🏴 *ابـیـات ابوذیّـة*🏴
بمناسبة وفاة *السیّدة زینب الحوراء (ع)*
لخادم اهل البیت(ع) الشاعر
مَـرِد مُـقـدّم🏴
ـــــــــــــــــــــــــ
هَم تدري اشدَهن روحي شجنها
و شنهو الحَط سُگم بیّه شجنها
هَضم زینب، بچي زینب، شجنها
و یوم ابلا ولي راحت سبیّة
ــــــــــــــ
یحِگ دوم الهَضُم زینب بس اتهل
عیني و عین کل شیعی بس اتهل
یشهـر افراگهـا اعلینه بس اتهل
یحل بینه الحِزِن مِـن کل نویّة
ــــــــــــ
ونَس روحي البواچي ماتملها
کـل ساعه الـتُـمـرهـا ماتملها
علـه الـبـالـغـاضریّـه ماتملها
حِمه و عگب الخِدر راحت سبیّة
ــــــــــــ
دواهي مرّن ابزینب ولدها
یوم الشمـر شتّمـهـا ولدها
طلبتي مِن ابوصالح ولدها
یاخذ ثارها مِن آل اُمیّة
ــــــــــــــ
عزیزه امدلّـِلـه عاشت یهلهـا
و عنـد اخوانـها وایـد یهلهـا
تعالوا انشـیّـع الزینب یهلهـا
بالشام او نِواسیها ابعـزیّـة
ـــــــــــــ
زینب یا مـره صارت مثلـها
عله کل فـاگده یعـله مثلـها
یشیعي ابدمع لا تبخل مثلـها
اهلها اتجزّروا بـالغاضریّـة
🏴🏴🏴

*ردادیّـة جدیدة*🏴
بمناسبة استشهاد *الامام المظلوم موسی الکاظم(ع)*☀️
لِخادم اهل البیت(ع) الشاعر مَـرِد مُـقـدّم
ــــــــــــــــــــــــــــ
یا دمعي عَـالخـدّین
مِن دَم تِحَدّر
بالسم خِلص مسموم
چَبده و تِـوذّر
آه و الف ویـلاه
ما تنحمل فرگاه
موسی ابن جعفر
ــــــــــــــــــــ
یا دمعي عالخدّین مِن دَم تِجاره
وآنه استمِر ویّاک وابچي ابعَباره
والگلب خلّـه ایذوب لا تطفه ناره
راح امنِدینه ایمام یالـه الخِساره
یا وسفه غـالی السوم
موسی انچِتل مسموم
حگّـه الیرید ایلـوم
ودموعـه تجري ادموم
حگّـه الیرید اینوح
وابلیله یسهـر
ــــــــــــــــــــ
یا دمعي من دم سیل واجری وتلاله
وإعلن حـزن مفتـوح للهادی وآله
موسی انچِتَل مسمـوم بید الجهاله
اهل الدجل والزیف واهل الضلاله
ماحسّبوا بحساب
هذا البدر مِن غاب
گلب الرساله انصاب
و اللموا داحی الباب
وامنجله وجه الکون حالاً تغییر
ـــــــــــــــــــــــ
موسی انچِتَل مسموم یاله المُصیبه
بید ارذل المخلوگ والله عجیبه
ما حَصّل ابدنیاه بس هَم نَصیبه
گضّه العُمُر بسجون ظَلمه ورَهیبه
بالسِجِن ما رحموا
عـدوانه بس اذّوا
وبزاده سـم انطوا
واعله الجِسر خلّوا
واصبح لهـل بغداد
مولانـه منـظَـر
ـــــــــــــــــــــــ
فوگ الجِسر خلّـوا محّـد یشیله
ضنوت علی الکرار شیخ القبیله
واجـه ظلم بسجون مامِن مثیله
ظلمه النهار اعلیه ومساوی لیله
اهـل الغَدُر والجور
حجّبوا عـنّـه النور
واهما ابتَرف وقصور
یابوالرضا ماجور
مِن اسمـع ابّـلواک
گلبی ایتِفَـطّـر
ــــــــــــــــــــــ
بالسجن مِن خـلّوک وبقوّه عِمدوا
مقصدهُم ایذلّوک واشگدروا ادّوا
عانِـدوا یا مــولای لله و تِـحدّوا
ما طِعِت مِن شافوک عریانه ودّوا
مِن عرفَت ابتقواک
