رياض النعماني


انا شفت الكحل نهرين فوگ الخد منو بچاك ؟
زعّلت البنفسج ..والزعل راضاك ..
ياهو ويااك ؟
منو غثك ؟
منو حاچاك ؟
اموت انه من اشوفن فَي ورد وازاك

ليش مغير ويايه ؟
هلك... لو ناس... لو واحد....؟ علي وصاك ؟

عمي عليك انا موصي الصميدة بس تعال هناك
بس خليني اشوفك غربتي بلياك

يلمايل عله روحك غنج
ونعسان من كثر الحله
يا اطره من قداحه ترفه مبلله
والله انه خايف من عيونك
عله عيونك يا عيني مدلله
ش هلبعد مو جبنه سادة
وگعدوا الصبه وعجدنه راية العباس
وانطشت هلاهل لرضا
وكلمن رجع فرحان ياروحي لهله

چا ليش هيجي تمر عليه بغيظ
وماتقبل اجي اتلگاك
انه خايف عله ضلك يتعب اعله الگاع

خليني اشيله بروحي وامشي وياك
واعله البعد وبهيده ومتدري انته
ابوسن شامة الرگبه واموت هنااك

اسامة الفيروز ... ارواح


سلمولي إعلى ربكم وإشكو گباله
وبدلو هدومكم گبل الملاگه هناك
خاف مچلبه بيكم ريحة الباله

وسألو ع اليصير يشوفه ؟! لو هم غاد
كلمن شلته وعمامته وذيله
لو هم غاد كلمن مرجعه وحزاب تحميله
لو هم غاد مامش واحد إمنالظيم نشكيله
گلوله الوطن غَط بالرصاص الحار !!
ما متنالك الجابتنه ألك چيله

وإذا صَح للزتت تابوت
يتگبع بوين وليش أو اااخ ومدري وبشيله

وصدئ الصوت اليهز الريش مطر غيمك اليرعد
والدم خبط وجه الگاع
بطراف الرصيف وبالمجاري ألوان
بجفوف الثكاله بصبغة الحيطان
بجدام الركاض بعين اليشوفون
بظلوع الأخوان بشارب الشجعان
لا ينشف ولا يبرد !!
گلوله يرب الدنيا حطلك حَد !!

وحلفو برحمته وبالعوز بالناموس
بالفشله التهزكم من يجي الديان
بالمسواگ بالكروه بصباح الويل
بالعماله بمتون التشيل أسميت
بچفوف الكلاها مناوش الطابوگ

بمكم بالتعب بطفالكم بالجوع
بطلبات الحليب بشدة الكاروك
بالحسبالها نايم تدور مخاد
باليغبگ بگصته بلوعة الشياب
بالستوته بالتكتك بكل دخان
بالحگ بالكفر بالظيم بالبوگات
بالكرسي بصلاة الليل بالحضرات
بمرض ثنوة أبأبنها وحبه للثورات
بگروش النفط بالعدس بالقرأن
بالعباس بالأسلام بالأديان بالألحاد
بكلشي تحبه حطلك حَد !!

وگلوله الوطن مثلك ولا ينشاف
وحزن منك ولا يخلص
دور جيوبنه المستاحشه الدينار
وفوك فطور رجيلنه الشغل غنئ
تعرفنه وطن ردنه...

وغنوله،
موطني...
موطني...
الدماء والعناء والعذاب والخرابُ في رُباك !!
والحياة والنجاة والهناء والرجاءُ قد جفاك !!

ونعوله....
عرسان بس ما چنه عرسان
مو للچرابي الأيد دفان
مكسوره يظهور الجناسي
ما لحگينه نگود نسوان
ولا عشنه لحظة هذا أبو فلان

واشكوله..
نشدنه الموت ناسي المن خلقته أنتَ
اليريد يموت يتظاهر
هالبت ينكسر گلبه ويعاونه

من يدري..؟
من يدري وطن ردنه ؟

الراحل ..ذياب كزار


مرة مرني الطيف نسمه على الجنح
وبلّل عيوني بدمعتين الصبح
ونگط بهيده على روحي الغافية سوالف عرس
وچانت الگذله ذهب
وچانت الدنيا كرستال وشمس


