(حالة الضياع تتجسد في هذه القصيده)

||جواد زغير ||

اسنين والدخان يكبر ..!

اسنين والبيبان بس بالريح تحضر ..!
اسنين ..وانه امرادي وين؟ ..
اسنين ..وانه بلا اسنين ..

يا برد ما جاس روحي ..؟
ويا صدك ما ضاك نوحي؟
كلشي بيه يريدني اسهر!
كلشي بيه يريدني انطر!

ذنبي ..!
ذنبي صليت الصدك لـ أول امرايه ..!
ذنبي ..ما ادري النهر من تكبر بعينه السواجي
يطيع مايه ..!

ذنبي اضيع وماكو دم ..!
اشما حمدت الله اعله جفهن باگ لوني ..
اشما أدلل بالضوه يرخص عيوني ..

وما هو ذنبي ..!
ماهو ذنبي!
وبين لهفه ولهفه اتوب!
ماهو ذنبي ..!
ويا شمس ما صافحتهه وما نست جف الغروب ..!

انه كاتلني البجي الـ من غير دمعه ..!
انه كاتلني الحجي المحد يسمعه ..!

انه كاتلني الهوه اليعطش حلاله
ومن غريب يبوگ شمعه ..!

انه مو ذاك التشوفه الناس يضحك
انه جذبة خايفين وخبر موت..!
انه شفه امتانيه من الماكو صوت..

انه صم تراب ماصعدتله گطره ..
انه مثل الينولد مطلوب ثار
ويگضي خوف وخوف عمره ..!
انه نار بحضن جمره ..!

بيش يغفه العمره نار؟
وبيش يتوسف يبيعه الما حضه بوشلة خضار ..!
وبيش تلتغ يا سمار!
وين تحله ابيا مروره ..
ابيا نشد تلگه اليعرفك ..

يا سماري ..الـ يمته لون البوب ما يرهم الجفك؟
الـ يمته للحيره مواعيدك تزفك؟

يا سماري الحيره كلفه ..!
وهي روحي الـ يا حزن ما بيها لهفه ..؟
روحي بس بالدمع صلفه ..!
روحي بس بالحزن تدفه ..!
روحي من يزغر حزنهه تخاف تغفه ..!

تخاف من يزغر حزنهه يموت شاعر ..!
تخاف مثل اليوم بيها يموت باجر ..!
روحي غنوة تايهين بيش تلتم والخلگ زحمة مناير ..؟
انه هاذ ..
عيوني غربه ابلا غريب ..!
عيوني دوم اشما تساجي احلامها تورد صليب

انه دوم عيوني غربه ..
اشما تعطشني الشواطي
يموت بيها الشوف جربه ..
يموت شوف وماهو دم!
يموت ذنب الخايفين ..


ٲسنين وانه بلا أسنين

||عزيز عسكر ||

" نبي وسكران "


النبي السكران راسم

لوحه للمحراب..

وجه الناس بيهه الله مشه لبعيد
اخذ ويا جهال العيد

سد باب الحلم والليل
بجه وغنه
مسح كل البيوت
وكتب فوك البوب

انا السكران اليصلي ويحب ناسه
انا اليندل وتاه وقبلته بكاسه..

نهر والكنطره الضلمه
مهره منااخر الدنيا تشب وتموت بالضلمه

مكاتيب
ورصاص
ودم
وطن غافي يلم روحه الصبح نجمة

العصر ينباع للفقره
قصيدة شاعر الجيل الطفه بصبحه
الخساره

انت يطين ورجعتك ربحه..

نبي وسكران
كل هاي الرسايل بيك من تصحه...

اكتب
ماتت الفقره
اكتب للشعر
لومات شاعرنا يموت الوطن الفطره

نبي وسكران لو لوحه

زنجيل الابوذيه ...

ل. جواد اليعقوبي



لاگاطع صبع لحسين لاچاف
لخو ...لاشلت بالطف ماي لا چاف
كونك غالي يوم جفاك لا چا..

(ف)رت لكن دموع العين وشلان
لغيرك وانه اذب هموم وشلان
كرهتك لا دگلي ليش وشلون

اتعمله موش گتل اهواك لاخر
نفس... شو لا دمعهن صاب لاخر
كون ارجع وعشگ صدك..!؟ لا خير...

