رسل الركابي


گبل لادگات جفك تغفه عالبيبان تنفك !
وگبل لا عاشور وجهك يعثر بمحراب عيني
أحمل برايات طفك !

دير بالك ..
لاتطيح من العيون ولو طحت لَظن تلمحك
ولو دنت نفسه اعلى بير ،
يوگع الناعور من عين الگناطر
وخوفي لا تدنى اعلى غيري وما يفضحك...

لاترخص بالهواك !!!!!
التمرة مو كل يوم يتلگاها سعفك

باچر امن يموت حبك مايرد يحيى ونحبك
لاتوازينه اعلى غيرك باجر ايسد باب هجرك
باجر انبات اعلى جيده وحاشه لو نبجي اعلى نحرك

انا وانت وباجر الثالث قطار
نواعده بكل مشتهانه
ولانحن مره أعلى دربك ..

لاتطول
عالشبابيبج التگصلك بالتذاكر باجر الرحلة تعبرك
لاتوازينة نعبرك ...
الهودج من ايشم رحيل ونوگ يمشي
واحنه چم دوب الننطرك ؟؟

لاتوازينة نعبرك

كريم الجسار ...

بعد شالحگ جزه النيسان

والما لحگ ما يلحگ

ولا بيدي رسن دنياي

والوي عنانهه وتسحگ

يقنديل الليالي السود

نمنه وبعدڪ امعلگ

يدرويش القوافي الجام

من جان الوكت زيبگ

الڪ بي هوه العزاب

لا غرب ولا شرگ

المه وروحي ثوب عروس

ما گتلي هوه العزاب للمفرگ

شمعه شتاخذ من الليل

خلصت وابو طبيله

اتعطل وما دگ

وانا يا خوي مو ايوب

والتحت الثگال شما صبر يزهگ

اخذلڪ چلمه صوغه .. الشمعه تگظي بساع

مو بس الهدوم الناس هم تعتگ

وخلينه انعم الله رطوبه السباح

لا ريعان ظل ولا نباع ازرگ

بعد شالحگ؟

زمانڪ مو زمان الچان

ماهو الواعد وصدگ

اظملڪ حفنه مني وضوگ

واصفن بي من تشهگ

تلگاني هذاڪ انه

فرق بس الجروح اغمگ

ادور بطارف الدولاب

مدري شظامه التطلگ

بعد شالحگ!! وكت ما عاف ذاڪ الحيل

هسه ايعوفني امعوگ

لو يعرگ وجه دنياي

للعنده وجه يعرگ

تسطر واليطيح ايطيح

وشراع الورق ينشگ

دنيه الصاح منهه الحيد

مو ندمه الرجيچ يصيح من ينطگ

بعد شالحگ!! يليل البارحه اندليتني بيا صوب

لو ما ظال لون البابنه المغلگ

لاگيني عصاري بسوگنه المسگوف

وبريحه عبي الحلوات خل نغرگ

وي زف الفخاتي على الشواطي غروب

ومواعد عشگ وعيون تتعانگ

وخل برد القوافي اينزز النيشان

واعذر غيضته ويكفيڪ ما دنگ

قصيدة -( انته وينك )- احمد رسن


استوطن ابروحي الحزن لمن مشيت
وچوچه بلدلال جرحك
وانه مامش حيل بيه شگد بچيت
يا حنين الله اليزتك سير اعليه و تعال
الليل كله بهم اناطر
بيك شاده يلمدهور بيه بال
وليش تبعد ترى الگمگم هيبتهة ابنص الدلال
شح صبرهة الروح چا يمته تمر
المصايب بيه چلت
ولوكت ناعور مرني شلون ما رايد يفر
الريل لو عاف المحطه يگضي صبره اعله الدرب
وما تهون الفرگه عنده والوكت كلش صعب
وانه چوچيت اعله دربك يمته تچهب يلمحب
چا سير عيني ذبلت ميت بشفتي الدعاء