وانـذهلَت ابمعناک
گامت تصلّي اویاک
خیّـبِت ظَـن اعداک
وابهل عَمَـل حَیریت
کلمَن تِـجَـبّـر
ـــــــــــــــــــــــ
بالسجن مِت ابلیل یابـو المَحنّـه
بالسم تعانی الموت ونّـه اعله ونّـه
لا اهـل لا خِـلّان گاطـع الـظِـنّـه
عـالجسـر مِـن خَلّـوک محّد تِدنّـه
منعوا الناس اتشیل
جثمانـک ابتهلـیل
وابلطُـم وابتجلـیل
حگها الدموع اتسیل
ابـن النبی ابهالحال
منهـو ایتِصوّر
ــــــــــــــــــــــــ
بس اربعه الشیعوک وسفه وهضیمه
ما منها بالـتاریخ هـای الجریمه
قِصّتک یا مـولای کلفـه وعظیمه
ماتَم علیک ادهـور واجب نقیمه
ما تبـرَد النـه اگلوب
ندوي و نِـشِب وانذوب
نمحي ابـهواک اذنوب
وانئـــدّي کل مطلوب
یالتبگـــه یالـمهیوب
للأمّـه مصدر
ـــــــــــــــــــــــ
مصدر تظل واشعاع ما یطفه نوره
للمهدی تجري ابزود والـمَـد ظهوره
صورة فَخَر و ایثار یا احله صوره
وابگبرک الـنه امجـاد کل مانـزوره
نبگـه و نظل نهواک
یالـغالی مـاننـساک
دم وابعـقیده اویـاک
تسمعنه خلها اعـداک
واعدانه خلها اتشوف
مِـن یصفـه مَحشَـر
🏴🏴🏴

🏴 *ابیات ابـوذیّـة*
بمناسبة استشهاد *الامام موسی الکاظم(ع)*☀️
✍لِخادم اهل البیت(ع) الشاعر مَـرِد مُـقـدّم
ـــــــــــــــــــــــــ
ابن جعفر بني العباس وردوه
ابسجن مظلم و سم چتّال وردوه
ما راعوا گرابـه و دین وردوه
المنیّـه و خاصِموا رب البریّه
ــــــــــــ
بني العباس یُفضَحهم دروا بي
حقدهُم ضد ابن جعفر دروا بي
مِن سِجن السِجن مِظلم دروا بي
و اخیراً شـرّبـوا کاس‌ المنیّه
ـــــــــــ
الکِتل موسی سفیه و زاد یهلـه
خلّـه الدین دمع الـعیـن یهله
تعالوا شـیّـعوا المظلوم یهله
غریب و یا کُبر هاي الرزیّه
ــــــــــــــ
نوِن وعلـیک دمـعـتنـه نَهلها
ابشجه واجسامنه امصابک نهلها
حیاتـک حِسَب چتّالک نهلها
انتها و ظلّت حیاتک سرمدیّه
ــــــــــــــــــ
یشیعه موسی ابن جعفر ودوله
منّه اهـتز عـرش حاکم ودوله
خلیعه عَـمـداً ابسجنه ودوله
هداها و تابت الرب البریّه
ــــــــــــــــــ
سجّانک ابصبرک حیّـریته
واِنه همّک یغالي حیّریته
عسى السمّک یموسی حیّریته
ابجهنم للابد ناره سریّه
ـــــــــــــــ
الموسی الدمع مالومه من اهله
جـسمه السجن یا ویلی من اهله
مـا واحد حـضر یمّه من اهله
بالسم یـوم وافته المنیّه
ـــــــــــ
بني العباس راس الفتن شالوا
و سهم احقـادهُم بالگلب شالوا
مثل موسی السنادي ابلیل شالوا
وعله ایدیهم شرب کاس المنیّه
ــــــــــ
بني العباس بس فتنه عملهُم
واکبـر جـور بالـدنیه عملهُم
عن درب العدل الله عملهُم
کتلوا چم ولي فوگ الوطیّه
ـــــــــــــ
عـلیّه ابـحِزن هـالدنیه قضاها
وگلبي الموسی ابن جعفر قضاها
حیاته بالـسجن نصهـا قضاها
و بید السِنِد وافتّه المنیّة
ـــــــــــــ
یهل شایل نعش موسی تونّه
خل روحی ابشجه ونها تونّه
