بتجوط عشان تترتب .. اخربي ي بلد على قدر م تحلمي تبقي احسن .. مصيرنا ومصيرك بيد القال (ان مع العسر يسرا) ح نبني بلدنا بصبرنا ونزينوا باخلاقنا ونسقفوا برضا ربنا علينا .. ح نرجع احسن وحنبني مكان كل سواد بياض ومكان كل ثقوب اشجار ومكان كل سنبله سبعه سنابل .. ح نعبر بتوكلنا على ربنا وننتصر ب الله اكبر التي لا زالت ترفع في المساجد وتنشر الطمأنينة في قلوبنا ذكرا تقول لنا الله موجود يرانا من حيث لا نراه ويسمعنا ويبتلينا ليرى الصابر فينا (افحسب الناس ان يقولوا آمنا وهم لا يفتنون ) ومثلما قال نبي النصر صلى الله عليه وسلم(ان الله لا يغير ما بقوم حتى يغيروا م بانفسهم )💙 كل نفس لها يد في كل البحصل معاها فتوبوا إليه قبل ان يحاسبنا بما فعل السفهاء منا .. واي زول يكبر كومو حق الصبر مصيرا تفرج ربنا يصلح الحال
#منقول

احمد صحبي مرتبط بوحدة سنة و 7 شهور .. و عندو صاحب دخل حياتو قبل سنة تقريبا و بيحكي لي انو قدر شنو واقف معاهو و اخو اخوان
بالصدفة قبل يومين اكتشف انهم اخوان 😬
بقى ما قادر يكلمو عشان اخوها بالرغم من انو صاحبو شديد لكن طبعا مستحيل ولد سوداني يتقبل فكرة ارتباط اختو و في نفس الوقت هو لا يزال طالب بكلية الطب في السنة الاخيرة و ما جاهز يجي يتقدم ليها
و ما قادر يواصل معاها من ورا صحبو الوقف معاهو اكتر من اخ
و ما قادر ينفصل عنها عشان دي حاجة ابعد من المستحيل بالنسبة ليهو
لينا يومين بنفكر صباح و مساء و ما لاقيين حل..و في النهاية بنختم تفكيرنا بجملة (نحن في كربٍ عظيم)

الليلة احمد فاجأني انو ح يتقدم ليها بالرغم من كل الحاصل
احمد ح يبيع عربيتو عشان يتقدم ليها و عشان يعمل مشروع يخليهو يجهز نفسو اسرع

احمد ح يعمل كدا عشان ما يخسر البنت البحبها و عشان ما يخسر الصاحب اللقاهو في كل وقت احتاجو فيهو

احمد ما خسر بت عشان صاحبو ولا خسر صاحبو عشان البنت .. احمد كسبهم الاتنين🤍
احمد ح يبيع عربيتو و يتمرمط في السخانة و المواصلات عشان يكون مع حبيبتو في اسرع وقت ممكن

احمد اثبت لي انو فعلا يلي بحب بيعمل اي شي عشان بقاء الحب..
احمد اثبت لي انو البدايات بتكون للجميع بينما الثبات للصادقين فقط
ممكن تكوني مع البتحبيو بس الحكاية محتاجة راجل و يا بخت الحباها راجل ❤
#منقول

طبعا حايكذبو عليك الجماعة ويقولو ليك لو أهتميت بيها حاتطلع ليك في راسك

طيب أنا داير اقول ليك حاجة وأعتبرها نصيحة من أخوك

أنت في كل الحالات الإهتمام فرض عليك وعليها💛💛

أخنقها بالاهتمام خلي الاهتمام محاصرها من كل الجهات💛💛

الإهتمام عُملة العلاقة والأوراق النقدية بتاعت العلاقة الإحترام💛💛

تديها إهتمام تديك حب إحترام ومودة ورحمة وحاجات كتيرة 💛💛

يعني شوف أنت أديتها حاجة واحدة شوف رجعت ليك قصادهم كم 💛💛

ونفس البقولو ليك ماتهتم بيها كتير بتطلع ليك في راسك ياهم نفس الناس الببكو بالليل في المكالمات ردي ماقادر اتنفس وماتسكتي وقولي بحبك وجربينى إحتمال أنفع معاك

