#جرح_سبايكر

عامر عاصي


-عراريس النهر -
يا نهر ذبني عله الجرف ناي
وبهداي جيس الروح بهداي
سولفلي أدري جروحك هواي
ودمهم حرير ويجرح الماي
...........
يا نهر ذبني عله الجرف عين
بعيونهم تقره العناوين
يا نهر حلّفتك بالحسين
من موتهم ، هم استحه الطين ؟
......
توّه الدمع والموت ، توّه
والعاش گوّه ، يموت گوّه
يا نهر شوف آدم شسوه
يمطر جثث بچفوف حوّا
......
يا نهر يا گبر النواميس
ابليس راح وخلف ابليس
والروج ظل يكنس عراريس
ونذور وشموع وفوانيس
......
يا نهر دم ودموع صاير
وچنّك بالولايات حاير
خجلان ؟ شتگل للمناير؟
الشبان بمتونك ضفاير
........
بس يا نهر لا تغسل الدم
كل روجة من روجاتك بهم
ليشيل من ماي الجرف صم
يقره الأسامي وموت يِشتَم
........
يا نهر بالعباس احلفك
لاويتهم ؟ لو مال چفّك ؟
أحمر على الشطين زلفك ،
دم ، لو نِشَغ بالطين جرفك ؟
........
بس يا نهر طينك عماهم
وبرياگهم وذّن ظماهم
أدري النخل يشرب دماهم
وتنوح برحيّة بسماهم
......
طير اعله متن الريح نَصّه
ورف من لِمَح بالماي گِصّه
صااااح .. .. (النهر شبّان نِصّه
كون الگصب حيّه وتگرصه)

صار النهر حيّه وتمد ناب
تروي الشواطي بدمعة احباب
غِيّاب .. چنهم موش غياب
شو چن أديهم دگّت الباب

نام الولد ، والشوگ ما نام
والريح تعوي ومالها لجام
يا طيف يبن ثمنطعش عام
تبچي الصور وتبلل الجام
......
مر يا بلم بالليل جنّاز
بتابوت روجك لمهم الماز
معتاز ، ون الليل ، معتاز
والروج شايل ريحة اعزاز

عاش مُقعدا ومات شهيدا ..الشاعر

حسن الشيخ هادي


من حضن امي.. كبل للكرسي اجيت
ما سمعت ال (فدوه لله) ويمشي كام
اتكسرن خطواتي واحساسي بصباي
الكاع صخره..وجانت الخطوات جام
وسجلوني بصف الاول..واستحيت

الروح احسها تفرفح من اسمع قياام
وابجي كل رفعة علم يوم الخميس
فشله اكعد..والعلم بالساحه كام
بالمرايا امنيتي اشوفن طولي يوم
سنين اباوع طولي بفراشي من انام
وأملوني..اباجر واصبر بقيت
وباجر أتأخر.....واجن عشرين عام
كبرنه....والايام تمشي ,,وما مشيت
وانه والكرسي عشت قصة غرام

وجانت دموعي ..بثكل حسرات ابوي
لو حضر خطبة بنات من العمام
ياهو يرضه بطير مكسور الجناح؟؟؟
والسمه كبال ايده غصت بالحمام
الدمعه سوده من الحزن عالخد تطيح
المادره بحزني يضن بخدودي شام
جفوف اديه استهلكت من الدعاء
وضلت لهذا الوكت رجليه خام
ربي..كعد حظي حتى اكدر اكوم
ربي بس كطرة ضوه لحلك الظلام
وافرح ابدلة عرس مثل البنات
صارت الحسرات بالرية ازدحام
خطوه وحده...امنيتي امشي..بأي طريق
حتى لو للمكبره لوادي السلام

...

كاظم الرويعي..


هوايه وادم سولفتلي
وماصحيت من السوالف
طفل كلبي
ويه كل ضحكه يوالف
وانت لعيوني ضواها
ومايها .. وفيها .. وهواها
وحبنه چلمه أتدور مابين الشفايف
اهوايه وادم سولفتلي
وماصحيت من السوالف
ايجفل الهجران روحي
وتغسل الحنه بدمعها
وتنفرش جنحين يالدربك بعيد
وتنذر الجيتك شمعها
آخ روحي ...
بيهه عشگ الجرح للسيف
وأنته .. لسه ماتحزر طبعها
وسايرت طبعك .. على المر والحلاه
وسايرت طبعك .. على فرحه وضناه
وأغلگت كل باب .. بوجوه العواذل
وأنطرت ملكاك .. يالجيتك هلاهل
وعمر وأتوسد مكاتيبك يغالي
وذابت بكاسي الليالي
ومانگل شباجنه ريحة زلوفك
وبين اشوفك .. ما اشوفك
آنه خايف ..!!

