المبدع محمد الجراح

وتصادفت عيني وي عينك
هسه بأول خطوة مشاوف بدينه

من ألتفت ماريد وينك
نشوة المخمور دينك

ياسواليفك معاضد تنزل بشمرات أديك
يا لذيذي المستحه يرغبني بيك
وشكد أهندم بالحجي من اعتنيك
وشحلاتي من أنسه يمك سالف وأرجع عليك

أنه وي طيني أحب الگاع سمره
الناس رغابت الگمره

أنته يالمو هين اعله الروح غيضه
ياذنب تسوه الصلاة
الموش بيضه

يا دفو عيوني العمر لذه معاك
الهوى هواي شمالني أتلاگف هواك
أخ لو تدري
شكبر بيه غلاك

تارك الگمره وأدور عن ضواك

العافيه وراعيها صارو مشتهاك

احبها وماعرف مثل اليمثلون
الم سوالفي واوكف وكله
والا عندي بخت وانتج علي
والا اعرف المواقف وستغلها
حب فطره وعشك وادم فلاليح
النحبها نوصط الوادم الاهلها
نجي يم بابها نحط عش عصافير
وفوك العش احبج نكتبلها
بس شو جنه ختلف حب هاي اليام
سوالف بارده وماعرفلها
سوالف ماي لاجن مو طعم ماي
والف جلمة عطش موش امحلها
المهم روحي العشك بلش يسلها
الحبها مبديه ليل الله بكحلها
الحكولي ربعي يل تعرفون
اذا لاكيته باجر شكلها
ارويها ع جفني الغافي جم ليل
اكشف جروحي بلجن يعننلها
اغرب عمري وختار احله اليام
وصوغنهن خرز داير حجلها
احفر دمعي اكو وشالة بتسامات
اطلعهن وطشهن فوك ضلها
اكله بابكم ماي وتبديت
وقصتي اسولفت عل كاع كله
اكله امي بكثر ماسولفت بيج
تكسر خاطري من اتباوعلها
ع نيتي الهسه عبالي العشك عيب
وعزيزه رويحتي وفشله من اذلها
موش انه ليلبس سوالفه وجوه
ومثل الدور ولقصه فعلها
الله يساعد المثلي ع الدموع
يباوع غايته ومايوصللها
وطريت ارد ع طباشير
ارسم ماي وتخيل شكلها
ولبسها عبايه ومن وره الباب
احاجيها وتجاوبني بخجلها

رائعة من روائع الشعر الشعبي

(العشك والناس والدنيا حلم عابر )

عقيل العرد

طاري .....

شمس حلمج فضح لوني
وعمى عيوني
وسمارج في
دلالج يشبه ايامي الجزن غفله بتجاعيدي ..ومواعيدي
الماجاسن زلوف الحي
وتطيح الدنيا بجفوفج مثل ماطيح بهدومج
وارد اصبي
النجوم سنين المغربين... والتوهم يشبهونج

وابنادم كمر
وانهار هاي الكاع دمع الله الغسل
كل ميت وكل حي
وتدرين الكمر لوطاح ...
وجهه اعله النهر ينشاف بس طاري
طاري من السما بلاضي

سفر ..والبحر من يخلص.. كلمن يلبس شراعه
وبلمنا المنتجي اعله الماي
باجر ينتجي اعله الطين بس ماندري ياساعه

حمل ..والمايعين الناس باجر ينجوي ذراعه
شعر .. والمايداوي ال آه باجر تنسي اوجاعه

غصن محني بصلاة الماي
ساجد والحزن جاري ....
اسبح بالشعب وابجي ... واستغفر من افكاري
ابيض الروح بالدنيا
ومن اختنك بالسرداب ضميري اليفتح ازراري
واكل لله كلت للناس ..
بس مافهمو اشعاري
باجر كلنه جوه الكاع ...وفوك من العمر طاري ...
ياواحة الجزيرة اتعطش اليغتاض من عينج
ياواحة الحزن حنه وتوالم وي حياطينج
يامهره صهيلج يعبر التاريخ
الشعر كلكامش... وسفرة مطر
تمشي بشرايينج

