#ألف_باء_العذاب
-٤-
بقلم فلة علي
الساعه 2:34الضهر قريب من مطار الخرطوم...كان في شاب اسمر كده ماسك شنطتو ومضاري وشو من الشمس بي جريده..

وقف ليهو امجاد وقال لي سيدها وصلني ال.... لو سمحته

...

يلا دا منو ؟؟ وماشي وين ؟؟ وجاي من وين !؟؟ حنعرف بعد شويه ...

*

انتهي اليوم الدراسي بخير...ومكارم اخدت زمن طوييييل حتي سامحتني لاني مشيت خليتها بالصباح..
رجعنا البيت وكالعاده برنامجي المعهود..رميت الغسيل ف الغساله والزمن كان زي حوالي الساعه 5:34م كده
علا كانت نايمه ف غرفتها وضاربه التكيييف وعمتو طلعت مع مرة ولدها يحومو ف الحله والله اعلم ..
عشان كده قلته اشتغل احسن..وانا واقفه
فجآة راسي لفه ...وم حسيت بروحي الا وراسي برتطم بالغساله ..

صرخته مع الوقعه وفقدته الوعي..طبعآ ماف زول سمعني عشان الصوت عالي وكده..

** 
في مكان تاني في نفس البيت...عمار كان قاعد في الصالون وفي السرير المقاصدو كان في واحد نايم في سابع نومة

عمار : فندام....اصحي ي زول 
نايم 5ساعات انت

فتح عيونو #ببطء بعد اتمقه كدااا
عمار : قوم قوم امش اخد ليك حمام 
فندام : والله ي ود العم جسمي دا مكسسسسر التقول كسرته لي حطب 

عمار هههههه انت راكب طيارة لاحظ..م جاي كداري من الأردن ..
اها عمي كيف عليك الله ؟؟
فندام : عمممك بقي نقناق ياخ ..وياهو قلته اخلي ليهو الاردن كلها واجي هنا عشان ارتاح وهو يرتاح شويه 
عمار : وحترجع أسبانيا متين ¿
فندام : البلد دي كشنتها ياخ . م نفعت معاي كلو كلو ..جريت الأردن قلت اقعد مع الحاج بس اخواني الصغار مزعجين ومرتو كل دقيقه بتحمر لي ..+نقتو الكتيرة 
قلت اجي هنا احسن دا لو.ما شفته لي عروض ..
عمار : العيشه هنا صعبه بس ..لكن احسن تغير جو لاني متأكد حتتم شهر وترجع تاني ههههه

فندام قام وبلبس نعالو ..: ماش الحمام انا..
عمار : بتعرف الوصف وله اقوم اقدمك
آشر ليهو بي يدو يعني اقعد اقعد م مشكله 
فندام ولدو لي عمو مبارك ..عايشين في الاردن من زمممان...وم بنزلو السودان طوالي..انا عن نفسي م حصل لاقيتهم..بسمع بيهم سمع بس
فندام شاب ف بداية الثلاثينات ...أقل حاجه ممكن نقولا ليهو انو وسيم..طويل وبنيتو رياضيه.. درس تمريض عالي ف االاردن ..بالرغم من انو في الجامعه بس كان بجيب لي ابوهو كم رطل مشاكل كل يوم ..يعني م قاعد يقصر نهائي
وحيد عن ابوهو.. وامو متوفيه من بدري ...عاش مع مرة ابوهو ووقت خلص جامعه مشي آسبانيا ومارس مهنة التمريض هناك ......
*

وقت مشي ع الحمام شافني واقعه ..جا جاري و رفعني ..خلعو منظر الدم عشان كده قعد ينادي : ي عماار !!! الحق ي عماار ! 

عمار جا طالع واتخلع من المنظر الشافو ...و جرا الشارع جاب ركشة **
غايتو وبما انو فندام دا ممرض..اسعفني و وقف النزيف لغاية وصلنا المستشفي .. الحمد لله ...الضربه جات خفيفه ع الراس و الدكتور قال ليهم آكلي ضعيف عشان كده فقدته الوعي ..
اخدته علاجاتي و
المساء خرجوني ..واحب ابشركم لا عمتي ولا بتها ولا عمي ولا حتي هدي مرت عمار ..ماف واحد فيهم جا يشوف الحصل لي شنو ولا كلف نفسو يتكلم معاي تلفون...
ف الركشه الولد قال لي : اها ي علا بقيتي كيف؟؟

قلت ليهو بصعوبه : بس انا م م م علا 

طبعآ استغرب..هنا عمار قال ليهو دي آثار بت المرحوم سعد ي فندام

فندام : عليك الله؟؟ و واصل : طيب ي آثار بقيتي كيف ؟؟ هو لكن انتي آثار وله إيثار؟؟؟ وبتقري ف سنه كم ؟؟؟
والوقعك شنو؟؟

اي سألني ديل كلهم ف زمن واحد وانا جاوبته ع اسألتو كلها ف نفس الزمن وم تسألوني كيف لاني م حأكلمكم ...

وقت وصلنا وجينا داخلين اول كلمة قالتها مرت عمي : امور الهنود العملتيها دي م بتنفع معاي ! والهدوم البليتيهم ف الغساله امشي واصلي غسيلهم ..
فندام : بس ي عمتي البت اسي طالعه من المستشفي !! علا وين؟؟؟

قالت ليهو ي ولدي انا عارفه شغلي كويس..بعدين تعال عندي معاك موضوع...
وساقتو ودخلو ف الهول ..وانا مشيت غرفتي طلعت عبايتي ورقدته حبه..راسي كان بنتح نتح...
بلعته مسكن واستكنته حبببه وقلت هي ي آثار..قومي غسلي غسيلك..

