(القصيدة الفائزة بالمركز الاول لشعراء ذي قار لعام ١٩٩٦)

غانم هاشم الفياض

(چف اوداع)...

توادعنه ....
وخذت جفي اويه جفك....بالموادع ذاك
لا انته اجيت...ولاجبت جفي
الاخذته وياك.

بعدك مالكيت ..بلون كلبي..اكلوب
احبههولا لكيت اولام
عيني ...انساك

تدفعني السوالف..ليك حد الشوك
واشتاكيت كلي ..لكل خيالك ذاك

يل عايف حلاة...
اسوالفك باذني...وماخذ كل حلاتي .وياك

دليني اعله عين ..اتوچد اطيوفك
ودليني اعله سچة طيف ..بيها الكاك
ما اريدن اكابل عينك من ابعيد
ومن ابعيد انزع.....
كل ضوه اعيوني واكلك هاك

توادعنه
وخذت جفي.. ويه جفك..بالموادع ذاك

كلي اشلون..؟ وآنه بلايه جف
من ترجع اتلكاك.... ؟

حيدر الطفيلي
.
.
كعدت من الحلم باجي
خسرتك بالصدك والطيف

اول مره اخاف من الشمس تطلع
واتوسل ركبتي تبوس كل السيف

هي المشكله ماموت

والبيبان اذا قبلت اصير تراب
ما اقبل اسوي من الصور تابوت

اموت ؟ وعايفك بالكيف !!

استاهل اعيش اكثر

ووصل بالتعب مني
احس بوحدة القمصان من تنشر

واخاف اكبر بعين الناس
بعيونك اريد ازغر

جنت المع بصفك والليالي تغار

واذا لاح البرد حضني
اجيسن كلبي وارجع حار

هو الحايط من يميل
معناها انتهت دكوا عليه بسمار

حزن من كذلتك للوين

الناس جفونهم صلت
واني رموشي ماتكدر بعيد الطين

سامحني اذا من باب
اخسرك هم بعد مرتين

احبك خل نضل ابعاد

واذا ترسمني غيمه والسمه الايام
ارسمك ماي هيجي عناد

الفركه اطول حتى الغلط ماينعاد

بس انعاد ..

اطيحن والمري تشهد

وامشط بالصور شعرك وتتبلل اصابيعي
واكوم من الصور معضد

حمامه وطايره من القفص للمرقد

مصطفى عماد



يا ماي استحى من الله وبعد ما يغسل بدمنه
ويا جف استحى من الله وترك وجنات خد امنه
ويا تابوت غمضهن عيونه كبال كل عريس
ويا نزوه مشت بلراي اذا ما جابهه النه بليس
نزهك والحمد لله التتن موجود
اذا ماعنده لف وزناد مايوصل السجه حمود
باهلنه مكابرنه ومشينه براي موتانه
ويغفه الشارع من الخوف ويبات الضوه متعوب
وينام الحلم شينام فقير امزكه اردانه
واذا يجبل علينه الموت كله الصيح هذا انه
السواجي الطافحه من الدم متمرده ع لون الماي
جاليش النهر يكشخ بدم وفاي
جاليش الدمع يشبهه نثار الطين
هوة الشيب مو لراس شو ابيض سواد العين
نسومر والسمار ملوحه للبستان
الهوى اليغتاض لو شيصير مايوصل خشم غركان
هلبت والضنون تبيد نلكه السجه كلهه اورود
هلب كلمن يشح شوف ما محسوب ع عميان
كافي نحشم الفانوس بضمايرنه عمى الألوان
هجي و نفتح الشباج ونلكا طاير الدخان
تعبنه من السهر والخوف و الغربه نهر يابس
لو ما عاشك العباس ما شك الدرع عابس
ليش احلامهم عرسن وبس احلامنه العانس
يرب الطين مد ايدك ع جفون الورود وشوف
تلكه العطر ما بي روح خانك روحه من الخوف
تلكه النهر مابي شوك كاسر كلب جم اجروف
جا هلبت يموت الخوف
هلبت من ضحك ليله نصوغ كلاده للفرحه
ومن كد ما نزف شبان ما لاكي اليسد جرحه
الوطن متعوب وطن جردوه من هدمه
وع راسه ركب رمحه الوطن محد يشم جرحه
الوطن مغتاض من صبحه
الوطن مغتاض من صبحه

علي المحنه



خفت يغتالون حلمي
وينذبح حلمي بشضية ...!
شككت حلمي بدية ....
وأرجعت شككت المشكك بدية ٫
شوية من حلمي بقه مجلب بدية ....
وخايف يزفني شهيد !!

