي وما أتلمه أفياي

كرار ماهر ... التعاريف ....

(المقطع الثالث)


النعاس .. يأتي مبكراً عندما تراسل من تحب

الخيط .. يشعر بالحريه عندما يتم القبض عليه .

الحريه .. فتاة عاريه لا يمكنها الخروج من تلك الغرفه المظلمه ،

السر .. طفل بريئ نحاول أخفائهُ ، ولكن لا نستطيع !
الدين .. أنسانيه / فـ سلاماً لبعض المعممين .

الكئابه .. حاجز لا أرادي ربما يأتيك في الوقت الذي يشفى فيهِ والدك .

الميل الصغير .. هو الأكبر شأناً داخل الساعه .

الدخان .. تبدي ساعة مماته في أول لحظات لحياته !

تلك السمراء ذات العيون الناعسه
عندما لا يحبُ الله قلباً .. يسلطها عليهِ

وما الجدوى أن يقرر الحاكم بالأعدام لشخص تزوجت حبيبتهُ .. هو ميت !

عندما يلفنا ذلك ألليل الذي لا قيلوله لهُ بمواجع لا نستحقها ،

فـ علينا بالمظاهرة إلى أن يأتي الصباح
وعندما يأتي الصباح نخلد ألى النوم ونترك المظاهره !!

الحب والأمل وكل شيئاً جميل في ذلك البر !!
نحنُ نعلم يتواجد في ذلك البر
ونستطيع أيضاً الوصول إلى ذلك البر
لكن قالها سركون بورص

( هذا العالم حديقة أشواك )

نعم ثم ماذا ؟
ثم يا أصدقائي رأيتَ الشباك فماً يحكي لنا ما يوصلهُ الحنين في ذلك الجدران !

الوحده .. مكاناً مزدحم

التوّحد .. غربه

الغربه .. لا أشعر بها عندما أنظر ألى عين حبيبتي

حبيبتي .. ذهبت لأنني لا أستطيع الزواج منها لكوني شخصاً مصاب بـ مرض السرطان . وهذا بكامل حقوقها ،

الحقوق .. أحلام نحاول تحقيقها متلبسين بذلك الأمل .

الأمل .. ساعي يبحث عن صاحب الرساله ويعلم بأنهُ ميت .

القلم .. يرتفع شأنه عندما يحاول مسكهُ نهاد الخيگاني

نحنُ ليسَ على اتفاق أن نجلس قرب الجمر
أنا ورقه ، أنت ورقه
فـ الجمرُ ينتظر قعيرنا لينام بهِ
حسناً الآن لنذهب من هنا .

عندما كتبتُ عن عينها الجمليتين ذهبت !!
أذاً ما ذنبُ تلك الغزل المنهك ؟
ما ذنب تلك القلم البائس ؟
ما ذنبُ عينها ؟!!
أنا أعتاديتُ أن أكون مستعد لمقابلة الأشمئزار .

عندما تكون الضيوف بجانبه يصلي في المكان الذي يشاهد بهِ الأفلام الأباحيه في حالة لايكون أحد بجانبه !!

قلبي متعب جداً . كـ تلفاز جدتي القديم
ملامح وجهي تشبه كف ذلك العائد من عمل البناء
او بالأحرى تشبه كف أبي

متعب لدرجةً أبصق على ذلك المكان الذي ولدتني أمي بهِ. !

