رسول محسن


مهضوم مدري شبيه مهضوم ؟
وبعيني مو بسماي الغيوم
عاديي الوجع لو صار كلَ يوم
مامش فرق بي ويه الهدوم
حگي الوجع ، خلاني شايش
كون ابقه ذاك العاش طايش
بس كون ميضل جرحي عايش
مامش خلك يفلان مامش !
ياحزني يلساكن وريدي
مابيه اشيلن گطف بيدي
ياروحي اذا مو موت هيدي
يوم الاموتن يوم عيدي
ماتغفه عيني اله بـ دللول
منحول من الضيم منحول
والحيل صاير ‏حيل مشلول
(سلة البي سل انه مسلول)
بين الجرح والونه لعبي ..
من دمي حد الشوف تعبي
من دمعي محد راد گربي
جرة كحل مجرور گلبي !

مجيد البهادلي

....



يوميه
الشمس تجوي
يفز من نومته لشغله
وترد قبله الشمس للبيت
ويوميه يرد لأمه
بحزن وتراب ومرايات مكسوره
وتلوليله
.
.
نام الولد يالما تهنيت
يبني الوحيد التارس البيت
.
.
هذاك اليوم فز مو مثل كل مره
فز فرحان
فز وعيونه حليانه
اجته أمه
وبجت يمه شكثر حليان بعد امك
شمحليك
وشمترب هدومك بلا ما اوصيك
ووين تريد اشو فرحان
اخذني لكل فرح لايگ على عيونك
گلها
اليوم واحد عشره
اريد الوطن يرجعلي
اريد الگاع ترجعلي
عفيه ابني اليرد گاعه بلا نخوه
عفيه ابني الحله للگاع
طلع بس ما طلع وحده
هو وگلب أمه وبالها
وشيلتها وتبده
((بالروح بالدم نفديك يا عراق))
صاح ومدري شتبده
وصل جوه جسر العماره
وهناك العراق بكيفهم خلو
يحلونه ويغلونه ويحبونه
نسه اسمه
نسه أمه
نسه روحه
اليگلي منين
عراقي انا
((يعماره ابنج بايع روحه))
هوس واشتعل دمه
مشت الايام
ثالث يوم
رابع يوم
عاشر يوم
شهر
خلص وبعده يصيح
بعد يدلي بالتابوت
بعده يموت
ماتو ربعه
جيرانه ابن عمه
ودخان المسيل يدلي بالتاريخ
يريد دموع
فوگ الظيم
يريد يرده
بس مو هيج
شكو دخان ما رد المطر للغيم
رد مجروح
رد هو وجگاره وعلم
رد يشفه
هنا گالتله أمه
ابني الوطن غالي اخذني وياك