وين أريد ...

خاف أغمض عيني وابعد .... وأرجع أحلم من جديد !!
أرجع أحلم بالعراق ..
احلم يشب النا خيمة !! ...
ونلتم نغني بفرحنا ....
والعلم يضحك نشيد !

حيل خايف ....
خايف أحلم من جديد !
ومن يلم العلم جسمي ... مايرد جف الرصاصة !!
وأرجع اتسمى شهيد !

مااريد ....

مااريد احلم بثورة ...
أنه عايش .... !
عايش بحزني سعيد !

ومااريد

ما اريد اضحك وأغني ... انه يعجبني الدمع !
من يغٓسلني و يعيد !

مرة واحد من أهلنا ...
جان يحلم !!
التمت الدنيا اعل حلمة ! ...
وكلها صاحت ....
هذا خاين .... شلون يحلم وشيريد ! ؟
وقسم صاحوا ....
هذا جاهل ٫ قشمروا أهل السفارة ... يريد تسقيط العقيدة !!
طايش وكلش عنيد ...
رد أكل حلمة وتندم ..... طاح باأحلامة شهيد .
هم شهيد !!
ماريد
مااريد ... احلم واغني .
ولا ادورلي وطن ..... لاقديم ولا جديد .

ماأريد

سعود الخفاجي

كلشي ولاترد مشتاگ
وبظنونك قصيدة وسالفة عشاگ
وعيونك على الخلوك
ومرورة زعلهم…
بالحلگ تنضاگ
تتمنه الدرب يگضيك
يابووويه...
وجگاره.... ولا غفل تنباگ
تكتل ضحكة الشافوك
تمشي وتاكل بروحك ..
سچين بظهر تفاگ

تتختل ترد مابين..
جرحك والحچي الموزين
وانت بلاذنب مرات ...
طفار الحچي يلوحك
لو يدرون

من ياليل جبتك.. چاطفو كلهم
ولويدرون ..

من ياطين دفتك ..چابچو كلهم..
حطوني بخلگهم سالفة رعيان
واتلولح خطيه برگبة الذباح
واترفع ولااگلهم
چنت بلاسمه ولاگاع...
وچنت بلااسم تنباع
ومن طحت بحضن روحي ...
گمر سموك..
لويدرون..

ماگعدوا امس واگبال
شمس الله شكثر ذموك
لا تهتم ؟
نسوك وهمه مايدرون ..

يتبده الضوه ويلتم
تموت هنا.....؟؟
تعيش هناك ....!!!
انت بكل حديقه تصير
معبد للفراش وللعطر منجم

خلهم ؟؟ لا تحطلك غاد
چادر للفراگ وللزعل مأتم

خلهم همه مرتاحين
يعجبهم حچي الظلمه
ويونسهم زفير الدم ....

رضا العبادي

اغلى من اخوتي علَيّ
وبغرفة امي چنت مگعادك ابيتي

ومحد يكفلك لان مالك عرف بالصدگ
وانه الغشيم الگبل مديت جنسيتي
امعاند اتبدي الدوة من رخت عافيتي ؟

اسبگ اردانك چنت لو دمّعت عينك
ومافاك ريجي ولك
محتار افك دينك

انه البرودي يغث .. تجرحني الحچاية .؟
معقولة هذا الوجه.. انه ال بالمراية؟

امنيتي اشع عالبشر..
والينحط اعله الضوه
يبين شناويلي
امنيتي من انضك واحد يتجيلي

لو مو تطور اجه... انه الصورك ترس
بيبان كنتوره

وكلت من اطيح بمرض
الكاك من التفت
ثاريهه كلهه چذب .. بس امي مقهورة

الماجابه شوگه الي .. يجيبنا النذورة ؟

كالو احترگو هلي والنار من كل كتر
كتلك يطبهم رمي.. ولاكطع سالفتك

خاب انت مثل الضنى ..
حتى من اغثك چنت
عود اعله مصلحتك

زید الهاجري
.
.

