ناصر البدري ....


كل قصايدهم ضگتها
ولا قصيدة الطفت حزني ..

أستاحشيت
أگعد بصفك
والزم أجفوفك وغني ..

ودي اكلك
هاك اخذني ..
وين ماتبرد ازنودك
أشعل اضلوعي كواغد

أودي ادنيك
أعله صدري ..
ولعب بشعرك وأذكرك
بــ الأيام النمنه بيـها بـغطه واحد

اااآخ لو تدري بوحشتك
بيش أساجيـها غربتك
انته رايح
بعد رايح
ماخذت جرحي بجنطتك

رادو يسدون
باب أسمي ولگوك ..

وسابگوني ..
وخلصت الگاع ولگوني
غاد من خصر الوفه واگف واحبك

ضمني ..
بس الليله يمك

أرجف ابابك أولايه
شارده من الضلمه وجدام السكاره

كافي ..
أكد اعله النذور الماتجيبك

كل كمر ..
تانـه قميصك
زنجر بعيني أنتضاره

شوفني شصاير بدونك
وجهي مترصع مثل ثوب الدفاتر

وحالي ..
حال الشتل عمره
ومطرت الدنيه مگابر

ارحم اضنوني يـ شراي النشد

عود ردتك عرس نجمه
تناوش المضنوك فرحه

وردتـك ..
اتـنومه اعله صدرك
ذاك الينام اعله جرحه

ياحبيبي ..
الشوك مهره
ومايردها الحيله خاوي

وانه حمال اعله زغري !!

أسنين الم بحطب وكتي
وترس حلوگ الگهاوي

خلصت ريـة شبابي
أبين دخان الگهاوي

مدري ياهو الباگ ليلي
وضلت أحلامي عرايـه

ومدري ..
ياحسبه الخذتني
وعفت وجهي أعله المرايه

وين اسافر
وانسه وجهك

وانته اسمك ..
تارس أجفوف الشوارع لافتات

بيش اعذرك دوهنتني ..

فراگك بدمي مشه تنور حافي
ومايك بصف العتب مابيه الوحه

كون تدري الروح طفله
ليش كسرت المعاضد

وليش ..
لمن كبر ذنبي
هدمت كل المعابد

هيه مو حسبة شجاعة
مزاحم اشواگك كتني
وانته تدري الكلب واحد

الهاظمتني ..
كلبي جان امـزاود أمك بـ المحنه

جنت ازتـن شامتك
عن كلشي ضلمه
وشتل أدروبك نفانـيف وگماري

كلشي سويته حرام ..
شوغتي
ودم المحاجر
والجكاير
والعيون الطبعن
بضهر الستاير
حسب أحسابك حرام ..

وخاف من نتلاگه باجر ..
ردلي ديني
هاكثر مطلوبلي دموع وخواطر ..

——————

الكبير محسن الخياط
وقصيدة. .
غيم آذار


شكثر نامت الفركه عليك
كافي النوم ماتنهض .!!

تحنت هالجفوف السود
مالكحت الحنه عليك وانته ابيض

تعطش وانت غيم آذار
مو حته الشماته ب آب يرعد غيمهه اتلمض

افااا .. ياخرزة سليمان
شفنه الطين
حته الطين يتفضض

حزنت عليك حزن التينه بجويريد
ليه ولاجفن غمض

يصير استعجل المرتاح
والمالوم يتريض !؟

يصنكر والوراك هواي ملو حيل
حدر الصنكرت يبهض

زبد ردناك
وياطبع الزبد معروف
يلتم لو سكا يختض
......

قصيدة كبيرة للمرحوم

( كاظم اسماعيل الكاطع )

توازت والله يستر من الموازه

كرهت الروح
جن روحي طريق اتكتلت بي ناس
وجنازه وره جنازه

ولا عنده غرض يسوى
كضن سلعه ورئ سلعه
بيعة ناس معتازه

تعال وشوف بالوكفه شتبيع الناس
موبس الغراض !
اجساد معروضه اعلى الميازه!

رادو ياجسر من تنكَلب ع الماي
حايط والجروح بجسمك درازه

رادو ياجسر ماتعبر العشاكَـ
ولا كَرصة شمس بخدود خبازه

امس معزوم يم شاعر.. وجانت كهرباء ماكو
لا مي لا نفط لا غاز

وكَع بطل الصبر واطشر إكزازه

امس معزوم يم شاعر بتت وياه

ريكَني جرح بايت
وغداني جرح تازه

وتكلي ليش تتوازه؟!

وصتنه الشمس للضلمه مانرجع
لان ندري الشمس عدنه
على كَبة شهيد أتغيب
وعلى خوذة مقاتل كل فجر تطلع

يبصم ع الخيانه الاصبع المعيوب
وراس بدون غيره كصته ماتنفع

تعلمنه من اهلنه نشد على الركبه خشب وحبال

حتى من تجرهه النايبات بيوم ماتركع

هذا البيت بي ورده وضفيره وحنه ومرايات
وهلهوله
وقصيده تشدك الها بأول المطلع

دلع صدر الزمان واحنه صرنه زرار
وزرار الشمس كلما تجي يلمع!

