(معلومات مبعثرة)

كتبها ...حسين السور


چوية البارود ...... موته
الملگه فاهي؛ بلا شرار

الجنه ما تنطيك كل شي
ما تسير بيها نار !!

الجرح مرات صيت
الجبل مجروح غار

شما تعب نام اعله دربه
هيچ گاضيها القطار

وصفنة الشباچ .... موعد
مشية المخيط.... حَبِي !!

اغلط گبال اليكرهك ... شوفه يتحول نبي !

جدام كل نهران... شگ !!
عيڜة البسمار.... دگ !!
غلطة الغلطان ... حگ!!

ساعة الفرگه ..... دهر
نومة الفاگد ... سهر
ضحكة الفشله... قهر

ما مشه بزود بحياته
راي ما عنده النهر؛؛

الحلم مو دومه وهم
حچايه التغثك ...سهم

الشارد من الوطن ليش ... بجنطته تلگه العلم

اليكبر يضل اعله طبعه !
طيحة الروج اعله ربعه!

سوالف المو گدها ذِل
تريد تغله : هواي قل
اسم الله للمكروه حل

شنهي بالضلمه إشـ حچوله
وطلع مكسور الـ يِهل ؟!

ويا ابن ادم
كون تلگالك وطن مابي حرب
كون تلگالك ابن ادم ينشرب

يابن ادم

كافي عايش تنطلب
كافي دومك تنغلب

يا فشلته الطايح گبال الغرب!

ماعدهه رجل بس هي مدري شلون
ترفس بالضلوع حجاية البطران


حسين السيد نور ... وقصيدته


رجفت شففتڬ واتبده منهه الصوت
ومو وجهڬ کلامڬ گام ینطی الوان

من رجفڬ عرفت الغیری راح اتروح!
من یرجف بعد مایرجع الفنجان

هوه اشگد وابفرگتڬ مدری وین ایضیع!
احس من گد خنگتی ایبذر الغرگان!

حارگ صورتی؟امدنیهه یم النار!؟
امس باوسنی جاری ابوجهی شم دخان!

رسایل عشرتڬ تارسهه کلهه احساس!
من ینشگ حرف ینکتل بیه انسان!

بس الگعد وحدة ایعرف طول الیل!
السولف للصبح ماینحسب سهران!

اذا مششط چنت من شعری یوگع رای!
هسه الدرب واحد وآنه بی حیران!

وچنت هیبه امن اسولف تسکت الخیرین!
بعدک سولفت ماسکتت الخرسان!

نکتب علشجر والذکریات اهوای!
دفتر ذکریاتی ابعشرتک بستان!

آنه ابکل مکان امخلی بیک آثار!
حته النفس مالڬ عدی بی نیشان!

ابرگبتڬ من بست خلیت اثر بلصوت!
و امن الشبگ ضلڬ بی اثر ضرعان!

من گدما ذکرتڬ هزلت طرواڬ!
اسمک لوتنکته ایطیح منه السان!

وجهی امن الصفار الظهر ماینشاف !
چانت لو امقطه اتشوفنی العمیان!

وتجاعید الوجه ینقرف منهن مای!
کون ابعصر نوح اینشفن الطوفان!

وماعدهه رجل بس هیه مدری اشلون!
ترفس بلضلوع احچایت البطران!

ومن کثر الدمع یزلگ ابعینی الطیف!
لعیونی ابوجودڬ حافی یدخل چان!

چنت افرڬ اعیونی اتبلل ایدی احلام!
بحیث امن ایدی ابین لوچنت حلمان!

انه ابنص الصخر بلشعره حافر بیر!
هسه امن ارمش افحط کثر ماتعبان!

وگدما انتچی اعله الگاع حته الدود !
سکن بخطوط ادیه و هاجر الگیعان!

ابدمعی اتغسلت واتچفنت بلشیب!
انه اجنازه ابغیابڬ عوزی بس دفان...