تستاهلني
بس بعديش

لا مرخوصلي أشتم بيك
كَدام الخلّكَـ كلها
وأكلهم حضنك أفيّشي

ولا عشكَي غلط ، وأنساك
وأحسبنك ضمن طيشي

لو منك وجه ملكَه
چا وصيتلك عيني

ولو تنباكَـ ، چا بكَـتك
بس عطرك يسويها ويدليهم ، مثل ما چان يدليني

علمني ، شسويلي ؟
أروح ليا حضن لو بردن سنيني ؟

شكَلّك ؟
وآنه كَايلّك
غيرك مو رزق عيني

علمني
أمد ليا ضوه ، خيالي

علمني
أذا مر ليلي من دونك
شسوي وما تجي ببالي ؟
شسوي وما تفيض عيوني وأبچيلك ؟

علمني
منو الـ يندلّك بروحي ؟
خاطر من يزيد الشوكَـ وأتأذه
يشلع كل تفاصيلك

شسوي وغيبتك مستلمه عافيتي ؟
كون تشوفهم وتضوكَـ تاليتي

عفتني لناس
ما بيهم وجه يستاهل أحچيله

عفتني لناس
لون عيونهم ما يسوه أغنيله

عفتني وظال كل عقلي
أذاشم صورتك حسبالي مشتمك
وألملم بالأخبار الجايبات أسمك
وأثث بيهن ظنوني

يـ تارسهم
بذمتك كل فراغ مكَابل عيوني

يـ تارسهم
يلمفرّغني من كلشي

رغم كلشي
أذا تحچيلي ، ماچذبك

لكَيت بوجهك الزهري
لهفتي لتكملة عمري
ولكَيت الطايحات من العمر ، بيدك

وراويتك الماراويته لعيوني
وأتشهنّك الما شبعن بزغري
وكَلتلك كل مسامه بخاطري تريدك

أذاسألك
شنو الضوالك وما كَامّن يعجبنّك عيوني ؟

أذاسألك
شنو الما صابغه بلونك
حتى تضوج من لوني ؟

شتكَلي ؟
تستاهلني !
چا بعديش ؟

هسه ومن غفت كل (وينك) بروحي
هسه ومن بديت أصحى
جاي تكّلي بس سوالفي تفيدك !

چا والفركَه ؟
چا والحلّقة الـ بأيدك ؟ ،.

جبار المياحي

سجل اسمي حته لو اخر اسم
التسلسل بالضحايا
مو مهم
انه ناتج حرب في ناقص سلم
وانته حاصل كل عذابات الحصار
اثنينه افرازات من حالة ظلم
انته كلشي البيك من توكف يطيح

من تحس بداخلك شي منهزم
من تدور يمنه ما تلكه بديك
اجفوف اديك اثنينهن صارن عِسم
من تطلع سيفك ابين السيوف
وتلكه بيه من الحرب صاير ثلم
وانه من اوكف يسيل اعله الرصيف
شبه ظل انسا ن ملفوف بهدم
الحرب بيهه طبع تاكل الناس
والحصار اطباعه ياكل بالعظم
سجل اسمك فوك اسمي لوتريد
والتسلسل بالضحايه مو مهم
اكبال شوف عيونه كمنه نطيح
مثل تمثال الرمل من ينهدم
طشرينه اعمارنه بخط الشروع
إلمامه صرنه وطاحت من ايد اليلم
خيل ريسزز بس فحطنه من الركاض
ومن طلعنه بظهر كل واحد رقم