أنا وأنتم
نستمع القرآن الكريم لجمالية صوت القارئ ،، لا للقرآن نفسه

تباً لي ولكم

#والمجدُ_السكائر

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

عدنان البركي



شبگني ,وفرفحت لـــــ الله ,

بحلم ,مومن صدگ شبگه

اعله ريحة مطرته امن العام؟

نميت ,وخضرت نبگه

يجي وتوسله ,,ناگوط

وحي ينزل

لمى ,بس مولمى

لا .من عسل حلگه

شگلك ,,..بعت ديني اعليك

يالوجهك لمض تفگه

دسرسحني ولو مره

بخريفك ...روحي الك ورگه

ربيعك موش الي للناس

اليَ النار .والشعواط

ترس رية السمه الزرگه

المصيبه لانته مفارگ .؟

وعيش (مسودن)الفرگه

بديه وما الوحك ليش؟

يشنهو انت..؟

ملح .وسوالفك دبگه

يزفه

ومطبگ

وصفگه

يكلك من اوصفك بيش؟

دمع (حلانة)البلگه

حرير امطعم بفضه

التكبر ,بس عليك يلوك

يطاوس شغوه عنگه

يروط الخيزران تروط

خمر ..بمايلك الگى

يياقوت ,وعلي ,نقشة نبي اسليمان

يخرزة حظ

الملچها بذمته ,,ترزگه

حرز ,,للا ,يكول الله

بمثابة چلمة اسم الله

اعله زند اطفالنا ,,انعلگه

يراهي بطول اوني اعليك

امن اشوفك تدمع عيوني

شلك وي الشمس رفگه ؟

ألك بيه جرح شمسين ...؟

طبيبي تحير بغمگه

يعافيتي ,,,

ونفس ريتي

معتازك ,ولو ,,,شهگه ,

,,,,,,,,,,,,,,,,,,,,,,,,,,,,,,,,,,,,,,,,,,
تگدر...

قربت امتحانات البكلوريا ..
والنشر راح يقل

اندعولنا ... ❤️

وتصفحو بالقناة👆🙂

كاظم الركابي



بيه حيل وعندي راي
وچلمة چلمة ايفزن بطولك سوالف مشتهاي
وهيه هاي
الدنية بنت اليوم واموادع امس
وانت مدري
ابين زلفك والنحر شبخة شمس
ابين وجهك والصدگ چلمة تعال
سولفولك ؟؟
نية اليغفه اعله طيفه ايبات صاحي
وحوبة الگاع بعطشهه التغسل ذنوب المساحي
ودنيا هاي
اليعصر اظنون الهوا اتسولفله ناي
اليعثر بوجه الجرف يحچيله ماي
التخدر بعينه السوالف يلبس الصفنه ويجيك
وانت ياخصر الشواطي اشگد نوارس تشتهيك
ولا تواعدني اعلا باجر
النهر لو فاض شوگه ايغازل اخدود الگناطر
ذنبي تانيت الرسايل
وذنبي چذبت الحمام
وطاوعت روحي واجيتك
وانه ادري ابيا مشط ليلك ينام
واااااااااااخ لو اندل درب روحك واموت
بيه جم ابليس غافي وجلمة مفطومة علصوت
و انت تدري
جدام المتيه عمر معتازه حيل
ووين مايفرش ينام الكلبه خالي ومايمر بعيونه ليل
وانت تدري
الفَركة جذبة وحبل الموادع كصير
ورحمة ابن آدم صغيرة وذنب المفارك جبير
منين ما اشوفك جدم يتبع كفاي
منين ما اشوفك محطة تودع بكل لحظة راي
فدوة رسيني على راي
لو تدليني على ليلة وكون مابيهاش كاس
لو تدليني على شمعه تموت لو مايمها ياس
وما اتعبك
هذا طاري الشوك اجاك
لملم الشوف على طولك خاف عيني تعاشر ابن ادم وراك
وما اتعبك
وما اتعبك

انه مو ذاك
الهني
المرتاح
انه مخلص الدنيه بضحك عابر

اغفه حاير واكعد من الصبح حاير

انه مشطوب عله اسمي من الدفاتر

انه مكروه ولاواحد يريده
حفنة تراب انمسح من المناير

انه الضلوعه تحت جدم الخيول
بكل ضلع مطبوع حافر

محد يدليني ب الحض ومكانه وين صاير
الباب اذا مفتوح مو اله تجيك الريح منه
الريح لليهوى تجيهه من الستاير

من طحت ب الدنيا ابجي
ابجي ماادري عليمن
اني يكتلني اليكلي لاتهم ترتاح باجر

مال واحد يركض لباجر يبوسه
بلكت يرفرف علييه كليب باجر

ليش ياكلبي قبلت انسحك يمهم
ليش ياكلبي صرت مثل الكناطر

ذني كلهن بس بعدني
مااحس كفيت روحي
ولاحجيت البيه صاير

مره منهن اكو للحب خارطه وكلش جبيره
انرسمت بفيض المشاعر
اليريد يفوت سهله
واليحب اوليفه يوكف ع السره وياخذ تذاكر

اني مشتاك لحبيبي بس هضيمه
من وصلتلهم بعد ماكو تذاكر

موش هذا الوكت وكتي
من تخضر ب السما الحنطه واجوع ...جناح ماكو
ومن تخضر ب الارض ...تلكاني طاير


