كريم غانم


الصبح غايب على الشباچ
والحايط زعل.
واتصالح وي الريح
وبقيت إني اتجي أعلى اليل
والقلب أعلى غفلة يطيح

وعلى خدودك شمس نيسان
و العتمة كلت بابي
وين انت
ولا مطره التذب روحك على ترابي

مر بيه
واذبلك نهر عالماي

ولو مابين .اصابيعك نهر
وجفوفي محتامات عالملگة

ناديني
وامشيلك على السچين
وافرشلك نبض عالكاع
وضمك
بالفكر
نسمه أعلى خد ورگة

تعال معطر.مترب
اشهگنك
تراب الغالي
نسمه بساعة الخنگة

ظلك لو يجي أعلى الروح تبرد .
والفراش ينام

ولكن لو درت وجهك
گفاك يطفي الولايت
تبقى بعازة البرگة

واعدني
بلا موعد اضيعن
خطوة فوگ الماي

لا تبطي
ترى
لموعد جمر عالراس
وانت اتشد المراية على عيونك

اذا لمسن اصابيعك
اصابيعي
يطيحن عالرمل نهرين

ولجدامك كناطر
من ورد .والوح لتنور

لا تبطي
الكلب ميشوف .جذابين
كون يشوف
حطيته على النخلة

سنابل تمطر الدنيا اذا كلبك يجي خطار
ولو جيدك عرگ لحظة
سحاب ابيض
يغرك ليل الولاية

فك قيدي لا يذبل خصر روحك
ويظل بعازة اللمسة
لا تنسى
تنسى أنت ولكن دجلة ما تنسى
..

((سفره ل عالم البرزخ))

محمد لفتة العماري

چان
برزخ
لون
ضوياته عجيبه
وجانت الدنيا
نهار

جانت الهوسه……نهار
صوت بلبل
غاد مني
ويمه
فختايه زغيره
صوتهم
مايشبه
اصوات النعاوي
ولا

تراتيل
ال كهاوي
ولاكو
بيهن
حسرة امي
ب اخر ايام……الحصار….!!!!
كلشي
چان
يناغي…كلشي

كلشي
چان
يبوس….كلشي
الشجر
والماي
واسراب الحمام
وريحه
اجت من صاية الله
طيبه كلش

نسمه كلش
جانت ال دنيا….…خضار….!!!!
واحنه
ملتمين
ماندري عليمن
صوت
مدري منين اجانه
صحنه
عطشانين كلش……

گال صار
صحنه
جوعانين كلش…….
گال صار
واستحينه
نگول
مهضومين
متعوبين
مضلومين…كلش
شافنه
شگد مستحين
وماحجينه
ماهمسنه
بچلمه وحده……
وگال صار…..!!!!

صاح للغلمان مهلا….
صد علينه
منين

اجيتو
ويمته….اجيتو
گتله
اجينه
من العراق
جابنه
الدخان
ومدافع شضايا
وشگگ
هدوم ال علينا
عصف……اخر انفجار
وذاك
واحد
مانعرفه
مبلل
وجبناه ويانه
بي ملامح…… انتحار

هنااا

الصوت
اغتاض كلش
صاحب الصوت
انتبهلي
وجن
تغير حتى….لونه
صاح
ب الغلمان
اسرعو

فضّو اول…..فارگونه
وحضرو
كل مقعد سياحي
ومو سياحي
ذوله….مو مال……انتضار…!!!!
ودعانه
وگال محروسين
ب الله
وداعة الله

من زمان
يتاني
بيكم
كل شبر بولاية الله
وچانت
هدوم
ال علينه مشگگات
لفلفانه
بورگ سدره

حشم
الصفصاف كله
و…..دفع……تذكرة……القطار……!!!!!