انه يم ربك دعيتك
وانته مو الله ونخيتك بلصلاء
اي وحك الما گلتهن ميت و عايش عليك
الخشبه ماتت عيسى ردلهة الحياء
وانه راگد و انتظر
يوم يوم احسب وتاني گلي شيفيد الصبر
انته نورس من تسافر يعگد لسانه النهر
وانه مثل الليل صاير
شما يضوي النجم بيه ابقه عايز للگمر
وحتى اعذرك
يلقرنفل شوف منهو بگدي حبك
عيني تانت يمته ما يچهبهة طيفك
خاف ربك
انته عايفلك محب طشر اسنينه اعله دربك
انته وينك
جرحي اترف من فراشه التعتنيك وما تجيبك
روحي طفله وجاني عيد وما عرفت شلون اهني
وانه بلبل والحزن خلاني اغني
شگد تعنيت اعله بابك
وعين غربه تصد اليه بين چاي بين فات
ودليل الشيب اخذني وبلدرب صاير ابات
وخاف تنشدني اعله باجر
زين منك كلشي مابيه بغيابك
هنه بس عيوني عميه و گلبي مات

الكبير الراحل ابا خلدون ..
عريان السيد خلف



أشتاكلي
المشتاك يطفى بماي عينه
ويشتعل بجروح ايديه
ويضحك بوجه الظنون بغير كلبه
ويبتشر والبيه بيه
الماي يخطف عالجروف وداع صدفه
ويعتذل هرش اليبس ما يعتلي
أشتــاكلي اليعثر بظله يموت صاحي
وال يعيش بلايه وعيه بغير ظل
الشوج من ينبت بسجه يبات وابن ادم يزل
أشتاكلي جروحي غلاتي
وعيبي صبري:::ودفلتي السكته ووحشتي بلا يا هم
وحجتي الفشله التطشني تراب ما يسواش لم
وهمي دنيا انبعت بيهه بغيرك انته
وشنو معناة الجرح من غير دم
وك أشتـاكلي أتخضر أضنوني بكاع صبخه
ويشبج ارموشه على طرواك الجفن
وتشرك أشموسه بحظن ليلك نهار
ويحظن الغايب هوى الحاضر حضن
وتطفح البسمه على بال المبتلين
الماي يضحك من تشك صدره السفن
أتعذرت يا بخت ليل المسعدين
ويا مرارة ليلنه بطرف اللسن
الكاع سلها جنازه الميت تكوم
ويندفن جنازها وما تندفن
وأبرى بيــــــــــــــــــــــــــــــــدك
وأغسل ذنوبي واواكح مستحاي
واكطع بروح العطش ومرورة الحلوين ماي
يضيع جروحي غواها
و يعتلك شوكي جرح وانته دواي
وما مـش الما مش بعيني جزيره ونيه وحشه
وفكر ما صافي على راي
يداهر عيوني حلمهه بليله ظلمه
وكبل ما يغفى الجفن يطفى ضواي
وبيــــــــــــــــدك انا
تاخذ عيوني وتعبرهه مدى لدنياك شوف
وتلهث بدمي عرج نخوه وساعات خوف
وتحتيي بروحي
وكاحه ونفس دافي ودفكة مروه وعتابه وليل اوف
وانا بيـدك لو شجتلي الكيظ عينك
ما تلم فيض الجفوف رباة كــــــاع
ربات كَاع وما شبج ليل الولايه رموش عيني
ولا طفى صبيها ضواها وهيه التشوف
بيه حس الساجيه ولون الشموس
وبيه طعم السنبله وطيب الزلوف
أطوف دنياك بدمعها وما رضت
روحي بزعل موحي انا اطوف

هذه القصيدة فاقت كل الصور لذا جائت لتلامس الارواح المتلهفة
لكم فيض من روحانية النص و روعته
عامر عاصي :