بيه.. ولا بگصتي خجل لاماي
وسدآ ذاني من يزود لامي
وخو زينب أگل للتحن لماي

صورهم... واخذ شچم اخ وبعيد
وذمم ما اجي بحساب وبعيد
بعد ما سالمك للدوم واب "(عيد)

امنشوفك.... تنطي ضهرك خاب لدان
صوبي... الخمر مايدناش لدان
اتخسه اتسكتني خاب الصور لدان

حلگي... وصرت مثله هناك للحاي
ونه معزب وسير شيب للحاي
اكتلك بيدي ومشي انوب للحاي

اطوفن ...وارجم الشيطان والعال
يسامح وهو يعرف الخان والعال
وسولف بس قصايد غيض والع (ال)

غزل.. احرگهه مو عن بطر لا عن
قصد ..وانه ادري لا تشتاگ لاعين
عليك ...ولا يرفلك جفن لا عين

تبچي ..ولاگي عگرب حوك لا صال
يلدغك حتى لا مر بيك لا صال
المثلك لاخشع فديوم لاصال

بحياته ...وگتلك منشتاگ مرويد
اشوفك وانه كحله احتاز مرويد
التكتلك ماهو حالي دوم مر ويد

الأحبه.. يامگرم شوگ ياهام
بمشيته ويامعزتك الي يا هم
الگلب... گلي وجعوني گلت ياهم ؟

نغزني وگال المچلبين بيه

قصيدة جميله

||موسى الحمامي||

ملحده تسأل حبيبها
ــــــــــــــــــــــــــــ

- انا كلش خايفة

وماكو شي يخلس ابنادم مثل ظنه

موسى… خاف باجر ماكو جنه !

خاف وحدنا انخلقنا !

خاف من نموت نبرد

خاف مامش روح تصعد

خاف محد…

خاف صدفة…

خاف بس الدنيا عدنه
_________ج

- الخوف تربات السجون

وانتي حرة

الصدفة اذا خلقت الكون

شلون گدرت تخلق عيونج الشگرة !

لا تصدگين بحجيهم

ليلة المحشر تخبل ، والقيامة هواي گمرة

والهوه ينسم علينا ، والمية تگول خمرة

ويمرگ الله

ويبقى كلشي بطرگ عطره

يباوعلنه ويبتسم

يعذر القصر تجاهه گبل لا ينطي عذره

ويصرخ الشيطان كفرررررررة

شلون يتساوى اليعيش عل الكمان وي اليعيش عل المدافع

يبتدي يأشر علينه واحنه نعرفها الاصابع

من نبوس الايد ما ننسه الاصابع

هذا يشرب ذاك ما سحگت جدامه تراب جامع

ذوله غنوا لازم انصب الرصاص عل المسامع

لازم ولازم ولازم لجن سبحانه يخزره

يگول حضروا الحنه لوليدي الأحبه ويدفع من جيوبه مهره…

(قصيدة من روائع الشعر الشعبي المعبر ارجو قرائتها بتمعن حتى لاتفقد موسيقاها الشعريه )