عدنان البركي

يانديم الكاس صبلي بمشتهاي
من عصر صبلي لما تلاكي الضحى

زيدلي وذكرني بي واسمع غناي
طور اسمعنك مثل طور الرحى

الراحه موش النه فقط للفايخين
احنه ناس امحرم علينه الصحو

عمر خلصنا سكارى ودايخين
برؤسنه الوادم الغربه تمرجحو

ورغم كل هذه ولكن شايخيين
وماعلينه من المسو والصبحو....

شچم ارداة ضلت تحوبي وراي
وراح اثرها من الدرب كله انمحى
عيوني سبگني ولا أصد لگفاي
من الفتفت مرات اداري المستحه

وما علينا السالفه تخص الحبيب
المن اذكرنه اجر طور الونين

وجهه نيه جاهله وحوبه مشيب
صدگ بعيونه بگثر جذب السنين
يا شمس روحي ولا مرها المغيب
الما يغيبش يستحق ينصب دين

يالمسودني ولا خليت راي
بجوهرة راسي اكوله واطرحه
فدوة اروحلك شلك گلي معاي
من وراك أمي علگ بالاضرحة
موش بس هدومي امرعدهن عليك

مرعدت بيدي سمعتي وريتي
شيلني محبس غوى باقلام اديك
لا تخليني خلص دم شمعتي
شلون رايدني أجيك انه اجيك
تبوس باجدامك شفايف دمعتي

براحتك ذلني لما تكطع هواي
طيرك بكيفك تعيشه وتذبحه
بس اكلك سالفه .. انت سماي
ويا سمه الملت رفيف الاجنحه

حكيم الفريجي


هذوله احنه
هذوله احنه اليذبنه بضيج منذبه..
وهذوله احنه اليعذب گلوبنه نحبه..
وهذوله احنه
ياما ردتونه غير وجوهكم للحين ماردنه..
هذوله احنه الشريناكم بوكت العوز
من جنه جهال وهدم ماعدنه
هذوله احنه الشبعناكم ضحك والضيم چاتلنه
هذوله احنه كطن وانتم حجيكم نار يحركنه
شمس والليل يكتلنه ..
جنط غربه وتفرهدنه ..
غرب والنشد يوجعنه ..
سكارى وبالدرب تهنه ..
بلا عرفه وتعاندنه جهال وكلشي يعجبنه
غنى السبعين ياهو اليفتهمنه وياهو يسمعنه
على الفطره وتعذبنه نوك الكطع موش النه
هذوله احنه شتسمينه سمينه يالمطيبين وياهم كلو
حگنه
هذوله احنه الكتبناهم ابيات بكل قصايدنه
هذوله احنه اغانينه
وتعبنه
وضيمنه
وهمنه
كلهن منهم ومنهم فلا كلنه
هذوله احنه اذا حطينه ابالنه شي نسويه

لحّد يكدرلنه
ولحد يردنه
احنه الشيب عدنه نحسبه مثل الطيش
حتى بشيبنه من العشك ماتبنه
لحد ماثكلت وبهتت سوالفنه ..
لحد ماتعبت وخربت ملامحنه ..
لحد ماشفنه شوف العين تتشكك رسايلنه ..
وانعفنه وبعد صرنه شمس محد يغازلنه ..
وكلنه نرده خير النه
بعد شنهو ضلتنه نتاني الباب يطردنه ..
وكلنه الصوج بالدنيا التغير الناس ..
لكن هو كل الصوج من عدنه

عريان آل سيد خلف

(( حني حني ))

اشويه ياعين الخشف .. خزرات
المعاتب .. چوني
من كثر ما لوع .. حتى اهلي
اصبحت جزعانه مني
رافكَتني الونه .. والحسرات
من بطن الحملني
او هذا عمري .. امكَالب اويَه الضيم
ما مر الضحچ .. مرة اعله
سنّي
او هذا حچي الناس .. اون من لوعتي
او كَالوا يغني
فتَّر اعيونك .. تره اعيونك كَصن
بسنين عمري او ذوبني
آنه احب منهن .. نبل مغتاض
خلهن يوجعنّي
ذابل .. اوكَاصي العطش وياي
جا هلبت رونّي .. ؟!
انسه حزنك .. لا يحن حزني
او على اعناد الحزن
يا زين .. اغنّي
حتى اصيحن : يا حسرتي اتباعدي
او يا بسمتي الضاعت تدنّي
آخ مني او آخ من روحي الكَضت
هذا العمر بس بالتمني
وسرت بيها او صحت : يا روح
هدوة ليل ، عنّي
.........

