بعد انتهاء صمت الطف
نطق لسان الامام الحسين قائلا:

ماكو امان الطف نهبني....
وحته ماباكتني ناسي مدري ناسي
من طحت ضميت اديه حته ماينباك اصبعي تلمست مبيوك راسي....
نايم وجسمي توزع حصه حصه...
ومو شرط واحد يطيح تبوكه ناس
حجارة باكت مرة گصه...
والله نفسيات عدهم
باكو المحبس اكبالي
وبالخيم وشلت بواجي
ومن مشو واحد صحتله انطيته اصبعي
بس كلتله بذمته الياخذ تراجي...
بكوسر ضلوعي حوافر صلفه كعدن..
خربن فيي وجزن..
مايريدن بس يريدن دوم تجويهن شمس..
خربن كل شغل امس
نمت بالطف والله حيرة
درت ايدي بصفي الاكبر
درت ايدي نايم بصفي عرس
اشتهيت الله وطحت بالطف وذر
وهمه فزعولي ضرس
هناك بالطف كل اصابعهم سوة
اشرو كلهم عليه وطفي خص
تمضمض الطف بهل بيتي ومن شرب عبد الله غص
وبحوافر خيلهم سحكو صبح
اكو وادم شبر ماصعدو ل الله
وانه صاعدلي رمح....
كربله كاروك النه والله هزاهه بنحر....
كلشي بالطف باكني...
سهم بايكله نحر....
باكو احزامي اللبسته
روحو حلفو الماي بايكله ضهر
همه سبعين الف ليل
واحنه بس سبعين شمعه وعدنه بالطف بس كمر
نايم وروحي تهبت والعطش بيه فرش
شمعه خلصت شمعه ذابت
شمعه بيدي مكمطه اشتعلت عطش
الخيم وجت والطف يسولف هوه
هناك ضهر المشرعه توة التوة
لان ضلمه دروبهم باكو ضوة
وانه وي روحي اسولف...
وكت خله البرحي نايم عالتراب ويسحك عليه النوه
واخيرا ارد اكمل وارد اوضح مساله
لليحب الله صدك
الله داينكم نحر ردو اله.....

..كرار وحيد ..💙💦

قصيدة اليوم هي
للشاعر عريان سيد خلف

(ربما تحتاجون الى معجم شعبي )


ذمني ذم الماعثر بالمستحة
او لانكث زيجة

اومر علة اسمي ابشيمتك
مثل اللكز رمحة ابصديجة

اوجور وكتي وياي جاير
والعمر تيه طريجة

وتاه يتخطة الليالي اوناب المعاتب رفيجة

ايناطر اضنون المحبةاو يفرز امن الضيج ضيجة

او ضاع جالعاكة وهواكم ماي مايطفح غريجة

او ضاك لوعات الندامة
او ليلة مرة اتكود ليلة
اتنام حتة اجروح كلبة

ويكضي ليل الله اعلة حيلة

امكالب وليل التجافي
ايريدلة ابتوت التشيلة
بهيدة يالماراد يوفي او لاعرك وجهة الجبيلة

ابهيدة موكلمن يلوج امن الوجع مصيوب جيلة

وموش كل ميت يهيه ابعين مشفج ينبجيلة

لكن او ذمك تعدة او جلمة الصاحب ثجيلة

خشنت كلب الشفاكة اوهدت امن الحيل حيلة

قصيده شجاعه للمبدع

عزيز عسكر

وطني غريب مثلي..


الصبح يكعد حزين... يصلي ...ويغني

(ياالله يكول ويذكر الفقره يذب السبحه ويغني)

يدك بابي العصر سكته
مطر بالروح غيمة اطيح من كلبي
وغيمة بطرف أصابيعي تحن سكته..

امشي ويمشي بية الليل
اوكف الكه كل الناس صورة تناوش السكته..

العمر والماي والمنسي التمر بعيونه سكتاته بعيد وجاي..

عبي وكل النخل دخان..

ها يافلان
الشمس طيره وزغير الفي ورا النسيان...

آآاه

الوحدك سكته
نهر شايل هلي وناسي..
حنين وع الجرف خضرت كل الروس رسايل كبر وهواسي...

ارد للوطن مابي ناس..
شفت كل الشوارع خاليه من الناس...