((لفت عصابتها ونزفه
گلها الدم وگالت وسفه
يا محلاتك موت الصدفه ))
مشت جوه جسر العماره
گعدت ما ادري شتريد
بس بعيونهه ثوره
ونشيد وناس
نشيد يدلي المتيه
نشيد يلوگ للفارگ حضن دافي
وابنها تمدد اعله الگاع
حط راسه اعله رجل أمه
غفه وگالت غفه الما عايف جتافي
غفه توه
واجه فزاع
گومو ساحة التحرير
محتاجتكم بسدهه
گالتله امشي
جا وانتي
هذول الولد هم ولدي ولك امشي
مشه
وعاف أمه جوه الجسر يم اهله
وصل لهناك
عراقيين
عراقيين
صليب ومسلم من بعيد واحد حاضن الثاني
وابو التك تك كتب لافته اعله عيونه
اليريد يموت
بلا ليصيح يلگاني
بلا ميموت يلگاني
وره ميموت يلگاني
ركض من فرحته وغنه
((عش هكذا في علو أيها العلم
فأننا بك بعد الله نعتصم
أن العيون قريرات بما شهدت
والقلب يفرح والآمال تبتسم
أن احتقرت فأن الشعب محتقرآ
وأن احترمت فأن الشعب محترم))
الله يا هذاك اليوم
يبجي ويضحك ويركض
مسيل دموعهم ما نزل دموعه
نزل دمعه بلا گلبه
يم فلكة الخلاني نسه گلبه
مشه لجسر السنك بعيون متأذيه
ودمع يجوي
كتب ع حايط اليمه
((يعماره ابنج بايع روحه))
مشه ورد
للكتابه البقت ع حايط
شخبط فوگها
والناس كلها تباوع شرايد
شني السواه
مسح اسم العماره وهو من عدها
كتب ع حايط اليمها
((يعراق ابنك بايع روحه))
بجو صفگو ضحكو
حارو يفرحون لو يبجون
صعد ع المطعم التركي
جبل تشرين
صعد شاف العراق احله
اااه يا ساحة التحرير
كل ما تذبل عيون العراقيه
نزيف الدم صبح كحله
رمي عالي
ورمح عالي
ونحر يمطر مفاتيحه ع المسجون
مشه للرمي بلا گلبه
صوت الرمي يدلي الناس
َبس صوت
ال ((بالروح بالدم نفديك يا عراق))
جان اعله
يصيح وعينه حمره بلون دم الشاب البصفه
يصيح
وأمه تنتظره يرد يدفه
يصيح
وكلشي بعيونه يدلي النار بالسعفه
يصيح
ومات
ابو القناص يندل العراقيين
مو صدفه
رد لأمه وعلم فوگاه
تلگته هلاهل من العماره
هلاهل وصلت لگلبه رغم ميت
((عفيه ابني گل للظلم كافي
مات ابني من موت العوافي
صافي مشه للگبر صافي
عفيه ابني مات وما انذل يوم
شغله وطلعته بنفس الهدوم
ما گال لأحد انا ملجوم )

نبيل الخفاجي . في سفر ممتع .. !!


اكتب اسمك
عالعلم واضحك نشيد..

ولاتعيد..بساع تنمل!!
غردلهم مره وحده اويه الفجر
بس لاتعيد..

المايسمعك صم خساير
واليحب يسمع نشيدك
يشمر اذنه اعله الغصن ويتاني صوتك
صبح يضحك..

ولااتاني احد يمدحك..
وانت شاعر مو بعازه من ينصحك..

لاتخلي اليسوه
والمايسوه يتملعب بجرحك..

دير وجهك!!
وامشي غيمه بهوى إشمالي!!
تفر الاولايات سكته إو وين ماطاحت تطيح..

الدنيه
مو مال انتضار!!
الدنيه ريح..

الدنيه ريح!!
وهذا طبعك بدله كافي شگد صريح..؟

الناس ناس… و انت ناس!!
شمالك تحب التعب..؟؟

انت چم مره
قميصك شگگوه؟
بحجة ال ليش؟..وعتب..

ردلي گصتك!!
المن معلگ صورهم؟
وليش اغانيك حزينه؟
او..وادمك شو ملتهين بغير عينك..

انت شاعر!!..ليش تبچي؟
احضن سمارك...يسوه ديره!!
ولاتبوس چفوف غيرك بوس ادينك..

انت شاعر!!
صير در صيني اليرغبك يعتنيلك..

لاتطشر احلامك
بدرب النسوك ارماد تنور بعجاج!!
صير نوح الدنيه ماي..

دوه صير ل
گلبك اليضحك نهار
الناس داي..!!
الليل داي..!!
العتب داي..!!

الليش تأخير او..وكتنه العمره صوت
مايفرط بالثواني..
ولايتاني احد يِتاني..

انت شاعر!!
اغبش اويه الضوه اشعاع
وفجر يسوه!!
يلاعب سطوح المدينه..

ولاتخلي ابابهم روحك رهينه..

مر على اشجار الحدايق
گلهه اگعدي و لِم عصافير الزقاق!!
وسَير لآخر ستاره طوير حب..

انكث تراب النسوك
وعيش من گلب وگلب..

الشته إبابك لايجيسك!!
دفي گلبك بيش ماچان انت غالي
حتى لو تحرگ صورهم..