عبد الوهاب الحمداني

.............سلسبيلك..........

سلسبيلك ليش يمّي وينگطع

وليش يم گيعان روحي تنشف عيون النبع

بخت ما عندي ويجيبك

هيچ واتسمى حبيبك

واعلگ الدنيا لدرب جيتك شمع

ليش يم عنگود حبنا تعثر سلال الهوى

و جيلك وجيلي حبايب ليش ما نحلم سوى

ليش خاويت الظلام وروحي متروسه ضوه

ليش كل هذا الحچي

عيوني ماتحمل بچي

والليالي تريد بفراگك دمع

سلسبيلك ليش يمّي وينگطع

ليش من اعطش حبيبي شفافي يرويها الدمع

وانتظر صوتك يجيني وبس غيابك ينسمع

هيچ وتسويها لله وحدِر رمشك نجتمع

هيچ و يموت السؤال

وبعد ماگلك تعال

شلون اگلك وانت تغفى وي الضلع

سلسبيلك ليش يمّي وينگطع

احمد عاشور

دورني

بس ارد افتهم... وجهك بيا نجمه؟؟
تره مليت ادورك... والسمه مغيمه...
واذا تعبان... بس حاول تشك الغيم...
ودورني تره البي شوك... بي همه
دورني... تره بروحي سوالف ضام...
معصوبات... كلمه اتدفع بكلمه...
دورني... واذا مابيك... ظل هناك...
تلكه هواي مثلك رفسوا النعمه...

تلكه هواي مثلك... مثلي تلكه منين؟
بشر من يختنك تشتاكله النسمه...
بشر فحطان ملكه... شكثر ماشي فراك...
واضحك... بس چذب... بيناتنه اللچمه!

تره اليضحك هواي... جروح كبله هواي...
الملح من يلبس ابيض.... هيچ للحشمه...
مرات اشتهي غيرك... واظل محتار...
افرفح.... وبركبتي اتچلب الذمه...
وأحسبهه عدل... والكاني ما معذور...
امد ايدي لزلف تفكيري مو يمه؟؟...!

صفنتي البيك تطلع... من كلب وعيون...
يالمخرب صلاتي... من الله مو زحمه؟؟
انا مطَشر... بكد ما ظاملك خطوات...
بس مو دوم... لازم ظيمنه انقسمه...!
اباوع عالمرايه خدود... چف فلاح...!!
تره العاشك يمل... يتعثر بجدمه...

دورني... واذا مابيك لا تنعاف...
الضوه اليكشخ بذله يشككه اليعمه...
المطر مابي نقص.. من يمشي ينكط خير
الكاع الما تضوكه... اتعاتب القسمه !!!