الدكاكين الكبل تنطي الزغار العيد..
هسه تبيعني من الخوف..

هسه اشرب ونام واحلم ومرتاح
بس ايمر عله عيوني الوطن جامع افز
زعلان..

ورد اشرب حزن ناسي
وقصايد مالهن شاعر عمر يفترن براسي..

واحلم نايم بحضني سياسي بعد عذاب الناس

انام وياه وفرغ كل حزن ناسي..

وابول اعله السنين الجابتك
يا...
ياابن ال....

والحديث يطول
احلم والحلم مكتول
بعيد ولا وطن لمني ولا شاعر عرفني منين

غريب وغربتي سنيني قبلتي الله وعذابي الدين..

الليله احلم اني.......ج
الساسه والسلطان..

حلم يتفسر بلا خوف.......

شلون بحصيره تنجمع
ماكو اعله كد طولك نعش

لو كل القصائد الحسينيه تكتب بهذا الوعي والاحترام لشخص الحسين لوجدنا جمهور حسيني واعي ومثقف..

للشاعر حسن الترابي
للرادود مسلم الوائلي

ايهاب عيال .....

عن لسان

صاحب الزمان عج :

حزن كل گنطرة بروحي جرف منكم
ابچي عليكم و انتم و لا چنكم
ضيعتو العرف بيه
الاحشمه يگول شعليه ؟

چي عماتي مو عماتكم ركضن
مثل ما تنچوي الدلة وعلي اتچون

مرات البچي ايريحك
بس يبقه الجرح جرحك
يهضمني اليطب للمجلس و يضحك
چي گلبي مثل شيبي متعود اظل وحدي
ولا واحد سمعته يگول الله يساعد المهدي

شبشركم ! گضت روحي اكبر و الحلم يصغر
ظهر ما عندي حتى اظهر

ما تدعيلي تدعي الوادم عليه وحگ ضحكت علي الاكبر

ابچي و تضحك الوادم
هاي اسنين ما نايم
شوكت عافيتي تحچيلي
شوكت واحد يتچيلي

لميت الضوة من عيوني و اتبده
انكسر ظهري مثل كسرت ظهر وردة
اگبال عيونكم چا ليش سميتوني يالغايب !
يمته اطلع صرت شايب

ريتي اتصلي للدخان و احسد كلمن اعله الگاع يتنفس
مدري شبيهه هاي الناس من تلچمني تتونس

مرات الضعن انساه هيَ ذنوبكم تهضم
اليتفرج لعمتي بطبت الديوان
نفس ذنب الوگف يتفرج بمجلسنه
ما يلطم

اليحبني يموت بالعاشر
كلمن ما يدگ صدره....
باچر ينحسب حافر
الوكت چا هاي تاليته !
يمن اعليه الانطيته
ما محتاج كل رادود
ما محتاج كل شاعر
ما محتاج كل ناعي
يمن عليه كلمن ما إله داعي

يبوگ بشمسي فيّكم بوگ
وعلي وليه التعب و الليل و الغربة ..