شافني
تلمّس ضواي
صعدن براسي السنين
بيض وينثّن حنين
وآنه جاهل
جاهل ، وچنّي انبگت
انته ياهو ؟
_ آني انته
انته آني ؟!!
ودنّگت .....
شلت راسي
شفته ، وتلمّسته
خطواته مطر
والليل طين ....
تلفتّت ،وينك ؟
سكوت .......
وآنه وحدي
،سنطه ، أيام الفرح ، والظيم ، والحربين ، والخمسين ، والهم ، والتراچي ، وهور ناشف ، وانتظارات ، وعرس يبچي ، ومواويل ، او وتر مگطوع ، وهموم ، وگراجات ، وجهال ، وجوع ، وولايات ، ودموع ، وشمع ، ومرايه ،
وانه بروحي حنين ...
يالمراية ،
البيچ هذا ،

شگد حزين

مظفر النواب


حزنك چماله شته
وگاعد لوحدك غاد بزويه عمر
والگهوة چنهة سنين نطرت ناس
مسحتهم صفنتك
مطر كلش مطر
والشارع مغوش حچي
وريحة ناس مالك شغل بيهم
عينك مرايه وكت ما بيهة احد
وانت ضايع مثل ورگة يانصيب انتهت
وتدور الجرايد بلچي ريحة وطن
وتغمض عيونك وين راحو
يعني حلفو ما يجون ؟
تمسح الليل والمطر
ترسم على الشباچ دويرة صحو
برجفت چفوفك بلچي جيتهم تشوفك
ما اجو شسوي يعني ؟
ما اجو
تثاوب تعد الكراسي الفارغة
تعد الليالي الضيعتهة بهل زويه
وتصفن بواحد گبالك
بلش يزنجر مثل شرطي بعيد
انت والشرطه عرف من زمن المرحوم ادم
تطرد افكارك
تلم روحك تصغر بالزويه وانت عالم
تحلم بحمام ريحه مستحه ونسوان
بين فخاذك يدورن على الصابونه
ويصبن نهدهن والمسچ فوگاك
وطاسه ضحك
وانت بگد الاصبع
صوتك صغيرون يلعلع
يبدن شويه اصابيعك يفهن
يبدن افخاذك يرطنن
تبتدي تحب التمر
يوگعنلك جلف
تلمع مثل قوري صغير
وتتراعش ركبتك
تنظف انته !
لچن توصخت نظرتك
مدري وين تزرزر عيونك بالزواغير ؟
وانت صغير
وانت صغير لگطه مسج و زواغير ومطينه حسبتك
ياخذنك بالمناشف
حيل ينشفنلك فخاذك حيل
وتگلهن شنو الصابونه من جديد ضاعت ؟
يضحكن ساعات
لليوم الضحك بأذنك
يدفننك دفن جوه وزرهن والروايح
لچن العصفور الصغيرون مارح
يضحكن وگلوبهن تسعر جمر
گاعد انته وحزنك الما ينتهي بگهوة بعيدة
يجي شرطي جديد بالكاغد
ينشدك
وين حمام الزلم ؟
تصفن !!
زلم !!
ضلت زلم ؟
وتدير عينك غاد
وتمشه بجريدة لچن يصب الدمع
نهر يرسم على حروف السود
وكربه مسيسه
كربه كلش لچن تشيل الوطن فوگ الدهر زفه شمع
يا شعب لو شفت كربه الزمن لاعب لعب بيه
وحزينه وراسهة يلعلع لالله مكابر وحب
يا شعب هذي كربتي
وفوگ هل الايام شموع حمرة تشتمع
صاحت الدنيه عليه ثگلت كربتك
خلهة تثگل
وين ما اسمع غريب يلوب اشيله
يگلي تغرگ
يا عساني بعشگ اغرگ دوم
ولا وحدي اطوف بلايه ديرة
وحبلي منكم ينگطع