ولما يجى الدور عليك يقولو ليك بتطلع ليك في راسك؟

ومالو لو طلعت في راسي طالعه ليها في مصحف؟

تطلع في راسي وتعمل البعجبها كمان

زعلانة؟ أرضيها 💛💛

تنكد علي؟ أموت في النكد حقها أنا 💛💛

زهجانه؟ أضحكها حتي لو ابقى ليها أرقوز
تبكي؟ أمسح دموعها بيدي وأطبطب عليها لحدي تهدا 💛💛

بتاعت تفاصيل؟ اي مالو تحكي لي تفاصيل يومها لي درجة التسالية اللي أكلتها وطلعت فاضية وجدعتها وشالت واحدة غيرها مستعد أسمعها وبكل دهشة أقول ليها معقول طلعت فاضية دي معجزة عديل سبحان الله 💛💛

ماهو شوف أنا داير أقول ليك كلام تاني

هي إختيارك يعني أنت أخترتها مابين كل البنات وقلت دي حلالك أو حاليآ هي زوجتك 💛💛

ماتخلي زول يحرشك عليها ويدخل ليك فكره إنها حاتطلع ليك في راسك عيش تفاصيلك خليها مابين كل الرجال تشوف انك انت الراجل الوحيد الفي الكون 💛💛

ماتسمع كلام زول ماتدي زول فرصه انو يدخل بينكم 💛💛


#منقول

_ من السُنة تركُ العتاب ..

_ كان رسول الله ﷺ كثير الإغضاء، يترفق بالناس ولا يعاتب إلا فى أمر الدين "
فخير الناس أعذرهم

_وتجنبوا حديث الغاضبين رأفة بحالهم ؛ إنما هم أسرى الشيطان في تلك اللحظة..
ولا تستفزوهم ليخرجوا أسوأ ما لديهم.. ثم تقولون هذا ما أنت عليه ؛ فلا تكونوا عوناً للشيطان على أخيكم .
فخير الناس اعذرهم للناس.

أربعة أحاديث من حفظها وحققها جمع أصول الأخلاق والآداب

الأول : قال الرسول صلى الله عليه وسلم : "من كان يؤمن بالله واليوم الآخر فليقل خيرا أو ليصمت"

الثاني : قال صلى الله عليه وسلم : "إن من حسن إسلام المرء تركه ما لا يعنيه"

الثالث : أن رجلا قال للنبي صلى الله عليه وسلم : أوصني قال "لا تغضب" و كررها مرارا "لا تغضب"

والرابع : قال صل الله عليه وسلم : " لا يؤمن أحدكم حتى يحب لأخيه ما يحب لنفسه"

.. ففي الأول *ضبط اللسان
.. وفي الثاني *ترك الفضول
.. وفي الثالث *ضبط النفس
.. وفي الرابع *سلامة القلب

والله أعلي وأعلم وصلّ الله وسلم وبارك على خير الورى ♥

#منقول

السلام عليكم ورحمة الله وبركاته ..♡..
سمعتو قبل كدا عن واحد بقولو ليهو "قتيل القرآن"!؟..
أحكي ليكم عنو؟
تدفعو كم؟

طيب احكي ليكم😹
كان في واحد اسمو فُضيل إبن العياض

- فُضيل ابن العياض دا كان حرامي وكان واقع ليهو في عشق جارية وفي يوم من الايام فات بالليل وتلب بالحيطة عشان يشوفها واثناء ماهو هو داير يتلب الحيطة سمع ليهو شيخ او حاج كبير في السن يقرا القران وسمعو يتلو...

("ألم يَأنِ للذينَ آمنَو أنْ تخَشع قُلوبُهُم لِذكرِ الله")

يبس في مكانو قعد يبكي ويقول
"قد آن قد آن"

ورجع إلى الله وتاب وأصبح من كبار العلماء والشيوخ
وكان في الوقت داك الخليفه هارون الرشيد حاكماً لجزيره العرب وبلاد الشام ومابثق في زول إلا في فضيل ابن العياض لكثره ورعه وزهده في الدنيا,

و هارون الرشيد كان بمشي لي بيت فُضيل عشان يقول ليهو يا فضيل ذكرني بالاخره ولمن يمشي هارون لي بيت فُضيل فُضيل يُطفئ اللمبة ويضارا منو وهو خليفه العرب يفتش ليهو لحدي يلقاهو
ولمن هارون الرشيد يلقي فُضيل؛ فُضيل بقول ليهو ; دعني لا أريد الدنيا
دعني لا أريد الدنيا..
وهارون يقول ليهو لا يا فُضيل فقط اريدك أن تذكرني بالاخره فـ يقوم بوعظه وينصحو لحدي يبكي هارون الرشيد بكاً شديد..