(قصيدة شجرة الحب )
ترى النور لأول مره

الراحل كاظم الرويعي


ياحلم عشرين عام
اگبالي يقضه
يرش طريق العشك فضّه
يهزر العاگول عن دربي و يرضّه
يترس كتاب المحبه .. ومضه ومضه
يبني شجرة جارنه الغطت سطحنه
ابتسمت النه وعلگت شمعة فرحنه
وطاب يوحيّد جرحنه

يبني .. يبني
اشتكفي هلهوله اطشهه ابدرب حبك؟
اشتكفي صينيه ورگ نومي اعله دربك؟
انه كل الگاع متلمني ابمحبتك
يالخطبتك .. اغله من كل الهلاهل

وضوه من نور المشاعل
يبني واربعطعش بسته ابگاع دارك
شويه لو گتلك
مبارك
اشويه من يضحك ظلام الليل
ويغني نهارك
يبني .. يبني
شوف مشحوف السعاده وين ذبني
بجنة الحب الزهيه
و حِشت من شجرة محبتكم بديه
يبني واطيور العشگ حامت عليه
تگلي اعجني الحنه لچفوف الشباب
اتكلي عالجنه انفتح بالخطبه باب
وماتت ايام العذاب...

شوف شجرة جارنه الغطت سطحنه
واعلگت شمعة فرحنه
يا حلم عشرين عام اگبالي يقظه
ايرش طريق العشگ فضه
يترس كتاب المحبه .. ومضه ومضه

علي هادي ...

..
انشدك هم يمرك ليل ؟
هم تصفن .
هم تخنگهة خنگة موت هم ترفس بصدرك صوت
هم تحبسهه هم تون .

انشدك يا شريك اعضاي گلبك نط ؟
هم اتهج توالي الليل ويلحگوك چي دمعك بكل ممشاك راسم خط ؟
ومن يلگوك يلگون بمچانك شط .؟

انشدك هم تحس بيه ؟
هم تشتاگ مثل النوگ لو تشتاگلي شوية ؟
انشدك تنشد اعليه ؟

انشدك هم تنيم الليل وبحضنك تلوليلة .
هم يشكيلك شما بيه ؟
وتواسيه ؟
وتطيب خاطره بنجمات واتداريه .
وتعض لسانك من اتموت خاف بغصة تشكيله ؟
هم عن حبنه تحچيله .

لو تسكت
وشما بيك تدثر بالعمة وتغمت .
وترد وظنونك بطولك وعيونك نظرهة اتكت .
وتزاعل حته المخليك عايش وبقهر تنفت .
انشدك مثلي هم تسكت .

هم وكتك يدور اعليك چن رحة .
هم تستاهد الضحچات وتشوف العمر شحه .

انشدك بالنشد ايوب هم رافگت نجم اسهيل .؟
لو سلوة اجدادك هاي تكمخ العاشگك بالويل .
انشدك والنشد يوجع .
وارد وانشد يبعد اني واكلك هم يمرك ليل .؟

حسين المحسن

خروج عن النص

تمشي بولاية قديمه
تفكر بعيشة جهالك وانت بعدك لسه جاهل
تفتر بسوك الحماميل العتيج
بلكت الله بنادم يدورله عامل ..
ايدك تمدها اعله جيبك تلكه خرده
تبتسم فرحان كلش
بلكت يكفن جكاير
تلكه خرده مشككات تكول رجلك توصل الدكان خايف
خاف ابو الدكان عكره ويرفض الخرده العتيجه
وتالي فشله تحسبك الوادم ذليل وانت
شاعر

تخزر السبعه بحسرتك
تحمد الله وتمشي سكته
تبدي بطنك تنطبك حيل اعله ظهرك
وانت سكته
شلون بله
اهنا يربي الجوع يكتل
تنخه الله وتمشي سكته
اي يربي هذا مخبز بلكت الله يبدل الخبزة
بقصيده
عامل المخبز خبيث الخبزة يشمرها بحقاره
كوه تصبر تنبط عروكك مغثه
جنه يشمر شيله امك
اباب مخبزهم قفص شايل بلابل
يبتدي بروحك تساؤل
شلون يقبلها القصيده وهو ساجنله بقفص
حفنة مشاعر
تأبى نفسك... ترفض تبيع القصيده
تبقه جايع
تبقه ضايع
انت شاعر..