احمد الشريفي


اتريد اتصير امام اعله البشر جامل
وگل للعاجر انتي ابيا شهر حامل
وچذب عالگطه وگله اعله كيفك طير
يبن الغيم ابوك مخلفك حايل
لسنهم تاكلك لو مو تجي بقرأن
تندچ لو صرت نطفه بظهر جاهل
شكو چلمة هله طشوهه عالملاچ
والله يساعدك ماحصل العامل
ابو النيه الشريفه ويعشگ يطردوه
وابو جيب الوصخ گالوله تستاهل
الماي الجوه باير ماتعشگه الطوس
وهوه متاع ظل لحلوگهن نازل
عمره مسافر يودي ويجيب اضروف
ولگوا ساعي البريد ونكروا الزاجل
حدر بزره اكعدوا يداينون افياي
وعلسباح گالوا مو كلف خاتل
اليحچي ابعركه مابين الشلب والبوه
تلگاه بالحلم مرواح ماشايل
اعله كل باب انكتب لاهله بكل محتاج
ماعدنه جواب انوزعه للسائل
الصدگ مدوس كرك مسحوگ بالرجلين
وادم صفگوا للكلشي ماگايل
الله انطاك چف ترفع بخشمك ليش،؟؟
تره اليعله اعله اخوته السنبل الفاشل
صير ابريسم من اتشوف ربعك جام
المصافح وي الماعنده چف باطل
اتريده يطيح من فوگ القصر للگاع
فوت ابصحن مسلم واكتب وراسل
امن الله يوفقك وتكبر بعين الناس
فتش گلب اخوك وتعرف اشايل
شجر بس بالخريف ايعرس الصفصاف
لو شاف الخظار من الشجر هادل
ولا تلهم السمسم جعده لسه اتعيش
السهم من ظهر ابوه للدنيا اجه عايل
عيش انسان بر السجن بير احلام
تره صدفه وشبابك للكبر واصل
السمچ يسعه وره رزقه اعله شص يلگاه
هيه الدنيا لو ماكول لو ماكل
شكو بدوي استقر تلگا مچودر شوگ
البدوي الماعشگ يگضي العمر راحل

مصطفى الاشتراني


ياگماري رويحتي وضلمة حزنها
ستاحشيتك فاجده وحنت لبنها

طيفي هلولة رساله امن الحرب مشگوگ منها
وضني ياخذني بسفر مهرة عرب ماتنگدر وتطگ رسنها

خوفي
مامر بيك من خوفي اعله ديرتنه وحزنها
وعمري مكتوب ابرصاصه شما نمت تكبر بطنها

تزعل وتكبر غربتي وبيك احير
مره اضم روحي ابصفنتي ومره للقناص اصير
ليش المعاتب يغثني وهوه ذله وروحي طير

تعبتني
اليله ابات ابغير گلبك
لازم اتعود عليك اومن جديد امسح وكتبك

الدنيا خوووف وعاذرك من تشتهي اتنام اعلى اديه
انه احبك بس عزيزه الناصريه

والشتال ابلثگة اهدوم التعب والگاع گاعي وبيها اطيح
والغريب ايوچد المكسبه بگلبها وكلها صاحتله استريح
ياااهو يدري اشينذر المگرود ويذب بالضريح

واليموت ابلا وطن ميت ذليل
والرصاصه بهوست الوادم فقيره امنين ماراحت قتيل
وانه احبها
هواي احبها
الطير لو چل المطر فايت دخيل

عبد الوهاب الحمداني

( الليلة گدِر )

ودّيتلچ وي الگمر ديرة هلا

او رفّة خواچي أو مستحه او ريحة نثايا مهلهلة

او ردتچ تجين إبضحكتي أو ما صحلي طارش للنذر

أو ردت أشتري من الله الهوى وأشرب روازين العمر


يمرايتي الليلة گدِر ...

