3000 صديق ..

شكراً لكم ♥

عمار سالم - بلايه حساب



خليك بفرح وبجرحي خليني
طبع عاگول مامتعود اعله الناس تسگيني
وهذاك انته مثل عارف عرب لداي
تندل وين تچويني
وتعرف ادموعي يمته اطيح
چي حطيتك ابعيني
طين اگبور حتى بموتي تاذيني
منك بيك بس مابيك تحييني

عليت عليك لاچن مو كبر معناي
نيت الغيم من يعله اعله گاعه افياي

اتعبت من وادمي وگلبي
وهذا انه من اريد امشي
مثل حال الجنازه اوداع
محد يوگف ابدربي
ولاناس الترد بيه
اليمشي وياي بس ذنبي

درت وجهك گبل لاتطلع النجمات
وانه وگلبي هم ننساك
موش اگبور خاطر نحتفظ بالمات

ما انطر فرح وادعي
شمع بالليل اكسب وادمي بدمعي

طحت اليوم باجر هم تطيح انته
المطر والناس كلمن طيحته بوكته
وما اشكي الجرح لناس طير اغريب
تعودت اعله جرحي ايطيب بالسكته
وماندمان
ماردت الزعل انته الزعل ردته

بلايه احساب
صار اوداعنه بمرسال
رغم الديره ديرتنه
وانه وجدمي فوگ الگاع مثل الماي
مشيتنه عله فطرتنه
وچي نمشي اعله فطرتنه
حتى الگاع شربتنه

ولاناس العلي تسال
ولاني العايش مدلل

عشت اهلال عيد انگل فرح لناس
وبس اتشوفني ادير الوجه عني
ورد مهضوم ومحدب لچن ماطيح
منجل هيبتي بسني

وما محتاز عندي چفوف
ومسحهن ادموعي اگدر
موبس وادمه ابنادم تمن اعليه
حتى اجدامه من يكبر

عمرك مافگدت الناس التحبك
چف ميزان مابات بثگل گلبك
مطر وادريها جيتك تترس الگيعان
بس هالروح ماتدناك وتشربك
بعد مالك ذچر بروح
من گام الجفن يغمض
وماريدن عذر منك
لو الغراب عنده السان هم چا گال گلبي ابيض
ولو حچي البلابل نفتهم معناه
چان اعرفنه چم چذاب بيها وماهويناها

كل هذا واگول الحگ

بعدني ابخير مادام الگلب بي دگ
ومادام النفس موجود اريد اعشگ
چنت ماخذ حذر بس انته شاطر حيل
جدم فلاح تعرف ياكتر تسحگ

عقيل العرد


هذا وجهي بساط بس لليستحون
وما استنكف لو شريف يدوسه

ليل ماكو بداخلي واجهبلي نار
لا يجملني العلكَ فانوسه

خاف ما تدري احنا وادم شايفين
نسكت وننسمع وسط الهوسة

لا نعرف المصلحة ومسح الجتاف
ولا انصادك واحد اعله فلوسه

.........
ولو ثكل وجه العزيز انخف لما
يخف كَلبه وينزع انكَاب الزعل

وخلل ماعدنا وي واحد عدنا طيب
وللاسف بكَلوبنا الطيبة الخلل

وما نخاف اجفوفنا اطوال وتلوح
لكن من حجاية يكتلنا الخجل

وكبل ما نفعل، حرف ما نحجي عيب
نخاف خاف يكول كال وما فعل

........

