حسن وصفي ....


حدر كل ليله منسيه ضباب اسود
يزتنه ل زحمة التاريخ..
ونرد بينه ضمه وسجيل

منسيين ...
من طحنه اعله وجه الگاع منسيين..
وك يا ليل باصرني...
اشتهيت ارثي العراقيين..

هذوله احنه الكلانه الطين...
مهمومين لاخر نجمه بالميلاد مهمومين..

احنه الوهگ بينه العوز
المدري ل يا سمه امغربين

اشنعود ل عيسى مصلوبين ..!

شعب من باگو ب طوله قره بينه الحزن ترتيل...!
شعب متعوب..
من اول عضه بالتفاح لاخر جيل ...

چا شنگول للساعي لون باگو رسايلنه...
وبيش نسامر العشاگ لو گصو ضفايرنه...

اشنحط بيهه قصايدنه !

غاد امن السهر حلمين
وامرورة امزاود ليل مرسومه عله الضويات

ونتوكل ل باب الله سواد اهموم
وحدر كل عين خدرانه دمعنه ايبات...

الشمس مسحت معانينه صفينه اتغثنه الامرايات..

اشيسد كسرة خواطرنه..
مكسورين كسرة خاطر احديثات...

دلينه يرب الطين
چا ليش الفراش ايطير من هدومنه الحلوات...!

محترگين
والموسم حطب والنار تتمشه بخواصرنه ..

احنه المحد بسدنه !

غربه ابين الولايات.
ما ضل باب يتنسه ل اصابعنه ...

وكتبنه ولا يصح ساعي يوصلهه رسايلنه...

ما ضل للاعتاب اشفاف صبحنه صراير ضيم

چا من عطش بينه الحيل
ما نده اعله فينه الغيم !

مگيودين
مدري ليا صنم وال اخ تتمشه بضمايرنه

وضعنه ولا يصح بينه نبي ابراهيم

عراقيين
نمشي اويه التعب مرسال
ما صح ليل يقرانه اعله فطرتنه

شني بيا ديره عازتنه

مهي سابع سمه اعله الگاع‌ ذبتنه

العمر شيريد

غير التعب والحرمان ما عدنه

تيممنه مسية اغروب

وصلينه صلاة الخوف

شني ذنب العشگناهن
دمعنه ايخرب الموعد لحد ما يعتگ النفنوف

عقيل العرد


العمر شاعر وشاعر

شاعر يبيع القصيدة وثاني يوم يصير تاجر

وشاعر يبيعونه ناسه

يبقى يكتب ضيمهم وبكلبه حسره
ويخنك جروحه ويكابر

هذا ما يعرف يجذب
وذاك يعرف يركب الموجه ويدغدغ بالمشاعر

والقصيدة,, نثية وكحة ما تدنك عينها اكبال الشمس

والشعر دمع المساكين اليطيح اعله الامس ,
ويتاني جفية تنشفه وينمسح بجفوف باجر
,,
وجان شاعر ما يحب قصر الرئاسة

وكافر بدين السياسة

شايل الفقرة بضميره
كتب دمعاته وخساراته
وقراها وما قروه

نزل سوكه ,,, وخسر حضن ولايته وضحكات ناسه

وانذبح بالساحة واكف

مات,, بس ما طاح راسه ,
,,,
وجان شاعر ينطي للسلطة ضميره

وشاف دم اهله بثلج يندار ليلية اعله كاسه

واغتصب صوته وضميره وشاعريته

وكَال للناس :
(انه شاعر ما اتدخل بالسياسة) ؟

وذبح جم شاعر بروحه

غازل السلطة بقصيدة

صعدت السلطة اعله متنه

وجانت اول بايه ( جيبه )

والدرج باياته تغري

السلطة رادت تصعد اكثر "

ووصلت الباية الاخيرة

خلصت البايات كلها ,,
وداست السلطة اعله راسه

من اجمل ماقرأت للشاعر

علي حسن علوان

مشكور جازيت التعب بس يمته
شايف شثكله المايجيك بوكته

بالفزعه هم ضايك ال چا وين فلان

وشتضوك منها وهوه الفلان انته

لا تلتفت بس عينك اعله الوياك
ورحم كلب ماعافك شماعفته

بين الكطن والشيب عاشه النداف
واللون الأسود واكف بفاتحته ..

