اليوم لحد يحاجيني ...


اليوم لحد يحاجيني
صاير عزيز كبال عيني
للنجف ياهو اليوديني


مريت بالديره انه سايل
و شفت ركن البيت مايل
سايل يدمع العين سايل

شط الجبير وكابليته
وبماي عيني جمليته
لو ينشره الوالي شريته

اسمر يبو العيون الوسيعه
طوله حلو اجدامه رفيعه
قاطك نضمه لو نبيعه

مرتك ي يمه شلون بيهه
حطهه بقفص واقفل عليهه
وخاف ياخذها وليها

يهل العكل يهل الطراريج
عبرو تره المعبر غميج
وسوو لوليدي طريج ...

اشتاكلي .....

#عريان


اشتاكلي,,

المشتاك يطفه ابماي عينه ويشتعل ابجروح اديه

ويضحك ابوجه الضنون ابغير كلبه ويبتشر والبيه بيه

اشتاكلي ,,

الماي يخطف عالجروف وداع صدفه ويعتني الهرش اليبس

مايعتنيه

اشتاكلي.,,

اليعثر ابظله ايموت صاحي

واليعيش بلايه وعيه ابغير ظل

الشوج من ينبت بسجه ايبات وبنادم يزل

اشتاكلي,,

اجروحي غلاتي

وعيبي صبري

ودفلتي السكته

ووحشتي بلايه هم

وحجتي الفشله التطشني تراب مايسواش لم

وهمي دنيه انبعت بيه ابغيرك انت

وشنهو معناه الجرح من غير دم

اشتاكلي,,

اتخضر اضنوني ابكاع صبخه

ويشبج ارموشه اعله طرواك الجفن

وتشرك اشموسي ابحضن ليلك نهار

ويحضن الغايب هوى الحاضر حضن

وتطفح البسمة اعله بال المبتلين

الماي يضحك من تشك صدره السفن

الماي يضحك من تشك صدره السفن..

كريم حاشوش .... ... سفرة طيش


اضوگ اسمك
واشوف الكاس عابد يرتجي بربه

واشوف الدنيه سفرة طيش
باجر كلمن بدربه

خل اتعب بعد شيفيد عندي النار موصعبه
عندي الموت
جرعة كاس
وشلة كاس
سهله وينتهي بشربه

كلشي يهون وبسرعه
كلشي يهون بس الليل
بس الليل ماجرعه

بس بالليل يلتم كل عتب روحي وغنيلك
اغني وعيني تبجيلك
اغني وشوگي ياخذني بجدم حافي المواويلك

ووصيلك
يرب الاااخ والچمه
عله هونك من تطب روحي
بشر متعوب ومكدر عليش وترفس بحيلك

عليش اسنين المعسرات كلهن طبعن بروحي
گولو هل بشر متعوب وأخذوني ع گد نوحي

عوفوني اختلي ابروحي
عوفوني اختلي ويه الكاس
عوفوني التعب مرات مايحتاج كثرت ناس

عوفوني الحزن مريود للما طاح بجروحه
ولا انه الباگ حگ الناس
لا انه المانطه بروحه

ولا انه المستعز دمعي وغليه اعله ياهو الجان
اشو كلما عزيز يروح من عيني يطيح انسان

وماعرف البقن بيه شكثر ياعين تحسبهن
اشو ياهو اليجي انطيته
المصيبه يروح مايبقه
ولا انه الكتله رجعهن
السنين الونن عمري بعد ما ظل اثر منهن

ويروحي براحتج وني
تراهه الدنيه وكحت عين كلما يطگ عود اخضر تذكرني بكبر سني

وتغازلني
وعرف خيوط مافيدن لچنهه اتريد تغزلني

الذكريات ..!
عبارة عن عبوات ناسفة ..!
و لي في كل شارع ذكرى
لا اعلم في اي لحضه ستتطاير أشلائي!

#مذكرات_منسي

عبد الكريم القصاب


گالولي تجي وحطت عصافير المحله
امتانيه الخطار
واغصان الشجر نفضن ورك حنه
وصواني ازغار
وعودان البخور اشتهن طعم النار

وحرگ روحه الشمع
من سمع بيك وذاب
وانه الخاطرك
رشيت ماي الورد عالعتبه
وغشيت برفيف الكلب شباجي 
كلت يمكن يجيك تراب

وبلهفه عطش تانيت
تانيتك تجي لكلبي
تجي لعيني
مثل جية حلم من غير دگة باب

وبلهفة عطش تانيت
واستعجل نبض گلبي عليك
او وكفت الساعه
ومدري شلون
غبت اويا الشمس
وتجرح اللبلاب

.. لقاء شتوي ..
..عبد الكريم القصاب ..