انت شاعر

عبد الوهاب الحمداني

هواك يريد حِنّة عيد تترس كل صوانيها
و آنه بطرگ حزن امي او نعاويها

وحلم كلساع يلبس ثوب ما چنّه حلم حافي
ولا چن الشعر مرغوب
كلها اتصيحلك كافي

اليريد اينام بين الگاع والتنور لازم يعبد الخبزه
ولازم يحضن الحلاج حتى يرافگ المغزه

تره بلايه ضوه السچين ما نندل وحي إسماعيل
ولا نفهم حچي النواب من يسولف اعله الريل

يا سجيل ،
هذا ابرهه ابعمري شتنتظر يا جيل ؟

مليت المعاتب وي نده الغبشه
او مليت الخناجر من كثر ما موت
كلمن يحلم بكبشه

فقار الكرخي ...في بلدي

في بلدي
لازم نموت بكل وكت
والبشر صاير سلعه

في بلدي
احزاب تسرق بالنفط
والشعب حصته الدمعه

في بلدي
ام الشهيد اتبهذلت
بنص الزلم ومفرعه

في بلدي
المسؤول اطرش لو نذل
عالشعب يثكل سمعه

في بلدي
غاب الترابط بالمحن
كلمن يحير بوضعه

في بلدي
بوجوهنه تلكة الملح
بس الحكومة ملمعه

في بلدي
نصها حواسم ساكنة
و ريسنه ساكن قلعه

في بلدي
القانون ضد هذا الشعب
هو الحرامي مشرعه

في بلدي
اكبر انجاز بهالبلد
عالنت نجي ونكطعه

في بلدي
العاطلين اعلة العمل
ما حصلو اي دفعه

في بلدي
التعيين للناس العرف
وللفقرة كالو قرعه

الشاعر عبد الكريم القصاب .
..

قصيدة (الله يشوف بالدخـان) .


ليل ، ....

ويا حلاة الليل من جان الكَمر شفّاف .

هسّه الليل آبد مو ليل ،

ليل آعمى وسما سرداب ،

واللي آيطيح ماينشاف .

انجوم آنشوف بيها آوجوهنا وننام ،

صار آسنين ما تنشاف .

مخالب ريح سوده آتمرعد البيبان ،

تلْكَط كل حلو وشفّاف .

ريح بلا عكَل سولتها بالبيبان ،

والوادم ورك صفصاف .

اجروح آعزاز مشروره على الصفنات ،

اشكثر بيها ونين آيبات !!

اشكثر بيها نـزيـز آيبات !!

وما غير الدمع لفّاف .

مامش خيط من منديل ....

يندل وجنة الدمعه ،

مامش عين تشعل بالجـرح شمعه .

جا يمته الجرح ينشاف ؟

كل شي آمدخّن آمدخّن لَحَد الله ،

وما ظلّن آدروب آنظاف .

جم كَذلة حرير بلا مشط غبشه ؟

جم عصفور ينطـر جدحة الغبشه ؟

جم دكَة جرس مخنوكَه بالوحشه ؟

جم ورده بلايه آشفاف ؟

كل شي آمدخّن آمدخّن لَحَد الله .
.
بس الله بقى ينشاف .

ديره اجروفها دخان ،

ديره آثـيـابـها دخان ،

ديره آنفاسـها دخان ،

اشلون آيعيش بيها آنسان !؟

مصلوب الحنين آعيون عالشباج ،

هلبت جدحه من الله .....

برفع خيط آبره للعريان .

كل شي آمسرّد ومامش درب للخيط ،

كل شي آمدخّــن وماش درب للخيط ،

كل لحظه تدك الريح عالبيبان ،

كل لحظه يوج بستان ،

كل لحظه يوج اِنسـان ،




والله آيشوف بالدخان .

ياسر الانصاري

امس
شفتك حنين مـعلگ اعلى البوب
شفتك تختل بعمري ذنب ، مايدري وين يتوب

هلبت بالدرب وألگة الوطن صدفة !
ويلمنه التعب
والخوف
والرجفة
ونتشابگ وابوس خشونته الترفة

ويدليني على عيوني خذاهن ياحزن مني
ويعيشني السنين الضامهن عني
ونمشي ثنينه تايه لگة تايه
واضل ابچيلة ويغني

واگلة الغربة ماتعرف تلم عاشگ
ولوما انت ما ننجبر ونفارگ
انت اول وطن مبيوگ فاتح حضنه للبايگ

واگله اغفة اعلى چفي ، وخل الوليك
تطيح انت ونعاوي امي تجي تشيلك
معلمنه
النهار نموتلك ، بالليل نبچيلك ..