ومرة مرني الطيف والنومه ثجيله
وشاورتني وشفتك هلال ابو ليله
وانه وصيته اوعدني
وگال : نرجعلك سوه
وچانت الگذله ذهب
وچانت الدنيا كرستال وضوه


ومرة مرني الطيف مهرة مزلّفه
وذب غطوته البارده گليبي ودفه
وطرزت للجاي وردة من الفرح
وچانت الگذله ذهب
وچانت الدنيا كرستال وقزح


ومرة مرني الطيف وبثوبي الجديد
وخضّر بروحي گمر وهلال عيد
وانه وصيته على باچر مثل امس
وچانت الگذله ذهب
وچانت الدنيا كرستال وشمس

نضع بين ايديكم المجموعة الشعرية الكاملة للشاعر الكبير عريان آل سيد خلف


مهداة الى اعضاء قناتنا ❤️

ايهاب عيال ..


بچه ، المحد بگاله
و گعد ينشِد خياله
ما ودّوا رسالة ؟!

بچه ، المحد يريده
و حَط گلبه على ايده
لما خـضَّـر قصيـدة

اگباله انفتگ زيج الحقيقة
و مرَّت سنة بهاي الدقيقة
آخ .. إنّسى بأبشع طريقة
دم جامد بحلگ الموسيقى
و چان الحچي المضموم فرگة ..
بچه ، المحد يصدگه
اشتاگ و مات حرگة
خَنگة الليـل خَنگة

بچه ، المحد يسأله
إنثِنَه الما چان گذلة
و رجع متروس ذِلة

بچه ، المحد يفگده ..
و ضم الصور عنده
دِوه جوه المخدة

خلصت بعد ما الها چارة
اول نِفَس بآخر جگارة
جام و كسر گلب الحجارة
و ظَل يحلف براس السكارى
إلا المهفة تصير جمرة ..
بچه ، المحد يگدره
شحضه من هذا عمره !
طعن و عيون حمرة

بچه ، المحد يسمعه
و شيسووله ربعه ؟
حريجة ابيت شمعة

من يبتعد گلبه يورطه
وينزل ضباب اعلى المحطة
سكتة إنفِتَح سَحّاب جنطة
وطلّع صورهم غلطة .. غلطة
وسفة الدموع تصير لعبة ..
بچه ، المحد يحبه
الرسايـل ما تكِتبَه
اثاري العشگ چِذبَة
بچه ، المحد يعرفه

و رجف بالباب رجفة
لحد ما صار سَعفة

زيد الهاجري


أعرف روحي
ما يعرف شجاي يصير بيها و وين بس أنته

الما شآمّين الشامّه بچفك
يلوموني من أكررها
يريدوني من أحن لچفوفك بسكته

و ما أخجل
و أكررها
و عساها بكل قصيدة تصير

أي يالرايد أشتمّك
آنه الكاره الدنيا وأحبنها أعلمود أسمك

ساومني على أيامي وعلى أغراضي
وأخذني بتعبي و أمراضي
يمن جسمي فدا لجسمك

أخذني أحتاجلك منفى
أخذني الوطن مو كلشي أذا مو شابگك وأغفى

أخذني ومن عساني ما أرد منك
ألا و ردتي جنازه

كلشي ولا تخلص شوفتك عندي

لو ترسو عيوني الناس
تبقى أنته الوحيد العازتك عازه

ولو كل غيمه تتوازه
وتذب كل مايها بدمي

أظل معتاز لك يمي
ما علمّني چفك أنروي أعله الغش

الماي الما أشربه من أيدك ايعطّش

حسن البركي .... إلى الأمام علي (ع)

يا چتيل الهاك ومحمّل تعال
يا سميح الأشك عندك شاره
گصّراك العدل مو اصلاً گصير
يا طويل الما عله أعلى اگصاره
صغت روحك باب بس بلايه بيت
حتى يندگ من جميع اكتاره
ابسما چفّك قزح تركض لليتيم
وتوج تنوره وتلوّن ناره

يا هو مثلك خاوه خوصات الحصير
ونخل صارن من خلال إيثاره
وياهو مثلك انسن الوان العبيد
وعرف خاطرهم يريد انطاره
ويحرث الگاع ويشمّس مستحاه
يخاف لا توصل رطوبه لجاره
ولليجيه يتصدّق بأي شي يفيد
وما يضم وين السمينه بداره
ولو يهيّسله بشر بي يستفاد