فُضيل ابن العياض كان عندو ولد اسمو "علي" و كان تقياً جداً

وكان فُضيل إماما للمسجد وقبل يجي يصلي بشوف ولدو في المسجد في ولا ماف اذا كان ولدو في بقرأ للمصلين اياآت الرحمه ولمن يصلي ولدو في مكان تاني بقرأ ليهم ايآت العذاب..

عارفين لي?

لانه"علي" ولدو كل مره يسمع فيها ايآت العذاب بقع مغشياً عليه من شده خوفه من الله تعالى , وفي يوم من الايام نسى فُضيل أن يتأكد من وجود ولدو خلفه،وقرأ للمصلين آيات العذاب

عارفين الحصل شنو?

وقع علي من بين المصلين لكن المره دي ما مغشيا عليه بل وقع "ميتا"..

#اوتار_الختام اي قلب هذا ؟ اي خوفا هذا نعم أنه علي بن فُضيل مات عندما سمع آيات العذاب
مات وهو يصلي
مات من خشيه الله
وسمي بعد هذا بـ "قتيل القرآن''

("ألم يَأنِ للذينَ آمنَو أنْ تخَشع قُلوبُهُم لِذكرِ الله").... ؟!🤍

#منقول

— عامُ كامل على حربك يا وطني، وما زلنا ننتظر عودتك!
وما زالت أنفسنا تحدثنا بيوم فراقك والروح تحن والذكريات ترن والقلب منفطر حزين،
ياليتنا نلقاك اليوم قبل غدٍ ونزف البشرى بنصرك ونحوز الدنيا بفوزك ونملئ الدنيا فرحاً فياليتنا نلقاك اليوم قبل غدٍ!

- عزيز أنت ياوطني رغم قساوة المحن! 🇸🇩💔
#القضية_المنسية
#السودان
#منقول

لم يتم التحرير الكامل لمصفاة الجيلي بعد ..
إستلام لعدد من المواقع المهمة بالقرب من المصفاة
والعمليات مستمرة قريباً سنحتفل جميعاً كما حدث بالإذاعة
نصر الله قوات الشعب المسلحه السودانيه 🇸🇩
#منقول

حدث في مطار دبي ✈️✈️

مواطن سوداني في مطار دبي عند التخليص الجمركي

تأخذ موظفة الجوزات جواز سفره كي تضع ختم الدخول عليه :

فنظرت إليه وهي تبتسم ...

وسألته: من تحب أكثر السودن أم الامارات ؟؟؟؟

فقال لها:
الفرق عندي بين السودان و ألإمارات
كالفرق بين الأم والزوجة ....

فالزوجة أختارها ..
أرغب بجمالها ..
أحبها .. أعشقها ..
لكن لا يمكن أن تنسيني أمي ..
الأم... لا أختارها ولكني أجد نفسي ملكها ..
لا أرتاح الا في أحضانها ..
ولا أبكي إلا على صدرها الحنون..

وأرجو الله ألا أموت إلا على ترابٍ تحت قدميها ..

فأغلقت جواز السفر ونظرت إليه باستغراب... وقالت:
نسمعُ عن ضيق العيش فيها...
فلماذا تحب السودان ؟

قال: تقصدين أمي؟

فابتسمت وقالت: لتكن أمك ...
فقال: قد لا تملك أمي ثمن الدواء ولا أجرة الطبيب.

لكن حنان أحضانها وهي تضمني...
ولهفة قلبها حين أكون بين يديها تشفيني ...
وترابها أغلى من كنوز الذهب والفضة .
قالت: صف لي السودان...

فقال: هي ليست بالشقراء الجميلة ،
لكنك ترتاحين اذا رأيت وجهها ...
ليست بذات العيون الزرقاء ...

لكنك تشعرين بالطمأنينة اذا نظرت اليها ..
بسمائها وزرقة ماءها
ثيابها بسيطة ، لكنها تحمل في ثناياها ....
الطيبة . والرحمة ..