(اسف ما اعرف المن)

لو كان عريان السيد خلف في العصر الجاهلي
لقام أمرؤ القيس بنفسهِ وعلّق نصوص عريان على جدار الكعبة

(( غريبة ))


يا غريب اذكر اهلك - والكَالها
ابحجية ايتنكّت

هيّج اجروح الكَلب .. والعين
كت مهضوم .. كتت

ذكروّها .. واعادة اليذكر يحن
والروح .. لاهل الروح حنّت

ونتّ .. اوماظن مثل ونها .. الصخر
خنساه ونّت

صبّرتها .. اوكابرت عالظيم .. والكابر
يظل بسكوت .. ينهت

طاحت ، اوفوك الفشل .. بمصابها
الشامت .. تشمت

شلون ذلت .... ؟

اخ ياروحي .. الكّبل جانت عزيزة
شلون ذلت .. ؟

ملت امن اونينها .. او عذّالها
امن اللوم ملّت

واصبحت .. مثل الرشة المتروك
من يشله .. جليبة

اوحنت .. اوعاداة المحبين

لو حن المحب .. يطلب حبيبه يالتريدين
الولف .. ولف الجفاج .. امنين اجيبه

كافي غيبه .. كافي .. جلمات العتب
عالناس .. ياروحي الغريبة

يالمثل دلّه استوت بوجاغ ما يخمد لهيبه
يالتظنين .. ابعظم بلواج .. ما صارت مصيبه

هذا سهمج .. والسهم لوعات
والخانه الوكت يرضه بنصيبه

او هذا طبع الناس .. بيهم بلاوفه
اوبيهم وفي .. اتجيبه الحليبه

وانتي لا جف الينشف العين .. لا دار
الولف .. يمج جريبه

يالحسرتج . حسرة المجبود .. وادموعج
تبدّت

يالعلى اجروحج .. اعز الناس
من شافت ، تشمت
يالتظنين الشمل .. يلتم
شمل عزّج .. تشتت

شمل عزج تشتت

قاسم بخيت

(وهو يصغي الى وصية والدته )


المالهم عرفه بغلاتك
لاتدليهم عليك

المالهم نگشه بسمارك
عوفهم وانفض ادييك

هيج وصتني الحنينه
أمي ذيج....

التندل الغيمه التغني من ال.. تغث
امي ذيج

الرشت المغرب نعاوي

وشخلت الليل اعله كبره ودافت
الغبشه صلاه....

وترست عيون القحط باجر تهون
وشيمتني...
يمه بالك

لا تطيح گبال مهره
ولا تبات ابسد هظيمه

يمه دنياتك غشيمه
اتعثر المايشتهيها

يمه بالك
صير هبريح اعله وكتك
واشطب الماله وجه

واشتري اليرهم ظهر
وماشي روحك من يشح مجره النهر

وشاورتني...
يمه ذاك الله شحلاته
وأشرت للگمره فدوه

بجفها ذاك البي إثر جويات
من ذيج السنين الباگن الكحله ومشن

عوفهم يمه وتعال

شلك بسجه تعثر التايهين
شلك بناس اعله مامش تايهين

شلك بديره الصدگ بيها غريب
والجذب بيها أمام
و الجرف مو منها لله يجفل گلوب الحمام

لايوجد خطوط حمراء في العراق سوى دماء الناس

عقيل العرد
………

الشعب لازم يسولف

الظاهر حلوك المناير بيها موس

التوت مو بس للوزير

ومن يشح فيَ الحكومة الفقرة كون تصير فوس

الناس تستاهل تعيش ..الوطن للناس كلها

وشيصير اعله الشعب لو صاح كافي
وشيصير اعله النجف لوصاح كافي
وشيصير اعله الملك لو ثلم تاجه