الــه کلـمــا نِـحِط ماتـم تونّه
لـئـنّـه اتلوگله الونّه الشجیّه
🏴🏴🏴

🏴 *قصیدة رثائیة*🏴
بمناسبة استشهاد *الامام موسی الکاظم(ع)*☀️
✍للشاعر مَـرِد مُـقـدّم
ـــــــــــــــــــــــــــ
یِحِگ لگضي العمر بدموع وآهات
عله الّي ابسجن ابن شاهک گضه و مات
ـــــــــــــــ
عله الّي ابسجن ابن شاهک گضه السّوم
امگیّد بالسلاسل حیل مظلوم
مات ابلا ذنب بالزاد مسموم
وحده ابلا اهل یجذب الحسرات
ـــــــــــــــــــــــــــ
ما واحد من اهله حضر یمّه
یساعد حالتـه ویزیل همّه
عسى انشلّت یمنته الجِسَر سَمّه
جریمه وتنّسي الهارون هیهات
‌ــــــــــــــــــــــ
مصیبه و داهیه ما من مثلها
عسی بالحامیه کلمن عِملها
غیّب موسی ابن سیّد رُسلها
سد باب الگضه للخلگ حاجات
ــــــــــــــــــ
هضیمه مات ابن جعفر هضیمه
بني العباس سوّوا هالجریمه
ماصارت مثل هـاي الظلیمه
إلٍمْحَتّم جره و سهم الغَدُر فات
ـــــــــــــــــــــــــــ
هـارون العمل هاي الجهاله
ابسهم الغَدُر طگ گلب الرساله
عاده المصطفی و رب الجلاله
والشیعه ابحزن ذبها و معانات
ـــــــــــــــــــ
للمحشر تظل تلطم الشیعه
کلها ابسبب هالعمله الشنیعه
علـه الکاظم بیابینه نجیعه
وامنلأجرموا نطلب الثارات
ـــــــــــــــــــــــــــ
ثــار ایمامنه الکاظم نریده
بعیده انسامح و ننسه بعیده
انگص ایده السعه و نگطع وریده
ابسیف ابنه الیشد للمجد رایات
ــــــــــــــــ
ماننسه السجن والبالسجن راح
ابن جعفر غِده و ذاک العَلَم طاح
نبگاله ابحزن کل مسه و مصباح
بعیونِن تِهِل وگلوب وَلهات
ـــــــــــــــ
مات ایمامنه ابسجن المُعادي
وبلا ناس شَیعتّه السنادي
هَز العرش مِن ناده المُنادي
واظلم الفضا و بانن علامات
ــــــــــــــــــــ
هبّت عاصفه و عم السمه ارماد
واظلم الفضا و غَـبّـرت بغداد
ابن جعفر گضه مسموم بالزاد
وبهذا الفعِل سبّبوا مئسات
🏴🏴🏴🏴

*ردادیّـة*
🌹🌸🌹🌸
بمناسبة میلاد *سید شباب اهل الجنه الامام الحسین(ع)☀*
للشاعر مَـرِد مُـقـدّم
ـــــــــــــــــــــــــــ
یحسین یحسین یـبن عَقدِ الوِلَه
میلادک اعیاد هله و کل الهَله
بسمک هتفنه
وعیّد سلفنه
یا حید الحیود یراعي المرجله
ـــــــــــــــ
یحسین یحسین یبن حامي الحِـمه
میلادک ابنور سطع برض وسمه
واجبنه هالیوم نـهنّي فاطمه
وابفرحة العید هوانه انوسّمه
بیک انفتنّه
یا احله جنّه
یالبسمک الکون یبو الیمّه حِله
ــــــــــــــ
یالبسمک الکون یبو الیمّه زهـر
یا نور الافلاک یبن فارس مضر
یا ثالث ایمام یبن سید البشر
میلادک اعیاد یظل طول الدَهر
نور و سعاده
وافضل عباده
و بکل وفه وشوگ یجي و نستقبِله
ـــــــــــــــــــ
میلادک اعیاد یمرنه ابکل سَنه
ونجدده ابشوگ وحاسیس اوهَنه
واباجمل اورود بلدنه انزیّنه
وانعوف الهموم علینه المُزمِنه
وانذب حِـزِنّـه
بالفرحه کلنـه