و غدر هل مره من مگفاي طگني الشوگ

گالوا دموع ولطم ، ثورة بچي وعاطفة
وفاجعة وسيف وغمد...
ماحچوا عن موقفك عدهم مواقف أهم
حور بجنان الخلد.!!.
عنّك سمعنه شكثر
ونقراك اجينه بعقل
ابعد من الواقعة وحته ابعد من الحقد...
جتنه الكتب كلها دم!!
نقراها نشتم حرگ بين الحبر والمجد..
من أول الصفحة عطش
من صار كلشي گبر والسهم نيزك جمر!
وانطفه برگبة طفل!...
ولاخر الصفحة العطش نقره ويسيل الورق
من دمك المشتعل...
ودخّان فوگ السطر ونشوف وادم غرب…
واطفالك مطشّرة
ومالامّتها الخيم شايلها متن الكتب....
چي ماحچيت (النَعَم)
ضيّعوا بيك العرِف بس انت دربك درب..
يندلّه كلمن يحط فوگ الصرايف علم...
وشاهدة ابّاب الضوه تسولف بذاك الوكت
من چان كلشي نعم...
چانت عيون الصبح تذبل بجرة كحل
والموت جرة قلم....
وتاريخ لونه فشل
باع الضوه چي ضوه وحط بمچانه فحم...
حته الورد محترگ
والليل شط الحزن
وليومك ولاحلم دگ اعله باب الخلگ...
يالكاتب النه شمس بيدك وديرة فرح
مانقره بس الدمع....
ومن ذاك يوم وهذن دمعاتنه بكل عرس يتبدن اعله الشمع...
انتيه ونشوفك نجم
نعطش نشربك مطر
ومرّات مانوصَلَك حسبالنه بس عطش
وانت الشلب والنهر....
ودربك الماي العذب ماينگطع فيضه...
اتعذّرنه لون الفجر
واسود صبغنه العمر يالرايتك بيضه...
شتريد من عاشگك؟!
اليبچي لرقيّة بگلب لو شاف طفلة مرة
مسوّيها چفها مرة!!
المفروض مو ينكسر، لا ينمرد گلبه...
وكون اليسولف على دربك وعاشگ صدگ
ابّاب اليتامى عمر ماينگطع دربه...
وكون البروحه الك شايل نهر عاطفة
لوشاف طيرة بقفص نظراتها اتعطِّشه
واليخدم بموكبك
يعزل محبة وخبز للبايت بلا عشه..
مو بس دمع نهضتك
نهضة اصلاح وفكر
نهضة محبّة وسلِم يالثورتك ثورة...
بدمّك سگيت (الهلا)
وحطّيتها بكل گلب
عن لا يفوته العشگ والمستحه يكسره…
مرّات ظلمه نجي نزورك ونرجع ضوه !
مدري انت گلبك شمس
مدري الشّمس حضرة!..
يالطينتك من ذهب يالماشي بيك العطش
بس ما گطعت النهر
چي نيّتك خضرة. ..



ميثاق الهلالي 💚🍃

عقيل العرد .... انه وياك

انه وياك واحد يم الاخر ضاع
ولا موعد يلمنه
ولايطشنه وداع

تشح واتيمم بذكراك من اشتاك
واغرب وانحدر صوبك صلاة شراع

عليه بعيد..... بس الشوك بيه بعيد

والومك ليش؟؟
الحجي مشامر ابين الغيم واهل الكاع

ولو مو من مقامك بس امون عليك
بيه هواي منك بس اكولن عيب

عتب مدفون
وظنون اعله سجة غيب

شسولفلك ؟ ولك كبران

بيني وبين المرايه سوالف شيب

العمر مستثكل بروحي
يريد يروح يا.....
ياليش؟

تعنيتك غشيم اشطوط واستاهدت يمك كيش

يكلب الماي يابارد اخذني جفاك

اصيحك صيحة الغركان

واتلثم بخورة مستحى ,,وعكبيش

يالبايع سواليفك .. (شلونك) بيش؟

يمر طرواك وتهندم سوالف بيك

وامر طولين واتمشاك
وانه ادريك ماموجود

واكول تعود!
البروحه شريعه يتاني فزعة جود

مره اصفن
وفرزن ياهو المتانيك؟

ومره اصفن وفرزن يادرب مسدود؟

ماتعرفني حكًك !!
جي رخيص وياك

انا الطاح بشليلك كبل لا ينكال

واتلولح اكبال عيونهم عنكود

انا اكبالك.. اتيه ياطبع يرضيك ؟

واحس بروحي كلشي وكلشي ماحس بيك

اخف وياك واتعدى التفاهه وياك

واتمثكل اعله الخلوني فوك الراس
واغنيلك غنه اهل اليوم
وانه براسي حسافة ياس

من اشوفك جاي ليه بروحي تلتم ناس

وارسم بيه عيدين وعرس معدان

وافور اكهوة بدوي بحظنك البردان

ولو مابيك من سوالف الفنجان

بس اهواك

انه وياك غيمه وكاع

لاموعد يلمنه
ولايطشنه وداع
.