باسم الخاقاني


كلبي اعله كدي
وحزنك هواي
ورايد كلوب تشيلك وياي
مقهور وحدي مكابل جفاك
صبخة الكلوب وضحكتك ماي

نار الجفه
والروح خشبة
والموت .. يكتبني وأكتبه
ضميتلك للملگة لو جيت.!
يَسمر عطر من التحبه

صوتك حرير ملفلف الروح
وحجايتك بالروح عذبه
كونك ترد مثل اليردون
وآنه بحلم وجفاك جذبه

يرادلك جم عين تقراك

بعيني سوالف جنهن جفاك
كاسر ضهر ياضهر مثلوم
بصحة المات اعله فركاك

قصيدة (شبگة روح)

للكبير عبد الكريم القصاب

فززني طيف الهوى وجيت امشي جدامه...

ثاري الزعل بالگلب يجرح مثل جامه...

اطبعني بوسة وجن فوگ احترگ شامه...

گلب المفارگ غصب سچه لمشي اجدامه...

حسيت گبل الجفه جرح الحبيب انزاح...

ورديت كلي خجل سامحني خل ارتاح...

دمعاتي فوك الوجن حنطة عل چف مرواح...

لاگيني ملگة الندى لرويحة القداح...

تعبان من الندم مليان كلي جروح...

گلي هلا ومرحبا والتعب كله يروح...

نادم سبگت الجفه ورديتلك مجروح...

ماريد شبگة خصر محتاج شبگة روح...

...

(يلهويتي بلا وچاد انوب من تهوين وچدي)

(خطاب الشاعر لنفسه بلهجة الندم والتوجيه )

(ردّي) (ردي)

عريان سيد الشعر

ردَي........ردَي.......
يا ظعن شتَ عن هله.....
وحدَاي غربة البيه يحدي.......

ردي ينباع العشك.....
للياكلب تهوين صدَي.......

لا تهيجين الجروح.....
جروحي من تنلجم تدَي......

وانه من دم ولحم......
مو من صخر جبدة العندي......

ردي ملَيت الصبر......
وامكاطر الدمعة اعله خدي......

جورَت ليل الهجر......
واعجزت منه وهذا حدَي.....

بلجي يغفه الجفن......
ما جلمة التنكال بعدي.......

وانه موش اول زند....
.يشتل شلب وايحصَد بردي......

ولانه بس اتغربت......
.والمعتنيله ايصير ضدَي.....
ردي ......ردي.......
مالي حيل امعاتبج.....
.وانه العليج ادَيت جهدي......

غلست من الكلت والكال........
.كمت اسمع واعدَي......

صابرت صبر الطفل....
شربي صبر والحزن مهدي........

واحملت ليل العطش........
وانه العيون السود وردي.....

والله جا ملّ وجزع......
لو قصتي اعله (أيوب) تسدي.....
ردي.......ردي......

يلي عمرج زهلله......
ودنّ وملامه وضيم وعدي.....

نحّي عني امحبتج....
.مالج دليل ايشيل دردي........

يالهويتي ابلا وجاد.....
انّوب من تهوين وجدي......

لا تتلومين اليوّن...
واللوم عالمدرج تعدي......

حطّي جدامج ملام الناس....
.وابمشيج تهدّي.....

وانه مو طبعي العتب.....
عالماحلاله ايصون عهدي...

يا مناحة ذلّتي.......
.وليل الكضيته دموع وحدي......

وانه خلاني الدهر .....
ناعور.....بس
أترس .......وابدّي.....

الاستاذ غانم الفياض

قصيدة (ليش ) كتبت عام 1995

جان وجهك ...
اول ولايات عمري
وآخر ادوروب الضياع

وجانت اعيونك ....
سمه لجنحان حلمي
تيهتني ومن هذاك اليوم ادور..
مالكيت لحلمي كاع

وجانت اعيونك .....
سمه لنجمات كلبي
وكل حلاتك جانت لجنحانه كاع
وجان شعرك ليل واهس
امنت روحي اعله بابه

تيهت روحي وتهت.....