||كاظم الكاطع||

اجه طيفك غريب امتيه ادروبه

اجه طيفك يدك بالبوب
ياجفن اليدكه امقفله بوبه

اجه يعاتب مضيف اهله
ولكه الدلًه بمضيف الحسره مصلوبه

وشاف الناس تشرب بالجماجم ماي
كال شمال هاي الناس
كول شمال هاي الناس

وشمال شهر عاشور مامش طوس بحبوبه

وظل عطشان يترجه يكت الغيم
عاين فوك... شاف الغيم ...
يلحس ماي حالوبه

وصفك راحه اعله راحه وكال
يا (سيزيف) مالك ماكشفت اسرار

تدري الآلهه عالناس مجلوبه

ولامذنب لزم شباج عكله وكفر اذنوبه

ولا الطيف من انباك
من عين الزلم حوبه

ولادهر الغدر نوبات ويه الحك نصح نوبه

شوغركت سفينة نوح
شو جف البحر ماحنته دوبه

لا ياسندباد العرب لويدري العرب تغرك فلا راد الملاحه

وياهضيمة جبل طارق
من بجه اعلى احفاد طارق
.من صفك راحه على راحه

ويازلمنه الليل طوًل يمته ليل الخير يكرمنه بصباحه

زفة شناشيل مرّت بالعگد
والدف يرشرش فرح
والدشداشه گمره

وگلبج كليچة تمر
والحنه تركضلج گبالچ
تفرش السجادة خضره

واحنه عصفورين
لمّينه الوكت حجرة عرس
والنومة يمچ دفو حضره

شكثر زخت هم امس
واركضت شمسية عشگ
شكثر دگت ايدي بنهيدچ البرحي
واشتعل جد العثگ

نار بمرايه شيكمشچ
من اجيلچ
انطبج انا ولهيبچ نحترگ

طعمه يا برحية الله
وعنگج معيبر قمر

وانا فارش حضني انطر
بلچي نسمه ليل تلعب بيچ
وتصيرين حصتي
قبل ما تملي شليلي وقلبچ ايام المطر

زفة شناشيل
وانا وياچ ختيله بحجرة النوم
ومخاديد ودواشگ وظلمة
الظلمة حلوه
الظلمة ما تترك اثر

والتكمكش حلو يا حبيبه
واذا الگيتچ اضمچ
وارجع من الاول اكمكش
انا يعجبني اتكمكش

انا يعجبني ادور عالگمر بالغيم
ما احب الگمر كلش گمر

يا عمر كلك مطر
يا فرح جنك قهر

منين اجيسچ تآخذ الختلات روحي..
الگه عنبر..
الگه مشمش..
الگه غرنوگين يصلن
الگه شي ساكت مثل فرخ الحبر
الگه شي ضايع نهر

دشداشه گمره
اثنين بالمشمش ..
وإذا العصفور يزقزق ...
فوگ ...
نسحب البستان ..
نتغطه شهر .

صنطه لشناشيل
صنطه العگد
نام الدف على امخاديد الجوارين
وحصان العمر مسرع ورا الگمره ، عبر
گنطره وماي الگمر
گنطره ونوم وعثگ جاس النهر
گنطره وجانا المطر...

القـديس..💚🍃

قصيدة ... جزع


المبدع.. موسى الحمامي

_____________________


كون الله اعلكد نيتي واحضننه

واگله النار شفناهه بعد نطلبكم الجنة

كون الله عل گد روحي واشمنه

واگله بفوح دم هابيل شعلينا

واگله نريد بس فيروز رجع كل نبي ودينا

خلقت النار بس للشوف
تحرك ناس ما جنك

يرب وانت الحلم والعين

تعذبلك شوية طين

ماظنك

اذا رايد نموت.... نموت... گللنه

ليش بكل فگد محبوب تكتلنه

ليش أوليدنا ميتم ما شاف التلوليله

ليش ابن الجنوب يموت والشاعر يغنيله

يشاعر لا تغنيله

يشاعر منته ما تدري بأمه وطيحة الشيلة

ولا تدري اعلفجدة تذوب جبدة ذيج الكحيلة

ولا تدري الصديج المات يموت وياه كل جيله

انا اعرف الوطن ينراد
بس عيونهم اغلى

انا اعرف الشهيد يعيش
بس عريسهم احلى

يدين الما الك اي دين
شعلينه ونموت هواي

النهر ينباگ كون يثور
ذاك الگال حصتي الماي

كافي نموت ومكيفين

كافي انحني بالشبان قصايد تنقرأ بفلسين

كل طلقة رصاص تثور

سببها الشاعر الجاهل...

زيـن كـريم
......



چا وإلعيون إلبچتلك..؟
چا وإلگطوف إلحچتلك..؟
وإلدرابين إلخذت صوتي ومشتلك..؟
ذني بيش..؟

چا وإلچفوف إلتمسحك..؟
چا وإلأرتاحن لملحك..؟
وإلشبابیچ إلتصليك إعله هَويه وما تفتحك..؟
ذني بيش..؟

چا وإلدروب وسفرها..؟
چا وإلوجوه إلصدع يمّك شذرها..؟
وإلمحطات وزحمها وليلها وريل إلعبرها..؟
ذني بيش..؟

چا وإلعزاز إلعفتها..؟
چا وإلسنين إلجزتني وماشفتها..؟
وضحكتك گلولي بيش ومابعتها..؟
وذني بيش..؟

چا وإلشموس إلچوتني..؟
چا وإلحلوگ الحچتني..؟
وإلأماكن..؟ وإلقصايد..؟ وإلهدايا..؟ وعوّدتني..؟
ذني بيش..؟

چا وإلمدخنات ضلعي..؟
چا وإليحبك يَ گطعي..؟
وإلبرد..؟ وإلـ آخ منّك..؟ وإلصور طفحت بـ دمعي..؟
وذني بيش..؟

چا عليمن تعّبتني..؟
چا علىٰ إلمامش بعتني..؟
وماكو بيش..!!