رائعة .. باسم الخاقاني


ترافكن روس ونحيب
وعيد وطبول وهبل حامي المسير
بدنيا بيها الله غريب

وبيها راس حسين متعلي الرماح
وجان جبرائيل شاهد مستحي
حسين ما ينزل علي وحي الاله
حسين يصعدله الوحي

حسين راداه الاله
شافه ما كفتله دنيانه وخذاه

الدنيا اصغر من محطات الحسين

شال اغاني الرب رسايل
حسين ثوب الحب وأدين الفقره وطيوف الجدايل

حسين عرشه الماي واحلام الصبه
وغبشة مطر بعيونه شايل

حسين شاهد ع الرؤوس بصحره بيها الله رهين
ابين جويات السنابل

شلون صحره البيها ثوب العرس موت
وما تأمن للهلاهل

والحمام يدور امان بدنيا ما بيها متن
شلون دنيا البيها ناس تبدل الدينار بدموع السبيه

او وصو الدخان يكطع كل درب
وماتمر جربة هوه لرية رقيه

ولا يمر عطر السمار ويفضح الدنيا الزغيره
وزينب بدنيا الهضم تفضح هواها
ها يراس حسين اخوي بحر بواهس عذابي

الدنيا جنها شراع حيره
ومن تفك عينك يراس تشيلني بواهس عشيره.....

كلشي وارد

بصم بالعشره الحسين ب تسع أصابع





#مهند_حمود

(حده بروحي الوداد ومادريت المن )

(عريان سيد الشعر )


تكلي افرح
ويكلي وتصيح الناس كلهه افرح

وادور مالكيت الفرح حتى افرح
وشكيت ودورت موت العفه وﻻ صح

وصرخ بيه الصبر وانه العلى المذبح

يمتخطي اعله موت الكيف
ما بلموت موت اروح
يغركان الملامه الماردت تطفح

بديك اجرح جروحك مو بدين الغير
جرح الغير ماينصح

وروح المن..؟
واورجمن..؟
وحده بروحي الوداد ومادريت المن

رحت ودري البعد لو طال
بيه جروح ما يسلن

اونن ونة المادامت اعله الون

وحنن حنة العايش الغربه وحن

عليك وكل هفاك تحملو

لاجن يفت روحي بضمه ونيسان كله امزن ..
......

من القصائد الحسينيه التي تستحق القراءه ....

قصيدة الكاروك

(الأمام الحسين (ع) يخاطب #السهم الذي أصاب نحر عبد الله الرضيع (ع) :

||علي حسن علوان||

أي عاذرك ،،
لا والد ولا عطشان
او لا ضايگـ اللذه الـ بزر الگعده ..

أي عاذرك ،،
خلصت عمرك مدفوع
مالك اويه الكاروك روحه او رده ..

هوّ الگماط الينگطع ،، شده ايهون
بس النفس من ينگطع شيشده ؟!!

تندل نحر عبد الله ماضاع اعليك
السوگـ يندل وگفة الماعنده ..

مرات اصيحه (الغالي) مره (العطشان)
ويحومره الدم و اصيحه (الورده) ..

صار ولگه الكرار طبره وتابوت
عاش اليتم بآول احچايه ابمهده ..

وياك (ابو) موجود ،، بس المعروف
ابن الولاد ،، اتصير روحه ابجده ..

خلصّو وين اليستحون من الطين
و ضلّو الما بيهم عله الدم هده ..

ياناس دم اوليدي هذا العل گاع
گالو حلاة الخير من يتبده ..

(و أذا بصوت يخرج من نحر عبد الله الرضيع ع يخاطب فيه والدته ..)

من الكاروك للتابوت ،، مالحگت اصيرن شاب ..

و كلما راد جسمي ايطول ،، أگولن گصرچ امحليچ ياعوچية الشياب ..

يمه السهم يوجع حيل ،، يشبه ضحكة الچذاب ..

(و إذا بالجواب من داخل الخيمه عن لسان والدتهُ ..)

بعد ماگام طينك ليش ـ كاروك
يعبد الله بعطش مو سيف ـ كاروك
أصعد وين ما لاگاك ـ كاروك
هلبت هزته اتدليك بيه

مقطوعه لـ الاستاذ : ( عامر عاصي ) •


عبايه بــ مگبره و جاهل
وسِمه تبچي وگمر ذابل

وفجر بردان

سعيد هنا ؟
ــ لا يمّه
سعيد هناك ؟

ــ لا يمّه
سعيد الدِفنِته الظلمه ..