....

المبدع. .عمار سالم
وقصيدة
(طرف چكليت )

جانت جيتك بشاره
وصارت ضيجة المشلول ادي والموت بكتاره
وكلبي أصبح كلب جتال خايف حته من داره
وكلبك دار ابو المكتول
موش بحال خطاره
وانا الماطاب خاطر ياخذ بثاره
وانته المو سهل ملكاك .. چمه ويرادله دواره
عايل بس عزيز ديار
كلها تضيع اخباره

وتوسطت الكلب فاله
ماينفع بعد تنشال... يا چتال
وعكب جرحك مثل كصة جناح الطير
ساويت الخلك بالبال
وبغير موادعك للروح ماخليت كل چاره

وبملكاك اضمن وجهي عنك ضمة جروحي
ومثل رسم البيارغ
ماترف روحي

ي مچمل العطش منه
ماي ابير ابد مابيك تتعنه
وموش بعازتك وجفوفي شالنه
حملي شما يطول يخف ...صبغ حنه

وماضلينه باب اباب من كون البيوت خيام
جا شلنه
امس حلمك جنت وتريدني ادنه
ثاري عيون جاهل عندك بمصباح ينسنه

اهتمامي الخربك مثل الملح عالزاد
كون ايدل علي ماتعرف اكدارة
يخرب مو بنادم حته طبع الزاد كون يدل علي ماتعرف اكداره
بكلبك طرفتني وماحسبت حساب
جنح الطير بي تطرف كباره
الحمل مو بالكبر عاين على البستان
الحمل بكباره وزغاره
وماصدك ..
لجن مازعل الجذاب ... بوجهه مصدك اعذاره
وعنك مانشدت شجاي مو تقصير ..ماظنيت تسيارة
ومعزب العرب ماينشد كبل
الثلثت ايام خطاره

وانا الطبيت كلبك ماصرت حاجوز منك ماردت مهرب
وشفتني صواب ..يمك ماردتني اكرب

ومثل مجرى النهر وياك
رايح لو شفتني اندار تلكه العايفك مجبل
ومثل صوت الرعيد بعشرتك وياي
تبطي بجيتك ..وتروح مستعجل

يكاتل جلمة الياريت
غيرك يمي حسبة زاد ماينكاملك لوجيت
وبعد نتلاكه ماظنيت
وانت امشيت
وانه امشيت
واحد عكس الآخر
جن طرف جكليت

حسام مهاوي ...


بعد راح اعيوني شدن حيلچن
ارد اشم عطاب من أشكيلـچن

العين ما تغفـى أعله چلمـة راجعين !
الا كون تشوفهم ردو صدگ

يمالح حد المروه
الصحره بشوفتك تروه
هضيـه بكل سهولـه تروح يالحبيتني بگوه

اثاري الماي مثل الناس هم يخرب
اثاري الگلبـه مثل الشيب ما ينحب

لا تهم !
ماحسبينك رمش عدهم
وما يحنون شعلامك بس تحن

بيش أقنــع أعيوني غيرك يشتهن
ستاحشيتك غربـه وبچيتك وطن !

تلاحگلي !
گبل لا يصحى بيـه الشيب

قميصك مالـه داعي يضم مراسيلك

چم مسلم .. لحد
من شاف فيّ خصرك

ياحبيبي
فياي نحرك
لايــگ اعلـه فياي شفتي

دوهنتني !
يل جبتني من المناغـه .. بديرة مناشغ عفتني ،،

تغطيني بسعف صدرك
وتشبگني ورد أنهد ،،
وندفه ثنينـه ونبرد
كل ذني
يصيرن كون
يمته يجيسنـه المحد ؟

يم داركم
مو صدفـه وداني الدرب
انه المشيت بحسرتي
مخنوگ والريـه بچت رادت تشم اترابكم

-

كُلَّما أَوْقَدُوا ناراً لِلْحَرْبِ أَطْفَأَهَا اللَّـهُ وَ يَسْعَوْن فِي الْأَرْضِ فَساداً وَ اللَّـهُ لا يُحِبُّ الْمُفْسِدِينَ

#بردآ_وسلامآ_بغداد_السلام

من القصائد الممتعة ...للشاعر

ياسر فليح

شسالفة وعزيت روحك مرتين ؟
لا والتكتلك ظال غالي ومريود !!

