..تزوجيه مجنونا 
عشان لما تقولي ليهو يلا نجري ف الشارع
يقول ليك 1،2،3
ارح نشوف منو حيسبق التاني ❤
عشان يرقص معاك حفيان ف المطر ،
عشان حلتك لما تتحرق يقنعك انو الحلة بتغير منك ، اي والله وانتي كهبلة حتصدقي ♥
عشان لما تصحيهو الساعة 3 صباحا وتقولي ليهو م جاييني نوم يحكي ليك عن طفولتو المشردة وانو امو خبتتو خبت لأنو كان بيخبت اخوانو ،
عشان لما تنسي تكوي القميص ي السجمانة
يحلف ليك الليلة بطلع مكرفس ومعولق
وخلي الناس تضحك فيني 
عشان لما يلقاك بتبكي مع مسلسل زي الميت ليك زول م يقطع فيك كف ويحنسك ♥
عشان يسوقك تفطرو ف الشارع مع الشفع السمحين ديلك 
عشان لما تمشو شارع النيل تشربو قهوة يقول ليك بلا كراسي ارح نقعد ف الارض 
تزوجيه مجنووووون ؛
عشان لما تحكي ليهو تفاصيل يومك التعيس يكون بكامل الانتباه والانسجام مع انو محور نقاشك ممكن يكون كديسة عادي 
عشان يتعاور ويتهابل معاك قدام الناس
وم يكون شايف انو دي هبالة ويقول ليك حريقة في اااي زول خليهم يعاينو م عندنا ليهم شي
عشان يحرجك قدام صحباتك ويتغزل فيك ويقول ليك بحبك ي هبلة وم تعرفي محل تقبلي ♥
عشان لما تعملي فيها زعلانة منو يجيب كباية موية باردة ويكشحها ف راسك ويفهمك حاجة ،
وعشان لما يزعل منك
يشيلك يرميك ف الحوش ويقفل منك الباب ويقول ليك غني لي وقولي بحبك كتير حنسيني يلا
ولا تبيتي برة براك ويقعد يكاوي فيك بالشباك وهو خالف رجل ع رجل ♥
عشان يسوقك الكبري ويقول ليك ارح نكورك وتقعدو تكوركو لحد م تترفعو 
اي عدو الليلة ف القسم عادي يعني الموضوع م خطير 
عشان لما يلقاك بتتكلمي مع امك
يقلع منك التلفون يقول ليها عندكم بت عندي ؟ راحت جواي م تفتشوها تاني يلا سلام ♥
عشان اولادكم لما يجو يحنسوكم كل يوم عشان تحكو ليهم عنكم وم توقفو كلام عايزين يسمعو جنكم بس ❤
عشان وعشان وعشان حاجات كتيرة م بتنتهي وعشان الحياة عايزة جن
عايزة قلب مجنون يعمل حاجاتو من غير م يفكر فيها ولا ف عواقبها زي م تجي كدا بس
الجن سمح 
والجنون ولا مال قارون اي 
ف شنو ي عزيزي ي ابو بناتي كن شنو
كن مجنونا للدين عقل م دايرة معاك انا وريتك من هسي !
ولسة م قلت شي عن الجن الجد
ف ارح نكون مجانين بس ❤
وعايني ي السمحة العاقل داك ابو برستيج وبدلة عند كل طلعة العايزك تكوني معاهو ديكور لمناسباتو الرسمية خلللللللي لي امو
شنو خلللي عند امو قاعد
وخليك مع الأصلي
.
.مجنوووووون ي رب مجنوووون ي الله ❤️😘
#منقول_بحب 💕
يا الله زيو😂😂😂🙌🙌🙌💕💕💕

#سبوحه

انتو عارفين !

امبارح جات زعلتني ، ومشيت راضيتها
الليـله جيت زعلتهـا ، ومشيت راضيتها

الله خلقني أقوى #منها ..!