بعد جم موت مايبقه ولاساتر
بعد جم يوم مايبقه ولاشاعر
بس الصاغ جرح الناس مثل كلاده بالركبه

يبنيه العمر خامه ...المنايا بكيفهه تفصله
اليوشل سنينه للحنطه يطيح بكيف رزق الله

سجن واصفادي ملح العوز وعيونج روازيني
وكظه عمره الكصب عالمامش يناحر
وهوانه يشرع البيبان بس القفل بالخاطر
العشك
والناس
والدنيا... حلم عابر
يبنيه العلك من ينعكد مفتاح للباجر

وابنادم كمر وانهار هاي الكاع.. دمع الله
الغسل كل ميت وكل حي
وفوك من العمر طاري ....طاري من السما بلاضي

عبدالخالق المحنه -

تعال و لا تجي

تعال ولاتجي وثنينهن صعبات ...
واحسن شي اكلك اني ماكلك ...
خايف من تجيني ولك مثلي تصير ...
لذالك لاتجيني هواي احسنلك ...

انه وياك متنه بيوم مابيه موت ...
ليش الموت تيه كلشي واندلك ..
واشتاكيت الك شوك الجرح للاه ...
واشتاكيت اشبكك كلي وي كلك ...

تعال شكد صحتلك والمسافه كبور...
كفر بيه الصبر واجفوفي يدعلك ...
شتلبس ياقميص وكل حلو منفوس
صدكني التراب هواي اجملك

تعال ولاتجي المن يصاحب جاي ...
دنيا مخلبصه اولوطحت شيفيلك ...

تعال اشلون اشوفك ماتكفي العين ...
تعال اشلون شلون اشبكك حيل ابهيده ...
تعال ومن تجيني انه اروح وياك ...
ادورلي وطن هلوطن ماريده ...
الوطن تحت التراب الفوك اشكن بيه ...
الوطن لومايلم عيله ما ريده
..... وطن كد الحد يجمعنا انه وياك ...
وتاريخ الكرامه انذكره ونعيده ...

تذكر ماي شطنه صافي مثلك جان ...
يلوك لعنبره وهوسة حواصيدها ...
وتذكر جارنه لمن يدخن جان ...
اومن شافه ابوه طفه الجمر بيده ...
خجل جان الخجل مرسوم عل البيبان ....

شكثر غايب حمد بس مالمس غيده ...

عزيز عسكر

حزن والشوف يتكسر ورى الدخان
وابنادم لگه ابنادم
وتعب محترگ مر من بين المرايات لآخر شيب
بس طاح اعله خصر ادم

غنه اشموع الفجر لناس جاس الحيل
وتعده گمر مني الرفيف الدم
اثاري الاه تبدي منين. ماتلگه وطن يحلم!!
السهرينجاس بالضلمه گبل ضني
كون اتناوش الدنيه افيض من الصدگ للطيف
يم طولك ورد جني

لو ادري العمر ما يلتفت للباب
الك صغت الخيال اليركض بعيني ضوه يغني
ابهيده ويلكناطرلوجزت للگيض تلجمني!!

مامش والگواغد تركض بضلي
اعله روحي الروج من يبرد تجي النهران
احس موال يدفعني

التعب موال
حدما تعرگ البيبان
شيركد الگمر بالماي والوادم سجج للريح
هم زين العطش نيشان

بالگمره التعبرالسيف للمذبوح كمت احلم
الحسبة التختنگ تلاح بس تموت من تلم

طيف الطيف غنيت الگصب والهور مرجذاب
من ماشفتك اوية الناس ماصليتلي بمحراب

وانة ادري الصبح بالشيب ماينشاف
بس الگنطره بكل باب

ردبيه المواويلك اخاف اعتگ وگول انت
الغبشه التعثر من الاخ تكبر بالنهر سكته

بكل لون التفت للغاد لاتابوت يرسمني
اهيس البوب التغنيك مومني!
للغربة السمار وياك من فوگ الحزن والناس
لورديت ملتف ورى النجمه
اشمر الوهواس
ديربكيفك اعله الكاس
القصيدة التنكتب لناس حدها من الثلج للكاس!