إندفن كلّه
لو بالمگبره ، الدفّان يندلّه

چا شنزور ؟
ــ يمّه ندور

بلكت بالمگابر ميّت يگله :

( عبايه بمگبره ، وجاهل
وسمه تبچي ، وگمر ذابل
ودمعة والده الغبشه
وطفل إسمك عله لسانه )

لو دفان يتمشّه

والمدفون ، " يبقه بعين دفّانه "

وتشوفه انته !!

واشوفه آنه !!

ناصر البدري .... ولوحته ..

(نعي)


سكته اعله سكته تمر الأيام
لاتـنشـره ولا جذب تـنسام
تدفـع بــ عمرك دفـع جـدام
حته الحلم مل منـك ونـام
.
.
فنك تنام وجفنك أبعـيد
وحزنك كسر ضهـر المواليد
أتـريد بس ماتـدري شـتريد
صافن وره ضعون الـمواعيد
.
.
صافن وگلبك ركض مذعـور
ركضـة نفس مابين الگبـور
تشتعل بس تـنشـاف تنـور
تـكتل الطيف أرسـمله ناطور
.
.
لاتحسب ولا تشـتري الصيت
ماتضحك أشفاف التـوابيـت
دللـت يامـه ويامـه ربـيت
بس أنـته واسمك تالي ضليت
.
.
ضليت شوغه بـصدر الغروب
ودمـوعك أمنطيـح حالـوب
أحبابك نسـوك وسدو البـوب
ونامـو اگلوب امشابـگه اگلوب
.
.
ديـر الخمر فوك الصور ديـر
بـلكت تطفـيك التصاويـر
ليـلك أشكبره وحلمك أزغير
ماينصـبغ شـيب الطباشيـر

( خيال الطف )

كريم البغدادي




شمس ضلمه

ونهاية صوت

ونداء من السماء

ياهو العزيز يموت

واختار الحسين الورد والريحان

گلهم روحوا للجنة

والقاسم اذا موجود

هسه نكمل الحنه

ومشوا نجمة بگفة النجمة

كل خطوة بأثرهم خضرت نعمه

وشفت ريشة وگلت عباس راسك حار

نزل ريشتك لا توصللهه النار

وشفت هلال نص الليل بس يفتر

رحت وتقربت منه وطلع يشبه علي الاكبر

سألته شبيك گال حسين

گتله الماي گال حسين

گتله الجنة گال حسين

كل احنه فده لحسين

احنه هوااي عد الله

ياهوا الگالكم سبعين

ورجعت امشي وشفت شمعه وعليها گماط

يعبدالله الخلق روحك عليها شحاط

شو تلمع

انت اول طفل لحسين يتبرع

نزلتلك سمه وشالتك من الگاع

طف متروس كله سباع

واجت زينب وصاحت خويه ابو السجاد

هاي الدنيا موش النه

بعد فترة ويصير فراگ خويه حسين حاللنه

عامر عاصي

خلك صبير

روحي سلة خوص وهمومك جمر
واشتهيت الليله احبك من جديد
نصير ساكين بجذر

انته يافرحه يتيمه
انته طيف امعلك اعله ذيال غيمه
وانه هاوي
وانه خاوي
وانه جاهل باع عمره اعله التتن بين الكهاوي

وشيبه شيبه
كبرن هموم الليالي وضفرن سنيني ضفر

ومرجحت روحي بكصايب
وبمصايب

وبخلك صبير عطشان بثنيتك

ولو... ماباست شفاف الديم مطره

ولو ..ماضلت بعد بالروح كطره

بس اشتهيتك

واشتهيت الليله اموت اباب بيتك

ااخ مني شكد تنيتك

وصبت هموم الليالي دموع دم
تنزل واعتها

العين والدمعه برمشها
الوالده الودعت بتها

وانت الخضيري المسج
والهاشمي العيد اب عيده

فرحة الجاهل
ترس عينه ويدف نبضه بوريده
انته الولايه الجديده

الواعدت روحي ونستها
وانته اهلنه عيونهم هدوت مسيه
والفرح بيهن جنح
زاهي برفيفه
والسوالف واهليه
انطرهن بفي الكصب واسمع وهيفه