لا تتزين بالذهب والفضة
لكن في عنقها عقداً من سنابل القمح والشعير
والنخل الباسق
تطعم به كل جائع ..

خربها الفاسدون ولكنها ما زالت تبتسم ..!!

السودان باقية للابد والفاسدون لمزبلة التاريخ مهما صمدوا....
السودان باقية طول الدهر
السوددان باقي قلعة للسودانيون وللمخلصين
السودان قبلة العشاق
أعادت إليه جواز السفر ...

وقالت: أرى السودان على التلفاز...
ولكني لا أرى ما وصفت لي ..!!

فقال لها: أنتي رأيتي السودان الذي على الخريطة ...
أما أنا فأتحدث عن السودان الذي يقع في جوف قلبي.ومقلة عيني وﻻأريد بدلا عنها أنا منها وإليها(( أمي السودان)) ...

إذا كنت سودانيا فاسمع ما يقال عنك !!! وإذا كنت محبا غيورا عليها فاسمع ما يقال عنها :
- قال الملك عبد العزيز: السودان لا تحتاج إلى رجال فرجالها أهل ثبات ..
- قال صدام حسين : في كل نقطة دمي سودانيه يولد مجاهد ..
- قال كيسنجر : لا يوجد .... و لم ..... ولن يوجد ... أشجع وأجد و أعند من رجال السودانيون..
- قال هتلر: أعطني جندياً سودانيااً وسلاحاً ألمانياً و سوف أجعل اوروبا تزحف على أناملها ...
- قال الحجاج يوماً عن أهل بلاد السودان : لايغرنك صبرهم ولا تستضعف قوتهم فهم إن قاموا لنصرة رجل ما تركوه إلا والتاج على رأسه، وإن قاموا على رجل ما تركوه إلا وقد قطعوا رأسه ... فانتصروا بهم فهم من خير أجناد الارض .... . واتقوا فيهم ثلاثاً ..
. 1- نسائهم فلا تقربوهم بسوء وإلا أكلوكم كما تأكل الأسود فرائسها ..
. 2 - أرضهم وإلا حاربتكم صخور جبالهم ..
. 3- دينهم وإلا أحرقوا عليكم دنياكم ...
- و قال المستشرق والفيلسوف الفرنسي رينان: لكل إنسان وطنان: وطنه الذي ينتمي إليه، و السودان
مهد الحضارات الأولي

هذا هو الشعب السوداني.
ارجو ارسالها لكل سوداني ولكل غيور عليه حتى لاييأس ،.،.
السودان الحبيب ✌👍👍

ارفعو رؤوسكم انتم سودانيون..
اول رسالة جميلة توصف السودان بابداع
🌹👍
اهداء الى امي الحبيبه السودان ❤🇸🇩🇸🇩 عن السوداني نحدثكم…
… ..اسعد الله مسائكم كم بكل خير……..
…… .…… .#منقول

المشكله طلعت عامه
في سؤال كده محيرني من فتره طويله وهو ليه أصحابنا والناس ال بنعرفهم بتتجاهل البوستات والصور ونجاحنا واي حاجه حلوه بنعملها واي انجاز شخصي كأن
هم م واخدين بالهم علينا عكس الناس ال م بنعرفها ال بتقول لينا كلام لطيف وتدعمنا وتدعي لينا ؟
#منقول
نفس السؤال البجي في بالي 💔😔

"ربنا يجعل نصيبنا مِن الحُب شخص شاريّنا،
وعايز روحنا قبل ملامحنا"

بيكبر في عيونّا الشخص اللي بيبقى قدر كلامُه ووعوده،
والكُل ما تخاف مِنه يطِمنك أكتر،
ويثبت ليك حُبه أكتر
ويحبك أكتر..

قعد تلاقينا قصص كتيرة لإنه إتنين عايزين بعض فرقتهم الظروف!
وبرضو كتير بنلاقي علاقات حُب لاقت النور وأسيادها إنتصروا بعد مرور أعوام كتيرة وحُبهم إتوّج بالحلال،
طيب إشمعنا ديلك ما قدرو وديل قدروا؟!

بعد القسمة طوالي بتحججو بالظروف،
وفي الحقيقة ممكن اتنين ظروفهم تكون أقسى بس هم مُصنددين،
فبحجم كمية الحُب بتجي المُعافرة،
وبجي اليوم البدق فيهُ الباب،
ويجي اليوم الحيجمعكم بيت واحد..