اخذني بغير ماادري التواسيلك لليغنون لضنونك
جي حزنك مشى اعله الكاع روج اسمر خذو لونك

حته الماي بطراف العمر يضوي
حته الغيم بطراف الجفن يضوي
زتني العمرك مراية شربها الليل
من تهتز خيال الگاك گبل الحيل
جيل يموت يطلع جيل

وابنادم لگه ابنادم!!

الراحل ابراهيم الديراوي ...


مثل أول مثل أول


احب أیامنه الراحت ترد ترجع

مِثل أول مِثل أول

احب بیتی صَخَر لو طین احبه امطَرّز ابچَندل

مِثل أول مِثل أول

احب ایامنه الراحت ترد وایامی هذی اتزول

احب اتشابگ اویلکوخ کوخ الامل طول بطول

احب أتوسد الحِلفه وانام ودوشگی العاگول

تحت فی الگصب والبردی والچولان دایر حول

احب امضیفنه المفروش ،حصران ونمِد وبلول

احب چانونه الیلهث جمر والحطَب یمه اتلول

احب اتنشّگ ابدخان ،ذاک اسراینه المشعول

احب دیواننا اللیل ونهار،الکل وجه محلول

احب اتصنّت الدگات هاونّه الیرّن شیگول

احب المَرفعَه وذیچ الحبوب وضحچة الکشکول

احب أهلِی النشامه البلحصاد، تگوم کلهه اتیول

احب احزام ابوی الچان من خوص النخل مفتول

احب رحاتنه وخبز الشعیر الکل وکت مبذول

احب یاونّه والمهباش والگوسانی والمَنجَل

والناعور والیاییم والمشحوف والتنبل

مثل أول مثل أول

احب دیرة هلی ام الخیر، احب اربوعنه الخضرة

احب شطنه وسواجینه احب موجاته السمرة

سواجینه الغطاها الزود، زود الضیم والحسرة

وشطنه إلطمته إهموم السنین ودثرت صدره

احب اشکال ابوی الچان باسم کل وکت ثغره

احب سالوفة اللگاح احب غناوة السهرة

ورفیف البردی وضحچة إعثوگ النخل للگمره

احب ارجع وأشم اتراب آرضنه الچل مسچ عطره

واروح اشبگهن ابفروند الامل والعشگ والعشره

وگل إلهن ینخلاتی الشتلتن بالگلب جمره

انا ردیت لا تبچن بعد مو خلصت الهجرة

وارید أغسل بدمعاتی عقیق ادموعچ الصفره

وإجاچ المای یتهاده او خوصچ بعد لا یذبل

خل تترادف السعفات خل الگلب یتدلل

مثل أول مثل أول

علي نغيمش....


عليچ اهواي طيحاتي
اول طيحه لعيونچ
من بين سمارچ من خطف لونج

من مديت شوگي وگلتي نوش بكيف
هذا الحضن حضنك وانت لا مو ضيف

گلبك يرجف وبردان
ليش انه لمن يفلان

احرملني الك يا زين
ادفيك بحنان التين

اشعلك واشتعل وياك
اطيح من السمه لحذاك

اطش روحي هوه وتشتمني لو مخنوگ
اكت عطري نفس يم چبدك المحروگ

امطرلك نده وتشربني لو عطشان
فرطني على كيفك وايد الرمان

اطيح من النحر للطين
اطيح اعلى النهد مرتين
احسبچ شامة شامة
من الخصر للدين

احسبچ شامة شامة ابلاية ذرعاني
احسبچ مو بدي اني
احسبچ شامة شامة بشوگي واحزاني
ترجية بحملتچ صالب الساني

اركد يم فيايچ ادفه اگول احاااه
اروحن يم رگبتچ برد اصيح اشاااه

اخلص الليل ياطايح ويامچتوف
اخلص الليل اه و اوف
الله يساعد النفنوف

واجي الصبحي واگلج شوفي
هذا الخوف
بي معيوف بي مشيوف
مو كل السيوف سيوف
بس اسنوني خوش تروف
دافن علشفايف دوف