ماا علشان أجي اذيها واستغلهااا

لاا علشان أمشي احميها واسندهااا 💗

#منقول_بحب

#Mâńôśhá

قال موقف حصل معاهو قبال 21 سنه مع مرتو ..ولحدي الليله لما تجي تنوم ..بعاين فيها وببتسم ..وكانو اول مره اشوفا ♥🍂👌🏻
.
.بحكي:
لما لاقيتا ...كانت صدفه ... اتعرفنا علي بعض .. شويه شويه اتعلقنا ببعض. حبينا بعض ... بس ظروفي ما كانت بتسمح انو نتزوج ...ونستمر مع بعض💔💔
قالت لي بس تعال اتقدم ...وتاني الله بفرجا ..وانا بقدر اعيش معاك ان شاء الله في راكوبه ...ما دام معاك بشوفا جنه بسس اكون جنبك ومعاك انت💕🍂
.
.مشيت اتقدمت ....ووريت ابوها بالحاصل كلو ...انو ظروفي ..تعبانه .. وما عندي حق الاكل 💕💔💔
.
ابوها كان وضعو كويس شديد
بس عمري ما فكرت في قروش ابوها♥
المهم ..لقيت شغل. في الخرطوم واصلا انا من الريف ...فبقيت بحاول ...استثمر وقتي بافضل طريقه والم قروش عشان نتزوج🥀🌷
لميت لي قريشات .... وعملنا عرس ابسط من بسيط ...حاجه كدا رمزيه بس لا تكاليف. .. لا حفله لا صاله لا حاجات ذي دي
الناس اكلت ..ونحن مشينا بيتنا الانا اجرتو♥^
وكلو اوضه واحده معاها مطبخ وحمام ..علي قدر حالنا♥
الفرحه الشفتها في عيونا يوم عرسنا كانت كفيله بانو تحفزني انا اشتغل عمري الجاي كلو عشان البت دي ما تشوف معاي حزن💕🍂🥀
.
مرت الايام.... والشهور عدت
وبقت الظروف تجينا ظرف ورا ظرف وهي ثابته معاي ما كلت ولا ملت ...
وبقيت شغال ياداب بجازف حق العيش والفول ...البناكلو وبنوم ..ونصحي الصباح في نفس البرنامج♥
..
.يووم ابوها عزمنا عشاء ...ومشينا ليهم ..اخوات مرتي رجالهم كلهم مرطبين وامورم مظبطه ..
وجابو العشا لحوم وجداد واكل ما طاب من النعم ....
وفي نص الاكل في صحن فول
ومرتي بس بتاكل في الفول وما بتهبش حاجه تانيه
لما سالتها امها مالك يا بت شوفي اللحمه دي جيبناها عشان منو نحن! !!
قالت ليها والله يا امي انا شبعانه لحوم لدرجه ما صدقت لقيت صحن فول. ..وراجلي ما بحب الفول عششان كدا
❤💕🥀
ونحن بنجازف حق الفته مجازفه
بقيت ببلع في اللقمه ومابيه تنزل ....
مابيه تنزل لانو انا معاي زوجه ذي دي ووانا ما قادر اقدم ليها حاجه 💔💔
واجهنا الظروف سوا ...اتنازلت لي عن الف حاجه والف واجب مفترض اقدمو ليها ....وقفت معاي وسندتني
بقت هي ملجئ من الدنيا والظروف الكعبه ..💕🥀
الله هون لقيت شغل برا
وربنا فتحا علينا ...والليله راكب اخر موديل ...وساكنين افخمم سكن ...واولادنا في ارقي المدارس
.
.
وكل ليله لما نجي ننوم بتذكرني بالماضي ...وبنضحك لمن نحس بالانجاز ...وانو لسه قادرين نحب بعض بنفس الشغف ...💕🥀
.
وفي كل يوم بقول ليها ..والله مستعد اواجه نفس الظروف دي مليون مره ...بس انتي تكوني جنبي♥
.
.نصيحتي لما تحاول ترتبط
ارتبط بروح ..قبل ارتباطك بجسد ...💖
🖤
#منقول_بحب ♥

قالت ليو :

عارف المشكله ما فيك أنت كدا كدا كُنت حتمشي بس أنا ، أنا أتعلقت بوجودك. 😭💔

#منقول_بحب

ا لي ؛؛ لمن استلمتا الشهادة و جايه راجعه اسمع زول بي المكرفون بقول ف اسمي و انا اتلفت قال لي قدامك ي الطيره❤ الناس الفي المدرج كلهم قعدوا يضحكوا قال لي سامعاني😂 بقيت اعلي صوتي قلتا ليهو انت العالم كلو سامعك ي قونه 😆 قال لي صبرك بس يلا انا دايرا اقول ليك انا الليله مشيت الصياغ جبتا دبلتين وحدة ليك وحدة لي لو حقتك طلعت صغيره م مشكله شيلي حقتي اصلا عارف يدك يد راجل😂 و انا دايرك ع سنه الله و رسولو قدام الله و اهلي و اهلك و الاساتذه عشان بعد التخريج دا هم م بيقدرو يعملوا لينا حاجه😂 و جا علينا نزل المكرفون قلتا ليهو دا شنو الفلم الهندي الما بيعملوهو الهنود دا😂 قال لي سريع وافقي عشان والله اشيل المكرفون اسي و اغني و تعرفي الهندي ع اصولوا😂 قلتا ليهو جبتا القروش من وين قال لي انا م كنتا شغال ترينغ بس انا اشتغلتا😂❤
و الحمدلله بعد سنتين و كم شهر عرسنا عرس متواضع و ربنا م فرقنا من بعض🧡🌷
#المشتريكي_بي_الحلال_بتكوني_اختو_لحد_م_ربنا_يجمعكم_بي_بعض🌹