حسين الحبتري

معاتب العشاك هيل ..


بلكت الله
وطيف اصير بعين عريس ارد اموتن من صدك
نظره ما ليه على وجهك ليش اعد ايام من شهر العشك
مغازل الحطاب ذابحني دخيلك
خفت لايكرهني طير
بكلشي راضي مكاود صورك يل مكاود الغيررر

ولاتلوم...
وداعك باخر محطه هواي اخذ من عندي حيل
معاااتب العشاك هيل..

اافرح شبيدي ويرجعك يابخت
شمس ربك حاره وبالشوك مامره دفت
شمااشوفك عين ورده تبااوع لغيمه جزت

وصي بيه الريح تاخذني على عرفك
نسمه وجفوف على حنه..
الضحكو بدورة سنه فراكك حرام
وبيدي مو بيدي الضحك مو مال اهلــنه

نيت الدخان فزعه تحشم
النشمي على نااار
وبوكة النجمات تطلع
من يمد روحه النهااار
وصدك ليش اهوااي اشوفن
وجهك بلعب الصغار

ولاتلوم..
منينلي الواهس واجيك ..؟
منينلي الواهس مشت بيه السنين بلايه عرفه..!
وين ااباوع..؟
فاتحه بروحي وتدور براسي زفه
ولاهي ترجية فقيره وبالعمر تنشاف صدفه
ولاهي صحوة موت وتفكني وتفض
ولانه كاافي النار شري وكاايم مصلي فرض
شماا اطب حايوز بين هموم ليلي
تردني فشله
من الكه بيها السالفه طلابة عرض

وحيل حلوووه
من اترس الدنيا نشد ما الكه يوسف
حيل حلوه
وحيل حلوه فراااااكــــكـ المايرضه يخلص
راح اموت ويمشي تووه

شجاابني لسجة ونين التايهين
وجدمي ينكط واهليه
شوازه سري وامناله بير زلمه
وطوله يتكلب بنيه

شماحضيت بكااع كلها
تصير ملاجه وفلح
ويمته ماحصلي ضحكه
يعامل بنص ظهري خنجر
بيش ينباع الجرح

السكته نعمه...,
وهيبت العنكود بالسله تطيح
وتدري بيه اخلاف زلفك
عدل بس دفنوني حكهم ؟؟
ااااخ مابيه اااصيح....

المبدع. .عمار سالم
وقصيدة
(طرف چكليت )

جانت جيتك بشاره
وصارت ضيجة المشلول ادي والموت بكتاره
وكلبي أصبح كلب جتال خايف حته من داره
وكلبك دار ابو المكتول
موش بحال خطاره
وانا الماطاب خاطر ياخذ بثاره
وانته المو سهل ملكاك .. چمه ويرادله دواره
عايل بس عزيز ديار
كلها تضيع اخباره

وتوسطت الكلب فاله
ماينفع بعد تنشال... يا چتال
وعكب جرحك مثل كصة جناح الطير
ساويت الخلك بالبال
وبغير موادعك للروح ماخليت كل چاره

وبملكاك اضمن وجهي عنك ضمة جروحي
ومثل رسم البيارغ
ماترف روحي

ي مچمل العطش منه
ماي ابير ابد مابيك تتعنه
وموش بعازتك وجفوفي شالنه
حملي شما يطول يخف ...صبغ حنه

وماضلينه باب اباب من كون البيوت خيام
جا شلنه
امس حلمك جنت وتريدني ادنه
ثاري عيون جاهل عندك بمصباح ينسنه

اهتمامي الخربك مثل الملح عالزاد
كون ايدل علي ماتعرف اكدارة
يخرب مو بنادم حته طبع الزاد كون يدل علي ماتعرف اكداره
بكلبك طرفتني وماحسبت حساب
جنح الطير بي تطرف كباره
الحمل مو بالكبر عاين على البستان
الحمل بكباره وزغاره
وماصدك ..
لجن مازعل الجذاب ... بوجهه مصدك اعذاره
وعنك مانشدت شجاي مو تقصير ..ماظنيت تسيارة
ومعزب العرب ماينشد كبل
الثلثت ايام خطاره

وانا الطبيت كلبك ماصرت حاجوز منك ماردت مهرب
وشفتني صواب ..يمك ماردتني اكرب

ومثل مجرى النهر وياك
رايح لو شفتني اندار تلكه العايفك مجبل
ومثل صوت الرعيد بعشرتك وياي
تبطي بجيتك ..وتروح مستعجل

يكاتل جلمة الياريت
غيرك يمي حسبة زاد ماينكاملك لوجيت
وبعد نتلاكه ماظنيت
وانت امشيت
وانه امشيت
واحد عكس الآخر
جن طرف جكليت

عزيز عسكر


ياول ضحكه بشفافي
عمر متعوب بس دافي

زغير يلاعب النهران
ويمشط الفجر والليل بس كل مغرب يجافي..