خذن كلشي ولگن كلشي
ومشيت اعلى المسامات بشعر رمشي

وفحطت ومافطتي انتِ
بعد بيچ شكثر عفتي
روة بيچ اشكثر شفتي
بعدچ كلشي ماشفتي
بعدهي مطوله سالفتي

احمد العبيدي

(هلي لوبيدي مااكبر)

عفتوني
اعله يا سجه
انشري و انباع و اتعثر
يكون بعودي ماكو اسنين
خاطر ما نبت و اثمر

افااا
اتبدل حجيكم ليش
معقوله العمر أثر
هلي
خلوا الحجي مدثر

انه شبيدي العمر ركضه
هلي لو بيدي ما اكبر
مثل حال العراق وياي
عشت وياكم بغربه
الماي الما تحظنه جروف
ما يندل بعد دربه
اهل روحي شبلاكم
مو ابنكم طاح
لو ما ينحظن صعبه
هلي الماله عرف بالكاع
يضل ياهو اليجي يشربه

بيا دنيا ابرد و ارتاح
هاي الدنيا تجويني
هلي منكم عرفت النوح
يجفي الماي البعيني
هلي منكم صرت محراب
صلت بيه ناس هواي
بس محد امصليني
هلي منكم صرت نيشان
ادلي التايه من ابعيد

بس ماكو اليدليني
هلي ماكو اليدليني

(حين القاكِ عاقبني علىٰ كل شيء بعناق )

عبد الكريم القصاب


يوم إلگاك
ادية تفوّج إلك واصرخ بغير صياح
اعثر بالضوى وأتغمّش جروحي چفن قداح

يوم إلگاك
إلكا الواهس يصفگ بروحي جناح
عالصدرك گلادة اطيح شهگاتي
( واگلك هسه گلبي ارتاح )

مثل الريح من أتلاگي صدر أشراع
شبگة اطيح فوگة وتخدر وترتاح
يا گاروك وگماطة ترف
ملتف عليّ سباح

هاگد نوم اضوگن بيّك
نوم امبيت جفونة بخمر تفاح
جفن مخمور نومك بية ايضيع الطيف
جفن ما ينفتح بصياح

نومك ما اله مفتاح
ياااا هالگد حلو، يااااا صفنة إظنوني

مادري شنو من شاعر هذا

مرتضى العكيلي


هم عمرك مخلص تعب ماتدري منه شباگي

هم خام جيب لوالده وغير الدوه مالاگي

هم ويه ابوك مسير وديان لازم شيبه

هم مره مطينك دوه ومامش فلوس اتجيبه

هم شارد من المدرسه مبسط مخضر بلسوك

هم. عيرك جيرانكم چي بنطرونك مشگوگ

هم مره لاكيك ربع ومدخله جيبك بسكوت

هم شاكر الله اعلى الربع جي عرفك بلحانوت

هم ساحكه العيشه اعلئ راس عگالك

هم زامخ الخلفه اعلئ ابوك كبالك

هم مره كلت لأمك شتودين وياي

هم داك صدرك للغده وفارغ جاي

هم ضايفينك ناس ماتعذر دوم

هم واصل وياك الفشل للبلعوم


خامل وملج الموت جرني من للردان
كتله اشوه روحي تريد حسبالي ديان

قصيدة ....القيامة (كاملة)

عريان آل سيد خلف

الحيطان منخل والدروب حفور
والبيبان صرخه بلا صدى ولاصوت
صفنة كنبرة بوحشة مسيت كبور
ووجوه الصغار الحاضنه الشباج
باكة ورد ذابل بالحزن معصور
والنظره متاهه وخوف يرضع خوف
من يهتز قفل حسبالهم شاجور

من يهتز قفل حتى الطيور أطير
مرعوبة جنح وبلا وعيها أدور
ما ضل لا ملاذ يلوذ بيه الخوف
بس حسرة مراره بحشرجة مصدور
قامت والجراد اسراب تتلي اسراب
من تسكن الريح يعشعش المنذور
قامت والدقايق ترضع من الموت
كل لحظه بطبك كل ثانيه بعاشور