ويـــــــــن هالغيبه حبيبي ؟ جنت ويــــن بيا مجره ؟

جيتني ، يانعمة الله .. شـــلون فرحه شــلون بشرى !

والله بغيابك يبس عود الصـــــبر وآنطاك عمــــــره

وانا خاوي ومالي خلك الناس ، والروخ آعلى شعره

ضيجه والفارك عزيز ، آمـــن الدبيب يضيج صدره

وين هالغيبه الطويله ؟ اشـــكَال كَلبك ؟ شنهي عذره ؟

كَلبي عصفور بغيابك تاه مـــــــــــا حط آعلى شجره

ليلة آشـــته وجابـــــــــك الله بغيم والدنيـــــــا ممطره

اســـــــفر آكَبالي حبيبي ، سنين مـــــــا شايف الكَمره

خل آشـــــــــبكَك ، بارده الدنيا وشــــــبكتك نار كبره

روحي مشتهيه البجي وروحــــــك مثل روحي مِكِدْره

يابســــه آشــــــــفافي عليك وظالّه بحســــــرة الكَطره

هاك شــفتي وبوس وآبجي ولا تظل بالصــــدر حسره

أنت مــــــــــن تبوســــــني وتبجي أمص بكاس خمره

أنت مـــن تبوســـــني ، الحامض حلو عيونك آتكَطْره

دمعك آيمَوع الكحل ويطيح شـــربت نومي بصــــــره

يا طراوة طولك الخدران والشــــبكَه آعلى خصــــــره

حســـــــنك آيفك عكَدة لســـــان الكَلب ويبوح ســــــرّه

صـــــــوتك آيرطّب عشب روحي وترد الروح خضره

جيتني ، يا نعمة الله ، شـــــــلون فرحه شـــلون بشرى !

عقيل العرد



أول مشاوير العمر


جانت عيونك

وآخر رسالة للهجر جانت عيونك

اول غُرب نرتاح بيها
وآخر مدينة نموت بيها

جانت عيونك

ياما حبايب سامرونه وماكو واهس للعشك

وياما كصايب خدرت وما مش اصابع للصدك

وياما كلتلك ضايع المفتاح بكَليبي بعذابك لا تدك

ياما تنيتك بالمواعيد
هلال اعله كَدي وضاملك عيد

والصايمات بلا عذر ..

جانت عيونك

وتاخذني للوادم نذر ... جانت عيونك

زعلان لو هاوي الزعل حيرنا طبعك
جبنا دمعنا ونعتذر لو تعب شمعك

والمطر من كل غيمه اجه ايطيح اعله دمعك

ثاري المطر ما وفه الاعذار

والغيم يم عيونك احتار



ثاري اول صيار المطر ...جانت عيونك
والتهدي للناس السهر ...

جانت عيونك

انشد بساتين الورد يا وردة منهن بيها خله وباكَتك

هاي الالوان الوان صارت جي
شفتها وشافتك

وهاي الانهار الحلوة ..
صارت حلوة..... لمن ضاكَتك

طعم الشموس ولون الازهار
يالحسنك اعله الدنيا خطار
وخطار غالي اعله الحلم ..

جانت عيونك

يطفح دمعها وتبتسم ..



جانت عيونك

على گد البريسم ..
القديس مظفر النواب ..


ياطعم ...
يا ليلة من ليل البنفسج ..
يا حلم..
يا مامش ابمامش
طبع البگلبي من اطباعك ذهب
ترخص واغليك واحبك ..
اني متعلم عليك اهواي ..
يا سولة سكتّي..
يا طواريگ من الظلمة تجيني
ﭼـانن اثيابي على غربة گبل جيتك ..
ومستاحش من اعيوني..
و على المامش حنيني..
جلعة الهجران زارتني گبل حبك يغالي
والمتني ..و على المامش علمتني ..
انه حبي اﭼـثير گبلك ذوباني ..
لگحت بعيوني كل الطلع گبلك ..
وانته توك عوگ ..يالـ فيّك اشگر
كل زمانك على ازماني ..
اشلون اوصفك وانت كهرب
وانه گمره و عيني دمعة ليل ظلمة ..
اشلون اوصفك وانت دفتر وانه ﭼلمه ..
يلي ما جاسك فكر بالليل وما جاسك سهر ..
يلي بين احواجبك غفوة نهر ..
يل جرة سمه بعينك ..
خاف افززها من اگلك ..
شوف انه احبك ....انه احبك ..
مامش ابمامش و للمامش ..
بميزان الذهب وتغش....واحبك ..
سلمت كل الحجي الوادم وگلت ..
غرني حِسنج يا بنفسج ..
وانت وحدك دوختني ..
وعلى حبك انه جبت الذي بحبهم لمتني ..
يا طعم ...يا ليلة من ليل البنفسج ..
يا عذر عذرين ..
يا شنهي واحبك ..