باسم الخاقاني


بسم الشعب .. جاع الشعب
بسم الشعب .. ضاعت جناسي اركابنه و مات الشعب
ويلاه و.. الويلاه معزوفة وطن
واغنية امي ...
ويلاه ضيعت الصبح والليل مد جفه اعله دمي..
انا شعب باكوا ضواه وغربوا ..
وسدوا شبابيج العتب
يا ما صحت .. واتظاهرت .. واستنكرت
يابرلمان الله جعت .. يامرجعيتنا متت
ياقائد الثورة اعتزل.. ياثورة ما تهوى الخبز
جاع الشعب ..وانت بصلاتك طولت
علمني باوكات الخبز
فهمني بالسنبل وطن ..
فهمني .. دوخني الحرز..انا الشعب وحشد الشعب.. وشعر الشعب مني
انه العشك.. وانه الصبر..وانه امنيات المعركه
وشاهد على عيوني شمس
تباوسني ونزيح المسه وعالساتر نغني
ياشمس ياحلوة ياصفرة حرب
يا شمس ياحلوة ياحمرة من دم الحرب
ياشمس ياسمرة كلب ..
نيشان لو جدمي عثر وانباك من حدره الدرب..
هذا انا هم اسمر كلب..
بس غيراني الدم
بسطالمن هذا الجزه وداس اعله بستان الكلب
ياحلوة احزنيني
بس الله وحروف الخبز وعيونج الحلوة عرف..
و همه وخلافتهم غرب..
هم وخلافتهم جذب...
يا حلوة غنيني دمع
بسم الشعب
ويلاه ، والويلاه عالتابوت خدرت
ويلاه ، و بنية المكتول كبرت
كالوا يجي وعالبين صبرت
ودمعتهه عالشفتين عبرت
هلبت يجي .. هلبت يرد لاهله الشعب

(القيامة ) عريان السيد خلف💚🍃

اسِتْمٌتْْعوَوَ💚🍃

الحيطان منخل والدروب حفور

والبيبان صرخه بلا صدى ولاصوت

صفنة گمبره بوحشة مسية گبور

ووجوه الزغار الحاضنه الشباچ

باگة ورد ذابل بالحزن معصور

والنظرة متاهه وخوف يرضع خوف

من يهتز قفل حسبالهم شاجور

من يهتز قفل حتى الطيور تطير

مرعوبة جنح وبلا وعيها تدور

ماظل لاملاذ يلوذ بيه الخوف

بس حسرة مرارة بحشرجة مصدور

قامت والجراد اسراب تتلى اسراب

من تسكن الريح يعشعش المنذور

قامت والمناير تختل ويه الناس

وتخاوي الرصاصة الصگر والعصفور

قامت والبشر مو بشر غابة زور

يحصدهه العصف ويلوچها التنور

حتى الماي ورث والتوى الصفصاف

شاحب والنهر من كثر غيضه يفور

والموت بصلافه يدگ على البيبان

ويوزع عليهه السدر والكافور

قامت والدقايق ترضع من الموت

كل لحظة بطبگ كل ثانية بعاشور

هنا دفتر كتابة ...هنا حمامة بيت

هنا وصلة جديله بچف طفل مبتور

هنا تربة صلاة والدم عليها هلال

هنا مصحف جلالة من العصف منشور

هنا صرخة نثايه تشتت بالريح

على جثه تململ من چلب مسعور

قامت والمناية تدور فوگ الروس

صفنت رحى الگاع ورحى الموت تدور

قامت من دخيلك ياعلي الكرار

مو هاي القيامة المن بعد مذخور

اقدم لكم
الرائع الشفاف الشاعر لطيـف العامــري

وقصيدة(ذكريـــــــــات)
....................