وانا بلاناس لاعندي وطن لادين دمعي يخضر من الخوف كمرية ع الحافي!!

من بيتي الطيور اطير ومن عمري الظلام يموت بس حافي..

هذا انا
بعد عندي وبعد بية..

انا بورح السمر والماي

انا بوجه الزلم نجمة
وانا النشمي الترف والعارفه الكصاي...

وجيتني وجبت كلبي وجبت كل الحزن والشوك..
ردت اغفه ع سنينج وكلج هذا انا الشاعر اموت من الحزن والشوك..
ولج غني
ولج دليني بثيابي تهت والعمر مو كمره ظلام يخوف المحروم ويحركه روحه للسلطان ويغني..
ولج موتي كبل لاموت لايخذنه للحرمان ويكلولج عني..

جبان يحب هله والناس بس يكتب ع السلطان..
شاعر جان

هسه الوحده مايعرف يروح الوين..

غريب ويكسر الخاطر

بس ماخاف ماجذب بطل قومي وجنح مكسور ومطرز ع النجمات بس مهموم ويكابر...

مرات يتمنه امه تكله نام بهيده نام

(عيونك زرازير البراري )

يفز ويصيح هذا انا بعدني اهنا

احب واسكر وصلي واندل الفقره
واعرف الباك والمبيوك وعرف العاهرة الحره
عمر خلص طفل يشبح بعين الناس بس مايلكه بيهم ناس
يرد وحده وعبرته بصدره جن مهره..

ولج لوبيج من روحي فلا تغفين
سهر ودموع شعب متروس بس دخان شتغنين

هو احنه عرفنه الناس هو احنه شعرفنه الدين...

اجيتني وجيت بكل بجي العشاك..
اجيت من الشغل مرتاح عندي انت
عندي الله
عندي دلالي عندي الناس...
هذااااا، انا الجبان الكالج عنه.. عزيز
ويشرب كهوته ويهم بالناس
ويرد الدنيا كله تصير وردية

عشاك وعمرهم من غنه الرحمن
ومن وجه الصرايف هيل للديوان

حلوات ودلع ونهود ومسامر حبايب ليله كمرية

ناكوط حِب..!

عـقـيـل العــرد

مرلي واكسر صفنتي
و رش جفني نوم
مرلي سالوفة ضوة وافركني هيل

ضلمت وياي حد المدري وين
عندي صار الليل دنيا
وانت عندك دنيا ليل

كوم كاسرلي ضواي
وانت تدري
ليلي مو حي الله ليل

اسكيني موعد
خل اشد حيلي واكوم
خل اذب سنيني وبفيك اشب

طبعي عنبر واشتهيك
وانت طبعك بالوصل ناكوط حب

يازلف صفصاف الك عمري هوه
كوم وانطيني اعله كد عقلي من اجيك
رخي غصنك
فدوة خل نلعب سوة

انته كلشي يلوكلك من احجي بيك
لأن كلشي انت بحياتي
وكون اشوفنك غلاتك
بلكي اصيرن كلشي بيك
......

احمد الغالبي ❤️



من يدگ شباچكم عصفور
والدنيا مطر
گولي محبوبي إجة وحلي الشعر

من تجي نسمة خفيفة تناغي بزلوفچ خجل
گولي محبوبي برد
گولي محبوبي گعد

اشاه يافي الگصيبة شچم شمس بردانة تدفة على سدك
چم نهر خدران والشهوة نوارس حطت اسراب على حدك

ردي بفراگچ صرت گاع النجف ميت برد
ردي بفراگچ الدنيا الوانهة انترست چذب

موناليزة وشخبطتهة دموعي بعدچ ماكو دافنشي اليروحلهة ويرد
خلاف عينچ كلشي باهت
حتى طعم الموت باهت
لاخسارة ولا ربح
خبزة امي وچلمة اليمة صباح الخير مابيهة طعم
الدنيا محتاجة ملح
سامحيني محلفچ بخل الصبح

واحلفچ بحر الظهاري وكل مواعيد الصبح
سامحيني بداعت اول كلمة كاتبلچ احبچ
ذابهة ابابچ حرز
ردي لية ..

بية تقوة ملك ماشاف الاثم مرة بحياتة
طلگ جناحة لجل يمشي على دربچ
اشتهيتچ ..
بية حسرة عانس بزفة اختهة
بيدهة تصفط غطاهة وتحلم بليلة عرس
من افك بيبان قمصاني القديمة الگة عطرچ يلعب بنصهن مثل طلاب ومكيفين
ماعندهم درس

صوت عطرچ يترس الغرفة بلابل
ويترس عيوني سهر
صوت عطرگ يگلب اللحظة شهر
يگلب النشغة مطر
يگلب ايامي صفر
ياترافة شمس من تغيب تتوضة بنهر
سامحيني الدنيا ما تسوة زعل
الاجل واگف مثل وحاش ديرتنا القديمة متاني يكتلني الخجل
سامحيني
سامحيني.