قامت والمنايا التختل ويه الناس
وتخاوي الرصاصه الصكر والعصفور
قامت والبشر مو بشر غابة زور
يحصدها العصف ويلوجها التنور
حتى الماي ورث
والتوى الصفصاف شاحب
والنهر من كثر غيضه يفور
والموت بصلافه يدك على البيبان
ويوزع عليها السدر والكافور

هنا دفتر كتابه
هنا حمامة بيت
هنا وصلة جديله بجف طفل مبتور
هنا تربة صلاة والدم عليها هلال
هنا مصحف جلاله من العصف منشور
هنا صرخة نثايه تشتتت بالريح
على جثه تتململ من جلب مسعور
قامت والمنايا أدور فوك الروس
صفنت رحى الكاع ورحى الموت أدور
قامت من دخيلك يا علي الكرار
مو هاي القيامه المن بعد منذور

رماد اسود على البيبان
مطر اسود ينز السكف والحيطان
دم اسود على المله وعلى الدله وعلى الفنجان
دم فوك الجراجف فوك المخدات
بجفوف الصغار تكول حب رمان
لون اسود شرب كل بهجة الالوان
غول اسود تربع فوك جتف الموت

ياكل كل عمارة وشارع ودكان
وبوسط الدروب الخاليه من الناس
جثة تشيل جثة تخم على الدفان
والميزان ثابت بالعدل ميزان!!!!!!!
والميزان ثابت بالعدل ميزان!!!!!!!
نص الليل فات وما رجع غسان
والميزان ثابت بالعدل ميزان!!!!!!!
مر وكت الصلاة من غير صوت وذان
والميزان ثابت بالعدل ميزان!!!!!!!

نص جثة بحصيرة تشيلها النسوان
والميزان ثابت بالعدل ميزان!!!!!!!
وآنا بغير شاطي اتنطر السفان
ياسفّان
يا سفااااااااان
ياسفاااااااااان
يلي بعز ربيعك والسفن شالت شرعهه بزود
وظل شراعك الملفوف
يتنطر الريح تعود
ياسفان

هبة الريح نسمة وما ترد ردود
يللازم الدفة النوخذه النشمي
يشم الريح والجاري
يلاكَي الروج ملكَة وخل يطك صاري بعد صاري
ملاليحك سواعد ضيم بس الطينه التواري
ملاليحك نجر جبال
نسحك ليل
مجريه اعله مجريه

دشد حيلك وراك حساب
تطلب بيه الف ميه
فهد يابوي يالجفك سواد فهود
شعبنا بعز ربيعه وشيمتك صيهود
وخابط ماينه الصافي العليه منكَود
والف عشرين صارت والليالي شهود
يللي بعز ربيعك لا تهزهه بكثرة الطعنات
شرِّج بالسفينه ودوس عالكلفات
وهمان اليكَول ام العلا ناخذهه بالسهلات
بجفوف النشامى
بصرخة الرشاش
صرخة هالوكت تتنطَّر الغبّا ش
كحّل عين موتانا بضوه الرشاش
عيشة وي الشكول الزفرة ما تنعاش


عيشة وي الشكول الزفرة ما تنعاش....

علي مالك

(نعي)

نوبات نغفه اعله التصاوير
نتحلم ومانلكه تفسير
النوم اذا ماعنده جنحان
جاليش من عيونه ايطير

ثاري اليحب وتعوفه ربعه
يطلع حركته براس اصبعه
بالمكبره اليدفنله شمعه
كون بصلاته يكوم ينعه

يطلابة المغرب ثجيله
لامن يرد لابيه حيله
الصاحب يذلك بس رحيله
هاون جفاك وكلبي هيله

نايم لجن مو بالعوافي
مو مثل حظني الكبر دافي
العكل تغفه اعله الجفافي
يعكال موش براسي غافي

ارهيف كلب واترجه يلفون
وحاجوز مامش بين العيون
انحصر عمري ب ليش ..وشلون
موصوجهم صوج اليدفنون

جامادرو بالجاي محتام

امجين يريد بصفك ينام
من متت كمت اسمع بالحزام
بجالك جنت ماعاض ابهام

محسن الخياط .....