احمد عاشور


سلامتهم

بعد ماريد منهم شي.
كلهم طيحتي ماطولت بيهه

كلهم مامدنك كمت مثل النار
من تلهب ومحد يعرف شبيهه

رجعت بهيبتي بس اني من جواي
مكسور ودمعتي گوه خافيهه

مثل احساس الاسره الجايه من ابعيد
من ترجع وماتلكه اليتانيهه

رجعت اسئل عللماكالي شمحتاج
ماعاتبته وتخيلته حاجيهه

جنت بره السرب مونقص بلجنحان
بس جنحانهم مامقتنع بيهه

هيه حظوظ والطيب يرد خسران
من ذيج الاحلام الجان بانيهه

اكو مكتوبله يكظي العمر مخنوك
يتعود وتالي طيبه يجفيهه

واني تغيرت مونفسي ذاك الجان
من اتمر اسامي احبابي اغنيهه

حته الصوره تتغير وتبدي اتموت
من تخلي الشريط الاسود عليهه

سلامتهم بعد ماريد احب ونعاف
وجفوف التسلم راح اجويهه

اغمظ عيني واذكر شكد اوجوه
جانت تضحك بوجهي من الاكيهه

سدو بوبهم مادرو بلبيبان
ماتكدر تظم عيوب راعيهه

امر من يمهم وتلجم بس والله
مابينت روحي شبيهه مابيهه

صح مجروحه بس الغيمه من اتفوت
ماتعرف ضحكهه من بواجيهه

سلامتهم بعد ماريد منهم شي
كلهم طيحتي ماطولت بيهه

عقيل العرد

أول مشاوير العمر


جانت عيونك

وآخر رسالة للهجر جانت عيونك

اول غُرب نرتاح بيها
وآخر مدينة نموت بيها

جانت عيونك

ياما حبايب سامرونه وماكو واهس للعشك

وياما كصايب خدرت وما مش اصابع للصدك

وياما كلتلك ضايع المفتاح بكَليبي بعذابك لا تدك

ياما تنيتك بالمواعيد
هلال اعله كَدي وضاملك عيد

والصايمات بلا عذر ..

جانت عيونك

وتاخذني للوادم نذر ... جانت عيونك

زعلان لو هاوي الزعل حيرنا طبعك
جبنا دمعنا ونعتذر لو تعب شمعك

والمطر من كل غيمه اجه ايطيح اعله دمعك

ثاري المطر ما وفه الاعذار

والغيم يم عيونك احتار



ثاري اول صيار المطر ...جانت عيونك
والتهدي للناس السهر ...

جانت عيونك

انشد بساتين الورد يا وردة منهن بيها خله وباكَتك

هاي الالوان الوان صارت جي
شفتها وشافتك

وهاي الانهار الحلوة ..
صارت حلوة..... لمن ضاكَتك

طعم الشموس ولون الازهار
يالحسنك اعله الدنيا خطار
وخطار غالي اعله الحلم ..

جانت عيونك

يطفح دمعها وتبتسم ..



جانت عيونك

من القصائد الممنوعه قصيدة " البراءة "
ل. ||مظفر النواب||

ام تخاطب ابنها (الحزبي)

"يبني لاتثلم شرفنا "

الام :
يَبنـي ضـِلعَكْ منْ رجيـته
لضِلعي جَبـٌرته وبنيــته
يَبنـي إخذني لعُرض صدرك
و أحسب الشيب اللي من عمرك جنيته

يَبني طِش العمى بعيني
وجيتك بعين الكلب أدبي على الدرب المشيته
شيلة العلاكَة يَبنـي
تِذكر إجتـافي بلعب عمرك عليهن
سنة وجفوفك وردتين على راسي
وبيـك أناغي كل فرح عمري النسيته