تعالو نتفق..
إنه البحبك حيكون شاريك ولو جاته مية فرصة حلوة مع غيرك، حيختار الشينة المعاك
وإنه الشاريك بيعرف كيف يقيف للظروف في وشها، ويحمي علاقتكم من الخدوش ويفوز بيك..

فمرة تانية..

" ربنا يجعل نصيبنا من الحُب أشخاص ما بنهون عليهم.
يشترو راحتنا وقُربنا وحُبنا،
لو خُفنا يطمنونا
ولو تعبنا يدفرونا
ولو يئسنا يدعمونا
أشخاص على قدر أحلامنا وآمالنا
آميين..❤️."


#منقول.

بعد قصص كتيرة كدة.. ح اقول..
- الحب مهم وما تستغنى عنه..
- ما تواصل في علاقة انتهت جواك..
- في أي علاقة.. أدي نفسك حقها وقيمتها واحترمها..
- التفاهم مهم زي الحب..
- ما مهم الزول يكون رهيب، مهم يكون رهيب ليك ومعاك..
- رأي أهلك مهم وأخده في الاعتبار..
- معايير الناس "غير أهلك" ليك ولزولك اكتبها في ورقه وأرميها البحر اذا انتوا مقتنعين ببعض..
- زواج الصالونات ما كعب زي ما نحن فاكرين..
- أشتغل على نفسك بالدرجة اللي تكسب معايير قبول اجتماعي كبيرة..
- المشاكل بتتحل بأنكم تقعدوا تحلوها ما بأنكم تتجاوزوها وخلاص..
- اتكلموا !
- أتمسك قدر قدرتك.. بس ما تتمسك وزولك قنع..
- خليك واقعي.. وأتفهم الرفض.. ومسبباته..
- غالباً الحقيقة ما بتتقال في لحظات كتيرة..
- خليك متقبل أنه زولك قد يكون ما قادر يكون صريح في بعض المراحل..
- خليك حصيف.. وافهم المعاني المدسوسة وراء الكلام..
- من حقك تقيّم الطرف التاني.. ومن حقّه يقيمك.. ومن حق كل واحد يحدد معاييره بتاعت التقييم ده..
- الاحترام الحقيقي لبعض والعميق مهم شديد..
- الالتزام الأخلاقي والديني مهم بس ما معناها تمشي تعرسي عشان هو إمام جامع أو تعرسها عشان حافظة القرآن.. عادي ممكن تكونوا ما مناسبين لي بعض..
- في حد أدنى من الخوف والحذر من رد فعل الطرف التاني مطلوبة وما حاجة كعبة..
- اختلاف افكاركم ما مشكلة.. بس منهجيتكم في النقاش والاستنتاج مهم تكون متقاربة..
- الزواج قسمة ونصيب.. بس محتاج سعي زي الشغل والوظيفة واحد..
- زي ما بتظبط الCV للتقديم لوظائف.. ظبط الCV العام بتاعك قبل الارتباط..
- الجانب المادي مهم.. عشان النظام العالمي فارض علينا كدة..
- الزواج ده مشروع حياة.. وأجيال جاية.. وبداية مجتمع.. أتريث.. بس ما تهمل الفكرة..
- ما تختار البحبك على حساب البتحبه.. أختار البتحبه وبحبك..
- زي ما بتفكر فيها ك زوجة كويسة.. فكر فيها ك أُم ..
- وصل ليها ولي اهلها إنك شخص مسؤول.. وأثبت كدة بسلوكك في حياتك وشغلك..
- ما أي شي بتحكي للناس.. الخصوصية مهمة شديد..
- ما تعرس عشان تعرس.. عرس عشان لقيت البستاهل تعرس عشانه..
- كل الفات ده نظرة شخصية وما قوانين ولا شيء ..
دمتم سالمين ❤️
#منقول.

بوست لازم تقراه🥺

أنا مهما أنسي أيام في حياتي مستحيل أنسي اليوم دا ..
قد تكون الصور ماسمحة وشعرهم مغبر والمكان غريب مابستاهل أصلا يصورو فيه صورة ، لكن الصور دي وراها قصة عظيمة ...