ملح روحي وشربهه الليل والمامش شرب طيفه
ومشيت وكلبي وصله هنا
وصله بحد سواليفه
العمر جربة نخل وبشوج واكف وبطرك ليفه
وتلمست العدو من السيف ...
جيه بيه انكسر سيفه
يريد ايضوكني الزنجار حسباله الذهب زيفه
وكفت انكر الاوي الماي لاوني مشاحيفه

الثلج مو عار بجويريد عار اليجرد بصيفه

انه امشي وتمشي الحجايه وترد بيه عتيجه
من الصبر شجره
وشفت روحي بصيص يريد
يتعب يوصف الكمره

نكلت الروح اسولفها
لكيت اسنين احد السيف وايامي اعله طارفها
اجيت اسكت ...تبديت
الشمس تزهد بالمرايه

وبعد ياهو اليضوي الها وبعد ياهو اليلم جفها
الجرح كبلك وصل ليها
وكبل ماتلتف يلفها

ويطشرهه والمهه من الضلام وهي نيليه
ويطشرهه والمهه من اللهيب وهي برديه

ي وانته اطباع ماتتبدل بروحي
مثل عشك السمج للماي وك روحي شوديلك
اوديلك ضوه مرايات لجروحي
اوديلك قصيده مسافره بروحي
يلمتاهت عطش بالليل وانشمرت بعيد
وجلبت وانكطعت بروحي

وتلكيته هذاك ال بالعمر مكتوب
وفراكك تلكيته

وكبل مااحجي حاجيته
وشفت غمك العشك بالروح مثل الماي
ياخذ كيش ساجيته....

ياسر الانصاري .....


امس
شفتك حنين مـعلگ اعلى البوب
شفتك تختل بعمري ذنب ، مايدري وين يتوب

هلبت بالدرب وألگة الوطن صدفة !
ويلمنه التعب
والخوف
والرجفة
ونتشابگ وابوس خشونته الترفة

ويدليني على عيوني خذاهن ياحزن مني
ويعيشني السنين الضامهن عني
ونمشي ثنينه تايه لگة تايه
واضل ابچيلة ويغني

واگلة الغربة ماتعرف تلم عاشگ
ولوما انت ما ننجبر ونفارگ
انت اول وطن مبيوگ فاتح حضنه للبايگ

واگله اغفة اعلى چفي ، وخل الوليك
تطيح انت ونعاوي امي تجي تشيلك
معلمنه
النهار نموتلك ، بالليل نبچيلك ..

زياد طارق
....

شمس الله الباكت كل اسمر
عافت منك لون وضحكه.. واخذت كلشي
ضحكاتك صارن بشفافك ..وانه برمشي
جبتك من كل تعب الدنيا
حلمين نحط بالمرجوحه
ندفعها وترجع مبتسمه
ونضره عيني لعينك جانت
كبل جدامي لعندك تمشي

صوتك يطلع سمفونيه
فراشك مبخوت ومتعافي
وراضي لحسنك صاير دّيه

القنديل مضوي ويضحك
يتمنى بگربك ما يطفه
لا تطلع يمدوخ الغرفه

جي عاشكتك !!..
تعاند ما تفتحلك باب
شلون تفتحه!!؟
ولمن تطلع ترجع اتعس من سرداب

اوكف يا معشوك الباب
اوكف يا معشوك الحايط
حك إطار الصوره يسجنك

حسنك شارب مي تشرين
يل مو اسمر بس بشوفك تدفى العين

يا جماره كلب الوالد ورفيف امك
يل جفك ما يطلع فارغ من تسلم
شايل ياس ولمعه معضد
ومن يلامس جفك جفي

تخجل حدما يطلع دمك

نضع بين ايديكم المثل الاعلى للقصائد التي تكتب للوطن

عريان سيد الشعر

(اوراق يومية)