بكثر ما حب ماي وجهي اعطش واموت
روحي تضمى وتشرب من عيونها

والحجاية الزايدة ترخص العزيز
حجايتك عرضك استشهد دونها

روحي كاع وما تفرع للبخيل
من يبزها المطر يطلع لونها

واترك المالي نفس بيها من اجوع
وابد ما طلعها من ماعونها

..........
ما ارد جفي من اشم ريحة تعال
وما اسدها بيوم بيبان الصلح

اليجوي كَلبي اضحكله حد اخر براد
الوفا البيه مسدي منا للملح

وما يهموني اليروحون اليجون
انه وي روحي صرت كطنة وجرح

ولا يغث كَلبي اليضم عني ضواه
شعندي وي فانوسهم واني الصبح

قيس الربيعي

خاف انام و خاف تلدغني الثواني
خاف انام و خاف غيم (الكاطع)
يمد ايده وينگط اغاني
خاف اكو اغنيه فقيره تريد تتلحف بذاني
الليله اموت و خاف ماباريني ذمه يا زماني

الليله اموت وما اگلك خاف توعدني اعله جيتك وانا مابيه اتاني
الليله اموت و بالي يمك خاف من دوني تعاني
هذا كله و اعترفلك انه فد واحد اناني

الليله اموت و راح احط مفتاح صندوگ امنياتك باليالي بجنطه عازلّك حناني !
الليله اموت وفوگ جثتي تصير هوسة حصو و تدهرب قناني !

الليله اموت .. و انصلب فوگ الچتاف و عيسى لبروحك سمع بس ما حياني !
الليله اموت .. وما تجيني
و وسفه بس الچان ما يعرف شنو اسمي الليله اجاني ..

الليله اموت .. و گلبي ما راضي اعله گلبي الضيعاني ..
الليله اموت .. و تنطفي احلامي الزغيره
طفية الشمعات بطراف الصواني

الليله اموت .. وما اريد بعينك اي واحد يجي وياخذ مكاني
الليله اموت .. ويدفه گبري من حرارة هجرك بگد ما چواني !

احمد الصالحي

حطيت اديه اعله الجرح
حسبالي دم تمطر لان من عِكسي ينگط دمي
رايد يفارگني الجنت من كثر ماراكظ وراه
مفروك اصابع جدمي
تكبرون احسكم بس علي
انته وجروحي وهدمي
الواحد تعرفه من الحجي
لاكيله يم غيرك وطن...لمن يسولف رسمي

شتريد موعوزك بعد صبعين اوصلك لامي
بس والله مت من الضحك
من كتلي ضل لوحدك هوه آنه ياهو اليمي

احجيلي لوعندك ولف من گلبي مبري الذمه
احجي وراويك الزلم
موزلمه من اوكف عدل لوماطحت موزلمه

وماكال عندي ومانكر ومافتح حلكه بكلمه
بس عمي هيه المشكله تعرف شكو اباله حچي
من يسكت التفتهمه

ولمعت وطفيت الضوه منا الشارب زحمه
الماتحس يمه بدفو تاكل بصبعك من تضل بصوره واكف يمه

والرحمه من تشتم هوه مورحمه هاي التنحسب
بالراس طلقة رحمه

المهم موعيب النشد منا وجرحي اتعلم
وماثق وحلل كل وجه واخذ الزين عله الدم
واحد لواحد مايحن كاولي وجاره معمم

ومبريه ذمة كل شخص بايكني... سرحته الحرس ...لايجي انوب ملثم

الحارس اليحجيلك حلم لوحارسك مايحلم
غير انه بيتي على النهر ليش بترابه اتيمم
ماراهمين نضل سوه مانرهم ولاترهم

هذه القصيدة فاقت كل الصور لذا جائت لتلامس الارواح المتلهفة
لكم فيض من روحانية النص و روعته
عامر عاصي :


شافني
تلمّس ضواي
صعدن براسي السنين
بيض وينثّن حنين

وآنه جاهل
جاهل ، وچنّي انبگت

انته ياهو ؟
_ آني انته
انته آني ؟!!...ودنّگت .

شلت راسي
شفته ، وتلمّسته
خطواته مطر
والليل طين ....