_مكَفاك
_والشارع
_والله لفوكَاك
_والناس
_والمو ناس
عالفشلة شهود ...

(صدفة والف موعد وجف وفنجان ...)
يفتحلي بابك والكَي وجهك مسدود

شفتك سمة وظليت احلم بجناح
من ليل شعرك جنت مدري شموعود !!

شسالفة .. وبعدين جرت بعدين
لحد مارحت منا ومنا مكَيود
الليل ينصح ... وانتصح بس الليل
تطلع شمس واتجة بوشالة حيل

واتعنى ريل بلاية سجة تودي
واسمع الدكَ وما اشم ريحة هيل

دهلة وشربتك والنهر شمرة راي
مهرة ورسنها رموش من دون الخيل

راويت حجيك للثلج صاح اشاه ...
(تجيت صدك عالسفح رد السيل )

تمنيت لو عايش قلق اي ... لو لا
شسالفة ورديتني من اول هيل ؟؟؟

لو عالدمع سهلة ..سهلة وافضهة بياحيف
لو بس جفن ينسام بسوالف طيف

(بس شايفك اخر محطات الكَود..)

واسمر كَمر بمناطرك سولة وكيف
ريض .. يحادي الشوف خل اشبع شوف
وجهك من اهل العين والشافك ضيف ...

الاستاذ غانم الفياض

(اصابع جام )

دك ناقوس خوفي
وجفلت طيوفي
نار ابنار طك وماعت سيوفي

عثر ممشى الحلم ما وجد بياعين
ذب تابوت روحه وعافني بخوفي
وبتت وي الصبر والناس راس ابراس
لا طخيت راس
ولنكسر شوفي

شلت عيني ادور بالظلام وجوه
كد نهر الحنين اليجري بجفوفي

مانه امن اول الدنيا غصن ذبلان
زنجر ماي شطي وطلك جروفي

يل شاتل عيوني طيوف جذابة
وسهر .. واوهام
يل ماشي اعله خاصرة الضوه ابروحي اصابع جام
مرجحني. وعلمني
بعد بيه لعب واطفال
ترگص لو رگص وجه الگمر بالماي وتغني

وعلمني اسوي من الفياي افياي..
وارسم للطيوف السان
ومن يجدح صدى صوتي
اصلي بصوت روحي بغير صوت أذان

وعلمني.. اوادد كل گلب مغشوش
وارسم للطيور اعشوش

وانطي الغابه للانسان....

الشاعر الشهيد ... صفاء السراي

ومرني كلشي
الشوارع ، والصحاري ، وصوت جاهل
واللافتات البيها اسمك
وكمر اخر ليلة بالبصرة الحزينه
مرني اخر طيف بعيون المدينه

داسن جدامي الدرب
صعد منهن خدر للروح ، وسكت كلبي
وبقت عيني
توزع الشوك وضواها ، وتبجي باجر
كلشي حاير
كلشي ساكت

كبل ما نوصل ال٥٠ كيلو
كبل ما تبدي الافتات توج حنيني
كبل ما يبدي الهوة يبرد جبيني
كبل ميهز ريح العمارة كذلتي
جنت ناسي
صارن ٣٠ كيلو
آه يكلبي
كل مواويلي القديمة اتذكرتها
كل العيون البجت بالدنيا صرتها
كل لعبنا ، والغناوي ، والوعود ، والدروب الرادت نمر

والجوانين التجر من دمي بردها
كل الاحلام تذكرتها
آه ي ٣٠ كيلو تذكرتها
صرت اشم بكلشي يعبرني عطرها
واعرفت وين تسكن
وين وهي
وبيش حلمانه امس
وصارن ١٣ كيلو
وصار بكليبي عرس

صار كلبي ، زفة طيور النوارس
كلش ابيض...