..

#رائعه... ل زيد السومري


مَرّه سألوني اعله روحي
و عاندت .. گلتلها صيري

ما استنكف من خلالاتي و حصيري

الناس نامت للظهر
و من الصبح غبّش ضميري

لا حچيت الفاهيات
و لا خفت من تايهات

و لا مخلّي مريتي التقرر مصيري

احله شي بـ الدنيا آني

مره سألوني اعله أمّي
و فرفح التنور البگلبي و چواني

لسّه و آني بعيد
تشغر لله و تحسّ بمكاني

و مره سألوني
اعله صاحبتي .. استحيت

تحبني بس ما عدنه بيت

غاليه دموعي و عله المامش بچيت

..
..

"بالك تحط روحك دكه للتغسيل!!! "

❈ العش و الحطاب ❈

للكبير عماد المطاريحي ..



العش مو حطب ..!
خل يفهم الحطاب ..
العش بيت شرعي وساكناته طيور
واحياناً يضم عشاگ متصافين
واحلام ..و اريكه ..و نافذه اعله النور
اعله غفلة من الزمن لن بيتهن مهدوم
والغصن اليشيل من الاصل مبتور
الدستور منقوص اعله هذا الحال ..
الحقيقة العشگ لازم ينكتب دستور ..
العصافير اعتراض الهن على الحطاب
جاب اعشوشهن وانطاها للتنور ..!!!
ازرع گاع روحك رازقي ونسرين ..
واشتلها گصب من يشح ماي الهور
وافطم منجلك لو راد يحصد غيم
واكسر منجلك لو راد يحصد زور
واخذ دمعة عزيزك واستعير افراح
والبسه العيد بيدك واكشخ بعاشور
انشدني العسل ما ضايگه النحّال؟؟
القارورة بيده والعسل محظور ..!
من تلثم فراشة اخدود زهرة تنام.
تسكر بالنده وتطيح بالمحذور ..
شارب من خضار عيونك الصفصاف
وراضع من بياض اخدودك البلّور..
روح اشتل حياتي بشجرة الصبير
انا احلامي عوانس ما يهمهه البور
افرشلي ضحكتك خل امدد كيف
وخل فيّ الظفيرة يدغدغ الناطور
تغرف روحي مني بجفك النعسان
وتشربني خطية وخاطرك مكسور ..
جمعنه الما يصير البرد والنيران
شفتي اتنث بروده وشفتك اتنث نور
يقام الحد عليه من لمس شفتك يوم
ويتحاسب مثل ما يتحاسب المصگور
اخذ مني دمع ما طالبك بالديـــن ..
يمته النهر راد افصول من ناعور؟؟
تدريني سليل الما يشم اشمــوم
ابن بيت العفاف الصاوغ الله انحور ..
بعد شبرين عنك والحضن ينخاك
اشم ريحة اثيابك والگلب مسحور ..
يا جنة عدن يا دنيا تنبت روز ..
يا سحر الهند واحلام نيسابور ..
هسه الحب حضاره وبابها كرستال
تتلاگه المجره ابكل مسية اتدور ..
انا روحي نده وروح البنات اورود ..
انا موتي نده وگلب البنات اگبور
بالك تحط روحك دكه للتغسيل ..
جثمان الفرح ما فززه الكافور ..

(ذنب مغسول)

صالح ناصري
***

یا دگ الخضر،
یا خرز نیشابور....
یمشذر،
یلمعدل....

یل ناشر ضواک ابجرف المضیعین،
یل تندل.....

یجمار المنایر،
یل امضویی اللیل
یل فیک صلاة ابخور..

دمعتك تربه سمره امخضره اعله الگاع،

بفراش الصبح شافوک ممتد نور...

اذکرک وشتعل تموز
وفزعلک مطر بل طیف..

یل دمک صعد لل لله سنابل غیض.،

یلمچیم الشته ابتنور
حالوبک نزل بلگیض...

یرجم کل خریف امخضر ابدرب الصدگ عاگول.

یا رویه جنوبیه التمر بیه ورد لهلي ذنب مغسول...

يشراعك رغیف وعابر اشچم جیل
اسجدلک یرب العیش...

یموزع هلاهل غبشه للثوار،

چم اصویحب اباسمک توضه وگام یحصدنار..

اوصلک وضیعن بیک
والگه اشگد عگل مشدوده بل شباچ..

الگه اشگد دمع بل باب...

علی ادخیلک دربنه ابعید...

مربینه فجر مو زنجر المحراب...