اتصلو علي عمر يوم 23 فبراير من الجامعة المقدمة ليها في ألمانيا إنو أنا مفروض أدخل معاينة في نفس اليوم وماقادرين يصلو لي لأنو تلفوني مابدخل هو كان في القضارف وأنا في سنار أيام قطعة الشبكة، قال ليهم صعبة اليوم ممكن تأجلوها ل بكرة ؟ وافقو ليه لبكرة العصر ... قفل الخط والساعة 3 عصر واتحرك علي السوق الشعبي طوالي ولأنو اي زول قاعد في السودان الفترة ديك بكون عارف يعني شنو تسافر من القضارف لسنار وقدر شنو الموضوع متعب وطويل وارتكازات وتفتيش وحظر تجوال .. إضطرا يبيت في الشارع ووصل تاني يوم الساعة 12 ضهر .
كان مشهد كإننا رجعنا بالزمن لما قبل الاتصالات والتلفونات ، تتفاجأ بالمسافر جا من غير سابق إنذار وتسألو من أخبار الناس بلهفة وشوق ، بعد انا جيت وسلمتا عليه طوالي قال لي هي قومي البسي احنا مسافرين. مسافرين وين ؟😦😦
قال لي اتصلو علي من جامعة في المانيا قالو انتي قدمتي وعندك معاينة
طيب متين المعاينة ؟
الليلة العصر
الليلة العصر 😦😦 لا ي عمر أكيد ما حنصل الساعة ماشة علي 1 حاليا ، مستحيل نصل..
قال لي انتي أعملي العليك واتوكلي علي رب العالمين انا من أمس مسافر وجاي عشان أكلمك ونرجع سوا تعملي المعاينة يلا أمشي استعجلي عشان نطلع..
أنا لمن ركبنا في العربية كنتا ملانة خوف بس ماعندي اي إحساس تاني غير الخوف وحاسة دا تهور مني وأنا بجازف بأخواني عشان موضوع في إحتمال ينجح وإحتمال لا ..
ومحمد كان ماش يوصلنا الموقف بس، بعد وصلنا الموقف فرضنا عليه يمشي معانا لأسباب فنية 😂😂😂 بترننق وتيشيرت البيت 🥺
الطريق كان ما آمن فيه قطاع طرق و إمكن أكبر نسبة خوف حسيت بيها في حياتي كانت في اليوم داك كل شوية بقول ليهم انا خايفة بطمنوني ماف شي ي بت ، وكل ما يوقفونا في إرتكاز انو الوقت إتأخر ما حتواصلو عمر بنزل وبحنسهم بإستماتة إنو إحنا لازم نصل القضارف اليوم وأنا بكون عايزة أقول ليه عمر خلاص ماتجادلهم كتير خلينا نبيت سلامتنا أهم من كل شي هو مصر انو لازم نصل اليوم ولازم تدخلي المعاينة ، هو واثق فيني وانا من أطراف شعري لحدي اصابع قدمي ملانة خوف
واصلنا لمن وصلنا المجرح وخلاص ماكان في أي طريقة ندخل القضارف وقفونا في الإرتكاز وحنبيت في الإستراحة للصباح حتي نواصل بس لحسن الحظ كان في مكان قريب من الإستراحة واصلاهو شبكة مشينا واتواصلت مع الجامعة ووافقو انو اعمل المعاينة بكرة الصباح ...
رجعنا الإستراحة لأول مرة في حياتي أبيت تحت صفحة السماء في الشارع ، بس كان علي يميني سرير عمر وعلي يساري سرير محمد وانا في النص ، كل شوية بقول ليهم أنا خايفة
بقولو لي زول نايم بين أخوانو يخاف من شنو ؟؟
فعلاً العندو أخوان يخاف من شنو
حرفيا عمر كان واثق فيني أكتر من نفسي بقول لي اها السفر متين بقول ليه عمر هي معاينة امكن مايشيلوني بقول لي لا انا واثق بشيلوك
انا بكتب في البوست وأنا في ألمانيا والذكريات دي ليها إحساس مختلف وعميق وحاسة بإمتنان مابعدو إمتنان.
حقيقي جيش المرء عائلته 🥺❤️
أنا عندي أخوان مافي منهم بالجد 🥺❤️ ربنا يحميكم ويحفظكم لينا ♥️♥️♥️