دنكت يمك بس احس رفعة راس
مثل اليدنك راسه يم والدته

يكفيك شرها الفاكده اعزاز…
يانومه عكبك منها مافاز
تصعد بروحي انكاب جناز

كبر السمه وعصب عيون العصفور
يندل الشجره العاشها وعايشته..

يندل الريح الخربت سالفته
يسكت ويعرض عشه المطيحته
اجناحه مو ايد ويكض خاصرته ..
غير الغصن غير الحجي الماكلته

مريت بيهن بس العناد عناد
ذاك الهوه ال لاشالني ولاشلته ..

ارجعله هوه اليستفز الصياد
الينفرد بالصحره عن قافلته

جاهوه هيج افراك الحباب
كل ما يشوف اجناح جذاب
راس النعامه يبوكه التراب ..

اليوجعني كلها اصيح هاذا الردته
هم حاسب حسابك كلت تعبته
كلت الموسيقه اسوت بذاكرته
بس كله طايحلك الهاي السكته
هاذا البجي اسويتله وضحكته

مشكور جازيت التعب بس انته....

قصيدة القيت عام 1969 #للعراق

عريان آل سيد خلف

(عشكتك حلم)....

عِــشكـَـْــتك حلم
بالوحشة البعيده اتسامر اجفوني
وعِــشكـَـتكَ
من ونيــن النايحـه الحره
التلم مجرى الدمـع
من عينها اعيوني

وعرفتك تستحي من العايزه الجبحه
وتـِفل فل الظفاير سفة اضنوني
وتوسمتك .. نِكـش بجفوف بدويه
وذهب ليره .. وشهامه .. اتوج شمس لوني

وتِـعودتك
حليب الوالده الطيبه
وصبرها .. وشيبها
اليتعب على امتونــي

ونذرتك وجه للنجمه الجديده
ونايل وغايه
سمارك عزّتي .. وعشاكـَك اهوايه
عشير الكل عشير ايصونك ابروحه
وبري من كل وجه لو ما حفظ مايه
اشـمّك بالجفوف الطاهره الخشنه
واشوفك بالوفي الكِصٌته امندّايه

وأبورح
لو هبوبك يلتكَـي اّبارح
واخضّر بالعطش من هيبتك دايه
انه ابغيرك كـَمر ما شافته اولايه
انه ابغيرك قلب نِـــيٌته امغـَطـّـايه

ويظل طرواك
نسمة بر.. لايرخص شرفهه
ولاهي تتعـثــّر
يمن طرواك .. خاوه الجدم والمعبر
يمن طرواك.. خاوه الجرح والخنجر
تعودتك
شهامه وخوف ومكابر
وتعـّودتك
محــّبه وليل ومسامر

وتعـّودتك .. خليل وخل
حبيب وكل حبيبه اتبيع طاريها

و ِنــِــتْ
ما بِعِـتْ طاري الراح والمجبل
يمنجل مايلف الردي من االسنبل
يذل وجـــــــه اليضدّك
ونته ابد ما تنذل ,...

محمد لفتة العماري


وانته
مابينك
وبينك…
حايط اسود…
حايط اعله رفوفه موت
وريحه
ماتعرفها شنهي
مبلله
ثيابك
تعب والسچه طين
ناگع
ب فشلة حريمة…..مشتهاتك
وانته
كلش مايهمك
انته
گاعد غاد منك
حاير
تگلب دفاتر….……ذكرياتك
ذكرى
مرّه
وذكرى
امر منها بمسافه
ذكرى
تنده
كلشي بيك بصوت ناعم
تختنگ
غصبن عليك
تلتفت
غصبن عليك اضيع……كلك
تعثر
ب دخان كحلي
ويعلگ الوحشه
اعله صدرك…مارد اسود
كلش اسود
تضوي
بعيونك
حبيبه….!!!!
وانته
مامستاهد
ب مرجوحة
رموشك حبيبه
تنچفي
الدنيا عليك
تنطفي
الدنيا عليك
ومدري ياهو
يسرگي باب الله اعله……ضلّك
تبچي
چي
مستاهد الله
وسرگو الباب اعله ظلّك
تبچي
خاف تموت كلك
تبچي
خاف تموت وانته
انته
ذاك انته الغريب
ال عايش متاني غريبه
تبچي
خاف
تموت مامش
مامش
ب مرجوحة رموشك…..حبيبه…!!!!!