أصبع أصبع جان جفك جاي
وآنه بروحي شوغه
وباب سجني يخاف من خيط الضوه يوصله ألي
شلون وصّل جفك الجايبلي صوغه؟!!
وآنه أشوف بجفك أحلامي القديمه........
ذيج أحلام الطفوله....
وحسرة الثوب الجديد
ودمعة العيديه باول يوم عيد
العيد عدنه.......
مو مثل وجهك حلو
عدنه مرجاحة العيد خدود ثكلى
واللي يتمرجح دمع.........
وشفت جفك....
هاكثر جفك جميل
جنه كل اصبع نبع..
والعطش بينه.
شلون اسولفلك على سنين العطش؟؟؟
الهور زنجـــــــــــر.....
والنهر نشفت لهاته......
والملح مابيه دغش
وانت يل جفك قضية...
شلون اورقلك همومي.......
ورقه ورقه
وليل ليل....
وحيره بل جفك شباب
تعافه من ماشاف حيل
يصافح حرورة شبابه.....
شلون لو جفك يمر مطلع قصيده......
شلون أكملهه شعر.....!!!!!!!
وأقراهه لليردون شعري...
شلون أوصل للأريده!؟
وأنت جفك مره لو يخطف علينه
يعيّد الماشاف عيده..
ولاتكلي البيت عيده......
آنه جاي أنزف همومي وحبري دمي
آنه مو بطران جاي أكتب قصيدة....
جفك مرايه شفت بيهه حياتي..وذكرياتي
وآنه هم شلون أحمل ذكريات!!!
كلهه خاكي تكول ساحة عرضات
تبتدي بفرضة وشعيره
وتنتهي بأرض الحرام
شويه خل أخدر على شباج جفك
آنه أحس جفك إمام
شويه خل استغفر ذنوبي بحضرتك ملت الغربان روحي
خل يحط مره الحمام...
وكافي أسمع (ياحسافه)
شويه من (حن وآنه أحن)ضوكني شهكه..
روحي ملت راشديات الحكومه..
شويه مد جفك عليه
أشبكني
وعيونك اموت
بدفو الشبكه
وعيونك
أموت بدفو الشبكه ..........

محسن الخياط




برد لولاك سن منجل گصيدي

ولاخيط الشمس حزم جديدي

ياول من تدور ايده اعله ايدي

طرت بيك وي كل طابع بريدي

انا الماتيهت تيه رشيدي

يوگفة كاغدي وطيحة حديدي

يموتي واربعيني ...ويوم عيدي

يمفتاح القفل زنجيل قيدي

عقيل العرد


ما ادري باجر ضحك
ما ادري باجر بجي

وياروحي راح الصبح
مو وكته هذا الحجي

خليني عش مختلي
وفوك الغصن منتجي

ياروحي ضاع الحجي

وضاعت مواعيدي

حنيت باب الكَلب

بلكت يمر عيدي

والعيد مامر عليَ

وهلالي ترس ايدي

ياروحي دربج تعب

والناس بطرانه

(والعشك) طيرة حزن

مالاكي بستانه

واهل العشك مكبرة

شي ودعونه بدمع

وشي صبرونه بشمع

وشي ماتوا ويانه
,,,,,,,,,,,,

من اروع قصائد الشعر الشعبي
قصيدة (عيون جاهل) :


عامر عاصي
......

سحگت الليل وهمت وحدي..وعليش تهيم وحدك
سحگت الليل كله وما لگيت احد

واجيت براي
وتعبت الجفن واحد...والاحلام هواي

حلم ابيض...حلم احمر....حلم اسود
وحسبت هموم سَفره لأمس جان ابعد

شيردني لأمس يا برد يا حراس
القطار ينوح بضلوعي
جرح يغفه وجرح يوعي
وعرفني الياس
وشبگ روحي بحنين من الجرح للراس
لگيت الناس
شفت هواي ناس وما لگيت الناس

ترد وياي ...تعبت الجفن واحد والاحلام هواي
ترد ابعد....
شيردني لأمس يا ليل يا چرغد
سحگت الليل كله وما لگيت احد

ومن ذبني القطار وهمت چان غروب
شفت شامات چفك عله خدود البوب
وشفت گطرات ليل يطيحن بصفي
وشلت گطرة ضلام ونامت بچفي
ودفت گطرة....وعفت گطرة
ويصب الليل فوگ بيوتكم مطره