ويجي سائل چا انطا فقّاره
هو بس انت علي باب الرسول
وغيرك اتحسّر ثقب بسماره
يالتلحن البويه لأيتامك بحيث
حسين لو عادي اختنگ بأعباره
كبّراك الضيم وتفرفح شباب
النخل من يكبر نفس جمّاره
دنيتك مغرب بدو ودحّت غشيم
ما توگفه إلا السمه المطّاره

دنيا بيها اهل البخت يتسابگون
وياهو يسبگ گصّته بديناره
يخف دمعه اليفگد بنادم ثجيل
انفگد طه وثگل دمع انصاره
دنيا ما تسوه الذكر موش الطلاگ
دنيا وصخه بكل چتل فجّاره
التگصر ايده شما خطف چتّال ابوه
يظل يتغرغر دمع من ثاره
الكل يعرفونه الشرف مثل الگزاز

وذاك من ذاك اليلم طشّاره
وانت چنت وياهم مراية غريب
الدين چان يشوف بيك غياره
صلصلت ماي الوجوه من السراب
وفصلت للمستحيل بشاره
وگلت شنهي العگرب يسوس البلاد
البي نفع ما ياكلنّه زغاره
الفشل أولى من العذر بالموزمات
البشر يمصخ من تزيد اعذاره

وگلت سيف اليلمع بحي الله طيش
اعلي يشيخ الگابع بزنجاره
تكره الدم التفك بابه الزغار
يغدي طفّاره اعله من اكباره
وتحب طبع الماي من يلاگي ماي
ما يغث حتى الطفل طفّاره
برجلك تضوگ الأرض مثل الفراش
برجله يتذوّق لذيذ اثماره
وتشتل الماكو وتطگ الله كريم

لان چاسي المستحيل بشاره
اصلك الگاع وتحضنك من تموت
لهذا عافيتك گضت كفاره

مقطوعه للفيلسوف السماوي ... مهند حمود

جنة خشم حيدر ريحة الزهراء
وجهنم اذن حيدر ريحة الغيبة

متفقا عليه الچفن مابيه جيب
باستثناء حيدر بي چفن جيبه

وهلكد ما بياض بگلبه داحي الباب
اشك ماظل يميز كلبه من شيبه

اخو دموعة الندى وراتب معدته الجوع
وعلي اصغر بنات امروته الطيبة

ولان اهدعش ركعة تضم صلاة الليل
علي يجلب اليل اهدعش تجليبة

كريم البغدادي


الغربة مو بس لليسافر
الغربة من تعيش بين اهلك وحيد وتبقى حاير

الغربة من تصير واحد مو اناني وتنطي روحك
الغربة من تموت ويعيشن جروحك

الغربة من محبوبتك تاخذ غريب
وفترة وتسير عليك
الغربة من تعرف بروحك
سلعة محد يشتريك

الغربة ذيچ المغربيه
التاخذك للذكريات
الغربة من ترجع تعيش
وجوه روحك كلشي مات

الغربة من تذبل سنينك
الغربة لمن توگع ومحد يعينك

الغربة من ترجع ادور بالصور
والذكريات اليوجعنك
الغربة من روحك تگلك تنسه فنك

الغربة من تستاحش وجوه التحبهم
الغربة من تعرف وحدتك مو ذنبهم

عامر عاصي


عيونكم،
عِشْگ ابدويّة،
شايله بچفها الجمُرْ ..
لا تلمكم،
لا تطشّركم،
ولا توگف رمح،
لا تنكسِرْ ..

حايره،
تلِمْ شوگ،
تفضحها القصيدة،
تِسكِت،
يضيع العِشِگ بالريح،
والسكته عُمُرْ ..
بيكم، الدنيا تِرِدْ لاوّل گُمَرْها،
والستاير، يعبر الليلة عمرها،
نور تايه،

يبلّل عيون السكارى،
النور،
كاس ونار،
والظلمة سُكُرْ ..
وانتم امعرسين،
آخر حِزِن بِيّه يريدكم،
رِگبة،
وشِمِرْ ..

بهاء سوادي


جايبـه الحـلوة نَسيم الصيف الأترف ..
جايّه تسلّيني ..