عارف هاشم

( خرز ناعم)

من اذكرك ينخطف لوني..'
و اتطّشّر خرز ناعم..اي ناعم و بعد انعم..'
و اذا منگاش الحديثات مايلگطني ما ألتم..'
ياهذا آنه..بعد ونّه ويخلص الليل..
بعد سچّه و يخلص الحيل..'
وشالة عافيه معتاز أهرول بيهه صوب الريل..'

يهلبت بيك زلّة شوگ ويحنن مراسيلك..'
يهلبت طيف وتسيّر علي وتگلّي شدحيلك.."
چا خضّرت من اجديد..
چامشّيت المرايه و عزمت المشط و الحنّه..'
چا نشّيت كل نورس بحجة عيد..'
يل امتعّبني مامِلّك..
بذرّات الظباب تضيع صم دخان اجيك مغمض اندلّك..'

أنه العلّمت ريتي اعليك و أرتاح من اشهگنّك..'
أنه اول سنبله تحب شفرة المنجل..
آنه اول امدلّل لاچن معلعل..
أنه المن داخل امبهذل صرت لعيونك امعدّل..'

يحسوة كاس المحبين..
يلذة ليل المعرسين ..
احس بعيونك النشوه..'
يكلما تنحچي تنراد يحچاية بخت حلوه..'
من اشوفك تفزع الضحكه و تلم غرضانهه جروحي..'
من اشوفك يبرد اعتابي و تفرّع كل (هله) بروحي..'
و يامه ويامه گلت اهواك..
گعدت وياك..گمت وياك..
كلّه و گلبي گارصني و أرد اردود و تمنّاك..'

چم مره تزاعلنه و تحالفنه..
چم مره نوينه انعوف ماعفنه..
ماندري و عله ساعه القدر يذبح مواقفنه..'
وتفارگنه..
وعرفت (الآه) ماترتاح الّه بصدر المفارگ..'
و عرفت الليل مابي خير چي بس بي عله العاشگ..'
ليليّه انشتل شمعه..
ليليّه ابچي و آنه ادريه كتّال الشمع دمعه..'
ليليّه أجفل ابطرواك و الصفنه تجي تحبني..'
ليليّه استكينة چاي يمي تصيح اشربني..'
و انت ولاخبر منك..
ياهو استوطن احضانك..
عسا يبرد ولايدفه..
عساه ايموت بالرجفه..اليطب بدين ذرعانك..'
آاااا يالبارحه الگشره..
گصدناك بحلم خطار آنه و گلبي و همومه..
و دخلنه الگلبك و شفنه الغريب معلّگ هدومه....

لطيف العامري || عشـگ (حامد ) ||

چنه فقره
وچانت القريه التلمنه
قريه ميته بلا حياة
وچنه نتجاسم فگرنه , نضيفه كلنه
اوين مايچهب يبات

وچان برد الشته يگرص بالضلوع
وبالدشاديش الفقيره يمرن علينه الليالي الباردات
ومن سموم الصيف چنه نلوذ بفياي النخل
حدر العثوگ الداليات
وچان ديوان السلف عامر بناسه
وبالدلال العامرات

وچان من دون الشباب اليحب حامد
وشكثر چانت الحامد ذكريات
وياعشك حامد عشك ولد العشاير
لو حياة وي اليحبها
لو بلياه ممات ,

وچان حامد عنده شوفة سلمى عيد
وبس عليها افكاره دوم مشتتات
وچنه لو ضيعنه حامد
عالشريعه يروح
بلكت تجي تترس ماي سلمى وي البنات

وكبرت القريه الزغيره
وكبر حامد
وانقبل باحلى المعاهد
وفارگ اهله وراح يدرس
وفارگ هوايه سوالف
وشاف وادم ماهي وادم
مو اهل دلّه ومضايف

وشاف دنيه مگذله وكلها سفور
كبل ماچان الها شايف
وصار حامد يستحي يگول آنه ابن ذيچ الطوايف

وعلى شدهة بال منكم ضاع حامد
واول حچايه حچاها
حلفاني مااجيبن طاري سلمى
خاف يسمع بيها واحد
وصار عنوان التخلف ثوب سلمى بعين حامد

وگام يچذب من يواعد
وفارگ عيونه الشرار وصار بارد
وگام كل ساعه يصارح وحده حامد
وصار گعدة مكتبه او وگفات ختله عشك حامد

وسلمى تترس ماي وتبدي بجدرها
وكل خميس عيونها تناشدني

ماجه وياك حامد؟؟

وحامد ولاچنه حامد
وسلمى تصبر
وياصبر سلمى على صبر الگاع زايد

وحامد الحبه الجديد
يالف ابيوت وقصايد

وناس تنشد ياهو حامد؟؟
انه حامد
وانت حامد
وكل قسم بيه مية حامد

(زيد الهاجري )

سفره ممتعة

#شناسية بوجهي ومشيتي ؟
الناس نظرتها غريبة

الناس تهوى الوجهه فارغ
وآنه فاكَـدلي حبيبه ،.