#منقول_بحب

احكي ليكم عنو..💙
هو م سمح بس راااجل بمعنى الكلمه والفعل💕بدايه علاقتنا كان صحبي شديييد ل درجه م ف زول كان مصدق اني صحبتو وبس😂اخلاقو كعبه واقل حاجه بعصب وممكن عادي يسب بس م حصل علا صوتو علي ولا حصل قال لي كلمه كعبه💕كان محترمني شديدد❤كان دايما بعاملني كأني بتو💙كل م يمشيي مكان بسالني اجيب ليك شنو من الحته الفلانيه ف كنت بقول ليهو سلامتك بس💙 ف تلقائيا كان بجيب معاهو حاجه ولمن يلاقيني بديني ليها💕كان مدلعني شدديد و م مخليني محتاجه ل حاجه وكنت شايله فكره الارتباط من راسي نهائياً لاني مكتفيه بيهو💙لمن ازعل منو كان دايماً بقول لي ف زول بزعل من ابوهو؟😭❤هو عارف انو موت ابوي كان مؤثر ف نفسياتي شديد لاني كنت المفضله عند ابوي ف حاول يكون لي الاب والسند دايما كان بحسسني انو هو ابوي وكل فتره وفتره بقول لي م تنسي انو انا ابوك واوعك تبكي وتقولي ابوي اتوفى ادعي ليهو ولو احتجتيي ل شي م تنسي انو ابوك التاني قاعد💕وبالجد قدر انو يكون لي السند والاب💕مش قلت ليكم راجل؟💙💙..

#منقول_بحب 🖤

ونحن طلبة لمّا نكون راجعين الحِلة والواحد مافي جيبو شي غير حق المواصلات كنّا في الموقف بنراقب العربية العليها الدور من بعيد لحدّي مانتأكّد إنّو مافيها مرا من الحِلّة حتّى نجي نركب لأنّو في قاموسنا عيب وعيب كبير جدًّا إنو لما تنزل تدفع لي نفسك بس وفي مرا بتعرفها راكبة معاك نفس العربية.

أمّي النعمة الله يدّيها العافية لحدّي اليوم لما تعمل ملاح ويعجبها عندها عبارة مشهورة بتقولها دايمًا
"والله ملاح يستاهل ليهو ضيوف"

أبوي وداعة الله يرحمو ويبرّد تربتو كان أيام الخريف
الشديد والوحل بيكون لافي في الحوش وراخي أضانو
"ها جنيات دا صوت عربية موحّلة الله يكرمنا فيها بي مقطوعين ينوموا معانا"

قبل ٥ سنوات أنا ومحمد أخوي وأخواتي حصل لينا حادث في شارع الخرطوم مدني جنب الطالباب
أول مانزلنا لقينا بتاع ركشة استلم البنات ودّاهم بيتهم، مشى صلح معانا العربية ولما رجعنا بيتهم أبدا ما أنسى الكرم الأكرمونا ليهو، يشهد الله ونحن طالعين أخواتو بيبكو مع أخواتي وهم بيودعوهم
وكأنّو معرفة سنين.

في رمضان كل خميس ونحن راجعين من الخرطوم
عادةً كنا بنصادف نفطر في الشارع، الصراحة كنت بستمتع جدًّا بالحاجة دي في بالي إنو الكريم دا مافي حاجة تكرمو بيها أفضل من إنك تشاركو زادو
، يشهد الله الواحد بيكون مخنوق بالعبرة وهو بيشاهد الجنيات المحزمين وقافلين الشارع بالعمم و "يا ناس وصلتو"،
الصواني البتطّاقش، الرجال الكبار البيخدّمو عليك وعينك ماتشوف إلّا النور "حرّم تشرب، طلّق تدبّل"..
الخير الفي قلوب الناس لمّا يفيض بي صورة زي دي
الصراحة شي فوق التحمُّل

ديل نحن ناس الجزيرة طيبين قلوبنا زي بيوتنا
ما عندها أبواب.
الكرم، الشجاعة، المروّة وفزعة الغير دي حاجات
رضعناها من أُماتنا وفطمونا عليها.
الشي الأصابنا في الحرب دا ابتلاء كبير وامتحان صعب جدًّا إلّا إننا واثقين تمامًا من فرج ربّنا وإن تأخّر
وواثقين تمامًا إنو الخير الفي نفوسنا وفي قلوبنا دا طوق نجاتنا،
بإذن الله حاترجع بلدنا آمنة مطمئنة وحانرجع نرخي أضانا للعربية الوحلانة في طرف الحلة، حاألقى لي مُلاح أمّي العاجبا ضيوف وحانرجع كل رمضان نقفل الشوارع بالعمم ونحلف بدل الطلاق طلاقين
"ولو ماجيتا من زي ديل وا مأساتي وا ذُلّي"

بإذن الله راجعين..
#منقول بحب 🩵