انه المتعوب ادگ يا باب
كل البوب تنسه ويرجع المحبوب
ادگ يا باب يصحه السيسبان وترف بيه ذنوب
ادگ يا باب ...صار تراب
ادگ يا باب ما ينسد
شيريد الجهل يا باب يا معضد
عرفت البوب كلهه وما عرفني احد

وبعد شامه..وبعد ليل...ورفيف التوت
رسمت عيونكم بأول محطه تفوت
شفت ضحكاتكم ثالث محطه تفوت
علگت الصور تاسع محطه تفوت
وبأخر محطه شفت ماكو بيوت
صحت؟چا وين اهلنه
وصرت گطرة بليل
چا وينه الحلم والمن رضينه نموت
الياحد يا نزف يا صوت يا مرود
اصيح الليل كله وما لگينه احد

وصرخ بيه الضلام تشوف..؟...لا ما اشوف
امشي وبالدرب عثره وبراعم خوف

وينگط متاعي سنين
ذكرت اول عبايه تعثرت بيهه وشبگني الطين

بعد ما اشوف!!
من عيني لسواد الليل كل اجفوف

واديه عيون جاهل غصت بنجمه!!
احن لأول عبايه اتعثرت بيهه وصحت يمه!

انه الضايع ...ضفرت الطين كله زلوف
الم دموعكم من عتبة الجامع!!!

الم صفصاف ليل اتوسل الشارع
ويگلي اتشوف ،؟.....

(هيالة الغبشة)

سيد سعيد الشريفي

من باقي العمر نص ساعة
خلي أنبوگ
خل نشوة عشگنه أطوف
عله راگ ألگمر هألليله معزومين
أنه وياك، وعيون ألنهر، و الليل والمشحوف !
عله حبنه ألعفيف ألگصب ضل ناطور ؟!
ألليله أرد أضيعن بيكـ
بعيونك سمه
وبعيونى سرب أطيور !!

ياحلقة وصل بين الگمر و الگاع
مد روحكـ بحر مديت روحي أشراع !

نجمات الفرح تتلامض أمنبعيد
تنثر فوگنه بكل صوب جنه وكرنفال وعيد

حبـيـبيـن أعله جرف الليل نتمشه
خل نلحگ گمرنهأنخاف
ينصاد بشبچ هيالة ألغبشه ؟!

لاتصفن..
يبوگ الليل من راگ الزلف لگاح للنسمات ؟؟

لا تصفن..
خذانه ألموج لحضان ألصبح
وحنه بعدنه بأول الچلمات !!

قصيدة الشاعر بهاء سوادي

(نشرت سابقا باسم عامر عاصي للاشتباه )



جالت كل صحاري الروح
ميّاله بگصيبتها..

تصفن عيـن
ترمش عيـن..

تتبده محاسنها اعلى گذلتـها..

"طاحت ناي"
يعزفها هَفيف الريـح

تتمشى
على حروف الشِعر ومضه
وقصيده اتطيـح..

"طاحت ماي"
تتغنى بضمى الصحره..

طاحت ناي،
يعزف والكِحل نبـره..

تصفن عيـن
ترمش عيـن..

يلتم كل سواد الليل بالشامه
وتِهل گمره...

مرّت عالحزن بالروح
حفنه اجروح
تتـشذّر بلچمتها..

تضحك عين..؟
تفتح للربيع ابواب ضحكتها

تِدمَع عين؟
تتبده قصايدنا اعلى گذلتـها...

عريان السيد خلف

جية العيد

يناهي الشوك ذمٌـه وذات من ذات
وفرق مابين حالي وحالك بْعيــــد
سنه وصدٌك يِضَـوك الروح لوعات
ويجَملٌي الجروح جروح ويزيــــــد
أبات بحضن صبري إليال ويباتْ
جرح يصحى وجرح متغصٌب يْهيد
وأكًًول إشوالف السرحان للشــاة
عْلى سـجٌه وكًاوداه الإيـد بالإيـــد

إلك جـانت ياحلو الطول جيـات
عجب تبخل علينا بْجيٌـة العيـــــد


تنينه وأملينه جْفونـٌه بْطيفْ
وصبرنا وصبـٌرينه الآه بـــــالآه
وتحسفنه الحســافه وحيف عالحيـف
عله إسواجي الدموع الـ مالهن جـــــاه
وعرفنه وعود حبك غيم بالصيف
المحل وين المطر بالصيف يلكاه؟
إشيصير عْلى الترف لو ينحسب ضيف
عْلى غفله وعيد وصل الزين محــــلاه؟
أنه بْعازة الموت وحاجبك ســيف
وأمــوت بْغير صدٌة غيض ماريـــد