گِعدَت
ونفنوفها يعلّگ صريخ النَبض
بالرجلين..
عالجهتين…
والكحله بستها بعيني…

هبّت بكل حيلها،
صرخة هـدوء..
وموت رجّع كل حياة سنيني..

فِتحَت الذرعان…
جُرفين ،
وعلى النهَـدين..
رسمت لي نَهـر
وانـه بگليبي قهر..

گبل لا اموت بسبيلك
يانهر ترويني؟
والله ساعه من الحِلم ..
فزّيـت ..
واتمنيـت..
كحله من الحلم تعمي الرفَيـف بعيني،

مصطفى الخزاعي
.
.
من شفتك شفت روحي بلا مرايه
ولگيتك تشبه البيه
وحيد وحزنك ولايه
من خوفي جزه الدنيه لگيتك ضحكه وحچايه
ومن عيني اشتهت تبچي
لگيتك للدمع آيه

ولگيت البيك مثل البيه تالي الليل يندهني
كلشي البيك يشبهني !
كل حفنة رمل يعراگ تشبهني
وكل دمعه بجفن مهظوم تلچمني
يذبحني الحنين اليفز تالي الليل
ويغرگني التعب وچفوفك تلمني

بچيت هواي
لعينك
للسهر
للخوف
للبيبان
يحله البچي بلا عنوان !
يالعينك صبح نيسان
تغبش عالفلح نسمه وتمشط گذلة النهران
يالعينك صبح نيسان
چم نجمه طفت من اشتهت طولك ووجهك تارس الحيطان !

وچم ليله الحزن يملي الگلوب البيض
ويصعد غيمه سوده بكل جفن مالوم
كون الراح من عمرك يرد اقبل
اموت اليوم
وكون ادري وره الدنيه شنو المظموم
اموت اليوم

اموت ودمعي يسبگني عليك وغفل يمشيلك
واگلك يامعطشني
فراتك يسحر عيوني واغنيلك
دخيلك لاتضيّعني وأنه الملموم بشليلك
ليليه اشگ الصور بدموعي

واعيوني بسمه الغرفه تشع نجمات
وتفززني الاغاني الباهته المابيهه حزن امي
ولارگص الضوه بنهران الولايات
وتگلي حلمكم مات حزنكم مات
الحزن لومات
مامش طعم للضحكه الحزن لومات
مامش طعم للملگه الحزن لومات
الملگه البارد يموّت اغاني الشوگ واللهفه التخلص الليل وبكل عين صوره تبات
وبكل نجمه عين تبات

ترسم موعد لباچر
وكل دمعه تطيح اعله التراب رماد
وتخضّر قصيده
وينولد شاعر

عبدالله عمراني
.
.

كل يوم واگول اليوم اتوبن من المناطر
والمن شوفي المطشره
لهناک وترد اردود بیه اتوسوس العشره

وأتوب توبتي واشتاگ
هوه ابليس خو ملعون بس وگفاته حلوه ابملتقی العشاگ
اشما هومن واريد انساك
يعرض جرحي عرضت ناس مبخوتين
واضل محتار
لأمن فازع وناسيك لأمن راجع ولاگيك
يلمضيعني
ضحكه ابحلگ المشيعين

وين اطلع؟؟؟؟
وجه ماعندي بل دفنه
لتحط ايدك ابغير ايد
جگاره الماتحب اشفاك صعبه اتجيبلك صفنه

شجاک وطابجتلک ناس امیین مایقرون البعینک
یاهو المثلي من اتضوج ینفخ راحته ابطینک

تعال ارجوك
رد حظي الخذيته اوياك
تعال ارجوك
غط العين بملاگاك
اريد امساتر الدمعه
تدری ابعینی بت إيواد زحمه ازلوفهه امفرعه

تعال ارجوك
لتخليني أصيرن سالفت رگبه ابلسان السيف

لتطول علي فرگاك
يكشف سر المعسرين لو طول گعدته الضيف
متمني انتلاگه ابحلم
بس اشلون؟؟؟
الماينطي زكات النوم ربك مايرزقه ابطيف

موبطران
ماسد عیني عدي اسباب
القفص لوراح منه الطیر عیب اتفیده سدت باب

ماچنت ادری بلعشاگ غیر السهر ماعدهم

وانه اویه اهل الکهف چانتلي عشرة نوم
لوگعدوا شگللهم

ایی والله وبعد لاوین

اموگف صبري هاي اسنين
لا مريت ،،،،،
لا گتلي البعد شنهي؟؟؟؟
ال يدري ابروحا مو اخاذ
عود المن بعد ينهي ؟..