علي الزهيري ...

تلاكينه ...


تلاكينه بتعب لمن تلاكينه
او واحد كل للآخر خايب شبينه

ضمينه الجرح عن لا تشوفه الناس
فاضحنه المناشغ من تحاجينه

كتله شبيك مدري شكلي هنه هواي
وكلمن جلبت ايده بطرف عينه

وخذانه الليل سفره والدموع امتاع
بس من الوجع والضيم غنينه

تغطيت وبعدني الليله مابردان
دفانه الغنه وشوغة بواجينه

سولفلي اعله باجر كال خايف حيل
خافن نفترك وتضيع اسامينه

يباجر لاتجي اعله الفركه مابينه
وهذا الخفنه منه وحيل ماذينا

ضيعنا الحجي بس الوجع معروف
موجره ارواحنه وماكو اليطفينه

زتينا الرساله بفشلة الياريت
وشيعنا الضحك بال آه ردينا

عله جتاف التتن ذبينا اخر آخ
وخفنا من البجي وخربت معانينه

كتله الصدفه ذيج اللامتنه اثنين
هم ترجع بعد وتعود ماضينه

جر حسره ودمعته تسولف من اطيح
وقريت السالفه ومعروف تالينه

كلبنه المضى وتنطرينه الجاي
وكتبنه اليوجعنه وبينه وصينه

اذا رايد يجينه الموت خله يفوت
تموت ارواحنه بس تبقه اسامينه

(رثاء) لوالدته

مثنى ابهير ..

﴿شمس سودة﴾

صباح اسود ابلون الخوف
وعيون الضوة بلاشوف
والغربان جوگة ابوسط راسي اطوف

وخيوط الشمس معگودة علـ شباچ
معقولة الشمس طاحت..!!

معقوله
الشمس علـ گاع ممدودة..
ماشايف ﴿شمس سودة﴾ ...!!

ماشايف صبح يتعنة مابي خير
اضن هذا صباح الموت..

شجاه
الغيم بايگ من عباة اليل وملثم..؟؟

شجاهة سنوني تثلم ...؟

شجاهة
عيوني بيهن فاض مجرة الدم..؟

شجاهة الگاع طلگت
حامل بزلزال..؟
صرخت
والشوارع بيت لاذ ابيت

شفت حتة الورد ينزف
علة الچكليت..!

شفت لمه بلابل لافات نگاب
يم شجرتنه يتباچن..!!

اباوع للسمه بلا لون... ذبت ثوبها
ولبست من جلد وحشي....!!!

شجاه
الميل كض رجلة
على الساعة ولايمشي

شجاهة
ادموعي مجمدة بطرف رمشي

حته جدامي مابيهن يعينني

معقولة القيامة اليوم ...لوعزريل باگ امي.؟؟!!

محسن الخياط ...

اتصوريني

اتصوريني طيب من شراي اﻻول
ما افيد اليشتريني ..
اتصوريني
هنه والحادي الحدى بحلواتهن ضاعن سنيني ..
اتصوريني
تايه بزيزايه وحدي والعشك طيره غريبه
منين ماهدها تجيني ..
اتصوريني
بصومعه ودرويش بيها ايجوي روحه
والجفون معاشريني ..
اتصوريني هنه ظلن كطرتين
وبعد ما اوجد دمعتي وياهي عيني ..
اتصوريني
اوشال زيبك حطني وكتي بظهر مهره
اترهرز بماعون صيني ..
اتصوريني
بليل والمصعاد جالي مجلب بكشايه وادري هواي وادم حاسديني ..
اتصوريني
نخلة بالبصره تلكح نخلة بديالى


بعيده السالفه البينج وبيني ....