إلك جانت ياحلو الطول جيـٌات
عجب تبخل علينه بْجيٌـة العيـــد


أحن لمسامرك والكًاك شلكًاك
شَرِي المعشر حلاوة شــوك مابيــــك
يمر صيفك صبر واتنَطٌر شـْتــاك
تبيعك عزتـٌــك وبذلـٌـتي أشريـــك
تراك ويه النفس يلماتجي أشراك
وبالدم الـ يدور تدور أحس بيك
يابو الروح عْلى روح إهواك شلهــاك
وإهي بْعيـن الشفاكًـه إليال تِربيــك
أبد ما سامرتها الآه لولاكْ
ولا جـان إعله دربك لاويــه الجيـــد

إلك جانت ياحلو الطول جيـٌات
عجب تبخل علينه بْجيٌـة العيـــد


أنه ولا كًـول عنـٌك غير معذور
ولَو ماظَلْ عذر للروح ينكًــــال
لـَجَنْ ون الـ يساهر ليل معـذور
ألم لو من وكت لو من ولف شــــال
وانه بْحالي عْلى صبرك حال مزهــور
صبر ومكابر المحتـــام جَتـــٌال
إلك عمري عْلى زين وشين منذور
ولَو من السنيــن إوشال ما ظـــال
لـَـجَنْ يبقى الجفن للطيف مسمور
ويظل راجد عليها النوم ترجيــــد

إلك جانت ياحلو الطول جيـٌات
عجب تبخل علينا بْجيٌـة العيـــد

محسن الخياط .....


ملح روحي وشربهه الليل والمامش شرب طيفه
ومشيت وكلبي وصله هنا
وصله بحد سواليفه
العمر جربة نخل وبشوج واكف وبطرك ليفه
وتلمست العدو من السيف ...
جيه بيه انكسر سيفه
يريد ايضوكني الزنجار حسباله الذهب زيفه
وكفت انكر الاوي الماي لاوني مشاحيفه

الثلج مو عار بجويريد عار اليجرد بصيفه

انه امشي وتمشي الحجايه وترد بيه عتيجه
من الصبر شجره
وشفت روحي بصيص يريد
يتعب يوصف الكمره

نكلت الروح اسولفها
لكيت اسنين احد السيف وايامي اعله طارفها
اجيت اسكت ...تبديت
الشمس تزهد بالمرايه

وبعد ياهو اليضوي الها وبعد ياهو اليلم جفها
الجرح كبلك وصل ليها
وكبل ماتلتف يلفها

ويطشرهه والمهه من الضلام وهي نيليه
ويطشرهه والمهه من اللهيب وهي برديه

ي وانته اطباع ماتتبدل بروحي
مثل عشك السمج للماي وك روحي شوديلك
اوديلك ضوه مرايات لجروحي
اوديلك قصيده مسافره بروحي
يلمتاهت عطش بالليل وانشمرت بعيد
وجلبت وانكطعت بروحي

وتلكيته هذاك ال بالعمر مكتوب
وفراكك تلكيته

وكبل مااحجي حاجيته
وشفت غمك العشك بالروح مثل الماي
ياخذ كيش ساجيته....