دنكينه الروس حد وجه النجوم
وللارض مرفوع راس اچم قزم
صار جفن اعيونه غابة اكبور
ويه رمشة كل جفن ندفن حلم

وكبل وسطه اعيونه تركص نجوم
ومات بس مخنوك هسه اخر نجم
تكدر بوجهك تضم كلشي انته بيك
انه كلشي بوجهي ما اكدر اضم
العازة معروفة بعلامه اعله الوجوه
وياوجه بوجوهنه الما بيه ختم
العين من تدمع! تدمع تدري ليش؟
من تشوف الذله تصعد عالخشم
والجرح لو نام عدنه انعصر حيل
احنه عدنه جروح تغفه اعله اللجم

اشلون نفطم جرح مدمن عالنزيف
شما نشف حلكه صرخ من الفطم
سجل اسمك وين ما انته تريد
وفرق ما بين الكتابه والوشم
الينحفر بالذاكره لازم يدوم
وما يظل عالماي كلشي ينرسم
المباديء والقيم مثل القمم
وبالاخير انشوف صعدت يا جدم

زياد البصراوي


انه وصورتك والليل ..وجهك چان رابعنه
اشتهيتك تسكت بروحي
الحچي الـ بالكتب مابي صوت بي معنه

جاي اسمع ونين بهوسة جروحي
اشيطفي الدنيه اريد ارتاح من روحي

شنو ذنبي غريب وديرتي احساسي
وشنو ذنبي انخلقت الناس مو ناسي
وشنو ذنبي اديرن غيركم بالكاس
واشرب ناس ماحبه وصوركم تصعد براسي

او ماعندي الينسيني واگول تهون عشرتكم
واگول انسه اشينسيني وبعدهه اتدردم
براسي سوالفكم
واگول ارتاح وانه الفاتحه تبين عرس يمي
منهد مافارگت بالليل ضحكتكم
تركتوني وشنو الغايه

چاليش الضميره انسان ماينذكر بحچايه
وانه من ارد ابيع الشوف
اتوضه بضوه اليمشون واتوكل عله مرايه
اريد ارتاح ياطير اليبيع جناح
هاي الناس خلتني ادور بالسمه ولايه

واطيرلكم عطر مبيوع شابع شم
وامرلكم هلا الكيعان لوشافت فلح تلتم
وخاف وجوه هاي الناس تخنگني
اجيكم بالهوى محزم
وانا مابيه لثگة ليل
اخاف انباگ
هذاك انه ضوه ملثم
هذاك انه انوخذ لوني
من تغيب الشمس بالسمه يسافر دم
وتمنيتكم
يله الصبع يتمنه كل الناس ماتندم

ضعت بوجوه وادم ماتعرف تشوف
اريدن عين تلگاني
واريدن صوت يخدر من يگول اسمي
واريدن اخ تنساني
مشه عمري بتواليه
وانا متاني انا متاني
صفنتلهه وشفت الفراگ تاليته عشگ ثاني

زغرتو بعيني وحتاجيتكم يمي
مرات الوطن خيمه
وادم كلمن وضيمه
چنت گطره واجت شمس الله باستني
وصرت غيمه

واريد انسه اريد انسه
وهواكم يعبر بروحي ويذكرني
وضواكم ينچفي براسي ويكبرني
اشتهيت اضحك عله جروحي او ارد ابچي
واشم ريحتكم من بعيد واسمعكم
اثاري العطر هم يحچي

نديم الآلوسي .... ترانيم منفى

ليل يساوم الدخان
وططوه تصيح مذعوره اجانه الموت
وعيون الكمر معصوبه والنجمات تتنطر يجي السجان
البراءه ادور ابين الوجوه امچان
الرحمه دور ابين السبايه امچان
ماضل ابزويه امچان

،،تحودب ،،ظهر نخلتنه تصيّح،،وين
ياختله البستكم ضيعتكم وين

وإتباوع من الشباج
مامش غير
هوا يلعب وي البيبان

واحنه بديرة المجهول سوده الريح
قمصلة الوكت مشگوگه
ياجيب اليحطنه نطيح ..