وشما امد شوفي الوكت يكثر ضبابه
الما يحط عينه اعله دربه....
يتيه دروب الوكت
للوكت غابه.....
الما شرب دمع الحزن محد يهابه
وآنه وياك عالدنيا
امتحان وكلمن يحضر جوابه

ﻟﻴﺶ ..
ﻣﻦ ﮔﺘﻠﻚ ﮔﺒﻞ ﻫﺬﺍ ﺍﻟﺪﺭﺏ ﻣﺎ ﺻﺪﮔﺘﻨﻲ .. ؟
ﻭﻟﻴﺶ ..
ﻣﻦ ﮔﺘﻠﻚ ﺑﺴﺎﺗﻴﻦ ﺍﻟﺒﺮﻭﺣﻲ ﺗﺮﻳﺪ ﻓﻴﻚ ﻋﺎﻧﺪﺗﻨﻲ ..؟
ﻭﻟﻴﺶ ..
ﻣﻦ ﮔﺘﻠﻚ ﺗﻌﺎﻝ ﻧﺼﻴﺮ ﻟﻠﺪﻧﻴﻪ ﻭﺭﺩ ﻣﺎ ﻃﺎﻭﻋﺘﻨﻲ ..؟
ﻭﻟﻴﺶ ..
ﻣﻦ ﺑﻌﺖ ﺍﻻﺣﺒﻬﻢ ﻭﺍﺷﺘﺮﻳﺘﻚ ...

ﺃﻧﺘﻪ ﺃﻭﻝ ﻣﺎ ﺣﭽﻮﺍ ﻋﻨﻲ ﺑﻌﺘﻨﻲ ..؟

...

رائعة من روائع ...عامر عاصي

سِعِد بيدك
ضوه بجيدك
واريد ، وگلت ما اريدك
وارد اشتاگ للديره ،
لهواك ،
وهدوة عيونك ،
ويصير اليل نايل
والگلب طيره
عله چفوفك يِحِط ويسولف همومه
صريفتنه بتوالي الليل ،
حزنانه
وتسلّيهه
واشوف البيت ، تفرح بيك حصرانه
واصير انته
وتصير آنه

2
ويصير الناي ، حنيّه

واحس روحي ،
زلف يلعب بترچيّه
واحس يدور .. ألف عصفور
بعيونك يناغيني
واشوف الروح .. حفنه جروح
بظنونك تحاچيني
واشمّك ، ورده بالهجران ذبلانه
گطاية ليل ، تعبانه
ومحنّة والده ، وشبگة غريب ، وعطش صبّيره
واصير انته
وتصير آنه

3
تعال
انته السنين الغرّبتْ غفله
ونسيناهه ، ونست حبنه
تعال ان چان ربّك ياترف ، ربنه
تعال انته ،
نجيك احنه؟
تعال نصير ،
سر ابّير
خايف تنتهي المحنه
ونشوف الدنيه خلصانه
وتروح انته
وأروح آنه

4
نِحِنّْ
ما نگدر نودّع هوه المحبوب
كتبناه عل صخر

واقلامنه الخرنوب
كتبناه عل جفن
والحبر گام يذوب
كتبناه عل گلب
والگلب ظل يلوب
كتبناه عل نهار ، المالفاه غروب
هوه المحبوب دنيانه
تعال انته الحبيب مكلّف ومعتوب
لَوَنْ صار الوكت
مطرگ وسندانه
تعيش انته
واموت آنه

و .. تمر حلم بجفوني
بحر ماس
وشمس خضره
وسفن عشاگ ورديّه
وشراع ابيض

بعيييييد
وجرفك مفضّض
وزغب جنح البلابل غيم
ونجوم بسنابل ديم
وگمر جاهل بديك تمدد وغمّض
وأمر بيك بحلم صحوة
تمر برحي ولبن شچوة
وخبز طابگ
تخبزه امي صباح العيد

وانته تصيد

بسنين العمر وسنينه خلصانه
وارد ردود
ناي وعود
وعاشگ مستحي لسانه
وأصير انته
وتصير آنه

قصائد لم تقرأ ..▼
قصيدة (احديثه )

للكبيـر كاظم اسماعيـل الگاطع ..