#بس أنته الدرب وياك
يبدي منين ما يخلص

بس أنته التجي ببالي أذا عطشان
وأشربك حيل ، وما تنقص

يـ وجه سوالفي شلونك ؟
مرلي بداعت عيونك

صدكَـني المسافة تخاف من حچاية الخطوه
صدكَـني المحبة بدون ما نتلاكَـه ما تقوه

- أحبك يا دفو عروكَـي ،.

#مر بيه

أنا موجود ، بس مشمور ، يم حاجات
خلّص دورها ويـه الناس

أنا موجود ، بس مركون ، يم أشياء
من ألمسها ما تتعرف بأيدي

تعال تمدد بچفي ولو بصمه

تعال ودوّر بعمري
وأخذ ليعجبك وضمّه ،.

#وين رحتي ؟
شرد أسولفله ويكَـلچ ؟!
خايف يشهكَـون أسمچ
والهوه مو حصة أحد

والشبابيچ البقت مفتوحه بيه
صايره عنوديه مثلچ
لو تشوفچ لو تشمّچ ، يلا تنسد ،.

#روحتك
لو بيها صالح
ما بعدني لهسه أذكرك ،.

#أخذ مني ، عطر منك
عليمن ضامّه بحضني
أذا متوازي عالفركَـه ؟!

أخذ مني
شلي بذرعان ما تشتم دفو الملكَـه ؟!
أخذ مني شكو بصدري
ألك بيه عمر مريود
ما ينعاش من دونك
عليمن ماخذه لكَـبري ،.

#أشوفچ وين ؟ ما أدري
ضويت بكل وجع مكتوب ما مكَـيول ، وما شفتچ
دليني
أريد أبچيلچ العندي
ما معقولة ما ألكَاچ
عندي سوالف متيهات
منو اليندلني وأحچيها ؟

خليني
أدور كل زويه أنثلمت بروحي
هلبت ضامچ بيها ،.

#يلـ نسيتو تنيموني ، لهسه ظل صاحي طفلكم ،.

#أريد أنسى

أريد من أختنكَـ
أشتم هوا من الجاي يشتمونه كل الناس
مو ألا الهوا الموجود بـ زلوفچ

أريد الماي من يلمسني ما أتخيل چفوفچ

كافي أتذكرچ وأحسد شكو معرسين ،.

#مشتاكَـ لحضن بس آنه نايم بي ،.

#كلشي يندلني ويجيبچ لو سمع نسيان بيه ،.

#يجيچ الليل وتنامين
يجيني الليل وأتذكر

وكلمن ليلته تشبهه ،.

#يل عفتي غير عيوني فوكَچ نامن
الباقي من عمري أخلصه ويامن ؟ ،.

#لو مخليني بـ ضماي هواي أرحم
شجابك ومريت بيه وبللتني ؟

من بديت
أتشهى كل كَـطرة ندى تطيح أعله صدرك
ومن بده ستوه الخضار يشوف دربه ، فاركَـتني !

يا عطش ناداك ولبيته وعفتني ؟؟ ،.

#كَـضت الأحلام بالدنيا ..

وكل أثنين
ردو حيل متونسين
وهالرديت بس آنه

كلمن غايته بچفه ، حتى أنتي
بس لوياچ مو آنه ،.

#حبيني ،.
بعد بيه عمر يستاهل سنينچ

- حبيني ،.
أحس بـ طيني ما يرتاح ألا ينام يم طينچ

أذا ما تنتمي لـ لونچ
شسوي بسمرة خدودي ؟!

أذا ما تشهكَـ زنودچ
عليمن عايشه زنودي ؟!

يـلمشوّفتني كل سوالف الفردوس بيدينچ ، شوفيني

- أحب روحي من أجي بعينچ ،.

#هل ظلّت بعدكم روحي فد ظلّه
محد يدري بيكم ويـن بس الله

- وين دروبكم وصلت ؟
جدمي بكل درب دخلت .