يصر سنه البرد وخيامنه مشرعات
مره تروفهم ضحكه ونداوة ليل

مره الهوى يمزگهه وبذنهه يصيح
واترجاك وك ياغيم اترجاك
لاتحمل جرح ياغيم
وك الجروح حمره الهسه تتراكص على السجين
لاتنفض خلگ ياغيم

فرط گلادة ليلو بگاع يبسهه القهر
ياغيم
وك ماضل ورد ياغيم

طالب غالي


يمتى يصير الفرح گمره بليالي الحزن
ويصير دمع المحب نجمه اعله شاطي الجفن

لانثر اغاني الكلب فوك البراري مزن
لاكبر ونوش السما شجره وحبيبي غصن

يوم على يوم انتظر
صوته يصحيني
ياخذني مثل الحلم ويلون سنيني
صبري تعدى الصبر بس دمعتي بعيني

ودعي حبيبي يجي يذكرني كلبه ويحن
يمتى يصير الفرح گمره بليالي الحزن

جمعت شوگي اله
ضحكه وندى وقداح
انتظره يمتى يجي ...وهمي يصير افراح
واصير انا جناح اله
وهوه اليه جناح

ونطير وي الهوى ...واحد لواحد يحن

يمتى يصير الفرح گمره بليالي الحزن..

يمتى يصير الفرح ..

غناء : لنا طالب
كلمات : طالب غالي

@sha3er_100

فرح كريم ..
.
.
تلگيتك ضوه هلالين وانه مسومرة بحزني ،
- تلگيتك بصوتي الماوصل لأذني

- ياديرة ابنادم على بنادم طيح
شتخسر لو كسرت افياي !
هلبت تعگد ايامي وحچي اضنوني وبچي احلامي وتحطلك رآي !
هلبت للحزن شراي !
مليتك يوالي الروح طشرت الضعن للنستحي انگله !
وچملت الصبر سهله ،
وخلصت الحچي البيه
احط اعذار وجهي التايه اندله ،

ولك آ ياطريقك درب مامحزور
ونرد ، وگلوبنه اتكمله

ماجريتني بچفك علامة خوف
وألتف بيك ملگه اشراع
ولا غليتني بشوگك
- رسالة موت عشگ الگاع ،

يالعذرك شمدريني

وين الگاك؟
وألگه الما رضت بيهن روازيني !
عفتني شعنده طيفك يركض بعيني؟

حرب واستنگه وين البيه
ندارت حيل الابهر من شراييني ،
عمر مالمته چفوفك
عمت عينك غريبه الروح اتيهك من تلاگيني ،
اعله هالت كل جفن متعوب اطلبك ليل غيمه اسود ،
واطلبك خوف مدري امنين يرفس باب عشريني

واجيك اركض بنية بيت ماتندل شوارع گلبك ابيا راي ،
ماتندل اجنازة روحها ابيا گذله مبيوعه وعتبها هواي

كاظم اسماعيل الكاطع
.
.
يبني خنكَو كل ضواي وذبحو بصينيتي شمعة
ونجمك اليضحك ييمة امغنتب وما بيه لمعة
والكَمر شد نكَلة جاي ايشيل
ظل ابلا ضوة جاشنهي نفعة
يبني والبستان ذاك امصوفر ومسلول زرعه
ودم ضحايانة ينز بكل مضيف
ومابكَت للزلم ربعة

والخبز مديوف بالدم.
كَلي خبز اليابس الينداف بالدم من يجرعه؟
يبني..جاعت الامهات وديسها كَامت ترضعه