قصيدة العتاب الاول و نقل المعاناة مع الفقر

للمرحوم.. كاظم خبط




يمه ذوله اهل القصر ما لاعبوني
يمه من شافوني جيت تنادسو واستغربوني
يمه ماسموني بسمي .. وگالو هذا ابن الفقير وشتموني
وگالو هذا ابن الصريفه وعيروني
يمه چا هو الفقير شسوه من نچله بعمرهم
...يمه چا هيه الصريفه شماخذه وخايف قصرهم
يمه گالو لا تمر منا بعد بالك تشم ريحة وردنه
وگالو بجدمك الحافي نخاف يترب عگدنه
يمه عدهم كلشي عدهم واحنا بس الماكو عدنه
يمه لعابات عدهم مدري شنهي وانه لعاباتي طين
وحتى ثيابهم مستغربتني يعاتبن ثوبي الحزين
يمه چا ليش احنا فقره وهمه اهلهم زناگين
يمه دين الفقره متعب خل نبدله بغير دين


وليش ما عدنه قصر عالي مثلهم
موش ابونه اليبني قصورهم كل هاي السنين
وليش ما عدنه ورد يمه مثلهم
موش ابونه اليزرعلهم بساتين
يمه مو گلتيلي مره
ابن ادم اطباعه تهم ما يهم لونه
يمه مو گلتيلي
يمه ثاري بس الگمر بالدنيا يحبنه
علينه يسهر دوم ما غمض عيونه
يمه خاف الگمر هم ينباع والهم يشترونه
يمه خاف الگمر هم ينباع والهم يشترونه

نائل الاسمر...


گتلها
نسيت وگالت تچذب

انتَ أول ابنادم يعرگ من يحب

والـ مثلك يتيه بـ عالم النسيان

مثل ذاك الضَوه الـ يختنگ بـ المغرب

گتلها بَعد للسفر ماكو شراع

خايف نغرگ وما نگدر نچلب

وگتلها بَعد حيلي أنچفه وما فيد

گالتلي السيوف الـ باشطه تحدب

وگتلها فقير شعاجبچ بـ العوز

گالتلي الفقير بـ كلهن معزب

وبچت وأسمعها گالت لو إلك لو اموت

گلتلها الحچي الـ ما يَنحچي يتعب

مو صاحب طويله وگلبي عايش خوف

وتفززه القطره الـ تَنزل من الحِب

وگالتلي صبر يعقوب وايوبين

متانيتك بعدني وعـ الهلال أحسب

وهاك أخذ القلم وأكتب وهنه اثنين

لو ورقه وفاتي لو عقد تكتب

وما فاد الحچي ورديت لـ أول بيت

وگتلها نسيت وگالت تچذب

،

(كونو حريصين على قراءة القصيدة الى نهايتها)

طارق صبار


انا جاي من الشمس
صوتي شرارة
وسكتتي بركان من جوّه الثلج
ملتهبة ناره
من بلاد الفقراء
بلد بيْه ممنوع
دمعة طفل ترجف بالعراء
يخنگ بصدره عبرته ..
وسط ارصفة البكاء
بلد بيْه ممنوع
ترگص شفّة الموسيقى
ولسان الصور والشعراء
بلد بيْه مسدود شباچ
الضماير والدفاتر
والمشاعر والنساء
بلد بيْه ممنوع كلشي ..
الاّ ساحة كربلاء
من رسالة دمّه تتغذى الحروب
وتشرب احساسه جگاره
ورغم برد الموت
مليانة مساماته حراره
انا جاي من الشمس
گلبي شعب ينبض عطاء
رغم كل اجروحه
بس عاش بكرامة وكبرياء
جروح تمتد للنجم رگبة مناره
انا جاي من الشمس حسرات
روحي اتنشّف اثياب الحضاره
انثلمت اخر نجمة
من طرف الصبح
من وادعتني
وگذلة ابنيّة خذتني
گالت : عيونك سبتني
إلي كل دگات گلبك
إلي كل عيون خطواتك
وهمس تراب دربك
گلت: ياحلوه إلي
إلي كلشي بگلب عشاگج إلي
الي كلشي بروح عشاگج الي
إلي الله
وصبري
وحچاية علي
الي عمر النهر
واطباع المواسم
الي عرگات الفلح والساجية
وكل نبع هايم
الي كل وردة ذبل بيها الندى
وكل جفن حالم
انا جاي من السواتر
أرسم البسمة
على بيبان انتظار الامهات
أشهگ بكل شاب
يرجع لهله سالم
الي .. الي .. الي
گالت : الك كل دگات گلبي
الك كل عيون دربي
الك حبي ياحبيبي يا .... ؟
گلت ياعيني الشمس انه العراق .