يازلف
كلش ترف
حد المنيه
وانه ناحل وانه ذابل
وانه ضيم اسود مثل لون المكاحل

انه كل كطرت عرك صدر المغازل
وانه كل عيد الصبح بدموع جاهل

وانته بسته
ياطعم ساجي الشته ودور رغيفه

انته وجه امي الواكفه اباب الصريفه

وروحي صوره معلكه بحيطان غربه

توجع ضلوعي البسامير وتنيتك
وغطه وجهي تراب الايام وتنيتك
وعلكتني خيوط شوك ومانسيتك

ااخ مني شكد تنيتك

موسى الحمام و قصيدته - عراقيات -



اسمهن حرز للنسوان

راية شرف معكودة

وحجيهن بلبل البستان

اذا جاس الندى خدوده

كصيبتهن تصير عگال

لشيوخ العرب وحزام

للبين نگص زوده

عراقيات

لم الله ال ( لعد ) و ( الچا )

وخلق بيهن الحور العين

وشوف انت شكثر ترفات

الهوه اذا فكر وما فات

تلكاله اثر خطوات

عل خدين

عراقيات

شفايفهن البرحي انچبس فوگه الهيل

وسوالفهن نثيث الغيم باخر ليل

فقيرتهن تميل عل الگمر وتعيل

وتكل للكمر مسچين يالمكرود

ما نحتاج ضيك تبرجلنه خدود

وهلال الكمر معكود

چن شعره بكصيبتها

وسنون المشط تاكل اچفوف الراد

ينش موعد بگذلتها

اول ما تصير الطفلة تتعلم شتعلم ابنيتها

جبيرتهن غلگ للبيت

لو وجت بوسطه النار

وزغيرتهن هلا معزبين

ودگ كهوة وضحك خطار

كبل جان الحصار يخاف

اذا هدن عل الكيعان

ما يلحكهن اللبلاب

ويطك الشلب مترين

اذا طاريها يمه انجاب

ومن تنشد شكو ام كلثوم

ويضم راس اللحن زرياب

عراقيات

ثقافتهن بحر واشعارهن ناقوس

يدك بكل زمن صوته

ونواعيهن غزل معدان

تفرح الميت بموته

عراقيات

حزينات وحزنهن لايك عليهن

يمشن عل حسج متحنية رجليهن

كارتهن عشكهن والكطا مرسال

وبيادرهن شوية من الوفه البيهن

عراقيات

شكو غالي عل سوك الناس يسونه

اذا شافن الكيض تعاند وي الگاع

برگص خلخال غيم الدنيا يغرنه

يذب روحه المطر مچتول

ويجي يركض على الرجلين يتوسل يسحگنه

ويسبحان الجدم من يسحگ عل طين ويگلبه نقش حنه

عراقيات

الجدر واحد لچن تنصبلك انواع

اشك عدهن حبل ممدود بالجنة

الشاعر ينقد المجتمع ب لغة خطاب آدم

(عباس الغالبي )

شمرن بيك ..يا ادم ؟

حشمه وما تعرف اهدوم ..؟
لو خبزه بحلگ محروم..؟
لو خرت سگف بالليل يرگص بوم..؟

شمرن بيك ..يا آدم
أمرن بيك
هل هلال ...هل هلال
والصايم كله الصايم

أمرن بيك حوى وبلكي نتوالم
مثل خطبة ثلث ﭼـلمات
صارت عيشة الحاكم ..

اجيت... وهالشفتهه ....
وهالخذيت
امراد
واحنه بعيشة امساوم

ايا عثرة الشجره برغبة العالم

لوّنه ابليس جاهل ما مشاله شراع ..
ولا غرك بشجره
وطحنه احنه بگاع
جا هسه ابمـﭼـان انشوف بيه وادم

مو وادمنه هاي التحـﭼـي مدري المن
يتراجف وعيها ابين ضحكه و سم

ي آدم ..شاخت الحسرة ..
انه من احجي بلسان الغير
تره الساني بكبر گدره ..

و على الفطره ..

صبحنه وليل ما ينراد
عشگنه وحرگه الها ازناد

اسمي واسم الولايات ..
جذبنه بمشية وبگعده

وضحكنه الكلشي ما يسوه

على الفطره ..