يـَبني شوفك يبعث الماي الزلال بعودي و أحيا
وانه ميتة

أبيض عيونك لبن صدري
وسواد عيونك الليل اللي عد مهدك بجيته

وأبنك التوه يناغي الخرز بالكاروك
يبني ...كَـِتله:
(لاتخاف اليتم جده
اللي مامش ابو عده
الحزب ابوه الحزب بيته )

كًـِتله يبن وليدي من يجبر على الأيام
تلكًـه حزام ابوك الماطواني وما طويته

تلكَـه منه خطوط اضمهن حدر ضلعي
لحد ما موت بعز على السر الحويته
ياعمد بيتي وكَـمر ليلي
وربيع الشيب والعمر الجنيته
جيت اهزك يـاعمد بيـتي
يكون الدهر ظعظع عظم منك للمِـذَلـٌه وللخيانة
وساومت جرحك على الخسة وخفيته

يبني خلي الجرح ينظف
خله يرعف
خله ينزف
يبني الجرح اليرفض شداده
علم ثِـوٌار ويرَفرِفْ
يَـبني (إبن الجلب) يرضع من حَليـبي
إو لا إبن يـرمي إلـي خبز البراءة
يبني ياكلني الجلب عظم ولحم
وتموت عيني ولا دناءة

يبني هاي ايام يفرزنهـا الكَـحط أيام محنه
يبني لا تثلِمْ شَـرَفنـا

ي بني يوليدي البراءة تظل مدى الأيام عفنة
تدري يابني بكل براءة
كل شهيد من الشعب ينعاد دفنه
وخلي ايدك على شيبي
واحلف بطاهر حليبي
كَـطرة كَـطره
وبنظر عيني العميـــتَه
قلي ما يندار رجمي و أنت أمي وذاك حزبي

وعز أبوي المالواني وما لويته
كلي ما اهدم حزب بيدي بنيته :::::

الأخت :

خوي كابلت السجن
حر وبرد ليلي ونهاري
انحملت لجلك شتايم على عرضي
واشعلت ليلي بنهاري

تالي تهتكني ابخلك وصلة جريدة
كرة عيونك يخوي بهاي جازيت انتظاري

بهاي اكابر كل اخت تنتظر منك ثار لعرضها
بهاي اكابل امهات الناس وهمومي افضها
جنت ارضى اتدوس بعظامي
واكلك حيل رضها

جنت ارضى تذبح ابطني جنيني
ولا براءة عار متبركع تجيني

ولا تكون الكاع تبلعني شخبر الناس
ولينشد شكله

شلون تكابل عيوني المحله
شلون اوصفك وانت كلك عارُ و مذله

بعد مالك ارض ويانا وخبز
لا تصل يمنه وهاك اخذ عار الجريدة
ولف ضميرك والكرامة
مثل متبريت من شعبك
تبرينه من اسمك
يا شعب هذا التشوفه موش ابنّا


موش ابنّا

گبل متروح وتهاجر ..يطير الصاف تانيني ..!
اداء باسم الكربلائي..
كلمات جابر الكاظمي ..

ثمانية وعشرون حرفاً لا تكفي لوصف هذه القصيدة ...!
التراث الحسيني ..والحنجره التي تشكلت من تجمع اصوات البلابل ..!
سيأخذك الى عالم ثانٍ.. ..!

قصيده جميله ...تستحق القراءة..

ل. عمار سالم

امتعبني
جرحي من الزغر شامة،
لايلتم ولا ينزف كسر جامة،

مو كل ناسي الاحسبهه آنه عندي اعزاز
اثگال ايمرن المحبوس بس يحسبهن ايامه.!

وانته وياي جريب أعلى النفس بس كل عطر مابيك،
ورده بطوگ خزامه

أشما اشكيلك اتردني
وآنه ابگلبي لو خليك هم شبيك تنشدني؟

وانا يمك طحت جمره اعله طرف فراش كلها اتريد تبعدني،
لاتكسرني اذا تودني!

عظم هدهد تموت ويه الكسر روحي
وبعد ماينفع اتشدني،

من استاحش أأمن عالشجر عصفور
وجفل من اشوفك جاي تفگدني!
بيك الصوج انته المامعودني!
وما مستبعد اتذبني!