حلّيتلچ ميّة ظفيرة او لا شفت خصلة فجر

أو صلّيتلچ ميّة نهد لمّن غفه إبجفي الخِصر

أو غنيتلچ كلّ القصايد و الرسايل والمواويل أو سوالفنا الشِعر و المو شِعر


يمرايتي الليلة گدِر

او باچر يمر بينه العطش و إنفرفح طويرة عتب ما أظن يكفّينا صبر

و آنه إعله باب حجايتچ بلكت حرف يترس قصايدنا خمر

بلكت تمر نسمة صدگ تفتحلي شباچ الجدايل وأنتظر

يمرايتي الليلة گدِر

و آنه نبي أو متعوووب من ليل الوِتر

صلّيني بأحضان الشَفع خل أنتچي

تدرين المرايات تطفى إبلا وجه يمسح تجاعيد البچي

أو تدرين الولايات تغفه إبلايه شاعر يعلگ شموع الحچي

طالب عبدالله الكناني

مفضوحين

مفضوحين ..
مثل اسوالف العرسان ..محد شافهم بس كلهه تدري شصار..
واحنه ازغار..
بس لتشوف من نشتاك ..نحضن حضنه مال اكبار
من اتروح خلك العين ادزه وياك..
زحمه تضوج من تندار
زحمه تكول ما كمل طريقه وياي
وآنه بخطوه الف مشوار..
لا تندار..
جرف وماي..
انه وياك مخلوقين من تندار اتبده
انه وياك ..
امشي بكيفك ومرتاح ميوكفنه حته امكابل السده
تعال هنا تره من اتروح صعبه تصير..
شوف الناس مكروه الجزر عدهه..
جي يندار عنهه وراح ..
لوما تقترب ما حبو المده
امشي وياك ايد بأيد..
احس بجدمي خضر نوح
ينكلني بسفينه بشاطي بس حيتان
بس مرتاح من عنده
انه ارتاح من ترتاح..
راحة جف يكض اصفاح..
راحة ورده عد فلاح..
لو مرهه بجدم تعبان تمشي تعارك النخله..
متعودين هيج نعيش
تحبني وما أسألك ليش
بس صوج المنعنه وما عرف ممنوع ..
يحرم طيره من الريش

زامل سعيد فتاح

حاسبينك


حاسبينك .. مثل رمش عيونّه
بعشرتك لينه
معاهدينك .. وانته كل العمر
وأيامه وسنينه
وداعتك ذاك انته غالي
حبيب وسلوة حچينه
انته روحي ..
وروحي جم حب تدري بيهه
حبها للكاع المشيت انته عليهه
حبها للمزنه الروت خدك سكيهه
وحبها للناس التحاجيك بحجيهه
حلوين ..
بوجوهم فرحة الدنيه الضاحكه
حلوين ..
بعيونهم ملكَه أحبه مفاركَه
العين لو شافت وجوهم باسمه
تشع بسعاده
والكَلب برياضهم فراشه بالحب حالمه
وطافح وداده
عاشكَين احنه وهوينه
ومثل ما ردنه لكَينه
وحاسبينك ..
انته خليت السوالف .. طافحة بروحي قصايد
وانته علمت الشفايف .. بالغنه تصوغ الكَلايد
انته .. يا انته وغرامك
وشكبر روحي بسلامك
همه روجات الفرات .. العاشرت فَي الشواطي
همه دجلة ومن دلاله .. يسيب ويه الكمر غافي
حلوين ..
صابغتك من الغروب خدودهم
حلوين مثل عشرة رازقي ..
ويه الندى بعهودهم
وحاسبينك ..
من هويتك....
لمت روحي الما هوت بسنين صغري
وهيچ اثاري؟
الحب حلاته يشع سرور ببين صدري
ياغرامك
مثل طعمه روحي ما ضاكَت سعادة
الدنيا حد الشوفحلوه
والكَلب ينثر وداده
عيونكم تبرالي نجمه
تدور بيه شما تريد
طافت بروحي حنان
وكَرّبت مني البعيد
الدنيا حلوه
الناس حلوه
والوطن باسم سعيد
عاشكَين احنه وهوينه
ومثل ماردنه لكينه
وحاسبينك ...!

عريان السيد خلف

جية العيد

يناهي الشوك ذمٌـه وذات من ذات
وفرق مابين حالي وحالك بْعيــــد
سنه وصدٌك يِضَـوك الروح لوعات
ويجَملٌي الجروح جروح ويزيــــــد
أبات بحضن صبري إليال ويباتْ
جرح يصحى وجرح متغصٌب يْهيد
وأكًًول إشوالف السرحان للشــاة
عْلى سـجٌه وكًاوداه الإيـد بالإيـــد