جبار رشيد ❤️


عفت كلشي ...وجبت كلشي
ومدري شلون اجيت امشي ..
اجيتك ردت اگلك شوف ...
ردنه نعوف كلشي وماگدرنه نعوف

كون تشوف
حالي شگد الك ملهوف ..
جبت كلشي اليسولف بيك
خيالي وصحوتي وطيوف
جبت دگات گلبي
الگطعن گلبي بجفاك سيوف
جبت صفنات روحي
السودنت روحي .....
مثل جن بمسيه وعاليتيمه يحوف

كون تشوف .....
بشفافي الحزن ماخله بسمه تعيش
وكلمن گمت ابوسه بخده اطبع اوف

كون تشوف .....
دموع الجدم مايدري وين يروح
والخطوات عميه
وتايه بلاشوف

كون تشوف ....
..خلصت الوجوه وشفت كل الناس
كلها وجوه غربه ولا وجه معروف
وين الگاك يالموصوف
اليه أنه والك موصوف ؟...
يالفرگاك غربه وكلشي مامألوف ...
انه بلياك مدري شبيه مابيه ..
زلف وبلايه ترچيه ...
درب مابيه كل جيه...
نهر فاض وتبع ميه
رجع بس مالگاله جروف

كون تشوف....
روحي شخله بيها الخوف
مطلوبه نذر وتخاف ...
ماتوصل حضرتك
من بعيــــــــــــــــــــــ ـــــد تطوف

كون تشوف....
روحي شخله بيها الخوف
مثل دم العروس الجايه على اجناب
ويصبر عليهه
وجابها الزافوف

وشوف شخله بيه الخوف
مثل حلت مدارس
روحي احسها اطفال
حلت وتركتني ...
وباقي بس صفوف

ويا وحشة صفوفي ومن يجيني الليل
ويالون الوجه
بعدك الضل مخطوف

ويا قسوة ضنوني الماتريد ارتاح
وانه الصاير اسير
وبيدهن مجتوف

كون الگاك واشكيلك
على جروحي لگيت
الغشمه بيها تروف
وكون الگاك وابجيلك
واسوي خدودي سبوره
ودمعتي حروف

وكون الگاك واحجيلك
بكتاب السنين انحذف كلشي الچان
بس اسمك لگيته الباقي مامحذوف
واذكرك من مسحت دموعي
باخر يوم على خدودي
احس لهسه طبع چفوف

وكون تشوف....
عيوني مضيف تصير وكت النوم
وهلبت بالحلم لنك
تجينه ضيوف
كون تشوف حالي
شكد الك ملـهوف.....

قصيدة رائعة للشاعر
لفته الحموداوي من الاهواز


#اما_بعد


یبعد المالهن كل مد...
یلذة اقران المدلل بأول كد؛
یلمبریني منك لا تفک لي الباب...
انا راید قمیصي من الصدر ینقد!

هويتك یا دللول الولد يبني!
احبک یالولا مو هامني تحبني؛
یعز چتال انا اتمنی:
یزوعني البير و ترجع تذبني...
شملذك من تعذبني!

شمعزک من تبچیني...
الف مره بالیوم تطیح من عیني؛

و ترد تصعد!
یغیم الحار بین السگف المهدل...
و بین الترفه ذیچه الما یحب تذبل؛
اگلهم ما غواني و انت غاويني...
و تخليني اگول و ما اعرف افعل،
تهت...
بس لا تدلیني؛
انا اول تايه الما يشتهي يندل!

مره تخوف المبلل...
و مره مبلل من الخوف!
بیک اشگد زحف یلگون...
تتگطع شبیک بساع وتگضّي المسير زحوف؟!
من گامو یبیعونک بمدري شگد...
غدیت تخاف من الحوف!

و تتجدد شما تعتگ؛
یبحر المایغرّگ خلني بيك اغرگ...
شربت الستعش چا لیش ما اشرگ!

يالبدينك بري فرعون...
"لا تتهم کلیم الله"
ولو عندک النار و لا چفي الماعون؛
بس وادمنا بين و بين...
من تگلهم حرامي فلان؛
یگلولک امس صلّى!

ناس الدورت بالطف علی الدمعه...
عمیه وداعتک یحسین؛
لا تحچیلهم شمعه!

حاچیني...
یالمسودني لو عشگک یضر دیني...
اعوف الدين و اتباهه بسواديني!
من مسجد المسجد بالعمر مره؛
و انا گاضیها رایح راد بسنيني...

شبعد موجود من بعدک

يا اما بعد!

النخلة .. كرار وحيد

وقصيدته ..

اشتراني الليل من أول لقاء وياك
وهذا الليل اعكبنه نبي وملسوع
ودوم آخر رسالة دموع
الضحك مرات مابي وحدة الموضوع
ومن تغورب الدنيا شكووو بروحي يريد شموع
ولاجنك شتال ايدي ونثارك من شليل الروح
وتكللهم جمه من الله مامزروع

ماواصلني بس جازيك
اهد روحي رسالة بحجل زاجل توصلك ونوب تفرشها
وتهد طولك رسالة بحجل فختايه
تسير بيك يم عشها
يمن طيري امين وطيرك انت يبوك
طليعه ولكاحك بيك مامفتوك
ماادريك من تتفشك بكيفك
تتوزع لغيري عثوك