لو مخلوق لو مو طين ، لو نخله
أطشلكم عثكَـ من كل سنة بعمري
وأترس كَـاعكم بيها .

يلما ألكم أي طلّة
أذا ناحت عليكم عيني شنطيها ؟ ،.

#مـا متعود أكَضي أيامي من دونك
خل يطفالي كلشي ولا ضوه عيونك ،.

#يلـ سوينه كلشي ببالك وبالي

ٲبوس جفوف من
ويجيبك كَبالي ؟ ،.

#لا تسألني عنها ، الوجع ما ينكَـال ،.

#القسمة لعبت دورها وشهتني أموت
زحمة أعيش ونسمتي بـ رية غريب

بسكته تكَـضي أيامي يلچنتيلي صوت
الچان يشتم زلفچ أشتمه النحيب

هوه منچ وأنطفى بوجهي الشباب
المايشوف عيونچ يشوفه الطبيب ،.

#تركيلي نهاية أندلها من ترحين
لتخليني أرد لربي ناكَـص طين

أنا بملكَـاج أبوك العافية من الناس
وأردها ألهم ضعف بأول جدم تمشين ،.

#الحركَـه البينه منكم
وين نحچيها ؟

بسرعة بسرعة صار وداع
مالحكَـنه حتى الدمعه نبچيها ،.

#وليمته أظل بس أنتظر ؟
مضمومه ألك جرة نفس
كون من أشمك تنشهكَـ
ما تسوى أشمك بالصور

أتمنى أشوفك وأنتچي
ظهري أنكسر من فركَـتك
الفاس ، مو بس للشجر

يلما تخلص غيبتك
جروحي ما تعرف صبر

كلما يمر جوع بجرح
ياخذله وصلة من العمر ،.

#لا والقاسمه الله يبين شما غاب

لا والماي
ما يحلالي عكَبج بس عطش وتراب

ٲفك حزني عليج بيا وجه ؟ يا لون ؟

كل ٲمة محمد ما تجي بعيني
ٲذا بالصدفة ٲسمج بالطواري ٲنجاب ،.

#عفتني ألمن ؟
غيرك ياهو يعرفلي ؟ .

#أحس ماعندي حيلة وأظفر بملكَـاك
تچيني كَـبل فركَـاك

خايف لا أظل وحدي ، وأتمنالي أي واحد
دنيه وكلشي بيها ثنين ما تستلطف الواحد ،.

#يا زغر ملكَـاچ والدنيه شكبرها ،.

#مو مالت مالت وداع ستونه متلاكَـين
بعدها أعيونّه من المستحه مدنكَـه

بعدها تشوفنه عيون الشمس ظلين
ما لحكَـنه نكسر عينها بشبكَـه ،.

#شلون ماشوفك تريد تظل بعيد
المسافة المو قريبة تلوكَـلك ،.

وشميناك وأعرفنه الورد مخلوق ، للمنظر ،.

قصيدة "اغاني بشفة الجرفين "

الكبير عبد الاله منشــد ..'



تواصلني و انس بيك ..
ونسة نهر بالگمره ..
يضحك والنجوم ابلام من فضه ..
والروجات اغاني بشفة الجرفين
يا أول حلو بالعين ..
يا اخر حلو بالعين ..
احلم بيك ..حلم الصبح للورده
اتلگاك من تجبل ..
ملگه النخل للمَده ..
روحي من الفرح تهتز على السعفات
يا بستان ..كل ليلة حمامه الروح بيك اتبات ..
من تبعد اضلن بـور ..
اتحسر على الفيّ وعلى الخضره
واستاحش بعد فرگاك ..
وحشة بير جف مايه ..
واتنطر ترد واعتب ..
واگلك وين ..وين؟ وين؟
يا أول حلو بالعيــن!
يا اخر ...

قصيدة ((طعم اول سلام))