تلفتّت ،وينك ؟
سكوت .......
وآنه وحدي
،سنطه ، أيام الفرح ، والظيم ، والحربين ، والخمسين ، والهم ، والتراچي ، وهور ناشف ، وانتظارات ، وعرس يبچي ،
ومواويل ، او وتر مگطوع ، وهموم ، وگراجات ، وجهال ،
وجوع ، وولايات ، ودموع ، وشمع ،
ومرايه ،
وانه بروحي حنين ...
يالمراية ،
البيچ هذا ،
شگد حزين...

علي الهادي آدم .... تفاحة آدم


الليل مؤمن والنجم يعبد هبل
استاحشت لوني المناير.
وانشتلت بلا امل.."

جروحي من نامن عرايه
وحيل صلفات الخناجر
جروحي ودموعي نثايه

بيا محطه اترك اثر لعيونك الحلوه وتجيني
وبيا ورد انزل ندى ويغتاضلك شوگي وحنيني

انت يااول شمس تتبده بحضان السنين
انت اول شمعه ميته بليل
جانت كلشي النگوله يمين

واعدتني بساجيه تلم عمري ماي
وفرفحت بيد الصواني
وعازف مضيعله ناي

والرساله بلايه ساعي
وسجه هاجرها القطار
وعثرت براسي الجفافي
وضحكت بوجهي الصغار

انه لو بيدي اجيلك ماي زمزم
وانهطر فوگ الثياب وافتح بزيجك بحيره

وتطفح بمايك ع حلوگ العطاشى

يا نبي تمدله بسلاله
مشتهي اطلب بيك تعبي
وماكو واحد ناكر تعيبه وحلاله.

شوگي خدران بصفنتي وباگن عيوني الدموع..؛
صارت بصدري مغاره وختلن ايات الحزن" جوه الضلوع

ياامام الوحشه روحي
تغنت باخر مواويل الحزن
وطيفك توسد منامي وگيد حدود الجفن

ارد اعيش بفي سمارك
جوه كلش ويه دمك
واختلط بحروف اسمك

بيا خريف اتعنه شجره وانثر اوراقي الحزينه
وكلي ياريح التمرني وانه ابادر
ويا مدينه هواي بيها طيور بيضه
وانه ابني عشوشها طيور المدينه

ياذنب تفاحة آدم.
شيبت روحي الملامه

وبللت جف العواچي
فزن عيون السوالف
وارتفع صوت البواچي

انت يابيرغ عراضه شوهدناك
ولملمت روحك مصلى
وهو ياهو اليعرف الله
ضاع كلمن يعرف االله

نباگت رسوم الولايه
وصارت ايد اللص مناره
وشهوه اقلام الجهل
صارت حضاره

وياحضاره..؟

كاظم اسماعيل الگاطع
.
.
تغطيت وبعدني الليله بردان
لان مو انت يمي فراشي بارد

وينك يادفو يا جمر الاحزان
احس بدمي بالشريان جامد

يامهر الصبر ماكضت عنان
نسمع بس صهيلك وين شارد

كل ساعه وتعتني جفوف بطران
وانا جلد العلي قماشه بايــد

تعال اوزن هموم وجيب ميزان
وشوف شكد عذاب الروح زايد

أنسحبوا من حياتي هواي خلان
بقيت بعزه ماني الوحدي اعاند

سواد الليل يبقى وتطفي الالوان
واعيد بذكرياتك والمشاهــد

اذا كل طير عنده ثنين جنحان
انا مكسور وعشت بجناح واحد

على بير المنايا وجيت عطشان
مجبور وشربت الماي راكد

وينك يالبعيد الكلب مليان
غنا و بوسات ودمــوع وقصايد

وياك بعشرتي ياليل خسران
مثل عشرة النار وي الكواغد

لو طاهر حليبه الدهر ماخان
ضربني براسي غفله واني كاعد

عبد الوهاب الحمداني

انجيل النده

ورة عيونك
ذابلة عيون المدينة...بلايا ناس
وذابل وياها ..الورد والگاع
وشطوط السوالف والنعاس

يل خذيت وياك رب الماي
وانجيل النده
ودين الگناطر
شلون الوحك
رب المشابگ بديك
وانته كافر