#منقول

مشيت البلد تميت فيها اسبوعين يوم كده جاي من النادي متأخر بس كانت القمرة بيييضه اها جيت ماري ب بيت جارنا شيخ كبير بعالج السحر والمس..
اثناء م انا ماشي اشوف ليك بت جاريه من بيت الشيخ وفي نسوان اتنين جاريات وراها عايزين يمسكوها، النسوان شبكو ليك فيني اقبض البت اقبض وانا م فاهم حاجه مفتكر البت دي شالها ابو الكباس ولا حاجه وقلت كدا وكتحت ليك بوراها البت تقول مركبة مكنة "موتر جي إن" مفحطة بكلو لمن انا استغربت هي جارية وانا لاحقها لحدي م وصلت حافة الترعة قبضتها من يدها والله يخوانا الامانة الإتلفتت علي وقالت لي فِككككنيي بصوت راجل انا اعصابي دي كلها باظت وشعر جلدي كلو قام، بقيت م شاعر بجسمي نهائي ولولا النسوان حصلوني ومسكوها معاي كان اتشليت عدييل..

المهم النسوان مسكوها ووصلوها للشيخ وانا لاحقهم من ورا منطر عيوني قدر القعونجة م فاهم اي شيء كلو بس عشان م يقولو الود ده م راجل وبتاع وصلوها للشيخ وانا كبرتها بيتنا للصباح م نمت تاني يوم طوالي شلت شنطتي والخرتوم جاك زوول.
#منقول 😭😂

وردتنا اخبار من احد الأصدقاء ان مدينة الهلالية شرق الجزيرة وتستباح من المليشيا قتل ونهب وتنكيل بكبار السن وحاليا المدينة محاصرة ومافي اي تواصل لانو نهبو منهم التلفونات وشبكات الاستارلينك ومافي اعلامي قاعد يتكلم عنها وهي الهلالية المدينة الوحيدة المانزحت في شرق الجزيرة بي سبب الحصار
حسبي الله ونعم الوكيل 💔
الهلالية تستباح الان
#الهلالية
#منقول

ونحن طلبة لمّا نكون راجعين الحِلة والواحد مافي جيبو شي غير حق المواصلات كنّا في الموقف بنراقب العربية العليها الدور من بعيد لحدّي مانتأكّد إنّو مافيها مرا من الحِلّة حتّى نجي نركب لأنّو في قاموسنا عيب وعيب كبير جدًّا إنو لما تنزل تدفع لي نفسك بس وفي مرا بتعرفها راكبة معاك نفس العربية.

أمّي النعمة الله يدّيها العافية لحدّي اليوم لما تعمل ملاح ويعجبها عندها عبارة مشهورة بتقولها دايمًا
"والله ملاح يستاهل ليهو ضيوف"

أبوي وداعة الله يرحمو ويبرّد تربتو كان أيام الخريف
الشديد والوحل بيكون لافي في الحوش وراخي أضانو
"ها جنيات دا صوت عربية موحّلة الله يكرمنا فيها بي مقطوعين ينوموا معانا"

قبل ٥ سنوات أنا ومحمد أخوي وأخواتي حصل لينا حادث في شارع الخرطوم مدني جنب الطالباب
أول مانزلنا لقينا بتاع ركشة استلم البنات ودّاهم بيتهم، مشى صلح معانا العربية ولما رجعنا بيتهم أبدا ما أنسى الكرم الأكرمونا ليهو، يشهد الله ونحن طالعين أخواتو بيبكو مع أخواتي وهم بيودعوهم
وكأنّو معرفة سنين.

في رمضان كل خميس ونحن راجعين من الخرطوم
عادةً كنا بنصادف نفطر في الشارع، الصراحة كنت بستمتع جدًّا بالحاجة دي في بالي إنو الكريم دا مافي حاجة تكرمو بيها أفضل من إنك تشاركو زادو
، يشهد الله الواحد بيكون مخنوق بالعبرة وهو بيشاهد الجنيات المحزمين وقافلين الشارع بالعمم و "يا ناس وصلتو"،
الصواني البتطّاقش، الرجال الكبار البيخدّمو عليك وعينك ماتشوف إلّا النور "حرّم تشرب، طلّق تدبّل"..
الخير الفي قلوب الناس لمّا يفيض بي صورة زي دي
الصراحة شي فوق التحمُّل