وفصله حجول وتراجي لكل عروس ؟

احنا من نبني المناير ينتهي دور العمل

ويبدي دور عمامتك وحجايتك ويشيل صوتي

اعله الهوى

اعله الماي

وي طيف الشمس

السياسيين عبادة نكاح

والشعب من يضم صوته يصير جرباية عرس

المنحلة بدم الشعب يثخن عسلها

وبخواشيك الذهب ينضاك ماي وجوهنا ولذة عملها

اللافته البيها شعار الفقرة آيه

النبي يبوس بشفته الچف الحملها

كل مناجلنا صحت والحنطة ضحكت

وكل سمار وجوهنا ( الباجر) اكلها

وكل تعبنا وي الوطن رايح ثواب

وكل شوارب مجلس النواب زفرة

وزحمة من تسطي الحرامية اعله اهلها

انا حريتي قضيتي تعيش اعيش
تموت وايها اندفن

وﻻ تفكر تعتقلني
اني ماتلكاني بيه

انا صرخة بكل كلب ضاك الحزن

اعتقل كل ذاكره وطلعني منها
الشاعر براس الشعب مو بالسجن
.
…… .
اضطهدني براحتك واتشفى بيه

واشطب اسمي من التنانير وخبزها

بطني مليانه قضية

يجي يوم نگلك " ارحل "

بلايه فتوة مرجعية

تجي ساعة الناس تتداين شجاعة وتصرخ " ارحل "

لا تأمن ..
شما خدر ليل السماوة
ينتخي بشعلان ويورث غترته براس مگوار النشامى
ويعتلك للثورة مشعل

متاني يوم اخذ عرگ وجهك والمع بي حذائي

متاني يوم اكل جبدتك وبثواب الفقرة
اطلع حيفي منك


اخذ من الكرسي عود
وشوف روحك
جم فقير يطيح لو نظفت سنك

يجي يوم ونشچخ المنجل بصدرك
ونشرب بدمك ونسكر

كاتبين اغنيتك وجاهز لحنها

شوكت مايدبر ضمير انگله غني

مشتهينك

والجياع اسنين بس تبرد بسنها

انت سويت الشعب مثلك عگارب

والحكومة شما تعافت تكبر ويكتلها ابنها
………………… …… ..

الجبل الشعري كاظم اسماعيل الگاطع
في كل مره يثبت انه مدرسه شعريه ...



منهو بحالنه احنه المساكين؟
احنه المحد النه المدري امنين

ومن يسأل علينه لمن نغيب
حتى لو غياب يطول اسنين

خلصنه عمرنه بالمحطات
سفر وبيوتنه اسطوح الفراكين

مرسومه بجلدنه ذيج الانياب
الجرح لو طاب هم يترك نياشين

وين اهلي علي مادكو الباب؟
تره صحتي عليله وكلبي مو زين

من اهل الله بعدنه وناس طيبين
مكتوب بجناسينه غريبين

خسارتنه جبيره وغشمه عالسوك
بعنه اعقولنه بسوك المجانين

من يستاهلج يادمعة العين
مسكين اليداين دمعة العين

تمنينه نموت بغير تعذيب
وعله المذبح يطغنه صارله اسنين

فض الازدحام وطشت الناس
وما كدامنه بس واحد اثنين

يوصلنه السره ويتاجل الموت
يم اركابنه وتعمه السجاجين

علي هلال ..

بكل ( مرحلة ) من العمر
تبتدي كلش صعب
بعدين
من خيبتك للضعف تتبدل

تضعف لحد ما تضل
ما بيك ترمش بعد
( ميت يشم الهوى ) تحس هيج تتحول

تسهر تحس بـ ألـم
ما تدري وينة لچن
شيفيد اذا تندل ؟

متنام اذا مو دمع
تغفة
و تفز الصبح من دمعك مبلل

يسألوك عن الجفن
هذا اسود من البچي ؟
و تگلهم ( مكحل )

تحس نومك
و موتتك !!
بس هنة بيهن حل

مضيعني يا هلخلگ
بـ الليل كل ثانيةة لو اموت لو أعدل

و بصدري مدري شيدگ
يگولون اسمة
گلب
چا ليش
من اختنگ لـ اگزاز يتحول ؟

انا ادري مو من ورد
و شمالني من جفو
بشويش گمت اذبل

كلي اصفر من التعب
شافوني اخضر گلب
و تحولوا منجل

و تصير مثلي فطن
و تتعود علة البچي
يسألوك عن الجفن
( هـذا اســـود مــن الــبــچي ) ؟
و تگلهم ( مكحل )

(مو هينه ربعك ميه ترجع خسران )

لاصحاب الطعنات...

||عقيل العرد||

ماتكضي ..