لغير دلال هيلك فاح
مالحك عله دلالي
وانه وكلبي كافي نعيش مثل البر
هوه عذيبي وكلب خالي
او نزف اخر كطن جرحي عله هلالك
الخذك جتاالي بس من ترد جتالك
وليش وياي ماتقنع بالشمالك
عشت معضد كبل سنتين بجفوفك
شمعنى وصرت محجالك
وكت والحال موحالك
تعال الكلب خلا الله لامثالك

ووكف طاريك حنه توزعت عالطوف
وملاخخ شمس كترين
امهات الشوف فص منهن يحب طولك
وفص منهن كره رسمك
وانه تحيرت بأمرين
ادخلنك بهاي العين ...بس تنزل بهاي العين

وتغيض الروح واتهندم لنسيانك
وانا كلبي حطب رمان مايطفه
ومرات الشلونك ماي
واطفيني بلسانك

بكثر مادلعت اسمك نسيت اسمك
واغير اسمك بكيفي وارد تعبان
وتمنيت الدمع يتسمى باسمك خاطر من يطيح
نكول طاح فلان

واتحسر مثل مسجون راسم ولفه عالحايط
وصدفه وصبغو الحيطان
يشبكمن
حلا الحايط لجن كثرت تجاعيده
وهو المنسجن بال ليش
تلكه الحسرة رازونة مواعيده

انا مثل الشجر ولفي
بكثر مامنشتل بالروح مااعرف مواليده
ارضى انسل
ارضى بكل مكص يوميه اتفصل
بس لاتنكمش ايده

يالحارمني من مايي
كبل لا اجهن اووديت فلاحك
امبين مو عزيز انه
رحت عنك سنه ماكامش اصفاحك

وجي متعافي
واتغير عله اغيارك ..
ابنادم قيسه بالخطار
وعرفته الخوش من شبيت كثرت رجل خطارك

بعتني بزحمة اليشرون
وشريتك انت واعذارك
وبين اوتار عودك ذاك اكو منهن وتر جرحي
وضحك سني
وهي الكاتلتني دومك تغني
ونزف جرحي وترس عودك
وضل يخن
مثل غركان ماافتهمه من يصيح طلعني

وكرهت الشعر جي ماتحب تسمعني ......

الكبير كاظم أسماعيل الكاطع
يصف دول الجوار بقصيدته (الغابه)



كلشي ولا تجنون اسلاح
گالوا لتصنعون اسلاح
واحنه بغابه وداير مادايرنه اذيابه
وهتك اعراض وسفك ارواح
وكل جار ايراوينه انيابه
وكل جار ايسمن بـ ﭼـلابه
ويحد خنجر ذبــاح ..
بوسط الغابة (الشرك) امكهرب
والغار امسگف برماح
وطيور بگاع المحترگه
ويا ويله الما عنده اجناح
مناه ظلمة ومناه ظلمة
وبس عدنه اينور مصباح
كلمن بيده احجار وهدو نص الليل
ويا ليل اشگد بيك اشباح؟
واليگصد بغداد بغاره بأسطنبول يرد يرتاح
وبسوريه الثعلب ماكر
ماكر جداً ثعلب هجاء ومداح
ماكر جداً مو حواء الغشت آدم
هو القدمله التفاح ..
وذاك اللي گاعد يتفرج
هذا اتصوب ذاك الطاح
ومن روجات البحر الاحمر
شفنه الدم وشفنه الكاتل
ومعگل جان التمساح
ويا بستان الما جر حسره؟
ويا عود الما ون اوناح ..
هضبه نجد وربع الخالي
خلوا گاع الله الخضره هيمه ومبزل للأملاح
گطره وطاحت شيرد ماي الگصه الطاح
واشلون ابنادم يرتاح
منهو يعيش بهاي الدنيا
ومامش جوه الراس اسلاح؟
شافوا بغداد ابعزتهه
يومية الناس اتزف عاشگ ..
وحزن الحلوه يصير افراح
وما فادتهم هاي الفكره
ورادوه يطيح وما طاح
ما يعجبهم يكبر سنبل
ويصير ابطول الفلاح
شافوا شمس الديره اتعلي اتعلي اتعلي
وبحجارتهم ما تنلاح
گالوا لا تجنون اسلاح
واحنه بغابه وداير ما دايرنه اذيابه
وهتك اعراض وسفك ارواح ..