عريان السيد خلف

جية العيد

يناهي الشوك ذمٌـه وذات من ذات
وفرق مابين حالي وحالك بْعيــــد
سنه وصدٌك يِضَـوك الروح لوعات
ويجَملٌي الجروح جروح ويزيــــــد
أبات بحضن صبري إليال ويباتْ
جرح يصحى وجرح متغصٌب يْهيد
وأكًًول إشوالف السرحان للشــاة
عْلى سـجٌه وكًاوداه الإيـد بالإيـــد

إلك جـانت ياحلو الطول جيـات
عجب تبخل علينا بْجيٌـة العيـــــد


تنينه وأملينه جْفونـٌه بْطيفْ
وصبرنا وصبـٌرينه الآه بـــــالآه
وتحسفنه الحســافه وحيف عالحيـف
عله إسواجي الدموع الـ مالهن جـــــاه
وعرفنه وعود حبك غيم بالصيف
المحل وين المطر بالصيف يلكاه؟
إشيصير عْلى الترف لو ينحسب ضيف
عْلى غفله وعيد وصل الزين محــــلاه؟
أنه بْعازة الموت وحاجبك ســيف
وأمــوت بْغير صدٌة غيض ماريـــد

إلك جانت ياحلو الطول جيـٌات
عجب تبخل علينه بْجيٌـة العيـــد


أحن لمسامرك والكًاك شلكًاك
شَرِي المعشر حلاوة شــوك مابيــــك
يمر صيفك صبر واتنَطٌر شـْتــاك
تبيعك عزتـٌــك وبذلـٌـتي أشريـــك
تراك ويه النفس يلماتجي أشراك
وبالدم الـ يدور تدور أحس بيك
يابو الروح عْلى روح إهواك شلهــاك
وإهي بْعيـن الشفاكًـه إليال تِربيــك
أبد ما سامرتها الآه لولاكْ
ولا جـان إعله دربك لاويــه الجيـــد

إلك جانت ياحلو الطول جيـٌات
عجب تبخل علينه بْجيٌـة العيـــد


أنه ولا كًـول عنـٌك غير معذور
ولَو ماظَلْ عذر للروح ينكًــــال
لـَجَنْ ون الـ يساهر ليل معـذور
ألم لو من وكت لو من ولف شــــال
وانه بْحالي عْلى صبرك حال مزهــور
صبر ومكابر المحتـــام جَتـــٌال
إلك عمري عْلى زين وشين منذور
ولَو من السنيــن إوشال ما ظـــال
لـَـجَنْ يبقى الجفن للطيف مسمور
ويظل راجد عليها النوم ترجيــــد

إلك جانت ياحلو الطول جيـٌات
عجب تبخل علينا بْجيٌـة العيـــد

سمر الخالصي
.
.

كلشي يوجعنه بغيابك حتى عتبة بابنـه!!

حتى گطرات الندى!!
بحضن الورد..
وترابنـه"
وكل درب ودانه ليك وجابنـه..

لسه ضجة ضحكتك تملي الدرابين القديمه..
لسه كل مسعد يذكرك..
تنچفي بروحه السوالف يا حريمه!

المثلك يسمونه ذكرى شگد هظيمة

انت وحدك..
عايف بكل گلب غصة ..
كل وجع بالروح الك من عنده حصه..
درس چنت..
وگبل مايبدي الدرس دگت الفرصه..

توه خضر عودك ..
وبگلوب ناسك خضرت يحديث نچله..
حملت سنبلة روحك ..
مادرينه
شما تحمل سنبله بعين المناجل موت تحله..
اي يـ رايح
كحلينه عيوننه بريحان طولك..
ثاري حزن العين كحله..

قصيدة تحمل الكثير ... للشاعر
وسام سباهي

(وجـــه الشعـب)

مناير حيل مضفوره على شفافك...
صلات لكل نحر بي سيف متعدي...

ارتفع يم عرش الحجايات....
كَطرة مستحى وشبّاج معصومين....
بي شدّو حرز بردي....