احديثه ..
تتمناها نجمه ..الليل كله اتعاين الها
تزهي والفرحه ضويه
املاليه ابوجنة حجلها
احديثه
تتمناها خيط اتشدها فوگ الروح
بثلاثين عگده
ولو تحز رگبة وريدك ما تحلها
ﭼـن حمامة سيد
ايلوذ البخت كلها بجنحها ..
وﭼـن صبغ عاشور حب اعيونها
ولاذ بكحلها
احديثه
ﭼـن فرحة حصاد
ادغدغ اعيون السنابل والزرع
والدنيا الها ..
وجانت الها
وجان هودجها شراشيبه النجوم
وغافية ابفي الطفوله..
ومسعده وملتم شملها ..
وجانت الها الدنيا مرجوحه
وسجاجين الوكت گطعن حبلها!!
وجانت الگذله حـــرير
وهب هوه ونعثر نسلها ..
والفرحه الما دامت الها
الفرحه الما دامت الها
انجفت دجله ..وتبده الماي
واندارت بـ اهلها ..!
وشيبت..
شيبت مثل الربيع المر عليها
وضاعت ادروب الدمع ضحكة جهلها ..
وذيــﭼـه المحسوده
گامت تحسد اليمشون لگبور النجف
جي ما مش اگبور التكت بيها اهلها ..
ضاع ثوب العيد منها ..
وفصلت عاشور ثوب ..
وماي خدها الصافي بالحرگه انخبط ..
حدب ابسكته المضيف
وطاح سگفه اعله الدلال
ومركب العبره فحط..
ظلت الحرثه يتيمه
انعمه اگلوب الطريق
ودار راسه التيل وبشوغه انسمط
وما لگه "اسم الله " التعينه
ولاذ بجروحه وسبط ..
ماتت الهوسه اعله شفة الگايلات
"احنه النخبطها ونشرب صافيها "
وخضرت هوسه جديده ..
هوسة الدنيا الجديده
"احنه نصفيها ونشرب خابطها "
وهاي دنيتنا الجديده
هيجي دنيتنا الجديده
السمج يجتف الفاله
اجتاف بايگ ..والشريعه اتصير بيده
والگمر يگطع اخيوطه بليلة ظلمه
والنجوم البيه ملظومه اتطشر
حگها لو تطفه القصيده
حگها لو تبجي القصيده ..
الزلم سبحه الجفوف السود عمدن طشرنها
و"خرزه"عــن "خرزه" بعيـــده ..

مقطع من قصيدة (اوراق يوميه )

ل... عريان آل سيد خلف

عراريس

التفك زافوفنا واحنه عراريس
جمعنا كلوبنا
وشبت متاريس

زمر يغمز زمر وتورد الكاع
وبريج عيونا ينور فوانيس
توهسنا الصدك حد رفة العين
وعرفنا شلون تنباع النواميس
الطفل من يلعب بخرطوشة امهاد
ويحل وكت الوهف بالصايده يجيس

وعراريس
وزهت بينا الخنادق والممرات
وضوه بوجوهنا وجوه المحلات
يضكنا الموت مره ويكبر الصيت

ونضك الموت.... حد الموت مرات
مرتنا تنزرت ساتر مناجيب
وضفيرتهه بزمر جايوس تلتاث
وطفلنا تعذرت عنه الملاعيب
ولعب بالموزمه
وليل العذابات
وخواطرنا اعلكد ماتوسع الكاع
توج بكل شبر مغصوب رايات