ما كلت شايفهن كلت ما سامع
لهنا وكلش طفح خلگي الواسع

كلمن يراجع نفسه بالذات وياي
القاريني ما يگدر بوجهي يراجع

رديت اهز جذع الوفه انشد بالروح
ياهو النخاني بشدته وما فازع

مرات تعمه عيوننا وننسى بساع
نتمادى بس يبقى الضمير يتابع

ومرات نقره بعين وحده ونندار
نغلط ونرجع عن غلطنا ندافع

مو هينه ربعك ميه وترد خسران
تتمشى وي ظلك بنفس بالشارع

انه من اديرن وجهي لابد ملجوم
مو مشتهاية روح بيهم كاطع

من جنت اشبعهم ضحك ما يدرون
جنت استحي وغصات منهم شابع

يا گلبي كافي تلومهم خل يرحون
ماعندي ضل لفراكهم اي مانع

يا گلبي لملمهم حطب دفي الروح
يبسو محنة الطيب بيهم زارع

اني اكتفيت من الدغش والخذلان
وبوجه ثاني لفكرة الحب راجع

ما اكدر انطي الحلم ال بجفني اردود
بس كون طيبي ومستحاي يطاوع

يشبه طلوع الروح ملگه المو ناس
بين الجذب والصدك وجهك ضايع

تصافحهم وجرحك يخنگك للموت
تضحك ورفسة موت بيك تنازع

هذا النفاق اللي نفرضه اعله الذات
بين المصالح والضمير نصارع

هذا الضياع العايشينه وي الكاس
نفس الضياع الگادنه اعله الجامع

جرب تنشف نهر ولفك جم يوم
تشوف الخفي ال عن شوف عينك ضايع

تلگه شكثر جلمات ما ممسوحات
دروب وجنط وجفوف بيك توادع

ترجع تفيض اكثر تغطي المضموم
بس تلگه منسوب الصدك متراجع

الكلفة من تكتشف نفسك مغلوب
تضحي بشرف بس ما تعرف الدافع

هي الخسارة المرة ليمتها تصير
من تفوت بيها وصاحبك متراجع
………

من تنطي گلبك للثواب وينداس
وبلحضه ليل يرد بياضه الناصع

من يصير گلبك للگمر فكة باب
وتلكه الگمر يم باب غيرك طالع

من تنثر الموقف بگاع الحبوك
وتلكاه بگاع الما يحبك واكع

علمت اثگل خطوتي بدرب الشوگ
و صحيته ذاك الطيب المتواضع

خسران لكن مستقر و مرتاح
لا عدو يعيل ولا حبيب يدافع

لا قلق يشرب راحتي بتالي الليل
لا سهر لا دخان لا خد ناگع

بس هي مدري شلونها بلايه احباب
ماتگضي اذا ما نختلف عالواقع

ماتگضي اذا مابيها خل يجافيك
وتروح يم بابه وتگله شسامع

مرات احس روحي انتهت خلصت شوك
جثة وبرد دمها ودمعهم جازع

واندل اطلع الحب الاعمى ال بالروح
من استفزها بضحكة الما قانع

موسم الهجرة يبين بوجه الطير
والشجرة تذبل من تحس بي ضايع

ايفتح ورگها بفتحة جناحه اردود
ويحضنها و يگلها مشتاك و راجع

مو حلوة اذا ما ننجرح لو نشتاك
و نعشك جديد ومن جديد نوادع

هي الحياة ايام والناس ادوار
ما يستمر حال اعله نفس الطالع

والغرگوا تابوتك بأول يوم
تلكاهم يضحكون يوم السابع

كاظم اسماعيل الكاطع

هم ياگلب باليجي
و حن ياگلب عالراح
وأسبح بشط الحزن
ظهر و مسه و مصباح
هيم بصحاري التعب
و چويك من ترتاح
مادام ضاع القفل
شنسوي بالمفتاح ؟!
مليت وك يا گلب
دگاتك مسودنه
وجنهن بضلعي رماح
جم موت إجه و ما متت
يالبيك سبع رواح
وياك انا حرب
و كلمن يشيل سلاح
تگتلني لو اكتلك
بالحالتين ارتاح
فاتك قطار الهوى
وبعيد عنك صاح
و الشيب حنا الزلف
وانوب بالخد لاح
امشي اعله حد الحزن
لان الحزن .. ذباح
يا آدم اشحصلت ؟!
من شجرة التفاح ....
.