واسمک بالزهور یغالي انکلّـِله
ـــــــــــــــ
میلادک اعیاد یظل طول الزَمَن
واربوعک امجاد یبو الیمّه زهَن
خَل تِسهر اعیون ولا تقبل وَسَن
والمایشوفک عسه اعیونه عِمَن
بسمک یمحبوب
نوّرت الِـدروب
یالجسّدِت بیک ملاحم کربله
ــــــــــــــــ
یومک یظل یوم یبو الیمّه شرَف
یالبسمک الدین تِـثَـبّت وانعرَف
یالدمّک اصروح لجل دینک نِزَف
یالکلشي ضحّیت لجل غایه وهدف
وبأیدک انته
مجدک کتبته
وابلهفه واخلاص طِعِت رب العُلـه
ـــــــــــــــــ
ما مثلک ایصیر یثار الله بَـعَـد
للزهره مولود اَجل واجمل وَلَـد
یا سر الاسرار یصادق بـالـوَعَـد
یالبیده جبریل یهز لیک الـمَـهَد
ابنور الجلاله
وجهک تـلاله
وانته الحَمِد بیک تِکمّل وانتله
ــــــــــــــــ
انته الحَمِد بیک تـرتّل وابتهل
یا رمز الاحرار یبن خیر العَمِل
گلب الیحبّک فلا مَـسّه وَجل
هاللیله بدرک سطع نوره وکِمِل
بدرک یغالي
ضوّه اللیالي
وشما رِکَم غـیم تگشّع وانجله
🌹🌸🌹🌸
ــــــــــــــــــ

🌹 *ابـیـات ابـوذیّـة*🌹
ـــــــــــــــــــــــ
بمناسبة میلاد سیّدی ومولای *عـلـى الاکـبــر (ع)🌙*
اشبه الناس بجدّهِ رسول الله (ص)🌙
🌸🌹🌸🌹
للـشاعر مَـرِد مُـقـدّم
ــــــــــــــــــــــــ
گمر والنجم من یسری یلـیـلـه
ظلام الـلیل لو لالـه یلـیـلـه
تـهانی ابـمولد الاکـبر یلـیـلـه
الچ والـجدِّتـه الزهرا الزچیّـه
ـــــــــــــ
گـمر والنجم من یسری تـلالـه
عـلـه الصوبـین بـنواره ‌تـلالـه
الاکـبر وِرِد والـحَـبّـه تـلالـه
شِبـه المصطفی سید الـبریّـه
ــــــــــــ
اشموس الکون والعالم عله اهلـه
الناس انزول بس اهما عله اهلـه
الاکـبر کـل مـعـانـیّـه عله اهلـه
کرم ، جود او وفه وغیره وحمیّه
ـــــــــــــ
ابفرح مزهِـر اهلاله هل هلیلـه
علینه و نِشم صرنـه هل هلیلـه
انـولد هاللـیلـه الاکبر هل هلیلـه
یلـیلـه و بـشّری عمتـه الزچیّه
ـــــــــــــ
اللیله ابهنه العِـتره شارک الـهـا
وابـهای الـمـحافـل شارک الـهـا
اللیله اشلون لیلـه شارک الـهـا
الاکبر صار بیها و سطع ضیّـه
ــــــــــــــ
رب الـعَـرش هاللـیلـه وحـلـهـا
مثلـها ما تِصِح لـیلـه‌ ‌وحـلـهـا
فـتح بـیـبان جـنّـاتـه وحـلـهـا
لِـلَـکـبـر والـیحـبّونـه هـدیّـه
ـــــــــــــ
فـرحـنه المولـد الاکبـر نـحیلـه
وابکل شوگ مِن یجبل نـحیلـه
الـلـیلـه للـصبح واجب نـحیلـه
ابشعر وشموع وبهوسه وتحیّه
ـــــــــــــ
هالیوم الـیحب حسین بـیـسار
شربت بالیمین او شَـمِع بـیـسار
علی الاکبر بزغ والگلب بـیـسار
مِثِـل بدر التمام الـیِشِـع ضیّـه
ـــــــــــــ
مِن مولد علی ابن حسین شبهـا
مـشاعِـل لـیـل للـضِلـلال شبهـا
شَـبَـه جدّه النبی المختار شبهـا
کرم واخلاق وایمان وحمیّـه
ــــــــــــ
علی الأکبـر فَخَر نـالـه ولالـه
مَـثِـیل او ینسِـعِد یَللی ولالـه