سمير صبيح

ياروحي .....


ياروحي الايده بجمر ...مو مثل الايده بماي
مليت من الحجي ..
الذيب غط الغنم والراعي يعزف ناي

بفنجاني تقره وقرت ..
ضيم ومآسي وتعب
كتلهه هذا المضى ..!! كلتلي هذا الجاي ..!
وصحراء تكظي البقه
بس الرمل والشمس ماتلكه بيهه فياي
كتلهه هذا البشر
بصرخه بديت العمر ...وصرخات من ينتهي
ومحد يروح وياي ...
مدري الخلل بالبشر ..مدري الخلل بالزمن
محد يفسر هاي !؟

الكبر خياله االضوه ..ماشوفه ..نفس الحجم
غيري اليشوفه هواي
بس يالردت تبتعد ماعندي حيل الصبه
وطيحتك مو بهداي
بدوي اعله بيت الشعر للبيع ماينكتب
طبق الاصل حبي الك .. مابدله بدنياي
واخر كلامي الك
وي الحار حار الكلب ..وي البارد ابرد بعد
طبعي القديم انتهه

قررت اصيرن ماي ...

(قصيده المجهول )

علي حالوب

وچم عزيز اندارلك فدوة اعلى طولك وانت طايح
ارضى لو گصيت نحري
ولا تگلي الليله رايح

انه لچماتك عشتهن لچمه لچمه وحيل اعزهن
انه ضحكات الفلا مرن عليه انت منهن

انت (ياجرحي واحبك ) وانتميلك انت كلي
انت ذيچ الشيبه التبين لجن موش اعلى راسي بينت شيبه اعلى ضلي

كافي اتعبلك واحبك تالي الاگيك بوجه مابي محنه
تذكر امن ازعل واردلك واعتذرلك
وابقى اكلك انت منه
وانت تطلعلي بسوالف كلهه منه

الناس عرفوا بيه احبك وانت ماكو راح ارسمك
ومن يسالوني عليك الناس اكلهم جان يمي وانت حتى طيوفك مزعلات عيني مارضن يلفن واحلمك
(وانت تدري العين بيت لكل حلم ماشاف بيته )
وتدري حظي الماگعد يم اليحبه
وجان گاعد على نيته

تراب رشيت الحلم بلكت يخضر وانه اشوفك
وزاعلت گلبي اعلمودك مرة فكر گال اعوفك

غير اعرفك انت ياهو بياحلم نايم واجيك
حتى ناس الماتعرفك گامت تسولف عليك
بيا مچان اعثر واحبك
بيا مچان يطيح گلبك

يمته اشوفك رايد اسمع جلمه من الناس عني
رايد اسمع هذا عاشگ تايه بعشگه ويغني

(وين اجيك الدرب گربته يمك وانت تبعد )
انت هم تغني لگطوف الجگاير تشرب الكاس اعلمودي
تسهر الليل وتحبه تصلي يم محبوبك وترگع وتسجد
انت بس احجيلي تعبد !؟

فحطت خلگ السوالف كلهه مطروقه بكلامك
انت يمكن تختلف حتى بسلامك
انت تعثرلي من اطيحن تبقى تدعي اعلى الرصيف
(تدري بالجفن اليشوفك حتى بحلامه شريف )

من اشوفك راح اگلك
بطلت اكتب بديه

هاك گلبي وانت اقرا الليعجبك

محسن الخياط

روحي مضيف الهوى وهمومك اضيوفي ..

وكلفني بيك العشك وهواي تكلوفي ..

ليك وهجرني الصبر ونباكت احروفي ..

ويشل روحي الحجي وتعثر بخوفي ..

موتني موت النخل وانه على وكوفي ..

وانا عطش كربله وصوابي خط كوفي ..

بصراوي من تبتسم حﻻوي من توفي ..

مادام ماجاستك ماريدها جفوفي ..

ومنين احصل حلو يشبهك ويوفي ..