شلون اجيك ..ودربي شوك
وعگلي حافي
وگلبي ماكلته الضنون
بلا ضوه عيونك
نعاس وكلشي غافي

يا توالية ذنب قابيل
ما من عنده توبه
وياطواري سوالفك ليل الحصار
العثر الوادم هذيج
بلايا حوبه

حيل ويه جروحي
عذبني برضاتك
حط ملح روحك عليهن
واستر ذنوبي بعباتك

انت يا اول ضريح
ذنوبي تكثر من اطوفك
لاهي حاجت عين
مفطومه عله شوفك
ولاهي رغبة عشگ
يستاهل چفوفك

ولا انتَ ابالي
واگول النيه بيضه
ولا انتَ الراكب
عنان الطيش حتى اگدر اعوفك
مدري ياهو النزلك
يم گبري جرحي
وانته اول واحد العندك
عنب يترس طيوفك

مالي حيلك
ريح تسودن رماد جروحي
مايحمل عصفها
طشرتني وعلمتني ..الشوگ مثل الريح
مانندل وصفها

الشوگ ياخذني دوه ل اخر نزيف
وارجع حجايه ذليله بغير دم
والگه صوتك يستحي يكشف گذلته
وينشتل بالروح هم
وتكبر ولايات جرحي
وما عرف يمك ملامه ولاندم

وانتشيك الخوف ياخذني
واجيك بلهفة ام
وتلتف عله الروح صفصافة حزن
والعين غرگانه هظم

وامتحن يم باب عينك من يمر رمشك سؤال
واشتهي النسمه التغني
زلوفك بطاري شتال
ياتنين النعمه مابيه دلال

مالي حيل الشوگ ياخذني
وارد بلا حبيب
مالي حيل الناس
من تشوفني تگلي غريب

سچة العشاگ مابيها وداع
وحصة العاشگ چفن كونك شجاع
انته ماتندل جميل

ومن تغني تنام بزلوفك بثينه
ولاعثر قيس عل سجه
وياك يم ريل المدينه
شلون مدري شلون
خاويت النده وسولفت بينه..

بهاء سوادي


لو تگف تسأل على احبابك
بَعيد الفَـرح عنْهم ..
ماتشهگه انفاس ..

ماتدري الخمر مجنـون؟
لو جاس الگلب..
ينفي الاماني ،
الذكريات،
الناس..،

يصعدنا سِكر
يلعب لعب بالراس ،

يلتف عالظّـنون
يبوسهن
تدري السكر وهـواس ..
يشبگنا،
يغنّينـا ،
بكل خفگة رمش للگاع يچفينا
ولك مجنـون...،

لو جاس الگلب..
يمشي الگلب لبعيد،
وهمومه اليتيمه تزيد..

وانت وي البُعد ..معگود!

لو صارت صدگ
واخر محطاتك تجينه ..
يلتم العـراق
بحزنه ،
وتـرابه ،
واغانيّه الحنينه..

يبوس گبرك يابه ،
ويشتعل بترابه..

علي رسام


بين أمس ،

-- واليوم ضايع

وادري باچر هم اضيع

چن جنح فراشة تايه
بين الوان الربيع !

ظعت من يوم الولادة
بيوم ميلادي الفضيع

وأمي سمتني بوكتها
الشايب ؛ الحجي ؛ الرضيع

دورت كل القصائد

دورت بحر السريع

ولا لگيت الروح مرة
وگلت خليها تضيع

چي فگدت أنسان احبه

وطحت ،

بعيونه صريع

ضيعت روحي بمحبته

وضيعت حتى الجميع

.............