تعال وياي من روحك....ولو صفنه!!
تعال وياي من جرحك...ولو لچمه !!
تعال وياي ....من كلشي الخذيته وياك...
حتى أخر ندى البجنازتك يحدي...

السفر بعيونك ليا ليل متعدي!!
سفر والناس مايدرون....
طيفك عافني لوحدي....!!

وارد وحدي اجيبك من بواچي الغيم....
وانثرلك درب مهجور...بس اتعوفني لوحدي!!!!

اختصرني انسان حتى ابرالك وي الريح....
كل تمثال مايحمل رساله ايطيح
اليمشي ابزفّة الثوار....
يم عرس المنايا ايصيح!!

ياوجه الشعب لاتصفن بروحي....
ترى الهسه الشمس تنعاك والمنجل....
ترى لهسه الحبل مشدود...
بس ابثورتك ينحل....

واخذ دمي ضوى وقربان للثوره....
شما ضمّو علينه انسان...
بنفاسك هوى اندوره ....
شماذبحو ضمير الكَاع...

راح اتخضّر الثورة
راح اتخضّر الثورة

ايما صباح

دمعي لچفوفك حرز ليليه ادزه
وكل حلم مابي سمارك
گبل لا يوصلني افزه
آنه كاتلني الحچي ال من المعاتب چنت اچزه
والله لو گايلته مايخنگني هسه
لچن ماادري الفراگ يصير فوگ امن المعزه

امس غنيت اسمك بكل حضره عايفني بسببها
وسلطنت عادات بيه لخاطرك چنت آنه احبها
منيلها ايامي حزن لو ما حنينك ؟
روحي بس فَگدك تعبها

اهواي لچمات المَذاهب والله واحد
وچان كملته السعي لوصلك ولكن
صبري خاوي ومايساعد
خايفة اطفى بغيرك وماتبقى بارد

لابُد يشدني الخضار
ويطفح بروحك صفارك
تبدي تتخيل رضاي
ووي هوى الغرفه اتّعارك
لمن اويه المايفهمك بالغِطا الفاهي إتشارك

تبچي شوگي بكل أذان وتشتهي عيوني مناير
وتكفر بطاري الرساله الماتجيب اخباري باچر
الماي من يتبده مره، يلم غرِگ روحه ويسافر .

سمير صبيح
.
.

أمس زرت السوالف والمواعيد
بعدهن عالجسر كلشي بمكانه
نظراتك
لهفتك
عرگة الأيد
خوفك لا عيون تطب سمانا

ونار أشواگنا الما تقبل أتهيد
وبير دموعنا وصحرة لقانا
أنتَ گبال عيني وچنك ابعيد
أكيد وي البعد يكبر هوانا
وچفوفي ورگ غطى العناگيد
ولهينا ارواحنا ودارت رحانا
وصيني گبل لاروح شتريد ؟
گتله الليل لا يخنگ ضوانا
شوصيها السنابل عالحواصيد
لو اوصي الجرح يلچم دوانا

لو اوصي العطش بالصيف ليزيد
وصية وغيرها خلنا بعمانا
بس عينك عليك وكلشي ماريد
يمك أنت ألي مخليك أمانة

غازي ثجيل ... مسافرين
.
.
مسافرين وعيني مشدودة لدربكم
رايحين اخ لو عندي كَلبكم
جنت الم جروحي كلها جروحي كلها
وياجرح يلجمني بيكم حيل الجمه

مسافرين وروحي يطويها الدرب غربة وملامة
رايحين ومن بعدكم صرنه لشطوط العشك
والحب علامة

واحنا طرزنا الستاير للشبابيج
العبر منها الضوه
واحنا علمنا الخلكَ طبع الوفه بدرب الهوه

شوكَنا جناحين
للراحو بلا جلمة وداع وضيعونه

مسافرين وتغفى بعيوني المحطات وصورها
مسافرين وترفه يا عيني المواعيد وصورها
رايحين وذبلت جفوني التعب بيها سهرها

عيونهم عشك الربيع الغض على الدنيا حلاته
بروح ترفه
رموشهم ليل الطويل اليشرب عيون الضوة
وبهدابه تغفه

روحي مثل الكاع لو مرها المطر تمطر وفه وخير ومحبة
لاجن الدنيا سفر والنحبهم ما نسيناهم نسونه وسافرو
مسافرين وعيني مشدودة لدربكم