ممات الذل عمر ...وسنين... واجيال

وممات العز تره شماطال لحضات

الشاعر: : : (عباس العبادي)

#قصيدة: : ||خلهن مو وكتهن خاطر احچيهن||

خلهن
مو وكتهن خاطــر احجيهن
يجيني الليل وكعد وانفردبيهن
وافتح بابهن
فتحت جناح الطير
وراويك الماامراويهن
اجروح ابابهن قوس وحضن نشاب
ويرشكني اعله طولي امنين ماجيهن
هجرانك جدم
وجروحي واحة طين
اتظيك ابطونهن ويعرضن اكفيهن

ومن كتلك ادعيلي
اجروح كلبي اكبار
اتذكر كلتلي
الله يخليهن
جابالجذب كتلي الله يشفيهن
وﻻتنشدني عنهن
كلشي مابيهن
حمر من نار هجرك والسهر بليل
بس انت العيونك ماادري شبيهن
جفل غصن العيون
وطار منهن النوم
وبجيت امصاوت المخ وي بواجيهن

انه اعيوني امهات
وفاجدات اوﻻد
خافن ذلتي وما ذبن اعبيهن
من اخر نجم ضك بلهاة النور
ولحد موت الشمس واعبيهن اعليهن

بساتينك زهن
بس شلي بيهن كون
غيري ايشم وردهن وانه اﻻسجيهن
حرام الماي يلعب يم اشاف الشوج
واجروفة العطش يبس جﻻويهن
انه اطيتك اسنيني
ابشحة الساعات
ووصيتك اعليهن موش تطيهن

وانه اسنيني الشموع
الفوك منهن نار
تنزف روسهن واتضيع رجليهن
نبت رمح المساحي بجبدت الكيعان
ﻻجن ماحين لوما مساحيهن

اذا مات الجرح
كثر اللجم يحييه
والجروح الكبار الموت يحييهن
وﻻتنشدني عنهن
كلشي مابيهن
حمر من نار هجرك والسهر بليل
بس انت العيونك ما ادري شبيهن
انه اعيوني طوس وليلهن ناعور
ينترسن دمع والليل يجفيهن

عباس العبادي 💚🍃

لايوجد خطوط حمراء في العراق سوى دماء الناس


عقيل العرد
………

الشعب لازم يسولف

الظاهر حلوك المناير بيها موس

التوت مو بس للوزير

ومن يشح فيَ الحكومة الفقرة كون تصير فوس

الناس تستاهل تعيش ..الوطن للناس كلها

وشيصير اعله الشعب لو صاح كافي
وشيصير اعله النجف لوصاح كافي
وشيصير اعله الملك لو ثلم تاجه

وفصله حجول وتراجي لكل عروس ؟

احنا من نبني المناير ينتهي دور العمل

ويبدي دور عمامتك وحجايتك ويشيل صوتي

اعله الهوى

اعله الماي

وي طيف الشمس

السياسيين عبادة نكاح

والشعب من يضم صوته يصير جرباية عرس

المنحلة بدم الشعب يثخن عسلها

وبخواشيك الذهب ينضاك ماي وجوهنا ولذة عملها

اللافته البيها شعار الفقرة آيه

النبي يبوس بشفته الچف الحملها

كل مناجلنا صحت والحنطة ضحكت

وكل سمار وجوهنا ( الباجر) اكلها

وكل تعبنا وي الوطن رايح ثواب

وكل شوارب مجلس النواب زفرة

وزحمة من تسطي الحرامية اعله اهلها

انا حريتي قضيتي تعيش اعيش
تموت وايها اندفن

وﻻ تفكر تعتقلني
اني ماتلكاني بيه

انا صرخة بكل كلب ضاك الحزن

اعتقل كل ذاكره وطلعني منها
الشاعر براس الشعب مو بالسجن
.
…… .
اضطهدني براحتك واتشفى بيه