إلك جـانت ياحلو الطول جيـات
عجب تبخل علينا بْجيٌـة العيـــــد


تنينه وأملينه جْفونـٌه بْطيفْ
وصبرنا وصبـٌرينه الآه بـــــالآه
وتحسفنه الحســافه وحيف عالحيـف
عله إسواجي الدموع الـ مالهن جـــــاه
وعرفنه وعود حبك غيم بالصيف
المحل وين المطر بالصيف يلكاه؟
إشيصير عْلى الترف لو ينحسب ضيف
عْلى غفله وعيد وصل الزين محــــلاه؟
أنه بْعازة الموت وحاجبك ســيف
وأمــوت بْغير صدٌة غيض ماريـــد

إلك جانت ياحلو الطول جيـٌات
عجب تبخل علينه بْجيٌـة العيـــد


أحن لمسامرك والكًاك شلكًاك
شَرِي المعشر حلاوة شــوك مابيــــك
يمر صيفك صبر واتنَطٌر شـْتــاك
تبيعك عزتـٌــك وبذلـٌـتي أشريـــك
تراك ويه النفس يلماتجي أشراك
وبالدم الـ يدور تدور أحس بيك
يابو الروح عْلى روح إهواك شلهــاك
وإهي بْعيـن الشفاكًـه إليال تِربيــك
أبد ما سامرتها الآه لولاكْ
ولا جـان إعله دربك لاويــه الجيـــد

إلك جانت ياحلو الطول جيـٌات
عجب تبخل علينه بْجيٌـة العيـــد


أنه ولا كًـول عنـٌك غير معذور
ولَو ماظَلْ عذر للروح ينكًــــال
لـَجَنْ ون الـ يساهر ليل معـذور
ألم لو من وكت لو من ولف شــــال
وانه بْحالي عْلى صبرك حال مزهــور
صبر ومكابر المحتـــام جَتـــٌال
إلك عمري عْلى زين وشين منذور
ولَو من السنيــن إوشال ما ظـــال
لـَـجَنْ يبقى الجفن للطيف مسمور
ويظل راجد عليها النوم ترجيــــد

إلك جانت ياحلو الطول جيـٌات
عجب تبخل علينا بْجيٌـة العيـــد

كل عام والعراق بخير ♥
.
.

مثنى كامل


وين المشو ياراعي الغروب
گد ماادور خلصت البوب

جربها مره ونام ملجوم
شوف شثكلها عليك الهدوم

شبعداتكم بس هوى الأغرب
ليش الدرب من يمكم اگرب

ياليل مو خلصن نجومك
وگلب المشو يشبه هدومك

كون اليرد للبيت لو غاب
جفوف التحبه التفتح الباب

خلص اليل ونامو بطيب
مو مثلي اگلب بالمكاتيب

كون الجفو گلبي مذاريب
ولانهم بالمواصل معازيب

هب الهوى وگلبي فگدهم
يمكن عزاز بيت اهلهم
مسيريين عالحرموني منهم

انباوع عالوجوه الجزتنه
وماندري عن ياهي متنه
ماضل ولف يفزع بمتنه
عزاز ونسونه بفاتحتنه

لعيوني ماخليتوا منكم
وبروحي شو باقين كلكم

تستاهل الينشاف بيهن
يامايهن عينك عليهن
كمت استحي اطلع من بجيهن
•
•

جواد زغير

(متسوله)


ليلچ ضايع
عمرچ ضايع

يا زهره وبستان الدنيه انطاچ لشارع

من يا وادم وليا وادم تستجدين ..؟!

مديتي ايدچ واحنه نباوع محتارين ..؟!

مدري نعشگچ..؟ مدري نگلچ لا تبچين ..؟!

مديتي ايدچ من يمته يمد ايده التين ..؟!

يا بت ادم يا تين الله

ليل الدنيا وخاف چفوف الرغبه تبوگچ

ليل الدنيا وخاف عيون الناس تضوگچ

ليل الدنيا ومالچ ليل

ودموعچ والكحله تسيل

يا بت ادم ضمي الهيل ولمي چفوفچ

لا تنجرحين وشيروفچ ..؟!