ناصر البدري

امً تبحث عن ابنها
::
::

نتگاود ..
انه وكلبي
وانشد بـ اليشبهونه

ماشفتولكم ؟
خمري زغير وفرگه بسنونه

ابني ..
ويـ المناره گدار
وجفوفي المربياته

يضل ..
سهران طول اليل
حارس فوك اخياته

امشي ..
ودايخه بشيبي
تعنيتك لعد زغرك

يمخاوي ..
الجفه شجندوب
ومزاعل اجفوف امك

يبني ..
وذيج المروه
وراك انخه النفس نخوه

ولك فدوه ..
ناغيني ولك فدوه

شوف شخله بيه الجور
نص صورة بجفن مكسور

اجينه ..
ثنينه مورثين
نتگاود شمع وبخور

هجرك ..
ترس كلبي فطور

يذبحنه ..
برد وشاه
ونضحكله فرح وطيور


تسع انذور ليليه
بـ العباس اشدلك

لا عندك گبر وابجيه
ولالـك ذچر واندلك

حدر ..
صدري شليل اهموم
وبفراگك كرهني النوم

گمت ..
انسه وطب للسوك
واشريلك ضحك وهدوم


ادورك بس انه وكلبي
لوحدنه وبسكته نموت

ساعه ..
اغفه ويشيعني
ويحطني بهيده بتابوت

وساعه ..
اگعد وشيعنه
وروح ويـ النعش زاتوت

مدري شلون گمنه نموت

الكبير محسن الخياط ❤️

( طاحونة حزن )


روحي المارواهه الماي
حكهه عليك
ل ارسم ونتي اعله اوصافك الحلوات
ياريت الحلم بس بيك
طاحونة حزن مابطلت روحي
تحن وتدور وتلاكيك
كالو ماتجي وجذبت ومتانيك

ياواحة بنفسج وازود واطعم
ابيعك وانخبص واندم
ابيعك واندم واشريك

ياذاك الذهب لوبي رخص تتشمت الفضه
واعديلك جثيره جروح
وامطرلك محنه وبالتعشكه ارضه

وحكك طيبة اليوفون طيرة ماي
لابد ريشهه تنفضه
وتضل مناطره لملكاك
ولاموني ويلومونك
واضيعك ضيعة الزيبك وارد الكاك
لاموني هلي ورديت
وثيابي تعاتبني وبعدني اهواك

اغربل ماي
اشوه
ولااكول انساك

يااا شنهي الملحه المنك اعله الروح

ارضالك واكلك زيد
يلي المن يمر طرواك
يتحنه الورد ويطلع البستان بجويريد
يالمنك دواليب الفرح والعيد

يلي محبتك بالروح
مثل الخيط
كلما تنكطع يطلعله راس جديد
ويطعم حلاوتهه
يرد بعيون شافت ماتشوفه مراية العريس
واحتام اعله شوفتها

وعله الهجروك ..لاتحسبني عالهجروك
كل ورده ولها ريحه
وكلت للزاعلين عليك

شيضر النهر
من تزعل الجيحه ؟!
وخاف توهمت وياي
من تشابه البيبان

كل باب ومفاتيحه......

(غوشتني ..تغوش المصباح بعيون السكارى)


السماوة من جديد واحد كنوزها ..

امير ال جدوع ..


فرفحت حسباتي يمك ..وشحسبتك؟
صلب طبشور المدارس
وانا صبوره رديه ..
ولملموني اتلملم اتراب النجاره
وانحسب طبشور عثه
وانا عايش جمره تلهف ..وانته شتوه!
والشته يـﭼـويني نثّه ..
وين اشرد؟
وين اشرد وانته تدريبه البلم
يتلگه كل روجه التغثه
وشحسبتك؟
طيف شايل بيده حنظل
وانا ريجي يغني طيفك مشتهيك
وزحمه بايعني زليخه ويوسف انا المشتريك
مشتهيك ..وفوگ صورة كل شهيد اكتبت ﭼـلمة مشتهيك ..
وكلهن اليـﭼـوني منك ..
بيه كاسر عين شوگي
وانت منجل سنبل المكسور كاسر عين سنّك ..
بيه يندس ..
گاصد جروحي اعله هندس
وانا شمعه ..!
وطاري وجهك ينفخ الها
المثله كون يگلها موعي
وعلعلتني ودبـﭻ هجرك زيّد بطيني خشوعي
و غوشتني تغّوش المصباح بعيون السكارى
وانا قرآنك يـ لوني ..
ورتلتني ترتل البيبان ببيوت الدعاره ..
سولفتني!
سولفتني طويره حره انذبحت الجدم العرايس
وابد ما شورت بيهم دمها خالي بلايه شاره ..
وانته غبشه اتلوح عيني
وانا فلاح الغبشتك ..
احصد امتانه تجيني وما تجيني
وتدري روحي اشكثر شالت ضيم منك!
وزعتلك كل متن بيه يغني
اغنية السبعين محمل
وانا مشمر وانت طفله اتقلد امها
وابد ما عرفت تلفها
النوب شدتني برجلها وبيه تسحل
شمس هجرك تحرگ بروحي صريفه امعلگ اعليها حصير
وانا سعفه وملختني اجفوف جناية حمام
تريد مني اعشوش اصير ..
ويصفگ الحرمل بروحي
طگطگتلي بطابگ امي
واندعتلي بصم اديها
وانا شـ املك؟ بس دمعتي
وياهو يحسدني عليها؟؟؟
وانت ذاك الجنت كشختنه وعبينه وما غسلتك ...
ﭼـلبن بيك وخذنك ..
والعبي النغسلها خوفاً لا اكو عين امـﭼـلبها بيها ..
ااااخ كون اگدر اوخرك ..
وانت منقوش اعله لب عيوني ذني..
اااخ كون الگالي غيرك
حتى لو فانوس بالظلمة واگصده واگعد بصفه ونغني ..
اااخ كون اگدر افرط روحي بيدي
وبيدي الگط كلشي يوجع وانسى وني
وانت ذاك بلون هجرك شوهتني
وانا ريشه رسمت مظفر كتب بيها قصايد
تارس الدنيا وجعهن وانت ذواق وعفتني
ومن عفتني استفحل الليل اعله روحي
واحترگ بيدر جروحي
وانا تايه جدمي بلعم وين وبليله كئيبه!
وانا شيله امسرده وبس اسم مضمام الگصيبه
اتورج الشيب اعله عيبه
التفت اعليه النوايب لفة الفاف الجنازه
لهفه وعيون وروازين وعجاجه
وانت عازه!
وانا جن طوير تايه بين جنحانه گزازه
يريد يصفگ ليك يرجع وانت ماكو
دورت اثار جدمك وشلگيت؟؟
گبور كلها وبيها جم عاشگ غشيم بلون وجهي ومات جوه اتراب جدمك
كلها غشمه استغربيت..!
واقنعت والگيت اثر ما عنده عاشگ
وادفنت روحي ومتت