فرحنه مِن بِـده اهلاله ولالـه
انولد وابمولِـده سَر البـریّـه
ــــــــــــ
علی الاکبر عله الماضین عـدّه
مِثِل عمّه الحسن بالجود عـدّه
حـاتـم بـالکرم سـمسـار ‌عـدّه
علـه راس الرُمح ناره سریّـه
ــــــــــــ
الاکبر بالـفِـعِـل مِن وصل حـدّه
سـیفـه ابرگـبَت الـعِدوان حـدّه
َسَـر عَمـته العقـیله ابیوم حـدّه
عله جیـوش الکفر بالـغاضریّـه
ـــــــــــــــــــــــ
🌹🌸🌹🌸

*🌸هـوسـات🌸*
بمناسبة میلاد *سیدي و مولاي علي الاکبر(ع)🌙*
لِخادم اهل البیت(ع) الشاعر مَـرِد مُـقـدّم
ـــــــــــــــــــــ
میلادک یالاکبر ما مثیله ایصیر
یا سِر الخفي الیحتاجله تفسیر
ما نِجبُـر وفاک اشما نِـرید انصیر
للدین اوجودک ضَحّـِيته
ـــــــــ
میلادک فرح واسرور میلادک یالمچَنّه
حَگنه الیوم نفرح بیک وابمولدک نتهَنّه
لفراحک نِـعِـد ساعات والهالیوم نتمَنّه
میلادک شیوصّف عیده
ـــــــ
عیدک فرح عیدک خیر عیدک هَنَه و عیدک نور
عیدک معرفه وآیات و آمال و قیم واسرور
وامحَلّه ابشِعِر وابیاس وابحِنّه و شمع وازهور
واجبنه ابعیدک نتباها
ــــــــــ
عید میلادک یالاکبر عید ما یوجد مثیله
یا سِعِد حظّه الیشهده و یشهد افراحه الجمیله
اللیله نتمنّه الحفلنه لیله مزیونه و طویله
واعباده ابحبّک نگضیها
ـــــــــــ
قایَست ما بین حِسنک یا علي و حِسن الگُمر
شفت حِسن الگُمر عادي و بي تغـیّـُر بالصور
حِسنک اشما جو تِـغـیّـَر ثابت ابطول الـدهر
للمحشر ما ینگص نوره
ــــــــ
قایَست ما بین حِسنک یا علي و حِسن الشمـس
شفت حِسن الشمس مِنّک یبن حیدر یقـتِـبِس
انته مِن عندک تعَلّم کِل شَـهِـم غایه و درس
وابیوم الطَف یومَک هیبه
ــــــــ
تـهـنِـئه الثالث الیمّه اندِزها مزیونه ابوَرِدها
ابعید میلاد ابنه الَاکبر فارس الحومه ومجدها
وایضاً انهَـنّي العقیله والأخص لیله ابوَلَدها
وانهَـنّي الکوثر والهادی
ــــــــــ
ضحّیت ابوجودک وابدِمه الشریان
مِن اجل العَـقیده ابحومة المیدان
ابمیلادک اللیله کِل مُـحِب فرحان
یتفاخَر بسمَک کِل شیعی
🌸🌹🌸🌹

🌹 *ردادیَّـــة🌹*
بمناسبة میلاد سیّدي و مولاي
*عـلـي الاکـبـر(ع)🌙*
✍للشاعر مَـرِد مُـقـدّم
🌸🌹🌸🌹
ـــــــــــــــــــــ
عطر والجو تَـعـطّر
بدر وابنوره نـوّر
هـله ابمیلاد الأکبر
ـــــــــــ
عُطر واتَعطّرت بي کل مَحلّه
بـدر واللیل بنواره تِجلّه
اعله امنالنَجِم مزهِـر تَعلّه
حلو والکون مِن عنده تَحلّه
عطر ما مثله وابها
بـدر ما من یشبها
زها الدنیا و عِـجبها
عله امثالـه تصدّر
هله ابمیلاد الأکبر
ـــــــــ
عُطر واتعطّرت مِـنّـه البرایه
بـدر ما شوف لوصافه نـهایه
لجلـه امـعیّده الیوم الـولایه
واحنه ابکل فرح شلنه روایه
وامعیدین صرنه
واملبّس نثـرنه
یستاهل سهرنه
ما مثله انتِصوّر
هله ابمیلاد الأکبر
ــــــــــ
میلادک صُبَح جنّـه و سعاده