والسلف ياكل لحم موتاه يبني ما لكَة خبزة التشبعه
وذني حلوات السلف باكَو كحلهن
والرمد طش وترس كل عين وسعه
والعجارب ينكَط بكل درب سمها
وعدنا محسود التلسعة فرد لسعة
والسهم نام اعلة جبد الكَاع يمة وحشمت وين الينزعه؟
والمراجيح التغني بعيدنة ..صارت مشانق
والحبل محد يكَطعه!
والمزابل حولوها النة مكَابر
يمة يومية الفجر توصلها دفعة
اوية كل سوط اليشَك ظهرك سواجي
ايشَك مهجتي وتنشلع روحي
اوية كل اظفر نذل منهم يشلعة
حدوا بضلعك خناجر..وانتة كَبلك
جم شهيد العبر الثورة اعلة ضلعه
يبني جلاد السجن ساطورة جايع
كَصلة من زندك واشبعه
كون اشوفك

كون اجيك بنار كَلبي جا حديدك كلة اموعه
يمة نشكيلك ظلمهن
من اجينة انواجهك مصباح جمعة
جينة....واحدنة ايتطوة..الريح لوهبت تدفعه
ويم سجنهم.....
صارت اعلينة البنادق يبني فزعة
واحد ابعيني يحط يايمة اصبعه!
واحد اينعل حزبكم واني اسمعه!
واحد يجر شيلة اختك..راسها ابشارع يفرعه
وتهمل ادموعي وتصب راية اعلة خدي
دمعة تبجي الحال دمعة
يبني...ماخلوني اجيك

اوعز عليّ مسواككم يوليدي بالعلاكَة ارجعه
يبني صبرك..
خلي بسمار الدرب نابت بجدمك...لا تشلعه
يمة ظل لابس حديدك لاتمل منة وتنزعه!
نارك الحسرة التوجها
الناس باول ليل هية الي تكَطعه
وخلي عكَربهم بداري وكل وكت تلسعني لسعة!
ما اكولن آخ منهم لا....لا..

وحَك كلمن كَضة وما دلة عدوانة اعلة ربعه
لما صوت الدنيا يدوي وللعشيرة تصير فزعة!
اهناك راسي وبيرغي المصبوغ بالدم عالي ارفعه
اهناك..وحش الغاب ما يحميه شرعه
اهناك..اردن للعرس حنته وشمعة...

عقيل العرد


شمكعدك ,اطبكهن, نام, لا يعمن
وشد ارموشهن واتركهن يحلمن

وعلمهن يضحكن مثل ضحك الناس
مرة.. اثنين.. عشرة.. المهم يتعلمن

ليل وصور ناسك شاردة وي الريح
وجوه امطشِره وعيونك يلمن

وياهو اليدري بيهن وشلن عدمن
وعلى يامال صبن مايهم و المن

شمسهن تعبت وشبرين عنها الماي
واخاف بلا ضوه بغربتهن يسلمن

تكابر , ترسملهن درب ملكه وباب
وفوك اوراق وجهك مدري شيرسمن

شاعر والحزن رايدله عش بي روح
وبكلبك طيور الحضرة يلتمن

و عرفت بسرهن عيونك " بنات الليل "
ينطن نومهن ودموع يستلمن

باسم الخاقاني


( صــــدفه ) ...

صادفت انت.... !!!!
ونسيت الناس وبس انت الُلكيتك ناس
وصادفت انت....!! ولكيت الماي ...بس مايك حنان وخوف...
وكمت من العطش صليت .....فرضين وقبلتي الياس
لكيتك...تلعن الجمار جي مات اعله رغبه فاس

لكيتك شجرة متاناة ماشالت حلم بلبل
لكيتك سنبلة بصحراء وحدك للمطر تانيت
تكره رفگة السنبل

كبل لاشوفك متانيك...
وبيك الحزن فك وياي كل صبره
ومن شفتك كمت للعيد ...فصلت الفرح قمصان
والميت نزع كبره

عثرت بنجمتك واذكرت عمري الفات..
.المن...؟ عمري ذاك الضاع
للنسيان ..للذكرى ؟
ياصدفة بكبر مكتول بالصحره....

ما مر بصدفته الناس
ياصدفة نبي من الشوك جايبلي الحنين وجاي
توضيتك حلم من ماي... وصليتك صلاة الياس

ياضحكة بوكت مابقت بيه وجوه..
يا صفنه بوكت اذنت بيه غربان
صوت يزاود اعله الصوت وانت بصفنتك ترتيل
عايدت الصبح والماي وامي وكل حلم ذبلان

من شفتك كمت هليت
خطيه آنه اشكثر تانيت
واشتاكيت..