الشاعر - علي حسن الشمري


من هويتك ..
جانت اضنوني گصب
والليل خرخاشة عطش
وجان صوتك غيمه تلعب فوگ شفتي
ردتك اتگطع خيوط المستحه وتمسح ظلامي ..
جنت اسرح شوگ ويعتني النزيف ..
ويه كل گومه بخيال اكسر صنم ..
ردتك اتشوف الفراغ ..
التارس عيوني ركض
ومن ركض بيه العطش جيت اشتكيلك
ضگت (ذقت) ﭼـفي بيه طعم اول سلام
واشتهيتك ..اشتهيتك كاس غرگان بصفنتي
ايكاسر اضنوني بسمارك ..
ولمن هبت ذكرياتك
عمري طشيته ذره وتانيت دمعي
وتدري اخر طيف ضيعته بهواك
ذكرياتك من تمرني
يصعد الروج وجرف خدران اصير
يسرح بروحي الونين
اتشيلني الريح بجنوني
الما كسر خاطرهه لوني
وهدمي من يركض حنين
ذكرياتك تصحى وي اول جگاره
وتغفه وي اخر محطه اتشيل تعبي
والخيال يصير غيم ..تصفن بوجهي سمه
تغرگ بعيني شمس ..!!!
و يتيه طولي ..!!
ارجع اتلمس ضواي ..
وبعد شهگه وانه جروحي تنزف ..
وحشة اغروب وگبر ماله اهل ..
يرجف بروحي الظلام
ومستحاي اضنون ثكله ..
اتشيلني بـ ﭼـف مستحاك
الدنيا ما ضل بيها شهگة مستحه
وشدني صفنه ابخاطرك لا انكسر
انه عايش عالنفس ..
انه واگف بس نفس ..
خايف من الحسره تشرب روحي ..
روحي شيبه ..!!
وخضرت دمعه وسوالف
والتجاعيد الـ بعمري بيها حتى الطير يعثر
الخطوه تشرب واهسي وبابك بعيد
الدرب يوگف وارجع
ارسم بعيني درب ثاني جديد
امشي فوگ اضلوع عمري
وخطوتي حيرة غريب
واعتنيتك خوف يرسمني دمع بين الدروب
الضحكه ما ضيّفهه وجهي ..وشذبحلهه؟
اخدودي ذابحهه الدمع ..
ضايع بصفنة اضنوني ..
النار ما ترحم شمع ..
خيطت روحي اعله جرحي بلكي تدفه
اهناك واخذتنه الس الف والتهينه
انه وجروحي ظلام اضنون دربي ..
وخلص دربي وما وصلتك ..!!
تاه عمري وما وصلتــك ...!!!

مر خوية مر ..

للشاعر - الشيخ ابراهيم الديراوي


مر خوية مر ..
ما ضل صبر ..
مر شوف دمعي الينحدر مد وجزر
مر شوف بستان العمر ما فتحن ورداته
ما لاگنه نسمات الفجر ..
مر خويه مر ..ما ضل صبر ..
مر خويه واحجيلك ..
سواليف الأمس
عن گلبي الصارلكم ذبيحة عرس ...
عن وردتي الذوبلت من حر الشمس
عن عمري الماع بصوانيكم شمع
عن النخيل الما يمل من البـﭼـه وصب الدمع
عن الشمل والطشروا ذاك الشمل ..
عن النواعير الخذتها الصفنه عن جور الدهر
عن الشواطي اليابسه وحزن الشجر
عن الشته الما بيه مطر...
عن الحمامه الفاخته الجانت ابنخلتنه
بـ نخلتنه الطويله امعشعشه ..
وخربت عشها وسافرت عنه ..
ولا ردت بعد ..
سنتين ما واحد سمعها اتصيح من يوم المشت
ما ردت ولا عشعشت ..
المن ترد؟؟
ماتت بنيتها وبعد شتصيح ..
لا فردة رطب بالنخل لا فردة تمر
مر خويه مر ..
مر فرهدوا بيت الشعر
مر قافيتنه انباگت ابسكته الضهر..
مر طشروا جلماتنه وصارت نثر.
مر خويه مر ..
مر داوي گلبي المنكسر ..
مر خويه مر ..!!!!!!!!

الكبير كاظم لاله .. وقصيدته

((((حجـــل الشمــس)))


حزنان جفني ابلا كحل
مامش كحل واشريله ..
وما بيع حزني للنذل
لو گطعوني الليلة ..
بيدك ظفرت اگصبيتي ..
بـ أول عشگنه وشوگنه ..
نيشان نجمه للصبح
سهرانه ضلت فوگنه
والگمره ترسمنه فرح
وخيط الفجر من طوگنه
والجفن شريعة كحل
ابليل الكحل ناغيله ..
ومابيع حزني للنذل
لو گطعوني الليلة ..
تسبگني روحي اعله الدرب لهفه
واجفوفك دافيه ..
الخوف يلملمني برد
جنك حمامه ولافيه
واعدني من حجل الشمس
وانا اعله صدرك غافيه ..
نام الحلم وي الكحل ..
بجفني غفه كل ليلة ..
ومابيع حزني للنذل
لو گطعوني الليلة ..
تانيتك ليالي الزرگ
وگفه وتصل اضلوعي
صنطه ومشى بيه الحزن
ابطعم الكحل وادموعي
وشريت زلفي من النده
الدال فوگ اشموعي ..
ولتخلي جفن ابلا كحل
كون الكحل تشريله
ولتبيع حزنك للنذل
لو گطعوك الليلة ..