ناصر البدري

امً تبحث عن ابنها
::
::

نتگاود ..
انه وكلبي
وانشد بـ اليشبهونه

ماشفتولكم ؟
خمري زغير وفرگه بسنونه

ابني ..
ويـ المناره گدار
وجفوفي المربياته

يضل ..
سهران طول اليل
حارس فوك اخياته

امشي ..
ودايخه بشيبي
تعنيتك لعد زغرك

يمخاوي ..
الجفه شجندوب
ومزاعل اجفوف امك

يبني ..
وذيج المروه
وراك انخه النفس نخوه

ولك فدوه ..
ناغيني ولك فدوه

شوف شخله بيه الجور
نص صورة بجفن مكسور

اجينه ..
ثنينه مورثين
نتگاود شمع وبخور

هجرك ..
ترس كلبي فطور

يذبحنه ..
برد وشاه
ونضحكله فرح وطيور


تسع انذور ليليه
بـ العباس اشدلك

لا عندك گبر وابجيه
ولالـك ذچر واندلك

حدر ..
صدري شليل اهموم
وبفراگك كرهني النوم

گمت ..
انسه وطب للسوك
واشريلك ضحك وهدوم


ادورك بس انه وكلبي
لوحدنه وبسكته نموت

ساعه ..
اغفه ويشيعني
ويحطني بهيده بتابوت

وساعه ..
اگعد وشيعنه
وروح ويـ النعش زاتوت

مدري شلون گمنه نموت

مساء الخير مشتاقون ♥
رجعنالكم بعد ما خلصنا السادس "الفترة المظلمة " ..😅

.
.
.
راح يتحسن نشر القناة
مع مصطفى و 15 آخرون ...

قصيدة ممتعه
ل...سعود الخفاجي

قشمرني

بـدرب نملة تلاگينه ..زلفني وگال ما شفتك ..
رايح ..وين رايح؟
وين رايح والشواطي التارسه عيونك نسوك ابلايه روح ..

و واهسك ضحكة يتيم ..
الماخذك منك درب ما يشتهيك..
الشوﭺ اخضر و المشه بـ رايه غشيم ..

رايح الـ وادم ادّور تراب عدهه ..
العدهم يبات الهوى ميبسين روحي ..
ولا لگيت الينطر عيونه اعله خدهه
صارلي اشجم يوم ادور ما لگيته ..
ولا لگيت السالفه الـ بيهم تشدهه ..
رايح الـ ديره ادور بيها وجهك ..

تيهتني اسنين بوجوه النستني البارحه ..
ليل يتوﭼـه اعله روحه ..
وناس يم ناس ابحضنهه اشگد سوالف طايحه ..
ظلمه و الوادم سكارى ومدري وين
الـ يا جهه الـ من عندي رايح...
يا وجه لعيون اشبگه يگلي شسمك ..
وانقريت عيونك انته منين جانت واضحه ..

يا حبيبي ..و واهسي ..وصاحب جروحي ..
ضحكتني مره وحده
و طلعت الضحكه اعله روحي ..
و ااااااخ يالمدري شلگيت بصف ضحكتك ..
مدري احبك ..مدري احبك مدري لا ..
بس لا كرهتك ..
ضيعتني بعينهم وانه اللگيتك ..
تيهت روحي ومشت عميه اعله نيتك ..
ليش مو شسمك جنت وانه العرفتك ..

انتظرتك ما اجيت؟ ..
يمنه.. يسره اتلفتت يمي و لگيت!
ناس تضحك و ناس تضحك و ناس تضحك ..
افتهمت السالفه تخصني ومشــيت ..

يا فشلتي اگبالهم وانه بحرگتي ..
ويا غربتي بـ ليل ما يندل شهگتي ..
و ااااااااااخ لو تسمع صرختي ...
وداعتك ناقصني انته ..وغيرك يبين نشاز ..
ومن يجي يخرب كشختي ..
واشتهيت عيونك ضحكة فقير ..

وما دريت الضحكه ما تستر حلگ متروس دم ..
ولا دريت اليشتهيله عيون ملتهيه بصور غيره ايتندم ..
وجانت الدنيا حلم بعيون كافر ..
خلص وطب لـ جهنم ..ليش نحلم

يله حبني ..قشمرني بـ هلا و مشتاگلك ..
حبني و العباس انه استاهلك ...
حبني واتمشه اعله طولي براحتك ..
و وين ما مديت اديك بروحي اخذ تفاحتك ..