غانم هاشم الفياض



ثاري احلام عمري المضن چذابات
وحشه ابغير عينك جانت سنيني

ممحل روض روحي اوعـّـيد ابملگاك
وبفـّي ضحكتك ضحكت بساتيني

ادري عيونك الحلوات كتالات
تكتلني .. وترد اردود تحيني

راضي اشما يصح وشما يصح مقبول
بس گصر المسافة البينك وبيني

حبيت اشكثر وشگد عرفت اوجوه
وياما چفوف ذابت بين چفيني

بس اشما ادوّر اوجوهم الگاك
اوضحهم وجه واگربهم العيني

يل تجدح ابروحي وتشتعل بركان
ومتانيك تمطر ماي يطفيني

بيه اشما ادور الگه منك صوت
وانته اشما اتدور بيك تلكيني

ترضى الغصن حسنك اشتعل فانوس
وانته اشما اتريد اتصير يرضيني

يا اعذب معاول مرت ابدنياي
يومية تهدني وترد تبنيني

عزيز عسكر

انا بهذا العمر تايه نبي ودينه سوالفكم
اذب روحي حزن يمكم
وجي من الغربه كلي اعتاب والكه الله بشفايكم ..
على الدنيا ورد واحساس طشركم..
احبكم وانتم عيوني امل مني ولاملكم..
هلي وناسي وحزن كلبي ومواويلي وشعر شعبي ورصاص احمر رسم دمكم..
قصايد والعمر جلمه وحبيبة وكيف والبية تعب منكم..
ماشلتو الكمر وياي ما غنيتو لسجه البعيده وياي بديت اكره منايركم..
ولا أحبكم
غريبه بعيني اساميكم
عمري الراح مذبوح بجناسيكم..
صدف تتلاكه بالصدفه نهر شارد من جروفه عمر مايندل احبابه قصايدكم
وضل انه السهر والخوف ولياويل والمدري ولعد ياباب
امد شوفي وكول اليوم ازاعلكم
وافاركم..
وشك الخارطة واحرك شكو بروحي واحرك كل رسايلكم..
انا اكرهكم
واحب تراب رجليكم

وابوس الناس كل الناس احس الناس تشبهكم..
منو الجاباكم العمري ومنو الوداكم بكلبي دخيل الله ولاينشبع من عدكم..
طين وكل فراش الليل طوك يعبر الثورة
يلم كل الفرح ويوزعه للفقرة..
ويرد اردود بي نايل عشك سمرة وسهر هيله بمظايفكم..
كون اغفه بجدايلكم
وكللكم
يجذابين منو مثلي صدك حبكم..
منو مثلي عبر جيله بعتب وبشوك وفدوه اندار للعدكم..
شمع لو ليله كمرية اريد ابجي بصوانيكم
وشاقيكم

وكلكم غربتي تشور وابچيكم...
لاتنسون انه اشعركم
انه اليندل بنات الليل انه اليندل بيوت الله
انه اليسكر و اليصلي ويحب كل الخلك لله..
وبس اسم الله بعيوني شكثر دخان بصوركم...
شكثر غربه بسوالفكم..
جذابين مابيكم ولاعدكم..
ماشفتو الكصب من ورث بطولي ولاشفتو العطش من شب جسر ع الماي
اطفال شكثر حلوين ماتو شذر فوك الماي
ماتو بالحلم وياي
ماكسرو خواطركم
انا اكرهكم

يبذاتين ماتنحمل عشرتكم
كواغد والمعاتب ريح شال اقلامكم والليل وشال وياه كواغدكم...
انا مجبور اصارحكم
واكل للناس انا اشعركم

عريان ال سيد خلف

سواحل...

يالمثل كلبي حلو بليل المحبه
وبالخواطر لو طرت
نشغه الغافل
اكثر من اسمي معزه
ومن حنيني لشوفتك
حد المناهت ونته نازل

يا سمير العين
وي ضيهه سوه
و توّمت بيكم
وانه بهم يا ريت بالضي
يوم باخل
طوحت باسمك بكل غناوه حلوه
وطولت
حد العتب والعتب كاتل
وكلبت كل ورقه

من عمر المحبه
وكلت بلجي
ولني بليالي العشك مايوم عايل
وانته سكته
اتجيبني حسبه اعله بابك
ولنك ويه العذل عاذل
سلي بيه امعاتبي لحد مشتهاته

ومن يسئلونك ...اشنيتك؟؟
كول احاول
نوجت بشباج عمري اتريدني
وغافلت روحي
وطحت صيد بشبجتك
وابعدت جافل
وشوله كلما اتمايزك
وافرش اطباعك
تطلع اعله اربعطعش حبايه .. كامل

ومدري .. سر حبي الك ..
جورك .. عليه ...لو سواحل
يالعليك اتعودت
بالعشك شايل

باول طلوع النخل ... طلع حنيني
وحايلت وكتي ...اعله شوفه
ولني حايل
وصكت بروحي الليالي
وصك ثلجهه
وثلجت بيه

وعليك جناحي هادل
يطيب من اول الطيب البلورد
لو ردت اميزك
واصعب ابليل الوفه
من اعناد جاهل
مللت بيه الموده
وكلت امله
وكاشفت روحي اعله كلشي
ولني ما مل.