قاسم والي

||سلالة الخوف||

حُمِّلْتُ ما لا أستطيعُ تَحَمُّلَهْ
فرميتُ أجوبتي بوجهِ الأسئلة ْْ
ورفعتُ رأسي بعدما... أنهتْ
مهمــّـتها عليهِ المقصلة ْ
لمْ تُكملِ الآياتِ حنجرتي
فقدْ ماتتْ على شفتيَّ باءُ البسملة

أنا سيرة ٌ للموتِ
والميلادِ
سلسـلةٌ تكبِّلُّ سلسـلة ْ
أنا حيرة ُ الآتين ...والماضين
معضلتي بأنّيَ معضلة ْ
آمنتُ أنَّ دمـاءَ أسلافي بأوردتي
بداية ُ مشكلة ْ
وعرفتُ أنَّ سلالة ً للخوفِ
تستدعي النصيرَ ...لتخذلَهْ

أنا آخرُ الخيباتِ
والنكباتِ
والقصصِ القصـــــــارِ المهملة ْ
لا أملكُ التفصــــــــــــيلَ
في سفرِ الحروبِ الآتياتِ لأُجملهْ
فليفرح الناجونَ في وطني
لأنَّ الموتَ أبدلَ منـجلهْ
في كلِّ يومٍ
نبصرُ الحجّاجَ

والشـــمرَ اللعينَ...وحرملة ْ
نروي مقاتلـَنا
إذا نروي الحســينَ بكربلاءَ
ومقتلهْ
نبكي علينا ..حينَ نبكيـــهِِ
فتذرفنا العيونُ المُمْحلة ْ
راودتُ مأساتي ..لأمنحـها الدموع
فغازلتني المهزلة ْ
غادرتُ روحَ النصِّ

حينَ ترنَّحَ المعنـى بـبابِ القلقلة ْ
أنا أكسرُ المعيارَ
والنقـّادُ يحتطــبون
ليلَ الأمثلة ْ
ربّاه .. ليت القلبَ يقبلُ صيغة ً للشــوكِ
مثلَ قرنفلة ْ
منْ لي بمنْ يمحو مراحلَ تيهيَ الأولى
لأبدأَ مرحـــــــلة ْ
أخشى إذا أنهيتُ سيل تدفقي هذا

سأصــبحُ قنبلة ْ
ويعودُ رأسي بعدما قطعوهُ مُستاءً
ليـحملَ أرجله ْ..

من بغداد الحزن وكبيرها... عامر عاصي

||رسالة الى سجين ||


فک حزنک یطیرن زرازیر
واگذل شگر بحدادها اتغیر
وگص الگمر گص التصاویر
ودگه اعله شباچ ابسامیر
احلام والماصایر ایصیر
*
وتعنه للبسکوت بسکوت
وشِر النهار وچفّن الموت
تابوت حطه ابطن تابوت
کافی المگابر ترضع ابیوت
ودلوَک ظلام وشمسک ابیّر
*
ذب للشمس بلبیر سنهه
وگوم احرگ الروح ابتتنهه
روحک چذب فکّت حزنهه
شالت اللیل وطاح منهه
وصبّح عله اوجوه النواطیر
*
واللیل مرکب حمّل انجوم
مرکب جهل یتنطر اغیوم
وغیمت عید ومطرت اهدوم
وبیوتنه الغاد امن الهموم
صامت عله اوذان المفاطیر
*
ازغار چنه ابلا مراجیح

ازغار چنه انگوم ونطیح
وصبیان نغزل گذلة الریح
ولو مرت من اسطوحنه اتصیح
ضحکاتهم سلّت عصافیر

مشاركة من شاعر أهل البيت ع عقيل الكاظمي

مرسم رقية
-----
رِسْمَت سيف..
رِسْمَت معركة و رايات..
تدور بمشتهات الطيف
طف وطيف
نصر محتوم..
مو مشهد..

على ارمال القدر مرسوم
حسّت بل خليل الچان..
يسلّيهه ، اويراقبهه..
بِهَت لونه
رُفعت راسهه ، وشافت..
قنديل السمه السهران..
طاحت من ضوا ، دمعه..
طفّت للحلم ، شمعه..
اوْلَنْهه بحضن خوف اظلم..