ي آدم طگ المعاتب ..!!
دنزلنه لمجان نشوف بيه خضره
دنزلنه لمجان يحلل الخمره ..

المن نزلتنه الـ دنيا بيها الماي يتمنن على الشجره

ولا تبره ..

السوالف بس عتب فقره..
هلبت من يشوفك يلمح بكفره ..

هلبت يندل القبله..
هلبت ما يشيل السيف
عنتر لو حضن عبله ..

ي آدم ....غاد هم ذله..؟!
هم الصيت للمله ..

هم عين الفقير امكتره ابلا لون
وعين ابن المدلل تضحك وشهله ..

ي آدم والعتب مو زين ..
ولا يمك عتب لن ما رضينه عليك
و رضينه اعلى الضمه العمرين
يا ادم انت موش حسين ....

الكبير سعود الخفاجي ..و قصيدته -كون اموت -

صارلي اشجم يوم افتر عالحدايق
خاف اموت وما امسلم عالورد ..
كون أموت
ومحد يگلي من اموت ..
حتى احط روحي اعله متني
ومن تنام الناس افوت
اليموت وداعتك بس الله ربه
واليصلي اعله الجنازه بكيف گلبة ..
أطوني سم ..
الليله اريد ارتاح واتوكل واشربه!
الليله اريد اخذلي فره ابين اهلنه
ويا گبر يعجبني اطبه ..
اليخله وجهَ أبين اخوته ..
يموت والجناز غربه ..!
منين اجيب الخايف الله وبيه اشد للشوف رايه
الدنيا وكحة عيــن والوادم عرايه ..
السكته تكتل ..!
والحجي يزعل عرب ..
اليشتري الجلمة من امس هد المضيف
و حطله خيمه وصفط بحي الطرب ..
وسكته ..!
والميت حجه الما ينحجي ..!
الدنيا ضاگت ..!
الگبر مفتاح الفرج كلش قريب ..
نية الغرگان سولفهه النهر ..
الـ عالنهر كلهم عرف والماي بس هو الغريب ..!
ليش بس انه اعله بابك اوگف امبين غريب ..!
طشريتوا اسنين عمري وما حجيت
وعمري جبته املاحف اوي سنينكم ..
الليل وانت اثنينكم ما تستحون ..
توني اريد احجي ومشيتوا اثنينكم ..

استمتعو بهذا النص
ل
مصطفى الخزاعي

(معراج بارد)

گبل لايغفه كل شارع بالولايه اغنيلك
واگلك نام بعيوني

گبل لاتنده الوحشه مواويلك.
وگبل لا تشتري الصفنه وتحن للناس وتغيب بتواسيلك

وگبل جيت النهار يخظّر خيالي
انه شمايكبر خيالي افييّلك !
انه كلما تزعلني اجي اشكيلك

منو غيرك يلم البچي من عيوني ويگلي اضحك ولو بهداي

ومنو يشيل التعب غيرك لوَن صح للوجع شرّاي،
ومنو غيرك سمه ومعراج للصفنه !

احظنك محترگ دخان وانزل ماي ،
وتگلي اضحك ورد بارد ولك ياطيف يمدلل يزرع فياي،

حزنك ازغر من ال اآااه
وانه وليل عمري ما نعرف الجاي !
تعال الفرح دنيا بطارف جفونك
تعال وجيب باچر يزهي بعيونك
تعال المستحه بلونك !

كلشي بلهفته يتانيك
عين مكحّله بنعاسهه اتّانيك
دمعه مشبگه بصفناتهه اتّانيك
بكل نسمه تجيب نعاس بارد يشتعل طاريك

وكل عين اشتهت طولك يكحلهه بحلم تبچيك

وانه ضلوعي حطب طافي !
وحزن بأول الصفنه وينشرب صوته
حزن بارد

حزن تتكسّر الضحكه اعله تابوته
حزن والعلّته السكته دواه موته

ظنيتك نويت تسافر بروحي وتفيض من العتب دهله

واگلك حيل عاتبني العتب ويه الدمع يحله
غيّم وامطر گبالي يطيح الفيّ على عيونك زعل گذله

واشبگني حلاة مشابگ اللهفه بچي وكحله

وچذَب ظني
ولگيتك بارده عيونك
وحاضن غيظك الراكد مثل دجله ...