علي نغيمش...

گلبي تعبني اعله ناسي
مدري شمخلف وناسي

أتعبت وانه اعيش الهم
اريداً مره اعيشاً لي
أتعبت من كل شي يعنيهم
أتعبت من اسأل اعليهم
أتعبت من كل شي مابيه

أتعبت
چم دوب ابرر بير هم اطفح
أتعبت مانفع بيهم صح

خلصت الجفن مبلول
لياحد ابقى وياهم گلب بهلول

لا انه النرجسي واگطع مرار ال ليش
ولا هم كيش

بحر وانه العلية اضماي
نار وبارد الملگاي
بنص الماي مامش ماي

شربة مرحبا مرو چذب عالحال
شگد ننطر تعال
شظل صدگ عالبال

شبگة منهم وگولاً حسبت اغنية
شبگة منهم انانية
شبگة الهم بعد بية

شيريدون ليش انه
چا راس العليهم ريش
چا بس انه وجهي تصوفر الوانه
چا بس انه ذاك انه
ولا فد يوم غار وغير امچانه
ولا گال انه ثم انه

وكت خله التعب مذموم
وكت مايرحم ومرحوم

ماحاجة السعف للريح حتى تگول
ولامحتاجهم مشلول
كل شي صار شي معقول

تگدر تمشي وحدك بدوي بالصحرة
وتگدر ياسمچ تگضي النهر فطرة

بس ياهو اليگلك عينهم تبرد
منو يضمنلي محد مايحسده احد

مصطفى الاشتراني


الليله بيها عيون ابوي
ودمعة امي
وحزن اخوي
وشهگت هدوم العـتب
والسرگي فك بسمار ثغره

الليله
ضايع والخساره هواي للماعنده شي خاطر يخسره

يمه
رتلني التعب وستاحشيت التف عليچ
اشتم رگبتچ
بيچ اطيح
ادموع فقره

ياروازين الشمس باگتنه منچ
ونتي شباچين گمره

كون
احط روحي
بصليب
وبيدي اشد رجلي اع اديه
وگلبي اخنگه
وحلگي اضفره

وكون افز فزت جنايز
ونزف عيوني برضاتي
وكل عزيز بروحي اكسره

حيدر هادي الخفاجي

(مرسوم شعبي)

سأُعَيِّنُ قَحْبَةَ شارِعِنا
بوَظيفَةِ خازِنِ بَيْتِ المالْ
واعيِّنُ أُخْتَ القَحْبَةِ نائِبَةً
في المجلسِ
تُعنى بغَسيلِ الأموالْ
وسأُصْدِرُ مَرسوماً

لأعيِّنَ إبْنَ القَحْبَةِ
في جيشي جَنِرالْ
بلدي يحتاجُ لعاهرةٍ
أكثرَ شرفاً
مِنْ رَجُلِ الدينِ الدجّالْ
القَحْبَةُ أكثَرُ طهراً في بلدي
من ايِّ سياسيٍ محتالْ
القحبَةُ انزهُ من شيخٍ نَجِسٍ بعقالْ
يسرق ابناءَ عشيرتِهِ ليلاً

وصباحاً يمدَحُهُ المِهوالْ
حين يصير الخَمرُ حراماً
لكنْ موتُ الناسِ حَلالْ
سوفَ يصيرُ غِطاءُ سريرِ القَحْبَةِ عَلَماً
فوقَ دوائرِنا الرسميَّةِ
والخَتمُ السرّيُّ نعالْ
هذا المرسومُ بإسْمِ الشَعبِ
لعلّ القَحبَةَ تنجحُ في تغييرِ الحالْ

عبدالله راهي


سهران وألم بالشوف..

مدري شطايح بروحي تعب لو واحد يغني؟

لو ظلمه ومسافة خوف..