بس اشباح..
و عْيون الخيانه التلمع من بعيد..
و صفنة بيد..
و ريحة دم
نِسَت چان القلم كِسرة..
من ضلوع المخيم..
والمرسم..
رماد گلوب..
اوّصلة ثوب..

ظلت من حرير الله..
اليمحي للبرايا ذنوب
و رجعَتْ ترسم الصورة..
عكس ما چان..
بي تتمنّه تطفي الآه..
اوتسعِد بل وهم ظنهه
خرير نحور..
اوسِمَه تنزِف نجم و بدور..
اوسَلْب خدور..
وحْبال الظلام امچتفات النور..
ابْضَعَن مأسور
وسِرِب أيتام..
ويتيمة ، تناطر المفگود..
وتدري الراح ابد ميعود..
بس ما تدري من بعده..
غريبه تموت بارض الشام
-------------

حسن عاشور

(ریحة رمضان)

هالسنه اسواجینه گبل الناس صامت
هالسنه ابنیات شعري
من اجل تتسحر گبل رمضان گامت

هالسنه جارتنه ام افلان ماتگدر
تجیبلنه حلاوة نذر...
مو للأبد نامت

چانت اتوزع ابکل رمضان
ذکر الجار... والفقره ..وعطر رمضان..
وصواني النذور
بعد ماتگدر تجیبلنه خبز دافی
وشي کاست محنه للفطور

بعد ماتگدر عبایتهه تدگ بیباننه
وریحة عبایتهه ابمحلتنه تدوّر

هالسنه الاولاد کبرو
بویه بیش الناس عالحر والعطش والجوع صبرو

یبني رمضان الفقیر
اصماطه مفروش ابنفوس الناس وصماطه چبیر

یبنی باوع
یبنی رمضان الفقیر بکلشي قانع
لأن صفناته لذیذه
وتسمع ابلذة دعاءه من الجوامع

یبنی والصایم یبدل ارویحته المن عدهه شابع
روحه چن مو ذیچ روحه
چنهه روح اجدیده روحه ونازله من السمه السابع

یسمع القرآن عاشگ
ساعه راکع،... ساعه ساجد
تربه تتبلل وریحتهه تعط ابجفن ناگع

هالسنه برمضان مو موجوده کثره من اهلنه وکثره من احبابنه
ورائحة رمضان فاحت حیل وجابتهم ودگو بابنه

هالسنه برمضان نبض السوگ فاتر
والشبابیچ اعله حر الوکت....
ملت من کثر تنخه الستایر
یامه من بعد الفطور اتمرمر ابصفنات شاعر
والگه شاعر چنه آنه
چنه آنه وتایه بحزن الگهاوي
وترجمت صفناته نار النارگیله والجگایر

عزيز عسكر

الليله مو مثل الليالي..
قلق ماصافي اعله راي
الليله بس انت اعله بالي..
والثلج ينزل على الشباك وعيوني غريبه..
تجي ليله من الليالي بكل حزنها تجيب ضحكات الحبيبه..

تجيب وجه امي وضياعي..
والمهم والماله داعي..
الليله مو مثل الليالي..

شطوله ليل الغربه يمه يعذب بروحي العليله.
اه ياذلة هواكم شاكي منه ومشتكيله

ياهواكم ياعشككم تارس عيوني وغرفتي
شايل الوحشه وقلقها وعابر الدمعه وغربتي..
طيف ويدور بخيالي
الليله مو مثل الليالي
الليله جانت شاطي واعياد وكمر.
جانت ويه الروح ختيلان تلعب بالمطر
جانت بحبكم مشاعر دافيه
جانت اطفال وفراش وعافيه..
نهر من جرفينه خالي..
الليله مو مثل الليالي..

اكو نجمة تفرح عيون الشوارع والمحلة
واكو طير بعشه مثلي يموت لومر طاري دجلة
وانه وانت

نموت سكته
غالي ومضيعله غالي..
الليله بس انت اعله بالي..