وقت مشيت محل الغسيل تفاجآته بالذي رآيته ..

حنعرف بس الصببببببر 
#صلو_علي_محمد

#ألف_باء_العذاب
-٥-
لقيت الولد الوداني بالركشه بشر ف الهدوم¡¡¡ 

غسلهم كلهم خمسه دقايق وشراهم¡¡ 
قلت ليهو لييي ¡¡ انا كنت حأغسلهم¡¡ 
قال لي انتي طالعه من المستشفي اسي ارتاحي ساي ..انا فندام ع فكرة ..ولد عمك مبارك
قلت ليهو اي سمعته مرت عمي وهي بتكلم علا عنك..
ابتسم ومشي...طبعآ اول مرة زول يعاملني كده ف البيت دا...
فرحتتتته شديد وقلت الدنيا لسع بي خيرها...بس ي ربي صحي الدنيا لسع بي خيرها¿¿¿¿ دا سؤال جوابو حتلقوهو قدام عند فنادم

*

تاني يوم مشيت المدرسه طوالي لانو لو قلت اقعد ف البيت عشان راسي مضروب م حأرتاح من شغل البيت ..
عده اليوم الدراسي عادي لغاية طلعنه نهاية البيوت..

كان توفيق واقف برة جمب المدرسة ومن وقت طلعته 
ناداني وجا علي ..قال لي بقيتي كيف؟؟؟
استغربته طبعآ عرف من وين ..وقبل م افتح خشمي حسيت في زول جراني من يدي وبمجرد م التفته حسيت بكف !!!

لقيتو دا عمي 💔 ..عيونو كانت محمرة من الغضب وقال لي : انا ادفع ليك ف القروش وانتي تجي تصيعي هنا !!! عاوزه توطي راسي صاح ي بت سعد !!

قبل م افتح خشمي اداني كف تاني ولزاني قدامو وقال لي توفيق : حسابك جاييك ورا انت كمان..

طول الطريق كان بضرب فيني وانا بس بقاوم بدموعي..الناس كلهم كانو واقفين وبنبزو فيني وفي اي بت ثانوي لأنو طريقة ضرب عمي لي خلتهم يظنو انو عمي قبضني في موقف مخل للأدب مع زول ..

وصلنه البيت ولزاني تحت كرعين مرتو عشان تديني نصيبي انا زاتي .قال ليها الحيوانه دي لقيتها واقفه مع ولد وم شفتي شكلهم عامل كيف! وطت راسي الله لا كسبها 

طبعآ هي زاتها استلمتني و وقعت فيني خبت 

عمار جا طالع من بيتو هو ومرتو وقت سمعو الجوطه...عمي قال ليهو علا قالت لي يومي في ولد بتقيف معاهو جمب المدرسه وبتونسو ..وقالت لي لو م مصدق تعال شوف وقت بنطلع من المدرسه..وفعلآ لقيتها واقفه معاو بأبشع منظر وتضحك زي الما عندها ولي !! 
لاحظو لزياده الكلام لاحظو!!! انتو شاهدين انو بس قال لي كيف بقيتي و ولا حتي لمسني بيدو للسلام !!! وانو انا قبل م ارد زاتو عمي جا مسكني شاهدين صاح !!! حسبي الله ونعم الوكيل 
عمار ولا كضب ورفع اقرب عصاية وضربني بيها هو كمان...لغاية فقدته الوعي وم حسيت بحاجه تاني

*****

لو كان دا ابوي الشافني صاح كان غضب مني لكن م كان فضحني ف الشارع كده وجاب لي كلام

ولو كان امي الرموني تحت رجولها كان حضنتني عليها وم خلت زول يقرب علي...لو اهلكم عايشين احمدو ربكم ع النعمه الانتو عايشين فيها ...

*

حسيت برشه مويه ف وشي...قمته مخلوعه ولقيت نفسي واقعه في حتتي ديك مااف زووول كلف نفسو يرفعني
مرت عمي قالت لي قوممي شدي الغدا حتنومي كده لي متين !!! 
قمته قعدته ف الأرض ودموعي جاريات..
قالت لي امشي غسلي العفن والقرف الانتي فيهو دا حتي اطبخي نحن م ناقصين تلوس..
ومشت خلتني
....

مشيت شلته لي غيار من هدومي واصلآ ملابس المدرسة كلها اتشرطت واتملت دم من آثر الضرب..سخنته مويه واستحميت بقطنه وصابون ديتول 
جسمي كلو كان مجرح وضلوعي كلها بتوجعني ..بكيت ف الحمام بأعلي حس..وقلت يارب شكوت امري ليك يارب

صليت الضهر والعصر سوا وطبخته ليهم الغدا ورجعته الغرفه
الغرفه القاعده فيها دي بالرغم من انها عبارة عن مخزن بس كانت آكتر مكان لماني وسمع آحزاني..ياما وقآني من شمس الهجير وياما وقآني من تجريح الكلمات ..

نومممته و ولا أكلته حاجه وماف زول كلف نفسو يجيب لي آكل 

الحمد لله حتي يبلغ الحمد منتهاه 

الصباح سمعته جوطة برة...كان عمي و ولدو الكبير عمار بتناقشو...

اتنصته جمب الباب وسمعته الكارثه