جور
شما طفح غيضك على الناس
سليل الظيم الك
بالساس نداس
لون تكبر حقد نكبر علامات
وجذب شمس الظهر بالباع تنجاس
تذل كثره الكصص حد لطخة الطين
وكصصنه بشدة التاريخ تنباس

فرق بين اليبيع اسمه وسجاياه
ومابين الوفي المادنك الراس
ومن بين الحزن والآه والويل
ومن ركبة طفل ماكاوت الميل
ومن بين العطش والجوع والنار
ومن بين
الثواجل والمجاتيل
ومن بين الصبر.... والطيف. والحيف
وما بين الجفوف المالهن حيل
لون ليل الغدر يكبر علامات
نشع نجمة صبح ونشتت الليل
مهو وحده الصدى الصادك مع الصوت
وابن ليلة غوه اليتهيب الموت

هلج ..ياكاع لاتخذف حناياج
يخون اسمه النجه بروحه وتعداج
ولون هبت عكس ريح التغاريب
وسحب السما احنه عيونهه سماج
ذرى ايامج كحل واسمج مواويل
ودمنا يهون الج لو غيرنا انطاج
وحك ليل الجرح والويل والحيل
العثره شما تصير يفوتهه السيل
وحك ملح الخبز والطيب واللون

يمر الموت بينا ومايمرون

والثوره حلم مازارنا بنوم
روت باول شهيد الطاح لليوم
وتضل رفة جفن كل عين مامون
وكلب كل اريحي المادنسه اسموم
اذا نوفي بالعهد ونطيح ثوار
يخضر دم شعبنا وغيرنا ايكوم
واحك اخر وصيه من اليطيحون
يمر الموت بينا ومايمرون

المنازل شرعت للنار ....والنار... تشب
هلبت تفرزن دار من دار
يلطخ صفحة الانجيل كانوص
ويوصخ صفحة القران غدار
ويساوم عل الشرف والناس جاسوس
ويبيع ويشتري مهزوز الافكار
المنازل شرعت للنار ...والنار

وتهون.....
شاطفح ميزانهه تهون

الوكت صهوة مهر وتجيب البطون

وعرفنه السلطوا سيف الوصايات
باسمنا شكد حجوا وشكد يجذبون
وعرفنا الريح من تكصي ويه الاشجار
يوهسها الكطع بالخاويه ودون
الشمس غايه وشرف لليعشك النور

ودرب كرص الشمس من كال مامون ..؟؟!

كاظم العطشان

سايسيتك


سايسيتك....
زيبك امسودن شكظّك...
يلسوادينك..... تِعِتني ابلايه راي
ساسيسيتك...
حته اشوفن وين تاليتك يماي...

لاني گصبه ابهور ظلت....
لاني بشفافك الناي...

وخاصمت روحي وتبعتك..
بين غلطه................
وبين ظنّي...............
ومستحاي ...........
وشفتك ابعزّ الظهاري...
اتدوّر ابصحره ال افياي...........!!!

وگاودتني.....
وطاوعيتك...!!!
علجروح اتريد ترگص........!!!!!!
گتلك ارگص....گلبي مات ...!!!!

اشما بچيت المات مايسمع بچاي ....
الوادم اشمدريهه بيك...
الوادم اتغرهه ضحكتي....
الوادم امصدگه غناي....
وبلچذب ......تضحك ابوجهي
اوبلصدك........ تشبر گفاي...

وسايسيتك.....
چم شمع يطفه اعله چفي....؟؟
وچم زفير الاووف من يخنگ ضواي ؟
ونته طير ابلاشجر وكت الغروب
لاتحط ترضه اعله ذيچ....
ولاتحط ترضه اعله هاي.....!!!

وماكسرت ابخاطرك ومشي وراك
وماشبرت اسنين عمري..
الفحطن وظلّن وراي.....
ياعتب بلسان خرسه....
يلسمارك....موگد ابچلّت اشتاي...
وسايسيتك....
وانه هسّه ابير يوسف...

لاوحي ايسامر وحشتي...
ولاظعن بالسچّه جاي...