گمر عشت ولگيت الناس بس بعيونها اتحبني!

شما حسب لروحي اعزيز ارد ندمان

دم محد يحب شوفي!

ومو من غربه من عينك كثر خوفي،
معلم عالبواچي وكحله معروفي!
مثل خامة چفن گلبك،
مامش عايش يرغبك؟

حطب وانته ابوكاحه تعاملك وياي
احرگك وگعد ابگربك،

شفتك ماي حب محبوس
ضميت الجرح عنك
گطرات الدمه اتخربك
وبيش اچويك
وانت اطباع حرمل بيك
ترگص من تلوحك نار!

وگتلك أمن ابفرگاك
بس انته النهر بروح
ولغيرك سواجي زغار،،

وغيرك من يمر عالبال حسبت ضيج
يمحيها الفرح وتروح
بس انته شيزيحك ثار؟

بس ثاريك مو صاحب طويله وياي
عشرتك زتت الخطار

ومرات الصبر زايد..
من بعد الصواب الشرده للچتال
وانه مصوب وشارد

مثل لدغة الحيه يريدله استعجال
جرحك يكتل البارد

نيشانك وشم بروح
مو جرح وانطره ايطيب!

يحط نيشان من ينزاح نيشانك
وجه دفان وجهك يثگل اعله الجاي

حگك ما تعود عالهلا السانك
سد بيبانك وخلهن عذر مقبول

محد يعتنيك ابشوگ ياسجان
من تفتحها ومن اتسدها بيبانك

ريت الماخذك جاهل وصيح اعليه
ويرجع بيك لمچانك

چنت مثل الشمس وياك ماتانيتني وماجيت

ورد مكسور لدياري
مخلص دمعي وعذاري
واذا انته اصبحت چتال
ياهو الياخذ ابثاري

لايوجد خطوط حمراء في العراق سوى دماء الناس


عقيل العرد
………

الشعب لازم يسولف

الظاهر حلوك المناير بيها موس

التوت مو بس للوزير

ومن يشح فيَ الحكومة الفقرة كون تصير فوس

الناس تستاهل تعيش ..الوطن للناس كلها

وشيصير اعله الشعب لو صاح كافي
وشيصير اعله النجف لوصاح كافي
وشيصير اعله الملك لو ثلم تاجه

وفصله حجول وتراجي لكل عروس ؟

احنا من نبني المناير ينتهي دور العمل

ويبدي دور عمامتك وحجايتك ويشيل صوتي

اعله الهوى

اعله الماي

وي طيف الشمس

السياسيين عبادة نكاح

والشعب من يضم صوته يصير جرباية عرس

المنحلة بدم الشعب يثخن عسلها

وبخواشيك الذهب ينضاك ماي وجوهنا ولذة عملها

اللافته البيها شعار الفقرة آيه

النبي يبوس بشفته الچف الحملها

كل مناجلنا صحت والحنطة ضحكت

وكل سمار وجوهنا ( الباجر) اكلها

وكل تعبنا وي الوطن رايح ثواب

وكل شوارب مجلس النواب زفرة

وزحمة من تسطي الحرامية اعله اهلها

انا حريتي قضيتي تعيش اعيش
تموت وايها اندفن

وﻻ تفكر تعتقلني
اني ماتلكاني بيه

انا صرخة بكل كلب ضاك الحزن

اعتقل كل ذاكره وطلعني منها
الشاعر براس الشعب مو بالسجن
.
…… .
اضطهدني براحتك واتشفى بيه

واشطب اسمي من التنانير وخبزها

بطني مليانه قضية

يجي يوم نگلك " ارحل "

بلايه فتوة مرجعية

تجي ساعة الناس تتداين شجاعة وتصرخ " ارحل "

لا تأمن ..
شما خدر ليل السماوة
ينتخي بشعلان ويورث غترته براس مگوار النشامى
ويعتلك للثورة مشعل

متاني يوم اخذ عرگ وجهك والمع بي حذائي

متاني يوم اكل جبدتك وبثواب الفقرة
اطلع حيفي منك


اخذ من الكرسي عود
وشوف روحك
جم فقير يطيح لو نظفت سنك

يجي يوم ونشچخ المنجل بصدرك
ونشرب بدمك ونسكر

كاتبين اغنيتك وجاهز لحنها

شوكت مايدبر ضمير انگله غني

مشتهينك

والجياع اسنين بس تبرد بسنها

انت سويت الشعب مثلك عگارب

والحكومة شما تعافت تكبر ويكتلها ابنها
………………… …… ..