روحي تفك فرحها بساع بس تاخذ حزنها جفوف..

روحي ومدري وين تريد ليليه اعله ديره تطوف..

أحب ربعي وأحب امي التكلي شبيك
ياوحشت رسايلنه العمرها زغير..
انه وأنته مدري منين بس الكل شعار نصير.

جبيره الشاره البروحك..

اخاف من الشعر ينسه ويذم بين العمر صبحك..

زغيره العافيه بلياك
يلمتبدي برسومي أغاني وسالفه وجرحك..

انه لباب المتانيك..

انه الطيف المتانيك ترمش حته اكلك جاي..
تجيني ويه العطش كطره وأصوغنك شعب من ماي..

حيطان وسهر متبدي ع الشباج
بس يتنفس الشاعر اذا ماصايغ الشباج..

أحس ثورة شعب بيه ونثايه تنوح..
مدري شيجري يم كلبي احس روحي تجيس بروح..

خوف يشد ظلام العين
ويكسر الظوه اعله الباب..
وناس تحب ضحكتي وياك نعمه وعندي لون احباب..

كون گبرك يالحسن بالناصرية *

الناصرية العظيمة و الكبير محسن الدخيلي ...




افا .. يحيف الله ..
لا مزار ولا صحن وبلا بِنية
كون گبرك يالحسن بالناصرية
والله تبجي الناصرية ..تبجي الناصرية
عيونها التنزف مرارة
اترابها الينزف حضارة
انت شايف كربلا بيوم الزيارة؟
انت ابن حيدر علي ..!!!! حيدر علي!!!
ومالك مزار؟؟؟
وعدنه سيد جابر بگبة ومنارة!!
كون گبرك يالحسن بالناصرية
خاف گالولك خبيثة!
والله بيضه اگلوب اهلنه
اسأل الحبوبي عنّه ..
شيعة كلنه ..
واكبر جامع بـ ذي قار
گبة جامع الســنة ..
لأن بيضه گلوب اهلنه
خاف گالولك خبيثة ..
نعم ..عسرة الناصرية وما تمض بيها السنون
اولاية صعبة الناصرية اتغذت بحلگ السجون
اولاية توجع..!
خشم سمرة الناصرية ..!!
خشم سمرة الناصرية وشتموها
الشتموها افضالة الما يستحون ..
الناصرية ولايتك كتبت شعارك
انت ..انت ..لا ولاية ولا خلافه ولا امارة...
غيرك وغير الحسين ..
ولا حمل من غير حملك حملته
ﭼـم يزيد الصار وگفت سبته
وﭼـم عظم ريس ..صعب بس بلعته
وﭼـم عزيز الراح مارد ..بالحلم سب الحكومة ..
وراح من تقرير مرته الكتبته ..
كون گبرك يالحسن بالناصرية...
ولو ما يرجع بعد ذاك الزمن
بس هيه منوه ..
هيج ويسويها الله وبخت ابوك
وصايم برمضان وافطر بالصحن
ومن ارد لـ اهلي اگلهم
والله بابا اليوم شو مالي خلگ
وبراسي حسبة ورحت ازور
والا اگل لـ اهلي جنت يم الحسن
لا مزار ولا گبر و لا بِنية ...
يمن فدوة يروحلك ذاك الوطن ..

ناظم السماوي (عشگ اخضر )


اريدك بالحلم خطار مر بيه عشك اخضر
واتيه نجمه بسنينك ادور طيفك الــما مر

خذانه الواهس من بعيد نزف شموعنه بشوكك
مشينه وايد تشبج ايد ننــــــاغي الروح بطيوفك
العمر من غير حب شيفيد لمني بعصرة جفوفك

ياريحة مسج ياهيل
عذبني ونيــن الليل

شكلك وانته نسمة صيف شكــــــــلك يالذهب شعرك
لاجن مـــــــاتحب ياحيف تصد وتعذب بهـــــجرك
وادلل بالصبر سنتين خلص صبري الحمل صبرك

يكــحله بجفن كل سمره
تره الدنيه بطرك عشره

اجيتك من بعد غربه اجيت بليله كمريه
هذاك اني نبع صافي يخايب دغش مابيه
اجيتك والعتب بالعين عتب عاشك بحنيه

واكلك هجرك شسوه
لون ادري فلا اهوه

ودعت السماوة بليل وهزني الشوك بالحسرة ..
أسافر لا صديج وياي ..
بس جدمي النكل صبره

وظليت بطرك روحي.. واتجه على جروحي..
وياحيف والف ياحيف..
عبنك مو صدك صاحب..