وكتبتلك كلشي بيه
من الحزن
والشوك وآهاتي
وغنه جفوفي اعله بابك
اكتبتلك
وانتظرتك ليله ليله
وعطبت بيدي الرسايل وانت ماكو
لاني عد بابك خزف واطرد غربتي
ولاني ملجوم اعله غيرك
يانبي شأخر ضميرك
عاين جروحي شكه جناحين ملجومه وتغني
يا قطار المرني ماخذله عزيز
ويارفيج المامشه بروحي فرح جلمة وعرك ذمه ونزيز
انه والليل وصفنتي وكل مواعيد العمر ننطر تجي
ننطر هلالين وكتك ويحصد بينه البجي
كل شبابيجي حزن والليل وحشه
وكل صواني دموعنه تصلي اعله غبشة
وانت لا طيفك يجي ويطرد غربتي
ولاغنه زلوفك يمر صدفه العتبتي
يا خضار
استعجل سنيني الكضت حيف اعله كلشي وفرزنتها
شمانعك ماتوصل العتبه الردتها
شمانعك وانت البديت!
اقرا بيبان العفتها تكلك أنت
سايل دموعي الشفتهه تكلك انت
انت انت
كلشي انت
كاعنه وخضر السنابل
والحجي الماجزنه منه
يا بعد شامات اهلنه
يابعد كلهن والك جم هور غنه
حاسبينك مثل امس والشوك حنه
حاسبينك وانت نيشان من اهلنه



_بهاء الطائي

جبار رشيد ↺ ايام البعــد


ايام البعد جبناها صفنات
بين امالنة وحيرة امرنة

تجي لو ما تجي كضينة الايام
وصرنة وياهو يدري شلون صرنة

صبرنة متاع صار وبعدك بعيد
وتجوع ايامنة وتاكل صبرنة

شبعد يلما تمر مو كافي الغياب
صار هواي ننتضرك تمرنة

نذرنالك تجي وندعيلك تعود
وعمت سجينة وشيب نذرنة

وعلي غيرك جذب ما يرهم نروح
ومن غيرك يسد حاجة نظرنة

يبن الناس غيرك ماكو موضوع
وهلبت بلجذب شخصك ذكرنة

نسولف بيك لاخر لحظة بليل
وترد من الصبح تشغل فكرنة

ما عنت عليك بساعة غروب
روحك واشتهت تسمع خبرنة

يا روح الكلب يا عزت الروح
يا دمعاتنة وهمنة وسهرنة

يا اول عهد يا تالي الايام
يلعب صبانة يا شيبة كبرنة

شكد كبلك مشو ما سلو الروح
ولا بغيابهم كسرو ضهرنة

البعد نيران كبرة تبخر الدموع
وبس يزود يتبخر بصرنة

منين نجيب مثلك حتى ننساك
ومنو المثلك يعوضك لو خسرنة

الشبة كل اربعين حجاية تنكال
واذا واحد يصح جان انتظرنة

تعال الجرح جن وما رضا يهيد
ونحجي وياة ما ينفع عذرنة

ويشك روحة ع طولة وينكت جروح
وكضينة خيوطنة وملت ابرنة

شوكت يندك علينة ويضحك الباب
ويترس بيتنة وصوتك يسرنة

وترد انت وتجيب الراحن وياك
وتجيبة وياك يلماخذ عمرنة

عدنان شايع




حتى لو بطراف اصابيعك تكظني وانچفي

الينچفي يگلوله فدوه

الفدوه من حلگك يبعد احلوگ اهلنا هواي تسوه

لولي برموشك على رموشي نُعاس

بروحي غفوه.

فراشنا النسمه .العليله

الگمره.. .غطوه

عيشني ....امن اول (دللّو)خدرتني

وإبدي سافر

خطوه ,خطوه .

طشر بروحي السعادة بكاس وصلك

بي غنوه ...

بي اه

وبي اخ

وبي مدري ...!!

منين ماكظيتني ...

تلگاني شكوى .

عيشني .

وفزز احلامي النامت امتانات .صحوه ؟

عيشني (الجلمود).اكل لوني بضراوة.

وروحي خضره ..

وعيني .رخوه