بين الحيطان الما تبصر كتبي حروفچ

لو ضعتي بورقات الشارع

حته النار العميه تشوفچ

باچر من تكبر لوعاتچ يكبر خوفچ وتضيعين

وباچر شمس الله الـ ما ترحم تحچي الطين

باچر كلشي أيگلچ وين
باچر چف يعاتب چف...
وباچر عين تعاتب عين

شما غنيتي السكته امتاع

يا بت ادم هاي أعثوگج حصة الگاع

شيردچ لو صيتچ ذاع وگالوا عاهر ..؟!

عانگتي الريح ويا ريه تلمچ باچر ..؟!

اه يا باچر...

و اه يا ماي العيب المنچ سافر

مو بس منچ... سافر مني ... ومن الناس

يا شجرة وعشنالچ فاس

لونچ ياس ..

ومحد غنالچ صينيته

غنى العوز وضعتي بريته

واه يا وكتج....

وكتج عايشلج مرواح وليليه يذريج بديره

يا سر وما ضمچ بيره

عمرچ حيره
وليلچ حيره

( من مال الله ) شگد اذنتي ..؟؟!

شگد كبرتي ..؟! ... ومحد صلى

ما كافيچ يا تين الله ..؟!

ما كافي نشهگچ ونلومچ ..؟!

ما كافي تشهگين اهمومچ ..؟!

عفيه اهمومچ ،،

ما گالولچ بين العفه وچلمة عاهر مدت ايد ..؟!

ما گالولچ طحتي اهلال وعمرچ عيد ..؟!

ما گالولچ شص الليل وبينه يصيد ..؟!

ما گالولچ بس شيفيد ..؟!

من مال الله ومال الله الباعچ شيفيد ..؟!

وسام سباهي

(سما التسبيح)

تلاكينه غريب يحب غريب ومالهم ديره!!

وتواصينه اعله كل نيشان مايدري
منو يشوه تعابيره !

سولفنا سوالف ماحجيناهن مثلهم حيل ..
بريد عيون والساعي سفر غبشه اعله وجه الليل..

تذكر من بجينا هناك جم تابوت.. ؟
تذكر من كلتلك مانريد نموت؟
جا ليش النوارس من درت بينه
استحت يم الشواطي تفوت؟

علايم بالوجوه.. وصوتهم نيشان
رسايل ماقروهن من كتبنا الطيف
نگطه بگصة السجان..
مدام الله ضماير شوگ ليش يغرّب الانسان!
ليش نعيش ذكرى بذمة النسيان..
ليش من العطش ندعيك وانت بسجدتك نهران ؟

إشيلم عرشك زغيره الناس ما صليتها بخيرك
إشيلم الكاع لونامت نواطيرك ؟

أبتسم خل ترتوي الدنيا
ونرد للغيم كل كطره..
إعتلك مثل النجوم الوشمّت جم ليل
من انباكت الكمره..
اذا دربك متاع يريد
جاهوه الفقير بيا بچي ايعبره ؟

بسما التسبيح
طشينه الذمم صوغه اعله جنحانك !
إحترك مثلي اعله حزن الناس سبحانك !

العشك عشكك گبل لانعرف الشبگه
الوطن ضحكه عله شفافك
گبل لايبتسم جبريل ونصدگه

درت وجهي ودريت بصفنتك حيره !

وتلاگينه غريب يحب غريب ومالهم ديره...

محسن الخياط

لولحني

لولحني من حواجبك لجدامك بهيدة وخف
وخلي البروحي بذمتك يتحكرص بخيط الحف
ولفني على محبتك لف

زغار العصافير التزف
وي امهن يلوك الزف

وجروحي غربة بغربتي ومدري على ياهو اتلهف
اركص وياي من الحزن
نص وكتي اوكف وازحف
فزينه نتلكه الصبح صغنالك لجيتك دف

وارسمنا بي عن الحسد عين وجف

جرحي الجديد احجيلي بي
وخلي العتيك اعله الرف
عمري قمر دين انغسل لابد يضيك ويكصف
چن صكر شدوا بركعه وفوك الشداد مكرطف

واعتاب الاخرس والعمه كلما تلاكوا يكلف

العمر گاضي ...