حبني والله اسمك سوالف ما يملهه الساني ..
گتلي خدك وين حتى اندل و اجيك ..
صرت خد ومحد اندلاني ..
حبني ..!!!

گلي ....احبـــك!! ..
..ﭼـلمة سامعهه اشكثر من غير ناس ..
بس اريد اسمعها منك.. يله فنك ..

عقيل العرد


شوكت اشوف الناس تندلك صدك ؟
بينك وبين ابو فاضل بت علي وجربه عشك

شوكت اسمعلي قصيده بلاسياط ؟
ومو امتون ام الخدر بيه زراك
رايد اسمع بيهن حجايات بت حيدر زرك

خنصرك لو ينسكي بجربه ضوه يطك بي هرش
وترجع انته ،، الكلش انته،، تكودنه بجفك لباجر

جيتك حيل بمحلها ايامها الحيره اعله حيره
وصادفت صفنه مناير

الكاع جول ودبه شريانك خظار
وركضت الحنطه اعله مد شوفك ضفاير

وانته هيست النهر هندس علينه...
ونكطت من عين دمك تسع ضويات وكناطر

السالفه انته مكيفلها
سهامهم طردتها اهلها وهيسن گلبك جبير ...

السالفه انته مكيفلها
وياك حتى العطش كضاها اعله خير ...

السمه بور وغصن ذرعانك نفض سبعين طير

شضوكتهم ياحجايه وكلها طشت روسها كبالك انذوره ...

وزينب شهوست يمه ..؟
وكطع العباس جفينه برهاوه وگالهم وثقولي صوره ...

طوقك ليل ال اميه ..
ودفت ربعك بالطفوف هلال من ذاك الملح

وعفيه راسك مامعبر الدنيا كلها

بذاك وضعه ..
وكف يتفكر بهيده شلون يكشخله برمح

وعفيه خدك باس الحجاره بكل برود
هاكثر خدك مؤدب ...وهاكثر جفهم وكح ...

وعفيه زينب واكفه وتهمس وراك ..
فوت بيهم هول وتالي تلا كلبك ذبح

مطلع النبله بنحر طفلك جبير وراد من عندك قصيده
وكمت طشيت النجوم الظامهن عبدالله للسجه بوريده

انته وابنك عيريتو الغيمه من ظمت بجيها
وكبل لاتمطر عليكم كتله خل نمطر عليها

وها حلات الله بضميرك ..
ساوموك بكلشي بس مالك شغل

الدنيا باعتلك شرفها وبعت ع الدنيا ثكل

انته واهلك شايفين وعايفين
الله بيده مسگملكم شاره ودلال وعگل

يلمسوي الطف مضيف !!
وسفرتك مديتها بطول الزمن ....

هـــا!! وابلاش
عزبت حد ماسمعنه المانسمعه ! يصيحلك يحسين اواااش

شمس راسك غربه تتمشرك عليها ...
ودفه جم جيفارا بيها
واحنه مانندل حجيها

وتايهين ،،، وحكنه لو تيهنه راسك
في رمح راسك ثخين

انته فوك الحجي كله واحنه مو يم الحجي

فاهمينك بس مناحه ودك زناجيل وبجي ...

الزمن طايح من زمان وفوك ظلعك منتجي ...

ومايعرفونك لحدما يعرفونك



#

من القصائد الحسينيه التي تستحق القراءه ....

قصيدة الكاروك

(الأمام الحسين (ع) يخاطب #السهم الذي أصاب نحر عبد الله الرضيع (ع) :

||علي حسن علوان||

أي عاذرك ،،
لا والد ولا عطشان
او لا ضايگـ اللذه الـ بزر الگعده ..

أي عاذرك ،،
خلصت عمرك مدفوع
مالك اويه الكاروك روحه او رده ..

هوّ الگماط الينگطع ،، شده ايهون
بس النفس من ينگطع شيشده ؟!!

تندل نحر عبد الله ماضاع اعليك
السوگـ يندل وگفة الماعنده ..