رائعة كاظم اسماعيل الگاطع


الليله اموت
الليله اخر ليله
الغيم مد ايده اعله راسي
والمطر شد حيله
الليله كَطرات العمر
ناكَوط حب سهران
يمه ادخيلج..
اترجاج
ضميني بسواد الشيله
الليله ليله
هد عليه الليل بخيول الظلام
منين اجيبن حيل ويرد خيله
حيرتني اضنوني موتي
اوف نعشي اشلون اوصله الباب اهلنه
ومن يكَابلني عليه ونشيله
الليله اموت
الليله كَلبي ينام دافي
وتندفن وياه حرارة جيله
الدم ينبع من سراديب الضلوع
ويرسم جروحي على الفانيله
وطير من بين الضلوع يطير
وتلحكَه السهام
وقيس يخسر ليله
وكَمر سكران اعله ميز اقمار
ضيع ليله
تفيض روجات الحسافه
وتكسر الشط
يا سنيني الراحيات..وداعة الله
انطيني بوسه...موادع الخل الخليله
يا نخل يا عاكَر احبل
ضوكَ طعم الفاجعه بموتة فسيله
ويصيح:
يا هور الحزن..
لا تغفه يا هور الحزن
تابوت اجاك اويه الكَصب
بهداي حطه عالجرف
ومحمداوي امن الكَلب غنيله
يا مطر
ياسيل..ودني اعله نهران الحبيب
بلجي اصادف صورته
شي باقي منه
اثر جدمه عالرمل
واشكيله
ونزع اعيوني براحته
وهي العيون امعلمه
اشتبجيله
جن ربابة كاولي اتزتني بعتابه
وتركَص الغربان
عالجثه الثكَيله
يا طيور الليل
وديني اعله ناسي
اليموت..
يشوف..يسمع..يلتفت.
ينكسر كَلبه ويعرف اليبجيله
تمنى
وعادة الموات يتمنى ويجيله
انا اتمنى
الشته..وحضن الحبيب
وسيف جاتلني كَبل هالليله

قصيدة || معانات||


محمد الجراح


شوهدناني وسيرت جف الكذلتك واشتهيتك
ياعرف توك تعال اتعوديتك

بموعد... بلا موعد.... املاكاك نعمه
والله شاهد ماادري بروحي هويتك

هيج لا كيت الضوه وطولك عرضلي
الله مطيني اعله نيتك

ياغله البهداي تلجمني لكيتك
يلي طايحلي اعله عرفك رافكيتك

نكط بكيفك يغيم الكاع كاعك

وشتصح سجه مشيتك

يلي اشوفن راحتي بتعبك واذيتك
ياجرح كلما طبك جفنك وهود لاعبيتك

غافلت ريتي وخذت وين العذيبي ومنهه اجيتك

وديرت الكاس اندرت فدوه اعله نيتك

ياحبيبي هواي حبوني وعفتهم ويمهم وعنوه اعتنيتك

وراحه مدو روحهم
ياما بدربي وعبرت روحي تعب وتوسديتك

كبل ماشوفك ذنب بيه لكيتك
وشفتك وبالمايمر ببليس طوخت وهويتك

خايب... واتفقنه وخلط حنه اتخالطيتك
كلشي بالدنيه حلو ماخذ صفاته
ياخصر دله البرد ند الحلاتك

ياكمر دوم وطلعتك مشتهاتك
و اخ من يتلاكه زعلك وي رضاتك

ينده بعيني الخمر واغفى بصلاتك

يانشد وكت الجفه اتبين غلاتك

ابين ادي وتكلي من اتجيس فنك
وكحت اجفوف وتكلي اشاقه يل ازعلت جنك

ياحنين امنيلي من اتروح مني
ومن حلاتك ماالوم الوادم اليحجون عني

انته يل جنك دخيل
شما اتيه بالضوه الكاك الدليل

عظم الله لكم الأجر يا موالين...!

🏴🏴