القصائد الفصيحة والشعبية

#جرح_سبايكر

عامر عاصي

-عراريس النهر -

يا نهر ذبني عله الجرف ناي
وبهداي جيس الروح بهداي
سولفلي أدري جروحك هواي
ودمهم حرير ويجرح الماي
...........
يا نهر ذبني عله الجرف عين
بعيونهم تقره العناوين
يا نهر حلّفتك بالحسين
من موتهم ، هم استحه الطين ؟
......
توّه الدمع والموت ، توّه
والعاش گوّه ، يموت گوّه
يا نهر شوف آدم شسوه
يمطر جثث بچفوف حوّا
......
يا نهر يا گبر النواميس
ابليس راح وخلف ابليس
والروج ظل يكنس عراريس
ونذور وشموع وفوانيس
......
يا نهر دم ودموع صاير
وچنّك بالولايات حاير
خجلان ؟ شتگل للمناير؟
الشبان بمتونك ضفاير
........
بس يا نهر طينك عماهم
وبرياگهم وذّن ظماهم
أدري النخل يشرب دماهم
وتنوح برحيّة بسماهم
.....
صار النهر حيّه وتمد ناب
تروي الشواطي بدمعة احباب
غِيّاب .. چنهم موش غياب
شو چن أديهم دگّت الباب

نام الولد ، والشوگ ما نام
والريح تعوي ومالها لجام
يا طيف يبن ثمنطعش عام
تبچي الصور وتبلل الجام
......
وينشد فضيض الماي شتشوف؟
ماي وسِعِد وعيون وچفوف
ومچتوف لاذ بإيد مچتوف
والروج مغزل يغزل زلوف
.........
شتشوف من توگف على الشط
وشمس الفجر توهه اتّمَغَط
وتسمع غراب الليل ينغط :
شيلي الضمير البالنهر غَط
.........
شيلي الولد شوفي شحلاته
عطشان والماي بلهاته
والموت شل جرحه بعباته
عريس ...... شيگولن خواته؟
.......
يا نهر روجاتك مخاديد
ناموا عليها الإيد بالإيد
حتى اليريد يصيد ، شيصيد؟
ضحكات وشفاف ومواعيد

محمد الشمري
.

وكلشي اليـنجهب ذبــلان
فهاوة ملكَة بين الجذب والبــيبـان

ورزة بــاب ماتت شيٌعــاهه إشراع
ملامحهم نهار دروب
وصدكَهم شبكَة مال اوداع
أمــتيـهيـن إشـتهتنه الــكاع

وشرب بيــنه النجم كَمــرة
وهدل بيــنه السـعف جم لــيل
بس مـا لحنـه جـي فقرة

بســالوفة عتبهم كَــعدوا إمتيــهين
توازيــنه وخذانـه المـاي عالوادم

ردت البيــبان صفنـة بوجه كلمن جــاي
وجــنه نموت !
من جــان الكَمر بالمــاي يكَعد والعشك بسكوت
من جانت عبــاة الكَــاع تهدل لو شهك تــابوت

أعله نــيتنه إشــتهانـه الليل
جي شفنه الزلف خطار
إشبـديـنه أعل المشوا يا حيف
طواريهه التراجي أكَصار
وركضــنه بدرب كله فراكَــ
مرات الركض مريوود . بس الكَاع
تبيــن ركضة الـمـشتـاكَ
تبين ضحك غربة الكَــاع
يترايه الكَبر لو سولف التابوت
جي شاف الجنازة متــاع

ودعنه العشكَ والليــل ومراية عرس طحنـه
تره الدنـيه سفر و أوجـوه ..
غير أوجوهـنه أشفنه
صــدكَ عــشنه ! ؟
وفكَدنــه الشيب . بس الصدكَ مـا عشنه
يــاربي العـمر عنـكَود
جـا ليش أحنه ما لحــنه ..؟