مرات اصيحه (الغالي) مره (العطشان)
ويحومره الدم و اصيحه (الورده) ..

صار ولگه الكرار طبره وتابوت
عاش اليتم بآول احچايه ابمهده ..

وياك (ابو) موجود ،، بس المعروف
ابن الولاد ،، اتصير روحه ابجده ..

خلصّو وين اليستحون من الطين
و ضلّو الما بيهم عله الدم هده ..

ياناس دم اوليدي هذا العل گاع
گالو حلاة الخير من يتبده ..

(و أذا بصوت يخرج من نحر عبد الله الرضيع ع يخاطب فيه والدته ..)

من الكاروك للتابوت ،، مالحگت اصيرن شاب ..

و كلما راد جسمي ايطول ،، أگولن گصرچ امحليچ ياعوچية الشياب ..

يمه السهم يوجع حيل ،، يشبه ضحكة الچذاب ..

(و إذا بالجواب من داخل الخيمه عن لسان والدتهُ ..)

بعد ماگام طينك ليش ـ كاروك
يعبد الله بعطش مو سيف ـ كاروك
أصعد وين ما لاگاك ـ كاروك
هلبت هزته اتدليك بيه

بعد انتهاء صمت الطف
نطق لسان الامام الحسين قائلا:

ماكو امان الطف نهبني....
وحته ماباكتني ناسي مدري ناسي
من طحت ضميت اديه حته ماينباك اصبعي تلمست مبيوك راسي....
نايم وجسمي توزع حصه حصه...
ومو شرط واحد يطيح تبوكه ناس
حجارة باكت مرة گصه...
والله نفسيات عدهم
باكو المحبس اكبالي
وبالخيم وشلت بواجي
ومن مشو واحد صحتله انطيته اصبعي
بس كلتله بذمته الياخذ تراجي...
بكوسر ضلوعي حوافر صلفه كعدن..
خربن فيي وجزن..
مايريدن بس يريدن دوم تجويهن شمس..
خربن كل شغل امس
نمت بالطف والله حيرة
درت ايدي بصفي الاكبر
درت ايدي نايم بصفي عرس
اشتهيت الله وطحت بالطف وذر
وهمه فزعولي ضرس
هناك بالطف كل اصابعهم سوة
اشرو كلهم عليه وطفي خص
تمضمض الطف بهل بيتي ومن شرب عبد الله غص
وبحوافر خيلهم سحكو صبح
اكو وادم شبر ماصعدو ل الله
وانه صاعدلي رمح....
كربله كاروك النه والله هزاهه بنحر....
كلشي بالطف باكني...
سهم بايكله نحر....
باكو احزامي اللبسته
روحو حلفو الماي بايكله ضهر
همه سبعين الف ليل
واحنه بس سبعين شمعه وعدنه بالطف بس كمر
نايم وروحي تهبت والعطش بيه فرش
شمعه خلصت شمعه ذابت
شمعه بيدي مكمطه اشتعلت عطش
الخيم وجت والطف يسولف هوه
هناك ضهر المشرعه توة التوة
لان ضلمه دروبهم باكو ضوة
وانه وي روحي اسولف...
وكت خله البرحي نايم عالتراب ويسحك عليه النوه
واخيرا ارد اكمل وارد اوضح مساله
لليحب الله صدك
الله داينكم نحر ردو اله.....

..كرار وحيد ..💙💦

كريم البغدادي


شـمـس ظـلـمـه ونـهـايـة صـوت
ونـداء مـن الـسـمـا يـاهـو الـعـزيـز يـمـوت

واخـتـار الـحـسـيـن الـورد والـريـحـان
گـلـهـم روحـو لـلـجـنـه

والـقـاسـم اذا مـوجـود
هـسـه نـكـمـل الـحنـه

ومـشـو نـجـمـه بـگـفـه الـنـجـمـه
ڪل خـطـوه بـأثـرهـم خـضـرت نـعـمـه

وشـفـت ريـشـه وگـلـت عـبـاس راسڪ حـار
نـزل ريـشـتـڪ لا تـوصـلـلـهـا الـنـار

وشـفـت هـلال نـص الـلـيـل بـس يـفـتـر
رحـت وتـقـربـت مـنـه
وطـلـع يـشـبـه عـلـي الاڪبـر