كاظم الركابي



بيه حيل وعندي راي
وچلمة چلمة ايفزن بطولك سوالف مشتهاي
وهيه هاي
الدنية بنت اليوم واموادع امس
وانت مدري
ابين زلفك والنحر شبخة شمس
ابين وجهك والصدگ چلمة تعال
سولفولك ؟؟
نية اليغفه اعله طيفه ايبات صاحي
وحوبة الگاع بعطشهه التغسل ذنوب المساحي
ودنيا هاي
اليعصر اظنون الهوا اتسولفله ناي
اليعثر بوجه الجرف يحچيله ماي
التخدر بعينه السوالف يلبس الصفنه ويجيك
وانت ياخصر الشواطي اشگد نوارس تشتهيك
ولا تواعدني اعلا باجر
النهر لو فاض شوگه ايغازل اخدود الگناطر
ذنبي تانيت الرسايل
وذنبي چذبت الحمام
وطاوعت روحي واجيتك
وانه ادري ابيا مشط ليلك ينام
واااااااااااخ لو اندل درب روحك واموت
بيه جم ابليس غافي وجلمة مفطومة علصوت
و انت تدري
جدام المتيه عمر معتازه حيل
ووين مايفرش ينام الكلبه خالي ومايمر بعيونه ليل
وانت تدري
الفَركة جذبة وحبل الموادع كصير
ورحمة ابن آدم صغيرة وذنب المفارك جبير
منين ما اشوفك جدم يتبع كفاي
منين ما اشوفك محطة تودع بكل لحظة راي
فدوة رسيني على راي
لو تدليني على ليلة وكون مابيهاش كاس
لو تدليني على شمعه تموت لو مايمها ياس
وما اتعبك
هذا طاري الشوك اجاك
لملم الشوف على طولك خاف عيني تعاشر ابن ادم وراك
وما اتعبك
وما اتعبك

سالوفة برد ..

للكبير عماد المطاريحي ..



طبعك طبع سنبلة ..
الريح لو عاندت بالحوّل بيدر ترد..
ارتاح لو عاندت..
بردك بـ لمسه تدفي ..
وارتاح لو حوّلت نار الشماته برد
تعجبني من تنجرح ..
مو دم نزيفك ورد ..
بستان عمري عطش
وطيور حبك خضر
وضحكاتك الهن جنح
حطن بروحي العصر
وسالوفتك من برد
وهمساتك من النده
وعيون نشوة خمــر
يعجبني موت الشمع
يفرش الروحه لحد..
يعجبني موت النده
من ينزل امن السمه
يختار حضن الورد
الله يـمّوت العشگ
الله يمّوت الكحل
من ينتحر عالجرف
نفس انتصب مأذنه
للناس غـنّي الحمد
نفس اشتعل واشتعل
ومحرابي برزخ ضوه
بين النهد والنهد
بس طبعي مرود كحل
ابحر ابعين الشگر
وابحر ابعين السمر
ومن يجي الليل انتحر
وارجع طفل منكسر
افرش سريري ملح
واتوسد الزنجار
وابقى احلم بمكحله
ما بيها مرود غفه ..
ما بيها مرود دفه ..
ما بيها مرود دار ..
احلم بخصرج يـ حره ..
ما مسه جف الصبغ
واحلم بنهد ارتفع
ما طافته الزوار

"ريحة عذر "

للشاعر عبد الخالق المطوري



ما ادري من تبتعد
ليش الورد يختنگ
ليش الغصن ينكسر وتمرجح بغربتي
واصبح نده ابلا ورد واتحير ابطيحتي
كل يوم انت الفجر ..لا تنسى مني تمر
تنساني ابظلمتــي..
خليك ريحة عذر
وانغطي كل الهوه
وانطير مثل الجنح
لو طرنه نصبح سوه
راويني ساعه هجر
تلگاني صفنة مشط
تلگاني دمعة ثلج
تلگاني حسرة طفل
من ينفطم ينحــرج ..
ما ادري من تبتعد
ليش المسافه تضيع
ليش الحلم ينتهي
وامشي الحلم مشوار
ليش الجمر ينطفي
وتفهه عليه الــنار

"أكسـر قرارك "

للكبير الشاعر ٲيــهاب المالكي ..



في كُل يوماً استفيق لـ أبتسم
و آراك منكسراً فـ يخفت عيدي
ولِدمعك الناري احزم ضحكتي
وكأن جمركَ يشتعلُ بجليــدي
كم مرةً هجمت عليك مــلامتي
وغيومُ صمتَ مخاوفي و رَعيدي..
ما بين تحذيري وخيبة فكرتي
ودخان تهديدي ونار وعـــيدي
قد صارَ جرحٌ ذاك من ارغمتني ..؟
وجعلتني اسكنتهُ بـــــوريدي
ان الذي لم تنسوا ها قد نسى
وطوى قديم حنينهِ بـجديدي ..