كضت والدنيا مكضية...
هدني .. هدني ولاتعت بيه

دفنت العشك بالغربه.. بعد لولايتك مارد
شكبنت العشك والظيم ..اظن ع الظيم متواعد

خساره التعب ضيعته ..شعر ماينشره وبعته ..
وياحيف والف ياحيف... شبكت سنينك المرت
.. مثل شبكت البرديه ..هدني ..
هدني لاتعت بيه

عزيز السماوي

اضحك دغش...* كُتبت عام 1966

إضحك دغش للوكت لو ثگل بيك اللوم
وإهذي بسوالف چذب .. وادِمنه اخذها النوم
بيع الضمير إبفلس .. لو عليك السوم
وإكتل نثايه الشرف .. خاف إتحمل فد يوم
دنياك خزرة نذل .. طاف ابسماها البوم
خل تنشد اهل الصدگ.. وين الحميّه إشلون
غمض إعيون العرف .. لو گالوا .. اشيگلون
شاعر ، طفل ، مجنون ..!

إبوجه الأوادم
ندم
يلدنيه شنهو الصار
تدري بگلوب التين .. طافت بثر تيار
عمرك حلم مرتخي.. غرگان وسط العار
رحمه المشي
إبلا گلب
نسّاني اخذ الثار
لو وج مضيف السلف.. شعليّه غاد النار
دخان عمرك صعد.. مذبوح ما يدرون
غمض إعيون العرف.. لو گالوا.. إشيگلون
شاعر، طفل، مجنون..!

أحچي
ابسوالف عطش
وشفافي صارن بيض
والريه تيبس غفل.. مايك لغاد إيفيض
گلبك سفينة غضب.. تدوي إبحور الغيض
بسكوت
مات الشته
والگيظ شايل گيظ
تجري بحروف الشرف.. نهران دم الحيض

إنگل سوالف صلف.. وإمشي إبدرب مسمكون
غمض إعيون العرف.. لو گالوا.. إشيگلون
شاعر، طفل، مجنون..!

ماتت
إوجوه الخجل
صوت النثايه إيصيح
مكتوب معنى الشرف.. برمال اخذها الريح
بالگصه ما ظل عرگ.. والغيره نگطه إتسيح
العر لف النَفِس
ماتسوه
خلها إتطيح
چذب السوالف طفح.. ما ظل مچان إنزيح
صافح إچفوف النذل.. للدنيه ظل ممنون
غمض إعيون العرف.. لو گالوا.. إشيگلون
شاعر، طفل، مجنون..!

محمود اليزل ..

كبران من الحزن. وعيوني ذبلاانه..
ومكابل مرايتي
معقوله هذا انه؟
همه نسونه ومشو..
چا ليش اخلص العمر وياهم متانه!!!!

جا ليش احن عالمشه..واتحسف اعله الراح..
بغربيلي ماجلبو ..
ذبيت بيه السبب غربلت بالمرواح..
ومافاد بيهم تعب..
عشرتهم مكدرة. وما ادري يمته ارتاح..

لا هيه مدة وتفظ.
لا شده وتعدي..
باكو اسنين العمر ضل كلشي ما عدي...

وما ادري وين التفت...
والدنيا بس حيطان..
مسدوده من كل كتر..ونسدت البيبان.
ضليت عايش جذب وصويحبي الدخان..

ومادري وين التفت والدنيا خلصانه..
عاشرت ناس اشكثر كلمن بروحه التها
ومحد بقه ويانه..
دنيا ومشت بالعكس
يمكنها سكرانه..