سـألـتـه شـبـيڪ گـال حـسـيـن
گـتـلـــه الـمـاي گـال حـسـيـن
گـتـلـــه الـجـنـه گـال حـسـيـن

ڪل احـنـــه فـــده لــحــســيــن
احـنـه هـواي عـد الله
يـاهـو الـگـالڪم سـبـعـيـن

ورجـعـت امـشـي
وشـفـت شـمـعـه وعـلـيـهـا گـمـاط
يـعـبـد الله الـخـلـق روحڪ عـلـيـهـا شـحـاط

شـــو تـلـمـع ؟
انـت اول طـفـل لـحـسـيـن يـتـبـرع

نـزلـتـلڪ سـمـه وشـالـتڪ مـن الـگـاع
طـف مـتـروس ڪلـه ســبـاع

واجـت زيـنـب وصـاحـت خـويـه ابـو الـسـجـاد
هـاي الـدنـيـا مـوش الـنـه

بـعد فـتـره ويـصـيـر فـراگ
خـويـه حـسـيـن حـالـلـنـــه

شريف الدم

عريان السيد خلف


معذوره الدموع عليك ما تنشف
ومعذوره الگلوب تهيم بيكم شوگ
وتتعفر جباه الناس بأرض الطف
أجيال وعصور تعاگبت وأزمان
ودمك يا شريف الدم بعد ماجف

يا أول رفض لمصافح العفنين
ويا أول نعم للموت من يحتف
وياأشرف أسم ..سماك جدك بيه
ويا بزغت بدر..شع بالسمه وشرف
يالموتك..خلاص من الظلم والحيف
وگبرك باب كعبه وگبتك مصحف

يبن ذاك المغيث .الغوث أجيت أنخاك
أريدك بالشديده وياي تتلطف

مثجل بالهموم الحد گطاع النيط
وطوال الوسيعه أعله الگلب تگصف
وأنت أبن الاسد عطاي للينخاك
محبتكم دوه وللجرح تتوصف
أشيم الروح .تصبر تجفل من الصوت
يوجعهه الوكت.حدما بدت تتلف
أذكره بمصابك تخفض الجنحان
هيبه الوكفتك ما بين صف وصف
يالشايل عذاب أجيال تتله أجيال
أليثگل علينه . أعليك هان وخف
فرق بين الچفوف التزهي بالصمصام
وبين چف يشيل كاس ودف !

تتعرف الناس بحادث وعنوان
ونت الكون ظل بس بيك يتعرف
ونت الكون ظل بس بيك يتعرف

عقيل العرد



شعطلك عن الحلم

استاحشتك هوايه

شايف بروحي ذنب ؟

لو سامع حجاية ؟

يحسين هاي السنه طيفك ولا مرلي

وجف ابو فاضل طلع بالماي واشرلي

وكبل اربعينك نذر راح امشي مشايا

عطشان يا ابو علي

ردتك تمر غيمة

ما يمي اثر علكمي

ومطلوب الف هيمه

وكلما امر زينبك يزغر بروحي الحجي

وجفني اليجمل البحر

يستحي يهل ضيمه

اتذكرتك ودخنت
وبصدري ثغبت مرة

بجرة الجكارة طلع يمكن حرك خيمة

واكف بنص كربله

واتخيل اخيامك

هنا طاح رب الوفه

هنا ركضت ايتامك

ومكسور خاطر رحت

يم كنطرة نوحي

وطاحن جفوف وعلم وتلاكن بروحي

يحسين بيه حجي ما ينحجي لغيرك

لو ما اشوفك وطن جا ماصرت طيرك
يحسين دربك عدل
من اوله اندله
منك عرفت الزلم لو موت لو ذله
عاشورك بخاطري

وباهلت الولاية

تراوالي وجهك نهر بس ما ضكت ماية

تانيت بس ماطلع

صوت من المراية

أشايف بروحي ذنب ؟

لو سامع حجاية ؟

عاشورك بخاطري

وفريت الولاية

ويطيح مني وجه كلما شفت راية