ديل نحن ناس الجزيرة طيبين قلوبنا زي بيوتنا
ما عندها أبواب.
الكرم، الشجاعة، المروّة وفزعة الغير دي حاجات
رضعناها من أُماتنا وفطمونا عليها.
الشي الأصابنا في الحرب دا ابتلاء كبير وامتحان صعب جدًّا إلّا إننا واثقين تمامًا من فرج ربّنا وإن تأخّر
وواثقين تمامًا إنو الخير الفي نفوسنا وفي قلوبنا دا طوق نجاتنا،
بإذن الله حاترجع بلدنا آمنة مطمئنة وحانرجع نرخي أضانا للعربية الوحلانة في طرف الحلة، حاألقى لي مُلاح أمّي العاجبا ضيوف وحانرجع كل رمضان نقفل الشوارع بالعمم ونحلف بدل الطلاق طلاقين
"ولو ماجيتا من زي ديل وا مأساتي وا ذُلّي"

بإذن الله راجعين..
#منقول بحب 🩵

حين كنت ترسلين لي صباحاً قائلة " صباح الخير .. انا استيقظت " كنت اقول لنفسي " وماذا يعني ؟"
حين كنتي ترسلين لي " افرم البصل الان " كنت اقول " وما همي بالبصل انا " .. حين كنتي ترسلين " ضفرت شعري ضفرتين " كنت اقول " يا لسخافتك"
حين ترسلين لي " اتحدث مع جارتي فاطمة عن مشاكلها مع زوجها سعيد " كنت اقول " ما شأني وحياة جارتك التافهة "
الآن يا حبيبتي وبعد عامين كاملين من فقدانك .. لا زلت اتفقد بريد رسائلي ابحث عن تفاصيل يومك فيه
اشعر بالحيرة حول شعرك .. هل لا زلتي تضفرينه او اصبحت تتركينه مسترسلا على كتفيك ؟ اود ان اعرف متى استيقظت اليوم ؟ ينتابني الفضول حول فاطمة وسعيد، ترى هل تصالحا ؟
اعاقب نفسي واسألها كل دقيقة " ترى ماذا تفعل هي الآن ؟"
تفاصيلك تلك التي طالما استسخفتها .. تستخف هي بي الان وتجعل مني اضحوكة

#التفاصيل 💙
#منقول

البت لمن ترفض شاب ما معناها إنو كعب أو ما عندو قروش الناس ترتقي ياجماعة ..
إترفض عمر بن الخطاب وهو أمير المؤمنين ومن المبشرين بالجنة.

انت ممكن تكون عريس جاهز ومحترم ومركزك كويس جداً وعندك قروش، لكن برضو دا ما شرط كافي انو البنت توافق عليك..

سيدنا عمر بن الخطاب رضي الله عنه أمير المؤمنين مشى للسيده عائشه رضي الله عنها وطلب منها تتوسط ليهو عند ام كلثوم بنت ابي بكر الصديق عشان يتزوجها، تخيلو رد ام كلثوم كان شنو !!

الخليفه بنفسه طالب ايديها للزواج وكمان الوسيط منو؟! ام المؤمنين وزوجة رسول الله صلى الله عليه وسلم السيده عائشه..
رفضت وقالت مالي وعمر !! إنه خشن العيش، شديد علي النساء .. أنا أريد رجلاً حنوناً يصبُ عليا من الحُب صبا♥️🌸

عليك الله شوف الفهم دا؟
ما قالت دا أمير المؤمنين وعندو وما عندو، وانا حـ ألقى زيو وين ودا معروف بين الناس.
لا رفضتو لأنها شافت انو غير مناسب ليها، وبعد كدا إتزوجت سيدنا طلحه بن عبيد الله بإرادتها وأحبتهُ حُباً شديدا وأحبها وكان على الرغم من كونه رجل حرب وقتال إلا انه كان رقيقاً معها ويغازلها دائماً، إتخيلوا الكلام دا من 1400 سنه.

انا كتبت الكلام دا ليه؟!
عشان اوضح انو عمرها القروش او المركز او المكانه الاجتماعيه م كانوا شرط او سعاده لرابط بين اتنين، بل بالعكس اختاري الهين اللين البتحسي إنك تقدري تكملي معاهُ باقي عمرك وإنتِ مطمنه وحاسه بالأمان، بغض النظر عن ظروفو شنو.. 💜💜❤❤❤
#منقول