ماكل عيوني التعب يادنيا شتريدين ..
عوز وبلاوي وسهر وبخاطري تكسرين..
مو مال هذا التعب تدريني ابن عشرين..

ولا وين اضل انتظر.. لاوين ما ادري..
ضميت كل الحجي
وضل يرفس بصدري..

ومعذور لو سولفت..
جيفن خلص صبري..

سمفونيه شعرية اتمنى قرائتها

غانم الفياض


نجمه اتطيح
تفلت من سمه عيوني
تخـــدر
تنتجي اعله الكاع
تلكـــــاني..
شجره اعله الرصيف اواكـف ابكــلبين
واحد ينتجي من الضيم
ع الثاني
تلكــــــاني..
حـلم تعـبـان
ومتاني المسيح ايفوت
وبجفي صليب
وبيه ست اطفال ماتو ليله الميلاد
رسموا فوك خد الموت ست الوان
للحب.والخبز.والماي.والدم.والوطن .والناس
واحد طاح
والخمسه اصابع باقيه ابجــفي
ومتاني المسيح ايفوت
امتاني المشو بلكن يجون وبيدهم عنوان
غركت كل سفن ربعي وكلاها الليل
مدري شلون عمري انباك
والتم اعله بالي وخيم النسيان
يتمدد على عيوني الندم
فد يوم..
جاني النخل كله ابلهفه العطشان
ومحمل تراجي ابلون عمري الفات
امتدت اديِِهّ وضاع بيهه الشوف
جابت تمره وحده وعافت البستان
بيني وبين وجه امي
عمر يمتد مسافه خوف
وبيني وبين اول بيت بالدنيه
ظلام
وموت يعبر والطريق سيوف
وبيني وبين وجهك ليل
طش ثوبه.......وخنك صبحه
روحي امرايه المجتول
وسنين العمر حلمين
وعيون التغمض بالفشل وكحه
وادري العود من يحله
الجفوف الزرعته
اتذبحه
سد الباب
غم صدر اليشيل الضيم ما يكدر
يكــّسر وحــّــده البيبان
ما خليك تقراني
وتعرف كل مساماتي
وتدك ابحافرك فوك الجرح نيشان
ما دليك بجروحي.
وعناوين الطيور الغافيه ابروحي
وبصمات النخل
والكاع
والنهران
ما غمض جفن والليل شايل سيف
ما اخلي الخريف ايفوت
واوراق الشجر
ذمه
او ... وصيه ابركبه الانسان
شضيني علكيفك
طشني بيدي الموت
ماتشطب هويتي
وصوتي بيه الموت
اصير بكل شضيه
السان .. صوت
وكل شضيه تهد عليك
تريد ثاري انسان

محسن عطيوي


( تهمة شريف )

دگ بابي شرطي الأمن
وشايل ضرف بيده

مكتوب فوگ الضرف
المشتكي بلا شرف
مسؤول عنده حزب
وبلغني تهديده

عنده عشيره همج
وشيخ ( الدواب ) الذكي !
راضوع ثدي الحزب
شبعان دم وجذب
وجوعان غيره وبخت
والقتل تعويده

وگبال قاضي العدل
المسؤول وجها ضحك
مكيف بجاويده

گتله الشكيه شنو ؟
گال انت عندك شرف !
تحرض عليه الفقر
وما دام عندي حزب الشرف ما ريده

والقاضي ماله خلگ
بطراف اديه بالقلم
وقع عليه الحكم
صفگوا وتباوسوا
وگال انت حُكمك سجن
والحُكم ما عيده

اهنانه دمي انتفض
والمثلي ما يلام

سبيتهم بالسره
من القاضي لاخر (جحش) بعگاله يمسح جام

انتم اخياس الارض
تجار دم الشعب
وبليس بيكم نام

باجر الفقره تجي
وتسوي منكم ( نعّل )
يااا عجم يااا أقزاااام

ورشيت دمي حجي
وحكمت روحي اعدام