حگنه انهیم بفراحه و وداده
وابکل شوگ بنشاده انتِماده
چنّـه ایّام نتنطّـــر مَعاده
فـرح مِـن هَـل علینه
غطه اگلوب الحزینه
مِلـه اعیون المدینه
نبع صافـي و تِفَجّر
هله ابمیلاد الاکبر
ــــــــــ
یا نبع الوفه و نبع المَحنّه
بیک ابن الوصي ما خاب ظَنّه
ذاک الـیوم ویّــاک انتِمنّه
یالضحّیت بوجودک لجلنه
حتّی انظلّک انصار
وانظل مثلک احرار
یالمیلادک انـوار
وایظل النه مشعَر
هله ابمیلاد الأکبر
ــــــــــ
میلادک یالاکبر مـا مثیله
و وصافک یالمنَتَّب جمیله
یا جِرناس یا شیخ القبیله
حگها الیوم تفرح بیک لیله
هِده الباري و نطاها
بدر یضوي ابسِماها
مِن حـگها اتّـِبـاها
و حگها الیوم تستر
هله ابمیلاد الاکبر
ــــــــــ
فرحة عید میلادک واماني
یالبیک انطُوت کِل المعاني
بیک احتار توصیفي و بیاني
للزهرا و علي انزف التهاني
والعـودَک یَمهیوب
یا ساکن بالگلـوب
مقامک والله محبوب
کِل مـاگول واکثر
هله ابمیلاد الأکبر
ـــــــــ
وانهَنّي النبي ابهـاي الولاده
وانقیم الصَلى و نجري العباده
جَـنّه و حور بیها النه استِفاده
محتفلین عُـوّام و یَساده
بالحُب جینه کلنه
ناسین الحِــزِنّه
هـاوین انتَهَـنّه
وابهذا احنه نفخَر
هله ابمیلاد الأکبر
🌸🌹🌸🌹

*قـصیـدة*🏴
بمناسبة وفاة *السیّدة الطاهرة خدیجة الـکبـری علیها لسلام*
لِخادم اهل البیت(ع) الشاعر مرد مقدم
🏴🏴🏴
حَزینه الیوم کل قریه و مدینة
و اُم الحسن مفجوعه و حَزینة
ــــــــــ
هالیوم الحِـزِن عَم البریّه
و اُم الحسن دمعتها جِریّه
خدیجه الیوم وافتها المنیّه
واعله افراگها محزِن نبینه
ــــــــــ
تهمِل دمعَـة اعیونه ابجفاها
وابکل اَلم وابکل هَم نعاها
یذکر طیبها او حُبها او وفاها
وابکل دعوِته چانت مُـعینه
ـــــــــ
شعَـدّد مِن مواقفها الجلیله
بذلَت للنبی اموال الجزیله
ابدن جودها ما مِن مِثیله
تستاهل مَآتمنه او بچینه
ـــــــــ
وگفت مؤمِنه ویّه الرساله
بخلاص او وفه الرب الجلاله
ننسه الشِعِب واهواله مُحاله
وابضیمه الِّذی چانت رَهینه
ــــــــــ
اوّل مُسلِمه تنعَـد بالحساب
اوتآمِن بالنبی والرب والکتاب
اصیله والنَسَب مِن خیر الانساب
مبادی عالیه عِدها او رَصینه
ــــــــ
وحده امنَربعة الباري جعلها
بتها او آسیا او مریم مثلها
مثلهن منزلـه بالفضل الـهـا
او یوم الدین وزنتها رَزینه
ــــــــ
نصرت دینها او نصرت نبیها
او بِذلت کلشی العِدها بدیها
ما نّلام مِـن نبـچی علیها
والها انجود کل ما صح بدینه
ــــــــــ
والتاریخ شوفوا اشکتب عَنها
جبرائیل جاب الها چفنها
وابوالزهرا النبی یوم الدفنها
علیها بُردِته مَدها ابیمینه
ــــــــــ
بیده بُردِته اعلیها نشرها
والها اندعا ابکل لهفه او شکرها
حَـتّـه الگبر لایبدي ابعصرها
او رَسم افراگها بان ابجَبینه
ـــــــــــ
اثّر بالرسول امصابها او بان
واغیاب ابوطالب عالي الشان