ردت اكسر قرارك من ردت تحلم
و على تعبك خفت من تنخذل تندم
يگلبي اوداعتك ملتهي الما تنساه
لا تطره اعله باله ولا مجرب الهم
حلاتك مو سهل كلما تشح تنهاب
الماي البيه حياه وكت الغرگ ينذم
ينصاد الصگر بـ الألف يا الله
و بصم الدخن تلزم ســرب دلّم ..
دمعتك غاليه من اتطيح كون اتطيح
للجفن المبلل على افراگك دم ..
يگلبي اليا وكت تعتني الما يشتاگ؟
وتبذر احساسك على الما يهتم ..
الـ على ايدك ما يضل شالفايده من يعود
يتبعثر وراك وتلتفت يـــــلتم
من حنيتك اشگد حذرتني الناس ..
بس اخجل اگلهم گلبي ما يفهم
عشت الخاطرك من انطعن مااگول ..
وبحرة اصوابي اگبالك اتكتم ..
ظهد جرحي و اواسي الشايل السـﭼـين
واگله اعذرني اذا سـﭼـينك اتألم!
ﭼـم مره الزعل من انطيه حجايه يصير
واتراجع واطمنك گبــل لا تعلـــم
و ارد اضعف مثل ما جنت انت تريد
واحن الناس منهم الي الموت ارحم
يگلبي وهذا حدي بطيبتك مجبــور
جربت وشفتهه وضعفك اشقدم؟
رف لكن على اليستاهلونك كون ..
عالـ من تشب نارك حرگ بيه تشتم
عالـ من ما يشوفك بالحلم يومين
الف حسبه اعله باله من القلق تلتم
عاليمدحك وكت ما تختلف وياه
گدام اليريدك بالذكر تنذم ..
الما يهتز حبل حنجرته وكت الغيظ
وبلحظة زعلته ابدمعه يتلعثم
يگلبي وموهبك ومسامحك عالراح
بس احسب احسابك باليجي امذمم ..
دللتك گبل جانت سنين اهواي
گمت اعذر واگول من الخطأ اتعلم
عمر تجبر خواطر نــاس ما يدرون
انا الـ من ما وراهم خاطره اتهدم
انا بعازة گلب يندل االـﭼـيله منين
يقره الطالع ومن يقترب يسلم ..
على نيتك بعد يا گلب ماخليـــك
تهوى الوادم البيهم الله اعلم ..
سلّم بس على الـ بل يا هلا اتلگاك
ماريدك هذاك الـ بالحرب سلّم

▼ خزامة هجــر ▼

للشاعر قاسم المعاوي ..



اشتهيت امشي اويه روحي
كحلت شيباتي بـ اشوية زغر.
واطلعت صوب الگصيبه بشوگ حنه
وسبگتلي اجفوف يكرها المشط
ومثله سد المشتهاتي ..!
وين امشي؟
وين اروح الياكتر؟
جامه مطرور الگلب
وبلمسه وحده تنكسر
باب ومتـﭼـه اعله طوفه
ابلايه عتبه ابلايه شباج وجرس
وقفل خزامة هجر ..
حد گبل جم يوم عندي عتبه جانت ..
گاعده ومتمدده ابفيّ العمر ..!
انضوي بستان السهر ..
ونوش عنگود النده ..
وحدر كل گطره التخر ..طاسة حلم ..
ليلة عطشانه اعله گطرتها اگعدت ..
وگمت فز بيه العجد ..
والبدت لبدة حرامي فوگ حايط ..
ولمعة اگلاده واصابيعي دبن ..
واعبرت ..راح الخجل ..
انكرص خوفي وانكتل ..
استحه وغطاني الگمر حد الشمس
وغمست شفتي بشفايفها وضگت طعم العرس
باب وعتبه ..والليالي افياي دنيه
انجفت الايام بيها ..
والسنين البارده ركّن عمرها
بحرگة ضلت تشتكي للجاي والرايح المها
شرعتني جفوف غربه ..
اويه كل هبة هوى گمت انردم
غفله اعله وجهي ..
وين امشي ..؟
وين اروح؟
طاگه ابراسي اذب اهدومي كلهن بالعجد
وانمطل راحه
واخلي الدنيا وسوالف اهلها ..
الوجع راسي مخده ..
يا عشگ ..كلمن يدگ الباب گله فلان نايم
وانت من تطلع وراك الباب سده