واشطب اسمي من التنانير وخبزها

بطني مليانه قضية

يجي يوم نگلك " ارحل "

بلايه فتوة مرجعية

تجي ساعة الناس تتداين شجاعة وتصرخ " ارحل "

لا تأمن ..
شما خدر ليل السماوة
ينتخي بشعلان ويورث غترته براس مگوار النشامى
ويعتلك للثورة مشعل

متاني يوم اخذ عرگ وجهك والمع بي حذائي

متاني يوم اكل جبدتك وبثواب الفقرة
اطلع حيفي منك


اخذ من الكرسي عود
وشوف روحك
جم فقير يطيح لو نظفت سنك

يجي يوم ونشچخ المنجل بصدرك
ونشرب بدمك ونسكر

كاتبين اغنيتك وجاهز لحنها

شوكت مايدبر ضمير انگله غني

مشتهينك

والجياع اسنين بس تبرد بسنها

انت سويت الشعب مثلك عگارب

والحكومة شما تعافت تكبر ويكتلها ابنها
………………… …… ..

قصيدة رائعه للمبدع ...عقيل العرد


وصيت اليشبهونك

اذا شافوني احن ..يمشون

يلتمون بعيونك

تطيح وي المطر للناس
وافزع ليك جف واعيون
الملم كل معانيك

وارسمك.. بس يشح لونك

اغار عليك من الماي

واغار عليك من ضني

واحبهم من يبوسونك

يا دخان يالما تدري وين تريد

سلملي اعله كلشي بعيد

يا دخان

مر بنجوم كل ديرة

واكتب عالسما بكل لون

يحسين الزلم غيرة

حر حتى الحمام الغازل اكبابك
وما يرضى بسجن جناي

دمك يسرج الدنيا ويطوف الكاع

دمك ينثر اعله الماي للعباس جم ذراع

دمك بالمناير ناي

دمك بالضماير ماي

دمك بالمناجل،
بالمراجل،
بالنخل،
بالصوت
مدري منين دمك جاي

عبد الكريم القصاب


........ طوفان الدم .......

دم ، دم ، دم .

وطن جن مخلوق من دم .

امنين ما تلتفت دم .

الشوارع والشبابيج العفيفه .....

ورزّة البيبان دم .

ندى الغبشه ......

على الورده وعلى السعفه ....

وعلى العش آيطيح دم ،

امنين ما يتلفّت البستان دم ،

امنين ما يتلفّت العصفور دم ،

الحدايق ذابله يصفنة الموت ....

والضفيره الناعمه ......

آتنكَّط على المرجوحه دم ،

اسطور من دم على السبوره ....

وفراشات المدارس ما يفززهن جرس ....

وآتنكَّط القمصان دم .

حنة العريس دم .

الدمع والماي دم ،

الخبز والقاسمه الله ....

وآستكان الجاي دم .

الريج دم .

الكَبور المن عهد قابيل تطلب ثار ....

ما ناشف جرحها ، آيفيض دم .

كل شي بيْه ريحة الدم .

ضاج خلك الحايط آمن اللافتات ......

آسطورهن شلال دم .

الحجي آمنكَع آبدم .

والآقلام التنشره وتنباع مفتاح الجريمه ...

والضمير كّلاص دم .

المآذن بيها صوت آبليس .....

بسم الله يرش عالضحكه دم ،

على الكَذله آيطيح دم .

وطن مفطوم آعلى دم ،

عاشك آمن آكَماطه دم .

عشك مجنون وخرافي ....

آينكَّط آمن الراس دم .

الوطن منذور للشيطان المعمم .....

يظل تجرات دم .

الوطن طوفان دم .

وانا كَلبي كاغد آبيض ،

اشلون حالة كاغد آمسيس آبدم ؟

انا الخواف ..