سمَّه العام هذا ابعام الاحزان
والهُم زادَت اشواگه او حنینه
ـــــــــــ
نجود الها ابلطُم وابنوح وادموع
وابلوعه او اسه وابصوت مسموع
هالیوم النبی والدین مفجوع
والها ایلوگ مِن یکثر نَعینه
ــــــــــ
بالهم فاطمه ظلّت بعدها
حسره اتجر بَـثر حسره وحَدها
گد الکون والعالم کَـمَدها
گلبها ایزلزل اجبال ابسِحینه
ــــــــــ
تدیر العین ما تِلگه التِحِبها
عَنها الموت یا ولی حِجبها
یوم اخلافها مالَـذ شِرِبها
مِن فُگدت حَنان اُمها او مَعینه
ـــــــــــ
اُمها الچانت الها افیای بالبیت
فُگدتها او علیها اتعـود یاریت
بس هیهات یحیه او یرجع المیت
مُحال المات یستحیي او یجینه
🏴🏴🏴🏴

*ابـیات ابوذیّـة*🏴
ــــــــــــــــ
بمناسبة وفاة *السیّدة الطاهرة اُم المؤمنین خدیجة الـکبـری* علیها السلام
لِخادم اهل البیت(ع) الشاعر مرد مقدم
ــــــــــــــــــــ
خدیجه اشگد تعَب شافت وعانت
وَکتها ابـزَجُـر لاواها وعانت
وگفت، جاهِدت، واست، وعانت
فِدت کلشی ابسبیل الله ونبیّة
ــــــــ
خدیجه افعالها الطیبه کفنها
الباری ابسُندُس الجنّه کفنها
فَضلها ایحیّر العالـم کفنها
بتها الطاهره الزهرا الزچیّة
ــــــــــ
خدیجه یا مره صارت مثلها
مَلومن لو دِمه دمعی مثلها
عظیم ابشِعب ابوطالب مثلها
شِرَت بموالها الجنّه الزهیّة
ـــــــــــ
دمعتي ابکل حِزن هَلّت وجارت
عله الواست رسول الله وجارت
قریش اتحالفت ضدّه وجارت
واهیا ابکل فخر وگفت تِچیّة
ــــــــــــ
خدیجه ابیوم ماتت هل علیها
النبي ادموعه او غِدتله هل علیها
اتراب اللِـحِـد بیده هل علیها
او گلها ابموتِّچ تَـم خَلل بیّة
🏴🏴🏴🏴

*ابـیـات ابـوذیّـة*
🌹🌸🌹🌸
بمناسبة میلاد *سیّد شباب اهل الجنّـة الامام الحسن المجتبی(ع)*🌙
لِخادم اهل البیت(ع) الشاعر مرد مقدم
ــــــــــــ
اللیالي بَهجة انواره حسنها
والله ابمولده الزاچي حسنها
الدنیه زَهت منیاها حسنها
تبدّد کل حزِن مِن سطع ضیّه
ــــــــ
عِفنه اللامنه ابحُبّه وشانه
جِزع ما نِفع یوم اللي وشانه
الحسن ربّه رفع قدره وشانه
امام او مقتدی الکل البریّه
ـــــــــ
خَبر میلادک البي فخَر منشاع
لبس ثوب الفرح وانشِرح منشاع
ضوه نورک عله الصوبین منشاع
یبومحمّد یبن سید البریّه
ــــــــــ
اللیله کِل معاني الفرح حلّن
الحسن مولود وابکل ‌بیت حلّن
عَدَن والخُلُد والفردوس حلّن
کل بیبانهِن و اَدّن تحیّه
ــــــــــ
دونک وي هَلَک والیان مختار
وَلى او عندک ولایة عَهَد مختار
جدّک وصّفه المعبود مختار
وابوک امنالعَرش عنده وصیّه
ــــــــــ
الحسن یحمِل وفه او رقّه وجوده
رحمه او‌ خیر للعالم وجوده
مِثِل زود العَرِم فضله وجوده
تجي المخلوگ اِله مِن کل نویّه
ـــــــــ
الهوی ابشوگ الحسن حُبّه یجنّه
فخَر نجل الوصي اخباره یجنّه
استرّي او عیّدي اللیله یجنّه
انولد للیجعَل انوارچ زهیّه
🌹🌸🌹🌸