ميثاق الهلالي || من أول حزن ||

من أوّل حزن مكتوب تقراني
جرح من ديرة الحفّاي
يفهمني اليَعَرف الهور
ويميّز شواطيي وسماري وطيبتي وديرة ملح ويّاي
أنه المستاحش , المتعوب,
اِلبْعيد, الغريب ,التايه بلاراي…
المغرّگهم , العطشان
هذا فراگ بيني وبين وجه الماي…..
أجي شايل فرات بروحي من أشتاگ
أدَوّر عن (هلا) تلمني
واطيح بگاع مابيهه الحنين اليغرگ بملگاي…
أضم جروحهم وأسكت
ولاسولفهن اِعلى البير
أگول الجرح من يثگل يجيه الليل
يتكحّل بچم دمعة و قصيدة يصير…..
وأكتبها على الحيطان والبيبان
والطعنة الجديدة وفشلة عيوني
وامُر بقافية من العطش والنسيان
تشربني القصيدة وينخطف لوني…..
شكثر سولفت للشمعات
بلكي تجيب طاريهم
شكثر وصّيت
حتى المالهم خبرة وعرف بيهم
شكثرفوگ النهر خلّيت
چم دمعة ورسايل شوگ
واِتعذرني ساعي الماي مايندل شواطيهم…..
شكثر… وشكثر
لمّن راحن ويه الروج
دمعاتي ورسايلهم واساميهم …
واتاني اِعلى الجرف عطشان
أَدُور بلاوعي والدنيا بيّه تدور
أَتاني الضيّعوا دربي
واَظل أَفرك بِدَي من يمرعرس طيور….
هيچي وينفتحلك باب ؟!
هيچي وتفتره ياخاطري المكسور!؟
أَگول شمالهه الوادم ثلج ما تنچوي بناري؟
أَثاري الليل برّد حرگة المكتوب
أَگول شبيك يا گلبي؟
جنح فختاية عطشانة ولحگها غروب…..
واَتحزّم, واَرِدّ أعتب,
واَطلّع ناري بالدخّان
تاخذني الجگارة لديرة سكرانة
غريب ومالي بيهه وجوه
والضويات يطفن من تمر اِجدام خدرانة…..
إِبخت من باگوا اِرسومي؟!
وتبدّل واهسي واِنگلبت اَلوانه؟
إِبّخت من تيهت عمري؟!
إِبّخت من ماعرف روحي؟!
أنه بياوكت موش آنه!!

جارة القمر

(عذرا لذاتية القصيده)من وحي الإنتظار



لطيف العامري


سولفيلي الليل بعده بأوله
وين أحنه سكارى
و شوكنه يمطر حنين . .
وها تجين
و ها فراك . ما تجين

و روحي تعبت
تاكل بروحي الظنون
الدنيه تضحك لليمر بيهم خجل
بملاكه حبهم
و تكره إلمايستحون

و آنه و أنتي . .
أثنينه انكط خجل
أثنينه انكط أمل
الدنيه ليل
و الكمر حط روحه شاهد بس علينه
ما نجذب . . .

أنخاف من ضي الكمر يفضح حجينه
و سولفينه . .

أنتي سولفتيلي عنج
عاشكه و شوكج جبير
و الصبر حبله كصير
و ما يصير . . . .

و آنه سولفت . .
العشك يذبل ورد ما بين إديج
و بس عليج . .

فصلت كل القصايد ثوب
لاكن بس عليج

و دمعه دمعه . .
الليل خلصته حزن
لون الظلام تخاوه وي الريح
ما تشفعلي شمعه
و كون أسمعه

صوتج من بعيد يندهلي تعال
بلايه شوف
بلا وعي
بلا . . .
من كل كتر بالورح أسمعه

آنه عاشك للنعاوي
و أنتي فدعه

أنتي خليتيني أصير
شاعر . . .
و أنتي القصيده

و أنتي خليتيني أصير
عاشك و كلشي الأريده

يصير ملكي
أنتي خليتيني أمير

أنتي خليتي الفرح كلش جبير
أنتي خليتي الحزن كلش جبير
أنتي خلتي العشك بيه شعار
أنتي علمتيني . .

معنى الإنتظار