كاظم اسماعيل الگاطع


انا الخواف يا دنيا ..
انا الخواف من كل شي
لو احلم حلم مو زين ..
اني ارجف گبل رمشي
احط بالباب الف رزه
وافز بالليل الف فزه
وتعز روحي ..
واگل للخوف ظل بالبيت وانا امشي ..
لأن مشغول يا دنيا ..
وانت معذب احوالي
اعبر عالنهر عطشان
والمي مو على بالي
بأولها وخلفتي وياي
شترجاﭺ من تــالي
دنيا وخالفت وياي
بيمن ارتجي والمن
بس اطيور تعبانات
يمي بليل يلتمـــــن
شوالف گلبي ودنياي
بيمن هالگلب امن
تعز روحي واگل للخوف
ظل بالبيت وانا امشي ..

عبد الوهاب الحمداني ...


( شگد موت نگّط عالگلب ) ، والناس صارت غربة

يومية اصادفلي نهر ، مامش ولاية بدربه

ولكم أدورلي وطن ، ما بيه رصاصة بگلبه

عندي حبيبة بلا جنح ملّت طواري التربة

ويّاها اليّه شچم جرح ، عين وتراچي ورگبة

وعدنا نبي ، بس من دمع ، كلما نضيع نشربه

ولكم أريدن لي وطن ما بيه سياسة وأحزاب

ما بيه حبيبة من الصبح تفتح شعرها بسرداب

ولكم اريدن لي وطن ...

بيه غرفة من ماي الضحك ما بيها مفتاح وباب

دلّوني وين ألگى الشعر ، شو كلها تكتب نوّاب

وين الگى شباچ الصبح ، ليل القصايد چذاب

محسن الخياط ...


يلوح خيال الصبح ياريته لاح
ويحكم الحادي على خيله ونوكه

ياكحيله يشوف سبكت بالرواح
وياكحيله العاودت مسبوكه

آنه شوك اليتعب ومايستراح
وشمعة ظلت للصبح معلوكه

وشوكه من ايمر على البر والسفاح
اينّبع ابين النخل واعثوكًه

الزهدي والبرحي خذن نفس اللكاح
لاجن اشكًد الفرق بعثوكه

لا اتنّوج للغزال ابلا اسلاح
ولا تغير ابكاع ما مسحوكه

ولاتنود اويه الغنه وغناك راح
والربابه العزتك مخنوكه

النار هزت بالجدر والفوكه فاح
وشب لفوك الي جنت ما فوكه

طيني اشكر وانته طينك بي ملاح
وخل نشوف بيا حديقة البوكًه

مصطفى الاشتراني ..


هنا عرفنه الثوره للجايع شهاده
هنا عرفنه الذله وال موذله اراده
توكلو بالله الدين مايحتاج ساده

من زمان ولا سمعنه اتهلهل ام عريف بينه

من زمان ولا خواچي تلفلفت بيها المدينه

كافي عدنه الموت عاده
بياوكت مچتولنه يخلص حداده

ثورو
نسوان السلف والهور تحبل من تهد عگدت زلمهن

من زمان ولا شلبنه تخوصر بثنيت وزرهن

من زمان بكسرت الخاطر بعدهن

كافي خل نفزع لبنهن
كافي زحمه نگول حگهن

ياملح صلي اعله جرحك وشهگ الحنضل گزازه
ياملح يربات اهلنه تنام وبحوشك جنازه
ولامطگ للعرجه سرگي شضامها ولله انتوازه

غير
يربات السمر يعگال اهلنه

تساومت
نسوانه بطرفت دراهم وحنه نمنه

تحسرت شبانه بلگمت حلگها ولا طلعنه

نشمرت الشيله اعله نحر ارگابنه وهلبت گعدنه

تعودينه الينكتل نقرا اعله روحه الفاتحه وندفن ولدنه

كافي بالعباس متنه

يا غرابت شيبنه وسكتت جرحنه
وياغزارت شوگنه وچذبت ضحكنه
وياصلافت خوفنه اليرضه بوضعنه