*هوسات*
🌸🌹🌸🌹
بمناسبة میلاد سیّد شباب اهل الجنّة *الامام الحسن المجتبی(ع)*🌙
للشاعر مرد مقدم
ــــــــــــــــ
اهلال هَل واشرگ علینه او نوّر ابشهر الصیام
حَـیّر الناس ابجبینه الأضوه مِن بدر التمام
یا هَله ابضنوة نبینه المجتبی الحید الامام
شع بدره او نوره
واضوه المعموره
والکل مسروره
وانهنّي الزهرا ابمیلاده
ـــــــــــ
هللیله انولد مولود بس الله ایعرف قَدره
ضوّه او نوّر الأکوان یوم اللي انبزغ بدره
مبروک العلي الکرّار واُمّه الطاهره الزهرا
والجَدّه الهادی
هَل نور البادی
کل احنه انّادی
للناس انته ایمام الثانی
ـــــــــــ
انته ثانی ایمام النه او تنحِسِب ثالث خلیفه
وانته ابن عروة الوثقه او بیرق العصمه الشریفه
انحِبّک، انمدحَک، انریدک، سیّدي هاذي وظیفه
یا ضنوة طاها
بسمک نتباها
شخصک مِن یاها
دنیانه استرّت هللیله
ـــــــــــ
یالحسن مولِدک فرحه او للبشَر اکبر سعاده
والیِحِبّک یبومحمّد حَصّل ابهاي استفاده
یا وَصي المرتضی الخصّک ربّک ایمام العباده
ییمام الثاني
حُبّک عنواني
یسري ابوجداني
ماعوفک لو کلشي انطوني
ــــــــــــ
ابخام وابزاد العَواید تِکرِم اشیوخ السَلف
وانته جودک یبومحمّد بحَر یِشطر مانشف
انته دُر مکنون انته اشلون ابدلَک بالخَزف
حُبّک ماعوفه
ماهاب اسیوفه
جودک شیروفه
طوفانک غرّگ کل عالي
ــــــــــ
سطع میلادک علینه او عِفنه هللیله الوسَن
للصبح نحتِفل کلنه او ما یدانینه الوَهَن
خصّک الباري ابأمامه والها سمّاک الحسن
نورک هللیله
کل حي یضویله
والضیم ایزیله
والمهدي امعیّد ویّانه
ــــــــــ
عیّد المهدي او تباها ابمولدک یبن الرسول
واحنه هم مثله ابتهجنه او هَله ابمیلادک نِگول
الف مبروک العلیِنه او فاطمه الزهرا البتول
شربت فضّینه
وازهور انطینه
وابحُب نادینه
والساده اتهوّسه فرحانه
ـــــــــــ
فرحوا الساده او تباهوا جَدهُم اللیله انولد
فرحي یا دنیه او تباهي او غنّي یا طیر السَعَد
بِزغ فرقد للولایه او سطع نوره ابکل بلد
عالي ابتمجیده
عیّدنه ابعیده
کل احنه انریده
حُبّه ایضل ثابت للتالي
ـــــــــــ
هللیله انولد مولود بس الله ایعَرف شانه
ذاک المجتبی المهیوب جود او کـرَم عنوانه
حَگها ابمولِده امنتصیر جِن او اِنِس فرحانه
تاج اعله الهامه
نستر بیّامه
وانشیل اَعلامه
واسمه ایضل ربّاط الهوسه
ــــــــــــ
بِسمه تتنومس الهوسه او بس اِله ایلوگ الحچي
او شاعره ابصدر المضایف حَگّه یعله او ینتِچي
الشیعي فرحه اللیله سهمه او حَرّم انواع البچي
مِن شاف اهلاله
محفل خلاله
مقبوله اعماله
حُب حیدر شابش بصیامه
ـــــــــــ
بسمه تتنومس الهوسه او بس اِله ایلوگ الکلام
او شاعره ابصدر المضایف ینتچی او یاخِذ وسام
ابمولِده انسعدت الدنیه او یفتخر شهر الصیام
مِن هَل هللیله
کل حي یزهیله
واحنه انحییله
خَل یشهَد میدان الهوسه
🌹🌸🌹🌸