كاظم الگاطع


محسوبه من العمر كل ليله نكظيهه
ومحسوبه من الدرب كل خطوه نمشيهه

ايامنه الي تمر
رحله بقطار العمر
سفره ابمرابع خضر
شتريد سميهه

لونوكف بنص درب الدنيا تبقى تدور
المي صعد للجرف والفخر للناعور

دور صديق الوفي ومشي بدرب بيه نور
وعينك على صاحبك يغفى تظل ناطور

يالماشي بهالدرب وانت على ناسك ضيف
يراد معشر حلو لمة احباب وكيف

ولوشفت برد الشته ولسعة ضهاري الصيف
صبرك وهي تنجلي وتصير ذكرى وطيف

ايامنه الي تمر
رحله بقطار العمر
سفره بمرابع خضر
شتريد سميها

قصيدة للشاعرة ..لميعة عباس عمارة

ارد اسألك
وبحسن نيه محلفك بالله ترد
ربك بيوم الصوّرك
جم يوم طينك نگعه بماي الورد

وارد اسألك
هذا الحرير الشايله تاج على راسك هل جعد
جم واحد اتمنى على صدره تنثره
ويدثّره ليل البرد

وارد اسألك
ليش الگمر من سهر بعيونك على اهداب السعد..
يتمايل وتتمايل الدنيا على شفافك غزل
بس من بعد

حته الله ما يغفرلك بيوم القيامه
تحاسبك روحك على سنين الزهد

مَ انت بشر ..مالك نفس مثل البشر
مالَك جلد

يل كلك احساس ومحبه..روح واحساس وشعر
حبّبت للناس المحبه.. وما تحب
وين الصدگ؟
تتباهى بس..وتنحسد

ياجنة الفردوس يلما بيج عيب الاّ الطرد

سعود الخفاجي

رايحين شعدنا نبچي
الوادم تذم الدموع المالحة

ورايحين الدنيا ضحكه
وسالفه
وهم رايحه
وخاف باچر مانمر ابابكم
ولا نحن يوم ونشم اترابكم
احنه بعنا بيوتنا
من البارحة

حظرينا اهدومنا وباچر نشيل
ويادمعنا الما تلمه هدومنه
گمنا علبيبان نتوازه ونميل
وبجرحنا اليدري ليش يلومنه

وخاف غلطه وتعتنينا طيوفكم
عيون ماعدنا بعد ونشوفكم

ولاخلگ نسمع سوالف جارحه

رايحين شعدنا نبچي الوادم
تذم الدموع المالحة

رايحين ومدري وين ويا قطار
باچر يفك بابه من يشوفنه
وخاف ينسه ويلتهي ويعمه النهار
وحاله حال الضيعونه يعوفنه
ونبقه مدري ويالمحطة شلونه
واحنه غربه وضيعتنه عيونه

انجوم چنه وبسماكم سارحه

رايحين شعدنا نبچي
الوادم
تذم الدموع المالحة ...

عقيل العرد ...



مو مهم عندي بعد
تنكر الطيب وياي

من البداية جنت
تمطر بكَلبي جمر
وامطر بكلبك ماي

وشلتك وشالة ندى
وعفت النهر جواي

وما جنت اظن للحقد
يوصل خلاف الراي

وياك ما قصرت
وابقى انه صاحب فضل
ما عفتك بعازة

وزارع بكاعك وفه
حتى بوفه اتجازه

ومن شفتك اتغيرت
قويت كَلبي وكَمت
غطيت وجهك مثل... ماغطي الجنازة

اليوم كًلبي رجف
ردتك ترد الهلا
مو ترد من ملكاي

انه من اسلم شمس
ما جيت من شجرتك
رايد لتعبي فياي

من درت ظهرك عَلي
جنت اني كلش جاي

المهم يا صاحبي
مجبور اسد الملف

طين البچفي خلص

وخدودك انت هواي