رسالة من الأهواز الى العراق ...
.
.
یاهو منکم
بیه حیل ایشیل حنيوره
و ينيشن عل سهم ؟؟
ياهو منكم ... مشتهي ايشيله العلم ...
اتنگبو ...
عن لا توچدهم الآخ البيها هديتو عليهم ...
اتنادسو من درو ماينفع بچيهم
ذيابه
مرتعهم دمه الشبان ...
و ادموع الثچاله ...
و انتم انتم
تعمي دخان التفگ بحت حچيكم
و انتم انتم
غصون ساجيها الربيع بنحر طفله ...
وانتم احنه
ابيوتنا
و لهجتنه
و اصواباتنه
ودمنه
و قلقنه
وهاي سعفات النخل چنهن اگذلكم
ايخسه الذيل الراد يتعده اعله اسمكم وانتو هامه
اگشاش مده العارچوكم
وانتم الروجه الجنوبيه التخمهم
من كراسيهم
واساميهم تذبهم
غاد
يم ذيچ العمامه

موعود قاسم الرشیدي

عاش مقعدا ومات شهيدا ..الشاعر

حسن الشيخ هادي


من حضن امي.. كبل للكرسي اجيت
ما سمعت ال (فدوه لله) ويمشي كام
اتكسرن خطواتي واحساسي بصباي
الكاع صخره..وجانت الخطوات جام
وسجلوني بصف الاول..واستحيت
الروح احسها تفرفح من اسمع قياام
وابجي كل رفعة علم يوم الخميس
فشله اكعد..والعلم بالساحه كام
بالمرايا امنيتي اشوفن طولي يوم
سنين اباوع طولي بفراشي من انام
وأملوني..اباجر واصبر بقيت
وباجر أتأخر.....واجن عشرين عام
كبرنه....والايام تمشي ,,وما مشيت
وانه والكرسي عشت قصة غرام
وجانت دموعي ..بثكل حسرات ابوي
لو حضر خطبة بنات من العمام
ياهو يرضه بطير مكسور الجناح؟؟؟
والسمه كبال ايده غصت بالحمام
الدمعه سوده من الحزن عالخد تطيح
المادره بحزني يضن بخدودي شام
جفوف اديه استهلكت من الدعاء
وضلت لهذا الوكت رجليه خام
ربي..كعد حظي حتى اكدر اكوم
ربي بس كطرة ضوه لحلك الظلام
وافرح ابدلة عرس مثل البنات
صارت الحسرات بالرية ازدحام
خطوه وحده...امنيتي امشي..بأي طريق
حتى لو للمكبره لوادي السلام

...

اشرف الصافي

للتاريخ ...

التمينه ورحنه تظاهرنه
غبشنه بدمنه وماخفنه
كلها تصيح لا يالحاكم
هاي احزابك ماتحكمنه

وطلعو ربع الحاكم لينه

شالو جم اسلاح وصاحو
ياهو يريد يسقط بينه؟
ياهو اللي طالع عن دينه؟
خل نباوع ... ياهم ذوله
شجاباهم يمنه شذكرهم
شو صارت كلش مطمن
حضرو قناصتنه بسرعه
وجيبو شيخ يشيل القصه
يحرم ويحلل ويصهين

وباكو صوت الجامع ذاك
الجنه بسده شكد نأمن
وحطو صوت من اربيعتهم
كام يأذن
ويصيح مندس اليطلع
هذا يريد يخرب العامر
ومافاد صياحه وضلينه
كتلونه ومامتنه نكابر
و وكفن طلقات اليضربنه
تفاجئنه وضلينه نباوع
ردنه نشوف شلون شصاير
ثاري الدنيا نكلبت بينه
والحاكم طالع متظاهر
.
.
.