""تعجب الله وزعل ملك الموت كام""

من السماوة وكبيرها محسن الخياط

قصيدة " ثلج مالح "


شكثر صارو من ربعنه معوقين
وشكثر ودو للمغيسل ازلام

ثلج مالح للجنايز هالسنين
وبعد مايلحك على الميتين خام

وذوب الدم بالصخر خلفه طين
ولحسته بكد العطش وادم اسلام

مدلهمه وماتنعرف متحاصرين
ظلمه وحويزه وبلم عبرتنه جام

وحته عالغيمه فواتح ناصبين
تعجب الله وزعل ملك الموت كام....

.

قصيدة (أبواب )

جمعه الحلفي

تگدر تدگ الباب..
الباب، لوح الخشب،
مصبوغ ومدردغ وملوّن وجذاب
بس… ما يرد الباب
ولوما  أسمعك تدگ
ما ينفتح لك باب
بابك منقّط شذر مرسومه بي نجمات
بالأزرگ اسمك، تحت، مكتوب بالدمعات
وتحت التحت، رزته، مديوفه باللذات

بابك مناطر فرح موعود بالغياب
حاميك چف الحسد مرسوم فوگ الباب.

بابك امزهّر ورد طالع ندى بعتبته
وببابي نابت عطش من عروته لرزته

ريحة الحضره ببابك والحمدو والتسبيح
بابك يجيب الفرح.. وبابي يجيب الريح.

بابك دفو بالشته وبالصيف جرّة مي
بساط العصر بابك ومغطى بالفي

متروس بابي سهر وبابك ينام العصر
بابك منمنم خرز ومطرز وغافي
بارد هوى عتبتي وبابك ندي ودافي.
بابك مراية عرس تتمرى بيه الناس
مديوف بالحنه ومعرّش بياس
بي آية الكرسي والحمدو والخناس
دگات بابك غير.. وبابي إله دكات
بابي تدگه الريح.. وبابك تدگه الناس.

بابك زغير وحلو مقفول ومندّه
يسبح بمي الورد بالفتحه والسده
ناطرت بابك عمر، شو طالت المده؟
بابي مشرّع دوم.. محد يجي يرده.
بابك جناح وهوى يودّي ويجيب أحباب

وبابي مبسمر صبر يتنطر الغياب
مليان بابك حچي ومليان بابي عتاب.

كريم البغدادي


مو زعلان بس الحب يتعبنه

حبينه الوطن وشصار ؟؟

خير من الله بأول موعد انبعنه

خلص هذا الوطن للبيع
مثل يوسف خذوه للسوگ

وطن بيه كل معاني البوگ

بيه سيد يبوگ الناس
بيه خير أمدنگ الراس
بيه وادم يرجعون بنسبهم لهل بيت الدين
بس عدهم علاقة ليل ويه الكاس

وطن كل عمره يصرخ ليش
وطن منتوف منه الريش
وطن كل متر بيه حزبين عدهم جيش
وطن ميت يريد بكل طريقة يعيش

حلمنه يموت يوميه اعلئ تربانه
الفقرة تنام بيه جياع
واهل الدين شبعانه
شبعد وتريدني اصبر مو حجر آنه

وطن بس بالحچي احنه اسلام
ذيچ ام الشهيد الغزرت بالگاع
تالي اعلئ الرصيف تنام
________________

الاستاذ غانم الفياض


شفتك تشرب جروحك
ضوة امبسمر عذابة بلوحة الايام
طش ثوبة الظلام ..
وما طفت روحك
وشفت ابظل تواريخك حزن يغلي
اوجه غابة اونهر متعوب
واگف وحدة ايصلي
وشظايا .. ومنجل .. ونخلة
اومدن ميته رماد ابعينهه اتخلي
لگيتك هم مثل روحي
عثگ عالي .. بعيد وما تلوحة الايد
للچف اليحبه الوحدة ايدلي
لگيتك هم مثل روحي وجرح مثلي

وطبع گلبك مثل گلبي
غريب وبالسفر معني
اتناسل ليل للمجنون
ليل .. وخضرتله سنون
واحنه اثنينه ابهالليل
بس اثنينه انغني

تذكر
من چنت تركض وره اهلالك
ماواحد ركض وياك
اول ما ركض گدامك اخيالك
وتذكرمن گمت غنيت
شفت ابكل حرگته الماي غنالك
وتذكر .. من بنيت امن الثلج تمثال
طلعت چم شمس

ما ماع تمثالك ؟!