آخر قصيده للراحل كاظم اسماعيل الگاطع
••

الدنيا ما دام انتهت..
والعمر كاضي
منهو بينه بلا خطيئة
خَلْ يكوم اعلّه الملف
يكشف الماضي

خل يجي يسويله مره..
ايشوف بيتي إشراح وشظل
من غراضي
ناس صعدت ناس بعدت
وأنه باقي بخيمتي وسوقي وعكاظي
وجان بامكاني أصير
لكن هموم العشيرة…
لا أنه راضي عله شيخي
ولا عليَّه شيخي راضي

جان بإمكاني أصير
أملاك وقصور وأراضي
لكن أعرف هاي كلها
ماتساوي فركة إيد..
وراس محني ابّاب قاضي

لكن اعرف هاي كلها ماتساوي
نوم ليلة اعله المخده
بليَّه خوف وبال فاضي
هِيَّ مو بالسرعة تنلَّم
ولو على السرعة يصير
أغنى شخص عدنه الرياضي

خلصت عمري بدولتي
لا أنه راضي اعله وضعي..
ولا عليَّه الوضع راضي

عقيل العرد

(صلاة الذل)
ــــــــــــــــــــــــــــــــــــــــــــــــــــــ
وطحت من خاطري وشالنك حجايات

شوكت تغلط نظر وتشوفني بعينك
و صدكَ يمكن

صلاة الذل فرض لليعتنكَ دينك

المصيبه الناس تدري شبيني ؟ وبينك

تضم روحك ضوى وبالعين احط الصوج
واغشم روحي واتلمس

واغيملك شعر وابجيك
هنيال اليعرف السالفه من الذيل,, فوكَ جروحي يتونس

زغرت هواي يمك وانته مو نشاد

وانه لاخر جدم بي حيل بدروب المذله اوياك رايح راد

كابلتك كَمر متعوب ,, يم شمسك بعد شنشاف!!

وَابيت مستحاي حروف,, يم راسك حرز مخواف

يمر موسم تمر بالناس وانه مكابل الصفاف

غلب دورت وي ابليس ,, بس وياك ارد مغلوب

ترس راسي نهر وخيام
بس
وياك اذل مهيوب

مناير طين وسط الروح,, بس الروح كلها ذنوب

تمشيتك مضيع نوكً من جان النهار غروب

وباريتك شلب من جان بيه شجم نهر مصلوب

اختنك بيه العتب شفتين

وضَحكتَك سالفة مخمور

يا ميل الحجي المتعوب

حل وكت المجازه وياي

ماشيني بتعب ناعور,,, ميته سوالف الحالوب

بعدني المع ضوى الطاريك لو رسموك

واكشخ للسوالف من يسمونك

وبعدني استاحشك بالخطوه لو مريت من دونك

وكَع وجهي اعله خد شاطيك واتعتبر

وتخالطنه الملامح دهله وي عنبِر

تشح واشرب سوالف من كَبل عامين
وصوفر شوك ومتاناة

ومن الكَاك ,,اضوك العافيه بلونك

يالمكَابلني,,, وين من مشرد عيونك

انته شويه وهواااااي اليحبونك

افردك منهم بيا راي ؟
يا منفوس
غصنك مايرد حطاب وانه اكره صلاة الفوس

فرزنتك ورد من بين الف صبير

وباريتك محنه وسيرتلك ماي

وتلمست السواجي وسرسحت روحي
ودورت اعله سباحك ,,لكَيته وياي

شب فوكَي بعد, مشراكَة الله تعيل
حلاتك من تشب وتكَلي هاك فياي

يروحية الحجاز اذن
مناير حيلي راح اتطيح

شبعدلك ياربيع العافيه امتانيك
شجرتنه كلتهه الريح

مواعيدك جزن كفران وانه مناطرك تسبيح