قصيدة القداس

باسم الخاقاني



احب امي التصليلك

خذّيت اعزازها وكل يوم تدعيلك
وطن مبيوع لو محسود
سبع عيون علكاظم نخليلك
بقداس الكنايس شوك
كافي المكبره تغنيك
اضحك ...اضحك خل اغنيلك

مشتاكين ...
ياريحه خبز مبيوك من عمال متعوبين
مشتاكين
ياطاري عشك وانجاب بين جنود مشتاكين
مشتاكين ..
شوك اعمى لقميص حسين
ملهوفين ..يمعود مّسج ملهوف للشيله
ياسنبل كعد ضامي
تنه الفلاح يدعيله

احبك يامطر مشتاك يقره جفوف
تدعي الله على النية

احبك يارساله عاشگه لملهوف كل شويه يقراها لمعزتها انضمت جوا بيرية

عجل يابة شحلاتك
يا لعد
يا چا
ياگحلة عرب بعيون كردية
وطن هاي امي عراقية

ئمن اريد اسمع تراتيلك اتغطه بنعاويها
ئمن اريد اهواك اجي بـ نية حمامة هور
متبلل جنحها ابوست الشلال
ئمن اريد انعاك

دللول بحلك نثيه بظناها تعاتب الجتال
ئمن اريد اقراك افك صدري
واشوف شكد عراقيين بالغربه ويحنولك
ملتمين ومسامر عشگهم مابرد ليلة
شما تبرد يغنولك

يمعود خذانه الشوك من تشتاك هاي اضلوعنه ادفيك
من. تزعل نبوس تراب كل عتبه
ابداعه حنه الباب وضما العتبه
ازعل خاطر انراضيك
وطن محلاك

احب الجف المحنى المسح قرئانك المترب
واحب الرصعه من تهمس دفو انجيلك
واحبك
احبك

واحب امي التناغيلك.....

محسن الخياط || الطوگ و المحبس ||

رحت كوه بجرح من سيف
بي ماضاج خلك السيف يتونس
رحت كوه صعدت صعود
اماطل والصعدته املس
رحت كوه اذب روحي على العطشان
واليابس كبل سنتين بيه الحس
رحت كوه مثل كاغد عتيج
وملتف ومشكوك ومعفس
اصوغ الونه بيها احجي
واخيط الحسره بيها البس
ومن شفت الخضر ماطاح
رديت على الميبس
نشدت الليل عن وجه الصبح ماكال
شاور وحشته وغلس
يمشحوف على ريح الليل
تاه معيبره وسيس
ضوه مطفي وشمع مخنوك
هلبت يوم يتنفس
وﻻرده وﻻهوسة حصاد
ومنجلك هوس
حرت بيك وحرت بيه
عمت عين الدخول المايضوك الخس
وحك ذاك اليعدي الليل
نايم كلشي ماهيس
انا جروحي جرح مايدري شمتاني
وجرح فاته الوكت ايس
وجرح ظل ياكل بروحه
انمرد والينمرد يلهس
شريت الجاي يشريني
وعليه مزاود الشدات يمهندس
يصوغه من حنين الكاع
من تغسل ومن تلبس
قلم من لون الكتابه
يحلو الذات والملبس
العمر بردي ويناتر بي
يعته الوكت يتهلس
اخافن جيتك تفوته
واخاف الباجي يسلس
ماتكعد جواك الريش يالنعام
كضيت العمر تشمس
بنفسج ياضوه الواحه
يتكي الشام يملبس
سرج ليلو ومهر ادبس
لهسه وماعشكت عليك
وانت الطوك والمحبس
يطير الماي يانورس
اغنيلك شغنيلك
اغني شلون وانا اخرس..!